رواية كريات الدم السوداء الجزء الثاني الفصل الأول بقلم زحل شريف
توضيح . للي ماقرين الروايه من البدايه
جبار ابو مريم مو اخو ابو اسعد يصير ابن عمه.
___قدر
_عيوني تفتر بينهم اريد الي يطنمي ويكول
لكيتها صاح بيهم الخال .
الخال:ترى مو وكت تفاهتكم
خلص مهمه وانتهت مامطلوب منكم
ادورن الضاع . شوفو شغلكم وكملو
اجراءات التحقيق ويه الكل بدون استثناء .
_شدد عله كلمة بدون استثاء
باوعله ابو حيه وهو يهز راسه بتسأل.
الخال:اذا احد المتهمين اعترف عله وحده من البنات
انو الها ايد وياهم .مضطرين نسلمها وندور عله اختها .
_رفع راسه الباشا متفاجئ
وابو حيه نضراته ادور بينهم. شكد جنت اشوف شخصيته تافهمه بسبب تصرفاته وسهراته يم
سليمه بس هنا كان مختلف جذريا
دفع الطبله الكدامه وكام موجه كلامه للضابط.
الباشا:تعاون البنات ويانه واضح
ومتأكد من عدم اشتراكهن بأي عمل من اعمال
الشارع اما بخصوص محابس هو من البدايه
عليه كم دعوى قضائية واعترافات من خلايه
سابقا اعتقد بملف غازي وحيدر كفه .
_انتفض محابس معترض عله كلام الباشا.
محابس: مامشترك لا بعملية تسليم ولابيع
واعترافهم عليه جان بدافع الحقد لان حميت
سونه وماسلمتها الهم من علست الولد لجنابك.
الباشا:جنت تأمن المكان وعندك علم بكل
شارده وارده من عملياتهم .
محابس:تمام اسلم نفسي بس الكه سونه
وامن عليها هيه واختها . ماخايف من السجن.
الباشا:بعد ماعندك شرط استاذ محابس
شو تحجي وكأنو مسوي علينا فضل .
_اشرلهم ابو حيه بمعنى اسكتو .والتفتت للخال.
الخال:تعيد التحقيق ويه المجموعه السابقه
لان انته تعرف محابس مااله ايد وان ثبت شيء
فهو يتحاسب حاله حالهم بس خلي ارتب اثبات نسبه.
الضابط:مافهمت .
الخال:مايرادلها شرح.
الضابط:بس هيج تخسر منصبك.
الخال:ماضل بالعمر كد الراح اقدم تقاعد .
_كل هذا وانه مكرفصه روحي عله قنفه
خجل خوف .. مااعرف شنو شعوري
وجودي بين مجموعه زلم لا يقربولي ولايربطني بيهم شي . شكد استحقرت نفسي وكرهتها ورغم قلقي عله سونه بس عتبت عليها شلون هان عليج تعوفيني وتدرين ماعندي غيرج ..دموعي تصب ومامنتبهه
لنفسي وكل ضني احجي بكلبي لحد مانبهني صوت ابو حيه رفعت راسي كلهم يباوعولي تمنيت الارض تنشك وتبلعني .
ابو حيه:كومي يابه ارتاح بالغرفه وان شاء الله
نلكه اختج ادعيلها وربج كريم.
_حاولت احافظ عله اخر ذرة من كرامتي
لان حسيت بذل مو طبيعي . رديت وانه اعدل بشالي
بس وصلوني للبيتنا اروح انتضر اختي هناك اكيد تجي.
محابس: انه راح ابقه مراقب الصعده
اذا اجت ابلغكم. وبالنسبه لقدر تروح وياي
انه اعرف وين أمنها .
_هزيت راسي لا . باوعله الباشا وهو يفرك وجهه
بملل وجه كلامه لمحابس. وكانو واكف عله شعرة وضاغط عله اعصابه.
الباشا:اخر مرة اكلك لاتدخل
الضابط: انته متهم مالك حق .
تتحرك واذا تشوفنا ساكتين عنك
ف احتراما للخال .ولان نعرف
هو راح يسلمك للمركز.
محابس:وانه كتلكم ماخايف من السجن
بس الكه سونه اسلم نفسي .
_نهى نقاشهم الخال كام وهو يحجي.
الخال:ابو حيه امن لقدر مكان لحد ماتضهر اختها
ورتبلي كعده ويه الحجي وعمامك حته اشوف شلون
ابلغهم بوجود محابس .يله اترخص واذا صار شيء اتصلو بيه .
_كام الخال وقبل مايوصل الباب التفتت
للباشا اشرله بمعنى تعال . كام بملل ونضراته لمحابس بغضب .الضابط وابو حيه واحد يغمز للثاني وهمه يحاولون يخفون ضحكتهم .
الخال:حقير وتماديت هواي بس احبك
وتبقى انته الباشا الي افتخر بي.
_جر الباشا لحظنه طبطب عله كتافه
وبعدها ترخص وطلع . ضليت انه اباوع بالوجوه.
حايرة وين اروح وبيمن اامن كمت وانه موجه كلامي للضابط . هسه كملت شغلك تكدر ترجعني لبيتنا باوعلي متحسف وضعي ونضراته ادور بين
ابو حيه والباشا.
الضابط:شوفي يابه انه حفاظا عليج
طلعتج مناك . خو كادر الزم سليمه وربعها
بالجرم المشهود .بس لان انتي تعاونتي ويانه
وساعدتينا اكيد مانتخلى عنج ولا عنج اختج
بس اطيني مجال ادورها لان مديحه وامها
مالزمن وخاف هيه وياهن .
_لا مو وياهن اصلا هيه طلعت قبل لاسليمه
ادخل الموس والبضاعه. ومديحه جانت موجوده
هيه وصوله وام دعدوش. وعبالك الباشا انتل
من جبت طاري مديحه طفر وكف كدامي .
الباشا:يعني مديحه وياهم.
_حسيت بروحي جفصت . رجع كرر سؤاله.
الباشا: لاتخافين سولفي ترى احتمال
مديحه الها ايد بأاختفاء سونه.
_رد عليه ابو حيه.
ابو حيه:اذا مديحه وياهن منو الي طلعها
من الشارع اذن اكو من وصل
خبر اكو كبسه للشارع.
الضابط:اكيد خو النصافات اول ميشوفن حركه
يبلغن البقيه ، بس شلون كدرت مديحه تفلت
واحنه ماخلينه الطير يطر .
الباشا:ماكو غير محابس.
هو الي شردها.
ابو حيه:معقوله زين هو مو عله اساس
مو بالصعده..
الضابط:جذاب
كل مرة يشيع خبر انو هو خارج الشارع
بس عنده مكان بنفس الصعده محد يندله.
_اخذهم الحديث ونسو وجودي
وبقو يحللون الصار. وانه كلبي نار عله سونه.
الضابط: هسه اخلي الولد ينبشون
المكان نبش . واذا طلع هل سافل اله ايد
مايلزمني عنه شي . يعذرني الخال .
_حجاها وهو يطلع نقاله اشرلهم يسكتون واتصل.
الضابط:ها بشر شنو الوضع يمك. اها تمام شوفلي
بالموجودين اكو وحده اسمها صوله .
اوك اتاكد واتصل بيه انتضرك .
_دقايق وهو منتضر . دك نقاله
رد وعينه للباشا،
الضابط:متاكد ؟
تمام لاتخلي احد يوصلهم لحد مااجي.
_نهى مكالمته والتفت عليهم .
الضابط:صوله مو ويه الموجودين.
الباشا:اذن شكي بمحله محابس هو طفرهم
_حجها وكام . جرئت نفسي وحجيت
رجعوني لبيتنا .
الباشا:وين راجعه بابا كل عقلج
تدرين اول المتهمين بعلاستهم انتي
اذا لزموج الجن الازرك مايعرفلج طريق.
_ابقه بشارع انتضر سونه
هسه اكيد رجعت هيه كالت الفجر اجي .
الباشا:مادام ويه الفرقه اكيد وصلهم خبر
مستحيل يرجعون هسه خل ننتضر بلكي تتصل بيه.
_ماتتصل بيك . اطوني نقالي انه اخابرها.
الباشا:بيمن تتصل بمحابس .
_لا ماتتصل بمحابس ولا انته
انه اعرف هسه ضال بالها يمي
وترجع للبيت عله مودي .
الباشا:خطر رجعتج ابقي هنا
بس نحصلها اوديج الها . ترى لحد الان اكو ناس بالصعده مانلزمو واذا رجعتي مانكدر نحميج منهم.
_ضليت حايرة اباوع بوجهم ،خوفي عله سونه
ومن جهه كلامه صح بس شلون ابقه بينهم
نزلن دموعي بعبرة ماسيطرت عله شهكتي
بجيت بصوت عالي. شنو ذنبي يصير بيه كل هذا.
وين اروح اعاتب منو عله وضعي حاول الباشا يطمني.
الباشا: لا تخافي الكها .
_وعبالك اجتني رحمه اطلع ضيم وقهر سونه بي.
صحت بصوت عالي. انته بالاخص لادور عليها
لان حته لو ضامه نفسها بالصعده من تشوفك
تشرد كل الهيه بي بسببك . لان يوميه سليمه والنصافات يعاركونها لان انته ادور محابس
طلعت ويه الفرقه حته تثبتلهم مالها شغل بيك
التفت عليه متفاجئ .
الباشا:تمام
بس كليلي هم فكرتن بيوم اطلعن من سليمه
ماكالتج عله مكان معين ترحن بي.
_جنا متفقين ننتضر لحد مانبلغ السن القانوني
اشتكي عله راضي يطلعلي جنسيه
كالت نوكل محامي يطالبلي بحصتة
امي من بيت فاروق حته نكدر نستأجر بيت .
الضابط:انطيتج كلمه اجيبها
بس لازم تبقين تحت حمايتنا
لحد مانلكاها ونأمن عليجن.
_كام الضابط واشر للباشا يله.
ابو حيه:وين رايحين يابه متشوف ايده
مو مال حركه معود المن ماخذه.
الضابط:للمركز .
_صحت عليه انطيني نقالي .
الباشا:بس ديري بالج تكليلها انتي يمنا
لان مانعرف اذا هيه بيد الفرقه او احد من الشارع خاطفها وتعرضيها للخطر فاهمتني اذا ردت عليج
كليلها انج لابده بالسوك يم المحلات .
ابو حيه:تمام انه رايح للبيت ابلغ الحجي
بموضوع الخال وارجع انتضركم هنا .
_انطاني النقال وطلعو .. عافوني بحيرتي
ابجي وادعي بكلبي وكل شويه اخابر ويطلع مغلق
احس بروحي فرت وينج وين رحتي وساعه بعد ساعه
وخلص اليل وطلعت الشمس وانه ماغمضت عيني .
ولا حد بين منهم عيوني كامن ينسدن من وحدهن
تمددت بمكاني مكرفصه روحي ومايطيني كلبي انام.توني اغمض ودك نقالي طفرت اباوع للرقم
مو اسمها ترددت افتح خط تكرر الاتصال
رديت بخوف الوو منو . وتفاجئت من كال انه ابو حيه.
ابو حيه:صباح الخير .
اخذت الرقم من اياد اقصد من الضابط .
_رديت وانه ادعي كون يبشرني
برجعتها سالت بلهفه ها لكيتوها .
ابو حيه:ان شاء الله يلكوها.
_احس طفت روحي بجوابه.
استغفر ورد سالني .
ابو حيه:محتاجه شي
انه فد شويه واوصل .
_من حركت كلبي سديت الخط بدون ماجاوبه
كمت للحمام غسلت وروحي تلوب تايها
امشي بالصاله واعتب ليش هيج ياسونه
وين عفتيني حسيت الباب نفتح دخل ابو حيه
بيده علاليك توجه بيهن للمطبخ.
ابو حيه:صباح الخير. واعتذر عفناج لوحدج
بس تاخر الوقت وماكدرت اجي .
_حجيت بنفاذ صبر . خوش مادام انتو مالكيتوها
انه ارجع لبيتنا . لان هيه اول وتالي تجي وبالاخص
اذا عرفت سليمه وجماعتها انلزمو بعد منين تخاف .
ابو حيه:مو كلهم نلزمو . ومانصحج ترجعين لنفس المكان لان اصابع الاتهام موجه عليج .
_شمدريهم انه الي خابرت الضابط.
ابو حيه:متاكدين ومايرادلها تفكير
لان انتي الوحيده الي جنتي بالبيت وقت
ما سليمه دخلت البضاعه وممكن تنكرين تواصلج باي شخص بس هم راح يكولون ليش ماخذوج ويه البقيه.
_حالي حال مديحه هم اكول شردت.
ابو حيه:مديحه ماشردت اكو من ضمها
لان ماكو شخص كدر يطلع من الشارع
وقت الي داهمتهم الحكومه بس الي يندل زواغير الصعده واكيد انتي مو من المجموعه حته تعرفين وين ومنين طلعين والكل يعرف هل شي.
_صفنت بكلامه . هو صح بس خو ماابقه
هنا لازم ادورها . اباوعله يتحرك بهدوء
يحجي بدون ماينضرلي عرفت جاي يسوي ريوك
شويه وجاب الصينيه .
ابو حيه:اكليلج لكمه خلي امر اختج
يم رب العالمين .
_ماجوعانه .
ابو حيه:اشربي جاي اكيد راسج من البجي صدع
ترى مسوليتهم يلكوها . من امس لحد الان همه يبحثون .الباشا مارجع للبيت مكابل الشارع.
_ هسه صار حنين
وحريص مو توسلت بي يطلعها من سليمه
مو كلتله بس خليلي بيت اكعد بي .
ابو حيه:اكيد هو مو ناقص غيرة وماتخله عنها
اله لاجل يحميها .
_ناوشني كوب الجاي ورد كمل حديثه.
ابو حيه: اختج جانت نقطة ضعف
بالنسبه لمحابس..
_بس عافته وطلبت المساعده من الباشا.
ابو حيه: اخذت غطاء تحتمي بي
وبنفس الوقت حمت محابس وتصرفت بجهل وعدم معرفه وبيوم زواجها من الباشا خبرت عله ولد الصعده
ونكشف امرها بس محابس سد الموضوع وبنفس الفترة انكشف علاء وهنا همه رادو يضربون عصفورين بحجر واحد
_مافهمت.؟
ابو حيه: ضلو يضغطون عليها
رادو الباشا يطلعها حته يقتلوها
وتنذب براسه وهيج يخلصون منه
وياخذون ثارهم منها وهم تصير عبرة لكل بنت تحاول تتمرد عليهم . يا بت الناس انتو جنتو بمستنق اجرامي
_نزلت دموعي بغزارة. وشكد اتمنيت اكون فعلا بت ناس واحتمي بيهم . شنو وجودي بين ناس مااعرفها
ليش هيج ليش شدعي عل امي لو راضي . دنكت وانه فشلانه من وضعي . عجز مني اكل شال الصينيه
و كام تاركلي مجال ابجي. شويه ورجع بيده باكيت
اكلنس خلاه يمي وكعد كبالي .
ابو حيه:بشنو اكدر اساعدج كليلي
اعتبريني اخ عم اب كيفج . احجيلي شنو الي يوصلج لبر الامان لحد ماتضهر اختج وان شاء الله تستقرون .
_ايست من رجعتي
للصعده لان خطر بالوقت الحالي بالاخص
من عرفت مديحه وصوله وبعد اكو مجموعه مانلزمت
مااكدر اجازف ..ماعدي احد ولا عندي هويه
شريد اسوي .املي بسونه وجنا متفقين نكمل سوى.
ابو حيه:انه اترخص انتي لا تتقيدين
محد يجي والبيت مامن بكامرات .ورقمي صار عندج
شيصير اتصلي بيه واذا اختج خابرتج بلغيني .
_ سكتت وهو طلع
ضليت افتر بالمكان اباوع بشرود
امل وتتعب رجليه واكعد .. اخذلي مشوار بجي وعتب وتفكير وتعده اليوم والبعده وخلص الاسبوع وابو حيه يجي يطمن ويروح اتصلت بالضابط اكثر من مرة ونفس الجواب .
الضابط:كولي ان شاء الله نلكاها وانه مخلي عناصرنا
بالشارع بس يشوفوها يبلغوني .
_اليل يمر عليه بثكل عيوني جافت النوم
وينها ميته عدله جوعانه بردانه انخطفت انقتلت
الجهاز مغلق كل دقيقه اتصل عله امل ترد عليه
ايست وحسيت بثكل وجودي يم ابو حيه لان هذا مكان عمله واكيد متقيد بوجودي عزمت امري اطلع
من يمه اروح وين مااروح وبس اجه كتله انه بعد المن باقيه سونه مامنها رجعه .
ابو حيه:وين ترحين .
_مااعرف بس ارجع لبيتنا. بلكي من تعرف بيه
ترجع يجوز ضامه نفسها بفد مكان .
ابو حيه:نخلي احتمال انو هيه ماترجع .
_شهكت لا لا تكول هيج.
ابو حيه:ان شاء الله ترجع
واكيد ترجع بس اقصد يجوز اطول يعني انه متاكد هيه خايف بس لاتفكرين توصلين الصعده نهائيا .
_ماعندي حل غير ارجع لبيت عمو فاروق
بلكي فاطمه تتقبلني ابقه عدها
واتنازللهم عن كل شيء لحد ماترجع سونه .
ابو حيه:وتتوقعين تقبل .
_مااعرف.
ابو حيه:ويجوز ترجع تسلمج بيد محمود
شوفي ياقدر . انه مااكول انتي غبيه بس ماالومج
الانسان بوقت الشده يخونه التصرف واذا مايلكه الي يوجه يضل يتخبط . انه ماحجيت لاجل اتخلص منج
لا انه ردت انتي تختارين الحل .
_ماعندي خيار ثاني.
ابو حيه:انه راح اطرح عليج اكثر من حل وانتي اختاري. لحد مانطيح بخيتج ونجمعجن سوى .
_هزيت راسي اي.
ابو حيه:اخذج لمكان محد بي وحته انه مااجيج
اله تحتاجين شي . منها اامن عليج
وهم نستغل الوقت.. اشوف الج محامي
يقيم دعوة اثبات نسب ونطلعلج هويه وبعدها تتوجهين اطالبين بحصة امج وبلكي بهاي الايام اختج تبين . تردين اخذج لبيت اهلي وهناك بناتنا وحالج من حالهن . انتي اختاري الي يرضيج .
_ضليت حايرة .. وخجلت اكله ماامن لان مابذر منه شي طول هاي الفترة. بلعت غصتي وحجيت وانه اعصر بطرف شالي . زين الضابط والباشا يعرف
البيت الي تخليني بي . باوعلي وهو يحاول يخفي ابتسامته .
ابو حيه:اكيد والباشا بيته قريب من البيت الي راح اخليج بي . انه لاجل اطمن عليج لان مادام انتي هنا انه بقلق عاد قريبه علينا انه والباشا والضابط اخوي
وهم بيته بنفس المنطقه هيج انتي تطمنين واحنه .
_كيفك. بس اريد اطلب منك طلب
ابو حيه:اعتبري نافذ.
_اريد اواجه طارق قبل مااوكل المحامي
يعني قصدي .
ابو حيه:فاهم قصدج . وفكرت قبل لاتحجين
وماردت اغثج . بس ياقدر طارق مو مثل ماعفتي
انه واجهته .الولد محطم نفسيا مانلومه لان الي مثله جان يصول ويجول . مستند ومحتمي باابو
_صح هو رغم تمرده بس جان يحب ابو
وفاروق جان حيل حريص عليه
ابو حيه:اكيد مايرفضج ويجوز يفرضج عله امه
ويمكن بس لاجل ابنها تقبل . بس ماتتقبلج
كنصيحه مني . لا ترجعين وانتي ضعيفه
وتضطرين تتحملين جورها واذيتها . هو بعدله هواي يله يخلص حكمه استغلي الوقت ورتبي امورج طلعي هويتج حته تكدرين تثبتين حقج وقتها يكون ارتباطج
بي بشروط وانتي الي مترهيه.
_لو ترجع سونه مااريد شي
غير نكعد انه وياها بمكان يحمينا.
ابو حيه:ان شاء الله ترجع يله انه اعوفج تفكربن
وشوفي شنو الي يريحج . وين تردين اوديج.
_طلع ومر يومين مااجه
وفكرت غير رايه . وصارت سولتي النقال
كل دقيقه اتصل وانه ادعي كون ترد عليه
طالت المدة وغيبتها تركت بروحي جرح
عتبت وابقه اعتب عليها دموعي ماتنشف
وصرت ملازمه السجاده اصلي بدون تحديد وقت الواجبه وصلاة خاصه ادعي بيها ربي يجمعني بسونه يرسيني لبر امان . انفتح الباب دخل ابو حيه والباشا ورا لميت السجاده وكمت سلمو رديت وعيوني تتامل
كلمه منهم اطمني وتفرح كلبي اباوعلهم
الباشا متغير حيل . عبالي مريض ويمكن بسبب اصابته بيوم الي دخلو الصعده قطع شرودي كلامه .
الباشا:لا تأيسين الكاها . اهم شي اطمنا هيه
مو بالصعده.
_شلون عرفت.
الباشا:قبل يومين انفتح تلفونها بين ماحددنا
المكان ووصلنا نغلق حاولنا نشوف الكامرات الموجوده بالمحلات القريبه ماحصلنه شي يدلنا وين توجهت .
_وين يا منطقه قريب عله الصعده
بس ضيعناها باخر كامرة دخلت السوك واختفت
بين الناس .
_احس شي حار بصدري
معقوله . يعني مافكرت بيه هيج هنت عليها
اذن ماتريدني اي جا ليش ماتصلت بيه. خجلت
حيل يعني عرفو اختي تخلت عني لزمت طرف شالي
اكتم بي شهكتي رفع راسه ابو حيه باوعلي.
ابو حيه:اكيد تفتر بالمكان تريد اي شي
يوصلها الج . بس تخاف تدخل الشارع
حقها لا تلومينها ترى هيه تعرف الناس
بالصعده وتفهم تحركاتهم .وتصرف ذكي منها
ماضهرت ولا رجعت للبيت حته لا يلزموها .
_هو منو الي بقه . واكثر ناس بيها شر
سليمه وجماعتها بعد منين تخاف.
الباشا:صوله ومديحه وغازي
هذول اخطر من سليمه . وشلون فلتو من ايدي
بس وين يرحون الزمهم لو بعد الف سنه .
_وانه واختي شنو ذنبنا. نبقه مهجهجين.
الباشا:لو ماالصار ولو ماذكائجن
واتصلتي بينا جان سليمه باعتجن
بليل ولا تخاف لان محد يداعي بيجن
لا تضنين خايفه منجن كل هاي المده بس جانت
ترتب الامر معين. المهم يابه انه جيت حته اخذج
يمنا تردين تمشين وياي لبيتي لو بيت اهلي لو انخليج لوحدج بس بنفس منطقتنا ونفس الشارع .
_كيفكم هيه فترة بس اكمل اموري
ابو حيه:تمام اخليج بيت لوحدج
حته لا تتقيدين . يله نتوكل.
_طلعنا وطول الطريق الباشا
مشغل اغنيه بس تعالو . غمضت عيوني واتخيل سونه
تغنيها ماانتبهت للطريق ولا المنطقه لحد ماوصلنه مسحت دموعي اباوع وكفو كبال بيت بناءة فخم
ركزت بالشارع مبينه المنطقه زراعيه نزل ابو حيه واشرلي انزل التفت عليه الباشا.
الباشا:نزلي يابه لاتخافين هذاك بيتي كبالج
وبصفه اهلي واخواني .
_نزلت رجليه تخط بثكل
دخلت اتلفت بخوف كراج وحديقه عله الجانبين
يمشي كدامي ويصلي عله محمد فشلت صليت مسمعته . فتح باب داخلي يطل عله صاله .
ابو حيه:فوتي يابه . اعتبري بيتج
وانه جهزت الثلاجه مسواك . تلكين علاكه
بيها كم قطعه ملابس ان شاء الله يجن قياسج .
_ماانطاني مجال ارد ترخص وطلع.
كعدت بكلب مكسور . وتعده اليوم والبعده اخلص نهاري اباوع للحديقه ودموعي تصب معقوله الزمان يعيد نفسه واعيش نفس حياة امي . اذكر وكفتها بيت فاروق اي مثل هاي وكفتي . لا لا مستحيل تهسترت اسال واجاوب روحي طار النوم من عيني احس فقدت السيطرة عله عقلي وتشتت تفكيري ابو حيه يجي كل كم يوم جايب مسواك يشغل الماطور يترس التانكي
يسكي الحديقه ويروح يحاول يخلق حديث بينا
بس من يشوف عدم رغبتي بالاجابه يسكت وهيج
مرت فترة وتاه عليه عدد الايام وصرت الح عليه انو يكمل موضوع هويتي.
ابو حيه:المحامي جاي يمشي بالإجرأت
_شوكت شوكت يخلصها.
ابو حيه:هو راضي ماناكر ورحمة الله عله فاروق
الي فكر بالعقد هواي سهل علينا امور.
_الله لا يرحمه عله شنو يرحمه لان حطمني
لو لان قتل امي . الطماع الله اخذه وحرمه من الفلوس الي طمع بيها . جنت اخدم ايوب بعيوني ومايوم قصرت ماوكفت بعينه جان كال حق التعب والسنين الي عاشتها امي وياهم .
ابو حيه:الله يرحم الجميع الانسان بطبعه
طماع لاكن ماننكر لولا فاروق جان مصير امج .
_ماخليته يكمل صحت . شنو مصيرها الموت
اهون لو مرجعها لاهلها وقاتليها جان ماانولدت انه ولا واجهت هل الضيم. لو من البدايه راغم راضي عله زواجها ومنسبني . شنو فضله ها كلي شنو الي سوا
خسر الدنيا والاخرة ومراح افرط بفلس من ورثها
اعناد بيهم .
ابو حيه:وهذا الصح بس لازم تستندين
عله احد كون من تواجهيهم . يعرفون بعد مايكدرون يسوون بيج مثل ماسوى محمود .
_اشتكي عليهم .
ابو حيه:وهمه مااضن يجازفون ويرفضون حقج
قانونا بس يحاولون يوصلوج وساعتها يخفون
وجودج صح لو لا.
_سكتت افكر . بكلامه كام وهو يحجي.
ابو حيه:تعلمي لا تاخذين قرار ولا تقاتلين
وتواجهين عدوج بساعه عصبيه الحرب بااعصاب
بارده وتخطيط رابحه اكثر من حرب بيها سلاح
بس بدون خطه للهجوم لان تكون خاسرة اكيد.
_طلع وعافني غركانه بتفكيري
هجرت النوم وصرت انسى وجبات الاكل
من اجوع يله اكل . ايست من سونه وانقطع كل خبر
عن الصعده تلفوني ليلي نهار بيدي . وبيوم اجه ومبين عليه مغثوث طلب اسويله جاي خليت الكوب كدامه
ودرت وجهي اريد اطلع من يمه . صاح عليه.
ابو حيه:تعاي يابه المحامي طالبج باجر لازم تحضرين
_هزيت راسي اي.
ابو حيه:حسب ماكال انو راضي رايد
انو يشوفج . فخاف اباله يطلب من القاضي
بمعرفة مكانج او احتمال يطلب ترجعين لبيته.
_لو ابقه بشارع لو اسلم روحي للموس
مااسكن ويا بمكان. اله بحاله وحده اذا سونه رجعت.
ابو حيه:انه اريد اطرح عليح فد موضوع واتمنى متفهمين غلط لو تفسرين طلبي استغلال لضرفج.
_هزيت راسي اي
وانه ادعي مايكون طلب مثل ماجاي اتوقع
اشرلي اكعدي . كعدي وانه احاول اشتت نضري عنه.
ابو حيه:اول شيء خل اكلج ايجابيات هل الامر
منها نكدر ندخل الصعده وندور اختج واحنه مأمنين
ثانيا.مانخاف من تطالبين بحقج من بيت فاروق
انو يتعرضلج محمود او اي شخص .
_ردت اغالط احساسي
حاولت ابين مافاهمه الامر . حته لا اضطر ارفض
لان اذا رفضت بعد مايصير ابقه عنده . سكتت رفع راسه باوعلي هزيت راسي كمل .
ابو حيه:والج حق من تكملين امورج
وتاخذين حقج وبلكي نكدر نلكه اختج
بعدها انتي حرة . بس حاليا غلط وعيب وحرام
دخلتي عليج وهم .
_ماخليته يكمل كمت وانه احجي
خلص فهمتك . حقك مامجبور تتحمل مسؤليه
مشكور وماقصرت بس كمل فضلك ورجعني لبيتنا
وخلي المحامي يتواصل وياي.
ابو حيه:ترى هو اقتراح لاجل حمايتج
يعني انه باجر ماخذج للمحكمه بله سال القاضي
انته شنو . زين اذا واجهتي بيت فاروق وتعرضولج
شلون اكدر اوكف بوجهم هم يطعنون بيج.
_تشوف الي انه بي يسمح افكر ازوج
اختي ضايعه وانه ضاله مثل لو شنو مثل
هو انه تايهه لقيطه نغله لاب لام لاعشيرة
تريد تعقد عليه مثل الباشا وتخليني
هنا .وشوكت مايعجبك تجي . شوف لاتصور لان
بسبب ضرفي اوافق .ههه كالت سونه ذول مابيهم
غيرة ولامنهم خير ومايسون شي بدون مقابل.
ابو حيه:لا مااسمحلج ابد والله مامفكر استغلج
ترى شرحتلج الاسباب. وانتي حرة بس مو معناها رفضتي اعوفج اطلعين .
_وانه موبكيفك . مالك حق تمنعني ولاتكلي
طلبك لله لو انسانيه منك . لان قبلك الباشا
وعد اختي يحميها وبعدين طلكها رغم شكد طلبت
منه يطلعها من الصعده ورفض لاجل مصلحته وماراد يخسر ام طيبه وسليمه وجان ينفذ كل طلباتهن.
ابو حيه:الي متعرفي انو عمله الباشا
مايسمحله الزواج باامراءة اذا مايكون عدهم معلومات كامله عنها ولو لاحظو اي شائبه بملفها يتم اعفاءة
من منصبه عبالجن الامر سهل لو هين عليه ضياعها
وجان ناوي يخلصها من يمهم بس عرف بخطورة سليمه والبقيه جان قتلوها لان اختج خلت ايدها بالنار . شوفي حاله هايم ليل نهار يفتر بالمنطقه
يراقب الشارع عله امل يلزم خيط يوصله الها.
_لا يدور لان ماترجع خلص خلي يعوفها
خل يكفيها شرة هو ومحابس ان شاء الله بس مثل ماضيعوها يضيعون . وهسه بيها مجال تفتحلي الباب اطلع اشوف وين اطي وجهي.
ابوحيه:الضاهر كلام سليمه صح
_هزيت راسي شنو.
ابو حيه:يعني انتي واختج تجذبون
من تكولن ردنا احد ينتشلنا من الصعده
هاي انتي اكبر دليل تردين ترجعين الهم برجليج.
_فكيت حلكي . تحجي صدك
يعني احنه لو هيج جان ماخبرنه عليهم.
ابو حيه:جا شعدج راجعه بنصهم .
_وين اروح .
ابو حيه:من سالتج اذا طارق
طلع وعرض عليج الزواج توافقين
كلتي افضل من وجودي بالصعده
وانه فهمت من ردج عندج استعداد تتحملين رفض اهله
وجور امه. بس لاجل تحافضين عله نفسج ولهذا السبب
كتلج ازوجج لبين ماترتبين امورج وتوكفين عله رجليج
وساعتها شوكت ماردتي اطلكج الله وياج.
_واهلك يدرون وزوجتك
لو تريد تزوجني مثل زواج الباشا.
ابو حيه:لا مو مثل الباشا
وبعدين لو نيتي سوء وياج جان خليتج
بالشركه وماجبتج هنا . بالنسبه لاهلي اكيد اكلهم.
_نزلت دموعي بغزارة ماكدرت ارد وشريد اجاوب
الي مثل حالتي ماله حق الرفض ويجوز اي بنت غيري تعبرها فرصه . اله انه اعتبرتها ذل واهانه واستغلال بس العتب عله اختي الي عافتني بدون ماتوجهني لو ترسيني عله بر . كام وهو يستغفر طلع ومن بعد هل
يوم قلت جياته . اخذني للمحكمه واخ من شفت راضي
اتمنيت اطلع بروحه كملنه الاجراءات ورجعنا بعدها بفترة طلبو حضروي بالنفوس واخيرا استلمت الجنسبه مافرحت بيها بسبب وجود اسم راضي كأب خلصت الطريق بجي
ابو حيه:الصبر عله البلاء فوز .ليش هل بجي
انتي اليوم اخذتي اول دليل يثبت حقج عند بيت فاروق .
_لدفعهم ثمن كل لحظه جنت اضن بيها ايوب
ابوي ضيعو تعبي اليالي الي جنت اغفه والكتاب بيدي شكد حلمت اكمل دراسة واعالجه ليش هيج سوو بيه.
ابو حيه:ورب العالمين مايضيع حق
_وقبل ماندخل المنطقه دنكت وهاي الحركه بكل مرة يطلعني من البيت انزل راسي جوى الكشن عرفت يخاف لا احد من الجيران يلاحض وجودي
وصلنه نزل فتح باب الكراج ورجع خل السيارة
نزلت وعفته يقفل الباب . كعدت محتارة منين ابدي
حسيت بخطواته قريبه رفعت راسي .
ابو حيه:فكري ودرسي الموضوع من كل الجوانب
وشما يكون قرارج انه بضهرج . بس لا تاخذج العاطفه .
_نضرتله بتساؤل .
ابو حيه:ان كان طارق رايدج فمراح يزعل اذا سمع انج
طالبتي بحقج ومن يطلع ويعرف المريتي بي اكيد مايلومج .
_ قاطع تفكيري وهو بكلامه.
ابو حيه:انتي واختج اجركم عظيم عند الله
ثقي انو جزائكم راح يكون شيء اكبر مما
جنتو تحلمون.يله انه اترخص اذا تحتاجين شي خابري.
_ضليت يومي كله افكر . ماانكر حقدي عله فاروق
وبيت حجي احمد . وكل الي مريت بي هو بسبب طمعهم وانانيتهم وهذا الي مااتردد بمواجهتهم
نزلت دموعي وينج ياسونه شكد خططنا لهيج يوم
ومثل روتين كل يوم اخلص الوقت مكابله الشباك
وباوع للحديقه وعقلي يستذكر كل يوم
شفت بي امي واكفه هيج وكفه
حسيت بنفسي تعبانه دخلت
وانه ادعي لابو حيه الي شما اريد اشكرة اعجز
فتحت الكنتور اخذت احتياجاتي الخاصه
الي جابهن بطريقه تثبت شكد هو انسان محترم
عرفت ماراد يحرجني بحيث الكميه الجابها
تكفيني اكثر من ٦ اشهر . تمددت وعيني للنقال انضرله برجاء وجانت امنيتي يعلن عن خبر يطمني عليها بس
خاب كل امل وتاكدت بعد ماراح التقيها اتخلت عني
غفيت ودموعي تصب. احس بحركه بس مابيه اكوم.
فتحت عيني بتعب داير وجه ويجي .
ابو حيه:ها يابه خوفتيني عليج.
_عدلت نفسي التفتت ادور شالي
طلع منطيني مجال اكوم . توجهت للغرفه لبست صايتي وشالي وطلعت .
ابو حيه:ترى حاولت اكعدج.
_هزيت راسي اي . كام للمطبخ ورجع بيده صينيه
بيها اكل ومبين مال بيت .
ابو حيه:اليوم الحجيه مسويه ثواب
وكلت يصير بينا زاد وملح .
_قاطعت كلامه لسؤالي.
اهلك يعرفون بوجودي هنا .صفن ثواني يله جاوب.
ابو حيه:والله ياقدر مااكذب عليج
لان الحجي كلش صعب بمثل هيج امور
وحته لو ردنا نقنعه من ناحية الحرام والحلال
فأاكيد اله حق يخاف عليه تحسبن انو اتعرض لفد مسأله قانونيه او اجتماعيه . فشتكولين لو انقلج يمهم بالبيت لحين ماتاخذين حقج من بيت فاروق.
_بدون تردد وعكس طلبه
كتله انه موافقه . رفع راسه وغريب هل شخص بذكائه
ابو حيه:عله شنو .
_وترني بنضراته بلعت ريكي
ورديت بتلعثم . عله الي تشوفه صح .
ابو حيه:خير ان شاء الله .
_حجها وكام عرفت ماراد يحرجني
طلع وبعد كم يوم اجه بس واضح عليه التعب
خجلت اساله . التزمت الصمت وهيج مرت فترة
لا هو فتح موضوع ولا انه سالت لان واضح اهله رفضو
كاعد ونقاله بيده وكل حركاته ادل عله الحاله
العصبيه الهو بيها . كسر الصمت البينا صوت نقاله
وعبالك جان منتضر هل مكالمه رد بلهفه.
ابو حيه:ها بشر .
_ومبين رد المقابل مافرحه شمرة النقال
حاولت استفزه جليت صوتي وسالته
شوكت نباشر بدعوتي بلكي تتصل بالمحامي
وياريت ماتسرعت التفت عليه وماعرفت افسر نضرته.
ابو حيه:كومي .
_وين مافهمت .
ابو حيه:بدون مااجادلين لان مالي خلك
كومي اخذج لبيتنا.
_هزيت راسي برفض كام وهو يجرني
ماانطاني مجال بجيت عوفني عوفني ترى ادري اهلك رفضو خلص اروح وين ماجان انته مامجبور بيه.
ابو حيه:اششش اصعد يله .
_ فتح باب السيارة ودفعني .
ركض فتح باب الكراج اتوسلته ينزلني يعوفني اواجه مصيري التفت وعينه دم .
ابو حيه:منا اول المواجهات لازم تثبتين وجودج
حته تكدرين توكفين بوجه فاطمه واهلها.
_مسافه لو ماشين عله رجلينه هيه خطوات
طبك السيارة ونزل اشرلي يله رفضت دار ناحيتي
فتح الباب وجرني .
______بنين ______
ايامنا صارت متشابهه . عله كولت امي حته الوقت صار مابي بركه . والساعه تركض النهار مايتلحك عليه
من بعد مااشترينا بيت ابو رامي خلال فترة قليله كم شهر ابوي وثابت كملو بناء وانتقلو اسعد واياد يمنا
صح طل واحد بيته بس الباب الرئيسي واحد
رغم عدم تقبل الامر بالنسبه لاريج ونغم زوجة اياد
ومريم الي بانت تذمراتها واضحه لكن الولد مااهتمو
فرحانه بالحديقه وصار كل وقتي بيها حيل رتبوها
بكراسي وكعده ارضيه تخصهم صاحت عليه امي كمت وانه احجي يووو دوم تقطعين جلسات تأملي.
وفيه:دتعي ام تامل . شوفي ضغط ابوج.
ركضت للغرفه اخذت جهاز الضغط
وتوجهة لابوي الي صار فترة هو كلش تعبان
بسبب الجدال والمستمر بينه وبين ثابت
ومحد يعرف ليش وعله شنو مرة نكول بسبب اسعد
الي تغير وضعه وعبالك نكسر داخله فد شيء يخلص كعدته يمنا صافن . قطع شرودي سؤال امي.
وفيه:ها شنو صاعد.
_هزيت راسي اي وعيوني لابوي .
وفيه:يارجال صحتك ترى محد ينفع
كومي خابري اسعد اياد خل ياخذو للدكتور.
ابو اسعد:اتصلي بثابت.
_ركضت لنقالي اتصلت بي رد وهو يتحسر
تسمعني ابوي ضغطه مرتفع.
ثابت:جاي يابه.
_ضليت كاعده يم رجلين ابوي ودموعي تصب
افرج بي وكل شويه اباوعله بقهر جرني مكومني
بجيت حظني وهو يستغفر.
ابو اسعد:عليش هل بجي يابه مابيه شي.
_اموت اذا صار بيك شي .
ابو اسعد:استغفري ربج وان صار عندج ثابت واسعد واياد والمضمد مولي .
_ضحكت من دموعي. اجه ثابت
والقلق واضح عله عيونه .
ثابت:سلامتك يابه يله السيارة مشتغله
وانه اخذت موعد يم دكتورك.
ابو اسعد:ماكو داعي اخذت علاج .
_وبدون جدال كام وهو يكومه طلع وصاح عليه.
ثابت:كولي لمولي يتبعني.
_كعدت يم امي الي حالها مو افضل من حال ابوي بعد ماخالي جلال فاجئنا بخبر ابنه الي لحد الان دايخه بسالفته .قطع تفكيري صوتهم كمت تلكيته بقلق ها يابه سلامتك .
ابو اسعد:الله يسلمج .
وفيه:بشرو .
ثابت:مابي غير العافيه بس يدلل علينا.
ابو اسعد: حق دلالي وتعبي عليكم
ماضن قصرت وبالاخص وياك . فضلت عله ولدي
ثابت:وانه ماعصيتلك امر لحدهذا اليوم
تحت طوعك .قبل مايتوفه ابوي انه اتخذتك اب.
ابو اسعد:ومن اشتد عودك وكفت بوجهي
ولك دزيتك اطلع اسعد من النكرة البيها تروح تخط ويا.
_صدمه اول مرة ابوي يحجي ويا ثابت هيج
من فكينا عينا عله الدنيا ثابت اخونا ماعاملنه كعم
ولا احنه عاملنا معاملت عمي محمد جان اقرب من اسعد النا . ضلت امي محتارة ماكدرت تدخل لان كلامهم مو مفهوم .
ثابت:وهذا هو كبالك طلع بس ضايع
شتشوف حاله . عاجبك وضعه.
ابو اسعد:الزمن كفيل ينسي كل شي
اول وتالي يفهم ويستدرك الي جان بي غلط .
ثابت:ان شاء الله مثل متكول.
ابو اسعد:وانته شوكت تصحى عله نفسك.
ثابت:شلون اصحه وانته تريدني اغمض
وتجرد من انسانيتي واخلاقي وديني .
ابو اسعد:هيج تشوفي الله يبارك بيك.
ثابت:طول عمرك تكلي لاتخطي خطوى
ولا تقدم عله عمل قبل ماتنوي لله .
ابو اسعد:وانه مامانع مساعدتك الها .
ثابت:طلبت الستر الستر حجي الي غيرها
مستورة مستته وخانت. القت عليه الحجه
بطلب حمايتي الها شلون اواجه نفسي كرجل اذا خذلتها .
_ضلينا انه وامي بحالة ذهول اشرتلي بمعنى خابري الولد طلعت من يمهم اتصلت بااياد وبلغت اسعد
ومولي اريد اخابر عمي محمد والتفتت عله صوت مريم الي واكفه وراي.
مريم:خابري اهلي خل ابوي يجي.
_ضليت محتارة شرد عليها حاولت اعبر بدون ماجادلها فاجئني تصرفها جرت النقال من ايدي . شبيج معوده
جيبي نقالي لا دخليني بينكم.
مريم:منين خايفه اشو كلامهم واضح وعله مكشوف.
_كلمه مني وكلمه منها علت اصواتنا اجت امي تركض
افتهمت هوستنا عله النقال. جرته من ايد مريم اطينيا .والتفتت عليها
وفيه:همه راح يخابرون ابوج
واذا عندج شي منج لرجلج .
_ابو وثابت صوتهم ارتفع .ضلت امي تعصر بااديها .
لحد مااجو الولد والضاهر متصلين بعمي محمد .
_ركضنا للصاله ومريم ويانا.
محمد:خير شصاير .
ابو اسعد:ماكو شي بس الضاهر مالي كلمه بعد.
ثابت:مو هيج يابه بس اريد اسألك اذكرلي ايه
او حديث يحرم نسبهم .
ابو اسعد:ولك تريد اتغالطني ودخلني بذنب
اكو امور عرفيه عقائديه مانكدر نتخطاها وان كانت حلال. فكر هذا نسب جينات وراثيه شنكول لناس
مو عدنا بنات متزوجه والي بعدهن منو يدك بابنا بعد.
ثابت:الناس رضا الناس لو الله
حجي اذن صلاتنا رياء .
اياد:احترم نفسك عاد.
_خزرة ابوي . ومو جديده عليه لان الكل يعرف
ومتاكد ثابت اعز واقرب شخص لروحه وقلبه .
محمد:يابه فهمونا شكو.
_وبعد سؤال واستفسار عمي محمد
ننصدم بالي كالو . الكل اعترض بس اسعد ملتزم الصمت .
ابو اسعد:زين فكر بزوجتك واهلها منو يكول يقبلون
ثابت:اقل وابسط عقاب هو زواجي عليها
يابه لا تستفزني . وانه اخذت كلامك
انو الله اوصى بالستر .
_ضلو الولد يتلفتون . فز ابوي وهو يصيح.
ابواسعد: ابو حيه .تماديت.
_اول مرة ابوي يحجي ويا بهل لقب الي جان دوم
يمنع اي شخص ينادي ثابت بهل اسم .
يكول لاتكسرون اسمه التفتت لثابت ينضر لابوي بعتب هز راسه تمام .
ثابت:اذا اعتراضك لاجل مريم وجبار اطمن
مالهم حق يرفضون انه حر اتزوج محد اله شي يمي
رجال مامقصر وياها بشيء وزوجتي ماخلفت
من حقي ازوج اريد جهال .
_كل هاي الهوسه ومريم اطفر خابرو ابوي
صاح عليها.
ثابت:جيبي الي تحتاجي من الغرفه وتبعيني.
انتضرج بالسيارة.
_ركضت بدون ماتلفتت علينا
دار وجه ثابت يريد يطلع صاح بي عمي محمد.
محمد:وهيج بسهوله شوف اذا تزوجتها نتبرة منك.
ثابت:قصدك اطردوني .
بس افضل مما انطرد من رحمة الله.
_ماعجبني غير مريم الي طلعت تجرلها
بجنطه شوكت لمتها شنو متحضرة اشرلها يله
وقبل مايخطي باب الصاله صاح بي ابوي.
ابو اسعد:واذا خيرتك بيني وبيناها.
_التفت وعيونه مليانه دموع وحزن .
ثابت:مستحيل يابه مكانتك ماتتقارنه بشخص
لو تخيرني بينك وبين روحي افديك .ومااتردد.
_ومانتبهت لنفسي ابجي بصوت عالي اباوعله
ضل مدنك محتارة هز راسه تمام .
ثابت:بس اطلب منك طلب اذا الي خاطر ومثل ماجنت تكول لمولي من يسألك منو اعز واحد وترد عليه ثابت.
بعد لا تضغط عليه خليني اخذ زوجتي واطلع منا.
_احس امي فرفحت
تبجي تبجي وتنضر لابوي بعتب.
وفيه:اطلع وياك مالي كعده وياهم.
محمد:يعني لو تاخذلك عبده لو تكاطعنا.
_طلع بدون مايرد عله عمي ركضت
ورا مريم صاح بيها اياد .
اياد:تعاي انتي وين موليه .
مريم: هو كال تعاي.
اياد:درجعي رجعي
مريم :خلص ودوني لاهلي .
ابو اسعد:كوم مولي صيح لجبار.
مولي:خو اخابرة .
ابو اسعد:فضهههها.
_طلع ثابت وعافهم محتارين
التفت ابوي عله اسعد .
ابو اسعد:هاي كله بسببك انته وجلال
دخلتو لحذيج الحفرة .ذاك احاني بولد
وانته لو لطف الله جان هم ورطنك ولك شدعي عليك.
اسعد؛ماكو داعي تعب نفسك
حوبتها طيرت النوم من عيني
ابو اسعد:حوبت زوجتك . والي بطنها
انتبه لنفسك كول بعد يومين اصير اب.
توب واطلب العفو من ربك.
اسعد:الكاها واعلن التوبه واطلب منه الله يعتبرني صبي واستسلمت بس الكاها.
محمد:لا انتم يرادلكم تكسر شنو ولكم
مستحكرينا.
_قطع جدالهم دخول جبار ومرته . ركضت مريم
عليهم مريم تبجي وتحجي ولحد ما فهمو السالفه
جبار:خلص تمشين وياي.
ابو اسعد:اذا طلعت مالها رجعه .
جبار:يعني تقبلها لبنتك يريد يزوج عليها
لا مو اي زواج عبده وكاوليه وراقصه ومن شارع بشار.
محمد:هيج تطي مجال ينفذ الي براسه
عوف زوجته بمكانها . هو ماريد البت زواج
بس لان داخله عنده دخيله. وحجينا ويا ولغه الموضوع.
جبار:اي عود من تحلون سالفتكم
يجي عله مرته.
ابو اسعد:كتلك اذا طلعت مالها رجعه وانته اعتبر عصاتك مكسورة . لا توزيني احجي ولك انه وياك جذبنا خو ماتريدني اصدك الجذبه.
_ضلو الولد يتلفتون محد فاهم شي
كام جبار وهو يحجي.
جبار:اعتبرها بتك حته لاتكولون
ابن عمنا كسر بينا .
_طلع واخذ ام مريم ويا. وعبالك
ابوي لكه اسعد فرصه
ابو اسعد:عبدات وكاوليات ولك وين غيرتكم
زلم انتم لو بسبب كعدتكم بذاك المكان صرتو مثلهم.
اسعد:ترى البنيه العد ثابت محد شايف طولها
اصلا انه بيوم المشكله مال علاء يله شفتها.
ابو اسعد:كوم شوف ثابت وين راح .
_ونسينا اريج ونغم
الي اجن اكيد بسبب الهوسه
وصوتهم العالي.
اياد:شكو اجيتن.
اريج:شنو اجتماع مغلق ؟
صوتكم واصل لراس الشارع
خير شصاير ؟
مريم:ثابت جايبله عبده يريد يتزوجها
واسعد الي معرفه عليها.
_صدمه الكل بكلامها التفتنا عليها واريج
ضلت مسلطه نضرها لاسعد. حاولت امي تنقذ الموقف.
وفيه:زغيرون واسعد دلاه كولي بسبب ضيمج
وانتن يله كل وحده لبيتها لوصايحه عليجن بشغل
جا تعذرتن مانسمع .
اريج:لحظه خاله شنو الموضوع .
اسعد:كالتلج روحي لبيتج
اريج:يابيت ماسمعت شكالت
شنو عمو فهمني مريم شنو تقصد.
اسعد :ياموضوع هاي انه كبالج شنو شفتي
مكعدلي وحده يمي لو لكيتي الشيخ يعقدلنا .
_يمه يحجي برود فت اعصابي كام اياد
صاح بي . وبعدنا ماسادين السالفه ونتفاجئ
بثابت دخل علينا الكل توجهت انضارها عليه
يا شبي نص جسمه علينا وكل ضني يجر بجنطه لو فد شغله يعت بيها ويرجع يباوع علينا لحد ما سحبها
بقوة كمزت شنو هاي بنيه لا مو بنيه كائن غريب
دفعها كبال ابوي وهيه تحاول تتمسك بايده.
ثابت:هاي يابه امانه عندك استرها بطريقتك
لاتخليها ترجع للمكان الي طلعت منه .
_صدمه ذهول الكل بحالة صمت.
ثابت:شوف بلكي واحد من اصدقائك
الي يتساروعون بخطواتهم للجامع حته يحضرون
صلاة الجماعه بلكي واحد منهم يطمع برحمة الله ويفوز بالجنه يجوز واحد منهم عنده ذنب كله رب العالمين يغفرلك كل ذنب بسترها.
_كام اياد دفع ثابت .
اياد:دكافي عاد شنو هل مهزله.
_صاح بي ابوي .
ابو اسعد:لا تدخل اخذ مرتك واطلع .
اياد:يابه .
ابو اسعد:اياك لا هسه ولا بعد موتي اسمح لاي واحد بيكم ينسه نفسه ويدخل بينا لو يقلل من احتراما كاخ اكبر وعم ومن بعدي هو ابوكم فهمتوووو .
_راد يطلع صاح عليه.
ابو اسعد:تعتذر .
_دنك اياد يخفي دموعه محبتهم لثابت
ماتنقاس اخوه اصدقاء . جرة ثابت لحظنه
الكل تحجي اريج بصفحه ومريم تصيح
وانه عيني للي واكفه بخوف وتتلفت
ياالله شنو هاي . معقوله جا شلون يكولون
عبده يابه اذا العبيد هيج ربي سويني منهم .
صباح اسمر .
