رواية جذبني فمك البني الفصل العشرون 20 بقلم عبير إدريس

مانمشي وي الروج وتردنه روجه

العدله عدله نكول والعوجه عوجه

__________

توني اريد اروح للغرفه وسمعت صوتها تصيحني بس صوت ضعيف..

سيلين : افونه مي..

ردت افوت للغرفه صاحني عمو..

ادهم : لحظة لحظة تعاي..

التفتت عليه ..

ايفين : ها عمو اختي كعدت..

ادهم : صدك والله خوش معلومه ، اي ادري كعدت تعاي احاجيج.

رحت وكفت يمه عكد حاجبه ورفع اصبعه محذر..

ادهم : ديري بالج تحجين اي شي عن الموضوع الصار بيتكم اذا حجت حاولي تغلسين غيري موضوع زين..

ايفين : شنو اجذب عليها قابل

ادهم : تره مراح تفوتين النار اذا جذبتي علمود صحه اختج علويه ايفين..

ايفين : ماشي ماحجي..

مشيت وبرطمت صاح..

ادهم : لتبينين الها انه ادري بالصار..

التفتت عليه.

ايفين : يعني ماحجيلها شسويت بغزوان وامي وابرد كلبها..

ادهم : استغفر الله لج بابه انه احجي عربي لو هندي داكلج اي شي يخص هذا الموضوع لتحجين بيه وعرفتج تردين تكليلها عليه لهذا حذرتج..

ايفين : زين ليش عمو شيصبرني..

ادهم : ايفين لخاطر الله لتحجين شي ، بله هاي شلون افهمها .

حجاها ورفع راسه ليفوك وغمض خصر ايده ، نفخ بنفاذ صبر ورجع نزل راسه وحجه..

ادهم : باعي اذا حجيتي الها وعرفت انه عندي علم ما راح ترتاح هنا ويمكن تتصور جايبكم لاجل شفقه عليكم وراح تضل تحرك بنفسها ونفسيتها تتأزم عدا خجلها مني ماريد عيونها تنكسر من تحجي وياي اريد تضل ثقتها بنفسها هاي اذا باقيه ثقه اصلا..

ايفين : هيه اول وتالي تعرف بعد عليمن نضم ..

حجه من بين اسنانه وتقرب كلت راح يضربني..

ادهم : معليج انتي انه اخليها تحجيلي كلشي بس مو هسه من تصير زينه هسه اختج مررررررريضه فهمتي مريضه ..

اخر كلمه حجاها حرف حرف..

ايفين : خو انت فوت احجي وياها..

ادهم : ايفين فوتي لاختج كدامي واذا فتحتي حلكج بحرف ميصير خير يلا روحي..

حجاها ورفع حاجبه محذر ..

اني افهم الكلام بس حبيت استفزه هههه ولو مو وكتها بس ماعرف ليش احب اداهره ..

دخلت لكيتها صافنه على السكف وخاله ايدها على كصتها.

ايفين : حياتي حمد لله على سلامتج.

دارت وجها وباوعتلي بتعب همست.

سيلين : شنو الصار وشجابنه هنا.

ايفين : عوفج من الصار واحجيلي شلونج شنو تحسين ..

سيلين : شنو احس يعني قرف بقرف ، وبعدين احنه شجابنه هنا..

رفعت عيني باتجاه الباب لكيته واكف وعينه عليه مفتوح الباب شويه يعني اني اشوفه بس وسيلين بينها وبينه الباب متشوفه ، من شافني باوعت فتح عينه وحرك حلكه همس .. مثل ما وصيتج. هزيت راسي اي..

ايفين : هسه ارتاحي وبعدين نحجي..

سيلين : شنحجي شرتاح ابويه كتلوه تعرفين شنو كتلوه وامي السبب لج جنه ناكل ونشرب ونام ويه مجرمين لج اريد اموتها اريد اشرب من دمها ..

كامت تصيح وتعيط جرت الكانونه من ايدها والدم كام يتطافر..دخل عمو باوعتله ورجعت باوعتلي ، وزاد البجي مالتها ...

ادهم : سيلين اهدأي انتي بأمان يمي ومحد يأذيج من شنو خايفه ؟؟؟

يحجي وعيونه تتوزع على وجها وايدها البيها دم ..

نتر بيه..

ادهم : متشوفين ايدها عجيب امرج كومي جيبي شاش كلينس اي شي...

كمت ركضت للمطبخ جبت شاش ولزكه جروح اخذهن وباوعلي صفح..اندار على سيلين وهمس..

ادهم : مدي ايدج..

تباوعله وتشهك ..مدت ايد ترجف..

بدون ميلزمها مسح الدم عن ايدها وفتح اللزكه خلاها على مكان الابره وضغط على كيفه بصبعه على مكان اللزكه ، اشرلي على الكرسي جبته وخليته يمه جره وكعد.

ادهم : بعيونج عتب هواي اعرف زعلانه وضايجه مني بس بعدين افمهج ونتعاتب انه هم عندي وياج عتب بس عتب حبايب..

نصت راسها مسحت دموعها وضلت تجر بخيط اللحاف .

هو عينه على ايدها ويرجع يباوع لوجها عبالك كاعد يدرس فد شي ..التفتلي وكال..

ادهم : ايفين.

ايفين : نعم عمو.

ادهم : اخذي اختج للحمام خلي تسبح تتنشط ..

حجاها وكام وكف وصل باب الغرفه ورجع التفت..

ادهم : سيلين..

رفعت راسها..

ادهم : ازمه وتعدي..

هزت راسها وبجت..

طلع ورحت يمها..

ايفين : كومي حبيبتي اسبحج..

سيلين : شلون اجه ومنو جابنه هنا وشصار احجيلي..

ايفين : كلشي احجيلج بس كومي سبحي حتى تاكلين صارلج يومين ماماكله شي..

كومتها على كيفي كوه وكفت جسمها كله يرجف .

ايفين : خلي ايدج على ركبتي وسندي روحج..

سيلين : راح اوكع ..

ايفين : هسه ليش تبجين متوكعين اني وياج لتخافين..

مشيتها كوه تمشي وبس صوت الشهكه مالتها وصلنه للحمام سمعت صوت الخلاط اشتغل بالمطبخ.

دخلتها نزعتها شافت الصونده تخبلت كامت تلطم على وجها وتعض بيدها..

حضنتها حيل..

ايفين : شبيج حبيبتي شكو..

كامت تصرخ اندك باب الحمام وصاح عمو ادهم..

ادهم : شبيها شنو وكعت ..

ايفين : لا لا مابيها شي بس داخت.

ادهم : اكيد ؟

ايفين : اكيد عمو..

مسدت على راسها ومسحت دموعها

ايفين : شبيج حبيبتي..

سيلين : شصار بيه ومنو هيج سوه..

سكتت خلت ايدها على وجها وتبجي بخنيك..

ايفين : والله دكتورة اجتي ومحد تقرب منج..

رفعت

راسها وباوعتلي.

سيلين : يعني مابيه شي غزوان مسوالي شي ليش جبتو طبيبه ليش فحصتني..

تخبلت بالزايد يمكن جفصت..

ايفين : مابيج شي والله بس اغسلج انطيني صبر..

عمو صاح بصوت عالي..

ادهم : طلعيها ايفين..

ايفين : اي عمو..

رجعت التفتت عليها.

ايفين : بس اسبحج انطيني صبر علمود نطلع حبيبتي ..

على السريع كمت فتحت الدوش فوكاها وسبحتها ركض ركض ، لفيتها بالمنشفه ..

ايفين : نسيت اجيبلج ملابس انتضري هنا هسه اجيج ركض..

هزت راسها ب اي بس جسمها كله يرجف كعدتها وطلعت اركض للغرفه جبت ملابس ورجعت شفت عمو واكف باب المطبخ..

محجه شي عفته ورحت للحمام لبستها ملابسها وطلعتها للغرفه كعدتها على الكرسي ورحت بدلت جرجف جربايتها بجرجف جديد ، غراضنه نفسهن مثل ما عفناهن لكيناهن ..

كومتها نيمتها بمكانها جبت مشط ومشطت شعرها على كيفي ، بس اختي مو هيه مو نفسها عبالك تبدلت ، صافنه وتنزل دموعها..

اندك الباب لبستها حجاب وصحت..

ايفين: فوت عمو..

فات بيده صينيه بيها عصير وفواكه مقطعها صغار وخضروات فلفل اخضر ومكعبات جزر وخيار مقطع وخضره..

خله الصينيه على الطبله وباوعلها ورجع باوعلي..

ادهم : تاكل كلشي بالصينيه وتشرب العصير وره نص ساعه تسويلها شراب الاعشاب تمام..

ايفين : اي عمو تمام.

ادهم : ميحتاج اوصيج .

ايفين : لا ميحتاج..

طلع وكعدت اوكلها اول لكمه اكلتها الثانيه كالت ماريد.

ايفين : سمعتي شكال كال كله تاكليه.

عاطت بصوت عالي .

سيلين : واذا كال شعليه بيه مو كلشي يكوله لازم اسويه .

فتح الباب وفات ضل يباوع عليها وهيه سكتت نصت راسها ..

ادهم : ايفين طلعي بره.

ايفين : مو..

ادهم : سدي الباب وراج..

كمت و كعد بمكاني ، طلعت وكفت بره بس الباب مفتوح..

ادهم : الاكل شعليه لازم تاكلين صارلج يومين ما ماكله شي..

سيلين : ماريد ..

فرك عينه بتك ايد بعدين مسد على لحيته وحكها .

ادهم : لازم تاكلين لخاطر عمتج اذا صدك تحبيها.

من كال هيج هيه فزت وباوعتله حسيت عتب بعيونهم ثنينهم همس..

ادهم : اكلي لخاطرها ومنريد منج شي بعد..

خله الصينيه بحضنها ورجع كعد مدت ايد ترجف وكامت تاكل بيدها ، كلت ليش ما جايب جطل رحت جبت جطل وخليته بماعونها ، بحركه سريعه اخذه من الماعون ،وخزرني.

اخترعت هذا شبيه اشرلي براسه طلعي بره طلعت وره شويه اجه وحجه بصوت خافت..

ادهم : انه اعرف الفواكه تنوكل بالجطل مو ماعرف ...

ايفين : اي اني هم استغربت لهذا جبتلها عبالي نسيت..

ادهم : وانه ماناسي تقصدت ماجيب..

ايفين : اي ليش غير افهم..

جر نفس وزفره باوع على الحايط البصفه ورجع باوعلي حجه بنفاذ صبر .

ادهم : مو كل حركه اسويها لازم اكعد اشرح تره تعبان فوك ما تتصورين واي شي حاد ممنوع يدخل غرفتها لا مكص لا سجين لا جطل فهمتي.

ايفين : زين ليش..

ادهم : بابه حالتهة ممستقره واحتمال تخلي ابالها تنتحر انتي شبيج استيعابج بطيء..

ايفين : عمو شمدريني اني ..

ادهم : كتلج اي شي تسويه تجين تكليلي اي شي اي شي الف مره أأكد عليج الكلام وماكو فايده.

ايفين: زين زين هاهيه ماسوي شي اذا ماكلك

هز راسه وطب ردت افوت سد الباب..

راح املخ روحي اني اعرف يعالج سيلين منا ويخبلني منا كعدت بالهول واهز برجلي اريد اشوف شديصير جوه شو ساكتين ليش من اني يمها تبجي ..

شويه وطلع شايل بيده الصينيه كمت شفته يمشي بالممر الي يودينه للمطبخ طبيت يم سيلين لكيتها متمدده وتلعب بصبعها صافنه ، كعدت يمها اخاف احجي وياها واخاف اسوي اي حركه لا اترزل ...

وره شويه غفت نامت غطيتها وطلعت سديت الباب على كيفي مشيت للهول سمعت صوته يحجي بالموبايل من غرفه المكتب.

ادهم : اريد تجي باجر وجيب وياك نرمان ، اعرف عدها دراسه هيه مرحله بحثيه تجي هنا تكتب وعود نهايه كل اسبوع واحد بينه يرجعها تروح للكليه تخلص شغلاتها وترجع ويانه ، اعرف تدرس دكتوراه انه مو غبي ، اريدها تجي وماخليها كلشي تسوي بس وجودها بلبيت كافي ،

بعدين افهمك ليش ، اي تكعد فوك يمك لا هوسه يمها ولا صوت اصلا اهدء من بيت اهلك، يلا لتنسه وماريد فهد يعرف بجيتكم خوما عنده علم بالبنات يمي ، اي زين لتكله غلس ، يلا الله وياك سلملي..ها لا لتجيب مريم هسه عوفها يم امي والبنات ...

مشيت سريع رحت للمطبخ خاف يشوفني واتفشل ، باوعت البيت صار يومين ممنظف رحت جبت ادوات التنظيف وكعدت انظف ، صارت ساعه عشره ونص تذكرت اني ممسويه عشا ، رحت دكيت الباب على كيف مجاوبني فتحت الباب لكيته نايم على الكرسي وره المكتب مرجع الكرسي ليوره ومكتف ايده ، حرت اكعده لو اخليه نايم ، خاف اترزل بعدين انقهرت عليه دكيت الباب مرتين صاح تعاي..

فتت ..

ايفين : عمو ليش متنام بمكانك ..

فرك عينه ومط جسمه..

ادهم : جنت اشتغل وغلبني النعاس هسه اروح انام اختج كعدت.

ايفين : لا نايمه بعدها وراح اسوي عشا اتعشه ونام..

ادهم : لا لا ماريد راح انام واي شي يصير كعديني.

ايفين : ماشي.

كام طلع وطلعت وراه راح للحمام واني رجعت يم سيلين ، نايمه عبالك طفل ..

.

رحت للمطبخ اكلت تفاحه مسويت عشا طفيت الضوايات ورجعت نمت..

ثاني يوم اجوي ايمن ونرمان اجتي سلمت علينه وراحت صعدت فوك بيت ايمن ..

كل يوم يتكرر الروتين عمو يروح للدوام يوصيني على سيلين شنو اسوي ، ويرجع يسألني على ادق التفاصيل واني احجيله كلشي...

روتينها يوميه الصبح تشرب عصير طبيعي وبعدين تاكل ماعون فواكه وره ساعه تشرب عصيرالاعشاب ،استمرينه هيج مده ٣ ايام ، بعدين عمو اخذ اجازه جنت كاعده بالمطبخ واجه يمي كال..

ادهم : اخذت اجازه لان مدالحك وراح نبلش انه وياج شنو اكلج تسوين..

ايفين : ماشي .

ادهم : الصبح يوميه تطلعون باليوتيوب تمارين اسمها اليوغا ضروري تخليها تسويهن على واهسج ...

ايفين : عمو هيه وين تحجي ويايه اصلا احجي اريد ماكو بس ساكته لو تنام..

ادهم : مو بهيج حاله راح تدخل بحالة اكتئاب وبصعوبه تتعالج ويراد وكت طويل يلا ترجع مثل الاول.

ايفين : شلون لعد؟

ادهم : لازم تلعب شلون تتعالج لعد..

ايفين: ماعتقد تستجاب لكلامي ..

ادهم : جربي وياها اليوم وباجر ورديلي خبر

ايفين : تمام .

رحت عليها حاجيتها متقبل كلشي تسوي واصلا عبالك متسمعني ثاني يوم هم نفس الشي رحت عليه جانت ساعه ٨ الصبح دكيت باب غرفته ماكو صوت فتحت الباب لكيته طالع ومعدل السرير ، غرفته ارتب من حياتي امدايه بنيه وجربايتي معروجه سديت الباب وغميت نفسي ويه ما غميت نفسي صار كبالي شافني وضحك ضم ضحكته عكد حاجبه وكال.

ادهم : ها اجتج الحاله ..

ايفين : عمو راح تخبلني انت وسيلين ، تعال حير بيها معليه بعد ..

كتف ايده وضيق عينه صفن بوجهي..

ايفين : ها عمو شبيك..

ادهم : منو عليه لعد اختج منو الها غيرج..

ايفين : مو انت شنو تكلي مكاعد تسوي وبس ساكته تروح للحمام وترجع انطيها اكل تاكل وترجع تنام شسوي اني..

ادهم : اختج تحب الحيوانات؟

ايفين : يعني قصدك تلعب وياهن لو شنو.

ادهم : تلعب وياهن او تربيهن ..

ايفين : اي تحبهن جان ابو الصالون عنده قطه وكلب صغير اشوفها تضحك من تشوفهم ومرات توكلهم ..

ادهم : تحب القطط لو الكلاب.

ايفين : هيه عدها خوف من القطط بس اكثر شي اشوفها تشيل الكلب تخليه بحضنها..

ادهم : ماشي تريكتي..

ايفين : لا بعدني.

ادهم : تريكي وسوي لاختج ..

ايفين : تمام ..

راح طلع وسد الباب واني رحت سويت اكل اليه واكل لسيلين ، وديته وكعدتها ، باوعتلي ودارت وجها على الحايط جريت نفس وكعدت يم راسها..

ايفين : حبيبتي كومي اكلي علمود اني هم اكل وياج..

مجاوبتني دارت وجها وغطت راسها جريت نفس وكعدت اكل مرت ساعتين اندك باب الهول رحت فتحته ايمن.

ايمن : صباح الخير..

ايفين : صباح النور ها اليوم ممداوم..

بيده علاليك فات للبيت يمشي وحجه .

ايمن : يمعوده عندي دوام وخابرني عمج هسه تتسوك كتله يابه عندي درس يكلي من يصير عندك شاغر تطلع تتسوك وترجع افهمه قافل ..

ايفين : ههههه هو راح يخبلني ابشرك..

ايمن : سمعي كلامه ومعليج بالباقي باعي سوي غده تعرفين لو اصيح نرمان وياج.

ايفين : لا خليها تقره اني اسوي ..

ايمن: تعلمتي يعني..

خله الاكياس على الميز وحجاها مبتسم.

ايفين : تعلمت من سيلين من جنه بيت اهلي جنت اوكف يمها من تطبخ ..

ايمن : ها زين لعد خلي نجرب اكلج..

ايفين : واذا مطيب شلون..

ايمن : ناكله معليج..

حجاها وعيونه لمعت صفن بوجهي بعدين حس على روحه ، كام يدور بجيوبه.

ايفين : ناسي شي..

ايمن : ها اي موبايلي بس يمكن بالسيارة عفته يلا اروح انه محتاجه شي ..

ايفين : سلامتك ..

راح طلع واني رتبت المسواك خليت اللحم على النار وبلشت اطبخ كل شويه اروح على سيلين الكاها على نومتها بعدها ، والاكل نفسه اني اعرف راح اترزل من وراها بس شسويلها متقبل تكعد ، رجعت للمطبخ بلشت بالغده شويه واسمع صوت جلب صغير التفتت واشوف عمو شايل جلب مدري جلبه لان لابسه شريط بركبتها احمر والفرو مالها ابيض وعيونها سود تخبل ركضت عليها كمت امسد بفروه جسمها واضحك رفعت راسي باوعتله يباوعلي مبتسم..

ايفين: هاي لسيلين ..

هز راسه اي..

ايفين : هسه تفرح بيها بس شعجب جبتها هسه هو احنه ومتحجي ويانه.

دنك بالكاع خله الجلبه وكام عيونه عليها ويحجي ويايه..

ادهم : مرات الانساان يحتاج يفرغ البكلبه ويحجي بس ميريد يحجي لأي بشر ، يحجي لدميه عنده او حيوان مربيه او لمرايته ، جبتها علمود تحجي وياها وشويه شويه راح تطلع من طور الانعزال الهيه بيه..

صفنت بوجها ردت ابجي على العلم الشايله لعد شبيه اني كلشي ما افتهم باوعلي وضحك..

ادهم : وعد تصير سيلين زينه وترجعين تدرسين..

تخبليت شمدريه هيج فكرت هو باوع على وجهي ابتسم ودار ضهره وراح لغرفته خلاني اضرب اخماس ب اسداس..

كملت الغده وصحتهم التمينه كلنا بالمطبخ اني وايمن ونرمان وادهم كعدنه ناكل بيهم طبع ابد ميحجون على الاكل اله شي ضروري ، مرات احس روحي زايده بنصهم لان اختلف عنهم كلش ، اللي يكمل يكوم يكلي عاشت ايدج ويروح يغسل وكلمن يرجع لمكانه ، ضلينه اني وعمو ادهم ..

حجه ومدنك راسه على

الاكل..

ادهم : اختج ليش ما اكلت..

ايفين : متقبل ..

هز راسه ساكت ..وره شويه كال.

ادهم : من تكملين غده سويلها صينيه اكل وكعديها اريد احجي وياها .

ايفين : ماشي..

كمت سويت اكل الها وديته لغرفتها كعدتها كعدت بس كوه تفتح عينها ، حجيت وياها سألتها شبيج محجت غير كلمه وحده راسي راسي وكامت تردد بيها. دك الباب عمو وفات ..

ادهم : روحي عاشت ايدج..

ايفين : خليني كاعده والله ماسوي شي..

باوعلي ودار وجها كعد كبالها..

ادهم : جبتلج ضيف يريد يتعرف عليج تقبلين لا ..

كتفت ايدها وعيونها تباوعلي وترجع تباوع على ادهم..

ادهم : ضيف خفيف راح تحبيه كلش اجيبه شتكولين..

ساكته متحجي ، التفت عليه وكال.

ادهم : ايفين جيبيها .

عرفت يقصد على الكلبه طلعت جبتها وفتت اول مشافتها ابتسمت اخذها مني وضل واكف يم سيلين .

ادهم : ترديها لو لا.

رفعت راسها باوعتله وابتسمت هزت راسها ب اي ..

خلاها بحضنها مدت ايدها وكامت تمسد للكلبه..

ادهم : ابالج اسم تسميها ..

هزت راسها لا.

ادهم : شنو رأيج نسميها كالى لو ميلي ..

ضحكت وكالت

سيلين : ميلي..

ادهم : يلا لعد اكلي علمود تتعرفين عليها ...

هزت راسها مبتسمه..

عافنه وطلع سد الباب وراه ضلت تمسد براسها وجسمها وتهمس .

سيلين : ميلي.

ايفين : اوكلج لو انتي تاكلين.

سيلين : لا اني اكل..

حمدت ربي شويه حجت..

خليت الصينيه كعدت تاكل ...الظهر نمت وفعلا سمعتها تحجي ويه الكلبه كعدت تشكليها تكللها انتي عندج ام هم اذتج مثلي لو تحبج..ضليت خانكه نفسي جوه البطانيه وابجي على حجيها..

اليوم مشى عادي طبيعي بين نومها وبين اكلها كامت تستجيب شويه شويه ..

ثاني يوم من الصبح كعدت على دكه الباب فتحتها عمو ادهم لابس تراكسود وترانشوز ..

ايفين : صباح الخير .

ادهم : صباح النور كعدي سيلين وبدلو ثنينكم اريد اخذكم ويايه.

ايفين : وين نروح.

ادهم : نمشي شويه علمود تتحرك موزين تضل بس نايمه..

ايفين : خاف متقبل..

ادهم : كليلها ميلي لازم تمشي وانتي ويانه علمود تتعود عليج.

ايفين : اذا هيج تكوم البارحه لخاطر ميلي اكلت مرتين..

باوعلي ضحك وهز راسه وراح وصل للهول صاح..

ادهم : استعجلي..

كلت بكلبي اي استعجل استعجل ، رحت كعدتها ..

ايفين : سيلين سيلين ،

سيلين : هممم

ايفين : كوي حبيبتي ابدلج.

سيلين : عوفيني عفيه

ايفين : مو هاي الكلبه تريد تطلع ضايجه باعيها شلون واكفه منتضرتج.

رفعت راسها وباوعت بالكاع على مكان الكلبه..

سيلين : بعدها نايمه ليش تجذبين.

ايفين : عمو كال لازم تمشي الصبح خطيه تختنك.

سيلين : اي اخذوها وروحو اريد انام.

ايفين : ميصير يكول لازم تتعود عليج.

ضليت احجي كومه يلا قنعت كامت راحت للحمام ورجعت ساعدتها بالتبديل وطلعنه للطرمه جان واكف يدخن ،شافنه طفه الجكاره وشمرها بالحاويه وتقدم يمشي بخطوات رزنه..وصل يمنه وكال ..

ادهم : صباح الخير.

حجاها وعينه على سيلين...

ابتسمت وكالت.

سيلين : صباح النور..

ادهم : يلا نطلع.

هزت راسيها ب اي

طلعنه نمشي المنطقه حلوة وشوارعها عريضه تسوي واهس ميلي لازمتها سيلين بالحبل مالتها واحنه نمشي بصفها بس عمو متقدم علينه بخطوتين كل شويه يلتفت يباوعلها مبتسم ويرجع يكمل مشي..

ميشنه تقريبا ربع ساعه وكالت تعبت ..

ادهم : نرجع.

سيلين : اي كلش تعبت..

ادهم : اخذلج تكسي.

سيلين : لا امشي عادي.

ادهم : لا لحظه اوكفو هنا اخذلكم تكسي..

وكفنه وهو راح وكف على الشارع العام وكف تكسي حجه وياه والتفت علينه صاح..

ادهم : يلا بنات ..

لزمت سيلين من ايدها وصعدنه بالتكسي ، وصلنه للبيت ونزلنه ، كال

ادهم : ادخلو وانه رايح اجيب كم شغله واجي..

ايفين : ماشي.

طبينه وكعدتها بالحديقه حسب الاوامر مال دكتور ادهم..

كعدنه وهيه ضليت تلعب ويه ميلي..

ايفين : راح اسويلج عصير تشربيه تضلين كاعده مو..

سيلين : اي ..

دخلت سويت عصير متأخرت دقايق رجعت للحديقه باوعت ماهيه تخبلت طلعت للشارع ماكو وينها وين الكاها هسه رجعت للبيت ادور ماكو تخبلت خابرت على عمو ..

ايفين : عمو سيلين ماكو

ادهم : شنو ماكو مو عفتها يمج..

ايفين : خليتها بالحديقه ودخلت جوه سويتلها عصير متأخرت دقايق رجعت ملكيتها ...

ادهم : هسه جاي ..

نفخ بضجر وسد الموبايل ، رجعت ادور بلبيت سمعت صوت الكلبه ، فرحت يعني هيه بالبيت تبعت الصوت جاي من غرفه عمه فتحت الباب لكيتها واكفه فاتحه الكنتور مطلعه ملابسها وتشتم بيهن ، من الهبطه والخرعه كعدت على ركباتي بالكاع ..بجيت لان كلت وين راحت تخبلت طلعت موبايلي وخابرته.

ايفين : عمو لكيتها ..

ادهم : وين جانت؟

ايفين : بغرفه عمه ..

ادهم : انه وصلت راح افوت للبيت..

ايفين : اي ..

سده وره شويه سمعت باب الهول انفتح اجه للغرفه فات باوعلي وباوعلها عيونه دم صارت وانملت دموع..تقرب مني همس.

ادهم : اخذي ميلي وطلعي ..

اخذت الكلبه وطلعت سديت الباب همه ضلو وحدهم ..

سيلين..

من فتحت عيني واني بيت عمه وشفت ادهم كبالي ماعرف شصار بيه خ

جلت منه ، كلت اكيد عرف الصارلي بيت اهلي ومنا سالفه زاكروز واني نفسيتي تعبانه اتخذت وضع السكوت اعرف تعبتهم بس اني اكثر منهم تعبانه وصلت مرحله ماريد احجي ويه اي بشر ما اريد اسمعهم اريد بس انام حتى الاكل كرهته ،

من طلعنه نمشي ورجعنه للحديقه تذكرت كعداتنه ويه عمه شلون جانت تحب تكعد بالحديقه وتسوي السمج لو دولمه وتكول يراد نكعد نتغده بنص هذا الخضار اللي يرد الروح ،

كمت دخلت لغرفتها وسديت الباب كبل رحت على كنتورها ادور ريحتها بلكت الكاها بملابسها ، طلعت قطعه قطعه وكل قطعه ملابس تذكرني بموقف معين ، استغربت غراضها كلهن على وضعيتهن محد لاعب بيهن ،

وره شويه دخلت ايفين سمعتها تبجي وبعدين خابرت عمو ادهم الضاهر عبالهم ضعت او سويت بنفسي شي ، وره شويه هو اجه وفات للغرفه طلع ايفين وكعد على الجربايه وره نص ساعه اني ناطيته ظهري وكاعده بنص ملابس عمه وهو ورايه همست بصوت مخنوك .

سيلين : احجيلي عنها..

ضل ساكت التفتت عليه لكيته صافن عليه والدموع جامده بعينه..

سيلين : احجيلي عنها احجيلي كلشي تعرفه اريد اسمع..

جاوب بصوت مخنوك

ادهم : انتي عشتي وياها اكثر مني انتي احجيلي عنها..

نزلت دموعي وحجيت بصوت يرجف..

سيلين : اللي اعرفه بس قهر لان مشافت شي حلو تعب ومرض اريد اسمع من فرحت من جانت تضحك شنو الاشياء اللي تخليها تضحك..

نزلت دمعته وحلكه رجف باوعلي ودنك راسه كال.

ادهم : جانت دائما تتذكر الموقف التعرفت بيه عليها وكل متحجيه تضل تضحك عبالك طفله عمرها خمس سنوات.

سيلين: محاجيتلي ابد، احجيلي انت..

رفع عينه باوعلي ودمعه طفرت من عينه مسحها بحركه رجوليه ، يعني ماريد ابجي كدامج وابين ضعيف..

تحمحم وكال..

ادهم : عوفي المدفون بالكلب لتهيجين المواجع يرحم ابوج..

سيلين : لخاطري احجيلي اريد اعرف هم فرحت لو كضتها ضيم وقهر..

مسح عينه وفرك ايد بيد وكال..

ادهم : الله يشهد طيله حياتها العاشتها بجانبي مازعلتها ولا بجيتها ولا بيوم نزلت دمعتها..

سيلين : اعرف.

رفع راسه باوعلي ..

سيلين : حجتلي جانت دائما تكول ما اذاني وماجرحني بكلمه..

ادهم : لان هيه نسمه شلون اجرحها ..

سيلين : شلون تعرفت عليها..

ادهم : يعني ضروري تعرفين .

سيلين : براحتك بس حبيت احجي بيها ، راح انام شويه واكعد ..

كمت اريد اروح وصلت للباب صاحني.

ادهم : تعاي سيلين كعدي..

التفتت عليه.

سيلين : اريد انام..

ادهم : اذا حجيتلج متنعزلين بعد..

دنكت راسي وكتله.

سيلين : مادري.

ادهم :زين احجيلج بشرط تاكلين.

سيلين : اي ميخالف..

اشرلي على المكان الكدامه رحت كعدت بطارف الجربايه وهو يم الجناح مالتها..

ابتسم ابتسامه حزينه تنهد وكال..

ادهم :حبنه بلش بمشاكسة مني ..

رفعت حاجبي وابتسمت.

سيلين : انت عمو معقولة؟؟

ادهم : وليش لا ؟

سيلين : يعني اشوفك مو مال هيج شي ثكيل والوقار يقره الف بشخصيتك...

ادهم : حلوة هاي مال يقره الف ...

سيلين : يعني صدك انت اللي بلشت بالحب وصارت بينكم علاقه..

رفع حاجبه وكال...

ادهم : بأسم الحب كلشي مباح..اول ماشفتهاصحت هلا بالسكن الكلب كبل العين ههههه...

دنكت راسي وهمست بقهر

سيلين : تستاهل الحب عمه وحبكم حلو بس ماتهنت بيه ،بس اتصور جانت اكو مبادره منك وبلش حبكم..

ادهم : اكيد للحب مقدمات وسكرات بالضبط كأنما تقرين روايه ادبيه مترابطه الاحداث يكون كاتبها جيد يشدج الها بكل فصل تقريه يخليج تتعلقين بالقصه وبالابطال الحب نفس الشي..

سيلين : حلوو حبيت الوصف..

ادهم : مممم.

سيلين : وشصار بعد..

سكتت وهو استرسل بالكلام..

ادهم : بيوم الصبح طلعت من البيت وشغلت السياره لكيت المي خلصان نزلت فتحت البنيد ودخلت للبيت جبت الصونده وبلشت اترس مي سمعت صوت باب حديد انفتح وشخط الكاع حيل انه بطبعي اضوج من هيج اصوات يعني جسمي يكزبر منها ،

التفتت داشوف من وين هذا الصوت باوعت بنظره خاطفه ودرت راسي على السيارة اني و مندار من الصفح لمحت هيئه بشر صار عندي فضول اباوع منو باوعت وياريت ما باوعت شعر اصفر ذهب والبياض يصيحج من بعد كذا متر تصطج من الجمال ،

بيها جاذبيه بارده وانه تجذبني المرأه الملامحها بارده لان تكون هادئه مثل الهدوء البداخلي ، وياسة حتى نفسها هادئ مابيه صوت نسمه ..

جر حسرة طويله وكمل..

ادهم : باوعت عليها مرتبكه وتدردم شبيها ماعرف شيطاني وسوسلي اسد البنيد واروح اسألها شبيها ههههه حسيت روحي زاحف بس ثكيل يعني المهم وكفت وراها هيه متدري بيه ملتهيه تدور بجنطتها رادت تمشي وانضربت بيه التفتت شافتني كامت تأفأف رادت تبجي بس بلعتها،،،

عيونها المليانه دموع جانت كفيله تخليني اتبسمر بمكاني وما اتحرك مثل عيونج بالضبط عيون ناعسه ..

دنكت راسي ونزلت دموعي على عمه..

ادهم : مشت سريع ولا اراديا لكيت روحي ماشي وراها اريد اشوف شبيها شنو المضيعته وليش تريد تبجي ماعرف حبيت اساعدها بشكل من الاشكال ،

حست بيه وراها امشي التفتت باوعتلي بنضره غضب وتأفأفت وكفت تنتظر سيارة اعتقدت هيج لان جانت

واكفه ع الشارع العام مشيت وكفت على صفحه ،،

اذا التفتت متلكاني بنفس المكان الجنت واكف بيه راقبتها بدون متدري ردت اشوف شبيها وكفت بمكاني وشبكت ايدي وره ركبتي وكفت ادرس حركاتها تقربت وسمعتها تهمس بينهة وبين نفسها شلون راح اشوف الاسئله واني مضيعه نظارتي شكد غبيه ،

ضحكت بصوت عالي خلاها تلتفت عليه عبالها جنت اضحك لان حجت على نفسها لهذا انفعلت كلش وخزرتني سهم وطب لكلبي مو نضره ..

حجت من بين اسنانها..

ياسة : ليش تضحك سفيه خوش طريقه جديده تلاحكون بيها البنات مو عيب عليك..

اختنكت بضحكتي هلمره اريد اسكت زدت بهيج مواقف الضحك ينزل عليج فجأه ..

سيلين : اي عفيه هههههه..

ادهم : بين نضراتها التتوزع بين الجنطه وبيني وبين الشارع تنتظر السيارة وبين وابل الحروف المتقطعه الجانت تسب بنفسها وبأمج ههههه سحبت النظاره من شعرها وقدمتها الها..

صفنت بوجهي وكالت ..

ياسة : وين لكيتها ؟

اسرتني صفنتها بلعت ضحكتي ولبست الادب الرجولي وهمست..

ادهم : اولا اسف اذا ضوجتج ثانيا ضحكت مو استخفاف بيج العفو لكن جنتي محتاره وتدورين على النظاره وجانت على شعرج لهذا ضحكت لتعتبريه تقليل ادب مني ..

خزرتني وضربت رجلها بالكاع ومشت وكفت سيارة كيه وصعدت بيها ، انه مشيت وراها اضحك بصمت تبعتها وصعدت بنفس الكيه ليش وشلون وشداسوي ماعرف المهم حبيت اروح وياها حسيتها مالتي حسيتها مسؤوله مني ..

وصلت للمدرسه وصاحت نازل ، نزلت هيه وصدريتها وضفيرتها التجنن واصله لنهايه ضهرها ،

التفتت عليه خزرتني ودخلت للمدرسه طبعا انه نزلت وراها والكيه راحت ،

دك موبايلي يذكروني بالمقابله تأخرت على المتقدمين للعمل بمعامل الوالد ..مشيت اضحك على نفسي شنو حبيتها معقوله ومن هذا اليوم بلشت اوصلها وحاوطتها وين متروح وياها وياها الى ان خطبتها وتعرفين شلون تعذبنه يلا صارت من قسمتي سنه وحده بس كضيتها وياها ورجعت كملت دراستي وصار اللي صار...

غطه عيونه بيده وكتفه كام يهتز اني هم بجيت وطلعت رحت لغرفتي مددت ،

وره شويه اجتي ايفين شايله كلاص العصير بيدها وضلت واكفه كبالي وتتوسلني بعيونها يعني شربيه ، اخذته منها شربته ورجعت نمت ،

كعدوني الظهر تغديت وياهم جانو مجموعين بالمطبخ وضلت نرمان تسألني شلونج وشلون صرتي واغلب الاسئله ادهم يجاوب عني ،

لا راد يتعبني ولا راد يطلب من اخته تسكت ويفشلها ..

هيه من شافت هو يرد بمكاني سكتت وصلها الباص ...

كملنه غده صار العصر اجتي ايفين كالت عمو ادهم يريدج بالحديقه ..

كمت وراها طلعنه لكيته واكف لابس كفوف نايلون ثخين وشايل ثنين قدمهن الي..

سيلين : شنو ذني..

ادهم : لبسيهن..

سيلين : ليش؟

ادهم : الصبح جبت شتلات زرع حتى نزرع انه وياج..

سيلين : بس اني ماعرف..

ادهم : اعلمج.

نطاني محراث ماعرف فاس لبست الكفوف وبلشت احفر شيسوي اسوي مثله ونزرع الشتلات وارجع اطم التراب عليها بيدي ، كل شويه انسى اريد احك عيني ويسحب ايدي ويكول..

ادهم : لا تتلوث عينج ..

واتذكر وارجع ازرع كملنه كم شتله...

بعدين من صرت زينه وره فتره سألته ليش خلاني ازرع وليش جابلي كلبه واني بهذا الوضع..

كال..

ادهم : هاي احد الشغلات اللي تطلعج من دائرة الانعزل والكأبه ..

رحت بحثت على النت وفعلا تربيه الحيوانات حراثه وزرع الارض ، المشي الرياضه شكو شي جان يوصي ايفين علمود تخليني اسويه او هو يطلبه مني ،جان عباره عن تفريغ للطاقه السلبيه من الجسم ونوع من انواع العلاج النفسي اللي استغربته ولا يوم سألني شلونج او شلون صرتي ،

تذكرت من دزيتله مسج وكتله شلونك ضاج لهذا مره من المرات جنه نزرع وسألته..

سيلين : عمو ولا مره سألتني شلونج ..

عاف الحراثه وباوعلي..

ادهم : لان اعرف شلونج عليمن اسأل..

سيلين : بس اللي اعرفه بدايه الكلام يسألون شلونج او شلونك..

ادهم: بحاله اذا انتي زينه او صارلي مده ماشايفج وماعرف اخبارج اسألج شلونج ، اذا انه اعرف وضعج شنو وكلشي يمر كدام عيني بعد عليمن هذا السؤال..

سيلين : لهذا ضجت من سألتك شلونك بالرساله..

تنهد وكال..

ادهم : جنت بوقتها ميت وكتلج الجواب عندج يعني تعرفيني موزين بعد فراق عمتج لهذا كتلج سؤالج مو بمحله.

سيلين : زين النقاط بالرساله شنو تعني..

ضحك.

ادهم : انتي متنسين شي.

سيلين : ضلت ابالي وردت اعرف معناها..

نزع الكفوف وراح غسل ايده على المغسله البره واجه كعد كبالي على الكرسي وحجه..

ادهم : النقاط بعلم النفس بيها هواي امور هيه نقطه بس تتفسر بشغلات هواي ومرات تؤدي الى الزعل في بعض الاحيان.

سيلين : كل هذا تسويه النقطه..

ادهم : اي

سيلين : احجيلي وبعدين كلي شنو جنت تقصد انت من دزيتهن بالرساله..

ادهم : تدرين العلم العندي اللي صارلي سنوات ادرس واتعب راح يجيج بطبق من ذهب لان هواي تسألين..

سيلين : مو احسن اتعلم منك.

ادهم : اكيد ..

سيلين : اسمع.

ادهم : انه جنت اقصد بالنقاط ختام الكلام او نهايه المناقشه يعني ماعندي شي اضيفه للكلام الكتبته قبل كم سطر ..

سيلين : زين

خو اكتب باي اسهل..

ابتسم.

ادهم : النقاط تدل تعني الشخص غضبان من هاي المحادثه او فتور من الشخص اللي كاعد يتكلم وياه وبما انو انه اعرف انتي متعرفين بهاي الامور لهذا دزيتها ارضي غروري فقط لان انتي مراح تزعلين لان مفهمتي..

سيلين : هيج جنت شايل بكلبك عليه.

مجاوبني كمل شرح.

ادهم :والنقطه اذا دزيتيها لمدير او مسؤول عنج راح يضوج اذا جان دارس ويعرف بهذا المجال والجمله اللي تنتهي بنقطه هاي تكون اقل صدق من الجمل ذات النهايات المفتوحه...

سيلين : شلون يعني..

ادهم : استخدام النقطة مثال على التناوب اللغوي تبعًا للموقف، من نستخدم النقطة تصير اللغة رسمية أكثر من اللازم. إذا نهيتي جملتج بنقطة راح يشوفها المتلقي غير صادقة أو غير مناسبة، مثلما يكون الحال لو استخدمتي لغة رسمية في مكان يتسم بالتلقائية كالمقهى مثلا .

سيلين : حلووو معلومه جميله..

ادهم : عندج تكرار الاحرف بالكتابه مثلا لاااااا أو علامات الترقيم يضفي حِدَّة على الرسالة، هذه الطريقة في الكتابة تُظهر أريحية أكبر للمقابل ..

سيلين : حلو

ادهم : تكرار الكلمه بنفس الجمله مثلا انه منتضرج بمكان وتأخرتي عليه تدزيلي اسفه اسفه تأخرت شويه واوصل هاي الرساله مبينه بين صديقين لان مابيها تكلفه بينما اذا دزيتيلي اسفه شويه واوصل هاي الرساله فاتره ومنزوعه المشاعر مبينه رسميه بين موظف ومدير العمل مثلا..

سيلين : اول مره اسمع بهاي المعلومات شكرا كلش استافديت..

ادهم : عفوا ..

كاعدين نسولف وانفتح الباب دخل فهد مبتسم شافني عقج وجها..

فهد : السلام عليكم شلونك ادهم..

حجاها ومشى ب اتجاه ادهم تسالمو وتباوسو..

التفتلي ورجع باوعله.

فهد : علمود الجماعه متريدني اوصل لهنا وداز خبر بيد ابوك علمود ينقل شغلي لمحافظتنه.

ادهم : حجيك مو وكته امشي جوه نتفاهم..

فهد : ها جوة نتفاهم ، يعني انت كاعد هنا وذني مفضلهن على اخوك وبعدين شلون ملفيهن شنو نسيت الفديوا..

نتر ادهم بيه وحجه بصوت عالي.

ادهم : احترم نفسك فهد وارجع منين ماجيت..

فهد : هاا ارجع وانت تاخذ راحتك ولك شلون تقبلها على نفسك وهيه من حضن لحضن..

حضنت نفسي وكمت ابجي ما احس اله اندفر فهد وادهم نام فوكاها شبعه كتل ..

ادهم : ارعن نذل انه من هيج نوع والبنات اذا جبت طاريهن اله اكطعك تكطع..

ادهم يعيط وفهد يعيط اخر شي طلع موبايله من جيبه وفتحه خلاه بوجه ادهم واني باوعت مصورينه اني وزاكروز ،حجه فهد.

فهد : من يمي جانت تبيع شرفيات وبالمطبخ تتختل..

التفتلي ادهم شافني عيني على شاشه الموبايل ، التفت على فهد اخذه من ايده وشمره بالكاع تفلش.عاط بعلو صوته وجها صار دم...

ادهم : اطلع بره وجهك ماريد اشوفه بعد واذا عتبت الباب اله اكسرك.

كام فهد وطلع ركع الباب حيل..

ايفين

سمعت صوت صياح طلعت ولكيت فهد بالكاع وعمو ادهم فوكاه يضرب بيه وسيلين واكفه على صفحه تباوع وتبجي ، وراها طرده وطلع من البيت اباوع على اختي بس تشهك وتبجي نحجي وياها اني وعمو نريدها بس تحجي ماكو اخر شي كامت تعيط وتصيح ولازمه راسها ، ركض ادهم طلع بره ماعرف وين راح ربع ساعه ورجع وياه بنيه. اجه يمي وكال..

ادهم : طببيها جوه بسرعه..

جريتها وطبيت اني وياها ، اول ما فتنه للغرفه كامت تملخ بنفسها ، فات عمو و وياه البنيه كالت..

_ طلعو هسه اني اضربها ابره وتهدأ.

طلعنه وكفنه بره وعمو كل شويه يغلط على فهد ويضرب الحايط برجله ويرجع يفرك وجها ويستغفر اخر شي سمعته يكول.

ادهم : النذل ضيع تعبي كله ورجعنه لنقطه الصفر..

الفصل الواحد والعشرون من هنا 

شكرا لزيارتكم عالم روايات سكيرهوم