رواية هشاشة قلب الفصل الواحد والعشرون 21 بقلم العباديه

بـاهـتـه كأرمـلـةٌ . .

لازالت قابعـة في أيام حِـدادهـا 

حـتـىٰ يـمُـر إسـمـكَ مـن أمـامـي 

فَـتستـيقظ بداخلي الازهار . .

وتـطـوفـني الـفـراشـات

~~~~~~~~~~~~~~~~~~~~~~~~~~~~~~~

ثُرىٰ . . .

رفعت راسي وگعدت على حيلي شهگتلي شهگه حسيت صدري انشگ .. وخلت كل الي بالخط يرفعون روسهم مصدومين !!!

شفته ويمه الدكتوره تخبلتت !! لا ياالله بس لا متزوجهه لان گاعده بالصدر !! اتخبل غير اذا صدگ هيج . 

بس هوَ شصاير صخام بويهج ثُرىٰ .

لاأول مره بتاريخ حياته لابس تيشيرت لونه أخضر تركوازي على سمائي. ملاصق لعضلات صدره ونص ردان .. مثخن لحيته ومزداد وسامه .. ورافع شعره لفوگ والنظاره على عيونه . ووجهه سمنان .

متتت متتت والنوب عبالك توه سابح .. شعره رطب مدري بيه جل . 

تخربطت احوالي ردت اشوفه وبسس .

ردت اتخبل من هاي اليمه !!

احس گلبي گام يفرفح متت من الفرح . بس من اتذكر هاي يمه تطير فرحتي ! شنو خطبها؟؟ تزوجها؟؟ اذا خاطب اسمع من نهى .

ولو ذيج المره ماگالتلي !! خلتني انصدم

السياره عبرت واني رگبتي انعوجت بعدني ملتفته رغم السياره اختفت بس گلبي يريد بعد يشوفه .

متغير شكله متغير جذرياً .. هيج انسحابي من حياته خلاه يرتاح ! ولو هاي الدكتوره يمه مريحته ومدللته بعد وين يتذكر ثُرىٰ تهي بهي .

اني افكر وماادري لما انتبه والگاهم كلهم صافنين عليه !! ياااء شبيهم ذوله ؟؟

هذا علي خازرني بالمرايه .! . اي والله بس عوزهه تخزرني خب دروح اني صگاري واحد ومحد يلحگه .

علي.. شنو شبيج ثُرىٰ ششفتي وهيج خوفتينه؟

ظليت محتاره شأگله ؟؟ بشرفك هوَ هذا سؤال؟ خليني براحتي مو توني سگيت عيوني بشوفته 

رديت عليه وداخلي ميت منه.

ثُرىٰ.. صديقتي 

علي.. وليش شهگتي؟

رديت بنفاذ صبر لان عاش الدور زياده

- صار هواي ماشايفتهه 

سكت ووصلنه للكليه وراح . 

دخلت للكليه فرحانه وطايره من الفرح بشوفته وأتناسه الوياه عندي اهم شي شفته خليهه الصدمه مو هسه اتلقاهه.. خل استعد شويه. 

خلصت اليوم كله أضحك والنوب هذا مهيدي من يحشش اني اضحك لان فرحانه بس بدون صوت ضحكتي هوَ لاحظ هالشي يوميه شكد مايحشش مااضحك. باوعلي متفاجئ گال :-

- ها ثُرىٰ شعجب اليوم تضحكين .. الله يديمهه

- شكراً أستاذ 

ضحك وراح عباله اضحك على تحشيشاته البايخه مايدري انه گلبي اليوم عنده حفله لان شافه وباجر عنده فاتحه من يتلقى الصدمه.

رجعت للبيت ملهوفه .. ركض للفيس .. طلعت الرسائل واضغط ع الحساب اريده يطلع وهوَ معطل يطلعلي مستخدم فيسبوك وعبالك حاظرني .

مليت اريد اشوف صورته ع الأقل .. رحت لنهى راسلتهه 

- نهى بظرف نص ساعه حساب ماهر يمي

نهى.. اي والله مو اني خدام جوه إيدج

- عليج الله دبريلياه

نهى.. امم يلا كسرتي خاطري خطيه بجيتيني

- ديلا عمي راضين بس جيبيه

ظليت انتظرهه تدزلي الحساب .. ربع ساعه ودزتلياه .

يمممه مخلي صورته شخصيه ومسمي إسمه بحروف انگليزيه مدري فرنسيه بس معكربه ماچنهه انگليزي .. حتى من ابحثه بالبحث مايطلعلي .

دخلت لملفه الشخصي مو عام ! مابيه ولا منشور ولا شي الا ادزله طلب صداقه !

شلون سالفه هاي يربي اريد اشوفه خاطب لو لا !؟ 

انجبرت ادزله طلب حتى ارضي فضولي وهم اشوف منشوراته بعد مااتحمل. التفكير خبلني

دزيت الطلب وبقيت منتظره يوافق .

ماكو ماوافق يعني مو نشط .. ظليت طول اليوم منتظره يوافق وماكو .. بالليل يلا وافق على الطلب ووصلتني رسالته .

- شكو شتريدين ليش دازتلي طلب؟؟

ظليت مصفصفه ومحتاره شأرد؟؟ صدگ غير رفضته اني المن دزيت طلب؟ الخطب والماخطب اني شعليه !؟

شلون سالفه هاي هسه شأگله؟! 

شفتهه ومارديت لان ماعندي جواب .

رجع دز 

- متحجين؟؟ 

-....(ماجاوبت)

- اذا مجاوبتي احظرج !!

نار واشتعلت بيه يحظرررني !! المن دزيت المن المنننن.

الندم أكلني أكل .. مو رجعت كرامتي وگلت هاي هيه بس اني اخخ مثل البزون يحب خناگه.

والله شويه وطلعلي انحظرت.

متتتتت قههررر احتاريت شلون اطلع قهري.

الحرگه كامت تدگ بضلوعي .

طلعت فرحة شوفته من خشمي.

داومت وميته قهر حتى كمت مااباوع من الجامه .. حاطهه ويفتر بيهه هسه مثل جنات بالبدايه طاير وبعدين تطلع أنگس خلق الله !

الدمعه بطرف عيني .. بغبائي ماشفت واذا خطب اني شكووو؟؟

داومت ثاني يوم وميته قهر .. وصلت للكليه وذني بنات الخط وياي نوعاً ما علاقتي زينه بيهن نسولف ونضحك سويه .. رحنه گعدنه بقاعه فارغه وسديناهه علينه 

- اكلجن ضايجه حيل وروحي طالعه سولفلي نكت تغير مزاجي 

اسراء كامت تسولف وتضحك بيه من صدگ ضحكت من گلبي . عوزي بس ابو الرزايل يقهر بيه .. جنت مااعرف البجي شنو من عرفته لهسه حياته تدمرت.

شويه واندگ الباب كالت اسراء صديقتي 

اسراء.. منووو؟؟

اني كاعده رجل على رجل على الستيج وكلت بمياعه واضحك :-

- تفضل يحلووو

انفتح الباب وتفضل الحلو يبوو .. دخل استاذ مهدي ومشرع الحلگ من الطول للطول مصدگ روحه حلو .. هوَ انتَ كلك قرد

اصلاً گلت شنو هذا القرد الدخل علينه .

يضحك وفرحان والله ظليت اضحك على عقله عباله صدك حلو .

تطشرنه بدخوله وهوَ كال :-

- وين وين رايحات ابقو 

- لا استاذ رايحين

- لا اني راح اطلع بس اخذ الاوراق

مدري شأخذ وطلع يباوعلي مبتسم ويضحك . هالله هذا كل عقله؟؟

رجعت للبيت بعدني بملابسي تمددت انتظر الغده اليوم غدانه متأخر .. لزمت موبايلي اتصفح ورحت للماسنجر اريد اشوف الحظر حتى يحترگ گلبي بالزايد .

دخلت للمحادثه والگه ماكو حظر !!

رافعه عني .. الظاهر بس يريد يحرگ گلبي .

والله مال واحد يسويهه صدگ ويرگعه بحظر حتى اردهه إله .. بس مااسويهه ويگول شافتني رافعه. لا خليه هيج اتجاهله احسن حتى ابينله اني ماادري رفعه واصلاً ماداخله على المحادثه .. والحظر وسيلة الضعفاء احم احممم.

تفاجئت بوصول رسائل من حساب اسمه (توم كروز) وماكو صوره شخصيه !

كاتب :-

- انتِ ثُرىٰ؟؟

رديت 

- اي تفضلي/تفضل؟؟

- اني بنيه مو ولد

- اي تفضلي 

- اني احب اراسل هواي وماعندي شخص اراسله

- اي واني شكو شعليه بيجج؟؟

- اريد ابقه اراسلج واتعرف عليج

- روحي بابا روحي شوفي غيري اني ماافيدج

- زين تعرفين دكتور ماهر؟؟

صفنت شويه ورديت

- اي اعرفه ليش المطلوب شنوووو؟؟

- اريد اوگعه بأي طريقه انطيج أي شي بس ساعديني

- عرفه ولفه اعرفج تعرفيني؟؟ واني شعليه ذاك دكتور ماهر وروحي وگعيه

- والله شتريدين انطيج لان انتِ وياه بنفس الكليه وتعرفينه

- اني ماعليه واذا وگعتيه شعليه بيج روحي عيني باي 

ظليت صافنه منو هاي؟؟ معقوله هوَ دخللي بحساب ثاني حتى يشوف شنو اجابتي؟؟ لا مااتوقع ! زين معقوله الدكتوره ؟؟ دخت ياربي احس عقلي جمدد

رحت تغديت واني افكر مني هاي يربي ؟!

.

مر إسبوع من آخر محادثه بيناتنه .. واستاذ مهدي من گتله تفضل يحلو لهسه لاطشلي لطشه من هاي الزينه .. والنوب كلما يشوفني يشرع حلگه ويضحك مصدگ روحه . 

اليوم من داومت بالكليه رحت للكافتيريا وانصدملك هيئة إبو الرزايل گاعد يم استاذ مهدي على طاوله ويشربون گهوه !

ظهره عليه واستاذ مهدي مقابيلي .. من دخلت استاذ مهدي نظره شاح عليه ومن شافني ضحك كالعاده .. هوَ التفت علمود يشوفه المن يباوع وصدگ يطلع ابو الرزايل . من شاف ابتسامة استاذ مهدي واني واگفه عگد حاجبه خزرني ورجع دار وجهه

رحت اشتريت وكعدت آكل وحدي.

نظرات استاذ مهدي وراي وراي .. حتى مليت من اشوف شكله تصيبني كآبه لاارادياً.

كملت اكل وردت اطلع.. انرفعت ايد استاذ مهدي واشرلي . صاحلي بإسمي

- ثُرىٰ تعالي شويه

اشرت على نفسي عود اني؟ هز راسه بــ(إي) .. رحت وگفت يم الطاوله الكاعدين عليهه وابو الرزايل يباوعلي رافع راسه والحاجب معگود عود ماراضي.

- ها استاذ ؟

- اكلج ثُرىٰ بس روحي صيحي معاونة العميد بلا امر عليج مااكدر اعوف دكتور ماهر واروح ..

- ها اي حاضر استاذ

نزلت عيني عليه شفته بعده خازرني .. ويرجع يخزر بمهدي .

رحت للاادره كلت للعميد يروحلهم ورجعت للقاعه .

شكو شعنده جاي شيسوي؟؟

خلص الدوام واني طلعت انتظر السايق .. اجه والبنات صعدن .. اني ردت اصعد ومااشوفلك الا ابو الرزايل جاي بأتجاهنه والنظاره حاطهه على عيونه ومبين عصبي .

دنگ ع الباب وحچه وي السايق من الجامه

- روحو ثُرىٰ اني اوصلهه

علي.. وانتُ منو نعرفك تعرفنه؟؟ مااكدر اعذرني البنيه أمانه يمي...اصعدي ثُرىٰ..

ماهر.. لك هيَ بكيفك 

علي.. اكيد بكيفي.. يلا صعدي ثُرىٰ

ضرب على السياره ووكف مستقيم .

ماهر.. روح حبيبي روح حرك

علي.. ماااروح اذا مو ويانه ثُرىٰ بله تريد تسويلهه شي .

التفت عليه ورفع نظارته عصر عيونه بنفاذ صبر ونتر :-

- احچيلچ كلمه

- شأحچي؟؟

- خيروح اني اوصلج

- لا اني ارجع وي الخط مالتي .. بله شويه خل اصعد 

خزرني ورفع حاجبه 

- دقايق معدوده والگاچ بالسياره مفهووم

مشه خطوتين گدامي وواثق من نفسه !! هه 

صعدت بسيارة الخط بعدني توني اريد اسد الباب. ولزمه بقوه . خزرني ونتر :-

- انززلي

علي.. اكلك نعرفك تعرفنه شنو تريد تاخذهه تره اهلهه مأمنيهه عندددي

ماهر.. انتَ متعرفني هيَ تعرفني وهالشي يكفي

علي فتح الباب يريد ينزل .. عززه راح تصير ملافخ هذا صاير زرزور گدام القاسي .. لان ضعيف واقصر منه.

ابو الرزايل ماخذنه طول بعرض .. كفخه وحده من إيده يطير علي واحنه وياه .

نزلت بسرعه خايفه ع الولد النوب تجيه سالفه من وراي .. كتله :-

- هاي هيه راح اروح هوَ يوصلني

علي.. اعذريني مااگدر

- دكتور ماهر يصير عم وليد يعني اقاربنه 

علي.. وشنو الدليل ؟؟

عصر عيونه بنفاذ صبر ومد إيده طلع محفظته وظل يدور .. طلعله الجنسيه مالته وانطاهياه .

كالله بإستهزاء :-

- هاي هيه لو بعد؟؟

تسالم وياه 

علي.. هاي هيه دكتور اعتذر منك ماجنت اعرفك لان البنيه عندي امانه 

حچه وياه وأشرلي اروح للسياره .. رحت للسياره غصباً عني .

دخلت كعدت وره وهوَ اجه كعد مشه شويه بالسياره ووكف التفت عليه عصبي .

- حرجعج لكليتج !!

فتحت عيوني وانتفضت

- شنووووووو؟؟؟

باوع بعيني والتفت يباوع من الجامه مال السياره 

سكت وتنهد

- اني مااريد ارجع للكليه خليني بعيده عن المشاكل

باوع عليه بنظرات مستهزأه ومقوس حواجبه .

- تبقين وي مهدي؟؟

- يامهدي هذا اني شعليه؟

- ماااششفتيي نظرااات عيووونه شلون يبااوعلججج؟؟؟

- سبحان المايباوع 

بلش يعصب شويه شويه وصوته يعلّـه

- اليباوع غير والينظر نظرات غيرررر ذني النظراات اعرفهن اني اعرفههههن كلششش زييين

سكتت. صفنت شويه وهوَ يباوعلي 

- بس اني ماريد اعوف كليتي هنا مرتاحه .

- ليش جنتي ممرتاحه؟؟ 

- لا بس مااريد ارجع

- لا... ترجعيين

باوعت بيه وصفنت .. فكرت بعقلي خليني ارجع ع الأقل اراقب تحركاته واشوفه خاطب لو لا .

- اذا ارجع ترسبني؟؟

رد بنفاذ صبر 

- ماارسبج

- وماإلك دخل بيه؟؟

- وماإلي دخل بيج وانتِ هم معليج بيه

- خوش.. 

- ها وماترزلني 

صفن بعيوني وضحك عض شفته متحسف

- ههه لا هاي مااگدرلهه 

- يييححح ليششش؟

- ههه مااگدر انطيج كلمه بس حسب الموقف

- يعني تريد تشبع بيه رزايل

- لا لا .. بس اذا انتِ تورمين گلبي مااتحمل 

- لا مااسوي شي اگعد عاقله

- تمام متفقين

- اي بس شلون يصير تنقلني

- معليج اني اتصرف 

- خوش

وصلني للبيت وعيونه بالمرايه عليه مبتسم .. اني مااباوع بس احس بيه بطرف عيني اشوفه.

وصلني للبيت ونزل دگ الباب سلم على إسماعيل وگالله اني وصلتهه وحاچاه علمود النقل مدري شطلع حجه علمود يرجعني وقنع اسماعيل واتفقوا يرجعوني للكليه مالتي .

رحت رأساً راسلت نهى .

- نهى عليج ابو فاضل ماهر خاطب؟؟

نهى.. يااا يااا شبيج خيه شوكت لحگ يخطب؟

- چا منيه هاي الدكتوره الگاعده يمه بالصدر

نهى.. شدراني مراقبته قابل

- اذا ضامه عليه شي من هسه احجي عليج الله

نهى.. لا والله وداعة حسون ماضامه عليج شي وولا ادري منيه هاي اصلاً

- ها يلا خوش

ظليت افكر ليش مصعدهه؟؟ والنوب مااگدر اسئله هسه شيگول عني؟

استغفر الله والله القلق والتفكير اكلني اكل.

بالليل دزلي رساله .

- باجر لتداومين من اني اكلج داومي تجين تداومين بكليتج 

مارديت .

- ها رجعنه شنو؟؟

دزيتله :-

- شنوو؟؟

- لا سلامتج ماكو شي .. بس من ادزلج رساله جاوبي . واني انطيج خبر علمود تداومين بكليتج مو تداومين من كيفج

- ياكليه منهن كليتين صارن

- كليتج الأصل 

- ها يعني ذيج تقليد؟

- اي طبعاً تقليد 

سكتت بعد مادزيت شي ولا هوَ الدز .. عرفته يتخبل من مااجاوبه لهذا السبب رگعني بحظر سُداسي.

بقيت ماداومت وهوَ كلساع يجينه وياخذ إسماعيل ويروحون .. عمي والله كله بالواسطات يمشي حتى لو مايصير انقل يسويهه غصباً ع الكل.

مر يومين وهوَ دزلي بالليل .

- س.ع. ثُرىٰ باجر داومي بكليتج كملت النقل 

- وعليكم السلام .. شكراً 

- تدللين 

ظل السؤال ياكل بگلبي اريد اسأله بس خاف يگول ذبت ميانه .

تجرأت وسألته

- زين انتَ ليش اجيت لكليتي؟ 

- شوكت؟

- من گعدتوا انتَ وإستاذ مهدي بالكافتيريا

- اهاا .. عندي تقديم لبنيه اقاربنه وقدمتلهه 

- جا شبيهه كليتنه ماقدمتلهه عليهه

- لا لا انتِ متعرفيني اني دائماً مااخلي الأقارب وياي بنفس الكليه لان تصير قال وقيل واقاربهه ونجحهه وجابهه واخذهه .. ف دائماً اقاربي اخليهم بعيدين عني 

- ها چا خوش همزين گتلي حتى ابقى بعيده 

- لا لا معليج انتِ .. اتصرفي براحتج معليج بأي أحد مادام اني جبتج للكليه ف امشي وانتِ مسنوده

- ههههه ماشي 

شكد حبيت كلمته طرت بيهه يعني هوَ ساندني .

ظَهركِ أنـا . .

فـكيـفَ تخافينَ العنـاء؟

يمينكِ أنــا التـي .. 

سـتلمسـينَ بها السـماء .

كعدت الصبح بكامل حماسي ونشاطي .. بدلت وانتظرت اسماعيل.. الله شكد اشتاقيت لهاي الأيام .. يوميه سايق تطلع روحي تعاي انتظري وتقيدي .. بينما اسماعيل كلش ماخذه راحتي الگاه قبل الكليه كلهه منتظرني علمود نطلع ويگعد من الصبح علمود ياخذني .

رحنه للكليه وصلني اسماعيل وراح .. دخلت فرحانه لاگتني فاطمه حضنتني وصديقاتي كلهن التمن عليه يبوسن بيه .. اني هم فرحاانه رجعت وي ابو الرزايل حتى يصير گدام عيني مايروح منا لو منا.

دخلنا للمحاضرات وفرحانه حيل برجعتي.

وصلت محاضرته ودخل هوَ .. تفاجئت الطلاب كلهه وعاطو . واحد گالله :-

- ها دكتور شو رجعتلنه

ضحك وگالله :-

- لا بعد مااعوفكم 

الطلاب كلهه عبست وجوهه وهوَ يضحك .. ظليت مستغربه شبيهم .

سألت فاطمه :-

- اكلج شكو ليش هيج تفاجئو من شافوه؟

فاطمه.. مو دكتور ماهر غيرو من عدنه جان ياخذنه دكتور عبد لان دكتور ماهر اخذ اجازه شهر كامل وقابل يخلونه بدون دكتور ف غيروا وبقينه على دكتور عبد بس هسه رجع يعني راح نرسب 

- ههههه 

ظليت صافنه واضحك علمودي والله علمودي . 

كلما يباوعلي يضحك ووجهه مرتاح واني ازيد مرتاحه .

اباوعله نظره خاطفه وارجع ادنگ . مستحيه عشتو .

ظل يشرح وكلساع يباوع على مكاني من يشوفني يبتسم براحه ويرجع يكمل شرح.

عصب لان من يشرح ويذكر الطلاب بالشرح ولا يتذكرون تخبل الا شويه . أثاري طلعوا گاضينهه لعب بلعب 

ماهر.. اكول مكيفين ومن

دخلت وجوهكم تعفست انتم ماتحبون الدراسه تحبون تلعبون وتجيكم درجات نجاح ع الحاضر

عصب وظل يرزل بيهم

فاطمه.. يممه بدت الرزايل من هسه 

- اسكتي لايلوحج طشار

فاطمه.. والله جنت كلشي مافاهمه واقره بس بيوم الامتحان لان الاسئله ماي كلهه ناجحه بس هسه اذا طلعت منزهاي المرحله عاتبيني

- هههههه احسللج 

ظل يشرح المحاضرات السابقه وجاب ملازم وزع على الطلاب كلهه بس اني ماانطاني !

ياا ! شبيه ابزز . ليش ماانطاني؟

باوعتله عود ماانطيتني .. ماباوعلي .. بدت رحمة الله .

غندبت وجهي لما كمل المحاضره ومن راد يطلع أشرلي بإيده عود تعالي .

رحت وراه گال :-

- من تريدين تطلعين مري عليه عندي ملازم بجنطة السياره ذكريني انطيجياهن 

- ها خوش 

ابتسم بوجهي وراح. ياا واني اخذت غيبتك بگلبي .. يلا ميخالف تستاهل .

قبل لانطلع رحت للاإداره علمود آخذ من عنده الملازم .. دخلت للاإداره لگيته گاعد بغرفة اسماء .

منهمك بالشغل والاوراق مقابيله ويدقق وينقل .. ولابس النظاره يبوو.

من دخلت رفع راسه عليه ابتسم وانتچه لوره الكرسي.. رفع إيديه يتمغط وعگد حواجبه صاح

- اخخخ 

فتحت عيوني 

- ها ها شنو

- ظهري واگف مداگدر اتحرك

ظل يتحرك ببطئ يمنى ويسرى واني صافنه عليه وقلقانه .. شنو شبيه خاف طاگه عصبه بظهره. ردت اگله اني خوش اسوي الاعصاب بس خاف زحمه .

باوعلي رفع النظاره وضحك 

- شبيج يابه ماتكعدين

- ها .. مو منتظرتك تنطيني الملازم

- اي هسه بس اكمل ذني الاوراق واطلع للسياره اجيبهن

- ها يعني شكد تطول؟

- بس دقايق مبقه شي

ظل يكتب ع السريع وكلساع يرفع عينه عليه يباوعلي ويرجع يكتب.. اخر شي ذب القلم وهز ايده يضحك

- اذا بقيتي هنا مااگدر اشتغل شي خل اگوم اجيبهن احسللي .

من طلع وصل للباب وكاللي 

- مو تروحين انتظريني 

- اي

دنگت وحسيت وجهي دخن من المستحه .

طلع واني بقيت گاعده بالأداره دخلت اسماء شافتني ضحكت وسلمت عليه 

- شمو هالغيبه ثُرىٰ اشتقنالج 

- تسلمين ست اني الاشوق

- همزين اجيتي بوقتج.. عندي رسومات ومحتاجه احد يساعدني وانتِ ماشاء الله رسمج كلش حلو ف اريدج تساعديني

- اي صار بس خل اشوفهن

راحت فتحت الدولاب وطلعتهن راوتنياهن بقيت مركز بيهن واحفظ بالتفاصيل اشوفهن صعبات لو سهلات عليه.

بهالاثناء دخل هوَ شافني مدققه بالرسمات .. كال :-

- شنو هاي؟

جاوبته اسماء

- لگيتلك الرسامه غير ثُرىٰ رسمهه يجنن صارلي شگد محتاره بيهن بس هسه من رجعتي فرحتيني والله طايره بيج

تفاجئ وفتح عيونه

- اااااه؟؟ ثُرىٰ رسامه؟؟

- اي استاذ 

- ههه كلش زين بس شعجب ماادري

- ههههه ماادري 

ضحك وكال :-

- باجر جيبيلي رسوماتج اشوفهن

- ها اي صار 

باوعت بالرسمات سهلات اكدر ارسمهن

- ست ذني ارسمهن عادي

- بس اريدهن كبار على فايلات 

- اي عادي

- حبيبتي راح اتعبج 

- تعبج راحه

انطاني الملازم وطلعت .. من طلعت رفعلي حواجبه وضحك

- مو تنسين الرسمات

- لا ماانساهن

رجعت للبيت گلبته گلاب على رسوماتي. خبصت اهلي خبيص.

وامي تصيح عليه واني اهم شي الگه الرسمات. جمعتهن كلهن وخليتهن يم راسي حتى اتذكر باجر واخذهن وياي.

كعدت الصبح رأساً حطيت الرسومات وبدلت وطلعنه للكليه.

اول ماوصلت لاگيته بالباب انطيته الرسومات كال :-

- راح اخذهن وياي للبيت حتى ادقق بيهن 

- براحتك استاذ

اخذهن وياه ومر اليوم عادي .. متحمسه اعرف رأيه يهمني اكيد

ثاني يوم جابهن وياه ودز عليه لمكتبه .. رحتله لگيته حاطهن مقابيله ويباوعلهن مبتسم.

دخلت ووصلت يم ميزه .. كال :-

- رسمج كلش حلو ومتطور بس بعد يرادلج ترسمين هواي حتى تطلعين فنانه توب.

- اني تاركه صار سنتين

- لا لا لتتركين استمري .. وها عجبتني رسمه عادي اخذهه بس رسمتلج بمكانهه 

- خل اشوفهه بله

شوفني الرسمه العجبته .. جانت ايدين اثنين مال بنيه وولد وحده بصف الثانيه ومتلازمات بالأصبع الصغير ومرتبتهن اني بألوان 

كتله :- اخذهه بالعافيه 

ضحك وكال :-

- شخبطتلج رسمه واني واگف 

- وانتَ واگف هههههه 

- لا يعني قصدي بخفة إيدي مو خوش رسمه بس علمود ماتبقين تطلبيني بمكان رسمتج

- ههههه عادي

طلع الرسمه بطه مدري وزه رگبتهه شطولهه ومدنگه .. اني شفتهه صفنت وكتله :-

- يااااااء شو هاي رگبتهه شطولهه 

هوَ اني كلت هيج لو وجهه صار احمر وشرگ من الضحك.. ظل يضحك من اعماقه بصوته الرجولي .. والله حتى استحيت 

- هههههههههه مو گلنالج شخبطنه هسه الا تقلدين 

- هههههه لا والله بس هيج شو جذبتني رگبتهه 

رجع يضحك حتى عيونه دمعت.. اشو اني ماضحكتني .. يلا هوَ گلبه رهيف بسرعه يضحك .

قبل مااطلع كاللي :-

- ثُرىٰ اذا تحتاجون انتِ وصديقاتج مي لو چاي تتعالو لهاي الغرفه سويناهه للچاي وحطينه بيهه ترامز احسن مما تشترون

- خاف مال الدكاتره

- چؤؤ معليج 

- ها خوش 

اخذت الرسمه وطلعت .. لگيت كاتب وراهه ( لاتقف عند مغيب الشمس حزيناً وإعلم إنها ستشرق من جديد . . .)

توقيعه جوه والتاريخ واليوم والساعه .. كاتبهه الساعه بال ـ1:04 بالليل .

ابتسمت وضميتهه الرسمه والعباره ..

رحت گلت لفاطمه ع الچاي وهيَ تفقد عليه 

فاطمه.. همزين حتى كلساع تجيبيلي چاي 

- اي مو خدامتج 

فاطمه.. ثراوي الطيبه شعندي غيرج

- تلوگي براحتج

للظهر وكونت عليه الا تجيبيلي چاي .. قفلت الا جاي رحت للغرفه الگال عليهه .. متردده ادخل لو لا.

لا خل ادخل .. دخلت لگيته نازع حذائه بالباب ومتربع ومقابيله حافظتين تمن ومرگة فاصوليا وياكل بنهم .

ظليت واگفه اباوعله شلون ياكل .. رفع راسه شافني الخاشوگه وكفت يم حلگه گام لا ياخذ ولاينطي .

ابتسم منحرج ونزلهه .. دخلت اني صبيت چاي وكلساع التفتله كلما يريد ياكل التفت يرجع اللگمه .

اخر شي كال :-

- ثُرىٰ رحمه للميتين لتباوعيلي اريد آكل جووعان

- هههه اني شعليه 

- لتباوعين 

- ههههه 

درت وجهي عنه واني صارت سولتي الا اباوع . 

التفتت عليه وضحكت .

اكل وكال :-

- يلا قابل استحي منج باوعي براحتج 

ظليت اضحك .. صبيت الچاي وطلعت مبتسمه .. انطيت الچاي لفاطمه .. شربته وكالت رجعي الاستكان .

شلون سالفه هاي .

اخذت الاستكان ورجعته .. لگيته گاعد ويمه اسماء كالتله :-

- هاي مني الجايبهه الفاصوليه 

- مااعرف بس كالولي روح إكل 

كالتلي :-

- ثُرىٰ تعالي تاكلين

باوعت عليهه وباعتله 

- لا مااريد صارلي ساعه واگفه بالچذب محد كاللي تعاي اجي من تالي شني 

عرف قصده عليه .. رفع راسه وأشر على نفسه

- اني؟؟

- ههه والله ممنتبه التهيت بجوعتي صار يومين مماكل .. يلا تعالي اكلي هسه

- لا مااريد 

- تتعاي يمعوده

- لا والله ابدد

- تعاااي يفوتج

- لااا 

- خب دروحي هههههههههه 

ظلو يضحكون عليه واني هم اضحك ..

رحت للقاعه گعدنه اني وفاطمه والبنات الويانه.. ظلينه نسولف لما يدخللنه دكتور ومااعرف منو الراح يجي.

شويه ودخلت ساره بإيدهه علاگة چكليت شكبراتهه يمكن بيهه 4 كيلوات .

كلش جبيره وتوزع چكليت.. اجت يمنه حطت على ستيجاتنه .

مانعرف شنو المناسبه !

وحده صاحتلهه بوسط القاعه 

- ساره شنو المناسبه توزعين چكليت؟؟

إلتفتت عليه تباوعلي بإستهزاء ... ورجعت باوعت للبنيه كالتلهه 

- بمناسبة خطوبة ثُرىٰ وماهر !!!!!!

سَـيبدو الأمر رائعـاً ومُـثيراً . . . 

مراقبتكَ وأنتَ تحاول تسلق الجدار لأجلي . .

أنْ يكون هنالك دائماً ما تستطيع فعلهُ .

‏أنْ تسرق الفرص من بين فكّي القدر .. 

‏أنْ تُمسك بعنادي من أُذنيه مثل ولدٌ مشاغب 

أنْ تهز جذع الخـوف بداخلي فـيهـدأ

‏أنٔ تعود إلـيَّ كـما تفعـل دومـاً ،

مُحمـلا بالـحُـبِ أو بـالجـراحِ

‏أنْ تُسـكـت غضبي بقُبلـة كمـا يفعل الـثـوّار . .

#نوران_الحسيني 

~~~~~~~~~~~~~~~~~~~~~~~~~~

ثُرىٰ . . . 

كلت لأمي بإصراري على موافقتي واني قابله على كل شروطه اهم شي اصير بإسمه وإسمي بظهر جنسيته كلش كافي عليه .

اخواني موافقين ويعرفونهم بس شويه صارت مناقشات لان ببغداد بالاخير اقتنعوا ورجعو الموافقه ولان الاخ مستعجل باجر يصير كلشي رسمي مشايه ونسوان وكطع مهر يممه مااصدگ .

ثاني يوم نسوان هواي اجن اعرفهن ومااعرفهن وزلم سدت الشارع .. مارحت صالون بس تمكيجت بالبيت ولبست فستان نازك لان الحفله تصير بقاعه .

خلصت الرسميات وعقدنه من كلت الكلمات احس گلبي صاير طبل من الفرح طيور التفاؤل تحيط بيه ومرافقتني .. اتفقوا وعگب باجر حفلة الخطوبه .. حجزت البدله وكملت كلشي.

بيوم الحفله كعدت من الصبح سبحت وطلعنه للصالون .. حفافه وعنايه بالبشره .

بدلتي جان لونهه أحمر غامق قصيره للركبه من المقدمه مابيهه هوسه جايه قطعه وحده اسفنجيه وحفر زخرفه بيهه وتعلاكتهه رفيعه كلش .. لبست وياهه حذاء احمر قديفه ومكياج هادئ صبغت شعري بني وسويت دانتيل بس الاطراف ثلجي وتسريحه مرتبه .

صبغ أظافر احمر برز بياض بشرتي .

رحنه للقاعه ودخل ماهر .. ههه صار ماهر بعد ماكو استاذ .

لابس قاط نيلي وبأناقته المعهوده بس مزداد جمال لان كشحه فوول

اول ماشافني ظل صافن .. شصار بيه غصت بملابسي من الخجل . عيونه تزر زر من رجليه لراسي .. بس عيونه مركزه أكثر شي على رگبتي وزنودي .

بلع ريك وتقدم لزم إيدي عصرهه حيل وطلعنه مقابيل الاجواء .. كعدنه بالكوشه ولبسني الذهب جايبين ذهب بغداد كله .. اني اصلاً مااحب ألبس هواي احب كله نواعم 

هاي اكيد أمه الذهب كلش حلو بس ثگيل .. شيحمله إلي.

لبسني وامه ماتوقفت تنطي بيه وماكو .. بإيدي اليمنى صار سوارين وتكله لبسهه بعد وبإيدي اليسرى سوار. وگلادتين وتكله لبسهه بعد وحده اختنگت. حس بيه وهيَ ماكو

اخر شي رجع عليهه العلبه الجبيره كاللهه :-

- يوم هيَ بعدين تلبسهن خليهن

ضمتهن وكلساع تريد تحجي .. احسهه كوه ساكته .

همس بإذني :-

- مبرروك مرتي

دنگت مستحيه .. وهوَ مد إيده گرصني من خدي 

- ذني الخدود ياما گوه لزمت نفسي ألمسهن هسه صارن بين إيديه

ابتسمت .. وهوَ عيونه تصعد وتنزل على طولي حتى لرجليه باوع . 

الحذاء گصتني ظليت احوس عرفني مامرتاحه .. دنگ باوعهن وكال :-

- نزعيها 

- خاف عيب

- معليج نزعي اهم شي راحتج

نزعت الحذاء تحت نظراته الفاحصه .. طلعن رجليه مصبغتهن صبغ ماروني .. وسع عيونه مذهول وهمس :-

- ادري البياض حتى بالرجلين 

ضميتهن جوه جرجف الميز .. همس

- خرب طلعيهن يابه.

ظل يباوعلي بتفحص .. همس :-

- خنشوف ربج شخالق بعد 

رفع عيونه على عيوني ركز بيهن ويضحك احسه فرحان اكثر مني .. 

سميره تگلهم "طلعوا اغنية متكبره". طلعو الاغنيه وهوَ يباوعلي ويضحك ويأشر على خشمه .. وصل مقطع (اذا خليتج إبالي اكسره لخشمج العالي) داعب أرنبة أنفي بطرف إصبعه وهمس (كسرته) .

ظل يضحك واني مستحيه منيلي التكبر اصلاً اني مكروده وفقيره ويني وين التكبر.

رگصنه واني مااتمنى الوقت يخلص بس للأسف خلص ورجعنه للبيت بعد يوم متعب 

تقوى كعدت تنصح بيه عود اختي الجبيره وهم تعرف تنصحني

تقوى.. من يغازلج مو تسكتين تره يمل 

- يااا وشأگول بله

- احجي أي شي 

- خوش المهم مااظل ساكته

- اي عفيه سحريه بإسلوبج

- اي اي جا شلون

بالليل قبل ماانام اجه صوت الاشعار مال الماسنجر .. ركضت للموبايل .

لكيته كاتبلي 

- جبببن عررررب لخاطررر ربج 

اني عود مااريد اسكت كتبتله :-

- جا شبيه الگيمر عرب وحد شنو 

دز ضحكه طويله

- هههههههه تدللين گيمر عرب گيمر عرب .

الفصل الثاني والعشرون من هنا