رواية ناديه الفصل الثامن عشر 18 بقلم انين الليل

سراج 

من رحت المياده وسمعت اعترافاتها وكلامها وشلون ما نكرت علاقتها وحبها السلدار تعحبت 

من تصرفها ما معقوله وحده لان تحب واحد واتزوجت واتدللت هيج تسوي وبعدين من گالت انو

 الي شايلته هو ابن سلدار ورغم وگفتها امام القاضي واخذ اعترافاتها وامام اهلها لكن اعرف بالفلوس 

تندار القضيه ويصير المجرم برئ والبرئ يعيش طول عمره مقهور لان حقه انغبن وانباع

انا محبتي العباس الله يرحمه وعمتي خلاني احقد عليها واحقد اكثر من سمعت 

كلام افراح وعارها العمتي وقررت اتحرك لان اعرف باهلها واهل سلدار اكيد ما راحوا يسكتون

ويتحركون وتندار القضيه صحيح قبل كان الخوف مسيطر 

والدوله تقريبا حافظه القانون مو مثل هسه اكثر شي الاحزاب مسيطره والانفلات الامني بكل 

مكان لكن قبل كان اذا موجود رفيق درجته عاليه بالحزب يگدر يخربط كل الامور يعني اذا اهل 

مياده عدهم واحد بالحزب من السهوله ان يطلع مياده لذلك قررت اتحرك

الي عرفته انو محامي مياده وسلدار قدم تمييز لكن التمييز انرفض واتاكد الحكم 

بعدين محامي مياده قدم التماس انها حامل وكانت تعاني من انفصام شخصيه وقدم مستندات لكن المحكمه 

رفضت هذا الشي واتاكد الحكم عليها بعد ان تنجب الطفل يبقى شهر ومن ورا الشهر ياخذونه ويسلمونه الى اهله

وطبعا صار لازم اتحرك عن طريق المحامي واقدم اعتراف مياده واطلب تحليل نسب قبل تنفيذ الحكم بسلدار 

وانا صرت اجيب الموافقه وارد الكتاب واروح وارجع حتى مرتين رحت البغداد من اجل هذا الشي 

الي فهمته من المحامي انو حتى سلدار يبقى الى ان يولد الطفل حتى ياخذون منه ومن الطفل العينه 

هو اكيد كان ال DNA لكن بسبب الحصار كانت العينات قليله

هذا الشي الي اسوي محد يدري بي وحتى طلبت تحديد نسب للبنات عن طريق المحامي 

الي لفت نظري انو المحامي يگلي هادي بس يريد يعرف همه انعدمو لو لا اي شي ثاني ما يسأل 

عنه وانا فهمته للمحامي ما يگول على تحركاتي واجيت العمتي قبل ان تخابرني بشهر واخذت البنات 

وسويت الهن تحليل

نسب واخذوا عينه من سلدار على اعتبار هو المتهم لكن طلعت النتيجه سلبيه وانو سلدار ما يمت الهن باي صله 

واخذت التقرير وضميته يمي

وعرفنا بان مياده جابت ولد واهنا اكدنا ع المحامي الطلب للمحكمه تحديد نسب وافقت المحكمه وعرفت بان سلدار

 طالب يشوف الطفل وجابو اله وداز على اخو وگايله

الولد ابنه ولازم يتسجل باسمه ويربي

بعد ولادة الطفل واخذ العينه البغداد عرفت اهل مياده تحركو رادو يغيرون النتيجه الصالح عباس 

لكن انا وعن طريق خالي واخو زوجته ما خلينه هذا الشي يصير وطلعت النتيجه انه الطفل الي انولد هو 

ابن سلدار

انا شفت الطفل من اخذوا منه العينه الصراحه انقهرت وانا اشوف طفل برئ ما اله اي ذنب سوى ام خاينه

 واب حقير

شفته يمكن بوكتها بچيت وانا اتخايل مقدار العذاب الي راح يشوفه بحياته وكمية العار والكلام الي يسمعه 

الطفل اول ايام رغم ما يبين لكن هذا سبحان الله كان غايه بالجمال يشبه مياده ولون شعره وعيونه على سلدار 

بقن التحاليل اسبوعين وطلعت النتيجه وراها بتلث ايام تم تنفيذ الحكم بسلدار

وره الشهر عرفنا بان الطفل تم تسليمه الى عمه اخو والده

كنت بالدائره وعمتي اتصلت وگالت شرطي جاب تبليغ حضور ناديه للمركز

العصر اجيت البيت عمتي ولگيتها بالبيت وناديه وحنين گاعدات ع التلفزيون الي كان قناتين لكن احنه 

اهل البصره كان يسحب عدنا تلفزيون الكويت والي كانت برامجه بذاك الوكت حلوه ومميزه

سلمت على عمتي ورحت اخذت ملابس ودخلت للحمام سبحت ولبست تراك واجيت يمها هي گالت 

=اخليلك اكل 

::لا عمه بس صبيلي چاي 

چان يمها القوري مال الچاي واستكانين هي صبتلي وسالتها ::وين التبليغ 

راحت للغرفه وطلعته وانا قريته رحت ع التلفون واتصلت برقم واستفسرت منه رجعت يمها وگتلها

::عمه تدرين ليش طالبيين ناديه 

هي باوعتلي وگالت =لا والله ليش 

::لان امها طالبه تشوفها قبل ما ينفذون بيها حكم الاعدام

عمتي طاح الاستكان من ايدها ورجفت باوعتلي وگالت 

=شنو شتگول

::مثل ما سمعتي انا بهاي الايام اتحركت لان اعرف اهلها موسطين ناس بالحزب ودافعين هواي 

=چا سراج مو الحكم قطعي 

::اي عمه بس المحامي راد يقدم التماس بان يخلون الطفل عدها وها الايام الدوله جاي تقدم تنازلات هواي بسبب 

تهديد امريكا 

هسه عمه شتگولين تره اذا ما توافقون احتمال يقدمون التماس ثاني وثالث بس حتى اياخرون الحكم 

وهذا مو بصالحكم الدوله يوميه الها راي

عمتي خابرت هادي وكرم وگالتلهم =تجون بسرعه (ما حچت الهم على الاستدعاء )

ربع ساعه واجه هادي وكرم عمتي گالتلهم همه رفضوا گالو // لا ما نخلي ناديه ترووح 

هادي //شنو:هاي سراج شلون تقبل نخليها تروح شنو مياده خاتون هسه اشتغل عدها هرمون الامومه 

جاوبته :...بس تبقى امها 

- - ياام هاي الي كتلت ابوهن

::والله انا رايي خليها تروح حتى من تكبر ما تگوول حرموني من امي او همه چانو السبب ما اشوفها لان 

اي شي مهما انظم اول وتالي يطلع وينعرف وثاني شي الدوله هواي اتقدم تنازلات يعني ما عدهم مانع من 

الاعدام للمؤبد ومن المؤبد انوب عفو بس اهل المكتول يتنازلون وراح تجي ناس وشيوخ وانتم بكيفكم 

 والرأي الاول والاخير العمتي

هادي حك شعره //ها يمه شو ساكته شتگولين 

عمتي جاوبت ==كلام سراج ابمحله خلي الام تشوف بتها هي ميته ميته 

هادي //شتحچين يمه ناسيه امها وحده ساقطه 

=لا ما ناسيه بس صحيح باچر من تكبر ناديه تگول ليش ما خليتوني اشوفها ويمكن تنطيها العذر خلوها تروح

 ولا تسوولنه لعبه ويه المحاميين وياجلون وما تدري شيصير ما يصير

هادي نفخ //ومنو يوديها انا بالنسبه الي لحد يگلي اخذها وروح 

كرم //انا اخذها 

سراج ::لا مانعرف منو نلگى هناك لو شنو يصير انا اخذها حتى اگدر اجيبها ابحدها تشوفها وتطلع 

هادي //هذا هو انت اخذها وشوف بت النعال شتريد منها 

عمتي سألت هادي //اگلك ما طول الولد موجودين روحو على ابو المحل وادفع باقي الفلوس حتى نشوف

شلون نشغله اناجره 

هادي ارتبك وجاوب بنتر //يممه يافلوس الي ادفعهن

=فلوس المحل الي اشترا اخووك وبقى يطلبه الرجال ادفعهن من فلوس الفصل 

هادي //اي مي خالف بس ابو عيسى گال لاتتصرف بالفلوس هسه لان اهل مياده ما ساكتين يرحون منا 

ويردون منا يردون يطلعونها بريئه 

سراج ::شنو بريئه بكيفهم 

هادي //اي هو هيج گلي هسه خلي تنعدم وتتسكر قضيتها عود ويصير خيير

باوعلي كرم وبنفس الوكت عمتي باوعتلي نعرف بهادي يچذب بس سكتنا لان عمتي ما الها خلك خصوصا بعد 

ان عرفت انو مياده جابت والولد اخذه اخو سلداربامر من المحكمه لان طلع تحليل النسب انه هو ابو 

راح هادي وكرم اتاخر شويه وهو يگلي

اگلك سراج هذا هادي شبي 

::شبي كرم 

مو تشوفه چنه شام ايده على فلوس الفصل 

عمتي ردت = هادي ومرته يبيعون امهم وابوهم على الفلوس

كرم //خاله هذا حق ايتام 

عمتي = اسكت كرم ذاك اليوم اجه هو ومرته علينه وحنين لازمه لعابتها واجت اسيل تاخذها وهاي دفعتها 

لو تشوف شسوو بيها 

كرم //. شسوى

= وگفلي وگلي 

والله لو ما انتي لازمتني عليهن اله اوديهن الحليم اگله ربي بنات اختك بس ااااخ كله منج 

ومن طلع بقى ياسر بالمحل گاعد واجه وگلي 

بيبي ديري بالج على بنات عمي لان امي تگل الابوي اشتكي واطعن بنسبهن وگول مثل ما الولد من سلدار

 هذني ما ادري منين جابتهن ما تشوفوني ساكته وما احچي

سراج ::لا عمه احچي وبزودج انا هادي كاشفه من اول يووم 

عمتي باستغراب = شلون 

انا اگل..

وقطع حديثنا رنة التلفون رد كرم 

الو منو 

هلا بيك ابو عيسى 

توه طلع خير 

اي هاي يمي هسه

اجه كرم وگلها// خاله هذا ابو عيسى الشيخ راد هادي متصل علي بالبيت وگايليله اهنا ومن عرف ما 

موجود گلي صيح الخالتك 

  اخذت عمتي التلفون وردت = الو ( انا فتحت الحاكيه ) 

اشلونج خويه ام عباس 

=هلا بيك الله يسلمك 

اشلون صحتج 

=الحمد لله بخير

ام عباس والله ما ادري شگلج 

=خير خويه 

هذا شيخ عشيرة الولد سلدار وهم خابرني شيخ عشيرة اهل البت 

=اي خويه عليمن 

هذا هادي مودي ناس على اهل سلدار يگلهم اريد الذهب والفلوس لان هنه مالات اخوي واحنا ام عباس

 لا عدنا ورقه تثبت الذهب باسم عباس ولا عدنا شي يثبت الفلوس راجعات اله 

وهذوله خابرو اهل مياده يگولون الذهب والفلوس مالات بتنا وهادي لا يتقرب عليهن وصارت ناس تجر

 طوول وناس تجر عرض ليش انتي ما تدرين

عمتي جاوبت =خويه ما ادري بهذا الحچي والله شنو انا بحال الفلوس ليش هو الفصل شنو شفنا منه كله عد هادي 

ابو عيسى //وهسه شلون ام عباس 

=خويه انت احچي ويا مو انت الشيخ هو هم محترگ گلبه على حلال اخو 

زين ام عباس انا خابرتج عبالي عندج علم 

=لا والله ابو عيسى كل علم ما عندي 

زين انا اشوف هادي واحلها من يمي فيمان الله 

=الله وياك

سدت عمتي التلفون وباوعتلي وهي تهز براسها وشفايفها يرجفن وصارت تگول

=ليش يمه عباس ليش هيج بت ابليس لعبت براسك وخليت بناتك مدگه ليش يمه 

الله لا يطيج يا مياده ولا يغفرلج على السويتي هجمتي بيوت ويتمتي بنات ما الهن ذنب اله انتي امهم

اتقربت منها وبست راسها وگتلها ::عمه گولي ياالله انتي مؤمنه ومبتليه الله كريم 

مسحت دموعها بشيلتها وگالت =سمعت يمه كرم وانت سراج سمعتوا اخو عباس يريد الذهب والله عبالي 

من جابو سلدار اهنا بكشف الدلاله يذبحه 

كرم //خاله شيذبحه اسكتي الله يخليج لو بيده چان خلاج تتنازلين عنه وياخذ فصل زايد

باوعتلي وگالت =شردت تگول يمه 

سراج ::ها عمه والله نسيت 

=من سولفتلك على ياسر والي يريد يسوي هادي 

::اطمني عمه قبله سويت تحليل نسب تذكرين من اخذتج للمختبر واخذوا عينه منج 

اي يمه وبنفس الوكت اخذو عينه من البنات بس انا ما حچيت 

كرم //تحچي صدك سراج

::اي وداعتك وطلعت النتيجه البنات بنات عباس وعمتي بيبيتهن وهادي عمهن 

عمتي بچت وگالت = ياعمه ياسراج بلاياك شچان صار بينه 

كرم //افه ياخالتي وانا وين رحت 

=انت الخير والبركه ابو مرتضى بس سراج ... (واختنكت بعبرتها )

كرم //والله والنعم منه تعب هوايه وطلع حك عباس لو ما هو وداعتج محد بحاله 

::شلقصه ياجماعه تره انا مو غريب عباس اخوي وهسه ياالله امشينه كرم خلي نروح نجيب عشا وباچر 

الصبح اخذ ناديه الامها 

كرم //اگلك سراج اروح وياك باچر

::اي امشي وياي بس تره ماراح يدخلونك 

مي خالف اروح وانتظر بره

ورحت انا وكرم وجبنا عشا ولبن ودخلنه للمطبخ خدرنا چاي ردنا شويه نغير جو الكآبه واتعشينا وراح كرم 

وگال يجي الصبح ناخذ ناديه ثاني يوم گعدت ولگيت عمتي مسويه الريوك ومسبحه ناديه وبدلت الها وانا 

صبيت الريوك واتريكنا 

بعدها اجه كرم ورحنا بسيارتي رحنا وانا متخوف على ناديه واسأل بنفسي

::ياترى شتريد من عدها مياده

قبل ما نوصل چان اكو محل نزلت انا وناديه وكرم وگتلها شنو تردين اشتري 

هي باوعتلي وگالت ......اريد عصير وعلج 

اخذتلها عصير وعلج وگتلها ::من نرجع اخذج للسوك انا وعمو كرم نفتر وشنو يعجبج نشتريلج 

خلت السبابه بحلگها وگالت ......امم طوبه وحبل

::صار حبيبتي ندوش تدرين وين رايحين 

هزت راسها ......اي عمو سمعتك تگل البيبي تريد توديني الامي 

::وانتي تردين ترحيلها 

هزت راسها بالنفي ......لا عمو تحرگني 

::لا بابا ما تحرگج هي تريد تشوفج لان راح تسافر وبعد ما ترجع

  باوعتلي ... تسافر وين تسافر ويه سلدار 

غمضت عيوني وجريت نفس وگتلها ::ما اعرف راح تسافر ويامن ما اعرف 

...تروح للجنه

::يمكن 

...ويه بابا 

::ما ادري 

...لا مو ويه بابا لان هي قتلته وخلت بيبي تبچي الله يخليها بالنار 

جريت نفس ولزمتني من ايدي ... عمو وانا هم شريره والله راح يخليني بالنار

فتحت عيوني ع الاخر سالتها ::منووگلج هذا الحچي 

...عمار وهديل گلولي امج راح يشنقوها بحبل (وتاشر بايدها على ركبتها )لان قتلت ابوج وانتي

خليتيها تنشنق انتي شريره 

نفخت وگتلها ::لا بابا انت مو شريره انتي سبعه تتذكرين لمن اجيتي وگدام جدو القاضي اشرتي 

على سلدار وامج وگلتي همه قتلو بابا انتي بطله ولان تحبين بابا همه يضوجون منج

باوعتلي ...يعني انا مو شريره ولا ساحره 

كرم //ساحره شنو اوصل واطيح حظهم 

   باوعت بعتب وحچت... عمو كرم حتى بتك خلوها ما تلعب وياي يگلولها هاي شريره مثل امها 

كرم //بس اوصل هاي غفران اله اموتها 

...لا عمو اضربها بس لاتموتها ويشنقوك 

لزمتها وحاچيتها ::ندوش ترحين تشوفين امج لو لا انتي بكيفج

اشرت باصبعها ...وانت تروح وياي 

::اي 

...وما تخليها تحرگني لو تذبحني بالسچين 

::اي 

...عمو كرم انت تكتل الشرطي الي يريد يموتني 

كرم رد // انعل والدي اكتله بس ما اموته 

...زين اروح بس عمو سراج انت تبقى وياي مو 

::اي حبيبتي 

...وانا هم احبك هلگد 

كرم //وانا 

...انت هم هلكد بس مو بگد عمو سراج

كرم بابتسامه خبيثه //وهادي 

شاورت كرم ......ما احبه لان دووم يصيح على بيبي ويگلها كله منج وبيبي تبقى تبچي عمو كرم

مو تگله تره يكتلني 

كرم حضنها وگال //لا بابا ما اگله

شفت دمعه بعيون كرم على هاي الطفله البريئه الي شافت شي ما يتحمله اي احد وانا عرفت من عمتي

تبقى الليل كله وهي تتفزز مره تگول لا تكتله ومره ماما لاتنطينه السچينه 

مره ماما ما اگول بس لاتخلين الشرطي يذبح حنين

وتبقى الوره الفجر تنام شويه لكن الظهر ما تقاوم تنام 

رحنا بالسياره وكرم گال //شنو من جهال الله يستر مفتحين باللبن 

جاوبته ::كرم بس لاتزعل هاي كله تدريس بت عمتكم 

كرم //والله صحيح مسمومه ما اعرف شتريد بس العتب مو عليها على الي جانيها 

سراج ::هادي اتعس منها ما سمعت ناديه عود تشاورك تگلك يجي يصيح على بيبي

كرم //. هيه بس. هاي والطمع يرجف رجف ع الفلس وهسه يطالب بالذهب اذا ما طلع ماخذ الفصلين فلا اتسمى. كرم 

باوعتله وگلت ::فعلا ما خذ الفصلين بس ما احچي گدام عمتي تنقهر وخاف يصير بيها شي وهذني وين يرحن 

كرم //لا حول ولا قوة الا باالله العلي العظيم واحد ياخذ حق يتيم صدك سراج ما يربح 

تدري سراج افكر لو ماانت وشغلك چان ضاع دم عباس 

::لا كرم حتى لو ما شغلي ما اخلي دم عباس يضيع عباس مو بس ابن عمتي عباس اخوي وصاحبي 

وصدگني ما چنت اعوف دمه لو يبقى يوم من عمري

وصلنه ودخلنه كرم بقى يم استعلامات الدائره وانا اخذت ناديه من ايدها وطلبت مقابله المدير بعد ان 

دزيتله هويتي 

هو گال خلي يتفضل واتلگاني واتسالمنا وطلعت الورقه گلي 

- - استاذ سراج انا على اطلاع بالقضيه وخصوصا هي هالاسبوع راح يتنفذ بيها الحكم طبعا ابيناتنا 

لان اعرف انت بنفس الجهاز وتمر عليكم هاي الاحكام

فهمته انو ما اريد ناديه تروح للزنزانه هو الرجل اتفهم الموقف وگال امشي وياي ورحنا انا لازم ناديه من ايدها 

وصلنا الغرفه بيها مكتب وطخم قنفات وره المكتب ولد برتبة ملازم من شاف المدير اخذ تحيه المدير گله 

- - ملازم حسن رايدين مكتبك 

تدلل سيدي 

- - وهاك هذا الاسم يجي لهنا 

صار سيدي

كعدت ناديه ع القنفه والرجل گال للحرس يجيبولها ماي وعصير وجابولنه احنه چاي وصرنا نتحدث 

بمواضيع تخص الاوضاع وتهديدات امريكا ربع ساعه واجه الضابط اخذ تحيه وگله 

- - سيدي المتهمه موجوده 

هو باوعلي وگف// گلي راح اخليكم ابحدكم

اتشكرت منه هو طلع وهي دخلت مدنگه ما شفت مياده الصلفه لا هالمره شفت بقايا من انسانه مهزومه 

ومكسوره ويمكن متندمه چانت لابسه دشداشه سوده ولافه شال اسود عيونها غايرات وهي ضعفانه رغم 

بياض وجهها لكن سبحان الله اي جمال ما متواجد بي ناديه چانت گاعده بصفي من شافتها حضنتني 

وانا اسمع رجفت جسمها عبالك سعفه

حسيت بمقدار الخوف الي تعاني هاي الطفله من خلال دگات گلبها الي بذاك الوكت كأنها مكينه تفتر خليت 

ايدي على راسها وانا اطمنها واشاورها

::اشش حبيبتي لاتخافين انا يمج 

باوعت المياده گتلها 

::شردتي من ناديه لا تگولين غريزة الامومه صحت فجأه عندج 

هي باوعتلي ورجفن شفايفها وگالت //مو كافي وصلتني الحبل المشنقه ما شفى غليلك 

جاوبتها ::ولا راح يشفى خنتي اخوي وحملتي سوفاح وقتلتي انتي وصاحبج وتردين تنجيين بفعلتج ليش وباي حق 

گالت بصوت مخنوك //كان ممكن تخفف الحكم عني

::لا انتي جبتي الحكم النفسج مو انتي اندعيتي گدام القاضي انو قتلتي عباس ومحد ساعدج وانتي هددتي سلدار 

حتى يشيله بالسياره ردتي تطلعين سلدار برئ وانتي لان حامل ما راح يعدموج والولد ابن عباس حاله حال البنات 

يورث مو 

هي من سمعت كلامي نزلت دموعها اتقربت من عدها گتلها 

::مياده لا تگولين تبچيين ع البنات انا الي اعرفج 

باوعتلي وگالت //اريد ابقى ويه بتي ابحدنا

درت على ناديه وگتلها ::ندوش انا راح اطلع اوگف بالباب وانتي ابقي يم ماما شوفيها شتريد منج 

هي لازمه بيه ...عمو لا لاتعوفني ارووح وياك 

:::بابا ما اعوفج اهنا تعاي خلي اراويج 

هي لازمه ايدي ولايذه بكتري طلعت الحرس شافني وگف انا گتلها 

::شوفي ندوش راح اگعد اهنا انتي روحي اگعدي يم امج اسمعي كلامي لاتزعليني منج 

هي باوعتلي ...بس بقي الباب مفتوح 

::صار راح ارده وانتي ياالله روحي حتى نلحك نرجع للسوك واشتريلج حبل وطوبه

شفتها دخلت والخوف بوجهه رديت الباب قليل وبقيت اسمع كلام مياده وتصرفها ويه ناديه 

مياده //ها ناديه تخافيين مني 

هي ما جاوبت 

مياده //ليش تخافيين تعاي مو انا امج لو نسيتيني لو كرهوج بيه گلولج كتلت ابوج

ناديه بقت ساكته اتقربت مياده الها وهي تحچي وياها 

- - ولج ناديه تدرين اكره حتى اسمج تدرين شنو سويتي بيه حتى ابني ما شبعت منه اخذو من عندي لو 

ما انتي چان هسه گاعده بالبيت وانتن وياي بدل ما راح تتيتمن من الام والاب

سمعت شهگة ناديه ردت مياده //تبچيين ليش عليه بعد هوااي رااح تبچيين انا اموت بس انتي من تكبرين 

يوميه تتمنيين الموت اذا انا كتلت ابوج مره فانتي كتلتي ابوج وامج واختج واخوج وكتلتي نفسج الف مره 

تدرين ليش احچي لان ما راح تبقيين طفله راح تكبرين وتشوفين محد راح يحبج ولا واحد يقبل يتزوجج 

لا انتي ولا اختج لان يگولون امج كتلت ابوج وعشكت براسه واي واحد راح يگول ما اخذها لان تطلع 

مثل امها هسه عرفتي انتي شسويتي من تسجلين بالمدرسه گومي للمعلمه من تسالج شنو يشتغل ابوج كليلها

 ابوي شرطي وامي كتلته وانا شهدت على امي بالمحكمه وامي عدموها 

شوفي هاج شوفي امج شنو سويتي بيها هاج ظلي طوول عمرج اتذكري منظر امج

سمعت صرخة ناديه ما اتحملت دخلت وشفت منظر اقل ما اسمي بشع شفت مياده بيدها الشال وطالع شعرها

 لكن الي شفته انو مياده حالقيين شعرها وهاي الي يتنفذ بيهم الحكم يحلقون شعرهم هي من شافتني خلت الشال

 على راسها وانا اجيت شلت ناديه وگتلها:: بابا لاتبچيين حبيبتي اسكتي 

وباوعت المياده وهزيت راسي وگتلها 

::انتي ما تخافين من الله لج هاي بنتج 

مياده باستهزاء//اي بنتي الي وصلتني الحبل المشنقه

جاوبتها بعصبيه ::وطبج طووب مو هي وصلتج خيانتج وچذبج هنه وصلنج عبالي من شفتج حزينه 

عبالي متندمه على فعلتج لكن انتي خاينه والخيانه بدمج 

مياده باوعتلي وگالت //اي متندمه ما سويت اثنين اشياء 

اولهن من شفت سلدار ما بقيت عد اهلي وطلبت الطلاك 

جاوبتها باستهزاء ::والثاني 

الثاني ما خليت سلدار يكتل ناديه لان شفتها تباوعلي من انطيته السچين

اتفاجأت بكلامها لكن لزمت نفسي ::شعجب لو كايلتله 

هزت راسها // اي لو گايلتله چان كتلها وشمرها بالسياره ويه ابوها ومحد شك بيه لان ابوها ماخذها ويا 

::يعني شفتيها وما گلتيله 

اي عرفت بس اگله يكتلها 

::مياده عليمن حزنانه لان راح تنعدمين لو عليمن 

مياده //لا مو لان راح انعدم انا من يوم الي عرفت بسلدار انعدم خلص كرهت كل شي اتمنى اليوم يعدموني

 حتى انام بصفه انا حزينه على ابني

(اهنا صارت تبچي بعبره )ابني الي ما اعرف شنو مصيره وشلون راح يعيش 

جاوبتها ::لعد ما فكرتي بمصير ذني المسكينات وشلون يعيشن بزمن محد يرحم بي 

احتقرتها اكثر واكثر صحت على الشرطي وگتله ::اخذها 

من طلعت باوعتلي وگالت //ناديه (واشرت عليه )حتى هذا الي شايلج هسه ويگلج بابا وانتي حاضنته وتگليله

 عمو يجي يوم من الايام يتخلى عنج لان انتي خاينه مثل امج واتذكري من تكبرين محد يحبج ولا يريدج راح 

تعيشين منبوذه وهذا الشي هو الي يفرحني لان بلحظه تتمنين لو ما شاهده عليه راح تتندمين من الي راح تشوفينه

انا بوكتها ردت اخنگها لكن كل همي بناديه الي بس تشهك ما اعرف خوف ما اعرف من الكلام الي سمعته 

  لو من منظر امها 

  اخذومياده وانا شلت ناديه ورحت وانا اشاور بيها 

:...حبيبتي ابنيتي لا تبچيين هسه نروح نشتري مو 

هي ما جاوبتني طلعت لگيت كرم منتظرني بالباب طلعنا وهو بعيونه تساؤل انا عضيتله شفتي وهزيت راسي 

يعني لا تسأل

انطيت الكرم سويج السياره وخليت ناديه بحضني حسيت بيها ثگل راسها ونامت لكن فجأه فزت وصارت تتقيأ

خليت ايدي على وجهها شفتها غاديه نار گلت الكرم خلي ناخذها للمستشفى وطلعت قطعة قماش عندي مسحت 

ملابسي ونزل كرم اشترى ماي غسلت وجهها واخذناها للطبيب الي ضربها ابره وسجل الها علاج وگال اذا تبقى 

مصخنه وحرارتها مرتفعه لازم مستشفى

رجعتها للبيت وبالطريق رجعت نامت وصلنه الظهر فهمت كرم اذا يشوف هادي لا يگله تخربطت تلگتنا 

 عمتي وانا شايل ناديه سالتني شبيها جاوبتها ما بيها شي نعست ونامت وانا دخلت للحمام سبحت ولبست 

تراك وگلت العمتي صبينه غدا 

صبتنا وگعدنا اكلنه واحنا ساكتين الصدك محد اشتهى ياكل لكن كلنه جبرنه نفسنا على الاكل

شالت عمتي المواعين وكرم گال اروح ما قبل يشرب چاي عمتي جابتلي چاي بكوب وسالتني 

=عمه شصار شرادت من ناديه 

::عمه ما رادت شي رادت تشوفها 

=سراج انت ابني واعرفك اكثر من روحي شكو 

اهنا ناديه گعدت وهي تصرخ ...لا ماما ان ما عليه لا تموتيني 

فزت عمتي من مكانها وراحت يمها وهي تگلها =اسم الله بيبي شبيج 

خلتها عمتي بحضنها وحست بحرارتها وگالت =سراج البت گابه ناار

::اي عمه من رجعنه تقيأت واخذتها للمستشفى ضربوها ابره وگال الطبيب اذا بقت تتقيأ لازم ارجعها 

ورحت جبت ماي وطلبت من عمتي قطعة قماش هي راحت وجابتلي عمتي القماش لفيته سويته كمادات 

خفت حرارتها ورجعت نامت انا اتمددت يمها وعمتي همه سكتت لان شافتني ما الي خلك احچي بين الغافي 

والبعدني سمعت صوت ناديه مبحوح وهي تبچي وتكول 

ماما لاتگصيين شعري لا ماما ما اريد ابقى گرعه عفيه ماما

اخذتها بحضني وانا اگلها 

::لا تخافين انا يمج اسكتي بابا 

لكن حرارتها زادت ورجعتها للطبيب هالمره اخذتها الاخصائي اطفال كتبلها علاج ووسجل الها ابر وطلب 

من المضمد الويا يضربها ابرتين هو قررهن واخذت الابر ونامت رجعنا انا وعمتي ويانه ناديه وحنين 

من وصلنه خليت ناديه بالبيت ورحت جبت عشا وخليته گدام عمتي وحنين عمتي باوعتلي وگالت 

ها سراج ما تريد تحچي وتگلي شبيها

/////////