رواية سراج السادة الفصل العشرون بقلم غسق ادريس
"معراج"
_عبد الرؤف:: دموعنا هيه وسليه لتعبير عن الحزن الي بداخلنه لان التراكم بدون التعبير هذا بحد ذاته اذيه تخيل تضل تراكم بين مشاكلك واحزانك بداخلك وانت ماتكدر تعبر عنهن ليش؟ لان انت تشوف الدموع مخلوقه للنساء فقط!
_عبد الرؤف:: انا عن نفسي اشوف الدموع افضل حل للراحه الاستعانه ب البجي مرات هوا نجاة بحد ذاته
من الواقع الي نمر بي
خله السيد ايده على كتف دلهب يطبطب علي
ابتسم السيد وضحك يباوع لدلهب
_عبد الرؤف:: هسه شكلت
_دلهب:: شكلت؟
_عبد الرؤف:: بعدك على كلامك الزلمه مايبجي؟
ضحك دلهب وهز راسه بنفي
_دلهب:: لا سيد حتى الزلم يبجون
نزل السيد ايده ضحك ومشه ب ابتسامه مسح دلهب على لحته والتفت يباوعلنه
_دلهب:: جدكم ورده
ابتسمنا لكلام دلهب
التفتت عيوني على السيد شفته مشه ب اتجاه الساده الاكبار
_دلهب:: ها زمايل وينكم من مساع
التفتت للخلف شفت جزام وجادح جايين يمشون ب اتجاهنا
جزام لابس بنطرون وبدي اسود وجادح دشداشه رصاصيه جايه ويا لون عيون البحري
باوعلنه جزام وغمز يأشر على نفسه
_جزام:: شلوني
_ايليا:: جنك عريس شحلاتك
_جزام:: تحسوني مكسر على غضنفر
_غضنفر:: عمي محد يكسر عليه
التفتنا عل غضنفر وضحكنا
_غضنفر:: يريد يكسر على العريس
_جزام:: شطالع خالي
ضحك غضنفر متونس وفرحان بهذا اليوم
شفت جادح صافن ب الارض فاصل عن الكل بس صوت حسراته تنسمع خله دلهب ايده على كتف جادح رفع جادح راسه يباوع لدلهب هز دلهب راسه وحجه
_دلهب:: بعدين تصير سوالف
هز جادح راسه ب اي وسكتت
الكل جان مستغرب وضع جادح باوع جادح لغضنفر ومشه ب اتجاهه مد رجله وضحك يباوع لغضنفر
_جادح:: دوس على رجلي
_غضنفر:: ليش؟
_جادح:: يكولون دوسه العريس تسحبك وتزوج ورا دوس على رجلي بلكت اخذها
كلنا باوعلنه لجادح مصدومين ضحك فقار وحجه بصدمه
_فقار:: هاي شنو
ضحك جادح ساكت داس غضنفر على رجل جادح مد دلهب رجله
_دلهب:: دوس وياك
_جزام:: هاي كلكم غرتو
_غضنفر:: كلكم لو كركم تعالو ادوس عليكم
داس غضنفر على احذيتنا واحد واحد وصل لرجلي مدينا رجلنه انا وغل سوا داس علينه بنفس الدوسه
" شاهيناز "
الكل جان مصدوم ب عمتي وشلون نهالت ب الضرب على منة الله وسهام
حاولن العلويات يفاككن عمتي من منة وسهام الي جانن طاحيات ب الارض رافعات ايديهن يحمن نفسهن من ضرب الحزام العشوائي
ركضت اسراء على عمتي تريد تبعدها عنهن لزمت عمتي من خصرها تبعدها
دارت عليها عمتي ودفعتها من صدرها
رجعت اسراء مره ثانيه تبعد عمتي
بس هل مره عمتي دارت على اسراء ب الحزام
بعدت اسراء عن عمتي متوجعه من ضربه الحزام وعمتي تصيح بحركه كلبها
_جهاد:: تلعبننن ب اذيالجن ولجنننننن
رجعت اسراء تسحب عمتي وتصيح
_اسراء:: جهاد احلفج ب اعزاز كلبج تعوفيهن
_جهاد:: راح ادورلج انتِ واعزاز كلبيب الحزام. عوفينيييي
دفعت عمتي اسراء ورجعت رفعت الحزام عليهن وكفت العلويه لباب كدام عمتي رافعه ايديها بوجه عمتي بظهرها منة وسهام
_لباب:: بداعة عون عليج عوفيهن
_زهراء:: ولجججج جهاد موتيهننننننن
_جهاد:: وخرننننن خل اصلخ جلدهن
_شيماء:: اللهههه اكبرررر ولج جهاد كفيييي
الكل وكف بوجه عمتي مانعيها من ضربهن وعمتي ما مهتمه لكلام احد تريد بس تلزمهن اباوع لمنة وسهام ب الارض متوجعات
منة جانت طايحه ب الارض روحها رايحه ايدها على خشمه الي يصب دم من ضربه عمتي تشهك بوجع عكس سهام الي جانت متوجعه وتصرخ من الوجع بس ماتبجي
سمعنه صوت طرقات الباب والسيد يصيح يريد يدخل الكل ركضت تغطي روحها وتلبس العبي واسراء والعلويه زهراء كاضات عمتي لاترجع على البنات
ركضت العلويه لباب على الباب تسمح للسيد ب الدخول
دخل السيد للصاله مصدوم عيونه على عمتي وعلى منة وسهام
دخلو الشباب كلهم ورا السيد مدنكين روسهم
رفعو عيونهم على عمتي والحزام البيدها
التفت السيد على عمتي علامات الاستغراب والصدمه كلهن بوجه
_عبد الرؤف:: جهاد!!!!
باوعت عمتي للسيد تتنفس بصعوبه صاح السيد يباوع لعمتي
_عبد الرؤف:: ماتحجيننن شنو هذا ليش هيج؟
رفعت عمتي ايدها تأشر على صدرها فحطانه
_جهاد:: بس اجر نفس تعبني من الكتل
التفت الكل يباوع لعمتي الي بعدت عن اسراء والعلويه زهراء تريد ترتاح بس شافوها ابتعدت عنهن الكل ركض عليها خايفين لاترجع مره ثانيه تكتل منه وسهام
باوع السيد لمنة وسهام
_عبد. الرؤف:: كومن بنياتي كومن هاي شصاير بيجن
الكل فزع لمنة وسهام باوع منة للسيد تشهك تريد تحجي ماتكدر تتنفس
مشه السيد لمنة الله مقهور عيونه كلها حزن على حالتها ظماها لحضنه يمسح على راسها
_عبد الرؤف:: بنيتي اهدي وتنفسي ببطئء
ركضت العلويه لباب لمنة تبجي وتمسح على راسها
جابن البنات ماي الهن
انتبهت على قس والبنات واكفات على صفحه عيونها على الدرج يردن يصعدن لختهن خايفات عليها بس غضنفر فوك
التفت السيد على عمتي الي كعدت على الدرج عيونها تتنقل بين سهام وبين منة حجه السيد بتأسف مقهور من حركة عمتي وضربها للبنات
_عبد الرؤف:: ليش هيج بابا جهاد
التفتت عمتي للسيد
_جهاد:: خليهن يكللك شسون
_عبد الرؤف:: وحتى لو بدر منهن فعل ماتوصل هيج تسوين بيهن
وكفت عمتي بفزع
حتى قبل لاتتحرك وكفت اسراء بوجهه لازمتها من ايدها وفقار وايليا بوجهه
_جهاد:؛ لااااا اصلا لحد هسه اني ماسوويت شي بعد ورانا شوط ثاني
صرخت سهام وهيه بعدها على كعدتها ب الارض العلويات محاوطاتها
_سهام:: والله يا جهادد وداعت بني اذا فكرتي مره ثانيه تمدين ايديج عليه...
قبل لاتكمل سهام كلامها
طفرت عمتي من بين الكل بيدها لحزام رافعته مقنصه على سهام
فزع الكل واكف بوجه عمتي مانعيها تتقدم لسهام
الي سكتت بس شافت عمتي ركضت عليها
صاحت عمتي تباوع للسهام
_جهاد:: شتسوينننن كليلليييي شتسوين بداعة ابنج عليج كليليييي
_فقار:: عمه كولي ياالله
_جهاد:: وخرررر راسك خل اشمر الحزام
رفع جادح ايده كدام حزام عمتي يصيح
_جادح:: جهاد بلا تقنيصات بلااا تقنيصات
_غضيمر:؛ نزلو روسكممم شباب
الكل جان واكف بوجه عمتي الي جانت متحلفه ب سهام تريد تلزمها
وكف السيد بظهر العلويات والساده يباوع لعمتي
_عبد الرؤف:: نزلييي الحزام جهاد
الجو جان متوتر من عصبيه وعمتي وانفعال السيد بضرب عمتي للبنات وشلون منة جانت تشهك بوجع كوا تجر النفس
محد جان فاهم ليش عمتي جانت معصبه عليهن ومحملتهن ذنب الي صار ب قدس معقوله هنا جانن السبب فعلاً!!!
بنص هاي الاجواء الحماسيه
نزل غضنفر من الدرج نازع ستره القاط دار الكل على غضنفر الي جانن نار وشرار من العصبيه
صاك على اسنانه يباوع لسهام ومنة بحركه
نزلت عمتي الحزام تباوع لغضنفر حجت بخوف
_جهاد:: قدسسس بيها شي؟؟
هز غضنفر راسه وتحسر
_غضنفر:: جهاد قدس تحتاجج
بمجرد كمل غضنفر كلامه بعدت عمتي عن الكل وركضت صاعده الدرج بسرعه اجت العلويه لباب تصعد ورا عمتي بس غضنفر منعها ماد ايده
_غضنفر:: خلي جهاد يمها عمه انتِ والسيد رايدكم بموضوع
حجاها غضنفر ودار يباوعلي اني وقس
_غضنفر:: صعدن خويه
بعد غضنفر عن الدرج سامح النا نصعد ركضت قس بسرعه واخواتها وراها
صعدت الدرج اريد اصعد للغرفه التفتت ماخذه نضره عليهم غضنفر جان معصب وكوا متحمل نفسه
منة وسهام على كعدتهن ب الارض منه تبجي متوجعه وسهام لا
السيد لهاي الحظه مستغرب الوضع وشنو صاير ومزعوج من تصرف عمتي
العلويه لباب مقهوره تباوع لحفيدتها وجنتها وشنو سوت عمتي بيهن
الساده كلهم نسحبو من الصاله شفت جادح يدخل للمصلا وعيونه باتجاهي
بس شفت نضراته سرعت بخطواتي صاعده للغرفه
صارت غرفه غضنفر كدامي فتحت باب الغرفه
اجتني بروده السبلت بوجهي وعطر الغرفه وزعت عيوني على غرفه غضنفر وقدس جانت جميله بشكل
الغرفه تركيا لونها ابيض
مكياج قدس موجود على المرايه والغرفه مفروشه ب فرشه فرو بيضه والنشرات مزينه الغرفه
باوعت لجهه الجربايه شفت عمتي كاعده على الجربايه حاضنه قدس لصدرها
وقس والبنات كاعدات كدام اختهن صافنات عليها وشلون دموعها يصبن بهدوء
تمشيت ب اتجاهن اباوع لقدس جانت هادئه بس الدموع يجرن من عيونها
مسحت عمتي على ظهره وشدت حضنتها
_جهاد:: اطلع دموعج من عيونهن بس صبريلي
باوعت قدس لعمتي وحجت بشهكه
_قدس:: ليش اني ليش هيج يصير بيه اني جاي اتحمل اكثر من طاقتي ليش من بين الكل اني!؟؟
تحسرت عمتي ومسحت دموع قدس
_جهاد:: هاي اكو فد واحد اسمه عطيه جان عايش ويا اخوته الاربعه هذا عطيه اكله وشربه ومنومه هوا واخوانه سوا يعني شنو يعني عيشه وحده
_مرت السنوات وبدو اخوان عطيه
الاول تزوج واشتره بيت وصار عنده اربع ولد وثنين بنات
والثاني تزوج واشتره بيت وصار عنده ثنين ولد ببنيه
والثالث تزوج واشتره بيت وصار عنده خمس ولد
والرابع تزوج واشتره بيت وصار عنده ثلاث ولد بثلاث بنات
_جهاد:: عطيه جهز نفسه اشتراله بيت و جان مجهز فلوس العرس بيوم الجان نايم احترك البيت واحتركن فلوسه وياهن
هنا عطيه لاصفاله بيت ولا صفتله فلوس ولا يكدر يزوج
_جهاد:: رجع عطيه من الصفر يلم بنفسه حتى يشتري بيت ويتزوج ويستقر حاله مثل اخوانه وبيوم من الايام جان راجع من شغله انكلبت بي السياره ووحده من عينه طفت هنا عطيه شصار بي؟ البنيه الجان خاطبها صاحت ماريده هذا اعور ونص فلوسه راحن للعمليات وسيارته راحت
_جهاد:: رجع عطيه مره ثانيه يلم ويلم ويجمع
ف صفه عطيه حياته كلها يجمع ب الاخير ماكدر يبني البيت الي اباله ولاكدر يتزوج بنيه مثل مواصفاته لان كلها تصيح هذا مايشوف ولاكدر يخلف جهال لان طلع عقيم ومرته اطلكت منه
_جهاد:: ف عطيه مايوم شكه وكال يارب ليش ليش ختاريتني انا من بين اخوتي الاربعه ولا كال يارب انت غير عادل لاااا
عطيه جان انسان مؤمن وصابر على كل البلاء الي يمر بي مات عطيه وهوا مامحقق ولاوحده من الرداهن
_قس:: هذا خطيه مو عطيه
باوعت عمتي على قس بخزره ابتسمت قس ودنكت راسها
رجعت عمتي تباوع لقدس
_جهاد:: بنيتي الله سبحانه وتعالى عادل مايحمل انسان اكثر من طاقته اني اليوم عندي نفاخه انفخ بيها اعرف شكد راح تتحمل هاي النفاخه صحح اني ممكن انفخها وانطيها اكثر من طاقتها بس هاي اني جهاد مو الله سبحانه وتعالى الفرق اني ممكن اتغافل عن طاقه النفاخه العندي بس الله لا لان يفكر بعبده وكميه البتلاء الي يتحمله كميه الحزن الي يستوعبها
وربج رحيم يعني انتِ متوقعه ممكن يختارج لهذا البلاء عبث؟ او بدون نتيجه؟
_جهاد:: ماكو اختبار بدون جائزة وانتِ جائزج راح تكون جبيره وجبر عظيمممم هذا كلبج
حجتها عمتي واشرت على صدر قدس بجهه القلب
_جهاد:: هذا كلبج باجر راح يخجل من كميه الجبر الي راح يقدمها الله اله لان جبر ربج مو بسيط لا ابد جبره جميل ف انا اريدج تصيرين صبوره تصيرين قويه انتِ هسه داخله حرب اعتبري نفسج بحرب وجاي تحاربين نفسج حتى ماتخسرين ماريدج تستسلمين بنص الطريق. مفهموم
هزت قدس راسها اي ابتسمت عمتي واشرتلنا نطلع من الغرفه
_جهاد:: يلا برا طلعن نريد نام
_شاهيناز:: هااا عمه ها تردين تنامين بصف قدس واني البارحه من كتلج تكليلي اذا تجين يمي انام عليج واخنكج
اشرت عمتي على الباب وصاحت بينه
_جهاد:: طلعنننن يلا يلا خل اريح ظهري تعب اليوم
نسحبنا اني والبنات وطلعنه من الغرفه عرفنا عمتي ماتريد تنام لا تريد تسمع من قدس الي صار!! وشنو موضوع منة الله وسهام
" عاتكه "
قبل رجعتنا لكربلاء
فتحت باب الصاله وطلعت البس نقابي ماشيه ب اتجاه باب البيت متوجهه لبيت عمي هادي
وكفت افتح ب الباب
توني فتحت الباب حتى اطلع من البيت ماحس غير صارت بوجهي ايد ضخمه جابتني راشدي بنص وجهي
كمزت مفزوعه من الضربه الي اجت بوجهي ومتوجعه من قوه الضربه خليت ايدي على خشمي مغمضه عيوني بوجع
اجاني صوت مؤلف الي وحسيت نفسي سامعته قبل
_:: الله الله
بعدت ايدي عن وجهي مصغره عيوني متوجعه من قوه الضربه الي اجت بوجهي
باوعت لدلهب جان واكف كدامي يفصل بينه باب البيت هوا خارج واني داخل البيت
جان خال ايده على راسه فوك الشفقه باوعلي وحجه بخجل متأسف
_دلهب:: عذريني والله ماشفتج جاي ادك الباب وطلعتي صارت بوجهج
نزلت راسي وهزيت راسي بنفي
_عاتكه:: عادي ماصار شي
_دلهب:: لا يا ماصار شي خويه والله عذريني ما انتبهت وانا من ادك الباب اتسودن جني اول مره اشوف باب
ابتسمت مدنكه لكلامه ماعرف سبب ابتسامتي بس كلامه خلاني ابتسم لااردي رفعت راسي باوعتله وهزيت راسي
_عاتكه:: عادي خويه ماصار شي انت مامتقصد
_دلهب:: لااا والله مامتقصدد
_عاتكه:: اي هوا جاي اكلك هاي هيه دام انت مامتقصد
دنكت راسي ارفع النقاب لوجهي وهوا على وكفته
رفعت راسي شفته صافن يباوعلي من باوعتله دنك راسه مشيت على مسافه اريد اطلع
_عاتكه:: بس مره خصتك
_دلهب:: اي اي تفضلي اعتذر
ابتعد من الباب راجع على مسافه بعيده عني طلعت من البيت ومشيت متوجهه لبيت عمي
وكفت بنص الطريق والتفتت على دلهب شفته يباوعلي من التفتت كسر نضراته حجيت ب استغراب ممزوج ب الخجل
_عاتكه:: خويه تريد اصيحلك واحد من السادة
هز راسه بلا بدون مايباوعلي
_دلهب:: ممنون منج خويه هسه اتصل عليهم كملي طريقج
هزيت راسي ب اي والتفتت مكمله طريقي لبيت عمي هادي ماجان يفصلنه عن البيت غير السياج
وكفت ب الباب دفعته ودخلت كبل
وكفت بنص البيت خليت ايدي على صدري وضحكت لاارادي طلعت ضحكت ماعرفت السبب وشنو الي دفعني اضحك
كملت طريقي داخله للبيت دفعت باب الصاله ودخلت شفت عمتي ام شاهيناز واكفه ب المطبخ سلمت عليها وصعدت لغرفه شاهيناز
دكيت باب الغرفه اجاني صوت شاهيناز يسمحلي ادخل دخلت للغرفه شفتها واكفه كدام كنتور الملابس محتاره
صحت بيها اباوع لهوسه الملابس
_عاتكه:: بعدج!!!!
دارت تباوعلي ب انزعاج
_شاهيناز:: سكتي عاتكه والله دايخه مابيه اروح
شمرت نفسها على الجربايه صافنه على السقف نزعت النقاب ومشيت لملابسها اطلع ربطتها والعبايه
_شاهيناز:: عوفيهن عاتكه مابيه اروح روحو انتم اني باجر اخذي امي وسجاد للسوك نشتري عود
_عاتكه:: عمتي كالت كلجن ترحن وياي والبنات كلهن راح يرحن يلا بدون عجز كومي لبسي جادح راح يجي
كمزت من مكانها تباوعلي ب استغراب
_شاهيناز:: شنو جادح مو فقار؟.
_عاتكه:: لاوين فقار اخذه السيد بس جادح اجه الصبح وعمتي انطته علم يجي ياخذنا للسوك
ضلت ساكته لثواني وكامت من مكانها اخذت الربطه والعبايه مني تلبس ما اعرف السبب الي خلاها تصحه بسرعه بس المهم راح تروح ويانا لان الطلعه بدون شاهيناز مركه بدون ملح
خلصت شاهيناز لبسها اخذت نقابها تلبس واني لبست نقابي من كملنه لبس النقابات طلعنه من الغرفه نازلات الدرج
_عاتكه:: شاهيناز شبيج
_شاهيناز:: شبيه؟
_عاتكه:: منتبه عليج صايره ماتجينه للبيت وحتى فقار
_شاهيناز:: شبي فقارررررر
وكفت بنص الدرج مستغربه اسلوبها وشلون ضاجت من حجيت على فقار دارت تباوعلي بنضرات تعب جرت حسره واشرتلي ننزل
_شاهيناز:: عاتكه والله تعبانه هل فتره عذريني
هزيت راسي ب اي ونزلت الدرج لازمه ب ايدها
_عاتكه:: وشبيج تعبانه ليش ماتحجين لو ناسيه عندج بت عم اسمها عاتكه دوم كلبها مفتوح الج
ضحكت وعصرت على ايدي طلعنه من البيت بعد ما شاهيناز ودعت امها وانطتها علم
فتحنا باب البيت وطلعنه توقعت اشوف دلهب واكف بس لا ماشفته جان ماموجود
مشينه ب اتجاه البيت
دخلنه للبيت شفنا عمتي واكفه بنص الصاله تلبس نقابها دارت علينه
_جهاد:: ها تأخرتن
عافت شاهيناز ايدي وكعدت على القنفه
_شاهيناز:: اني تأخرت ماردت اروح
_جهاد:: ليش ست
_شاهيناز:: بدون سبب
هزت عمتي رأسها وسكتت
كعدت على القنفه منتضره البنات مر الوقت
نزلت مهجان الدرج وحميده وحوراء دخلت للبيت
بقت عمتي كاعده على القنفه بيدها التلفون تراسل واحنا متجمعات نسولف
سمعنه صوت طرقات على الباب وصوت جادح طفت عمتي التلفون بيدها ووكفت.
_جهاد:: تفضل ابو عماد
عدلنه اني والبنات كعدتنا من دخل جادح مدنك راسه سلم واحنا ردينه السلام باوع لعمتي وحجه
_جادح:: ها مكملين
_جهاد:: اي يلا بنات
كمنا اني والبنات طلع جادح قبلنه وعمتي خلفه واحنا نمشي وراهم
فتح جادح باب البيت جاي يطلع صار بوجهنا فقار بيده التلفون تسالمو جادح وفقار باوعلنه فقار وحجه
_فقار:: ها اجيت اخذكم
_جادح:: راح اخذهن انا
_فقار:: لا ابو عماد انا اخذهن
باوعت عمتي لفقار واشرتله يدخل للبيت
_جهاد:: ادخل للبيت جادح ياخذنا
_فقار:: مو رجعت انا
_جهاد:: على الجايات يلا صعدن ب السياره
تمشينه متوجهين للسياره جادح صعدنا اني والبنات وعمتي وجادح وفقار بقو واكفين قريب السياره باوعت عمتي للسياره ودارت على جادح
_جهاد:: نطيني اسوق
_جادح:: جهاد عدنا عرس الاسبوع الجاي لاتحرمينه من الفرحات من هسه
_جهاد:: شسالفه جادح ترا سياره فقار موجوده
_فقار:: لا وين عمه التاير نازل
باوعت عمتي لفقار وجادح وفتحت ايديها
_جهاد:: جادح مفتاحك
مسح جادح على وجهه وشمر لعمتي مفتاح السياره
فتحت عمتي باب السياره وصعدت بمكان السايق صعد جادح ب الكرسي الثاني واحنا ورا
رفع فقار ايده يضحك
_فقار:: الله وياكم توصلون ب السلامه
_جادح:: ياسلامه ماتجي من ورا عمتك
شغلت عمتي السيارة ومشت
_جادح:: على كيفج جهاد
_جهاد:: شبيككك جادح شبيك خليني اسوق براحتي
سكتت جادح لازم ب الباب واني والبنات كلوبتنا بيدنا صح عمتي تسوق بس مرت فتره طويله هيا ماساقت من اجت من ايران
شاف جادح سياره طلعت كدام عمتي
_جادح:: كدامج سياره جهاد رمشيلها
_جهاد:: ماعندي رقمها
_جادح:: شنوو؟؟
توا جادح حجه ومانشوف غير عمتي داست الها ب السرعه لزم جادح باب السياره وصاح
_جادح:: جهادددددددددد
_جهاد:: اسكت لا انزلك من السياره
ما اهتمت عمتي لكلام جادح وكملت سواقه بسرعه دارت على جادح
_جهاد:: شغل باسم الكربلائي خل نسمع
نزلنه من السياره كلوبتنا طايحه من سياقه عمتي وجادح يمسح على سيارته
_جادح:: سلمتج بيد جهاد تنذكر ماتنعاد صدكيني
سكتت عمتي ماتريد تحجي والناس رايحه راده
مشينه داخلين لسوك وجادح ورنا يمشي على مسافه
" قدس "
اهم لحظه عند كل بنت هيه يوم زواجها ب اليوم الي تلبس بي بدله بيضه
هذا يوم تنولد بي مره ثانيه بحياة ثانيه ويا شخص ثاني بس يومي جان مختلف وعكس الي جنت متوقعت
رفعت راسي من سمعت كفايه اخت غضنفر وكفت كدام المرايه مبتسمه لطلتي
_كفايه:: قدوسه
التفتت على كفايه مبتسمه باوعتلي وضحكت
_كفايه:: هاي شطالعه تموتين
خليت ايدي على وجهي اضحك بخجل باوعتلها والابتسامه شاكه وجهي
_كفايه:: تعاي خل اصورج
هزيت راسي ب اي كعدت على الكرسي وهيه تصور بيه واني مبتسمه بفرح وكفايه كل شوي شامره علي كلمه
_كفايه:: خلي العرايس يعزلن قدوسه غطت عليهن
_قدس:: سكتي كفايه اخجل
_كفايه:: ولج والله طالعه تخبلين
شفت عمتي رنا ام غضنفر جايه ب اتجاهنا مجهزه نفسها وكمله المكياج باوعتلي وهلهلت كمت من مكاني خجلانه منها حضنتي تباركلي وتبوس بيه
_رنا:: يمه فدوه للبنيات
حضنتها وبستها اتشكرها ووكفت بصفي وصاحت ب كفايه
_رنا:: صورينا اني وقدوسه
_كفايه:: يلا اوكفن
وكفت كفايه تصورنا اني وعمتي واحنا مبتسمات خلصنه الصور دارت عليه وباستني
ونضال واكفه ورا كفايه تباوعلي مبتسمه
من خلصت تصوير مشيت لنضال فتحتلي ايدها واني حضنتها عيوني مدمعه
_نضال:: الف مبروك بنيتي الصغيره الصارت مره واليوم لبست بدتلها البيضه يشهد الله اعتبرجن مثل بناتي ومعزتجن بمعزه ابتهال شكد ماتصير بينه مشاكل بس تبقن عزيزات عندي وامانة ابوجن
دمعت عيوني من تذكرت ابوي بعدت عن نضال اريد ابجي استغفرت نضال وجرتني لحظنها
_نضال:: عوفي الدموع بعدين ابجي
_قدس:: تذكرت ابوي
_نضال:: خايبه نجبي كل يوم متذكرتلها واحد
سكتت مسيطره على دموعي رجعت وكف كدام المرايه بس هل مره بحزن صح امي عافتنا من صغرنا بس هذا مايعني اني ما احتاجها لا احتاجها توكف يمي اريد اشوف رد فعلها من تشوفني ب الفستان الابيض
وابوي! اتخيل لو ابوي موجود يسلمني بيده لغضنفر صح عمي ونضال ماقصرو بس تبقى فرحتي ناقصه ب بهل ثنين
_كفايه:: اجه غضنفر
التفتت من سمعت كفايه
حسيت بتوتر وبطني مغصتني هفيت على وجهي مسيطره على توتري
اجت كفايه ب اتجاهي وجرتني من ايدي
_كفايه:: تعاي وياي
_قدس:: شنو وين
_كفايه:: تعايييي
مشتني ب اتجاه باب الصالون جانت اكو مساحه فاصله بين غرف الصالون الي موجودات بيهن العرايس
وكفت قريب الباب مستغربه
طلعت كفايه ووكفت ب الباب مدت راسها وضحكت
_كفايه:: تعال ادخل
استغربت مصدومه منو هذا يدخل بعدت كفايه عن الباب سامحه لغضنفر يدخل
ابتسمت من شفت غضنفر يدخل
صارت عينه عليه ابتسم بفرح واني دنكت راسي اضحك تمشه ب اتجاهي واني واكفه بمكاني شابكه ايدي متوتره
رفعت راسي ب اتجاه غضنفر وابتسمت دار على كفايه واشرلها تدخل
_كفايه:: لاا خلوني اشوف
_غضنفر:: امشي دخلي لججج
_كفايه:: اهووو عود جاي اصور
دخلت كفايه واحنا بقينه واكفين بمكانه
باوعتله وحجيت بخجل
_قدس:: شتريد جاي
_غضنفر:: شكد اطردين بيه
باوعتله وهزيت راسي ب لا
_قدس:: يمتى طاردتك شبيك غضنفررررر؟؟
ابتسم بفرح ولزم وجهي
_غضنفر:: خجوليييييييي
_قدس:: غضنفرررر لا فدوه
_غضنفر:: شكد احبج من تخجلين ووجهج يصير احمر
ضحكت ودنكت مستحيه ماعرف شسوي قرب غضنفر يخجلني ويوترني يجبرني اتوتر ماعرف السبب
خله غضنفر ايده جوا حكني ورفع راسي
_غضنفر:: قال الله تعالى (ومِن آياتِه أَن خلَق لَكم من انفسكُمْ أَزواجًا لتسْكُنوا إِليْها وجعل بينكُم موَدَّة)
صدق الله العظيم وانا على ماقال الله وكيل
انا السيد غضنفر معز الدين اجعل الله شهيدً لي على ماسقوله الان
جان رافع وجهي ب ايده وعيوني بعيونه كمل كلامه ب ابتسامه
_غضنفر:: اشهد ب ان اجعلك اقرب النساء لقلبي وان لايمسك الاذى وانتِ بقربي
قدس عزيزتي بهذا اليوم انا اوكل الامام المهدي عجل الله فرجه امام زماننا واجعله شهيد على حبي لكِ
خلص كلامه وباسني براسي دمعت عيوني من كلامه
قوست حلكي متأثره بكلامه
_قدس:: غضنفررر احبككك
ضحك وضمني لصدره
_غضنفر:: خجولي اموت عليج
حضنته من صدره حلكي يرجف اريد ابجي بس اخاف يخرب المكياج بعدت عنه وصحت
_قدس:: راح يخرب مكياجي
_غضنفر:: عمي شطالعه اميره يابه اميره
باوعتله وضحكت بفرح
_قدس:: صدككككك
_غضنفر:: شووو شو دوري ببدتلج
رفعت بدتلي ودرت حول نفسي وغضنفر يصفك ويصيح
_غضنفر:: اميرة بويه اميرة شنو سنويات منو ربانزل يهي سندرلا عمي الجمال كله لقدس اميرة قدس مو قدس طالعه حلقومه
ضحكت متونسه بكلامه اطفر وادور حول نفسي
_غضنفر:: يابويهه خفي على كلبي قدوستي راح اموت هنا
_قدس:: مو طالععهه احلى منك
سكت رافع حاجبه
_غضنفر:: نجبي امي تكلي طالع حلو
_قدس:: غضنفررررررر
_غضنفر:: روحه لغضنفر
تقدم ب اتجاهي وشالني ب ايده من خصري وفرني واني متونسه رافعه ايدي واضحك
_غضنفر:: احلى مني جنج حوريه
نزلني ب الارض واني اضحك بفرح
_قدس:: احبك سيد
_غضنفر:: يا محلاها السيد بحكلج يا احلى دعوة تمناها السيد
دنكت راسي عيوني مدمعه من كلامه هوا لان غار مني يريدني ابجي حتى يخرب مكياجي
قبل لا ابدي ب الموال والحزن والدموع
طلعت عمتي رنا درنا اني وغضنفر نباوعلها وهيه تهوس لغضنفر
_رنا:: يهل القوط ذبو القوط وليدي لبس قاطه
_غضنفر:: شنو يمه كولي اسمي
_رنا:: يمه اسمك ثكيل ماينحجي
حضن غضنفر عمتي رنا يبوسها من راسها بعد غضنفر عن عمتي ووكف كدامها ياشرلها على القاط
_غضنفر:: شطالع
_رنا:: يايمه شحلاتك جنك النبي يوسف
درنا اني وغضنفر على عمتي رنا مصدومين
_غضنفر:: صدك جذب يمه منين شايفه النبي يوسف انتِ
_رنا:: ولك يمه قصدي حلو طالع شبيك
ضحكت على كلام عمتي رنا وغضنفر يباوعلي ويغمز
رفع ايده غضنفر ولزمني من خدي مبتسم
واني مبتسمه اباوعله ناسين عمتي رنا
بس من سمعناها تصيح بغضنفر وتهوس
_رنا:: سبع ساعات ب الصالون لاتلعب بكدتلها
ضحك غضنفر وبعد عندي باوع لعمتي وحجه
_غضنفر:: يلا تجهزو السيارة ب الشارع
هزينا روسنا اني وعمتي رنا غضنفر طلع واحنا دخلنه نلبس
من كملنه وغطوني طلعنه من الصالون وغضنفر واكف بباب الصالون بس طلعت اجه ب اتجاهي شايل البدله خاف اعثر بيها
صعدنا ب السياره عمتي رنا كدام واني وكفايه ونضال خلفهم جانن العلويات لكبار ويانا بس رجعن قبلنه
مشه غضنفر ب السيارة للبيت
رغم محد قبل نشغل اغاني لان الكل جان مانع ومحد يسمع اغاني بس هوسات عمتي رنا وتصفك كفايه جان مسوي اجواء واني فرحانه وياهن
وصلنه للبيت والهوسه ب الباب
رفعت الكبوس عن وجهي شوي اباوع للشارع كله معممين وكله ساده وشيوخ واكو ناس لا مو ساده واصدقاء غضنفر والولد كلهم ملتمين
نزلنه من السياره غضنفر وعمتي يغطون بيه
دخلنه للبيت واني اضحك فرحانه كل ما اتذكر بوسه غضنفر وكلامه الي احس براحه ماكو خوف عليه
كعدت ب الصاله البنات ملتمات ب الصاله يركصن بس مو بالاغاني لااا ب مواليد وهوسات شيعيه غيرها مادخلن الاغاني ابد
حسيت بدوخه وخنكه من الهوسه باوعت للعلويه جهاد الي جانت واكفه قريب الي
_قدس:: عمه مختنكه
_جهاد:: شبيج!
_قدس:: دخت
اجت ب اتجاهي واشرتلي اكوم
_جهاد:: حقج ماماكله شي لسه نتوسل بيج تاكلين
_قدس:: ماشتهي لعد
هزت راسها ماراضيه صعدنا للغرفه والبنات ورانا
كعدت ب الغرفه مبتسمه شكد حلوه الغرفه اشتراها غضنفر لان عجبتني رغم جان رافض الون الابيض
طلعن البنات والعلويه نزلت واني ب الغرفه وحدي كمت من مكاني افتر ب الغرفه اجاني مغص ببطني من تذكرت هاي غرفتي اني وغضنفر احس بخوف لاشنو انوب فجأة يجي يعيش وياي شكد بيوم وليله لا لحظه اني الاجيت عشت بغرفته بس هم مايصير لازم واحد يتشجع ويغير هذا القانون
سمعت صوت فتحه الباب توقعت العلويه جهاد او وحده من البنات بس خابت توقعاتي من شفت منة وسهام داخلات للغرفه باوعتلهن ب استغراب عاكده حواجبي
_قدس:: ها شتردن؟
رفعت سهام حاجبها ب انزعاج
_سهام:: طردينا شنو!
غمضت عيوني وابتسمت بخجل
_قدس:: لا لا اسفه تفضلن بس متوتره شوي
استحيت من نفسي وشلون اطرد ب الوجوه شبيج قدس اهدي مو هيج تخلين التوتر يسيطر عليج كعدت سهام على الجربايه واني كعدت كدامها بس منة بقت واكفه ب الباب
ابتسمت بوجهن متوقعه جايات يتباركلي وسهام ناسيه الي صار جنت متوقعه نست وفتحت صفحه جديده بس لا جانت توقعاتي غلط!!
باوعتلي سهام وحجت
_سهام:: مبروك
ابتسمت بوجهه وردت
_قدس:: الله يبارك بيج
باوعت سهام لمنة الي جانت واكفه ب الباب درت على منة وابتسمت
_قدس:: تعاي منة كعدي ليش واكفه
هزت راسها ب لا وحجت
_منة الله:: مرتاحه ب وكفتي
باوعتلي سهام وتحسرت
_سهام:: والله اني مقهوره عليج شكد كلبج طيب وعلى نيتج
عكدت حواجبي وابتسامتي بدتت تتلاشه
_قدس:: ليش مقهوره عليه مافهمتج؟
_سهام:: اقصد شكد معميه انتِ وماتعرفين الي جاي يصير من وراج
استغربت من كلامها مافاهمه شي باوعت لمنه ورجعت باوعت لسهام
_قدس:: شقصدج؟
باوعتلي سهام ورفعت حاجبها
_سهام:: تذكرين من تعاركت وياج؟ وجهاد فزعتلج
_قدس:: عادي اذا قصدج على الي صار ف اني ناسيه كلشي ومسامحتج
ضحكت سهام وهزت ايدها تباوعلي
_سهام:: عليمن مسامحتني متوقعه مثلا اني متندمه على الي سويته
تحسرت وباوعتلها بأسف
_قدس:: سهام اذا تردين مشاكل ف اترجاج أجلي مشاكلج لغير يوم وتفضلي طلعي بره ماريد شي يزعجني بهذا اليوم
ختمت كلامي ب ابتسامه واشرتلها على الباب
كمزت سهام من مكانها تباوعلي بخزره وكفت كدامي وصاحت
_سهام:: ها طلع السانج المسودنه
انصدمت من كلامها مسودنه شنو مسودنه؟ باوعتلها وصحت بيها
_قدس:: احترمي نفسج سهام محترمتج لكبرتج لا تخليني هسه اصيح لغضنفر اخلي هوا اليرد عليج
هزت ايدها وضحكت ب استهزاء
_سهام:: غضنفر؟ تحتمين ب الي راح يغدرج؟
عكدت حواجبي مافاهمه
_قدس:: شقصدج؟
_منة الله:: سهام امشي خل نطلع كافي
تقدمت منه لسهام تسحبها من ايدها اعترضت سهام وبعدت ايد منه
_سهام:: لاخليني احجي عليمن تستكيني
_منة الله:: كافي سهام امشي مانريد مشاكل
_قدس:: لا لا خليها تحجي وين طالعه
وكفت رافعه بدتلي عيوني على سهام
_قدس:: احجي يلا شنو يغدرني منو راح يغدرني
_سهام:: لعد سمعي اذا تردين تسمعي
_منة الله:: كافييي سهامممم سكتي
دفعت سهام منه وصاحت بيه
_سهام:: ولج انتِ ام غضنفر وغضنفر كاتلتنه كتل انتِ تدرين غضنفر اخذج يكسب بيج اجر
_قدس:: اجر؟
_سهام:: اي اجر السيد عبد الرؤف لاخلف الله علي توسل ب غضنفر تواسيل حتى ياخذج ويطلعون الجنن من راسج
اشرت على باب الغرفه وصحت ب سهام
_قدس:: طلعي برا طلعيي برا لاتخليني اني الي اتعامل وياج
هزت سهام ايدها تضحك
_سهام:: خاف قبل شديتي حيلج بجهاد هسه انتِ وجهاد وحيلج ادوسجن برجلي
ضحكت وهزيت ايدي
_قدس:: باع منو يحجي لج انتِ بس تسمعين ب طاري العلويه جهاد ترجفين رجف عبن هيه تعرف تضبج يل فالته
من حجيت هيج همجت علي تريد تكتلني ومنة مانعتها
_سهام:: متونسه بعرسج ي المسدونه زين انتِ تدرين غضنفر مايكدر يتقرب منج؟؟
_قدس:: عادي المهم غضنفر يمي انتِ شحاركج
ضحكت تباوعلي
_سهام:: ماحاركني بس شلون غضنفر راح يكضي هل جم وياج الله يساعده بس وحده الجن مربوطين بيها ماراح يسمحوله يتقرب منج واذا تقرب يروح بوله بشط
خزرتها وصحت بيها عيوني مدمعات
_قدس:: كافي حقيره ماتخافين ربج انتِ تألفين
_سهام:: ما مقهوره بس على غضنفر شلون ولد دره مال الله تاليته يطيح بوحده الجن يلعبون بيها لعب
رجعت مقهوره من كلامها عيوني مدمعات
_قدس:: كافي سهام الله يخليج طلعي
_سهام:: زين خل اكلج بعد شسمعت من السيد والعلويه لباب مممممم اوكفي اتذكر
خلت ايدها جوا حنجها تذكر باوعتلي وصاحت
_سهام:: ايييي تذكرت عمتي كالت احتمال غضنفر يموت لو تقرب الج لان عندج جن يعشقج لالا مو يعشقج يموتتتت عليج ويغار عليج حتى من غضنفر ولو غضنفر تقربلج خطيه هل غضنفر يموت
خليت ايدي على وجهي وبجيت اصرخ من كلامها
_قدس:: طلعيييييييي ماريدج تحجين انتِ جذابهههههه طلعيييييييي
طحت ب الارض اصرخ وابجي من كلامها
_منة الله:: كافييي سهام
جرت منه سهام من ايدها ماشيه بيها للباب وسهام تضحك وتباوعلي فتحن باب الغرفه يطلعن واني طايحه بنص الغرفه مدنكه ابجي وايدي ترجف
_سهام:: قدس
رفعت راسي ب اتجاه سهام الي جانت تضحك اشرتلي على بطنها وحجت بفرحح
_سهام:: حتى خلفه مايصير عندج جهال لاتحلمين يصير عندج راح تتمنين كلمه الماما
جرت منة الله سهام من ايدها طالعه بيها من الغرفه
كعدت ب الغرفه وحدي ابجي خليت ايدي على بطني وصرخت منهاره
لطمت على وجهي بحركه كل ما اتذكر كلامها معقوله صدك؟ معقوله اني اجر بس؟ معقوله ماراح اصير ام؟
كمت من مكاني ادور حول نفسي احاول اجذب سهام بس لا لا ماكدر كلامها سجاجين بكلبي
حسيت نفسي مخنوكه ماكدر اجر النفس
رفعت بدلتي وطلعت من الغرفه ابجي نزلت الدرج شفت الصاله شبه فارغه بس العلويه زهراء منطه ضهرها للباب
ركضت ب اتجاه الحمام رافعه بدلتي الكل جان ب المصلا والباقين ب المطبخ
فتحت باب الحمام وقفلته وراي
خليت ايدي على ركبتي ابجي بقهر
مشيت كدام المرايه اباوع لنفسي مكياجي كله ساح حالتي تغيرت بعد كلام سهام
رجعت اباوع لنفسي ب المرايه متجمده بخوف واني اشوف شخص واكف وراي طويل ولحيته لبطنه عيونه سود محاوطهن سواد فضيع ووجه شاحب
والي زاد صدمتي وخوفي جسمه العاري ماجان لابس قطعه ملابس على جسمه
دنكت راسي حلكي يرجف بعدت من المرايه ماريد اشوفه ماريد رجفت ايدي وشفايفي بخوف حسيت بشخص بضهري
صعب علي النفس والخوف حاوطني ماريد ادور ماريد اشوفه
ضليت منطيته ضهري وجهي على الحايط
حسيت ببدلتي تنرفع غمضت عيوني بخوف مفزوعه من صارت ايد تمسح على ركبتي من الخلف ماشيه ب اتجاه صدري
صعبت عليه نفسي من حسيت بلمسات جرئيه على صدري فتحت عيوني ابجي اريد ادعي الله يبعده عنه ماكدر ماكدر احجي
درت بسرعه اباوع محد موجود وراي لزمت صدري اتنفس بصعوبه النفس صعبان عليه
اخذتني عيوني مره ثانيه للمرايه رجعت شفته مره ثانيه واكف بضهري يباوعلي ب ابتسامه
رفعت ايدي وصرخت اضرب المرايه ب ايدي ماريد اشوف ماريد تكسرت المرايه بيدي الكزاز ملتهم ايدي بس ما اهتميت ب الوجع بكد ما اتمنيت هذا الشخص يختفي عني
نزلت ايدي بعد ما الكاع انترست كزاز مكسر باوعت لجزء من المرايه جان عاكس على سطح الحمام
شفته نفسه متعلك ب الحايط عاوج راسه يباوعلي بضحكه
رفعت راسي بخوف اباوع متوقعه ماراح اشوفه متوقعه هذا مجرد خيال مجرد تخويف بس لااا!! انصدمت من شفته فعلا فوك راسي
شمر نفسه ب اتجاهي خليت ايدي على راسي اصرخ بفزع ورعب صرخاتي تطلع من اعمق احبالي الصوتيه
انهاريت ب الصريخ والخوف طحت ب الارض على الكزاز رجلي ينزفن دم وايدي
سحلت نفسي لزاويه الحمام ابجي بخوف اختفى عني بس ما اكدر انسى شكله وشلون شمر نفسه علي
خليت ايدي على بطني متوجعه
رجعت راسي على الحايط ابجي
سمعت صوت صيحات ب اسمي هذا غضنفر
اي غضنفر جاي يصيحني ابتسمت بحزن من تذكرت كلام سهام معقوله غضنفر ينحرم من كلمه بابا بسببي معقوله غضنفر يموت بس اذا تقرب الي!!
نفتخ باب الحمام باوعت لغضنفر بحزن
_قدس:: ليش عفتني غضنفر
ركض غضنفر الي بخوف شفت الخوف بعيونه بس ليش كلام سهام يدور براسي! ليش كلامها يتردد براسي!!
شالني غضنفر للغرفه واني متعلكه بركبته الدم مالي البدله
صعدني للغرفه والعلويه جهاد خلفنه
فتح باب الغرفه ماشي ب اتجاه الجربايه خلاني على الجربايه وباوعلي عيونه مليانه خوف
_غضنفر:: منو منو سوا بيج هيج قدس عزيزتي
حجاها وحضني جسمه يرجف باوعت للعلويه جهاد الي جانت تباوعلي بخوف
_جهاد:: منو وياج!!!
باوعتلها وعيوني يصبن دموع
_قدس:: سهام ومنة
بس حجتيها هزت راسها متحسره بعصبيه باوعلي غضنفر عاكد حواجبه
_غضنفر:: شسولج؟؟ شحجننننن؟؟؟؟؟؟
سكتت ماريدت علي باوعت للعلويه جهاد توزع عيونها ب الغرفه صارت عينها على حزام غضنفر متعلك ورا الباب مشت ب اتجاه الحزام اخذته تطبك بي باوعتلي وطلعت من الغرفه عيوني تتبعها
_غضنفر:: قدس
باوعت لغضنفر بتعب
_غضنفر:: شسولج؟
دنكت راسي صافنه بزاويه الغرفه
_قدس:: كالت انتِ مسدونه وبيج جن ماتستاهلين غضنفر وكتلتني
_غضنفر:: كتلتج؟
_قدس:: اي وحسبتني ب الحمام
غمض غضنفر عيونه وهز راسه بعصبيه ماعرف ليس جذبت او ماعرف ليش ماكملت الحقيقيه واكتفيت بهل كلام
سمعت صوت صريخ منة وسهام جاي من جوا باوعت لغضنفر
_قدس:: كتلتهن
_غضنفر:: تربيهن
دارني غضنفر ينزعني البدله خليت ايدي على ايده مانعته
_قدس:: لا صيح لقس
ما اهتم غضنفر لكلامي وكمل ينزعني ب البدله واني واكفه بمكاني متصنمه كل ما اتذكر كلام سهام يجيني وجع ببطني
جردني غضنفر من البدله رغم جنت خجلانه بعدت ايده مني وحجيت
_قدس:: صيح للبنات
_غضنفر:: انا اولى بيج منهن
شمر غضنفر البدله بعيد ومشه ب اتجاه كنتور الملابس غطيت نفسي ب الحاف جسمي يرجف
رجع شايل بيده ملابس الي مديت ايدي اخذ الملابس جر الحاف وتقدم ب اتجاهي يلبسني
شكد جنت خجلانه بس ما كدرت امنعه واعراضه اكو دوخه فضيعه براسي كل ماتذكر سهام والشخص الي شفته ب الحمام اخاف واختنك
خلص عضنفر وابتعد يشيل البدله من الارض
غطيت روحي ب الحاف وغمضت عيوني
كعد غضنفر كدامي يباوع بعيوني
_غضنفر:: قدس
_قدس:: لاتحجي شي
عكد حواجبه مستغرب
_غضنفر:: شبيج؟
_قدس:: خليني ارتاح
هز راسه وانطاني ضهره منتجي على الجربايه شعره بوجهي
مر فتره واحنا ثنينه ساكتين دمعت عيني بحزن خليت ايدي على حلكي ما اريده يسمع صوتي
نزلت دمعتي وطلعت الشهكه مني لا اردي
دار غضنفر راسه يباوعلي
_غضنفر:: قدوسه
_قدس:: عوفنيييييي
_غضنفر:: شبيج بنتي غير افهم
رفعت راسي وبعدت الحاف مني وكف كدامي واني دفعته باوعلي مصدوم من دفعتي
_غضنفر:: شبيج!!!!
_قدس:: اشششش لاتحجي ولاحجايه لك انت شنووو
_غضنفر:: شبيج قدس
وكفت وهوا كدامي
_قدس:: انت هم معتبر نفسك زلمه
غمض عيونه صاك على سنونه معصب هز راسه وباوعلي
_غضنفر:: عادي حبيبتي انتِ هسه معصبه طلعي حركتج بيه لاتكتمين عصبيتج
دفعته من صدره اضربه بقوه دموعي يصبن
_قدس:: اكرهك ياحقيررر مسوي نفسك تحبني وانت تستثقل تنزل تاخذ حقي منهن!!!
غمض عيونه ومسح على وجه سحب ايدي من صدره وحضني
_غضنفر:: ما مستثقل والله وحقج يطلع من عيونهن بس ما اكدر
_قدس::: ليششش ليششش ماتكدرررر شبيكك عوزك حيل
بعدت منه اصرخ وابجي باوعلي
_غضنفر:: ما اكدر ترديني امد ايدي عليهن
_قدس:: لاتمددد بس عندك لسان بيكك تحجييييي يعني هاي مو اول مره ومو اول مره تسكت عني حقي من ياذوني معتمد على العلويه جهاد هيه تاخذ حقي مو وانت رجلي تتعاجز تنزل تحجي
بقه ساكت يسمعلي واني اصيح بوجه
_غضنفر:: وداعت دموعج اليحركن روحي اطلع حقج منهن اضعاف
_قدس:: اطلع براا اطلععع ما اريد اشوف وجهك
_غضنفر:: قدس
_قدس:: كتلكككك اطلععععععععع اطلععععع
خليت ايدي على اذني اصرخ بقوه مانعته يتقرب مني باوعلي بحزن هز راسه ب اي وطلع من الغرفه طحت على الجربايه منهاره من الي صار
مشكلتي ما اعرف السبب الحقيقي الي خلاني اتهجم على غضنفر بس ما اردته يكعد وياي وجوده يخنكني
نفتح باب الغرفه اجيت اصرخ توقعته غضنفر
بس من شفت العلويه جهاد باوعتلها وبجيت اركض لحضنها
حضنتي تمسح على راسي
_جهاد:: اششش لاتبجين لاتخليني انزل عليهن مره ثانيه
_قدس:: اذني عمه
_جهاد:: كون عمه العماهن بس اوكفيلي اذا ما اربطلج ياهن بنص الصاله واخليج ادكين عليهن مثل المطي اني مو ام عون
مشت بيه للجربايه تمسح على ظهري نفتح باب الغرفه دخلن خواتي حضنتهن ابجي وهنا يبجن لبجيي دخلت شاهيناز
كعدنا على الجربايه حاضنه العلويه بالي بعيدد شكد حجن وياي البنات ماجنت مركزه بكلامهن بالي كله بعالم ثاني
بعد ماطردت العلويه جهاد البنات سدت الباب وكعدت كدامي على الجربايه
_جهاد:: احجيلي كلشي
بديت احجي كلشي كل الي صار من دخلن للغرفه لحد اخر موقف ب الحمام بس ماذكرت كلام سهام من كالت غضنفر مايكدر يتقرب الج وماراح تصيرين ام
اكو شي جان مانعني احجي
هزت العلويه راسها ب اي
_جهاد:: راح اصيحلج خواتج يجن يمج
_قدس:: عمه لاتعوفيني اخاف
_جهاد:: ماعوفج رايحه اجيب حقج واجي
طلعت العلويه من الغرفه بعد ما صاحت لخواتي عرفت العلويه جهاد ناويه للبنات ومحد راح يخلصهن منها!!
" ملاك "
الي صار ب قدس وصدمه الكل بكتله عمتي لسهام ومنة جانت صدمات ممتاليه
امانه خل نحجي الصدك عمتي طلعتلهن جلد ثاني
يعني انتم طايحين طايحن اطيحون بيد العلويه جهاد؟ شهل غباء العلويه جهاد! الي البيت صغيره وجبيره يخاف منها
تصدكون مرات احس حتى السيد عبد الرؤف يخاف منها يعني اني احس مو اكيد لادخلوني بكلام مالي بي شغل
وقت عمتي جانت تضرب بمنة وسهام الكل جان يفزع يحاول يفاككهن بس لاااا عمتي جانت تصلخ الي يحاول يافكك بينهن
يعني لاتحاول تصير طباب خير بموضوع العلويه جهاد بي لان راح تخليك انت والخير ب السالفه
جان تركيزي كله على ضرباتها وشلون ماتخطىء ب الضربه بس ترفع الحزام تجيبه بوحده من سهام ومنة بس امانة الله نحجي ابد ماظلمت بينهن حتى ب الكتل جانت عادله يعني على عدد الضربات الي حسبتهن وقت جانت تكتل منة وسهام ف جانت عادله تضرب منة ترجع تضرب سهام
محد جان يعرف السبب الي دفع عمتي تضرب هل ثنائي الفضيع شلون ثنين منة وسهام اتعقد من سهام تشبه فتون الي جانت تمثل ويا دواس واخو
دخل الكل للمصلا بعد ما غضنفر طلب من العلويه لباب والساده يحجي وياهم هوا محد عزمنا ندخل وياهم بس احنا نحب نعرف كلشي
كعدت العلويه لباب والساده وغضنفر واكف كدامهم باوع للعلويه
_غضنفر:: عمه حفيدتج وزوجت ابنج داسن حدودهن ويا زوجتي
عكدت العلويه لباب حواجبها ب استغراب
_لباب:: شمسويات شحاجيات وياها؟؟
باوع غضنفر لسيد عبد الرؤف ورجع باوع للعلويه لباب
_غضنفر:: يابه اريد واحد يجاوبني انا بيوم شكيتلكم من قدس؟
هز الكل راسه ب لا كمل غضنفر كلامه
_غضنفر:: لعد من تروح ام موسى لزوجتي وتكلها انتِ مسدونه وزين من غضنفر راضي بيج هاي شتقيموها؟
انصدمت العلويه لباب وعمران زوج سهام حجه السيد بعصبيه
_عبد الرؤف:: شنو هل كلام!!
_غضنفر:: اي سيد هذا الكلام طالع من ام موسى وبنت عمران يعني هاي بدايتها حتى ما مر يوم على العرس بنفس يوم العرس هيج يحجون وتبدر هل تصرفات ترضوها انتم
الكل جان معترض على الكل ومنزعج نقهرت على قدس خطيه شحالها هاي ثاني مره تجاوز سهام حدها وتصحيلها مسدونه ومسحوره ليش هل تصرفات نفتح باب المصلا دخلت شاهيناز والبنات وكفت شاهيناز بصفي
_شاهيناز:: شنو شفاتني
_ملاك:: سمعي سمعي بعدنا ب البدايه
كمل غضنفر كلامه يشرح الي صار ويا قدس والكل يسمع اله حجت نضال زوجت عم قدس ب انزعاج
_نضال:: ولو اقاطعك سيد بس هذا الكلام يصير يعني بنيه بليله عرسها هيه تنهان وتنضرب؟ انتم ترضوها على بناتكم احلفكم ب الله لو صاير هيج ويا وحده من حفيداتكم ترضوها
الكل دنك راسه والساده يهزون روسهم ب تأسف خجلانين من تصرف سهام ومنة
حجه السيد ويا نضال وهوا مدنك راسه
_عبد الرؤف:: اكيد مانرضا وهاي التصرفات غير مقبوله
نفتح باب المصلا بقوه دار الكل يباوع لعمتي جهاد واكفه بباب المصلا باوعت للقافيات وصاحت بيهن يصعدن لقدس كلهن نسحبن لغرفه اختهن دخلت عمتي للمصلا تباوعلنا
_جهاد:: اريد عمتي وابوي وعمامي بس ب المصلا
كلنا صفنا بوجه عمتي اعتقد عمتي جاي تطردنا مو اكيد يعني اعتقاد بس رجعت باوعتلنه وصاحت بصوت
_جهاد:: يلااا؟؟
الكل بده ينسحب من المصلا وغضنفر وجادح وفقار واكفين بمكانهم باوعت عمتي لجادح وفقار
_جهاد:: وراهم
_فقار:: ليش عمه
_جهاد:: وشنو ليش يعني امي تطلع وانت تضل؟
جر جادح فقار وطلعو ثنينهم بكرامتهم
درت اباوع لشاهيناز صافنه على عمتي
_ملاك:: امشي لاترزلج
_شاهيناز:: لو كايلتي باجر اعدامج ولا كايله طلعو وخلونا وحده شلون اسكت فضولي
جريتها وطلعت من المصلا نطلع بكرامتنا احسن من مانطلع متجردين منها
بقه غضنفر والساده والعلويه لباب ونضال ب المصلا والكل انسحب بعد طردده عمتي يعني
طلعو الولد للزلم الي ايليا وغضيمر وغل والباقين التهو بيهم واحنا كعدنه ب الصاله
منتضرين شنو راح يصير
استغربت منة وسهام وين راحن؟ ماموجودات
بس من شفت عطاء وخدلجه دخلن لغرفه السيد والعلويه عرفت هل ثنائي ب هاي الغرفه
اقل الربع ساعه ونفتح باب المصلا بقوه
طلعت العلويه لباب بيدها الحزام الجان بيد عمتي معصبه لا مو معصبه فايره من العصبيه
وعمتي وراها والساده ورهم
اخذت عمتي الشحاطه مال السيد عبد الرؤف من كدام باب المصلا ومشت ورا العلويه لباب صاح السيد من شاف عمتي بيدها الشحاطه
_عبد الرؤف:: بابا عوفي الشحاطه
دارت عمتي على السيد
_جهاد:: اني اشتريلك غيرها
_عبد الرؤف:: بنتي مو على الشحاطه انا ماريدجن تصرفن بتهجم هيج
_جهاد:: لعد سيد تريد ندغدهن
هز السيد راسه ب الرفض وحجه يباوع لعمتي
_عبد الرؤف:: بنتي اكو شي اسمه تفاهم بدال الضرب كعدو وياهن وتفاهمن
_جهاد:: سيد ولو اقاطعك بس اكو شي اسمه عقل واكو انسان يعرف الغلط من الصح اني اذا اجي اتفاهم اتفاهم ويا طفل اتفاهم ويا ام الحسن اتفاهم ويا موسى اتفاهم ويا شخص صغير مو وحده ام!!! والثانيه طولها يسد الباب
الكل جان واكف يسمع لكلام عمتي الي جان تحجي والشحاطه تلوح بيدها
_جهاد:: واذا على التفاهم ف اني متفاهمه قبل ومحذره كلت لحد يفكر يحجي ويا قدس راح يشوفني واكفه بوجه وسهام ب الضبطط حذرتها هواي والفهيم يفهم من اول طكه مايحتاج يرجع ينهان مره ثانيه
_عبد الرؤف:: بنتي
حجت العلويه لباب بحركه كلب تباوع للسيد
_لباب:: خويه كلامك على عيني وعلى راسي اني اريد اربي حفيدتي وجنتي ادري بكلبك ماينطيك ف خويه بلا زحمه عليك اطلعو برا انتم هم الزلم عيب واكفه بحدها خلونا نتصرف براحتنا
اتحسر السيد وهز راسه طلع من البيت والساده خلفه وغضنفر وياهم باوعت العلويه لباب لعمتي
_لباب:: اريدج تريحين كلبي
_جهاد:: افاا وانا عمة السادة
مشت العلويه لباب للغرفه الموجوده بيها سهام ومنة صاحت بصوت عالي
_لباب:: وين صخمان ولطمان
رفعت حواجبي بتعجب شلون القاب صخمان ولطمان حلو عجبتني العلويه
ركضنا كلنا ورا عمتي والعلويه لباب للغرفه
اشوف منة وسهام بس شافن عمتي والعلويه لباب كمزن مروعبات سهام وكفت تباوع لعمتي وتبلعم ومنة حصرت روحها ب الزاويه تبجي وتصرخ
_منة الله:: لايمه فدوه اروحلج لا
_لباب:: لاتكليلييي يمه ولج انيييي هيج تسوين بيه منه هيج تنزلين راسي اذا ماربيتج مو لباب اني
ركضت العلويه لباب على منة ب الحزام ومنة تصرخ تحمي بنفسها باوعت عمتي لسهام وابتسمت.
_جهاد:: ولج انتِ ادوسين عليه اني؟
هزت سهام راسها بلا تبلعم
_سهام:: لا والله انتِ جبريتنا شلون ادوس عليج وشلون اكدر اصلا
_جهاد:: اكيد ماتكدرين لان مجرد تفكيرج ب الموضوع راح تشوفين رجلج الردتي ادوسين بيها مكسوره
ركضت عمتي على سهام ب الشحاطه واحنا مصدومين من الاكشن الي جاي يصرف كلها ركضت تفاكك بين عمتي وسهام والعلويه لباب ومنة
ضحكت متونسه من الي جاي يصير جان التلفون بيدي ماعرف ليش فتحت تصوير اصور بيهم وشلون عمتي تكطع الشحاطه على راس سهام الي حتى ايدها ماكدرت ترفعها
جانت اسراء ورشا والعلويه زهراء ورقيه على عمتي يردون بس يبعدونها عن سهام والعلويه شيماء وشريفه يبعد العلويه لباب عن منة
الموضوع جان حماس فول يعني ماعرف بس من افكر ب الاذيه الي شافتها قدس من هل ثنائي وشلون تحولت فرحتها لحزن واذيه اتضامن ويا عمتي والعلويه لباب ب الطك لان يستاهلن يضوكن هاي الاذيه
بعدو عمتي عن سهام والعلويه لباب عن منة صاحت العلويه لباب بيهن روحها رايحه
_لباب:: كومن كومن لابارك الله بيجن هسه تردحن تبوسن رجلين قدس وتعتذرن منها
كامت منة بسرعه بس سهام لا ماقبلت وجانت رافضه باوعتلها عمتي وزمخت بيها كامت سهام ويا منة والعلويه دفعتهن من ضهرهن للدرج
صعدن الدرج منة تبجي وسهام تمسح بجسمها متوجعه اشوف طبعه شحاطه السيد على وجهه هسه عرفت حب عمتي لهاي الشحاطه لا تسوا تسوا السيد يخاف عليها
مشينه كلنا وراهن عمتي والعلويه لباب بضهرهن
دفعن باب الغرفه ودخلن على القافيات ب الغرفه شفنا قدس كاعده على الجربايه من دخلنه دارت علينه مصدومه
ركضت منة على قدس تبجي وترجف
_منة:: قدس الله يخليج كلي لامي كليلها اني معلي هاي سهام الحجت والله هيه وزتني اني معليه
باوعت قدس لعمتي مصدومه بخجل باوعتلها عمتي ورفعت ايدها البيدها شحاطه ب استفهام
_جهاد:: كتلج اجيبلج حقج؟
_قدس:: ها مو شنو هاي
مشت العلويه لباب ب اتجاه قدس تبجي
سحبت راس قدس وباسته
_لباب:: ولج يمه والله خجلانه منج خجلني هذن ماعرف شلون اخلي عيني بعينج وجنتي وحفيدتي السبب بكسره فرحتج
هزت قدس راسها ب لا بقوه
_قدس:: لا لا عادي لاتعتذرين علويه انتِ معليج بيهن
_لباب:: حمستلجن ياهن حمسح تعالن تعالننننن بوسنها واعتذرن
مشن ثنينهن يعتذرن من قدس
جرت سهام راس قدس وباسته بدون كلامه بس واضح شوي وتنفجر من العصبيه ومنة لا باسته اكثر من مره تبجي بخجل وتتعذر
دارت عمتي علينه وصاحت بينه بصوت
_جهاد:: سمعني كلش زين حاظرجن يعلم غايبجن شكو وحده تحاول لاااا مو تحاول تفكررر بسسس!! تحجي حجايه وحده ويا قدس لو خواتها لووو وحده منكم فكرت تاذي غيرها بكلمه بتصرف غبي يطلع من راسها وداعة عزيز كلبي التلوع بموته وماحلف بي منا والدرب تلاكني واكفه بوجهه اربيها
باوعتلنه عمتي وحده وحده حتى العلويه الكبار وحجت
_جهاد:: التفكر تلعب على الحبلين خليها تعرف الفها بعد هل لعبه راح تشوفني العبها بس بطريقتي مفهوم!!
هزينا كلنا راسنه وصحنا اي
_جهاد:: يلا الكل برا
انسحب الكل من الغرفه واني والبنات وياهم وعمتي ويانا ضلن القافيات ومرت عمهن ب الغرفه
نزلنه للصاله الكل نسحب لغير مكان باوعت العلويه زهراء لعمتي بتأسف
_زهراء:: ليش هيج سويتي جهاد هاي وانتِ علويه عود تصرفين بتهجم وتضربين غيرج وتاذينه
باوعت عمتي للعلويه زهراء جانت عمتي كاعده على القنفه حاطه رجل على رجل من حجت العلويه نزلت رجليها وحجت
_جهاد:: ولان اني علويه هيج تصرفت حتى خاف باجر واحد يفكر يأذي غيره يعرف الي راح يجي شنو ذنبها هاي البنيه اول يوم تدخل بي للبيت كعروسه يصير بيها هيج؟ تدرين شنو راح تكول
باوعت عمتي للعلويه زهراء بتمعن وحجت
_زهراء:: راح تكول حقي ضايع من اول دخلت بي بعد ماتكدر تحجي ماتكدر ادافع عن نفسها تدري حقها انسلب من اول يوم دخلت بي للبيت يعني بنيه عروسه بدلتها البيضه تتحول حمره بسبب حقد البعض؟ خاف باجر واحد يفكر يمسها بحجايه تعرف ترده وتخلي الحق وياها واذا على تصرفاتي ف اني مامتندمة وعندي استعداد اكوم مره ثانيه اكتلهن
سكتت العلويه زهراء تخاف لا صدك عمتي ترجع تكتلهن
بقينه كاعدين ب الصاله وعمتي كاعده كدامنا تراسل وكل شوي تصفن وترجع تكتب مره تانيه تهز برجليها
الكل انسحب من البيت بعد الي صار وهواي حمدت الله الي جانو ماكو غربه كلنا من اهل البيت حتى محد لحك يفرح صدك ب العرس
كل ما اتذكر قدس انقهر عليها نكسرت فرحتها ب اهم يوم بحياتها
دخلو الساده بعد ما الناس كلها راحت البعض دخل للمصلا والباقين ب الصاله
غضنفر صعد لغرفته وجادح وغل وفقار كعدو ب الصاله كدام عمتي باوعت لفقار جان مدنك راسه نازع العمامه صفنت على شكله مزيج من العصبيه والهدوء ملامحه حاده عكس اطباعه هادئه تحسه نسمه بارده حتى تصرفاته بارده وكلامه قليل دوم عازل نفسه حتى من يضحك على كد الابتسامه بس
عكس الباقين مثلا ايليا فقار غضيمر غل سجاد وغيرهم اذا ضحكو يضلون يفحطون ب الكاع واحد يطيح على الثاني بس فقار لاا منعزل عنهم كل ما اشوفه اصفن بوجهه لا اردي اشوف نفسي اباوعله ومركزه ويا
مسح على وجهه ورفع راسه اول مارفع عيونه باوعلي
صفنت بوجهه وهوا يباوعلي كسر عيونه ورجع دنك واني لا صلفه محد يلحكني بس كلبي يدك بسرعه احسه يريد يطلع من مكانه
ما اعرف شلون عيوني ودتني لعمتي هيج فجأة صارت عيوني على عمتي الي جانت حاطه رجل على رجل تباوعلي وحاجبها مرفوع
هنا ملامحي كلها تشنجت مصدومه ماتعرف تعبر عيوني مايرمشن حلكي مفتوح من الصدمه خشمي مايجر النفس
مادري هيج الخوف يسوي معقوله حتى الملامح تخاف من العلويه جهاد باوعت لشاهيناز الي جانت صافنه تباوعلي وتباوع لعمتي بصدمه باوعتلها وبلعت ريك
دنكت راسي عيوني على ايدي الي بدت ترجف بخوف شوفي ملاك هاي تاليتج مساع تشمتين وتضحكين على منة وسهام لعد شعبالج الدنيا ما ادور لاعيني ادور وهسه يجي دورج ب الكتله وشلون عمتي اصلا ضايجه يعني راح تنسيج ايام عمرج بهل نضرات
رجعت باوعت لعمتي شفتها صافنه على جادح باوعت لجادح جان يباوع لشاهيناز ويدنك يرجع مره ثانيه يباوع ويكسر نضراته
وشاهيناز لا ابد مامهتمه اله تباوع لعاتكه
باوع جادح ب الصدفه لعمتي شافتها منطيته نضره اقوه من الي انطتهن الي انصدم ودنك هزت عمتي راسها وصاحت
_جهاد:: ادب ماكو بهذا البيت ادب ماكو
باوع الكل لعمتي ب استغرب غيري اني وشاهيناز وجادح
_فقار:: ها عمه
_جهاد:: جاي افكر بسالف
_غل:: شاركينه سوالفج حلوه
_جهاد:: لا سوالفي اكبر من مفهوكم خليكم بسوالفكم
عوج غل حلكه وهز ايده
_جهاد:: فقار
رفع فقار راسه يباوع لعمتي
_فقار:: امريني
_جهاد:: مأيأمر عليك ظالم اريدك بشغله
_فقار:: هسه؟
_جهاد:: لابعدين خل اشرب جاي راسي راح ينفجر
دنكت عمتي راسها ايدها على راسها باوعت لفقار وابتسمت
_جهاد:: فقار خوش فقار
ابتسم فقار بفرح واني ابتسمت ويا كام من مكانه ومشه لعمتي باسها من راسها
_فقار:: الله يخليج النا
ابتسمت عمتي ودنكت راسها ساكته
مر الوقت والقافيات نزلن كعدن ويانا ب الصاله
دخلت المطبخ بيدي كلاص الماي اريد اشرب طلعت من المطبخ التلفون بيد والكلاص ب الايد الثانيه
الكل جان متجمع ب الصاله سمعت صوت فقار يصيح ب اسم عاتكه
_فقار:: عتوكه ولو اتعبج رايد ماي
اجت عاتكه تكوم تجيب الماي واني بيدي كلاص الماي
مشيت ب اتجاه فقار مديت الكلاص بوجهه صار كلاصي وكلاص ثاني بيد شاهيناز ثنينه واكفات كدام فقار
باوع فقار النا ولكلاصتنا باوعت ب اتجاه شاهيناز بخزره باوعتلي مصدومه توها تنزل كلاصها وفقار اخذه منها وابتسم
_فقار:: مشكور شهوده
هنا ما اعرف اوصف احساسي وشنو المشاعر الي زارتني بساعتها واني اشوفه يرفض كلاصي رغم مديته قبل شاهيناز وحتى كلاصي مامشروب منه يعني ليش؟
باوعتلي شاهيناز وعضت لا شفتها بأسف ابتسمت بوجهه ومشيت منطه ضهري الهم خليت الكلاص على الطاوله
باوعت لعمتي جهاد صافنه تباوعلنه هيه وجادح ونضرات الانزعاج بعيونهم عكس الباقين محد جان مهتم لان محد فاهم الي بداخلي لفقار
مشيت ب اتجاه المطبخ كاتمه بجيتي ماريد ابجي وافشل نفسي كدامهم عادي ملاك عادي يجوز ماحب يفشل شاهيناز؟
زين يفشلني لعد مديت كلاصي قبلها وحتى من انطيته واكيد هذا الموضوع مادخله بمشاعري اله بس لو غيره طلب راح ابادر وانطي الكلاص
دخلت للمطبخ ومشيت ب اتجاه الحديقه شفتها فارغه محد كاعد مشيت للمرجوحه عيوني مدمعه بس كعدت وحدي على المرجوحه بجيت اي بجيت يجوز البعض يشوف الموضوع مايستوجب بس اني لا اشوف الموضوع يستوجب وبقوه
تربعت على المرجوحه مسحت دموعي وبقيت ساكته بس صفنتي ماخذتني
باوعت ب اتجاه باب الحديقه شفت شاهيناز جايه ب اتجاهي باوعتلي وكعدت
_شاهيناز:: والله العظيم ماقصدي الله يشهد عليه مادري بيج راح تن
_ملاك:: عادي مو مهم
_شاهيناز:: ملوكه ماقصدي صدكيني
_ملاك:: اي واني كتلج عادي؟
حجيتها وكمت من مكاني لبست النعال ومشيت اطلع من الحديقه
باوعتلهم يجهزون ب العشه طلعت من المطبخ صار كدامي كلاص الماي شفته بيد فقار يشرب منه نفس الكلاص المديته اله باوعلي واني درت منه
توني اصعد الدرج وطلع السيد من المصلا باوعلي وابتسم
_عبد الرؤف:: هلا بملاكنا هلا بملاك السادة
وكفت مبتسمه بخجل
_ملاك:: شكرا سيد
_عبد الرؤف:: شكرا على شنو؟
_ملاك:: ماعرف بس كلامك خجلني
_عبد الرؤف:: وهاي الحقيقيه انتِ اسمج ملاك وانتِ ملاك
ابتسمت بفرح لكلامه وكف كدامي وحضني يطبطب على ضهري باوعت لعمتي جهاد تباوعلنه مبتسمه
_جهاد:: صدك ملاك جمال واخلاق وهدوء ورزانه وعيونها ماترفعهن من الكاع
رفعت حواجبي واني مبتسمه حسيتها انطتني بسمار بس يلا عمتي جهاد تهون وتمون طبطب السيد على ضهري وحجه مأيد عمتي
_عبد الرؤف:: ونعم منها خوش بنيه ان شاءالله مانضيعها من ايدينا
باوعت لسيد ب استغراب مافاهمه كلامه رجعت باوعت لعمتي شفتها مبتسمه تهز ب السبحه الطينيه البيدها
وفقار يباوع لسيد مستغرب ويباوع ل ايليا ماعرفت الموضوع بس ما اهتميت اهم شي السيد مدحني باوعلنا السيد وصاح
_عبد الرؤف:: تعالن ورداتي خل نكعد ب المصلا بين مايكملون العشه
فعلا دخلنه اني والبنات للمصلا والسيد كعد كدامنا باوعلنه وحجه مبتسم
_عبد الرؤف:: اي شنو تردون نحجي؟
كلنا جنا ساكتات وحده منتظره الثانيه تحجي
_قس:: ابليس
باوع السيد لقس ب استغراب
_عبد الرؤف:: ابليس!
_قس:: اي مو شسمه ماسامعتك مره حجيت عنه واني اريد اسمع عنه
_عبد الرؤف:: اي ليش لا نحجي
عدل السيد كلامه وباوعلنه
_عبد الرؤف:: عن ابي بصير. عن الصادق جعفر بن محمد انه قال: اخبرني عن خلق ادم كيف خلقه الله تعالى! قال ان الله لما خلق نار السموم هي نار لا حر لها ولا دخان فخلق منها الجان
قال تعالى (والجان خلقناه من قبل من نار السموم) وسماه مراجا وخلق منه زوجه وسماه مارجه فواقعها فولدت الجان ثم ولد الجان ولدأ اسمه لجن ومنه تفرعت قبائل الجن ومنهم ابليس اللعين وكان يولد الجان الذكر والانثى ويولد الجن كذالك تؤامين فصارو تسعين الف ذكرا وانثى
تزوج ابليس بأمراه من الجان يقال لها لهبأ بنت روحا ابن سلسال فولدت منه بلقيس وطونه في بطن واحد ثم فقطس وفقطسه في بطن واحده فكثر اولاد ابليس حتى صارو لايحصون وكانو يهيمون على وجههم كالذر والنمل والبعوض وكانو يسكنون المفاوز والحياض والاجام والمزابل حتى امتلئت الارض منهم
اسكن الله الجان الهواء دون السماء واسكن الجن في السماء الدنيا وامرهم بالعباده والطاعة وكانت السماء تفتخر على الارض وتقول ان ربي رفعني فوقك انا مسكن الملائكه وفي العرش والكرسي والنجوم وخزائن الرحمه مني ينزل الوحي فقالت الارض انا ربي بسطني واستودعني
عروق الاشجار والنباتات والعيون وخلق في الثمرات والانهار والاشجار فقالت لها السماء ليس عليك احد يذكر الله فقالت الارض يا رب ان السماء تفخر علي ان ليس علي احد يذكرك فنوديت الارض ان اسكني فاني اخلق من ادميك صوره لا مثل لها من الجن وارزقه العقل والعلم والكتابه واللسان وانزل عليه من كلامه ثم املاء بطنك وظهرك وشرقك وغربك على مزاج تربك في اللون والحريه وافتخر يا ارض على السماء بذلك ثم استقرت الارض وسالت ربها ان يهبط اليها خلقا فاذن لها بذلك على ان يعبدو ولا يعصو الله قال وهبط الجن والانس وسكناء الارض واعطوا على ذلك العهد ونزلوا وهم بسبعين الف قبيله يعبدون الله حق عبادته دهرا طويلا ثم رفع الله ابليس الى السماء الدنيا لكثره عبادته فعبد الله فيها الف سنه ثم رفع السماء الثانيه فعبد الله فيه الف سنه
فرفعه الله الى السماء السابعه وكان يعبد الله حتى حق عبادتك ويوحده حق توحيده حتى اذا امر به
جبرائيل وميكائيل يقول بعضهم لبعض لقد اعطى هذا العبد من القوه على طاعه الله وعبادته ما لم يعطي احدا من الملائكه فلما كان بعد ذلك بدهر طويل امر الله تعالى جبرائيل ان يهبط الى الارض ويقبض من شرقها وغربها وقعرها وبسطها فيقبض قبضه ليخلق منها خلقا
جديد يجعله افضل الخلائق قال ابن عباس فنزل ابليس لعنه الله ووقف وسط الارض وقال يا ايها الارض اني جئتك ناصحا لك ان الله تعالى يريد ان يخلق منك خلقا يفضله على جميع الخلق واخاف ان تعطيه وقد ارسل اليك جبرائيل فاذا جاءك فاقسمي عليه ان لا يقبض منك شيئا فلما هبط جبرائيل باذن ربه نادته الارض وقالت يا جبرائيل بحق من ارسلك الي ان لا تقبض مني شيئا فاني اخاف ان يعصيه فيعذبه في النار
فيعذبه في النار قال فارتعد جبرائيل من هذا القسم ورجع الى السماء ولم يقبض منها شيئا فاخبره الله تعالى فبعث الله تعالى ميكائيل فجرى له مثل ما قالت لجبرائيل فبعث الله عزرائيل ملك الموت فلما هم بها ان يقبض منها قالت له مثل ما قالت لهما فقال وعزه ربي لا اعصي له امر ثم قبض منها قبضه من شرقها وغربها وحلوها ومرها وطيبها ومالحها وخسها وقعرها وبسطها فقدم ملك الموت بالقبضه قال الله تعالى وعزتي وجلالي لاسلطنك على قبض ارواح هذه الخلق الذي اخلقه لقله رحمتك فجعله الله نصف تلك القبضه في الجنه والنصف الاخر في النار
خلق الله ادم من سبعين ارض فراسه من الارض الاولى وعنقه من الثانيه ويده وصدره من الثالثه ويده من الرابعه وبطنه وظهره من الخامسه
قال ابن عباس خلق الله ادم على الاقاليم فراسه من تربه الكعبه
فلما خلق الله ادم على هذه الصوره امر الله الملائكه فحملوها ووضعوه على باب الجنه عده وكان جسد لا روح فيه وكانت الملائكه تتعجب منه لانهم لم يكونو راوأ مثل ذلك يعني لم يكن انسانا موصوفا فكان ابليس ممن يطيل النظر اليه ويقول فانه خلق ضعيف خلقه من طين وهو اجوف الاجوف
__________________
قال فلما اراد الله ان ينفخ فيه الروح خلق الله تعالى روح ادم ليست كالارواح وهي روح فضلها الله على جميع ارواح والخلق من الملائكه وغيرها
فلما خلق الله روح ادم امر بغمسها في جميع الانوار ثم امرها ان تدخل في جسد ادم دون استعجال فقالت يا ربي كيف ادخل من فضاء الى الضياق فنوديه ادخلي كبرها فدخلت الروح من يافوخه الى عينه ففتح ادم فجعل ينظر الى بدنه ولا يقدر على الكلام ونظر الى سراديق العرش مكتوب لا اله الا الله محمد رسول الله صلى الله عليه واله وصارت الروح الى اذنه
فجعل يسمع تسبيح الملائكه وجعل تدور في راسه ودماغه والملائكه ينظرون اليه ويتوقعون متى يؤمرون بالسجود يسبحون وابليس اللعين يضمر خلف ذلك وقد اخبر الله تعالى الملائكه قبل خلقه بذلك ثم صارت الروح الى الخياشيم فعطس ففتحت العطسه المجاري المسدوده وسارت الى اللسان فقال ادم الحمد لله الذي لم يزل في اول السنه قالها فناداها الرب يرحمك ربك يا ادم لهذا خلقتك وبهذا لك ولذريتك ولمن قال مثل ما قالت قال النبي ليس على ابليس اشد من تسميت العطاس
قال جعفر بن محمد الصادق عليه السلام كانت الروح في راس ادم 100 عام وفي صدره وفي ظهره 100 عام وفي بطنه 100 عام وفي وفي بركه وفي ساقيه وقدميه 100 عام فلما استوى ادم قائما نظره اليه الملائكه كانه الفضه البيضاء فامرهم الله بالسجود فاول من بادر ب السجود جبرائيل ثم ميكأئيل ثم عزرائيل ثم اسرافيل ثم الملائكه المقربون فضلو في سجودهم وكان اول السجود لادم يوم الجمعه عند الزوال فبقيت الملائكه في سجودها الى العصر فجعل الله هذا اليوم عيدا لادم واولاده واعطاه الله فيه الاجابه في الدعاء وفي يوم الجمعه وليلتها 24 ساعه
"التكمله بقناة التلي"
خلص السيد كلامه عن ابليس سمعنا صوت العلويه تصيحنه للعشه باوعلنه السيد وابتسم
_عبد الرؤف:: نكمل بعد العشه
طلعنه كلنا من المصلا شفنا السفره مفروشه بنص الصاله والعشه كامل التمينه كلنا حول السفره والسيد كدامنا
باوعلنه السيد وحده وحده ب استغراب باوع للعلويه لباب
_عبد الرؤف:: وين البنات؟
_لباب:: يابنات؟
_عبد الرؤف:: ام موسى ومنه
رفعت عمتي راسها تباوع للسيد
_جهاد:: صحناهن يكولن مانشتهي شبعانات
_عبد الرؤف:: ليش هنا شنو اكلن؟
_لباب:: اكلن كتله معدله
هز السيد راسه ماراضي بس ماحجه كمل اكله بهدوء واحنا كذالك
ماكسر هدوء السفره غير من فقار حجه
_فقار:: سيد ليش ماقبلت ابو وسام يحجي وياك
_عبد الرؤف:: عوفه لاتذكرلي اسمه
_ايليا': لاسيد نقهر من عفته ومشيت
_عبد الرؤف:: ابني هذا الشخص ماعنده غيره على عرضه ماعنده غير على زوجته وبنته انسان شخص غير محلل على بنته وزوجته يلمسهن هذا شنو تلقبو؟
رفعت قس راسها من الاكل وحجت بهمس
_قس:: ثور مكرن
ضحك الكل مصدومين من القلب والسيد ابتسم يباوع لقس الي دنكت راسها بخجل لان الكل سمعها
_عبد الرؤف:: ب الضبط ثور مكرن
_غل:: حلوه هاي مال ثور مكرن استبادل لدثو
ابتسمت قس وكملت اكل بهدوء
اجه اليل والكل توجه لفراشه جنت اني وقس وشاهيناز كاعدات نسولف رفعت عمتي راسها وصاحت بينه
_جهاد:: مانخمد
_شاهيناز:: عمة بداعتي اخر سالفه
رجعت عمتي راسها على المخده وغمضت عيونها
رجعنا نسولف على العركه الصارت
_شاهيناز:: اكثر لقطه ضحكتني من عمتي كتلت اسراء ويا سهام ومنه
خليت ايدي على حلكي كاتمه الضحكه من تذكرت شلون اسراء كامت اطفر رفعت عمتي راسها واحنا اطشرنا نضحك جوا المخده
_جهاد:: وين الحزام
_شاهيناز:: لاعمه لا راح انام
_قس:: تتنفس دموع العلويه جهاد
_جهاد:: الحزام ويننننننن
انلصمنه كلنا وعمتي ادور على الحزام
سكتنا بس اجسامنا ترجف من الضحك جوا البطانيه فطست من الضحك من عمتي جابت شاهيناز ب الحزام فوك البطانيه وشاهيناز اطفر جوا البطانيه
_جهاد:: جوا راسي الحزام التتحرك ماتلوم غير نفسها
كتمت ضحكتي ما اريد احصل طكه
رفعت راسي من المخده بعدت الحاف وكمت باوعتلي قس وهمزت
_قس:: وينن
_ملاك:: اشرب مي
هزت قس راسها وسكتت اخذت الربطه ونزلت من الغرفه صارت غرفه غضنفر وقدس كدامي بس ضوه النشره جاي من جوا الباب والغرفه ظلمه
نزلت الدرج البيت هدوء مستحيل شخص يضل كاعد بعد ال 11 بليل لان الكل ينام وتصير كعدتنا على صلاة اليل قبل صلاة الفجر وبعدها انام ونكعد قريب ال 10
دخلت للمطبخ اخذت كلاص الماي ومشيت للبراد اشرب انتبهت على باب الحديقه مفتوح
وكغت كدام البراد اشرب ماي تذكرت قصيده جانت تحجيها عمتي جهاد قبل كم يوم لباسم الكربلاء
_ملاك:: "يمتى تموت من القهر روحيي"
"اهلي تحت الترب بس بقو ب الكلب"
"مثل نار الغضى نيارن فركاهم"
"لون بيدي يصيح جان امشي وياهم"
" ادور على الاحبهم وين الكاهم"×2
"اذا انسى الهوا هيهات انساهم"
سكتت ناسيه كلمات القصيده وكفت اشرب ماي انصدمت من اجاني صوت!!
_فقار:: "ما اكابر بعد والحبيب ابتعد"
"ليلي خلص نوح وسهر روحييي"
"اهلي تحت الترب بس بقو ب الكلب" ×2
"يمتى تموت من القهر روحي"
"شكبر صبري... حفرت الحود احبابي"
التفتت ب اتجاه باب الحديقه كلبي يدك بسرعه شفت فقار واكف بباب الحديقه الجكاره بيده ومدنك راسه من خلص باوعلي وابتسم
_فقار:: ذكرتج بكلمات القصيده
هزيت راسي ب اي عفت الكلاص على البراد ومشيت اطلع استوقفني كلامه
_فقار:: ماجان قصدي
هزيت راسي بعدم اهتمام
_ملاك:: مو مهم
_فقار:: ماحبيت اكسر بخاطر شاهيناز
عكدت حواجبي والتفتت اباوعله بعصبيه
_ملاك:: ترا اني ماكتلك اكسر بخاطرها لاخلفه عليه انطيتك كلاص المي وسويته اجر لا اكثر
هز راسه مدنك للارض
_ملاك:: اذا ما كعد عمتي اكلها فقار يشرب جكاره
رفع عيونه يباوعلي مصدوم باوع للجكاره وهز راسه بلا
_فقار:: لا اوكفي علويه هاي مو الي هاي ل
انفتح باب المطبخ شفنا عمتي ب الحزام واكفه تباوع لفقار بعدها ماحاجيه وطلع جادح جاي ب اتجاه فقار مانتبه علينه
_جادح:: اكلك هاي الللل
انصدم جادح بيه وب عمتي تباوعلهم وتباوع لجكاره
_جهاد:: الى متى؟
بلع فقار ريكه يباوع لعمتي
_فقار:: مو الي والله هاي جادح انطاني ياها
_جادح:: شنو شنو جادح هل جادح هذا انت وعمتك تشمرون التهايم براسه
دار فقار على جادح مصدوم
_فقار:: جادححح بلا شقه انت انطيتني الجكاره
_جادح:: لاعمي وين منطيك انا رجال مادخن انوب تريد تخربني بسوالفك هاي
جانت عمتي تباوعلهم مكتفيه ايديها
_شاهيناز:: لاعمه هذا ابو عماد يدخن حتى باكيت الجكاير مالته اسود
التفتنا كلنا مصدومين بدخله شاهيناز باوعلها جادح مصدوم
_جادح:: اعوذ بالله من الشيطان الرجيم اجيتي تركضين سالفه بيها جكاير
_شاهيناز:: شبيك سيد لاتظلمني ترا دخلت ب الصدفه
_فقار:: عمه تدرين بيه صفحه بيضه ماعندي هاي السوالف
_جادح:: نجب لك نجب شبيك خايف هيج ترجل صير رجاللللل
باوعت عمتي لجادح وابتسمت باوعتلنه اني وشاهيناز وصاحت بينه
_جهاد:: طلعن
_شاهيناز:: ليش خل نشوف
دارت عمتي على شاهيناز بخزره سحبت شاهيناز وطلعت من المطبخ وصلنه لنص الصاله ونفتح باب المصلا طلع السيد من المصلا باوعلنه وابتسم
_عبد الرؤف:: ها بنياتي
_شاهيناز:: سيد فقار وجادح يدخنون ب المطبخ
_عبد الرؤف:: شنوووو!!!!
سمعنه صيحه جادح جاي من المطبخ
_جادح:: ابليس الثانيييييي
باوعت شاهيناز لسيد وحجت تجر بيه نصعد
_شاهيناز:: معليه اني سيد انوب لا اطلع نقاله حجي
ركض السيد للمطبخ واني وشاهيناز ركضنا للدرج
نسمع بس صوت الحزام ورزايل السيد فقار يحلف الجكاير مو اله وجادح يحجي على شاهيناز
صعدنا اني وشاهيناز الغرفه نضحك دخلنه الغرفه ونمنا بفراشاتنا نضحك متونسات بالرزاله الي راح يحصلوها اكيد عمتي ماراح تضربهم بس رزاله السيد تكفي وتوفي
"قدس"
صدمتي من شفت سهام ومنة الله كدامي يتعذرن الي من الي الصار وكلامهن جنت مصدومه ب العلويه جهاد ماتوقعت ترجع حقي بنص ساعه بس!!! نص ساعه؟
فرحت من شفتهن يبجن وخجلانات بس فرحتي جانت ناقصه كلام سهام مايروح من بالي
سولفت لاخواتي ونضال كلشي
وهنا مقهورات ومحروك كلبهن مايكدرن يعاركن يستحن واني ما ارضا يعاركن احد ما اريد احد من الموجودين يصغرهن لان بهذا البيت اكو قوانين حقك تاخذه بس بدون ضرب!! والعلويه جهاد قلب القانون بكبره
طلعن خواتي من الغرفه بعد ما سمعن صوت غضنفر
دخل غضنفر للغرفه بدون مايباوعلي واني اصلا ما اهتميت لوجوده نمت بمكاني وغطيت نفسي ب الحاف
ثنينه جنا هادئين وساكتين
بس اني نقهرت نقهرت بهدوئه اني زوجته وبهذا اليوم صار بيه هيج وفوكه هوا صاحب الزايد؟ خلي لعد اصلا اني ما اريد وبطلت اريده عرفت نفسي ومعزتي عند غضنفر من هذا اليوم!؟
اي عادي خلي كلمن براحته دام اني ما اريده وهوا مايرديني مايهم
مسحت دموعي الطاحن عليمن تبجين شبيج؟ ترا انت صاحبه الحق مالازم تبجين شبيج سكتي
انكلب منطيته ضهري
مر الوقت وثنينه التزمنا السكوت سمعت صوت دكه الباب طلع غضنفر يفتح الباب سمعت صوت عمتي جهاد تحجي ويا غضنفر
سد غضنفر الباب ودخل سمعت صوت صحونه وصينيه نحطت ب الارض
_غضنفر:: كومي اكلي
سكتت بدون رد تحسر ورجع كرر كلامه
_غضنفر:: قدس كومي اكلي
_قدس:: ماريد
_غضنفر:: ماماكله انتِ
_قدس:: مو شغلك
سكت ومارد عليه استعديت ابجي مره ثانيه يعني سكت مو مهتم مايهمه اكل لو لا؟ اي هسه بيندت على حقيقتك غضنفر
صرخت مفزوعه من نرفع الحاف مني ونرفعت من الجربايه
_قدس:: وخرررر كتلك ماريد
_غضنفر:: مانمشي ب المزاج احنا
اخذني ب اتجاه الصينيه كعدني وكعد بصفي دفعته وكمت
_قدس:: ليش ليششش تلح غضنفر مو اكلك ما اريد؟
_غضنفر:: لا حبيبتي مو بكيفج ماتردين تاكلين وانتِ الممنونه واذا ماكعدتي هسه؟؟؟؟
باوعتله وكتفت ايدي
_قدس:: اي استاذ شتسوي اذا ما كعدت
_غضنفر:: هيج اسوي
تقدم ب اتجاهي واني ابتعدت لزمني من اكتفي وحضني من ضهري كعد ب الارض وكعدني بحضنه محاوطني ب ايديه مانعني اتحرك
_قدس:: كتلك ما اريد وخر عني ايدي تاذيني رجلي تاذيني بطني تاذيني
_غضنفر:: وانا بكبرج جاي تأذيني!!!
سكتت وهوا سكتت باوعت للصينيه معلاك والمقبلات صمون وقوطيتين ببسي
اخذ صمونه من الصينيه خله بيدها معلاك وخلاه كدامي
_قدس:: مو جوعانه تلعب نفسي
_غضنفر:: عادي تجربه بس
بقيت صاكه على سنوني وساده حلكي وهوا حاط الكمه كدامي رغم جنت جوعانه وميته جوع
نغزني بخصري واني كمزت فاتحه حلكي بعدني ماحاجيه وحط الكمه بحلكي
ماكدرت اشمر الكمه من حلكي باوعتله بخزره امضغ ب الكمه ابتسم وباسني بخدي
ب حركتة هاي طفه نار بداخلي وابتسامته خلتني ادنك مستحيه وساكته بدون تطفر
رجع يلفلي لفات ويوكلني واني اكل بهدوء
حجه بعد ما جان ساكت
_غضنفر:: انا ما مستهان ب الي سوو بيج وماراضي وعرف استاهل الي اجاني منج وزايد ما وفيت بوعي الج وب اول يوم الج صار بيج هيج ونكسرت فرحتج بس انا ما جان بيدي شي شنو متوقعه انزل امد ايدي عليهن؟
ضحكت ب استهزاء على كلامه
_قدس:: لعد الي سونه بيه قليل؟
_غضنفر:: مو قليل وكتلج حقج يرجعلج ورجعلج بساعتها
بعدت ايده عني وصحت بي
_قدس:: منووو رجعلي حقي انت؟ للااااا غلطانه العلويه جهاد رجعتلي حقي انت سكتت عن حقي
_غضنفر:: قدس فهميني ماكدر اتعارك وياهن هنا اكو حدود شكد ماجان الغلط جبير الزلمه مايفكر يمد ايده او يرفع صوته على مره وجهاد مره وماقصرت بيهن
_قدس:: عوفني غضنفر خنكتني
_غضنفر:: ماخنكتج بس انتِ ماترديني افهمج جهاد لو تحركهم بنار محد يكلها ليش لان جهاد مو بس جبيرتنا لا جهاد الي وراها مايسمحون لحد يفكر يحجي وياها
ضحكت على كلامه باوعتله وحجيت
_قدس:: الي وراها ابوها السيد عبد الرؤف اكيد مايرضا احد يحجي وياها
_غضنفر:: لاا اكو اكبر من السيد عبد الرؤف ساده كبار لو جهاد ضاجت وصاحت اخ شايفه هذا البيت؟ ينهدم على راس الي يفكر يحجي ويا جهاد
جنت مستغربه كلامه منو يعني غير السيد يفزع للعلويه جهاد! ماجنت فاهمه الي يقصده غضنفر منوو!! وشنو راح يسوون بعدين وشلون راح يدخلون بيوم يشعلون النار بس لان دمعة العلويه جهاد طاحت!!
كمت من حضن غضنفر وهوا كام اشرلي على البرده بزاويه الغرفه
_غضنفر:: غسلي وتعاي
باوعت للبرده متذكره اكو حمام ب الغرفه بس البرده مغطيته واني من غبائي نزلت للحمام الجوا
دخلت للحمام قفلت الباب ونزعت ملابسي
فتحت دوش الماي ووكفت جوا الدوش اشوف نفسي جاي انزف من الدم
ما اهتمت ورفعت راسي ودموعي تصب ليش هيج سون ليش كسرن فرحتي حتى غضنفر حسيت بهذا اليوم انبتن بينتننا الحدود
سديت الدوش ووكفت كدام المرايه دنكت بسرعه ما اريد يرجع يتكرر عليه الي شفته لبست ملابسي بسرعه وطلعت من الحمام ايدي على بطني متوجعه
شفت غضنفر واكف بنص الغرفه يلبس بملابسه ما اهتميت اله ومشيت لجربايه غطيت راسي ونمت
ارجف بردانه
سمعت صوت ريموت السبلت يعني طفاه دقايق وحسيت بي صار ورايه على الجربايه رفع الحاف وتغطه
توترت من قربه ما متعوده على هذا القرب من غضنفر
حسيت بي يتقرب مني ايده صارت على خصري سحبني لحضنه منطيته ضهري
صار صوته قريب على اذني
_غضنفر:: احبج
_قدس:: ما احبك
_غضنفر:: بس انا احبج
_قدس:: ما ايهمني
_غضنفر:: نجبي انا يهمني
باسني بخدي واني اتجاهلته بس جسمي كله يرجف متوتره من قربه
" عاتكه "
ثاني يوم رجعنا لنجف بعد كل الي صار منة حاولت تعتذر وتحجي ويا عمتي بس عمتي لاااا!! جانت رافضه قرب منه ورزلتها مرتين وبكل مره منة تبجي وتدخل للغرفه حتى العلويه لباب رفضت منة وسهام
سهام ماجانت مهتمه بكد منة لان علاقتها ب العلويه لباب علاقه ام ببنتها مو حفيدة حتى تصيحها امي
رجعنا لنجف ثاني يوم ارتاحينا ورجعنا لروتينا المعتاد والسيد والكل بدو يجهزون لمحرم العلويه تطلع تشتري تحضريات محرم وتوزيعات القرايه الي راح تصير ببيتنا
الكل راح يتواجد ب العشره الاولى من محرم السيد عبد المقتدر والسيد معز والعلويه لباب العشره الاولى بكل سنه تكون ببتنا..
هاي الايام نجهزلها بحماس وب حزن
محرم شهر اعزاز قلوبنا وب نفس الحظه شهر فقدان اعزازنا
لهذا نستقبل هذا الشهر بهلفه وشوق وبس لهفه حزينه وشوق حزين
" مهره "
مرت الايام واني متوتره ماعرف شسوي اريد ابتعد عن مسلم ما اتحمل قربي منه بمجرد وقوفه بجانبي يحسسني ب الرعب
دخلت للغرفه شفت امي كاعده تضفر ب كصيبه لجين اختي تمشيت ب اتجاها
وكفت كدامها وحجيت
_مهره:: ماريد مسلم
باوعتلي وحجت بعدم اهتمام
_جنان:: شنو الجديد كل يوم تجيني ما اريد مسلم
_مهره:: لعد ماتشوفيلي حل!!!!!
كملت تضفر بشعر لجين بدون ماتنطيني اهتمام
_جنان:: صار رجلج بعد ششوف من حل تعودي
احترك كلبي من برودها بكل مره اجيها هيج تحجي تعودي؟ شتعود انسان اكرها اكره قربه الي
_مهره:: ما اتعودددد شوفيلي حل لا والله اشرد واسود وجوهكم
باوعتلي بعصبيه وزمخت
_جنان:: شرديييي خليهم يغسلون عارج
_مهره:: عاري اني عار!!!
_جنان:: اي لعد التريد تشرد شيسمونها عار متزوجه وتردين تشردين والله عمه صلفه وتحجيها
مسحت على وجهي بعصبيه عيوني مدمعه
_مهره:: ما اريده كل ما اوكف يمه لو اشوف وجهه اتذكر كل الي سوا اتذكر من اغتصب ليلى بت جمال وهيه عمرها 10 سنوات بس!!! اتذكر من اعتدى على سما اكثر من مره وصارت حامللل واهلها رادو يكتلوها لو ما الله لطف بيها وزوجوها اله يضمون عاره!!! اتذكر كلشي بس اشوفه هذا مريض مو انسان صاحي ولد وبنات ما مرتاحين منه يتحارش ب الصغير وب الجبير مو نفسه تحارش ب اخته و
بعدني ما مكمله كلامي وكامت لطمتني على حلكي
بعدت عنها ايدي على حلكي متوجعه من ضربتها خزرتني تاشرلي اسكت
_جنان:: وتسكتين وتاخذي لو مغتصب امج هم هاي قسمتج ترضين بيها ورجليج فوك راسج
_مهره:: ما اريده
_جنان:: بيج خير روحي كلليهم ماريده يعرفون شلون يشكون حلكج ويخلوج غصبنا عليج تقبلين
باوعت لامي بأسف عيوني مدمعه مشيت طالعه من الغرفه هذا هم حضي حتى امي وكفت ضدي حتى امي وكفت وياهم عليه اهم شي عدها لا محمد ينزعج مايهمها بنتها الي جاي اطيح بتهلكه ويا هذا الانسان
اعرف لو بقيت ويا مسلم ما استمر لو اموت على ايده لو يطلكني محد يعرف مسلم بكدي
بكد ماتحارش بيه واذاني بعيوني مره شفته نايم فوك اختي لجين وهيه عمرها 6 سنوات وقتها
فوك هذا مطلك وعنده طفل ماتعرف شنو تحكم علي مريض ومختل همه الوحيد يشوف جسم مرأءة كدامه بس وقتها يهمه شهوته بس
وكفت كدام المغسله المرايه كدامي مهره مالازم ترضين ادفنين نفسج بهاي المقبره لو جان مسلم انسان فعلا لاا مو انسان رجال!! جان رضيت واستقبلت الموضوع
بس مسلم ذكر يهمه غرزيته الحيوانيه بس
اني ما متأكده من الي راح اسوي معقوله راح اطيح بمشكله معقوله اطيح بتهلكه وما انجح بخطتي
ما اعرف شنو راح يصير بس خلي الي يصير يصير اني مارضا ادفن نفسي ويا هذا الشخص
مرت الايام واني منتظره اليوم الي راح اروح بي لنجف يوم يوم محد جان يعرف الي راح اسوي شنو؟ وشنو ممكن يصير واني هم ماجنت اعرف بس اعرف ماراح يخيب ضني
قبل محرم ب اربع ايام طلعت من البيت ب اتجاه سياره مسلم فتحت باب السياره وصعدت
باوعلي وابتسم
_مسلم:: حتى ب العبايه تخبلين
_مهره:: اي ايي يلا امشي
_مسلم:: لاتشمرين لج ترا ما اخذج
استغفرت مسيطره على نفسي شغل السياره ومشه طالعين لنجف للمكان الي راح يكون حبل نجاتي من الي اني بي
الطريق كله جنت افكر معقوله تخيب توقعاتي معقوله ما اكدر انجح بس لااا!! املي ب الله جان جبير رغم كلشي بس جنت واثقه ب الله اكيد ماراح يخيب ضني
فتحت عيوني واني اشوف لافته دخلونه للنجف
عيوني دمعت من تذكرت الفتره الي قضينها هنا جانت اجمل ايامي
نزلنه من السياره اني ومسلم ومشينه داخلين لصحن الامام علي (عليه السلام)
جانت عيوني ب اتجاه طريق الحوزه باوعلي مسلم وحجه
_مسلم:: روحي توضي حتى تزورين يلا مانريد نتأخر
هزيت راسي ب اي ومشيت ب اتجاه الحمامات
دخلت للحمامات نزعت جواريبي والعبايه وتوضيت كل شوي اصفن على الماي كلبي يدك بخوف
طلعت من المغاسل بعد ما كملت وضوء شفت مسلم واكف من بعيد عيونه على النسوان رغم لابسات عبي بس لا!!! عيونه تكصهن كص
سبحان الله الانسان الوصخ يبقى وصخ لو كعد ب اطهر اماكن العالم
باوعلي واشرلي نمشي جان مركز ويا النسوان بكثره
مرت مره جبيره تجي ب الثلاثينات من عمرها رغم لابسه عبايه بس جسمها منفوخ وبارز
صارت عينه عليها من ورا شلون العبايه تطبع عليها
شكد لعبت نفسي منه محد يولمني لو حاولت افتك منك انسان وصخ
افترقنا اني ويا وهوا ياشرلي على الامانات نلتقي بس نخلص زياره
دخلت لتنفيش وكبل للامام علي
دخلت المرقد كدامي عيوني دمعن حجت بكلبي
_مهره:: ياعلي يا ابو الحسنين يابو الشدات جيتك تخلصني من الي اني بيه احضرني يا ابو الحسنين
لزمت المرقد بيدي وعيوني صبن دموع شوقي ولهفتي الك يا علي جبيره جنت كل يوم بس اخلص درس الحوزه ارجع اكعد هنا كدام المرقد واتمعن لمرقدك
خلصت زياره وكعدت اصلي ركعتين للامام علي
خلصت صلاتي وقريت زيارة الامام علي
باوعت لساعة هذا الوقت الي اتفقنه بي اني ومسلم نطلع
اخذت السبحه وطلعت ايدي ترجف ما اعرف الي راح اسوب صح لو غلط ما ادري راح انجح بفكرتي لو لا! لو يعرف مسلم ب الي راح اسوي احلف علي يكتلني بنص الوادم ومحد يفكني من ايده
طلعت من صحن الامام علي شفت مسلم من بعيد واكف كدام الامانات عيونه تفتر ورا النسوان
مشيت بغير اتجاه عيوني على مسلم خاف يشوفني
مشيت بين الناس اضيع عيونه
بس لاا كدر يلكفني ويشوفني باوعلي وعكد حواجبه مستغرب رفعلي ايده واشرلي متوقع اني متيهه الطريق
رفعت عباتي وركضت درت وجهي اباوع لمسلم يمشي وراي مسرع بخطواته
ركضت ب اسرع ما عندي من القوه الناس تباوعلي مستغربين ركضتي
_مهره:: ياعلي بداعة عزيزتك زينب تفرجها عليه
ركضت بسرعه عيوني مدمعه شفت مسلم يركض وراي عيونه براسه لو يلكفني يموتني ادري يكتلني كدام الناس يعني هم متفشله وهم ماخذته رجل الي
درت وجهي من مسلم اباوع كدامي شفته اي شفته كدامي!! جاي ب اتجاهي مدنك راسه ويمشي ركضت ب اتجاه رافعه عباتي يمشي هوا والسيد عبد الرؤف ثنينهم مدنكين روسهم ما منتبهن عليه
سمعت صيحه مسلم من خلفي
_مسلم:: مهره!!!!!!
رفعو الساده روسهم صارت عيونهم عليه ركضت ب اتجاههم ابجي مرعوبه من الي راح يصير ركضت ب اتجاه السيد مفرقد وصرت بضهره
_مهره:: سيد لاتخلي ياخذني.....
...................
بارت طويل كلش طويل ورجعنا مره ثانيه ب السرد القديم دام الكل يكول السرد متغير مو مثل الاول؟
شلونه السرد؟؟؟ 🤨🤨🤨
شاهيناز وجادح
فقار وملاك
هل الرباعي شنو منتضرهم ب المستقبل؟
خجولي وغضنفر 😔💔
نقهرت على قدوسه ماتساهل الي حلصته
وشنو مستقبل علاقتها هيه وغضنفر!!
مهره!! يامهره شنو تتوقعون راح يصير؟ ممكن يساعدوها الساده؟
العلويه جهاد وشنو ضامه من قنابل جديده
جاي نشتغلكم اني والعلويه جهاد على السكته ب البارتات الي جاي يشيب الراس!!!
شكرا لزيارتكم عالم روايات سكيرهوم
