رواية نقش بارد الفصل السابع عشر بقلم فدك فاطمه
لايك الأسود عليك
ولايك الكلشي عليك
وشارع شگده و شكبره
ما تدوس ...
إلا اعلى كلبي ..
شلون بيك ؟
.
.
رفـــا
طلعت من المطبخ صاعدة لغرفتي غنوة هناك من البارحة ماخلت لگمة بحلگهة موتتني بس تبجي
نزلتهة گوة صبيت العشة ماما اصرت عليهة اكلت شوية ماتشتهي نطيتهة ماي شربت علاجهة عيونها حمر و صغرانة من وجع راسهة
العصر ماما خابرت العلة بعدهم موقفينة و خلالة محامي بس همة لمشتكين عليه ادلتهم مو قوية
بس واحد من المنطقة يگول شايف جلال داخل لبيتة بس ما طالع شلون ما ادري
كملت شغلي رجعت لگيتهة غافية عفتهة خاف تفز بعد ما تنام طلعت برة اخوي صفا يصيحني يريد ملابس ماما طردتهم لبيت عمي
اخذتلة حجة واكف يلبس بالحوش : البنية هنا
رفا:اي خطية مقهورة
صفاء: هذا حالج اذا رجعتي لصفوان هم هيج ينشلع گلبج
رفا:هو بيدي لو حمودي مايرضى يوگف وياي
صفاء:انتي ماعندج قرار
رفا:مايقبل يطلگني ماما ماترضى اخلعة الناس تحجي علية عيب
صفاء:انعل ابو الناس
عبست العب بالقيطان مال الدشداشة اخذت ملابسة حجة يبوس راسي:انتي قرري واني وياج شنو ما جان الوضع
هزيت راسي بفهم مبتسمة مشة راجع لبيت عمي
صفاء اصغر مني بسنة هو دائما مساند قراراتي
بس اخوي احمد هو الجبير ما نكسر كلمتة
رجعت للغرفة متمددة اباوعلة مراسلني يسأل عن غنوة خوش حجة فتحت خط طلعت من الغرفة صعدت فوك السطح اسمعة يحجي
رفا:لاتدور دروب وياي شعليك بالبنية تسأل عنهة
صفوان:رجلهة يسأل اني شعلية بيهة
رفا:عبالي الخيانة تمشي بدمك
رد محترگ گلبة:بت الگ***" انعل ابوج لابو منين ما طلعتييي هذة الحجيي لاتحجينة علية
رفا:شبيك دست على ذيلك ابن خالتي
صفوان:رفا لجج رفا لاتحرگين دمي
رفا:شنو حجيت اني انتة لأتصلت عوفك هسة گلي الرجال شلونة
صفوان:زين گلليهة لاتخاف ماكو دليل ضدة
حجيت ادلع بصوتي:اگلك صفوان اريد اسألك
رد متنهد :سألي يانظر عيني
كشمت بس ضليت احجي بمياعة:توعدني تگول الصراحة
صفوان:اگولهة عيني الصراحة و ابو الصراحة
رفا:انتة وين
صفوان:يم بابكم
رفا:اگول جاي اشوف ضوة من الشباك
صفوان:يم يا شباك واكفة
رفا:لا تعب روحك اني طالعة للحوش تعال ادخل
سديت الموبايل اتلفت خاف امي تشوفني نزلت بيدي الحجل لو هي مو وكت كشخات و تفزگن هسة
كعدت على الدرج لبستة و خليت حمرة و نثرت شعري طلعت علج اخذتة اطكطك بي وگفت يم المراية اشوف روحي تمام
فتحت باب الكليدور طلعت اباوعلة كاعد گبال الورد
بالحديقة جهازة بيدة يگلب بي انتبه على صوت خطواتي التفتت مخلي ايدة جوة خدة
استندت على الحايط العب بشعري عمدة حتى اخلي يباوعلي هيج اكشخ گبالة حتى احرگ گلبة
رفا:تدري بية ماحب أأجل و الف و ادور گبل اسوي لشي الاريدة بس هالمرة اريد اطلب منك طلب
صفوان:صار گولي لتردينة
رفا:باجر اروح اقدم طلب خلع بالمحكمة لاتگول لأمي عليه تكتلني
رخت ايدة صافن علية ابتسمت ببرائة اباوعلة منتظرة يجاوب اذا ما اشعل عشيرتك و اكرهك بروحك فلا اتسمى بأسمي
حجة يتقرب مني :هذة طلبج
رفا:اي جا انتة ماترضى ماكو غير هذة الحل
تقرب مخلي اديه بجيبة:ياگ***" راح يوگفلج
رفا:ما احتاج واحد يوگفلي بس لو ما محلفتني ماما و مذممة جان من زمان سويتهة
تقرب رجعت خطوة ليورة مرتكية على الحايط اباوعلة جنة ثور شگدة وين جان گبل وين صار هسة
صفوان: واني اخليج تجبريني هيج على الطلاگ
رفا:اي تخليني جا شتسوي
قرب وجهة من وجهي حجة بهمس:ادفنج
رفا:الخاين طلع صوتة
صفوان: اسمعي و ديري بالج لاتجبريني أسوي شي يكرهج حتى بروحج
رفا:مو گبل ما اكرهك بروحك اخليك تتخبل
مد ايدة خفت بس ضليت ثابتة گلبي يرگع خلاهة على الحايط تطخ بخصري مستند عليهة روحي راحت من قربة خايفة مو متأثرة
حجة بهمس يم أذني توسعت عيوني من جرئتة يريد يتمم زواجنة حتى ارضخ و ما احجي هاي مو اول مرة يهددني يسويهة بكلمات وصخة و قذرة مثلة
رفا: انبت سجينة بنص گلبك مو اني لترخصني هيج
صفوان:اخذتي حگج و زيادة هاي تصرفاتج كلهة مالهة داعي
رفا:لا الهة لو اني خاينتك گبل عرسنة بيوم جان هسة المگابر تسمع حسي بس لان انتة رجال جاي تتفرعن علية حضرة جنابك الصلف
صفوان: خمس سنوات رفا خمسة ياهو ليخلي مرتة هيج معلگة كل هاي المدة
رفا:من ايدك محد طگاك گالك خون
صفوان:ماجنت بوعييي سكران
رفا:عذر اقبح من الذنب انتة عقدت والله وفقك
و كتبلك رزق بالحلال ترووح توصخ روحك بالحرام ليش علمود تتونس ضل اتونس حبيبي
مسح وجهة متنرفز محتار اول بداية جان ندمان بعدين جبرني وراهة صار يخلي الصوج بية نوب رجع ندمان و يتعذر كل شوية راي شكل
رفا:اي صدك ما سألتك البنية لخنتني وياهة وين صفة بيها الوكت بعدكم تلتقون
صفوان:اي نلتقي البارحة جنت يمهة
رفا:تلوگلك ثنينكم نفس الصنف
جرني من زندي خليت ادية لا اطخة رافعة راسي حركت شعري حتى يصير كلة ورة ظهري نزل عيونة لشفتي اطك بالعلج گبالة
حجة بهمس:كافي تعذبيني گتلج ندمان
رفا:واني سامحتك و گتلك ننفصل كل واحد يروح بطريق يشوف حياتة
صفوان:تردين تشوفين حياتج ست رفا
رفا:جا شنو عيب
صفوان: غلطت و ندمان كافي اني مو معصوم صارت غلطة ماكررتهة من يومها
رفا:له له كررهة ليش حبيبي ليش هجي انتة رجال اكيد مايعيبك شي حتى لو كررتهة مرة مرتين راح يگولون حقة مرتة يم اهلهة مل الزلمة شيسوي
ابتسم تقرب يحجي بهمس:اخ من عوجة حلگج تاخذ گلبي و تسلب عقلي
رفا: ليسمعك يگول هذة عاشق مايدري خاين
صفوان:گ***" وداعتج
رفا: واضرب هم و اتعس واحد حقير ولا انسى فعلتك
لكك بنص خبصتي تونة عاقدين منتظرتك تجي تشوفني وانتة رايح تخوون
صفوان: اي رحت بس والله ما جنت ناوي اخونج گلت نص وكت و ارجع همة شربوني
رفا:تروح للملاهي و ترجع مو تروح للملاهي تحتفل بعقدنة تشوف الساقطات هناك تعاي ست رفا تفهمي والله شنو خطية جبروه
رد ضام ضحكتة:شفتي شگد خطية
رفا:اي عمت عينة
صفوان: يابة خصميهة وياي گليلي غايتج شنو
رفا:تسوي لأكلك عليه
مد ايدة حاوطني اني واكفة على الحايط مخلية ادية ورة ظهري ما خايفة منة صرخة وحدة مني ادهرة بيهة اگلب عليه الناس
صفوان:افتهمي يبت الناس ماكدر اعوفج قابل نضل كل واحد بصوب بس مو تتحرمين علية
رفا:يوه صفوان خطية شلون تعترف انتة بالحلال
و الحرام بس هو مو صوجك صوج امي لشايفتك ملاك و صافة وياك هي و أحمد
صفوان:بعد المحبة من الله
رفا:والكره من البشر واني كرهتك
صفوان:ضلي معلگة هيج
رفا: حرام عليكم خطيتي برگبتك اريد استقر اشوف حياتي لمثلي بانية بيت وعائلة عدهة جهال اني شنو ذنبي اضل هيج
صفوان:تعاي و جنج على بيت و جهال
رفا:مو منك ما اثق بيك خاين
صفوان:هذة الموجود انتي بكيفج بعد
رفا:اني اجيت اسألك عن دلهم يمتة يطلع
رد بنتر:وشبيج تجرين اسمة جررر
رفا:وين جارتة يتهيألك انـ..
توسعت عيوني من بوسني بشفتي قوي ضليت مصتكة من الصدمة سمعت صوت واحد يتحمحم
فزيت دفعتة دار وجهة يمسح بحلگة
مشيت مدنگة اخوي أحمد واكف بباب الحوش دخلت اردم بالحياطين و الطم هسة بس احجي يگلولي تتختلين وياه اشتعلت روحك صفوان
صعدت لغرفتي متقززة رحت غسلت رجعت كاعدة اكل بظافري صافنة على الحايط اسب بي و بروحي
التفتت على غنوة من كعدت مسحت وجهة نزلت بصفهة مبتسمة حتى شوية تهدء اعصابهة ماتتوتر
رفا:ريحي گلبج صفوان هنا سألتة گال ماكو دليل
حجت بقلق:خاف يتبلون علية
رفا:خايبة ذولة غاطين و طالعين يطلعون الشعرة من العجين لاتخافين
غنوة:واذا صارلة شي
رفا:گولي يالله كلشي مايصير
غنوة:خايفة
رفا:عليه لو منة
ردت تلعب بظافرهة:ثنينهن خاف صدك هو مسوي هيج بس من خابروه گال مالي علاقة مادري
رفا:اذا مسوي صدك كاتلة تضلين وياه
ردت بغصة واضحة:لا
لزمت ايدهة ماريد اضغط عليهة رفعت عيونهة الي
وجهة اصفر عيونهة مغورگة حمر مورمة من كد البجي يگول ماخذين أبنهة مو رجلهة
رفا:هسة خل يطلع بخير و سلامة وراهة تفاهمو لاتفكرين ما دام صفوان الخبيث وياه يطلعة
غنوة:وينة هو بعدة هنا
رفا:اي جوة سألتة توني گال بخير
غنوة:خاف يطگونة
سكتت يعني بالسجن كلشي يسون اذا ذولة لمتهمينة ورة سالفة الاعتقال يكدرون يبلونة بأي شي الله يستر يطلع سالم
خلص اليوم محتارة المدرسة ما قبلو ينطوني اجازة
هسة اني مدرسة فنية لا افيد ولا ازيد مجلبين بية المن والله يصفنون الواحد همة درس مامخليلي
رجعت من الدوام نزلت براس الشارع مريت على المحل اشتريت بعدني ادور بالرفوف سمعتة يحجي وية الولد يريد جكاير اخذت الاريدة رحت
باوعلي رافع حاجبة خليت الغراض على الميز گبل لا افتح محفضتي حجة يمد الفلوس للولد :واصل حسابج روحي للبيت
رفا:جيب العلاليك وراي
طلعت اباوعلة بغرور شوية طلع وراي شايلهن بيد
و جكارة دخانهة يجي علية درت من جهة الثانية
صفوان: ليش ما تشترين سيارة
رفا: ماحب اسوق شعليك بية
صفوان: اخاف عليج من البرد و الحر
رفا:اي حنين دخيلك و دخيل اهلك
فتح الباب يضحك دخلت اغم بي بالسر اخذتهن منة من الباب طردتة غنوة هنا هذة ماعدة بريك يمدد بالصالة بس يدخل للبيت
صفوان:بالعشرة اجي دلهم يريد يخابر مرتة
رفا:خوش عود اگللهة
صفوان:شمسوين غدة
تأففت بضوجة: مادري هاي جيتي للبيت
صفوان: دمشي شوفي شمسوين وينجج خااالة
خزرتة بضوجة هي سمعتة طلعت تهلي و ترحب بيه
ابتسم يباوعلي بطرف عينة حاضنهة يبوس براسهة
دخل للاسقبال باوعتلة بحقد فتت للمطبخ شربت ماي كل ما اتذكر بوستة اروح اغسل شكد مقرف
صعدت شفت غنوة گلبهة راح يوگف من القلق خايفة عليهة گتلهة بالليل يحاجيج ضلت متانية كل شوية تگلي بيش الساعة
لحد الليل اكلت راسي بس صارت بالعشرة گامت نازلة صفوان بالاستقبال اتصل عليه اخذت الموبايل فوتتها بغرفة امي حتى تاخذ راحتهة
رحت للمطبخ صبيت الجاي ولديتة الهم كعدت على تكة القنفة مرتكية بأيدي على ظهرهة مخلية رجل على رجل مقلصة عيوني اباوعلة
رفع حاجبة امي تسولف عليه هو بس يرد يباوع بطرف عينة لحركتي گلبت وجهي اباوعلة بحقد نزلت من مكاني رايحة لغنوة
لگيتهة الوجه احمر تحجي بهمس مدري تبجي مدري جاي يسولفون سوالف مال متزوجين باوعتلي و توترت سدت الموبايل مدتة الي
رفا:خلصتي
غنوة:اي
رفا:تطمنتي
هزت راسهة تبجي:صوتة مبحوح
رفا: يمعودة حتى الصوت يرجع
هزت راسهة تمسح دموعهة اخذت الموبايل مستندة على الباب اگلب بي و افتش كلشي مالگيت
دخلت للصور مدري شني ما شني هوسة
رجعت بالصور جني شفت شي وكفتة حاشرني حشر بينهن دخلت على صورتي مسحتهة رحت للمهملات
عود صرت نبهة اريد امسحهة اشوف السلة متروسة ترس صوري طگيتهن حذف كلهن سمعتة گام يصيح رحت نطيت التليفون لماما مشيت عايفتة
صعدت فوك غنوة تريد تروح للبيت حاولت وياهة ماترضى تستحي مبين هو يتأخر طلعت گلت لماما اروح ابات يمهة خطية لوحدهة
اخذت كم لبسة صعدت وياهة دخلنة تمسح بدموعهة التفتت الهة مستغربة:شبيج
غنوة:كلشي مابية مقهورة
رفا:صدك جذب غنوة شجاج غير گنالج يطلع
هزت راسهة ساكتة راحت غسلت خلتلي فراش نامت على الثاني حاضنة المخدة و تنوح باوعتلهة اضحك
رفا:اصورج هسة و اخلي ثگلج گبالة يطير
ردت تمسح دموعهة:مو عليه ابجي علية
رفا: ليش شبيج يروحي
غنوة: شكد فگر ولا مرة نعدلت وياي
مسحت على شعرهة مستخطيتهة رديت اخفف عنهة :لا تحجين هشكل انتي شعليج هو عندة مشاكل مبينة هاي السالفة قديمة
غنوة:ما طلعت الة هسة
رفا: ليلعب بالنار تحرگة قابل رجلج كاعد و ساكت
غنوة: شسويلة مخبل
ضحكت ابتسمت تعدل نومتهة حاضنة المخدة باوعتلهة بطرف عيني :اكليهة بعد
غنوة: بردانة شبيج
رفا:البردان يتغطى مو يحضن بالمخاد
صارن خدودها حمر ضمت وجهي هزيت ايدي واصلة مرحلة ويا و عابرتهة و تگول ما احبة اكرهة
رفا: شلون سامحتي
سكتت فترة و ردت متنهدة:ما مسامحة ضايجة انقهر على روحي بس مضطرة اضل وياه
رفا:ليش ماترجعين لهلج اشتغلي اي شغلة
غنوة:احنة مو مثلكم ما يرضون باب الشارع ممنوع اوصلة مو نوب متطلگة كلهة تضل عيونهة علية
رفا: اخوج ما يوگف وياج ،ماكو واحد من اهلج اعمامج زين بي هدة يوگف وياج
غنوة:محد من رجعتلهم راوني نجوم الظهر لو ما جسام موگفهم جان هسة اني شابعة موت
رفا:هذة جسام يحبج
طفرت تتلفت بالبيت تباوعلي خايفة:لااا شنو ماحبة والله
رفا:گلت يحبج ما گلت تحبينة على كيفج
ردت متوترة :مادري دلهم يگلي يريدج بس شلون اني جنت مخطوبة للاخوه گبل
كعدت على حيلي السالفة دسمة حجيت لسمعتة:مخطوبة لابن عمج و تزوجتي غيرة من رجعتي حباج اخو ابن عمج لجتني مخطوبة الة
غنوة:اي يمكن هيج
رفا: والله قطعة انتي بسرعة تنحبين
غنوة:بس اني ماحبهم
رفا:ولد عمج و دلهم
غنوة:لا بس همة ولد عمي ما احبهم ماريد اروح هناك اختنگ و هنا هم حايرة بروحي
رفا: ليش ماترحين لأخوالج
غنوة:ما اعرفهم بس سامعة عنهم
رفا:يجوز احسن من اعمامج بلكي امج عايشة
ردت تلعب بطرف المخدة:لو عايشة ليش ماتجيني هواي ايام احتاجيتهة بيهة اموت من الخوف
و الرعب ماعندي واحد يسمعني حتى بجي من يسمعني البنات يضلن يشككن بية
رفا:احط رجلي بگلبهن ذني الحقيرات
غنوة:اخاف منهن
رفا:اشوفج تكدرين
غنوة:هسة شوية صرت احجي گبل اخاف والله اذا صفية صاحتني ارجف من راسي لرجلية
رفا:محد معودج تحجين دوم يصير الغلط عليج عشتي وحيدة ماكو واحد يشد على ايدج الخلل مو بيج بعائلتج
غنوة:من اشوفج وافكر تدرين لسواه صفوان بيج ارحم بهواي من الصارلي من ورة دلهم بس اني رجعتلة احس اني بدون كرامة
هسة احطهة بخبزة و اكلهة هم واحد يگلي ليش حضنتهة مدت ايدهة تمسح بدموعهة ينزل غيرهن
رفا: حبيبتي لاتجلدين بروحج هيج انتي شبيدج كلهة معاكستج تطلعين من سالفة تروحين للاتعس منهة
غنوة:حتى لو تطلگت ما استفاد شي ارجع مكسورة جذب اكدر اعيش لوحدي كل واحد يعرف بيئتة اني اعرفهة حتى ما اكعد وحدي اجيب لحجاية لروحي ليسوة و المايسوة يحجي علية
رفا:الله يريح گلبج يعوضج عن الشفتي و يهدي زوجج و يعقلة شوية يخلي يهتم بيج اكثر
غنوة: انتي شتشوفيني مرخصة روحي
رفا: اشوفج حلقوم و غيوم و كل الحلويات
ضمت وجهة معبسة تداري خجلهة دغيتهة بخصرهة كشت روحهة تبتعد تلم الغطة عليهة مديت ايدي عاطت رايحة يم الحايط
رفا: ولجج غنوة عوفي المخدة خلص العطر بيهة
غنوة:شمسوية بش لازمتهة
رفا: اذا ما اصورج
غنوة:صوريني اكدر اجذب
ضليت اتشاقة وياهة نمت هي سهرانة للصبح سمعتهة تصلي كعدت توضيت و صليت كعدت يم الشباك من اشوف صفوان يخلص يومة يراقب بيتنة ارتاح نفسياً
هالمرة كاعد عينة للشارع سيارتة يم بابنة التفتت لغنوة اجت تعدل بشعرهة لابسة فانيلة جبيرة
و تراك مال بنات
رفا:رجعنة للتبهذل
غنوة: والله مالي خلق گلبي يوجعني
رفا:عدج علاج خاف من وجع الشقيقة
غنوة:لا راسي زين
رفا:ديري بالج على روحج مايصير هلكد تبجين مو زين ترة انتي بشر عدج طاقة تخلص
غنوة:مو بيدي اني حساسة
رفا:اوي .. وخري اني اسوي ريوك
بعدتهة رحت خليت الجاي گلت لصفوان اريد ريوك
مثل الحباب راح اشترة جابة صمون و گيمر كعدت
مخليتة گبالهة جبرتها تاكل گوة
مر اسبوع كل ما نحجي وية صفوان يگول هسة يطلع اني من يمي اختنگت شحال نزلت رايحة لبيتنة
غسلت ملابس اخواني نشفتهن
الساعة بالعشرة كلهة نايمة الولد يتعبون بشغلهم يذبون روحهم للصبح الة نگعدهم يالله يصحصحون
نفضت الملابس طلعت برة اشرهن التفتت مستغربة طفة الضوة مال الحديقة مديت راسي اباوع صار گبالي صفوان تأففت دايرة وجهي
صفوان:ليش مسحتي الصور
رفا:صوري و بكيفي
صفوان:هو موبايلج و تفتشين بي
رفا: صوري بسلة المهملات ويريدني اخليهن
صفوان: ادري بيج جلبة تفتشين بس تلزمينة
شريت القميص التفتت الة : ماتدري بية ذكية
رد يتقرب مني:مايرادلهة ذكاء
رفا: المهم خسرتك الصور
دنك ظهري صار على صدرة ابتعدت مسافة حجة يشاورني:لا موبايل واحد ولا ثنين لاحياطين لا عيوني صورج مطبوعة بكل مكان
رفا: و خنتني
عصر عيونة قوي خلة گصتة على جتفي حجية متنهد:تعبتيني شگد گلبج حجر
رفا:مو گلبي الحجر بس الزعل على گد المودة
صفوان: شنو ليرضيج بس فهميني اجيتج من كل باب
نفضت القميص شريتة رديت اضحك غصباً علية:لازم وصلتك ورقة المحكمة وقعهة خل تفض
صفوان: ايا عرمة يابت النداف
رفا:استقر عيني ابن النجار
لزم ايدي لف جسمي الة خلاني گبالة رد عيونة حمر ضاغط على فكة :تردين الطلاگ
خليت عيني بعينة تحرگني من الدموع :ايي اريدة
تقرب مرجع شعري ورة أذني عصرت ملابسي بيدي
حسيت بملمس شفتة على خدي بوسني بوسة هادئة على كيف گوة صبرت روحي و وگفت غمضت عيوني
ارجف رجع بوسني بأذني
حجة بهمس:أنتـــي طــالگ
غمضت عيوني دموعي نزلت على خدي وخر ايدة من خصري ابتعد رفع اصبعة يوخر شعري اللازگ على لحيتة يباوعلي معصب و مستعر
درت وجهي دخلت للبيت اخذت عباتي و طلعت رايحة فوك يم غنوة رجلية بادت كوة امشي مصدومة دكيت الباب فتحتة تباوعلي مستغربة
كعدت ما مصدگة خايفة من امي حجت تلزم ايدي:رفا شبيج شصايرر لاتخوفيني فدوة
رفا: صفوان طلگني
باوعتلي بصدمة كعدت يمي :جذب
رفا: والله هسة طلگني الخاين طلگني
غنوة:اي جا شبيج
رفا:مصدومة من وحدة طلگني الجبان
ردت تخلي أيدهة على گلبهة :ولج خمشتي گلبي گلت شو الصار على دلهم
هزيت ايدي اني وين هي وين گمت غسلت وجهي بعدني ما مستوعبة ماعرف شنو مشاعري قهر على صدمة و خيبة أمل
سنين مرت اني احبة من صار الي خاني ماكدر اوصف كمية الخذلان و القهر لعشتة بساعتهة ضليت اليوم كلة اضحك من الصدمة حضرت البدلة
وحجزت بالصالون و كملت كلشي من جهة احضر لبيتنة يوم كامل يالله استوعبت لسواه بية داس على كل مشاعري و فرحتي خلاني ماعرف شسوي
ماكدرت اسامحة استهان بية حتى لو مثل ما يگول غلط مايدري همة لعبو عليه بكل الاحوال ليش يروح للملهى هو توة عاقد ليش رخصني هيج
ضليت للصبح سهرانة معصبة بدون سبب ،مقهورة على أيام عمري الضاعن واني انتظر لاشي بس محتارة بمشاعري و خيبتي
.
.
غنــــوة
فزيت وية الاذان گعدت صافنة على السگف امسح على گلبي بضيق مر فوك الاسبوع لهسة ما طلع خايفة لا يروح بيهة محد الة يوگفلة غير صفوان
كعدت تضويت اصلي كملت تقربت من رفا نايمة بسابع نومة امس تطلگت الصبح تعاركت وية امها
صبحت عروس الضحكة شاگة الحلگ و المكياج بفلس ولا جنهة امهة صعد ضغطها من وراهة
فتحت الشباك كعدت اباوع للشارع هيج وكت جان يرجع اضوج من يجي متأخر هسة غير يجي والله گلبي خلص من مشاكلة
كعدت رفا صلت و ضلينة كاعدات خلصنة قوري الجاي كلة وحدة تشتكي للثانية عن همومها نوب نزلت تبدل مشت لدوامهة ضليت وحدي
انتظرتهة للظهر وقت الغدة توني مكملة صلاة اخذت الموبايل اخابرهة بلكي تحاجي صفوان تعرف اخبار دلهم منة
ندك الباب گمت بضوجة فتحت الباب رمشت بصدمة اشوف علوان كدامي و اسمع صوت غفران
و ابنة حضني مكيف بية ضليت مصتكة لا اخذ ولا انطي بس اباوع بوجهة
غفران: دخيلك ياعلي شني معيشج بگن شو معلگة فوك جا وينهة فلوسة
دخلو واني فاكة حلگي ذولة شجابهم هنا سديت الباب متنهدة التفتت الهم علوان كعد ماخذ راحتة
و هي تفتر و تباوع لكل مكان تهز بيدهة ما عاجبهة
علوان: نثولتي جاينج خطار تصفنين بوجوهنة
بلعت ريك رديت متوترة :استـ..استغربت
علوان:شبيج استغربتي فوك ما تفرحين
غنوة:اي فرحت هلة بيك
علوان:رجلج وينة
غنوة:بالشغل
هز ايدة يضحك عگدت حواجبي مستغربة كعدت غفران بصفة تشاور بي و تضحك مشيت للمطبخ راد ماي اخذتلة بطل
نزلت عيوني لحسوني مبتسم شابك رجلية مسحت على راسة كعدت بوستة گوة علية مبتسمة ماريد اعبس كدامة خطية طاير من الفرحة
جان وقت غدة غفران تفتر علية شنو غداج
و شمسوية تحجي على دلهم و تغلط عليه فگر
و حظج يحيبلج بس الفگر
رديت بهمس خايفة من علوان:شعليج اني مرتاحة
و قانعة لا تدخلين
غفران:راضية بهذة الگن الكاعدة بي
غنوة:اي راضية
جرتني من ارادني تحجي بهمس: ونطاج الحاضر
غنوة:معليييج
غفران:طلعي الفلوس الضامتهن على گلبج ارضي علوان خل يرجع ترة يدري برجلج محبوس
عفت الي بيدي بصدمة اباوعلهة :منيين يعرف
غفران: ماجد ابن عمج مو هناك بالسيطرات يوكفون عارف من جماعتة من سامع الاسم ناشد خابر علوان يگلة نسيبك كاتلة واحد و مسجون
غنوة:جذذذب دلهم مامسويهة يتبلون عليه
غفران:هسة هوة مسجون صدك جذب ماندري
غنوة: تغدو و روحو شغلة كم يوم و يطلع دلهم
حجت تاخذ الصينية من ايدي:احجي وية اخوج مو وياي
مسحت وجهي متنرفزة من شوفتهم هنا كعدو يتغدون هي تتبطر شنو هذة الاكل ليش المرگة مابيهة لحم ليسمعهة عشاهة كلة باجة و كراعين
راسلت رفا حجيتلهة بلكي يجي صفوان اي واحد يخوفة يخلي يروح و افتك من مشاكلهم ،دگيت على رجلي بقهر كون الزم دلهم الة اخنگة
كعدت اعصر بصابعي اباوع لعلوان خايفة حجيت بتردد: ءء دلهم يومين و يطلع لا يضل بالك تكدر تروح
علوان:راح يقبط الشهر هو ماكو تضحكين على روحج شني كعدتج وحدج هنا الله اعلم شيصير عليج
غنوة:مايصير شي اقاربة هنا هو وصاهم علية
علوان:هذة الوكت ما يتأمن گعدتج لوحدج مو راهمة تجين وياي من يطلع نتفاهم وياه شني يومية مخليج بمكان
غنوة:بـ...بيت خالتة هنا هي تجي تجي تبات يمي ما ضالة لوحدي
اشر بيدة رافض اكمل حجة بحدة:ماتكسررين كلمتي تجين ويانة هذة رجلج خل يتحمل المسؤولية شوية شني يومية شامرج و عايفج لاگيج على كد ايدة
زفرت بضوجة هسة لو اكتل روحي مايتفاهم گمت افتح الباب اجت رفا توهة واصلة تلهث صاعدة الدرج ركض حجت تلزم ايدي
رفا:مرت اخوج جاية
غنوة:اي هنا
رفا:راح احوس گلبهة حوس
ذبت علاليگهة تريد تهد لزمتهة بسرعة:ولجج رفا اخوي هنا فدوة هذة ايدة و الضرب تكبر السالفة خل تولي
رفا: اووي دادا خايفة منة خل يضربني اذا زلمة
سديت حلگهة خايفة:اشش اش ولجج حباب عوفيهة رفا:شعدها جااية المسعدة
غنوة:واحد من ولد عمي گايللهم دلهم مسجون اجو حتى ياخذوني
رفا: سبحان الله شلون محبة نزلت عليهم اللهم صل على محمد وآل محمد
ضميت ضحكتي هي تگرص بيدي تريد تكتل غفران
نزلت وصيتهة تخابر صفوان بلكي اكو خبر من دلهم يسكتهم و يعوفوني
رجعت لميت الهوسة هو يلح علية الة اروح وياهم هسة صرت عزيزة رتبت البيت قفلت الغرف غفران
تدور وراي طلعت مخنوگة يالله يجي دلهم وارجع
نزلت وراهم بيدي جنطة عفتهة رحت سلمت على ام رفا و عليهة هم طلعت شفت صفوان واكف يمهم
هو يسألة على دلهم ذاك يباوع للسمة
رجع حجة برود: ماعندة شي يومين ويطلع
علوان:تگولون يومين راح يقبط الشهر عايف مرتة وحدهة صدك ماعدة غيرة
صفوان: نطي شوية منك هاي دبة هنا اجيبهة تترسهة
دنگت عاضة شفتي اباوع لرفا وجهة احمر تضحك اخوهة يدك بالباب يردهة تسكت نغاض علوان من ردة ضل يخوزر حجة ويانة بنتر حتى نروح
صفوان شغل سيارتة و عدل اسلوبة قنعة يوصلنة
صعد المهم مايدفع كروة كعدت ورة مخلية الجنطة گبالي العب بالسحابة
الطريق كلة مشغل اغنية كل ما يحجي علوان لو يسأل يعلي الصوت طرشنة طرش خليت راسي بين ادية راسي يوجعني الصوت يرن رن
گتلة ينقصة شوية قللة لحد ما وصلنة للبيت اختنگت من وراهم واحد يحجي وثاني مغلس وضع مو مريح علوان ليش يخلي روحة بهيج موقف اكره هاي تصرفاتة
نزلت بيدي الجنطة دخلت للبيت حتى ما اسمع نقاشهم ذبيت عباتي تلگني البنات سلمت عليهم كل وحدة لازمتني من ايد افرح من اشوفهم
نص يوم بدت سوالف علوان يغلط و يسب بدلهم عود يريد احجي اني اكيف من يسب ابوه لان كل المشاكل من جوة راسة
يومين جزعوني بيهن حتى الشقيقة صارت ما تعوفني رغم مايضربني بس الحجي ينرفز و على الگايمة و الگاعدة يصيح على البيت و ماعدنة منين ناكل و ربينة و كبرنة
ليسمعة يگول غنوة تلف كباب بالخمسات و تمسح دموعهة بعشرات طاگني الفكر اكثر منك يجوز انتة احسن اني حتى بيتنة ايجار
بس ماحجيت حتى ماتشمت غفران ضليت اضحك
كل مايحجون العب وية البنات مغلسة عنهم ،رفا
تتصل بية تگلي سوي هيج و لا تردين و غوريهة
صدك تونست هي تنغاض من تشوفني مرتاحة اكل
و اكعد ماتكدر تحاجيني خاف عدي فلوس و بعدين يطلعن
صادف خميس بيت جدي مسوين ثواب عزمو علوان
رحت على عنادها رغم خايفة من الحجي و سوالفهم
لبست خليت مكياج و رتبت وجهي فاتحة كامرة وية
رفا هي تنطيني دروس على گولتهة شوية راحت خلت الجهاز عد امهة
سلمت عليهة مستحية من سوالفنة هي تضحك تأيدنة اول مرة احد يشجعني على الخباثة الگة روحي افضفض الهة و تنصحني حالي حال رفا
خاتون:لاتصيرين عوبة خالة خلي روحج ثگيلة وسلمي على الكبار ديري بالج تنطين برجلج كدامهم
حتى محد يضحك عليج بعدين
رفا:يمة هو غير مصخم الشرايع حتى صبغ مايفيد
خاتون:اسكتي انتي لاتسمعين لهاي المخبلة اعملي بخلاقج لا تنزلين من روحج
هزيت راسي اخطط بحواجبي رفا تغمز شابكة امهة
تأشرلي اني مگابلتهن اشوف روحي بالكامرة صاحتني غفران لميت الهوسة بسرعة و طلعت
لبست الحلقة و السوارات اطكطك بيهن و اضحك غير يجي ابن الشفية حتى يرتاح گلبي اووف هسة شحالة گلبي صار نار من القلق عليه
صفوان يريد يرهمهة ماتصير رغم ماكو دليل بس هذة نعمان يجرجر بيهة كل ساعة مطلعين سالفة جديدة عليه يردون يضيعون القضية لحد ما يبلونة بسالفة مايطلع منهة
فتحت الباب طلعت بيدي عباتي تباوعلي معبسة تهز بيدهة ابتسمت بوجهة لبست طالعة گدامهة
البنات لازمات ادية كل وحدة من جهة طلعنة الغروب مشي لبيت جدي وصلنة سلمت بهدوء شكد اكرهم حتى عمتي ام هلال سلمت عليهة بهدوء
هي حجايتهة ثگيلة مدري شبيهة علية من لمن اجت بفاتحة اسراء حسيتهة متغيرة ،كعدت بصف جدتي
ماحركت ادية ولا اشتغلت تعشيت و رجعت
و غفران و شلتهة رجعو وراي بعدين تذكرت اني طالعة ما گايلة لدلهم يالله الغايب عذرة وياه مدري شلون بعدين اگلة و يرضى مايحجي
انتبهت لموبايلي رفا تدز سمايلات تغمز و قلوب استغربت فتحتها اشوف الرسائل كومة كلهة ضحك
كاتبة"ها نسيتيني " "اجاج الحب بعد اني بيش الكيلو" "وينج عود انتي الثگيلة "
رديت مستغربة"ياحب شبيج"
شافتهة دزت سمايلات تضحك كتبت "غير دلهم جايج"
فزيت كاعدة على حيلي خابرتهة ما صبرت اضل گاعدة گمت افتر و احجي:وينة وين اجة يمتة طلع
رفا:يبوو خربت المفاجئة طلع الغروب من جنة نحجي وياج اجة اخذ المفتاح و توقعت جايج
غنوة:ماكو ما أجة ولا خابرني
رفا: يجوز بالطريق عبالي واصل يمج
غنوة:هسة وينة ،شلونة فدوة شفتي
رفا:اي شفتة كلشي مابي ارتاحي
سديتة منهة اتصلت عليه اختنگت من طلع مشغول فصلتة انتظرت شوية هو اتصل ضليت لازمة الموبايل و اضحك لحد ما فصل رجع اتصل
فتحت خط لازمة الباب :دلهمم
رد بهمس:گلبة و روحة و اهلة
غنوة:وينك جاي علية
دلهم:ياهو الگ***" الگالج
حجيت بضحكة:رفا
دلهم:ابوس ليضحك من شفتة
راحت ضحكتي ضليت اروح و ارجع بالغرفة ماعرف شگول وجهي صخن ضاغطة الموبايل على أذني
غنوة:وصلت
دلهم:اي راح انزل بشارعكم
غنوة:منين اجيت من الشارع لو من البستان
دلهم: انتي منين تردين اجي
غنوة:من البستان اريد الاگيك
رد بضحكة:يالله تعاي ديري بالج
سديت الموبايل رحت لبست عباتي بدون حجاب من طفگة وصلت للباب و تذكرت رجعت البسة و عدلة
طلعت رايحة من الباب الورة فتحتة مشيت اتلفت
من بعيد شفتة جاي بيدة الموبايل يضوي بي عگد حواجبة ضليت منتظرتة
حجة بصوت يسمعني : صــغير بــعدك رايـح ويـن
ليشــوفوك الصيــادين ..شلــون تأمـن وانتة تجنن
ضحكت لحد ما وصلي رفعت ادية حاضنتة شالني يفتر بية مخلي وجهة برگبتي من جوة العباة يبوسني
غنوة:اجيت
رد يبوس خدي: اجيت ياحبيبة الروح
نزلني مدنگ علية باوعتلة بضوجة اشوفة شلون متغير هنة تلث اسابيع شمسوين بي صاير هيج
غنوة:عمت عيني شوف شصاير بيك
رد يبوس عيوني:سالمات الحلوات كلشي يصير خل يصير
غنوة: عود ليش يسون هيج شكد خبثاء
دلهم: يابة نازكة من الله
ضحكت بوسني بخدي حضني لصدرة يمشيني وياه
رجعت لبيتنة گالي استعجل اجيب اغراضي حتى نرجع دخلت اجر بيدة وراي
حجة يعض اصبعي:ماتستحين تجيبين زلم لبيتج
غنوة:لا ما استحي
دلهم:ادبسزز
غنوة:تعال ادخل اشرب ماي جاي
حجة بصوت عالي:انام بحضنج
التفتت الة اخزرة سحبني صرنة وجه بوجه بوسني بشفتي حجة:خل نرجع لا انزع المستحة
غنوة:بس الم هدومي غير تستراح شوية
دلهم: نرجع و استراح
باوعت بالمطبخ ضلمة طلعت دولكة ماي نطيتها الة
راح يم الباب منتظرني لميت اغراضي بسرعة شديت الجنطة طلعت صارت بوجهي غفران
حجت رافعة حاجبهة : ويين مولية
غنوة:دلهم منتظرني وخري
حجت تدفع جتفي:وتطلعين مثل ما ترجعين
عگدت حواجبي لزمت ايدي اجت تجر واحد من السوارات سحبت ايدي و عطت بصوت عالي رجعت ليورة خايفة عبرتهة
طلعت شاردة لاگاني يم الباب مستغرب سألني كتلة عثرت ضل يوخر بالعباة عن رجلية اني واكفة اعدل بالسوار لا يطيح
اخذ الجنطة من شافني كلشي مابية طلعت وياه شايل الجنطة بيد ومخليهة على جتفة و ايدة الثانية حاضن جفي بيهة امشي مبتسمة
حجة يباوعلي:هسة لو اخذج للذبح تضلين شارة الحلگ
غنوة:مو صوجك صوج لتفرح بيك
دلهم:متعافي
غنوة: رافس النعمة
دلهم:ومشتاقلج
عضيت شفتي مبتسمة دنگت العب بطروف العباة
وگفنة على الشارع ضلمة و صوت الجلاب مسموع
وما خفت لازمة ايدة متطمنة
وصلنة لسيارة صعدت خلة الجنطة ورة اجة شغلهة ملتفتت علية قرب راسة مني يبوس خدي و يعضة
دلهم:شو مرتاحة و سمنانة ولا جن رجلج بالسجن
غنوة:لو احبك بجيت عليك
دلهم:أيا بذاتة اخت المسلوك
غنوة: اجة اخذاني من بيتنة ضل يحجي عليك شكثر و سب ابوك
دلهم: والله
غنوة: والله شكد سباه
دلهم:جا انتي شبيج مكيفة
التفتت الة فشلانة ضحك يخلي جف ايدة كلهة بوجهي و يعصرة بصابعة دفعتة مختنگة من الحركة
غنوة: يمتة طلعت
دلهم:العصر على ماخلصنة الاوراق و الهوسة رجعت الغروب لگيتج ماكو
غنوة:مو بيدي علوان ضل يرزل و يحجي خفت يضبرني و اتفشل كدام اهل رفا
دلهم:ضربج
غنوة:لا بس يرزل و يحجي عليك
دلهم:اشوة .. خو ما زعلوج بگعدج يمهم
غنوة:اني زعلتهم ضليت اضحك و مكيفة
دلهم:و رجلج بالسجن
غنوة:من ايدة جا من ايدي
دلهم:اني اعلمج خل اختلي بيج
شهگت ضاربتة على رجلة التفتت متحلف بية شكد ما الطريق بعيد و موحش ما حسيت بي لحد ما وصلنة تفاجئت راجعين لبيت اهلة القديم
التفتت مستغربة:مو بعتة
رفعت راسة بسرعة حك خدة :لا
خزرتة بضوجة:ليش تضحك علييية تگلي بعتة و قسمت و مدري شنو ورث خالتك مدري جدتك
دلهم:ما نطاني گلبي ابيعة
غنوة:ليش تجذب علية
دلهم: حتى ماتگليلي نرجع هنا و اني ما حامل الرجعة
غنوة:هسة المن اجيت
دلهم:اخذ اغراضي ونرجع
غنوة: عود ليش دوم تجذب علية
دلهم: من نرجع نتفاهم
باوعتلة بضوجة مكيف ولا جنة مجذب علية نزل فترة رجع بيدة اغراض صعدهن سحب سلاح خلاه بالجكمجة سداه رجعت نفتحت
مديت ايدي اخذتة جان مدنك يضم بالمفاتيح شغل السيارة وية طگة السلاح ماعرف اسحب اقسام بس من جريتة رجع لمكانة مطلع صوت
التفتت بسرعة اخذة مصدوم نزلاه جوة الكشن حجة خازرني:شسوووين
غنوة:اشوفة يرمي
دلهم:استلك اخوج بت الفارسية هي هيجج المن تسحبين اقسام بالله اجت بيج طلقة وين انطي وجهي
غنوة:على كيفك هو اني اعرف هيج سحبتة
دلهم:لاتلزمييينة
گلباه بين اديه مبعدة عني تأكد ما ساحبة اقسام رجعة باوعتلة ضايجة مسح وجهة مشة عينة على الطريق عاصر الستيرن بين اصابعة
دلهم:لاتلزمين اسلاح لاتوصلين يمهن غناوي كلشي يصير فجأة بدون حساب اخاف عليج
دنگت العب بخيط العباة حجيت بهمس:اسفة
دلهم: واني هم اسف
غنوة: اي انتة لازم تعتذر مني هواي
دلهم: للصبح شكد ما تردين
باوعتلة امثل الضوجة درت وجهي للجامة ضامة ابتسامتي وصلنة للبيت نزلت سابقتة اجة وراي فتح الباب حاضني ايدة على خصري دخلني وسداه
حجة يشاورني: شمسوية بهاي الايام ولج
غنوة:كلشي مامسوية
رد بهمس ناصي: جا شبية ميت عليج اني
طگيتة بعكس ايدي وخرت شغل الاضوية تنفست براحة شكد ما البيت صغير بس احس براحة بي
و حرية مو مثل بيت اهلي
حجة يستهزئ بية:مو تبوسين الحياطين
غنوة:حتى انتة ما ابوسك
دلهم: لا تعبين روحج اني ابوسج
باوعتلة بغرور مشيت اعلگ عباتي واحجي:انتة كل ما تنسجن تضل تباوس شبيك عود
دلهم: فوك ما مشتاقلج
غنوة:لا والله صدك
دلهم: اشتاقلج
ضحكت انزع شالي فتت للحمام غسلت وجهي من النعاس طلعت ادور بالجنطة على شي مريح البسة
بدلت رحت تمددت يمة
غنوة:شعجب مانزعت الفانيلة
رد يخلي ايدة على عيونة: بردان
كعدت مديت ايدي اوخرهة لزمهة يگرص بخدي عيوني غورگت بعدت ايدة اشوف ظهرة صاير خرايط من الضرب مثل الشگ من الجتف لحد نهايتة بعد ايدي يعدل نومتة
بجيت مقهورة مسح دموعي يحضني :شش عليمن تبجين يطيبن ويروحن
غنوة: ليش هيج شعدهم وياك
دلهم: هاي بعد ليدخل السجن يتورط على روحة
غنوة: شوف سودة علية حتى جتفك شلون ضربوك هيج
دلهم: يردون يوخرون الوشوم كافي عيوني شكم يوم و يطيبن لا تبجين تهيج عليج الشقيقة
لفيت ادية على رگبتة حضني اديه على ظهري بوستة برگبتة اشمة احس مشتاقتلة كلش مادري شسوي
دلهم:غاوي غناي
رديت خانگة صوتي:اشتاقيتلك
حجة يبوس جتفي: اعترف الثگيل
غنوة:بس شوية
دلهم: عمي زين و حصلنة
غنوة:يالله نام اني سوالفي ماتخلص انتة تعبان
دلهم: فلي راسي صار ايام ما نايم عدل مسطور سطر
غنوة: تعال مسوية وياك هدنة اليوم
دلهم: مو بيدج كلاوجية
ابتسمت مخلية ايدي بشعرة راسة فوك زندي احرك اصابعي بهدوء لحد ما حسيتة غفة ماتحركت خاف يفز هو نومة خفيف ضليت هيج منا لمن سيطر علية النعاس و غفيت
كعدنة متأخرين العصر كلش گمت غسلت توضيت
اصلي اخزر بي لحد ما اجة صلة كدامي يالله عفتة
رفا جابتلنة عشة لازمة الباب احجي وياهة بهمس اشم بالاكل عاقجة ملامحي اباوع للدولمة مكشمة
حجت تگرصني:شبيج ترة طك ظهري واني اسويهة
غنوة:ريحتهة مو طيبة
حجت تبز خاصرتي بصبعهة :اي عيني احنة مانعجب
دفعتهة اضحك دخلت مخلية الصينية على الحاجز
رفعت الخبز بس التمن عجبني برياني الباقي جزت روحي منهن جني شبعانة كلش
على ما طلع دلهم من الحمام خليت الصينية بالگاع
طلعت الماي اشرب اول ما بدة ياكل سوالي لفة لحم و خضرة مدتهة الي دفعتهة
غنوة:ماريد زفر
حجة مستغرب:منين زفر كلشي مابي
غنوة:ما اشتهي اكل بس برياني
رد يخلي المرگة كدامي بيهة لحم هم دفعتهة جانت مال لحم حمرة و تمن و مسوية دولمة اشكال اشكال الاكل بالايام العادية انظف الصينية كلهة
دلهم:شبيج ماتاكلين زعلانة
غنوة:لا ما اشتهي
دلهم: اجيبلج روبة
باوعتلة افكر هزيت راسي رديت :اذا بيك حيل
حجة يقرب وجهة مني:بوسيني ويصير بية
ابتسمت ابوسة بخدة گام اخذ فلوس راح اشترالي اكلت الماعون كلة و راسلت رفا ودتلي بعد باقي الاكل كلة ما ردتة
عزلت المطبخ رحت للغرفة اوصل للجنطة و ارجع
جبرت روحي غصبا ما علية اريد اصير مرتبة من صدك طلعت قميص احمر ضميتة مستحية
رجعت طلعتة طگت روحي اخذتة ضامتة جوة ملابسي فتت للحمام وصلتة تعال يامن تلبسني
و تطلعني اباوع بالمراية ماكدر استحي من روحي
مشطت شعري طلعت الحمرة من جيب الثوب يگول اهرب مخدرات لو تشوفني رفا الة تكتلني
خليت صارت طوخ ماعجبتني يگول ما شتيفة مسحت شوية منهة جذب طيرتهة كلهة كملت رتبت روحي مديت راسي من الباب
حجيت متوترة:طفي الضوة راسي يوجعني
رد متعاجز:من تطلعين طفي
غنوة:حبااب الشقيقة هاجت علية
گام يباوعلي مقلص عيونة سديت الباب طفاه شلت هدومي خليتهن بالسلة افتريت فتحت الباب شهگت صار بوجهي غمصت عيوني مصتكة من الخجل
حسيتة تقرب يمي حجة بهمس: بيا جهنم يخلونج ولج تريدني اطفي الضوة
تنفست متوترة عاصرة طرف القميص اسحب بي لزم ايدي حجة قريب علية : عوفي هو گصير تحلفينة بعد
غنوة:حباب دلهم
رد حاضني: جذاب اني مو حباب
ضحكت مدنگة حسيت بشفتة على خدي شالني يبوس بية حاوطت رگبتة بثنين ادية بوسني بحنجي
و برگبتي انكمش من اسمع صوت البوسة
دلهم: ولا تراعين مشاعري بت الفارسية
غنوة:شمسوية
دلهم: صاكة خرب عرضج و عرض اهلج
بوسني بشفتي غمضت عيوني ابادلة مشتاقتلة لاول مرة احس بشعور يختلف كل مرة اخجل اضل جامدة هسة ماعرف شبية حابتة
بوس راسي يغطيني ايدة بشعري حاضني لصدرة تنهدت متوترة كل شوية اقرب عليه أكثر مستحية من روحي
دلهم: باجر هم انسجن
رفعت راسي متفاجئة :ليشش
دلهم:اذا كل سجن وراه حضن هيج
غنوة:هاي بس اول مرة
رد رافع حاجبة: قصدج تتعودين
غنوة:اي يصير فراقك و وجودك عادي
دلهم:كلاوجية
غنوة:احجي الصراحة
دلهم:اي صدك شكد صريحة انتي
ضحكت ضامة راسي بحضنة حجيت اتلمس ايدة:مدري شبية
دلهم:شبيج
رديت خجلانة:مادري هيج مشاعري مدري شبيهة
دلهم: شبيهة ياروحي
غنوة: اريد اخنكك
دلهم: همزين السلاح خليتة بالسيارة
غنوة: لا والله اكلك دلهم
رفع وجهي مبتسم حجة يبوس خدي: مخبل بيج
و خبل
رمشت مستغربة :شنو
دلهم: شكد ما اريد اصير عاقل همة يخبلوني حبيبتي غناوي
يحجي اباوعلة مستغربة حضني لصدرة حيل يبوس جتفي حطة بهمس بينة يشاورني :حرگت گيعانهم
دفعتة مصدومة اشر بأيدي:منو منو
دلهم:نعمان و صلاح
خليت ادية برگبتة من العصبية: ليشش
دلهم:داسو راسي بالسجن طيحو حضي واسكتلهم
غنوة:انتتة ماترتاح الة تجيب المصايب لروحك
دلهم:لا والله ما ارتاح
دفعتة ضايجة سحبني بصفة حجة بلطف :عليمن عگدتي الحاجب مايدرون بية جنت الصبح بالسجن هنة احتركت لا يمهن ولا گرباهن
يحجي على كيف يشاورني مشاور رديت اعض اصبعي:بالله بيهن ناس ماتو واحد صار بي شي
حرك راسة :لا محد موجود تأكدت
غنوة:منو لحرگهن اذا انتة بالسجن
رد يرفع شعري ليفوك:اني بليتهم بنار والله بلاني بنار بين ادية ماتطفى
غنوة:شكد مستفز
حجة ببتسامة واسعة: وفرحان و گلبي برد احسن اجيج معصب مغثوث
غنوة: مخبل
دلهم: فد ادبسزز
غنوة: والله مخبل انتة ماتكعد راحة ابو المصايب
دلهم: مسودن ماعوف سالفتي
دفعتة من جتفة حك لحيتة برگبتي ضحكت ادفع بي
حضني قوي يبوس خدي بكل قوتة يطلع صوت عالي
دلهم: بتت الفارسية
غنوة:شلون ما انام وخر نعست
دلهم:نامي عمري
غنوة:خاف تطلع يروحي
رمشت مستغرب واني هم استغربت عود اريد اگل خاف تطلع و تروح صارت يروحي اول مرة اتغزل بي
بوسني رفع ايدي مخليهة على خدة شوية و ايتعد يبوس راسي يمسح على جتفي حضني بهدوء لصدرة
غمضت من كل گلبي اتمنى الله يهدي و يعيش
شكرا لزيارتكم عالم روايات سكيرهوم
