رواية جذبني فمك البني الفصل التاسع عشر 19 بقلم عبير إدريس

القريب قال : اقتلو يوسف

واما الغريب فقال : اكرمو مثواه

وان الحب رزق ، وانك لاتعرف

في اي قلب رزقك

ربما في قلب ذاك الغريب القريب

________________

البارت منقول عن لسان سيلين وايفين..

ايفين

اباوع على اختي انهارت تبجي وتملخ بنفسها حسيت راح اخسرها ردت اكوم اتعارك بس ما اكدر اعوفها وخفت لا اني هم اتأذه وشلون اختي منو الها ضلت بحضني تبجي ولازمه ملابسي بكل قوتها اباوع هدومها متمزقه طبع ازرك بجسمها مال ضرب قديم متت قهر ضليت اتحسب على امي بصوت عالي الى ان تعالت الاصوات بين امي وزوجها سيلين مدت ايدها ترجف خلتها على حلكي يعني اسكتي تريد تسمع سكتت وبلشنه نسمع الحديث الدار بين امي وزوجها..

سيلين : شبه فقدت ما احس بالدنيا ورجفه لزمتني الرجعني للوعي وخلاني اركز انذكر اسم بابا بالعركه سكتت ايفين علمود نسمع وهاي جانت القاضيه بالنسبه الي ...

تماره : رجعلي فلوسي فلس فلس وتتنازل عن البيت غصبن عنك ليش شناقصني وتباوع لبنتي هااا شناقصني شو مدللتك دلال واحبك وممقصره وياك..

غزوان : هااا تردين ارجعلج البيت لازم نسيتي الاتفاق خانم..

تماره : منسيت وانت بهذا الكلام تدين نفسك واي اثبات عليه ماكو.

غزوان : ولا عليه اصلا دفعته والكل التهى بيه عبالهم وكع شلون تثبتيها عليه وين دليلج وين شهودج..

تماره : اكدر اعترف عليك ..

غزوان : اعترفي واكول انتي جانت عندج علاقه بيه من قبل والتحريض جان منج وانتي اللي كلتيلي خلصني منه وعندي ورث انطيكياه شمدريني عندج ورث شمدريني شعندج ماعندج وسجلتي البيت بأرادتج ماعرف خوف لا احجي كلشي..

تماره : وانت حجيت لصلاح ماقصرت خليتني بحلكهم..

غزوان : هذا جان تأديب الج حتى مره ثانيه تجرين عدل وياي..

تماره : بس انت حقرت ويايه انت البلشت من كمت تجيب نسوان صغار للبيت واني موجوده..

غزوان : لعد شمنتظرة مني اضل عليج ليش يابه شناقصني ، كلتها الج الف مره وراح اعيدها الباب يوسع جمل عجبج تبقين تخدميني اهلا وسهلا ما يعجبج روحي والهوه بضهرج..

تماره : امنت بيك مادريت راح تعض الايد التنمدلك..

غزوان : مجرم شتترجين منه خريج سجون وحاير شلاعب وشمسوي شجابج عليه ههههه يمكن حبيتي شكلي مو تموره.

تماره : حبيتك الك بس انت طلعت متستاهل..

سيلين : دتسمعين لج تسمعين الكاعد اسمعه..

شهكت ايفين وخلت ايدها على حلكها..

ايفين : مستحيل اكيد تتشاقى لالا ممعقوله امج توصل هيج مرحله وصلاح يدري وساكت عن دم اخوه..

كمت بضعف اريد اوكف ما اكدر رجلي ترجف وصلت للباب سندتني ايفين وصلتني للهول ركضت عليهة ضربتها بصدرها حيل وعطت بعلو صوتي ..

سيلين : الله ياخذ حق بابا منج يا مجرمه يانذله..

وبعدها فقدت ماحسيت بالدنيا ..

ايفين

سيلين انهارت طلعت كوه تمشي عاطت جمله وحده و وكعت بالكاع فقدت ، اجتي امي رادت تلزمها عطت بيها ..

ايفين : ايدج عنها لتنكسيها ..

تماره : خل اشوفها شبيها..

ايفين : خاف تكليلي خايفه عليها لج التكتل رجلها هاي شنوو نترجه منها تخاف علينه لو تحن لو تخاف الله بينه انتي شنو من ام انتي .

تماره : مكتلته اني هذا سكران وبكيفه يخربط.

ايفين : صح مكتلتيه بس حرضتي على قتله ودفعتي فلوس اللي هيه ورث بناتج اليتيمات وخليتينه نتبهذل بالبيوت نخدم بلكمتنه لو ما عمه تنتشلنه جان ضعنه اني وسيلين لهذا معليج من عدنه كومي من وجهي احسلج..

كمت اكلب ب سيلين اكعد بيها متكعد اضرب بوجها على كيفي فاقده تخبلت ..

تماره : كتلج سكران ليش تصدكين بيه.

مجاوبتها عفتها والتهيت بسيلين ..

هيه اخذت رجلها وفاتو جوه بغرفتهم ،

ضليت ابجي على اختي حايره شسويلها بس اللي ريحني تتنفس ونفسها منتظم ...

خليتها على رجلي وامسد الها واقره عليها ايات للصبح ساعه ثمانيه ضبط اندك الباب ،خليت راسها على الكوشه و طلعت فتحته عمو ادهم وايمن جايين عبالك شفت ابويه من شفتهم ضحكت وعيوني متروسه دموع..

ادهم : وين اختج طلعو بسرعه.

ايفين : عمو اختي نايمه من البارحه..

عكد حاجبه.

ادهم : شبيها نعسانه لو شنو..

ايفين : لا تعاركت ويه ماما وتخربطت.

ادهم : زين ليش شنو السبب..

دنكت راسي وضليت افرك بيدي شكول شحجي ..

ادهم : لتسكتين ايفين احجيلي كلشي اريد افهم شسوت امج احجي..

ايمن : احجي لتخافين لان راح ناخذكم ويانه هيج هيج متشوفوها بعد..

ايفين : وره محاول يعتدي على اختي ضلت تقاوم وياه وتعبت ورجعت سمعت ماما تكول ....

سكتت..

حجه من بين اسنانه بغضب..

ادهم : كملي عاد مو موتيني..

ايفين : سمعناها تكول لزوجها انت شمرت وضاح من العماره وهو يكللهة انتي حرضتيني على القتل وكلتي انطيك الورث...

صفن بوجهي مصدوم ايمن ضرب ايده بالباب حيل وكام يستغفر ويفرك بوجها..

ادهم : ما سجلتي كلامهم..

ايفين : لا من الصدمه معرفنه شنسوي..

ادهم : اختج وين سويلي طريق افوت..

ايفين : تعال ماكو احد..

دخلو وصلو للهول باوع على سيلين والتفت دار وجها ونتر ب ايمن.

ادهم : دير وجهك وانتي مو كتلج

سوي طريق فوتي ستري اختج ..

باوعت على سيلين نسيت ملابسها متمزقه ونسيت اصلا اغطيها راح من بالي..رحت جبت جرجف وغطيتها بيه..

ايفين : غطيتها عمو..

التفت ونفخ بنفاذ صبر خصر ايده وكال لايمن.

ادهم : هاي شلون نشيلها ..

ايمن : ماعرف..

ادهم : جيبي بطانيه .

ايفين : اي اي هسه ..

ركضت للغرفه وجبت بطانيه اخذها مني وفرشها بالكاع ..

ادهم : ايفين اكلبي اختج على البطانيه تكدرين.

هزيت راسي وكتله.

ايفين : اي اكدر..

كلبتها مثل الدعبلتها..

ادهم : لتخليها على وجها تختنك.

ايفين : اي اي .

ايمن : هاي شبيها خاف ماتت يمعود نوديها مستشفى ..

ادهم : مابيها شي متعرضه لانهيار عصبي...

ايمن : شلون لعد..

ادهم : معليك انت بس شيل من الطرف وانه من طرف.

شالوها بالبطانيه واحد من يم رجلها والثاني من يم راسها وطلعوها وصلو لباب الهول وطلعت ماما شافتها تخبلت كامت تصيح وتعيط بناتي وين ماخذين بناتي ، مجاوبوها طلعو سيلين خلوها بالسياره ليوره ضل ايمن يمها ورجع عمو ادهم فات للبيت وصاح يلا ايفين امشي..

تماره : تعال تعال شو بكيفك تطب وتاخذهن عم اخ خال وليد انت ..

باوعلها بروود على اشمئزاز خلاها متعرف تحجي بعد..

ادهم : ايفين عوفي كلشي وجيبي بس الضروريات والباقي انه اشتريه الكم يلا تره لعبت نفسي ...

ضلت ماما تصيح...

تمارة : بناتي اني اربيهن على ايدي انت غريب شنو تاخذهن الظاهر متفهم بالكلام..

ضليت واكفه اباوع عليهم اخاف افوت جوه خاف يعوفني ويروح ..جاوبها بدون ميباوع عليها وكأنما شي مقرف كدامه عينه عليه وجاوبها..

ادهم : ربي ابنج اول النايم جوه بعدين ربي بناتج..

قصده على زوجها لان اصغر منها خلاها تفور.

تمارة : وين الموبايل اله اخابر عمامها يجون يسحلوك سحل ..

انثبرت تدور على الموبايل بهوسه الهول ...جاوبها مستهزء ..

ادهم : اريد رجال من عمامها يوصلني كاعد بغداد نفس مكاني يندلوه همه ماريد النسوان اذا عدهم زلمه بيه خير اسلمه البنات اذا لا بس نسوان يحلمون يشوفون اضفرهن لان لو زلم ماجان بيتو عرضهم يم وحده مثلج..

تمارة : اشتكي عليك هسه والله ..

ادهم : يلا اشتكي كاعدلج هنا..

حجاها وراح كعد على القنفه.

تمارة : يعني متخاف..

ادهم : عليش اخاف قابل شامر واحد من فوك العمارة لو مضيع ورث ايتام علمود مجرم..

بسرعه باوعتلي و خزرتني..

تمارة : ماكو هيج شي هاي تكذب عليك وهو حجاها جان سكران مو بوعيه..

ادهم : انطيج معلومه صغيره السكران اصدق مني ومنج بكلامه لان عقله مغيب ميكدر ينكر ولا يزيف الحقائق ، اذا تريدين اطلع منا واخذ البنات بدون مشاكل وترجعين تنامين براحتج ،،تريدين اطلعهن بفضيحه الج وسجن لابنج هم براحتج ضلت يمج حجيه..

من كال حجيه ركز على الكلمه...

ضلت تحجي وتغلط وهو ساكت اني ركضت اخذت موبايلاتنه ومستمسكاتنه كلها وكم لبسه وطلعت لكيت غزوان واكف يفرك بوجها بعده مصاحي..

غزوان : هذا منو ؟

حجاها ويأشر على عمو ادهم.

تماره : هذا زوج عمة البنات ياسة الماتت تتذكرها.

غزوان: ام السرطان الجانت ملفيتهن..

تماره : اي هيه ..

اباوع على عمو ادهم يباوعلهم بغضب ويفتح ايده ويسدها ..

غزوان : امشي لك الخميس العقد مال سيلين وراها ازوج الثانيه واخلص منهن..

ادهم : الضاهر السكر بعده براسك ويراد اصحيك.

ويه اخر كلمه ركعه كله على راسه وكع بالكاع ، التفتلي وكال يلا..

مشيت وصلت يمه وكفت اشرلي اطلع قبله طلعت وهو طلع سد الباب وماما تصيح وتغلط وتدعي على عمو، لبس نظارته وصعد ليكدام صعدت كال..

ادهم : خلي راسها بحضنج لا تتأثر ركبتها بالطسات وحاولي تضل نايمه صفح...

ايفين : تمام..

خليت راسها بحضني ومشت السيارة كل شويه ايمن.. يلتفت يسألني..

ايمن : كعدت..

ايفين : لا بعدها..

اخر مره سألني نتر بيه ادهم .

ادهم : متكعد هسه شبيك انت زين اذا منا ليومين حست ..

ايفين :عفيه عمو شلون ليش تضل نايمه..

رفع راسه باوعلي بالمرايا بس مشفت عينه لابس نظاره بس حاجبه المعكود كفيل يبينلي هو غضبان وضايج سكتنه اني وايمن لان كل منحجي هو يرزل بس بطريقه يفشلنه يعني مو غلط...

ساعه اربعه العصر وصلنه بغداد متكسرين تكسر بيومها جان ازدحام ماعرف مال شنو ، دخل السياره للكراج ونزلنه.

ادهم : ايمن افتح الباب وروح افتح غرفة البنات..

ايمن : زين زين رايح..

راح فتح الباب ورجع وره شويه شالوها بنفس الطريقه ودخلوها للغرفه مالتها خلوها على السرير...

ادهم نزع نضارته وحجه..

ادهم : غيري ملابسها وجيبي مي غسليلها ولتحاولين تكعديها ابد وخليها على نومتها صفح ابد لتنام على ظهرها ..

ايفين : تمام..

ادهم : كملي وصيحيني راح اسبح واجي..

هزيت راسي اي..

طلعت ملابس من الجنطه وغيرت ملابسها ورحت جبت مي غسلت وجها ، اندك الباب فتحته ايمن.

ايمن : انه رايح دزني ادهم على شغله عينج على اختج ماشي..

ايفين : ماشي..

راح واني رجعت يم سيلين شويه واندك الباب صاح ..

ادهم : تعاي ايفين احاجيج.

طلعت لكيته واكف والخاولي على ركبته ..

ادهم

: اسألج اسأله سريعه واريد جواب واضح بدون كذب..

ايفين : اي طبعا..

ادهم : يمكن ميصير احجي وياج بهيج موضوع بس انتي موصغيره يعني تفهميني وماعندي غيرج اسأله لان تحركاتي كلها وعلاج اختج يعتمد على كلامج.

ايفين : زين ..

ادهم : سوالها شي زوج امج؟

حجاها وضيق عينه..

ايفين : ضربها وشكك ملابسها.

ادهم : اعرف يابه واضح هذا الشي اريد افهم سوالها شي يعني اعتدى عليها ..

ايفين : هاا فهمت لا لا ملحك ضربته وضلت تتقيئ..

ادهم : ماشي اخذي راحتج..

دخل لغرفه مريم وسد الباب ، استغربت مريم مشفتها وينها ...

وره ساعه ضبط اجه ايمن صاحني طلعت..

ايمن : هاي الممرضه راح تفوت يم اختج تعلمج على شغلات ركزي وياها انتي راح تسويها لان احنه ولد منكدر ..

ايفين : اي اركز..

ايمن : لتنسين ايفين فتحي تسجيل صوتي وسجلي كلامها حتى اذا تنسين شغله تسمعيه لان ادهم ميكدر يفهمج ، وصلت الفكره..

ايفين : وصلت وصلت ليضل بالك.

ايمن : ورة متروح طلعي تغدي جبت غده بالمطبخ خليته..

ايفين : خل اشوف اختي اول وبعدين..

هز راسه وطلع ضليت بالهول واكفه دخلت بنيه لابسه لبس مرتب وياها عمو ادهم دخلو يحجون بالانكليزي وهيه تأكد كلامه بكلمه اوك اوك..

راحت دخلت لغرفه سيلين وعمو خله ايده بجيوبه باوعلي واكفه بالهول عكد حاجبه.

ادهم : شنو وصاج ايمن..

ايفين: ها نسيت نسيت ..

حجيتها وطبيت اركض للغرفه..

اعتقد هاي دكتورة نسائيه ضلت تفحص بسيلين اخذتلها الضغط وقاست حرارتها وصاحتني..

_ انتي اختها مو..

ايفين : اي.

_ سمعي حبيبتي اختج عدها انهيار عصبي حسب ما فهمني دكتور ادهم .

ايفين : صحيح.

_ منعرف شكد تطول وتصحى جوز بعد ساعه او يوم واحتمال ٣ ايام لان الصدمه قويه..

ايفين : زين ..

_ لهذا راح اخليلها صونده ادرار لان متحس على نفسها واذا اقتضت الضروره استعملي حفاظات مال كبار ..

خجلت ونصيت راسي.

_ ماما انتي ويايه تره اختج مريضه لازم تنتبهين على كل كلمه اكولها تره مو وقت خجل هسه ماشي..

هزيت راسي ب اي.

_ راح اشدلها مغذي لان متكدر تاكل ومن يخلص صيحيلهم يشدولها الثاني..

ايفين : تمام..

وصتني هواي وطلعت ، سمعتها تكله لادهم.

_ دكتور الحاله مثل ما شخصتها انت يعني كلامي لا يعلى على كلامك..

ادهم : اقاربي واعرف حالتها وبشنو مرت لهذا عرفت فقدانها للوعي سببه انهيار مو شي ثاني..

_ اني الصراحه شكيت شغله تخص القلب او امراض وراثيه..

ادهم : لالا سليمه متعاني من اي مرض ...

_ الضاهر صدمه قويه..

ادهم : اي ..

_ انت تعرف شنو تسوي ميحتاج اوصيك ..

ادهم : لا يمي شكرا جزيلا تعبناج دكتوره..

_ لا شكر على واجب صديق عزيز ابو مريم..

ادهم : ممنون منج..

طلعت وصلها يمكن لان صوتهم ابتعد عن الغرفه وره شويه دك الباب وحجه جان مفتوح شويه.

ادهم : راح افوت

ايفين : لحظه ..

كمت غطيت سيلين وخليت شال على راسها .

ايفين : تعال عمو ..

فات جر كرسي وكعد كبالها ، باوعلها ورجع التفتلي.

ادهم : جنتي قريبه منها بالفتره الراحت..

ايفين : شلون يعني مفهمت .

ادهم : يعني تسولفلج من شنو ضايجه لاحضتي شي غريب بيها شكت من شي.

ايفين : هيه ضاجت من ماما ومن تصرفاتها وجانت تتعارك هواي وياها ..

ادهم : ما وصلج سؤالي راح اسألج وانتي جاوبي تمام..

ايفين : تمام

ادهم : اكو شغلات متأكد منها انه منها تريد تنهزم من الواقع العايشته وماعدها وقت كافي للراحه..

قاطعت كلامه..

ايفين : اي اي صح ..

باوعلي وكمل كلام..

ادهم : متعرف شتسوي وشلون تتصرف.

ايفين : صح بس شلون عرفت وانتو متحجون سوه واني مكتلك..

ادهم : من رسائلها قبل فتره دزتلي هيج شي..

ايفين : هاا زين ..

ادهم : متأكد فقدت الثقه بالنفس بس الشغلات المامتأكد منها اريد اسمعها منج ، اول شي تسهر هواي نومها شلونه..

ايفين : متنام ابد تضل الليل كله تبجي مرات تنام ساعه لو ثنين وتكعد تروح تدور على شغل..

ضيق عينه ونفخ بضوجه كال .

ادهم : جانت تأذي نفسها؟

ايفين : اي تبجي هواي ..

ادهم : لا اقصد تضرب نفسها تملخ شعرها تعض ايدها هيج اشياء..

ايفين : كل ما تتعارك وياها ماما تفوت تلطم على وجها وعلى صدرها مرات تملخ شعرهة وهاهيه بس متعض نفسها..

ادهم : مجانت تعض اصبعها..

ايفين : اي مرات تعض اصبعها علمود لتعيط ويطلع صوتها..

ادهم : كتيلي اشتغلتو سويه مو ..

ايفين : اي من سألتني جاوبتك بس خجلت اكلك وين..

ادهم : وين اشتغلتو؟

ايفين : صالون وبعدين اشتغلت بسوبر ماركت وصار الصار وبعد مراحت..

ادهم : من جنتو تشتغلون سويه جانت اجتماعيه تسولف تضحك لو منطويه على نفسها ومعزوله ..

ايفين : بالبدايه جانت بس تبجي على عمه ابو الشغل كام يحجي عليها كامت تكبت بداخلها وتشتغل ساكته اللي يسألها تجاوب ميسألون تسكت..

ادهم : تمام عاشت ايدج ، عينج عليها وجيبي ورقه وقلم من مكتبي اي حركه تسويه كتبيها ..

ايفين : شلون يعني اي حركه..

ادهم : رمشت تثاوبت حركت ايد رجل دارت راسها رادت مي همست بكلمه ما مفهومه اريدج حتى على كر

مشه جفنها تنتبهين عليها..

ايفين : ماشي..

ادهم : روحي جيبي ورقه وقلم وتعاي كعدي بمكاني.

رحت جبتهن ورجعت كام وكعدت بمكانه وصل للباب وكال..

ادهم : اكلتي؟

ايفين: لا..

ادهم : ضلي بمكانج وراح اسويلج لفه وحده لو ثنين..

ايفين : عمو انت شتكول تكفيني وحده لو ثنين.

ابتسم ..

ادهم : حسب ما جنت اشوفج تحبين تاكلين يعني اسويلج ثنين..

ضحكت وراح وره شويه جابلي لفات ثنين بصينيه وقوطيه ببسي.

ايفين : شكرا عمو تعبتك..

ادهم : ماكو تعب ، باعي اذا كعدت ورادت اكل اي شي حلو لو بيه سكريات لتنطيها تعالي وانه اكلج شنو تحضريلها من اكل..

ايفين : زين ليش هو الحلاه زين جوز سكراها نازل..

ضحك ..

ادهم : ياسكر اكلها انهيار عصبي عدها والحلاه يدمرها..

ايفين : عمو وين الربط مو راح تخبلني..

ادهم : السكريات اذا اخذتها بهيج حاله راح ترتاح راحه مؤقته بس تسبب ضرر بالبكتريا الموجوده بالامعاء ..

ايفين : وهاي شعليها..

ادهم : شلون شعليها اكو علاقه بين الحياة البكتيريه الضعيفة بالامعاء والقلق.

ايفين : بس اختي ماعدها قلق انت مو كلت انهيار..

ادهم : والقلق سبب من اسباب الانهيار ، انه رأيي تاكلين وتراقبين اختج وتتركين شغلي..

حجاها وطلع..

صفنت شيحجي حرام اذا فهمت شي اكلت وطلعت وديت الصينيه ، ورجعت للغرفه ..

وره ساعتين ضبط هم اجه سألني على الحركات الوصاني عليها سوتهن كتله لا..

ادهم : ماشي بس انتبهي اذا تعرقت او صخنت تجين تكعديني حتى لو نص الليل ..

ايفين : اي ..

فات شد المغذي الثاني وكال ..

ادهم : عينج عليه اذا اوت صيحيني، تصبحين على خير انه نايم بغرفه مريم اذا ردتي شي.

ايفين :ماشي وانت من اهله..

سد الباب وراح واني ضليت صافنه على سيلين ، تدررت اكثر من مره وبدلت الها الكيس ، محتاجت حفاظه لان ما اكلت شي بس مغذي ..

للفجر بدت تحس تحركت اجفانها وحركت حلكها طلعت اركض دكيت الباب ، ثواني فتحه باوعلي بنص عين.

ايفين : حركت حلكها واجفانها..

ادهم : وانه كتلج كتبيهن بورقه ..

ايفين : مو كتلي كعديني.

ادهم : كعديني اذا صخنت او تعرقت اخ منج ايفين ..

عافني وارح لغرفتنه فات وراح وكف فوك راسها يباوعلها مغضب حاجبه. التفتلي .

ادهم : الصبح تكعد ليضل بالج..

ايفين : صدك عمو الله عليك..

ادهم : كاذب عليج كبل.

ايفين : لا حشاك..

ادهم : خلص المغذي وسادته عاشت ايدج روحي نامي ارتاحي.

ايفين : وسيلين شلون؟..

ادهم : انه يمها كاعد روحي ارتاحي ماعندي شي عود من يصير وكت الدوام اكعدج..

ايفين : ماشي..

كعد وكتف ايده وعينه على سيلين واني رحت نمت وغطيت راسي..

ساعتين وكعدني.

ادهم : ايفين كومي انه رايح ..

فتحت عيني كوه.

ايفين : اي كمت..

كعدت على الكرسي واغفي .

ادهم : كومي غسلي وجهج اريدج صاحيه وشنو وصتج الدكتوره البارحه سويه راح اخذ اجازه وارجع ما اتأخر..

ايفين : اي ..

طلع راح لغرفه مريم واني رحت للحمام غسلت وجهي وطلعت رجعت للغرفه كعدت يم راس سيلين ..

تذكرت حجايته شنو كلتلج الدكتوره سوي كمت شفتها مابيها شي غطيتها وكعدت مرت ساعتين ورجع ادهم طلعت لكيته بالمطبخ جايب صمون وطبقه بيض خلاهن على الميز.

ادهم : تريكتي..

ايفين : لا .

ادهم : تعرفين تسوين لو اسوي.

ايفين : لا اعرف شنو السالفه ..

ادهم : ايفين اريد احجي وياج بس لتاخذين كلامي بقصد ثاني انه اخوج الجبير تمام..

هزيت راسي وفتحت كل عيني مركزه وياه ...

ادهم : من بعد وفاه ياسة الله يرحمها هملت بيتي وبنتي وصحتي وكلشي اجوي اهلي عاشو ويايه فتره ورجعو وياهم مريم وانه كل عطله اروح يمهم اشوفها ،بس الصار شنو فهد بنه بالحديقه الخلفيه مشتمل وأثثه يعني ايمن وفهد وانه ٣ عزابيه هنا اريدج تنتبهين على كل كلمه وكل تصرف وعلى لبسج وحجابج على ماشوف حل الكم..

ايفين : تمام..

ادهم : ماريد تتحسين مني منا وجاي انتو مسؤوليتي..

ايفين : لا ما اتحسس..

ادهم : اروح اشوف سيلين بين متسوين ريوك.

هزيت راسي وطلع ..

فهد هنا عايش ويانه لعد شو مشفته لا اليوم ولا البارحه ، رحت سويت جاي وكليت بيض وخليت ٣ اكواب للجاي اخذت الصمون والصينيه وفتت لغرفتنه خليت الصينيه بالكاع ورحت جبت طبله وكرسي خليت الطبله كباله وخليت عليها الصينيه جبت الكرسي وكعدت..

باوع للصينيه ورفع راسه عليه..

ادهم : اختج متاكل عليش جايبه ٣ كواب..

ايفين : حسبت حساب ايمن ..

ادهم : ايمن بالدوام يرجع وحده ونص ..

ايفين: ها مادري..

اكل واني هم كعدت اكل اول مره استحي منه ماعرف يمكن لان حضوره يجبر الواحد يخجل منه لو لان صار فتره مشايفيه .

كمل اكل وكام..

ادهم : عاشت ايدج..

ايفين : وايدك.

حجاها وطلع ..

ساعه تجر ساعه وسيلين ماكو على نومتها مكعدت ، وعمو ادهم انخبص كل شويه مخابر واحد يشرحله حالتها بالانكليزي ويمسح العرك من كصته واني مثل الاطرش بالزفه كلشي ما افتهم بس حسيته متوتر ازيد من اللازم ، ثاني يوم العصر اجه لغرفتنه وكال.

ادهم : بدليلها ناخذها للدكتور.

ايفين : مال شنو.

ادهم

: دكتور جمله عصبيه خاف ضاربها على راسها والضربه مأثره عليها بسرعه استعجلي..

طلع واني بدلت الها ملابسها وبدلت ...

دخل وجايب الكرسي المتحرك مال عمه خلاه كبال السرير و وكف حاير صفن عليها ورجع باوعلي.

ادهم : متدبريها تكعديها وحدج مو ..

ايفين : احاول .

ادهم : خاف تأذين كتفها ..

ايفين : لا اكدر..

رحت رفعتها من ضهرها كال .

ادهم : باعي نزلي رجليها اول .

ايفين : نزلتها..

قرب الكرسي بصف السرير.

ادهم : هسه وكفيها وكعديها على الكرسي واذا مكدرتي كولي..

ايفين : اكدر..

رفعتها جانت خفيفه سندتها وخليتها على الكرسي.

ادهم : شديها بهذا الحزام يمج.

حجاها واشر بيده شديتها وكلي دفعيها..

دفعتها وطلعنه وصلنه للسياره وضل حاير شلون راح يصعدها..

ادهم : هنا متكدرين مو لان لازم تشيليها.

ايفين : لا ماكدر..

ادهم : فتحي الحزام..

فتحته خله ايد جوه رجلها وايده الثانيه جوه راسها وشالها بحركه سريعه وخلاها بالسياره.

انتبهت عليه من شالها داير وجها للجهة الثانيه ، عفيه عمو شكد مؤدب .

حسيته انخبص ارتبك ماعرف شبيه.نتر بيه

ادهم : صعدي يم اختج شبيج صافنه بوجهي..

ايفين : ها اي اي.

صعدت وكعدت ليوره خليتها بحضني ، الطريق كله يخابر على ايمن وايمن ميرد ماعرف كم مره يلا جاوبه نتر بعصبيه..

ادهم : وينك انت من البارحه مختفي،

منو كلك جيب مريم صخمت وجهك وكتلك جيبها وين جايبها ،

اي كلت بس الوضع مو مال اجيبها هسه غير عبالي البنات مابيهم شي ،

اي عوفها وارجع يلا لتبات محتاجك وفهد وينه ،

ادري نقل شغله لبغداد وبس بالاسم كاعد يمي وانه مادري بيه وين يروح و منين يجي ،

باوع بلغ ابوك كله ادهم يكول فهد اذا ضل على هذا الوضع رجعه يمك ما مسؤول عنه وعن اي تصرف يبدر منه واذا رجع يمكم بعد احسن لان بركبتي ثنين بنات وانت فاهم قصدي كلش زين.

حجاها وسد الموبايل شمره على الكشن فرك وجها بعصبيه وكام يستغفر ،،،

وصلنه كبال عماره مال اطباء صف السياره بالكراج نزلت ونزل هو ونزل الكرسي خلاه بصف الكشن وكف يباوع على سيلين ويستغفر ...

همس بصوت ناصي بس لان جنت واكفه قريبه منه سمعته..

ادهم : ربي انت تعرف بالنيات..

شالها وخلاها على الكرسي وحجه عاكد حاجبه.

ادهم : شديها ودفعيها ..

شديتها ودفعتها مشى كدامنه واحنه وراه ، يعني الموقف الشفته كدامي كفيل يخليني احقد على كل اقاربي يعني غريب رجال غريب ومحرم علينه حاير بينه وعايف شغله واللي من دمهم ولحمهم مو بحالنه..

وصلنه للعياده مال طبيب اول الناس دخلونه ، العرفته حاجز قبل بيوم .

سلم على الدكتور الواضح صديقه ، كعد يشرحله الحاله ..

فحصها ودزنه على مفراس لراسها ...

طلعت النتيجه سليمه مابيها شي ، حجو هواي وطلعنه ، وصلنه للسياره ، هم شال سيلين وصعدها بالطريق سألته..

ايفين : عمو شبيها اختي..

حجيتها وبجيت..باوعلي بالمرايا جر نفس وكال..

ادهم : اللي اكدر اوصله الج وتفهميه اكو شحنات كهربائيه بالدماغ بسيطه سببت عدها تشنجات عصبيه وحاله اغماء بس ادعي كون مابيها شي ..

ايفين : عفيه عمو يعني شنو منين تجي هاي الكهرباء خوفتني..

حجه بهدوء وعينه على الطريق..انقهر عليه وراد يطمني ..

ادهم : هاي الحاله بالاغلب تصيب الاطفال ونسبه قليله تصيب النساء ،ابرز الاسباب الي تؤدي للاصابه باضطراب نشاط المخ ،

هو التعرض بشكل مستمر للأشعاعات اللي تصدر من اجهزه التلفزيون والحاسبه والموبايل و الاشعه الكهرومغناطيسية الصادره من جهاز الموبايل هيه اشد تأثير بالمخ لان تدخل صيوان الاذن من خلال ترددات هاي الاجهزة اللعينه وبالتالي يسبب خلل كبير بالمخ يؤدي خلق بعض التغييرات والتشنجات للبؤرة العصبيه داخل المخ ،

هاي اكثر شي تصيب الاطفال واكيد الكبار الهم نصيب منها بس سيلين حالتها هم سببها التركيز بالموبايل مده طويله لكن السبب الاقوه هو خوفها وتوترها الدائم والقلق او الصدمه النفسيه اللي هيه تعرضت الها ...

ايفين : زين هاي شتسوي شعليها بالمخ..

ادهم : شعليها شلون شعليها ، شي مرتبط بشي الاحتمالات اللي ذكرتها ادت إلى زيادة معدل ضربات القلب بشكل كبير، وبالتالي يتسبب في ارتفاع الإشارات الكهربائية التي ترسل إلى المخ، لان الجهاز العصبي والقلب متصلين ببعضهم في بعض الوظائف.

ايفين : تمام فهمت وزين شنو العلاج وتطول حالتها لو لا..

ادهم : هيه على الاغلب راح تصحى بالزايد وره ٧٣ ساعه يعني ٣ ايام ضبط اقصى حد ، واذا طولت

حجاها وسكت..

ايفين : اي اذا طولت شنو؟

ادهم : احتمال اكو ورم بالدماغ بس لحد الان ما متأكد تصحى ونعيد الفحوصات كلها هسه سوينه مفراس وطلع مابيها شي كلشي سليم الحمدلله يعني ماكو داعي للخوف..

ايفين : شنو العلاج.

ادهم : نوصل للبيت واكلج شنو تسوين راح نتعب انه وياج هواي على ما ترجع توكف على حيلها..

ايفين : ان شاءالله والله افديها بروحي بس تصحى..

حجيتها واختنكت بجيت على اختي هسه حسيت بقيمتها ، رجعنه للبيت نزلها ونيمناها بمكانها..

شدلها المغذي واكد عليه تضل نايمه ص

فح..

ايفين : ليش مو على ضهرها احسن.

ادهم : لان المصابين بهاي النوبه الافضل لو نبقيهم كاعدين بوضعيه جلوس او ينامون صفح واذا نامو ميصير نكعدهم بأي وسيله لا بالضرب على الوجه ولا بأي صوره ثانيه ..

ايفين : لو من البدايه موديها للمستشفى مو احسن..

ادهم : مثل هيج حالات اذا ماكو شخص يفهم بالبيت اكيد الافضل ينقلوها للمستشفى بس انه موجود عليمن بعد وعرفت حالتها وشخصتها ..

ايفين : الله يوفقك عمو ان شاءالله بس مكتلي شنو العلاج..

ادهم : حالتها بسيطه راح نكتفي بالاعشاب هيه الي تفرغ هاي الشحنات راح اجيبلج وتسويلها ٣ مرات بليوم تلفزيون وموبايل ممنوع صوت عالي يمها ممنوع حجي وسوالف هواي هم ممنوع ،،

طباخ متوصله موزين عليها الحراره و بالشمس هم متطلع موزين عليها واهم شي من تصلي تطول بالسجود سبحان الله السجده بيها علاج مو طبيعي رب العالمين بكلشي خال النه فائده..

ايفين : ليش شنو يسوي السجود.

ادهم : السجود اول شي يفرغ شكو شحنه كهربائيه زايده بالجسم والشي الاهم همومج كلها تنزاح..

ايفين : ونعم بالله شكد حلو..

ادهم : راح اروح اجيب الاعشاب واجي..

ايفين : تمام.

طلع وصاح..

ادهم : عينج على المغذي لا يأوت.

ايفين : ماشي..

طلع ورجع صاحني رحت للمطبخ..

ادهم : ركزي وياي.

ايفين : مركزه والله.

ادهم : تخلين ملعقه من كل واحد من ذني ، الشمر والكراويه واليانسون و شويه تخلين من اوراق النعناع وازهار البابونج وتخلين مي دافي فوكاهن وتشربه مره وحده بليوم..

ايفين : مو كلت ٣ مرات..

ادهم : غلطت شلون ايفين توكفيلي على الكلمه.

ايفين : لا بس عبالي نسيت وكلت اذكرك.

باوعلي صفح ورجع كمل كلام.

ادهم : باعي ممنوع ب اكلها اطعمه حيوانيه ولا البان كثريلها فواكه وخضروات ، ممنوع تشرب مشروبات غنيه بالكافيين..

ايفين : وشنو ذني مسامعه بيهن قبل.

ادهم : المنبهات الجاي والكهوه مشاربتهن شنو ..

ايفين : خو كول هيج من البدايه اني وين اعرف ..

هز راسه مراضي وكمل كلام.

ادهم : مشروبات الغازيه ممنوعه خصوصا الببسي.

ايفين : وهيه روحها بالببسي..

ادهم : خليني اكمل كل شويه مقاطعتني اذا انه ما دخلته للبيت شلون تشرب سمعي..

ايفين : سمعت..

ادهم : اذا كعدت تنام اقل شي ٨ ساعات بليل وتنام من وكت ممنوع تسهرون لا انتي ولا هيه تره موزين عليها.

ايفين : ماشي فهمت اكو شي بعد لو هاهيه.

ادهم : اذا اكو انه اكلج روحي لاختج..

توني اريد اروح للغرفه وسمعت صوتها تصيحني بس صوت ضعيف..

سيلين : افونه مي..

الفصل العشرون من هنا 

شكرا لزيارتكم عالم روايات سكيرهوم