رواية نقش بارد الفصل العشرون بقلم فدك فاطمه
ليــش الحُـب لعـب ؟
كلمن بكيفــة !
حبيــبي شلــون اعيــفة
.
.
غنـــوة
حجيت كاتمة بهمس مترددة:دلهم
رد بهدوء: همم
غنوة:تخوني
رخت ايدة لحاضني بيهة رفعت راسي عيني بعينة
مغورگة بجيت بدون ما احس گلبي يرجف و خايفة
نهض عدل گعدتة حجة مستغرب:ليش تبجين
رديت برجفة:متزوج علية
دلهم: شبيج بوية يازواج هو ملحگ احك راسي
غنوة:احلف
رد بزهكة:خاب ماتسكتين احنة بيا حال
غنوة:جا شبيك
دلهم : شبية شمسوي
غنوة:ليش تاخذ موبايلك وتخابر برة و ماتخليني اسمع صرت تاخذ هدوم وياك من تروح وذاك اليوم
دلهم:اي ذاك اليوم شبي
رديت بهمس: من عضيتك عصبت مارضيت
دلهم: وبعد شنو الملاحظات الثانية
اني احجي مقهورة هو مخلي على خدة يرد ببرودة اعصاب التفتت اخذ موبايلة فتحة خلاه گبالي مسحت دموعي عيوني مغوشة
دلهم:هاي الرسالة يگلولي تعال من وكت اني گوة علية حاملهم مغثوث مغثة بس الله يدري بيهة
اخذ ملابس وياي لان اضل اليوم كلة هناك ويجون يخبثون تعال صير بمكان فلان و علان حراسة على ال***" مالتهم خو ما اضل لثاني يوم هيج وماملحك
غنوة مالحگ حتى انتي صاير ماشوفج بكد گبل حياتي كلهة فوك جوة تخربطت
هزيت راسي مدنگة اعصر بصابعي مد ايدة لزم حنجي رفع راسي يمسح بدموعي تقرب على گعدتة حضني ضليت ابجي من الخنگة لعشتهة بهاي الايام
دلهم:شش كافي والله مگضيهة اشتغل و اسوي مصايب على گولتج منين اجة ابالج الزواج
غنوة: عبالي گلت يجوز تزوجت يمهم هناك
و تعوفني و تروحلهة
دلهم:هاي وين واصلة بتفكيرج يم منو اتزوج ذولة بيت عمي الگ***" ماي ماشرب عدهم تردين اتزوج
غير صايرة مكاتل
غنوة:يجوز علمود يصالحونك
دلهم:ينطوني مرة
هزيت راسي رد بضحكة:هنيالي
طگيتة على رجلة معبسة لزم وجهي بثنين اديه حجة مخلي عينة بعيني: هذة البجي كلة علية
غنوة:اي علمودك والله اني مريضة لاتمرضني بالزايد
دلهم:العتب على لمحشي راسج علية غناوي و روح حاتم وهاي اول مرة بحياتي احاف بي لا گبلج ولا بعدج مرة لو شيسون ما اساوم على حساب كرامتج و دم اخوي لاتدوخين راسج و تعبين على الفاضي
غنوة:اني مقدرة تعبك ادري بيك ماعندك وقت بس
هاي الافكار سيطرت علية
دلهم: الأفكار لو صاحبتج على طاري الشك و هاي السوالف ممنوع بعد تحجيلهة اي شي الكلام الي بينة يضل بينة دخيل الله لاتدخلينة بدروب عوجة
هزيت راسي بفهم امسح دموعي تمددت متغطية
منطيتة ظهري خلة ايدة فوك جتفي نام بسرعة غفة
سحبت روحي اخذت موبايلة وطلعت برة مخلية ايدي على خدي صافنة عليه ما فتحتة ولا مرة فاتحة
موبايلة و شايفتة رغم اعرف الرمز دوم يفتحة گبالي
عفتة ماريد اسوي هيج وثقت بحجية رحت غسلت وجهي من الدموع ارتكيت على السنك احس بوجع
ظهري سديت الماي
ضليت بالهول متمددة على هوة البنكة السبلت بارد
مدري اني ابرد بسرعة صايرة غفيت على نومتي
كعدت بالتسعة دلهم ماشي لشغل تململت بمكاني
متعاجزة اگوم اسمع صوت نرجس تحاجيني من الشباك كعدت گوة عليةغسلت انشف الماي من وجهي فتحت الباب مستغربة
غنوة:ليش ماتدخلين شعدج بالشمس
نرجس:عبالي مقفول ماكدرت ادفعة
غنوة: تعاي شجابج من الصباحيات
وگفت بالباب مرتكية عليه ردت:ابوي وداني يصيحج
غنوة:شيريد
حركت جتفهة ردت:مادري بس گال صيحي عمتج
غنوة:دلهم مو هنا من يجبني اخلي يجيبني عليكم
نرجس:اني اجيت اوصلج
غنوة:لا حبيبتي ما اطلع وحدي
عبست ضايجة دخلتهة غسلت وجهة من العرگ نازل من شعرهة لميتة صاير شمس كل شعرة طافرة
بجهة ضفرتة الهة على السرعة نطيتهة نستلة ضالة عندي رجعت للبيت تركض خاف ابوهة يكتلهة
توني خليت الريوك كعدت اكل رجعت اجتني استغربت شعدة اخذت موبايلي اتصلت على دلهم
فصلة و دزالي رسالة گتلة ضل يحقق شعدة و شنو يريد منو اجة گالج اني ارسل بس مادري زهگ مني
گوة يالله وافق لبست شالي و العباة طلعت وياي نرجس مشيت بيتهم مو بعيد حيل يعني مسافة عنة
لازمة ايدي و تحرك بيهة من وصلنة هناك عبست
اشوف بيت عمي يمهم و جدي بالحوش توة طالع
گلبي ما ارتاح شعدهم
سلمت على اعمامي مستغربة اباوع لعلوان مخليلة
جرباية و متمدد لاف شماغة على وجهة رحت سلمت عليه بس رفع ايدة ما يرد باوعت لغفران اسألهة شكو گلبت وجهة
ضليت كاعدة يمهم بالاستقبال مايخليني اگوم عرفتة طايح على ظهرة بالشغل صارلة يومين ولا ادري بي ما سمعت محد گال حتى نرجس ما حجت
حجة يتذمر من حالة: دخيلك ياعلي المصايب تجي بس على الفقير شلون بية اضل مدد لا اخو يشد ظهري ولا ولد
عمار:دگول يالله عمي شجاك هسة اسبوع تصحى ترجع لشغلك
علوان: اخخ خوية ظهري انة تكسرت ياعمي تكسرت
هزيت رجلي متوترة من نظراتة بسرعة ما ضم بگلبة بدة يحجي على دلهم يلوم بي شنو كلهة اجتة هو لا
حجة عمي مستهزئ:العتب على المرة ماتخلي معزة لأخوهة و تحرك رجلهة
طكطكت اصابعي متوترة رديت احجي بكيفي:عمي
دلهم عمة مات اول امس ملتهي وياهم بالفاتحة
حجيتهة اعدل عباتي خاف يشوفوني لابسة احمر
حجة عمي يتسنكر:الى رحمة الله شلون مات
غنوة:ءء ندعم اي ندعم ومات خطية
غفران:شو ماندري لاسمعنة صريخ لا ناس اجتة
غنوة:همة ببغداد و الفاتحة هناك
باوعتلي بطرف عينهة تخوزر علوان بعد ما نسمع حسة الحمدلله ربي ماضليت ساكتة مدري شلون اجت ابالي يالله هو عمة ميت صدك
ضلو اعمامي يمهم صادف الغدة غفران كل شوية تصيحلي ما گمت بس من اجو ولد عمي و شفت جسام طلعت للمطبخ اعدل بعباتي علية
بنات عمي اخوات جسام كاعدات بالهول يم امهن
و جدتي هم هنا مستغربة ليش مجتمعين كعدت على الدرج الف بشالي عدل
صاحتني وحدة من اخوات غفران هنة بالمطبخ يساعدنهة عدلت عباتي على راسي صحت نرجس
طلعت حجت تلفتت علية
غفران:رايحة شني حتى ثواب ابوج ماتضلين تساعدبن بي شجاج
غنوة: مسوية ببيتي اريد الحك اخلي على النار
واصل ثوابج
طلعت مغثوثة منهم بس يردون يفشلوني گبال اعمامي ، دورت على نرجس مالگيتهة اني اعلمهة اذا ما اعضهة ام لسان ما گالتلي
جسام:غنوة اوگفي اوصلج هاي زلم تارسة الشارع
التفتت لصوتة هزيت راسي برفض متوترة اعدل بالشال فتحت الباب طلعت اجة وراي يمشي سرعت
بمشيتي بس صرنة قريبين من البيت شفت دلهم طلع بطني خبطت من التوتر
باوعلي بعصبية اجة اشرلي امشي للبيت بسرعة دخلت هو وگف وجه بوجه وياه ،جسام يگلة الزلم بالشارع هي رايحة رادة
حجة دلهم يتلفت و يباوعلة: بكيفهة بمزاجهة تروح ترجع تتشلبة على الحياطين براحتهة
جسام:شنو انتة ماعدك غيرة
دلهم:لا ماعندي شتريد هسة
هز ايدة جسام شكد خبيث الة يحتك بي و يتعاركون يالله يرتاح يباوع بطرف عينة متقصد يغثة انتبهت يباوعلي سديت الباب بسرعة ادعي كون مايتعاركون
طبيت للمطبخ اكل بظافري من الخوف اجة دلهم عيونة بهماتة حجة يرگع باب المطبخ:المنن راجعة وياه بنتت اخوجج وينن
غنوة:مادري وين ولت طلعت وحدي هو اجة وراي
دلهم:اجة وراهة ماتعرفين تگليلة ارجع لو تضلين يم اهلج من شفتيي طلع وية طلعتج ارجعي
غنوة:كلهة مجتمعة هناك ما اتحمل مغثتهن رجعت
شدراني راح يطلع وياي
عض اصبعة محترگ گلبة شنو جسام يمشي وراي درت وجهي مخلوسة نزعت العباة لو ابتليت على روحي شلون طلعت بهذة الثوب
اباوعلة عريض كلشي مابي بس نص ردان من لخوف
رحت نزعتة لبست غيرة ،رجعت للمطبخ اسوي بالغدة مستغربة شعجب رجع من وقت
كاعد برة بالشمس و موبايلة بيدة و الباكيت بصفة يشرب جكاير وكفت بالباب صحتة التفت عاگد الحاجب و يخوزر بية
غنوة:راح يصير بيك تيفو من الشمس تعال هنا
على البرودة شجاك
طفة الجگارة بالگاع گام تراكة كلة تراب مدد بالترابة
وكف على المغسلة يغسل گالي اسوي جاي شغلت الطباخ جوة القوري و هدرت التمن
دلهم:اخوج شراد منج
غنوة: مريض طايح على ظهرة صاحني يحجي علية
لان مارحتلة وهم حجة عليك
دلهم: الله يشافيه شلون طاح
حركت جتفي رديت:مادري صار يومين من طايح
دلهم:امس الصبح هو شايل ابنة يفتر بالسوك
غنوة: يجوز وراهة طاح ماسمعت منهم شي اعمامي يمهم و هوسة مسوين ثواب كلهة تتغدة هناك
هز راسة يسمعني بدون رد طلع كوب غسلة وگف يم الطباخ يشعل بالجكارة من النار مديت ايدي اخذتهة شمرتهة بالسنك
غنوة:كافي اني حامل مايصير تدخن يمي
دلهم:خوش موال جديد
غنوة :صدك ما اجذب
وگف وراي محاوطني حجة يرفع ردان الثوب:دافعتي عني يم اهلج لو سگتي وياهم علية
التفتت الة رديت بضحكة:ما دافعت كل ما يسكت علوان اگول كلمة اخلي يرجع يحجي عليك
دلهم: بذاتة
غنوة: اشاقة طلعتلك عذر من جوة الگاع گتلهم عمة متوفي ملتهي بالفاتحة
طفة الطباخ التفت الية يضحك حجة يگرص خدي :عفية خوش تلزمين ظهري
غنوة:غير ابو ابني بعد لازم ابيض وجهك
بوسني براسي ضل مرتكي يمي محاطني بيدة كل شوية يجوي خدي بالكوب بس يلسعني ويوخرة
ترست ايدي ماي شمرتة عليه نگعتة و خربت الجاي
بداه فوك المواعين الغاسلتهن شمرت الجلافة زعلانة خلة الكوب على السنك شالني من ورة عطت
متفاجئة ادفع بي اخذني للغرفة يتحرش بية
دفعتة اطلع روحي من ايدة مستعجلة:التمن احترك يمعود خل اروحلة
دلهم:رايح اطفي اذا گمتي اكتلج
راح طفة الطباخ رجع تمدد بصفي مخلي راسة على المخدة اخذ ايدي خلاهة بشعرة حتى العب بي
غنوة:شعجب رجعت
دلهم:مرتي الثانية طردتني
كفشت شعرة اخربط بيه : اطلع اني هم اطردك ضل بالشوارع
دلهم: شعجب ما بجيتي
غنوة: ليش ابجي غير گتلي مامتزوج
التفتت مخلي عينة بعيني:يجوز اجذب عليج
مديت ايدي جوة المخدة لزمهة بسرعة يضحك :تردين تكتليني بسلاحي ملعونة
غنوة: جا استر على روحك
دلهم: بعد ماخلي بالغرفة انتي مو امان
غنوة:تگلي لاتشكين وانتة تشككني عود وثقت بيك حتى موبايلك ما فتحتة و فتشت بي احترمتك
بوسني بحنجي و رد مبتسم: عاقلة وين اكو مثلج
غنوة: جا خليني عاقلة لاتخبلني
دلهم : لا تفكرين غناوي يشهد الله ماعندي غيرج
رديت امد ايدي:بوس ايدي و اصدگك
عضاهة منبت سنونة باللحم سحبت شعرة من الوجع اريدة يوخر جراني من رجلية مطيحني على ظهري يدغدغ بية تكش روحي من يسوي هيج
وخر نايم بصفي عينة على السگف نزلت ثوبي بهذلني بسوالفة لميت شعري صاير طويل و اتعاجز منة بس ماريد اگصة خاف اتندم مرة ثانية
دلهم: عمج شكم ولد عدة
التفتت مستغربة :ياهو من اعمامي
دلهم:ابو الشفية
غنوة:عدة تلاثة هلال يدرس بغير محافظة مايجي مادري كمل و كاعد هناك و جسام و بعد حسن عايش وياهم متزوج عدة جهال ليش تسأل
دلهم: اريد اكتل جسام
كعدت على حيلي لازمة جتفة:شسوي شسوي
دلهم:اكتلة مو كتلة موت بس اسحلة
غنوة: استغفرالله ربي دلهم شجاك شنو هي هيتة
رد يباوعلي مبتسم:غاثني
غنوة:جا تكتلة عوفة تجاهلة
زادت ابتسامتة يخوف ماريد ادافع عن جسام نوب يحطني ويكتلي بس ما انسى وگفتة وياي حتى لو جانت عدة نية من ساعدني بس مانكرهة
غنوة:كافي شجاك خوفتني عليمن تضحك
دلهم:اتخيل شلون اكتلة جني مخلي سبلت بگلبي هيج البرودة توصلني جا لو كتلتة شلون
غنوة: ماترجع لشغلك شعدك گاعد هنا الثلاجة يغني بيهة داخل حسن فرغت
دلهم :تردين تفتكين مني مو صوجج لا والله العتب على الشارد من شغلة و جايج خاف بعدج ضايجة
غنوة: هو انتة تهبطني بهاي سوالفك شعليك بالرجال خلي يحجي و يسكت كافي المشاكل لعدك
دلهم: اريد ادگلة وشم بعينة
عقجت وجهي شلت المخدة متنرفزة يحجي برود
يخوفني خليت المخدة على وجهة اخنگة اخذهة يضحك شمرهة وراه
دلهم :تدافعين عنة كدامي تردين تخنگيني
غنوة: لا اريدك تسكت سويت عدي خفقان
دلهم: بالله وين خل اشوف گلبج
يحجي ويجر بثوبي سحبة حيل گطع الدگم كلهن حجيت اگوم منة :الة اضل هيج خل يجون
و يشوفوني
دلهم:مو جاي نتسامر وين مولية
التفت مقلصة عيني:ويين متسامرين تگلي اريد ادك وشم بعين ابن عمج
دلهم:لازم تفرحين
غنوة: اوووف دلهم شبيييك
دلهم:وشبة لتشب بيج لا تتنعوصين
غنوة:اروح اشوف غداي احسلي
رحت للمطبخ بالي كلة يمة خاف صدك يسويهة مدري يضحك علية يريد بس يخبث و يخوفني
لو يشوفني ادافع عنة حتى يتعارك رجعت للغرفة لگيتة متربع يم الكنتور بيدة اوراق يگلب بيهن
غنوة: صارت الصلاة تعوذ من الشيطان و گوم
دلهم: تعاي شوفي هاي
رحت يمة مستغربة كعدت بصفة جانت ملفوفة على شي فتحتهة داخلهة كارتونة صغيرة اخذهة
فتحهة اباوع بفضول طلع إبرة ناعمة
حجة يراوني اياهة:هاي لدگيتلج بيهة وشم
غنوة:بعدها عدك شعجب
دلهم:ضامهة ببيتنة لبغداد ضلت وية الغراض جبتهة ذاك اليوم دگيت بيهة الية
غنوة:شفتك من ضميتهة ما سويت الوشم
رد بخبث: بيومهة ضحكت عليج عندت الة ادكة بجتفتج حتى اكحل عيني
رديت خجلانة اذكر اول مرة :شكد ماتستحي
دلهم:اجيتيني غفل طاگني الجفاف
طگيتة على زندة اضحك گومتة لميت الغراض على ماكملت صلاة شفتة طلع برة الباب ندك رجع بيدة
صينية غدة مودينهة اهلي مدري شعجب
خلاهة على جهة و اكل من الطبختة فرغت المواعين ضميتة للعشة حرامات يضل هيج رجعت كعدت بصفة ميتة من الجوع ماتريگت
بالليل اجة صفوان گعدو بالحوش يحجون اباوعلهم من الشباك سويت جاي صبيتة دگيت الباب اجاني اخذ الصينية لزمت ايدة گبل لا يروح
غنوة: شعدة أجاك
دلهم:يشوفني
غنوة:بس يشوفك
هز راسة مبتسم شكلة مو راحة طلع راجع لمكانة ساعة تجر ساعة همة كاعدين برة كل واحد لازملة
عود و يشخبطون بالگاع يرجعون يمسحون برجليهم لو يتجادلون صوتهم يعلة دلهم يگلة نصي
مليت من مراقبتهم عفتة شسويلة المهم شكوكي طلعت غلط خلي يسوي ليريدة ما دام ما يتزوج هزيت راسي اطرد الفكرة من بالي انقهر اذا افكر
تمددت اتابع فلم فاتحة انترنيت من موبايل دلهم
اني اكنك على جيرانة بس غيرو الرمز خلوني مثل اليتيمة افتر بالبيت
طاح الموبايل على وجهي فزيت جنت غافية بدون ما احس درت وجهي للباب دلهم ممطول بالهول
عدة الجداحة يشمرهة فوك يلزمهة
سديت الموبايل گمت رايحتلة وكفت بالباب احاجي
رفع راسة رد بأستغراب:شگعدج
غنوة:انتة شعدك ليش سهران
دلهم:تعاي نامي على ايدي
غنوة: باجر تروح
اشرلي بـ لا مشيت تمددت بصفة راسي على ايدة
حجة يگرص خدي:شلونة وليدي
غنوة:متختخ ببطني
دلهم: محظوظ جا مثلي شامرتني برة
غنوة:يمة يمة غير انتة من وحدك كاعد هنا
دلهم: صاحبتج خاطبينهة و صفوان راح ينجلط
گعدت على حيلي فازة :منييين يعرف
التفت مقلص عيونة:انتي تعرفين
غنوة:ها
دلهم: شعجب ضليتي ساكتة
غنوة:مو هي گال لاتگولين
دلهم: من اگلج لاتگولين تسولفين الاكو و الماكو
غنوة:اني مو فتانة ما احجي اي شي عن حياتك
دلهم:يعني اذا أمنج على سر ماتگولينة
غنوة: شنو من سر
دلهم:ماتگولينة لصديقاتج
هزيت راسي برفض ماريد اسمع شي حجة يرجع لمكانة:شفتي انتي فتانة
غنوة:لاا حتى ماخليتك تحجي ليش تذمني
دلهم:ماترحين تلبسين قميصج الاحمر و تجيني
احسن من هاي الگعدة الفارغة
غنوة: والله متعاجزة روح جيبية و البسة
گام بس دخل للغرفة طفت الكهرباء اخذت موبايلة
اشغل الضوة حجة بصوت مسموع:ويينة
غنوة:دورة يمك
احجي و اگلب بالصور الي بموبايلة اغلبهة وشوم و الباقي صور محادثات لو اوراق لازمهن و مصورهن
غنوة:عود ليش مامخلي ألي صورة بموبايلك
حجة يخلي القميص براسي:مو أمان
غنوة:بس اوگف جا فوك الثوب
دلهم:توقعتج تستحين بس طلعتي ماتستحين
اخذتة منة معبسة اباوعلة بطرف عيني طفيت الضوة بدلت بسرعة كعد بصفي مخلي ايدة على خدة يباوعلي خجلت من نظراتة شلون مركز
وخرت الكماشة اعدل بشعري مدنگة اتحاشى عينة
تقرب حجة بهمس : غناوي
همهمت حجة يخلي شعري ورة أذني: مشتاقلج
غنوة: وين اني بصين و مشتاقلي
دلهم: نجبي تعاي ابوسج وين شاردة بوجهج
التفتت لشباك مستغربة:اگلك اسمع صوت من برة
دلهم:مو من برة هذة صوت گلبي مخبوص بشوفتج
رديت اگوم للشباك:لا والله اكو صوت زلم
گام وراي سد الشباك و الباب قفلة رجع اشوف قليل
لان البيت كلة اضلم و الكهرباء طافية حسيت بأيدة
على خصري حضني قريب عليه
دلهم:همزين گعدتي
غنوة: ماردت اغفى منتظرتك بس نعست بدون ما احس
دلهم:شفتج بيدج الموبايل و مشغلة النت و جهازي مصفر شحن
ضحكت ناسية تقرب خلة شفتة عل شفتي غمضت عيوني بأيدة سد البردة و الايد الثانية حاضني بيهة
اسمع صوت صياح من برة فجأة ندك بابنة قوي ابتعدت مستغربة ما نطاني مجال اوخر رجع يبوسني بلهفة و ايدة ترسم تفاصيل جسمي
تشتت بينة و بين صوت الباب شالني للغرفة مانطاني مجال احجي كل ما اباوع برة يسوي شي
و يشتت انتباهي عن الصوت و الخبصة
حجة بهمس وصوت ناصي:معليج بالبرة بالج يمي غناوي حبيب الروح ،حبيبتي
يتغزل بهمس و صوتة هادئ غمضت عيوني مخلية وجهي برگبتة ضغط على خصري بوستة مثل ما يبوسني ايدي على ظهرة
بين لحظات الدفو و الحب مرت اكثر من اربع ساعات صار هدوء برة مدري اني ما اسمع حضني
يغطيني من برودة السبلت اشتغل
محاوطني بأديه حجة ببتسامة:غناتي حضري روحج يجوز انسجن
راحت ابتسامتي فزيت درت عليه لازمة الغطة:ليش
دلهم:ما اتأخر شوية و اطلع لاتخافين
لزمت ايدة اتقرب:شسويت البارحة دلهم شنو هاي الاصوات لسمعتهة
دلهم:شبسرعة نسيتي بعدنة سوة
حجاهة و غمز دفعت جتفة يباوعلي و يضحك لزمتة من رگبتة لافة ادية عليهة متنرفزة:شسويت
رد ياخذ ايدي:وداعت غلاتج غناوي كلشي مامسوي يايوم اني سويت شي كلهة تتبلى علية
نهض داير وجهة للجرار طلع موبايلة التفتت يأشر بي:المهم انتي تصدگيني
غنوة: دلهم حباب گلبي نخمش بس گلي شسويت
دلهم:غير حلفتلج كلشي مامسوي شتردين بعد
غنوة:شكيت بيك البارحة هدوئك مو مال واحد بريء
دلهم:البارحة جانت نيتي مو صافية اتجاهلج
عضيت اصبعي متنرفزة ضحك بصوت عالي يسحبة
يمسح عليه بهدوء يبوس بخدي ماينطيني مجال
دلهم: اعصابج حبيبي انتي حامل مو زين عليج
غنوة:من وراك جا اني بطرانة و اعصب
دلهم: شمسوي امشي بصف الحائط والله العظيم من وصيتيني صرت امشي بصف الحايط حتى رداناتي متدمرة منة
دفعت ايدة يضحك و يستفزني تقربت احاول احجي بهدوء:بس گلي شسويت البارحة شصار
حجة يخلي اديه بشعري:بس صارحيني گليلي باروكة
ولا تعودت على هذة لونة
غنوة:دلهم لاتشلع گلبي
دلهم:گليلي أحبك و احجيلج كلشي بالتفصيل
غنوة:احبك
رد ياخذ هدومة من الگاع:لا هاي مو من گلبج
غنوة: احبك دلهم من كل وگلبي احبك
التفت بوسني بشفتي حجة:كلي الج من راسي لرجلية
غمضت عيوني عفتة بس بداخلي اريد اخنگة على هذة البرود ولا يقدر خوفي گام رايح للحمام صاح احضرلة هدوم گمت وراه طلعتهن
دگيت الباب فتحة بعدة ما سابح مرتكي على المغسلة يحدد بلحيتة علگتهن مرتكية على باب الحمام اباوعلة بشك
دلهم:ادري عاجبج
غنوة: تگول لو ازعل
دلهم:ابن عمج راح يشتكي علية
توسعت عيوني كل ضني كاتلة طبيت لزمني بسرعة لا ازلگ حاضني من خصري قربني عليه موگفني على
رجلة فتح الماي يغسل بيدة
غنوة:كتلتة
دلهم:تردين اكتلة اكتلة
غنوة: دلهم موتتني شبييك
دلهم: كلشي مامسوي هو يشك بية
غنوة:انتة مو داخل السجن گبل ماتخاف على روحك
دلهم:لا ما اخاف مو اول مرة ولا ثاني مرة خريج سجون اني خاف ماتدرين
غنوة:گرة عيني
رد يبوس خدي:اختصاص حرائق همين ماخذ ماجسيتر بالافكار الحلوة كل افكاري مبدعة
غنوة: بعد ما اعصب اني ما اگدرلك والله ماكدر انتة مسودن دلهم عقلك ابد مو عقل رجال صاحي
دلهم:كل ماتغلطين اوشملج انتي تحملي بعد لسانج
غنوة:تريد تسويني منگرشة محد يگلبني
التفت عاگد حواجبة اني هم انتبهت لكلمتي عاف المكينة لزمني مقلص عيونة:محد شنو
غنوة:محد بالبيت بس اني وياك
دلهم:نجبي لاتصيرين فكاهية لاتجفصين
غنوة:زلة لسان اعصابك
دلهم:محد يگلبهة شنو تردين واحد يگلبج وراي
غنوة:ايييع لا
دلهم:جا اسكتي
غنوة:ماتخليلي وشم لو تعلگ للسمة
دلهم: بمكان محد يشوفة
رفعت رجلي لزمني خازرني عض رگبتي عطت صوتي دوى بالحمام لزمت شعرة اجرة اريدة بس يعوفني
شلع رگبتي شلع من بداية صدري لفكي
گكت ابجي يالله عافني يبوس بدموعي يدغدغ بية دفعتة زعلانة حضني يراضيني يغسل بوجهي
دلهم:لاتصيرين كلش شسويت
غنوة: ماتشوف سنونك حتى دم طلع
دلهم: انتي حساسة
غنوة:وخر زعلت و روح ابوي
دلهم:علية الطلاگ الة اراضيج
غنوة:طلگ
دلهم: بالخمسين لزگتي روحج بيهن علية
غنوة:هاا هسة اني لزگة صرت
دلهم: اشاقة لاتصيرين نكدية امشي نامي
لا الشقيقة تهيج عليج من السهر
غنوة:راح يأذن بعد كمل بسرعة
دلهم: الحمام جبير
غنوة: خوش بالعافية
طلعت هو يباوعلي ما عاجبة وگفت كدام المراية اهز
بيدي اباوع لرگبتي دنگت اخذ كلينس تذكرت شغلة
رجعت ادك بالباب فتحة مستغرب مد راسة:شنو اجو علية
غنوة:لاا بس اريد اسألك مرة احنة بذاك بيتنة كعدت شفت مثل ذني على رگبتي هذا انتة مو واني عبالي مريضة و طلعلي
دلهم:هي هاي سالفتج
غنوة:ايي ليش تسوي هيج واني واثقة بيك
دلهم: بعد وكت ما انتظرتي من يصير ابنج بأيدج
غنوة:طحت من عيني
دلهم:لا ارجوج .. دمشييي منا
اشرتلة بيدي حجيت:بسيطة اني اعلمك
دلهم:تريدن تطبين تعاي فضيني
درت وجهي راجعة لمكاني كعدت انتظرة يطلع أذن هو ماكو احلف عليه بعدة يرتب بلحيتة يريد يروح للسجن كاشخ
طلع هلهلت حجة ينشف وجهة:شعدج رجلج معرس
غنوة:اي هلهولة شهيد
باوعلي بطرف عينة:خطير الاحمر
غنوة:لا تقرب علية
مد ايدة عطت راجعة ليورة اخزر بيه عافني يضحك علية دخلت للحمام اباوع للمغسلة منيتي يغسلهة وراه من يزين حكاني جسمس من شفت الشعر
كملت و نظفت الحمام طلعت انشف بأدية و شعري
اسمع صوتة من المطبخ يدندن واكف يسوي جاي
غنوة: ماعدنة ريوك
دلهم: اشتريت هاي مرت اخوج خوش تخبز ماتخبزين مثلهة
غنوة:اكو تنور و ماخبزت اشتري و تدلل
دلهم: عوفي اخاف على اديج الحلوة
غنوة: لا اشتري والله اخبز عادي
دلهم:جؤؤ يمعودة صدك جذب
ضحكت من مد ايدة بتراكة طلع جيوبة فارغة رحت توضيت صليت رجعت يمة حضنتة مخلي راسي على ظهرة بوستة حاضنة خصرة
دلهم: يوازونك على روحك
غنوة:مو صوجك يمتة تروح للسجن
دلهم: والله مادري غير يجون
غنوة:تشاقة مو
رد بجدية:لا والله منتظر غير يجون بلكي يوصلوني بالسيارة حتى هم اتسوك بدربي مناك
صب جاي اباوعلة مامصدگة عبالي يضحك علية خلة الصينية بالگاع كعدني يوكلني علمود اشتاقلة
بعدنة نتريك و ندگ الباب باوعتلة خايفة ضحك ياخذ الفانيلة من الگاع طلع لزمت ايدة بالباب
غنوة:بس گلي شسويت
دلهم: غير لسويتة البارحة كلشي مامسوي
غنوة:اطلع وشوف اني اعلمك
غمزلي يباوع بخبث مد ايدة يجعص بطني كشت روحي ادفعة اشرلي ادخل مسح وجهة طلع اسمع
صوتة يحجي بالباب و صوت سيارة هم مشتغلة
مد راسة اشرلي رايح تنهدت بضوجة طلع ماشي بدون ما افهم شكو انتظرت للتسعة اجتني نرجس
لزمتهة كتكتهن گلهن البارحة بالليل محترگة دراجة جسام و متعاركين قصص وروايات عراقية كرار صلاح بعد ماعرف عليمن اگول دلهم شعدة فرحان
للعصر اجة الاستاذ لاكيتة بالباب اخذت المسواك
من ايدة وكف يم الحوض يغسل خليتهن بالمطبخ رجعت يمة ادية بشعرة
غنوة:تحجي لو اجرهن
رفع ايدة يراويني :نجرحت شوفي
لزمت ايدة مستغربة: منين
دلهم:نطبگ باب السيارة على ايدي
غنوة: البارحة محترگة دراجة جسام لو انتة مو يمي جان شكيت بيك
دلهم:مهرج خمسين بخمسين شتردين بعد وتوگفين وياي
غنوة: اني وياك ماتشوفني ساكتة
اخذ الفانيلة ينشف بيهة حجة: للعلم ترة اني مالي علاقة ولا حارگهة ولا واصل يمهم
غنوة:جا ياهو لحرگهة انتة شعليك و اخذوك
دلهم:هو مشتكي ماكو عدة دليل رجعوني
غنوة:ايي
خلة اديه على رگبتي مدنك حجة مبتسم:صفوان
غنوة:شبي
دلهم:يسلم عليج
حجاهة مشة اخذت شوية يالله استوعب رحت وراه
گعدتهم بالليل ما تجي وراهة بس المصايب هذة صفوان لاشغل ولا مشغلة شيگلة دلهم يسوي
غنوة: خوش المهم مو انتة بالليل روح لعلوان فكني من العتب و الحجي
دلهم: تدللين من اروحلة
غنوة:انتة شعحب معطل صارلك ايام ماتحك راسك من الشغل هسة كاعد
دلهم: عطلة يومين و يوم شردت ماترديني شبيج
غنوة:لا اريدك
دلهم: حبيبي
طگيتة على ايدة گبل لا يتحرش ضلينة نتشاقة سوة
تغدينة ضل طول اليوم بالبيت عرفتة يجذب من المخابرات لاعدة عطلة ولا شي
هو شارد مطفي جهازة يريد يگضي وكت وياي حتى ما تضوج مثل ذيج الفترة ضالين ناكل و نتملعب
فرغت الكرزات ضالات شوية عدي اخذتهن كاعدين
بالباب مال المطبخ العصر صبيت جاي كعدت بصفة مرتكي على المخدة يراسل
غنوة: دلهم
همهم يرد علية حجيت اباوعلة بشك:خاف كاعد يمي حتى تغسل مخي و اصدك انتة ماعندك غيري
دلهم: مايحتاج انتي مغسول مخج من گاعج
غنوة:يعني شنو
دلهم: گلبج نضيف و نيتج صافية
غنوة: من الزينات
التفتت رد مبتسم: حبيبي هذة الوكت يخوف
غنوة:انتة موجود اذا ما طكطكت نعولك و مشيت
دلهم: ميانة زفرة بينة كلش زفرة
غنوة:هسة شنو
ارتكة بأيدة رد يمسح على خدي: والله گاعد
على مودج ولو اني ماحب الگعدة لاشغل لامشغلة
غنوة:اعرفك من صوتك تحجي الحقيقة
دلهم:كلشي حقيقي اذا ماتطوخينهة و تسألين هواي
غنوة:بعد شنو راح تسوي بيت عمك شلونهم
دلهم: ملتهين بزواج ولدهم
غنوة:اني اروح
دلهم:لا يابة وين ترحين غير اطگ و اموت اذا شافوج
غنوة: شسالفة
دلهم: احبج هواي مريض بيج
غنوة:اريد فستان حلو اروح بي
دلهم: لا غناوي ماتحتكين بيهم نسوانهم مو خيرة
ماخليج توصلين هناك
غنوة:اني هم اشاقيك ما اروح
دلهم: راح افتحلج نت روحي تونسي اريد اشرب جكارة
غنوة: وحدة مو تسلك سبعة و ثمانية
دلهم:وحدة و عشر بوسات تدللين
باوعتلة بطرف عيني فتح الباكيت طلع جكاير يريد
يشربهن كلهن خلاهن كدامة سحب الماعون بصفة
غنوة:بوسة و جكارة بس
هز راسة برفض:كل جكارة عدال عشرة
غنوة:شووو بدلت لا تغش دلهم
اخذ وحدة يريد يشعلهة قربت عليه بوستي بخدة
رد مستهزئ: روحي تمددي خاف تعبتج
غنوة:اهووو لاتصير كلش
دلهم: الله يذكر الايام لجنتي لازگة روحج برگبتي
عبست الم بشعري رفعتة تقربت عليه ابتسم گلبي
صار يدك حيل من نظراتة و ابتسامتة اباوعلة خجلانة قربت عليه ابوسة حضن خصري يقرب علية
ابتعدت متوترة لازمة زندة حجيت مرتبكة:يالله اشرب وحدة
رد يمسح شفتي:اشرب عشرة
غنوة:ليش تضحك علية
دلهم:گتلج كل جكارة عدال عشرة
غنوة:وابوسك عشر مرات يالله تعوف الجكارة
هز راسة مبتسم وخرت باوعلي مستغرب حجيت رايحة:اشربهن كلهن
دلهم:امووت ولج
غنوة:الله يرحمك اسويلك ثوابات
گام وراي دخلت للغرفة اضحك لزمني يم الباب بدل اللعبة بوستة تسع مرات راح شرب جكارة وحدة
بالليل ورة العشة طلعنة سوة رايحين لبيت علوان
دلهم عندة فلوس من راتبة مال بيت عمة وشغلة
يمهم و مايريدهن يكره كلشي منهم
صلح سيارة صفوان و نطاه فلوس يطلبة و باقي مصرفنة كلة من شغلة مال الوشوم لو بجيبة مية مايصرف ربع منهن على البيت
دك الباب حاضن جتفي يحجي بهمس:شبيج ضايجة
غنوة:اني اسفة ماعرف شلون اتصرف اخوي يحرجني كدامك
دلهم: غناوي حبيبتي هاي الشكليات لاتفكرين بيهة
غنوة:بس هم مو حلوة
دلهم: على هيج حبيبة تخبل اهلج شيريدون انطيهم
ضحكت ادغة بعكس ايدي نفتح الباب صار علوان
گبالنة بس شافة لزم ظهرة غلس و سلم عليه تحمدلة بالسلامة هو عزاه بوفاة عمة الجذب
دخلنة سوة لاگتنة نرجس بالباب مبتسمة تعدل بشعرهة بس شافت دلهم گامت ترتب و تمسح حلگهة گرص خدهة اخذهة للاستقبال مخلي ايدة على شعرهة باوعتلة بطرف عيني
اضحك على سوالفهة بگلبي ماكو خجل گبل يومين اعترفتلة دخلت للمطبخ غفران كاعدة بعدهم يتعشون و السفرة ممدودة حجت بدون سلام
غفران:شعجب اجيتو
غنوة:صار عدنة مجال
نزعت العباة تباوعلي بطرف عينهة علگتهة يم الباب
طلعت القوري اسوي جاي صاحت واحد من الجهال
شاورتة مدري شگالتلة راح يركض برة
ضلت تراقب بية اباوعلهة بطرف عيني طلعت الكوابة غسلتهن ارتكيت على السنك دايخة مدري شبية راسي يوجعني
غفران: عوفي اني اسوي غير خطار انتي
غنوة:ميخالف كملي عشاج
غفران: خلي للجهال خطية اليوم ضلو بدون غدة هسة اهلي ودونة عشة
غنوة:جا انتي قافلة الثلاجة فتحيهة حتى ياكلون
غفران:قافلتهة فارغة خربت من الفتح و السد
سكتت ما رديت عليهة صبيت الجاي اخذتة الهم نطيت علوان بعدين دلهم اخذ كوبة كعدت بصفة
حتى ماكو سوالف يسولفونهة سوة احتارو بگعدتهم
بدة علوان يحجي عن الصار لبارحة
حجة بنزل الكوب:الولد تخبل يحلف انتة حارگهة هد على بابكم گتلة مو انتة بس ماصدگو لو طالع مدافع عن روحك احسن ما مشتكي عليك
دلهم: مادري بي لو ادري طالع مطفيهة وياه جنت مشغول
علوان: حقك سمعت عدكم فاتحة اني مادري غنوة ماتجيتة و نسمع منهة ما رحنالك للفاتحة هناك اعذرنة
دلهم:معذور اهم شي سلامتك مالحگت اجيك
درت وجهي بالغرفة حابسة الضحكة من جذب دلهم
يصفط و يتعذر و علوان هم حجية نصة جذب خلصو
الگعدة هيج
سمعت صوت صفية تحجي وية غفران عرفتهة ودت عليهة من شافتني ما طلعت لا رحت يمهن ضليت
يم دلهم لحد ما طلعنة
نرجس جابتلي عباتي اخذتهة طلعت وياه مرينة على المحل نشتري رجعة تأفف دلهم من شاف سيارة طابگة يم بابنة
حجة ينطيني العلاگة:ارجعي لبيت اهلج
غنوة:ماريد ادخل للبيت شنو ياكلوني
دلهم:الگ***" من خرب يومهم
لزمت ايدة اخاف ما اباوع عليهم اول مرة اشوف شگولهم عدل تمشينة للباب جان الرجال توة يريد يدگة من حس بينة التفتت
واحد ضخم لابس دشادشة سودة لاف جراوية على
راسة بيدة سبحة يلف بيهة على اصابعة وياه ثنين
زلم هم نفس هيئتة
حجة دلهم يفتح الباب:شعدك جايني
رد بوجه بشوش:اشوفك مختفي هاي الايام
دلهم:عدي ضرف عائلي
دفع الباب دخلت گدامة مشيت للمطبح فتحلهم باب الستقبال دخلو يباوعلهم بغل و حقد همة نفس الشي حتى ما يحاولون يضمون حقدهم
خليت الجاي على الطباخ حضرت دولكة الماي انتظرتة يجي واكفة يم الباب الداخلي اتصنت
سمعت صوت واحد منهم گالة:ان شاء الله العارض خير
دلهم:كل الخير
صلاح:شايفينك اليوم بالمخفر
دلهم:عزموني على ريوك ماكدر اردهم
واثق:شنو المناسبة الحكومة تعزمك
رد برود: روحي حلوة يحبوني
ضحكت سديت حلگي اسمع صوتة يتحمحم وخرت
من الباب على ما راحت الضحكة رجعت طايرة نص السوالف
صلاح: خلي علاقتك قوية لاتزعلهم تحتاجهم بعدين
دلهم: مو اتفقنة نصير صحبان المن تهدد
صلاح: يا صحبان وانتة لاعب بالكهرباء جان حرگتنة
دلهم:الگلوب يرمش ردت اصلحة اعذرني مو قوي بالكهربائيات
واثق: لا تروح يمهة حتى ماتنتل نخاف عليك
دلهم:حبيبي اقدر خوفك
انتبهت للجاي ركضت طفيتة و صبيت دگيت الباب
طلع اخذ الصينية ماعاجبة يضيفهم اخذهة راح
كعدت يم الحايط هدوء بس صوت الاستكاين هي طك بالصحونة مددت تعبانة من الوگفة ارتكيت على الحايط
دلهم:باجر ارجع لاتضل يومية رايح راد علية ماحب اشوف جهرتك
رد واحد منهم بنتر:احترررم لاترس حلكك تراب
دلهم: الزم ابنك صلاح اني مو خير و اسكتلة
صلاح:اشش خطار احنة لاتسويلنة مشاكل
لؤي:يابة ماسمعت شيگول كل احترام ماعندة
رد عليه بصوت حاد:اشش اسكتت
سمعت حركة شي طك و الباب نرگع صاح دلهم عليه
يطردة من البيت ذاك صوتة عالي يسب و يغلط على دلهم و على ابوه
دلهم: ماتربي ولدك لو حاير تفتر وراي
صلاح: ولدي مربيهم عدل لو جاي من وكت هم اربيك ليش تضل مسربت بالشوارع
دلهم:افيدك بعدين من تتسربت ادليك بالشوارع الزينة بيهة خوش ال***" حتى ***
گمت سادة أذني لاعبانة روحي من فشايرة ضلو هواي كل شوية تعاركون و يرجعون هادئين گوة
مشو نعست طفيت اريد انام خايفة من جيتهم
تأكدت مشو وكفت يم الباب منتظرتة سداه رجع
گالب وجهة ماعاجبة خلة ايدة على جتفي دخل
غنوة:شنو يردون
دلهم:يراوني طولهم خاف جنت مرتاح
غنوة:اوف خربو مزاجي
رد يمد الحجاية:لااا
غنوة:اييي نعست مانمت خايفة
دلهم:افا تخافين واني موجود
غنوة:خايفة منك
جر شعري عطت طگيتة على ظهرة بكل قوي لزم المكان متوجع :خرب روحج
غنوة:جا ليش تمعش شعري
دلهم:ادبسزز تمدين ايدج علية
غنوة:انتة البديت
تقرب يرفع بردانة مشيت اتلفت خاف يسويلي شي
ضلينة نتشاقة واحد يكتل بالثاني ايدة ثگيلة گوة حامية روحي منة ولا يگول حامل خطية
مرت فترة بهدوء رجع دلهم يشتغل و نفس سوالفة
بس بين كل فترة ياخذ يومين يكعد بالبيت مگابلني
اليوم طلع للشغل رجع مستعجل بالعشرة بدل ملابسة طلع مشيت وراه اسألة عرفت صفوان بالمستشفى متعارك وية اخو رفا
راحلة هناك لبغداد هم اخذولهم ايام مشاكل اعرف
اخبارهم مناك خاطبهة واحد و صفوان كاتلة و اهل
الولد حاجين على رفا طاعنين بيهة
و اخوها من عرف تعارك وياهم و رجع تعارك وية صفوان و دايسين بالحجي واحد على الثاني صفوان
متخبل گوة مسكتة دلهم
حس بمعاناتي وياه من اگلة اسكت و اكعد راحة هو بس يروح يسوي مصايب و يتعارك و من جهة رفا غاثهة و تعارك من وحدهة
مرت الايام روتينة نفسة اني بالبيت قافلة بابي كاعدة بس اذا دلهم يفرغ نطلع نفتر ، وكفت بالحوش منتظرتة
طلع يلم بشعرة صاير طويل و يخليلة لاستيكة تلمة
اگلة زين مايرضى شايف روحة حلو ضال عليه مكيف
طلعنة ماشين عكس الشارع من ورة البيوت نروح نفتر بالبستان و الشوارع الفارغة رافعة عباتي امشي
دلهم:تعاي بالله اگعدي هنا على هاي النخلة
التفتت مستغربة كعدت على الجذع دنگ كعد گبالي جر رجلي نزعني الحجل باوعتلة معبسة شمرة بحضني ما عاجبة لان يطلع صوت
ردت اگوم اشرلي اصبر مد ايدة بجيبة طلع علبة حمرة فتحهة بيهة حلقة حجة بهمس يتلفت:لبسيهة بسرعة لا واحد يشوفنة
غنوة:ماتوقعتهة منك
دلهم:كل مرة البسج بالمطبخ ويصير بيهة عارض و نبيع الحلقة گلت خل أبدل المكان
ضحكت امد ايدي طلعهة لبسني يبوس اصابعي گام بسرعة من سمعنة صوت ولد جاين سوة روحة خايف علية عود طحت
گمت اعدل بعباتي لازمة ايدة كعدنة يم النهر اباوع للحلقة مبتسمة التفتت يخلي ايدة على جتفي
دلهم:عجبتج
غنوة:كلش حلوة ليش كلفت روحك
دلهم: حقج مابي كلافة
غنوة: هاي الحلقة الثالثة عاجبتني و همين لان جبنتي هنا للزرع و البستان لبستني بعد لو ناكل حصو ما ابيعهة
ضحك يدنگ حجة بهمس يم أذني گرصتة اخزر بي رجع گال بضحكة: ايدي خفيفة ديري بالج
غنوة:تعودت عليك بعد ما تغشني
دلهم:اطگج ببوسة ام الصوت اخذ منج الاكو و الماكو
غنوة:مفتخرر نووب حرامي بواگ
دلهم:غلط لاتغلطين اشمرج بالنهر
غنوة: ها هيج صارت
دلهم:احترمي بت الفارسية
غنوة:خل نروح انتة مو أمان
دلهم: كلاوجية بس نرجع تجيني تتحرشين
غنوة: يمتة ولا مرة سويتهة
التفتت يباوعلي بخبث گرصتة احنة بالشارع هو ماعندة مستحة ضلينة فترة كاعدين نسولف على كلشي سوالف عادية
رجعنة حاضن جتفي مخلي ايدة عليه يسولفلي على
مشكلة صفوان وية هذة لخطب رفا طلع ضابط صايرة مكافش و رفا الخبيثة موافقة و تدافع عنة
دنگت منزلة عيني من شفت عمي وكفنة لان همة وگفو سلم دلهم عليهم رفعت راسي سلمت متجاهلة جسام لواگف بصف ابوه يطكطك بالجداحة
كرهتة بهاي اللحظة لان يباوعلي حتى لو ساعدني
اني مقدرة هذة الشي بس الانسان العاقل ما يباوع لوحدة متزوجة و بصف رجلهة الة يريد يسوي مشاكل يجوز افعال هاي كلهة بس حتى يغث دلهم
عفتة راجعة وحدي من طولو بسوالفهم بعدين اجة
وراي هم اخذلة ساعة يطلع عصبيتة بالحجي
و السب صاير لسانة كلش وصخ
مشت الايام دخلت بالشهر الرابع و كلشي تغير بشكلي بطني صارت تبين جانت مسفوطة ولا جني حامل هسة شوية برزت
وجهي انترس نمش ترس صار طبقة ماحبيتة خرب شكلي و خدودي صايرة كل واحد بي طن لحم يگول حامل بخدودي مو ببطني
جانت بداية محرم اليوم الخامس يومية مجالس يسون هاي الايام المرت كاعدة بالبيت ما اطلع ما اختلط بعدهة كلهة تباوعلي بستنقاص
ما دام صفية اتهمتني وصخت سمعتي ضلت التهمة مجلبة بية حتى لو متزوجة يگولون لعبت گبل الزواج و اضطرو يزوجونهة حجي الناس مايخلص
ابتسمت من نفتح الباب دخل دلهم توة راجع من الشغل گمت تلگيتة سد الباب مخلي ايدة على راسي
بوسني فوك حاجبي
حجة يگرص خدي: احلى ما شافت عيني
غنوة: بس لاتريد تشوف
دلهم: خل اشرب ماي و اسمع الشكاوي
دخلت كدامة فتحت الثلاجة نطيتة دولكة ماي خلة بيدي توزيعات من المواكب من يرجع ينطونة يضمهن الي اخذت العصير فتحتة
غنوة:متعشي
دلهم: اي اكلت بس تريد استكان جاي
غنوة: هسة اخليه
راح للغرفة يبدل و يرتاح سويت الجاي رجعت لگيتة
غافي ما هان علية اكعدة طفيت الضوة خليتة نايم
اجتني نرجس موديتهة غفران مجلس ببيت اهلي
اجة بنفسي اروح كتبت رسالة الة حتى من يگعد يشوفهة طلعت وية نرجس
وصلت لبيتنة بعدهة النسوان محد جاية بس بيت عمي سلمت كعدت قريب على جدتي حتى ما احتك بيهن و احصل مغثة
اجت الملاية بدة المجلس احب هاي الاجواء رغم
جنت محرمة منهة تمنيت اكدر ادخلهن لبيتنة مثل بقية البيوت بس ماكدر ماكو وحدة هنا ما حاجية علية لو سامعة شي عني كرامتي ماتسمحلي ادخلهن لبيتي وهنة طاعانات بشرفي
باوعت للقابلة علياء كل ما اشوفهة انغث و انقهر اتمنى يجي يوم و اشوف الندم بعيونها على السوتة بية ما اسامحهة على الحجتة و ضلت تشهد وتتهمني
التفتت لگدة بنين بنت عمي ابتسمت بوجهة لان هي مبتسمة حجت تنطيني كعكة:ليش عازلة روحج
غنوة: راسي يوجعني هنا بعيد عن الصوت
بنين:اي المساعة كل شوية توش بأذني لو ترحين للمطبخ احسن
غنوة:مرتاحة بگعدتي هنا هسة شوية و اروح
بنين:ليش ضلي بعد بيتين و نروح هناك لبيتنة تعاي ويانة شعدج
غنوة:اتعب مابية حيل
ردت تباوع لوجهي بتركيز: حامل شفتج من عدلتي عباتج بس گلت يجوز متوهمة
هزيت راسي لا إراديا ابتسمت من فرحتي بالحمل بس واحد يحجي و يذكرني افرح متحمسة هواي
بنين:مبروك الله يگومج بالسلامة
غنوة:الله يسلمج خايفة شوية
بنين:منين تخافين من تشوفين ابنج بيدج تنسين الوجع تگولين اريد بعد سأليني
ضحكت هي متزوجة عدهة اربع جهال حركت ثوبهة تأشرلي اشوف طلعت حامل ماستوعبت ابنهة بعدة صغير شلون حاملة هلكد
غنوة:مبروك ما ادري بيج
بنين:بعدني ما گايلة ذيج المرة بشرتهن و حسدني گبل طرحت ورة مدة تذكرتج بيومهة نقهرت
عگدت حواجبي مستغربة:ليش تذكرتيني
بنين:غير انتي هم مسقطة گبل
غنوة:شنو هذة الحجي ما جنت حامل هاي اول مرة منين سمعتي
بنين:كلهة تدري بيج
نغثيت لان تحجي برود و طبيعية گمت لبست عباتي
طلعت ضايجة وكفت يم الحايط ادور على شحاطتي
اسمع صوت همس من الشباك مفتوح كلهة تسولف
خلص المجلس ضلن يسولفن طلعت موبايلي اضوي
بنين:اي ولج حامل و زعلت مشت
تقربت اسمع حجيهة جانت كاعدة يم صفية لهزت ايدهة ردت: اي يحضي تالي وكت غنيبة تشيل خشمهة علينة تمر مني ماتسلم
بنين:جا انتي شوية لسويتي بيهة
ردت تطك رجلهة:حگي لو لا سالم ضل يهم بيهة هي راتعة بالخير يگلي زوجتهة لواحد جنة مو خوش ضال ايدة على خدة گوة لازمتة يريد يرد يجيبهة
توسعت عيوني اطرافي بردت من الصدمة ضليت صافنة اريد استوعب الي حجتة گلبي نعصر عصر
