رواية بنات سهر الفصل الواحد والعشرون بقلم فراقد حسن علي
أذا جانت أعظامك رخوة ☠
لا تدك صدرك وتكول أحبج 💗
لان دكت الصدر يرادلها زلم 💪.........
🌷🌷🌷🌷🌷🌷🌷🌷🌷🌷🌷🌷
أساور / مازن دماغه قفل ميقبل ابقى بيت منتصر
يريدني اروح اسكن بيت عمو حاتم
وشكد حجت وياه خالتي فاطمة
وعماته حتى ابقه يم خواتي
بس هو ما قبل
لميت غراضي ومسرة ساعدتني هي ولمى
سلمت على الكل وطلعت وياه
بقيت ابجي اريد ابقى يم خواتي
بيت عمو مو بعيد عن بيت منتصر
هو بالطريق كالي / هاااا لازم مقهوره على فراك حبيب القلب
يمه أحس كلامه سجينه ونومها بنص قلبي
باوعت عليه وفكيت عيني على وسعها
مااعرف اخزره ، مااعرف انصدمت من كلامه
كالي / نزلي عيونج لو افكسهن
رحت امشي سريع قبله ودخلت لبيت عمو حاتم
لكيت عمو كاعد بالصالة ويلعب ويه جهاله
يصفطون مكعبات وهو يعلم بيهم
وبيداء كاعدة على جهه تكوي بملابسه
بسرعة ركضت ورحت على بيداء
هي خطية من شافتني أبجي ومخنوكه
وركضت عليها ، فتحتلي ايدها
ختلت بحظنها ،
كالتلي/ شبيج منو طكج
دخل مازن ورايه شايل جنط هدومي وغراضي
عمو حاتم كام بوجهه
وكاله / شبيك وياها ؟؟
مازن كاله / تورطت على عمري وكتلها
ما تبقين بيت عمي كاظم ،
خواتج وعرسن شنو بعد ظلتج هنا ،
تمشين تسكنين بيت عمج حاتم
وهي راسها والف سيف الا تبقى
وهل جبتها غصبن عليها وهاي حالها
اني بسرعة كلت لعمو حاتم / عمو والله كذاب
هسه كالي لازم مقهوره على فراك حبيب القلب
واني اعرف قصدة على همام
والله العظيم هو سألني و كتله هو اخويه
وهو مصركع من عنده صارله كم يوم
هو صاح عليه/ ااااانجبي لو اكوم اكص السانج
منو الجذاب
عمي حاتم / كاله من هاي الساعه مالك مراة يمي
حسبالي تغيرت وكبرت وعقلت
بس ابو طبع ما يغير طبعه
هو كاله / ابو جواد رجاءاً لا تدخل بيني وبين مرتي
عمو حاتم كاله / وانت هم رجاءً مالك دخل بنتي
ولو تجيب شيخ العشيرة ماانطيها الك
هو مازن اتصركع وطلع زعلان
من بيت عمو حاتم
عمو حاتم كعد يمي وافتهم كل الموضوع من عندي
واني بكل كلمه احلفلة بسم الله اني ماعندي
شي ويه همام ومنتصر وطارق
بس تعودت عليهم وعادي اخدم حاسبتهم أخواني
بيداء كالت / حاتم على روح امك وابوك
فك عقدها من مازن ،
ترى الشك مرض ويمشي بدمه
مريض الشك لا يطيب ولا اله علاج
هو عمو كال / حسبالي بعد تجربة طلاكة
وهجمان حياته ،
اخذ عبرة وتغيير وعقل
اثاري باقي على سوادينه
باوع عليه وكالي/ بويه هذا البيت بيتج
وانا ابوج ، وبيداء امج ، وهذوله صغار اخوانج
تكعدين هنا معززه مكرمة محد يمسج بكلمة
عافني كاعدة يم بيداء
وهو كام بدل وطلع
والله العظيم هي خوش مراة وطيبه
تنصح بالزين ، وابد ما تخرب
وخطية تخاف من عمو حاتم خانكها خنك
ما ينطينها مجال تتنفس ،
وهي لان طيبه وحبابه متحملته ومتحمله سوالفه
سألتها/ ليش مازن هذا تفكيره ؟؟
كالت / من هو وصغير تحشى راسه
-علمود سالفه ساهرة
-
وانوب سالفه ابوج وكتلت اخوه
عساس امج حابتهم اثنينهم
-
وشويه من كبر كاشف جيرانهم مراة متزوجة
تواعدلها زلمة غريب بغياب رجلها
-
ومن صار شاب حبله وحده غريبه
وغدرت بي وتزوجت عافته مات وراها
-
ومن تزوج ،،خواته زرعن الشك بروحة على مرته
لحد ما طلكها
والعباس هي البنيه نظيفه وخوش أدميه
المسكينه يقفل عليها باب غرفتها من يطلع
وهن خواته عرفن شلون يغسلن عقله وطلكها
بس هو كال طلكتها علمود البزره
-
واهم من هذني كلهن
يشوف اشكال والوان السوالف بشغله ،
وهل انزرع الشك بروحه
بس الواحد يحجي حك الله
هو خوش زلمه ابد ماعنده مكسرات
ويخاف الله ، وشهم ، وغيور
وابو بيت ، وصايم ومصلي ،
ومعمر لبيت الله ،
وخادم امه وابوه شالهم بحياتهم من تمرضوا
وشالهم بمماتهم وحسن دفنهم وعزاهم
بس عنده سالفه الشك تجري بروحه
هو دوم يحجيها / يكول ماعندي ثقه بكل مراه
لو جانت امي
اني صفنت ويه روحي يالله بيش تورطت
وبيش وكعت نفسي
اني اعرف بنفسي ما أتحمل الكلمه التجرح
مو عاد اتزوج واحد فكره وروحه مزروعات
بأفكار تذبح
مشى الوكت وعمو حاتم ماكو
وبيداء بقت تفتر بالبيت تكمل شغلها
اني كمت للصلاه ،
وهنا صليت صلاة الاستخارة
جنت هوايه اسمع ماما تعلمها لجارتنا
خاله ام عمر وخطية هي تنساها
من خلصت الركعتين الخاصة بالصلاة وسلمت ،
وقريت دعائها ومو هلكد حافظته بس على نيتي ، طلبت من رب العالمين
هو يتكفل بعاقبة أمري وحياتي المستقبلية
وزواجي من مازن اذا زين يسهل امري
واذا مو زين هو يخلصني من عنده
بيداء كتلكم كلش حبابه ،،من خلصت صلاتي
كالت / حبيبه كومي ساعديني اعدلج الغرفه الفوك
خطيه كنستها ومسحتها وفرشتها ،
وسحبت سرير من اسره الولد ،
وخلتلي كله فراش جديد
وكالتلي/ تعالي ساعديني
وصدك اشوفها مراة سباعيه
بغرفه الغراض أكو كنتور أبو بابين
فرغته من هدوم جهاله الزايده
وسحلناه خليناه بغرفتي
وبدت تساعدني سفطنا هدومي وغراضي بي ،
وراحت جابت طبله خشب جبيره وخلت عليها مفرش كالت /خاف تخلين عليها شي
وخلت للشباك بردات جديده ،
والحلو هي صعدت على الدرج الحديد
وغيرت الضوه شالت الكلوب القديم
وخلت واحد جديد ضوه اقوى ،
اني هنا ضحكت
كتلها /شنو انتي ام البيت لو ابو البيت
كالت / انا متعلمة كلشي اسوي بيدي
ماانتكل على حاتم بشي
هو زلمة خشاش طلاع أله الصافي ،
انا ارتب واعدل كلشي على ايدي
ويمكن بساعتين صارتلي غرفه جديده
بيت عمو حاتم
نزلنا ولكينا الجهال نافيش البيت الجوة نفش
عود جواد جبير بالخامس ابتدائي
يتصرف تصرفات اصغر
من عمر نوره أخته الصغيره،
اني بلشت اعدل هوستهم
وهي أمهم راحت تسويلهم اكل
ومن هذا اليوم بدت حياتي الجديده بيت عمو حاتم
بيداء صارت اختي مو مرت عمي
خطيه شكد علمتني شغلات تخص البيت
وشكد حجتلي على سوالف تخص اهلي الجديدين
وشكد علمتي على شغلات شلون اتعامل بيها
ويه مازن واكسبه اليه
وجهال عمو اني حبيتهم من كلبي
اسبح ، وابدل ، وانوم ، واوكل ، واشرب
مو شغله احس روحي غريبه وكاعدة بيت عمو
ولازم ارد الجميل الهم
لا هنا من صدك ارتاحيت
حتى حجابي ماادري بي وين ياخذوه الجهال
لان من يطلع عمو حاتم ، بيداء تقفل الباب وراه
ما تفتحها الا من يرجع
فما اعرف شنو سبب هذا الارتياح
لان حسيت عمو سندني وكف بوجه مازن
لو لان بيداء حبابه وحسبتني اختها
وهي كلش مكيفه بوجودي
والله العظيم كم مره اسمعها من تخابر
اهلها تسولف عني بخير
وتترحم على روح ماما لان ربتنا زين
مازن قبل لا يلتحق الدوامة بيوم
اجي لبيت عمو يشوفني بس اني ما طلعت عليه
كلمتة توجع بقلبي ، وابد ما أشوفها كلمة صغيره
واني ادري هو وحيدر كاعدين
ويه عمو حاتم بوجود منتصر وهمام
وحتى مهند واحمد وسعيد كاعدين وياهم
كاعدين يم منتصر بشغله مو بيت واحد
لان مايريدون يسمعون نسوان
وعمو حاتم كايله / شوكت ما تعقل عود بذاك
الوكت افكر اذا الك مراة يمي لو لا
بس همام زعلان عليه وكايله/ عيب عليك هيج تفكر
انا حاسبها هي وأخواتها مثل لمى
ومرة ثانيه اذا فكرت بيها هيج تفكير وسخ
انا احاجي عمي جابر وعمي شامل يطلعوها من ذمتك
هو يكلهم /مو بيدي سالفه امها ادك براسي
منتصر خوش مجاوبه كايله/ اي حكك من يدك اسم أمها براسك،، عبن خوش ربت بزرة نظيفه
ودزتهن النا مصبوبات بذهب ووفضة
ورفعت روسنا بيهن ،
نثايه وحدتهن رمانة مو بالسهل تتكشر لو تتفلس ،
وحرامات الله يرزقك انت وطارق منهن
بنات ليل زايدات عليكم
هو كايله / ابو حسين لهنا وحدك
مااسمحلك تقارني بطارق
صح هو أخوي وأبن عمي
بس اخلاقه طايح حظها
حيدر أخوة صايح عليه / وانت هم طايح حظك
هذاك يشرب بس فكره وقلبه ابيض من ثلج
وانت تصوم وتصلي وفكرك وقلبك أسود من عباة أمي
أثنينكم مو خوش أوادم
كم مره حجيت وياك تفكيرك النكس بدله
مرتك القديمه طلعت روحها وحتى حبس حبستها
وهاي الجديده بلشت وياها من هسه وهم راح تعدمها
بابا اصحى مو كل اصابعك سويه
اختها طفله وابن النعال مصجمها
اجت وكالت الماجد عليه
يكول خجلتني با أدبها واحترامها النا
لازم الجلب وخابزة خبز
واختها ثانيه مرت أبو حسين
حتى من تسلم عليه مااسمع صوتها
وشوكت مااروح لبيت عمي الكاهن لابسات العبي
وحجاب كامل تكول يردن يطوفن الكعبة
عمي خلي الله بين عيناك وكول الحمد لله
رضت بيك وانت كتلها وبلسانك مصفر
ومايصير عندك بزره ، احمد الله وشكره
رزقك بخوش قسمة
هو ضايج وكال لحيدر/ هااا ياخوي تعيرني بالبزره
حيدر كايله / لا اعيرك ولا تعيرني
ثنينه نفس الخ..... بس اذكرك خاف نسيت
هي رضت بقسمتها منك
وبت عمي رضت بقسمتها مني
واثنينهن من حقهن يصيرن امهات
عمو حاتم هو مسولف كل هذا الصار لبيداء
وهي خطيه كالتلي
اني هنا صفنت كتلها شنو يعني كلمة بزره ؟؟
قصدج مايصير عدهم جهال
كالت / اي خطيه أثنينهم حاتم يكول مصفرين
دخت وصفنت رجعت سألتها / يعني حيدر ومازن ما يصير عدهم جهال ؟؟
واني ولمى ميصير عدنا جهال ونصير امهات ؟؟
زين ليش محد كالنا ؟؟
هي هزت أيدها وكالت / وشلون محد كالج
مو هو بنفسه حجه بالكعدة وانتي موجوده
وكال العمامه / ليش تضلومها ويايه تعرفون مايصير
عندي بزره
كتلها / والله العظيم بوكتها ما جنت أعرف شنو
معنى كلمة البزره
اني اعرف كلمة الخلفه تخص الجهال
وحتى ولا انتبهت لكل الحجي بهذاك الوكت
يعني ما ركزت بكل الكلام الصار
ولا صارت على بالي اسال احد عن معناة الكلمة
هنا افترت الدنيا بيه ،
كعدت بغرفتي فوك وشكد بجيت
يعني حالي حال كل بنيه هم اريد اتزوج واصير ام
هلكد مابجيت تعبت ،
كمت توضيت ورجعت لغرفتي صليت
حتى كمت اخيط واخربط
مااعرف شنو ادعي وشنو اكول ،
كمت اسولف سوالف عجايز على كولت لمى
ويه رب العالمين وادري بي يسمعني
ويعرف شنو اكو بقلبي وبروحي
نمت بهذاك اليوم بدون عشا
فزيت نص الليل خايفه على مرتبكة على مدهوشه ،
اني من توفت ماما لليوم ما شفتها بحلم
اليوم شفتها هي وبابا ومحمد
وبحظنها طفل صغير مكمط ،
وكاعدين بيتنه وكلشي موجود نفس ما عفته
وكدامهم سله فواكهه
وبيها جميع الفواكه الشتوية والصيفيه ،
ومحمد أثنين ايدي بيهن فاكهه،
عود شلون اني الطبيت عليهم من باب الصاله ،
و بابا ضحك بوجهي
وشمر عليه فاكهه بس ماعرفت شنو نوعها
وهي ماما ابتسمت وكالت لا تنسين
قبضة ايدج وفتحتها ....
فزيت اريد اعرف اني وين
بعده عقلي مو صاحي،
احساسي وعقلي وروحي هناك بيتنا
بس جسمي هنا بيت عمو حاتم
ماادري ليش خفت ، اخذت فراشي
ورحت نمت يم الولد بالغرفة الثانيه
كعدت الصبح وسولفت الحلم البيداء
كالت /والله الحلم كله زين ،
وهم اهلج هناك بدار حقهم مبين مرتاحين
وابوج انطاج فاكهه وهو وامج ضحكو بوجهج
ان شاءالله حياتج الجاية زينه
بس شنو قصدها امج قبضة ايدج وفتحتها ؟؟
كتلها/ اذا يصدق تفسير الحلم هي تريد تذكرتي
لان جانت عدها طريقه مال دعاء لحل المشاكل
مثلآ من تتمشكل هي وبابا
لو وحده من عدنا تتمرض
لو يصير شي هي ما تكدر عليه
تقرأ ((كهيعص /سورة مريم ) بقبضه ايدها
يعني تقره على كل اصبع من أيدها اليمنى
حرف لحد ما تنسد ايدها ،
وترجع تفتحها بقرأ ((حم -عسق / سورة الشورى))
يعني تكول الحرف وتفتح الإصبع
جانت دوم متمسكه بهاي الطريقه
بيداء كالت / خوش طريقة وسهله اسويها
وانا هم الحجي بيناتنه طلعت روحي
وبالبسكوت هذاك اليوم من رحت للسوك
مريت بالحسينية ولكيت السيد موجوده
وحجيتله على ضيم الشرب مال عمج ونسوانه
علمني هم على طريقة وكاعدة اسويها بالبسكوت
كالي تقرين على كلاص ماي
٣ مرات لأيلاف قريش
و٧ مرات سورة الفاتحة
و١١ مره بسم الله الرحمن الرحيم
ويشرب من هذا الكلاص ثلاث مرات باليوم
وعليج تدعليه بالهدايه ، بس لا تدعين عليه
وانا يوميه من هو موجود
اقره الصبح على كلاص الماي
واخليله من عنده بالجاي وبالاكل مابي مضره
بس من يروح للدوام يخرب عليه كلشي
راح اسوي هاي الطريقه مال امج
واستمر بطريقه السيد والله كريم
عدت يومين وكتلها / خاله اريد اروح اشوف خواتي
طك قلبي على شوفتهن ،
كالتلي حاتم مايقبل اطلع واروح لبيت
اي واحد من كرابتنا
الا هو ويايه ،
هسه اخابرلج على الحجية تجي تاخذج
بس كولي الرجلج لا يسويلج سالفه
اني مااحجي وياه
دزيتله رساله/ اريد اروح لبيت خالتي
اشوف خواتي
جاوبني / ماكو طلعه اكعدي بمكانج واسكتي
عاد هي بيداء كالت / عوفي السالفه تولي
وكعدي وسكتي هذا بعد خله همام براسة
من يجي هو ياخذج لخواتج
اني هم بطلت ما رحت
وكمت يوميه اخابر على مسرة وسوار وسلم عليهن
بالقران مالي خلك للمشاكل
-
-
-
سوار/من أجى طارق من دوامه
وكعد يمنا وبقى يسولف ولمى سألته
على بيت عمته وذكرت اسم علياء
اني هنا افتر راسي لان اسم علياء
تكرر عليه اكثر من مره
صفنت هي هاي نفسها ألبنيه اليبجي عليها
بالعرس لو غيرها ....؟؟
ماادري ليش كمت افكر بيها
واكو شعور غريب كام ياكل بروحي
مااعرف شنو هذا الشعور الأجاني فجأه
بقى عقلي يجيب ويودي
انوب زاد التفكير عليه من سولفت العصر
لمسرة بشنو افكر ومااعرف شيصير بيه
كالتلي / هذا نفس شعوري من اشوف منتصر وساهرة سويه،
واني شفت هاي علياء مو فقيره
وشلون تباوع عليج بالحنه وبالعرس
بودها تلزمج وتكتلج
واني تذكرت وكتلها / بوكت العرس من صعدنه
وبعدين صعدتلي خالتي والنسوان
شفتها تبجي ومن صارت عيني بعينها غمتني
كالتلي / هاي تحب طارق وهو يحبها
مو تكولين كام يبجي بالعرس ويكول اسمها
نفس ما نشوف بمسلسل نور ومهند
وهذيج وكحه وصلفه هسه تاخذه منج
وتعوفج انتي وجهالج بدون اب
ويجوز اذا اتزوجها واجتي لهنا تطردج من البيت
ليش مااجتي خالتي ومسرة سألتها
خاله شنو سالفة علياء وطارق
خالتي جاوبتها / من لا بارك الله بيها
بكد القملة وضحكت على طويرق وملخت قلبه
وهو الغشيم طاح على وجهه وعشكها
اني كتلها / خاله يعني هم واحد يحب الثاني
هي خالتي بقت ساكته وتباوع بوجهي
انوب كالت / وانتي ليش تسألين
مو ما تردينه وتخافين منه ؟؟
أستحيت شريد اكلها ، مااعرف شصار بيه
واكو شي ياكل بروحي وبس افكر
من الظهر الهسه ، كتلها / لا بس اسأل
كالتلي / اي واحد يحب الثاني
ويجوز وره جيابتج اروح اخطبها اله
خطيه عاشكها وقلبه متملخ عليها
هي كالت هيج واني احس واحد وشمرني
بنص كوره مال زنابير كل جسمي كبت بي نار
اصفن على روحي شبيه
شنو هذا الشي الغريب الياكل بروحي
شعليه بي واذا راح يتزوجها ؟؟
لليل واحس بطني كامت توجعني
والله مو وجع قوي ،
بس اني لكيتها حجه حتى ابجي احس روحي
مقهوره مااعرف من شنو !!
طارق جان هستوة طالع
ومنتصر وهمام وحيدر يلعبون ورق
كاعدين يمنا بالصالة وحسين كاعد يمهم
ولمى ومسرة كاعدات يكرزن حب شمسي
متابعين فلم اجنبي
وخالتي متمدده على القنفه كبالي
واني هم جنت متمدده على القنفه ومتغطايه
وتبارك راحت تسويلهم جاي
كعدت على حيلي وكتلها / خاله بطني توجعني
وكمت ابجي، ماكو وجع قوي
بس هوايه اختنكت فكره تاخذني وفكرة تجيبني
هي خطية خافت واجتي عليه
وشاورتني/ تحسين اكو دم لو شي ينزل
كتلها / لا
لمى ومسرة هم اجن وكفن يمي
منتصر كال / هاا حجيه خير شبيها البنيه
بس كالتله/ بطنها توجعها
هو بسرعة عاف اللعب وطفر واجى يمي
وبس كالي / بويه شبيج ؟؟
شو اني كمت ابجي بالزايد
كلمة بويه دكت بقلبي
حسيت روحي مشتاقه لاهلي
هو اصركع وكام يحقق ويه لمى ومسرة
خو ما اليوم اني مشتغله لو مسويه شي ،
وخالتي تخبلت تخاف على جهال
حيدر كاللهم / شبيكم يمعودين سودنتوا البنيه
عادي تصير عدها اوجاع رحمها طفولي
وشايله اربعه جهال ،
شتردونها تبقى مثل الفارغه ،
هي ام الطفل الواحد الله يساعدها
مو عاد انوب شايله توأم رباعي
منتصر دك على طارق / كاله هسه تجي
مرتك اتخربطت وبطنها توجعها
بس لا الجهال صار عليهم شي
همام كاله / ابو حسين ليش خابرته
هسه يسودن لا يسويله حادث
جاوبه / ما عليه شي
خلي يجي احسن
بلكت سالفه الجهال تربطه بالبيت
حيدر كال / هسه اجيبلها حب مسكن
واجي
خالتي بقت تقرأ قرآن على بطني
واني كمت ازيد بالبجي
اكو شي مخنوك بصدري بس مااعرف شنو هو
واريد بس أبجي
منتصر كال لمسرة / لبسيها خل اخذها للمستشفى
خالتي كالتله/ اصبر خلي يجي حيدر
همام هالمرة هو الخابر على طارق
كاله / راح ناخذ مرتك للمستشفى فرد نوب تخربطت
انوب كاله / شمدريني تنزف لو لا
اي امي والبنات يمها
يلا ننتظرك
لمى كالت / كومي اخذج للحمام
كمت وياها وخالتي خزتني وشهرتني
تصيح ورانه/ لمى عود شوفيها خو ما تنزف
يارب سترك بس لا ما يحمل ظهرها وتطرح الجهال
رحت العفو للحمام كلشي ماعندي
بس العفو اكو حرقه بالادار موتتني
لمى هي ومسرة واكفاتلي بالباب
من طلعت اغسل على المغسله
شايفين واحد من يسأل سوال مو بمكانه ولا بزمانه
كتلها / لمى هو طارق صدك يريد يتزوج علياء؟؟
كالتلي / وانتي هسه بيا حال وتسألين هيج سؤال
ولج شجابها على بالج
خليها تولي وحده صلفة
عليج بنفسج وبجهالج وبس
رجعت كعدت بالصاله
واجى حيدر انطاني علاج شربته
كال اللمى / سويلها عصير ليمون وبرتقال سويه
-عمه انتي دلكي بطنها هسه ترتاح
الله يساعدها انا من يمي اختنكت
همام ضحك وكال / انا قبل لا اتزوج
اخذلي دوره شرب وكبسله
حتى لا اتعب بسالفه البزره
منتصر صاح بي / اكل خ..... ياحيوان
لو شي بي خير محد يمشي بي
بس لان منكر وطيحان حظ كله تركض عليه
حيدر كاله / ابو حسين على كيفك
تراه شيطان ويقصد على غير سالفه
كاله / تراني فاهمة عدل
وهذا رزق الله اذا مو هو يبعثه للشخص
ما يجي لا بالمنكر ولا بالحبوب
لمى جابتلي كلاص عصير
كعدت وشربته كله وانوب حامض
كتلها اريد بعد
خطيه راحت جابتلي انوب نص دولكه
كعدت اشرب بيها
شويه صرت زينه ، ماكو وجع اختفى
هو اصلا جان شي خفيف
كملت العصير ورجعت اتمددت
وخالتي بقت تمسح على بطني
وتقرة قران
اجي طارق ودخل للصاله مستعجل
شافهم كلهم قريبين عليه
كال / هااا راحوا الجهال مووو ؟؟
خالتي كالتله / كششششش وبرة
من هاي نطقتك ، كول يالله
شويه صارت احسن
اجي وكف قريب يمي كال / شبيج ؟؟
هسه شنو تحسين ؟؟
اخذج للمستشفى؟؟
حيدر كاله / شبيك ملكوف خرعت البنيه
مابيها شي شويه وتصير زينه
هو كاله / بالعباس اخاف عليها وعلى الجهال
متشوفها باقيه بس عظام
جاوبه حيدر / مو الله يساعدها
هي المرأة التحبل بطفل واحد يروح كل حيلها
من الوحام وتكوين الطفل
مو عاد طفلة وعدها حمل رباعي
طارق يخوي عينك على مريتك
رحمها طفولي واتوقع على ياساعه تطرح الجهال
هو كاله / لا لا ان شاء الله يكمل حملها
يمعود كول غيرها ، ولك انا المالي شغله بالدين
من سمعت بيها توأم رباعي
مشيت لسيد خضير نخيته كون يباوعلها
ويحميلي الجهال
همام شكاله / طارق بروح ابويه
جنت ماخذ حتى شالت توأم رباعي
متأكد بس شرب
جاوبه/ قزرقرط ومرض منا البنات
منتصر كاله / يالله اليوم مصحصح
جاوبه/ لا تحسدني ههههههه
لا يابه جنت رايح يم حبايب سراب عواد
اليوم عدهم حفلة صباحي ،
بس بالطريق انت خابرتني ورجعت
شدكول ما دام سوسو شويه صارت أحسن
اخذك انت وحيدر تغيرون شويه المزاج هناك
منتصر كاله/ ما تاكل تبن يخوي وتصلح حالك شويه
شدكول لو انا اخذك لبيت الله
وهناك تنزع هذا الثوب الجايف
وتلبس ثوب نظيف
لمى كالت الحيدر / حيدر والعباس اذبحك
بس تمشي وياه
حيدر بالشقه لزمها من ركبتها
وكاللها / شنو تسبعين بااخوانج وتهددين بيه
شوكت مايعجبني اروح
منتصر كاله / تسبع بنيه وتزامط بعد
بيوم الطخ منها شعره
اطخك بجيله بين عيونك
هي راحت على منتصر وباست جتفه
وتكله/ حبيبي ابو حسين
من عمري على عمرك
طارق كال / استلم الملاقه
لج بابا اعقلي شويه
البكدج متزوجات وعدهن كومه شواذي
حيدر بقى بس يضحك على رد منتصر
وكال الطارق / الله وايدك تعجل بزواجنا
همام كاله / من افكر انا الك مراه يمنا لو لا
بهذاك الوكت احددلك موعد عرس
هو حيدر صاح بي / خاااايب كممم ابو فتونه
يفكر اليه مراه يمه لو لا
اول شي فكر بحالك وبعدين فكر بينا
باوع على خالتي وكاللها/ وانتي عمه بس تضحكين مو
لا تحجين ولا دافعين، ولدج ولوني
وانتي كاعدة تتفرجين
كالتله / الصوج بطبوني هو العزمك
على مستنقع الخ....... الغاط روحه بي
وانت جنك موافق ، وهل اجاك الرد
هو بالشقه دفر طارق وكاله / انت شيطان
لك بابا بالعباس انا خوش ادمي مو مثلك
حتى صلاة كمت اصلي
طارق جر لاستيكة بجامته وكاله / احنا بختك
شيخ حويدر، ما تنطيني علك من الباسك
بلكت اصبح خوش ادمي
حيدر دفعه وكاله/ لك مطي مو راح يخترعن البنات
دوخر شبيك لطشت ،
وبقى مجلبت بالبجامه وراح رجع كعد بمكان لعبهم
هم الولد كلهم رجعوا بمكان لعبهم
وخالتي بقت يمي
مسرة من شافتني صرت زينه
كالت / اني اروح اصعد عندي شغل
خالتي كالتلها / روحي يمه
ولمى راحت للمطبخ تسوي شي للولد
وتبارك كاعدة تشرب جاي وتباوع على التلفزيون
وره شويه خطيه حسين اجي عليه ولزم بطني
كالي / هااا شلون صرتي
بس صدك بطنج صايره حيل قويه ليش ؟؟
الصبح ما جانت هيج
مااحس الا طارق أجى وشاله
كاله / ادبسزز شكو اجيك بيها
انت طبيب وأنا ماادري
كاله / عمي بالقران بطنها مو مثل الصبح من لزمتها
حيدر صاح عليه / وانت شكو تكمش بالبنيه
عيب عليك
كاله / عمي حيدر انا اعرف شغلات اكثر منك
طارق كاله / اذا بعد شفتك كمشتها
اشرك بالسطح
اني شويه عفتهم كاعدين وغفيت
فزيت بطني صاير صخرة ،
اريد أتحرك مااكدر
باوعت ماكو احد بس اني نايمه بالصالة
وحسين نايم على هذيج القنفه
كمت خطوتين العفو اريد اروح للحمام
ماكدرت لزمني الم كلش قوي أبطني من جوة
كمت ابجي وأصيح على حسين
خطيه كعد مخروع كتله / ناديلي خالتي
هو أجى لزمني وكالي/ امشي انا اوصلج يمها
كتله /مااكدر امشي يمكن الجهال ماتوا بطني توجعني
هو صعد الدرج ما راح على خالتي
اني بقيت وأكفة بمكاني وأبجي هالمره صدك متوجعة
اجاني طارق طاير لابس بس شورت
كالي/ هاااا ولج شبيج
ونزلت وراه لمى تركض
لزمتني كالتلي / شبيج ؟؟
كتلها / بطني توجعني راح اموت
اريد اروح العفو للحمام
مشتني شويه ما كدرت
طارق كال / اشيلج
كتله/ لا
اجي لزمني من ايدي الثانيه ومشيت على
كيف وصلت للحمام ،
طلعت ورحت تمددت بغرفة خالتي على سريرها
خطيه خالتي كعدت خايفه
كالت / مااعوفج بسلامه باجر
اخذج للدكتوره
وبقت خطيه تمسح على بطني
اني احس هذا الوجع شويه ويختفي
مو يبقى مستمر ، صرت احسن
لمى رجعت نامت
وحسين اجي تمدد يمي
و طارق صعد لبس بجامه ونزل
بقى يمنا بالغرفة
خالتي كالتله / مدلك فراش ونام هنا
للصبح اني مره الاغفى
ومره اكعد متوجعه واروح العفو للحمام
الصبح خالتي خابرت نهى
علمود تحجزلي يم دكتورتها
تكول عليها خوش دكتوره
دزت رقم الحجز مالتها
وطارق الضحى خابر وحجزلي
خطية حتى منتصر من راح الصبح
على شغله كال الخالتي / عود كلساع طمنيني عنها
للعصر بدلت واخذتني خالتي وطارق وساهرة
على دكتوره نهى ،
بعد ما وصلنا السرة
وبعد التحاليل
سوتلي سونار كالت / عندج تقلصات قويه
بسبب تمدد الرحم عندج
وانوب حولتني على غير دكتوره عدها دوبلر
هم رحنا عليها
أنوب ماكو حجز الا بعد يومين يلا يوصلني السرة ، طارق بغشش السكرتيرة
خلتنا اخير شي ،
وصلنا السرة ودخلنا هي ابد ما تحجي
بس ساكته ، وتسمع الساهره حجتلها كل سالفتي
قرت الرساله الدزتها الها هذيج الدكتورة
كالت / أصعدي اشوف شكو عندج
ساعدتني ساهرة وخطية جابت الطريق كله
بس تقره قران على بطني وشكد حافظة ادعيه
كلساع تقره دعاء شكل على بطني
اجتي الدكتورة يمكن نص ساعة وهي تفر
بالجهاز على بطني، وتحرك بهاي الدكم مال جهاز
كالت / ماما حملج مقبط ثلاث اشهر
ومخلصه ١٨ يوم بالشهر الرابع
عندج ثلاث أجنه واضحين وسالمين كلشي مابيهم
وهذني أثنين بنات بمشيمه وحده
وهذا ولد وحده بمشيمه
ماعندج جنين رابع ،
بالسونار العادي تبين مشيمة الأجنه
كانها جنين رابع مشوهه مثل ما كاتبه الج دكتورتج
لا تخافين ماكو جنين رابع هاي مشيمتهم
بس عندج تقلصات بس تمدد انسجة الرحم
لا تخافين وتفزعين اهلج بعد منها
منا وهيج تستمر عندج لان الأجنة يكبرون
ماما اتعذي زين ترى مو حجمهم ولا وزنهم
الطبيعي ، واذا مااكلتي ياخذون من صحتج
وشربي هوايه مي وعصاير عندج رمل خشن
وادعيلج بالسلامة وتفرحين بيهم
كتبتلنا تقرير الدوبلر ولأزكت
بي صورة مال الجهال
طلعنا خالتي وطارق حجوا سويه/ هااا بشروا
اني أنقهرت وبجيت اريد جاهل الرابع
وهي خالتي هبطت خطيه حسبالها اكو شي
ساهرة كالتلهم/ ماكو شي بالسيارة نحجي
تخاف تسمع السكرتيرة والمنظفه
من صعدنا هي حجتلهم كلشي
وانطت التقرير الطارق
اباوع عليه يعرف يقرأ انكليزي
كال / كلامها مظبوط ويه كتابة التقرير
الحمد لله والشكر من ذو الفقار سالم
وخواته وياه سالمات
باوع عليه وكال / شبيج تبجين
كتله / مو ماكو جاهل الرابع
اني انقهرت عليه
هو ضحك وظل يباوع عليه بالمرايه
بعدين كال / ولا يهمج بس جيبي وكومي بسلامه
واخليج تجيبين الرابع وارهم
خالتي كاعدة بصفة كالتله / شويه استحي
من مرت أخوك
هو اندار على ساهرة كاعدة يمي ليوره كاللها/ بروح
ابوج كلامي بي شي يخجلج
هي كالتله/ داعيتلك من قلب والسان
كون الله يهديك ويسعدك ويحفظك اعزاز قلبك
ويفرحك بشوفة جهالك بخير وسلامة
وهو جاب الطريق كله يضحك ومكيف
ويطك اصبع ويغني ويه الاغنيه المشغلها
بسيارة/ ذكرتك يابعد عيني
ذكرتك وانت ناسيني ،
اجي بالي اسم غالي
وحدهن دمعن عيوني
هو مكيف ويضحك وخالتي تصيح عليه تخاف
يسوي بينه حادث لان يطك اصبع
وساهرة تكله / يمعود نصي الصوت العالم
يعاينون علينا ،
وهو مستمر يغني ويطك واصبع
واني كبت الخبالات براسي
وكمت ابجي بقهر
لان يكول اجي بالي اسم غالي
وحدهن دمعن عيوني،
اتذكر شلون كام يبجي على هاي علياء بيوم العرس
من وصلنا ودخل السياره للبيت
وخالتي تخرب ضحك من تنزل من سياره
تسرسح روحها من الكشن لحد ما توصل للكاع
وساهرة كالت / ابقي هسه اندار انزلج ،
هو كالي / اعرف ليش تبجين وغمزلي وهو يباوعلي بالمرايه
ماكو كم يوم واخذتني ساهرة للمركز الصحي
سولي دفتر رعايه ، وانطوني لقاح
وسولي تحاليل وانطوني مقويات
هذا الكبسول ابو الخرز الملونه
ونطوني موعد جديد مال مراجعة
يعني خلصت الشهر الرابع شويه زينه
من طبيت بالخامس زادت عندي الحركه
كمت احس بالجهال من يتحركون
فد شعور حلو ربي يرزق كل مراة
بهذا الشعور الحلو ،
معدتي استعدلت ماعندي لعبان نفس مثل قبل
وهم اني اشرب العلاج ،
كمت اتغدا مرتين
واتعشى يمكن اربع مرات اكثر
وشكو شي يجي كدامي اكله
بس البتنجان تخبلت منه بس اشوفه استغفر الله
تعلب روحي من عنده واعوف الاكل
ومتت على تمن عدس وزلاطة
والله مسرة تسويلي جدر كله اكله
واحس نفسي جوعانه
يعني لحد ما دخلت الشهر السادس
اني هوايه سمنت شايفين حباية الذره
شلون صغيرة وبعدين تنفش وتصير شامية
اني خلال شهرين من كثر الاكل
وبس نايمه ، وشرب المقويات
والعصاير سمنت
بس شنو هوايه تعذبت
هم بطني توجعني دوم احسها توجعني
وكل ما تتقدم الايام احس اعظام حوضي
تريد تتكسر ، وبطني تتملخ
حتى رجليه كامن يصلن عليه مااكدر امشي
مسرة ولمى هن ينهضني من اريد اكوم
وبالكوة امشي
وهم تعذبت كل مااشوف طارق يخابر ويضحك
انمرد مرد ، وابد ما كلت الواحد على هذا
احساسي الجديد
لحد ما بيوم جنت متمدده اريد انام الظهر ،
وهمزين خالتي كاعدة بالصالة
بس اشغل السبلت الجو حار بدايه صيف
وهي صاحت / مو زين هاي البروده عليج
لو تقلليها لو تطفي
ماصدكت بردت الغرفة ،
وحسين غلقت البردات وصارت الغرفة ظلمة
حتى انام ،
أجتني لمى كعدت يمي وكالت لحسين
/روح يم الحجيه اريد أحجي ويه سوسو
هو كاللها / اعرف راح تحاجيها بموضوع
زواج طارق .....
اني انصدمت كعدت على حيلي
كتلها / منو راح يتزوج
هي طردت حسين وقفلت الباب
ورجعت كعدت يمي كالت / ولج ليش هيج
حرامات طارق يعوفج
ويتزوج عليج هاي علياء النكسه ،
انطي مجال يتقرب منج
سالفتكم صارلها فوك ست أشهر من راحت
والله هو حباب ورايدج
ودوم يكول للحجيه حاجيها انا رايدها
بس هي تخاف عليج وما تحجي وياج
وحتى حاجاني وحجه ويه مسرة
وانا هسه اجيت أحجي وياج
انطي فرصه خلي يصلح غلطة
ليش دومج تشردين منه
وانا عاذرتج واكول حقج تخافين
بس لازم تبدين خطوة جديده وياه
هو حجة ويه منتصر من تجيبن بسلامه
يرحون يخطبون علياء ،
بس انا وامي واكفين بوجهه ما نريدها
لان وحده صلفه وكحه
والسالفه هسه بقت يمج ،
لو تكسبينه الصالحج
لو تكولين مااريده وخلي يروح يتزوج علياء
ومن تجيبين بسلامه يطلكج وعود تزوجي
غير واحد انتي ما تخافين من عنده
عافتني دخت وصفنت ويه روحي
اني صارلي مده مااعرف شبيه
بس أصفن عليه ، واضحك على سوالفه وشقاه
وشكد اكيف من يشتريلي حلويات لو باقي شغلات
وادري بي بليل يروح بطريق مو زين
العفو يسكر ويكولون عليه ابو نسوان
بس مااضوج من هذني الأشياء
بكد مااضوج من يذكرون اسم علياء
بقيت ابجي وما طلعت من الغرفه
وبقيت على هاي حالتي يمكن ثلاث ايام
خالتي عرفت لمى حجت ويايه
وهي ولمى ومسرة وانوب اجت ساهرة
بقن يحجن ويايه وهن يحاجني منا
واني اكوم ابجي منا
بليل خالتي نايمه بالكاع
واني وحسين نايمين على سرير
دك تلفونها ، ردت عليه
هذا طارق صوته يخربط عرفته سكران
كال الخالتي/ الاسبوع الجاي تخطبيلي
انا اريد مراه بغرفتي من انزل مجاز كون تتلكاني
خالتله شكالتله/ يمه طويرق جهالك صلوات زايده
حركتهم ، وصحتهم زينه ،
هو شو بسرعة غير الموضوع
كاللها / سوسو زينه
تاكل زين
اكلج يوم شو بالكوه تمشي
انقهر عليها من اشوف لمى واختها يكومنها
اوديها لدكتور مفاصل من انزل
خالتي شو تباوع عليه وتكله / لا ما يحتاج طبيب
بس انت من تنزل داريها ،
وهي ما تقبل تزوج
تكول انا بعد مااخاف من عنده
وهو ابو جهالي ليش يزوج عليه
وبعد ظلت يمك ،،
واني جذبت لا كلت هذا الحجي ولا ابد
هي خالتي كالت من يمها
هو كام يضحك وكاللها / حجي يفيدها
اتزوج يعني اتزوج
اني من سمعت هذا كلامه متت من القهر
والله العظيم اصفن على نفسي اكول
ليش هيج تغيرت وكمت انقهر من يكولون
راح يتزوج
ثاني يوم همام كعد من الصبح مبدل
يريد يطلع ويه منتصر ،
عدهم شحنة جديدة مال سيارات ،
اجي على خالتي
كاللها / خاف نتأخر لليل يلا نجي لا يظل بالج ،
اني لكفت ريحة عطره تخبل ترست خشمي
صحت وراه /همام اريد هذا العطر المخلي من عنده
كالي / بدون جداوة من الصبح
هذا تعباه بخمس الاف جيبي عشرة وانطيج الشيشه
اجي منتصر هم كال الخالتي نفس حجي همام
من طلع كتله / ابو حسين جيبلي وياك
طرشي مدبس ، وطرشي بس خيار
اشرلي على عيونه وكال / تدللين من اجي بليل
اجيبهن الج
مشى اليوم نفس كل يوم
بس اكل واشرب واباوع تلفزيون
واصلي اني كاعده،
والعصر اكعد شويه بالحديقة نهز بالمرجوحة
اني وحسين ونخلص علاكة الحلويات
الجابها النا منتصر قبل يوم
يعني حياتي بس اكل ونوم وتلفزيون
اجوي الولد بليل ومنتصر خطية جايبلي
دبة طرشي مدبس ، وطرشي ابو الخيار
كلت المسرة / اني هم اتعشى وياهم خليلي اكل
وهم بين ما غسلوا وبدلوا تعشيت وياهم
للمرة الثالثة
كلت الهمام / مو تغلس اريد العطر
هو الخبيث شسوة ،
من صعد جابلي تيشيرت من عنده
وراش عليه العطر ومسفطة وأنطانياه
كالي / هذا عطر دهني
مايروح من القماش القطني
خلي التيشيرت يمج ماالبسه
احسن ماشامره بالكنتور اكسب بيج اجر
خالتي كالتله / امشي نزل شيشه العطر
شبيك جحف
كاللها / وشبيه مسودن انطيها شيشه العطر
هاي بخمس الاف معطتها من قلبي معط
مو زين بخيتلها على التيشيرت وانطيته الها
باوع عليه وكال / اكلج سور الفول العظيم
مو تسويلي سحر على التيشيرت
خالتي كالتله / العباس عليه بس تجيب بسلامه
الا امسح الجهال بي
هو كال / مو نسوان فلك اسود
عدت الايام اقل الاسبوع يعني
نايمه واحس واحد باسني على خدي
كتله / حسين وخر نعسانه وما شبعت نوم
رجع باسني
من دفعته هذا مو حسين
فتحت عيوني هذا طارق بعده بهدومه العسكرية
واكف بصف السرير
كالي / صباح الخير مريتي
كعدت على حيلي كتله / صباح النور
باوعت خالتي ماكو
بس حسين نايم بصفي
هو بقى يباوع عليه وكالي / شلونهم جهال
حركت راسي يعني زين
كالي / بس اسبح وابدل ونتريك
يعجبج نتريك سويه لو تضوجين
كتله / بكيفك
هو طلع من الغرفة،
واني كمت بالكوة مشيت العفو رحت للحمام
طلعت غسلت ومشطت
ورجعت للغرفة لبست حجابي
رحت للمطبخ لكيت خالتي ولمى
سالت على مسرة كالن /بالحمام الفوك تغسل هدوم
كعدت وهي لمى كملت باقي الريوك
اجي طارق صاح / يوووم ميت جوع
هذا المطي البارحه سوالنا شوربه وسلك بيض وبتيته
ابن الزمال ماادري منو كايله نريد
ناخذ أشعة للمصارين
كالتله خالتي/ اكعد اتريك بالعافيه
ومن تخلص عندي حجي وياك
خلت وطلعت من المطبخ
لمى كالت / راح ادزلج حسين عود ريكي وياج
بقيت بس اني وياه نتريك
ردت طرشي من تحركت من الكرسي
كالي / شتردين وين رايحة
كتله / اريد اجيب طرشي من ثلاجة
كالي / ابقي كاعدة انا اجيبه
من رجع مخلي هوايه طرشي بالكاسه
كالي / مو حامض عليج تاكلينه الصبح
كتله / لا مااحس بالحموضه
يوميه منتصر يشتريلي عصير ليمون وجبس حامض
اتريكنا واحنا ساكتين لحد مااجى حسين
وبقى يضحك ويسولف هو وياه
من كمت حسين كالي/ هاااا بعده ظهرج يوجعج
لو صار احسن على العصارة الجابها الج حيدر
هو صدك ظهري صارله كم يوم يوجعني
وحيدر جابلي عصاره يوميه بليل خالتي
ادلك ظهري بيها ، كتله / نفس يوميه
بالنهار زين ، وبليل يكوم يوجعني
رحت كعدت بالصاله
خالتي هي الراحت للمطبخ وطردت حسين
اجي كعد يمي ،كالي بالضحك / الحجيه سربتتني
تريد تحجي ويه طارق عبالها مااعرف شكو
تريد تقنعه ما يتزوج هاي علياء ام رجوله
كتله / عيب تحجي على الناس
لا تتعلم شغلات مو زينه
هي بنيه ومصير نجيب طاريها بشي مو زين
مشى الوكت ومشت الساعات
واجى منتصر وهمام وكعدنا كلنا تغدينا
واني اكلت وجبه قبلهم
ومن رحت تمددت بغرفة خالتي وشغلت السبلت
والغرفه ظلمة ، خالتي مااجتي تمددت
ولا حسين ، اني غفيت على البروده
حسيت واحد متمدد بصفي
من ريحة الجكاير عرفته طارق
فتحت عيني بسرعة وكعدت على حيلي
كالي / لا تخافين بس اجيت اشوف جهالي
كتله / يعني شلون تشوفهم
كالي / بس لا تخافين
وعلى كيفه مد أيدة على بطني وبقى يمسح عليها
اني كشيت كلش أستحيت
وارتبكت ، مااعرف شلون اتصرف
يعني شعور اول مره احس بي
دفعت ايده عن بطني
كالي / ترى حرام عليج تمنعيني عن جهالي
هسه هم يسمعون ويعرفون اني كاعد الأعبهم
وبقى يمسح على بطني
شو صارت عندي حركات زايده
والله العظيم هو حس بيها وشكد كيف
كال / شوفي شلون مكيفين بشوفة ابوهم وبقى يمسح على بطني ويضحك ويدفعها بصبعه وكل ماتصير حركة هو كال / فدوة لله
والعباس حسوا بيه ، كيف وفرح من كل خاطرة
اني مااعرف شلون اتصرف
بقيت هادئة واضحك
على واهس ضحكته وفرحته
-
-
-
ماحسيت غير كال شنوووو هذاا
وشمر تيشيرت همام بوجهي....
شكرا لزيارتكم عالم روايات سكيرهوم
