رواية سراج السادة الفصل التاسع عشر بقلم عسق ادريس
________________
كُن مُمتنًا للمسرات التي يسوقها الله لك دائمًا.
الحمدلله
الحمدلله
الحمدلله
لاحول ولاقوة الابالله العلي العظيم
لاحول ولاقوة الابالله العلي العظيم
لاحول ولاقوة الابالله العلي العظيم
اللهم صلِّي على محمد وال محمد
🤍
خلونا ويا السادة..... ♥.
" شاهيناز "
صدمتي بكلام عمتي وجادح اني لفقار؟
مستحيل اكدر استوعب هل فكره اني اعتبر فقار اخوي والكل يعرف
ابتعدت عن باب المطبخ خايفه لا جادح لو عمتي يحسون بيه صعدت للغرفه فتحت الباب ودخلت شفت ملاك كاعده تقره قرأن
اول مادخلت رفعت راسها تباوعلي رجعت دنكت تقره
كعدت على الفراش صافنه ماعرف شبيه
المشكله مشاعري بدت تنجرف ماعرف السبب كلام جادح او تعلقه بيه؟
مسحت على وجهي وتحسرت باوعت لملاك شفت عيونها مدمعه حيل استغربت وضعها صايره دوم تصفن وعيونها مدمعات
باوعتلها ب استغراب
_شاهيناز:: ملاك شبيج؟
رفعت راسها تباوعلي قوست حلكها بحزن وبجت
انصدمت من شفتها تبجي دموعها على القرأن تقدمت ب اتجاها عاكده حواجبي
_شاهيناز:: ملوكه شبيج منو وياج؟
مسحت دموعها ودنكت راسها
_ملاك:؛ تعبانه شاهيناز
_شاهيناز:: شبيج احجيلي
رفعت راسها تباوعلي اتصدقت وشالت القرأن مرجعته للرف نزعت جادر الصلاة واجت كعدت كدامي
_ملاك:؛ احس روحي غبيه
عكدت حواجبي ب استغراب
_شاهيناز:: ليش؟
اتحسرت ودارت منطتني ضهرها رجعت ب اتجاهي وخلت راسها بحضني مسحت على شعرها احاول اطمنها واحسسها ب الحنان
جرت حسره ودمعت عيونها صافنه....
" ملاك "
مرحبا اني ملاك او العلويه ملاك حفيده السيد عبد المقتدر
والدي شاف امي ببغداد بعد زيارته للامام الكاظم اخت احد الشيوخ الي جان يدرس ب الحوزه
اتزوج والدي امي وسكنها ببغداد محد من عائله السيد مقتدر جان رافض امي حتى زوجتة الثانيه لان التعداد بعائله الساده جان موضوع مقبول وغير مرفوض
لاكن امي رفضت تسكن ويا عائله السيد مقتدر وتنتقل للحله
نولدت وعشت ببغداد اني واخوي الجبير ميزان
حياتي جانت عباره عن طيش بطيش
ماجنت افهم التعلق بالله صح
رغم والدي سيد ومن نسل سادة لاكن حبي للدنيا شال غشاء الخوف من الاخرى جنت انسانه طايشه
حياتها مخربطه
الى ان اجه ذاك اليوم جنت اتجهز حتى اطلع لبيت خالي
كعدت كدام المرايه اعدل ب الايلاينر
واغني نفتح باب الغرفه اجاني صوت امي
_عبير:: ملاك مسحي وجهجج بسرعه ابوج اجه
كلبت عيوني ونفخت بضجر التفت اباوع لامي بعصبيه
_ملاك:: شلون يعني يومممم
_عبير:: مسحي وسكتي ملاك لايضل يحجي ابوج
شمرت قلم الايلاينر من ايدي وصحت
_ملاك:: هسه شسالفه الناس كلها تحط وتلبخ شلون يعني حرامم عليه
_عبير:: زماله كتلج من يروح حطي لايرزلج
نفخت ب انزعاج ومشيت طالعه من الغرفه ادردم ويا روحي يعني شكو بيها المكياج حرام الملابس الحلوه حرام ماصايره هاي كلشي حرام شنو من دين هذا الي يحرم كلشي؟؟؟
شلون يعني هاي الناس كلها تحط وتلبخ هذول مايدرون حرام لو بس احنا؟ والله سادة وعلويات ومايصير يعني موضوع مزعج شكد كارهه نفسي كوني علوية!!!!
مشيت طالعه للخارج اغسل وجهي احجي ويا روحي
جنت متحمسه اريد اطلع لبيت خالي اني والبنات متفقات نسهر!!! هسه اجه ابوي راح يحرمنه من الطلعه
توني اريد اطلع للحوش ورجعت بخطواتي من شفت رجال غريب اول مره اشوفه واكف كدام المغسله يغسل تمعنت بشكله جان ضخم وطويل لابس دشداشه سوده
وكف يتوضه
دخلت للمطبخ من شفت ابوي يطلع من الباب المربوط ب المجلس تقدم ب اتجاهه وابتسم
_حمزه:: ها سيد فقار
التفت الي اسمه فقار ب اتجاه ابوي مبتسم مسح على كف رجله ووكف باوع لابوي ب ابتسامه
_فقار:: ها ابو ميزان
_حمزه:: شلونها رجلك بعدها تأذيها؟
هز فقار راسه ب الرفض وحجه
_فقار:: لا الحمدلله احسن
_حمزه:: ادخل ارتاح لاتضل واكف عليها
_فقار:: اي بس اصلي
_حمزه:: اخذ راحتك فقار البيت بيتك
ابتسم فقار ب امتنان ومشه ب اتجاه المجلس ايده على ركبه يعرج متوجع شفته دخل للمجلس وسد الباب فتحت باب المطبخ وطلعت ماشيه ب اتجاه ابوي
دار ابوي يباوعلي ب ابتسامه من شاف المكياج بعيوني صغير عيونه برفض ماراضي حضنته مرحبه بجيته
_ملاك:: الله يساعدك بابا شلونك
_حمزه:: هلا بملوكتي شلونها بنيتي الحلوه؟
ابتسمت وبسته بخده
_ملاك:: يمتى جيت بابا شو مادري بجيتك
_حمزه:؛ قبل نص ساعه وماتدرين لان جنتي مشغوله تصبغين بوجهج
ابتسمت بخجل على كلامه رفع ردن الدشداشه يتوضه واني واكفه بصفه منتضرته يخلص حتى اغسل وجهي
درت اباوع لباب المجلس باوعت لابوي وحجيت مستغربه
_ملاك:: بابا هاي شحاطه منو؟
سكتت ابوي يكمل وضوئه واني واكفه منتضرته يجاوب
خلص وضوئه وباوعلي ينزل ب ردنه
_حمزه:: فقار حفيد السيد عبد الرؤف
_ملاك:: هااا اي هلا بي
هز ابوي راسه ب اي وباوعلي
_حمزه:: غسلي وجهج يلا وتوضي لصلاة
_ملاك:: هاا اي هوا اني جيت اتوضه
ابتسم ومسح على راسي
_حمزه:: عفيه بنيتي عفيه بعلويتي
ابتسمت لكلامه ووكفت كدام المغسله اغسل وجهي من المكياج ابتعد ابوي داخل للمجلس
غسلت وجهي ووابتعدت بدون وضوء ماكدر اصلي احس اكو شي بداخلي يرفض الصلاه ماكدر اجبر نفسي مو بيدي الموضوع
ثاني جنت متوقعه السيد فقار رجع لاهله
مشيت ب اتجاه المجلس تلفوني بيدي فاتحه شعري واضحك اكلب ب الفيديوهات
فتحت باب المجلس بدون مادك الباب
رفعت عيوني وانصدمت من شفت السيد فقار كاعد ب الارض يعدل بعمامته مصدوم لدخلتي
دنك راسه واني سديت الباب اطفر ويا روحي مستحيه منه
جنت متوقعه هاي اول واخر مره التقي بفقار بس جنت غلطانه دارت الدنيا ورجعت التقيت بي مره ثانيه بعد ما ابوي اجبرنا نعيش ويا ب الحله
رغم رفض امي ورفضي لاكن هذا الشي ماغير عند ابوي شي
عشنا ب الحله وجنت اكره واضوج من كلشي
وضعهم وتعلقهم وتقيدهم جان مزعج وملل ب النسبه الي حاول وياي السيد مقتدر حاول يصلحني بس اني جنت رافضه جنت اركض لزينتي بس لكشختي بين الكل فقط جنت اشوف نفسي مميزه عنهن من اشوف بنات عمامي يلبسن عبي واني البس بنطرون وبدي احس روحي غير عنهن
بيوم من الايام جنت طالعه للاسطبل اتمشه وادندن ويا روحي ب الاغاني انتبهت من بعيد شخص صاعده على ال "سراج"
الخيل الوحيد والحصان الي محد يكدر يمتطي
جان فرس مميز لونه اسود فحمي
ميزت شكل فقار وهوا صاعد على السراج يتسابق ويا ميزان تمشيت ب اتجاهم مركزه ويا فقار
جان واكف بنص الاسطبل يضحك بفرح لاف ب اتجاهي وانصدم بيه واكفه قريب علي وصافنه بوجهه
باوعلي وصفن بوجهي للحظات وكسر عيونه
جان بين فتره وفتره يتردد فقار ويجي لبستانه ماجنت افهم نفسي ليش بس اسمع اسمه اركض ركض
رغم هوا مايوم باوعلي بنضره اهتمام
بس كلشي تغير من جنت اسمعه يردد اسم شاهيناز
عرفت هاي بنت عمه كرهتها بدون ماشوفها ماجنت اعرف ليش فقار جان مهتم بيها لهل درجه بكل
بعد ما التقيت ب شاهيناز وب العلويه جهاد تغير تفكيري كله صح بقيت اكره شاهيناز بس تفكري تغير للدين
انصدمت بكلام السيد عبد الرؤف من عرفته مقرر يزوج فقار لو جادح لنبراس
بحركه تافهه مني رحت واجهت العلويه جهاد
ماعرف وين بالي جان رجلي اخذتني للعلويه
باوعت لشاهيناز ودمعت عيوني
_ملاك:: مادري شبيه احبه وهوا حتى ماباوع بوجهي
رمشت شاهيناز بوجهي مصدومه من كلامي
_ملاك:: لاتصفنين شاهيناز ترا والله مختنكه
_شاهيناز:: يعني شكلج ماعرف شحجي
_ملاك:: فقار يحبج؟
دفعتني من حضنها كامت من مكانها وصاحت
_شاهيناز:: والله لعبتو روحي يابه ماحب فقار اموت منه مستعده هسه لو يجيني واحد من الشارع اخذه وماخذ فقار
حجتها وفتحت باب الغرفه انصدمنا اني وشاهيناز من شفنه جادح واكف قريب الباب ابتسم بوجه شاهيناز بفرح وحجه
_جادح:: يعني ماتحبين فقار؟
سدت شاهيناز الباب بوجه ودارت تباوعلي مصدومه
كعدت ورا الباب تلطم على راسها
_شاهيناز:: الله اكبر يمه راح اموت من وكت
ضحكت مصدومه من كلام جادح ونضراته لشاهيناز جان فرحان بشكل وهوا يحجي
بليل الكل جان متجمع ب المصلا منتضر كلام السيد وقراره باوع السيد لفقار وجادح وابتسم
_عبد الرؤف:: جادح ابني ابدي جهز
_جادح:: ليش سيد؟
_عبد الرؤف:: خطوبتك الاسبوع الجاي
ابتسمت فرحانه يعني السيد ماختار فقار!! رغم اني سمعته جان رايد فقار التفت اباوع للعمتي جهاد شفتها تباوعلي وصافنه ابتسمت بوجهه وهيه خرزتني ودارت عيونها مني
باوعت لجادح شفت نضرات الرفض الي جانت مروسه بوجهه هز راسه ودنك ساكت ماعارض السيد رغم ملامحه جانت ادل على الرفض
باوعت لعمتي جانت صافنه تباوع لجادح دارت للسيد وحجت بتسأل
_جهاد:: الاسبوع الجاي قصدك الخطبه؟
دار السيد على عمتي وهز راسه ب اي مكمل كلامه
_عبد الرؤف:: اي بعد عرس غضنفر بيومين
عكدت عمتي حواجبها مستغربه
_جهاد:: وين صايره هاي؟
_عبد الرؤف:: ليش علويه؟
عدلت عمتي كعدتها وحجت
_جهاد:: لان مايجوز سيد ورانا محرم ليش احنا مناسباتنا قبل محرم بدال مانجهز لشهر الحزن نجهز لخطوبه جادح؟
_عبد المقتدر:: ليش علويه وعرس غضنفر؟
هزت عمتي راسها ب اي ودارت على السيد مقتدر
_جهاد:: سيد عرس غضنفر احنا مجبورين نعجله بسبب تعب قدس بس جادح ماكو داعي خلي بفرحه الزهره افضل ورانا شهر محرم والعاشور مامستعجلين على خطبه جادح؟ صح لو غلطانه اني
وجهت عمتي كلامها للجميع
والكل ايد فكره عمتي وكلامها
_عبد الرؤف:: تمام اذا هيج تشوفون اذن خطبه جادح تتأجل بعد محرم وهسه ابدو جهزو لعرس غضنفر
شفت جادح مبتسم يباوع لعمتي كلبت عمتي عيونها من جادح
حسيت العلويه جهاد ماشيه بخطه بس ماعرفتها لان السيد جان مصر خطبه واحد من الساده بعد عرس غضنفر بس العلويه جهاد كدرت تلوف الساده بكبرها
‼️ فداكم قلبي متابعه الحساب والتفاعل ب التعليقات والتصويت ‼️
"قدس"
بنفس اليوم الي عرفت بي السيد مقرر خطبه جادح ونبراس بعد العراس
جنت صاعده اتصال اني وغضنفر حجيت مستغربه الموضوع
_ قدس:: غضنفر صدك السيد ليش اختار جادح مو فقار؟
_غضنفر:: ماعرف بس الي اعرفه السيد يفكر بعماد الدين
_قدس:: عماد ليش شبي؟
سمعت غضنفر فتح باب السيارة كمل كلامه ب
_غضنفر:: عماد الدين يحتاج اهتمام وماجاي يلكاه
_قدس:: بس رشا والبنات ماقصرات حتى العلويه شيماء حيل تهتم ب عماد
_غضنفر:: صح بس العلويه ماتكدر تركض ورا عماد ورشا والبنات مامقصرات بس تشوفين كلمن وعنده درزن جهال وكلمن ملتهي ويا خلفته ورامن يركضون ورا جهالهم لو ورا عماد؟
_قدس:: يعني السيد يريد نبراس تخدم عماد؟
_غضنفر:: ولج باب شتخدم اصلا عماد معتمد على نفسه بكلشي بس احنا نكول هيج ولاتنسين جادح هم يحتاج انسانه بحياته تفهمه وتحتوي ترا احنا الزلم نحتاج مرأه ويانا ماتشوفيني اختاريتج
عوجت حلكي معارضه كلامه
_قدس:: السيد اختارني مو انت
_غضنفر:: شكد. احبج
ضحكت وشمرت الملابس من ايدي نمت على بطني مركزه ويا كلام غضنفر
_غضنفر:: شدينا الغرفه انا والولد البارحه
_قدس:: ممممم
_غضنفر:؛ ايييييي خالي راح نزوج ونصير بغرفه وحده
ابتسمت فرحانه رغم قصر مده تعارفي بغضنفر بس حبيته وتعلقت بي بشده شفت اهتمامه وحبه الي
ماحسسني بتعبي ولا بيوم حملني ذنب اذيه احد
ولا بيوم شكالي من تصرف تصرفته بدون قصد او بقصد
بدينه نحضر ونجهز للعرس
جنت اطلع ويا نضال والبنات كل يوم للسوك نشتري للجهاز رغم اني اشتريت وجهزت بكربلاء بس هم جنت احتاج كم غرض
الكل جان فرحان وقس كل ماصفنت صاحت
_قس:: اكلك عمي الكميه تصفه المن
_محمد:: كميه شنو؟
_قس:: حصه قدس الطحينات والزيت والشكر والتمن وهذن السوالف خو مانطيهن لقدس؟ ليش مانتقاسم بيهن
مر اسبوع على رجعتي من كربلاء ومابقه غير القليل للعرس بكل مره اتذكر يجيني مغص ببطني وخوف
بس من اسمع صوت غضنفر ينسحب الخوف والتوتر مني صرت اريد بس انجمع اني وغضنفر بمكان واحد حسيته الشخص الوحيد الي يفهمني ويفهم الاريده ويكدر يمتص الخوف مني بسهوله
" عاتكه "
بعد ما السيد انطه علم للكل عن اختياره لجادح الكل فرح يعني راح تصيرين عدنا فرحتين فرحه غضنفر وقدس وجادح ونبراس
صح ما اعرف هل بنيه رغم هذا من اول لقاء كدرت تكسب العلويات وتحببهن بيها
جانت لطيفه وهادئه بشغل يجذب غير ملامحها وجمالها المميز
ثاني يوم الكل بده يجهز لرجعتنا لنجف حتى نبدي نجهز لعرس غضنفر
نزلت الدرج بيدي الجنط والبنات وياي
الكل جان متجهز حتى نرجع لنجف شفت العلويه لباب واكفه تودع ب السيد وتبوسه
شكد حاول وياها السيد حتى ترجع ويانا لنجف رغم هذا عارضت ب
_لباب:؛ لاخويه بعد انتم اول وتالي راجعين لنجف بعرس غضنفر ان شاءالله بعد العرس ارجع وياكم هم روحي مشتاكه لامير المؤمنين
طلع الكل من البيت ب امر من السيد
شفت اخواني الساده واكفين ب الباب متجمعين وسيارتهم محاوطه الباب باوعلنه السيد وحجه باستغراب
_عبد الرؤف:: عمتكم وين؟
_مهجان:: هاي اجت
التفتت على البيت شفت عمتي وجادح طالعين من البيت والانزعاج واضح ب ملامح جادح
وكف جادح كدام السيد وحجه مأشر على سيارته
_جادح:: يلا سيد بسيارتي تصعد؟
_جهاد:: لاتجي جادح سيارتنا تكفي
_جادح؛: لا وين تكفي خليني اوصلكم
_عبد الرؤف؛؛ لا ابني تكفي السيارات ماتقصر
حاول جادح ويا السيد بس السيد رفض جادح يوصلنه رغم سيارتنا ماراح تكفي تجمعنه كلنا لان سيارتنا مقتصره على فقار وايليا وابوي السيد مهدي وسيارة السيد ويا اعدادنا الهائله ماراح تكفي
ودعنا السيد عبد المعز والسيد عبد المقتدر
الي راح يضل ببيت السيد معز ليوم العرس صعد الكل وتوزعنا على السيارات
صعدت بسيارة فقار اني والسيد عبد الرؤف وشاهيناز وعمتي وحميده والباقين توزعو ب السيارات الضلن
مشه فقار راجع بينه للنجف
السيارة جانت هادئه ماينسمع بيها صوت شفت شاهيناز صافنه على الجامه وعمتي صافنه وياها
استغربت وضعهن هل فتره خاصتن شاهيناز الي انتبهت عليها تتهرب من نضرات جادح
التاف السيد علينه وحجه ب حزن
_عبد الرؤف:: ماضل شي وتعج هاي الشوارع ب المواكب
_فقار:: الناس بدت تنصب
اتحسر السيد ورجع يباوع لطريق
"القلوب بذكرك تبكي وان كانت جلمودُ
حبيبي حسينِ "
وصلنه لنجف والسيارات صفت بباب البيت
الكل نزل من السيارة
جانت سيارتنا تمشي ب التساوي لهذا كلنا وصلنه بنفس الساعه
تمشيت ب اتجاه البيت من شفت فتحو الباب
دخلت للبيت تعبانه صعدت لغرفتي اجر بروحي جر
" جهاد "
بعد كل هل مده الي مرت واستغراب الكل
ليش جهاد مارجعت فتحت القضيه مره ثانيه؟ معقوله نست الثار؟ لا ومستحيل انسى ثار ابني عون
سكوتي هل مده جان جزء فقط من المجهول الي منتضر الكل
بيوم جنت نازله الدرج التلفون بيدي منتضره جادح يدز كلام النقيب جزام
ابتسمت بفرح من شفت الملف الي جان مذكور اسم ابني عون بي
تمشيت للمطبخ احجي ويا نفسي
لاتخاف عون ماما صح طولت هواي بس حقك راح يرجع اول وتالي الله سبحانه وتعالى يمهل ولا يهمل
ومستحيا دمك يهمل ويروح هدر
وكفت كدام باب المطبخ مستغربه الهمسات الي جايه من داخل المطبخ
تقدمت مركزه ويا كلام منة الله وسهام الي جانن يحجن بهمس مايردن واحد يسمعهن
توني اريد انسحب واخليهن ياخذن راحتهن ب الكلام
بس رجلي فجأة وكفت لاغيه النسحاب ومتقدمه حتى تسمع اكثر بعد ما سمعت اسم قدس ب الموضوع
_سهام:: اني شفتها بعيوني واذا ماتصدكيني هسه احلفج على القرأن شفت قدس واكفه فوك راس عمتي لباب تريد تخنكها
_منة الله:: لا سهام فدوه اخاف على امي اني
_سهام؛؛ لعد شبيج ماتمشين وراي اني اكدر اروح لعطاء لو خدلجه لو كريمه لو مبين بس ادري بيهن فاهيات كلشي ماكو خو عطاء الله منطيها بس جسم
فتحت تلفوني ودخلت على التسجيل ووكفت اتسمع الهن بتمعن
_منة الله:؛ اخاف تأذيني انوب سمعتي عمتي جهاد شكالت كالت يأذيكم ترا
_سهام؛؛ ولج شبيج انتِ جهاد تريد تخوفنا بس قدس مابيها شي هيه اصلا تتعامل ويا الجن
_منه اللة.:: لا سهام شلون تتعامل ويا الجن هيه اصلا مضروره
_سهام؛؛ انتِ بكيفج روحي هسه باجر عكبه تخسرين وحده من خواتج لو العلويه لباب عود ضلي ابجي
شفت منة الله صافنه بخوف وسهام واكفه كدامها
_سهام:؛ ولج شفتي الصار ب محمد؟ رادت تموته وكلهم يدرون بس محد حجه بحجه والله نخاف على مشاعرها
_منة الله:: شنسوي يعني خل نحجي ويا امي نكلها نرجع لايران
رفعت سهام ايدها وغمت منة الله تهز ب ايديها
_سهام؛؛ ولج عمتي كالت مانرجع اصلا تريد تضل ب العراق
_منة الله:: لا شنو منين جايبه هل حجي امي ماتكدر اصلا ترتاح ب ايران اكثر
_سهام؛: حجت ويا عمران كلته اذا جهاد مارجعت وياي لايران مارجع وانتِ يمج هاي جهاد راسها يابس ماتريد ترجع بس السيد يريد يضغط عليها
رفعت حواجبي وابتسمت يعني السيد هم جاي يلعب من وراي؟ رجعت اتسمع اكلامهن والتسجيل يسجل
_سهام:: تذكرين من غضنفر اجه لايران؟
_منة الله:: اي اتذكر
_سهام؛؛ اسمعي لعد بس عليج الله الحجي مايطلع ابد
_منة الله:: لا لا احجي والله ماكول شي
ركزت بكلام سهام متذكره وياهن
صح غضنفر جان يتردد لايران بين مده ومده وجان يزور عمتي دوم والبنات موجودات
كملت سهام كلامها ب
_سهام:: هذا غضنفر شايفج من راجعه من الحوزه من جنتي ويا جهاد
_منة الله؛؛ اي؟
_سهام؛؛ حاجي ويا عمتي لباب وحاجي ويا وجهاد عود رايدج
رفعت حواجبي مصدومه هذا الحجي منين ليش اول مره اسمعه يمتى غضنفر حاجي ب منة الله
وحاجي وياي؟
_منة الله؛؛ مايهمني غضنفر الي يهمني امي يعني مرتين شفت قدس واكفه ورا امي ب السجينه تحاول تأذيها اخاف صدك تأذيها؟
_سهام؛؛ تاذيها اي لهذا من هسه لازم نتصرف
توني اريد ادخل اكتلهن ب النعال وانسحبت من ايدي
التفتت ورا شفت اسراء واكفه وراي اشرتلي على حلكها اسكت وسحبتني للخارج للحديقه الخارجيه
سحبت ايدي منها ضايجه وصحت بيها
_جهاد:؛ ايدي لجج
_اسراء:: جهاد سكتي لاتحجين شي
_جهاد:: شنو ماحجي شي شفتيهن شيحجن؟ يسون مأمرات هذن يردالهن تربيه
مسحت اسراء على وجهه وباوعتلي بحزن وحيره
باوعتلها صفح ماراضيه على نضراتها
_جهاد:: شهل نضرات لاتسوين روحج مسكينه
_اسراء:: جهاد سمعيني
_جهاد؛؛ شنو؟
التفتت اسراء تباوع خاف احد يسمعها باوعتلي وتحسرت
_اسراء:: اكو شي جاي يصير ومحد منتبه الكل غافل
_جهاد:: شنو جاي يصير!
_اسراء:؛ جهاد
استغربت عاكده حواجبي واني اسمع لكلام اسراء الي نزل عليه مثل الصدمه لا مو الصدمه كارثه!! معقوله كل هذا يصير والكل غافل
ماجنت متوقعه ولا واحد ب الميه ب الي جنت اسمعه
باوعتلها وعطت بيها بعصبيه
_جهاد:: ليش ماحجيتي ليش ماكتيلي!؟؟
_اسراء:: جهاد محد يكدر يتصرف ويا الي جاي يصير
_جهاد؛؛ لانكدر لو حاجيه جان عرفت دربي
_اسراء:: جهاد هسه لاتركزين ويا منة الله وسهام ركزي ب الي حجيته
هزيت راسي ب اي والتفتت منطتها ضهري
_جهاد:؛ يصير خير
بعد هذا يوم اتناسيت منه وسهام
اتناسيت؟ لا مستحيل اتناسهن جنت اهددهن بطريقه عشوائيه خليتلهن بنج مؤقت
اعرف سهام ماراح تسكت بعد رزاله اخر مره
ومنة الله متعلقه ب عمتي لباب بشده ماراح ترضه واحد ياذيها
بيوم جنت كاعده وحدي ب الحديقه صافنه وبالي بغير عالم
بنص اندماجي وصفنتي ويا نفسي حسيت بشخص واكف وراي صفنت ويا روحي استغفر متوقعه الموضوع الي ابالي
توني جاي ارجع اكمل الشعر واجاني صوت
_فقار:: عمه
غمضت عيوني صاكعه على سنوني بعصبيه التفتت على فقار شفته واكف وراي مبتسم
_جهاد:: عمه العمت عمتك كون
_فقار:: ها ليش؟
_جهاد:: شهل الطلطه العدكم ماتعرف تحمحم ماتكول ناس كلوبتها خلصانه
ضحك فقار ومشه ب اتجاهي كعد قريب الي وحجه بضحكه
_فقار:: شلونج ام السادة
_جهاد:: عمة السادة لك
_فقار:: والله انتِ امنا مو عمتنا
باوعتله وابتسمت
_جهاد:: اشمرهن ترا اعرف سوالفكم
_فقار:: لا عمة قصدج مصلحه؟
_جهاد:: تريدني أحجي ويا السيد ماتريد تتزوج مو
ابتسم وهز راسه
_فقار:: ذيبه انتِ عمة السادة
_جهاد:: فقار ابد لا تحاول اني وابوي علاقتنا ضاله تعلاكه بدون هدم مايسمع مني
_فقار:: حلوه هاي تعلاكه بدون هدم
سديت الدفتر وخليته على بحضني
_جهاد:: هم ابالك وحده
باوعلي فقار ب استغراب عاكد حواجبه هز راسه نافي كلامي
_فقار:: لا ابد اصلاً موضوع الزواج كله مو بالي
_جهاد:: اكو ابنيه ابالي حيل ترهملك
عكد حواجبه وضحك
_فقار:: ها السيد عبد الرؤف الثاني ياهي هاي الي ابالج
_جهاد:: ملاك
صفن ب الارض وباوعلي
_فقار:: ملاك بت السيد حمزه؟
_جهاد:: اي خوش بنيه ولو هيه ماجنها رايدتك بس خوش بنيه
_فقار:: مو شوفي عمه
_جهاد:: مؤدبه وحليوه وهم منا وبينه السيد رادها ل ايليا تدري؟
جان صافن على كلامي ومركز وياي
_فقار:: يمتى هذا الحجي
_جهاد:: حجيت وياها كتلها شنو رأيج بفقار ردت اجرجها ب الحجي اشوف رد فعلها بيك
_فقار؛؛ اي وشكالت؟
قوست حلكي وضحكت
_جهاد:: تكول اعتبره مثل اخوي
_فقار:: هاااا
حك على راسه واني مبتسمه ويا روحي اني اعلمكم انتم الرباعي دواكم يمي باوعلي وهز راسه بعدم اهتمام
_فقار:: ولا انا مفكر بيها تدرين بيه عمه اعتبر الكل خواتي
_جهاد:: اي خواتك مو امك طالكه بيهن وتعتبرهن خواتك لو راضعات وياك؟
_فقار:: لا بس
_جهاد:: لاتبسبس ماحجي ويا ابوي حجايه وحده ماناقصني دوخه اني تريد روح احجي ويا السيد انت
كمت من مكاني ومشيت ب داخله للبيت
شفت البنات كلهن متجمعات ب الصاله وملاك وياهن
رفعت راسها تباوعلي خزرتها ومشيت صاعده للغرفه
توني اصعد وسمعت صوت جادح يدخل للبيت ابتسمت وكملت طريقي للغرفه دخلت للغرفه
طلعت كتب تفسير الحلام وكعدت
رفعت راسي اباوع للساعه هذا وقت رجعه ابوي والساده سديت الكتب ونزلت الدرج
فتحت باب المصلا شفت السيد عبد الرؤف والسيد معز وعبد المقتدر كاعدين يتناقشون بمواضيع دينيه
من فتحت الباب الكل التاف يباوعلي
سلمت ودخلت كاعده بنصهم
باوعت لعمي وابتسمت
_جهاد:: ها سيد
_عبد المقتدر:: هلا ب عمة السادة
هزيت راسي وابتسمت
انفتح باب المصلا سمعت صوت جادح يدخل للمصلا سلم ودخل للمصلا باوعلي وهز راسه ب استغراب
_جادح:: ها شصاير
_جهاد:: ماصاير شي بس جايه اشكي للساده
وجه الكل تركيزه وياي باوعت لابوي والسيد معز
_جهاد:: البارحه صار موقف ومتت من القهر
باوعلي ب استغراب
_عبد الرؤف:: ليش بنيتي خيرج؟
_جهاد:: البارحه كعدت بليل شفت عماد الدين فاتح الثلاجه ياكل لفه طمامه وخيار كتله شتريد اسويلك عمه تريد مخلمه؟ تريد طمامه وبيض لو بيض وبتيته
تخيلو شيكلي؟؟
عكد ابوي حواجبه ب استغراب وهز راسه
_عبد الرؤف:: شيكلج؟
اتحسرت ودنك راسي بحزن
_جهاد:: يكلي عمه تمنيت امي تسويلي الاكل هسه
صاح جادح من مكانه مصدوم يباوعلي بخزره
_جادح:: ياجذابه عماد زين منه يحجي اسمه
_جهاد:: اني جذابه جادح اني؟ ولك ياكل لفه طمامه وخيار
_جادح:: وشبيها لفه طمامه وخيار وياها خضره وليمون تصير اطك ب الكاع
باوعتله صفح ماعاجبني رجعت باوعت للساده الكبار وحجيت بقهر
_جهاد:: اني ارشح جادح يعقد على حفيده العاشور
_جادح:: بحضج وابختج كون
_عبد الرؤف:: ولك!!!
كتمت على ضحكتي ودنكت ماريد اكون اتلاوه ويا عيب زلمه وهم مايصير باوعتله بخزره
_جهاد:: خطيه ابنك جادح يحتاج عنايه
باوعت للساده وكمت من مكاني
_جهاد:: قرارتكم لازم تصير حك
باوعتله ومشيت طالعه من المصلا تعذرني جادح ماكدر افرط ب ابن اخوي
طلعت من المصلا شفتهم بعدهن على جمعتهن
تمشيت ب اتجاه القنفه كعدت حاطه رجل على رجل
تلفوني بيدي كاعده اتسمع لسوالف البنات
سمعت رجه التلفون جايه من اشعار
فتحت التلفون شفت الاشعار من الوتساب دخلت للوتساب رقم غريب كاتب
_🗣: السلام عليكم
_جهاد:: عليكم السلام تفضل منو وياي؟
_🗣: انتِ عمة السادة
_جهاد:: اي عمة السادة تفضل منو انت؟
_🗣: جتال ابنج الرضيع
ويا كلماته هاي جسمي ارتعش حسيت نبضات قلبي ثقلت ماعرفت شصار بيه شمرت التلفون من ايدي وصفنت امسح على وجهي
اخذت التلفون وطلعت للخارج مامنعت نفسي بهاي الحظه بمجرد شفت كلمه جتال ابنج الرضيع! يعني هذا قاتل ابني! شنو جاي يصير معقوله قاتل ابني صدك؟
دست اتصال وخليت التلفون على اذني اسمع ايدي ترجف وحلكي نشف من الخوف بس صوت رن التلفون ينسمع
اجاني صوت حمحمت رجال ثواني واجاني صوت
_جزام:: الو!
تصنمت بمكاني مستغربه شنو الموضوع هذا جزام شجابه على قاتل ابني
رجع كرر كلامه
_جزام:: علويه تسمعيني؟
_جهاد:: انت قاتل ابني؟
سمعت صوته يستغفر كوا كتمت عصبيتي ماريد انفجر علي ماريد اطلع عصبيتي وحركتي بي
_جهاد:: اكلك خويه انت ماتستحي على نفسك؟
_جزام:: العفو شنو؟؟
_جهاد:: عيب خويه شهل حركات شنو جتال ابنج وشنو مراسلني وانت منيلك رقمي؟؟؟
سمعت صوت كرسي يتحرك ومشي خطوا
_جزام:: علويه لحظه لاتفهميني غلط
_جهاد:: لا مو غلط هسه احجي ويا جادح وانت ويا تفاهمو
_جزام:: لاتتسرعين خليني افهمج !
سكتت اتنفس بعصبيه كلش ضجت من موقفه وتصرفه
_جزام:: اريد تواصلي وياج يبقى مستمر بخصوص قضيه عون!
_جهاد:: لا خلف الله عليك خويه سد القضيه مانريدها
توني اسد الاتصال وكمل كلامه ب
_جزام:: جادح يعرف بقاتل ابنج
بقيت واكفه بمكاني متصمنه من كلامه حجيت ب استغراب مافاهمه
_جهاد:: العفو شنو!
_جزام:: جادح بكلشي يعرف وهوا جاي يخربط علينه القضيه كلها
جريت نفسي بصعوبه كلبي يدك بسرعه
_جهاد:: شلون يعني
_جزام:: يعني جادح جاي من طرف والدج السيد بس
_جهاد:: تقصد جادح
_جزام:: يعني جادح وابوج متفقين على القضيه ثنينهم جاي يغيرون احداث القضيه والاثنين مايردون واحد يوصل للقضيه
غمضت عيوني وهزيت راسي بقهر ليش جادح مو انت الوحيد الي وثقت بي انت الوحيد الي مافكرت التجأ لغيرك شلون هيج تغدر بيه!
_جهاد:: انت وجادح اصدقاء شلون تغدر بصديقك؟
_جزام:؛ العفو علويه الشغل غير والصداقه غير لاتنسين انا لزمت شاربي ووعدتج وعد زلم حق ابنج يرجع
صفنت ب الارض شلون بهاي السالفه يعني ابوي يدري بيه رجعت فتحت القضيه مره ثانيه اكيد راح يجبرني ارجع لايران هسه فهمت سكوت ابوي يعني هوا مو شاك بيه اني مفكره افتح القضيه لاهوا يدري بيه اني فاتحه القضيه بس باله صافي ماراح اوصل لشي!!!
"مهره"
فتحت عيوني بتعب جسمي متشنج
جريت حسره وكلبت نفسي للجهه اليمنى متذكره الي صار البارحه
جنت كاعده امشط شعري صافنه على حياتي وعلى كل الي صار وشلون حياتي تغيرت
نفتح باب الغرفه التفتت على دخله لجين
_لجين:: مهره
_مهره:: ها؟
_لجين:: مسلم يريدج
تنفست بضجر مزعوجه
رفعت شعري وشمرت الحجاب على شعري طلعت من الغرفه شفته كاعد ب الصاله صافن على ايدي
من دخلت باوعلي وابتسم
_مسلم:: هلا بمهرتي
_مهره:: مهرتك شنو يمتى صرت مهرتك؟
وكف مامهتم لكلامي سحبني مقربني اله
دمعت عيني من قربه وشلون محاوط خصري ب ايده
_مهره:: مسلم الله يخليك بعد عني
_مسلم:: شبيج مهره؟
ببعد عني صافن بوجهي مستغرب
_مهره:: ماكدر ماتحمل قربك
عكد حواجبه بعصبيه منزعج
_مسلم:: تحملي لعد من هسه
بعد مني ورجع كعد بمكانه نفخت ب انزعاج وكعدت كدامه اهز برجلي ماكدر مو بيدي وجوده يزعجني اختنك بس يتقرب مني
كل هاي الايام المرت واني انفر منه وهوا يحاول يتقرب مني دوم احجي واشمر ب الحجي اريده بس يبعد عني بس ماكو بشر بلا كرامه؟؟
شكد حاولت افسخ الخطوبه لاكن بدون فايده جنت اشوف الرفض حتى من امي!! نفسها الي جانت رافضه زواجي من مسلم صارت تمنعني ابتعد عنه
محاولات محمد اخوي حتى يصلح بينه وبين امي
شفت امي رجعت تنجذب لمحمد
وكلامها بحجه
_جنان:: ماعندي غير ابني شكد مايسوي ويدوس يبقى مرجعي اله
_مهره:: ابنج باعنيييي!!!
_جنان:: ماباعج بس هوا يحب بت عمه وعمج قصي محقد علي شيسوي يعني
صرت ماحجي وافضل السكوت عرفت محمد
كدر يغسل عقلها وكدر يقنعها بحجاياته المره!!
كسر صفنتي من سمعت كلام مسلم
_مسلم:: ابدي اتجهزي العرس الاسبوع الجاي
_مهره:: شنو شنو!!
_مسلم:: شنو شنو؟
وكفت معارضه كلامه
_مهره:: محرم ماضل شي شلون تريد تعرس انت
_مسلم:: مامعرسين بمحرم ست مهره قبل محرم
_مهره:: لا مسلم لا الله يخليك خلي بفرحه الزهره
ابتسم ب استفزاز خله رجل على رجل ورفع حواجبه ب اعتراض
_مسلم:: الاسبوع الجاي ب الضبط العرس
بلعت ريكي صافنه هاي شجاي يصير توقعت ممكن اكدر افسخ الخطبه منا لفرحة الزهره بس مبين هذا مايرديني منا لفرحة الزهره
باوعتله وحجيت واني خايفه من قراري والي راح اسوي ماعرف شلون ومنين اجتني هاي الفكره
_مهره:: تمام بس عندي طلب منك
هز راسه ب اي وباوعلي ب اهتمام
_مسلم:: امريني
غمضت عيوني ومسحت على وجهي باوعتله وحجيت ب ترجي
_مهره:: اريد ازور النجف قبل لانزوج اريد ازور امير المؤمنين واني راضيه نزوج الاسبوع الجاي
" قدس "
نزلت الدرج بركض ماضل شي الناس توصل واني لهسه مارايحه للصالون شفت نضال وقس يتعاركن ب الصاله
_قس:: نضيله لاتخليني اتصرف وياج غير تصرف
_نضال:: روايني تصرفاتج اشو
_قس:: عليج بداعة عمي خل اروح والله ماسوي شي
شمرت قس روحها على نضال تبوس بيها وتتوسل ونضال معانده
_نضال:: حتى تتادبين اكلج جيبيلي من كربلاء دهينه ب القشطه تجيبلي دهينه وكيمر كاله بخمسميه
رفعت قس راسها تباوع لنضال
_قس:: ترا نفس الشي وداعتج ثنينهن من البقره
بعدت نضال من قس وقس رجعت تركض وراها وتتوسل
_قس:: نضال لا عليج الله
لطمت على وجهي وباوعتلهن اصرخ بقهر
_قدس:: صارتتتت ب 10 اتأخرتتتت على الصالون
باوعتلي قس وصاحت
_قس:: ولج خل امكيجج احسن من ماترحين لصالونات
_نضال:: نجبي الفكر ويلا انتِ قاسم برا منتضرنا
رتبت ملابسي ومشيت ورا نضال طالعات من البيت دارت نضال على قس وصاحت
_نضال:: اخذي بس اذا صار بي شي ياقس ماتلومين غير روحج
_قس:: يابعدددد جاويييييي جاو انتِ جاوووو
حجتها وشمرت على نضال بوسه هوائيه
_قس:: تدرين مابيه ابوسج بوجهج نفسي تلعب
شمرت نضال العبايه من راسها ورجعت لقس سحبتها من ايديها اتوسل بيها
_قدس:: فدوه من نرجع نكتلها سواا بس امشي
مشت نضال وياي تهدد بقس وقس تشمر بقبلات هوائيه طلعنه من البيت شفنا قاسم صاف السياره ب الباب صعدت نضال وصعدت وراها
اليوم النحس وراي وراي كعدنا متاخرين عن حجز الصالون وفوك هذا محد جان موجود توا قاسم اجه
فتحت التلفون شفت مكالمات غضنفر شخص متصل عليه بس اني مادري شجاني اخذتني النومه هيج
صفنت على الجامه عيوني مدمعه مادري شبيه عيوني هل فتره صايرات بسرعه يدمعن ب ابسط المواقف
وصلنه للصالون نزلت اركض عيوني مدمعات خاف الصالون هوسه ومايضلي وقت
دخلت للصالون قبل نضال الي ضلت تنزلب الغراض
دخلت للصالون وهنا جانت المفاجئه الصالون هوسه ومتروس صايره طكني واطكك دخلت نضال وراي وانصدمت ب اعداد العرايس باوعتلي وهزت راسها ب اسف
مشينه ب اتجاه ام الصالون جانت تسحب بشعر العروسه من تقدمنه ب اتجاها باوعتلنه وصاحت
_:: وين جنتننن صدك جذب
_قدس:: اخذتنا النومه ماندري
_:: شخذتج النومه شهل اهمال جايتني ورا ساعتين شلحك هسه
دنكت بقهر جانت نضال تحجي وياها وتحاول اتطلعع حجج ترضيها بيها
بعد الف رزاله وحجايه وكسره خاطر والف دمعه لاتكولون شلون حسبتيهن دموعي اعرف عددهن
كعدت على الكرسي وام الصالون فوك راسي ادمردم واني كوا متحمله روحي ماريد انفجر كوا سكتت
بدت بيه واني صافنه على روحي ب المرايه
ماعرف شنو الصار وليش فجأة بديت ابجي فجأه بهذا اليوم تجمعن عليه المواقف الحزينه والي زاد حزني من سمعت وشفت اهتمام امهات العرايس الموجودات
وشلون راكضات ببناتهن ب الصلوات
فجأة اشتاقيت لامي اشتاقيت توكف وياي بهاي الحظه
تحضني وتكلي امج موجوده وياج
بس هذا الشي ماصار ولاراح يصير امي ماراح توكف وياي لا اني ولاخواتي
دمعت عيوني وبجيت حتى خواتي مو يمي هسه
رغم ادري مو بيدهن ورادن يجن بس عمي رفض والولد
خليت ايدي على وجهي وشهكت ابجي سكتت كل الاصوات الجانت موجود ومحاوطتني حسيت ب ايد شخص على كتفي مسحت على عيوني ورفعت راسي شفت نضال واكفه يمي
_نضال:: يمج اني
_قدس:: اشتاقيت ل امي
حجيتها وبجيت مسحت ام المكياج على وجهي وحجت تهدئني
_:: كلنا يمج هنا حبيبتي كولي يالله
هزيت راسي ب الرفض ماكدر اسيطر على دموعي حسيت بشي ينزل مني غمضت عيوني بقوه وبجيت بقوه
_قدس:: مو وقتجج مو وقتججج
_نضال؛: شبيج قدس!
سسكتت وباوعت للتمكيجني
_قدس:: اريد اغسل
_:: كومي وياي
مشت واني مشيت وراها ماريد واحد يلاحظ اخاف ملابسي يبينن وصلتني للمغاسل ورجعت دخلت لحمام ونهاريت ابجي
شفت روحي ورجعت بجيت مو وكتج ابد ابد مو وكتج
رن التلفون بيدي شفت المتصل غضنفر رفعت الخط وبجيت
_قدس:: غضنفررررررر
_غضنفر:: قدسسس تبجين قدس!؟ شبيج
بجيت بقهر وكعدت اسولف اله كلشي صار من كعدت من النوم متأخره لهاي الحظه وشلون ترزلت وشلون ردت امي وياي تشاركني بهاي الحظه ختمتها ب
_قدس:: حتى الشهريه اجتني شفت الحض
سمعت سكت واني ابجي واشهك ويا روحي ماجنت منتبهه على روحي اريد بس احجي بس اطلع الي بداخلي واجه غضنفر ب الرجلين الي اجاني صوته يحجي بهدوء
_غضنفر:: قدوستي لاتخلين المشاعر والتراكمات تخرب عليج هاي الحظات انتِ هسه عروسه لازم تفكرين ب ايجابيه
مسحت دمعتي وحجيت بهضيمه
_قدس:: اريد امي وياي
_غضنفر:: اعتبريني امج وابوج واخوج واختج وصديقتج وزوجج
_قدس:: مخنوكه غضنفر
_غضنفر:: تحملي بس اليوم باجر انا يمج
ابتسمت بحزن وحجيت
_قدس:: اشتاقيتلك
_غضنفر:: اخخخ بويه طاك كلبي عليج
ابتسمت من بين دموعي سمعت صوت نضال تعجلني ودعت غضنفر وغسلت وجهي وطلعت
_نضال:: ولج وينججج شسالفه
_قدس:: اجتني الدوره
_نضال؛: شوف الحض روحي كعدي هسه اشوف محل قريب
طلعت حتى اتمكيج ونضال طلعت ادورلي
كعدت كدام المرايه وابتسمت متذكره كلام غضنفر جاي احاول اتصرف طبيعي
رجعت نضال وياها المنقذ لبست البدله وكملت مكياجي
باوعت لنفسي وابتسمت برضا عن نفسي بدلتي مارونيه الزند نازل كركش والخصر حزام بلون البدله
طلعنه من الصالون اخذنا قاسم مرجعنه للبيت
اول ماوصلنه للبيت تلوكنا البنات ب الهوسات والركص
واني ابتسم فرحانه الكل جان موجود عماتي عمامي الجوارين جانت عيوني ادور قس
شفت واكفه ب المطبخ تداهر ويا البنلت على الكيك اتصيح انا اوزع والبنات يحلفن ماتوزع شبيك قس تخوف هسه تضم نص الكيكات
باوعتلي وقس وابتسمت عافت كارتون الكيك واجتني ب ابتسامه جانت لابسه فستان مثل القفطان لون رصاصي فاتح فاتحه شعرها مكياجها ترابي
_قس:: راح ابجي
_قدس:: ليش شبيج
_قس:: طالعه تخبلين جنج لعابه نضليه جيبي الحرمل
_نضال:: تردين تخنكين الوادم
كعدت على الكرسي والكل كدامي يركص ويضحك واني عاصره على ايدي حسيت بدوخه غريبه اجتني غمضت عيوني ورجعت فتحتهن ماريد اتقيئ
رفعت راسي دايخه شفت البنات يركصن متونسات دنكت راسي امسح على عيوني رجعت رفعت راسي
انصدمت واني اشوف مجموعه نساء مصاليخ شعرهن لنص ضهرهن بقيت مصدومه اتنفس ببطىء واني اشوف معاني جسمهن جانت واضحه وضح الجسم
جسمهن مطوعن والجروح ماليه جسمهن
لون جسمهن شاحب
باوعتلهن بخوف جسمي يرجف جانن يركصن بطريقه غريبه ينزلن للارض ويرجعن يوكفن
التفتت من دخلو مجموعه رجال اشكالهم متشابه لحيتهم لنص بطنهن ملابسهن غريبه
وكفو بين النسوان ويلحسون ب اجسامهن جنت مستغربه ومصدومه الي جاي يصير دنكت راسي اتنفس ببطىء احاول اسيطر على نفسي اعرف الي جاي يصير تخيلات بس قدس اهدي كافي اهدي
عفت الورد على الكرسي ووكفت اهز راسي ماعرف الي جاي يصير جسمي يتحرك بعشوائيه
صرخت ولفت على روحي حاوطوني الرجال يجرون بملابسي واني اصرخ واضحك حسيت الدنيا دارت بيه ماحسيت بعد على نفسي
" قس"
جنت فرحانه واني اشوف اختي الصغيره عروسه شكلها ب البدله خلاني ابتسم لا ارادي حاولت اكتم على دموعي واتعارك ويا نضال ماريد دموعي تغدرني بهل مواقف ماتحمل اشوف اختي تبتعد عن وقدس اقرب اخت لقلبي
ما دامت هاي الفرحه وقت وكفت قدس بنص الصاله تركص بطريقه غريبه وتصرخ
الكل جان مرعوب وخايف من منضرها وشلون بدت تضرب بنفسها وتشمر روحها للارض
انتهت هاي الحركات ب طيحتها والاغماء عليها
ركضت عليها اني والبنات نكعد بيها جان وجهه شاحب تتنفس ببطىء
نقلناها للغرفه اني والبنات نحاول نكعدها بدون فايده
رفض عمي والولد ينقلون قدس للمستشفى وجانت حجتهم
_محمد:: عادي بابا ماكو داعي للمستشفى مجرد تعب
الكل طلع من البيت خايفين من الصار دخلنا اني والبنات للغرفه نزعنا بدلتة قدس
طلعت من الغرفه مقهوره على الي صار بقدس وشلون فرحتها نكلبت بلحظه
بليل صعدت للغرفه اجيب تلفوني حتى ارجع انام ويا قدس ب الغرفه فتحت باب الغرفه اخذت تلفوني توني جيت اطلع من الغرفه وجذب انتباهي صوت همسات
عكدت حاجبي مستغربه التفتت على جهة الكنتور
بقيت واكفه بمكاني مستغربه من الصوت
فتحت عيوني مصدومه من سمعت صرخه قدس جايه من جوا التفتت اريد اطلع فتحت باب الغرفه وانصدمت مسحوبه روحي واني اشوف مره لابسه عبايه واكفه كدام الغرفه منطه ظهرها الي
رجعت بخطواتي واني اشوفها ترجع بخطواتها اتجاهي لحظات فقط واني اشوفها شلون كعدت ب الارض وركضت ب اتجاهي على ركبها
سديت الباب بقوه وخليت ضهري على الباب اصرخ بقوه والتدفر على الباب رجف جسمي بخوف ابجي
_قس:: يمهههههه لحكينيييي
هدء صوت الدفتر واختفى عن الباب سمعت صوت نضال تحجي بحنيه
_نضال:: بلقيسه حبيبتي فتحي الباب لاتخافين اني نضا
_قس::دمشي لج برب"وك ضلت بس الجنيات عليه
ثواني بس واندفع الباب واني اندفع مبتعده عن الباب طايحه على وجهي التفتت اباوع للباب محد موجود لزمت تلفوني وطلعت من الغرفه اطفر تطفر اريد بس اطلع من الغرفه
ركضت للدرج رجلي يركضن صفح حتى نسيت ايه الكرسي اريد بس ادعي ناسيه الايه بكبرها
فتحت باب الغرفه شفت البنات وقدس كاعدات يسولفن طفرت كدامهن وشمرت روحي على الجربايه
_قبس:: سم شجاج
_قس:: جاوييي يابعد جاوييي
باوعتلي قدس ب استغراب عيونها تعبانه ووجهه شاحب
_قدس:: جاوي شنو!
_قس:: جاو يعني عيني جاوي يعني عيوني سوالف ناس فاهمه معليجن
شمرت روحي على الجربايه مغطيه روحي
عود صدك محد سمع صوتي واني اصرخ صالي ساعه خليت الغطه على راسي وغمضت الخوف مسيطر علي
ماكدرت انام اتذكر الصوت وركضه المره وراي
حسيت بطني خبطت من الخوف بس اتذكرت ياعلي دخيلك
ثاني يوم بدينه نتجهز غضنفر راح يجي ياخذنا لكربلاء بعد تواسيل وبجي ولطم وشوي حجايات حلوه وافق عمي نروح اني وخواتي ونضال ويا قدس لكربلاء لان محد من اقاربنا يروح وهاي عاداتنا ب العراق
البنيه اذا تزوجت اهلها مايرحون وياها
" شاهيناز"
صدمتي بكلام ملاك وحبها لفقار وصدمتي بكلام عمتي وصدمتي بكلام جادح حسيت كلها التمت علي
رجعنا لنجف بس حتى نجهز لعرس غضنفر وقدس
بهذا الاسبوع ابد مالتقيت ويا فقار جنت مبتعده عنه كل ماحاول اتصرف طبيعي يجي كلام ملاك وجادح وعمتي براسي
وارجع انقهر معقوله هيج يشوفون؟ مستحيل اتقبل فقار اني اعتبره اخ؟ اي فقار مثل اخوي مستخيل اعتبره اكثر من هيج!
رجعنا نجهز لرجعتنا لكربلاء دخت بكد مامسوين كربلاء روحه رده كل ماضجنه صحنا يلا لكربلاء
جنت كاعدده ب المصلا انفتح باب المصلا التفتت على عاتكه
_عاتكه:: ها خلصتي
_شاهيناز:: اي يلا
طلعنه اني وعاتكه من المصلا شفنا الكل متجمع يردون يطلعون ل كربلاء شفت سيارة فقار فارغه صاحتني عاتكه حتى نصعد هزيت راسي ب لا ومشيت ب اتجاه سياره ايليا
طلعنه لكربلاء لبيت السيد معز
وصلنه لبيت السيد ونزلنه ثاني جانت الحنه والكل جان متونس بيها
اليوم البعده اجت قدس بليل واحنا ملتمات وياها ب الغرفه نحاول نمتص الخوف منها وفعلا كدرنا ب السوالف والضحك نحاول نهديها
ثاني يوم بدينه نجهز للعرس طلعت قدس من الصبح للصالون ورنا ام جادح وغضنفر وياها ونضال واختها قبس
واحنا تجهزنا ب البيت
على طول الحفله جنت منتبهه ومركزه ويا سهام ومنه الي جانن يتصرفن بطريقه غريبه
اكثر من مره انتبهت لمنه تفتح غرفه غضنفر وقدس وتطلع منها
ماخليت بالي وياها ابد لان ماجنت متوقعه الي جانن مخططات اله!!
رجعت قدس من الصالون والكل تلكاها ب الهوسات
جانت جميله ونازكه بشكل الفستان الابيض عليها جانت اميره والعلويات يصحنن بيها وهيه مبتسمه بخجل
تهمس بينه
_قدس:: غضنفر باسني
_قس:: سرسري
_قدس:: نجبي
غطت قدس وجهه خجلانه تضحك
صعدنها العلويات للغرفه واحنا توزعنا ب البيت نركص
متونسات بقدس وغضنفر
انتبهت على منة طلعت من المطبخ ترجف باوعتلها ب استغراب حالتها ووضعها ابد مو خالي اعرف وراها شي بس ماعرف شنو
اجت قس ب اتجاهي مستغربه
_قس:: قدس وين شاهيناز؟
_شاهيناز:: شنو وين مو فوك؟
_قس:: لااااا مو فوكك
ركضت قس خايفه تصيح ب اسم قدس الكل انخبص محد يدري قدس وين راحت
طلعت عمتي من المصلا وصاحت بينه
_جهاد:؛ ولجن البنيه وين راحت
_عاتكه:: عمه توها ب الغرفه مادري وين راحت!
انخبصنا كلنا بقدس محد يدري وين اختفت وشنو صار
دخل غضنفر للبيت مخبوص الكل يهدي بيه وهوا يصيح
_غضنفر:: ويننن راحتتت قدس وين!!!!
_رنا؛؛ ولك يمه كول يالله وين راحت ب البيت
رجعنا كلنا ندور على قدس بس ماكو الها اثر فص ملح وذاب!!
باوعت لسهام يتهامسن بينهن منة الله جانت خايفه عكس سهام جانت ماممهتمه
دخلت عمتي للصاله شافتهن متجمعات ويتهامسن
باوعتلهن وصاحت بيهن
_جهاد:: والله لو قدس صار بيها شي وداعت لوعتنا هسه عليها ازورك جسمجن تزوك
حجتها عمتي وابتعدت اباوعلهن انخبصن سهام وجهه كام يكلب ومنة تعض بشفايفها
مشيت منهن مستغربه وضعهن وكلام عمتي ليش وجهت التحذير الهن!!
شفت قس كاعده تمسح بدموعها
رحت ب اتجاها اريد اهديها
وكفت بمكاني من سمعت صوت صريخ قدس جاي من الحمام الكل ركض
وعمتي وغضنفر اول الي ركضو للباب حاولو يفتحو الباب مقفول!!
بده الصياح وغضنفر يدفع ب الباب ويصيح ب اسم قدس
جابت رشا المفاتح تركض اخذه غضنفر ايدي يرجف مايكدر يسطير على رجفته
فتح غضنفر باب الحمام دخل يركض واحنا ورا
انصدمنه واحنا نشوف قدس غاركه بدمها ببدلتها البيضه
جانت كاعده بزاويه الحمام راسها بين رجليها ركض غضنفر عليها
رفعت قدس راسها وجها مكلوب دموعها ماليه وجهه باوعت لغضنفر وبجت
_قدس:: ليش عفتني غضنفر
حضن غضنفر قدس يبوسها بيها منهاره جسمه يرجف شالها ببدتلها ومشه بيها طالع من الحمام
شال غضنفر قدس وصعد بيها للغرفه وعمتي وراهم واحنا نبجي على حالتها والي صار بيها وشلون بدتلها البيضه صارت قطعه من الدم
كعدت على القنفه مقهوره من الي صار وشلون هيج الاجواء نكلبت من فرح للحزن
اقل الخمس دقائق نزلت عمتي الدرج تركض بسرعه
انتبهت جان بيد عمتي حزام رجالي
نزلت عمتي اخر ثلاث بايات ببطأ تطبك وتساوي جلد الحزام سوا نزلت عمتي اخر بايه ورفعت عيونها تباوع لمنه الله وسهام الي جانن واكفات يرجفن من الخوف
مشت عمتي بهدوء ب اتجاه منه الله محد جان متوقع الي عمتي جانت تريد تسوي
لحظات فقط والكل انصدم من عمتي رفعت الحزام وضربت منة الله على وجهه بقوه
الكل فزع يفاكك بين عمتي ومنة الله الي نهارت ب الصريخ والوجع من ضربات عمتي الها
التفتت على سهام شفتها واكفه ترجف بمكانها خايفه وهنا عرفت الي جانن راسمات اله منة الله وسهام!!!!
شكرا لزيارتكم عالم روايات سكيرهوم
