رواية نقش بارد الفصل الثالث والعشرون 23 بقلم فدك فاطمه

آنة جَريتچ نِفَس گوة عَلى ريتي

و هَسة حِيرة مِنين ما أَهِدچ أَموت

.

رفـــا

اجر بالباب مال الشباك ماينفتح اتلفت بالغرفة گلبي

يدك بخوف لطمت على رجلي بقهر روحي نسلبت من الخوف 

رحت وية صديقتي للمول گلت لأمي اتغدة و ارجع وياهة نوب اخوها ليوصلنة ندعمت سيارتة بطريقة

اجرنة تكسي سوة وصلتهة على ساس يوديني لبيتنة

لأخذنة رجال نعرفة دوم يوصلنة للمدرسة اتصلت بي اجانة هواي صار نرجع وياه

گالي بس يوصل كراتين الماي لبيتهم اليوم خطوبة بنتة باركتلة اضحك وياه فرحانة الهم جانن تلث كراتين ثنين بالصدر وحدة بصفي 

وصل لبيتهم اعرفة هاي مو اول مرة يجي واني وياه

صار سنتين فوك دوام و عطلة احنة وياه نرجع مطمنة اباوع للباب بفضول بلكي تطلع بنتة

التفتت من نفتح الباب الي بصفي ما لحگت اسوي شي الة نغمت خشمي بوصلة مالحگت حتى اصرخ

وعيت هنا مصدومة شلون سوة هيج عقلي راح يتخبل من التفكير اتلفت بالغرفة نظيفة تلج اجذب

أذا اگول ما تطمنت من شفتهة هيج

لو مكان خايس جان گلت راح يبيعوني عشرة بألف 

گعدت على الجرباية اهز برجلي مخلية راسي بين ادية ماتحملت اگعد

رجعت احاول افتح الشباك مقفول مخليلة قفل الادبسززية افتريت على كل الخانات مقفولة لزمت واحد من الجرارات اسحبة بكل قوتي

خشاب قوي ما يتهزز شنو من خاطف هذة خرب روحة كعدت ابجي من الخوف الم هدومي علية كل شوية اباوع للغرفة خاف اكو كامرات

لا ساعة ولا ساعتين اباوع لأيدي ساعتي بيهة من هدعش وربع فزيت هسة بتلاثة اني غبية المن گلت لماما ابقى وية صديقتي 

بس لا عبالهم وياهة لا اكيد ماما ماتضل ساكتة هلكد تتصل اذا مغلق تشوف صديقتي خليت راسي بين ادية ادعي الله يحفظني 

رفعت راسي بخوف من نفتح الباب رجعت ليورة كاضة المزهرية بيدي هي ترعش دخل ولد شاب لابس دشداشة سودة و لاف جراوية على وجهة

گلبي صار ببطني گلت ذولة دواعش المن لابسين دشادشين رجعت خطوة ضامة روحي يم الميز 

                                            

              

                    

التفت ليبرة اسمع صوت بنية تحجي وياه اخذ منهة

صينية دخل خلاهة على الميز عيونة ما فارگتني

حجة بجدية: هذة اكل تزغنبيي ارجع الگاه فارغ

من الخوف ضليت مصتكة بس عيوني تتحرك بينة وبين الباب اخاف اتحرك خطوة وحدة حتى النفس گطعتة بس سد الباب طحت بالگاع 

ضليت بمكاني عيني على الساعة الدقيقة تمشي بسنة الوقت بطيء گلبي يبس من الخوف گمت محاولة اخيرة ادور على المفتاح

اخذت الخاشوگة اباوعلهة رحت للشباك الواحد من يصير بمشكلة كلشي يطلع منة حاولت افتح القفل بيهة ما نفتح ثگيلة و من هاي الخواشيك الماتنشال

رجعتهة اباوع للصينية ماعون تشريب فوگاه تمن و لحم يمهن بطل لبن و مرگة باميا و خبز و خضرة هذولة شنو صدك لو يتشاقون

وين اكو وحدة مخطوفة يجيبولهة دليمية خاف بيهة منوم يردون يغروني بالترتيب لو اكل ثاني بمواعين مو حلوة تنسد نفسي ما أكلة 

عفتهن بطني صارت تطلع اصوات ولا اكل هسة لو مو دليمية و لحم نوب يطلع بيهة منوم ويجون يسون بية مصيبة واني نايمة مسلمتهة

اخذت بس الماي توضيت بي صليت بدون ما اعرف القبلة اگوم رجلية ترجف بس ردت الهي روحي بشي

لمست رجلية مرتكية على الجرباية اباوع للساعة بالخمسة نرفزتني گوة تمر صار شكد كاعدة هي توهة زادت ساعتين بس 

طفرت من مكاني على صوت فتحتة الباب نفسة اجة باوع للصينية شافهة مثل ما هي رفع حاجبة يباوعلي عدلت روحي گلبي يدك حيل اريد احاجيه ماكدر الساني ثگيل كل ماتذكر اني مخطوفة

اخذ بطل الماي الي على الميز غسل ايدة واكل من كل المواعين كدامي ياكل وعينة علية كمل باوعلي

حجة بأمر:تزغنبي 

رديت برجفة:مـ..منو انتو دـ..داعش

عگد حواجبة تقرب: شنو 

رجعت ليورة مرعوبة اتلمس الحايط وراي تقرب بينة مسافة متر مقلص عيونة مدنگ:شگلتي 

رديت ابالع:مـ..منو انتم شـ..شتردون

حجة يأشر بية:كلمتج الثانية شنية

رفا:دـ..داعش 

ضحك يهز بيدة نهبطت من ضحكتة دار وجهة يتأمر يريدني اكل ولا لمست الاكل عود أكل گدامي خلاني اخاف بالزايد ذولة منو

لحد التسعة بالليل انتهيت راسي طك من الوجع هم اجة هذة الداعشي فتح الباب بدون اي كلام اخذ الصينية و خلة غيرهة اباوعلة متوجسة

طلع سد الباب قفلة گمت الطم اشوف الصينية بيهة سمج و طرشي و خبز حار ذولة يردون يخبلوني شنو

و النبي ما أكل نوب سمج ياعلي جايبيلي سمج

            

              

                    

حرگ گلبي گلت بس يجي الة احجي شبية اصتكيت هيج بس خايفة مخطوفة اني اطلع مخبلة اذا ما خفت اكدر احجي اخاف يحطني و يكتلني من اشوفة رجلية يخدرن من الخوف 

صدك ابوي گادر بس على أمي اني گادرة بس على صفوان ذولة شنو من ملة اندري شيسولي يارب احفظني برحمتك الواسعة 

طگيت من الجوع و النعاس افتر بالغرفة حتى ما انام 

اوصل للصينية و ارجع الخبز يبس و الاكل برد نفسي

الدنية تگلي اكلي و عقلي يطلعلي غير أفكار 

ضميت وجهي بين ادية تنهدت اخذت المخدة نمت

بصف الباب حتى اذا نفتح احس بأحد دخل علية ولا غافية و مادري بالدنيا شبيهة مابيهة

ماعرف شگد نمت كعدت العرك يصب مني الغرفة ظلمة حتى ايدي ما اشوفهة نهضت مرتكية على الحايط خليت راسي على ركب رجلية ابجي

هيج وكت نايمة يم امي و مرتاحة شورطني المن طلعت اشتعلت روحك حجي صگبان صوج لتثق بيك

شلون هيج سوة وخلاهم يخطفوني

ضليت كاعدة لحد ما رجعت الكهرباء اباوع للساعة

بالستة مسحت وجهي هسة ياستة هاي صبح ليل

گمت للشباك اباوع

لجحت الضوة عزة بعيني نمت ليلة كاملة الفتت وراي گلبي طاح ببطني الصينية ماكو يعني دخلو اخذوهة واني نايمة يم الباب 

تلمست روحي و ملابسي مامتغير شي ركضت للمراية اشوف عيوني متفخة من البجي وجهي اصفر مبين علية خايفة 

لزمت بطني تتگطع من الجوع رجعت لمكاني اشوف المخدة الخليتهة صايرة بعيدة اكيد تحركت بنومتي

و رحت بعيد من دخلو ما حسيت بيهم

غطيت رجلية بدون وعي مصيبة اذا فستاني متحرك

ضليت الطم اجيب احتمالات و اخلي هالمرة ولا اسكت خل يجي الة اعرفة منو شعدة وياي 

ساعة تلحگ ساعة لحد ما دگت التسعة عيوني غوشن دخت خليت المخدة بالگاع بس اريد اركز

عيني على الباب منتظرتة شلع گلبي يالله اجة بس نفتح گمت على حيلي محضرة كومة حجي كلة تبخر من دخلت بنية شابة بيدهة صينية خلتهة على الميز 

حجت عينهة علية:اكلي مو زين عليج ،الاكل كلة نظيف لا تخافين 

تقرب عاصرة ملابسي بأصابعي:منو انتم ليش اخذتوني شتردون مني

دارت وجهة تريد تروح و اكمشهة من شعرهة واسد الباب صرخت سديت حلگهة هي ناعمة نخلست مني ضلت بس بؤبؤ عينهة يهتز

رفا:احجي شنو هذة البيت انتم منو ؟شسوين انتي هنا تشتغلون بالملاهي

هزت راسهة مصدومة تأشر على ايدي مديت ايدي الثانية اخذت كوب الجاي حار البخار يطلع منة

            

              

                    

رفا: والله بس يطلع صوت افرغة بعبج بس تصرخين

لزمت ادية تبجي اني اخاف اعوفهة تهجم علية نزلت ايدي حجيت:گليلي ياهو انتم

ردت تبالع:عـ..عمو مايرضى

رفا:عمج منو المن مخليني هنا وين احنة 

:بـ..بغداد هذة بيت عمو

رفا:عمج شسمة

هزت راسهة حجيت اسحبهة:ماتدرين عمج شسمة گرة عين ابوج

بعدني احجي نفتح الباب ندفر دفعتهة خايفة شمرت الكوب وراهة تبدة على الرجال الدخل هي صرخة تمسح بملابسة 

حجة يوگفهة:كلشي مابية امشي لأمج تريدج

باوعتلي رجعت باوعتلة هزت راسهة طلعت مشيت

ليورة خطوات ابتعد عنة عيونة مقلصهة علية بس لو يرفع النگبة سوالي قلق

حجة برود:تريگي الاكل مابي شي هذة بيت العايلة يومين و نرجعج

رفا:منو انتم شتردون شلون تاخذوني شنو بيتكم بيا حق تسوي هيج

لزم الباب يريد يسدة ركضت لزمتة تفاجئت حتى ما اعترض طريقي فاتحلي الباب و واگف رجعت خطوة لداخل الغرفة خايفة من خزرتة 

زهگت منهم و ميتة من الجوع روحي نسحنت احس

نار اشتعلت ببطني من الجوع گعدت ابجي محتارة

للظهر خفت يغمى علية دعيت الله يسلمني من شرهم نزلت الريوك اكلت الخبز يبس من هوة البنكة 

اكلت لگمتين اسند بيهن طولي

يوم كامل همة نفس الحال يجيبون اكل و ياخذون احجي مايفيد ثاني يوم فتحو الباب دخل ولد رجعت

خطوة ليورة گلبي نغزني 

حجة صوت من برة :قسور على كيفك وياهة

رد عليهة يسد الباب:لا خفايف

بلعت ريگي ارجع ليورة اريد الزم المزهرية عثرت 

بالمخدة گدرت اسيطر على وگفتي وين ما التفتت

رفع ايدة سطرني كف خلة نار تشعل بخدي من قوتة

ضليت مبهوتة طايحة بالگاع بس شفتة تقرب عطت

بخوف راجعة ليورة جرني من زندي ضربني على خدي الثاني ،رجع رفع ايدة صرخت ضامة راسي

دفعني طلع گعدت ارجف و ابجي الم هدومي علية

حاضنة رجلية خدي احسة نشلع الوجع وصل لأذني

ماكدر امسح دموعي بسرعة ورم 

ضليت ابجي و احجي على خواني وين يلگوني هسة 

منو يطلعني من ايدهم حتى عداوات و مشاكل ما عدنة منو ذولة هيج يسيون

للثنتين الظهر رجع نفس الولد الضربني زحفت ليورة واگف گبالي يرش على وصلة من قوطية بيدة

تقرب حبست انفاسي گبل لايوصلني شمر القوطية

على الجرباية رفع ايدة عطت بدون وعي من خوف

بس خلاني اتنفس خلاهة على خشمي

من وعيت و صحصحت جنت بسيارة و الدنيا ظلمة 

بس صوت الراديو مالتهة مشتغل و اشم ريحة جكاير 

            

              

                    

فتحت عيوني ضوة قليل ولد گاعد بالصدر و واحد بصفة درت عيوني بينهم حركت ايدي للباب افتحة

:مقفـــول 

فزيت من صوتة لميت ادية لحضني حبل ملفوف على زندي داير مداير جسمي اكدر احرك جفوفي

وحلگي ملزوگ ماكدر احجي

بس دموعي احس بيهن يجرن على خدي لحظات مرت هدوء رجعت راسي على الكشن تعبانة دايخة

راسي من الهامة يوجعني كلش 

:شوفة وينة خل يجي يفضنة 

رد عليه الي بصفة:يگول بالطريق 

:لمثلة هسة واصل دزيت الصورة الة

:امم بس ما يتأمن 

بلعت ريگي دخت على منو يسولفون ياصورة بي لا علية مصوريني نزلت ادية اتلمس ملابسي جنت مخدرة بس لا سولي شي بدون ماحس و صوروني

گلبي نعصر من الخوف ارجف عاصرة ملابسي انزل

بيهن هنة ما مرفوعات توسعت عيوني برعب من التفت الي واحد منهم ضعيف من هيئتة و منگب

الثاني ليدخن ما التفتت بس اشوف طرف عينة بالجامة الي كدام تمنيت اشوف وجه واحد منهم 

اريد اعرف منو همة شنو يردون 

من شكلهم ما محتاجين فلوس الغرفة لجنت گاعدة بيهة احسن حتى من بيتنة خشاب قوي و مرتبة مو حي الله مكان خاطفيني بيه 

عكس بعيني ضوة قوي من سيارة جاية بأتجاه هاي السيارة نزلو بسرعة كل واحد جر اقسام من اسلاحة

نصى الضوة صار گبالي صفوان رافع اديه بيهن سلاح تحركت فتحت الباب من نزلو نفتح القفل نزلت التفت الي واحد منهم

سحبني مخلي سلاحة براسي رجلية رجفن وحدة تطك بالثانية رخيت من الخوف ماكدرت اوگف عصر زندي قوي يمنعني اطيح 

حجة يأشر لصفوان:نزل سلاحك

رد عليه بصوت متقطع:منزلة.. نزلتة بس عوفهة لاتلزم ايدة عوفهة

رجع يحجي يرص السلاح على راسي:دفعة برجلك 

بدون تردد طك السلاح برجلة خلاه يوصل الهم نزل واحد منهم اخذة بس رفع راسة مشة صعد بالسيارة

تحرك صفوان بسرعة عاط بي الثاني:لاتتحرك اطشر راسهة اخليك تلمة من الگاع

مشة خطوات ليورة عيوني على صفوان ماشوفة من الدموع ابجي ويطلع بس صوت ونين هو يأشرلي

بيدة يريدني أهدئ

دفعني الي لازمني قوي عثرت طحت على صفحتي

تحركت السيارة اول ما صعد رجعو بگ بدون ما يوگفون بكل سرعتهم

نشلت من الگاع لزمتة ابجي حضني يمسح على ظهري حل الحبل وخرة رفع ايدة اصابعة على عيني

يمسح بالدموع بلاعيمي طگن اريد اصرخ 

فتح اللاصق شوية شوية ابجي من وجع خدي شهگت اول ما فتحة اصرخ و ابجي من الخوف لهسة

احس بحافة المسدس شلون خلاهة براسي

شالني من الگاع يسكت بية فلتت روحي من ايدة 

امشي و اتعثر اديه محاوطاتني بدون ما يلمسني 

            

              

                    

حجيت اصيح ادفع بي:منوو ذووولة شنووو يردون مني من وراك موو بسببك انتتة ورة كل مصيبة

جرني موگفني كدامة حجة يباوع لكل وجهي:شسولج طگوج شسوولج عذبووج رفا 

رفا:رجعنيي لبيت اخواني وين ليش محد اجة وين صفاء و أحمد امي شحالهة شلونهة 

نكتم صوتي حاضني كل قوتة ادفع بي اريدة يتزحزح

عاصرة ادية ادفع بذراعي گعد مخليني بين رجلي

حضاني لصدرة ضلوعي صارت توجعني 

رفع راسي يمسح خدي حجة:الدنـيا كلهة ضاگت علية أربع أيام طلعت من عيني بيهن جهنم وحق الله جهنم 

درت عيوني بعيد عنة ادفع بأيدة ابتعدت مخلية وجهي بين ادية هو مثلي مدنگ رفع راسة لسمة يجر نفس حيل و يتنهد 

حجة يگوم :تعاي اخوانج مايدرون هم ماضاگو النوم 

يدورون عليج

رفا:بس گلي منو هذة

رد ينحني لطولي:نعمــان واحد عدة مشكلة وياي

رفا :شنو يريد اني شعلية اخذني كلشي ما افتهمت كعدوني بغرفة اربع أيام طلعوني 

سباه گام على طولة رافع راسة اديه على شعرة حجة:الگ***" بس خلانة نترادم مانشوف دربنة

رفا:انييي شعليية بيك لو صاير بية شييي منو يفيدنيي انتتة

صفوان:گومي ارجعج لهلج 

رديت محترگ دمي :ساعة السودة لشفتك بيهة لو ميتة ولا شايفتك هنيال اهلك لمشو و ارتاحو من مصايبك 

صاح بعصبية:بنتتتت الندااف هااي ثاني مرة تگولينهة تصمين حلگج لو احطج هنا اگضي بيييج التوبة و القرءان اطيح حظج

رفا:فوگهة انتة ماراضي صار اربع أيام مادري اني وين روحي نسحنت من الخوف كل شوية طاب علية زلمة شكل يخليني ابلع العافية

رجع جان رايح للسيارة تقدم بخطوات سريعة حجة گاعد كدامي:شسوولج احجي بس انطقي أذوج عذبوج گولي 

رفا:ماتشوف وجهي ماتشوفة

رد ايدة ترعش:بـس 

رفا:ايي بس هيج وخرر عنيي

گمت اتعثر رحت للسيارة صعدت هو بعدة على گعدتة عگدت حواجبي من ركع حي الله بدون قبلة

درت وجهي اعض اصبعي على حجايتي كل مرة اگولهة و اتندم بس ادري ما يحرگ گلبة غيرهة

اجة صعد رگع الباب شغل السيارة خابر أحمد لگفت الموبايل من ايدة بس سمعت صوتة بجيت احجيلة لصار من اخذوني لحد اللحظة هاي 

مشت السيارة هواي و أحمد ما سد الاتصال ضليت احاجي طول الطريق لحد ما وصلنة لمنطقتنة من بعيد شفتة هو و صفاء واكفين بالشارع

اجو للسيارة گبل لا نوصل وگفهة صفوان نزلت همة

تلگوني حضنوني ثنينهم تعلگت بأحمد اهدي نفسي

و اتطمن اني بخير من رجعتلهم

دخلت وياهم للبيت امي گاعدة بالحوش مفرعة الشال على جتفهة بيدهة سبحة حتى ما گدرت تگوم

رحتلهة اضم روحي بين اديهة و ابوسهن

            

              

                    

لحظات تقشعر البدن حسيت كلشي خارج بيتنة يخوف كلشي ممكن يتغير بلحظة اني طلعت اضحك

و اشاقة وياهة هي توصيني على مسواك 

شلون مرت اربع أيام يالله شفت وجهة عيونهة دم من البجي حالهة متغير ولا جنهة نفسهة امي دنگت ابوس بأديهة اطمنها علية ايدهة على خدي 

اجة صفاء گومها دخلنة للبيت التفتت أحاجي أحمد 

دخل يسد الباب صفوان واگف يم باب الحوش مد ايدة سداه ضل برة

دخلت امسح دموعي فتحت الماي اغسل امي تصيح

علية رحتلهة حضنتني رايحة روحها من الخوف من الطلعت مرن تلث ايام وراهة 

شصار بيهة الحمدلله ما نجلطت ضليت يمهة حاضنتني و تحجي وية أحمد تسأل بيه عرفت مخابرين صديقتي هي گايلتلهم على الرجال لأجرناه

رايحة ناكر و صديقتي جاية و مطلعة فيديو صورناه

بالسيارة هو جان مبين گبل لا يرحون للمركز مخابرهم نعمان مخابر صفوان مهددة 

ضالين يدورون علية صفاء رايح للشرطة دازيلهم صور من اول ما اخذوني مخدرة مادري و ثاني مرة دازيلهم صور من ضربوني 

گمت من امي گتلهة بس اروح للحمام اجت وراي 

كعدت بالغرفة دخلت جلفت روحي زهگانة من حالي اباوع بالمراية وجهي مزورگ

طلعت انشف بشعري لگيت امي ماكو مشيت بالمطبخ گاعدة و مخلية صفاء يسوي عشة الي 

كعدت يمهة نايمة بحضنهة

مرت الليلة مصدومة من الصار حسيت الحياة على لحظة وحدة تتبدل صارت عدي ردة فعل مو حلوة

قبل لا أنام خابرتني غنوة اريد افتهم منهة كلمة ماكدر بس تبجي خفت عليهة حامل نوب يصير بيهة 

شي حاجيتهة ضليت اضحك حتى ترتاح

بس بداخلي كلش متضايقة اتگلب ماكدر انام قربت

فراشي من امي بس حست بية فزت نمت يمهة ايدهة على راسي تمشي اصابعهة بشعري 

غمضت عيوني ردت اغفى مختنگة اتنفس بي ما مرتاحة انتظرت غفت گمت طلعت برة اشهگ الهوة

واگفة بالمطبخ فاتحة الشباك 

غسلت وجهي شربت ماي مشيت ادور على موبايلي 

جان عدي موبايل امي خفت لا موبايلي ضايع غير

اضيع وياه بي كومة سوالف و صور

صعدت لغرفتي اتلافت شغلت كل الاضوية فوك غرفة أحمد متطمنة بوجودة هناك فتحت الباب

غرفتي اگعد بيهة بس ما انام هنا

دورت على جنطتي ما لگيتهة اني هم غبية خاطفيني يرجعون الجنطة لأهلي هم ثولة شبية نزلت اخذت موبايل امي مترددة گوة على روحي

كتبت لصفوان "أنـي أسفة على كلامي "

زفرت نفسي بضيق اشوفة بسرعة طلع عندي متصل

و قراهة رد "فدوة الج لا تفكرين "

مسحت الرسالتين و طفيت الشبكة رجعت الموبايل لأمي گوة غفيت كعدت على صوت أخواني 

و سوالفهم رفعت راسي منعسة كاعدين بغرفة امي

            

              

                    

أحمد بيدة صينية الكوابة و الجاي و صفاء مشتري صمون و گيمر و جبن ،أجت ماما وراهم شايلة طاوة

طماطمة و بيض گعدو يجيبون و يخلون

صفاء:اليوم طلعت گتلهم عدنة عيد روحو اشترو گيمر گبل لا يخلص

احمد: الناس ضلت فاكة حلگهة يگولون منين طلعنة هذة المخبل 

صفاء: همة المخابيل جية رفروفة عيد 

ضحكت اگوم اغسل ماما گبل نهضت لزمهة احمد

كعدهة طلعت برة غسلت صار عندي فضول افتح

الباب مديت راسي خاب ضني عبالي مرابط يم بابنة

رجعت اتريك يمهم حجيت اطگ رجل صفاء:اسمع صفاوي كعدوني بغرفة يگول فندق اول ما فتحت عيني شمرولي صينية دليمية خلوني لا اخذ ولا انطي

حجيت امي تتحسر:شوف تخبلت البت

رفا:والقرءان و العشة سمج بعد شتردين 

حضني صفاء يضحك يگلي اسكتي يغمزلي حسيت اكو شي سكتت ،أمي ما مصدگة كل شوية بوستني

بس أحمد ساكت كل ماتجي عيني بعينة يدير وجهة

ضليت أيام بالبيت الباب ما اوصلة صديقتي اجتني

و غنوة خابرت رادت تجي ماخليتهة طريق بعيد فتحت وياهة كامرة 

عبالي تبجي بس على دلهمهة طلع البجي عادة عدهة الدموع تصب اسكت بيهة من كد ما توسلت اجيت امد ايدي من الشاشة و امسح دموعهة

بيت عمي يترددون علينة نظراتهم مو راحة امي كل مايرحون تضل ضايجة رغم همة تحمدولي بالسلامة من رجعت گبل اجونة وصارو ليلة يجون

أحمد متضايق و يزيد عصبية بكل مرة يگعد وية عمي و امي هم عرفت السالفة بيهة أنة بعد اخر مشكلة صارت عمي أكرم هواي شد وية اخواني

من لمن خطبني أبن صديق عمي و وافقت صفوان سمع راح سحل الولد و تعاركو ذاك طگاه بسجينة

و صارت مشكلة شگدهة 

الولد وقفوه كم يوم بعدين طلعوه لان صفوان هاجم عليه هو يس دافع عن روحة و عمي واگف وية اهل الولد اجة علينة سوة فلك ماما ماترضى على صفوان حجت وياه غلط عليهة 

أحمد تهستر بيومهة گوة لزمناه جان طگ عمي يومين المشاكل بلفس صارت منهة بعد تغيرت علاقة عمي سيئة ويانة صار كل جياتة نغزات دوم يحجي على صفوان كدام ماما

مرت الايام رجعنة نداوم اختنگت بالبيت محد يرضى اطلع و حجي بيت عمي زاد لان نخطفت ما خلو كلمة ما طلعوهة علية

لو ما أحمد الله اعلم شنو يسون بية همزين ما يسكتلهم رغم اهلي وياي بس حجي الناس يزيد گرايبنة كل شوية شامرياهم حجاية 

وگفت بالباب منتظرة صفاء يجيني مليت رجعت

جوة للمدرسة عود ردت اطلع اليوم من وكت مريضة حجيت وية المديرة سمحتلي

رجعت كعدت بالإدارة حاضنة بطني مرتكية ليورة

خلص الدرس الثالث و بدة الرابع و صفاء ما بين

            

              

                    

رفعت راسي للعاملة دخلت تسأل عني نطتني علاگة گالت اجة ابو توصيل لباب المدرسة نطاهة الهم

اخذتهة مستغربة كل ابالي هاي سوالف صفوان

خجلت افتحهن گبال المدرسات لحد ما كل وحدة

راحت لشعبتهة فتحتة اباوع مستغربة

جنطتي لجنت شايلتهة بيوم لخطفوني فتحت ادور غراضي مثل ما هي جان بيهة الموبايل جنت مخلية ايدي على گلبي خاف ينشر منة شي 

فتحتة جان طافي من الشحن طلعت المحفظة فلوسي مثل هنة واني ادور سحبت ورقة مطوية

فتحتهة مستغربة لازمتهة عيني على الموبايل 

رجعت اقرة جان مكتوب" عذرينة أستاذة رفا اذا قصرنة وياج طول أيام گعدتج يمنة ، واني شخصياً اعتذر منج على الكفين لأكلتيهن احتاجينة نسوي هيج حتى نبين جديتنة بالحادثة "

عدتهة اكثر من مرة نوب تنبهت مغصتني بطني ذولة مراقبيني و وصلوني لهنا ضليت مصدومة

لميت كلشي شلتهن شلون ما جان طلعت موبايلي الثاني اتصلت على صفاء گالي بالطريق خفت حتى اوصل للباب لحد ما اجة 

طلعت وياه بالي مشغول وصلت للبيت مبين علية

مو زينة گتلهم مريضة دخلت للغرفة شمرت الغراض على الجرباية خابرت صفوان اتصلت مارد

لحد العشة اني احوس بقلق ساعة افكر اگول لأحمد

نوب ابطل الافضل اوصلهن لصفوان هو يعرفهم

همة هددوه بية حسب ما سمعت

صار مدة طويلة ما يجي الولد متعاركين وياه هو متعارك وية دلهم كل واحد رايح بجهة من الافتهمتة

و لگطتهن من غنوة يردون يضغطون على صفوان

حتى يعوف دلهم و بعد ما يوصل صوبة اذا شافوه

وياه لو مساعدة يرجعون يسون بية اضرب من السواه يعني گعدتي هنا معتمدة عليه

عضيت اصبعي بحرگة شعلية اني مدخليني بمشكلة 

حتى مادري بيهة غمضت عيوني اهز راسي انسى

لسمعتة ذاك اليوم اصم حلكي حتى ما اطيح بسالفة اكبر من الهسة طايحة بيهة

بالليل كلش رجع اتصل حاجيتة عن الصار وصورتلة

الورقة گتلة اسم الي ضربني لان اتذكر صاحولة بأسمة و مبين هو الكاتب الورقة

اتصل علية حجة يتأمر:اخذي اجازة لاتداومين

رفا:نعم واني شنو علاقتي اوگف حياتي

صفوان:لسلامتج

رفا:اني جنت سالمة و كلشي مابية لو ما انتة مورطني

صفوان:بس باجر اني احجي وياهم ابعدج عن السالفة كلهة

رفا:اي رجاءاً لاتورطني وياك كافي الي شفتة منك

صفوان: حقج

رفا:ادري حقي اعرف حقوقي ما انتظر تعلمني

صفوان:خو ما گلتي لخوانج 

رفا:لا انتة و رطتني انتة تطلعني 

صفوان: شي اكيد بس باجر غيبي اني احلهة

رفا:خوش باي 

ردت اسدة حجة بصوت ناصي:رفرف

عوجت حلگي رديت بنتر:نعـــم

            

              

                    

فصلة بدون اي كلمة ثانية طگيت گصتي بالموبايل

شبية نجلبت الة اصيح هيج ردت اراسلة بطلت خيولي اكبر راسة ماريد يضن مهتمة لزعلة

.

.

غـــــنوة

گاعدة بالعيادة على اعصابي راسي يوجعني صار مدة من التفكير ، ايدي بأيد دلهم عدي مراجعة 

تنهدت بضيق رابطة مزاجي بمزاجة طول ما هو متضايق اني ماكدر ارتاح احس بخنگة من اشوفة

اجة دورنة دخلت للدكتورة مراجعة عدي طمنتني 

حصلت كم رزالة تگلي ما معتنية بروحج دمج نسبتة مو كلش تمام كتبتلي علاجات 

تمددت على السدية علمود السونار ماردت اعرف بس دلهم گاللهة حتى ما متففين نشوفة غمضت عيوني شعور ما اعرف الوصفة 

أول ما شفت الشكل بالشاشة صح مو واضح بس 

هيج رفرفة صارت بگلبي التفت دلهم عينة عليه 

ساكت حتى ما مبتسم لو مبين عليه متأثر

عرفنة الجنس ولد ابتسمت ماعندي مشكلة المهم سلامتة و تمام الشكل على ما عدلت روحي طلع دلهم جاب العلاجات علمتني عليهن

طلعنة منهة صعدنة بالمصعد اباوع لوجهة العاكس بالمرايات تنهدت بضيق مديت ايدي لزمت اصبعة

فتح جفة حضن جفي يضغط عليه

ما كدرت احجي نفتح المصعد دخل رجال سكتت

طلعنة نتمشى مرينة على السوك اشترينة لمحتاجينة وراهة أجرنة تكسي و رجعنة

طول الطريق ساكتة لا هو يحجي وياي وصلنة للبيت

نزلت دخلت گبلة انتظرتة اجة عدة المفتاح مال باب المطبخ فتحة دخلت نزعت العباة

حجيت امشي للغرفة:شعدك متضايق هسة لو بنية نگول ماتريد بنات 

رد برود:وشبيهة البنية و أتضايق منهة

التفت ضايجة:جا شبيك

رد متنهد: ماكو شي مضايقني الصار اخر فترة

تقربت منة لازمة ايدة: علمود صفوان ما رجع يحاجيك كلش گطعتو

حجة يمسح گصتة بضيق:رجع بس اني صديتة احسن الة لا يتورط الزلمة جان راحت بنت الناس هي لابيهة ولا عليهة

غنوة:صلاح مايحجي وية نعمان يردة عنك يسوي شي 

دلهم:هو شنو المغتاض منة نعمان ليش صلاح رحعني نسى دم اهلة

رديت بقهر:وانتتتة شعليك غير اخذو حكهم بشنو طالبينك بعد منطيهم كلشي

دلهم:هااي بعدد هاييي عقليتهم

غنوة: اشتكي عليهم گول يهددوني خلو رفا تشهد خطفوهة

دلهم:همة خاطفين و اني و رضوان حارگين گاعهم خلينة مخدرات بمحلاتهم و الحبل على الجرار ناكلهة احنة

غنوة:هوو غيرر قتل اخوك و حاتم مشاركة بس گلي ليش ماتحجي و تشتكي ليش ماتدور وراهم تقدم ادلة و تخلي محامي احسن لك من هاي السالفة

            

              

                    

دلهم:مايفيد

غنوة:لا يفيد و احسن من الجاي تسوي

دلهم:انيي اعرف و اگلج مايفيد

دفعت ايدة متنرفزة مشيت للغرفة بدلت ملابسي 

واحد يريد يجيب التعب لروحة كدامة الحل ما يسوي الة يطيح راسة بمشكلة

غيرت ملابسي رحت للمطبخ ردت اسوي عشة لگيتة 

رحت يمة اشترة افخاذ خلاهن بصينية بالفرن رجع فتح الثلاجة طلع الفواكه 

حجيت اريد اخذهن:عوفهن اني اكملة 

رد يوخرني: امشي تمددي هواي ضليتي واكفة ارتاحي 

عفتة رجعت للغرفة تمددت لحد ما أذن گمت صليت رجعت اشوف العشة دلهم نخبص بالفخذ

مگابلة و گاعد رحت شفتة عوزة شوية

ندك الباب باوعت من الشباك راح دلهم فتحة رجع 

بيدة صفكة خبز الريحة وصلتني خبز حار اختهن منة

غنوة:منين ذني

حجة يسد الباب:من اهلج 

غنوة:شعجب

رد يفتح الفرن: خلص 

غنوة:حسيت بعدلة شوية 

هز راسة حجة يريد يطلع :رايح للمحل تردين شي

غنوة:منين الك الفلوس صرفت هواي اليوم

دلهم:اشتغلت

تقربت منة گبل لا يروح لزمت ايدة التفت رفعت رجلية جارة ردانة دنگ مستغرب بوستة بخدة 

حجة بعدني ملامسة خدة:الله يحفظك الي 

بلع ريگة ضل صافن ابتعدت خجلانة لان حجيت هيج درت وجهي لزمني گبل لا اروح حضني مدنگ

لطولي ايدة وحدة على ظهري وحدة على شعري

حجة يبوس رگبتي: حبيبة الروح

رديت احوط ظهرة:لاتضوج حباب انقهر من اشوفك ضايج كلشي ينحل ماكو شي يضل طول للعمر

دلهم:لاتخافين علية و كلشي تمام ،المهم سلامتج الباقي كلهن يتعوضن 

غنوة: الله يطمن گلبك و يريحك 

ضغط على ظهري ضامني بين اديه حجيت امسح على جتفة :أحبك اني

دلهم:مصيبة انتي

ضحكت ابتعد عنة بوسني براسي ما يخلي عينة بعيني طلع للمحل رجعت حضرت العشة على ما اجة تعشينة شوية فك من ضوجتة

گمت سويتلة جاي اخذت الكوب رحت للغرفة لگيتة نايم على بطنة حاضن المخدة تقربت كل ضني غافي

رفع راسة مديتلة الكوب عدل روحة اخذة 

غنوة:عبالي نمت

دلهم:گاعد ، شربتي علاجج

غنوة:هسة راح اشربة ، بس الابر شلون

دلهم: اني موجود ايدي ماخذة على الابر

ردت اوخر عنة: لو تنگلب الدنيا اروح لغفران تشوفلي وحدة هنا تعرف 

رد مخلي ايدة على خدة يباوعلي بخبث:مو حرام 

غنوة:ادري مو حرام بس ما تضربني انتة 

دلهم:تردين ترحين لوحدة غريبة و تعوفيني اني رجلج

حجيت اسد الجرار:اي أعوفك انتة رجلي 

لزم ايدي مگعدني يمة حجة يبوسهة:جربي

غنوة:بالله صار بية شي اكعد راحة دلهم عوف سوالفك

            

              

                    

حجة يوخرني:انتي الخسرانة

غنوة:لا والله انتة لخسران 

دلهم:هسة اكسرهن

غنوة:تسوي فضل 

عفتة اضحك عليه من كلة عقلة اوافق هو مايعرف

الليل كلة يتنهد و يتحسر يتگلب كل شوية على جهة 

غنوة:لو مفارگني ماتسوي هيج

رد بنتر:شمسووي

غنوة: كلشي مامسوي تصبح على خير

درت وجهي هذة كلة علمود صفوان يگول مفارگ مرتة ،مرت دقايق تقرب حضني مخلي ايدة على بطني بوسني بجتفي 

دلهم: غنوة بداعة اهلج خلي الولد يطلع طبيعي لا تگلبين خلقتة بجيناتج

رديت اضحك بصدمة: اني شعليية

حجة يحر شعري:جيناتتج راح يدمرنة

غنوة:وانتة هيج متأكد

دلهم: والله حساسي يگول هيج

حجيت ابوس خدة:عادي يطلع ابنة مميز

دلهم:لا اعتراض على حكمك ربي مامتبطرين خل يجي سالم بس كون مو شعرة احمر

ضحكت استند على ايدي اريد اگوم التفت لجهتة حجة هو ينهض:اني جايج ضلي 

غنوة:لا ما ارتاح و ظهري للباب 

ساعدني گوة اتگلب نمت على مخدتة ايدي فوك خدة دنگ لزمهة يبوسهة يقربهة عليه يشمهة

حجة يوخر شعري ورة أذني :الدنيا كلهة تضحكلي من اشوفج كلشي ميت بية يصحى 

غنوة:اني هم احب اشوفك تضحك و فرحان 

دلهم:لو ادري عوض التعب انتي جان صرت آدمي من البداية 

غنوة: جا انتة شبيك تخبل عسل 

دلهم:هاي بس بعيونج

غنوة:المامعاشرك ما يثمنك

دلهم:شلونهة من عشرة شلعت گلبج بيهة

غنوة: تدري كلشي صار وشگد زعلت منك بس ما اگدر اعوفك من اروح لهلي احس بغربة 

دلهم: غناوي ،غناي ،غناتي

ابتسمت اتذكر كلشي من البداية أول مرة دلعني فرحتي ما انطيهة لأحد بداخلي گلبي يرفرف جان

تقرب مني يبوسني غمضت عيوني ابادلة لحظات

وابتعد حاضن راسي لصدرة مديت ايدي للفانيلة

حجة يلزمهة:أم الغيرة

غنوة:ها غير تنزعهة شعجب ضال بيهة

دلهم: خلينة مستورين

ضحكت انزل ايدي رجعهة يخليهة على خصرة

غمضت عيوني نمت مطمنة بين اديه حاضني اصابعة بشعري يمشط الخصل

گعدت الصبح على صوت باب الحمام نرگع مسحت

وجهي گوة گمت اسمع صوت الماي رحت للمطبخ

حضرتلة الريوك على ما طلع

هو واكف شرب الجاي گوة اكلة لفة صغيرة مال جبن طلعت وياه هو يسحب بالشعر من لحيتة

دلهم:هاي شعفتج تارستني ترس

غنوة:وين شعري مايطيح

رد يرفعن كدامي:جا ذني شنو

غنوة:اي غير تمشط بمشطي بدربك لحيتك يصير بيهة شعر شعلية اني 

خلاهن بيدي صار عدة وهواس دنگ يگلي شوفي شعري حجيت اتلمسة:كلشي مابي ارتاح 

دلهم:دخل اوصل اذا الگة راسي متروس

غنوة:جا وذا يبزز لو تخاف مرتك تشوفهن

            

              

                    

دلهم:مستعجل ربج مستعجل 

ضحكت اسد الباب وراه دخلت للمطبخ نظفنة رحت للحمام غاسل الهدوم مخليهن همزين طلعتهن شريتهن فتحت الماي ارش بالحديقة

لحد التسعة راسلتة اروح لغفران من لاجارة رحتلهة

دكيت الباب الشمس براسي اعدل بالعباة تزلگ

فتحتة نرجس گرصت خدهة دخلت وكفت بالباب حجيت وياهة لازمة بيدي الابر و السرنجة طلعت

مشينة اباوع مستغربة

غنوة:منو لرايحيلهة

حجت تعدل عباتهة:لأم لطيف غير هاي شغلتهة

وگفت ضايجة:لو تموت ما اروحلهة هاي الجذابة هم مسوية روحهة قابلة على الوادم

غفران: جا وين اوديج خل رجلج يجي ياخذج للمستشفى هناك 

عبست هنة اربع أبر اضل يومية كراوي روحة و رجعة

لزمتهن ضايجة:ماكو غيرهة

غفران:سكنة تمشيلهة

غنوة:يالله المهم افتك منهن

مشيت وياهة رحنة لبيت جدي دخلت سلمت عليهم

كاعدة بغرفة جدتي صحنة سكنة اجت تگلب بالإبر 

طردت افكاري مال المسلسلات هي ابرة اخذهة وهاي هي صدك ضربتني ايدهة خفيفة ماحسيت

بس وجهة ثگيب يابة تريد تخنگني كعدت يم جدتي

حجت تلفتت علية:بعدلج شكد حبوبة

غنوة:دخلت السادس

ردت تلزم ايدي:الله يگومج بالسلامة شني لبطنج ولد بت

حيت مبتسمة: ولد امس رحنة للدكتورة 

غفران:ايي ولد احسن البنات ولا تنحمل 

سكتت ما رديت عليهة نضل نتناقش مالي خلگ گتلهة خل نرجع ما رضت گابلت مرت عمي تفلس تمر وياهة عدهة ثواب ست غفران طالبة مراد

ياهسة تگوم بطلاع الروح تهزهزت طلعنة بالباب صادفت عمي عمار من يوم لأخذني حتى يذبحني

لحد هسة ما مصادفتة وجه بوجه

رفعت عباتي الزمهة حيل مريت منة ما سلمت عاط

علية يسب بأبوي هم ما رجعت طلعت من بيتهم

رجعنة مشيت لبيتنة خلص اليوم نفس الروتين دلهم

يگول مضيعلة ضايعة راح يقبط شهر هو و صفوان ما يتحاحون وصلت حدها وياه

كعدت بالغرفة اخيط بتراكة و احاجي برفا كاتلتهة الحرگة من اعمامهة گالبين عليهم يحجون بيهة

غنوة:شتردين منهم مادام خوانج وياج معليج

رفا:غاثاتني اريد اكتلهن ذني العگارب

غنوة: ما تصعب عليج رفيفة

رفا:على يوم يوصلج صياحهم

غنوة:اگلك رفا هم تحجين وية صفوان

رفا:اي غير دك غزل وياه ويين احجي المن محاجيتة

غنوة:ماتگدرين تدخلين علمود يحاجي دلهم جنة يتيم

رفا:وهو هم لا اخواني يحجون وياه ولا رجلج مرتين شفتة وجهة تعيس و كلة طاقة سلبية

غنوة:استخطيتة

رفا: اهوو راح تخلي ضميري يأنبتي

غنوة:جا خطية لا اهل لا صحبان اني جنت مثلة خنگة

رفا:خلي رجلج يحاجي 

غنوة:دلهم ما يتنازل و يخاف عليه 

رفا: لعد خليهم هيج

غنوة:خوش لاتعبين روحج

سدت تضحك ضميت البكرة گمت بيدي التراك وديتة الة حجة ياخذة:بعد كت

حجيت اتمسكن:ايدي تشنجت على كيف خيطتة

دلهم:عاشت ايدج

غنوة:تدلل عيني

طلع گال عدة شغلة قفلت الباب وراه لحد العشرة رجع كعدنة برة مخلين كراسي و مشتي بقلاوة رفعهة الي يوكلني 

غنوة:دلهم اسأل مو شقة شنو تسمي 

حجة يمسح لحيتة:من يجي عود يجي اسمة وياه

غنوة:وين لاگيهة هاي رزقة وياه مو اسمة

دلهم:بكيفج سمي لتردينة

غنوة:ابالي أسم حلو سمعتة من مسلسل

دلهم:نورينة

غنوة:بـــراء

دلهم:اسم بنية 

غنوة:يصير للولد حبااب

دلهم:خل نشوفة و نقرر بعدين 

حجاهة التفت ليورة گام من سمعنة صوت مثل شي طاح اجانة صوت حجة:ابوو الغيرة كاعد نايم 

اشرلي ادخل گمت بسرعة واكفة يم البردة ابتسمت

اشوفة صفوان حجة دلهم ينتر:شجابك 

 رد عليه يمسح بالتراب:يمعود طگت روحي صدك جذب يگول جلب اجرب

دلهم:اهووو شحجينة احنة

صفوان:نسيت وداعتك

حجاهة حاضن دلهم ضحكت گوة حضنة يفشر عليه

فتح باب الاستقبال دخل يسولف وياه اول مرة افرح من اشوفة رحت سويت جاي 

رجعت اريد اگلة اذا اسوي عشة لو لا تذكرت حجي رفا خطية ماعندة واحد يسويلة يجوز جوعان جاي من طريق بعيد

وصلت يم الباب اريد ادگة سمعتة گالة:لاتكفرني خيولون نصيحة الك اطلع ذولة ما وراهم خير دشوفة هسة سوايتة على البال على الخاطر يخطف رفا حتى يسوي مشكلة بينة يريدك تضل وحدك يفترسونك هو و صلاح جذب ليگلك متخاربين

دلهم:وين اطلع تهريب ماروح توبت اخاف عليهة حامل مو مال اوديهة هيج دروب على البحر 

صفوان:خليهة هنا تولد و بعدهة نسفرهة الك

دلهم:لا ما اعوفهة 

صفوان:ولك گ***" من ساعة لزموك بيهة لو طالع بذيج السنة من خرب روحك المن رجعت

دلهم:واعوف اسراء هيج شبييك انتة جنك ماتدري بالصار

صفوان: اسمع مني روح تهريب و اني عهد علية اضمن سلامتها و اوصلهة الك وعد

دلهم:ماتكدر لصلاح و نعمان سوة يغرونك مثل حاتم هسة اني دايس على روحي و مسكتهم

صفوان:تضل يبلونك بمصيبة

دلهم:بس اوصل المطار يرجعون يفتحون القضية اطلع تهريب اني هنا مامدبر العيشة لا شهادة لا فلوس امشي بيهة وضعي ماكدر اعوفهة

صفوان: القضية صارلهة سنين وانتة همة ما اشتكو بوكتهة 

دلهم:يخلونهم يشتكون هذة جعفر يريدلة حجة 

صفوان: حجة على شنو اخوه هو الورطك

دلهم:اخوه ماجبرني اني جنت غاسل دماغي خرب باليوم لشفتة بي 

صفوان: سلم روحك شگد يحكمونك خلي روح لجعفر خل يفتح القضية و يرجع يشتكي عليك 

تقربت گلبي يرجف من السمعتة حجة بهمس:وغنوة

صفوان:لاتخاف عليهة وعد على گص رگبتي ينمس طرف منهة 

الفصل الرابع والعشرون من هنا 

شكرا لزيارتكم عالم روايات سكيرهوم