رواية هشاشة قلب الفصل الثاني والعشرون بقلم العباديه
- هههههه چا ليش گيمر عرب يعني اني عربيه
دز صوتي يضحك بيه بكل صوته گلبي گام ينبض بقوه .. غيّر ترانيم نبضاتي بتنريمة ضحكته الساحره
ظليت اسأل بيه عن حياتهم وتفاصيل بباالي وهوَ يجاوبني. اويلي ربي مااصدگ هيج هواي والله هواي احمدك واشكرك .
وجهي خير عليهم اول ماانخطبت اتصل السيد على تقوى كاللهه زواجهم راح يكون بهالاسبوع وهيَ محضره كلشي بس حجز صالون وبدلات وهالسوالف .
أعلن خبر خطوبتنه بالكليه وكلهه باركت إلنه .. وهوَ مايمشي الا وياي وكلساع صايحني يگلي إكعدي يمي اشتاقيتلج .. مرات مااصدگ نفسيته ابو الرزايل هيج صاير حنين .
ساره گامت تنشال وتنرگع من خبر خطوبتنه والله كبسه رادت تشوه سمعتي بين الكليه وانكسر خشمهه من خطبني وصارت صدگ خطوبه وظلت تتشعوط .
بقت بس الدكتوره ماعرفتها .. الافكار تتزاحم ببالي وتتداخل لدرجة تنهكني تخليني ألهث وتاخذني بعيد من دون إجابه أو نتيجه !
اليوم زواج تقوى والكل مخبوص والاماكن مكتضه بالزُحام .
رحت وي تقوى للصالون يلا افتكيت من الهوسه .. رتبت ولبست فستان .. واني بالصالون اتصل عليه ابو الرزايل يوو ولا متعوده اكول ماهر كلساع وكلت ابو الرزايل لو واحد من ألقابه وتقوى تخزرني لازم اتعود ماهر حاف لااستاذ ولا لقب هاي هيه بعد.
رديت بصوتي إنثوي يملؤه الدلع :-
- الووو
- الوو هلو ثُرىٰ شلونج
- الحمد لله وانتَ
- تمام
وين انتم؟
- احنه بالصالون
- اجي اخذكم؟؟
- لا السيد راح يدزلنه سياره
- زين انتِ شنو شلابسه شمخليه مكياج؟
- لابسه فستان حفلات ومن اطلع البس عليه صايه ومخليه مكياج وي الفستان
- لا كلشي ممخليه ههه لعد اني اجيكم من تكملون اتصلي عليه
- خوش
سديته من عنده ومن خلصنه اتصلت عليه اجه اخذنه .. صعدت بالسياره وهوَ نظراته عليه يباوعلي بالمرايه .. سلمنا وكعدنه اني كعدت وره الصدر ظل فارغ لان امي كعدت يم تقوى حاول وياهه ماقبلت تكعد بالصدر أشرلي براسه عود كعدي گدام .
إنتقلت كعدت يمه باوعلي وضحك .
همست :- شنو؟
- چؤؤ ماكو شي سلامتج
- الله يسلمك
طول الطريق كلساع يلتفت عليه ويذب حسره .. امي تسولف وي تقوى .. هوَ المفروض اهل العريس يدزون سياره تاخذنه بس تأخروا علينه والله جاب ماهر وصلنه.
شويه واتصل بيه زوج تقوى ينتر وضايج :-
- شنو هاي وين صايره تعوفون السياره وتروحوم غير محضرلكم السياره من الظهر ليش هيج تتصرفون بكيفكم
يمه خفت صاير عصبي حقه بس مايدري بماهر يغار عشتو مايريد واحد يشوفني واني ممكيجه
- ماصار شي هي كلهه توصيله
ظل ينتر بيه وانه اسد بالسماعه خاف تسمع تقوى وتضوج .. هوَ ماخابرهه لان صاير عصبي ف لهذا خابرني يدري بيه دوشگ رزايل.
سديته منه ولگيت العاشق الولهان صافن بيه ورافع الحاجب
- منو هذا ؟
- السيد
- شيريد؟
- علمود السياره كال ليش ماانتظرتوني
- غير اني جبتكم
- اي كتله
- شنو مو بعينه
- لا لا بس كال السياره مالتهم جاي بيهه اخوه وبقه واكف بباب الصالون لان ماانطيناه خبر
هز راسه خفت لاتتحول لعركه شيخلصنه بعد.
وصلنه ولاكتنه النسوان كعدت تقوى ومنتظرين الزفه تجي .. ام ماهر وموج جايات اني عزمتهن .. سلمت عليهن ورحت نزعت الصايه وعدلت مكياجي واجيت .
ام ماهر ظلت صافنه اني واكفه وهيَ تدور بيه كلساع تدورني على جهه عبالك تتفحصني
ام ماهر.. بله خل اشوف منا
- ها خالتي شتشوفين
ام ماهر.. هاي الجهه مال زنودج بله خل اشوفهه
التفتتلهه متعجبه وصافنه بيهه
- شوفي
امي واخواتي متعجبات وهيَ تسويلي جلسة فحص .
ام ماهر.. الله يساعده لاابني
- هههه ليش؟
ام ماهر.. مااگول ليش بس الله يساعده
ضحكت ودنگت عود كبرياءهه مايسمحلهه تمدح بيه هههه .
اجت الزفه وهنه ماراحن اجه ماهر واخذهن واحنه رحنه مناك للزفه .
كمل اليوم ورجعنه للبيت صار كئيب صفينه بس آني ومروه.
وحده تباوع بوجه الثانيه جانت تقوى ويانه مونستنه مروه ماتحشش واجتماعيه مثل تقوى .
مروه.. راح ابقه مگابله جهرتچ وتطلعين عليه خبالاتج
- لا والله اني شلون بيه وياج راح تخبصيني بالفلسفه
مروه.. اي لان نصائحي بيهن خير
- احتفظي بنصائحج لنفسج خل اضوج على تقوى خليني بضيمي
مروه.. اي والله كل واحد ضيمه
بالليل خابرني ماهر ع الماسنجر ظلينه نسولف وهوَ يتغزل اني بعدني مستحيه ابقه ساكته احسللي لان ذيج المره مروه مزقتني من كلتلهه شجاوبته .
هوَ يگلي بس صوت انفاسج المتسارعه من تستحين تخليني احس بيج وبخجلج .
نتزوج من اكمل كليه وهوَ هم يكمل نقله ويرجعون لبغداد علمود ابوه باقي وحده وكاللي بعدين اسولفلج ومنتظره يجي البعدين .
اليوم دخلت لحسابي مال الفيس مايشتغل .. كلت يمكن لان النت ضعيف عفته .
ثاني يوم داومت بالكليه شفته وجهه مايگصه الطبر !
يا خاف لان ماجاوبته ! ظليت ألوب اريد احجي وياه بس مااگدر .
وهوَ هم رجع لسالفة التخوزر .. اني اخاف من يخزرني .
اريد يوصل وقت محاضرته ماكو .. گوه الوقت يمشي .. اجه للمحاضره الوجه مايگصه الطبر ومغندب .
طول المحاضره ماباوعلي ويهز برجله متوتر وحركات سريعه حتى قلقني .
گومني واني فهيت بس اصفن بوجهه وببالي ليش عصبي من عندي .
نتر بيه :-
- ثُرررىٰ ليش ممحضره؟؟
- لا لا استاذ محضره
- متشرحين لعد
- أء اءءء اء
ظليت اعلس وهوَ يخزر بيه .. اني حافظه المحاضره كلهه بس من شفته وشلون يخزر طار من بالي كله.
نتر :-
- گعدي
- استاذ حافظه بس اتذكر
هز راسه
- گعدي
گعدت وضجت ماانطاني مجال اتذكر .
خلص وقت محاضرته وطلع بدون حتى مايباوعلي .. ظليت كاعده بمكاني حتى حصرتني البچيه .. شويه ودز عليه .
وكفت اريد اروح ركض .. روحي مفرفحه البارحه مامحاجيته واليوم زعلان !
رحت دخلت للمكتب لگيته واگف مخوصر وصافن ع اللوحه منطيني ظهره .
من حس بيه ماألتفت بقه ظهره عليه .
- احممم .. دزيت عليه؟
إلتفت عليه رافع حاجبه ويخزر بيه من فوك لجوه .. هز راسه بوعيد وعض شفته متحلف
- هـــه حاظرتني !!!
- شنوووو؟؟ اني ؟؟ لا والله ماحاظرتك
- ترجعيها الي أعرف بسوالفج وحافظهن
- وابو فاضل ماحاظرتك
- اشششش لتبررين .. ليش اليوم ممحضره؟؟
- محضره بس انتَ ماانطيتني مجال اتذكر
- مبين
- هسه تريد اشرحلك هنا؟؟ والله محضره
- مااريد
سكتت وبقيت واگفه .. راح گعد ودنگ على المكتب ظل يطلع اوراق ويحط كدامه ويكتب مامهتم لوجودي !
- ماحاظرتك
- امم
- شنو مامصدگ
- لا ليش مصدگ
- چا اني هنا شنو ططوه واگفه صارلي ساعه
رفع راسه كاتم الضحكه .. كال :-
- سچينه وملللحححح
- يييححح يعني اروح؟؟
- هههههههههه لا لتروحين ابقي هنا
- عندي محاضرات
- اذا عندج محاضرات روحي واذا ماعندج ابقي البارحه ممسولف وياج وهسه اريد انفجرر
- عندي شويه وتبلش
- تمام لعد بالليل اخابرج
- ماشي
~~~~~~~~~~~~~~~~~~~~~~~~~~~~
ماهر . . .
فصخت خطوبتي وي جنات وسفرتهه ماطايق وجودهه بالعراق كله فوگ ندمي على ثُرىٰ الراحت من بين إيديه فوگ هاي عليه .
من سمعت بالإيراني خاطبهه تخبلت .. حسيت من صدك راح اخسرهه .. شعور الغيره واحساس إنتهاك شي مهم بحياتي دمرني .
مااكدر اتخيل غيري يحجي وياهه وتباوعله بنظراتهه البريئه .
أصعب شي مر بحياتي من رفضتني ..تخبلت نظراتهه تدل غير شي وجنت واثق مية بالميه توافق بس انصدمت من رفضتني !!
والاتعس من هذا سمعت موافقه ع الايراني !! انجنيت واجهتهه وردهه نرفزني !! تحب ترجعهه إلي مثل ماسويت تسوي وياي !!
دخلت قطر .. تصير اخت صديقي مسافر واني منطيه وعد أي شي يحتاجوه عائلته اكون اول شخص سند إلهم .
رادت تسأل على تقديم الكليه واخذت مني معلومات هواي لان اختهه راغبه قسم العلوم .
انطيتهه المعلومات وفهمتهه شكد تطلع معدل وكتلهه ادبرلج محاضرات .
أيام تمر وتسحل بروحي .. السهر اخذني ونقلهه عذبني لااكدر اشوفهه لااكدر اخذ محاضرات أيست من كلشي .. الحياة صارت بدون طعم .. كل مكان يذكرني بيهه .
بيوم راسلتني جنات تستهزأ بيه وتضحك عليه تكتبلي
- ههههه جنت تتعالى عليه وتتفيك حيل بيك والله تستاهل تالي ترفضك وحده كل ماضيهه يمي وتگوللي خليته فضلات الج !!
تخبلت من كلامهه وردت بس اتأكد صدگ حجت هيج لو لا ؟ وشي اكيد مااصدگ بثُرىٰ عدهه ماضي ومااشك ولو شك بس هاي الادبسز خبلتني بالرسائل كلساع تدز غلط عليهه وعليه تستصغرني .. اخر شي انطيتهه حظر وبردت راسي .
رحت وعيطت وتندمت لان تقدمتلهه هانتني مرتين .
مرت فتره واني ماناسيهه ابد كل يوم تمر سوالفهه ع بالي وكل يوم اتذكر مواقفهه مااعرف ليش تعلقت بيهه من دون طالباتي واقاربي !
ظليت اوصل قطر بطريقي يوميه للمستشفى لان بعيد عليهه واني تكفلت بيهه .
رحت قدمت لااختهه بكليتهه وتفاجئت بنظرات دكتور مهدي !! هذا مطوخ الميانه كلش.
غيرتي ماحملتني رأساً اتفقت وياهه وبأتصال واحد نقلتهه رجعتهه مقابيل عيوني.
إسماعيل دائماً يحترمني وعلاقتي زينه وياه . بعد ماتحملت خابرته وسألته بعد السلام :-
- اكلك اسماعيل فد طلب حبيبي الغالي بس اريد اروح لإيران مايكدر نسيبك يستقبلني لان مااندل أي شي
صوته تفاجئ
اسماعيل.. نسيبي؟؟
- اي نسيبك !
اسماعيل.. هوَ نسيبنه بس وليد بعد منين نسيبي بإيران !!؟
صفن شويه وكال
- ها ها تذكرت اركان .. لا والله رفضناه البنيه ماوافقت بعيد علينه
- ها تسلم حبيبي ماقصرت
- تدلل دكتور
سديته منه واني أحس بلذة الإنتصار .. ارتاحييييييت.
موقف ساره كان من صالحي .. حسيت بفرح داخلي حتى لاتتشوه سمعتنه اني وياهه وتطلع اشاعات تقدمت .. ووافقت .
صارت مرتي وأحس مرتاح هذا هو . مااريد أي شي بعد. رغم رفض الوالده بس اهم شي اني مرتاح .
~~~~~~~~~~~~~~~~~~~~~~~~~~~~~
ثُرىٰ . . .
رجعت للبيت وركض للفيس اريد اشوف منو حاظر الروح والريه .
طلعلي انتهت صلاحية الجلسه وانغلق الحساب .. ركض خابرت نهى كالت نشط حسابج !!
صخام بويهي من البارحه مافاتحته يانشط هذا !
- ولج نهى صار يوم ونص مافاتحته لاتخبليني
نهى..والله العظيم نشط
- اخترقوني صخام بويهي صخااام
نهى.. بسرعه دزيلي الايميل والرمز هسه استرجعه بس كون مابيه صور شي
- لا مابيه بس مراسلات
نهى.. ديلا بسرعه
دزيتلهه الايميل ورمزه وطلع صدك مخترقيه .. مرت ساعه يلا كدرت تسترجعه من خلال الايميل .
غيرت الرمز ودزتلياه .. رحت فتحته وركض لقائمة المحظورين .. لكيت ماهر اول واحد !!
هاي منو يتجرأ يسوي هيج؟؟ اكيد شخص يريد يخرب بيناتنه !
رحت رأسا. راسلته :-
- هلاو حسابي مخترقيه وحاظريك مو اني
جاوب مباشرةً
- شنووو منو يتجرأ يسويهه
- مااعرف بس هسه نهى استرجعته إلي
- يراد تسويله حمايه
- مااعرف
- اني اسويلج بعدين
- بكيفك
- البارحه الليل كله مانمت من الحرگه
- هههه عمت عيني
- اسم الله على عيونج اكو غيرهن دوخني.. جمالهن عربي يشبهن أرض الحجاز بخصوبتهه وعوده المياس .. توگفين كدامي بأسلحتج الانثويه الشرعيه تعذبيني واني متجرد من اسلحة التصنع
وألاعيب الحب ..طفولتج عذريه مايلامسهه بشر وجمالج مميز تبعثرت بضحكاتج ووكعت ببئر العشق والغرام . وكعتيني يثُرىٰ گلبي وياج ينبض بقوه ويتأرجح بنظرات عيونج
ظليت ساكته هذا الحچي كله شأرد بس خدودي صارن نااررر يحجي همس وصوته بيه بحه .. دايخ واني دايخه وياه
- الووو وياي؟
- احمم اي وياك
- ههه اااخخ من الخجل .. يلا نعديها كلهه كم شهر نتحمل وأمرنا لله .. باجر حضري نفسج نعقد محكمه ومعزومه يمنه
- خوش
- نعستي يابعد كلهم
- ههههه اي
- روحي نامي حتى باجر تكعدين من وكت
- باي تصبح على خير
- وانتي الخير كله ياروح ماهر
سديته منه وانمطلت ع السرير يبوو ولا اصدك .. اتلمس خدودي صايرات ناار وأنفاسي تتخلخل وتتسارع .
غطيت راسي واضحك .. ونمت
كعدت الصبح بدلت واسماعيل وياي منطيه خبر .. كملت وطلعنه.
صبح عليه ويضحك بوجهي واني خجلانه من غزل البارحه.
وصلنه للمحكمه وهوَ متكفل بكلشي والمحكمه كلهه تحترمه وكلساع واحد مسلم عليه.
كملنه الاجراءات وانطونه موعد نرجع مره ثانيه مااعرف على شنو.
اتصل على امي وكاللهه معزومين بس اسماعيل ماقبل كالله خليهه تاخذ عليكم خاف مقابيلنه تستحي .
هوَ ماقبل بس اسماعيل وماادراك مااسماعيل ماوافق وحتى امي اصلاً ماانطته كلمه مضبوطه.
وصل اسماعيل واشرلي اكعد يمه.. كعدت يمه وظل لازم إيدي ويباوعلي فرحان
وصلنه للبيت ظل امه تلكتنه طابخه ومحضره كلشي .. والبيت يلمع ومبدلين وكلشي جاهز
ام ماهر.. لعد ليش اهلج مااجو؟
- مااعرف بس كالو اخذي عليهم
ام ماهر.. اوو هذا الطبخ منو ياكله لعد
سكتت.
ماهر.. ههه شسالفه يوم لعد احنه شبينه احنه ناكله
ام ماهر.. بالعافيه بعد عمري
حضرت الغدا وتغدينه هوَ يجيب ويحط يمي واني حلگي اصلاً انعوج من المستحه .. كلساع وهمس :-
- ليش متاكلين؟؟ ميعجبج الاكل
- لا لا كلش طيب بس شبعانه
- اكلي معليج بينه لتستحين
ام ماهر.. الياكل في ضرسه ينفع نفسه
ماهر.. هههههههههه
احسه ضحك يلطف الجو لان هيَ قصفتني دنكت واضحك .
كملنه اكل وردت اكوم اساعد موج بنقل المواعين .. كالتلي :
ام ماهر.. شكد قديمه عيني احنه منگيس كُله خدامات لتتعبين نفسج اكُعدي
- لا ميخالف
ام ماهر.. انتِ خطار كُعدي حبيبتي
كعدت لان انحرجت .. اشرلي إكعد يمه ع التخم .. كعدت يمه ودل يسولف وياي عن اصدقائه ومواقف تضحك .
اخر شي همس :
- تصعدين تشوفين الغرفه؟
- شوكت اشتريتها
- من زماان اشتريتهه ونصبتهه بس هاي مؤقت لما ننتقل لبغداد اغيرها ماتشوفين مااخذت ذوقج لان ذيج عليج وهاي عليه
- يعني نتزوج هنا لو ببغداد
- نشوف حسب الاوضاع
- جا ليش اشتريتهه
- غير افرحج بيهه
سكتت. رجع همس
- ها تروحين؟ اذا تريدين تنامين لو ترتاحين خاف تقيدتي من الگعده
- لا لا مرتاحه هنا هسه تجي موج نسولف سويه
- هاا براحتج
سكتت ميته من المستحه .. شلون بيه يربي
ظلينه كاعدين ونسولف ام ماهر ولا عرفتهه كله حبيبتي وحياتي اي بلكي تتغير وين الله بس لو تبطل تكبر هسه اني جاي احاول اكسبها بصالحي هم كله عيوني وخالتي وكذا .
جابت كنافه وبقلاوه وقدمت .. كالت :-
- تره ماهر متعود هاي الفقره بعد الغددا احفظيها أُمي
- اي ان شاء الله اتعلم على اليحبهن شويه شويه
بعده توه اكل وسمعنه.. الباب الرئيسي انرگع وصوت عياط !!!
