رواية هشاشة قلب الفصل الثامن عشر بقلم العباديه
"عيناهُ حَقـاً بالجمال تفـرّدت
و تمرّدت حتى سُقيتُ هــواهُ
عَـيـنـاهُ اللّٰهـمَ فـإغـفـر زَلـتــي
إنـي فُتِنـتُ و لـم أتُـب ربّـاهُ."
~~~~~~~~~~~~~~~~~~~~~~~~~~~
ثُرىٰ ...
فتحت الباب أضحك .. من شفتهه غابت الضحكه عن وجهي وتفاجئت .
شكو شعدهه ليش جايتنه !!؟؟
اول تالي شي فعلاً غريب !!
عدلت شعري حطيت گذلتي وره إذني لان هيَ تقلد وتكشكش .. باوعتلي ومقوسه الحواجب واني ابتسمت وكتلهه :-
- اهلاً وسهلاً
ردت بصوتهه وتتماوع والكشخه فول واللبس عبالك جايه لحفله .
ام ماهر... امج موجوده؟؟
- اي تفضلي
باوعتلي وباوعت من الفتحه على داخل البيت ووجهه معكمشته بإشمئزاز .. ردت اسمطهه راشدي اوعيها على زمانهه
ام ماهر.. اوف شلون ادخل
- ها خاله حطي رجلج اليمنى هنا وقدمي رجلج اليسرى وتدخلين واذا ماتكدرين تدخلين لان العمر مأثر بيج اني هسه ألبس عباتي وطلع ادخلج
هوَ اني گلتلهه هيج وهيَ ظلت تزأر عليه مثل الأسد كلشي ولا طاري العمر تتخبل وتتسودن .
ام ماهر.. وشبيه قابل مااكدر امشي هاج باعي شلون امشي اركض ركض
طبت للبيت مطفحه وتركض هيَ وجبتهه الضيگه .. خوش والله عرفت نقطة ضعفج يسميررره .
دخلتهه للأستقبال ورحت جبت ماي .. حطت رجل على رجل وتباوعلي شلون لازمه الصلاحيه والگلاص.
تقوس بشفايفهه وتمطمط بيهن ماعاجبهه .. قدمتلهه ايدي البيهه الگلاص ظلت صافنه على إيدي وعلى الگلاص كالت وصوتهه يتماوع
ام ماهر.. عيني معدكم مي جاهز بكاسات
- لا والله خاله ماعدنه بس هذا نعمة الله
- لعد انطيني الصلاحيه
- صار
انطيتهه الصلاحيه وظلت تشرب بيهه واني اباوعلهه من جوه الصلاحيه الشفافه شلون خشمهه فنتخ وحلگهه مفتوح على حافة الصلاحيه وكلهه صايره شكبراتهه على وجهه .
يمه الضحكه لزمتني اريد اسكت ماكو .. ضحكت وطلعت رأساً .. صحت امي تگعد يمهه . امي كالتلي
- ولج دقيقتين كتلج اكمل عجن ماتحملتي تكعدين يمهه شلون بيج اذا صار بيت وحدج ويجيج خطار شتسوين
- ههههههه ماما انتِ لو شايفه خشمهه من جوه الصلاحيه تموتين ضحك
- فوتي يالعوبه فوووتي
طبيت للصاله اريد اكمل البرنامج لگيته مخلص .. يا والحظ.
مروه وتقوى صافنات عليه واني ولا يهمني
مروه.. شعدهه ام ماهر
- شدراني
تقوى.. خاف تريد اخطبج
- غير خاطب شنو مره ثانيه تخطبله
مروه.. اخر مره شفتيه شوكت؟؟
- اليوم
مروه.. لابس الحلقه؟
- اي لابسهه
تقوى.. لاا يعني بعده مافاصخ جا شتريد امه
- هسه نشوف
عود دزيت الضيافه بإيد امي من راحت شفتهن مرجعتهن نفسهن ولا ماكله ولاشاربه حتى العصير ببطل گزاز ماشربته.
ديلا اصلاً سويتي فضل اني اشربه شبيه قابل..
اجت امي تتصفن .
مروه.. ها بشري شتريد
اني متمدده ع الكاع جوه التلفزيون ومعلگه رجليه ع الميز صايرات يم الجهاز واگلب اصلاً مامهتمه لحديثهن بس من سمعت كلمة امي طاح الريمود من ايدي وظليت صافنه
- اجت تخطب ثريا
مروه.. صدددك المن
- يعني المن غير لاإبنهه
تقوى.. خاف لااخو ماهر
امي باوعتلهن بنظرات شك وسألتهن
- وشدراجن انتن؟؟ شنو متوقعاتهه تخطبهه لماهر؟؟
تقوى.. ها لا ماكو شي بس هيج توقعات
امي إلتفتت عليه واني رأساً التفتت ع التلفزيون ورجعت راسي ع المخده سويت روحي مندمجه اباوع .
تقربت يمي ونترت
- شكو شصاير عنده شي وياج ؟ ليش اخواتج متوقعات هوَ خاف لان استاذج ووياج
- ياااء لا اني شعليه اصلاً ولا احاجيه ولا يحاجيني بس يشرح ويطلع
تقوى.. يعني هسه المن خطبتهه هيَ؟؟
- لماهر !!
مروه.. جا ليش تلعبين علينه
- اريد اشوفجن شضاامات عليه
باوعلّي مروه وتقوى يضحكن !! اني متفاجئه غير خاطب ؟!!
سألت امي
- ماما غير هوَ خاطب شلون يخطبني عود اصير مرته الثانيييه لا والله
- ولج فاصخ صارله مدري شكد .. بله خل اتذكر .. ها اي كالتلي الفتره .. بس من حسبتهه قدرتهه واحنه بإيران فصخ
- ماكالتلج ليش
- ماليش تكلي اصلاً گوه تحچي ومبينه ماراضيه وجايه گوه ووحدهه لابنيه لامريه عبالك من وره خشمهه
تقوى.. هلو راح تصير عدنه خطوبه
امي قاطعتهه
- اوكفي انطينه عطوه منو يكول خل يجي اسماعيل والولد ونشوف لان ذوله متكبرين ماتسلك وياهم ثريا
تقوى.. يا يعني ترفضون؟
- ولج انطيينه مجال
تقوى.. ظلو ظلو شعليه بيكم خل اروح اخابر خطيبي احسللي
راحت للغرفه واني مشاعري فرحانه على خايفه والتفكير ماكلني أكل .
محتاره شلون بيه !؟
لليل اجو الولد ومن تعشينه امي فاتحته . ظل يباوع بيه ويدنگ .. امي كالتله على نظرات أمه
- يمه أمه تباوعلنه بالعين الصغيره هاي اختك بكيفهه انه مااتدخل بيهه بس اگلهه بصفاتهم وهيَ تحدد
اسماعيل.. اني هم خابرني گاللي :- اني اولى بيهه واقربلكم من إيران واحطهه بعيني وادللهه لان اعرف شخصيتهه شنو صار سنتين ادرسهه عرفت اخلاقهه والنعم .. واذا تروح لاايران تصير بعيده عليكم شيجيبهه وشيوديهه ومايخليهه تجيكم لما تنسوهه وانتم بكيفكم .
اني كتله اشوف الاهل واردلك خبر ومدري منو الگالله على اركان سكت شويه جر نفس باوعلي وكال :-
- ها ثريا شتكولين انتِ موافقه؟
دنگت مستحيه راح اموت من التفكير عقلي تشوش واصلاً بعدني مامفكره
عرفني استحيت رجع كال :-
اسماعيل.. اسمعيني ثريا انه اخوج واعرف بمصلحتج .. اولاً اهل ماهر متكبرين الى أبعد حد ويجي يوم وتتعيرين وماترتاحين وي أمه لان مبينه ماتريدج وثانياً هوَ توه فاصخ ومانعرف شنو السبب ف توقعي يجي يفرغ حرگة وآثار تجربته السابقه بيج .. وثالثاً هوَ استاذج ف راح توجهين شويه صعوبات لان وين جان استاذج وفجأه يصير خطيبج ف انه اعرفج تستحين منه وهوَ اكيد يمل لان خلگ الزلم مو طويل مثل المره .
ف اذا انتِ تتحملين ذني كلهن رجعيلي خبر بإيد أمي حتى هم ارفض أركان وهم اخابر ماهر
هزيت راسي موافقه .. امي كالت :-
- اني اشوف اركان احسللج الولد ماقاصر شي وشفتيه شلون متواضع ومايكشكش وهوَ هم حالته عالي العال واهله خوش ناس ويحبج بعد شتردين
بس اهز براسي واشوي مقارنات بين ماهر وأركان .
حسن رفع ايده كال :-
- اني اصوت لماهر
مروه.. واني لااركان
تقوى.. واني لماهر
موسى.. واني لماهر
حمزه.. اني اركان
اسماعيل.. اني اركان
وامي ختمتهه وكالت.. واني اركان
اصوات أركان اكثر من ماهر وعقلي يگلي اركان وگلبي يگلي ماهر وعايشه بصراع داخلي .
غيرت الموضوع لان استحيت وكلت لاامي تسأل اسماعيل عن خطوبته لان السالفه تگص بگلبي من الصبح وهوَ هم خطيه بس احنه يفكر بينه .
كالتله :-
- اسماعيل وين صار موضوعك مال الخطوبه
جر حسره ودنگ
اسماعيل.. والله شگلچ ياضوه عيني بس ماكو خطوبه
- ياا ليش
- ماكو فلوس
- يا يا وين راحن المجمعهن
- صرفناهن بإيران
- ياااا ليش وانتَ صارلك شكد تجمع جا ماكتلي هسه احنه رايحين للشمال بسياره ولا هالصرف
ضحك وسحبني لحضنه حط إيده على ظهري وطبطب عليه
- لخاطر ثراوي كلشي يرخص
امي ابتسمت راضيه عليه وكالتله :-
- ولا يهمك هسه الملك سلفه بس شكد هنه فلوسك
- سبعه
- خوش هاي جيرانه خوش تسوي سلف
- شكد الشهر
- 500
- هووواي.. يلا راح اشوفلي شغله بلكي يزيدون اليوميه اني هسه هم مشترك بسلفه بس قليله
- خوش اكلك وهذا الضابط مدري شنو شسوه
- هه كلشي ماسوه رحتله تلاغينه وظل يهدد ويصيح انطيته حجايتين خرسته ورجعت .. هسه بس الم الفلوس اسوي الخطوبه واشوفه اذا يحجي اتصرف وياه
- يمه خليك بعيد عن المشاكل مابيه حيل تره ماعندي غيركم
- صار
طشينه كل واحد لغرفته ينام بيهه واني صار عليه التفكير كل جزء يصيح شكل راسي صدّع .
ظليت افكر وافكر وافكر وتوصلت لحل وهاي هيه .. باجر اگول لااسماعيل قراري لااسماعيل
..
كعدت الصبح بدلت وتريكنا .. اسماعيل مافتح موضوع وياي همزين خليهه لما نرجع .
وصلني للكليه وراح .. دخلت نسولف ونضحك اني والبنات بس ابدد ماجبت طاري خطبة ماهر التوبه بعد اذا طلعت سري .
اخذنه محاضرات ووصلت محاضرته .. دخل فرحان ويضحك .. يحجي ويباوع عليه بلهفه ونضراته مانزلت عني .. لاحظت الحلقه نازعهه .. جا اذا صارله مدري شكد فاصخ ليش لابسهه ؟؟
اكيد يريد يحرگ گلبي بيهه !!
جنات ماكو .. من داومت لهسه ولا مره شفتهه .
يباوعلي واني متجاهلته وولا رفعت عيني ..
شرح المحاضره وظل يكوم بالطلاب .. رفعت ايدي وكومني .. دنگت وظليت اشرح مااشوف شي لان مدنكه حيل مااريد تلتقي عيني بعينه .. كملت المحاضره كلهه وماگاللي اسكتي !
اخذني الواهس وظليت اشرح .. اشو ماكو صوت بس اني .. رفعت راسي لگيته عاگد حواجبه ومكتف يباوعلي !!
شكو ليش هيج يباوع ؟؟ يمكن لان تجاهلته وماباوعتله !!
باوعلي متسائل :-
- ها ليش وكفتي ؟
- ها استاذ يعني بعد اشرح
- اي كملي
كملت الشرح ورجعت عدته من البدايه وهوَ ماحجه .. فحطت وسكتت باوعتله وكلت :-
- استاذ تعبت
- اني اريد ادور الريمونت مالتج بس مالگيته .. يعني كومناج غير تشرحيلج شويه وتكعدين ادري من شرحتي المحاضره كلهه وين تريدين؟؟ وفوكاهه عادته مرة لخ
هز إيده ودار وجهه معصب !
هاي كله لان ماباوعت هيج رزلني .. دشوف بعد مني تباوعلك .
كعدت وهوَ ظل مغندب واني مغندبه مااباوعله وبس اصغي بسكته وراسي مدنگته .. رجعت مثل قبل العام من صارت سالفة القبوط.
عصب حيل ازيد من قبل شويه .. ظل أي طالب يگوم ومايعرف يعيط عليه ويرزله .
اني خفت من عصبيته حرت شأسوي هسه رفع عيني لو شسوي شلون ورطه هاي يربي اني اخاف من عصبيته .
وگف هواي طلاب ماعرفوا وسجل اسماءهم بالسجل الاحمر .. هذا السجل الينزل اسمه بيه يعتبر روحه دور ثاني .
سجل اساميهم وكعدهم .. كال وعيونه مشبطه
- طلعو اوراق هسه امتحان والميجاوب ميلوم الا نفسه شرط الا اخليه اقل شي يخلص سنتين بهاي المرحله
طلعت ورقه وايدي ترجف هوَ هادئ ويجيب الاسئله تكسر اذا معصب شيسوي ؟
من الخوف القلق كل القريته تبخر .. وهاي العاده ماابطلهه بس اخاف يطير القاريته .
رد الاسئله .. بس شنو سؤالين قصيرات الشوفهن يكول سهلات بس بيهن كل البله .
ظليت مصفصفه عززه هذا تحلف بينه .
. ظليت احل وامسح احل وامسح انسطرت .
هوَ يفتر علينه ومكتف ايديه لوره ظهره ويمشي بخطوات سريعه وانفاسه الغاضبه مبينه.
حسيته خياله فوك راسي .. انسطرت بالزايد اريد اكتب الكلمه مااعرف.
تقرب يمي حيل ونتر :-
- شو بله خل اشوف
رفعت راسي باوعت بيه بنظرات توسل اطلب العون .. ماباوعلي والحواجب معكوده والعيون حمر داير ماداير
وخرت شويه عن الورقه وشافهه .. يمه شافهه وفتح عيونه على وسعهن وبسرعه سحب ورقتي بإيده !!
باوعلهه وفتحهه ظل يگلب بيهه .. باوعلي مستهزأ
- تتشاقين مو؟
باوعتله بنظرات خوف وقلق
- هااا ؟
عاط بيه
- هستوج كمتي شرحتيهن ماصارلج ربع ساعه شلاااعبه انتم تريدون تخبلوووني
حط الورقه بنتر مقابيلي وراح يفتر ع الطلاب اخذ اوراق الطلاب المتميزين ومستواهم زين وهم ماحالين .. تخبل وعلي .. ظل يعيط ويرزل بينه .
ظل يأشر بإيديه ويصيح
- يعني توقعت تحلللووووهن هنه سؤؤالين هنا حضرة الاخت كاتبتلي من گلبهه ومسويتلي تأليف وإخراج عوزي بس اجيبلهه طابعه واطبعهن اله كتاب وهنا الاخ مصخم الورقه وصايره سوده
الرزاله شملت الكل واني ام التأليف والاخراج والله صدك اني حطيت كله من گلبي وولا اسلم الورقه فارغه واصير علچ .. بس هسه صرت علچين .
رگع القاعه كلهه بصفاره وحتى شرشبيله ويانه عود مسويه روحهه شاطره هيَ بس ببداية الدوام تتشطر وبعدين تهبط وتفش النفاخه .
عمي لو ادري مبتسمتله ولا هذا الظيم . كتل روحه ووجهه صار احمر عليمن شو ماتگلي .
خله وطلع معصب واخذ الاوراق وكال كلهه تنزل بالسجل الاحمر صخام بويهي .
اني اذا ينزل اسمي بالسجل هاي هيه مثل العام دور ثاني والنوب اتفشل مامستعده اعيد التجربه نفسهه .
ركضت وراه للمكتب .. دگيت الباب ودخلت بعد سماحه .. لگيته كاعد وثاني إيديه ع الميز وحاطهن على راسه ومدنگ راسه لجوه .
ووجهه بعده أحمر .. عبالك متوقعني اني مارفع راسه بس تمشيت وكفت مقابيل الميز .. رفع راسه عليه باوعلي بعتب ورجه ظهره ع الكرسي .. سحب نفس وزفره بتعب .
كال بصوت ثكيل
- ها ثُرىٰ گولي
- ءءاا استاذ عفيه لاتحسبه الامتحان والله مو زينين بيه
- راسي حينفجر
- هاا ؟
سكت ماحچه شي
- استاذ عليمن معصب لهالدرجه ماتسوه احنه نضر انفسنه مانضرك . رفع عينه خزرني واني رأساً دنگت .. عبالك يكلي انتِ السبب .
رفعت راسي شفته بعده خازرني رجعت دنكت شلون سالفه هاي يربي .
انسحبت خطوتين اريد افلت
- استاذ اني راح اروح بس احنه شطار مانستاهل هالصفاره
اول مامشيت كال :-
- وانتِ ليش ألفتي غير قبل شويه مگومج شارحته كُله بس الظاهر مقاريه بتركيز
- ييح اني لا وابو فاضل اقره كلمه كلمه وبتركيييز
عود ردت ابرر بعد كلتله بعفويه :-
- استاذ والله كله حافظته بس اني مدري شيصير بيه من اشوفك الحچي كله يطير
باوعلي صافن ورافع حاجبه .. عززه هاي شسويت .
ضحك من اعماقه وانتچه ع بالكرسي وفره
- بيه شواف شنو حتى من تشوفيني تنسين
- اي والله من الخوف
النوب ردت اكحلهه عميتهه .. ضحك بصوت عالي
- اي مو بعبع گدامج
ظل يضحك مستمر واني اضحك وياه ع الواهس .. شرگ وظل يگح .. ضرب على صدره وسحب بطل ماي من ثلاجته .
باوعلي ويشرب ماي كال ويضحك :-
- وهاي انشحط بلعومي من وراج
- هههه اني شعليه غير من الضحك
رجع ضحك ويتأملني
جلّه صوته وابتسم تك خد .. صفن بعيوني ومطير الحواجب .. دنگت وكتله :-
- ها استاذ هسه تحسبه لو لا؟
- احم لخاطرج مراح احسبه
- شكراً
- تدللين يابه
طلعت فرحانه اخيراً أثرت بيه .
رحت كملت المحاضره الثانيه وماكلتلهم مايحسبه النوب يكولون اشتغلت الواسطات .
بالاستراحه اجتني طالبه كالت :-
- ثُرىٰ شامخ؟
- لا جدي شموخي
- المهم بيه شامخ انتِ لو لا ؟
- اي اني ليش
- دكتوره اسماء طالبة بالاداره
- اني ؟ ياا عززه بس لا مصيبه
طلعت ركض للإداره التكعد بيهه اسماء .. لكيتهه فارغه !
يااا هاي تجذب عليه شنو.
ردت اروح سمعت صوته يصيح بإسمي .. يجي صوته من الاداره اليم ادارة اسماء .
- ثُرىٰ ثُرىٰ تعالي وينج
رحت للاإداره اركض شفته كاعد ع الميز يحط بالگلاصات والعصاير ع الميز .. والميز مفروش أكل , بورگ وكبب وبيتزا وكباب ودجاج .. ماألذ وماطاب نعلعله .
الريحه فاحت بخشمي .. ظليت ارمش بعيوني يبوو.
- ها ها استاذ وياي؟
- اي اكو غيرج اسمهه ثُرىٰ؟
- لا بس اني
- تعالي تاكلين ؟؟
باوعت ع الاكل وباوعتله هزيت راسي بالرفض
- لا مااريد
هز راسه وضحك
- تعاي تعاي
- لا استاذ والله مااريد
- تعاااي يمعووده
- مااشتهي
- هه عود تستحي خب دروحي
ييييحح الحقير فشلني .. ظليت صافنه وغندبت .. ضحك وصب العصير بالكلاص
- ظلي يفوتج
نترت :-
- مااريد .. بس وين ست اسماء كالو صاحتني
ابتسم
- اني صحتج مو اسماء
- ها
كلتهه من وره خشمي وخليت وطلعت شلون فشله فشلنياهه ابو عكروز .
رحت للحديقه ظلينه نسوف ونضحك .. اجن بنات كالت دكتور ماهر يريد طلاب المرحله الرابعه كلهم .
اهووو شيريد .
وگفنه كلنه ورحنا للقاعه .. اكو بالممرات براد مال ماي .. اني ردت ماي عطشت .. رحت للبراد اخذت الكلاص نايلون حاطينه .. عبيته ماي واخذته وياي للقاعه من الاستعجال .
مشينه للقاعه اني وفاطمه والكلاص بإيدي بس ينقط .
فاطمه اشرتلي ع الماي الينزل من جوه الكلاص واني صحت
- ياااا خايبه هذا الكلاص مزروف
سمعت نتره بإسمي بصوته .. التفتت لگيته خازرني ورافع حاجبه . نتر بيه :-
- ثُررررىٰ .. هاي منو معلمج؟؟
عزززااا .. بلعت ريقي واباوع بالكلاص واباوع بيه شلون خازرني وينتر بيه !!
صخام بوجهي لهالفشله .. شمرت الگلاص على فاطمه واطففرر رحت ركض للقاعه .. صخام صخام شهالتفكير ؟؟
لگيت القاعه فارغه .. عززا بوجهي .. دخلن ذني فاطسات ضحك واني متفشله وضامه وجهي بإيديه .
فاطمه شمرت عليه الكلاص
فاطمه.. هذا هذا كلاصج
- وخري عني وخري مااريد اشوفه
فاطمه.. فوتي رجعيه اني ماارجعه هذا العقده واكف للطلاب يدخلون
- عليج الله انتِ وديه
فاطمه.. والله ولا عليه
- شكد خبيثه
اخذت الكلاص ونزلت لجوه حطيته ع البراد .. اول ماحطيته سمعت الصوت ينرج بإسمي بالكليه كلهه وبعلو صوته
- ثُرررررررىٰ ثُررررررررىٰ
يربي هذا ماعنده غير صخمىٰ . الطلاب كلهه بره وركض عليه استغفر الله ربيييي.
ذبيت الكلاص عود ردت اشربلي إميه حتى لو مزروف ميخالف المهم يشرّب ماي.
ركضت للقاعه وهوَ وراي يأشرلي بعيونه .. دخلت للقاعه وهوَ وراي دخل لگاهه فارغه .. باوعلي مبتسم وارتبك .. كرفص خطوط خشمه بحركه عفويه وكال :-
- ياا هاي القاعه فارغه ههه
باوعتله بخزر عود تفشل بيه والقاعه فارغه .. رفع أكتافه وايديه عود ماادري وطلع .
بعديش طلعت بعد الفشله .
كمل اليوم عادي وطلعت سالفته المجمعنهه عليهه هيَ علمود قوانين الكليه وعبالك مانعرفهن مال كل سنه هالله.
رجعت للبيت وتغدينا ومن صبينه جاي انفتح الموضوع وياي وكتلهم .
- اني قررت لا أركان ولا استاذ ماهر اني مامستعده اتزوج هسه
اسماعيل.. بس اركان خوش قسمه
- مااكدر اعيش بإيران مااكدر افهموني مااتحمل الغربه
اسماعيل.. هاي هيه هاي هيه بكيفج مانجبرج خويه باجر اخابرهم اثنينهم بس ماتبقين بالكليه تره استاذ ماهر اعرفه كلش زين هسه يتعاده وياج ويرسبج لان يعتبرهه انتقاص منه مااتوقع يعديها بخير
- اي اني هم من العام ردت احول بس لان اكمال مايصير ف هسه انقلني مادام بعدهه بدايه جديده
اسماعيل.. خوش باجر اقدملج نقل بس لاتداومين كلهه اسبوع وتداومين بكليه جديده
- اي خوش
حسيت هم وانزاح عن كلبي بس ماكله هم من ناحية ماهر خاف يعصب .. ولو يستاهل نسيت شسوه بيه من خطب خل اضوگه نفس الكاس شعباله بنت شميخ هينه .
امي كالتله اني اخابر امه لان هيَ انطتهه رقمهه علمود ترجعلهه خبر .
امي خابرتهه واحنه التمينه عليهه .. نتصنت وفاتحين حاكيه .
اول ماامي كالتلهه ماكو قسمتهه .. ركعتهه بهلوله زلزلت السماعه مال الموبايل !!
كلنه ظلينه صافنين !!! امي كبتسهه كالتلهه :-
- ام ماهر تره ماكلت اكو قسمه كلت ماكو
ام ماهر.. اي اعرف عيني اعرف ههههه بعد احسن
ظليت موسعه عيوني مصدومه !! همزين ماقبلت لو قابله هاي شتسوي بيه !؟ النوب تحجي والفرح بصوتهه
سدته امي منهه وهزت ايدهه عود شفتي شسوت .. غلست وكمت من يمهه .
ثاني يوم ماداومت واسماعيل بلش بأوراق نقلي لغير جامعه .. خل اخلص .
مر كم يوم كملت الاستماره وداومت اول يوم بكليه جديده تختلف جذرياً عن كليتي لاابو الرزايل ولا صديقات ولا أي شي .
احساس الغربه يكتل .. احس نفسي مو اني معتكفه على نفسي ولازكه بالستيج مااكدر اتحرك .
.
.
.
مرت شهور اداوم بالكليه الجديده وماتعرفت على صديقات اروح وحدي واجي وحدي .. ابو الزرايل ماكو خبر منه حتى حسابه ع الفيس مغلق !
الحساب كله ماكو يطلع مستخدم فيسبوك !! ظليت اطلع بالمحادثات واقره واضحك .. بالاخير اضوج واسده غصباً عني .
قرب وقت ولادة نهى .. كلنه مخبوصين وهيَ مخبوصه وخايفه ترجف . على أي ساعه تجيهه ولاده .. تريد عمليه بس ام وليد ماقبلت تگلهه طبيعي احسن .
استغربنه لان ام وليد ماالهه دور وماينسمع صوتهه اصلاً وماتتدخل . بس مبينه دافعتهه سميرانو .
رحت اني يمهه كم يوم .. وليد يوصلني ويرجعني للكليه .. واني وي نهى اطبخ وانظف واغسل ملابس بس ملابس وليد مااتقربلهن لان حرام مدري مايصلح نصايح امي هاي شدراني اني.
بليله ظلمه ونايمين هدوء وبلشت نهى بالصريخ .. عرفت صار وقت ولادتهه ركضت لجنطة الطفل جبتهه ولبستهه ملابس سترتها وركضنه بيهه للمستشفى اني ووليد .
مناك خابرنه اهلي اجه اسماعيل .. ووليد خابر اهله شفت ام ماهر دخلت وانخمش كلبي متوقعه الوراهه منو..
دخلت وهوَ وراهه .. اني من اباوع عليهه صارت عيني وراهه واجت عيني بعينه رجف جسمي.. خزرني بغضب ودار وجهه بسرعه .
توترت وعرگت كصتي .. بس وجودي وياه بنفس المكان يسويلي ارهاق .
ظلينه بالممرات لما تجيب .. اسماعيل راح وي وليد علمود يكمل الاجراءات .
بقيت واگفه بمكاني ومدنگه اباوع على
رجليه .. حسيت خيال يمي وگف .
مارفعت راسي .. بس بحركه سريعه ايدي انسحبت بقوه ورجليه تمشي ركض بحركه من عنده !
شكرا لزيارتكم عالم روايات سكيرهوم
