رواية سراج السادة الفصل الواحد والعشرون بقلم غسق ادريس
"مهجان"
طلعت من المصلا عيوني مدمعه ما اتحمل فكرة عمتى تبعد عني او تبعد عن البيت شلون اتحمل فراقها!! لالا اكيد السيد ماراح يسمح لعمتي ب السفر
اصلا السيد مايتحمل يفارق عمتي مستحيل يرضا تسافر وتبعد عنه
شفت العلويه زهراء كاعده ب الصاله ايدها على خدها صافنه من شافتني طلعت من المصلا باوعتلي كاسره صفنتها
حجت وياي ب استغراب
_زهراء:: عمتج وين
اتحسرت ومشيت ب اتجاها
_مهجان:: كاعده ب الغرفه ماترضا واحد يجي يمها
تحسرت العلويه وهزت راسها عيونها مدمعه
_زهراء:: اخخ يمه يا جهاد بيها عليها يصير بيج هيج
باوعت للعلويه بحزن من شفتها تبجي بحزن على عمتي
_مهجان:: علويه قنعي السيد عمتي ماتتحمل كل هذا
_زهراء:: عبد الرؤف شيقنعه
تحسرت بحزن ليش هيج جاي يصير ليش السيد اخذ هذا القرار وقرر يبعد عمتي عن البيت
عمتي عايشه بعد فقدان عون على ذكراه بس
وهسه السيد قرر يمحي الذكرى للابد ويبعدها!!
بقيت كاعده ب الصاله والعلويه زهراء كدامي تبجي مقهوره زعلانه من السيد وزعلانه على عمتي
الي ماتحملت قرار السيد
شكد حاولت عمتي ويا السيد بس لا جان ثابت على قراره وجان رده ب
_عبد الرؤف:: لا بنيتي لازم تسافرين وجودج هنا راح يأذيج ويأذينه وياج
باوعت عمتي للسيد بصدمه والحزن محتل معاني وجهه اشرت على نفسها وحجت كاتمه دموعها
_جهاد:: اذيتكم لان ابجي على ابني؟
ابتسم السيد بحزن وهز راسه ب اي
_عبد الرؤف:: راح تضلين متعايشه بحزنج واحنا راح نضل متعايشين وياج على الحزن نفسه شوفي امج ماجاي تتحمل تشوفج بحزنج ولا انا الاتحمل لهذا يا بنتي انا اشوف سفرج افضل حل
سكتت عمتي وماحجت شي
باوعت العلويه زهراء للسيد وحجت رافضه كلام السيد
_زهراء:: لا بتي ماتسافر جهاد ماتروح لمكان واذا راحت اني وياها ما اتحمل فراك بتي
باوع السيد للعلويه زهراء بدون مايرد
رجع باوع لعمتي وابتسم
_عبد الرؤف:: اسبوعين الثالث تسافرين
رفعت عمتي راسها بصدمه
دمعت عيونها تباوع للسيد
_جهاد:: ماسافر اني
_عبد الرؤف:: علويه لا نرجع نعيد بنفس الكلام
بجت عمتي بصوت مشت للسيد ولزمت ايده تبوسها
_جهاد:؛ لا سيد لا والله ماكدر شلون اتحمل افارقكم سيد والله اشوف عون ب البيت ريحته صوته اشوفهن ب البيت شلون تريدني اسافر
هز السيد راسه يباوع لعمتي بحزن
_عبد الرؤف:: لهذا ماريدج تضلين هنا
بعدت عمتي عن السيد مسافه ولطمت على خدها تبجي سحبها السيد مانعها تلطم
_جهاد:: ابني فاركني وانت تريدني افارك ذكراه. اموت والله اموت
حضن السيد عمتي يبجي بصوت وهيه تبجي ويا خليت ايدي على حلكي كاتمه صوت بجيتي واني اشوف الكل يبجي لبجيهم
باس السيد عمتي من راسها ورجع باسها من وجهه دموعه يصبن
_عبد الرؤف:: بابا جهاد اموت من اشوفج بحزنج
باوعت عمتي للسيد تشهك اشرت على نفسها وحجت
_جهاد:: واني اموت من اتذكر ابني. يابه كلبي ياذيني كلبي ياذيني ماتحمل فراكه عني
جان السيد يبجي وعمتي تبجي بحضنه وتشكيله وهوا يهز براسه واحنا وياهم
رفعت عمتي راسها تباوع للسيد
_جهاد:: يضل كلبي يون لموته
_عبد الرؤف:: تنسين
_جهاد:: كل ماغمض عيوني اشوفه بعيوني اشوفه متلوع من حروره السجينه. ضحكلي قبل لايموت رادني
بعدت عمتي عن السيد ايدها على كلبها
_جهاد:: روحي هذا مو ياهو جان بروحته اخذ روحي ويا
من شفت اذيه عمتي وحزنها اتمنيت اشاركها وجعها بس صعبه منو يكدر يتحمل يشوف ابنه ينقتل كدامه منو يتحمل يشوف ابنه منحور كدامه؟
شفت السيد يمسح بدموعه كلنا ندري السيد يحاول يكابر كدام عمتي مايريد يذكرها بفقد عون بس كلنا مدري السيد من بعد عمتي اكثر ثنين متاذذين لفقد عون
التفتت على العلويه زهراء كلهم ركضولها من رجعت تريد تطيح مغمى عليها ركضلها السيد وفقار حاضنها لصدره
مسح السيد على وجهه العلويه وباسها من راسها باوع لعمتي وحجه
_عبد الرؤف:: امج ماتتحمل تشوفج متأذيه
ااشرت عمتي على نفسها وحجت ب استغراب دموعها بعيونها
_جهاد:: ماتحملت تشوف بتها متاذيه واني شلون اتحمل موت ابني؟
دار السيد عيونه يباوع للعلويه اخذوها للغرفه وعمتي كعدت ب الصاله صافنه ودموعها يصبن بهدوء
واني والبنات متوزعات ب الصاله
موت عون جان مثل انطفاء الفرحه ببيت السيد عبد الرؤف والحزن استوطعن هذا البيت بعد موت عون
اجه اليل والبيت داخل بتوتر بعد ما السيد طلع من الغرفه باوع لعمتي وحجه بحده موجه الكلام لعمتي
_عبد الرؤف:: انا ما ارضا اشوف امج بهل حزن ولا اكدر اشوفج متأذيه. ابدي جهزي نفسج سفرتج لايران سبب لتخطيج
حجاها ودخل للمصلا
خلت عمتي ايدها على راسها ساكته. رفعت راسها تباوع لعمي مهدي
_جهاد:: احجي ويا ابوي
سكتت عمتي مهدي يهز براسه باوعت عمتي لعمامي وصاحت
_جهاد:: ماسافر تردون تحرموني حتى من ذكراه
وكف عمي هادي ومشه ب اتجاه عمتي الي جانت كاعده على القنفه عيونها مدمعه كعد بصفها وحضنها من اكتافها
_هادي:: خويه جهاد حزنج جبير علينه
_جهاد:: مو بيدي هادي مو بيدي
باس عمي عمتي من راسها يطبطب على اكتافها ساكت والكل ساكت وياهم
حاولو عمامي والعلويه يقنعون السيد يشيل فكرة سفر عمتي لايران والسيد ساكت بدون رد
مر ثلاث ايام والسيد محد شافه يرجع من الحوزه يدخل للمصلا حتى ب اواقات الاكل مايكعد ويانا
عمتي جانت مثل السيد وهاي حالتها من بعد وفاة عون صارت ماتكعد ويانا ودوم وحدها معتزله عن الكل
بيوم السيد استدعانا للمصلا
دخلنه اني والبنات للمصلا شفنا السيد كاعد والكتب كدامه من دخلنه ابتسم بتعب حجه يرحب بينه
_عبد الرؤف:: دخلن ورداتي
دخلنه اني والبنات ومشينه باتجاه السيد
كعدنا كدام السيد وهوا يباوعلنه ومبتسم
_عبد الرؤف:: شلونهن بناتي
ابتسمنا اني والبنات مفتقدات كلام السيد النا وقربه النا محد يفهمنا بكد السيد ومحد يعزز النا ويمدحنه بكده بعد الي صار ابتعد عنه وماصرنا نتواجد ويا السيد بكثره
_شاهيناز:: سيد هاجرنا انت
باوع السيد لشاهيناز وابتسم
_عبد الرؤف:: ماتتكرر
فتح السيد كتاب كدامه ورفعه بباوعلنه وحده وحده
_عبد الرؤف:: جنت اقرا بهذا الكتاب وجذبني موضوع حبيت اطرحه الكم
ركزنا ويا كلام السيد ب اهتمام نسمع اله
طلعنه من المصلا بعد درس السيد النا حيل حبيت فكرته بتوصيل المعلومات النه وسردها
شفنا عمتي والعلويه كاعدات الصاله عمتي صافنه بزاويه المصلا والعلويه تباوع لعمتي من طلعنه دارت عمتي والعلويه علينه
باوعتلنه عمتي وحجت
_جهاد:: منو ضل ب المصلا
_مهجان:: محد عمه السيد بس
هزت عمتي راسها ب اي وكامت ووكفت على حيلها
مشت ب اتجاه المصلا قبل لاتفتح الباب دارت على العلويه زهراء
_جهاد :: تعاي وياي يمه خاف يرفض
كامت العلويه زهراء من مكانها ومشت ويا عمتي داخلات للمصلا
كعدنا اني والبنات ب المصلا مستغربات دخله عمتي والعلويه
اقل العشر دقائق!! وسمعنه صوت عمتي والسيد يعلى وصرخه العلويه زهراء من صاحت
_زهراء:: لااا عبد الرؤف
انصدمنا اني والبنات من صوت الصريخ الى اجه من المصلا بس خفنا ندخل لان عمتي لو جانت رايده تسمعنا جان حجت من جنا موجودين بس هيه فضلت نطلع من المصلا حتى تدخل تحجي ويا السيد
طلع عمي مهدي من الغرفه مستغرب باوعلنه وحجه ل استغراب
_مهدي:: شصاير شبيها عمتجن
باوعت عاتكه لابوها وحجت بخوف
_عاتكه:: بابا عمتي مادري شبيها والعلويه تصرخ
مشه عمي مهدي ب اتجاه المصلا
دخل للمصلا واحنا بقينه واكفات برا نريد نعرف شنو جاي يصير
رجع صوت الصريخ تكرر وبجي عمي وصريخها جانتت تردد كلمه
_جهاد:: ماروح ماطلع من العراق
_عبد الرؤف:: كتلج روحتج مو طلب انا جاي اجبرج جهاد!!
_جهاد:: تعرففف تعرففف قاتل ابني تريد تضمه انت مشترك بقتل ابني سيد!!
بعد كلام عمتي هذا سمعنه صوت عمي مهدي والعلويه زهراء مصدومين
دخل عمي هادي وعمي منتظر للبيت وركضو للمصلا
عافو الباب مفتوح وراهم تمشينه اني والبنات للباب المصلا نشوف الي صاير جوا
شفنا عمتي طايحه بنص المصلا تبجي وعمامي ملتمين حولها وعمي مهدي ورا السيد مانعه يتقدم ب اتجاه عمتي باوع السيد لعمامي وللعلويه وصاح بيهم
_عبد الرؤف:: خلوها تسكتتت تعبت منها تعبت من همومج تعب من مشاكلج الى متى اضل اركض وراج
باوعت عمتي للسيد بحزن عيونها متروسه دموع
_جهاد:: والله ماسويت شي
صاح السيد بعمتي بعصبيه
_عبد الرؤف:: سويتي وابسط فعل الج ترحين من ورا ضهري تفتحين قضيه عون
_جهاد:: ابني هذاا!!
_عبد الرؤف:: استوعبي من ترحين تفتحين القضيه ماراح تحصلين شي
دكت عمتي ايدها ب الارض بقوه تصيح
_جهاد:: تريددد تضيع القاتل انت مشترك بقتل ابني لعد
صاح عمي منتظر بعمتي بقوه
_منتظر:: جهاد!!!
باوعت عمتي لعمي وصاحت
_جهاد:: جهاد جهاد جهاد شتردون منها تردوها بس تسكت هذا الي هامكم سكتي عن حق ابنج واني احلفلكم ابني حق ابني ودمه مايروح
جانت عمتي تصيح بعصبيه منفعله
اباوع السيد جان يسمع لعمتي بس كملت كلامها خله ايده على صدره مخنوك رجع للخلف مامسيطر على نفسه الكل ركض على السيد وهوا يحاول يجر النفس
كامت عمتي من مكانها خايفه على السيد وشلون تخربطت حالته بسرعه
اتجمعو عمامي وشالو السيد يركضون بي للخارج
اخذو السيد عمامي ب السياره بعد ما ادهورت حالته
كلنا جنا خايفن على السيد والي صار بي وشلون تعب هيج كعدت العلويه زهراء ب الكاع تعبانه وعمتي واكفه تبجي باوعت العلويه لعمتي وحجت
_زهراء:: روحي جهاد
_جهاد:: ها
_زهراء:: روحي يمه روحي يم عمتج لايران لاتضلين هنا
انصدمت عمتي من كلام العلويه
مشت للعلويه وكعدت كدامها
_جهاد:: ليش يمه حتى انتِ مليتي مني؟
باوعت العلويه لعمتي وبجت
_زهراء:: ولج يمه انتِ عزيزتي شلون امل منج. بس كعدتج هنا اذيه الج ابوج راح يسفرج ردتي لو لا
_جهاد:: يمه ابني
لزمت العلويه ايد عمتي وباوعتلها بحزن تبجي
_زهراء:: يمه ابنج يم ربج طير وب الجنه هذا جان يوم مقتول ومنحور وكدام عيونج ربج راد يشوف صبرج ويختبرج بي. اني ماكدر اشوفج تعبانه مثل ما انتِ محروك كلبج على ضناج اني محروك كلبي عليج وانتِ ضناي وابوج مايتحمل شكد مايحاول يقوي نفسه يطيح صبره كدام عيونج
اخذت العلويه زهراء ايد عمتي وباستها جرت عمتي ايدها من العلويه بسرعه
_زهراء:: احلفج بعون ترحين لايران فتره زمن ورجعي ولاتضلين هنا محروك كلبج على ابنج واحنا محروك كلبنا عليج
باوعت عمتي للعلويه زهراء عيونها مدمعه
هزت راسها وكامت متوجهه لغرفتها الكل جان ملتزم الصمت حتى بعد ما رجعو عمامي والسيد من المستشفى
مر اسبوع والبيت هادء بس جو الحزن محتله
قبل الموعد الي انطاه السيد لعمتي لسفترها بيومين دخلت للغرفه عمتي شفتها كاعده على الجربايه تبجي قميص عون ب ايدها تشم بيه
رفعت راسها تباوعلي مسحت دموعي ومشيت ب اتجاها
_مهجان:: عمه ما اكدر افاركج ماريد ترحين عني انتِ امي ما اتحمل افارق امي مرتين
حجيتها وبجيت واكفه بباب الغرفه
باوعتلي وبجت وياي فتحت ايديها وصاحتني مشيت الها امسح بدموعي ويطيحن غيرهن
حضنتها ابجي وهيه تبجي وياي
_مهجان:: عمه ما اكدر افارق ريحتج
_جهاد:: ماعوفج اخذج وياي
رفعت راسي اباوعلها
_مهجان:: صدك عمه خاف السيد مايقبل
_جهاد:: لا بس هاي ضلت يحرمني حتى منج
حضنتي لصدرها تبجي بقوه واني ابجي وياها حجت تنعي بحزن
_جهاد:: يا يمه شلون اتحمل ابعد عن مكانك عزيزي يعون امك هنا تنام بسدي تنام.
بجيت بقوه من عافت راسي وحضنت المخده تبوس بيها شمت ريحه المخده بقوه
_جهاد:: ريحتك ماتفاركني عون شسويت بيه يا يمه لو طارحتك ببطني ولا جايبتك لدنيا ومتلوعه لموتك
هزت راسها بحزن وجرت حسره
_جهاد:: حتى ابوي ملل من حزني يكلي روحي ما اتحمل اذيتج تراضها؟ لا ماترضاها
مسحت دموعها وخلت ايدها على ركبتها تتنفس بصعوبه
_جهاد:: حتى الهوا من بعدك ما اكدر اجره
خلت راسها على الفراش وبجت
_جهاد:: اريد احضنك وابجي اكلك هجرك شسوه بيه.
شالتها راسها وباوعت لصوره عون ب الحايط
_جهاد:: بس اني ترا زعلانه منك خل اكلك بس اشوفك اعاتبك لان لو صدك تحبني جان حنيتلي واجيتلي بحلم
طلعت شهكتي من صدري ابجي لحالة عمتي وشلون تعاتب بعون
_جهاد:: عون يمه مختنكه مادري شبيه.
ابتسمت ورجعت تباوع لصوره دموعها بعيونها
_جهاد:: بلكت اموت حتى نلتقي
غمضت عيونها وطاحت عيونها ابتسمت من بين دموعها
_جهاد:: يا محلى الموت لو بي شوفتك
جنت اشوف عمتي تنعي عون مره تعاتبه ومره توصف شوقها اله
اخذتني عيوني لباب الغرفه شفت السيد واكف يمسح دموع ويباوع لعمتي
باوعت عمتي للسيد وضحكت
_جهاد:: اذيتك بحزني يابه مو
نزلت راسها وبجت تشهك دخل السيد للغرفه ومشه لعمتي كعد على الجربايه وجرها لصدره
_جهاد:: اني اذيتك بويه اني؟
رفعت راسها تباوع للسيد
_جهاد:: هضمتني بويه
حضن السيد عمتي لصدره وبجه بصوت وهيه تبجي ويا وتشكيله
_جهاد:: قهرتني بكلامك
_عبد الرؤف:: حزنج يفتح جروح كلبي
_جهاد:: بس اني مازعلانه منك ادري ماحجيتها من كلبك
بجه السيد ودموعه تصب على راس عمتي
_عبد الرؤف:: قهرتج بويه جهاد
هزت عمتي راسها اي
_جهاد:: تمنيت ساعتها احضنك واشكيلك من كلامك
مسحت دموعي ابجي لبجيهم
_جهاد:: مو بيدي لو بيدي سكتت جروحي بس مو بيدي
بعدت عن صدر السيد وباوعتله مبتسمه
_جهاد:: ترا شنو اريد هسه؟
هز السيد راسه ب اي ودموعه على خده
_جهاد:: اريد اكعد من النوم وعون نايم يمي اربد ابوسه بخده وهوا يفتح عيونه ويضحك نكعد من النوم ونجيك للمصلا وانت تفتح حضنك وهوا يركض الك اريد اخذه وياي للحوزه اريده يمشي كدامي واني افتخر بي هذا ابني هذا كبرتي هذا الراح يكبر ويلمني بكبرتي
هزت راسها ب الرفض تبجي باوعت للسيد بحزن
_جهاد:: ليش حرموني منه
اخذ السيد راس عمتي لصدره يمسح على ظهرها
_عبد الرؤف:: النا لقاء بعون ب الجنه
_جهاد:: يمتى اموت حتى التقي بي
سكت السيد وعمتي تبجي بحضنه
كمت من مكاني طالعه من الغرفه سديت باب الغرفه ومشيت اغسل وجهي
غسلت وجهي اكثر من مره دموعي بكل مره يصبن كل ما اتذكر كلام عمتي شكد اكتأبت بهذا اليوم ماعرفت اتخطى كلام عمتي
اجه اليوم الي محد جان متوقع راح يجي يوم سفر عمتي وسفري وياها اليوم هذا محد جان متصور عمتي راح توافق تسافر لايران وتبعد عن البيت
محد جان متوقع السيد راح يقسى على عمتي بهذا الشكل ويبعدها عن ذكرة عون
مسحت ادموعي ايدي ب ايد عاتكه والبنات واكفات يودعني لحظات حزينه واني اودع الكل
بعد ما اختاريت عمتي اختاريت اسافر وياها ما اكدر ابعد عنها هيه الي ربتني هيه امي هيه اختي هيه صديقتي وجودها هوا بلسم الي
ماتحمل فكره اعوفها تسافر وحدها
باوعت للعلويه زهراء حاضنه عمتي وتبجي وعمتي تبجي وياها عمامي ونسوان عمامي كلهم جانو يبجون الكل ودع عمتي بحزن ودموع
والولد حاضنين عمتي دموعهم تارسه عيونهم وعمتي تودعهم بهدوء
الكل جان موجود عدا شخص واحد الشخص الي اختار سفر عمتي نفسه ماكدر يتحمل فكره سفرها وبعدها عنه
ماكدر السيد يودع عمتي رغم اصراره على سفر عمتي بس فكرة عمتي راح تبعد عنه جانت ب النسبه اله كسره
مشت عمتي للمصلا تضحك بحزن وعيونها متروسه دموع فتحت باب المصلا واحنا خلفها شفنه السيد كاعده ب المصلا يمسح بدموعه. من دخلنه باوع لعمتي ودنك ضحكت عمتي ومشت اله
_جهاد:: ماتودعني
هز السيد راسه ب اي مدنك راسه
_عبد الرؤف:: هسه ردت اطلع اودعج
كعدت عمتي كدام السيد تباوعله مبتسمه باوع السيد لعمتي عيونه مدمعه ماتحمل وسحبها لصدره يبجي
_عبد الرؤف:: عزيزه كلبي
_جهاد:: راح تروح ماتشوفها بعد
بعد السيد عن عمتي
_عبد الرؤف:: مجبور
هزت عمتي راسها ب اي رجع السيد حضن عمتي وهيه تبجي واحنا نبجي وياهم
رفع السيد راسه باوعلي وفتح ايده
ركضت لحضنهه ابجي
ودعنا الكل بدموع وحزن ودعنا بيت السيد عبد الرؤف
السيد جان شايف بعد عمتي عن البيت افضل فكره حتى تنسى موت عون!!
" مهره "
_مهره:: سيد لاتخلي ياخذني
جان السيد عبد الرؤف والسيد مفرقد مصدومين وهما يشوفوني احتمي بيهم
باوعلي السيد عبد الرؤف ورجع دار يباوع لمسلم الي اجه ب اتجاهي عيونه ناطه يركض علينه
وكف مسلم كدام الساده حاول يسحبني من بينهم رفع السيد عبد الرؤف ايده بوجه مسلم عاكد حواجبه
_عبد الرؤف:: لحظه. ايدك
باوع مسلم لسيد بعصبيه باوعلي ورجع دار يباوع للسيد
_مسلم:: العفو سيد البنيه زوجتي مره خصتكم ابتعدو نريد نروح
شفت صدمه السيد مفرقد من مسلم كال زوجتي رجع السيد عبد الرؤف خله ايده بوجه مسلم
_عبد الرؤف:: واذا ابني؟
_مسلم:: شنو واذا اكلك مرتي وخرو خل اخذها نريد نولي
حجاها وجرني من بينهم صرخت اجر ايدي منه
_مهره:: لا سيد لاتخلي ياخذني ماريده
باوع مفرقد لمسلم عاكد حواجبه
_مفرقد:: جاي تكلك ماريد اروح وياك عوفها
_مسلم:: وانت معليك مشاكل بيناتنا مانريد احد يدخل
جرني بقوه ودار يمشي
_مهره:: عوفني الله ياخذك ماريدك ياوصخ
_مسلم:: انا اعلمج مهره ولج شاربي مو عليه اذا ماندمج
توني ارد علي ونجر من ايده بقوه. باوعت لسيد مفرقد وسيد عبد الرؤف واكفين ورا مسلم مانعي يكمل
_مفرقد:: وين
دار مسلم على مفرقد بعصبيه وصاح بصوت كدام الناس الرايح والجاي يباوع علينه
_مسلم:: انت شعليك اكلك زوجتي
_عبد الرؤف:: زوجتك شارده منك وتطلب المساعده من غيرك اذن الموضوع يتطلب تدخل؟
مسح مسلم على وجهه بعصبيه باوع لسيد عبد الرؤف وهز راسه
_مسلم:: بيناتنا مشاكل ان شاءالله نعرف نحلها
_مفرقد:: ان شاءالله تعرفون تحلوها بس ماكو روحه دام البنيه واكفت بسدنا ماتاخذها الى احنا نرجعها ب ايدينا
فتح مسلم عيونه بعصبيه يباوع لمفرقد دار عليه يباوعلي بخزره
_عبد الرؤف:: نريد نحل المشكله بهدوء بدون مشاكل
_مسلم:: انا هم ما اريد مشاكل
_مفرقد:: لعد تفضل نكعد بمكان ونشوف حل
لزمني مسلم من ايدي وهز راسه ب الرفض
_مسلم:: مشكورين نحلها بينا
_مفرقد:: من الاخير تريد تحل مشكلتك تحلها ويانا غيرها لا
تهجم مسلم على مفرقد بعصبيه والسيد بيناتهم حاجز
_مسلم:: انت شعليك لاتخليني اتصرف غير تصرف خليني محترم العمامه فوك راسك
وكف السيد عبد الرؤف بوجه مسلم وحجه بتهدديد
_عبد الرؤف::حجايه وحده اشتكي عليك
باوع مسلم للسيد بغضب مايكدر يحجي
شاف الناس كلها التمت والي يمر يحجي ويا السيد عبد الرؤف ومرتين حاولو يدخلون ويهدون على مسلم بس السيد منعهم
باوعلي السيد عبد الرؤف وابتسم
_عبد الرؤف:: تعاي بنيتي
مشيت ورا السيد عبد الرؤف خايفه جسمي يرجف خايفه من مسلم صار نار خفت ياذيني لو يأذي الساده وتصير بوجهي
مشينه راجعين ب اتجاه الحوزه عيوني دمعن من تذكرت الحوزه اشتقايت لايام الحوزه!؟شتاقيت اركض بهذا الطريق من اتأخر عن الحوزه
كعدنا بمكان فارغ محد بي غير احنا الاربعه باوعلي السيد وحجه ب اهتمام
_عبد الرؤف:: احجي بنيتي
باوعت لمسلم وبلعت ريك
_مهره: سيد اني جنت ادرس ب الحوزه تذكرني مو؟
هز السيد راسه ب اي
_عبد الرؤف::اتذكرج بنيتي ليش لا
هزيت راسي وحجيت
_مهره:: سيد اهلي جبروني على ابن عمي هذا كدامك اني ماريد اتزوج جنت اريد اخلص حوزه وارجع لدراستي ماجان ابالي لبسوني بدله الخطبه والحلقه غصبأ عني!!
جان السيد يسمع الي ومسلم خازرني
_عبد الرؤف:: وانتِ شنو الي تردي هسه؟
_مهره:: اريد اطلك سيد ماريد اتزوج
حجيتها وبجيت بقله حيله ما اريد اتزوج اريد اعيش حياتي مثلي مثل غيري ليش انكتب علي اتزوج ب الاجبار
_مسلم:: وانا ماكايل لا بس نتزوج اخليها ترجع تدرس واخليها تدرس بحوزه بس هيه ماتفهم وماتدري بيه شكد متعلق بيها ورايدها
هز السيد راسه وباوعلي
_عبد الرؤف:: اذن شنو سبب رفضج؟
_مهره:: سيد اني ماريده شخص انفرض علي اخذه!!
باوعلي مسلم بعصبيه والسيد يباوعلي بحيره
_عبد الرؤف:: يابنتي الي تردين تسوينه ب العزوبيه سوي ب الزواج ماكو فرق
_مهره:: بس اني ماريد سيد الله يخليك خلي يطلكني
_مسلم:: وانا يا سيد طلاك ماطلك وعرسنا قريب وانا جبتها لزياره لان كالت اريد ازور ومشتاقه لهذا المكان ماجنت اعرف راح تسوي هيج وتخليني بهذا الموقف
حجاها واخذ ايده ب ايدي سحبني وكام وكف
_مسلم:: مشكور سيد وماتقصر دخلناك بمشاكل لابيها ولاعليها البنيه طفله بعدين تفهم وتستوعب
جريت ايدي منه عيوني على السيد مدمعه
_مهره:: سيد الله يخليك ما اريده لاتخلي ياخذني
دنك السيد راسه ب اعتذار
_عبد الرؤف:: والله يابنتي مابيدي شي هوا اولى بيج وزوجج يعني الي اكدر علي انصحه يخاف الله بيج بس غيرها مابيدي شي
باوعت لمفرقد وعيوني مدمعه
_مهره:: الله يخليك سيد
سكتت السيد مفرقد والسيد عبد الرؤف
عرفت اني وين شمرت روحي جنت متوقعه راح يخلصوني بس لا!! اني اختاريت الخيار الغلط ماراح يعوفني مسلم على الي سويته
ودع الساده ومشه ساحبني ب ايده درت على السيد مفرقد وعبد الرؤف شفتهم عيونهن عليه
باوعت لمفرقد وبجيت بحزن
ماجنت متوقعه هذا اخر لقاء وياهم والقاء الثاني راح يكون ب اقدار مختلفه!!
" قدس "
كل الي صار وياي بيوم العرس جان صدمه الي وكسره جبيره بهذا اليوم
مشاعر اضطراب وبداخلي هوسه جبيره ليش هيج صار وياي؟ ليش اني؟ معقوله ماراح اصير ام؟ معقوله غضنفر اذا تقرب الي راح يموت؟
معقوله هذا الجن راح يضل يركض وراي ماراح اعرف ارتاح منه؟ زين يمتى يبدي علاجي
يمتى ابجي اتخلص من الكوابيس الي اشوفها يمتى اتخلص من مطارده الموته الي؟
مر يومين على زواجي
ماكدرت اتقبل غضنفر وقربه الي بعد ماشفته سكت عن حقي زين قدس انت شتريدن يعني تردي يتعارك ويضرب منه وسهام لا ما اريده بس ماشفته انطه للي صار حقه
ماشفت منه رد فعل تريح كلبي زوجتي نهانت بهذا اليوم تاذت نقهرت بجت ماكدرت تفرح شلون اسكت عن حقها؟ ماشفت شي منه غير كلام مايشفي قهرتي وحزني
كعدت كدام مرايه الغرفه اعدل بشالي البارحه سبحت من الشهريه معقوله اليوم غضنفر؟؟ لالا ما اريد افكر لان ماريد ماعرف شبيه بس حسيت ببرود تجاه غضنفر
وكلام سهام يتردد بداخلي
نفتح باب الغرفه باوعت لغضنفر دخل للغرفه تلفونه ب ايده رفع راسه وباوعلي كسرت نضراتي منه ورجعت اعدل بشالي
تقدم ب اتجاهي توقعت راح يحارشني او يحجي وياي؟ بس لا خله تلفونه على الميز ومشه ب اتجاه الحمام
ما اهتميت لان اني لو اريد قربه الي ماجان بعدته عني مو مهم خلي براحته شكو بيها ابتعدت عن المرايه وهوا دخل للحمام كعدت على الجربايه صافنه
زين ليش ماحجه وياي مو يدري مقهوره؟
ليش ما حاول يكسر الزعل ليش تجاهل حزني بهل سهوله معقوله عنده حزني سهل ومايهتم الي بهذا الشكل
اي عادي خلي براحته مو مهم يعني شسوي عباله اهتم
رفعت راسي ب اتجاه باب الحمام شفت غضنفر واكف ومكتف ايده يباوعلي عكدت حواجبي بعصبيه
_قدس:: شكو
_غضنفر:: نضل هيج؟
بعدت عيوني عنه وكمت من مكاني
_قدس:: اي افضل النا
مشيت ب اتجاه باب الغرفه اجه غضنفر ب اتجاهي جرني من ايدي ولافني علي
_قدس:: هاي شبيك وخر وخر
_غضنفر:: ما وخر وهاي مال افضل النا ف هاي ب النسبه الج مو الي انا ما اتحمل بعدج وزعلج مني هيج
اتنفست ب انزعاج وباوعتله
_قدس:: ماريد تتقربلي غضنفر
_غضنفر:؛ قدس انا ماكتلج اريد اتقربلج؟
_قدس:: اي اني مامستعده
_غضنفر: براحتج بنتي المهم نتراضه
حجاها وباوعلي يريد يشوفني ارضا لو لا
_قدس:: وخر عني غضنفر خنكتني
_غضنفر:: هوا شمسوي انا وخنكتج
_قدس:: اي بس بعد عني
بعدت منه منزعجه باوعلي مكتف ايده لصدره
_غضنفر:: زعلتج بدون سبب
_قدس:: وخر عن الباب خل اطلع
هز راسه ب اي وبعد عن الباب فتحت باب الغرفه وطلعت خلي حتى يتوب بعد من يشوف واحد يضوجني يركض يهد عليهم
نزلت الدرج عيوني تتوزع ب الصاله حفيدات العلويه لباب كلهن ملتمات عدا منة الله احسن وجودها يخنكي كلش اضوج من اشوفها
باوعتلي عطاء وابتسمت رجعلتها الابتسامه بدون ما احس على نفسي حسيتها مبتسمه من كلبها رغم الي سوته اختها بس تبقى هيه مالها ذنب
طلعت العلويه لباب من المصلا باوعتلي وضحكت
_لباب؛: هلا بعروستنا
_قدس:: هلا علويه
اجت ب اتجاهي سحبتني لصدرها باستني وابتعدت ابتسمت بوجهه خجلانه والبنات يباوعلي كعدت وياهن ب الصاله اسمع لسوالفهن جانت عاديه وماعرف اربط وياهن كل كلامهن عن الكتب والدين
مرت ساعتين وغضنفر مانزل من الغرفه شفته مطول حطيت وصعدت للغرفه شعليه بي هوا بصفحه واني بصفحه
فتحت باب الغرفه شفت ضوه الغرفه مطفي سديت باب الغرفه ودخلت شفت غضنفر نايم ايده على عيونه
مشيت افتح ب الشال
شمرت الشال على المرايه ومشيت ب اتجاه الجربايه
كعدت قريب على غضنفر باوعت لايده فوك عيونه مايشوفني
_قدس:: اي نام نام لاتكعد ماريد اشوفك
سكتت وهوا نايم ساكت رجعت كملت كلامه محروك كلبي
_قدس:: طلكني احسلك لاعبالك اقبل اكمل وياك خليني اشتغل ويا قس اختي
صفنت ساكته متذكره قس
_قدس:: ادري بيها بس اكلها اكمل وياج بمشروعج ماترفض
سكتت صافنه على كلامي لا والله قس اول وحده ترفض اذا كتلها اتذكر قبس كلتلها نشتري حلويات ونبيع على الجاهل كامت ادك على وجهه وتصيح
_قس:: الله اكبر تردون تبوكون شغلي حتى على هاي لحكتوني
باوعت لغضنفر بقهر
_قدس:: جنت احبك وهسه بطلت بعد ماحبك
درت وجهي عنه منطيته ضهري شبيك قدس عوفي هذا مايفيدج هوا اصلا بين على حقيقته من اليوم الاول
حسيت بشخص حضني من الخلف باوعت لغضنفر باسني بخدي يضحك
_غضنفر:: انا وياج نفتح مشروع احسن من قس ونشتغل بي
_قدس:: وخر عني
_غضنفر:: مو بكيفج
سحبني لحضنه وغطاني ويا ب الحاف باسني براسي وحجه يمسح على راسي
_غضنفر:: احبج خجولي
_قدس:: ماحبك اني
سكتت حاضني لصدره نمت بحضنه لليل فتحت عيوني لكيته نايم راسه على راسي
بعدت عنه وكمت من مكاني غسلت ونزلت لصاله
جانن البنات يحضرن للعشه دخلت للمطبخ شفت رشا واكفه ب المطبخ تطبخ من دخلت باوعتلي وابتسمت
_رشا:: هلا بعروستنا
_قدس:: ها رشا. تردين اساعدج
باوعتلي وهزت راسها ب لا
_رشا:: لا حبيبتي مشكوره كعدي ارتاحي
كعدت على الكرسي اباوعلها ضايجه ماعرف شبيه احس اكو شي على صدري خانكني
_رشا:: شبيج قدوسه
باوعت لرشا وهزيت راسي بلا
_قدس:: مابيه شي
_رشا:: شلون مابيج مبين على وجهج تعبانه شنو؟
_قدس:: ضايجه واشتاقيت لخواتي مامتعوده افارقهن
باوعتلي رشا وابتسمت
_رشا:: هاي اني من اجيت هم هيج ابجي على خواتي وامي بعدين تعودت
هزيت راسي ب اي وسكتت باوعت لباب الحديقه مفتوح محد ب الحديقه مشيت ب اتجاه الحديقه مخنوكه وضايجه تمشيت للمرجوحه
كعدت على المرجوحه اخذت تلفوني ودخلت على الكروب دست اتصال جماعي وخليته كدام وجهي
دخلت عاتكه للاتصال مبتسمه بعدها شاهيناز ودخلت وراهن ملاك دخلت قس للاتصال والكل التم باوعتلهن وضحكت
_قدس:: شلونهن المجاهدات
ضحكن البنات وبدن يرحبن وحده ترحب ب الثانيه واني اسولف وياهن واضحك كدرن يغيرن من مودي ويخلني اطلع من الملل الي اني بي
ثاني يوم جنت كاعده وحدي ب الغرفه
دخل غضنفر بيده ورد جوري احمر باوعت للورده شكلهن يجنن
اتقدم ب اتجاهي وخله والورد كدامي
_غضنفر:: شفتهن وتذكرتج
_قدس:: شكددد حلوات!!!
اخذت الورد من ايده متونسه بيهن وهوا يباوعلي يضحك
مدلي صبعه الصغير وابتسم بحزن
_غضنفر:: خلينه نصاحب وبعد مانتزاعل
باوعتله وحجيت برفض
_قدس:: لامانتصاحب
_غضنفر:: مو بكيفج
حجاها وحضني لصدره يبوسني من خدي ضحكت بفرح وبسته بخده من شافني لنت اله شالني بحضنه يفتر بيه واني اضحك متونسه
" قس "
بعد قدس عني جان صعب عليه تحمله قدس اكثر وحده من خواتي قريبه الي جنت كل ماضوج اروح التجىء الها تضوجني ب الزايد بس تبقى اختي؟!؟!
بعد مارجعنا لديوانيه ولبيتنا دخلت للبيت مامتحمله نقص قدس عن البيت رغم اعرف هيه بمكان أمن وافضل من الي جانت بي بس!!
اتحسرت وصفنت ب الغرفه شلون انام وهيه مو يمي ما اتحمل فراقها وبعد الي صار بيها ب اول يوم عرسها جان صدمه الي
ما كدرت اهد على سهام ومنة الله وقتها ماردت يشوفوني عائله الساده بمنضر مخل للنضر يعني تخيلو يشوفوني لازمه سهام واكتل بيها لاعيني وين المستحه لا مو لهل درجه
جنت كاعده ثاني يوم ب الصاله صفنه تجيبني وصفنه توديني صافنه على المستقبل البعيد وشنو راح افتح من مشاريع
بيني ويينكم صرت اخاف احجي بشغلي خاف انحسد شفت عيون الناس ماترحم ماكليني اكل من يشوفوني رابحه ب شغلي محد يتمنالي الخير
باوعت على الرف جانت اكو شيره محطوطه ب القالب كمت من مكاني وتمشيت ب اتجاه الرف اخذت الشيره
وكعدت على القنفه امرخ بيها
صفنه تجيبني وصفنه توديني ماعرف شنو الجديد مقرره ازرع بذور وابدي لسنه الجديده احصد السرع بي ما اعرف هم يردالي خبره بهذا المجال
مشيت ب اتجاه غرفه نضال وعمي
فتحت باب الغرفه ودخلت شفت عمي نايم على الجربايه بتعب خطيه الله يساعده البارحه بليل اسمع صوت ضحكه وسوالفه ويا زينب
زينب هاي يهي هاي وحده مصادقها ببرنامج ودوم يحجي وياها نضال ماتدري بس اني ادري بس اكيد ما انطي بعمي ادري نضال ماعدها تفاهم انوب تكتل الزلمه بيها عليها ادخل بخطيته
كعدت كدامه على الجربايه باوعت لرجلي مطلعهن والشعر تارس رجله ما اعرف شلون اجت ابالي وداعتكم ايدي وحدها اخذتني لرجله مادري شلون الشيره صارت برجله من الطول لطول بحيث نص منطقه رجله تغطت ب الشيره
صفنت على عمي هسه شيصير لو نضال تدري بيك تحجي ويا زينب؟ مو تحطك انت وزينب بتابوب واحد
لاعمي خطيه ما اريد اخرب علي
خليت ايدي على شيره وشلتها من رجله هيه شيله وهوا عمي كمز من الفراش يصرخ ويطفر
انصدمت مستوعبه هاي اني شسويت؟؟ شمرت الشيره من ايدي اباوع لعمي الي كام يطفر بنص الغرفه متوجع
باوعلي مصدوم ومعصب باوع لرجله وانصدم من المنضر تخيلو وياي؟ رجل متروسه شعر صفحه وصفحه ملسه بدون شعر
ما ادري شلون اجه ابالي دلهب الي شفناه ب الزياره عنده لحيه وماعنده شعر براسه
نزل عمي عليه سب وغلط واني كاعده بمكاني اسمع لكلامه وتعبيره ووصفه الدقيق الدقيق الي نفتح باب الغرفه ودخلت نضال مستغربه باوعت لعمي وحجت ب استغراب
_نضال:: شبيك تصيحح
_محمد:: تعاي شوفي الزماله هاي شسوت
حجاها ومد رجله صفنت نضال على رجل وعمي وباوعتلي
_نضال:: ولج هاي بس لا الشيره مالتي
_قس:: تدرين ياهي زينب؟
باوعتلي ب استغراب وعمي دار يباوعلي بصدمه
_نضال:: يهي زينب؟
باوعت لعمي ونضال تباوعله رجعت باوعت لنضال وضحكت
_قس:: وحده
كمت من مكاني وطلعت من الغرفه شفتو شلون بسهوله طفيت نيران الكتله؟
طلعت نضال من الغرفه واني كاعده ب الصاله دخلت للمطبخ واني لحكتها شفت المطبخ فارغ محد موجود
_قس:: نضال تدرين شنووو
_نضال:: شكوووو
تربعت كدامها مبتسمه
_قس:: اذا انطيتني هسه خمسه وعشرين اكلج منو زينب
باوعتلي نضال صفح رافعه حواجبها
_نضال:: واني شعلي بزينب وعليمن انطيج
هزيت ايدي اضحك ب استهزازء
_قس:: يعني ماتردين تعرفين عزيزه عمي محمد بكيفج
حجيتها ومشيت اطلع من المطبخ بعدني ما طالعه وجرتني نضال من ايدي
_نضال:: منوووو زينب ولج؟؟
_قس:: ورقي واكلج سالفه تاكلين راس عمي بيها سنتين كدام
باوعتلي عيونها ناطات رفعتلها حواجبي احمسها على السالفه دخلت ايدها ب... وطلعت الخمسه وعشرين
مديت ايدي وهيه خلتهن
_قس:: هاي زينب مطلقه عدها اربع جهال عمي يروحلها كل يوم وياخذلها مسواك ومشيها مصرف والله اعلم بعد شنو صالهم اربع سنوات يعرفون بعض واني شايفتها والله تردين الصدك احلى منج واحتمال جبير ياخذها ويخليها فوك راسج
واني تدرين لو ماحبج ماكلج واصلا ماحب افتن بس ماريد تجينه مرت عم اني انت كوا متحملتج مو وحده ثانيه..
كملت كلامي وسكتت اباوع لنضال عيونها راح يكمزن من مكانهن فتحت باب المطبخ وطلعت تركض واني وراها كلشي يصير احتمال تكتل الزلمه على الاقل احشم الناس تفزعله
بحركه خفيفه لطيفه دفرت نضال الباب برجلها ودخلت تحسكك مكافحه داخله عليك
انصدم عمي على دخله نضال التلفون بيده
_نضال:: منو زينب
انصدم عمي يباوع لنضال
_محمد:: ياهي زينب
_نضال:: اني جاي اسأل منو زينب؟؟؟؟؟؟؟؟؟
صرخت نضال موجها اصابع الاتهام لعمي وغير اصابع الاتهام جان بيها سجينه هاي جاي تسوي زلاطه ويعني شوفو الصدفه زلاطه وهسه عمي الله يعلم الجاي منو
بهذا اليوم صارت مشكله جبيره والسبب زينب خرابه البيوت هاي عمي نسوان ماينكدرن يدورن زلم متزوجين يطركاعه النسوان الماتخلص
عمي ماخله ايد ورجل ماباسهن بنضال بس لااا نضال عدها كرامه كعدت بنص البيت تصرخ وتغلط على عمي
عبالكم تروح لبيت اهلها وعمي يتوسل بيها ترجع؟ لا حبايب وين كاعدين هاي قديمه هسه هيا تطرد بعمي من البيت
بنفس ساعه العركه الي صارت شفت تلفون عمي يرن واتحداكم تعرفون منو المتصل؟ زينب ولكم اي زينب جان مسميها ابو الغاز
اخذت التلفون وركضت ب الصاله فتحت الاتصال والاسبيكر اصرخ
_قس:: ها بربو/ك هجامة البيوت ولج ام الزلم هجمتي بيتنا من كون هجمو بيت الخلفج وجابج
باوعتلي نضال مصدومه
_نضال:: منو هاي؟؟؟؟
_قس:: هاي العياره زينب ام الزلم اخذي هاج احجي وياها
اخذت نضال التلفون مني تباوع للاسم
_نضال:: ولج "" "" "" "" "" "" "" "" "" "" "" "" "
جنت متونسه سمعت غلط ماسمعته قبل وعمي يلطم على وجهه يريد يسكت نضال
هذيج سدت الاتصال من نضال هددتها تجيها تكتلها ب البيت باوعت نضال على عمي ولطمت على صدرها
_نضال:: ولك تالي وكتي تحجي ويا غيري
_قس:: ليش بشنو مقصره وياك نضال وتخونها عمو مو زين راضيه بعيشتك
لثاني يوم عمي جان يتوسل بنضال والجو جان مكهرب تكهرب اخواني من درو بيه اني السبب بتشتيت العائله حاولو يكتلوني بسسس اني قس محد يمد ايده عليه بكلمه وحده كدرت اسكتهم
_قس:: والله اليمد ايده هسه اكل النسوانكم على نغم وسحر
كلهم بلعو العافيه مني
ونسوان باسم وقاسم يفترون وراي يردني احجي بس لا ماكو شي بلاش انتضرهن ينطني الفلوس واسلمهن المعلومات ب ادق التفاصيل
هسه عرفتو مشروعي الجديد؟
"
عاتكه"
كل الي ب البيت جان مستعد حتى يستقبل محرم
العلويه انطت علم لكل الجيران والاقارب العشره الاولى جانت بيتنا وراح تبدي القرايه بداخل بيتنا
وحزرو منو الملايه؟؟ اي اي عمتي الملايه الي راح تقره عمتي من جنت صغيره حتى قبل زواجها جانت تقره
عمتي صاحبه صوت جميل وهادء يلمس طبول الاذن برقه وهدوء صاحبه بحه عريقه
جانت معروفه بصوتها
نكدر نكول عائله السيد عبد الرؤف من الصغير لجبير صاحبين صوت ذو جوده عاليه
كل الي ب العائله قارئين قرأن عمتي وفقار ومفرقد يقرون بمجالس
قبل محرم بيوم اتجمع الكل ببيتنا العلويه لباب السيد عبد المقتدر والسيد معز مع احفادهم
جنا اني والبنات ملتمات ب المطبخ نسولف ومتحمسات نجهز توزيعات اول يوم محرم
خليت قوري النومي بصره على الطباخ بعد ما السيد طلب نجهز الحامض تضامن ويا محرم
كعدت ب الارض اني والبنات نلف بتجهيزات باجر ونسولف
دخلت ملاك للمطبخ ضايجه وعيونها مدمعه دخلت شاهيناز ورا ملاك تحجي وياها باوعتلهن ب استغراب
_عاتكه:: شبيج ملاك
باوعتلي وهزت ايدها ب مابيه شي
كعدت كدام الطباخ صافنه تتحسر وشاهيناز واكفه فوكها تباوعلها
دخلت فاطمه بيدها برتقاله تركض بيها
_فاطمه:: عتهه
_عاتكه:: ها فطوم
رفعت البرتقاله بوجهي تريد اكشرها الها عفت الجيس من ايدي اريد اكوم اكشرها الها
استوقفني كلام ملاك من اشرتلي اكعد
_ملاك:: اني اكشرها كعدي
كامت ملاك من مكانها ومشت تاخذ السجينه جانت الكاونتر مطبوك ويا الطباخ اخذت ملاك السجينه ودارت تريد تاخذ البرتقاله من ايد فاطمه
ركضت فاطمه على ملاك تنطيها البرتقاله بعدها ماواصله الها وطاحت البرتقاله جوا الطباخ
دنكت ملاك تاخذ البرتقاله
ماعرف شلون تحرك الطباخ ماثابت والقوري على الطباخ يفور بمجرد ماتحرك الطباخ كلنا انصدمنا بصريخ ملاك من طاح القوري عليها ماخذ جسمها بفورانه!!!!!
"" "" "" "" "" "
بارت خفيف لطيف متكون من 6000 كلمه ضبط ♥
شوفو ادري البارت مابي هواي احداث
بس البارت الجاي اعوضكم ببارت 10 الف كلمه 👀👀
المهمممم؟؟ اي اي نجي نتناقش
فقره مهجان خلتني اكتب وابجي شكد تأثرت بهل فقره والحزن الي استوطني منها!!
مهره!!! اخ مهره اخخ موقفها والي صار بيها
ترا نعذر الساده والسبب مسلم يصير خطيب مهره يعني زوجها؟ يعني مالهم سلطه يبعدو وهوا ولي امرها
ف ارجوكم نريد تركيز احنا ماكاعدين بروايه خيال؟ لااا روايتنا حقيقه يعني احداثها مابيها مبالغه لحد يتوقع الساده راح يمنعون مسلم ياخذ مهره ويعقدون عليها وتصير تحت جناح الساده
لالالا دام احنا جاي نحجي شي حقيقي ف نكون واعين مهره مخطوبه ومسلم زوجها يعني محد يكدر يتصرف حتلو احتمت ب الساده يبقى مابيدهم شي
نجي لقدس وغضنفر؟
قس ومشارعيها الغير مطروقه
واخيرأ ملاك!!! شنو تتوقعون صار بيها؟؟
شكرا لزيارتكم عالم روايات سكيرهوم
