رواية هشاشة قلب الفصل السابع عشر 17 بقلم العباديه

كما حواء أشتهت الثمرة المحرّمة...

كُنتَ أنتَ ثمرتي التي أشتهيها إشتهاءاً مضاعفاً ولو أخرجتني من الجنة !!

~~~~~~~~~~~~~~~~~~~~~~~~~~

ثُرىٰ ...

توني اريد اطلب أكل .. وسمعت صوت وراي خلاني جامده .

- السلامُ عليكم !!

ألتفتت وياريتني ماملتفته .. يبوو يبوو 

شفته شاب طويل .. وجسمه مربوع وعضلات صدره بارزه .. لحيه وشوارب وملامح طاغيه شعره عالي ومسفطه بترتيب .. اللبس احدث شي .. البنطرون الكُحلي والقميص الاسود وكاف الردان بأزرار القميص بارز إيده ومبينه دمارات ايده كلهه والساعه ضايفه جماليه .. صوته هادئ ومتزن .. عيونه لون جوزي فاتح .

ظليت صافنه منين نزل هذا الحوري ؟

هيَ خزره وحده بس حفظته كله .

دنگت راسي ع الطاوله ورديت السلام بهمس كعد ع الطاوله ويباوعلي مبتسم .. ياا شبيه هذا شو اخذ ميانه ماليش كعد هنا غير طاولتنه !

كتله بنتر :-

- ها خويه شو كعدت هنا؟ يمكن متيه انتَ

ضحك بهدوء وجلّه صوته كال :-

- اني أركان 

يااا .. يباوع بيه ومبتسم وشأسويلك اركان كرفان اني شكو .

فهم نضرتي كال :-

- اني أقاربج فلان ابن فلان اخو فلان 

يعدد بالأسماء واني ولااتذكر .. بس اسوي روحي افكر وهوَ مستمر يعدد . ختمتهه وياه بكلمة 

- مااتذكرك

لطش اريده يطلع بالمفيد ماكو.

كال بهدوء وكلساع ينصي خجلان مدري يستحرم يباوع :-

- ههه بس اني اتذكرج واتذكر تفاصيلج حتّه حتّه وكبرانه وحليانه كلما تكبرين تحلوين

عود خجلت دنگت العب بالمداليه.

استغربت شنو هاي لغز خوب مو لغز .

- هـٰذي گعدتنه بعلم اهلج .. كلهم يعرفون يعني ممسوين شي خطأ ف لتخافين واسماعيل يعرف بالموضوع وفاتحته وهوَ الي رتبلي لقاء بس علمود احجي وياج وتشوفيني وتتعرفين عليه

ومنو كال اني خايفه هه ادري بأسماعيل يثق بيه ثقه عميه عباله اهلي من الناس الشكوكيه هسه غير يفضني ويكمل .

- ها اي

- اي المهم اني من زمان عيني عليج وصورتج مخزنه ببالي قبل لااسافر من العراق. ومن شفت حساب اسماعيل عبالك الخيط اليوصلج ماتتصورين فرحتي ف خطبتج من اسماعيل وهوَ موافق واهلج هم موافقين بقيتي بس انتِ اريد اخذ موافقتج

- شنو عود اتزوج؟؟

- اي اكيد

انتفضت بحزم 

- ياااااااء .. لااااا خويه لااااا

الولد توتر وشبطت عروگه .. عصب لان اني مطفيه وهوَ منطلق بالحجي ابتسم بغضب ويخفي النار البداخله .

كال بهدوء ومبتسم جذب :-

- مداخذ منج جواب اني انطيج مهله تفكرين وترجعيلي الخبر بإيد اسماعيل

- لااااا عمي لاااا مااريد مااتزوج

- اذا على كليتج ف تكملين هنا بإيران احسن دراسات اسويلج

- لاااااااء خويه مااريد مااريد

خزرني بغضب واني نصيت هيَ عوزهه بس يخزرني شو هذا ماخذ راحته كلش . 

عباله يخوفني هه هوَ اني ابو الرزايل مااخاف منه..

يييحح لا لا جذب وابو فاضل اظل ارجف من يخزرني .

كام وكف نزل قميصه ع البنطرون وابتسم بوجهي بهدوء وعيونه تقره ملامح غضب .

- اني اخذ الجواب من اسماعيل واتمنى بشاره متتصورين شكد افرح لان محتاج زوجه تسندني بالغربه وانتِ مناسبه الي لان معجب بيج

انطيته على مايه كتله :-

- وعود اتزوج بإيران ؟؟

- اي 

- يااااااء بويه واهلي وين اكدر افاركهم

- نزورهم واكو مواقع تواصل

درت وجهي سكتت شبيه مخبله افارگ اهلي . ظليت ساكته اريده يروح وهوَ حس وراح من طلع لاگه اسماعيل سلم عليه.

شويه واجو كلهم رجعو .. باوعتلهم بغضب وتخوصرتلهم .

- مابقيتو بعد مابقيتو

اسماعيل.. ها تفاهمتو؟؟

- ماتوقعتهه منك كل الناس اتوقعهه منهه الإ انتَ

عصب وفتح عيونه نتر :-

- شكو شششسسسوالج 

- ظل يلغي يلغي يلغي جا شسوه يعني

- على كيفج اهدي وسولفيلي بالتفصيل

- يعني انتَ مافكرت بيه اني اكدر اعيش بإيران؟؟ هوَ يوم اذا امي ماتحجي وياي وتنصحني ماانام مو الا اكدر اعيش بإيران بعيد عنكم ومااشوفكم غير اموووت

- ثريا تره خوش قسمه والولد اقاربنه وحباب واعرف اخلاقه وهوَ صغير چنه سويه وهسه هو جاي يدرس طب اخر سنه هاي وراح يتعين خوش قسمه والولد ماقاصر جمال شفتيه خوب

مروه همست... يمه غير معت وذبت وتسرسحت من شفته

نهى.. يااا هاي مروه انتِ الثگيله

مروه.. اگلهه تسرسحت تگلي هاي انتِ

نهى.. اشش ولج لايسمعج اسماعيل يسويج تفصيخ وعلي

مروه..حلو حلو حيل حتى جماله مو فاهي مثل ذوله النلاگيهم هنا مبين عراقي مملوووح 

نهى.. مررروه شويه ثگل تره هوَ ماخاطبج

مروه.. ادري ادري بس تره احلى من ماهر

نهى.. خل تسمعج ثُرىٰ لحتى تسويج وصلتين وحده بالشمال ووحده بالجنوب

مروه.. ثُرىٰ شكو بالنص؟ اني واتغزل بخطباءهه بيهه شي قابل

نهى.. ياااا .. خطباءهه النوب ههههه خرب يومج امشي خل نسمع اختج شمصخمه وي الولد

رجعنا سولفتلنه ثُرىٰ شمسويه بالولد مخبلته الا شويه وعلي ههه .

شويه واتصلت بيه موج استغربت شتريد !

رديت واجاني صوتهه تررجف وتبجي 

موج.. نهى نهى لحكيلي راح اموت من الخوف والله شسوووي كوليلي شسووي

- شكو شبيج

- ماهر صاير عصبي گلب البيت گلاب فوك

روسنه وديصرخ على ماما وهسه ماما بالمستشفى تخربطت خاف تموت نهى والله اموت وراهه

- اشش لاتفاولين ع المره شبيج .. وشبيه هذا اخوج شصاير 

- مااعرف بس دخل للبيت يعيط على ماما ويگولهه كله من وراج انتِ ورطتيني وهيَ هم صرخت عليه وملخت روحهه وتخربطت رأساً

- عززا خطيه 

- شأسوي فهميني

- ابقي بغرفتج لاتطلعين خاف يذب حرگة امه بيج بس روحي توضي واقري قرآن وكرري الآيه {فَإِنَّ مَعَ آلْعُسرِ يُسْراً} هسه شويه وتنحل المشكله

- اي رايحه بلكي تنحل المشكله والله اخاف من يعصب ماهر

- ماكو شي ان شاء الله 

- الله يسمع منج

غلقته منهه وخفت شكو شصاير وهيج معصب .. معقوله عرف بالخطوبه .. لا لا شلقضيه صفر وطفر شسالفه .

ثُرىٰ رافضه الولد رفض قطعي واحنه نقنع وماكو .. ادري بسوالفهه متأمله بماهر ماتمل منه .. النوب راح تروح عليهه قسمه زينه ترتاح بيهه بس هيَ قافله بعد .

كعدنه كلنه نقنع بيهه 

مروه.. لج بيبنيله انتِ مامهتمه وراح تكملين حياتج طبيعي وتتزوجين

ثُرىٰ.. وين اكدر 

تقوى.. كدرن الاضعف منج

نهى.. شمتوقعه مثلاً؟؟ يحبج؟؟يخطبج؟؟ يتزوجج؟؟

- اني حالياً مامستعده للزواج خلوني براحتي

مروه.. خايبه غبره الصاك راح تفوتينه عليج يكلج ذايب بيج من زمان اخذي اليحبج مو التحبيه 

- خلوني افكر

تقوى.. خلوهه تفكر يعني اكو أمل ولو صغير

- اي اكو يمكن اقتنع منا لباجر الله كريم

مر اسبوع وثُرىٰ مغلسه الظاهر جانت تريد تسكتنه.. اسماعيل يباوعلهه بعيونه يريدهه تحجي وهيَ سكته يلفته .. ذابتهه ع الصامت .. رجعنا للعراق والولد بقه منتظر ماكو خبر .

بلشنه دوام الكليات وداومنه والخبر مارجعله رغم كلساع يخابر الولد بس اسماعيل مامنطيه كلمه كاله تفكر وذاك يصبر بنفسه وراضي بس كون الاميره ديانا توافق .

طيلة الفتره واحنه بإيران وليد حاول يصالحني بس اني قفلت والله متجاهلني صار اشهر توه تذكر شنو .

خليهه بعد فد نوب لما اجيب مااحتاجه نساوه وخلصتهه بسلام . بس شنو فتتت اعصابه تفتت خليته يلوب ليل ونهار ويتمنى رضاي واني ابد ولا طخيت ولا تنازلت حتى بكلمه ماحجيت وياه .. لمسه ماخليته يلمسني .. شكد حاول يلمس بطني ومن يتحرك الطفل يفرفح يريد يجيسه واني مااخليه وعلى عناده اصرخ واضحك بصوت عالي وهوَ يتحرگن .

لما عاط بيه :-

- كافي عاد زهگتيني ابنننني افهميهه ابننننيي اريد المسه مليييتت

- لا والله هسه تذكرت عندك ابن وين جنت عنه صارلك شهوور

- اهووووووو والله حتكفريني بالشياطين لج بابا بس احط ايدي على بطنج وهاي هيه قابل شرايد منج اني

- ماكو لاتحط ايدك ولااحط ايدي راح اجيب وانتَ ماتدري مخلصهه وي الصيدلانيه 

- انعل ابو الصيدلانيه يابو حتى العيشه هاي 

رگع الباب قوي وطلع من السويت كله .

دروح توك جايني تتذكر شنو . النوب صاير خلگه بطول النمله كلمه وحده مايتحمل .

لليل وهوَ ماكو .. اخفت اكثر لايروح يشوفله وحده تعوضه وهوَ يكيف اكيد لان صارله اشهر طويله محروم .. ظليت اروح وارجع متوتره .

اتصلت عليه مايجاوب .. ظليت اتصل واتصل وكلساع ادزله رساله .

احر شي رد عليه بصوت ثكككيل

- الوو

- الوو وليد وين انتَ

- ليش شتردييين

- وليد شارب شنو؟؟

- شنو ليش تخربطين انتِ

- اشو صوتك ثكيل !!

- ماشارب وولااشرب اني . لتتهميني علمود تسويني كلش دايح وابن شوارع وشرااابببب

- اني شوكت كلت هيج 

- كافي كافي احجي شتريدين وفضيييني

- روح مااحجي وياك احسن يالخلگك بخشمك

- اهوووو انتظريني دقيقه واني يمج

سديته منه محتاره .. شويه ودخل مايباوع بوجهي وعاكد حواجبه معصب .

وليد.. شبيج المن مخابرتني

هدأت نبرتي لان ماعندي حجه ليش اتصلت قابل اگله اغار لو اموت مااسويهه .

كتله :-

- علمودك ااا اريد انام واخاف وحدي

رفع راسه باوعني بعتب ونصه جر حسره وظل يحرك برجله .

كعد وخله راسه بين ايديه وشكله تعبان حييل

وليد.. نهى ارحميني اني تعبت حيل جنت منطيج فتره ترتاحين وسويتيني هاملج واني يوميه اخابر اسماعيل اسأله عنج ويوميه التقي بيه علمودج 

ظليت ساكته باوعت بيه وركزت بملامحه

- ليش اني بعيده عنك؟؟ مو جنت تتصل يوميه وبعدهه گطعت

- ردتج ترتاحين مني وماتفكرين بيه بلكي تراجعين تفكيرج حتى ارجعج

- تره انتَ ماحاولت ترجعني حتى ارجع

- اي اني منتظرج تخابريني وتكوليلي رجعني

- لو اموت مااسويهه ولو اسويهه جان ماطلعت بالأصل اني مو بلا كرامه 

- ومنو كال انتِ بلا كرامه انتِ مرتي وام ابني واليمسج بحجايه افرك حلگه

- وام ماهر؟؟

- كتلج روحي لغرفتج اريد اخذ حقج بس انتِ ضيعتيه برعونيتج يعني هيَ بيبيتي واني احترمهه وتعرفين علاقاتنه كله احترام وحدود محد يتجاوزهه ردت احجي وياهه واخليهه تبوس راسج بس انتِ اخخخخ انتِ .. لعبتي لعب بلسانج 

سكتت 

كال :-

- اني اعتذر منج وهذا راسج ابوسه ومعليج بحجي أُمي .

- مو هيَ غلطت عليه وحچايتهه مستني وفوگ هذا تگوللي ساحرتك شعرفني بهالسوالف اني. شوكت شايفتني داخله سحاره

رفع راسه مبتسم .. غمض بهدوء ورجه راسه على كتفي . همس

- صدك انتِ ساحرتني 

فزيت 

- عزززااا 

ضحك وأردف

- ساحرتني بعيونج وبتحديد شفايفج وببطنج الكبرانه خبلتني وخلتني افقد عقلي قطعه مني بداخلج مخليتني مجنون بتفاصيلج طول هالأشهر ملازم كنتورج وصورج 

تلمس بطني ودنگ باسهه بهدوء 

- خل نرجع مثل قبل انسي هاي المشكله وانسي الكلام كله تعبت ببعدج باعي وجهي شصاير بيه حتى انسليت لااكله بيهه خير لانومه بيهه خير لاكعده بيهه خير البيت يصرخ بلياج حتى ماابات بيه اكضي الليل كله بالصيدليه لو بالحديقه بس كون ماادخل للغرفه وماالكاج اكعد ع الطاوله اريد اكل من اشوفج ماكو تلعب نفسي من الاكل كله اريد اشوف شكد اتحمل بس بعد لهنا وفاض صبري 

سكتت لان كسر خاطري شكله متغير جذرياً صاير عظم.. اخ من كلبي من طاح حظه وحظي وين راح كلامي مال ماارجعله واندمه.

رفع راسه صفن بعيوني وباسني على جفني غمضت هادئه وصوت انفاسه المتسارعه تتضارب بمسامعي . كلساع يبلع ريقه ذايب .. عيونه مغمضه ووجهه مرتاح والابتسامه شاقه ثغره . لهفته واشتياقه عليه كتل روحه .

ظل يطبع بوساته على أنحاء وجهي .. نفسه يرجف وعيونه ذابله .. سحبني لحضنه عصرني حيل اني اضحك ولازمه بطني وهوَ تضايق من بطني لان مانعته من حضني 

وليد.. شوكت تطلع وننتقم من امك

- ياا هههه خل لايطلع احسن اذا هيج

كرصني من خدي بخفة إيده وضحك

- اريد اطلع حيف ذنك الاشهر بيج

تقرب مني حيل وأنفاسه لفحت بوجهي خلتني ارجف وعبالك اول مره يلمسني . لهفته خبلتني

طبع بوسه هادئه على شفتي خلتني أسكر بيه وبلمساته وو...

(تفضلو بره)

ثُرىٰ_ كلهم يلحون عليه وافقي وافقي واني عقلي مشوش عقلي بإبو الرزايل رافض أي شخص غيره .. يع وبعد مايباوعلي بنظراته ومواقفه اموت غير لا لا مااقبل .

ظل يتردد كلامهن بإذني , شمتأمله يخطبج .

هم صدگ قابل يخطبني النوب افوت عليه قسمه زينه وهوَ كلشي ماكو .

ظليت محتاره اوفق لو لا .

تذكرت موقف القبوط ورجع گلبي لدگاته ورجفته وحقدت عليه .

حسمت الأمر وقررت اوافق وخلاص بعد إلمن متعبه نفسي اني هم مليت منه بلكي من انخطب وابتعد عنه انساه وماافكر بيه . والماتشوفه العين تنساه الگلوب . 

باجر اول يوم بالكليه المرحله الثالثه .. متأكده من نفسي ناجحه لان ابو الرزايل وياي وياي خله كل الحل مالتي صح .

طلعت اشتريت ملابس جدد والتوبه بعد إذا لبست شي من اخواتي .

نهى رجعت وي وليد لبيتهه .. بعد ما إجه لااسماعيل وتسامح منه واخذهه .. بس ام ماهر مااعتذرت منهه لان بالمستشفى جلطه مدري شنو . بس كلشي مابيهه مثل الحصان اصحى مني ومن عشيرتي .

شعليه بيهه بس مبينه خبيثه .. رغم شكلهه وستايلهه مال مريه حبابه مؤدبه .

وجهه دائري ونوراني .. بشرتهه بيضه على صفار .. عيونهه عسلي وحواجبهه ثخان .. جسمهه حلو مال مره ثلاثينه ولا عبالك ابنهه ابو الرزايل بطول التيل .. ماخذنه حاصل فاصل طول بعرض .

والنوب كلما اشوفهه مخرخشه بالذهب تخرخش عبالك ماشايفين ذهب وتستعرض بيه خفه ويهج .

بالليل ونشر ابو الرزايل منشور للطلاب الناجحين والراسبين .. الناجحين يهنئهم والراسبين يعزيهم ههههاي .. علقت ع المنشور وكتبت 

- يلا عدت المرحله على خير وصرنا بالثالثه .

رد على تعليقي بالعام

- من يگول؟؟

عزززززاا بس لا مرسبني غير انتحر .. ركضت للخاص راسلته لان كلشي اتوقع منه 

- استاذ عليك ابو فاضل صدك راسبه اني 

شاف الرساله وماجاوب ..أيا حقير والله ينگط سسسم .. ظليت اتحرگن .. شلون بيه اذا راسبه اعلگ روحي بالمروحه احسللي .

دزيت 

- الوووووووووووووو

شافهه ورد

- اكو بعد اطول من هاي الواو ؟؟

- اي طبعاً اكو 

- ههههه 

- استاذ صدك راسبه

هم شافهه ومارد .. كتبت

- ماترد ابنل ابنل والله عليمن شايف روحك ومعلگ خشمك بالسما عبالك ملك والله حتى الملك مو هيج دكعد راحه هوَ انتَ كلك ابن سميييره ام كرش

كتبتهه يلا شويه ارتاحيت فرغت البداخلي ..

بس همزين مارسلتهه .

لو راسلتهه شرط يعلگني من مناخري .

حذفتهه واحس براحه .. وظليت منتظرته يرد .

انتظرت شكد ماكو رد

رسلتله

- شلقضيه استاذ هيَ كلمه وحده لو اي لو لا تره كليمه وحيده ماتكلفك شي

كام يلعب بأعصابي .. دز

- اي 

- شنو اي؟؟ غير افتهم

- غير انتِ گلتي لو اي لو لا واني اكلج اي 

- اي شنو اي ؟؟ هسه اني شفتهمت من هاي الـ(اي)

- مشكلتج بعد

هذا يريد يلعب بأعصابي واني على عناده نهيت المراسله 

- ها شكراً استاذ اترخص اني

- العفو تدللين

حقير ولا عبالك اني ثُرىٰ بمقامي المحمود جاي اراسله .

عفته وطلعت من الماسنجر كله . طلعت انظف بالصاله والموبايل يمي ع الشحن .. اكنس واسمعلك صوت رنة الرساله .. ركضت بسرعه ع الموبايل لان محد يراسلني غيره ع الماسنجر .

دخلت للرساله كاتبلي

- يلا مااكسر بخاطرج وولا اخليج تنتظرين انتِ .......

رأساً رسلتله واعصابي مفتته

- اي شنو؟؟

- .....

- شنو هاي النقاط؟؟

مايرد.. وابو فاضل خبلني ظليت اركع برجليه بالكاع من الحركه .. اخ لو يمي شسوي بيك الا افگس عينك الثانيه .. من عمت عيني مافگستهن اثنينهن بوقتهه .

رحت للمعلومات ومقرره احظره .. نذذذل والله نذذذل فتتت اعصابي تفتتتتت.. خل اردهه إله من احظره هم يتفتتتتت

اول ماردت ارگعه بحظر دزلي

- مبرروك ناجحه 

يممه طرت من الفرح خفه ويهك تكولهه من البدايه المن هالمطمطه .

ظليت اكمز واضحك .. وحتى اردهه إله كتله :-

- الله يبارك بيك .. طبعاً ناجحه ادري بروحي سواءً گلتلي او لا !

خليته يتشعوط . دز 

- لعد ليش راسلتيني وبقيتي تلحين؟؟

- اني مالحيت تره انتَ كلتلي 

- اه؟؟

- اي والله

- ها تمام .. بيج خير وتدللين اني صوجي اكول خطيه تظل قلقانه

- لا استاذ ماقلقانه عادي اصلاً حتى لو رسبت اعيد السنه اصلاً ونسه

رسللي علامات تعجُب هوووواي

- !!!!!!!!!!!!

ضحكت عليه مبين تشعوط

رجع دز

- هه إذا كتلج خبر بعد عاتبيني

انطيته على مايه واني اصلاً استهزأ

- ياا لا لا كلشي ولا الاخبار 

- لا.. خلي السنه تفيدج

دروح شلون اخبار صارلك ساعه تفتت بيه

رسلتله 

- هههههه

بعد مارسل أي شي ولااني رسلت . متقلصه ضحكته صايره (هه) جانت (ههه) المره الجايه تصير بس (ه) هاء وحده كافي هم أنعم الله .

داومت اول يوم بالكليه .. لبست ملابسي الجديدات وفرحانه بيهن عبالك طفل بيوم العيد .. ظليت افتر بيهن وخبصتهم .. طلع اسماعيل هم مبدل ومتشيك .. تريكنا وطلعنه .

بالشارع سألته 

- اكلك سمعو وين صرتو انتَ وفدك؟

التفت عليه خزرني بمعنى ماعليج وولا تسألين .. يمه صاير هم يخزر . سكتت ودنگت ..

السالفه ظلت تگرص بگلبي مااتحمل .. رجعت سألته

- تره اني ثريا حبيبة گلبك ماتكلي اه هيج صارت

- ثريا مااحب احجي بعروض العالم اسكتي احسن

- اهووو عروضيش غير بنت خالتي

خزرني ونتر بيه

- ثرررررياا

- ها ها ها 

- ماجاي اصيحج اني جاي احذرج كلمه مااسمع يلا سدي الموضوع

- جا والخطوبه مو نريد نركص 

وسع عيونه وأشر على شفته يحجي ويرص على أسنانه لان بالشارع نمشي ويهمس همس بعصبيه

- انتِ ماتفهمين؟؟ احجي كردي انكليزي اجنبي اسرائيلي ماتفهميين جاي اكول اسكتتتي

- اي سكتت سكتتت

قلّبت عيوني لان نتر بيه وهوَ مايسويهه وياي .. ردت احرگ گلبه همست بصوت ماينسمع

- تنلام فدك من تكول معقد

رأساً ألتفت فاك عينه كلهه .. وكف بصفي كلش ولزم إيدي 

- شنو شنو شكالت شسمهه

ظليت امتمت ومرتبكه حتى اسمهه مالفظه !

- هاا ماكالت شي ماااكاللتت

- بسيطه ثريااا نرجع وعندي حجي وياج اثاري تگصن بيه انتِ والبرنسيسه واني ماادري 

- والله هيَ مو اني 

- اشش امشي يلا امشي 

وصلني للكليه وراح معصب .. عمت عيني حرگت أعصابه إلمن حجيت اني اخ من لساني شيلزمه الريّل .

دخلت للكليه والطلاب مگلوبه گلاب لان عام دراسي جديد وكلهه مجتمعه .. وبلشت سوالف البنات مال التبوس .. على غفله گبت عيطه ووراهه حضنه وتمطگ البوس يوصل للشارع وشلونج وشخبارج وحياتي وروحي .. غير يسطرني سطر.

واني اتخبل من سالفة التبوس وتعاي سلمي عليهن .. غلست مالي خلك .

دخلنا المحاضره الاولى .. ظلينه كاعدين ومنتظرين يجينه استاذ . 

شويه ودخل طالب يركض 

- اجه اجه اجه 

كلهم صاحو 

- منووو

- ابو الگوجه 

هوَ كال هيج لو الطلاب كلهه ماتت ضحك .. هذا عدنه الطالب يحششش للاخير .. يفطس ضحك .

اني اريد اضحك بس كوه بالعه ضحكتي .. ردت انفضح .

صاحو بيه اصدقائه

- ولك منو اجه

- دكتور ماهر 

كلهه القاعه صاحت

- ااااوووووووه

كال اليحشش :-

- ولكم السنه هم دور ثاني لاإله إلا الله 

- لك اكعددد لايدخل

كلهه گعدت وصار الجو هدددوء لان بلشت خطواته يوصل يم القاعه .

هذا لاطش بينه مايعوفنه استغفر الله .

دخل مغندب كالعاده .. والحواجب معگوده . 

راد ياخذنه محاضره وكاله هذا الطالب

- دكتور شلقضيه تره اول يوم هذا كل سنه تاخذنه محاضره ونعديهه بس السنه مانعديهه

كلنه إلتفتنه عليه منتظرين الرحمه على روحه .

هوَ خزره حيل وأشرله بحواجبه رفعهن لفوك ونزلهن عود اسكت .. وذاك كعد وسكت بس يباوعله بحقد لان فشله . وگف يمه ورفع اصبعه .. نتر بيه 

- عيوونك لاتخووزرر

صديقه كاله

- دكتور شلقضيه الولد جان يتشاقه هههه 

ويباوع لااصدقائه عود اضحكو لموله ضحكه لموله .

ظلينه نضحك بس كون مايحط الولد براسه ويرسبه .. عاف العالم كلهه وخزرني لان اضحك .

يااا شبيه هذا اليوم .. جايني مغندب ووجهه مايگصه السيف .. شبيك ابنل ابنل .

دنگت وسكتت امري لاالله هيَ مال لمّ.

مبين اليوم عصبي .. رفعت عيني باوعتله مبتسمه وفاتحه عيوني بنظره حلوه وحواجبي رافعتهن .. عود اريد اشوفه يهدأ من اباوعله لو لا .

باوعلي متفاجئ ظل يرمش بعيونه بهدوء .. عكد حاجبه وإبتسم لاإبتسامتي . 

دنگ چرخ حذائه بالكاع وضحك . رجع رفع راسه باوعلي يبتسم ووجهه مرتاح .. اني دنگت بعد مارفعت راسي

ظل يضحك وحط إيده على ظهر الطالب نفسيته وكالله :-

- يلا لخاطرك اليوم مراح اخذكم محاضره بعد شتريد

هوَ خطيه ضحك وگالله :-

- اي من اول مره وصير هيج هههه

- ها بدينه

- سكتنه عمي سكتنه

ظلوا يضحكون

وياه وهوَ انطلق واني شي داخلي فرح من هالموقف.. 

دائماً الشباب عدهم ميانه وي الدكاتره .

كالوله :-

- دكتور انتَ ليش لازگ بينه من المرحله الاولى لهسه

ضحك ورفع نظره عليه باوعلي مبتسم ورجع نظره ع الطلاب كاللهم :-

- وراكم وراكم مااعوفكم لما تتخرجون

- يعني قصدك هم نطلع دور ثاني مو نريد ننجح دور اول رحمه لله 

ضحك من اعماقه وكلساع ملتفتلي يتأكد اباوع عليه لو لا .

- ههههههه

خلصت السوالف وصار هدوء .

كال :-

- راح اسويلكم فعاليه .. روحو جيبوا كراسي من الاداره وخلوني اطرح عليكم اسئله عامه والكروب اليجاوب اول . هوَ الفائز واله هديه ثمينه من عندي 

كيفنه بيهه هديه .. هوَ هداياه كلهه دسمه حسب كلام سويران شرشبيله لان اني مامجربه هديته ياوالغسمه .

كال :-

- يلا انطلقوا شباب جيبو كراسي من الاداره

راحو جابو كراسي وصارت القاعه ضوضاء وهوسه .. لما رتبناهن على شكل كروبات واني حظي ادري بيه فگر مابقه كرسي اكعد عليه .

هوَ باوع منا ومنا كاللي :-

- ثُرىٰ ليش ماكو إلج كرسي؟؟

- لا استاذ ماكو

- خرب غير تكوليين

ظل يفرفر بعيونه ويدور كرسي .. لكه 

- تعالي هاج هذا الكرسي 

اكو كرسي من ذني اليفترن جان محطوط يم الباب مال القاعه محد يستخدمه .. جابه حطه بالمكان الآني واگفه بيه وكاللي :-

- هسه كعدي وخل انطيكم الاسئله 

اني قربت الكرسي يم كروبي وكعدت بيه هوَ الوحيد يفتر واني كيفت لان مختلفه عنهم كلهم كراسيهم ثابته .. اخذني الواهس وفريته .

اول مافريت الكرسي انررج رجه قويه خمشت گلبي .

ومااحسلك روحي الا طايره وايديه تشگف تريد تلزم شي تچلب بيه بس ماكو .لحظات وظهري انگسم بالنص . وصوت الطيحه رج القاعه

طاح بيه الكرسي للگاع ورجليه مفتوحه وايديه هم اطلب يد العون . والشال طار 

القاعه انرجت رج بالضحك .. حسيت روحي طلعت .. وجهي صااار احمررر دم واذاني دخنت .

النوب اريد اكعد من الكرسي مااكدر لان بكعدتي وطايحه بالكاع على ظهري .

ماهر اجه يررركض طاير . اني ايديه رافعتهن اريد وحده تلزمني . بس محد لزمتني !!

ركض عليه بخوف وفاتح عيونه بقوته ..

رأساً سحبني من إيديه وگومني بكل ماعنده قوه خلاني اوگف .

صوت الضحك وصل للمريخ .. والحرگ گلبي شرشبيله بكل صوتهه تضحك وتتشمت

ساره..ههههههههههههههاااااااي اخ بطني 

عاط بيهم بصوت خله القاعه كلهه تخنس . والهدوء ملئ المكان

- ككككاااااافييييييييي

نكثت ملابسي بإيديه التتلفن بالتراب حتى ماتهنيت بيهم !

رأساً نزلت دمعتي وظليت ابجي وامسح بدموعي .. ايديه كلهن تراب وامسح بوجهي الله يعلم شصار بوجهي بس احسه صار كله طين .

باوعتله بنظرات عتب لان هوَ كال اخذي هذا الكرسي .. باوعلي وفهم نظرتي .. رفع أكتافه للأعلى وإيديه بإستسلام وكال موسع عيونه :-

- والحُسين مااعرف والله العظيم مااعرف وولا متقصد

نزلت راسي واني الفشله مچلبه بذيالي .. وين مااروح لازم الفشله تركض وراي .

- تعالي تعالي اكعدي هنا 

كعدني بمكانه يم الميز واني ابجي .. ظل يعيط 

- منو حاطه هذا الكرسي هنااا منووو واذا يدرون بيه خربان ليش يخلووووه حتى توكعون الطلاب بالفخ 

- دكتور هذا الكرسي مال الميز القديم بس من تفلش خلوه هنا ومحد طلعه

- وين العامللييين وييين شنو شغلهممم 

كلهه سكتت وكام محد يرد عليه .. التفت عليه وكاللي :-

- كومي 

وكفت ومدنكه ابجي .. مشه ومشيت وراه .

التفت وعاط بيهم

- اذا واحد يحجي لو يضحك عليهه من اطلع والله ماتلومون الا انفسكم 

اني ساكته وذوله مخلوسين من عصبيته .. اصلاً حتى اني انخلست .

يمشي وامشي وراه .. التفت عليه كال :-

- اشش لتبجين

سكتت

- روحي للحمامات غسلي واني منتظرج هنا

- لا استاذ اني اروح روح انتَ هاي هيه

- روحي ثُررررىٰ

بخزره منه رحت بسرعه غسلت وجهي ونكثت ملابسي وطلعت لمكانه الوكف بيه .

مشه للكافتيريا وكلساع يلتفت عليه خاف مايلگاني .

دخلنه للكافتيريا طلب ماي وعصير 

- استاذ المن مااشرب شي اني

- معليج 

ظل يطلب واني ساكته .

كال :-

- اشربي العصير لان انهبطتي 

- مااشتهي

رفع عيونه وحواجبه وخزرني 

- ثُرررررىٰ اشرربي

- ها اي اي 

شربته تحت نظراته وكلساع غاصه واكح وهوَ يهمس "اسم الله" يممه ماعولي اكمل واكوم انفذ بريشاتي .

خليت نص .. باوعلي وأشر ع الگلاص

- كله اشربيه

- شطوله شيخلصه 

- اشرربي يخلص يخلص 

شربته وظليت اتنفس لان اختنكت .

باوعلي بتفحص وعيونه قلقه 

- خوما تأذيتي؟؟

- لا ماتأذيت بس ظهري انكسم

- ههه هاي ممتأذيه وظهرج مگسوم لعد لو متأذيه شيصير بيج 

- اموت 

صفن بوجهي رأساً عكد حاجبه وتغيرت ملامحه

- لتعيدين هالكلمه 

- ها اي

سكتت وكمت .. هوَ هم كام واني طلعت احس الجو متوتر وحابسه أنفاسي كلهه بس كون اطلع .

رحت للحديقه

خابرني اسماعيل رديت عليه نتر بيه 

- ثرررياا الولد يخابرني يوميه شأگله لخاطر ربججج فهميييني اي لو لا؟؟؟

رأساً رديت بسرعه

- اي !!

- يعني موافقه؟؟ مو تگولين انتم جبرتوني بس اني عليه اختاريتلج القسمه وانتِ عليج تشوفيهه ترتاحين بيهه لو لا؟

- اي موافقه هاي هيه 

- خوش من تجين اردله الخبر 

- خوش مع السلامه

- الله وياج

سديته منه ورحت يم فاطمه صديقتي مال العام .. لگيتهه كاعده بالقاعه هيَ وشلتهه كلهن حبابات .. والقاعه فارغه محد بيهه .

ظلن يسولفن واني وياهه احشش .

فاطمه.. شيريد منج اخوج؟؟

- اتصل بيه علمود واحد خطبني من إيران وكاللي توافقين لو لا 

- وانتِ شرديتي؟؟

- طبعاً وافقت 

- حلو لا؟ ولج يكولون الايرانين صكوك بس جمالهم فاهي

ثُرىٰ.. ولج عراقي عراقي اصيييل بس عايش بإيران

فاطمه... اذا عراقي خوش بس وصفي إلنه

كعدت ع الرحله مال البنيه العميه بعدني لهسه كاعده يمهه والرحله تتنقل ويانه .. هيَ هم كاعده ويانه وتضحك وتشارك .

حطيت جسمي ع الخشبه العريضه ورجليه ع الخشبه مال الگعده وظليت اوصفلهن واتباهى عشتو 

- خايبات العيون شنو الشعر شنو احلى شي عيونه بيهن لون حتى يطلع ابني بالمستقبل لون عيونه ملون .. لو شايفات النزاكه والهدوء من يحجي حتى اني مو هيج اني اصيح صياح وهوَ هادئ ورزن حييل واسلوبه بالتقنيع خراافي بحيث دقيقتين قنعني اتزوجه واعيش وياه بإيران.

- بس اني شويه صابتني النحثله سويت روحي لا ومااريد بس هوَ الصراحه صكصوكي .. راح اتزوج الايراني واسحبجن وراي بلكي يطلع جده مامتزوج هههه

اشو أني منطلقه واسولف وذني ساكتات !!

- ماتحجن وثول

فاطمه تأشرلي وراي بعيونهه .. عرفت منو الوراي ظليت جامده بمكاني وماتحركت وولا التفتت . هوَ دوم بهيج مواقف لازم يكون حاضر اصلاً اني استغربت ليش مااجه من البدايه . كلشي اخذ راحتي واجفص بيه لازم يتواجد

ويلي ع الفشله هسه شيگول .

هسه وكتي يصيبني التباهي كدامه نعلعله يومي.

تقدم للباب 

وذني وگفن احترام اله واني هم وكفت بس ظهري عليه ماإلتفتت .

دخل وخطواته الهادئه دخلت مسامعي .. شفته بطرف عيني راح للميز اخذ اوراق ومشه .. من مر من يمي سمعت نفسه الغاضب .

كال ومبين الحرگه بصوته

- كملو كلامكم بس اخذت اوراقي ناسيهه اعتذر قاطعتكم

فاطمه.. لا دكتور عادي

هوَ طلع وذني صرخن كلهن

- خرب يومج ثُرىٰ شدتحسين هههههههه 

ثُرىٰ.. عليجن الله جيبلي كرك وترابات خل اطم روحي 

- ههههه النوب مستمره ومنطلقه توصف بحبيب القلب وأأشر وماكو عيوني انحولن

- امداني غير ثوله وغبيه طاح حظي لهل دگه 

ظلن يضحكن عليه وسونّي تصنيف .

ظليت اكل بروحي شلون هسه شيكول وهسه شيفكر هسه متوازيه الا احجي خرب يومي .

رجعت للبيت طاگه روحي .. تغدينه واسماعيل كلساع خازرني متحلف بيه مال الصبح .. يمه خل اتغده واشرد .

شكد حششت شكد ضحكتهم اريده يبتسم بس هوَ ابدد ولا ضحك يمه شكله يخوف وعلي مابيهه مجال خل اطفر .

كمت وهوَ خزرني

- ها ثريا شو ماكملتي غداج

- لا لا شبعت

- هوَ انتِ شأكلتي حتى شبعتي

- لا ماكله بالكليه

- ها بكيفج 

هز راسه فهم ليش طفرت . حافظني حفظ هذا

ركضت للغرفه شارده من نظراته .. ظليت اتصفح واگلب .. نمت رأساً من حسيت باب الغرفه انفتح .

شافني ..

طلع وسد الباب واني ظليت النومه نومه للعصر . خليتهم لما كلهم طلعو للشغل يلا طلعت

سوينه كليجه وكعدنه على برنامج من سيربح المليون عايدين الحلقه للمره الألف واحنه لاطشين كلما يعيدوهه نشوفهه .

تجمعنه اني وتقوى ومروه ع التلفزيون ونباوع وناكل كليجه وجاي ونضحك .. وامي بالمطبخ تعجن للعشا..

شويه واندگ الباب بقوه .

امي صاحت بينه وهيَ بالمطبخ

- يثريا يتقوى ولجن كومن للباب ماتشوفني اعجن وانتن موسى يربح المليون ماخذ عقولجن

هيَ كالت موسى يربح المليون واحنه انهدينه ضحك نريد نسكت ماكو تمددت وظليت ادمع من الضحك وذني وياي وهيَ تصيح علمود نفتح الباب .

اخر شي اجتنه والخاشوكه بإيدهه همزين ماتخوف .. الخاشوكه ولا غيرهه .

اني سويت انسحاب ركضت للباب افتحه علمود مااحصل رزاله ولاتشملني رگعه تايهه منا منا .

فتحت الباب اضحك على كلمة موسى يربح المليون .. ومن شفتهه غابت ملامح الضحكه عن وجهي وتفاجئت !!!!!!

الفصل الثامن عشر من هنا