رواية ناديه الفصل الثاني والعشرون 22 بقلم انين الليل

سراج 

رجعت للغرفه ولگيت الممرضه ما خذه ناديه تسويلها التحاليل وبعدها رجعوها للغرفه انا باوعت الها وگلت 

::ندووش شنو يعجبج تاكلين 

هي بالم ...عمو ما اشتهي 

امي //لا بيبي لازم تاكلين حتى تاخذين علاجج 

...بيبي موجوعه ما اريد شي

اتقربت يمها وانا اسوي الحركه بخشمي الي تحبها هي ابتسمت وكتلها 

::انا راح اخذ حنين للمطعم واتغدا وبعدين اجيبلج مو ما تردين معناتها تبقيين ما تطيبين 

وبعد ما تكدرين تطلعين الاي مكان 

حنين گالت //انا ابقى ويه ناديه ما اروح

جاوبتها ::وعلى اساس انا ميت عليج انا حبيبتي وحده ما ابدلها بكل البنات (باوعت الناديه) 

حبيبتي بس ندووش 

هي ضحكت واتقربت منها وگتلها:: رايح اجيبلج غدا واذا تحبيني وتحبين منيره تاكلين

هي هزت راسها وانا طلعت رحت جبت اكل ورجعت وصرت اوكل بيها وعمتي وامي وحنين 

ياكلن هي تباوعلي وتگلي ...وانت عمو هم اكل 

:: ما اشتهي 

- - اذا ما تشتهي بعد انا ما اكل  

ابتسمت :: لاتزعلين راح اكل وياچ

صرت اكل وبعدها گلت العمتي وامي ابقن اهنا راح اروح اسبح واغير ملابسي وارجع 

رحت انا وموفق للشقه سبحت وغيرت ملابسي وارتاحيت ورجعت اخذت اكل وعصير ورحت للمستشفى گلت 

الامي وعمتي ::اخذو حنين وروحو وباچر الصبح ارجعوا انا ابقى يمها 

عمتي ما قبلت گالت =لا ما يصير تحتاج تروح للحمام 

جاوبتها ::عمه الممرضات يساعدنها 

امي //اي منيره صدك اهنا مداراة مو مثل هناك امشي ما عليج كل شي ما تحتاج

عمتي اتقربت وگالت الناديه 

=ها بيبي ارووح ويبقى يمج عمو سراج لو ابقى 

هي هزت راسها وگالت ...اي بيبي روحي 

   =. من اروح مو تاذين عمج 

هزت راسها ...لا ما اذي

راحت عمتي وانا بقيت يمها وكل ساعه يجي طبيب وتجي الممرضه الساعه بثمانيه وكلتها وسالتها اذا تريد

 تروح للحمام شفتها استحت انا طلعت ودزيت وحده من العاملات وساعدتها بعد ان خليتها بالكرسي بعدها اجت 

الممرضه وخلتلها ابره داخل المغذي وگلتلي هاي راح اتنيمها للصبح اهم شي لا تخليها تشرب ماي 

انا هم ظميت البطاله مالت الماي وبقيت يمها الى ان غفت ونامت

ثاني يوم اجت امي وعمتي وحنين وموفق واجو اخذو ناديه وگللونه ننتظر 

دخلت للعمليات الساعه بالتسعه الصبح ما طلعوها اله الساعه بالثنتين ونص واحنه على اعصابنا طلعوها 

وهي تبچي وبچتنا وياها وهي تگول 

...اااخ بابا حبيبي اريد بابا 

صارت تبچي وتعيط 

...ماما ليش كتلتي بابا ليش ماما 

...بيبي ما اريد عمو هادي خليني يمج لا تعوفيني افراح الشريره تكتلني

...هذا هادي وافراح ما احبهم احب عمو سراج 

... ماما شعري حلو عفيه لا تگصينه ماما ... 

وهواي كلام ولان طفله والبنج آثر بيها صارت تحچي بعدها نامت وانا رحت استفسر من الطبيب الي گلي 

همه سووا العمليه لكن بعد رجلها يراد عمليه ثانيه

وعدها الكلى متاذيه راح ينطوها علاج واذا ما فاد يضطرون يستاصلوها وهي سبب الورم الي بجسمها 

 طبعا انا ما حچيت العمتي ولا الاي واحد من رجعت طمنتهم وگلت :: ان شالله خيير

وره يومين اجو الاطباء واخذوها مره ثانيه للاشعه وبدو ينطوها علاج انا بين الدوام وبين المستشفى 

وره اسبوع رحت للمستشفى وقابلت الطبيب الي اكدلي نجاح العمليه وانهم لگو الكلى متضرره لكن ما راح 

يستئصلوها يكتفون بالعلاج وراح ترجع طبيعيه

الطبيب گلي //رغم نجاح العمليه لكن همه بالوقت الحاضر ما يگدرون يقررون 

تگدر تمشي او لا واحتمال تحتاج علاج فيزياوي وهذا ياخذ وكت ولازم تصبرون 

عمتي شالت فلوس وانطتني وانا ما اخذتهن گتلها ::خليهن لان الظاهر علاجها يطول

وطلعنا من المستشفى وانطونه موعد بعد اسبوعين نراجعهم طلعنا من المستشفى واخذتهم للشقه يم امي وموفق 

وانا رجعت للدوام وما اكدر اجي واشوف ناديه 

لكن چنت اخابرهم يوميه واطمن عليهم

وره تلث اسابيع اجيت واخذتها للمستشفى وهناك شالوا الجبس من رجل ناديه وهم اخذوها للاشعه الي بدوري اخذتها 

للطبيب الي گلي

العمليه تمت بنجاح لكن الطفله ما تگدر تمشي اله بعد العلاج الفيزياوي وهاي بسبب قوة الضربه اثرت ع الاعصاب 

لكن اكدلي انو هي راح تمشي فقط يراد الها صبر وتكثيف علاج 

اهنا الدكتور باوعلي وگلي //في مشكله زغيره ولازم تعرفوها وهي انو رجلها قصرت سنتمتر واحد عن رجلها الطبيعيه 

انا اتفاجأت وگتله ::يعني شنو دكتور 

الدكتور //الحقيقه يا استاذ الضربه كانت اكثر شي قريبه من الركبه (صار اياشر )هييييك الفخذ والحوض الي حصل 

انو الاعصاب يلي بئجلها اتمزقت والعظم مو بس اتكسر لا واتهشم كمان 

كان ممكن تفقد رجلها لكن انتو كنتو اسرع وجبتوها وعملنه العمليه هيه هلا ما تئدر تمشي ومثل ما فهمتك لازم

 علاج فيزيائي بعدها من تصير تمشي راح تعروج شي بسيط ما يبين وهي راح تتئبل هذا الشي

رديت علي ::شلون تتقبله 

الطبيب//اي نعم تتئبلو لان هي راح تصير بتتمنى تمشي الشغله يا استازتبئي نفسيه 

سالته ::وهسه شنو المطلوب 

الدكتور //انا كتبت الها على علاج وهاي كمان كتبت الك على مركز للعلاج الفيزياوي انا بعرف حتى بالعراق 

موجود هذا المركز يعني فيك تعملوا هون وفيك تعملوا بالعراق 

::ويمته نباشر وياها علاج فيزياوي 

من بكره اذا بتحب لكن اهم اشي هلا ما بتجييوا سيره ع الئصر يلي صار ابئجلها هيك خلوها تتعالج فيزياوي وطلعوها 

خلي بتغيير جو وبعدها انا اباكدلك راح تتئبل هالشي 

::خير ان شاء الله

ورجعنا للبيت وفهمت عمتي على العلاج الفيزياوي وانطيت الورقه الموفق وگتله تاخذها لان انا هالوكت عندي دوام  

بالليل من اتاكدت ناديه نامت حچيت ويه عمتي بحضور امي على القصر الي صار برجل ناديه ولازم هي ما تعرف 

بهذا الشي عمتي انقهرت لكن انا فهمتها انو ما يگلون الناديه اي شي بالعكس يشجعوها 

وبقت اربع تشهر وصارت ناديه تمشي على عكازه وشفت الفرحه بعينها لان راح تترك الكرسي

ورادت عمتي ترجع هي وناديه وحنين لكن انا ما وافقت وگتلها باقي شهرين واكمل الدوره ونرجع سووا 

زهراء وكرم وجميله چانوا يوميه يخابرون وابوي وعمي جميل ويوسف اما هادي فكل اسبوع او عشر تيام يخابر

امه دقيقتين ويسده 

وسلوى بالبدايه تخابر وبعدين صارت كل فتره اما نوال مرتين 

موضي مرتين وبثالث مره دزت حواله العمتي حتى تصرف على علاج ناديه

ورضا وعلي اخو وحتى امهم چانت تخابر ويطمنون علينه رضا يخابرني اربع او خمس مرات باليوم وكل 

ما يخابر يگلي //تريدني اجيك بس گول ما تشوفني اله مزروع گدامك 

ست تشهر ورجعنا كلنه للعراق حتى امي وموفق الي چان رافض ان يرجع

موفق رغم چبير لكن متعلق بامي اكثر من عدنا كلنه موفق يحب امي بشكل مو طبيعي لذلك من رادت ترجع 

هو رجع وياها رغم كان معارض وحاب يبقى بالاردن 

رجعنا كلنه للعراق وچانت فرحة ابوي ونور ما تنوصف

بيومها رضا اجه وجاب خروف وذبحه 

قررت تبقى ناديه وتكمل العلاج الفيزياوي اهنا ابغداد ومن سمع كرم اجه هو وعمتي جميله وزهراء 

وهادي اجه بقى ساعتين واتحجج عنده شغل حتى ما سال شگد صرفنا والعمليات شگد كلفتنه

الي شفته عمتي ما حچت على القصر الي صار برجل ناديه وطلبت مني ومن امي ما نجيب سيره 

وتمينا اكثر من شهرين واجه اليوم الي ناديه لازم تمشي بدون عكازه لكن بقدم اقصر من الاخرى 

بالمستشفى الدكتور شال العكازه وگلها امشي 

ومشت خطوه ولانه ما تعرف برجلها وگعت على وجهها

ردت اروح اساعدها لكن الطبيب ما قبل وگلها //گومي اوگفي 

هي بالبدايه ما گدرت وصارت تباوعلي وانا اهز براسي وابتسم وهي وگفت وگلها// امشي

 وهنا حاولت تخلي رجلها بالكااع لكن بصعوبه بالبدايه طفرت لكن الطبيب انطاها تعليماته 

و مشت خطوتين او وكعت وبعدين مشت لكن كان الي ينظر الها يشوفها عرجه

حتى الطبيب ما اتكلم بالعرج الي صار برجلها وصرنا يوميه ناخذها للمركز وصارت تمشي لكن 

حست برجلها سالتني بعدم اهتمام ...عمو راح ابقى عرجه ؟

باوعتلها وهزيت راسي وگتلها :: لا بابا بس لان توج صرتي تمشين 

جاوبتني وما كنت متوقع جوابها .... ااهم شي صرت اكدر امشي وانشال الجبس من رجلي وراح الالم

فكرت شلون اخليها ما تحس بالعرج واتذكرت كلام الطبيب قررت انمي الثقه بنفسها وشفت الطبيبه المسؤوله 

عن العلاج الفيزياوي وشرحتلها وضع ناديه هي ساعدتني بنصيحه وعلى اثرها رحت جبت ترانشوزات 

وصرت اخلي ترانشوز رجلها اليمنى 

الي بيها العرج اخلي جوه الكاحل قطعه كارتون بقياس سنتمتر واحد وجبتهن وخليتها تلبس الترانشوز بالبدايه 

اتعرقلت لكن بعدين مشت بدون ما تحس اكو فرق برجلها

وفهمتها وانا شايل مجموعة الكارتونات وگتلها 

شوفي هذا الكارتون ما يخليج تبين رجلج بيها شي حافظي عليهن زين 

هزت راسها وانا اشوف الفرحه بوجهها

ورجعنا للبصره وبيومها لگينه زهراء وجميله بالبيت وزهراء منظفه البيت ومرتبته والفرحه بعيونهم 

وزهراء حضنت ناديه وحنين وهي تبچي وعرفت انو زهراء چانت تحب عباس لكن الظروف او القدر قدر عباس 

ان يتزوج مياده وتقتله ويظلن البنات يعانن من جريمه ما الهن اي يد بيها

السنه راحت على ناديه وحنين ناديه الي بقت تبچي لان هي شاطره وذكيه لكن حنين لا ابالي

من شفت ناديه مقهوره لان اتاخرت سنه جاوبتها 

:: ندووش صحيح راحت عليج سنه بس لازم تعرفين السنه من سبقتج هسه انتي لازم تسبقيها يعني تدرسين 

وتطلعين الاولى وتثبتيين للكل انو انتي شاطره ولا يمكن بيوم راح اتركين مدرستج

وطلع تعييني ابغداد بجهاز مهم تابع للدوله وصرت اروح وارجع واسال عليهن من اجي للبصره اجيب الهن هدايا

 واطلعهن الى ان اتوفت عمتي وهادي اخذ البنات عنده انا وصلتهن واشوف 

الرجاء والتمني ان اخذهن عندي وابقيهن يمي لكن هذا الشي ما يصير بوجود عمهن رغم وصية عمتي انا 

المسؤول عن البنات بعد وفاتها

بيومها انا وصلتهن ومتخوف من الي راح يصير بيهن من جوه راس افراح الي اعرف بيها شگد حقوده 

وشگد عدها احساس بالنقص ولان شفت الغيره بعيونها من اول يوم اخذ عباس مياده

وصلتهن او وصيتهن شنو يسمعن او يشوفن يسكتن الى ان يكبرن واهم شي ينتبهن لدراستهن

 ويديرن بالهن على نفسهن وقبل ما ينزلن انطيت الناديه تلفون حديث بي رقمي ورقم زهراء بس 

وگتلها تضمه زين لحد يشوفه ولا تنسى تغلقه بس من تحتاج شي تكتبلي مسج وتنطيني ترميشه وانا اراسلها

وصلتهن ورحت ما اعرف بوكتها ليش عيوني ما بطلت بچي شنو السبب ليش انا هلگد حامل همهن 

هذا الكلام مو بس انا الي اگوله دائما اسمعه من امي ومن موفق الي يگلي 

- - سراج ليش انت خابص نفسك على بنات عباس لان جدهن صاحب فضل على ابوي لو لان عباس 

صاحب فضل عليك لكن انت رجعت الفضل مضاعف ما قصرت وياهن هاي سنين يكفي يااخي انتبه 

 النفسك انت كبرت انا الي ازغر منك صار عندي بيت وعائله وانت نفس ما انت فهمني سراج شنو شبيك

بوكتها ما جاوبت بقيت اجر نفس وادخن 

وره تقريبا اسبوع او اقل خابرني هادي وحسيت بي عصبي جاوبته ابرود

::الو هلا هادي 

هلا بيك سراج اشلونك 

::الحمد لله انتم شلونكم 

الحمد لله اگلك انت وين 

::بالدائره ليش خير صاير شي 

ها يعني تسوي نفسك ما تعرف 

::شعرف هادي شكو 

سراج اليوم رحت للمحكمه على مود البيت مال امي 

::اي شبي 

هو بعصبيه // ها تگول شبي يعني افهم من كلامك ما تدري 

::شبيك هادي فهمني

شفهمك طلعت امي مسجله البيت باسم ناديه يعني فوك بيت عباس سجلت البيت باسمها الهاي ..

قاطعته باستغراب :: عمتي هيج مسويه 

يعني ما تدري 

::اگلك هادي البيت مسجل باسمي لو باسم ناديه

لا باسم ناديه 

::بعد شكو تسالني تدري او ما تدري 

- - لا سراج انت چنت تدري امي مسجله البيت بيع وشرا وهي مريضه يعني منو اخذها للمحكمه منو 

اخذ ناديه اتوقع

::شوف هادي اني ما اعرف شي ولا عندي علم باي شي بعدين شنو هي عمتي سجلت البيت الواحد غريب سجلته 

البت ابنها البت اخوك يعني بتك وانت ما شاء الله الله فاتحها عليك ومو بحاجة بيت واساسا اني مو طرف بالموضوع 

هادي // يعني ما تدري 

::لا ما ادري 

 هادي بنتر // زين انا راح اعرف منو قنع امي تسجل البيت باسم بت مياده وذاك الوكت حسابي عسير 

وراح اطعن باهلية امي وانها سجلت البيت وهي مو واعيه وعندي بدل الشاهد عشره

:: صحيح كلامك تكدر تجيب بدل الشاهد عشره بس الي تجيبهم يشهدون وياك راح يطالبوك بنص البيت 

وحنين وناديه هم ياخذن الحصه الاكبر وراح ايطالبن بالمحل لان تعرف اكيد هنه عدهن علم فياابن عمتي

 الي تشوفه الصالحك سوي من رخصتك عندي شغل

هادي // اوكف اوكف شتقصد بكلامك 

:: لا هادي اعرفك ذكي وتلكفها وهيه طايره تريد تجيب شهود منو مثلا كرم لو زهراء لو قيس ذوله ما يشهدولك 

سلوى ونوال يردن حصتهن وياخذنها وبنفس الوقت كرم وزهراء راح ايطاليون بمحل عباس الي اخذته 

واني بصراحه راح اصف وياهم لان اني هم مسوول عن الي صار

هادي // مو چنك اتهدد 

 ::لا على شنو اهدد محل يسوى ابو البيت عندك واني اعرف انو انت راح تخلي ناديه تتنازل عن البيت 

هادي // شتقصد سراج 

اقصد لاتفتح على نفسك باب واخواتك يطالبنك بورثهن من امهن اجر البيوت والمحل واشبع بيهن اجارات 

ومن يكبرن بنات اخوك ذاك الوقت اتصافى انت وياهن 

بقى صافن ما جاوب بعدها كلي // انت گلتها انا وبنات اخوي نتجازى انت بعد ما عليك وياريت تعرف 

حدودك ولاتنسى انت بس ابن خالي وانا ابن عمتك وعمتك ماتت 

سد التلفون عرفت انا بعد ما اگدر اروح اشوف البنات لان هادي يعتبرني انا الي خليت عمتي 

تسجل البيت باسم ناديه 

والصراحه عمتي طلبت مني اجيب الها محامي وهو كمل كل اجراءات نقل البيت باسم ناديه وخلت 

اوراق المحل والبيتين يمه بحيث لا هنه او اي احد ما اله حق التصرف الى ان يبلغن السن القانونيه 

ويگدرن يتصرفن باملاكهن

وبعد خلت عندي انا سراج علبه بيها ذهبها وگالت هذني امانه عندك تقسمه بالنص بين ناديه وحنين 

بقيت اتواصل ويه المحامي الي گلي انو عمتي خلتني انا وكيل على. املاك البنات 

ناديه تراسلني وانا اكتب الها مسجات وهي ترد عليه طبعا انا اخليلها رصيد 

كانت دائما تردد نفس الجمله

...عمو تعال لاتتركنا محتاجيك

اعرف بيهن متاذيات من افراح وبناتها واعرف بهادي واحد طماع وقررت اجي اشوف البنات لكن كرم گلي

لا هسه مووكتها

فد يوم واحد من اقارب هادي اتوفى وهذا الرجل صديق الوالدي وقررنا انا وابوي نجي للفاتحه وهناك 

تلاگينا ويه هادي الي صار سلامه بارد حتى على خاله چان كرم موجود بيومها سالته 

::هادي شلون البنات 

هو باوعلي ورد گلي بالحرف الواحد 

- - ممنوع تسال على بنات عباس ولا تجي تشوفهن 

جاوبته ::انا اسال على البنات الي ابوهن وعمتي خلوني وكيل عليهن ومو من حقك تمنعني ما اشوفهن

هادي //انت ما ميت ع البنات لا تريد تضمن تضحك عليهن وتاخذ ورثهن 

باوعتله بنص عين اتقربت يم اذانه وحچيت بحده ما تخلو من التهديد 

::اي صحيح مو گالو انا هادي الي اخذ المحل مال عباس وسجله باسمه لو الي اخذ الفصل مال اخو 

واشترا بي غراض للمحل لو الي وقع امه العاجزه وصار يستلم الراتب مو انا الي اضحك على بنات عباس 

اگدر هسه اهنا وگدام الناس اكسرك اتكسر بس ساكت لان توگف عيون عمتي الله يرحمها 

ابوي گله //من نريد نجي نشوف بنات المرحوم ندفع الباب برجلنه وندخل مفهوم ومحد يمنعنا

طلعنه من الفاتحه وانا ابدي الزم هادي واكسره لكن كرم لزمني وبيومها راح كرم وجاب البنات وشفتهن وهنه 

بس شافهن ابوي صارن يبچن 

وصرت كل ما اجي امر ابيت هادي الي كان يصدني من اروح اسأل يطلع عمار ويگول //محد بالبيت 

ومره افراح گالت //اخذهن عمهن يشتريلهن ملابس 

ومره هادي طلع وگال من وره خشمه بدون ما يگلي اتفضل //راحن ويه افراح والبنات البيت نصره

وكل مره اسأل ناديه تگلي ما طالعات من الغرفه وبنفس الوقت ما اگدر احاجج هادي خاف يعرف عد ناديه 

نقال ويصير غير شي

بهاي السنه الي اتوفت بيها عمتي اجه اخو مرت خالي وطلب يخطب زهراء لان زوجته اتوفت وبنته واولاده بالخارج 

هو تقريبا عمره اكثر من خمسين سنه ويشتغل بوزارة الخارجيه انسان مثقف ودائما يسافر ويريد انسانه مثقفه 

وخالي وامي سولفله على زهراء ورحت اني فاتحتها بالموضوع وفاتحت كرم وعمتي الي رحبو وگالو همه 

موافقين اذا زهراء توافق

زهراء وافقت لان هي بدت تكبر واتمنت ان تستقر وفعلا تمت الخطبه والزواج بعد شهر من خطبتها وانتقلت البغداد 

الي عرفته هي سوت حفله بسيطه واجت افراح وبناتها للخطبه وناديه وحنين ما اجن لكن زهراء راحت الهن وشافتهن 

حزينات ومتغيرات وعرفت افراح ما خلتهن يجن الحفلة زهراء وشافت حنين وهي تراويها بدفتر رسم وكانما 

مسويته قصه ومن سالتها شنو هذا الي چان عباره عن هرم لكن القاعده مالته لازمه صخرتين الي هنه اساس الهرم 

راس الهرم وكع ويمه مره 

وبعدين الحجره الثانيه وهنا سالتها زهراء گلتلها هاي انتي لان راح تتزوجين وجوه راسمه رجل لازم امرأه 

وفوگهم ورد

بقت بس الحجره الي لازمه حجرتين ازغار الغريب انو الحجره الكبيره الي هي اساس الهرم الي ماسكه الحجرتين

الزغار الي جوه مخليتلها ايد تشبه ايد الانسان 

ومن سالتها زهراء وهذا 

گالتلها هذا عمو سراج اذا تركنا احنا ننتهي 

وصارن يبچن

وعرفت زهراء متحاچيه ويه افراح وجاي هادي ضارب البنات لكن زهراء مخابره شمس وجايه هي ويه قيس

زوجها اخو افراح وبعدين حضرن زواج زهراء الي اخذت الهن ملابس وهدايا 

وبقينا بتواصل ونجحت من الثالث للرابع وانا اوصي كرم عليهن واكثر من مره خابرتهن على رقم كرم

 لمن يروح يجيبهن حتى جميله تشوفهن

بهاي السنه رحت ايفاد للخارج ورحت شفت ناديه وحنين يم المدرسه وصيتها تدير بالها على نفسها 

وعلى اختها وتدرس زين وشنو تحتاج تروح تطلبه من كرم

 الي اكدلي انو هادي يصرف عليهن ومدللهن وشكم مره يروح هو وكرم وياخذ الهن ملابس واحذيه

كنت دائما اراسلها مسجات چنت انا احول رصيد واتواصل ويه ناديه الي احس بيها شايله هموم وحزن ودائما 

اشجعها على الدراسه او چنت اخابر كرم الي اكدلي هو وزوجته راحو

وشافوهن وسلمن علي

فجأه صرت ادز الناديه وهي ما ترد عليه ما اعرف ليش اتصل مغلق بصراحه انشغل بالي وما چانت عندي الجرأه

 اگل الكرم على النقال الي خليته الناديه لان خفت يفتهم غلط او يوصل الهادي واسويلها مشكله

لكن طول سفرتي انا ما مرتاح وضايج ومتوتر طلبت من كرم فديوم يعزم بيت هادي ويخلي عمه جميله تطلب 

من هادي يبقي ناديه وحنين يمها وفعلا كرم عزمهم وبس راحو كرم اتصل وانا قطعته وخابرته وبعدين سلمت 

على عمتي وگتلهم اريد احچي ويه ناديه انا حاچيتها 

::الو ندووش 

هي جاوبتني بصوت متقطع وعرفتها هي بچت ...هاا عمو 

::ندوش اشلونج 

جاوبتني بعبره ...الحمد لله زينه 

::انا مشتاقلج 

...وانا عم ..انا هم

::شبيج ليش هيج تحچين وين نقالج 

...هاا 

::ناديه احد شاف النقال عندج 

...لا لا بس انا غلقته

::ليش غلقتي(ما جاوبت )

::جاي تدرسين 

...اي جاي اقرا 

::وحنين 

...حنين هم

::ناديه ديري بالج على نفسج واختج واي شي تحتاجينه اطلبي من عمو كرم اي شي افتهمتي 

...اي افتهمت (صارت تشهك وگلتلي )سر. عم .يمته تجي 

::ان شاء الله عن قريب 

...ان شاء الله 

::صيحيلي حنين

...اي هاي يمي 

::انطيني اياها

=الو 

::هلو حنونه اشلونج 

=انا زينه بس مشتاقتلك وهواي مشتاقه العمه زهراء انت يمته تجي 

::ولج صاير السانج طويل 

حنين =لا والله عمو بس مشتاقه العمه زهراء (وهم صارت تبچي )

::دا كافي هسه اخلي كرم يخابرها وتخابرج لاتضوجين انتي زينه 

=اي زينه الحمد لله 

...وبالمدرسه 

=هاا

::شو بيها هاا تدرين بيه اسامح بكل شي بس بالدراسه ما اتساهل

=عمو الماده صعبه 

::مي خالف اقريها مره واثنين وعشره وخلي ناديه تساعدج 

=ان شالله عمو 

::انطيني ناديه 

...الو 

::ناديه ليش حنين تگول مو هلگد بالدراسه ليش انتي ما تساعديها 

جاوبتني بارتباك ... مو انا هم عندي دراسه انت يمته تجي؟

:: بس اكمل الدوره اجي 

...ان شالله 

::ديري بالج على نفسج وعلى اختج مع السلامه 

...الله وياك 

::ندوش 

...هاا ع

::شبيج بابا تقطعين بالكلام ردت اگلج نامي بالليل (سمعت حسرتها)

...ان شالله 

::انطيني كرم 

كرم //الو سراج 

::كرم دير بالك على بنات عباس احس بيهن شي ضاماته عليه 

- - لاتشيل هم بنات عباس بعيوني 

::تسلم وشنو يحتاجن اخذلهن ومن ارجع احاسبك 

- - مع الاسف عليك سراج

::شسوي كرم ابوهن وعمتي امنتني وهادي ما يقبل اشوفهن 

- - لا مو ما يقبل بس على مود البيت يكول انت الي قنعت خالتي تكتب البيت باسم ناديه 

::لا مو صحيح جبت المحامي اي لكن هي من ذاتها دارت البيت بيع شرا حتى انا ما اعرف 

كرم // يعني خالتي ما حاچتك بشي 

  :: لا كرم بعدين عرفت حالي من حالكم

- - صحيح كلامك لكن الي حز بنفس هادي يكول ليش امي مخليتك انت وكيل ع البيت 

::لان جربته كرم نسيت محل عباس 

- - لا والله ما نسيت 

::كرم افهم مجرد ما ناديه تبلغ السن القانوني راح يرجع الها البيت وهواي اشياء تعرف بيه كرم انا 

مو بعيني اي شي

- - اعرفك سراج لكن مي خالف انت بادر هذا ابن منيره واخو عباس 

::ان شالله

- - سراج خابره حتى ما يگول انت طمعان وهاي مرته الحيه تظل تقرا باذنه 

::شوف كرم تره ثق باالله ما محتاجهم ولا معترف بيهم الكاسرات ظهري البنات 

- - وانت گلتها البنات سراج 

::هذا هو هسه اخابره 

- - عفيه عليك اگلك شنو انت ما ناوي تتزوج مو كافي العمر جاي يركض 

::الله كريم 

- - والنعم باالله وانت ما قاصرك شي ياالله ياالله شد حيلك خلي نفرح

::ان شالله بس كرم مثل ما وصيتك على بنات عباس 

- - بعيوني 

::فيمان الله 

- - الله وياك

من نهيت الاتصال حسيت انو ناديه وحنين ضامات عني شي لكن شلون اعرف شنو بيهن 

بس قطعت الاتصال من كرم اتصلت بهادي وگلت احاول ابرد الموقف الخاطر البنات وحتى اگدر من اخابره 

احچي وياهن اتصلت رد

- الو 

::السلام عليكم اشلونك ابو ياسر 

- اهلا منو 

::انا ابن خالك سراج 

- اح (رد من وره خشمه )اهلا سراج شلونك 

::الحمد لله گلت انت ما تسأل انا اسأل

- - والله مشاغل وبعدين رقمك الدولي مو عندي 

::هم صحيح اي اشلونك العايله الاولاد 

- - الحمد لله انت شخبارك 

::ماشي الحال حبيت اطمن واذا تحتاج شي مناك انا بالخدمه 

- - تسلم ما تقصر 

::هادي اريدك تعرف شي عمتي من سجلت البيت انا ما اعرف اليوم ما انت مشيت بمعاملة حصر الارث 

اتصل بيه المحامي وگلي انت وكيل ع البيت الى ان تكمل ناديه كليه حتى من سالته السن القانوني 18 

المحامي كال لا تكمل كليه يعني عمرها 22 سنه 

وهاي وصية ميت تعرف ابو ياسر انا كل شي مو بعيني وتدري بيه شگد امين على حلال بنات عباس

هادي //اي اعرف سراج انا اتفهمت الامر لكن البيت مو حق ناديه البيت حقي وحق اخواتي 

:: بعد هذا الشي تحلونه ابيناتكم وبنات اخوك داريهن حتى من يكبرن راح يتفهمن موقفك ويعرفن شكد انت 

خايف عليهن وعلى املاكهن وصدگني ويصير الها حل

هادي // غصبا ما عليها ناديه تتنازل عن بيت امي وهيه تضحك وحتى اطالبها بحصة امي من بيت عباس 

انا ساكت هسه حتى الناس ما تلومني وتكول شمر بنات اخو. الي هنه الكل يعرف بيهن مو بنات اخوي بس خلي 

يكبرن ويصير خير اشوف منو يوكف بعيني 

   :: حقك ابو ياسر انت فاهم وتفكر لبعيد على كل حبيت اسمع صوتك واسلم عليك 

       - - الله يسلمك 

 :: سلمنه على ام ياسر والاولاد واي شي تحتاجنه مناك مسج زغير وتدلل 

- ما تقصر يوصل سلامك ان شاء الله

///////💙💔💙/////

في كثير من الاحيان يبدا القدر بنسج خيوطه ليلبسنا على ذوقه وليس لنا يد في ذلك سوى الصدفه 

سراج 

بالدوره كنا 15واحد ويه المسؤول عنه كان جدا خوش انسان وطلع دفعة خالي مجيد اسمه ( كامل ) 

 وصادف انو بنته خابرته وگلتله زوجته اتعرضت الحادث هي وابنها وحالتها خطره

فهو كان متوتر جدا وراسل المسؤولين وسمحوله ان يعود حتى يطمئن على زوجته لكن بعد اسبوع رجع واجت 

ويا زوجته الي كانت الضربه بالحوض وعلى اثرها ما صارت تگدر تمشي واجت وياهم بتهم سجى

اما ابنه بقى بالعراق لان كان عنده رضوض بسيطه 

من اجو سكنو بشقه قريبه من عمله حتى يكون قريب منهم

 وقررو الاطباء عمليه الزوجته وبيومها كل الي بالدوره وگفت ويا لان استاذ كامل بطبيعته 

انسان محترم

ورغم هو الي كان مسؤول عنه بالدوره لكن كان النه نعم الاب او الاخ الكبير بيومها كان متوتر جدا 

 والبنيه ساكته ومقهوره انا وزملائي ظلينه وياهم وهو ما قبل وطلب من عدنا ان نروح وفعلا بعضنا راح

 والبعض الاخر بقى ومن ضمنهم انا

زوجته دخلت عمليات الساعه تسعه الصبح وبقت الى الساعه تلاثه العصر طلعوها 

والي افتهمنا انو باچر نعرف النتيجه

وطلبوا من عدنا ان نروح لان هناك ما يقبلون نبقى بقينا انا واثنين واستاذ كامل وبنته الساعه سته 

بعد ان اطمانينه عليها طلعنا وانا سقت السياره لان الرجال كان كلش متوتر وتعبان وصلتهم للشقه 

ورجعت اخذت الهم اكل لان همه ما اكلو اي شي دكيت الباب وفتحلي كامل الي اصر عليه 

ان اشاركهم الاكل وفعلا اكلت وياهم وعرفت انو سجى محصله بكلوريوس آداب انگليزي وهذا الشي 

شفته لمن طلعوا امها من العمليات وصارت تتكلم ويه الاطباء بكل طلاقه

الي لفت انتباهي بالبنيه چانت رزنه وتحس بيها متكبره 

ثاني يوم انا مريت على استاذ كامل وسجى 

ورحنا للمستشفى نطمن على ام سجى لگيناها نايمه وانتظرنه الى 

ان گعدت واطمنه عليها وبقت سجى يمها وانا وابوها رجعنا نباشر شغلنه والمغرب وصلنه للمستشفى اخذنا سجى

 ورجعناها للشقه وافتهمنا انو بعد يومين تطلع من المستشفى وبعدها تباشر علاج طبيعي ولازم تبقى فتره باحد مراكز

التاهيل وهناك قررو ان يكون الزياره كل اسبوع وكان المركز بغير مدينه صار كامل ياخذ بنته ويروح يزور زوجته 

كل اسبوع

بالاسبوع الثالث وقبل يوم من ذهابهم للمركز بالليل خابرني وگلي انو هو حرارته مرتفعه وكلفني اخذ بنته حتى تشوف 

امها وثاني يوم الصبح اخذت سجى ورحنا وهناك شافت امها 

كانت سجى شابه مرحه وتمتلك جمال لا باس بي وثقافه بحكم دراستها وسفرها الدائم

طبعا امها تعرفني وبيومها گعدنا وبقينا نسولف واتغدينا والعصر رجعنا 

سجى كل شويه تخابر ابوها وتطمن علي بالطريق سولفنه عرفت هي عدها اخوات اثنين متزوجات واخوها احمد اكبر 

منها وهذا گوه اخذ اداره واقتصاد وهو هسه فاتح معرض سيارات هو نفسه الي كان ويه امه بالحادث بس هو 

طلع سلامات واخوها علي بالاعداديه

وصلنه للشقه ولگيت استاذ كامل حرارته مرتفعه زايد وقررنا ناخذه للطبيب وهناك قررو يبقونه بالمستشفى لكن 

هو ما وافق بسبب سجى يعني وين يخليها كان عدنا ولد بالمجموعه خالته موجوده بنفس المنطقه گلت لاستاذ كامل

 وخابرته واجت المره استقبلت سجى ابيتها وانا بقيت بالمستشفى رغم ما وافقو لكن انا بقيت بالممر لان استاذ كامل 

كان تعبان كلش وگلت يجوز يحتاج احد يبقى ويا

سجى الليل كله وهي تتصل بيه حتى تطمن على ابوها وثاني يوم الصبح اجت هي وخالة زميلنه واتوطدت علاقتي 

بسجى كانت صديقه وصار سؤال وجواب هي سالتني گالت 

ليش الهسه ما متزوج 

صراحه ما لگيت رد مناسب گتلها ::بعد ما مصادف الانسانه الي ممكن تفهمني وافهمها 

سالتني //يعني ما عندك علاقه 

انا تعجبت من سؤالها او خلي اگول جرأتها جاوبتها ::الحقيقه ما عندي علاقه

  وبقينه باحاديثنا المعتاده وعزموني مرتين ع العشا 

وصرت اروح وياهم الزيارة امها وطلبت سجى من ابوها اكثر من مره ان اخذها اونسها او تروح 

تشتري شغلات تعجبها

بقو تلث تشهر بعدين قررو ترجع ويه امها للعراق طلعنا انا وياها شفتها حزينه سالتها ::ليش ضايجه 

هي باوعتلي وگالت //لان راح ارجع 

::يعني افهم من كلامج تردين تبقيين اهنا 

هي ردت //لا اريددابقى وياك 

انا استغربت من ردها وهي كملت كلامها //سراج اني بهاي التلث تشهر تعودت عليك ما اشوف نفسي بعيده عنك 

جريت نفس گتلها ::صدگيني سجى حتى انا 

- - خلص سراج اخطبني

اتفاجأت بطلبها صراحه ما اعرف شنو ارد عليها هي گلتلي //سراج انا احبك واريد اعيش وياك 

بعدين گالت //سراج اني الي صارحتك وانت الي لازم تفكر يعني بالعكس بس انا ما اگدر اشوف نفسي بدونك وحتى 

حچيت الماما سراج اني احبك صدگني احبك

بعد ان كملت مشتريات رجعنا وصلتها وانا رجعت للشقه وصرت احچي ويه نفسي 

::معقوله سجى ممكن تغير نظرتي للنساء نظرتي الي بنيتها على اساس خيانة مياده وحقارة افراح الي خلاني ما 

:: احب شي اسمه ارتباط او انو ممكن ابني اسره وبيت واطمئنان 

:: لا غلطان سراج نسيت عمتك منيره وشكد اتحملت 

::لو زهراء وندمها 

::وناديه وطفولتها 

::ام رضا وطيبتها 

::امك وحبها الابوك

::صحيح لكن تفكير ان اكون عندي زوجه واطفال لا ما اتصور 

:: ليش لا مو هاي سجى عرفت عنها كل شي مو هي صارحتك يعني هي تحبك

بقيت افكر اجاني اتصال قبل ما ارد انقطع بعدين مسج قريته من سجى كاتبه 

- - سراج احبك وراح انتظرك لا تنطيني اي رد بس افهم انا احبك تريدني انزل كرامتي اكثر راح اگلك 

انا ما اتزوج اي احد غيرك

ثاني يوم سافرت هي وامها وما رحت حتى اودعهم او حتى اوصلهم للمطار اتحججت تعبان وظهري ياذيني 

بقينا شهرين يوميه سجى تكتبلي سلام وخاطره وصوره وتهنئه وسؤال لكن ما اتطرقت الكلام الحب والغرام 

كنت متواصل ويه كرم ورضا الي گتله بطريقته الخاصه يراقبلي سجى ويعرف تصرفاتها خارج البيت 

وعلاقاتها بالناس 

وره شهرين رجعت للعراق وشفت رضا وگلي بانها ابنيه ملتزمه ومن تطلع ثگيله وتتعامل ويه الناس برزانه 

بعض الناس ومن ضمنهم رضا يعتبرونه تكبر 

اما بخصوص علاقات او شغلات فهي بعيده كل البعد وهذا الشي شجعني اگل الاهلي اريد اخطبها

  ما تشوفون فرحة امي من سمعت الخبر وابوي كلي //. اتاكدت من عواطفك اتجاه البنيه 

امي // شبيك منير ما صدكنا اخيرا الله هدا تجي تكله عواطف وما اعرف شنو 

ابوي // اي امنه لان اعرف باابنج 

   امي //. ابني لو ما عاجبته ما جان خطبها ناسي همه چانو سوا مسافرين

وفعلا خطبتها وهي ما رادت الخطوبه تطول اتزوجنا بعد اسبوعين 

وانا عزمت كرم وعمتي جميله لكن كرم اصر عليه اعزم هادي 

وصار الزواج بسرعه وحضر هادي وزوجته وبناته وكرم وابنه وبنته ومن سالت على عمتي جميله 

كرم گال //تعبت ما بيها ع السفر 

ومن سالته ليش ما اجت ناديه وحنين كرم جاوبني //بقن يم امي

فهمت انو هادي او بالاحرى افراح هي الي ما قبلت يجن البنات 

اتعجبت لمن ما هادي جاب خروف ثاني يوم وذبحه قبل ما ندخل للبيت لان ابوي وموفق سووا عزيمه 

انا اجرت بيت يم اهلي واثثته بين ما اكمل بناء بيتي

بيومها من شفت هادي وهو يحضني وذبح جوه رجل سجى الخروف وافراح شلون تهلهل دمعت عيوني ما اعرف 

احسه چذاب جنت اتمنى يكون عباس هو الموجود

وره الزواج باسبوع سافرنا انا وسجى التركيا وبعدها باشرت شغلي والي شفته من سجى انها تحبني لكن بيها خصلتين 

ما عجبني هنه التكبر ودائما اتعيب على الناس حتى على اقرب الناس الها والشي الثاني هو حب التملك 

لكن بيني وبين نفسي گلت ::اكيد كل انسان ما يخلو من العيوب لان الكمال لله

وبهاي الفتره حاولت اتصل بناديه لكن جهازها مغلق دائما صرت اخابر كرم وهو يطمني عليهن 

وره تلث تشهر من زواجي اجاني شغل يومين للبصره وقررت اروح وسجى طلبت تروح وياي لان بيت عمها 

بالبصره هو مو عمها ابن عم ابوها وكانت تربطها علاقه قويه ابناتهم

وسافرنا وصلت بالليل خابرت كرم الي اصر اجي البيتهم لكن انا گتله راح ادز سجى البيت عمها واجي ابات يمكم 

والصبح عندي شغل من اكمل اجيبها لهنا وثاني يوم نرجع وفعلا وصلت سجى البيت عمها الي كان عمله مهندس 

او مدير عام باحدى المؤسسات الحكوميه

ورجعت يم عمتي جميله الي اشوفها كبرانه وحتى صايره تنسى اهنا انا خابرت هادي بس حتى اطمن على البنات

 الي صار اكثر من سنه ما شايفهن هو جاوبني واصر ان يكون غدانا يمهم اعتذرت لكن هو ما قبل اعتذاري

ثاني يوم الصبح رحت وكملت شغلي على ان ارجع بعد اسبوعين لنفس الغرض ورحت البيت عم سجى الناس 

لزمو بيه ع الغدا لكن انا اعتذرت منهم وعدتهم بالمره الجايه واخذت سجى وديتها البيت هادي وانا استاذنت اكمل 

شغلي وال ما كان شغل وانما انا رحت اجيب ناديه وحنين من المدرسه

وگفت اباب المدرسه وحلن البنات وانا اباوع للبنات وانا متوتر او خايف رجفه بگلبي اريد بس اشوفهن 

شفت اغلب البنات يطلعن وهنه يباوعن الي وانا منتچي ع السياره ولابس نظارتي وشفتهن ❤️❤️

وهنه طالعات اثنينهن شافني وانا اتحركت صوبهن

هي بقت متسمره بمكانها اما حنين بس شافتني اجت وحضنتني والبنات يباعلها اتقربت من ناديه الي صايره

 انثى تهز مشاعر اكبر واحد بجمالها الي ما يخلو من لمحة حزن وتعب مبين على وجهها وانا اشوفها شلون 

صافنه وبنفس الوقت متفاجئه لان شافتني اتقربت وگتلها

::اشلونج ندوش 

هي ما جاوبتني باوعتلي وگالت الحنين الي بعدهي لازمه ايدي 

... حنين ياالله امشي

////////////////////❣️💙💕/////////

الفصل الثالث والعشرون من هنا