رواية هشاشة قلب الفصل العشرون بقلم العباديه
يحجي ويأشر بإيديه بعصبيه ومن يجيب طاري اسمهه يعكمش وجهه بإستصغار .. وكف بسرعه طلع ورگع الباب قوي فززني وخله دمعتي تصب !
اني شسويت يربي .. هيَ راسلتني ماتدري برفضي
وبعدين من شوكت صارت انگس خلق الله غير جان خاطبهه وحاطهه بنص الكليه ويفتر بيهه !
ظليت ابجي من حرگة گلبي .. بس يرزل بيه ويلومني والخطأ اليرتكبه يشمره عليه !
دخلت نهى متفاجئه من الصوت مالته وعصبيته المفرطه .
نهى.. يا يا ثُرىٰ شبيج تبجيين شصار وليش ماهر عصبي
حضنتهه وظليت اشهك وهي سكتت عرفتني مااريد احجي . بس اريد افرغ البداخلي .
ظليت ابجي مقهور تذكرت كل المواقف من هانني , من رزلني , ومن طردني هم .
كمت من يمهه مالي خلگ اسولف لأي بشر ولا إلي خلگ اشوف اختي مقهوره على حالتي !
رحت للغرفه طلعت موبايلي وصفنت على مراسلاتنه القديمه ودمعتي تنزل على خدي .
مليت وانفتحت جروحي .. ذبيت الموبايل ولفلفت راسي ونمت . هذا افضل شي .. النوم الحل الوحيد حتى اهرب من الواقع .
.
.
حسيت نهى تگعد بيه ع العشه هوَ اني روحي ماطايقتهه مو الا اطيق اتعشه.
كتلهه مااريد مااقتنعت ظلت تلح وتگرگش بيه .. مليت نترت بيهه بصوت عالي
- مااارييدد نهىىىى مااريد گووه هيييه
ظلت صافنه بوجهي .. ابتسمت متفشله وهزت راسهه وطلعت ضايجه !
تخبلت اني اكيد تخبلت .. ظليت ابجي وابجي وابجي لما غفيت بدون مااحس على نفسي .
كعدت الصبح جسمي نشط وشبعانه نوم . رحت سويت ريوك وتريكنه اني ووليد طلع يركض متأخر الله يساعده خطيه يتعب .. الصبح والعصر واكف .
ظليت منتظره السايق . شكد انتظرت وهذا ماكو !
نهى نايمه وضايجه مني من البارحه بعد ماحجت وياي ومنا سهرانه من وره هذا المفعوص .
صارت بـ8 ونص والسايق ماكو. مر وقت المحاضره الاولى اكييد. خابرت وليد علمود يخابره .. كال هسه شويه واتصل بيج اكلج يجي لو لا.
صدك خمس دقايق وخابرني كال :-
وليد.. اكلج ثُرىٰ هذا اتصل عليه وميجاوب!
- ييااا وشلون هسه شلون اروح
- مااعرف
- وكليتي شلون رايك بله ابقه بدون دوام اليوم؟؟
وليد.. ابقي اليوم لتداومين هسه اله السنه كلهه تخلصيهه دوام
- وليد كل عقلك تحجي بس تفوتني محاضره اتيه الاول والتالي وبعدين اني مبدله اعوف تبديلتي لا والله
وليد.. اي والله صدك داحجي ابقي اليوم
- لا والله ولاابقه سويلي حل تعاللي انتَ وصلني وارجع
وليد.. اليوم يس اني بالصيدليه محد وياي شلون اخليهه فارغه
- وهسه شنو الحل؟
وليدد.. انتظري شويه حخابر عمي ماهر
انتفضت
- لا لا لاتخابره لاااا
وليد.. شبيج شبيج شبيج فززتيني
- راح اروح مشي امري لله
وليد.. لو اموت مااخليج تروحين مشي انتِ امانه عدنه واخليج تمشين لوحدج لا لا مستحيل هسه حخابره
- بهالوقت بالدوام
وليد.. ميخالف هوَ دكتور يگدر يطلع
- بكيفك
سديته منه ومنتظره القاسي .. بلش الخوف يتغلغل بداخلي شلون راح اواجهه مااريد اشوفه بعد الصار بيوم أمس !
ظليت منتظره .. لما سمعت الهورن طلعت ركض ولكيته السايق مالتي ايييييي همزين .
صعدت ركض خاف يجي ويلحگ عليه جاي اصعد ويوگفني .
بس تفاجئت ولا بنيه بالسياره !
سألته ؛-
- اشو البنات اليوم ماكو
علي.. اي بس انتِ
- ياا ليش؟؟
علي.. اني اليوم اخذتني النومه وتأخرت علجين ف البنات راحن وي اهلهن وبقيتي بس انتِ
والله مبين من عيونه الحمر جان نايم هنيالك عمي .
- يااا هذا هم حظي
علي.. هسه تقريباً المحاضره الثانيه مبلشه
- يييحح صخااام بوجهي شلون راحت عليه محاضره
علي.. والله اعتذر اني اول مره والاخيره ووعد
بعدني بالسياره واتصل موبايلي رقم غريب !
رديت وسكتت اريد اشوف الصوت هاي دائماً اسويهه اذا رقم مااعرفه اجاوب .. اذا صوت ولد اسده واذا صوت بنت احجي .
اجاني صوته يزلزل وعصبببيي
ماهر.. انتِ تضحككين عليييه شنووو. تخليينيي اجي والكاج ماكووو شكالولج عني قشممر اني ششايفتني مقابيلج طفلللل وتتشاقين وياه .. من جايج السايق ليش تخليه يتصل عليه ليششششش.
صوته شعلواته ويصيح بعلو صوته ساده السماعه مال الموبايل بإصبعي خاف الولد يسمع والصوت بعده طالع .
رديت بصوت ناصي ومدنگه
- والله بعدك ماواصل وهوَ إجاني
ماهر.. عفت الددددوووااام وجيت ركضض هسسه شيرجعني شيرجعننننيي. استغفر الله الصبر ربي الصبررر.. رررروحي يابه روحييي
يا هذا لطش اشو كل كلمه يگولهه مرتين شعدنه قواعد خوب مو قواعد اشتبه يمكن .. عود يحجي الكلمه مرتين حتى يسوي تأكيد لكلامه هه .
سديته منه واني ميته من الفشله .. النوب هذا يباوع بيه بالمرايه ويريد يسألني .. اني غلست وسكتت.. هوَ كال :-
علي.. منو هذا الهيج صاير عصبي ؟
- اااءء اخويه
علي.. مبين يغار عليج الله يسلمه هاي لان تأخرت هيج سوه لو ماجاي شيسوي
سكتت لان اذا احجي بعد شيسكته. شرط الا ينهد عليه مثل النهر اعرف بسوالفهم ذوله.
وصلني وراح .. نزلت ولكيت المحاضره الثانيه مبلشه
هسه شلون ادخل لو لا؟؟
اذا دخلت اكيد اتفشل ... واذا بقيت الوقت مايمشي وملل لان محد وياي لا صديقه لا بنيه غريبه تحجي وياي والكليه فارغه بس كم طالب بالكافتيريا.
رحت لقاعتنه مجبوره ادخل چا شأسوي امري لله كله من وره عليوان. هههه تذكرت علاوي جيرانه اشتاقيتله هذا هم علي خوش تشابه بالاسماء ولو هوَ العراق نصه علاويات وماشاء الله كلهم وكحين .
رحت للقاعه دگيت الباب ودخلت . تذكرت اول يوم من اجيت متأخره ولگيت ابو خاولي.
طلعت راسي لگيت عدنه استاذ مهدي . هم بعده ولد شاب ومامتزوج فوكاهه.
استأذنت منه ادخل وخلاني ادخل عادي .. همزين .
كاللي :-
- ليش متأخره؟
- استاذ السايق ماخذته النومه وتأخر عليه
- هاا.. زين شنو اسمج انتِ؟؟
- ثُرىٰ
- مم ثُرىٰ حلوو
ظل يشرح وعينه كلساع عليه .. استغفر الله يربي ادري شني لافته بگصتي اگللهم بصبصو عليه .
اشو ياهو الشافني وبصبص مليت تره .. صار الوضع ماينطاق.
كمل اليوم من محاضره لمحاضره .. رجعت للبيت لگيت نهى گالبه الچهره .
اجيت حضنتهه
- نهااوي حبيبتي
دفعتني بخفه.
- وخري عني
وكفت مثل وكفة ماهر وأأشرلهه بإيدي تماماً مثله لان اني سولفتلهه الموقف والمشهد واللقطه والكلمه ماخليت شي.
عكدت حاجبي ومثلت صوت رجال خشن وعصبي عود :-
- لج انيييي ثُرىٰ ثُرررررررىٰ بعظمتي تدفعيني ؟
ظلت صافنه عليهه وطگتهه ضحكه النوب اريدهه تسكت ماكو .. ابتليت خوب ماابتليت
ضربتني بخفه وتضحك
نهى.. وخري عني مو تريدين تطبقين سوالف ماهر عليه بس الصراحه ماتلحكين ماهر لو شما تسوين
- يححح اصلاً هوَ مايلحگني
- لا بس يركض وراج ويسبقج هههه
- هههههه ديلا صاحبتيني هسه
نهى.. تعالي سولفيلي موقف امس واني اصاحبج
- ههههههه يلا اسولفلج وانطيني اصبعج الصغير
مديتلهه اصبعي وضحكنه اثنينه
ثُرىٰ.. بسس اريد اعرف وين جان عقلي من جنت اسويهه
نهى.. اي والله اني هم ومقتنعه اتصاحب واتزاعل بالاصبع الصغير هههه هههههههه
ظلينه نضحك وسولفتلهه المقتل مال ابو الرزايل.. لازم كلشي تعرفه تفصيل تفصيل .
.
.
وصلت نهى للأربعين وكامت تكدر تكوم وتتحمل مسؤلية بيتهه واني واجبي بعد انتهى.
ودعتهه وظلت تبجي متعوده عليه واني فرحانه
- خايبين راح ارجع لااهلي بعد يانهى ياوليد
اقلد وهيَ تضحك وتمسح بدموعهه وتصيحلي البذاته.
رجعني وليد لااهلي. وراح
يممه افيشش ياريحة هلي غير طاگ گلبي عليهم صار شكددد.
بوستهم وحضنتهم والنوب كلهم ملتمين عليه عبالك جنت بالقتال ورجعتلهم .
رجعت لغرفتي وكضيناهه سوالف مال شهر ونص ماخلينه سالفه مانبشناهه .. حسيت طاحت وذّره من لساني سكتت بلكي يستراح لساني وانصدم بالساعه بالـ4 ونص الفجر .
عززااا شوكت الحگ انام باجر وراي كليه .
ركضت للمطبخ فرچت وركض تلفلفت ونمت .
.
كعدت الصبح دايخه وعيوني متصاحبات من النعاس.
تريگت واجاني السايق ورحنه للكليه اليوم مو علي الاخذنه جاي إخوه .
وصلنه للكليه وراح .. محاضره وره محاضره لما وصلنه لمحاضرة إستاذ مهدي تعبت وطفيت ردت اطلع بنص المحاضره ماقبل وكعدني.
گعدت مجبوره وحطيت ايدي على خدي وصافنه على السبوره وعلى شرحه بس ماادري شيشرح بالي سافرررر لذيج القاعه ولذاك المحبس الماروني وللعيون الغاضبه .
عيوني بلشت تنقفل وغمضن شويه شويه لما بعد صارت سواد وغفيييت.
حسيت صوت همس بالقاعه وضحك .. فتحت عيني قليل ورجعت انقفلت شلون سالفه هاي شيفتحهن اليوم .
ظليت ارمش وارفع بحواجبي لفوگ احاول افتح عيوني لان كلش كلش ماينتفحن بعد قفلن. صدك بهاللحظه احتاجيت لاصق توم .
شويه والستيج مالتي انمدت ايد عليه وانضرب بقوه وصوت بإسمي رج القاعه
- ثُررررررىٰ
فزيت ذيج الفزززه بحيث جسمي كله رجع لوره الستيج بعد ماجان منحني عطت من الرهبه كلبي راد يوكف.
القاعه انرجت بالضحك وهذا واگف فوگ راسي
لزمت گلبي مرعوبه ومن ركزت بوجهه عيوني غوشن وبعد ماحسيت على شي.
گعدت على نفسي بالإداره وجسمي يرجف وحيلي بايد لااول مره تصير بيه.
النوب من كعدت ظليت ابجي من الخوف والاداره مخبوصين عبالهم جلطه .. هيَ رادت تصيبني جلطه من وره هذا .
مهدي.. اسف والله اسف ماعبالي هيج تفزين بس لان نايمه واني اشرح
- استاذ لان البارحه تعبانه ومانايمه ماحسيت على نفسي اني اعتذر مو انتَ
العميد كال :- بابا انتِ عندج مرض مزمن خاف سكر هبوط ضغط؟
- لا استاذ مابيه شي
- هاا خوفتيني عليج الحمد لله ع السلامه
كله من وره هذا ابنل ابنل انرعبت رعب متت يعني واحد نايم نايييم وتجي انتَ بكل برود تسوي بيه هيج ماحسبت حساب يمكن يموت .
من طلعنه نريد نروح ننتظر السايق بره يم الباب مال الكليه .. استاذ مهدي هم ماعنده سياره يوصلونه الدكاتره الوياه.
مشينه اني والبنيه الوياي بالخط وهوَ يمشي بموازاتنه .. كلش قريب عليه احسه يريد يحجي شي.
وكفنه وهوَ وگف يمنه ويباوعلي .. هسه الي خلگك اني استغفر الله يربي.
هوَ فتح حلگه راد يحجي واني رأساً بحركه سريعه التفتت على البنيه اليمي وسويت روحي احچي وياهه وانطيته ظهري .
هيَ عوزهه بس انتَ .. هسه شلون اطم روحي حتى مايباوعولي شلون سالفه هاي يربي.
رجنا للبيت وانسطرت .. اخو السايق يريد يوصلنه للبيت واني مسطوره من النعاس والتعب
كلتلهم :-
- اليوم اني وصلوني اول
البنيه اليمي اول وحده نوصلهه كل مره كالت :-
- انتِ وين بيتكم
صفنت بوجهه واتذكر وين بيتنه صدگ؟؟
كتلهه بفهاوه :-
- وين بيتنه؟؟
- يااا ثُرىٰ بيتكم وين؟
- مدري
ظلو يضحكون عليه بس اني التعبير يخوني مااعرف اوصف المكان اوي شكد يدققون.
كال السايق :-
- اني اندله شسالفه غير جبتهه
- خوش خويه وصلهه لان البنيه فقدت الذاكره
ظليت مبتسمه وفشلانه من الموقف يبوو.
رجعت للبيت رأساً نمت .. يمه احس روحي صارلي سنه مانايمه كله من وره مروه وتقوى ظلن يدگن فوگ راسي سوالف لما تيهنني .
يوميه بالخط نمر على الطريق اليودي لبيت ابو خاولي .. يوميه ادعي من ربي بس اشوفه وألمحه .
كل سياره تعبر تشبه سيارته اظل اصفن بيهه واركز بيهه بلكي هيَ وتخيب آمالي من تطلع مو هيَ .
ثاني يوم اجه السايق علي وصلني وبالطريق التفت عليه يضحك
علي.. ثُرىٰ نسيتي وين بيتكم شنو؟؟
ركزت بكلامه بس مافهمت شي .
- ها؟
علي.. ههههههههه بيتكم بيتكم وين؟
سكتت مبتسمه ابتسامه اقتصاديه صغيرونه.
عرفت اخوه مسولفله .. خفه ويهه مايضم السالفه .
وصلني للكليه وراح.
دخلت للمحاضرات عادي بس محاضرة استاذ مهدي .. ظل يتلوگ طول المحاضره وكلساع مگومني ويحاول يلطف الجو وناصب عليه لان ماعت روحي گدام الطلاب .
عود راد يكومني اشرح يگلي :-
- ها ثُرىٰ تكومين تشرحين لو تموع روحج
ضحكت جذب من وره خشمي
- لا استاذ اكدر
ظليت اشرح عادي ومغندبه وجهي ومن كملت گعدت. شگد ثگيل ع المعده وغف على گلبي .
.
.
مرت أشهر طويله واني لاشايفه ابو الرزايل ولا هوَ شايفني .. متت على شوفته اريد بس اشوف شكله يااربي الاشتياق ذبحني .. اني ويني وين النحثله مسويه روحي مامهتمتله واني هسه اريد بس اشوف خياله كافي عليه .
والله وحنيتي يثُرىٰ .
يوميه اصفن من الجامه على الطريق اليودي لبيتهم ومن تمر سيارتنه اگعد گعده خاف يلاگيني واني مامنتبهه .
اليأس وصل بيه مرحله وكمت مااباوع من الجامه اصلاً . أيست اشوفه وأيست بعد يلتقي طريقنه !
اليوم جاي نمشي بالسياره واني منتچيه ومسرسحه جسمي لجوه بگعده مررريحه ومنتجيه بإيدي ع الجامه وصافنه حتى اللحم مال خدي مطبوگ على عيني ومعموصه .
رفعت راسي وگعدت على حيلي شهگتلي شهگه حسيت صدري انشگ .. وخلت كل الي بالخط يرفعون روسهم مصدومين !!!
