رواية نقش بارد الفصل الواحد والعشرون بقلم فدك فاطمه
.
اعُوف النَاس كِلها واكعِد بسدَك
فراغَك شَمس محَد يگدَر يسدَك .
.
.
غنــوة
تقربت اسمع حجيهة جانت كاعدة يم صفية لهزت ايدهة ردت: اي يحضي تالي وكت غنيبة تشيل خشمهة علينة تمر مني ماتسلم
بنين:جا انتي شوية لسويتي بيهة
ردت تطك رجلهة:حگي لو لا سالم ضل يهم بيهة هي راتعة بالخير يگلي زوجتهة لواحد جنة مو خوش ضال ايدة على خدة گوة لازمتة يريد يرد يجيبهة
توسعت عيوني اطرافي بردت من الصدمة ضليت صافنة اريد استوعب الي حجتة گلبي نعصر عصر
كعدت بمكاني من الصدمة رجلية خدرن ماكدر اگوم
ارتكيت على الحايط گلبي صار حجارة من ثگل لگالتة
خليت ادية على راسي مدنگة دموعي ترست عيني
لو راجعلي سالم لو عارف اني مريضة مو مثل ما گالن جان ما مات من القهر
هو جان عدة قلب بسرعة يتمرض خلتة بقهرة لحد ما راح وراهة اجت تتهمني و تلوم بية ماحجت الحگ
اتهمتني گبالهم كلهم ضلت تجذب
التفتت على صوتهة قريب طلعت مدنگة تدور رفعت
راسهة صارت عينهة بعيني تمنيت اكدر اطلع حرگة گلبي بس خفت مو گدهة نوب تجي تطگني
صفية:شني شمگعدج يم النعول شمالج
ردت بنين الي طلعت وراهة:يا غنوة بعدج هنا
مديت ايدي لحافة الشباك چلبت بيهة گمت وكفت كدامهة روحي مخلوبة و مبهوتة من السمعتة اعصابي ترجف من القهر خليت عيني بعينهة
غنوة: بجاه هذة الشهر ادعي من الله حوبتي ماتتعداج و اشوف بيج يوم شلون ما خليتيني سالفة لليسوة و المايسوة اريد هيج يصير بيج
عگدت حواجبهة شوية شوية گامت تخوز درت وجهي راجعة امشي بخطوات سريعة احس بحرورة الگاع و صلابة الحصو جوة رجلية جسمي كلة يرجف حتى البيت حسيتة صار شبعدة
فتحت الباب دخلت لازمة الحايط اتعثر بذيال عباتي
دخلت للمطبخ استندت على السنك فتحت الماي ارشگ على وجهي
ما بجيت بس احس جسمي يرجف نار اشتعلت بگلبي كعدت مختنگة نزعت العباة و الشال اهفي بي على روحي گمت رايحة للغرفة على البرودة
شفتة بعدة نايم ذاب روحة من التعب صعدت يمة
مرتكية علة تاج الجرباية ايدي على خدي كل ما اتذكر حجيهة اعطب من القهر
شلون نطاهة گلبهة تسوي هيج و كدامهة نضربت
ما كفاهة تنكر الزواج اتهمتني جايبة فلوس بالحرام
هي تدري بية متزوجة ما حجت
حلفت سالم گايللهة ذابحني بدون مايرفلهة جفن ليش حاقدة علية شسويتلهة خلصت عمري كلة اخدم بيهة ولا يوم ارتاحيت
كبرت و ربيت ببيتهة شتگلي اسوي لا افك حلگي ولا اشتكي ليش طعنت بية جنت راح اموت لو بس كلمة
وحدة گايلة و حاجية ضميرها
مديت ايدي لراسي اعصر بي من الوجع لطرة طر من تهيج علية الشقيقة اصير ما اشوف گدامي عيوني ماكدر افتحهن من الألم
رفعت الغطة نمت دموعي على خدي دايرة وجهي للحايط ماريد ابجي و ازيدهة على روحي بس مو بيدي دمعتي بطرف عيني
حاولت انام بلكي اشرد من مشاعري و الوجع ماكدرت ضليت صافنة على الحايط و كلامهة ينعاد براسي كل شوية اگول لو مسوية هيج لو حاجية
التفتت لدلهم رفعت ايدة فز مستغرب دخلت بحضنة مايشوفني الغرفة ضلمة حضني يغطيني وياه ينومني على ايدة
دلهم:ليش سهرانة
رديت بهمس:جنت يم اهلي بالمجلس انتة مو گتلي يمتة ما تردين روحي
وخر راسي عنة يرفع وجهي يتلمسة حس بية ابجي نهض حجة مستغرب:شبيج ليش تبجين غناوي
منو وياج
شهگت ابجي حسيت بي گام شغل الضوة غطيت عيوني اجة كعد بصفي يحجي بقلق و يسأل شبية
گوة سكتني و افتهم مني حجيتلة لسمعتة منهن
ولسوتة گبل بية شلون اتهمتني گبال اعمامي وشهرت بية ماخلت بيت ماحجت بي علية
مسح وجهي يرفع شعرة تقرب حضني يمسح على راسي : كافي بجي اطيح حظها اذا ما اجت تبوس رجليج انة معتب
رديت بغصة:قهرتني والله شمسويتلهة اني وتحجي علية
دلهم :هي الگ**" هيج تصير ،شش يروحي كافي مو زين عليج البجي
تمدد مخليني يمة طفى الضوة و البنكة صوتهة يوجعني رجع يدلك براسي مادري شوكت غفيت من الوجع دخت حواسي تخدرت
ثاني يوم كعدت مالي خلگ كلش ضايجة دلهم طلع
من الصبح للشغل خابروه گتلة روح المن كاعد بعد
هم يجون يضلون يغثون بي
كملت شغلي كعدت بباب المطبخ مرتكية عليه صافنة كلشي يمر كدامي من جنت طفلة لحد ما كبرت احس لسمعتة كفخة خلتني اصحى
مرت حياتي كلهة ماشفت منهة شي مامفتهمة روحي محرومة من كلشي عايشة اخدم بيهة اريد اذكر مرة ضريتهة حتى هيج تسوي
مسحت وجهي استغفر اسمع الاذان رحت صليت كملت الغدة ضليت اگلب بالموبايل اتصل علية دلهم يسأل عني گتلة زينة
لميت الغطة علية عفت الموبايل زهگانة اتگلب ضايجة بعدهة اعصابي مشدودة و مقهورة تمنيت اكدر اروح اكتلهة و ابرد گلبي
بس اخاف نوب تجيني طگة تطلع ابني من خشمي اروح بالرجلين كلشي ما استفاد ،رفعت عيوني للباب مستغربة منو الاجة علية
گمت متعاجزة جنت قافلة باب المطبخ اباوع من الجام مالتة تأففت بضوجة غفران فتحت الشباك مرتكية عليه اباوعلهة حجت تنزل صينية من راسهة
غفران: جبتلج هريس طاحت ايدي من دك الباب
غنوة: ماريد روحي
غفران:ولج ثواب شمالج ياا تعاي اخذي ماعون خل اولي
غنوة:واصل من تطلعين ردي باب الحوش وياج
سديت البردة عايفتهة برة تغديت رجعت احوس بالبيت لو ما حامل الة اگلبة على البطانة و اطلع حرگة دمي بالتنظيف
العصر خابرني گالي يتأخر تأففت بضوجة لحد ورة أذان الغروب هو ما رجع اخابرة جهازة مغلق عفت الموبايل بضوجة رحت اصلي
تعشيت وحدي كعدت برة بالحوش اسمع صوت الجهال بالشارع يلعبون لو صوت الملاية قريب بالبيت البصفنة تقرة
نفتح الباب رفعت راسي اجت نرجس تركض بيدهة
حجت تمدلي قراصتهة:عمة مشطيني امي عافتني
غنوة: روحي جيبي المشط بالغرفة
ركضت جابتة كعدت گبالي فحطانة مستعجلة سابحة و شعرهة مضفور حليتة امشط ما مركزة وياهة مادري شنو تحجي من جرت ثوبي انتبهت
نرجس:تجين ويانة لبيت جدي هناك الملاية كلهن راحن
غنوة:لا حبيبتي ماكدر
حجت تتلفت:جا عمي وينة
ابتسمت اگرص خدهة :بالشغل ،شعجب تگليلة عمي مو ذاك اليوم تحنصين بية و تبوسينة تگليلة حبيبي
ضحكت تضم وجهة دنگت اجر بخدهة:ها ولج عينج على رجلي
نرجس:هو حلو
غنوة:و گبالي النوب
شديت ضفيرتهة اضحك عليهة وجهة صار أحمر گومتهة ابوسهة حضنتني تبوس خدودي تگلي احبج
غنوة: حبيبتي يالله روحي لحگي على المجلس
نرجس:اي هاي غسق عافتني ومشت
راحت للباب رجعت ركض اخذت المشط طلعت الشعر منة راحت رجعتة مرت مني توديلي بوسات ابتسمت بوجهة شكد احبهة
الشي الحلو بحياتي همة جهال اخواني شگد ما امهاتهم يغثن همة حبابين ابد ما كرهتهم لو شلت عليهم كل ذكرياتي وياهم
تنهدت اليوم مزاجي كلة مگلوب غير يجي ويفضني
رحت جوة قفلت الباب شغلت كل الاضوية لان اخاف
حسيت ضيقتي مالهة فايدة ما دام دلهم گالي خلي السالفة علية اشوفة شيسوي من مصيبة وياخذ حگي من صفية بلكي يبرد شوية من نار گلبي
باوعت لوجهي بالمراية بي ستين لطامة فليت شعري جنت ضافرتة اخذت هدوم رحت للحمام ضل يتراوالي صوت الباب يدك ما صدكت اخلص
طلعت كلشي ماكو صنتة نشفت شعري مشطت ضليت ارتب بروحي بلكي تستعدل نفسيتي على گولة رفا كل ما زان شكلج زانت احوالج
خليت شوية حمرة يالله هو اني بالبيت وين طالعة
نوب ما نطاني گلبي بمحرم و متحمرة مسحتهة
خليت مرطب لأدية طلعت اسمع صوت الباب يدك
فتحتة حجة اول ما شافني:صدك جذب وينج
غنوة: ماسمعتة
نزل الغراض من ايدة حضن جتفي يبوس راسي:شلونج
غنوة: زينة ،ليش تأخرت
دلهم: ولد اعرفة ابوه مات رحنالة
رديت اجر ايدة:لاصدك
حجة بضحكة: والله شبيج
غنوة: عبالي مو صاحب واجب
رد يغمز:كلشي توقعي مني
ضحكت امشي وراه طلعتة هدوم حضرتهن رحت احمي العشة اشم ريحة كباب فتحت العلاليك لگيتة
مشتري الريحة تسرسح على الگلب
حضرت العشة بعدني اصب حسيتة بي وكف وراي حجة يحضن جتفي :متعشية
غنوة:اي اكلت شوف الطاوة نصهة ماكول
دلهم: صايرة تاكلين طاوات
التفتت معبسة: قصدي الاكل الي بيهة
دلهم:اشاقة يروحي الف عافية على كل لگمة
رديت مبتسمة:خوش
ضحك شال الصينية نزلهة بالگاع كعدت بصفة سوالي لفة اخذتهة اكل على كيفي اباوع لأديه شلون
صايرة نقهرت من شكلهن
دلهم:خو ما واحد اجة غثج
هزيت راسي :لا غفران اجت مسوين ثواب جابتلي مافتحت الباب و نرجس حبيبتك تسأل عنك
باوعلي يستوعب نوب ضحك مد ايدة من وراي يحضن خصري تقربت يمة مرتكية على رجلة
دلهم: حبيب الروح تغار
غنوة:منين اغار عقلي جبير
دلهم:فدوة لعقلج
رديت اشاقيه: بس يعني لا تعلم البنية عليك
دلهم:هيج تگولين
غنوة:اي انصحك نصيحة بعد بكيفك
ابتسم يگرص خدي بصابعة رجع ياكل جبرني اكمل الكباب گوة خلصتة ،شلت المواعين غسلتهن تمدد
بمكانة ايدة جوة راسة ولازم الموبايل بالثانية
دلهم: غناوي
التفتت الة مرتكية على السنك:ها
دلهم:سمنانة
غنوة:وين تباوع انتة
عاف موبايلة مخلي ايدة جوة خدة درت وجهي مبتسمة احس بنظراتة علية كملت نظفت السنك سديت الماي انشف بأيدي
مر مني طالع برة كعد بالحوش موبايلة يدك راح يخابر و يدخن ضل هواي ساعة يگوم يفتر نوب يگعد
رجع حجة يفتح الباب: صفوان اجة مو تطلعين
غنوة:شعدكم
دلهم:ماكو شي روحي للغرفة ارتاحي
باوعتلة بضوجة دخل حاضن وجهي:شبيج متخوفة من جيتة ماعندي شي جاي يشوفني
غنوة: ولا ارتاحلة
حجة بضحكة:وحق الله كلشي ماكو ضايج و مر علية نبطل غير صحبان
غنوة:هو صفوان هم يضوج
دلهم:جا مو بشر شنو
ضحكت اميل بوجهي على ايدة تحسست لان مرتبة
روحي ما حجة لحد هسة قربني حاضن جتفي راسي
على صدرة بيدة الموبايل يراسل
غنوة: خلي اسوي الجاي
دلهم:كلشي لاتسوين روحي ارتاحي
غنوة:ماريد مليت من النوم و الگعدة تكسرت
ما رد ملتهي يراسل خليت ايدي فوك الموبايل انتبه حجة يباوعلي:تحاحيني
غنوة:شبيك
دلهم:شكو
وخرت ايدة بضوجة احجي وياه ملتهي يراسل يگول
مو صفوان جاية رئيس الوزراء حتى ما اجة وراي سديت الباب كعدت احاجي برفا
لحد العشرة هو ماكو طلعت اسمع صوتهم من الاستقبال كعدت يم الباب اتصنت عليهم يضحكون
مدري شلون يسولفون اريد الگط كلمة ماكو بس يتمضحكون
ماصدگت مشة صفوان ظهري راح من الگعدة تأكدت مشة فتحت باب الاستقبال صينية مگلوبة يم الشباك و الكوابة متروسة گطوف جكاير
علاگة الخبز يمهة قوطية گيمر و ماعون مال التبسي
مطلعة من الثلاجة خابطينهة خبط حتى القوي يمهم متريگين و متعشين
التفتت على فتحة الباب الخارجي حجة يحك بشعرة:بعدج كاعدة
غنوة:اي ،شنو هاي بس الثلاجة ما جايبهة هنا
دلهم:مو زين دبرتلة عشة احسن ما تطبخين
ركيت راسي على حافة الباب اضحك عليهم شال الهوسة غسل المواعين لموصخينهن اني افتر وراه
حجة يحضن خصري :مساع شبيج گلبتي وجهج
غنوة:احجي وياك مامنتبه
دلهم:غير الرجال يراسلني
غنوة:امم خوش
رد يبوس خدي:يتدلع علية الحلو
غنوة:لا اغيرلك جو
دلهم: ها من باب من حبك لاشاك
هزيت راسي أضحك حضنت خصرة رحنة للغرفة تمدد يسحب الفانيلة من جواه نزعهة شمرهة يم راسة صعدت بصفة كاعدة
غنوة:دلهم شنو راح تسوي لصفية
فشر طگيتة مصدومة لزم خدة يباوعلي بنفس الصدمة لان صفگتة راشدي خفت ابتعد عن مكاني
حجة يأشر على خدة: طگيتيني
غنوة:ليش تفشر هيج فشاير عيب
دلهم:جا تطگيني هسة من اكسر ايدج هم واحد يلومني
غنوة:ليش تكسرهة انتة صدمتني خليتني اطكك
دلهم: طايحة الحظ
غنوة:مو صوجك
دلهم:نوب هي الماراضية
غنوة: لسانك ليش هيج لعبت روحي
دلهم:ادبسزز
سحبت الغطة ضايجة وخر ينفضة علية درت وجهي عنة بضوجة مغطية حتى راسي هو بعدة يغلط علية
لان طگيتة ينافخ اني مامتقصدة بدون وعي
غنوة:كافي تحجي علية
دلهم:نطمررري
سكتت خايفة من صوتة غمضت عيوني اسحب الموبايل بطرف اصبعي لحد ما خليتة يمي عبست
لان مطفي الشبكة علية
غنوة:اريد انترنيت .. دلهم افتحة
التفتت ضايجة لگيتة غافي الموبايل بيدة مشتغل
تنهدت مستخطيتة اخذتة من ايدة طفيتة غطيتة
رجعت نمت الصبح حسيت بي حاضني و الموبايل
يدك و يفصل طفاه فتحت عيوني رافعة راسي اباوعلة مغمض ولازمة مخلي ايدة على گصتة
غمضت من فتح سحب ايدة من جواي گام يغسل
شوية و رجع ينشف وجهة بثوبي المعلك ورة الباب
كعد بصفي يوخر شعري عن وجهي خلاه ورة أذني
فتحت عيوني راحت ابتسامتة عبس بوجهي
غنوة: ما شايفتلي زلمة يزعل
دلهم:الزعل بي الج لازم
غنوة:اي
استند على ايدة متمدد بصفي رفعت وجهي بوستة
بخدة تقرب يبوسني على شفتي رفعت ايدي حاضنة
رگبتة مغمضة عيوني
لزم خدي رافع وجهي الة ما ينطيني مجال اختنگت اطگ على زندة و اگرص بي ابتعد يلهث شهگت اتنفس كفشت شعرة اجرة
ضحك يبوس رگبتي حضني لصدرة نام على ظهرة خلاني فوگاه حجة : اليوم اگص شعري ابتليت خليتة طويل
غنوة:خنگتني ريتي ورمت من الخنگة
دلهم:لاا ورمت
غنوة:اني حامل ترة دير بالك علية
دلهم:مو بيدي من اشوفج اريد اخنگج
غنوة:شلون حب اگشر
دلهم:مال ملطلطين
ابتسمت اسند راسي على صدرة اگابل وجهة بوستة بفكة حجيت :مو نمت تتعارك شعدك هسة نزلت عليك الحنية
رد يلعب بشعري ويرفع بي : راضيتج وانتي نايمة
غنوة:شسويت عزة بعينك
دلهم:عزة بعينج انتي
ضحكت اگعد اعدل بثوبي رجع سحبني يبوسني شالني طالع من الغرفة يبتعد شوية يرجع نزلني بالمطبخ نزلت عيوني اعدل وگفتي
غنوة:شنو اليوم ماتروح
دلهم:لا اروح بس بعد وكت
غنوة:اسألك بس لاتفشر
دلهم:تريگي و بعدين نسولف
سكتت حتى ما يعاند و يبطل ما يحجي فتحت الماي غسلت وجهي هو سوة الجاي طلع يشتري ريوك حضرت الكوابة اخذتهن للغرفة
لحد ما اجة كعدنة نتريك هو يراسل ساعة يخابرونة
اني صافنة عليه منتظرة شوكت تفض و يگلي شعدة
سد الموبايل خلاه بصفة
دلهم:الظهر تجي خالتي
رمشت مستغربة:ليش شعدهة
دلهم: تريد تشوفج مسيرة ماعدهة شي
غنوة:هلة بيهة
وخر الصينية ارتكة على الكنتور بظهرة فتح اديه الية
حضني يبوس بخدي اصابعي بأيدة يمسح عليهن
دلهم:غناوي غناتي
غنوة:مابية حيل لا تتحرش
دلهم:شسويت هسة اني
غنوة:كل ما تگول غناتي ابتلي
ضحك يدنك حتى يباوعلي حجة يغمز: اگول من احجيهة الابتسامة تصير من الأذن للاذن
غنوة:يمتة لا تتبلة علية
دلهم:ها يمتة علينة غناوي
غنوة: والله من الخجل ابتسم مو مكيفة
غمز يباوعلي بخبث گرصتة بظهرة نز يسحب ايدي
يعض بيهة مد ايدة يدغدغني دفعتة اضحك طگيت
الكوب برجلي لزمة گبل لايتبدة علية
غنوة:وخر دلهم لا تضحكني ماكدر
دلهم:غناتي
دفعتة اگوم جراني من ثوبي لزمتة بسرعة:لافدوة لاينشگ بعدة جديد
دلهم: بالله انزعي خل اشوفة ياقياس حتى اشتريلج
غنوة:هسة صرت ماتعرف هو انتة اشتريتة
دلهم:ها هذة تني مشتري بالله نزعي
سحبتة اضحك: وخر دلهم مانزع والله
سحبني هو اقوة مني اني صرت مايعة من الضحك ماكدر اوخر سمعت صوت نرجس كيفت على جيتهة
عافني متحلف بية طلعت اشوفهة واكفة بباب المطبخ لازمة الحايط حجت :عمي هنا
غنوة: اي هنا صارلج يومين ماشايفتة
ضحكت دخلت بوستهة حاضنتهة دخلت للغرفة راحت كعدت بصف دلهم ضلو يتشاقون يحنصون
بية هي تم لسان شيگللهة تحجي
خزرتة اعدل بالجربابة شمرت المخدة عليه خلاهة
جوة راسة و نرجس تمشط بشعرة عاجبهة تنزع لاستيكات من شعرها تخليهن الة
غنوة: تسرسحت المنگرش
دلهم: كافي علينة الدنيا حارة نوب انتي مشعوطة من الغيرة
غنوة:لا والله اني اغار عليك شبية مسودنة
دلهم: اي نرجس شلونهة خالتج بعدهة زعلانة يم اهلهة
ردت متحمسة على السوالف:ايي يمهم ماترضى تروح
رفعت المخدة أشرلة بطرف عيني حجة يحرك ايدة بدون اهتمام:طبهة مرض احنة شعلينة بيهة
نرجس:لا عمو خطية
دلهم: اني خطية ماتشوفين عمتج لزمت السلاح
غنوة:على ساس تخاف منة
دلهم:عيونج اقوة من الطلقة
غنوة:اي صدكت
ضحك يحل بشعرة ترستة نرجس لاستيكات خلة نرجس مشت رجعلي يتشبك و يبوس نوب اخذ السلاح ضماه فوك الكنتور
مر الوقت ورة الغدة بس خلص طلع اخذلة فترة اجة
كاص شعرة و مرتبة راجع مثل گبل مشة للغرفة يدور بالكناتير باوعتلة مستغربة
غنوة:شتدور
دلهم:جان عدي تشيرت ردانة طويلة خفيف وينة
غنوة: ضميتة ماتلبسة
دلهم:طلعي اريدة
دورتة وية الملابس غسلتة ضل واكف على راسي يمتة ينشف بعدة رطب اخذة ينفض بي نوب لبسة
غنوة:شعدك اليوم
دلهم: اريد البسة يغطي الوشوم
غنوة:ليش
ارتكة على الكاونتر عينة علية سحب جكارة يگلبهة بين اديه رد ينزل عيونة : طخيت راس لصلاح
رمشت مستغربة:شنو
دلهم:ذولة أهل هاي الگ**" مرت اخوج ثاني مرة احاجيهم يضلون يرطنون علية كلشي مايسون هي مرة لو زلمة اكدر اطيح حظة لوحدي
غنوة:ايي صلاح شعلي
دلهم: شلون ما جان الوضع بس هنا العشاير هي كلمتهة اقوة راح اكسر عينهم بصلاح ولدة وگرايبي
من جهة ابوي و ناسنة كلها تمشي بكلمتة
غنوة:راح تجيبهم على اهل صفية
هز راسة:امم
تقربت يمة لازمة ايدة:لا لاتسوي هيج خاف يغثك بهاي السالفة بعدين
دلهم:شحدة لا يضل بالج خليهة علية
غنوة:عوف صلاح حاجيهم لوحدك اشتكي عليهة
دلهم: اخوهة الگ**" منتسب يلغمطهة من يمة
غنوة:اخاف يقهرك بعدين
رد يبوس اصابعي:جؤؤ فدوة الج
غنوة:ليش گتلة
دلهم: شما يكون الواحد بدون اهلة و عشايرة محد يحسبلة حساب بمكان كلة عشاير و تقاليد ليندگ بعشيرة يطيح حظة و ليعوفهم هم يطيح حظة
غنوة:بس انتة ماتريدهم عوفهم لا يجون ختولي صفية
دلهم:مو بس عليهة اني هم غلطان بحقج الناس تحجي بيج اذا ما اطلع جذبتهة و انظف سمعتج شنو فايدتي
غنوة:مو اخاف عليك
دلهم: منين تخافين حبيبتي الة اخليهم يسدون الشارع لعيونج
مديت ادية حضنت خصرة حاوطني يريح راسي على صدرة يبوسني ايدة فوك شعري يمشطة بصابعة
ضليت متوترة من الي راح يصير لحد الاربعة اجت خالة دلهم وياهة وتين يلمت عليهن و رجلهة هم جاي هوة ولدة كلهم
سلمت عليهة دخلتهن للغرفة هناك ابرد من الهول
كعدت يمهة البنات راحن سون جاي و حضرن ضيافة ماخلتني اگوم
اقل من ساعة صارت اصواتهم مسموعة جنت بالمطبخ فاتحة شوية من البردة اباوع للبرة باب البيت مفتوح لمحت واحد من ولد عمة
صعدن البنات على الدرج يباوعن من الشباك مال البيتونة اخذني الفضول صعدت وياهن اباوع لباب الحوش السيارات سادات الشارع
حتى من تحركن لببيت اهل صفية مبين هواي ذولة
اهل دلهم شكد حتى جامعين هيج زلم شگد كلهة معگلة قليل بيهم لابسين عادي
گلبهة عليهم گلاب طگاهم بگوامة من ذني الزينات
على گولة وتين تخابر بأخوهة و تحجيلي متحمسة
التهيت وية البنات نسوي عشة بس هنة يمي وية ما فرشنة السفرة اجت غفران نفس نفاقهة حبيبتي و عيني سلمت على خالة دلهم كعدت يمهة
نوب گامت من شافت ماكو سوالف جرتني بحجة تريد عشة لعلوان گمت للمطبخ صبيتلهة مدت راسهة من الباب رجعت
حجت تتقرب: شني هاي الزلم ولج شعدهم
غنوة: تسوين روحج ماتدرين
غفران:لا والله سمعنة صوت السيارات ماندري شني شصاير سدو الشارع عبالنة عليكم
غنوة:أهل دلهم ذولة بيت عمة
غفران:هذة رجلج عدة هيج اهل جا شبي مگعدج هنا
غنوة:شعليج هاج العشة و روحي
غفران:وين اروح اگدر اطلع غير هاي الزلم رجعت مكومة بالباب ماتشوفينهم
غنوة:واني شعلية مودية عليج
عفران: جا همة شعدهم شو حتى عشاج شوية
ارتكيت على السنك مخلية عيني بعينهة:تدرين بصفية مجذبة و سالم الله يرحمة گبل لا يتوفى گايللهة مزوجني
توسعت عيونهة و توترت جريتهة من عباتهة مقهورة:جنتي تدرين
ردت مرتبكة:لا لا شدراني
غنوة:احجييي غفران لا والله اخنگج هنا جنتي تدرين بيهة تجذبب
ردت تعصر بأديهة :اي گالتلي ورة ما اخذج عمج لمن رادو يذبحونج بليلتهة گالتلي
غنوة:لبستيني العباة بيدج و طلعتيني الهم
غفران: لا والله گلت لعلوان بيومهة بس ما صدك
عبالة مستخطيتج
غنوة:شگد حقيرات انتن ورة ما رجعت ما حجيتي الي ضليتي مصاحبة صفية شتگول تأيدج
غفران:شبيدي تدرين بيهة شرانية نوب ابتلي وياهة تطك خبالاتهة تشمر فروخهة علية بحجة بيت عمهم
غنوة:عادي عدجن تطعنن بشرفي ماتخافين الله عدج بنات و اخواتج بگدي ما خفتي يصير بيهن مثلي
غفران: اخواتي متزوجات شعليهن
غنوة:واني هم جنتت متزوجة و نكرتن گلتن سالم لأخر لحظة يگول ذبحتهة و مات مقهور علية
دلهم:غــناوي
التفتت لصوتة وخرت عنهة محترگ گلبي ماحس بروحي ابجي بدون وعي مد ايدة حضني عيونة على غفران يخزر بيهة لفت عباتهة مرتبكة
حجة يمسح على خدي:روحي البسي شالج و العباة
تعاليلي
غنوة:شكو
دلهم:كل الخير يالله حبيبتي
مشيت مستغربة لبست الشال و العباة البنات بالباب مال الهول يسألن شصار اشرت بجتفي ما ادري مشيت يم دلهم
اباوع لغفران تعصر باديهة واكفة يم الحايط وجهة ينطي اللوان مخلوسة عدلت العباة رحت بصفة
دلهم:حطلي علة شعراتج الحمر
رفعت ايدي اعدلهن:شسويلهن
مد ايدة يرجعهن جوة الشال عدل العباة حجة يرفع وجهي بين أديه: هاي الگ**" برة تعاي تعتذر منج
غنوة:اعتذارها شيسوي
دلهم: صار اكثر منة هاي شكليات
بوسني براسي طلعت وياه امشي بسدة وگفت على جهة يم الباب شوية لمحت صفية اجت توسعت عيوني اشوف وجهة مزورگ وياهة ابوهة
عصرت ادية سوة ابتعدت من قربت علية حجت:حگج علية انة غلطانة جذبت و طعنت بشرفج
خطيتج برگبتي كل حجاية گلتهة جذب جنت ظالمة بحگج
حجة ابوهة منصي عينة:السموحة منج عمي وجهنة اسود كدامج حگج علينة بتنة غلطت وأني ما أريد أطلع من هالبيت الة وانتي راضية
دلهم:كل كلمة هي شهادة عليكم و الاعتذار مايسوي شي لوحدة
رد بصوت مسموع:اعادهج گدام هاي الزلم ويشهد
الله بعد ماينذكر اسمج الة بالخير و مثل ما غلطنة بحگج من ورة حجي هاي النسوان نرجع نصلحة
عصرت ادية سوة ماكدر اسامحهة ولا امحي هاي
الصفحة و اصفح عنهة لسوتة هواي أذاني حجيهة
دمرني جنت راح اموت من وراهة
باوعتلهة عيوني مغورگة رديت بصوت يرجف:الاعتذار أقل شي تسوينة كل عمري اخدم بيج و محترمتج مثل أمي خطيتي برگبتج
سحبت ايدي من دلهم مشيت راجعة للمطبخ شفت
ابوها طلعهة رغم جيتهة هيج مكسورة عين بس ما محت القهر الحسيتة بلحظتهة
كعدت بالمطبخ اعصر بأدية اسمع صوت الزلم برة
اصواتهم عالية شوية شوية صارت تخف الهوسة
دلهم اجة واكف بالباب عينة علية
خالتة بصفة تسأل عن الصار اذا فضت مشيتهم لحد
العشرة يالله راحن گمت سلمت عليهن گوة مركزة بحجيهم مخنوگة اريد ابجي
طلعن عدلت شالي طلعت وياهن سلمت خجلانة على رجل خالتة حجيهم و طريقة كلامهم بشوشة
حجت خالة دلهم تعدل عباتهة: حل وياهم خل يلزمون نسوانهم جا المن مسربتينهن شني بنات الناس لعب عدهن
رد عليهة يفر بالسبحة: و ابو زايد بينهم فوك ما جايهم الزلمة بالعيني و الاغاتي ضلو يلزگون بحلوگهم و المرة تمشي و تحجي من شافو الزلم اجتهم ضلو يترادمون بالحايط
وتين:خايبة غنوة و احطهة واكتلهة هيج ادوس بمصرينهة حتى يبرد گلبج
غنوة: اخاف على ابني
ضحكو دنكت خجلانة العب بصابعي اجت خالتة بوستني حجت :عين العقل ديري بالج على روحج
هاي سالفتج نحلت و شحدهم بعد يجيبونج بالطاري
وتين: والله جمعتي راسين بالحلال ياوكت احنة نجي وية صلاح الگرع
طگتهة امهة حجت:ولج اسكتي الزلم برة
وتين:مايسمعون ماما شجاج علية
رد ابوهة الجان واگف يم الباب:يالله بوية مشينة
طلعت امهة اجت حضنتني تحجي بهمس:اذا حصلتي شي من الفصل زغيلي منهن
غنوة:فصل شنو
وتين:غير اخذو منهم فلوس هلسوهم طيحو حضهم على گولة علاوي
غنوة:خيولون ربع ماريد منهم
صاح ابوهة عليهة بوستهة طلعت باوعت من الباب وراهم بس همة ضلو اخر شي دلهم جان واكف برة يم ولدهم يسولفون لحد ما مشو ضل بس صفوان
دخلت جوة حتى يطب للاستقبال وكفت يم الباب اتصنت عليهم حاشرة روحي كلش بالركن مالتة
صفوان:نطيني المخدة تكسرت خرب عرضك
سكت شوية رجع حجة :هذة اخوها شگد گ**" لاخر لحظة هو نافش ريشاتة
دلهم:خيولي هو و الحايط واحد
گعدت اسمع صفوان گالة:هذة صلاح شلون جاب عگلة و اجة شسويتلة
دلهم: ليش شتريد منة
صفوان:اذا اجيب هاي الزلمة للخطيبة ما ترجعلي
دلهم:شوف احنة وين وانتة وين
صفوان: حلال عليك و حرام علية جا مو مشيتهم علمود المحروسة
دلهم: تاج راسك و راس مرتك
سمعت شي طاح رد عليه :ابن الگ***" أنعل ابوك لابو الگ***" لجابك
دلهم: نجب لاتفشر كدامي
صفوان: ضام وشومك صاير مؤدب اسكت لا اطلع غسيلك كلة هنا اشرة
مسحت وجهي منعسة ماريد اگوم اريد اسمع عرفت
الگعدة كلهة صايرة فجأة جفتو عليهم خلوهم مايعرفون شيسون
السالفة حاجين بيهة بينهم بيت جدي من شافوهة هيج صارو وياهم ضد اهل صفية حتى علوان شاد حزامة ضال يدافع
گمت من حسيت بصفوان راح يروح طلع وياه دلهم
انتظرتة يم الباب لحد ما رجع بس سد باب الحوش نزع الفانيلة مختنگ منهة
ارتكيت براسي على الباب اباوعلة راح غسل مخلي راسة جوة الحنفية الماي يجري عليه اعرفة اذا يحتار لو يضوج يسوي هيج
وخر سد الماي التفت شافني كدامة ابتسم اجة حضني جوة ذراعة يبوس براسي:شلونهة الحلوة
غنوة:مادري محتارة
دلهم: لا ليش
غنوة: حسيت بروحي حقودة كلش بس من اعتذرت ماحركت بية شعرة
دلهم: خيولي اعتذارهة المهم طلع جذبهة گبال الناس بعد شحدهم يجيبون طاريج
وگفت كدامة رفعت رجلية بوستة بخدة: شكراً
دلهم: على شنو حبيبتي جان لازم يصير من زمان
هذة اقل شي حجيهة مو لعب و ينسكت عنة
غنوة: ادري بس ماعرفت اتصرف ماحجيتلك من البداية لان عبالي راح تسكت
دلهم: هي لو تريد تسكت ماحجت من الاول
غنوة: شنو استفادت مادري
دلهم:گ***"
غنوة:اوف لاتفشر دلهم
حجة يبوس خدي:اكو اقوة تعاي اشاورج
باوعتلة معبسة:ما اسمع عيب
مشة للغرفة مستحر وگف گبال السبلت حضرتلة الحمام راح يسبح لميت الهوسة ضل المطبخ على النص البنات ما كملنة حتى عشاهم ماكملوه
حجيت من شفتة طلع:متعشي لو اصبلك
دلهم:شبعان عوفي الي بيدج و تعاي
غنوة:اكمل فد مرة و اجي مو تنام
اشتغلت بسرعة گفضت البيت اخذت هدوم فتت للحمام و هم بطريقي غسلت الهدوم الي بالسلة
طلعت نشفت ادية توضيت صليت متعودة اذا يصير
شي يفرحني گبل اصلي لان ماعرف اعبر غير هيج
طويت المصلاية خليتهة على جهة عيني على دلهم
لازم الجداحة يشعلهة و يمشيهة على ذراعة يرجع يكرر الحركة من شافني اجيت طفاهة
سديت الباب رحت بصفة حجيت خايفة:دلهم خاف بيت عمك يغثونك بعدين بجيتهم اليوم
دلهم:جؤ لاتفكرين هيج
غنوة: احس ثگلت عليك بهذة الموضوع
دلهم: هسة يالله ارتاحيت
مديت ايدي مترددة لزمهة قربني عليه حجة :اني غلطان و الغلط راكبني من راسي لساسي ما عوضتج
ما سويت شي ردلج حگج لو العقد بيدج ما تجرأت كل هاي المدة بحجيهة
حجيت بتردد:بس اني خايفة منهم
دلهم:غناوي حبيبي هذة حگج و مستاهلتة عوفي الباقي علية اني مرتب كلشي
غنوة:شلون صلاح اجة وياك
حجة يعدل المخدة:بيج حيل تسويلي جاي
غنوة:دلهمم بس لا يزوجونك
دلهم:اهووو والله گورعتي راسي بهاي السالفة يزوجونك و يزوجونك يابة نسوانهم متزوجة محد عدهم وحق الله ماكو عدهم
غنوة: جا ليش ماتحجي
دلهم: راسي يوجعني تلاحگيني بستكان جاي
تأففت عرفتة ما يرد لو انط و اموت هسة گمت اباوعلة بشك حجة وراي : يابة و روح حاتم مابيهة زواج ارتاحي بت الفارسية
ابتسمت فايتة للمطبخ سويت الجاي نقصت جواه
مشيت للغرفة وخر الموبايل من كدامة يباوعلي بطرف عينة غلست فتحت الكنتور اخذت قميصي
حجة مستغرب:شعدج شنو راح تخلين بالجاي
غنوة:شنو اخلي شجاك
دلهم:جا شبيج
غنوة: كلشي مابية اريد ابدل
ضلت عينة علية طلعت اسرع بمشيتي نزعت ثوبي
بالمطبخ محد يشوفني لبست على السرعة فليت شعري ،صبيتلة جاي و ترست روحي من عطرة
اخذت الكوب رحت نطيتة الة كعدت بمكاني احس بنظراتة علية يخوط بالجاي بس صوت الخاشوگة مسموع يطكطك بيهة
دلهم:يبستي ريجي والعباس
باوعتلة اضحك عاف الجاي على الميز نزل تربع كدامي عدلت گعدتي اباوع لكلشي بالغرفة عداه
دلهم: غناوي
رديت العب بالكفر مال الموبايل:ها
دلهم: لو ضالي على الشكراً و ساترين رواحنة
غنوة: اريد اضمنك
دلهم: مضمون والله دنيا و اخرة
غنوة:لا هناك الك حريتك
ضحك يقرب مني يشم رگبتي و يسب بية گرصتة بزندة عضاني حجة : اظافرج بت الفارسية زرفتي ايدي
غنوة:جا ليش تسب
دلهم:عذريني يخوني التعبير
غنوة: مو لهدرجة
دلهم: يادرجة اني عابرهة واصلة وياي وين
ضحكت ارفع ايدي وخرهة خلة شعري ورة أذني
تقرب بوسني بجتفي يوخر سير القميص يحرك
خشمة من جتفي لرگبتي و لخدي
دلهم: هذه العطر منيلج
غنوة:عـ..عطرك
دلهم:اخ عطري عليج
غنوة:دلهم
حضن خصري گومني راح تمدد مخليني بصفة ايدة تتلمس خصري كل شوية يدنگ يبوسني بوجهي
غنوة:كافي نعست
دلهم:توصلين اللگمة لحلگي و تاكلينهة
ضحكت على تشبيهة اني من الخجل بس اريد ادير
وجهي نطيتة ظهري حضني يتلمس بطني يبوس بجتفي بوسات متفرقة
دلهم: غناوي تعبين وحدج بالبيت
غنوة: اي جيبلي ضرة تساعدني
رد بضحكة:ايا ادبسزز شلون لازمتهة
غنوة: انتة خليتهة ابالي كل ما اگلك وينك تگلي لو يم مرتي لو بمعارض أربيل هسة لو ضال على ثانية ميخالف بس كلمة مرتي تنرفزني
ضحك بصوت عالي التفتت الة مستغربة نهض منحني فوگي بعدة يضحك خليت ايدي على حلگة اسكتة ضايجة اخذها يبوسهة
حجة بضحكة:هسة معارض اربيل اهون من مرتي
غنوة:اي ليش تضحك
رفع شعرة بيدة حجة: عبالي تعرفينهة
غنوة:شنو هي
دلهم:معارض اربيل يعني الملاهي لهناك
توسعت عيوني نهضت شاهگة:تروح الهن مثل صفوان
هز ايدة بعدة يضحك:لا يمعودة اشاقة وياج حجاية التنگال
غنوة:واني اكيف من تگلي هيج
دلهم: لو ادري تكيفين جان رحت
غنوة:والقرءان اسودنك
دلهم:من گاعي مسودن
غنوة:دلهم شبيك لا تضوجني
دلهم:يابة هسة اني رايح عليمن تضوجين
غنوة:مادري اتنرفز و انغث هسة انتة مو من اجيب طاري جسام تنغث
رد بحدة:الة تجيب اسمة ماترتاح
غنوة:ها مو عصبت اني هم اعصب بسرعة اتأثر
دلهم: ليش تتأثرين
غنوة:بطرانة غيررر أغار
حجة يرتكي على ايدة : تحبيني
حجيت مترددة:شوية
دلهم:بالله گوليهة
غنوة:أحبـــك
غمض عيونة يخلي ايدي على خدة يبوس باطنهة
قربني عليه حاضن خصري گبيت من الخجل لان اعترفت
قربت عليه مخلية ادية برگبتة منبتة اظافري ابتسم
هو مغمض يحس بحرگتي تدنيت بوستة بخدة
حجيت بهمس يم أذنة:ماكو اذا خنتني
دلهم: الله لايگولهة
غنوة: حتى سحر اسويلك
دلهم:سويلي سحر اسود احمر أدبيني رجعيني يمج
غنوة: صدك احجي مو ارجعك بس هيج اخليك مسودن بالشوارع
ضحك فتح عيونة عض شفتة من شافني قريبة عليه
خشمي يطخ بخشمة احس بأنفاسة قريبة علية
دلهم:غنــاي , غنـــاتي
غنوة: حبيبي
تنهد يحاوط خصري حجة:اليوم شنو تردين تحتليني
غنوة:جنك ما راضي
دلهم:لا يابة ممنون منج
غنوة: أحبــك
دلهم:كلي الج گلب و عقل و روح
دنگت ابوس اسمي لواشمة على جتفة تجرأ بلمساتة
رفع راسي يبوسني بادلتة بدون تردد مخلية كلشي صار اليوم وراي شاردة من افكاري
خلص الليل ذايبة بسوالفة و غزلة كلشي يگولة احجيلة مثلة حسيتة يستاهل ورة التعب ليتعبة يومية هاي اول مرة اتفاعل وياه هيج مابخلت عليه
حضني لصدرة گوة فاتحة عيوني طفيت كلش من النعاس ما ضل للاذان بس كم دقيقة مرغت وجهي برگبتة متعاجزة
سحب شعري من جواي لماه مسوي كور فوك راسي
نزل ايدة لظهري يدلك بي استرخيت احب هاي الحركة و من يعصر راسي هم ارتاح
غنوة:بعد راسي
دلهم:التدليك بفلوس
غنوة:اطلبك خمسين مليون اشتعل وانتة ساكت
دلهم:بالعباس بذاتة ماكو هيج امكانية بالستغلال
غنوة:لو تدلك راسي لو تجيب فلوسي
دلهم:مايصير اخدرج
رديت بضحكة:لا مايصير
دلهم:مابيهة مجال تطيحين اربعين
غنوة: جا شضل عشرة
دلهم:حقج عشرة شنو قليلة بانزين مال مولدة مابيهن
ضحكت ارفع وجهي الة:ليش كل حجيك بالبانزين
دلهم: متعود صحبان اني وياه
غنوة : جنت تبيع بطالة
دلهم:عرگ
رديت اگرصة:بانزين شسالفة
دلهم: غير بالمحطة جنت جا عندي بسطة
غنوة:مو اشوف مرات يبيعون هيج
رد يوخر شعري عن گصتي:جؤؤ جنت واكف على مضخة
غنوة:منصب وزير
دلهم: لو ما المنصب هذة جا ما شفتج
گعدت متذكرة لملمت الغطة علية باوعلي مستغرب تلفتت ادور شي يمي حرمات شال السلاح
غنوة:تذكرت ليش من شفتني گبل گلت لسالم علية گتلة هناك لابدة عود شنو هاي الخباثة
صفن يتذكر ضحك مخلي اديه ورة راسة حجة مستمتع: جا جايتني بالشعر الاحمر و العيون تلاگط گلت جنية
غنوة:يمة جنية لا تگلبهة ترة مو حلوة حركتك
دلهم: نقذتج لو لا
غنوة:لااا اخذتني لبيت و شمرتني بالمطر
دلهم :هاي انتي غلطانة بيهة راسي يوجعني ماصدك انام وانتي فوك راسي الباب يدك الباب يدك اي دعوفي يخولي شبييج
باوعتلة متفشلة رديت: خطية الدنيا تمطر و الرجال برة
دلهم:اي خيولي طبة مرض
غنوة:غير خطية انتة گلبك قاسي شمرتني برة
دلهم:الباب مفتوح ما طبيتي
غنوة:استحيت لازم تتفهم اني ماعرفك و مريضة
و خايفة انتة مدري شلونك
دلهم: هسة شجاب هاي السالفة مو شلوناتنة حلوين
غنوة:لا نقهرت علية نام وحدك زعلت
دلهم: نوكلت اللگمة بعد روحي الله وياج
التفتت الة رافعة ايدي خزرني عبست بوجهة نهض يبوس خدي حجة:غناي حبيب روحي أهلي و ناسي كلشي عندي
