رواية كريات الدم السوداء الجزء الثاني الفصل الثامن عشر بقلم زحل شريف
﷽
_يگولون القلب ما عليه سلطان ،،،وهذا الي اتاگدت
منه بوضع اسعد ،،،توني اريد ادخل للحمام وصوته
أبوي هز البيت رگضت واشوف الولد كلهم واكفين
ضليت أتلفت ،، صاح بيهم
أبو اسعد::ماريد اشوف واحد بيكم .
الباشا::يابه مو هيج .
أبو اسعد::بليل كتلك لاتوصلها
الصبح الكاك بغرفتها،،،،اطلععععع لا تشوفني
وجهك ،، وبس يجي ثابت هو يحل أمرها .
الباشا::ترى جاي تضلمني بس خل افهمك.
اترجاك تسمعني ،،وداعتك البنيه رافضنني
لاتجورون عليها ،، شنو ذنبها .
أبو اسعد::لك منو الجاير عليها غيرك
انته جبتلها الاذيه،،، گتلك أبعد عنها بليتها بلوى
شوهت سمعتها الكل يعرف لوحدها وانته داخل
طالع عليها گدام الناس ،،،لك اخجل اخجل من ثابت مهما كان زوجته اختها ،،علاء وجبار شهرونا
بين عمامنه بسببك.
الباشا::هو غير منتضر ثابت يجي وحق الله
لسحل جبار وعلاء بنص المنطقه يابه ترى
انته الي سكتتني عنهم .
أبو اسعد::بعد ماكفاك الصار تريد تسويلي
هوسه لك شنو انته ،،، فهمني شنو براسك تدري الناس شارتني على الحبل شكلك وادي جاب البنات وكعدهن بنصنا وابنه مسوي بيتهن خان اجخان هاي تاليتي سمعتي صارت زفت بسببك.
_انفعل أبوي ،،طلع اسعد وهو يتوعد لبيت جبار
ضل اياد يحاول يفهم أبوي عن طبيعة حياة سونه.
اياد::يابه انطيني مجال احجيلك،، ترى دخلته عليهن
بالنسبه الهن أمر طبيعي ،، لان هو جان معضم وقته
عدهم ،، ولا تنسى عقده عليها يعني مو مثل ماانته
متصور ،، انه ماابرر واكول موغلط بس الله فوك
الراس البنيه موسهله ولا .
_گطع كلامه منحرج هز رأسه أبوي بااسف.
اياد::رغم رفضي لوجودهم ،، بس اضلم بختي
وانكر الي شفته بعيني،،،، قبل لا نطلعهن مناك
جانن يحاربن،،،،،، لاجل ماينجرفن .
أبو اسعد::بابا أفهمو انه مااكول هنه موزينات
بس الناس الها الضاهر هو منو خلصان من حجي
المايخاف الله ،، لهذا السبب ردته يبعد وگلت ازوجهن وينسترن افضل .
_بعد نقاش طويل اتفقو انو بس يجي ثابت
ينقلون سونه ومديحه لبيته ،،، كامت امي صلت
وشكد دعت الهن ،،كعدت يمها بوستها وحمدت ربي على نعمة وجود اهلي .
وفيه::مردت گلبي البنيه مريضه ولج رجلها تخوف
وهيه متحمله الألم ،، وساكته عيونها بيها حزن يوجع الروح .
_ادعيلها يمه ادعيلها .
وفيه::ادعيلها لو اعي لابني الي
راح يخرب بيته ابوج خلف مايرضى عنه .
_هم مالها ذنب هو الي ما بعد عنها.
وفيه::توسلنا بيها تجي ويانه ماقبلت،، ابوج تخبل يكول البنت فوك عزة نفسها عقلها جبير ،،واعيه رفضت تجي حتى لاتثير مشاكل .
_تحجي ودموعها تصب بجيت بقهر،، صاح عليها
أبوي گمت وياها ،، لكينا يريد يطلع سألته عن ثابت
شوكت يجي ،، دنك وجاوبني بقهر.
أبو اسعد::كل مايتصل يوصيني على البنات
وأشكد حاولت مابين بس هو حس اكو شي .
وفيه::دخابرة خليني اسلم عليه اشتاقيتله
_هز رأسه بأايجاب وطلع نقاله اتصل
گتلها يمه فتحي صوت هم انه أريد احجي ويا.
أبو اسعد::ها يابه شلونك ،، لا لا ماكو شي
بس إم اسعد وبنونه ،، تمام .
_كعدت امي وفتحت الصوت بس سمعت صوته
نزلن دموعها ،،، وعبالك يشوف سالها بقلق
ثابت::منو غاثج إم الباشا ليش تبجين.
وفيه::البيت بدونك وحشه . شلونها قيادة
_مااقتنع ،، رد يضحك
ثابت::يابه لاجل هذا اللقب هسه انلم
غراضنه ونجي.
_ادنيت على امي وحجيت،،، لا عيني شوفلك
غير عذر مو تريد تغلس على الهدايه عود طلعنا
مستعجلين مامرينا بالسوك مالحكنه .
ثابت::هههههه لا اطمني حته لو من البطحه
هم اشتريلج هديه.
_فكيت حلكي شنووو البطحه ،، شجيبلي جبس.
ضلينه نسولف انضمت قدر للمكالمه اخذت النقال
وطرت لغرفتي وامي تصيح وراي
وفيه::ولج تعاي خلينه نحجي وين موليه.
_ضحكت قدر من سمعتها ،، سديت الباب
وگعدت ،، وهاي ميته ضحك ،، اي عيني ضحكي
شوفي مو عبالج اتشاقه ترى صدك ازعل اذا غلستو
وماجبتولي اشايائات .
قدر::اصلا ما اشتريت لنفسي كثر ماجبتلجن
انتي وسنونه ومديحه،، صدك بنونه شلونهن البنات
بالي يمها وثابت غلق نقالي وعافه بالسيارة .
_زينات وابوي ماعايفهن واليوم اخلي مولي
يوديني يمهن حتى انه مشتاقتلهن .
قدر::اي عليج الله اذا تكدرين خابري من يمهن.
_عليمن اخابر ولج هذا تلفون أبوي وهل
رقم بينه وبين ثابت،،،،، لايضل بالج تونسي .
قدر::تمام يله سلميلي عليهن.
_سديته وطلعت انطيت النقال لابوي،،بقو هو وامي
يحجون عن وضع سونه عفتهم ،،وتوجهت للكراج شغلت الماطور غسلت وسحبت الصونده رشيت الحديقة طلعت نغم اشرتلها تعاي ادري تحب ريحه الطين من ينرش.
نغم::ودي اگل منه .
_هههههه ترى اكو طين خاوة قبل اشوف
امي اجيبه لزينب اختي من تحمل .
نغم::زنيبه تتنسه انه غير يفضحني اياد
لو شافني اكل طين .
_خذتنا السوالف ،، لحد مااذن المغرب
گمنا بعدني الف بالصودنه ،،ودخل عمي محمد
تلكينا انه ونغم،، وهم اخذله مشوار يتشاقه ويانا
محمد::ابوج هنا لو بالجامع.
_هنا هنا . حجيتها ودرت وجهي للباب الي
انفتح بقوة دخل شلون الاعصار ما يشوف گدامه
حته ماانتبه لوجودنا ،، صاح بي عمي .
محمد::شكو شبيك.
مارد توجه لبيتنا،،بسرعه طفيت الماطور وركضت وراهم ونغم وياي ،، احس اعتز البيت من صوته
الباشا::بعدتوها عني وسكتت ،،، لعبتو بحالها وشمرتوها للخليجي وردت خسرانه ،،وسكتت
لهنا وخلصصصصص،
أبو اسعد::لك شكو غير نفهم .
الباشا::بعد محد اله شغل بيها,,اختها جنتكم
حقكم تحكموها بس هاي لا من اليوم لا ثابت
ولا اي شخص ،، يدخل بيها .
أبو اسعد::اي باشا على امرك
صار عندك أوامر ثانيه؟
الباشا::يابه اترجاك لاتستغلني تعرف مااعلى عليك.
كرهتوني بمنصبي ماريده اذا هيج تعاملني كافييي.
محمد::لك ماتحجي .شكو فهمنا.
الباشا::شفهمك عمو ،، بلو البنيه بلوى
حجيت صحت اترجيتهم بس اطوني مجال اوطنها خطيه وهم رد معروف لان بسببهن اترقيت..
_يحجي ويمسح وجه بعصبيه.
أبو اسعد::ماتحجييي فضها.
الباشا::ارتاح يابه هجت البنيه عافتلكم
المنطقه وطلعت من بيتها.ابشرك عمتي هاده عليهن للبيت .
أبو اسعد::شنووو ياعمه لك
مو رفعت ضغطي انطق فهمنييي.
الباشا::إم اريج رايحتلهن .
ابو اسعد::وين راحت لك احجي
البت رجلها منتهيه واذا ماتتعالج تسكط.
_انخبص أبوي وهو يحاول بس يعرف مكانها.
واسعد شلون گتلته النار ماهدء .
الباشا::گلها تصيح أبعد عنها بعدت بعدت
تالي هججتوها يابه حرام السويته حررررام .
_كام عمي جره گعده بصفه
وابوي حاير يباوعله .
الباشا::گتلكم اطوني مجال يابه ترى بفضلهن
ترقيت يعنيييي المفروض اكافئهن ..
محمد::صح وجلال هم حجالي كال بمساعدة البنات كدرنا نلقي القبض على العصابه ،،انتو هم ماقصرتو وياهن والدليل ثابت اخذ اختها.
_انتفض يصيح،، بصوت عالي.
الباشا::عمو ،، البنيه الف من يتمناها ثابت
مو صاحب فضل،،،، بالعكس هو الربحان.
أبو اسعد::هسه جاي تتحسده گلي البنات
وين راحن احجي ،
الباشا::اترجاك يابه عوفهن بحالهن منا
وبعد مااقبل احد يدخل بيها ،،
محمد::لا شلون انعفهن خطيه مو ابوك يكلك
البنيه رجلها متأذيه ،، دمشي انه وياك نرجعهن .
الباشا::شبيك عمو اكلك هجت هجت،، يابه
شسوي بعمتي ويرتاح گلبي .
_طلع شايط،، ركض ورا عمي كوى جرة
دخلو للبيت اجه اياد ومولي وتخبلو من عرفو
بعمتي رايحه لسونه.
اياد::صدك تحجون شنو هل استهتار شكو
رايحه شتريد منها ليش هيج.
أبو اسعد::مو كتله أبعد عنه البنيه،، جبتلها
العين والسمعه السيئه ..
الباشا::يابه اذا ماتوبتهم سهله هاي كله لان
سكتت عن علاء ،، جملتها عمتيييي.
_ويا احجايته دخلت اريج صاح بيها
الباشا::شكووو اجيتي امشي لبيتج وحسابج
بعدين هينه اعلمج انتي وامج
اريج::وعلى شنو تحاسبني شمسويه
خو متريدني اشوفها فاتحه بابها الك واسكت.
_تقدم راد يجرها وكف عمي گباله
بسرعه صارت بضهر أبوي .
الباشا::هيه دخل تقبل بيه وعود لاتسكتين.
_حجاها وطلع بدون مايلتفت ،، لحكه عمي
بقت اريج تلطم صاح بيها أبوي.
أبو اسعد::كافييي .
اريج::شنو خالو شو جنك قابل على كلامه.
أبو اسعد::هذا كله وتكولين قابل.
اريج::اي ماسمعته شكال .
أبو اسعد::سمعت شسوي اذبحه مثل.
اريج::شنو تذبحه خالو يعني أفهم من كلامك
_صاحت بيها امي .
وفيه::دكافي اسكتي احنى بيا حال
المن راحت امج لبيت البنيه.
اريج::يعني هسه امي غلطانه من راحت
حجت وياها حته تبعد عنه .
_اياد ومولي ضلو محتارين ونوب رقم سونه مغلق
أبو اسعد::امشي شوفو وين راح .
_كسر خاطري أبوي ضل محتار ويلوم بنفسه
أبو اسعد::گله مني شلون عفتها لو جايبهن هنا.
شكول لثابت لو رجع اكيد راح يعتب عليه.
اريج::بعد تردون تجيبوهن هنا .
_بين خوف امي على اسعد وقلق أبوي
على سونه وشلون لو ثابت رجع ،، دخلت علينا
عمتي مثل الاعصار باوعت رجلها وياها ركضت لبست حجابي اجت نغم شايله دانبي.
نغم ::هذا نط من البجي.
_دنطي لامه ،، بلكي من تشوفه تسد حلكها.
نغم::اگبر غلط روحت أمها لسونه.
_دمشي انطيها ابنها،، هزت رأسها أي
ودخلت قلبي نزلت دانبي لمه وصلت وگفت يمي
كلهم يحجون مافهمنا شي لحد ما أبو اريج صاح بيهن سكتن وهو يتعذر لابوي.
أبو اريج::ماعندي علم بروحتها صدگني،بس مو حلوة بحقنا گدام الناس ،، وجود هل بنات راح يسبب مشاكل.
أبو اسعد::شعليهن البنات داكات بابك، عايلات
بواحد ترى مصختوها شنو انوب تحكم الناس
إم اريج::جا شوفلك حل وابعد ابنك منهن.
أبو اسعد::بعد اگثر من هيج شسوي،ولج خليتوني ادخل بخطيتهن، وحملتوني ذنبهن اسمعو من هاي الحظه حاضركم يبلغ غايبكم الي يجيب طاري البنات بسوء لو يحاول يأذيهن معناها يكلي واجهني .
إم اريج::يعني شنو.
أبو اسعد::يعني اگثر من هيج مااكدر احمل نفسي
العليه سويته وكفت ضد ابني لاجل بنتج ماردت
حياتها تخرب ،،بس بسبب تصرفج الارعن انطيتي
مجال يعاند ويجوز حته البنت تسويها عناد وتتقبله.
إم اريج::خو مانسكت عنها.
أبو اسعد::ولج هيه شعليها، البت مالها ذنب،
كافي عاد شنو انتي تردين ،،واحرم شي رب العالمين محلله بس خلص .
_انجنت عمتي واريج ضلت اطفر صاح بيهن أبوي
طلعت هيه وزوجها رادت تأخذ اريج وياها ابوها ماقبل . انخبصنا خبص اجو الولد وعمي محمد
أبو اسعد::ها بشرو ؟
محمد::البنيه مسافرة.
أبو اسعد::منو كالك؟
محمد::اسعد اتصل بيها كالتله اريد اعالج رجلي.
أبو اسعد::هو وين بس لا راح وراها؟
محمد::لا وين يروح ماانطته عنوان.
أبو اسعد::وهو يصعب عليه شي.دخابرة
خلي ينطيني رقم البت بلكي نقنعها ترجع .
محمد::عوفها لحد مايجي ثابت افضل.
_وهيج يومين احنى مرمرين ،اسعد مادخل لبيتنا
ابد وابوي ميت قهر اطلع باليل الكاه واكف شباك
الصاله يباوع لاسعد الي جكارته ماطفت والتلفون بيده اريج التزمت الصمت،، كملت صلاه الضهر
وبعدني مالامه المصلايه وسمعت صوته طلعت
اركض تلكيته .
ثابت::ههههه ترى هديتج عند قدر .
_ملتمين عليه وهو كل شويه يسال أبوي.
ثابت::صاير شئ حجي شو وضعك ماعجبني
مبين تعبان .
_وشكد حاول أبوي ،، يبسط الأمر ،، بس ما جنت متوقعه ثابت يثور لهاي الدرجه يابه عبالك نار واشتعلت بي .
_____قدر_____
_خلصت اليل احضر لان كال الفجر نطلع
جريت الجنطه للصاله باوعلي وضحك
ثابت::شسالفه هاي كلها ملابس .
_اي غير نبقه اسبوع .
ثابت::اي بس اكيد راح نشتري مناك.
_هسه شنو اقلل منهن لو شنو؟
ثابت::لا يابه عوفيهن يله بس أصلي نطلع.
_طلعنا وبس ،، حرك السيارة گال انطيني نقالج
استغربت ،، سالته ليش ؟
ثابت::احنى رايحين نتونس نرتاح خلي هل الأيام
تكون مميزة تواصلنا بعض مانضيع دقيقه بمكالمه
_بس خطيه سونه خاف تتصل بينا. زين اهلك
مايحتاجوك بالاخص الحجي ؟
ثابت::مستحيل يعدي اليوم بدون مايتصل بيه
_حجاها . وغلق نقالي ونقاله وسحب الجكمجه
مال السيارة شمرهن بيها،، وطلع نقال صغير فتحه
ماانطاني مجال احجي اتصل وهو يضحك.
ثابت::ها يابه صباح الخير ،، اي هسه طلعنا
ادعيلنا ، ماوصيك على البنات ،ماشي ربي يحفظك.
_نهى مكالماته والتفت عليه .
ثابت::ها نتوكل .
_هزيت راسي اي ،، قرأ دعاء السفر وانه اردد ورا
لفت انتباهي تصرفه ،، ،،،،كل مانوكف بالتقاطع
أو سيطرة وبيها اشخاص يبيعون ماي، لو اكلنس ،
او أي شي ، هو يشتري انرس حظني، گتله شنو
سالفه ترى اختنكت.
ثابت::دشمريهن ورا يابه، ليش مضايقه نفسج.
_شمرتهن بالكشن الورا،وانه احجي شلك بيهن ليش اشتريت كل هذا ،،نوب سمسميه وعلج
وهذا الأكلنكس والماي .
ثابت::اكو شغلات استفاد منها مثل الماي
وغيرة وهم انه مسوي فد جدول مثل اليوم
حاسب حساب اتصدق ب100 الف ف اشتري بيها من هل شباب والأطفال وهيج انه ساهمت بمساعدتهم .
_بس لو منطي فلوسهن للمجدي افضل انه لاحظت انته ماانطي يجدون ؟ التفت لزم ايدي ورد.
ثابت::شوفي ياعيني ،، تشجيع الناس على العمل
بيها اجر جبير ،، مثل لو انه وانتي وغيرنا نفكر هذا يبيع ويحصل ،، فما نشتري منه وننطي للمجدي ،،ونعتبرها مساعده هيج تنشتر ضاهرة التسول ،،ويصير احباط للناس الي تحاول تسعى .ويفكر انو الجداوى افضل .
_بس هم الي يجدون خطيه.
ثابت::انطي للمرأة الجبيرة أو رجل عاجز معوق،دائما اركز على الي اشوفه يحاول
يسعى لرزقه بكرامه ،، وعلمت اهلنه وهواي ولد اصدقائي هم صارو يسوون نفسي . وربج أعلم بالنوايه وهو الرزاق.
_عجبتني الفكرة،، وهيج طول الطريق هو يسولف وياي ضحكت من شفته انطه للشرطه بالسيطرة ماي وكلنس گتله ها نوب توزعهن.
ثابت::رزق هذا على هذا ورزق الكل على الله.
_وصلنه النجف خله السيارة بالكراج وكال يله
ثابت::أول نزور ونوب اخذج لامج.
_كل خطوة بين المقابر أصرخ ادورها وكل ضني
الكاها لو اكدر اشوفها ،،لحد ما وكفني يمها انهاريت احس ماجاي يبرد كلبي،، لالطم ولا بجي ليش ليش عفتيني يممممه .راد يكومني صحت خليني اشبع
منها بلكي تسمعني وترد عليه.
ثابت::گومي يابه اجيبج العصر .
_ماتحركت لحد مااذن الضهر تعبت حيل
كومني امشي والتفت ماودي اعوفها ،، جرني وهو يستغفر ،، وصلنه الفندق بس دخلني للغرفة كال رايح اجيب الجنط ماطول شويه واجه سبحت
وذبيت روحي ميته كعدني المغرب
ثابت ::ترى جعت كلش .
_ليش ماكعدتني جا بعد شلون نروح لأمي.
ثابت::الصبح اخذج يله كومي صلي حته منزل
_نزلنا هم زرنا وتعشينا،، امشي بدون نفس
حس بيه كال نرجع للفندق هزيت راسي اي
خلصت ليلي بجي وهو احتار بيه.
ثابت::أخاف عليج والله مو زين ادخلين المقابر
باليل دنامي حته نروح الفجر وتشبعين منها .
_كعدني الفجر صلينه وطلعنا وصدك ماضغط عليه
بقيت للضهر يمها شبعت بجي كمت لان شفته تعب
كلش ودعتها بدموع وعتب.
ثابت::نطلع لكربلاء شتكولين؟
_بكيفك .
ثابت::هاي السفرة الج انتي وين تردينا اروح.
_خلص لكربلاء ، هز رأسه تمام .
ثابت::راح تتغير نفسيتج بس ادخلين
_وفعلا شكد ارتاحيت أجواء تخبل نزور
ونطلع نفتر ماخله مكان ماوداني اله بعدها طلعنا لبغداد كلش تونست اخذني لمكانات بحياتي ماشايفتها ،، طول هاي الأيام هو يتصل بالحجي
ويطمن على سونه ، وشكد فرحني مافرق بهدايه
اخذ للكل .
ثابت::لاتنسين مديحه يابه.
_اي بس لو تتصل بسونه بس اتاكد من القياسات.
ثابت::دختاري شنو تردين وانه اكلج القياس.
_التفت عليه بنضرة استفهام . ضحك حيل
ثابت::يابه غير الغيرة تخبل .
_لا صدك شلون تعرف قياسها.
ثابت::هههههه خرب تفكيرج لج يابه شبيج
ترى واضح البنيه بعمرجن .
_ترى العمر معليه شنو تقشمرني عود،، عفت المحل وطلعت بزعل لحكني وهو يضحك نوب نرفزني
ثابت::تعاي شبيج يمعوده عود صدك تحجين.
_التفتت عليه اي صدك يعني جاي تكلي أعرف
قياس صديقتج تريدني اصفك مثل، باوعلي كوى كاتم ضحكته ، نزلن دموعي انقهرت حيل تقدم لزم ايدي .
ثابت::بغض النضر عن فرحتي بغيرتج،، بس مااقبل
تحجين هيج قدر انه احسب مديحه مثل سونه
يابه كل عقلج انضر لغيرج بعد .
_وطول ايام سفرتنا هو ماضغط عليه .امشي وعيني عليه طوله وشكله واناقته يجبرني اباوعله .وجنت ناسيه هل الموضوع،،، لان خلصناها فرة وسوالف نرجع تعبانين انام ونكعد نطلع نزور ،، بس اليوم فتحت على روحي باب واجه من صالحه رجعنا للفندق
ثابت::انه رايح ازور انتي ارتاحي .
_كمت وانه احجي خو اخذني وياك ، ابتسم
وحجه بخجل .
ثابت::لا انتي ابقي فكري وحسبي احساب هذا زواج
مو مجامله لو نستمر لو نرجع ونفسخ العقد .
_حجاها وطلع احس صخنت ، ضليت حايرة
رجليه وجعني من كثر ماافتريت بالغرفه ، لاعندي نقال واتصل بسونه ، بجيت محتارة لو امي لو زواجي مثل اي زواج،،، سبحت وتمددت اصفن تاخر الوقت وهو مااجه غفيت واحس بانفاسه على وجهي فكيت عيني دنك باسني .
ثابت::باجيه ليش ؟
_نزلن دموعي بحرج.
ثابت::لا تبجين يابه وصل الجواب . نامي ولا تفكرين
اتخلى عنج ابقه ساندكم انتي واختج ، اشكرج لان تصرفتي وياي بصدق .
_مافهمني ولا انطاني مجال احجي ماعرفت شلون
ابين موافقتي كام فتح باب البلكونه وكف يدخن
ضليت فشلانه لحد مااذن الفجر يله دخل اباوعله
راح توضى قبل مايطلع كال.
ثابت::رايح أصلي لمي غراضنا حته نتوكل.
_بقيت ساكته عافني طلع ،، ضليت مرة الوم بروحي
ومرة الومه يعني شيريد اگله اي يله هو يبادر يووو
شسويله ، لميت الملابس وحضرت الجنط ، وانه
ادردم لحد ما اجه باوعت هم جايب غراض .
ثابت::ننزل نتريك لو بالطريق ناكل.
_درت وجهي مارديت عليه اخذت ملابسي
ودخلت للحمام بدلت وطلعت وهو يباوعلي
وكفت كباله گتله يله .
ثابت::بيج شي ؟
_خنكتني العبارة رديت،، لا بس غير انته كلت نرجع .
ثابت::اي غير ننزل نتريك وهم نمر للسوك
اذا محتاج بعد .
_لا ماريد .
ثابت::شبيج يابه ليش مغثوثه؟
_ماسيطرت على دموعي بجيت گام جرني لحظنه
ثابت::ليش تبجين شكو غير أفهم تردين نبقى؟
_شكو باقين وانته زعلان مني وكوى تحجي .
ثابت::لا لا ابد لاتفكرين هيج، عبالج لان رفضتيني
_قاطعته ،، بصوت عالي هو انه شوكت رفضتك
باوعلي متفاجئ اتقرب جرني كعدني على الحربايه
ثابت::اهدي يابه،، ليش منفعله ؟
_تحجي وياي من ورا خشمك وتكول شبيج
ترى انه ماحجيت انته لوحدك بعدت .
ثابت::اي غير واجهت منج رفض .
_شوكت شوكت رفضتك، شنو تحجي بكيفك.
ثابت::جا البجي مال امس شنو معناه.
_يحجي وعيوني مركزه بوجهي ، دنكت أعصر
بااديه،،رد يحجي بهدوء وهذا اسلوبه الي يغثني.
ثابت::سمعي يابه اذا مفكرة ،، لان ماتم بينا قبول
راح تخسريني أو اتخلى عنج لا غلطانه .
_اوووو،، شنو اخسرك شبيك انته اشبيك
انه شوكت حجيت شوكت فكيت حلكي.
ثابت::خلص خلص سدي الموضوع كومي غسلي
حته ننزل نفتر واذا تردين نبقى. بعد كم يوم نبقى
_لا صدك تحجي ، رفع حاجبه باوعلي هزيت
راسي شكو دنك يخفي ضحكت صحت اضحك عليه بعد عليمن ادنك هو انته جايبني تضحك عليه رفع رأسه مصدوم خليت اديه على وجهي وبجيت.
ثابت::لج يابه على شنو هل بجي،، قدر فهمي
انه مو مراهق ،،،ولا جايبج اخلص كم ليله وياج
گتلج قبل لانجي احنه نعتبر نفسنا مخطوبين أن اتفقنا نستمر وأن لا كلمن يروح لحاله وماضن
بذر مني شيء يغثج حاولت ومالمست قبول.
_نزلت ايديه باوعتله يعني شنو القبول تريدني
اشمر نفسي بحضنك لو شنو هو غير انته الرجال
وانته تبادر بعد شنو .
ثابت::مو بادرنا وبجيتي؟
_اي وشنو يعني خليني ابجي .خو متريدني اهلهل بعد هو انته تعرف ترى انه انه ما عندي معرفه
سابقه بهيج أمور المفروض تعذر وضعي ،، حجيتها وبجيت اتقرب حظني .
ثابت::اششش لا تبجين انسي الموضوع
انه اسف اسف .گومي ننزل
_نزلنا وفرني السوك كله اخذت للبنات هدايه.
ثابت::خو مانسيتي مديحه؟
_باوعتله دار وجه يضحك رجعنا للفندق
تعامل وياي وكأنو بينا قصه حب طويله .
ثابت::يابه شكد احبچ.
_بين بوساته الدافيه وعطرة الي يدوخني
ذبت بين اديه،، تمم زواجه بيه ،،وخلص ليلي بحظنه غزل ،وكل هاي الفترة ،،ابالي سؤال من يوم الشفته اتذكرت الشعر الي كاله رفعت راسي وسالته شنو معناه.
ثابت::واضح المعنى ، زين ليش ما اكملج
سالفته بيت المسيحي ؟
_هزيت راسي اي والفضول يدفعني .گام طفى الضوى ورجع سحبني لحظنه ،، گتله شنو غير تسولفلي المن طفيت.
ثابت::مو هاي السالفه ماتسولف
اذا مو هيج أجواء ..
_يحجي ويبوس بوجهي ، سحبت نفسي ورديت
اي وياريت تحجيلي سالفه الحيه فد مرة.
ثابت::يابه مو تددللين شو تعاي انسولف.
_طفرت وهو ميت ضحك . ايام واحنى عايشين
براحه طبعه حلو مايقيدني ولا يضغط عليه ولا بخل بشيء هيئنا نفسنا نرجع لان أبو اسعد بعد مايتحمل وشكد حبيت علاقتهم بينهم حب عجيب واحترام حيل متعلقين بعض .
ثابت::مابنفسج شي بعد .
_لا هو انه شخليت شو اشتريت السوك كله.
ثابت؛:بالعافيه يابه .
_حجاها ودنك جر علبه من داخل العلاليك
تقرب عليه اشرت شنو؟
ثابت::غمضي.
_غمضت احس انفاسه تلهب رگبتي رفع
شعري عرفت يلبسني مداليه .كمل وسحب ايدي
ثابت::لا تفتحين .
_تلمس اصابعي لبسني فتحت عيني باوعت حلقه
ومحبس يخبلون بدون شعور حظنته جرني للمرايه
باوعت المداليه سورة القدر .
ثابت::أول مالمحت الوشم بأيدج وعرفت اسمج تخيلت هل لحظه ، هذن مني وان شاء الله تاخذج إم اسعد تشترين الي يعجبج اسورات اي شي
_ماعرف اعبر عن فرحتي و لا أعرف شلون
اشكرك ،، قاطعني وهو يسحبني لحظنه
ثابت::اعلمج شلون تشكريني.
_كوة اتملصت منه،، يله كوم حته نوصل من وقت
ثابت::قدر اطلب منج طلب .
_هزيت راسي اي. كعد وكعدني يمه.
ثابت::ماريد بيوم تضمين عني شي حتى لو غلطتي
بأي تصرف يقصد أو بدون قصد ماريد اسمعه من غيرج لاتزغريني بين ناسي ترى انه راهنت على اخلاقج .
_ان شاء الله.
ثابت::أول مشوارنا راح نواجه مشاكل ورفض
تسمعين بهاي وتعبرين من هاي والج عليه
اجيب حقج يم رجليج، وشغله ثانيه اهلي حبيهم لمحبتي .
_احبهم ترى بالاخص الحجي وأم اسعد.
ثابت::عدنا جناين وتصير غيرة وكلام ديري بالج
يزل لسانج يمهن حته لو بالشفقى وبالاخص اريج
وتعرفين ليش .
_اكيد طبعا . بس هيه اصلا ماتعرف عن سونه
ثابت::ماكو شي ينضم ويجي يوم تعرف.
_بعد توصيات طلعنا وبس عبرنا مسافه طلع النقالات اخذته وانه اضحك فتح نقاله والرسائل مثل المطر،، يوووو هاي كلها مراسلتك
ثابت::جا ليش غلقته مو ادري مااخلص.
_يحجي ويكلب بالنقال عكد حاجبه يباوع سالته بقلق ها شنو
ثابت::لا ماكو شي بس صديقي هذا
شعجب متصل بيه .
_شوفه ،، حجيتها ودكيت على سونه طولت
يله ردت صحت حضري نفسج جايه ترى .
سونه::هلا بيج بس انه مو بالبيت .
_شنو يعني بالسوك لو وين ترى احنى نطول
يعني تونا طلعنا من بغداد.احجي وعيني لثابت الي
وضعه كله تغير هزيت راسي اكو شي
ثابت::لا بس انطيني سونه خل اسلم عليها
_انطيته النقال فتح صوت وخلاه بينا سلم عليها.
ثابت::شخبارج شلون صرتي .شنو طالعه انتي.
سونه::اي والله اختنكت من البيت وهم استاحشنا
لان انتو ماكو عاد كلت نزور ونتونس ماعبالي
تجون اليوم .
ثابت::صاير شي ؟
سونه::لا شصاير
ثابت::جا شعجب ماكالي الحجي انج مسافرة
وانه يوميه اسال عنج .
سونه::وهو شمدري .
ثابت::اي بس المفروض تبلغينه
سونه:اول شي انه ردت ابلغك بس جهازك مغلق
وما اعتقد ضروري انطي خبر لاهلك بطلعتي .
_رفع رأسه باوعلي وانه هم استغربت نبرتها
بالكلام رد سالها
ثابت::تمام وين انتي هسه.
سونه::بكربلاء .
ثابت::شوكت ترجعون.
سونه::ماعرف لان جاي اراجع دكتور
على مود رجلي لان كلش التهبت
ثابت::تمام لعد انه راح افر السيارة ونرجع
لكربلاء حته اطمن على وضعج .
_رفضت وهذا الي خلاه يشك
ثابت::يابه احجي شصاير ولا تكليلي ماكو شي.
_صحت بيها ماتحجين شبيج
سونه::ماكو شي شبيكم عادي ضجت من البيت
ملينه محبوسين اجينا نزور وهم راجعت دكتور
ثابت::شوكت تجين؟
يومه::يومين .
ثابت::تمام انتضرج .
_خذت النقال حجيت وياها وسالتها عن مديحه
سونه:: هاي هل كدامي
_كليلها جبتلها هدايا, صاحت مسمعتني
مديحه::ذوقج لو ذوق ثابت.
_بسرعه التفتت عليه ضحك خزرته ورديت عليها
لا ذوقي لو مايعجبج ذوقي ست مديحه
مديحه::اموت عليج وعلى ذوقج .
_نهيت مكالمتي وياهن وباوعت لثابت،هز رأسه شكو رفعت حاجبي ماسيطر ضحك حيل
ثابت::لج بابا شبيج ترى حرام .
_خوش .
ثابت:احبچ واحبچ واحبچ .
_رغم خلصها الطريق غزل بس قلق وكل شويه
يتصل بواحد من الولد يساله خو الباشا مل
ثابت::وشبيك مزعوج.
الباشا::مو مللتني دكلي شجبتلي ؟
ثابت::انته تعرف بسونه مسافرة؟
الباشا::اي گالت اريد ازور .
ثابت::شو ماكالت بلغت الباشا؟
الباشا::لحيت شكو,, بلغتني وخلص
يله يله عندي شغل عود من توصل انطيني خبر .
_ضل ثابت قلق ، ونوب قلقني ويا تالي طبك
السيارة باوعتله شكو شنو خلصت بانزين لو شنو
ثابت::بله انطيني نقالج .
_انطيتهيا طلع سجل المكالمات يباوع للوقت
ويرجع يباوع بنقاله ،، وترني صحت هسه غير تفهمني شكو ترى تعبت .
ثابت::شبيج يابه ماكو شي بس .
_بس شنو .
ثابت::قارنت وقت اتصال سونه بوقت اتصال
صديقي هذا يصير بنفس الشارع الساكنه بي
يعني اكيد صاير شي .
_بس هيه مابيها شي وردت علينا ترى عادي
شكو بيها اذا راحت تزور .
ثابت::ان شاء الله خير.
_لحد ماوصلنا انه كل شويه اخابر سونه
اطمنت مابيها شئ. طبك السيارة بابنا
ثابت::نروح لبيت الحجي لو مابيج حيل
_لا عفيه خليني ارتاح عود بليل انروح.
ثابت؛:تمام .
_دخلنا للبيت . نزل الجنط
ثابت:: مشتاق للحجي ماكدر بعد رايح
_بس طلع ركضت للغرفه ذبيت روحي مافزيت
اله على صوته يكعد بيه
ثابت؛:دنيا مغرب يابه .
_عبالك جايه مشي .
ثابت::الطريق متعب جدا .
_گمت وهو مامستقر بس يدخن سالته اكو شي
ثابت::لا سلامتج .
_ويه كلمته اندك الباب گام واشرلي اغير ملابسي
ركضت للغرفه بدلت وطلعت وانصدم كلهم
جايين سلمت وانه اباوع بوجوهم جرتني إم اسعد
كعدتني يمها ، عيني للباشا الي يهز رجله بعصبيه
وگانو ينتضر فد أمر وفعلا اندك الباب مرة ثانيه
طفر مولي شويه وصاح ياالله يابه عمي جبار
أبو اسعد::خلي يتفضل .
_ردت اگوم لزمتني إم اسعد
وفيه::اكعدي ماكو غريب .
_دخلو جبار وزوجته سلمو وكعدو احس گلبي كام
يدك حيل رفعت راسي باوعت لثابت غمض يطمني
بعدهم ماگالو الله بالخير ،،،،،وطفر مولي للباب تفاجئت بدخول إم اريج وياها زوجها حسب ماكالت إم اسعد عدل گعدته الحجي وجه كلامه للكل
أبو اسعد::حاولت الم الموضوع الي سببه علاء
بس تماديتو اگثر وزادت الطين بله إم اريج .
_اتلفت بينهم مافهمه شي.
إم اريج::حقي توفي على بيت بنتي.
_گمزت من صاح الباشا.
الباشا::وهيه شعليها بنتج داگه بابها شفتيني مصعدها بسيارتي ، وبعدين انه اذا رايد اسوي شي
انتي تمنعيني لو شنو .
_ماتعبت نفسي بالسؤال عرفت الشغله تخص سونه
بقيت مدنكه گوة مسيطرة على دموعي وهمه يتصايحون.
ثابت::من شوكت صرتي تتجاهلين وجودنا وتصرفين بكيفج ،،هيج مو بعينج احنى وضاله تطبين واطلعين بكيفج . بس عتبي على زلمتج
أبو اريج::مادري بيها ترى يعني تضن أعرف واخليها
ثابت::ولهذا السبب ،، من وجاي ممنوع تطلع
باب البيت اذا مو انته تاخذها وتجيبها حتى النا
هم ماتجي اله وياك .
_انتفضت إم اريج صاح بيها سكتت ،، والتفت على جبار الي ما عاجبه الكلام .
ثابت::انته وابنك تجاوزتني وتجاوزت عليه
جبار::لا ماتجاوزنا اول اسمع شنو سبب عركته وياها
ثابت::روحته من الأساس شنو جبار ابنك متعني
لبيتها وناوي الشر،،وصدفه لكه أبن فاروق عدها حطه عذر هو شكو ولي أمرها.
جبار::هو گال من شفت السيارة بابها .
ثابت::عشر سيارات عشيرة زلم أنتم شنو بيها.
جبار::أفهم من كلامك راضي حتى لو.
ثابت::لو شنو جبار اكعد عوج واحجي عدل
البت مابيها غلط شو تخوط خوط .
_انتفض جبار وگام بعصبيه.
جبار::لاتجاوز انه ساكت لخاطر الحجي البت وجودها غلط رضيت أو مارضيت مالها ضله بينا.
_هز راسه ثابت تمام ودار وجه للباشا الي من العصبيه حته الكرسي الكاعد عليه يهتز ضليت اباوعلهم وعبالك بينهم فد شفرات، بانضرات يفهموني بعض الحجي ساكت ،تحمحم ورد برود.
ثابت::بالنسبه لهل شيء مالك حكم علينا .
جبار::هذا الكلام من الكل مو بس انه.
الباشا::الكل منو غير نعرف اذا انته ماعاجبك
وجود البنت بالمنطقة شيل بس خو مانشيل دخيلتنا لخاطر نرضي ابنك .
_من خوفي لزمت ايد إم اسعد.وهمه صارو نار.
جبار::شو ساكت حجي وادي.
أبو اسعد::الحق .
جبار::ياحق وانته حطيت بت بشار بنصنا
وتريد الأولاد تغمض عيونها شني تغشم روحك.
_وندثر اسم راضي ونسبونا لبشار نزلن دموعي
وفيه::ارفعي راسج اشرف واطهر منجن ماكو
قيادة لادنكين وانتي كبال ثابت الي جابهم سحل لبيتج .
_غلبتني شهكتي بجيت بصوت گام الباشا
وهو يدفر الطبله الكدامه .
الباشا::حدك اسمع هاي گدام أبوي تجي
سونه،،تجيب ابنك وتعتذر منها
جبار::شنوووو خاب غير اترس حلگه رصاص
لو هوب صوب بيتها واعتذر.
الباشا::لا يابه على شنو عصبت خلص نعوفك منك الها وهيه تجيبك سحل من شتكي عليه وينشمر بالتوقيف بتهمة شروع بالقتل.
_رفعت راسي ثابت يباوعلي غمزلي بمعنى اسكتي
والباشا استلم جبار تهديد اريد بس اكوم حسيت بروحي راح افقد حجيت مسمعه إم اسعد خاله گوميني
وفيه::اسم الله ماما شبيج شو كومي.
_دخلت للغرفه بجيت بصوت عالي.
وفيه::سمي بالرحمن ماما لاتخافين .
_ضليت احاول اسيطر على روحي
نقذني من اجه.
ثابت::هااا شسالفه شو كومي غسلي وجهج
وتعاي اريدج تسمعين كل حرف حته من تعاتبني اختج انتي تحجيلها شسويت لخاطرها.
_گمت للحمام وانه ادعيله همزين ماتفشلت كدامهم رجعت كعدت بينه وبين أبو سعد
الباشا::اهنا وخلص الكلام .
جبار::لو متجاوز على مرة ثابت اجيبه يم رجليه
بس تردونه يعتذر من البت ما اقبل ،،هو مامتعمد
بس لان شايف أبن فاروق شايلته الغيرة
ثابت::منو گالك انه رافض.
جبار ::يعني انته قابل بدخلت أبن فاروق عليها جا هم احنه اهلك والنه حق نحاسبك لو شفنا غلط .
ثابت::يالناس افهمو مو بكيفكم تحللون وتحرمون هل ولد عايش ويا قدر 18 سنه إخوة بيت واحد
ربو ولعبو وكبرو .
جبار::هم مايجوز تواصله بيهن .
ثابت::هاي المايجوز حلال وحرام ماافتي بيها
لكن إنسانيا مو بسهولة تفرقهم . الجار لو جاورك
كم سنه من يشيل هم تبقه متواصل ويا اصلا انه
ناوي التقي بي واحدد علاقته بزوجتي مااكلك افتحله بيتي يجي وكت مايريد بس هم اله حق يشوفها لان يعتبرها أخته .
جبار::خلص نعتذر منك والبت ذيج ،مالها حق علينا
أبو اسعد::وهيه تخصنا مثل مااختها تخصنا .
جبار::اختها جنتك ورغم كسرت بنتي.
الباشا::واعتبر سونه هم جنتنا من هاي الحظه.
_الكل توجهت انضارها على الباشا صاحت عمته
إم اريج::اطلك بنتي .
الباشا؛:من هيه تطلب الطلاك.
أبو اريج::لا اسمحلي انه لهنا وايدت كلامكم
بس تزوجها على بنتي لا مااقبل.
_نهى الجدال ثابت
ثابت::هيه اصلا رافضه لا تنخبصون.
أبو اريج::وان رضت .
ثابت::مالي حكم عليها ولا عليه .
أبو اريج::حجي شو ساكت .
أبو اسعد::حملت روحي ذنوب وردت اعالج السالفه بالصحيح لكن انتو كبرتوها أن رضت فهذا شيء يخص ابني وماكول اقبل بزواجه منها لكن العليه انصح الطرفين مو انتقاص من البنت بس
زواجهم فاشل وماضن البنيه غبيه.
_رغم الكل انتفض بس هو يحجي برود
الحجي ماانطى مجال لام اريج وكال لزوجها اخذها وروح جبار ومرته طلعوا بعد ماتعذرو من ثابت والباشا اصر على اعتذارهم لسونه ، بقى الحجي وأم اسعد كاعدين انسحبت من يمهم ودگيت عليها ردت يتعب
سونه::هاا،،گلت نامت من التعب .
_كل هذا صاير وماحجيتي؟ شوكت تعتبريني اختج.
سونه::انتي امي وبنتي واختي وكل اهلي بس ماردت تخرب فرحتج بسفرتكم المهم طمنيني شلونه الوضع
_عرفت قصدها ،، رديت باتمام .بس انتي شوكت تجين انه مشتاقتلج هواي
سونه::كم يوم بس أكمل علاج رجلي المهم كولي لثابت يتصل بيه من يفرغ .
_بعدج تضمين عليه،، خو گليلي شتردين
سونه::اريده يعرض البيت للبيع بعد ماترهم ابقه يمهم
_اذا شلتي ماابقه عنده . حجيتها والتفتت للباب الي انفتح دخل باوعلي دنكت فشلانه مد ايده اخذ النقال وحجه وياها.
ثابت::حته لو اختج تعوفني انه مااقبل تشيلين بعيد عني يله لمي اغراضج وتعاي يا صاحبتي مشتاقلج.
_ماانطاها مجال تحجي نهى المكالمه وشمر النقال على الجربايه وجرني من ايدي طلعت ويا لكيت بيت أبو اسعد بعدهم گاعدين اشرلي الحجي رحت يمه
دنك بأس راسي.
أبو اسعد::انتي بنتي واختج حالها حالج ربي يشهد مو رافضها لكن يابنتي زوجة الباشا على كولتكم
بنت اختي وعدهم طفل شنو ذنبه يصير ضحيه
لان اعرف ومتأكد اريج ماتبقى لو اتزوج عليها
_بلعت غصتي ،، ورديت عمو ترى هيه رافضته
وهذا گبالك واساله لو انه اجذب كح الباشا
أبو اسعد::اشرب ماي يابه ليش شحطت.
_ضلو شويه وترخصو ،، صفنت الفرح ليش مايدوم
طلعت السفرة من عيني رغم ثابت وكفته وكلهم
ماانطو بسونه بس انقهرت
ثابت::حضري هدايه البنات حته نروح الهم
_عزلت كل شخص غراضه طلعنا من بيتنا نتمشى
تلكتني بنين .
بنين::زيارة مقبوله وكلشي وكلاشي بس انطوني علاكتي .
مولي::ولا عندج ذوق دكولي شكرا
_حجاها ومد ايده شمرت علاكته اخذها وركض.
ثابت::عود شكرا .
مولي::راح ادزها لك وات ساب .
_انطيت كل شخص هديته.
نغم::شكرا شكرا .
_تفاجئت بااريج الي اجت وسلمت وعبالك ماصاير
شي وطول الكعده هيه تصرف اعتيادي لليل رجعنا
لبيتنا ماعاتبني على كلامي ويه سونه وتصرف اعتيادي بس فرحتي ناقصه رغم كل شويه اتصل بيها
لحد ماقنعها واجت احس الدنيا ماسايعتني نزلني بابها وراح تلكني يبوسن بيه.
سونه::ليش مكلفه نفسج ولج
شدعوى هلكد جايبه.
_مو انه هو شنو اخذ يكلي اخذي للبنات.
مديحه::الله يرزقه .
_سولفتلهن على جيت اهله وجبار.
سونه::ماريد منهم اعتذار خلي يكفيني شركة
_بس ماكلتيلي جيت طارق شنو .
سونه::ابد لا تفكرين الولد مابذر منه غير الخير
وكال اختي وحلف .
_ثابت گال افرغ ودز عليه يشوفج.
سونه::اي احسن المهم شنو وضعج وياهم.
_اكلج شو مرة الباشا تصرف وگانو ماصاير شي
سونه::ديري بالج منها .
_بقيت يمهن اتصل عليه گتله اريد ابات.
ثابت::ماكدر تعذريني لان مشتاقلج .
_لا حباب بس اليوم ومن الصبح تعال عليه.
ثابت::لخاطر مديحه.
_هو يحجي وانه التفتت اباوع عليها
نبهني صوته يضحك .
ثابت::عوفي البنيه يابه شبيج .
_ترى ماحب هيج شقى .
ثابت::گولي إغار واخليج تباتين .
_صفنت هنه ملتهيات ينفشن بالغراض صاح.
ثابت::ها راح اوصل .
_اي .
ثابت::شنو اي ؟
_يعني اي بعد شنو .
ثابت::اجي عليج يعني ؟
_صحت لا إغاررر.
ثابت::هههههههه يله ابقي.
_سديته والتفتت لكيتهن يباوعلي، مالحكت ابرر
گامت مديحه شغلت الابلازمه وطلعت أغاني
مديحه::ماسوينالج حفله .
_ركصت لحد ما تعبت وسونه تضحك .
مديحه::گومي إم اعطوب هزي طولج .
سونه::اي بهاي رجلي .
_مانمنا لحد ماطلع النهار ،،اجه عليه ودعتهن وطلعت أول ماصعدت جرني باسني.
ثابت::بعد ممنوع ،، تباتين بعيد عني.
_اخذني لبيت الحجي تغدينا ،،هو والولد مشغولين يسولفون كمت يم بنين ونغم للمطبخ سوالفهن حلوى وابدي مايغثني اجت اريج
اريج::سلامم.
نغم::هلا تاخرتي ترى تغدينا.
اريج::گعدت متأخرة مااشتهي
شنو الولد وخالي وين.
بنين::بالصاله حته زوجج.
_گعدت وابنها بحظنها وهنه انشغلن بنين تغسل المواعين ونغم تسفط لفت انتباهي أغنية اريج الي تلعب بيها ابنها عود ترگصه.
اريج::تريد تموت الشايب حطت ريحه إم السودان.
_تردد بيها بصوت ناصي بس قاصده تسمعني ، غلست صاح عليه ثابت طلعنا لبيتنا .
ثابت::ها شو مالج خلك.
_هزيت راسي لا .
ثابت::شنو اتفقنا مو كلت لاتضمين عني.
_حجيتله عن اريج جرني لحظنه.
ثابت::الي ينتقدك فهو غيران منك . اهم شي انه احبج معليج باليحجي يابه كون السودان بحلاتج
كلنا نصير سود .
_وهيج مهون عليه كلام اريج الي كل مرة تخترع
سالفه حته تغثني بيها ،، وكدرت سونه تقنعه يبيع بيتها بس اخذلها بيت بنفس منطقتنا على الشارع
وصل الباشا يحاول رغم رفضها اله بس ما مل صار يتوسل بثابت يقنعها.
ثابت::يابه كف منها ترى مللتها مااتريد تتزوج .
الباشا::سهله إم اعطوب سهله .
_باوعتله ضحك.
الباشا::لاتزعلين بس من حرگة كلبي.
_يكسر خاطري اشوفه شلون يلوب لشوفتها
وهيه هم تحبه بس ابد ماانطته مجال وبعدت عنه
ضل ينتهز الفرصه بس يسمع بيها جايتني يجي وثابت يطرد وهو ولا مهتم.
الباشا::ها صار البيت لنسيبتك
ثابت::اي اي شنو مثل كاد عليه .
_عيونها عليه وهو يبوك النضرات منها ،، وهيج حالهم ،، وبيوم نايمه وثابت يسولف وياي على طلب سونه
ثابت::تريد تفتح صالون.
_خليها اذا بيتها شكو بيها.
ثابت::اي هو انه هم فكرت تسلى بي
دتعاي خليني اسولفلج عن الحيه .
_مالحكت اطفر الجربايه وهو يضحك دك نقاله
باوعت الرقم وعكد حاجبه سالته بخوف ها سونه
ثابت::لا رقم غريب .
_حجها وفتح خط بس كال الو طفر .
ثابت::وين وين اي اخي خليك وياي رحمه لوالديك
يا مستشفى اي اي جاي
_يحجي ويلبس بملابسه جر سويج السيارة ،،طلع للكراج ركضت ورا يمعود اوكف بس فهمني، شكوو.
ثابت::الباشا مسوي حادث.
