رواية هشاشة قلب الفصل التاسع عشر بقلم العباديه
قدحً منَ القسوةِ ..
أحتاجُ لأنتقمَ لكلِ دمعتً ذرفتها . .
وأحذفُ ذكرياتي كلماتي المسجلةَ في دفترها.
~~~~~~~~~~~~~~~~~~~~~~~~~~~
ثُرىٰ . . .
بقيت واگفه بمكاني ومدنگه اباوع على رجليه .. حسيت خيال يمي وگف .
مارفعت راسي .. بس بحركه سريعه ايدي انسحبت بقوه ورجليه تمشي ركض بحركه من عنده !
سحبني بقوه ويمشي .. ايده بقساوتهه وكبرهه تضغط على إيدي حسيت العظم راح ينكسر بإيده . مو إيد تگول ساطور.
سمييره گاعده بالممر هم منتظره من شافته هيج سوه لطمت على وجهه وعاطت
ام ماهر.. عززا ماهررر شدتسووي
مااهتم لكلامهه سحبني لغرفه صغيره فارغه مبينه مال دكتوره دخلني ورگع الباب خله الچرچوبه اهتزت .
شفت الغرفه صدك مال دكتوره وعليهه اسمهه من الارتباك والخوف بس ادير بعيوني بأنحاء الغرفه وماحطيت عيني بعينه .
حط إيديه بجيوبه ونظراته متمركزه عليه بغضب .. اشوفه بطرف عيوني وجهه صاير نار .. وگف ثابت ورفع راسه بشموخ .
نتر :-
- شو باعيني
ماگدرت اباوعله دنگت راسي وثبتت عيوني ع الگاع .
نتر بعصبيه ؛-
- ماكلللت دنكككييي
سكتت
صوت انفاسه الغاضبه مسموع بالغرفه يزفر نفس وره نفس بعصبيه .
سحب شهيق طويل ورجع زفره بهدوء يحاول يهدأ نفسه .. نتر
- اححححججججييي
رفعت عيوني مستحيه ارفعهن وارجع انزلهن لما اخر شي كلت عليمن خايفه من عنده شيريد يسوي قابل .. رفعت عيني بعينه الغاضبه وسألته :-
- شنو شأحچي؟؟
صفن بعيوني وتحول شكله لهادئ وحنين باوع بيه بعتب وعيونه نظرات عتاب همس
- ليشششش؟؟؟؟؟
باوعتله متعجبه .. ماجاي اقتنع نفسه هذا ابو الرزايل صاير حنين ونظراته خبلتني كلهه ندم وعتاب وهسه يگلي ليش مااصدگ !!
همس
- ماتحجين شليتي گلبي
- ها؟؟
- وين حلقتج؟
- شنو ياحلقه؟؟
- حلقتج مال الخطوبه ليش مالابستهه لازم الإيراني مامالي عينج !
ظليت مستغربه ياحلقه ياايراني؟؟
ياااا يااا خاف هذا عباله وافقت ع الايراني !
عززا خاف صدگ ؟! اول مره الگفهه وهيَ طايره والله يثُرىٰ صايره ذكيه .
خل اجيس نبضه يلا ابلش استفزه كتله :-
- تعرف شوكت خطوبتي
عكد حاجبه ولم شفته بغضب .. دار وجهه عني
- هه ليش مااعرف .. اعرف كلش زين رفضتيني منا وقبلتي بالايراني منا هه هه
ظل يضحك مستهزأ والحرگه مبينه بصوته
- لا الحمد لله أركان مالي عيني بس اني اخاف علينه ننحسد والنوب البنات يسألني على صورة خطيبي والولد ينصاب بعين يگعد بمكانه.. العالم ماترحم تحط عيونهه على كلشي
ظلت الشرايين البرقبته تتحرك وتتشنج خزرني بعصبيه والبنطرون من ناحية جيبه تعكمش يمكن صم إيده .. نتر بغضب وصوته علّه :-
- ليششش ثُررررىٰ ليشش؟؟ بشنو احسن مني الإيراني؟؟ لج اننننييييييي مااااهرررر بعظمتي ترفضيني وتوافقين ع الأيراني؟؟؟
رديت بصوت مستفز ورافعتله حواجبي هادددددددئه :-
- العظمه لله وحده
تخبل طلع إيده من جيبه وضرب ع الميز مال الدكتوره .. تفلش صخام بويهي خاف النوب تريدني اخسره اني شعليه هوَ يخسره .
- شهرررر واحددد شهررر واااحدد اخذت اجازه اجي الگاج ماكووو !!! لج قبل لااخطبج انتِ عيونج تحجييي وتباوعيلي خبلتيننيي بنظراتج .. وكلماتج العفويه خلتج تعترفين كلشي وماتدرين بروحج وهسه تسوين روحج متعرفييين؟؟
- شنو ليش اخذت اجازه؟
ظل يعيط ووجهه صار احمرر دم
- بااع وين تحججيلي يررربببيي
سكتت. ودنگت راسي اني الراح اتخبل مو هوَ يمكن اخذ اجازه وره مارفضته لان حضرته مايتحمل اقلل من رجولته وهوَ ماينرفض حضرة الملك .
- احجيليي عنه احجيلييي لهالدرجه شفتيه احسسن منيي
- قصدك اركان؟؟
فرك وجهه حيل ورجع شعره لوره بقضبة اصابعه
- استغفر الله لتجيبين طاريه مقابيلي
- ياااااء جا غير انتَ كتلي احجيلي عنه
- اي اقصد شنو الخلاج توافقين عليه وترررفضييني
باوعت بيه وتذكرت حجايته من خطب وشلون أذتني وكسرت گلبي بوقتهه .
كتله ببرود
- حبيته وكلش عجبني ف من تقدملي وافقت !
فتح عيونه على وسعهن مذهول !! عرف جاي اشربه من نفس الكاس .
رمش بعيونه والصدمه تعتلي ملامح وجهه .. خنزر عيونه وطبگ حواجبه .. أشرلي بحواجبه مرتين وهمس
- طلعي بررره
ظليت واكفه شنو غرفة اهله ويطردني
ضرب ع الميز تلث مرات بعصبيه وعاط :-
- طلللعععييي
حيلي باد ورجليه رجفت رأساً بدون صوت فتحت الباب وشردت لبره احس نفسي مكطوع جان ضاب الخناق عليه .
تنفست براحه ولكيت سميرانو واكفه يم الباب . اول ماطلعت صارت بوجهي نترت بيه
ام ماهر.. شبيه ماهر شسويتيله؟؟
- لازم صغير واسويله
ام ماهر.. شبيه يعيط فهميني كله بسببج الله ليرضى عليج
- خاله اني شعللييه هوَ سحبني
ام ماهر.. مااعرف شسويتي لاابني سوده عليه يوم
استغفر الله ربي شلون بيهه هاي المره باوعتلهه واهز إيدي بس بگلبي هزيتهه .. لان عيب مقابيلهه مهما يكون تبقى اكبر مني .
مرت تقريب النص ساعه وهوَ ماطالع من الغرفه . لما اجت الدكتوره دخلت للغرفه واني تخبلت هسه تلگاه گاعد ع الميز اكيد وتشوف الهيبه والشخص
يه تسحل روحهه لان ماشاء الله بنات الكليه كلهن ساحلات رواحهن .
ظليت اتحرگن من الغيره .. مرت عشر دقايق ولا هيَ ولا هوَ !!
استغفر الله ربي صبرني وخليني واگفه بمكاني توني احس بالانتصار مااريد اخرب كرامتي الاسترجعتهه .
رحت يم امه كلت بلكي اوزوزهه
- خاله استاذ ماهر بقه بالغرفه والدكتوره دخلت لجوه خاف متقبل لان غرفتهه
ام ماهر.. خليهه بلكي تعجبه واخطبهه إله هيج يوم عيد والله شفتيهه شلون نزاكه وترتيب كولش عجبتني بس كون تطلع واشوفهه بعد اروي نظري
هاي انهدت تمدح بيهه وترد لوره فوك مامحترك كلبي حركته بالزايد .
اجو وليد واسماعيل كلت لوليد
- وين عفتونه الزلم تتخطف علينه واستاذ ماهر عافنه دخل جوه
اسماعيل.. شنو وين راح غير بقيناكم امانه يمه
- هنا دخل بهاي الغرفه مدري شيسوي
راح وليد صاحه واجه .. طلع هوَ وياه ويضحك !!
خوش والله أثرت بيه بسرعه. باوعتله رافعه حاجبي بس ماباوعلي والابتسامه على كل وجهه .
طلعت الدكتوره نفسهه لابسه شال بيجي والشعر نصه طالع وصابغته اشقر ذهبي ووجهه دائري وابيض وخدودهه حمر وحاطه حمره لون جوزي ومكياج خفيف كلش حلوه وايديهه ناعمات ولابسه محابس ذهب نازكات والحذاء كعب والحجي والنزاكه اني معت وتسرسحت ف كيف هوَ ؟!
من تضحك بهدوء ونزاكه .. باوعت على روحي جنت لابسه بنطرون وفوگاه يلگ زيتوني وشال مثبتته بدنبوس واحد ووجهي يتلاطم .
لاكحيله لاحميره والله حسيت نفسي نمله مقابيل جمالهه .
ياا واني شمالني اصلاً بس خدودي بمره .
منتصرون رغم الألم .
نهى تصرخ ووليد يفرفح كلما تعيط يگمز ويظل ياكل بروحه .. كسر خاطري .
ابو الرزايل بعد ماباوعلي ومتجاهلني وبس يسولف وي الدكتوره .. وهيَ هم لگتهه فرصه كلساع يارايحه ياجايه .
جابت نهى ولد ودخلنالهه بعد ماكعدت.. اول ماشالته بجت وباوعت لوليد .. كاعد يمهه ولازم ايدهه .. وهاي ام ماهر تتحركن
ام ماهر.. أُمي عوف ايدهه خل ترضع الولد
وليدد.. اي بس تطلعون ترضعه
ام ماهر.. وانتَ هماتين تطلع
وليد.. لا مااعوف مرتي
هاي شبيهه المره تغار شنو ؟
ابو الرزايل اذن بإذنه الولد وكمل ورجع لوره وكف
كتلهه :-
- نهى عليج الله سموه شامخ
ام ماهر.. ايع شنو هالاسم
وليد.. هههه بكل عقلج وين عايشين بيا زمن
ابو الرزايل واگف ورانه كلنه ومكتف ايديه وعاكد حواجبه .. كال
- وليد اختار انتَ ونهى الإسم وخلاص
نهى.. اني ماكو ببالي اسم
وليد.. ولا اني
ماهر.. لعد سموه أبهر
حجيت بدون ماالتفت عليه
ثُرىٰ.. شسالفه عملية تشريح القلب شنو
تمشه ووكف صار مقابيلي .. خزرني خزره خلاني ادنگ راسي متفشله .. والله بط چبدي يعني هوَ هذا اسم ابهر هههه ابهر النوب .
نهى بإبتسامه كذب.. ههههه ماكو غير هذا الإسم
ماهر.. بكيفكم بعد هذا اول اسم اجه على بالي
ام ماهر.. اني اسميه انتم معليكم ..
امم اسميه حسوني
وليد.. حسوني حسوني هاي هيه
ياحيف والله راح يصير اسم ابن اختي وهيَ مسميته .
اسماعيل ماخذ دور المتفرج ماحچه أي شي بس بارك لنهى من دخلنه .
للصبح اجت امي هم ظلت وي نهى واني رجعت للبيت .
بقت يومين وطلعت نهى من المستشفى ولازم اني اروح لبيتهه اساعدهه لان ماقبل وليد تجينه يكول بيتكم صغير واريد اخذ راحتي . على اساس هوَ كاعد بڤله .
رحت لبيتهه اقدم ضيافه وانظف صرت كرسون بلوشي.
اساعد نهى من توكف ومن تبدل بكلشي وگفتلهه .. حتى الطفل اني اهتم بيه من تتعب هيَ .
حسيت نفسي ام بيت .. وليد ياخذني ويرجعني للكليه .. اشوف نهى حياتهه ممله .
شني هاي اذا مو البيت متروس وبيه هوسه هسه هم اكعد بيه.
من يطلع وليد العصر اخذ راحتي .. البس تراكات ودشاديش قصيره .
اليوم ساعدت نهى سبحت واني هم سبحت ولبست تراك للركبه وربع ردن .. عند اهلي محرومه من التراكات استحي من اخواني .
سويت شعري ظفيره صفح وظليت اسولف وي نهى .
- اكلج اشو استاذ ماهر يكلي ليش وافقتي ع الايراني منو كالله اني موافقه؟
نهى.. اني كلت مقابيله .. اخذنه للسوك علمود نتسوك للطفل وكلت لوليد اريد اخذ فستان مال حفلات من سألني كتله علمود خطوبة ثُرىٰ راح تصير بإيران هوَ رأساً وجهه انگلب
- وليش جذبتي عليه؟؟
- نرجعله الصاع صاعين
- هههه عفيه اخيتي
قاطعت سوالفنه دگة الباب رحت فتحته .. لكيتهه ام ماهر
- هلا خاله تفضلي
ام ماهر.. يا هاي انتِ شجابج هنا؟
- اساعد اختي
ام ماهر.. اوف وين مااروح تطلعين بوجِهي حاطتلي جهاز تعقب لو ايش
ابتسمت جذب وودي افترسهه
- هههه دخلي
دخلت كدامهه فتحت باب الاستقبال دخلتهه وطلعت اضيفهه .. من طلعت صار ابو الرزايل بوجهي جاي يسد الباب !
شافني وظل يرمش بعيونه .. نظرلي نظره وحده خطف ودار وجهه رأساً انطاني ظهره .
النوب ظليت مصفصفه وواگفه .مدري بشوفته مدري بالقاط الجديد .
جلّه صوته ونتر :-
- ماتمشين اليوم ابقى واكف هنا؟
- ها اي اي
دخلت ركض للبيت كلت لنهى ولبست صايه فوك ملابسي وطلعت بالماي .
دخلت وسلمت امه ماردت السلام ولا هوَ !
بس حرك شفايفه ومامبينه رد .
صبيت ماي بالكلاص وادري بإمه تشرب بالصلاحيه .. انطيته الكلاص وانطيتهه الصلاحيه اني واكفه قريب عليهه من ماده ايدي مامبينه الهه وهيَ ماخذتهه عبالهه لازمتهه لان ثگيله .
هوَ باوع بإيدي وبالگلاص . رفع حاجبه وباوعلي خازرني .
ماهر.. اني سامع يقدمون للجبير اول شي . تعرفينهه هالمعلومه لو لا؟
- ااءء
ردت احجي وقاطعتني
ام ماهر.. باع حتى بهاي ماعدهه احترام وكلشي متعرف ولا عبالك طالبة كليه وعمرهه بالعشرينات
- خاله غير انتِ كل مره انطيج بالصلاحيه كلما اقدملج بالكلاص تكولين اريد بالصلاحيه
- خلاله بعيج وع راسج شوكت اني شاربه منج مي هيَ مره وحده جيتكم وحتى مشربت شي .
هذا يباوع مخنزر وهاي اكلتني حاصل فاصل .. سكتت وعبرتهه .. سحبت الطبله بنتر خليتهه بالوسط وخليت عليهه الصلاحيه والگلاص .. سوولهم سالفه من لاشيء .
يخزر بيه خزر وعيونه تلصلص يريد يگوم يفترسني عبالك سويت جريمه .
طبيت مختنكه من هيج نماذج ادري مصنوعين من ذهب لخاطر الله .
- نهى كومي طلعيلهم تره راح اتخبل
نهى.. شكو شصاير
- كومي يختي كووومي
حضرت الضيافه وهيَ راحت يمهم .. دخلت حطيت الصينيه على الطبله والنظرات المراقبه تشتغل.
خليت العصاير كدامهم والكيك بالنص بقه بالصينيه .
ردت اطلع ونهى اشرتلي عود ابقي .. رحت كعدت يمهه ع التخم وروحي طافره مااريد ابقى .
ماهر.. وليد وين؟
نهى.. طالع
ماهر.. طاح حظه عود كتله جايينكم اليوم
نهى.. هوَ طلع كال ساعه وارجع
ماهر.. شلون يبقيكم وحدكم
نهى.. ماعلينه شي قافلين الباب وكاعدين نسولف
ماهر.. هاا زين
اني عيني على ام ماهر اخيراً اكلت كيك ردت اهلهل .
ظلت تاكل وتعوج بحلگهه ومبين عجبهه الطعم .
ام ماهر.. اكولج هذا الكيك منين مشتريه؟؟
نهى.. ثُرىٰ مسويته
ها .. اها بحركه وحده شمرت الكيكه بوسط الصينيه بإشمئزاز ونكثت إيديهه وظلت تمسح على حلگهه !!!
ظليت فاكه حلگي ومصدومه
خايبين هدوني عليهه وابو فاضل خبلتني هاي المره تاليتي مجلوطه مجلوطه من وراهه .
ابو خاولي خزرهه مبتسم عود " شنو هذا التصرف" .يعني حسب تفسيري .
اني ونهى وحده تباوع بالثانيه
هوَ ضحك واخذ قطعه واكل مجبور
ماهر.. عاشت ايدج كلش طيب عبالك جاهز
دنگت وهزيت راسي عود يريد يغطي سالفة امه !
اجه وليد ولگاهم كاعدين رحب بيهم وظل يسولف ويضحك .. وجايب عشا وياه .. يعني يبقون .
كمت اني للمطبخ صلينه وجهزت العشا .. كلهم التموا واني ماكدر اكل مقابيله وهوَ اصلاً مايباوع عليه بس وجوده بنفس المكان يوترني .
كلهم ياكلون بأريحيه ويسولفون الا اني متقيده وكوه ادحس اللگمه بحلكي .
وليد.. ثُرىٰ ماتاكلين مستحيه شنو
رفعت راسي ببلاهه لان جنت مامنتبهه لكيتهم كلهم يباوعون عليه وهوَ رافع حاجبه وصافن بيه رديت
- ها؟
ضحك وليد وقصفني
وليد.. تره راح نلم المواعين والاكل اليزود انطيه للبزازين خاف تاكلين بالمطبخ
- يييحح لا وابو فاضل مو هيج اني اصلاً مااكل بالمطبخ
وليد.. ههههه ها تقنعيني انتِ مو عظامه
- شبيك عمي والله مااكل بالمطبخ لاتخاف
ظلو يضحكون عليه وهذا صفن بيه مبتسم .. تذكر جفصاتي لازم
مااكلت شي لان بالاصل مااشتهي .. لميت المواعين وعزلت المطبخ .
قدمنه حلويات وظلو يسولفون وياكلون واني اطرش بالزفه .. اشو صارت بـ11 وذوله ماكو ماراحو لااهلهم !
خاف الهم نيه يباتون؟؟
شويه وكال ابو الرزايل
- جيبولي فراش خل اتمدد تعبت من الگعده
ظليت صافنه يباتون اهووو شنو هذا اليوم الفگر بعدني لهسه ولا تحضير محضره .
كمت فد نوب جبتلهم فراشات وفرشتلهم بالاستقبال .
اني ونهى وام ماهر بغرفة نهى وماهر ووليد بالاستقبال ينامون.
ظليت قلقه لان مامحضره اي شي منا لما نامو يلا كدرت اقره .. النوب ام ماهر كعدت تربعت وكابلت نهى ودگ سوالف اريدهه تسكت ماكو مدري خباثه مدري طگتهه الحنيه على نهى .
اخذت كتبي ورحت للمطبخ حطيت كتبي على الطاوله وسويت گهوه ظليت اقره لـ12 طفت الكهرباء .. رحت جبت لايت وكعدت اقره .
شويه وانفتح باب المطبخ ودخل ابو الرزايل بإيده موبايل ومشغل فلاش .
همس بهدوء
- ثُرىٰ كاعده؟؟
- اي
- شدتسوين؟
- اقره
جر حسره وسحب الكرسي كعد عليه . اشتغلت الكهرباء طفه موبايله وخلاه ع الطاوله .. باوعلي مركز بملامحي ومطول نظرته .
- ليش انقلتي؟؟ انتِ رفضتيني الكليه شعليهه؟؟
- ما
- هوَ شنو ما؟؟
- مااريد
- ليش؟
- ترسبني
ضحك
- لا ماارسبج
- لا والله ترسبني
- مرسبج قبل؟؟
- اي العام بنصف السنه
- انتِ غبتي مو اني رسبتج
دنكت راسي العب بأصابعي .. تنهد وقرب جسمه على الطاوله اني رأساً وخرت ايدي عبالي يلزمهه باوعلي متفاجئ وسحب الملزمه مال مادته .. ورجه ظهره لوره على الكرسي .
ظل يگلب بالملزمه مبتسم
- منو ياخذكم؟؟
- استاذ *
- بعدج تكولين استاذ؟ هههههههههه
ضحك من اعماقه.
- دكتور * خوش دكتور حباب
- اي احبب منك
ابتسم وسكت صفن عليه وتنهد همس
- ثُرىٰ إرجعي
- مااريد
- ثُررررىٰ
- ها ها
- ارجعييي
- ترسبني
- يابه والله ماارسبج بس ارجعي
- مااريد
- هاي هيه بكيفج بكيفج
وكف وشكله غندب .
- يلا يابه تصبحين على خير ونامي لان السهر مو زين اذا تريدين اكعدي اقري الصبح حتى عقلج بعده نشيط
- وانتَ بخير
راح واني بقيت كاعده اتصفن اوف شلون هسه شوشني وراح!
شلت كتبي وفتت نمت .. الصبح كعدت سويت لفه وتريكت ع السريع .. من طلعت لكيته قبلي كاعد ومبدل ويلبس بساعته هم .
حتى وليد هم مكمل .
وليد.. اليوم عمي ماهر ياخذج بطريقه
- جا وانتَ؟
- راح اروح بسرعه تأخرت
طلع ع السريع وخلاني وي هذا العقده خرب حظي..
فات كدامي للسياره واني وراه كعدت .. لبس النظاره وظل يسوق شكد اكره هذا الطبع بيه .. خرب حظي .. حتى بهاي يدقق ومايخليني اشوف .
ماحجه أي شي ولا اني حجيت .. وصلني للكليه وراح .. دخلت للكليه واليوم كله متكأبه .
حتى بمادته مادخلت للمحاضره .
وين قبل الخوف مايخليني افوت محاضره وحده .
مر اليوم بملل فضيع ..
رجعت للبيت ووليد دزلي خط مال بنات لان مايكدر يجي .. سياره حديثه وبيهه بنات وياي بالكليه.
كعدت وره والسياره جديده
رجعت للبيت ووليد دزلي خط مال بنات لان مايكدر يجي .. سياره حديثه وبيهه بنات وياي بالكليه.
كعدت وره والسياره جديده ومغلفه بنايلون.
الطريق بيه لوفات هواي .. اول مالاف الولد زلگت صرنه وحده فوك الثانيه .
البنيه الاولى واني فوكاهه وذيج فوكاي صار بينه فلم..
اني صحت بصوت عالي :-
- عللليييي
الولد التفت عليه وكال :-
- هااا
ظليت صافنه شنو هاي اني كلت علي قصدي ع الامام علي دوم اذكر اسمه بأي شي.
ذني اليمي ماتن ضحك .. همست
- شبيجن شكو
- ولج الولد اسمه علي
- ييييح صخام بوجهي ههههههههه
والله فشله .. النوب ظل كلساع يباوعلي بالمرايه خايب ميته عليك دوخر عيونك عني .
وصلت للبيت وكلساع اضحك ع الموقف.
كال وليد
- هذا الخط ثابت حتى من ترجعين لااهلج بعد ابقي عليه خوش ولد حباب صديقي هوَ وهم الكليه بعيد عليج ف ابقي عليه احسن
- ها خوش حجي
تغدينه ودخلت للغرفه قريت وكملت كل المحاضرت .
لزمت موبايلي وظليت اكنك..
شويه ووصلني رسائل خللني مسطوره .. عبالك انضربت راشدي بنص وجهي
"أدلالاً هجـرتـنـي أم مَـلالًا؟
أم صدوداً أم قسـوةً أم تجـنّـي؟"
~~~~~~~~~~~~~~~~~~~~~~~~~~~
ثُرىٰ . . .
لزمت موبايلي وظليت اكنك..
شويه ووصلني رسائل خللني مسطوره .. عبالك انضربت راشدي بنص وجهي ذكرني بالمريت بيه كله وماخلاني انسى كلمه وحده .
رساله وحده كفيله غيرت نفسيتي كلهه خلتني انشال وانرگع واحقد على ماهر واحقد ع اليوم الرحت بيه للكليه
جنات.. لج بنت الفگر البواگه نسيتي القبوط البگتيه مني لا عبالج ماهر سكت لخاطرج لا حبابه سكت علمودي ووعدني يندمج وهسه سمعت متقدملج هههههه حبيبي يريد ياخذ بثاري من عندج !!
حاطه صورتهه ع الماسنجر لابسه شورت فضيحه الامريكيات مالابساته من الخززي وكاعده ع البحر عشتو وضاحكه . عود شوفوني مسافره .
حرگتني حرگ خلتني اغلي .
ظليت افور شمرت الموبايل ووگفت اهفي على وجهي لان احس النار تطلع منه .. دخنت يمه ظليت اخذ شهيق وزفير ع السريع وألهث من الحرگه .
كافي ثُرىٰ كافي اهدي اشش هددوء
هديت شويه ورجعت لموبايلي قريت رسالتهه اكثر من مره وتحضرت اكتب رد مستفز ويحرگ الگلب مثل ماحرگت گلبي .
ثُرىٰ.. لازم تشعوطتي لان فصخ خطوبته منج اوو حرامات والله كسرتي خاطري لو شايفه الكليه من رحتي كلهه تبجي عليج ولو تستاهلين بس ميخالف .. وها صدگ لميتلج دموع بچيس ترديهن لان خاف مابيج حيل تبجين
جنات.. لج حقيييره ادبسسز اني ابجي لا والله اصلاً دمعه ماذبيت هوَ كتل نفسه عليه
ثُرىٰ.. ههههه ومنو بالحفله يتطلش ومنو السوه روحه نادر وحرگ خديداتي علمود ام ماهر تخطبه يمكن جدي شموخي سوه ذني كلهن
وعلي خليتهه تتشعوط ظلت تنشال وتنرگع .
جنات.. عمت عينج ياحقيرره اصلاً اني فصخت خطوبتي خليت ماهر الج
ثُرىٰ..ياا حرامات واني هم رفضته علمودج عود گلت اخليه الج
شويه وردت صدمني ردهه !! خلاني اعرف كمية غبائي !!
جنات.. هههه ههههههههه رفضتيه؟؟ مداصدگ هههه باي حبي باي خل اروح اتشمت بيه وأضحك عليه شويه لان وحده مثلج رفضته !!
لا ياالله شكد حقيره ونذله واني اني شبيه غبيه هيج !! لا ياالله شلون كلتلهه هيج شلوون؟؟ ماجانت تدري رفضته
جنت خوش ارد وشبعتهه قهر شخلاني احجي هيج . اجيت اكحلهه عميتهه .
ظليت قلقانه من ردة فعله ومتوقعه أي لحظه يراسلني ع الماسنجر يرزلني .
للعصر وليد راح للصيدليه ونهى يم حسوني بالغرفه ترضع بيه .
اندگ الباب .. حطيت شال على راسي وصحت
- منو ؟
اجاني صوته ينتر وعالي
- اني اني فتحي
- اي اي جيت
فتحت الباب بسرعه .. شفته الوجه مگلوب گلاب ومايبشر بخير .
يمه مدري شسوت هاي الله يستر. اكيد سويت من الحبايه كبايه بگد خشمهه .
دفع الباب ودخل .. سده بقوه ويرگع بيه ترگع.
إلتفت عليه عيونه غاضبه ووجهه مكتسي اللون الأحمر !
أشر بعيونه على الداخل
- روحي گولي لنهى اني جيت واريد احجي وياج وتعالي تلگيني هنا
أشر ع الاستقبال وفتح الباب ودخل .. رحت گلت لنهى وهيَ ظلت تاكل بروحهه
نهى.. ولج شكو شصاير
- كوارث
نهى.. عزه احجي
- من اجي من اجي
ركضت بسرعه وارجف من مواجهته .
دخلت وجايبه ماي وياي .
انطيته بالگلاص اخذه نتر ورگعه ع الطبله بنفاذ صبر...عود الحجج مالاتج مايمشن عليه . طبعاً أفسر بكيفي وفايدني تفسيري .
كال بعصبيه وصوته بيه بحه مال حرگه :-
- عوفييي المممي. اكعدددي
- ها اي كعدت
كعدت مقابيله مدنگه .. ظل يتنفس بغضب وصوت انفاسه مسموع نتر بعصبيه :-
- شحجيتي لجنات؟؟؟
رديت بفهاوه :-
- هاا اني؟
عصر عيونه بعصبيه ونفاذ صبر .. ضغط على أسنانه ونتر :-
- لعدددد ججججدددددي؟؟
رديت بخوف وع السريع
- ماحجيت وياهه شي هيَ الراسلتني اصلاً ومااعرف منين جايبه حسابي
- اي شحجيتو؟
- مااعرف
خزرني وهز راسه بنظره تحذيريه ! ظليت ارجف رأساً حچيت
- هيَ راسلتني والله.. تگلي الا اخلي ماهر ينتقم منج علمود ياخذ ثاري منج
- اي. وانتِ شگلتي؟؟
- گلتلهه شسمه شسمه اءءء ااا
ظليت اوتوت لما عاط بصوت عالي خلاني أكتهن كلهن
- شسسمممه حتخبلييننيي
- كتلهه خليته الج اصلاً رفضته !
صفن عليه وأعصابه تتشنج ومقوي قبضة إيده حييل .. جر شهيق وزفره بهدوء .. كال ونظرات ندم بعيونه وصوته تحول هادئ !
- تدرين شنو اكثر شي متندم عليه بحياتي كللههههه؟؟
سكتت.
- كوليلي شنو؟
رفعت عيني عليه وهمست
- شنو؟
- تقدمت وخطبتج .. هسه مستعد ادفع كل عمري بس كون يرجع الزمن وأمحي هالشي
رفعت راسي مصدومه !! باوعت بعيونه وهوَ عصر عينه قوي يحجب شوفة عيني
تنهد ونتر :-
- مااكتفيتي برفضي وقللتي شأني .. رحتي راسلتي جنات حتى تتشمت بيه وتذلني لج اني مااااهر جنااااتت جناااااتتت أنگسسس خلق الله تتشمت بيه؟؟؟؟ .. عساه ماإجه هذا اليوم وعساني مييييت ولا شفته
