رواية نقش بارد الفصل الثاني والعشرون بقلم فدك فاطمه
آنة جَريتچ نِفَس گوة عَلى ريتي
و هَسة حِيرة مِنين ما أَهِدچ أَموت
.
.
غنــــوة
خلص محرم دخلت بالخامس ما احجي عن التعب احس روحي مو اني اشتاقيت لخفة جسمي گبل
سـهرانة بيدي جهازي متمـددة بالمطـبخ فاتحة الباب دنيـا حارة بـوخة و كهـرباء ماكـو مختنگة من نفسي مر مني دلهم بيدة السجادة شمرها بالحوش اخذ المخدة نام برة
صافنة على السگف احسب الساعات بلكي تشتغل
طگت روحي گوة لازم لساني ما اشتم و دلهم من الظهر طاحلهم سلك
گمت طلعت يمة ابتعد مسويلي مكان گعدت اباوع
للسمة حسيت بي كل شوية يتلفت يباوع وراه
حجيت مستغربة:شكو ليش تتلفت
دلهم :خاف واحد يشوفج
رديت اتقرب منة:محد يشوف بهل الليل
عبر ايدة على جتفي اصابعة بشعري يحرك بيهن
غمضت عيوني منعسة من الحر ماكدر انام لا اگدر اتگلب براحتي اخاف اجعص بطني
حجة بزهگة:اشتعلت ابهاتهم على هيج كهرباء
لو مخليتني مسوي الواير هسة نايمين على البنگة
غنوة: والله بالليل ما تلمسة اخاف
دلهم:أموت بالليل ما اموت بالنهار
غنوة:اووف هم جاب هذة الطاري
عدلت نومتي ضايجة نطيتة ظهري اباوع للحايط ارسم عليه بأصبعي اشكال و ارقام اضيع وكت
نزيت اضحك التفتت لدلهم اخذت ايدة اخليهة على بطني فتح عيونة من حس بحركة الطفل ابتسمت
تقرب فجأة يبوسني گرص جتفة وخر
غنوة:عيب احنة بالحوش
رد يرتكي على الايدة: تفرحيني ماتردين ابوسج
غنوة: مو اني ابنك
دلهم:انتي الاصل بكلشي
باوعتلة مبتسمة بعدنة نسولف اشتعلت الكهرباء
شتم الكهرباء لا مطفين راضي عليهم و لامشغلين
گومني وأخذ المخاد دخلنة للبيت تمددت على الجرباية بعد لو افطس من الحر ما اگوم ظهري انتهة
سحبت الغطة الخفيف علية اخذة شمرة بعيد
دلهم:حارة وانتي متغطية تخنگيني
غنوة:ما اعرف انام هيج
سحبتة برجلية متغطية للنص اشر على رگبتة مختنگ غلست شعلي بية كل واحد و عاداتة ليرتاح بيهن هو مو ينزع الفانيلة
غنوة: باجر تروح
دلهم:لا ما اروح ،ليش بدت الزيارة ماكو شغل يالله خليني انام
غنوة:نام راح تموت
دار وجهة لجهة الثانية غمضت عيوني ايدي على بطني اجة ابالي موضوع شنو نسمي الطفل خفت احجي و يكتلني اني و طفلي
گعدت بالعشرة روحي طالعة من الحر الشمس على الشباك الغرفة تصير فرن دلهم نايم بالهول فوك السراميك عايفني هنا مشوية
گمت غسلت اخذت هدوم فتحت الحنفية الماي مال الماطور بي برودة بس هو لمصبرنة سبحت
گوة اتحرك اخاف ازلگ لبست طلعت
اسوي ريوك فتحت الثلاجة ادور لبيهة لگيت جبن ضال من امس طلعتة سويت جاي سحبت الكرسي
گعدت اهفي بشالي
ما گعدت دلهم بس يگعد يضل يسب و يفشر من الحر خلي نايم احسن كملت ريوك نظفت البيت يرادلة تنظيف عميق صرت اگفض شلون ما جان
اشتعلت الكهرباء بس حس بالبرودة گعد باوعتلة
من الباب اسمعة يدردم و يتذكر طلع برة شوية رجع
يسأل عن البلايس
غنوة:احنة منين النة بلايس
حجة مستغرب:فوك وحدة
غنوة: جا ما ادري بيهة تلگاهة فوك
صعد يدور رجع يفتح بالجرارات ما لگاهة ضاعت كل شوية يگلي وينهة من نظراتي يعرفني ما اندلهة يگول ضامتهة عليه
حجة بضوجة:اذا ما اسوي الواير بسنوني اني معتب مو جانت فوك وين وديتهة
غنوة:اهووو والله ماندلهة شسوي بيهة اثرم بصل
دلهم:اهلج ماخذينهة
غنوة:لا مادري روح شوفهم
رگع الباب رايح گمت بضوجة ادور وراه شفت الجرارات الي بالمطبخ ماكو صعدت الدرج گوة لگيتهة تدلي التايه
نزلت طلعت للحوش فتحت الباب اباوعلة جان واكف گبال عامود الكهرباء يباوع للواير اشرتلة خزرني يتلفت خاف واحد برة يشوفني
اجة مديتهة الة اباوعلة بطرف عيني حجة :وين مخليتهة
غنوة:فوك صعدت وراك لگيتهة
دلهم:امشي يالله طبي
گلبت عيوني بس سديت الباب فتحة يتخلف بية ما اهتميت وگفت قريب على الحايط عيني عليه اكره
من تعطل الكهرباء ويسويهة اضل بقلق
لحد ما شد الواير و نزل ردت روحي خابر ابو المولد يشغل النة هنة البنكات ينعسن اني اهفي اسرع منهن لو مبردة اويلي
غنوة: الغدة عليك
دلهم:ماكو غدة صومي
غنوة:اني حامل احتاج اكل راعيني شوية
دلهم:سوي الغدة و العشة اني اسويه
غنوة:مايعبرن علية تخليني اطبخ و بالعشة تجيب سفري
حجة يشمر المحفظة علية:فارغة وداعتج
غنوة: جان حلمي اتزوج واحد اغنى من اهلي تزوجت افقر من اهلي
دلهم: أيا ادبسزز تعايريني
ضحكت اخلي المحفظة على الثلاجة طلعت الخبز الضال عدنة سويت محروگ اصبعة ماتاخذ وكت ولا تعاي اوكفي و شوفي كل شوية
تغدينة گبل الصلاة نزلت الجدرية اكلنة بيهة كاعدين يم باب المطبخ نشم ريحة سمج من برة
غنوة: والله خطية السمج فوك الحر شاوينة
دلهم: سمج مثقفين هذة يتحمل كلشي
رديت اضحك:لو عدنة ماتت السمجة
دلهم:لا يالفطيرة هي السمجة تجي ميتة
تحمحمت متفشلة باوعلي بطرف عينة بزيت رجلة
بضفري طگ ايدي يدفعني عفت الخاشوگة ردت اخرمش زندة دنگ صارت برگبتة
عضيت شفتي متورطة:بالغلط
رد يمسح رگبتة: شبيج تخرمشين بزونة
غنوة:جا ليش تطگني ، اگلك داهم
همهم بدون مايرد حجيت ارفع وجهة الي:شنو نسمي ابنة مدري بتنة
حجة بعد تفكير:جاستن
غنوة:ايي وإذا بنية تسميهة انجلينا مو
رد يعض شفتة:ذكرتيني بالعزيزة
اخذت الجدرية گمت لزمني يضحك رديت ادفعة:وخر خلي انجلينا تغسل هدومك و تطبخلك
و تفليلك راسك من تنام
دلهم:الاخيرة على الجرح
خليت الجدرية على الكاونتر ماخذة السجينة حجة يأشر علية :تعوذي من الشيطان
غنوة:الة اجويك
لگفهة مني بدون ما احس ايدة خفيفة شمرهة اخذني بصفة حاضني طگيتة بعكس ايدي ببطنة
عقج وجهة متوجع
دلهم:استلك ابليسج اگعدي
غنوة:لا تشتمني والله بعد ما احجي وياك
دلهم:لا على بليس ترضين ولا على ابوج
غنوة:وخر مزاعلتك
دلهم:افا عليمن زعلانة من كل عقلج تغارين من ممثلة
غنوة:جا ما تشوف وجهك من تباوعلهة يگول مرتك اذا اجت هنا گبل تتزوجهة
دلهم:شيجيبهة ماتگليلي ختولي يمعودة كافرة ماريدهة انتي حبيبتي
غنوة: وخر مو صوجك
دلهم: كافي غناوي لاتعگدين الحاجب حبيبة الروح
غنوة:هالمرة سماح بعد صدك ازعل وشوف
دلهم: شلون فلم محضرلج بالليل من لتحبينهن
غنوة:دلهمم
ضحك يرفع ايدة ينزل الجدرية اخذ الخاشوگة حجة يرفعهة الي:يالله وية كل لگمة بوسة على الخد
غنوة:تترسني دهن
دلهم:مال رومنسية انتي مال نعل
غنوة:لا ضم الرومنسية لأنجلينا
دلهم:كل ما اريد انساها تذكريني
غنوة:هو انتة تنسى
خزرتة لان يضحك يجذب يموت على هاي الممثلة
ابدي اخنگة من يجيب سيرتهة هيج حاطة عقلي وياهة لان معجب بيهة
عفتة خليتة يغسل الجدرية و ينظف المطبخ رحت تمددت موبايلي بيدي اجة وراي ينشف بأديه
غنوة:شبسرعة خلصت
دلهم:نگعتهن للعشة مايطيح
غنوة:خرب حضي والله انتة تغسلهة
باوعلي بدون اهتمام تمدد بصفي اخذ موبايلي من ايدي مديتهة اخذة بعدة رافعة ليفوك حتى ما ألوح
دلهم:اوگفي خل ندور أسم لأبنج
غنوة: نسمي جـسـ
نخلست من خزرني عضيت شفتي وجهي صار ينطي
اللوان عدلت گعدتي اباوع بطرف عيني بعدة عيونة
علية خلاني اتوتر
رجع يباوع للموبايل يبحث عن اسماء حتى اخاف اجيب اسم ولد على لساني ضل يگلب مايعجبة يقلد عليهن عافهن يدور اسم بنية
غنوة:يجوز ولد
دلهم: هلة بي اذا مو شعرة احمر
غنوة: والله يطلع حلو هيج كيوت ابيض عيونة علية و شعرة علية
دلهم:واني وين رحت
غنوة:غير يشيل دمك هسة انتة ماتريد جهالك يطلعون علية
دلهم: اذا طلع اسمر و شعرة احمر نصير مضحكة لأمة محمد
ضحكت اتخيلة حجيت اشيل ايدة لجتفي:المهم سلامتة
رد يبوس جتفي:المهم سلامتج حبيبتي غناي
غنوة: والله لو تتغزل لباجر لاتعب روحك
نزع الموبايل يتقرب يبوس رگبتي يحجي بصوت ناصي علمود يغسل مخي و غسلة مايصعب عليه شي يسوي ليريدة
كعدت العصر كلش لگيتة ماموجود گوة علية گمت
على ما طلعت من الحمام لگيتة راجع رحت للمطبخ واگفة اباوعلة سحب الفانيلة يريد يمسح وجهة
غنوة:دلهم بس تمسح بيهة و تشمرهة اشگگهة مابية حيل اغسل هدومي مشمورات ما غاسلتهن
دلهم: ياهو لذابهة
غنوة:هسة شوية الگاهة بشي مكان من تريد تطلع تلبس غيرهة تعبتني
حجة يرجع يلبسهة:هاي ارتاحي يالله
رحت بصفة اباوع جايب ماعونين سفري قيمة غسلت الخاشوگة حجيت:منين هاي
دلهم: رحت اجيب عشة لاگوني يوزعون اخذتهن ورجعت
غنوة:حظوظ عرفتك والله ماتطبخ
دلهم: مالي خلگ
رفعت الخاشوگة اوكلة حضني من ورة مخلي راسة على جتفي :حبيبي غناوي
رديت اكل:نعم
دلهم: احبك اني
ضحكت اطگ بطنة يتحرش بية حجيت ادفعة:كافي حتى ببيتي اكو تحرش
دلهم: تحرش اسلامي حلال زلال
غنوة:وخر دلهمم لا تدغدغ خليني اكل
اخذ الخاشوگة من ايدي أكل ضميتهن بس يبدي بعد مايعوفهن مو بعيدة يگلي روحي سوي عشة
رجعت للغرفة نظفتهة تمددت أحاجي برفا تدرس خصوصي طالع براسهة شيب من الطلاب وكحين
لحد الاذان گمت توضيت اباوع للحوش مامصدگة
غاسل هدومة و هدومي و گاعد بالاستقبال مكنك
توضيت رحت يمة اجيت ابوسة تذكرت متوضية هسة بس ابوسة يكيف بعد شيخلصني عفتة رحت
صليت هو بالغرفة صلى كملت رحت احمي العشة
كعدنة بالمطبخ ناكل بهدوء مرت هاي الفترة كلهة
روتين دلهم ابد ما يسوي شي بس يروح لشغل ويرجع من يوم المشية لليوم
اخاف اسألة عبالة اشجعة يرجع لسوالفة القديمة
مكيفة عليه هسة يجي من وقت يضل الليل كلة هنا
جنت اخاف اضل وحدي
بعدنة نتعشة يگولون تتذكر المصايب تجيك بس كملنة دك جهازة صفوان گالة جايك باوعتلة بطرف عيني ما عاجبني
دلهم:ابطل شني راح يصير بية توحد
غنوة:جا مو اني وياك ماصار بية
دلهم:غير اني يمج
غنوة:واني يمك
دلهم:اكو مواضيع ماكدر اسولفهن وياج
تقربت بفضول:مثل شنو
دلهم:ماگدر احجيهن
غنوة:تخوني
دلهم:اي اخونج وية صفوان أستغفرالله شلون اجة براسي حجي لعبتي روحي
غنوة:اي اعصابك يابة شگلت هسة اني ما اتشاقة ابطل خلكك ضيگ
رد يطگ گصتة بگصتي على كيف:اضيگ من خصرج
باوعت لروحي رجعت باوعتلة معبسة ضربتة على جتفة رديت:تقلد مو هذة ابنك لو ما هو خصري برفع المحبس
دلهم :يمعودة الدنيا حارة
غنوة:قصدك اجذب گول الصراحة مو ايدك جانت تلتف عليه ها ايد وحدة
دلهم:اي طبيعي هسة ايد وحدة احضنج
غنوة:توصل لنص بطني و توگف گبل ما جنت هيج لاتضل تتنمر علية كل شوية تطگني بحجاية
دلهم:كلشي بيج زايد عن حجمة الطبيعي
خزرتة اضحك رافعة الخاشوگة: تأدب
دلهم:ترستينة تمن نزليهة
غنوة:واحد يسوي الجاي ثاني يغسل المواعين
دلهم:ثنينهن انتي اني رجال للبيت ما اشتغل
غنوة: رجال البيت يجيب فلوس انتة مگضيهة تجيب هريس و قيمة
رفع ايدة يريد يكفخني دنگت تمدد مخلي راسة على رجلي حجة يشيل ايدي يخليهة بشعرة:اني تعبان غنوة
حجيت امسح على شعرة:شنو الي متعبك سولفلي
دلهم:يجي صفوان و اسولفهن
غنوة:هاي ليش
دلهم:تضلين تفكرين مو زين عليج
غنوة: علمود قضية اخوك
دلهم: مو بس هاي هواي غيرهة
غنوة: كل مرة اگلك اذا انتة شاك بيهم اشتكي وخلي محامي مثل ما سويت بقضية عصام
رد يبتسم بسخرية:ياريت اگدر
غنوة:ليش ماتگدر شنو ليمنعك ماعندك دليل انتة تعرف حاتم الله يرحمة راح الهم بعد ما رجع يعني همة اخر شي شافوه
دلهم:كملي عشاج و روحي للغرفة خلي الباقي علية هسة يجي صفوان خل اكملهن
تنهدت ادير وجهي كملت عشة گمت ماخليتة يسوي
شي اني غسلتهن و خليت الجاي نقصت جواه مر مني يريد يطلع بوسني و راح برة
رجعت للغرفة فترة و سمعت اصواتهم ضل هواي يمنة للنص الليل يالله مشة دلهم صاير يحس بية من اگعد بالباب ضليت بالغرفة مغلسة عن سوالفهم
التفتت على حركة الباب حجيت من شفتة دخل:راح صفوان
هز راسة گعد بصفي مرجع ظهرة على القنفة عدلت
نومتي التفتت الة مديت ايدي لازمة جتفة باوعلي
أبتسم مد ايدة للياخة نزع الفانيلة
طلع موبايلة عدل نومتة مخليني على ايدة حضنت خصرة فتح الموبايل ضوة الشاشة صار بوجهي
حجيت اشوف الخلفية:تگول ماحب شعرج الاحمر
رد مستغرب:اي ماحبة
غنوة:ليش مخلي خلفية الموبايل لون احمر
دلهم:الله ياربط المواضيع العدج
غنوة:ماكو تفسير غيرهة
دلهم:هذة ثوب انجلينا احمر خليت مثلة
گرصتة لزم ايدي متوجع حجة:خرب بليسج
غنوة:تغثني يابشر انغث
دلهم:عليمن نغثيتي شحجيت
غنوة:يارب دعوة حامل كون الطفل يطلع نسخة مني وين ما نطلع يگولون هذة حلو على أمة وگدامك
زلم و نسوان
حجة يسكتني:هااا هااا سالمين ندهرنا تريدهم يتغزلون بيهة
غنوة:جا لاتضل انجلينا و نعلينا اسكتت
دلهم:اخ لو اگدر اسوي لأريد اسوي
غنوة:سوي جا خايفة منك
دلهم:لازمني الجاهل لبطنج
غنوة:شكد تراعي نفسيتي دخيل اهلك
دلهم:عوفي اهلي
غنوة:اهلي احسن من أهلك
دلهم: والله ابوج نجر من الديوانية لطهران لگطلة مرة و اجة شجابهة عليك شجابك الهة
ضحكت ارد عليه:غير نعجب بيهة
حجة يأشر علية:هي تشبهج
غنوة:اي تشبهني شايفة صورتهة مال العرس
دلهم:و رضت بأبوج
رديت اضحك:ابوي يشبه علوان
ضحك بصوت عالي اني أنبني ضميري ماكدر اسكت من الضحك ترحمتلة قريت صورة الفاتحة هديتهة الة استغفر الله شجاني احجي على ابوي
مديت ايدي ادور فلم حجة يشغل واحد: هذا حلو
غنوة:لا اريد مال الاميرات
حجة يستهزئ:واني وشومي نكعد نتابع فلم الاميرات مال حضرتج
غنوة: محد گالك دگ عود شنو هيبة
دلهم:لا شقاوة
غنوة: تابع هذة مال ام الشعر الطويل بي واحد حرامي مثلك ايدة خفيفة
نش ايدي من كدامة يريد يطلع حجيت اباوعلة:حباب تنسيت على الفلم
دلهم:دوخري
غنوة:يالله شغلة لخاطري
دلهم: والله خاطرج جاي يكلفني هواي
غنوة:متحسف
حجة يلعب بشعري: لا والله فرحان
ضحكت أشغل الفلم مستندة على صدرة گرص رجلي بصابع رجلي دفعتة دغدغني بصبع رجلة
جوة بباطن رجلية
غنوة:اووف دلهم نوب بالرجلين
حجة يبوس راسي: اكو فقرة عجبتني اليوم خل نعيدهة
غنوة: اخذ مخدتي انام هناك بالهول
دلهم:گعدي اشاقة من عاب شكلج
رجعت ابزز ببطنة بظفري تنرفز دفع ايدي حجة:ابتلي بيج بهل الليل اسكتي
غنوة:لا تغلط علية
دلهم:نجبي و تابعي
عدلت نومتي اباوع للموبايل يحجون عربي افهم عليهم احب ذني الافلام كارتون حلوات مابيهن شي يخوف و مزعج
غنوة:شوف راح تنزل بشعرهة
دلهم:ياسبحان الله
غنوة:باوع باوع هذة الحرامي شوفة
دلهم:يشبهج
گرصتة حجة يعض اصبعي:لاتگرصين صفحتي راحت مزورگ
غنوة:انتة كلشي تسوي تعضني و تكفخ و تضل تصنف اني ماگدر تعبانة اسهل شي الگرصة تفوخ الگلب و سريعة
دلهم:مبتلي على عمري اذا ما اگص أظافرج
غنوة: واني اغسل المسدس و المكينة مال الوشم
دلهم:دغسليهة اذا ما اطيح حظج
غنوة:عوف اظافري متونسة عليهن
فتح الجرار ما لحگت اشرد حضني شمر الموبايل
حست بحضنة اريد يوخر ما گدرتلة گرضهن كلهن
غنوة: اوووف ضوجتني
دلهم:لعبان روح فوك منهة تخرمشين
رديت بضوجة:مخرمشتك
حجة يراويني ايدة و رگبتة و ظهرة درت عيوني بعيد
غلست اخذت الموبايل اتابع كل شوية يقلد عليهم
غنوة:ماعدك ربع تجيبلي جبس
ندار يفتح بالجرارات اخذ دفاترة يگلب بيهن لگة ألف دنگ اخذ الفانيلة لبس راح يشتري المحل قريب وگفت الفلم لحد ما اجة
جايب حب كرزات و جبس و قوطية سودة بيهة رسمة مال نمر دوم يشتريهة تايگر يطگهة بكمعة وحدة نطاني الجبس رجع تمدد
فتحتة راسمين عليه شامية هو فوشار حجيت اكلهن:مالگيت غير هذة
دلهم:ماكو غيرة
غنوة:اي المحل فارغ خطية عدهم تعزيلة
دلهم: لاتصيرين فكاهية تابعي و سكتي
رفعت ايدي اوكلة :ضوگة يلعب سبعين نفس
نطيني حب
دلهم:اكلي شوية لايصعد الضغط
غنوة:ذاك اليوم غير تارس التمن ملح لگمة وحدة عيوني صارن بهامتي مفرغ القوطية كلهة
دلهم: اربع خواشيك انتي گلتي
غنوة: گتلك خاشوگتين بمال الجاي رحت طلعت مال الاكل كل وحدة شگدهة مخلي اربعة نوب
دلهم:اهووو نشيب ماتنسين
ابتسمت ارفع راسي الة:نشيب سوة
دلهم: اذا ما اجت انجلينا
غنوة:اني اشيب وياك هنيالي تجلطنب و اموت
حجة يأشر على الشاشة:شوفي اميرتج حصلت بوسة تعاي ابوسج
باوعت لگيتة صدك غطيت الموبايل عود هذة مال اطفال ضميتة وراي رفع راسي يضحك دك الة يبوس
بقينة سهرانين كل ما يكتلنة الحر نگول راح انام من يشتغل السبلت و تبرد الغرفة نصحصح نضل نتشاقة و نضحك لحد ما أذن
نمت بوقت متأخر كعدت على دگة الباب اباوع الغرفة فارغة گمت امسح وجهي بنعاس لگيت الفتاح مشمور بالگاع قافل الغرفة و مخلي فتحت الباب طلعت دلهم ماكو توقعتة راح يدور شغل شي
باوعت بضوجة اشوف غفران واكفة بباب المطبخ تدك بي هو مفتوح حجت تخلي علاگة على السنك
غفران:هاي باميا جبنة هواي اخوج وداهة
غنوة:شكرا ليش كلفتي روحج
حجت تگعد تهفي على وجهة:ماكو كلافة من گاع جدج ،شني شو طباخج فارغ وين الغدة
غنوة:بعدني مامسوية
غفران:بالوحدة بعد يمتة تسوين
غنوة:جذذب
هزت راسهة بأي حتى الصلاة فايتتني شجاه ماگعدني من راح ضلت غفران تسولف تجيب
و تخلي حجي من ورة الصار و جية بيت عم دلهم
صارت غفران رايحة جاية ساعة تجيب خبز ساعة تودي غدة و علوان يمر علية يسلم لو يعزم دلهم
يشرب جاي ورة العشة وياه
شكد ما جنت اتمنى اخوي يحبني هيج من وحدة يمر علية لو علاقتة حلوة وية دلهم شلون اخوان رفا
وية صفوان رغم مشاكل همة اصدقاء
بس كلشي اجة بوقت متأخر حيل ما دافع عني گبل
خلاني ملطشة بأديهم هسة كلشي منة ما يأثر بية ولا جاي احس بعاطفة و محبة اتجاهم
فزيت من صفنتي على صوت الباب البرة من نسد دخل دلهم گامت غفران بسرعة سلمت و طلعت بدون ما تباوع لفت عباتهة و فلتت
حجة يباوع وراهة:هاي شبيهة
غنوة:تخاف منك
دلهم:حتى بنتها صايرة مخلوسة مثلهة
غنوة:خطية مشتاق لنرجستك
دخل يضحك حجة يگرص خدي:مشتاق لمريتي
غنوة:شبسرعة
دلهم:محفور رسمج براسي مو بيدي
باوعتلة مبتسمة بخجل خلة العلاليك على الكاونتر
حجة يروح للغرفة:تغديتي
غنوة:توني گعدت
دلهم:لا ريوگ لا غدة عفية
غنوة:جا ما گعدتني من وراك سهرت
دلهم:نجبي
عفتة رحت صليت رجعت اشوفة شجاب اخذ صينية
مر مني گالي اجيب الخبز اخذتة رحت كعدت يمة
دلهم:جبود
غنوة:لا عليك الله
دلهم :علمودج لازم تاكلين
تأففت اكره ريحتهن بس طعمهن احبة فتح العلاگة الثانية جدرية صغيرة مسلفنة بيهة ورق عنب طبخ
بيت مشتري بطريقة
غنوة:هنا الحجي
دلهم:اكلي يابة مدللج اليوم
ضحكت ارفع وحدة منهن اريد اوكلة اخذهة حجة:مايصير من بعدج غناوي
غنوة: مو بيدك نبيل
حجة ينزلهة:يانبيل
غنوة:مو زلمة هذة يگولة بفلم الاميرات نبيل يعني محترم وهيج حباب ولطيف
دلهم:دنجبي وعوفي الصخلات يومية مطلعة كلمة
غنوة: والله محد مصبرني على الگعدة ببيتك غيرهن
دلهم:ايا بذاتة
غنوة:دنطيني اللگمة بردت
دلهم:كلة الاكل برد هاي من حرورة الشمس
غنوة:هسة انتسمم ، اشتغلت انتَ شنو
دلهم:امم حصلت عشرين
غنوة: نعمة الله يرزقك اكثر منهن
عافني اكل تمدد هو متغدي ماكل برة لفات مد ايدة نزيت اباوع وراي حجة مستغرب:شبيج
غنوة:شعدك
دلهم:موبايلي اريدة
غنوة:ها خوش
هز ايدة يباوعلي بطرف عينة عدلت گعدتي رجعت اكل الباقي ضميتة رجعت يمة يسولفلي عن الشغل
مرت أسابيع نفس الهدوء و الروتين رجع دلهم يشتغل هالمرة صلاح يريدة يصير وياهم يكتبون واحد من محلاتهم بأسمة ما يضل عامل حالة حال الغربة
رفض وصلاح يلح كل ما دلهم يريد يطلع روحة يگلة انتة بعدك حاقد و دافنلك ضميمة النة هو كلشي ماعدة من جيتهم علمودي بعد قدر السالفة صار يشتعل بضمير گبل جان يخبث و يخسرهم
حجيت انطيه كوب الجاي :ليش ما توافق احسلك من شغل المطعم ليتعب
دلهم:شمالني غشيم اصدگ بصلاح ،محل سراميك لا هنا و لا هنية يريد يخلي بأسمي
غنوة:يجوز من شافك صرت وياهم يحاول يرجع
همة عدهم خير من الله محل ما يفرق
حجة بسخرية: اخذت المحل صار ملكي واني منا شلون عدي سجل قضايا قصص وروايات عراقية كرار صلاح يخبل اجة صلاح رشرش مخدرات سوة بالمحل غسيل اموال لعبلة لعبة طاحت براسي
غنوة:اي گللهم همة سجلوه بأسمي شعليك
دلهم:بابا المحل نظيف سجلاتة نظيفة من استلمة
يجي يذبلة مصيبة مايگول شغلنة نظيف من اخذة دلهم هو لعب بكيفة
غنوة:ماعرف انتة سوي لشوفة صح
دلهم: والله ساعة سودة تورطت بيهة وياه
ابتسمت منزلة راسي ضليت صافنة على الكوب حجة يرفع وجهي:لا عبالج على سالفة المشية لاحبيبتي گبلهة اني وياه مو انتي السبب لا تفكرين
غنوة:اضوج عليك بس
دلهم:يابة سبع فدوات لليضوج
غنوة: ليش متعجب غير رجلي
وخر الكوب تقرب يفتح الجرار سديتة:دلهم اختنگ من العطر
رد يفتحة:شوية بس اشمة برگبتج
كل مايسوي هيج اخجل اكثر من ما يبوسني رفعت راسي اوخر شعري خلة من عصرة على رگبتي شوية
دنگ حاضني يشمني يحجي:افيش يا شمة الحلوين
بطني مغصتني صارت تدغدغ حضنتة خجلانة بوسني حيل لحد خدي و حواجبي جوة أذني ختمهة ببوسة على جفني
حجة ايدة تمتد لبطني: حبيب روحي
غنوة:همم
دلهم:يتحرك الساقط
ضحكت احس بنغزات مشة ايدة وية حركة الطفل مكزكز عليه كل سوية يبوس بطني اي مكان يحس بي حركة يدنك يبوسة
حجة يغني بهمس:كــل لحظة مرت ما جنت وياك
صدگني نــادم ، بيــك أنا هايم
الاحــلام أنتَ،العيــد لو هل ، دوم أبقى حالــم
بيــك أنا هايم ،بيــك أنا هايم
گلبتهة بواجي عيوني غورگن حضني يضحك يبوس راسي رفعت وجهي المس خدة بلعت ريگي تقربت
خليت شفتي فوك شفتة جسمي رجف حضني بدون
ما يبادلني بوستة على كيف غمضت عيوني بقيت ملامستة و احس بأصابعة تتخلل شعري
بوسني حاضن وجهي رافعني لحضنة و قريب عليه
احس بدگات گلبي بكل جسمي بادلتة احاوط جتفة
ابتعد بقى قريب علية
حجة يتلمس شفتي:غناي
رديت متوترة: بشرفك لا
ضحك يحاوطني بثنين اديه يرتكي على الحايط وراه
المخدة مدتت رجلية يلامسن جليه قريبة عليه حاضنتة مستندة على صدرة
غنوة:ارجع غني هاي الاغنية حلوة
حجة يمسح خدي:اغنيلج احلى منها
غنوة:لااا تغني اغاني مال ذولة لسوالفهم مو زينة
رد يعصر حنجي بين اصابعة:زعــلني يتحارش بية
يتقرب و يغازل بيــة
يضحك لــي و يأشر بيدة ، متطمن أنا روحي تريدة
ضحكت اضم وجهي بصدرة حجيت:مامتحارشة بيك اني
دلهم:و ثيابج ليومية تصير اگصر من گبل
غنوة:اعع هو ثوب نومنة
دلهم:لجج غناوي سحر اسود مو مثلج
غنوة:بعيد الشر انتة خفيف
دلهم:عمي كل ثگل يمج ماريدة شعدي غيرج
غنوة:أحبـــك
دلهم:حبيب الروح غناي
غنوة: ماعندك دلع ادلعك بي
دلهم: والله حبيبتي هذة عليج
غنوة:المنگرش
دلهم:بيج طگة
غنوة: انتة كل حياتي
دلهم: اخ گلبي خدر
طگيتة على رجلة ضليت اتشاقى وياه لليل طلع ورة العشة عازمة صلاح همة بيوتهم مو هنا بس عدهم
محلات و اشغال يجون بين مدة و مدة اول بمناطق
قريبة يعزمة على مطعم لو شقق عدهم هنا يروح
و يرجع اني حاطة ايدي على گلبي
صدك ما خاب احساسي رجع متعارك علمود سالفة
الشراكة يردونة ياخذ محل يلوفونهة عليه من باب
عود انتة ماتثق احنة سامحنة انتة حاقد
اجة مغثوث ضل ساكت خفت حتى أحاجيه گبل نام
و الصبح ماشفتة راح جنت خايفة يرضخلهم ويسون
بي مثل ما گال ولو هو الة حق وياهم
كل املاك ابوه ماخذينهن جان عدهم گيعان
و بيتهم همة من عافو المنطقة ماخذين بس أوراق
كل ذهب و الفلوس اخذوهن بيت عمة و نعمان
علمود يوگفون الدم و لخاطر أمة حاتم انطة كلشي الهم تنازل عن ورث ابوه و ورثهم طلعو بأرواحهم
لو ما صاير هيج جان دلهم ماتعب هذة التعب
فتحت الضوة متنهدة احاجي برفا حجت بضوجة:مابيهة يفتك
غنوة:مدريني لا افتهم منة ولا اكدر اساعدة
رفا:هاي اسرار رجلج كلها عدة صفوان لو ضال عاقد علية جان طكطكتهن گلهن هسة
غنوة:هم حضي
رفا:حضي الحلو و حضج الاكشر
حجيت ببتسامة:هسة رجلي يمكم
ردت اسمع حركة يمهة:اي صار ساعة من اجو هو وصفوان تغدو هنا هسة اسوي بالجاي الهم
غنوة:سوي خفيف دلهم يحبة هيج
رفا:لا عيني صفوان هم يحبة هيج اذا سويتة راح يگول بگلبة علمودي مسويتة مستحيل اطخ راس
غنوة:خرب عقلج سوي خفيف معليج
رفا: والله صار دبس اسود
غنوة:خففي صبي لدلهم اذا مايشرب يضل دايخ
رفا:اي مو هو كبسلة لازم يشربهة
حجيت مستغربة:شني كبسلة؟
رفا:يعني مخدرات شبيج ماتعرفينهن
غنوة:منين اعرفهن
رفا:عجيب اشو رجلج شكلة شكل تاجر ممنوعات
غنوة:خاب شبيج وياه فقير
رفا:دولي خل اودي الجاي
غنوة:خلي الموبايل يمج اسمعلة
ضحكت راح صوتهة ما اسمع الحجي شنو ضليت امسح بالميز واني كاعدة مثبتة الموبايل على رجلي
باوعت مستغربة اسمع من الموبايل صوت شي طاح مثل الكلاصات لتتكسر و راهة صارت هوسة اخذتة احاول افهم شبيهة اسمع بس صوت اخوهة گال ما صار شي و صوت امهة
انتظرتهة ترد توقعت عثرت لو شي لحظات ردت علية :غـ.. غنوة
حجيت مستغربة: ها شبيج شنو هذة الصوت
ردت متوترة:ءء ماكو شي اني نعست راح انام تعبانة من الشغل باي
سدتة بدون ما افهم شكو ضليت مستغربة منهة كل ابالي تصادفت وية صفوان و هل تلخبطت ماكو غيرهة هي من يصير موقف وياه تتهرب
خليت الموبايل على الشحن اباوع من الباب دخلت
نرجس حضنتهة اگرص خدهة صايرة ماتجيني مثل گبل علوان مانعها من الطلعة كبرت على ساس
حجت تجر ايدي:جدة برة تريدج
رديت مستغربة:ياهي
نرجس:جدتي انتظار
طلعت وياهة مستغربة مرت عمي ام جسام يگلولهة جدة مشيت للباب مخلية الشال على راسي فتحتة
سلمت عليهة بعدني مستغربة دخلتهة جوة هي وياهة بت عمي خلف بنتة الصغيرة سَكنة رحت للمطبخ جبتلهن ماي رجعت كعدت يمهة
حجت تزل الكلاص:شلونج عمة
غنوة: الحمدلله زينة
ام جسام:اجيت اعزمج على عرس جسام و هلال عگب باجر جنة بالسوك مريت عليج
توترت من نظراتهة و سكنة هم تخوزر حجيت اعدل صوتي: على الخير و البركة اشوف اذا اگدر اجي
سَكنة:اي تعاي غير ولد عمج
غنوة:ان شاءالله احاول
ام جسام: هلال موتني خطبلة وحدة مناك وياه تدرس صارت كلهة بسرعة بيناتنة و جسام خطبنالة سكنة بت عمة لايگين
دنگت سكنة خجلانة واني صار بية تشنج هلال الجلب طلع يحب طاحظك همزين ماتزوجتة الخايس و هذة جسام فرحتي فرحتين
غنوة:اي وين يلگة احسن من سكنة مبروك حبيبتي منة المال منج العيال الله يسعدكم
سكنة: الله يبارك بيج تعاي مو ما تجين ترة بس انتي عزمتج مخصوص اجيتج
غنوة: اشوف دلهم اذا رضى اجي
ام جسام:يرضى جا بعدة غير ذولة احنة
غنوة: ان شاء الله
حجت تگوم:يالله يمة تأخرنة حتى صلاة بعدني مامصلية شني السوك ماينطب زحمة
غنوة:لان جمعة
سكنة:اي ازدحام واني اجهز للعرس هواي افترينة
غنوة: هي تعبة وحدة بعد
ابتسمت تحجي و تباوعلي بخزر شبيهة هاي گمت وياهن مخلية ايدي على بطني اراويهة اني حامل لا بحال جسام ولا عرسة عسى ما يتزوج سبع مرات
طلعن ضليت افكر شلبس هاي رفا راحت بعد ما رجعت اراسلهة ماترد خابرتهة گوة ردت طبيعي مثل الصبح تحجي عادي
غنوة:عدج فستان حلو طويل كشخة
رفا:اي بس غير حامل مايصيرلج
غنوة:ماكو منا منا
رفا:شسوين بي
غنوة:نعزمت على عرس منين اجيب مادام دلهم يمج دزي وياه
رفا:العرس شنو موضوعة بي حياية
غنوة:هواي
رفا:هسة عجبتني السالفة حفيلي وجهج طگي عناية
حضري عطوراتج و اللبس علية
ضحكت نفتحت نفسها على السوالف لليل يالله رجع دلهم اخذت منة العلاگة مكيفة بيهة ثنين كل وحدة متروسة ترس
حجة ينزع بوتينة:مخليات قنابل اجيت اشمرهن
غنوة:يمة غير اموت
فتحتهة اطلع اول فستان اسود طويل اردان حلو
گصتة حلوة عجبني بس ماگدر البسة يگلولي تفاولين عليهم بعد شيفكني
عفتة طلعت واحد لونة بنفسجي فاتح كلش تور كلة
گصتة مثلثة عريض بي حزام ينشد بالظهر بس گصير
جوة الركبة بشبر
حجة دلهم مستغرب:شعدج
رديت اگدرة علية:عزموني على عرس راح اروح
دلهم:ها بيهة الخير واني ما عزموني
غنوة:مادري غير اعمامي يعزمونك
هز ايدة رد يأشر: محضرة المدام بأمر منو تروحين
تقربت ابوس رگبتة:بأمرك حبيبي
وخر الجكارة گبل لا يشربهة دنك لطولي:بطلي لواتة
عبست من گالي ماترحين ذب الجكارة بالسنك مشة للغرفة رحت وراه كعدت بصفة الح عليه بلكي يوافق لزمت ايدة
غنوة: والله اختنگت وحدي خلي اروح اغير جو
دلهم: عمامج ولا اجرعهم زلم و نسوان يغثونج وتعال شيفكنة
غنوة:حباب عرس ولد عمي عمار ثنينهم هوسة محد يهتملي
رفع حاجبة:منو منهم
غنوة:ها
دلهم:احجي
غنوة:جسام و هلال
رد يهز بيدة:هلووو
غنوة:حباب دلهم لخاطري ماعندي خاطر يمك
دلهم:لا ماترحين
غنوة:تشوفني محضرة
دلهم:محد گالج حضري
عفتة ساكتة رحت لميتهن باوعلي رافع حاجبة مشيت طفيت الاضوية و سديت البيبان غسلت وجهي بضوجة
رحت نمت هواي ضل ساكت اخر شي تقرب يجر ايدي:اريد ماي گومي
كل مرة اتعارك هو يروح گمت ساكتة گبل لا انزل من الجرباية لزمني:نامي صار بيهة صمٌ بكمٌ
درت وجهي حابسة الضحكة گام شرب جاب الدولكة
وياه خلاهة قريب علية تمدد وراي الغرفة خنگة اذا ما انسولف نشوف ياهو ليتحمل أكثر
دلهم:يمتة العرس ، ... احجي وياج ردي مو مغلسة..ادري بيج كاعدة
حجيت بهمس:عگب باجر
دلهم:امشي ولي
غنوة:وين للهول
حجة بنتر:للعرس بس ماتلبسين هذة القصير
غنوة:جا البس اسود يطردوني من الباب
زفر بضوجة ما احجة لف راسة و نام بس اني شينومني ضليت اتگلب و اتخيل شسوي و شنو البس
لحد ما اجة يوم العرس شيبتة من السوالف
خليت مكياج خفيف مو كلش اعرف ماردت اخرب شكلي طلعت برة بالشمس حتى تشوفني رفا فاتحة كامرة وياهة اشرتلي حلو
دخلت دايخة عيوني غوشن من الضوة نزعت الشال
رحت اسوي شعري وراهة لبست الفستان شوية بي عرض ضيگتة بالحزام بالبس طلع اگصر
مشيت للهول اشر لدلهم يسد السحابة رفع عيونة الي حجة:تروحين بهذا
غنوة:بس تگول لااضوج متحمسة لاتخرب فرحتي
اشرلي اگعد گتلة ماكدر گام متململ سد السحابة
التفتت اراويه :حلــوة
دلهم:حلوة مال احطج بالغرفة و اقفل عليج
غنوة: لا دلهم
حضن خصري شابك ادية سوة ورة ظهري ابتسمت
من نظراتة مبين طالعة حلوة حليت اديه عني
رحت جبت التراجي لبسني و الگلادة
لميت شعري عدلت الشال و لبست العباة گتلة يوصلني طلعنة سوة كل شوية يگلي لمي روحج
گبل لا نوصل للباب نطاني فلوس ادفعهن الهم اني ناسية همزين تذكر هو ابتسمتلة اشرلي ادخل يجيني گبل العشة
فتت هوسة و النسوان شگد دخلت لمحت غفران
و بنات عمي و جدتي كاعدة قريب على العرايس
سلمت عليهن باركتلهن كعدت يمهة نزلت العباة
على متوني اطكطك بصابعي خجلت انزعهة
لحد ما شفت اخوات سكنة لابسات فساتين نزعت
العباة اسمع لجدتي تحجي عليهن شنو زنودهن طالعة حكيت خدي باحراج
المهم كاشخة ما جاية بشي مو حلو مر الوقت هوسة العرس و الرگص ياهي لتجي تطش جكليت غرگنة
لازمة جهاز منتظرة دلهم يتصل ماكو صار العشة أذن اني متقيدة اريد ارجع رمشت عليه ما رد
صارت الزفة دخلو العرسان جنت كاعدة بالزاوية
اعدل بالعباة مستغربة من ذني اخوات سكنة كل شوية مرن مني يگللي شعرج طالع لو العباة مو عدلة
وترني عايفات البقية لاطشاتلي ضليت مغلسة عنهن
يمي نرجس تسولف منتظرة تخلص كيكتها و اوديهة على دلهم يجيني
رفعت عيوني حسيت احد يباوعلي جان جسام كاعد
بصف سكنة هي لازمة ايدة من انتبه اباوعلة دنگ
گمت بسرعة لا نوب تطلعلي سالفة عدلت عباتي ارجع وية نرجس طلعت البس بالحذاء و دك دلهم
مشيت برة شفتة واكف يم اعمامي يباركلهم اشرلي
انتظرتة ضل واكف همة مجلبين بي لحد ما طلعو
جسام و هلال باركلهم يباوع لجسام بسخرية
بس لحظات رجع عيونة وراه حسيتة بي شي مو مثل ما جابني استغربت حالة ترخص منهم اجة قريب
على الباب
حتى جسام من حاجاه گالة لا توصل هناك نسوانة برة خاف تلمحهن ما رد عليه كل مرة اي كلمة يسويهة عركة و مرادد
اخذ ايدي يمشيني بسدة نرجس تسولف عليه هو مو يمهة حجيت الزم ايدة:دلهم صاير شي
دلهم:لا عيني
غنوة:شو احسك متوتر مو على بعضك
تنهد يباوعلي فتح الباب دخلت انزع العباة حجيت بقلق:حباب گلي شبيك هم صلاح لو نعمان شسولك ليش هيج متوتر
رد يخربط شعرة:لا مو همة بس اريد اروح لبغداد هسة بدلي اوديج لهلج احسن ماتضلين وحدج
لزمت ايدة خايفة:شصاير
تنهد يلزم ادية و ايد على ظهري يهديني حجة:لا تخافين ماكو شي ماريد تتخربطين
غنوة:گلي شصاير عفية لا توترني هيج
دلهم:صديقــتج مــرت صفوان ماكو من الظهر
يدورون عليهة لحد هسة ما لاگينهة توة خابرني گالي
شكرا لزيارتكم عالم روايات سكيرهوم
