رواية ناديه الفصل العشرون بقلم انين الليل
___________
سراج
رحنا انا وكرم وعمتي وركبنا البنات وره يمها وطول الدرب وهي ساكته
وصلتها البيت هادي ودگت الباب
طلع هادي كأنما منتظرها ما دخلت گلتله
=هادي لو مربيه چلب بالشارع وما مربيتك لو من اتوفى ابوكم عفتكم واخذتلي رجل ولا هذا الي سويته بيه
ولك تاخذ فلوس الايتام والسانك شطوله على سراج
هادي رد عليها //اي يتدخل بكل زغيره وچبيره عبالك هو ولي امرنا او وصي ع البنات ناسين انا عمهن
=عمه العماك ياحقير يانذل ولك لو ما سراج چان الهسه محد عرف ياهو كتل اخوك ولو ما سراج چان انت
اخذت فلوس الفصل مضاعف ورحت اتنازلت عن مياده وعشيگها
هادي تلعثم //اه انا يمه
=اي انت انت الجاي تخابر تريد ذهب مياده حتى تلبسه المرتك وبناتك
هادي //لا لا انا طالبت بي گلت حق البنات
هزت ايدها =ولك انت حقهن اكلته وسويت حجه مره المحامي مره حق اخوي بس شوف ما طولني عدله
وخشمي يشتم الهوى ما الك شغل ابنات عباس والمحل اخذه ابذمتك اليوم القيامه انت من يوم يومك طماع
ومرتك يا سبحان الله مثل امها بيوم الي توفت ام خليل اجت نصره بدل ما تبچي وتصرخ فاتت على جيب
امها واخذت مفاتيح البوفيه وخلتهن بجيبها وبقت ساعه تدور على جيزدان امها وما استحت نزعت محبس
امها من ايدها ولبسته وابوها اكل البستان وتالي من راد يرجعه عمتك ما قبلت وهسه انت صرت اتعس منهم
بس شوف لا تصدك تتوفق ودير بالك تمر لو تسال
جاوبها وهو يرجف //وانتو فد نمونه خلي سراج وكرم ايفيدوج
=ها ولك شنو سراج يريد ياخذ المحل لو البيت ولك جاي يصرف من جيبه الله يطيح حظك بس تدري شتمنى
اتمنى ما تسحب الدعوه وياخذون البنات ويفلسونك من كل شي شوف ولك انت مو صاحب فضل عليه
لا انت ولا مرتك ولا حتى بناتي عباس گبل لا ياخذ المصيوبه چان عينه علينه يصرف على البيت
وشايلني ومن اخذها بدلته بس هي غريبه وبالاساس طايح حظها وساقطه لكن انت عود ماخذ بت عمتك
الله يچرم بس انت ومرتك اسقط من مياده
هي انكشفت واعترفت واخذت جزائها بس انت ومرتك بعدكم تشمرون سمكم بكل مكان
هادي //ها هيج صرت
=واكثر يانذل رووح خلي افراح وامها واختها يفيدنك وما الك شغل لا بيه ولا ابنات عباس وهذا الي
تگول عنه يفيدني (واتاشر عليه )
اي هو هو الفادني طلع حق ابني تره وحتى هو صاحب فضل عليك
هادي باستهزاء //ها شنو فضله عليه
=فضله چبير يا ملعون لو ما هو كاشف مياده ومخلي ناديه تعترف على امها چان كل شي ما حصلت
لا فصل ولا محل ( رفعت ايدها بالدعاء ) ما اگول عليك اله الله لا يشبعك ولا يشبع مرتك وهي كلمه صدگني سنه
عشره عشرين ما راح تتوفق وشوف
انت جاي تاكل ابطنك وابطن مرتك وجهالك ورث ايتام وحقهن وهذا نار ابطنك
هادي //اي اكل بالعافيه بدل ما اخليهن لاثنين نغلات ما اعرف منين جايبتهن
اتقربت علي وضربته راشدي وتفلت علي وگالتله ==انت اكبر نذل ومرتك انذل منك چلب جاي تشكك
برجولة اخوك ياحقير تف عليك انا ما راضيه عليك والله ياخذ حقي منك وحق عباس
باوعتلنه وگالت =ياالله يمه كرم سراج امشونه خلو ابقصره گاعد
ورحنا كال كرم سراج عمتي ضايجه اخذنه فرنا وبعدين امشونه البيتنا اهناك ابقيلج يومين تلاثه يم
اختج وزهوره
بالبدايه ما قبلت لكن بعدين سكتت اخذتهم على الكورنيش ونزلنا شويه واشتريت للبنات وكرم ظل
يتشاقى وياها
بالليل كلش رجعنا البيت كرم ومن سمعت عمه جميله عاتبتنا وزعلت علينه ومن سالناها ليش زعلانه
گالت ابدي رايحه وياكم املخ افريحه بسنوني وانوبه ماخذيني امونسيني على شط العرب
وره اسبوع انا چنت توني جاي اجه هادي هو وكرم وعمتي جميله وبعدين اجت افراح وجهالها اجو اتسامحو
من عمتي هي ما حچت وياهم وصارو يرحون ويرجعون لكن عمتي بقت تستقبلهم ابرود
انا صرت اروح وارجع على بيت عمتي خصوصا وانا دوامي بالبصره ودوم امر على بيت ام رضا اشوفهم
اذا محتاجين شي وهم اطمنهم على رضا الى ان صارت احداث 2003 وهاي غيرت هواي امور
////////////////////////🌷🌷🌷🌷🌷/////////||||||||||///////////////////
ابداية سنة 2003 كانت الدول اتهدد وتتوعد نظام الحكم وكنا احنه نتلقى الاوامر حالنه حال كل العراقيين
حتى نبين انو هاي التهديدات عباره عن زوبعه وهي ما تهمنا وانو احنه عدنا نظام وحكومه قويه وگفت بوجه
اعتى حرب قادتها امريكا بعد احتلال الكويت اضافه الى حربنا مع ايران هذا كان الشي الظاهر لكن الباطن
كان شي اخر
انا مو بصدد ابين مساوئ او محاسن الحكومه لكن القصه تقتضي ان نذكر هذا الشي
بشهر الثالث عرفنا بان القوات البريطانيه بدت بالانزال في اطراف البصره وفعلا اسقطت سفوان وميناء
ام قصر وبدأت باسقاط الاقضيه قبل ان تسيطر ع المحافظه وصارت تلتف على محافظات الجنوب
من عدة محاور بوقتها كان الرعب يسيطر على الناس وفي كل قضاء يتم السيطره عليه تبدأ عمليات السلب
والنهب وتليها عمليات الحرق
اجانه الامر ان نخلي الموقع الي احنه بي وكان الاتصال موجود بالارضي وانا اسمع ابوي وامي يگلولي
اترك كل شي وتعال
من اجانه الامر انا اجيت وياي اوراق تخص دائرتي وصلت البيت عمتي وگتلها لازم اروح الاهلي المشكله
شلون اوصل وما نعرف شنو منتظرنه بالطريق يمكن سيطرات او عصابات او او
عمتي گالت لا ابقى اهنا لكن انا اصريت اروح الاهلي لان اعرف راح يحتلون بغداد وخفت على اهلي وما
نعرف شنو المجهول وصارت الشائعات تكثر بين الناس اهنا عمتي گالت انا اروح وياك انا والبنات ما اخليك
تروح ابحدك لو شنو يصير
انا بين الرفض والقبول خصوصا وانو بدت التصفيات ابين الناس الي عنده عداوه والي قاتل والي سارق صار
واحد يصفي بالثاني وصار البشر ما كو ارخص منه وخابرت ثامر كتله يفرغ المحل ويجيب الغراض ابيت كرم
الي اجانه وگال
- - سراج ابقى اهنا ما عليك شي
جاوبته :: حتى ابغداد ما عليه شي بس خالك وامي يتخبلون اذا ما اروح
العصر اندك الباب وراحت عمتي فتحته واجتني گالت
— رضا بالباب
استغربت شجابه رحت لگيته رضا هو بس شافني حضني سالته
:: هاا رضا اشلون اجيت
رضا گلي //سراج اجيت اشوفك ابوك يريد يموت عليك شنو تريدني اكعد واسكت وانت ما ندري عنك شي
:: مو هيج رضا بس انت مطلوب يعني الخوف عليك
رضا // هههه تحچي صدك لو تتشاقى يامطلوب اندارت
باوعتله :: شنو قصدك
- - قصدي ياخوي سبحانه الي يغير وما يتغير ما تگلي الرفاق وينهم المنظمه الحزبيه وين مراكز الشرطه
تدري انا هسه شنو ابمنطقتي راح اصير
انا شجاع او وطني لان قتلت رفيق كان ماذيهم بس بالحقيقه انا كتلته لان هو كتل اخوي
وهسه انا جاي اخذك الاهلك
ابتسمت بمراره ::سبحانك ياالله قبل اشهر اجاني رضا خايف وانا اخذته وخليته هناك يم ابوي وهسه رضا
راح ياخذني خاف احد يتعرضلي اتفقنا الصبح نطلع وعمتي گالت ما اعوفك رجلي على رجلك
رضا راح الاهله يشوفهم والصبح قررنا نطلع نروح البغداد اجه رضا الصبح واجت امه وعلي يسلمون علينه
وعمتي وصتهم على البيت
طلعنه الصبح انا ورضا وعمتي والبنات وهي تقرا ايات
كانت الفوضى بالبلد ناس فرحانه وناس خايفه ناس تبوك وناس تتخفى وناس تنقتل
سيطرات وهميه والناس رايحه وراده الكل يريد مكان امن والقوات الاجنبيه بكل مكان
ومن نوصل البعض السيطرات تشوف الاجانب وياهم واحد او اثنين مترجمين وياهم ناس مغطيه اوجوهم
وبيدهم سلاح
ومن يستوقفونه رضا ينزل ويعرفهم على نفسه خصوصا واحنا طلعنه من البصره على طريق العماره
وهو يگلهم انو هو ماخذ امه رايحه تاخذ جرعه ابمدينة الطب
ومن ايسالونه ليش البنات وياكم وامهم وين اتجاوبهم عمتي هنه يتيمات وهذا ابوهن كادود عافيه على الله
وعلى هاي السياره بعد ما شردنا من بيوتنا وارضنا خصوصا ورضا اخذ هوية اما وانطاها العمتي وانا اخذت
جنسية علي وهذا رضا فد علي السان صدك ما تعرف الشخص اله بالشدايد
وصلنه الاهلي بالليل بسبب القصف والقطوعات شافونه وهمه ما مصدگين بسبب الفضائع الي يسمعوها
من الاخبار الي تجسم المشهد تقريبا الساعه 122 بالليل اجه خالي ومن شافني شويه ارتاح وصار الحديث
انو لازم باقرب.وقت نتزك العراق
ابوي اتعجب وگله //مجيد وين نروح وليش نترك العراق احنه مامسوين شي
خالي //صحيح منير بس اامن الكم والسراج
جاوبته ::خالي انا ما مسوي اي شيي ولا عندي عداوه ويه اي واحد اصلا محد يعرفني ولا يعرف طبيعة شغلي
مجيد // الوضع متازم وصار اكتل وصير بطل خلي نسافر ونبقى فتره وبعدين نرجع
امي جاوبت //لا مجيد وين عايفين بلدنا ورايحين نكعد اهنا هسه صدام يحاربهم بالسلاح العنده وشوف
شلون راح ايفاجأ العالم
خالي گال //صدام لو عنده سلاح چان طلعه بحرب الكويت هسه من احتلو الجنوب الناس هي الي جاي تدافع
وجاي تحارب الامريكان وهو اي شي ما بدر منه لذلك احنه لازم نسافر لان الناس بهالوكت تباوع الاي واحد
بالشرطه او بالدفاع على انهم خونه عبالك چنه ندافع عن صدام مو عن العراق
وراح يصير تصفية حسابات وبس الله اليستر
انا جاوبته ::خالي اعيد واكرر انا ما مسوي شي رجل اقوم بواجبي تجاه وطني
مجيد //خالي بعدك زغير ما واعي على هواي امور احنا وعينه عليها وعايشناها وهالمره صدك راح يصير
تغيير او انقلاب
ابوي //لامجيد صدام مو بالسهوله ينطيها
خالي //هسه هذا الكلام مو وكته ضمو اوراقكم المهمه بمكان امين واخذو جناسيكم والجوازات وفلوسكم وكل
ما استعجلتو يكون افضل
امي //وين نروح
خالي //حاليا نروح للاردن ونگعد فتره وبعدين نشوف انا اجيت ابلغكم ضروري وهذا(اشر عليه )
لازم يروح انا باچر راح امر عليكم باچر العصر ونحاول المغرب نطلع
راح خالي وامي واختي طول الليل وهنه يجمعن بالملابس وابوي گال هاي الاوراق المهمه منيره يبقن يمج
عمتي هزت راسها واخذتهن خلتهن بالجنطه اجانه رضا وابوي گله
عمي رضا صدك الزلم تنعرف وقت الشده وانت عرضت نفسك للخطر ورحت جبت ابني وانا ياعمي صحيح
من جابك سراج ما چنت موافق وبنفس الوكت متخوف لكن شفت امانتك وخوفك على ابني لذلك ما الگى
واحد اامنه على البيت والشغل اله انت
جاوبته ::بابا يجوز رضا يرجع للعماره
رضا //وسفه عليك حتى لو رحت ارجع ثاني يوم شنو هلگد تشوفني زغير بنظرك
::لا والله رضا السويته انت واهلك ما يسوي اله كل انسان وفي
مرت الساعات بطيئه اجه خالي بسيارته واجه ويا ولد وگال هذا الولد راح يصعد وياكم ويوصلنه
ابوي وامي سألو شنو مجيد منووذوله
خالي // جماعه مسوي عليهم فضل وآن الاوان يرجعونه الي
عمتي وامي وابوي صارو يبچون لان عمتي قررت تروح البيت جميل وثاني يووم ترجع للبصره خالي مجيد
گال الطرق ابين المحافظات ما صارت امينه لان امريكا احتلت هواي مناطق وعلى هواي محاور
ابوي //يعني شنو
خالي //يعني ام عباس بالوقت الحاضر تبقى اهنا على ما تصفى
عمتي وهي تبچي //اي هسه اروح البيت جميل وانتظر رحمة الله
امي //امشي ويانه منيره انتي والبنات شعدج باقيه اهنا امشي ومن تهدا الامور كلنه نرجع
عمتي //شلون ام سراج مناك البنات وهادي وهذني شلون روحتي وياكم انا ابقى يومين تلاثه على گولتكم تهدا
الامور ونرجع
انا لزمت التلفون وخابرت صديقي علي ما بينت نوع كلامي ويا بعدين سديته وگلت الاهلي
:: انتم هسه توكلو وطلعو وانا راح اخذ عمتي اوديها البيت عمي جميل ومناك امر على صديقي علي لان هو قرر
يطلع هو وعائلته اجي وياهم
ابوي //وليش ما تروح ويانه
جاوبته ::بابا الله العليم شنو يصير احنه عدنا طرقنا ومخارجنا بعدين اشوف رضا لان گال اوصلكم ما اترككم
انتو هسه توكلو وانا خلال ساعتين من دخولكم الاردن انا يمكم
امي //ولا اتحرك اذا انت ما تروح ويانه لعد على شنو تركنا بيوتنا مو على مودك
::ماما افهميني لازم مو كلنه سوو اخذو موفق ونور وانا وعلي لا حگينكم لان اكو جماعه لازم يكونون ويانه
ابوي //منو ذوله لازم وزراء لو رفاق
::يابه هذا الكلام مو وكته وشي ثاني لازم خالي يطلع هو وعائلته
خالي گال //ياالله الولد يدگون هورن وهاك (مد ايده على جيبه وطلع ورقه وگلي )
هاك خالو هذا عنوانه وبي رقم التلفون بس توصل اتصل وانا اجيك
::ان شاء الله دير بالك على اهلي
خالي //بعيوني انت دير بالك على نفسك
كانت لحظات صعبه لمن ما ابوي لزم التلفون وخابر عمي جميل وصار يبچي واسمع عمي جميل يگله
- - - منير ابقى لا تطلع ولدي اربعتهم يفدونك ويفدون ابنك
مر الوكت حزين وممل وطلعو اهلي وگتلهم:: انتظروني ع الحدود اجيكم
عمتي گالت =انا راح اروح البيت جميل وانت روح ويه اهلك
فهمتها::. انو بقائي بأمر وما اعرف شنو راح يصير
وراحو اهلي وانا اخذت عمتي وطلعت البيت عمي جميل الي اتفاجأ ابقائي عمتي گالت
=باجر يروح ويه صديقه
عمي جميل //ليش بقيت ما رحت ومنو صاحبك هذا الي تروح ويا
انا ابتسمت ::چذب لا يجي عليه علي ولا راح اروح الاي مكان لان ما مسوي شي وما خايف من شي
عمي جميل گال //اي عمي الدوله بعدهي قويه
جاوبه بشار ابنه وگاله //يابه ياقويه الجنوب والوسط كله احتلو
عمي جميل //هسه صدام ايفاجئهم
بشار //بابا بعد ما يقبلون باي تفاوض ويا احتلو العراق وصدام كل شي ما راح يسوي
جميل بعصبيه //انت بشار انا خايف منك انت ويوسف هذا الكلام بس الله يستر منه
يوسف //يابه واقع حال اجه الوكت انو الناس المهمشيين يصيرون همه اصحاب القرار
انا استاذنتهم وگلت ::راح اروح للبيت لان ما اعرف شنو يصير
يوسف گلي //انتظرني سراج اجي وياك انا ومحمود
ورجعنا البيتنا بيومها بقينا للصبح گاعدين ويوسف ملا الخزانات ماي وحتى گلي طلع شكو سطل خلي نملي
انا چنت خايف على اهلي واكثر شي على خالي وسولفت اليوسف الي شفته اكثر هدوء ورزانه من قبل يتكلم
وكانه رجل صاحب منصب او جاه ثاني يوم الصبح قررت اروح اسأل على الولد الي اجو ويه بيت خالي لان
اعرف عنوانهم من اريد اطلع اجه اتصال بالتلفون شلته سمعت ابوي
- - وينك بابا ليش ما اجيت شنو صار
::بابا ما صار شي انت هسه وين
- - بابا وصلنه للاردن وانتظرناك وانت ما اجيت قررنا نكمل
::لا تخاف ابو سراج ما كو شي
- - اي ليش ما اجيت مو امك ماتت من البچي
::انطيني اياها
امي //ولك سراج طوول عمرك شالع گلبي
::ليش يووم شسويت على كيفج
- - شعندك باقي
::تردين الصدك ما اطلع ابقى
- - سراج ماما اخاف عليك انت ما تشوف ولا تسمع الي احنا شفنا بالقنوات وسمعنا
::اعرف بس انا باقي ما اسافر وبهيج ظروف
ابوي اخذ منها التلفون وگلي //حقك ما شفت الناس الي على الحدود لوما حسين واخو چان الهسه باقيين
بابا انت دير بالك على امي واختي وموفق وانا لا تهمون بيه هذا يوسف ومحمود يمي
اخذ يوسف التلفون وگله //عمي اطمن سراج بعيونه
وگله //اشتري جهاز تلفون يسمونه نقال وخلي شريحه بلكي ما يقطعون الاتصال
اطمن شنو سراج غريب سراج اخونه وصاحب فضل علينه
بقينا گاعدين بالبيت ومحمود يطلع ويجيب اخبار عن الموت والدمار والحرق بالمناطق الجنوبيه ثالث يوم العصر
اندك الباب وراح يوسف فتحه شفت رضا جاي وسلم علينه وگعدنا وصار يسولف انو الدوله بس بنص بغداد والمناطق
الغربيه واهل الجنوب جاي يحاربون بكل قوه وناس قابله وناس لا والبوك والقتل والثارات والسلاح بكل مكان
وگلي بس وصلت لگيت بيت عمي الي كتلت ابنهم شايلين لان الناس مهددتهم وانا رجعتلي الگاع الي اخوي انكتل
على مودها وحتى گاع بيت عمي هم اخذتها وانا هسه صرت مجاهد وبطل والناس تحسبلي الف حساب
اتعجبت هيج الامور فجأه بلمح البصر اتبدلت
صرت اراقب الموقف وانا ساكت ويوميه من منطقتنا ناس عايفه بيوتها ورايحه
وبدت الطيارات تجي البغداد وتقصف اول شي قصفت الطاقه ومنظومة الماي وصرنا عايشين بظلام دامس
وانقطعت حتى الاتصالات
عمتي منيره اجت يمنا بقت اربع تيام ورجعت البيت عمي جميل
وصرنا نسمع اشكال القصص من الناس ونسمع اشكال الاخبار من الاذاعات الخارجيه طبعا عن طريق الراديو
ونسمع نفس الاخبار الي تجي بصالحنا من اذاعتنا وصارت الناس عايشه بخوف ودوامه الى ان تم انتهاء
الحكم الي دام اكثر من تلاثين سنه بين هرج ومرج ناس فرحت وناس بچت وناس ارتفعت وناس هاجرت
صارت الفوضى بكل مكان واجه الحاكم العسكري الامريكي وحل جميع دوائر الدوله ناهيك عن الحرق والسرقات
الي صار
يذكرني المنظر من لمن يشرح النه معلم التاريخ بالابتدائيه عن سقوط بغداد وحرق معالمها ومكتباتها
الشي الي شفته والكل شافه ولازال ينعرض سواء بالقنوات او بالنت هو عمليات السرقه الي تمت بوطنه
والي قامو بي نفسهم ابناء هذا الوطن بلحظه اتندمت لان بقيت ولمت نفسي وانا اگول
:: الوطن الي ينسرق من ابناءه ويحترق من المحتل هذا مو وطن وانما بقايا وطن
عمتي قررت ترجع وانا ردت ارجعها لكن بشار وعمي جميل ما قبلو وگالو همه شافو سايق يوصلهم
الحد البيت لكن رضا ما قبل اله هو يروح يوصلها
اجت تسلم عليه وباستني وانا طلعت فلوس هي ما قبلت گالت انا عندي الفلوس بهالوكت ايفيدنك
بست راسها وشلت حنين وبستها وبعدين شلت ناديه وگتلها :: صيري حبابه واسمعي كلام بيبي
ردت عليه ......اي واسمع كلامك انت هم
ضحكت وگتلها:: عفيه بالحلوه
هي گلتلي ...عمو يمته تجينه انا احبك
رديت عليها ::وانا هم احبج واحب حنين واحب عمتي
شاورتني ...اي حبنا بس لاتحب هادي الشرير وافراح الساحره وهديل وعمار
ضحكت وگتلها :: ولج ام لسان هذا الكلام مو تحچينه ازعل عليج
...لا عمو بعد ما احچي التوبه
::لا لا زعلت عليج لان ما تسمعين الكلام
باستني وگالت ...والله اسمع والله اسمع بس لا تزعل عليه
حضنتها ونزلتها وانا احچي :: تسمعيين ملام بيبي وتديرين بالج على اختج
هزت راسها وراحت ناديه وعمتي وحنين ويه رضا وسايق يعرفه بشار ومن راحو شفت ناديه وهي دايره عليه
وتحرك بايدها اليه
اشوف بشار ويوسف يطلعون ويجون وياهم جماعه يوكفون بالباب وساعات يبقوون الثاني يووم سالتهم الي
عرفته انو اهل مرت يوسف كانو من المناوئيين للحكومه ومن صار التغيير رجعوا واول المساندين الهم بشار
ويوسف وعرفت انو ولد عمي صارو بالدوله او خلي نگول صارو بالاحزاب شي مهم
وره اسبوع اجه رضا بعد ان مر على اهله وگلي
سراج امشي وياي للعماره
باوعتله وگتله ::لا رضا ما اطلع من بيتي
ياخي اخاف عليك وهاي الناس ما ترحم
::وانا ارجع واگول ما خايف من شي ولا مسوي شي
بقيت بالبيت ورضا وياي وحتى بشار ويوسف ما تركوني بعد ان حل بريمر اجهزة الجيش والشرطه
صارت الدوله بفوضى وطلبو بعض الموجودين بالحكومه من خلال شعاراتهم انه لازم ترجع هيبة
الدوله بوجود اجهزة الجيش والشرطه لذلك صار الطلب ولازم تزكيه انا قدمت اوراقي وحصلت التزكيه
من نسابة يوسف الي طلبو مني ان اترك البيت فتره واروح الغير مكان
وفعلا رحت البيت رضا بالعماره وصرت اتواصل ويه اهلي من خلال رقم التلفون الي انطا الي خالي
واجت الموافقه ورجعت بصفة ضابط لكن مو بنفس الدائره الي كنت اداوم بيها بصراحه انا ما استسلمت
وانما صرت اتحرك وبعد سنه صارت الحاجه الى ان تنبني المؤسسه العسكريه من جديد ولازم نتلقى تدريبات
بغير دوول طبعا مو الكل وكنت انا من ضمن البعض الي تم اختيارهم للذهاب الى الاردن لتلقي بعض التدريبات
وسافرت بعد ان امنت على بيتنا وخليت رضا يجيب عائلته ويگعدون بي لان اجرو ارضهم على فلاح بعد ان صار
يسمع كلام من اقاربه وانو هو استولى على ارض بيت عمه لكن رضا للامانه مو استولى وانما اخذها حتى ما يجي
واحد يداعي بيها ولذلك اجرها وانطى علم البيت عمه انو كل سنه راح يدز فلوس المحصول
اما اولاد عمي جميل بشار ويوسف صارو احوال وبيوت وسيارات وحمايه
كان ابودي اسافر للبصره حتى اشوف عمتي وبنات عباس واشوف عمتي جميله وكرم لكن اجانه الامر
ان نسافر بخلال ساعتين الى احد الدول الاجنبيه وانا بالطريق للمطار خابرتها وگتلها انا مسافر وبس اوصل اخابرج
من سمعت عمتي صارت تبچي وتگلي
= موكافي منير راح وبعد ما اشوفه هالنوب انت
جاوبتها ::عمه حبيبتي اكيد انتي يهمج مستقبلي انا اروح فتره وارجع ومثل ما گتلج بس اوصل اخابرج
هي صارت توصيني ادير بالي وتدعيلي وانا اسمعها شلون تشهك وتبچي
وصلت وبديت اخذ دروس انا ومجموعتي كان هذا الشي تقريبا بمنتصف عام 2005
بقينا ثمن اشهر وبعدها سافرنا الى الاردن لتلقي بعض التدريبات وهناك التقيت باهلي وانا اشوف ابوي
شگد مبين علي الكبر من شافني صارن دموعه يسبقن كلامه وامي صارت تعتب عليه وترزل بيه انا اتقبلت
كل شي منهم وفهمتهم انو انا جاي ايفاد وارجع يعني ما گتلهم على طبيعة عملي
اهنا ابوي قرر يرجع امي ما وافقت بالعوده للعراق لا هي ولا موفق
ابوي گال //امنه اذا تردين ابقي ويه بيت اخوج وانا ونور نرجع البيتنا
ابوي حتى ما انتظر رد من امي راح للسفاره وفيز وثاني يوم رجع هو ونور وكأنه كان منتظر اي اشاره للعوده
اضطريت افهمه على وضعي وهو گال راح يشوف بيت يم بيت عمي جميل بين ما ارجع
انا ما بقيت يم امي وموفق لان كان عدنا تدريبات ودروس وحتى ما صرت امر الهم اله كل فتره وساعات نلتقي
باحد المطاعم نگعد نتغدا ونسولف ونروح
خابرت عمتي منيره وبلغتها برجعة ابوي وعرفت بعدين هي جايه يمهم وباقيه اسبوعين وحتى گايله الابوي
يجي للبصره ويبقى على ما ارجع هي عبالها انا مسافر للدراسه
انا طيلة فترة تواجدي ابغداد بعد ال 2003 كنت متواصل ويه كرم وهو الولد ما تارك عمتي ولا بنات المرحوم
دائما يسأل عليهن اما هادي فاتذكر مره وحده خابرني بعد ان جمدونه من العمل واسمع بصوته نبرة التشفي وكأنما
يطلبني ثار
الي عرفته من كرم انه هو انتمى الى احد الاحزاب وصار بالدائره بمنصب
انا ما اتواصلت ويا ابد ولا خابرته وحتى من اخابر عمتي ما اسالها بس على بنات عباس
بقيت بالدوره انا وزملائي واحنا نتلقى تدريبات ودروس وكنا دائما بعيدين عن المحيط الي احنا عايشين بي
يعني تمر علينا اسابيع واحنا ما نتصل او نتواصل ويه اهلنه
صار تلث تشهر من وصلت للاردن شفت امي بيها مرتين وهي چانت تلومني لان انا السبب برجوع ابوي للعراق
العراق الي نسمع بي القتل على الهويه وصارت الطائفيه المقيته هي الي تحكم المناطق
بيوم كملنه وانطونه استراحه اربع تيام بعد ان اخذت حمام واجيت اتمددت فتحت نقالي لان احنه نغلقه او
خلي نگول اساسا
ما ناخذه ويانه شفت يجي مية اتصال من عمتي منيره وكرم وزهراء بقيت متوتر واحس ريگي نشف بالگوه
مسيطر ع النقال شفت مسج من عمتي تگلي
==عمه سراج الحگني ناديه دعموها
من قريت الرساله صرت ارجف وگلبي صار يدك شفت التاريخ قبل خمس تيام ما عرفت شنو اسوي اتصلت بكرم
- - الو سراج
انا گوه احچي حتى ما سلمت :::كرم گلي ناديه عايشه لو ميته
/
