رواية سراج السادة الفصل الثاني والعشرون بقلم غسق ادريس
"ملاك"
ريحه الطين الي جاي من التربه عشق مايتكرر
جنت خاله راسي ب محجر الترب الي طاح عليه كلاص الماي وتبللت الترب ماي
جبرتني ريحه الطين اخلي راسي ب الترب واستنشق اكثر مظ من مره
طلعت راسي من المحجر عيوني على شاهيناز
_ملاك:: شبيج
باوعتلي واتافأفت بملل
_شاهيناز:: الكتاب الطلبه السيد ماموجود
_ملاك:: كتاب نفسي هوا
باوعتلي ب استغراب عاكده حواجبها
_شاهيناز:: نفسج شنو
كمت من مكاني ومشيت ب اتجاها
_ملاك:: ولج نفسي كتاب عن علم النفس
رفعت حواجبها وفتحت عيونها مستوعبه كلامي
وكفت يمها عيوني على الكتب
مكتبه السيد عبد الرؤف ماكو مثلها مليئه ب الكتب جدي السيد عبد المقتدر عنده نفس هاي المكتبه والسيد معز كذالك بس السيد عبد الرؤف عدد كتبه اكثر
والكتب منوعات
نفتح باب المصلا التفتنا اني وشاهيناز نشوف الي دخل
دخل وحجه ب استغراب
_فقار:: ها الكتاب وين؟
_شاهيناز:: ما اعرف ماجاي الكاه
تمشه فقار ب اتجاه الرفوف يقره ب اسماء الكتب
وشاهيناز تدور ويا ب الجهه الثانيه واني واكفه بمكاني صافنه على الكتب
اجه فقار وكف كدام الرفوف الواكفه كدامهن
باوعتله مغطي الكدامي
_شاهيناز:: هذا؟
التفتنا اني وفقار على شاهيناز شفنه بيدها كتاب تقدم فقار ب اتجاه شاهيناز يقره اسم الكتاب
هز راسه وحجه
_فقار:: اي هذا
حجاها واخذ الكتاب طالع من المصلا باوعتلي شاهيناز وحجت
_شاهيناز:: نطلع!
_ملاك:: اي
حجيتها ومشيت اطلع من المصلا استوقفتني شاهيناز من كالت
_شاهيناز:: شبيج احسج ضايجه
باوعتلها وهزيت راسي بلا
_ملاك::مابيه شي
هزت راسها ب اي واجت تمشي حتى تطلع من المصلا
فتحت باب المصلا وطلعت اني وشاهيناز وراي
جان الكل ملتم ب الصاله الساده والعلويات الكبار وعمتي جهاد كاعده على القنفه بيدها التلفون
تمشيت ب اتجاه المطبخ البنات موجودات هناك يجهزن للتوزيعات وشاهيناز وراي تمشي
دخلنه للمطبخ شفنا البنات كاعدات ب الارض وكدامهن التوزيعات حلويات وعصاير شفت المطبخ هوسه ماكو مكان والتوزيعات ماخذه مجال جبير
تمشيت كدام الطباخ
كعدت صافنه على البنات ماعرف شبيه احس بخنكه فضيعه بداخلي رغم مابيه شي ومحد حجه وياي
جانت شاهيناز واكفه قريب عليه تباوع للبنات
اجت فاطمه اخت عاتكه تريد تكشر البرتقاله شفت عاتكه ملتهيه ب التوزيعات وشفت نفسي كاعده ماعندي شي كمت من مكاني اكشر البرتقاله الفاطمه
توني اخذ البرتقاله من ايدها وانشمرت ب اتجاه الطباخ ماجنت حاسه ولامنتبهه على القوري الي جان يغلي فاير دنكت اخذ البرتقاله بدون قصد وماجنت منتبهه من حركت الطباخ
صرخت عاتكه منبهتني بنفس الحظه جرتني شاهيناز من ربطتي ساحبتني الها
طاح القوري على رجلي ماخذها بفورانه وحرورته
صرخت من كلبي متوجعه حسيت النار اخذت رجلي
رغم جنت لابسه جواريب بس حروره النار صكت بجسمي
فزعن البنات الي مرعوبات والكبار كلهم دخلو للمطبخ بعد ماسمعو صريخي واذيتي
باوعتلي امي ودكت على وجهي تصرخ وابوي والسيد عبد الرؤف وعبد المقتدر ركضو ب اتجاهي
_ملاك:: راح اموتتتتتت يمهههه
شالني اخوي ميزان والكل ابتعد ركضو بيه للخارج البيت واني صاكه على اسنوني متوجعه الحروره ماكلتني اكل والوجع محتلني
ركض فقار كدام ميزان وفتح سيارته يصيح
_فقار:: ميزاننن تعاللل هنااا
ركض بيه ميزان اخوي واني اعض بملابسه واصرخ
_ملاك:: ميزاننن راح اموتتتت الله يخليك رجلي جاي تحركني
باوعلي ميزان بحزن مابيه شي خلوني ب السياره والسيد عبد الرؤف ويانا طلعت عمتي جهاد فتحت باب السياره وكعدت بصفي راسي بحضنها ورجلي بحضن ميزان
طلع فقار ب السيارة والسيد كدام يهدي بيه
_عبد الرؤف:: الله يساعدج بويه الله يساعدج
مسحت عمتي على رجلي من فوك تقره ايات قرأنيه واني اصرخ وابجي بوجع
_ملاك:: راح اموت عمة رجلي جاي تاذيني
_جهاد:: ياروح عمتج سودة عليه هسه نوصل المستشفى بنيتي اتحملي
رفعت راسي اتنفس بصعوبه وابجي مادري منين اجتني هاي الطيحه لابيها ولاعليها ولو ما تصرف شاهيناز جان القوري طاح على جسمي بس سحبتها منعت هذا الشي ورغم هذا طاح على كاحل رجلي
وكفت السيارة كدام المستشفى نزلو السيد وفقار وميزان وياها بس نزل سحبني اله وشالني يركض بيه للداخل واني كاتمه صريخي ماريد واحد يسمع اذيتي
ماجنت حاسه ب الي يصير حولي جنت مغمضه عيوني. ادعي الله يخفف عني الوجع او يشيله روحي جانت تنسلب على البطيء
جنت متوقعه المستشفى راح يخففون الوجع عني بس لااا هما زادو الوجع عليه صرخاتي وهما ينزعوني الجوراب وشهكه عمتي وميزان واستغفار السيد وصدمته بمنضر الحم وهوا وملتسق ب الجواريب جان كافل يشرح الي جنت احس بي وقتها!!
اشتغلو على رجلي واني دموعي وصريخي الي يطلع لاارادي بكل مره يلمسون رجلي العلويه جهاد وميزان اخواي لازميني بقوه واني اشهك متوجعه
ب الاخير طحت على الجربايه مابيه حيل الوجع سلبني حريه التعبير عن الي احس بي ماكدر ابجي ماكدر اصرخ ماكدر اتحرك
الحرك نهش رجلي نهش واني طايحه على الجربايه بس دموعي تنزل بهدوء
ابتعد الكل عني واني بمكاني جثه ماكدر اتحرك من الاذيه الي احس بيها
باوعتلي عمتي جهاد عيونها مدمعه
_ملاك:: عمه راح اموت
_جهاد:: اسم الله عليج عمه
رفعت راسي اون من الوجع وعمتي تمسح على راسي
بهذا اليوم ماجنت واعيه من الوجع
رجعوني للبيت عيوني كوا مفتحهن اعصر بملابسي عصر استحي اصرخ وابجي استحي اكول جاي اتاذى الكل جان محاوطني يتحمدون الي والبنات حولي عيونهن مدمعات
اخذوني لغرفه عمتي جهاد ارتاح
بس اني ماكدرت ارتاح الحراره جانت مستمره والوجع مستمر
طلعو الكل من الغرفه بعد ماتحمدولي على السلامه وب امر من السيد حتى ارتاح واخذ راحتي واكدر ارفع رجلي بقن البنات وعمتي جهاد
باوعتلي شاهيناز وحجت بحزن
_شاهيناز:: الله يساعدج دست على النومي الطاح ب الارض متت وجع شحالج
باوعتلها وضحكت بوجع
_ملاك:: شاهيناز جان تشوهت لو ماجريتيني
_جهاد:: ربج رحم بيج وشاهيناز بطله ماعافتج
هزيت راسي ب اي وسكتت مغمضه عيوني بوجع
فتحت عيوني وباوعت لعمتي
_ملاك:: عمه ماجاي اتحمل
باوعتلي عمتي جهاد واتحسرت صافنه
دارت على عاتكه وحجت
_جهاد:: كارتون الكيك الجبناه شمرتو!
_عاتكه:: لابعده موجود
_جهاد:: جيبي وتعاي.
طلعت عاتكه من الغرفه والعلويه تباوع لرجلي صافنه
رجعت عاتكه ب الكارتون الكيك الي جابو للتوزيعات
اخذته عمتي جهاد وكصصت قطع صغار منه
انطت لكل البنات قطعه واخذت قطعه ب ايديها
اجت ب اتجاهي ووكعدت جوا رجلي باوعتلي وحجت
_جهاد:: غمضي
باوعتلها عرفت الي تريد تسوي
غمضت بسرعه وهيه بدت تفتح بلفاف رجلي
غمضت عيوني متوجعه بس ساكته مانطيت رد فعل
فتحت عيوني شفت عمتي شايله الفاف عن رجلي والبنات يباوعن لرجلي بصدمه لمنضرها
_جهاد:: تعالن هفن على رجلها بس دربالجن لاطخن رجلها
وفعلا البنات كلهن التمن جواي يهفن على رجلي واني راسي على المخده رغم بروده الغرفه بس الحراره جانت تصك برجلي
والبنات يهفن من بعيد مايردن يطخن رجلي غمضت عيوني مرتاحه نوعاً ما حسيت ببروده خفيفه محاوطه رجلي
فتحت عيوني شفت عمتي تباوعلي ب ابتسامه مريحه
_جهاد:: احسن مو!
هزيت راسي ب اي وحجيت
_ملاك:: مساع جانت تحركني هسه لا اكو بروده حلوه برجلي
_جهاد:: غمضي عيونج ونامي بلكت من تكعدين الوجع خاف
غمضت عيوني ورحت ماخذتني النومه مسلمه رجلي ب ايد عمتي والبنات مرتاحه بنومتي الوجع يقل
ما كعدت غير على صوت عمتي جهاد تصيح ب اسمي
_جهاد:: ملوكه ماما كومي اكلي
فتحت عيوني اباوع عمتي وامي واكفات فوك راسي
باوعت لرجلي مرجعين الفاف عليها حسيت الوجع خف احسن من بدايته جان ماذيني هسه لا احسن بس من احركها يوجعني
ساعدتني امي وعمتي ارجع ضهري للجربايه واعدل كعدتي
_ملاك:: ماشتهي اني
_جهاد: لا تشتهين وتاكلين وانتِ الممنونه
سكتت مسلمه امري لعمتي مابيه احجي وارفض تعبانه والوجع بده يرجع شوي شوي
خلت امي الصينه على الجربايه وكعدت بصفي تبوسني وتكلني وعمتي واكفه تباوعلنه
اندك باب الغرفه صاحت عمتي من مكانها
_جهاد:: منو؟
_فقار:: انا عمة فقار
مشت ب اتجاه الباب واني عيوني تعلكت على الباب
فتحت الباب وصارت كدامه
شفت فقار واكف مدنك من طلعت عمتي مد علاكه ب اتجاها وحجه وهوا بعده منزل راسه
_فقار:: هذا علاج العلويه
_جهاد:: عاشت ايدك
ابتعد فقار عن الباب وعمتي دخلت بس دارت اني كسرت عيوني اباوع للاكل خوش اكل مداريني هواي بي
" قس "
بعد كل الاحداث الي صارت من هجمان البيت والعرايك ومناوشات غير معروفه منو صاحبها
بيتنا جان داخل بتوتر
محد يعرف الي جان السبب فجأة تصير عركه بين ثنين
سمعت انواع الغلط والسب والكتل والتعذيب يعني جنت داخله بجو حماسي بس تردون الصدك وبيني وبينكم ومامحلفيني جنت اقهر من اشوف الجو هيج
ماعرف ليش نضرات عمي محمد لنضال وهوا يحاول يفهممها زينب مو مهمه ب النسبه اله وهيه اهم زين يبقى السؤال
"ليش ادور على مرتك اذا هيه مامقصره وياك؟ "
هذا السؤال جان يدخل عمي بمتاهه جبيره يخلي يصفن ساعه كامله يحاول ينطي جواب منطقي بس لاااا ماكو منطقيه يبقى السؤال واضح انت زلمه متزوج ليش تحجي ويا غير زوجتك؟
نضال جانت مقهوره من عمي وشايله علي بكلبها رغم شكد حاول يصالحها جانت ترضه ب البدايه وتلين بس فجأة بدون معرفة السبب تغير رأيها وتنكلب 180 درجه
صعدت الدرج ودفعت باب الغرفه بدون ماحسس ابتهال اني دخلت للغرفه بس شافتني دخلت شمرت التلفون من ايدها مخروعه صاحت بيه وعيونها ب التلفون
_ابتهال:: شبيج قس شبيج ماتعرفين ادكين الباب
_قس:: من يمتى اندك الباب احنا شنو صارت عدنا خصوصيه واني مادري
ما اهتمت الكلامي وكملت عيونها بتلفونها تكتب وتمسح شمرت روحي ب الفراش وحجيت تلفوني بيدي
_قس:: مايفيدج هذا لاتعبين روحج ويا
_ابتهال:: شنو؟
باوعتلي ورجعت تباوع لتلفونها
_قس:: اسامه مو خوش اسامه
رفعت راسها تباوعلي مصدومه عيونها وحلكها مفتوحات شمرت التلفون من ايدها واجتني تسحف على رجليها اخذت ايدي تباوعلي جسمها يرجف
_نهال:: منو هذا اسامه
باوعتلها وغمزت
_قس:: صاحبج
عافت ايدي وبلعت ريكها بخوف
_ابتهال:: لا جذبين ماعرف واحد اسمه اسامه. وتعاي ترا اكل لابوي عليج كولي منو هذا اسامه
هزيت ايدي وباوعتلها صفح
_قس:: وشنو مخوفتني ب ابوج روحي خل يفك روحه من نضال ويشوف حل الها انوب يجيلي وتعاي لاتصيرين لوتيه ترا اني الوت منج كلش زين تعرفين اسامه مو صالج تحجين ويا ثلاث اشهر لو غلطانه
عضت على شفايفها بخوف تباوعلي تريد تبجي
_ابتهال:: يحبني يريد يخطبني
_قس:: يريد؟ شكد قديمه اني الجمعه هاي راح يجيب امه ويجي يخطبني
_ابتهال:: منو؟
_قس:: اسامه
كمزت من مكانها مصدومه تباوعلي بغضب
_ابتهال:: قسسس تحجين ويا اسامه؟؟
_قس:: اي صالي سبوعين
هجمت علي تريد تكتلني واني مادلتها رجلي ماريد اطكها ادري بيها مقهوره
_قس:: ترا علمودج ردت اشوفه كفو لو لا طلع واحد خايس وابو بنات يتنفس بنات قبل جم يوم صورلي الدجاجه مالتهم يكلي عيونها حلوات
لطمت ابتهال على وجهه تبجي بقهر ابتعدت عني واني كمت من مكاني فتحت تلفوني وشمرته بوجها
_قس:: اقري شوفي ولج صوتي ماسمعه على كد الكتابه بس مو نفسج ادزيله صورج امداج انوب شلون خلقه هيه
اخذت التلفون مني تقره ب الرسائل وتمسح بدموعها باوعتلي وبجت
_ابتهال:: عبالي خوش رجال
_قس:: لاتكولين رجال هاي الكلمه جبيره على هيج ناس كولي زبالة
مسحت دموعها تباوعلي
_ابتهال:: خل اغلط علي
_قس:: اايييي عفيههههه اي اتصلي علي من حسابي هيهيييي
باوعت لتلفون وداست اتصال ثواني بس ثواني واجانه صوت اسامه متهلف خطيه اول مره يسمع صوتي
_اسامه:: هلا بروحي هلا بعيني هلا بوفائتي
باوعتلي ابتهال مستغربه غمزتلها واشرت على روحي
جرت ابتهال نفس وحجت
_ابتهال:: لككك اسامه الجلب ابو البنات الخروف
سكت اسامه ثواني ورجع حجه مستغرب
_اسامه:: ابتهال هاي انتِ؟
_قس:: اي اسامه الخنفسانه جنك اركب عمي محمد الاسيود الوصخ ابو البنات مامكتفي ب ابتهال ادور وراها نسوان
باوعت ل ابتهال واشرتلها
_قس:: امه اسمها افراح كليله افراح لو احزان خل نقهره بعرضه
صاحت ابتهال ب اسامه تغلط عليه وتعاتبه عاد اني يم الاعتاب اضوج ماحب الاعتاب لان اكو بشر مايستاهلون الاعتاب وهاي النماذج ب الضبط امثال عمي محمد واسامه الخنفسانه
بقت ابتهال تحجي ويا اسامه وتغلط علي واني فوك راسها اشمرلها كلمات
_قس:: كليليه وين اكو ولد عيونه خضر ووجه جنه كوع جلب
جنت متونسه واني اشوفه مقهور ابتهال طايحه بي رزايل بس مرات تخذلها مشاعرها وتنقهر
_ابتهال:: ليش اسامه مو حبيتك ووثقت بيك ليش هيج تسوي اني اشرد من مشاكل اهلي الك عبالي تحتويني وتخفف عني وتشاركني تالي تخوني هيج؟
حجتها وبجت مقهوره حقها ترا ثلاث اشهر مو قليله ويا شخص مايستاهل هاي المشاعر
اخذت التلفون منها وحجيت ناهيه الاتصال
_قس:: باوع لك كل الصور التخص ابتهال تمسحها ولاجنك تعرفها ولا ماره بيك ولاتفكر سوالف التهديدات وغيرها صورك كلهن عندي ومعلوماتك كذالك حركه وحده من عندك اويدك ورا الشمس وهااا اسويها عشائرين وقانونين يلا اشطح
سديت الاتصال بدون ما اسمع رد فعله باوعت لابتهال وحجيت باسف
_قس:: صدك تحجين ابتهال فوك ما العلاقه محرمه خلقته ماينطلع بيها
مسحت دموعها وباوعتلي
_ابتهال:: ولج عيونه خضر كلت اطلع جهالي عيونهن خضر واحسن النسل
_قس:: هوا انتِ نسلكم خربان من عمي وقيسي شتحسني
كمت من يمها وشمرت روحي على الفراش خليها تاخذ راحتها بس خو ماطلع من الغرفه لا مابيه
اخذت تلفوني حضرت اسامه ومسحت المحادثه
كعدت اكلب ب الفيس بوك ضايجه ماعندي شي جان اسامه كاسر ضوجتي كل مايدزلي صورته اضحك هسه حتى صورته راحت
اجاني الفضول ماعرف منين فجأه دخلت على حساب غضنفر ب الفيس جنت اكلب بي قبل ايام خطبته هوا قدس
دخلت لحساب غضنفر اخر منشور اله صور وهوا لابس القاط وحوله السادة الكبار وبصور ثانيه اصدقائه واقاربه جذب انتباهي معراج
جان لابس نضراته ومبتسم ملابسه عاديه مو شي واو بس شكله حباب كلش نضراته للكامره ب ابتسامه تحسسك شكد هذا الانسان نظيف
دخلت لتعليقات كعدت ابحوش على تعليق معراج
ما اعرف ليش بس شفت نفسي ابحوش على حسابه
شفته معلق لغضنفر ب احد المنشورات
دخلت لحسابه وكعدت افتش شفته ناشر صوره ب ايران وصور ب العراق صور قديمه وصور حديثه جذب انتباهي منشور جان واكف ولابس لابكوت ابيض مال دكتور
بس شفت الصوره ضحكت عرفتتت وجهك مو مال واحد فارغ اكيد مال واحد سجاج وعيونه رايحه من القرايه والسهر
جان واكف وحوله مجموعه من الدكاترة وهوا بنصهم مبتسم نفس الابتسامه الي جان مبتسمها بكل المنشورات ضحكته ماتفارق وجهه
طلعت من صفحته ودخلت على ملفي الشخصي
شلت الصوره وخليت الحساب بدون صوره جان اسم الحساب "رحلة"
ماعرف رحلة وين هوا اني حياتي كلها اذا ردت اطلع رحلة اروح لنجف ازور ابوي وارجع بعد رحله عليمن
رجعت لحساب معراج كتبتله
_🗣: السلام عليكم شلونك سيد
كتبت الرساله وطلعت منتضرة الرد منه جنت متوقعه راح يتأخر ليوم ثاني او مايرد بس لاا والله!! رد بعد 17 دقيقه ب
_🗣: عليكم السلام
نكلبت على بطني متحمسه ما اعرف ليش كتبت
_🗣: شلونك سيد
مرت دقيقتين ورد
_🗣: الحمدلله بخير وانت شلونك
صفنت هذا بس لاعباله اني ولد
يلا عادي مو مهم شسوي بي واذا دره كتبت
_🗣: سيد اكدر اسألك سؤال
_🗣:اي عادي تفضل!
باوعت ل ابتهال الي جانت كاضه تلفونها وصافنه تكلب بي كتبت
_🗣: تكدر تختصرلي العلاقة المحرمه
كتب
_🗣: ماكو داعي للاختصار اسمها جواب لسؤالك علاقة محرمة
رفعت حواجبي على جوابه شنو وين الكلام المؤثر السيد عبد الرؤف من يجاوب يخلينه نصفق لحروره الجواب شو هذا ماعنده جواب طويل اختصرها كلها
كتبت
_🗣:: شسالفه سيد لعد انا مادري بيها محرمة. غير تنطيني كلام منطقي اكثر من جوابك
كتب ورا فتره
_🗣: العلاقة المحرمة مثل الثلج ب الثلاجه بمرور الزمن يذوب ويرجع لاصله "الماء"
الشيطان شلون يحلينه العلاقات المحرمة! ب الحب يخلي الحب يعمي عيونة يعمي الحقيقه عنه لهذا ب اكثر الاحيان نشوف نفسنا نبحث عن شخص يشاركنا الي احنا بي مايهمنة هل هذا الشخص محلل علينه ام لا!!
_العلاقة المحرمة بديتها حلوة تعمي على عيون المقابل بحلاوتها وحلاوتها عبارة عن
"اهتمام"
"خوف"
"حب"
"غيرة"
_وغيرها هذن حلاوات ماتخلينه نشوف الصح من الغلط من اجي اسأل اليوم شخص عندة علاقة ب انسانه ثانيه
شنو الي منعك تتركها؟
جوابه راح يكون اهتمامها خوفها حبها الي غيرتها
_زين مافكرت انو هاي العلاقة محرمة؟ وانت راح تحصل ذنوب
راح يكون الجواب: ادري بس احنا ماحاجين شي مخل او كلام خارج مفهوم العيب
_:: الاشيطان يحلي الذنب بعينه لدرجه يخلينه نصور الذنب الي جاي نرتكبه مو مهم وماراح نتحاسب علي بيوم
كتبتله
_🗣: بس الحب مو حرام؟
كتبلي
_:: الحب مو حرام ب الحلال
حسيته بكلامه هذا سكتني فعلا الحب حلال اذا كان ب الحلال فقط!
ودعته وطلعت من المحادثه شمرت التلفون من ايدي وخليت راسي على المخده رايحه ونمت
ثاني يوم اندك باب البيت طلع عمس محمد يفتح الباب الكل جان ملتم ب الصاله دقائق بس!! ورجع عمي معصب بؤبؤ عينه يريد يطلع من مكانه باوعلي ولطم على راسه
_محمد:: مطيرجيه ولجججح قسسسس اطيرين حمام على السطح!!...
" قدس "
بعد ما انتقلنه كلنا لبيت السيد عبد الرؤف ب امر منه
الكل اتحزم ومشه للسيد
شكد جنت متونسه واني اشوفهم محد يشيل وجهه على الثانيه لو يحسسه انو هوا مثقل عليه لا ابد جانو يجتمعون بحب وفرح
يسولفون بوجهه مبتسمه
يعني شكد ماريد اوصف حبهم لبعض ماوصل للنتيجه الي اريد اوضحها صح
بعد الي صار بملاك وحرقها كلنا نقهرنا واتاذينه لاذيتها منضر رجليها وشلون جلدها مشيول شيل
كل ماتذكر يكزبر جسمي مقهوره عليها شلون تتحمل هذا الوجع والله اني مره طاح عليه زيت واني اكلي البتيته يوم كامل ايدي تاذيني فمابالكم بحرقها؟
دخلت للغرفه امسح على وجهي نعسانه توني غسلت وهسه خلص مابيه بعد اريد انام وارتاح وقت راحتي عيوني بدت تقفل
باوعت لغضنفر نايم على الفراش بيده التلفون من شافني جايه ب اتجاهه فتح حضنه الي
ضمني بحضنه وغطانه ب الحاف
_قدس:: غضنفررررر
_غضنفر:: عيونه
ابتسمت وبدت عيوني تقفل ماحس بشي بعد رحت ب النوم ماحاسه على نفسي
كلش تعبت اليوم رغم ماسويت شي بس هم تعبت
السيد انطاه هاي الغرفه ب الطابق الثاني الي والغضنفر
ماشاء الله بيت السيد عبد الرؤف جبير
ورغم مساحته الواسعه وكثره الغرف بس مطلع ولده هادي ومنتظر كل واحد ببيت حتى ياخذون راحتهم اكثر
كعدت ثاني يوم حركت ايدي عيوني مغمضه حسيت ب ايدي على خشم شخص جعصت الخشم ب ايدي وضحكت من سمعت صوت غضنفر منزعج
كمت من مكاني اباوعله نايم وساحبني اله خليت ايدي على خشمه وسديت التنفس عنده خليت ايدي جوا حنكه حتى لايتنفس من حلكه
ضحكت منهاره من فز يجر ب النفس لازم حلكه وخشمه باوعتله وشمرت روحي على الفراش اضحك
باوعلي غضنفر مامستوعب الي صار مسح على وجه وباوعلي عاكد حواجبه
_غضنفر:: تردين تموتيني
_قدس:؛ اي شكلك يونس ردت اجيك راشدي بس انقهرت عليك
رفع حواجبه مدهوش باوعلي وهز راسه
اختفت ضحكتي من شفته فوكي ساد خشمي وحلكي بايده واني اهمش ب ايدي فوك وجهه اريده يبعد
بعد عني واني تنفست بصعوبه باوعتله عيوني مدمعه
_قدس:: حقوددددد
خله ايده ببطني ودغدغني واني اضحك وابعد عنه
" مهره "
صوت الهلاهل العراقيه مصحوب ب الهوسات والركص من قبل عمات واخوات العريس
هكذا تستقبل النساء العراقيات صاحب المناسبه الملقب ب العريس
رفعت راسي عيوني مدمعه اباوع ل مسلم وشلون عماتي والنسوان يهوسن حوله فرحانات بي وبعرسه
ناسين اكو انسانه كاعده على الكرسي تنظر الهم بعيون تملئها الدموع
دموع الخيبه والانكسار شنو ذنبي اتحمل هيج ليش اني ب الضبط اختاروني اكعد ببدلتي البيضه على الكرسي واشوفهم فرحانين واني فرحتي ناقصه!!
دنكت عيوني على المسكه بيدي الورد احمر بس مابي روح ذابل لاا لا مهره انت تشوفي ذابل مثلج بس هوا لا ماذبال
هذا الورد نخلق هاي الحظه واني نخلقت حتى ارضه بقدري الي انكتب اخذ مسلم
صعدوني للغرفه جثه هامده جثه بدون روح
نزعوني البدله وجردوني منها شفتها مرميه على الارض ماتذكر شكلها ماعرف هاي اني اختاريتها او غيري؟
انسلبت من كلشي حتى من حريه اختيار فستان زفافي
نفتح باب الغرفه رفعت راسي وشفته دخل نفسه هذا الي قبل جم يوم طلعوني من جواه جثه هامده بعد رجعتي من النجف
مسلم مانسى الي سويته اذاني بقوه اذاني بوحشيه
باوعلي وابتسم
دنكت راسي وطاحت دمعتي
بهذا اليوم نسلبت روحي لشخص ماجنت اتمنى بيوم اكون ويا شخص يهمه جسد الانثى اكثر من روحهة
بهذا اليوم تسجل جسمي ب اسم
"مسلم "
" شاهيناز "
طلعت من المصلا ايدي على راسي
مسحت الضربه متوجعه ادري شجاج ماتباوعين كدامج مادري شلون جاي ارجع الكتاب ونضربت ب الرف على كصتي
باوعت لصاله جان عماد الدين كاعد وحده يباوع لتلفزون جان على قناة الانوار باوعتله وضحكت بوجهه
_شاهيناز:: ها عموددد شتسوي
باوعلي عماد وابتسم بخجل
رجعت باوعتله وغمزت
_شاهيناز:: تجي وياي
_عماد:؛ وين
_شاهيناز:: نطبخ جعت اني
هز راسه ب اي واجه ب اتجاهي يالله شكد حباب ومؤدب ماكو مثله ودوم مدنك راسه حتى من يحجي من هسه غاض البصر
دخلنه المطبخ فارغ محد موجود شلت عماد وخليته على الطاوله
_شاهيناز:: اكعد انت
_عماد:: لعد ماساعدج
_شاهيناز:: لا بس اني اطبخ انت ولد
_عماد:: عادي ابوي دوم يطبخ
_شاهيناز:: ااي هذا ابوك مو انت
اخذت قوري الجاي وخليته على الطباخ بس على العين الاخير امانه الي صار بملاك خوفني بعد ماعرف شلون اتأقلم ويا الطباخ
طلعت طمامه من الثلاجه طلعت الطاوه
وخليتها على الطباخ توني افتح النار وسمعت صوت جادح
_جادح:: عماددد بابا وينك!!
صاح عماد من مكانه
_عماد:: هنااا باباااا انا هنا
سمعت صوت اقدام جادح تتقرب من الباب عدلت ربطتي ودنكت راسي اشعل ب الطباخ سمعت صوته يتحمحم ماحجيت اني خليته على مافتح الباب ودخل
جنت مدنكه بس اشوفه باوع ب اتجاهي ودنك يباوع لابنه
_جادح:: مو كتلك لاتروح المكان
_عماد:: بابا خاله شاهيناز كلتي تعال نسوي اكل
سكتت جادح واني على سكتي الجداحه مدري شجاها ماتشغل مدري شجاها توها مابيها شي
رفعت راسي من سمعت جادح
_جادح:: وخري اشغله الج
بعدت عن الطباخ وهوا تقدم شو بس شعل الجداحه مالته اشتعلت نار بوجهه قويه جايه من العين الثاني بعد جادح عن النار بسرعه واني عماد كمزنا من مكانه
باوعلي وحجه عاكد حواجبه
_جادح:: شلون تشغلين هاي العين وتعوفيها جان احتركتي
_شاهيناز:: ياااا هاي اني فاتحه العين اليمنه واشغل ب اليسرى اكول ماتشتعل
هز راسه ودار وجهه باوعت لعماد وهوا باوعلي غمزتله وهوا ضحك دار جادح علينه مستغرب
اتحسر وكسر عينه منه صاح عماد من مكانه
_عماد:: بابا نريد طماطه لاجعه
_شاهيناز:: شنوو
_عماد:: طماطه تخبل بابا دوم يسويها
دار جادح على عماد وضحك
_جادح:: بابا هيه طماطه حركتها ست مرات واوكلك ياها اكلك لاجعه يا تخبل
باوعتله وحجيت
_شاهيناز:: سويها خطيه خل ياكل
_جادح:: لا توا ماكل خل ينام
_شاهيناز:: لااا ابو عماد سويها اني هم تحمست اكلها
وكف ساكت لثواني وهز راسه ب اي اخذ الطماطه من الميز وغسلهن خلة على الطاوه دهن انتضره يحترك وضاف الطماطه ب الطاوة
مر الوقت واني وعماد صافنين على ابداعات ابو الي مادري منين طلعت تحسه بحركاته شيف وهوا جاي يطبخ طمامه الجزء السفلي صاير اسود من كد ما احتركت خله الطاوة بصنينه وخلاها كدامنا باوعتله للطاوه
_شاهيناز:: ترا حركت الطماطه
_جادح:: اسمها لاجعه
_شاهيناز:: عماد مو محتركه
_عماد: لاجعهههه
باوعت لعمام رافعه حاجبي شلون يعزز لابو وابو مفتخر بنفسه تحسه مسوي انجاز مو طماطه محتركه
شو هذا هوا وابنه تربعو على الصينيه ياكلون هاي عود اني الجنت جوعانه باوعلي جادح واشرلي
_جادح:: اكلي تفوتج
_شاهيناز:: ماريد حشه نعمه الله
_عماد:: والله طيبه لاعبالج محتركه هذا مو حرك هذا جلد الطماطه مو رقيق هيج يصير لان ماتتحمل حراره
باوعتله رافعه حاجبي ب استغراب
_شاهيناز:: منيلك هاي
_عماد:: بابا علمني
باوعت لجادح مارفع عينه حتى من الطاوة
اخذ خبزه صغيره خمزها ب الطاوة ومدها ب اتجاهي خلاها على الصحن
اخذت الخبزه وخليتها بحلكي اعلج بيها شو والله عجبتني طعمها حلو اخذت خبزه ورجعت خليتها ب الطاوة
باوعت لجادح يضحك
_جادح:: طماطه محتركه
_شاهيناز:: لاجعه لاجعه
_عماد:: شكدددد طيبه
ضحكت على تحفيز عماد لابو وشلون كل شوي صايح طيبه رغم هيه صدك طيبه وياها صوص حار وشوي ليمون اويلي متتت ب الطعم
طلع جادح وعماد ويا من المطبخ
بقيت اني وحدي غسلت الطاوة ورتبت المطبخ
توني اطلع من المطبخ وسمعت صوت همسات بس بكلام غير مفهوم كلام غريب مثل الطلاسم.!!
التفتت عيوني تدور ب المطبخ خايفه
احس صوت الهمسات براسي
بلعت ريكي من حسيت شخص واكف وراي
صار تنفسي بطىء الخوف اختلني الرعب الي دب كلبي وقتها
شفت قدس واكفه وراي بس لا هاي مو قدس
جانت تضحك ب ابتسامه عريضه تباوعلي وتكلب بعيونها بلعت ريكي
ورجعت بخطواتي مبتعده عنها
_شاهيناز:: شبيج قدس
تقدمت ب اتجاهي تضحك
_قدس:: شبيه
_شاهيناز:: قدس ترا جاي تخوفيني
_قدس::شبيح لاتخافين اني قدس
رجعت مبتعده عنها وهيه تتقرب سمعت صوت عماد يصيحني باوعت للباب اريده يدخل بلكت اكدر احس ب الامان
التفتت على جهه قدس شفتها واكفه تباوعلي طبيعي عاكده حواجبها ب استغراب
_قدس:: مو احجي وياج شاهيناز
_شاهيناز:: هاا شنو. وياي تحجين
هزت راسها ب اي وتقدمت ب اتجاهي طفرت بخوف منها ماريد تتقرب مني احسها مو هيه مرات
طلعت من المطبخ خايفه جسمي يرجف صادفني عماد باوعتله وحجيت
_شاهيناز: وين رايح؟
_عماد:: بابا اشترالج هذاااا
حجاها ومدلي علاكه سوده مديت راسي ب العلاكه جان بيها اندومي وعصير ونستله نبر وان وجبس ليز
باوعتله وضحكت
_شاهيناز:: ولك هاي شنو وانت شنو شتريت
مدلي علاكته يضحك باوعتله اكمز ويا
_شاهيناز:: امشي خل نباوع كارتون وناكلهن
_عماد:: yessss
اخذ ايدي وطلعنه نركض للدرج نضحك بيني وبينكم حلوياته تشهي مشتري بيضه كندر جوكلت واني احبها كلت نتقاسم بيها
بعدنا بنص الدرج وطلع جادح من المصلا باوعلنه وابتسم اخذت عماد وصعدت ماههتمه
فتحت باب الغرفه ودخلنه البنات ملتمات ب الغرفه اخذت تلفوني فتحت الكارتون نباوع اني وياه
دخلت عمتي للصلاه باوعتلنه ودارت تباوع للبنات
_جهاد:: ولجن ياهي كاطعه السير مال شحاطه ابوي
رفعنا راسنا كلنا وصحنه بصوت واحد
_:: انتِ
باوعتلنه بخزره. رفعت حاجبها بعد اهتمام وحجت
_جهاد:: اسكتن مو اني ابوي اذا سالجن كولن جادح كتل الصرصر بي لاتجيبن طارري بشي خوش
هزينه راسنه اني والبنات ب اي
باوعتلنه وهزت راسها بعفيه باوعت لعماد وابتسمت
_جهاد؛؛ شفت ابوك شلون كاطع الشحاطه
_عماد:؛ اي عمه كتل الصرصر بيها
_جهاد:: عفيهه يلا نامو لاتضلون سهرانين كل نص ساعه اجي اشوف الي مانايم ياويله
طلعت عمتي من الغرفه بعد مادربتنا على الكلام شوفو امانة الله عمتي ماجذبت هيه وجادح تعاركو ياهو يكتل الصرصر وعمتي شمرت الشحاطه جان تنكطع الشحاطه عمتي شسوت؟ ضمتها جوا المجمده بس اكيد هسه السيد دور عليها وفتقدها
ثاني يوم جنت نايمه وعماد بصفي ثنينه نايمن على نفس المخده
فتحت عيوني بتعت نعسانه اثاوب
كمت من مكاني عين مفتوحه والثانيه تجاهد حتى تنفتح
كمت من مكاني غطيت عماد لبست ربطتي وطلعت من الغرفه نزلت الدرج شفت الكل ملتم ب الصاله يسولفون الولد
دخلت للمطبخ غسلت وجهي وطلعت
باوعت القنفات كلها محجوزه وكلهم كاعدين على قنفه باوعلي جادح وكام من مكانه اشرلي اكعد اشرتله لا ماريد بس هوا اصر اكعد كعدت وعمتي جانت كاعده ب الكرسي الكدامي
طلعت منة الله من الغرفة باوعت للعلويه للباب ودنكت راسها
_منة الله:: يمه اني مو اعتذرت من قدس لعد ليش ماتحجين وياي
سكت الكل عن كلامه منتضر العلويه لباب الي دارت وجهه عن منة
باوعت منة للسيد ورجعت حجت مره ثانيه صوتها مبحوحح مصاحب بغصه
_منة الله:: سيد شوف امي ماتحجي وياي تكلي زعلانه لزعل قدس
دارت منة على قدس الي جانت كاعده بصف غضنفر تباوع لمنة عيونها مدمعه
_منة الله:: قدس والله اني ماعليه ماجنت ادري هيج راح يصير الله يخليج احجي ويا امي خل تحجي وياي
باوعت قدس لمنة وعيونها مدمعه تريد تبجي الفطيرة
_قدس:: علويه ترا منة ماعليها وهيه ماحجت شي جانت ساكته
_لباب:: تبقى غلطانه
مسحت منة الدمعه الطاحت من عينها وباوعت لعمتي جهاد الي جانت مامهتمه للوضع
_منة الله:: عمة انتِ من اجيتي لايران شاركتي بتربيتنا ويا امي وصرتي عمتنا وبمقام امنا واني ادري بروحي غلطت والي سويته كله غلط ومتندمه عليه والله اني مادري هيج راح يصير مامتقصدن
بجت منة وبقت تمسح بدموعها شفت العلويه لباب عاضه على شفتها ماتريد تبجي وتضعف
هزت عمتي راسها ب اي وباوعت لمنة
_جهاد:: مو مهم الي سويتي المهم وصلتج فكره الي سويتي غلط واني جنت راح اتصرف ويا غيرج لو بدر منهم نفس الموقف تجاهج مانريد نخلي كلبنه جلمود على بعض احنا هنا اهل مانريد التصرفات الخطأ تخلي المقابل ياخذ منا موقف مستقبلياً فهمتيني؟
هزت منة راسها ب اي ودموعها بعدهن يصبن كامت عمتي من مكانها حضنت منة ومنة حضنتها بقوه باست عمتي منة براسها ودارت على العلويه لباب
_جها:: يلا عمه كافي زعل ترا منة خوش منة
باوعت العلويه لباب على منة وفتحت ايدها
ركضت منة على العلويه تبجي والعلويه تبجي وياها
_لباب:: اذيتج يمه مناوي اذيتج
مرت هاي الحظه بدموع اني وقدس نبجي ويا منة والسيد مبتسم فرحان حسيت ماي بارد وطاح على كلبه
نفتح باب غرفه عمتي طلعت ملاك من الغرفه وامها لازمتها اجت ب اتجاهنا تباوع للاجواء مستغربه توني اريد اخليها تكعد بمكاني وكام فقار من مكانه اشرلها تكعد وبنفس الحظه كام ايليا صارو ثنينهم يردوها تكعد بمكانهم
باوعت ملاك على عمتي
اشرت عمتي على مكان ايليا وهنا جانت ضربه لفقار من عافته ملاك ومشت لكرسي ايليا رغم فقار جان اقرب
صفن فقار صفنه حسيته اكل نفس الي صار بملاك وقت كدمنا الماي رغم هيه قدمته قبلي بس فقار اخذ الكلاص مني!*هسه رجعتله نفس الضربه وعمتي مبتسمه
مر الوقت على كعدتنا والسيد يتحاور ويا فقار كلام من الي جذبني وقت كال السيد
_عبد الرؤف:: اذا نريد نوصل فكرة الدين للمقابل نوصلها بشكل واحد
_فقار:: وهو؟
_عبد الرؤف:: الدين ملل
المقابل بس راح يسمع هذا الكلام ممكن من الخارج يبين رفضه الك بس من الداخل راح يوافقك الرأي الدين والعبادات ملل
انا اليوم من اريد اجي اكرر شي ب استمرار راح امل منه
مثلا
اخذ السيد تلفونه ورفعه
_عبد الرؤف:: التلفون شكد مسلي للبعض بس ممكن نتفق اكو اوقات يصير مملل ونريد نبتعد عنه
الدين هكذا التكرار ب العباده راح تكون مملله للمقابل كل يوم صلاة كل يوم قرأن كل يوم عمل معين
شنو راح يودلنه من الداخل؟ التنافر
باوعلنه السيد وحجه ب اهتمام
_عبد الرؤف:: تصير بداخلنه رغبه التخلي عن هذا التكرار
_جادح:: والحل؟
_عبد الرؤف:: الحل بسيط لازم نظم عبادتنا ونخلي عقلنه من الداخل ينجذب للعبادة
صح العبادة احياننا اجبار بس التفاهم هم حلو ويفهم اكثر لازم اكعد ويا نفسي واشرح الها الي جاي يصير والي راح يصير اله نتيجه مستقبلاً مثل الدراسه انا ليش اخلص 12 سنه ب المدرس ادرس وانا جابر نفسي رغم انا ب السنوات نفسها جاي اعيد نفس المواد بشكل اقرب
لان اعرف بعد تعب هل سنوات راح احصد النتيجه بشهاده وتعيين وراتب وهذن راح يفرحني
_عبد الرؤف:: لهذا لازم نقنع داخلنه كل الي نسوي اله نتيجه بعيدن راح تفيدنه!!
" عاتكه"
طلعنا من المصلا متوجهين للحديقه حسب تعليمات العلويه جهاد الي محد يكدر يكلها لا!!
التمنيه ب الحديقه كلنا شباب وبنات وعمتي بنصنه بيدها شحاطه السيد تلوح بيها
_جهاد:: راح تبدي المسابقه الي يفكر يلعب بذيله جادح هذا الكلام الك
رفع جادح راسه يباوع لعمتي ببغض خازرها وهيه خازرته
_جهاد:: اذااا فكرت تغششش
_جادح:: من بين الكل ماعرفتي تركزين بس على جادح لو لان غاثج
ضحكت عمتي وهزت ايدها تباوع لسيد الي جان يهز راسه ب الرفض
_جهاد:: يلا نبدي المسابقه وهااااوقبل لانبلش كل خمسه يختارون اسم فريق يلا
التمينه اني وشاهيناز وحميده وحوراء ومهجان بفريق واحد
ايليا غضيمر غل معراج ميزان بفريق
عطاء كريمه خدلجه اسراء مبين بفريق
عمتي السيد عبد الرؤف السيد معز السيد مقتدر العلويه لباب
فقار جادح وقدس وغضنفر بفريق
باوعت عمتي لفريق جادح وفقار
_جهاد:: بعد ينقصكم نفر
_غضنفر:: انا اعادل ثنين
_جهاد:؛ اطلع ماتلعب انت
_غضنفر:: مايصيررررر شسالفه شهل حقد ينبع من كلبج
باوعت عمتي للسيد
_جهاد:: جاي تسمعه سيد
_عبد الرؤف:؛ عذري بنتي مو بقصده
باوعت عمتي لفريق جادح وفقار وغضنفر وقدس
_جهاد:: صيحو ملاك
صاحت العلويه زهراء ملاك الي جانت كوا تمشي من رجليها خلو كرسي ب الحديقه وهيه كعدت
_جهاد:: يلا ابدو سمو فرقكم
رفع جادح ايده وحجه اول الناس
_جادح:: احنا فريق الخماسي الصعب
باوعت عمي لجادح وضحكت تهز ب ايديها والولد كلهم يضحكون
_جهاد:: منهم صعبين انتو!
ضحكت عمتي تباوعلنه
_جهاد:: وانتم الخماسي السهل؟
_شاهيناز:: لا عمه قاهرين الفرق
_جهاد:: شنو؟
_مهجان:: عمه يعني الكل مقهور منا
عوجت عمتي حلكها تهز ب ايدها
_جهاد:: وانتو!
_غل:: شباب 2018
_جهاد:: لاعاد شهل اسماء؟
جانت عمتي رافضه الاسماء المقترحه وكفت كدام الساده وحجت
_جهاد:: احنا فريق سراج السادة "
الكل نعجب ب اسم الفريق والسيد اول واحد وافق على الاسم وشجع عمتي بي
الكل جان مستعد حتى يلعب العبه المصيريه هاي
كلنا جنا متحمسين وواكفين ب استعداد بس الي وكف العبه
صياح سهام من دخلت للحديقه بيدها التلفون تريد تهجم على قدس
وكف الكل بوجهه مانعها تتقرب من قدس الي صارت بضهر غضنفر وعمتي واكفه بوجه سهام صاحت بيها بعصبيه
_جهاد:: خيرررر سهامممم!!!
رفعت سهام التلفون بوجه الكل وهنا جانت صدمه خلت الكل يلتفت على قدس مصدوم
نضرات الصدمه ممزوجه ب العصبيه جانت موجهه لقدس الي جانت واكفه خلف غضنفر مصدومه من الفيديو الي جان الكل شاهد علي!!!
"" "" "" "" "" "" "" "
