رواية ناديه الفصل الواحد والعشرون 21 بقلم انين الليل

سراج 

من قريت الرساله الي دزتها عمتي منيره وشفت المكالمات الي ماراد عليهن تراوالي انو خلص ناديه 

اندعمت وماتت 

انخمش گلبي اتصورت الي صار چانت افكار وصور تمر ابالي ماردت اخابر عمتي اتصلت بكرم بمجرد 

ما گلي الو سالته 

:: كرم ناديه عدله لو ماتت

من سالته ما اعرف ليش العبره تكسرت بصدري حسيت انو عباس جاي يباوعلي ويعاتبني انو انا ما صنت الامانه 

اجاني رد كرم //سراج اطمن بعدهي عدله 

جريت نفس وسالته ::كرم يمته صار الحادث وين وشلون 

كرم //سراج ناديه چانت حاله رايحه تجيب نتيجتها هي وحنين الي سبقتها وراحت للمحل واجت دراجه دعمتها 

برجلها وصفحتها

جاوبته :: تحچي صدك كرم 

اي والله وداعتك 

::هسه هي وين 

وين يعني بالمستشفى عمتي وزهراء وياها وحنين يمنه 

:: زين كرم راح اتصل بعمتي

كرم // اي سراج اتصل خطيه كلش تعبانه وهذا هادي اجه حاله حال الغريب بس انا يشهد الله كل ساع اروح اشوفهن 

وزهراء يمها ما مفارگتها 

:: كرم حنين جيبها خليها تلعب ويه جهالك 

اي من اول يوم الحادث رحت اجيبها ولازگه بعمتي وبس تبچي على بيبيتها واختها 

:: ياالله خلي اخابر عمتي 

الله وياك

واتصلت وردت عليه وانا احس بكلامها عتب 

::الو عمه 

=هلا بيك عمه بعد وكت ليش كلفت على نفسك 

::عمه حبيبتي والله هسه شفت رسالتج واتصالاتج اصلا التلفون مغلق مو صحيح 

=ياالله هذا هو هسه انا قابل طالبتك بطلابه هو انا من بزر بطني ما حصلت عود منك 

::افه افه عليج منيره هيج وانا والله بس قريت الرساله وشفت اتصالاتج ما ادري شنو صار بيه 

عمه والله ما كان التلفون يمي تدرين بيه هسه گليلي ناديه شبيها

=شبيها ياعمه سايق ابن حرام دعمها وشرد 

::ها وين دعمها 

=يمنه يم بيتنا كلش 

::عمه ناديه شبيها 

=الدعمه برجلها وصفحتها سوولها عمليه وبعد على الله 

::هي گاعده 

=اي عمه (حسيت بيها تباعلها وتريد تبچي )

::انطيني اياها خلي احاچيها 

اسمع عمتي تگلها هذا سراج حاچتني بتعب (عمو )وبچت

::ياروح عمو ندوش حبيبتي لا تبچين 

...عمو موجوعه تعالي عمو 

::اي اجي بس احصل اجازه 

...لا عمو تعال هسه انا خايفه 

جريت نفس :: لا تخافين وحتى اذا انا مو يمج اتاكدي انا قريب عليج من تخافيين من شي غمضي عيونج شويه 

تشوفيني وانا اضحك وبعدين فتحيهن ما راح تخافين من اي شي

جاوبتني بتعب وهي تبچي ... لا عمو هالمره انا خايفه عفيه تعال 

::اي اجي ان شالله اجي 

سمعت بچيها وردت عليه عمتي 

=سراج عمه لاتاخذ بكلامها ادري عدك شغل 

:: عمه انا بس احصل مجال اجي واشوفكم واي شي تحتاجينه گلي الكرم اي شي انا راح اوصي وافهمه 

= ما تقصر

:: عمه لا تحاچيني بزعل والله عدي شغل وراح اجي باسرع وقت انتي ديري بالج 

هي اتحسرت وگالت ==الله كريم 

::عمه ادعيلي ارجع بالسلامه باسرع وقت 

=ان شالله يمه الله وياك

عمتي سدت النقال حتى بدون ما تسمع سلامي عرفت هي مو زعلانه لكن محبطه رجعت اتصلت بكرم وفهمته

 شنو تحتاج ناديه عمليه مستشفى اهلي يخابر يوسف ابن عمي جميل وهو يحوله فلوس 

وافتهمت من كرم انو عمتي مقهوره من تصرف هادي الي ما كلف نفسه حتى يجي يوقع ع العمليه ولا يوگف 

ويه امه ومن خابره كرم اجه وكان كل همه يعرف الي دعم ناديه منو ولازم يعرفه

سديت التلفون وانا مقهور على عمتي لو هاي الطفله الي بس سمعت صوتي صارت تبچي وتگلي تعال 

ما نمت ذيچ الليله ثاني يوم رحت الرئيسي بالعمل وطلبت منه السماح الي باجازه والسفرهو بالبدايه عنفني 

وسمعني كلام شديد اللهجه لكن من عرف الحاله هو اتعاطف وياي وبنفس الوقت گلي 

(بعملنه لازم نخلي عواطفنه جانبا )

رجعت العملي وانا كل تفكيري بعمتي وناديه بقيت اسبوع بعدها خابرت كرم گلي 

طلعوها من المستشفى لكن البنيه تبچي من الالم تكسر الخاطر 

سالته ::وين هسه همه 

جاوبني گلي //ردت اخذهم البيتي لكن هادي ما قبل اخذهم عنده وخليت زهراء تروح وياهن

طلبت من كرم ايحولي رقم زهراء حتى استفسر منها على حالة ناديه لان من احچي ويه عمتي تخلصها بس بچي 

خابرت زهراء وردت لان اكيد كرم مبلغها 

::شلونج زهراء 

- - هلا سراج شلونك 

::الحمد لله اگلج شخبار ناديه

- - والله سراج ما اضم عليك البنيه الليل كله تصرخ من رجلها واليوم صبحت وارمه انا شفتها من يم 

اصابيعها لان مجبسه 

::زين ليش ما عرضتوها على غير طبيب 

- - الصراحه هادي ما قبل يگول هو طبيب كسور على شنو نعرضها على ثاني 

اتنفست بعمق ::وانتي يمها ؟

- - اي سراج لكن گاعده على اعصابي من هاي الحيه افراح

:: زين انا اشوف شنو اگدر اسوي 

زهراء حاچتني بخوف //سراج اذا تگدر تعال صدگني اذا ما تجي تره ناديه تفقد رجلها 

انا گمزت من مكاني وحچيت بعصبيه:: لا يابه شتگولين 

- - الي تسمعه هادي ما يهون علي يصرف على المسكينه وعمتي باجارالمحل والبيت يادوب للدوه 

جاوبتها بعصبيه :: زين زهراء انا مو فهمت كرم 

- - اي هو گلي بس انا ما قبلت 

:: وليش زهراء ما قبلتي

زهراء وهي تتحسر//صدك ياسراج كرم يجيب الفلوس وهادي يستولي عليهن تصور اجن جارات عمتي للمستشفى 

وجابن عصاير وچكليت صار هو ومرته يجمعون بيهن وياخذوهن وخله سيت واحد شسولفلك خليها سكته 

:: هاا شنو 

- - سراج عمتي تنطي فلوس الياسر يروح يجيب اكل من المطعم الها والناديه والي لان افراح مكضيتها تمن وعدس 

على بو جهالي ما ياكلون اللحم ومن تجيب عمتي الاكل يلتمون وياكلونه لو..

قاطعتها وگلت ::كافي زهراء كافي انا راح اتصرف

سديته واتصلت بيوسف وگتله ::اريد اجازه ارجع للعراق 

يوسف گلي //سراج شنو اجازه هو بكيفنا 

::مو مشكله انا راح استقيل 

- - اي شكو غير افتهم 

::المفروض يا ابن عمي عدنا عمه بالبصره تسال عنها وعن احوالها لان هي ولا فد يوم عافتنا

يوسف باستغراب //هاي شبيك سراج اول امس هادي اتصل بيه 

انا گلت يجوز حتى يشوفله طبيب زين او بلكي واسطه يسفرها سالته 

:: هادي شراد ؟

يوسف //ماراد شي عنده شغله مكلفه عليها ولد صاحبه وخلصتها اله 

::ها وسالته على امه 

- - اي سالته يكول كلنه زينيين

نفخت وكتله ::يوسف تره بت عباس مسويه حادث واحتمال تفقد رجلها وانا لازم ارجع 

  يوسف بتعجب //سراج انت شتحچي شنو مسويه حادث اگله اول امس هادي وياي ع التلفون 

:: اي اعرف هذا الي يسويله الواسطه لازم تارس جيبه 

- - شبيك سراج مو الهلدرجه ؟

جاوبته بنتر ::واكثر وداعتك بت اخو بالمستشفى ويگلك زينين هسه يوسف حصلي اجازه لو ماكو 

ما لازم ابطل 

يوسف // على كيفك سراج هسه اخابر وتدلل 

:: يوسف بسرعه البنيه رجلها مو زينه ولا تخابر هذا الناقص هادي 

- - ابدي اخابره واطيح حظه 

:: لا يمعود يرجع على عمتي وعلى هاي الطفله المسكينه

وحصلي يوسف بس گلي هاي راح اتاخرك بتكملة التدريبات قبلت لان صوت ناديه واذيتها يطخ باذني 

رجعت بنفس اليوم عن طريق البر وما عطلوني ع الحدود بحكم واجبي وبوجهي ما مريت على بيتنا الي ابغداد

 گبل رحت للبصره وصلت بالليل رحت البيت كرم لان خابرته

لگيته منتظرني بالباب بس دخلت للبيت چنت تعبان كلش ما حچيت ويا بس دخلت للحمام سبحت وطلعت نمت

 ما حسيت اله الصبح وانا اسمع عمتي جميله تگله //اشلون ما تندهني حتى اشوفه الهذا الچلب الي ما يكلف

نفسه يخابرني 

كرم// يمه نصي صوتج خطيه وصل الساعه بتلاثه ميت من التعب 

حچت باستهزاء //تگعده گعده خلي اشوفه

فكيت عيوني وتثاوبت وانا اگلها //اويلي جميله كون صوتج جميل مثل اسمج 

ردت عليه //خاب انچب شبي صوتي چان يشبه صوت شاديه 

گعدت :: اي وانتي چنتي تشبهين سميره توفيق وادري گبل لاتاخذين عمي ابراهيم خطبج قايم مقام الفاو 

زهراء وهي تبتسم //صباح الخير ليش تقلد على امي 

انا باستغراب ::ها انتي اهنا عبالي يم ناديه

- - اجيت سراج وبعد شويه اروح 

::ليش اجيتي 

جميله /بعد ليش من هاي بت الفكر افريحه ما سامع صار البيت المطيره وطارت بي فرد طيره 

كرم //زهراء جيبي ريوك بسرعه

وراحت زهراء جابت الريوك اتريگت انا وكرم وعمتي جميله وزهراء ورحنا كلنه انشوف ناديه بالطريق نزلت انا وكرم 

يم بسطيه واتسوگنا فواكه ومخضر لان اعرف بهادي وافراح شگد جلوفه وانا قبل ما اجي جبت هدايه الناديه وحنين

 ولان عرفت انو هنه ابيت هادي جبت الجهاله همه

ما اعرف قبل لا اوصل البيت هادي انقبض گلبي يمكن كنت خايف على ناديه دگينا الباب وفتحت افراح اتفاجئت 

من شافتنا جايين خصوصا من شافتني رحبت بينا وهي تحچي ابرود  

 - - عمه اجوج خطار

عمتي گاعده بالصاله وشفت وحده نايمه على قنفه حتى مو چربايه عمتي بس شافتني بچت وحضنتني وهي تبوس بيه 

چان مبين عليها التعب وكسرة الخاطر والخذلان شفت حنين نايمه بالارض على زوليه ومتغطيه بلحاف وناديه 

نايمه على القنفه 

عمتي حتى ما خلتني اسالها گالت = الليل كله وهي تون من الالم هسه هجعت شويه 

جميله //خليها نايمه

ما گدرت اذا ما اشوفها اتقربت منها وشاورتها باذنها:: ندوش اگعدي انا اجيت 

هي دارت وجهها شفت السواد جوه عيونها والتعب الي مبين عليها برطمت وگالت وهي تدفعني بايدها 

...ما اريدك ليش هسه اجيت ؟

وصارت تشهك وتبچي وهي تگول ...عمو الوجع راح يموتني 

حضنتها حييل وانا اگلها :: لا تخافين مابيج شي 

جاوبتني بصوت متقطع ...يعني ما راح تعوفني وتروح بعد ما تجي 

هزيت راسي وانا اصطنع الابتسامه :: لا ما اعوفج

اجت زهراء وگالت الها //ياالله خلي اخذج للحمام

هي استحت من عدنا اجت افراح //ها زهراء اعاونج 

زهراء فتحت عيونها متفاجئه من كلام افراح //لا ام ياسر انا اشيلها بس كرم وسراج روحوا للديوان لان 

ندووش تستحي 

كرم راح وانا اتقربت من زهراء گتلها:: شنو ما كو كرسي ؟

زهراء //لا سراج خالتي بعد ما مشتريه

::وين الصب مو برجلها 

- - اللحد الفخذ 

::وشلون تشيلينها 

- - انا وخالتي نتگابل عليها ونشيلها وانا جبتلها كرسي للحمام 

هزيت راسي وگتلها ::وخري خلي اشيلها 

هي اتفاجئت وگالت ...لا عمو لا تشيلني

ما سمعت الها شلتها وسألت زهراء ع الحمام ودخلتها ودخلت وياها زهراء وبعدين صاحت لي ورجعت شلتها 

وجميله تگلي // اليوم شلتها وباچرشلون

باوعت العمتي منيره الي چانت مقهوره گلت :: العصر اخذها للطبيب اتحضرن زهراء سوي العمتي وناديه ريوك 

زهراء //صار هسه

واجت افراح جايبه چاي وسالتني //شلونك سراج والوالده شلونها شنو حلتلها الگعده هناك بعيد عن ابوك خطيه

يگولون ظال بالضيم 

باوعتلها ورديت بتهكم :: ابوي بالضيم ام ياسر ما اعرف والله بس الي اعرفه يمه نور وهم بيت عمي جميل ويوميه

يبقى ويه امي للصبح يسولفون 

افراح //بس ولو رجال بلا مرته شلون ترهم 

:: كلامچ صحيح ام ياسر امي ترجع خلال هالشهرين

- - اي خلي ترجع هي منين خايفه ما شاء الله ولد عمك بالحكومه يگرگون وانت يگول هادي ....

قاطعتها جميله// والله انتي الي تگرگين 

افراح فلت وجهها جابت زهراء الريوك كوبين حليب وصمونتين وصارت تشرب الناديه حليب بالخاشوگه 

كمت ::ياالله كرم 

زهراء //وين رايحين 

جاوبتهم ::الظهر نرجع

جميله باستهزاء //زهراء يمه انتي ومرت اخوج (تقصد افراح )سوون غدا زين السراج جاب اشكال بالسياره 

رديت ::لا تكلفون نفسكم ما نجي ع الغدا 

افراح// ياا شلون يصير 

::ما نريد نكلفكم ام ياسر

وطلعت انا وكرم ورجعنا البيت كرم بقينا نسولف واتغدينا وبعدين ارتاحيت شويه وطلعنا انا وكرم رحنا حجزنا

الناديه ورجعنا 

لگينا هادي جاي وداخل بغرفته ينام انا طلبت من زهراء تبدل الناديه وحنين لان بقت تبچي ما تقبل تبقى 

افراح گالت //هسه توه اجه هادي وتعبان كلش ودخل يرتاح 

جاوبتها :: ولايهمج ام ياسر هذا بيتنا ماكو فرق 

افراح //يحتاج اروح وياكم 

جميله //شتسوين ترحين ظلي يم رجلج

واخذناها انا وكرم وعمتي وزهراء 

دخلنه للطبيب الي عرفها لان هو:الي سووا العمليه وفهمته زهراء هي ما تنام وتبچي 

باوعلي الطبيب گلي //شتعود الها 

جاوبته عمها هز راسه وطلب اشعه واخذناها سوينالها اشعه وانتظرنه مجرد ما طلعت الاشعه انا خليت زهراء

يم ناديه وحنين ورحت انا وعمتي وكرم شافها الطبيب گال 

انا طبعا اعرف شنو بيها لان انا الي سويتلها عمليه

:: دكتور شكو طمنا 

الطبيب باوع العمتي //حجيه مو قبل اسبوع انا شفتكم بالمستشفى وچان وياج ابنج الچبير 

عمتي =اي دكتور 

الطبيب //ليش هو ما گللكم 

سالته ::شنو دكتور شكو 

- - انا فهمته للاستاذ انو العظم ملتهب والعمليه ما نجحت لان الضربه قويه وما عدنا ذيچ الامكانات والاجهزه 

وفهمته لازم يسفرها للخارج وهو اكدلي راح يسفرها

رديت ::دكتور ليش مو سووتولها عمليه 

الطبيب //اي صحيح لكن بغير دول الطب بتطور احنا اهنا عدنا نقص بكل شي المعدات الجديده الادويه لكن بغير

دوله لا راح تلگون هواي امور ممكن تنقذ حياة البشر 

سالته ::زين دكتور الاي دوله انسفرها 

الطبيب //مثل ما گتلك استاذ تقريبا كل الدول عدها كفاءات ومعدات افضل من عدنا وبصراحه لازم تستعجلون 

وإلا تره احتمال تسبب الها مضاعفات خطيره ويجوز تفقد ..

ما خليته يكمل ......طيب دكتور انا راح اخذها للاردن 

الطبيب //بعد احسن طبهم متطور لكن بيكم وما تستعجلون انا راح اكتب الها ابر تخفف الالم وانتم استعجلوا 

 بالسفر خطيه طفله وحامله وجع ما تحمله جبال

عمتي دنكت وصارت تبچي وكرم لزم چتف عمتي وانا واگف گبال ميز الطبيب الي كتب علاج ابر وشراب 

ورجعنا واحنا محبطين من كلام الطبيب ومن تصرف هادي 

وصلنا البيت هادي لگيناهم گاعدين سلمنا وانا سلمت على هادي الي دخلنه للديوان وزهراء اخذت ناديه للصاله

گعدنا عمتي جميله گالت// هابشرو شنو گالكم الطبيب 

سكتنا عمتي منيره گالت ==لا تسالينه اسالي هادي 

هادي جاوب وهو يبتسم //شنو يمه قابل انا رحت وياكم

==لا ما رحت بس الطبيب مفهمك 

انا گتلها ::عمه على كيفج لا تسمع ناديه 

عمتي وگفت وحچت بعصبيه ==لا مو على كيفي انا اريدها تسمع الطبيب گايل العمها اخو ابوها او ولي 

امرها گايله اخذها للخارج سويلها عمليه وهو ساكت عليك الله هادي هاي لو بتك هم هيج سكتت 

هادي بارتباك //شنو يمه جاي تتهميني الطبيب يچذب

==ها يچذب وهو سماك بالاسم ليش مو هذني يتيمات حرام عليك 

هادي بنتر // حرام عليه حرام عليه شنو بايك سايك 

عمتي =اي بايك بكت فصل ابوهن والمحل وهسه ابنيته تلوج گدامك من الوجع وانت ابد ولا هامك 

هادي بعصبيه //شنو اليسمعج ذابكم مو هالكاعدات بالبيت معززات مكرمات 

== احنه معززات ولك حالنه حال الاسير حدنا للهول ما نتحرك هاي حنين ممنوع تلعب ويه بناتك

هادي رد بعصبيه //ها انوب صرتي اسيره وبناتي ما يقبلن يلعبن حنين وياهن بساع دسترنها بنات مياده ذني 

مثل امهن حقيرات من هسه يتبلن 

جاوبت بحرگه = ولك شوف عيني بس انت شگول عليك رب الاكلت حلال اليتيمات وهسه بت اخوك تلوج من 

الالم وانت ولا بحالهن ما تگلي انت شنو ملتك

هادي وگف وصار يحچي بعصبيه //اي طلعي بعد احجي گولي كله من مرتك گولي ليش ساكته كافي ما مليتي

 اكلت فلوس اخوك اكلت الفصل مال اليتيمات هي مياده ما ادري من يا شارع ملگطتهن وانتي ترديني اصرف عليها 

عمتي بعصبيه =ولك انت نذل مو اليوم 

كرم// هادي شنو هالحجي هذا عيب عليك 

هادي بنتر//لا مو عيب مو كل اليجي يصير عنتر براسي ويريد يطلع نفسه بس هو وبس

جاوبته بنتر :: دي كافي هادي انت شتحچي الطبيب گايلك اخذها الايران للهند وانت ساكت 

هادي رد //اي اهنا طب وهناك طب شنو منين اجيبلها السفر ما يرادله فلوس 

عمتي ==فلوس ابوهن 

هادي باستهزاء //ايبااخ يا اب هذا 

عمتي //فلوس الفصلين والمحل الچبير السجلته باسمك

هادي //المحل محلي والفصل انطيته للمحامي واي شي ما عندي وشتردين تسوين سووي عندج اجار البيت والمحل 

اخذيها طببيها اما انا انسي فلس احمر ما اصرف على بنات مياده ولو اعرف بيهن بنات عباس ومن صلبه هسه

 انا مسفرها للخارج من اول ما كلي الطبيب بس انا اريد رجلها تلتهب ويگطعوها الها ح...

جميله قاطعته // خاب اسكت 

 وگفت جميله وگالت //اگلج منيره انتي متاكده هادي ابن خليل والله لو ما ماخذ افريحه چان گلت انت ابن نصره

هادي //ها وبس عباس ابنها مو ما طول هيج صار الحچي وانا ما عليه لان ذني نغلات ملگطات ما ادري 

منين وعباس چان ..

قاطعته بعصبيه ::هادي عيب هذا الحچي 

جاوب باستهزاء وبصوت عالي //لا هذا الحچي انا بالنسبه الي ما عندي ولا فلس اصرف عليها الي يريد يتكيرم

 يتكيرم من جيبه ولا يجي يبيع براسي مراجل واله لو ادري بيهن بنات اخوي ما اخلي احد يتدخل وياخذهن للطبيب 

بس ذني لو يطلع عباس من گبره ويگلي بناتي ما اصدگه وابقى اكرهن ولو بيدي ذبحتهن وذبيت لحمهن للچلاب

جاوبته بعصبيه :: دا كافي عيب عليك تره الناس تكبر ما تزغر 

هادي //وانتم شكو وتتدخلون 

اتقربت علي وگتله وانا اخزر بي ::نتدخل وغصبن ما عليك من تصير عمهن وگد المسؤوليه ذاك الوكت ما نتدخل 

عمتي =كافي (وصاحت )زهراء يمه لمي ملابسنا خلي نروح البيتنا لان هادي بيك عيرنا بالخمس تيام الگعدناهن عده

بس تره مو ابلاش حتى الشربت والجكليت الي تجيبه الناس لمته مرتك واخذته 

جميله //وين ترحين منيره ياهو وياج يداري البنيه

عمتي هزت ايدها = هههه واهنا ياهو وياي خلف الله على زهراء تره من اجينه اليوم الله هاي خمس تيام افراح

 ما كلفت نفسها لو تجي تگول شلونها وهذا ابني يدخل ينفخ ويطلع ينفخ 

افراح //انوب رديتي عليه ( اتخوصرت وصارت تحچي بعلو صوتها ) لا اسمعيني زين هذا ابنج تحچين تغلطين 

علي ابنج بس من يمي واتكفي انا مو خدامه البنات العايقه مو امهن شبعت ويه صحبانها وانوب انعدمت وجايه 

تردينه نخدمها

جميله //ولج افريحه صدك انتي ادب سزز وما متربايه 

عمتي باوعتلي وگالت = ياالله سراج تاخذني لو اروح ااجر لي تكسي وانتي زهراء بسرعه خلي نمشي 

افراح //والله اذا تردين ترحين روحي تره انا على اعصابي حاويه هاي الشكولات ابيتي واذا تردين تسفرينها

 سفريها بيعي المحل البيت مالهن وسفريها احنه ماعدنا وحتى لو عدنا ما نصرف فلوسنا على النغلات

عمتي عضت شفتها = حقج خاله حقج محد يلومج بس صدگي يا افراح ما افرحج وابيع البيت لو المحل عدهن 

رواتب ابوهن مجمعتهن واسفرها واعالجها ولا اخليج انتي وبناتج تتشمتين بيهن 

رفعت اصبعها = وانت ولك هادي مو عبالك اخذت المحل والفصل وفرحان بي انا اگدر اشتكي عليك واجيب 

ابو المحل واخلي يحلف گدام القاضي وانت تحلف وسراج وعصام الشرطي واگدر افضحك گدام ابو عيسى 

الشيخ واگول اكل فصل اخو بس تدري لا 

(عمتي طلعت صدرها وگالت )انا مسلمتك بيد الله هو ياخذ حق اليتيمات وياخذ حق حرگة گلبي

جميله //كافي منيره لاتنقهرين خايبه ظلي لليتيمات منو الهن اذا صار عليج شي 

عمتي //هاي انتي حچيتيها من يصير عليه شي هاي گدامكم وصيه تشكل الذمه من اموت سراج هو المسؤول 

عنهن هاي وصية ابوهن وكرم وانتي وزهراء شهود گدام الله والناس من اموت المسؤول عن ناديه واختها وحلالهن 

سراج هذا هادي ما يتقربن اله

طلعنا كلنه وهادي ما كلف نفسه حتى يطلع ورانه الدرب كله وعمتي جميله تنعى وتبچي كرم گال 

- - سراج امشي البيتي واذا هادي فك حلگه اطگه طلقه واموته خلاص تره گوه لزمت نفسي 

عمتي منيره رادت تحچي جميله گالت الها //امشي واسكتي 

وصلنه البيت كرم وبس نزلنه رحنا انا وكرم وجبنا عشا چان الكل حزين عمتي جميله حچت

- - اگلك سراج وين هدية ناديه وحنين 

انا كأنما اتذكرت شي ضربت على گصتي ::اهوو نسيتها بسيارة كرم 

ورحت جبت الجنطه وطلعت لعابه الحنين ولعابه الناديه وملابس 

وشلت علاگه الكرم گتله الجهالك 

جميله //عليك الله سراج هذني جايبهن الجهال كرم 

كرم //يمه شبيج كافي

جميله //خاب اكريم انچب انا وابن اخوي انت شلك غرض  

ابتسمت وگتلها ::لا والله لان ابالي اروح البيت هادي گلت من اطلع الهدايا لازم اخذ الجهال هادي 

جميله //تاخذ الهم حمس يطيح بگلب افريحه الچلبه شوف كل شي بالقسمه هنه مقسومات الجهال كرم بس والله

 لو جايبين الفواكه والمخضر ولا تاكلهن هاي ام حلگ

ضحكنا على كلام عمتي جميله ولو اشوف الخيبه والخذلان بوجه عمتي منيره

ثاني يوم الصبح طلعت ورجعت الضحى لكيتهن گاعدات جميله گالت الزهراء جيبي ريوك لاخوانج 

احنه كلنالها متريگين بس چاي سالت عمتي منيره ::وين جوازج وجواز ناديه 

هي باوعت =ليش ؟

:...حتى افيز الكم واخذها اسويلها عمليه 

زهراء //وين تاخذها ؟

::للاردن

هي باوعتلي والدمعه بعينها حضنتها وگتلها :: منوره مو وعدتج ما اعوف بنات عباس 

بقت تبچي وهي ساكته زهراء گالت //سراج وحنين شنو تبقى اهنا خطيه 

هزيت راسي :...حتى حنين اخذها 

جميله //خاف هويدي ما يرضى 

كرم //لا شنو ما يقبل مو بكيفه

جاوبته:: خلي اكمل وانطي خبر هو كل همه الفلوس 

عمتي = من طلعت جواز ضفتهن وياي 

:: خوش اتسهلت هواي امور

راحت عمتي وزهراء وحنين ايجيبن الجواز وانا بقيت يم ناديه الي سالتني 

... صدك راح تاخذني وياك 

عبالك كلام وحده چبيره هزيت راسي 

... وهذا الوجع الي برجلي يروح 

:: اكيد يروح 

... وما يگطعون رجلي 

:: لا شنو هالحچي هذا 

... عمار وهديل يگلولي راح يگطعون رجلج وبعد ما تمشين وانا بس ابچي لان بس اگول البيبي تبقى تبچي 

وانا ما اريد اشوفها تبچي

:: لا حبيبتي اخذج هناك يشيلون الجبس منها وتصيرين تمشين 

هي باوعتلي وبعيونها لمعه وگالت ...عمو سراج انا احبك هواي بس قبل ما اندعم چنت اكرهك 

انا بضحك:: هاا ليش شسويتلج وتكرهيني 

... لان عفتني ورحت وعمي هادي يگل البيبي شرد ابن اخوج خاف على روحه صدك عمو انت تخاف 

سالتها :: وبيبي شتكول 

... بيبي كلتله انت الي تعرف بسراج ما يخاف وبعدين تبقى تبجي 

:: وانتي شتشوفيني اخاف ؟

هزت راسها وايدها ...لا انت بطل ما تخاف 

::خلص خلي يحچي هيج براحته

اتعجبت شنو الي غير هادي هالشكل ومنين جاب قساوة الگلب هاي صحيح هو طماع بس هادي بطبعه حنين 

ثاني يوم فيزت ورجعت گتلهن باچر نسافر بسياره خاصه

چنا گاعدين بالليل قررت اخابر هادي اتصلت علي ابلغه بالسفر رغم ممانعة عمتي منيره وجميله لكن كرم گال 

- - ننطي خبر احسن كل شي يصير 

جميله //اذا اسم الله صار ما صار هادي يگعد ركبه ونص يطالب بفصل 

كرم //هههه يمه شلج بهالحچي هذا

جميله //خاب ياحچي لو كاظيين الدعم البنيه چان ما سفر ناديه للهند لا چان وداها للكمر بس حتى يطلعله شكم 

فلس من فصلها شنو ما تعرفونه 

كلنه ضحكنا خابرت هادي وسلمت علي وگتله ::راح اخذ ناديه وعمتي وانا انطيتك خبر واذا تحب تعال ويانه 

هو رد ولا كانه صاير شي // لا ما اگدر عندي شغل بالدائره انت اخذهن واي شي يصير بلغني 

رديت باستهزاء :: صار وتأمر اگلك هادي (باوعت الناديه وابتسم ) 

- - ها سراج 

::تره انا ما شردت لا خايف ولا جبان وراح اثبتلك

وسديت التلفون 

الكل يباوعلي وهو متفاجأ شفت بعيون ناديه لمعه فرح وكانها كانت مقهوره من كلام هادي 

ثاني يوم الصبح اجرت سياره وسافرنا انا وعمتي وناديه وحنين وصلنه الظهر البغداد ونزلنه سلمنا على ابوي ونور 

ابوي الي اشوفه تعبان ومقهور من تصرف امي عمتي گالت =اريد ابقى الليله ابات يم منير 

انا گتلها ::لاعمه من نرجع تبقون ابغداد لمن ما تملون هسه لازم نروح حتى نوصل باسرع وقت

انا خابرت موفق راح يحجز بالمستشفى 

وفعلا اتغدينا وناديه ما اكلت شويه بس على مود الدوه واشوفها شلون متاذيه اما حنين فالطريق كله نايمه 

وره الغدا سلمت على ابوي وصيت نور تدير بالها واي شي تحتاج تخابر رضا 

نور گالت //والله سراج رضا وامه واخو ابد ما مقصرين يجيبون المسواك والفلوس وامهم حبوبه وسوالفها 

حلوات ولو تشوف كله خبز بيت والسمچ فد شي مو طبيعي 

انا ضحكت وجاوبتها // اكلج خاف ناصبه على ابوي تريد تاخذه 

نور // ابوي سراج كلش متأذي على امي اعرف بي بس ما يبين هذا الشي 

 هزيت راسي :: انا اروح واشوف بلكي اقنعها ترجع خلي اروح اسلم على ابوي وانتي ديري بالج على نفسج 

نور // ان شالله

رحت بست ابوي بخده وكتله //محتاج شي ابو سراج 

ابوي ابتسم وگلي // سلم على امك 

:: بس 

ابوي // شتريد تكول 

:: بشرفك منير ما مشتاقالها 

جر نفس // من تاخذ الي تحبها وتفاركها تحس كل شي متحطم يابس ما بي حياة وامك من بقت هناك انا حتى الحياة كرهتها 

:: لا تحجي هالشكل يابه امي رادت تبقى هناك وانت ونور وحتى اني رادتنا حواليها 

ابوي //. وانا ما زعلان عليها

اتقربت علي وحضنته وصعدنا بالسياره عمتي منيره گالت خلي امر بجميل اسلم وانا واكفه مرينه وسلمنه  

وصيت يوسف ومحمود يديرون بالهم على ابوي لان عيب رضا شايل الحمل وهمه الولد اتعذرو بسبب مشاغلهم 

طلعنا بالسياره بالطريق خابرني رضا وگلي

ليش ما مريت اشوفك اروح وياك 

جاوبته ::مو مال انمر البنيه وضعها صعب انت دير بالك 

رضا // بعيوني لا توصي حريص 

:: سالمه عيونك 

- -سراج بروح جدك من توضل خابرني تره بالي يجيب ويودي ما استقر اله اطمن عليك 

::ان شاالله

مشت السياره بينه وناديه بسبب العلاج اكثر وكتها نايمه وصلنا الفجر للاردن لان ما اتوقفنا تقريبا طلعنا بوجهنا

 رغم التعب طلعنا للمستشفى بقينا منتظرين على ما اجه الطبيب 

وشاف الاشعه والعلاج امر ان تنام اليوم بالمستشفى

اخذت غرفه خاصه وخابرت موفق وامي الي اجت ومن شافت عمتي صارت الدموع هي الي تسولف مدى الاشتياق 

والحنين بين امي وعمتي الي گلتلها 

=امنه ارجعي منير بحاجتج العمر ما بقى بي بگد الراح 

امي هزت راسها وهي تباوعلي وشفايفها يرجفن رحت عليها وبست راسها وبستها بخدها وگتلها 

:: هاي من منير

واجه الدكتور ويا طبيب ثاني ومضمد الي گلوله يجيب ناديه وراهم انا شلتها خليتها بالعربانه وعمتي رادت تجي 

وانا ما قبلت 

رحت بس انا وياها فتحوا الجبس عن رجلها وطلبوا اشعه ثانيه 

وبعدين گعدوا يتناقشون وباوعولي وگال الطبيب 

استاذ شو بتئربلك 

:: بنت اخوي 

ابوها وامها وين 

:: هي يتيمه وانا مسؤول عنها انا وجدتها 

طيب يا استاذ (باوعو للممرض)وطلبوا منه ياخذ ناديه الغرفتها بعدها الطبيب گلي

- - استاز لازم تفهم انو عمليتها جدا صعبه واحتمال تحتاج عمليه اخرى احنا راح نشيل البلاتين ونعمول العمليه 

وبعدها بنشوف ما بنئول الا الله يرأف بحالها 

::استاذ اهم شي رجلها ماتنبتر 

- - لا ان شالله ما بنوصل الهي الحاله المهم هلأ بدنا تعمول لاالها كل التحاليل ولازم تصوم من الساعه 12 الصبح 

تمام 

ان شالله خير بنتصور هي لان طفله زغيره ممكن يلحم العظم لكن بدها وقت وصبر

:: ان شالله دكتور الي اريده منكم ابذلو جهدكم واي شي تطلبونه بالخدمه 

- - هو الحقيقه السبب من اهمالكن الها كان لازم تجيبوها ئبل هالوئت 

:: صحيح بس لان انا كنت خارج العراق وبس جدتها وانت تعرف مره كبيره 

مفهوم اكيد 

:: دكتور ما اوصييك هاي امانه 

///////////🌺🌺🌺🌺🌺//////