رواية كريات الدم السوداء الجزء الثاني الفصل الثانى والعشرون بقلم زحل شريف
___بنين__
_ طفه كلشي بيتنا، انشلت حركتنا مانعرف شنسوي
جان املنا بالعملية ومن عرفنا فشلت ،ادمرنا أبوي
وامي انهارو ، ايام وليالي هو رافض احد يشوفه
وبقى بالمزرعة والولد يروحون يمه أبوي انتهى
ليل نهار هو ضغطه معلك اجو عمامنا وضلو يحجون عليه وخوالي وأكثر شخص متأثر هو خالي
الجبير الي معتبرة ابنه.
الخال::لو أعرف ابيع كل ما أملك ولو علاجه بااخر
الدنيا هم اخذه بس خلو يرتاح فترة .
_وهيج صار وضع بيتنا يوميه ينجمعون، وحديثهم
اسعد وحالته ,بعد فترة دزو اريج يمه
وفيه::بلكي من يشوف ابنه نفسيته ترتاح.
_اخذها مولي،الي بقى مرافقه .وابوي كل شويه
يتصل يطمن عليه ، وهو مرة يجاوب ومرة ماله خلك يحجي .
ثابت::يابه لاتلح عليه ترى تعبان وموجوع.
أبو اسعد::مابيدي غير الدعاء بس عود ردت
اسمع صوته .
_متت قهر على حالة أبوي ، گمت وانه احجي
يابه حتى انه مشتاقتله ، شتكول لو نروح انه وياك
ونسويها اله مفاجئه اكيد مايطردنا، باوعلي محتار
ايدو الفكرة امي وثابت.
وفيه::اي روحو .
ثابت::خوش اقتراح يله اتهيئو بين مابدل واجي.
_اخذنا ثابت،وشكد حجو عن حالته بس ماتوقعته هيج من شفته انصدمت ،وحاولنا مانحسسه
بوسته وانه امسح بدموعي ، وابوي يحاول يتصرف
طبيعي شال دانبي يبوس بي.واسعد يعتب على ثابت
الباشا:: ليش جبته الطريق متعب .
ثابت::غير مشتاقيلك انه شكو.
أبو اسعد::شايلين البيت انته وابنك .
الباشا::عامر البيت بوجودك يابه ،بس ارتاح
واجي مالي خلك الخطار وجماعتي اذا عرفو
بوجودي مايعوفوني.
أبو اسعد::ارتاح لاتشيل هم .
_طول كعدتنا اريج مانطقت ،ضلينا يمه اكثر
من ساعه ردنا نكوم وتفاجأنا بيها من كالت
اريج::اروح وياكم انتضروني بس الم غراض دانبي .
_وقبل مايسالها أبوي اسعد حجه هو .
الباشا::اخذوهم وياكم .
أبو اسعد::ليش يابه غير عائلتك يمك وابنك
خطيه ترى يستفقدك ويضل يبجي.
الباشا::مامرتاح هنا لان مايشوفكم مستغرب المكان ويريدني اشيله .
_دنك أبوي يخفي قهرة ،نكسر خاطري على
دانبي يريد أبو يشيله ويطلعه مثل قبل ، باوعت لمولي ونزلن دموعي غمزلي بمعنى لاتحسسينه .
ثابت::تمام خلي مولي ياخذكم وانه ابقى.
الباشا::لا خلو مولي يمي افضل.
ثابت::هيج صارت مولي افضل؟
الباشا::يمعود هو اگدر أمر عليه انته اكتب عريضه
يله افكر اكلك ناوشني ماي ,واياد احترم رتبته .
ثابت::من اشوكت صرت تحترم.
الباشا::من اتجردت من قوتي صرت
أخاف مو بس احترم .
_ماتحمل أبوي طلع يمسح بدموعه.
_حاول ثابت يلطف الجو .
ثابت::اي فرصه نطلع حيفنه منك ، نلعب عليك
بكد ما لعبت علينا، قبل ماتسوي العملية الثانيه
وترد العن من قبل.
الباشا::لو يكللوي اطير مو بس تمشي
هم مااسويها بعد انسى لاتفكر .
ثابت::ولك ماتخجل تخاف من الألم؟
الباشا::مو الم العملية ، الم انتضار النتيجة
موت بطيئ والكارثه من يكلولك فشلت.
_هز أيدة ثابت ، وهو يصيح على مولي حته يوصلنا
بس اسعد اصر على بقائه ، بوسته وطلعت وثابت
وراي شويه وتبعتنا اريج .بس طلعنا المزرعه استلموها أبوي وثابت.
ثابت::يعني تشوفين حالته مال زعل وتمضيك
انتي غبيه لو شنو ؟
اريج::شسويله هو كاره وجودنا وماطايق نفسه
وهذا يريده يشيله وهو من يشوفه يبجي يعصب عليه احتاريت وبعدين هو حته مايقبل انه اخدمه
اكثر اتكاله على مولي.
أبو اسعد::يابه هو بينه وبين مولي ميانه
المفروض تتحملين عصيبته ترى موهين اللي بي.
ثابت::شدة من يبجي ابنج تسكتينه اخلي
مولي يفرة بالسيارة يشتريله خو متعوفينه .
اريج::كلت ارتاح كم يوم وهم ارجعله.
ثابت::منين ترتاحين ولج مكلفينج بي شو مولي
يمكم ردناج يمه حته لا يستاحش،اذا من هسه مليتي هاي وهو يگدر يقوم بواجب نفسه جا لو
كالو يبقه العمر كله هيج شلون.
_صحت لا اسم الله ربي لايكولها نهى نقاشهم
أبوي ، وهيه ضلت بس تبجي.
أبو اسعد::خلص يابه كم يوم وهم ارجعي وبلكي
ربج يلطف بحاله ،قادر على كل شيء ، يحي العظام
وهيه رميم.
ثابت::والنعم باالله.
_ وبقى الامل برب العالمين اهلنا وناسنا ماقصرو، رغم التعب بس وجودهم جان ضروري ماتخلى هيج لمات من الحزازيه ، وقدر تحاول تتحمل صحت لامي سولفتلها .
وفيه::حقها تگابلن عليها مريم واريج.
_خلص احجي ويا مريم .
وفيه::شحجي وابوها واخوانها، واگفين ويا ابوج
والولد هسه مال حجي ،لاتسولي سالفه .
نغم::اي والله مو مال حجي خلص انه احاول
ابعدها عنهن .
_كم يوم وانه ونغم لازمين حراسه مانغفل
حتى لاتصير مشكلة،والي فاجئنه من أكتشفو
الحادث انو مدبر انخبصو عمامنا، عمي محمد عاف بيته وبقى مكابل أبوي وبناته رغم موجات ، بس مايعدن يوم وهمزين ازواجهن خوش ولد ومامنعوهن يجن من الصبح لليل وبقيه بناتنا لازمات المطبخ،،، اباوع لابوي انتهى .
أبو اسعد::ماتتخذو اي إجراء لحد مانشوف
حالته شلون تستقر حاليا ،تكتمو على الموضوع
اهم شي يكوم وبعدين نتصرف .
الخال::وانه من رايك لان لحد الان مالزمنا خيط
هاي معلومات ضعيفه بسبب تخطيط الحادث
وأفضل انو مايوصله خبر ترى يتعب اكثر.
_مخبوصين وناس تروح وترد علينا احس روحي تعبت كلش ونوب امتحاناتي صادفت ويا الهوسه
ياخذني مولي بس امتحن وارجع ،امي هم تعبت
كلش بحيث كالت لخواتي روحن لبيوتجن
زينب::يايمه اطردينا شنو؟
وفيه::يمه جهالجن اتاذت واجنه تعبنا
روحن لبيوتجن وهاي البنات مامقصرة، ابوج
يريد يجيب اسعد اهنا وهو مو حمل صوت وهوسه.
_وصدك من راحن هنه وبنات عماتي شويه هدء بيتنا ،طلعت من غرفتي لاكتني بنت عمي شايله أبن اسعد محتارة بي وهو يبجي صحت ،بيها يمعودة انطي لانه.
بيداء::شمرته على قدر وكسر خاطري
مستغرب منها مايريدها ، نوب هسه ابوج كال
جايينا ناس دخذي عفيه خل اروح اساعد البنات.
_اخذته ودخلت للصاله امي وعمتي إم جواد وخالتي ميسون كاعدات يسولفن واريج وامها ماخذاتلهن
ركن خليته يمهن بلغت امي ،راح يجون ناس كانت
وهيه تسأل .
وفيه::ها منين ؟شو بله خابري ابوج خل يجيني
_جبت نقالي واتصلت بي اجه خطيه
أبو اسعد::ها يابه محتاجين شي.
وفيه::غير نعرف كم شخص عندك
حتى نحسب حسابنا .
أبو اسعد::أصدقاء اسعد بالدوام .
وفيه::سودة عليه يمه .
أبو اسعد::ذكري الله .بنون شوفي شنو تحتاجون
_تمام هسه اشوف هز رأسه ومشه محني
ضهرة بلغت اياد بلي نريده وتسوك انشغلنا
كل وحده لازمه شغله.
نغم::بنون اخذي قدر حضرن لبن وماي.
_توجهنا انه وقدر نحضر,وشكد تعجبني تشتغل بهدوء ،مدنكه اكسر ثلج ودخلت مريم تحجي
عرفت قاصده قدر بكلامها.
مريم::يووو شكد بارده بعدج ماكملتي ترى هو لبن
مو قوزي وياريت انتي مسويته كالولج خلي بالثلج.
_رفعت راسي باوعتلها ، ماجنها تشوفني
ومستمرة تحجي .
مريم::شو وخري .
_ردت عليها قدر برود .
قدر::ترى مايحتاج كل هل كلام اتشوفين بنونه
تكسر بالثلج وهاي انه كملت ، لو ترحين تساعدين نغم افضل .
مريم::وشنو انتي توجهيني شسوي خير نسيتي
نفسج لو شنو .
_بسرعه شمرت الثلج بالسطل وكمت ، جريت
مريم للترك، اششش عفيه ابد مو مال هوسه
وبعدين انتي مو من حقج تحجين وياها هشكل.
مريم::اشوف دفاعج الها يابنت عمي .
_لان هيه ماغلطت بحقج . مريم سوالفج حافظتها
اشوف لو تبعدين عن قدر ترى مالها ذنب بالي بينج
وبين ثابت ,مانطيتها مجال ترد عفتها وتوجهت للمطبخ ، تبعتني مريم تنافخ ،لكيت قدر مكمله
غمزتل بمعنى اتحملي، صبينا وتغدو الزلم ،لحد ماراحو هلكنا ، بحيث اكلنا صار بسرع صار المغرب
الوقت يركض مدري احنه ماحاسين لان هوسه ضلت مريم مغثوثه وعافته وانضمت للصاله،طلعت خالتي لان اجه عليها زوجها ،انه والبنات صارت كعدتنا بالمطبخ كامت نغم وهيه تسأل .
نغم::نوب الحيرة بالعشه.
_اذا ماجانه خطار ، عادي شبقه من الغده
نحضرة للعشه، لا تهمين،
نغم::إم اريج هنا وأم مريم،راح اتبل دجاج
واشوي بالتنور ها شتكولن ؟
_كامن بنات عمي محمد وياها،
كفينا المطبخ انه وقدر ،،،وحضرنه جاي جديد، دخلت اريج شايله ابنها مريم شايله صينيه بيها استكاين الجانن بالصاله خلتهن على الكاونتر جرتهن قدر غسلتهن والتفتت عليه.
قدر::بعد ماعدنا شي .
_تمام جا خلي اروح أصلي ، لان اذا بلشنا
بالعشه بعد مانخلص لليل .
قدر::جا اخذيني وياج ليش تفوتني انوب اتعاجز
من يفوت وقتها .
_بعدنا ماعابرين المطبخ حجت مريم مسمعتنا.
اريج :من اشوكت؟
_والضاهر قدر فهمت السؤال ،درات وجها على اريج حاولت اجرها نكتت ايدي وتقدمت صارت
كبالها وحجت .
قدر::من وجبت عليه الصلاه .
_وماتوقعو رد مريم بهذا الخبث، حجت
وهيه مبتسمه باستهزاء .
مريم::مرة شفت مقابلة لفيفي عبد،سالتها
المذيعه هم تصلين.
_ماخلتها قدر تكمل بسرعه البرق صفكتها
راشدي خليت ايدي على حلكي متفاجئه
وحته مريم هم نصدمت،،،، ما توقعت تضربها
بحيث سكتت ثواني يله هجمت تريد تكامشها دفعت قدر وصرت بنصهن ،،، احجي ويا مريم
لا عفيه لا تسون هوسه، دفعتني وهيه تحجي.
مريم::دوخري ،اليوم اريد اكص ايدها
بت الگ،،،،الرقاصه العبدة .
_دفعتها قدر بقوة ، انركع ضهر مريم بالكاونتر صرخت تقدمت قدر بسرعه خلت ايدها على حلكها وجرتها اجن البنات يتراگضن وهاي ماجنها تشوف احد،ومريم تريد بس توخر ايد قدر من حلكها.
نغم::يا يا شبيجن صدك جذب.
قدر::بس وخري خل ادخلها جوى .
_يمعودة عوفيها وين جارتها ، وعلى هوستنا
اجت امي وتبعتها، أم مريم ، تقدمت تدفع بقدر .
إم مريم::ايدج منها يادبسزز.
_امي جرت قدر ، ومانطت مجال لمريم تحجي التفتت على أمها كالت الها .
وفيه:صوتجن عدنا ناس ، جيبي مريم
وتبعيني للغرفة .
إم مريم::لا نمشي لبيتنا الضاهر بعد مالنه
احترام ، ترى جيتنا لاجل اسعد .
_جرت بتها وطلعت بزعل،صاحت امي على قدر.
وفيه:: تعاي اريدج.
_حجت عمتي موجه كلامها لقدر.
إم اريج::شنو هل صلافه ولج انتي
شلونج تخنكيها هيج.
_تجاهلت كلام عمتي ودخلت لأمي
تبعناها انه ونغم .لكينها قافله باب غرفتها
ردينا للمطبخ عمتي مستمرة تسال بنات عمي.
إم اريج::وانتن شبيجن واكفات تتفرجن
عليهن شلون تخلنها تضربها.
_رديت ، عمه ترى مريم تعمدت تخلق مشكلة.
إم اريج::جان صحتي علينا قبل مايتعاركن.
_وقبل مارد حجت اريج.
اريج::هيه هاي أكبر ادبسزز ولسان مسويه
روحها فقيرة وهيه من جوى ليجوة ذاك اليوم خليت ابني .
_قاطعتها امي الي دخلت علينا وهيه لازمه
عبايتها ابأيدها .
وفيه::وهيه مو مسؤولة بي ابنج انتي تدرين
مايسكت عند احد.
_سكتت اريج وعمتي سالت امي وين رائحة؟
وفيه::لام علاء المرة طلعت بزعل.
إم اريج::طبعا تزعل جا تشوف هل ادبسزز
خانكه بتها .
وفيه::لا تضلمين بختج مريم متجاوزة عليها.
إم اريج::حته لو هم ميصير تسوي هيج،
_بعدهن يحجن دخلو أبوي يسال
أبو اسعد::خير شبيكم
_حاولت امي تلم الموضوع بس حالة قدر
ثارت الشك ، باوعلها أبوي دنكت تمسح بدموعها.
أبو اسعد::شكو ماتحجن،وانتي وين رايحه شو الزمه
عباتج
وفيه::البنات متحاجيات وطلعت مرت جبار زعلانه رايحه اطيب خاطرها .
_غمصت من دخلو ثابت واياد. وعبالك تحقيق
كل شويه واحد سأل شكو بعد ماتنضم حجت عمتي
إم اريج::قدر ضربت مريم.
_رفع رأسه باوع لقدر الي تناشغ, عاد امي كالتله
وفيه::اي لان متجاوزة عليها.
_تقدم وهو موجه كلامها لقدر
ثابت::شوصيتج شكايلج ، ونوب تعاركين تضربيها
_نفجرت قدر تبجي وتحجي.
قدر::يعني تغلط عليه واسكت .
_ابوي يباوع بوجوهنا عمتي ضلت تحجي
إم اريج ؛:اي جان عديتيها احنى بيا حال وانتي
تعاركين ، ولج غير كوة خلصناها من ايدج.
_صاح أبوي بيها
أبو اسعد::اسكتي خلي أفهم احجي نغم
شنو الموضوع.
نغم::عمو وداعتك ما جنت يمهن بنين واريج
همه بالمطبخ .
_باوعلها أبوي بمعنى احجي.
اريج:: قدر تجاوزت .
وفيه::زلمتج بين الحياة والموت ، لاتضلمين
اريج::اي الحق لعد اجذب ، وحتى وان ذيج غلطت
بس مايستوجب قدر تكتلها .
_درت وجهي اريد اطلع من يمهم واستوقفني
صوت أبوي .
أبو اسعد::بنونه منو غلطت
_باوعت لقدر الي تنضرلي ودموعها تصب وثابت
واكف على اعصابه واياد يخزر بنغم . دنكت محتارة
صاح اياد
اياد::حزورة شنو ماتحجين
_سولفت من بدايه دخول مريم واريج المطبخ
لحد الغلطه سكتت گتلهم ،استحي احجي الكاتبه
مد ايده ثابت جر قدر يريد يطلع لزمه اياد
أبو اسعد::شكالت مريم احجي بابا.
_حجيتها كوة ، رفعت راسي اباوع الهم .
أبو اسعد:مولي خابر جبار .
_حجاها والتفت علينا
أبو اسعد::حاضركم يبلغ غايبكم قدر بمقام
بنين بالنسبه الي،تسمعون لو لاااااا
_عمتي درات وجها ماقابله واريج ذبت حركته
بدانبي صاح اياد
اياد::مريم مالها دخله لبيتنا بعد موضوعها
ويا ثابت خارج قوس وبالنسبة الي ولمرتي قدر
زوجة عمنا وعرضنا ،والغلط عليها يعتذر
_رفعت رأسها اريج باوعتله هز رأسه أي
كأمت وهيه تحجي.
اريج::لا والله ماعوزي اعتذر من هاي وكالت
مريم قابل جذب
_فزيت من اثر الراشدي الي توجه الها من أبوي
صرخت هيه متفاجئه، وعمتي گلبت الدنيا انخبص
بيتنا بصوهن.
إم اريج::تمد ايدك على بنتي ، وادي ، وهيه مكسورة بزوجها بدال ماتطيب خاطرها
أبو اسعد::ابني مو اعز من ثابت .
إم اريج::بالعافيه عليك ثابت ومرته، انه بنتي
مو رخيصه خلص اخذها وياي
أبو اسعد::اذا طلعت بعد ماترجع .
____سلاسل___
_نقذنا مولي وهو ينبهى عن وجوده .
مولي::وحطين الك ونه باشا .
_كلماته توجع الروح جر حسرة وهو باوعلي
ماعرفت شحجي هزة رأسه ها،، گتله تفضلو تفضلو ،جر حسرة رد بوجع
الباشا؛:والله وكت چنت افلش الباب ماتفتحينه
لو تدرين عندي رجلين ،جا ماكلتي ادخل .
_لا لا مو هيج بس خو ماتبقون بالسيارة
يعني اقصد ، قاطعني
الباشا::فوتي يابه مريت اشوفج ورايح .
_وين رايح؟باوعلي ودار وجه للشارع اشر لمولي يله
حرك السيارة ، ومشه جنه مايشوفني نزلن دموعي
التفتت على صوت السيارة الي دخلت من الركن
عرفتها مال طارق مسحت دموعي ، احاول اكتم شهكتي ماكدرت ادخل لان بسبب لايت شافوني بقيت واكفه نزلت مديحه تتلفت بخوف تباوعلي
وترجع تباوع للشارع،وطارق صف السيارة بصف
الباب.
مديحه::ها شبيج ياهو وياج شنو ليش واكفه هنا.
_تسال وتتلمس بيه ، بلعت عبرتي ودفعتها شبيج
يمعوده شكو قاطعنا طارق .
طارق::ها سلاسل خير ليش واكفه بالباب؟
_مدري شلون رهمت واجه ابالي هل عذر ,شبيكم شسالفه ،ثابت وقدر جانو يمي وهسه طلعوا
وانتو اجيتو ،ددخلو أدخلو،
طارق::لا اتاخر الوقت .يله سدو بابكم
_دار متوجه لسيارته صاحت عليه.
مديحه::اوكف نزل العلاليك .
طارق؛:همزين اذكرتيهن دوكفي خل انطيجياهن.
_عفتهم ودخلت غسلت وجهي ، شويه ودخلت وراي شمرت العلاليك على القنفه ونزعت شالها تفتح باازرار الصايه وتحجي.
مديحه::خرب شنو هل خنكه متت جني مگمطه.
_گعدت وانه انشف بوجهي باوعتلي،بشك ومستحيل يخفى عنها شي،نزعت صايتها وكامت وهذا طبعها لو تروح الاسواق براس الشارع من ترجع گبل تذب ملابسها بالغسالة ودتها ورجعت گعدت گبالي دنكت على النقال اكلب بي ،ماحسيت اله سحبته من مني وصاحت.
مديحه::لازم اگلج احجي يله تحجين.
_رديت ،والعبرة خانكتني شكو شبيج؟
مديحه::خوش عود .
_المهم انتي شنو روحتج ,ولج صدك تعاي شنو سالفه الدجاجه ؟تجاهلت سؤالي وكامت شالت العلاليك للمطبخ صحت طاح حضج مو جاي
نحجي وياج مثل البشر؟
مديحه::مو سألتج مثل البشر ؟
_تحجي وتركع بالكاونتر،
مديحه::تعشيتي لو بعدج؟
_ماشتهي, مدت رأسها باوعتلي وردت للمطبخ
كمت اخذت نقالي دكيت عليه مارد ،كتبتله جا اذا هيج ليش اجيتني،،،،ضهر خطين زرك يعني قراها شمرت النقال احس بروحي تعبت حاولت مابين
وهم ردت أفهم منها، صحت عليها هسه شنو
تحجين لو اروح انام ، ردت وهيه بامكانها.
مديحه::ماعندي شي احجي .
_خوش بگيفج يجوز ماتردين تحجين
شي خاص بيج گمزت من انرگعت الصينية ،
خرب ابوج شبيج اجت وكفت كبالي .
مديحه::لا انه ماعندي خاص بس الضاهر انتي
مسويتلج خصوصيه براحتج اختج ماتردين
تحجيلي عنها حقج .
_ رفعت راسي باوعتلها ,كل عقلج تحجين؟
مديحه::اوووو اله تشلعين كلبي احجي
متعاركه ويا ثابت بروح امج احجي،؟
_لا مابيها شئ؟
مديحه::جا ليش باجيه .؟
_هيج انه مختنگه ,دارت وجها جرت الشال شمرت
طرفه عليه لزمته متفاجئه ،جرت الطرف البيدها مثل الي يجر بحبل، صحت شبيج ترى مالي خلك
سوالفج
مديحه::يعني شسوي اذا اجر الكلمه منج
جر احجي مو عليتي گلبي .
_مو قدر ، الباشا.
مديحه::هسه شفتهمت ؟
_دنكت ودموعي تنزل بقهر، حجيتلها عن جيته.
مديحه::خلص بعد لاتراسلينه ولادگين.
_رفعت راسي باوعت الها.
مديحه::اگلج شنو عبالج سهله ترى غيرة ينتحر
رجال فار الدنيا فر بحيله،،، بليله ويوم يكعد على كرسي ، افهمي خسر صحته وشغله وكلشي
شتردينه بشهر يتقبل الأمر ويتصرف عادي.
_جا ليش اجه؟
مديحه::مشتاقتلي .
_حجتها وگامت جابت صينيه بيها لفات
وحلويات ،نزلتها بالكاع واشرتلي نزلي، نزلت وانه احجي شوفي مال اسكت عن سالفه الدجاجة .
مديحه::خل اكل أول ونوب احجيلج لان جوعانه .
_جا العزيمه مال إم طارق ماعجبتج
ليش جايبه لفات .
مديحه::لا مااكلت استحيت .
_معقولة ؟
مديحه::عود سويت روحي خجلانه لان شفتهم ينقشون اتنقش عبالك يأكلون مقبلات مو وجبه
ومحطوطه گبالهم .
_صبتلي عصير تاكل وتحجي ، گملنا وقبل ماتشيل
الصينية صحت بيها ،وسالفه الدجاجة شنووووو .
مديحه::اريد اعالج فطوم بيها .
_بشرفج يعني اول دختلج لبيتهم تحجين بهيج أمور
وهو حاجيلج عنها،،، رحتي متباهيع بطولات أهل الصعده ، شبيج بس كليلي .
مديحه::شوفي لو اغير جلدي مثل الحيه ، واروح
مشي لبيت الله ،والتربه تلزك بكصتي ، ماراح
تتغير نضرتها إليه .
_هم موهيج ،جان حاولتي تبينين مختلفه جنتي
مجبورة عايشه هناك ،مو تحجيلها سوالف
طشه ، المهم گليلي شلون تعاملت وياج.
مديحه::أول ماوصلنا دخلت البيت قلعه الحديقة
بگد بيتج امشي واتلفت لحد ماوصلنه للصاله
الي متوسطها درج واثاث يخبل البيت يلمع التفتت
عليه سالته بشك شنو محد موجود؟رد وهو يصيح.
طارق::لا امي موجوده٫ يممه وينج ?
مديحه:طلعت فطوم شاده رأسها بعلك باوعتلي وعكمشت وجها ،تقدم بسها وغمزلي بمعنى سلمي وقبل لا اتقرب عليها ردت.
فاطمه::هلا هلا بيه فلاونزه لاتبوسيني تنعدين.
مديحه::بلعتها وسكتت جرني من ايدي متوجه
بيه للتخم كعد وكعدني يمه، وسألها .
طارق::شنو ماوصل الاكل ؟
فاطمة::اي وصل هسه خالتك راح تجي حتى
تحضر انه مابيه اليوم راسي لازمني .
مديحه::ماطولها عليج ، كام هو جابلي بطل ماي
وعصير ، شويه وكال گومي اشوفج البيت كمت
ويا وهيه ورانا وكل مانوصل لغرفه أو مكان تقرأ
وتسمي كلت حقها تخاف من العين.
_قاطعنا صوت نقالها جرته باوعت للرقم
صحت ماتردين شمنتضرة ؟ غمضت عيونها
وهيه تحجي .
مديحه::نايمه ماسمعته.
_فكيت حلكي ،لا بشرفج ضلت لازمته لحد ماانتهت المكالمه اباوعلها بسرعه ضغطت على الشاشه عرفت سوته صامت حطته بصفها وردت كملت كلامها .
مديحه::اي عاد اجت خالته، وسلمت عليه جهزو السفرة گعدن هنه وحده بصف الثانيه وانه ويا كبالهن ، ماتسمعين بس طكت الخواشيك رفعت راسي لكيتها، تباوعلي،،، ابتسمت والگمه واكفه بلعومي دريت عدها حجي سالتني شلون جنا اهناك
حجيتلها مغشمه روحي انه امي ما جانت تخليني ادخل على احد ، ردت بنبرة بارده .
فاطمة::هاي منطقتكم قبل يسموها
شارع السود والهنود.
مديحه::هزيت راسي اي وطارق غير الموضوع.
طارق::اخاله ليش ماجبتي الجهال وياج.
_وقبل ماترد خالته أمه حجت.
فاطمة::زوجها ماقبل وانته تعرف ليش.
مديحه::حسيت بروحي اختنكت وهو حس
بيه گام وانطاني ايده كمت ، گال نصعد بغرفتي.
طارق:: لو نگعد بالحديقه؟
_بالحديقه, هز راسه تمام طلعنا برا كعدنه
يحجيلي عن وضعه ويا أهل أبو.
طارق::مديحه لاتهتمين لكل كلمه تحملي
فترة لحد مااصفي امري نسافر ، نستقر بتركيا .
مديحه::طلعت امه لازمتلها بطل تمشي وترشرش
دار وجه باوعلها وتحسر بقهر ، گتله لا تهتم عوفها
وصلت يمنا وبطلها بيدها ضحك وهو يخلي ايده
على خشمه .
طارق::امي لو جامعه فلوس الخل
جا اشترت بيهن البيت الركن .
مديحه::گتلها ترى الخل مايبطل السحر القوي
شو هاي اكرصت صاحت موجه كلامها لطارق.
فاطمة::ها شكتلك مادامها من ذاك الشارع تعرف
اي جا شلون خطبتها ،اگيد سولك شي هيه وذيج
السمرة ولك السمر أهل المكائد والزيران .
_ماانطته مجال يريد بس يسكتها ،
تحجي وترش گام وهو يصيح.
طارق::يمه گافي گافي تعبت .
مديحه::جريته گعدته والتفتت عليها اخذت منها البطل الي خلصته علينا ،گتلها صح كلامج أعرف وجنت احضر، جلسااتهم وانه ازغيرة لان خالي هو الي يسوي هاي الأعمال .
_خرب ابوج ، وشكو گلتيلها هيج ؟
مديحه::لان عرفت هيه مسويه بهذا المكان ومگلوب ضدها العمل .
_باوعتلها اي شيخه مديحه ماعرفتج شنو جنتي
تشتغلين وياهن بالوگفه مال الركن لو بالسحر؟
مديحه::هسه خل اكملج عن فطوم، الي سكتت وكعدت گبالي،، مثل بزون طشه المهم رهمتلي فلم ،من الجنت اشوفهن بالخرابه گتلها العمل القديم لازم تجيبين دجاجه سوده.
_ونوب تخابريني تساليني كملي.
مديحه::وبالاخص من خابرتج اقتنعت كلش
علمتها شلون تنذبح الدجاجة وبدمها تمسح جسمها ولازم تندفن وتبقه أربعين يوم ماتسبح.
_خرب ابوج ، ولج تخيس المرة أربعين يوم
ياضالمه وعليمن هل فلم خو أعوفها بسوادينها.
مديحه::وشنو انه صاعده وياها بسيارة ومن نوصل
كلمن يروح لاهله ، غير راح اگابلها العمر كله خو
ماخليها تچبسني بخلها .
_ شموازينا تولي وبعدين تعاي، انتي شعرفج
بالدجاجه وسوالف طشه ، باوعتلي وكامت شالت
الصينية ورجعت تمددت على القنفه وتحجي برود.
مديحه::جنه مأجرين البيت الي بصف طشه.
_يابيت الزويه؟
مديحه::اي قبل ماتصير زويه ،وبالشته مايدفه
لان الرطوبه ماكله حيطانه ، عاد انه استغل اليل الگهرباء ماتطفه اخلي الگيزر يحمه كلش اسبح .
_تمددت بمكاني استمع الها بتركيز.
مديحه::وتدرين انه ذگيه من زمان؟
_ماگو بذگائج كملي.
مديحه:أول ماادخل افتح الماي الحار
اترس الطاسه واضل اكاسر بجدر ثاني.
_وليش هيج ذكيه، خو كاسري من البداية.
مديحه::لا مو فكرت بين مااخلص الي بالطاسه
هو حامي من جديد.
_كملي يل ذكيه.
مديحه::وبيوم ترست الطاسه الجبيرة بحيث فرغت
الگيزر توني نزعت وطفت الكهرباء، ضليت محتارة
لايرجع الماي للگيزر وارجعه ولا اغطي ويضل حار.
_هيه تحجي وانه اختنكت من الضحك
صحت ، بالحالتين يبرد .
مديحه:: هم تعرفين تفكرين، إم اعطوب.
_احس. صفحتي وجعتني من الضحك وهيه
مستمرة تحجي.
مديحه::المهم ،،،،گلت حرامات يروح الماي هيج
ضليت أصب طاسه على رجليه وطاسه على اشمرها
على الحايط عود شني حتى يدفه.
_ذگيه .
مديحه::وروح امي دفه.
_ولج گملي نعست.
مديحه::لحد ما فرغت الطاسه وخف البخار
گمت اتلمس اريد اجر اهدومي شو صار ضوى
رگزت بالحايط هذا منين ادنيت اباوع ثاري اكو
فتحه بينا وبين بيت طشه ويمكن ملبوخه بجص
وهو البيت مو تايخ .
_وانتي نگعتي ماي طاح الجص.
مديحه::اي ولج انوب ماسكتت ، ضليت انبش المكان بظافيري لحد ما شلعت وصله من الجص
بس العجيب،،،،،مو الحايط كله بس هل مكان
بحيث فتحه. على كد العين شلون واحد مسويها
وضامها هيج ، عاد تدرين بيه خو مايصير مباوع.
_لا مستحيل.
مديحه::حطيت عيني اباوع ، بس عود شني عبالك گاعده بنص الصاله مال طشه ،،،الي صايرة نهار بسبب الشموع الشاعلتها ،،،،، نسيت حته البرد
خذاني الفضول اباوع هيه گاعده وجمريه البخور اكبالها والشموع داير مادايرها،،، ومدري شتقرأ
انوب گامت طبت لوحده من الغرف،،، ورجعت بيدها دجاجه سوده ،،دنكت سحبت خيط شدت رجليها ضلت الدجاجة تعوص .
_هيه تحجي وانه اتخيل الحدث ،من خوفي
گعدت على حيلي ،سكتت تباوعلي اشرتلها كملي.
مديحه::شگمل غير وجهج صار اخضر.
_لا بس بردت،
مديه::دكومي لفراشج لاتغفين هنا.
_لا خلينا هنا احسن بس جيبيلي غطه، گامت
وهيه تضحك،،، جابتلي مندر وبطانيه ومخده شمرتهن بالكاع نزلت تمددت وهيه هم فرشت بصفي ، كلتها كملي .
مديحه::جابتلها طشت وسجين حطت
رجليها على رجلين الدجاجة وعكفت جناحها وقدمتها للطشت وذبحتها، ضلت ترافس لحد ماسكتت گصت راسها خلته على صفحه ،وشمرتها
بالطشت ، گعدت ويمها أوراق شلعت ريشه وضلت تغطها بالدم وتكتب بالورقه لحد ماكملت.
_وانتي ماخفتي ولج انه من السوالف بردت.
مديحه::حتى النفس كطعته ماانتبهت على روحي لحد صاحت عليه امي شهكت بخوف من شفت الكهرباء جايه ضليت محتارة شلون اسدها امي
تصيح خليت جف ايدي على الفتحه ورديته اي يمه جايه ، دنكت اباوع شلون الم الجص ورجعه بمكانه
سحبت دشداشتي گضيت طرف الردان دحسته بالفتحه ولبست وطلعت طفيت ضوى الحمام
ورديت الم بالبچص بللته ماي ولطشته بالحايط.
_ونسدت افتحه.
مديحه::شلون ماجان بس ردت اطلع لان امي
شهرتني تصيح دخلت عليها استلمتني غلط
لحد مانامت انه افگر خاف حطاح الجص
شلون اسدها گمت ومدري منين اجتني الفكرة الجهنميه عدنا شويه طحين صفر خبطته سويتلي عجينه ورحت لطشتها فوك الفتحه .
_من خرب عقلج يعني لو لاكفتج طشه
جا ذبحتج بدال الدجاجة ، ردت وهيه تضحك.
مديحه::دسمعي جا عبالج لهنا وخلصت.
_لاتكليلي رديتي باوعتي ولزموج لا مستحيل.
مديحه::جا الانسان بي سوله.
_ولج سولتيش كولي دوده .
مديحه::هههههه وروح امي بس شلون ايام
عبالك جان عندي واجب احسب الدقايق شوكت يصير لليل حته اروح اباوع.
_يماااا ولج شلون، زين امج ماحست.
مديحه::لا انه اسبح امي بالنهار وتدرين
هيه لاتگوم ولا شي . ف استغليت الوضع بس
ما جنت متعمده .
_هيه الفتحه صاحتلج تعاي باوعي.
مديحه::ولج مو الحظ مدري أبو بريص
اكل من العجينه وطيحها ،،،لاتگليلي ولا اگلج
مثل كل يوم خليت امي تنام وطفيت ضوى الحمام
ودخلت وخرت العجينه،،،،،،، وحطيت عيني اباوع
وطشه ناصبه شموعها،،،،وكوة اشوف من دخان البخور ،ونفس الحاله هم جابت الدجاجة وشالت رأسها وشمرتها بالطشت بس هل مرة الدجاجة مدري ليش ضلت بيها روح ،، بحيث طفرت من الطشت گمزت طشه ويا گومتها عثرت،والمصيبه هيه حاطه على رأسها مثل الجرچف من طاحت صارت على الجمريه ضلت تصرخ وتخردلت نار الشموع حركن الگاع و الجرجف .
_كل هذا وانتي ضاله تباوعين،ويجوز الله
راد يحرگها وطفر عليها جني.
مديحه::عود ماردت اگلج .
_هو انتي شخليتي دحجي احجي.
مديحه:شلون واحد لازمها ويرگع بيها
بحيث أطك بهذا الحايط. وترجع لصفحه الثانيه
اخر شي انشالت ليفوگ ونرگعت بالكاع وگبت
الصاله مالتها كلها من خوفي انغمه عليه . فزيت
لكيت امي بعربانتها تشمر عليه ماي بس فكيت
عيني اشرتلي ماطلع صوت طلعت منا الخوف ومنا البرد بسبب الماي الي مسبحتني بي ، لطمت على وجها وتحجي بصوت ناصي ، كالت گومي شوفيلنا شي انسد بي الفتحه ، غيرت ملابسي والرجفه اموته
رجليه گمت عجنتلي عجينه بس خفت اروح للحمام
أخذت امي بعربانتها دخلنه لطشت الفتحه تمرضت
كلش عاد امي خابرت محابس وجاب سمنت وسد الفتحه.
_وطشه شصار بيها.
مديحه؛:اووو غير ضلن سلوم وصوله وام دعدوش
حايرات بيها منا الحرك ومنا الجني لابسها تالي سمعت جايبين واحد اسمه نيلش .
_شنو هذا بشر جن؟
مديحه::هندي .
_فكيت حلگي,بصدمه ، سألتها اوگفي يعني
كلام إم طارق صح من كالت السود والهند
بس هاي وين عرفت هل سوالف ؟
مديحه::چا انه ليش حجيت گدامها عن الدجاجة.
_شنو يعني ؟
مديحه::اكو واحد تعارك ويا واحد
گاله امي شافت امك ترگص بالكاوليه .
_هزيت راسي اي وهذا مثل سالفه.
مديحه::ثنينهن, المهم، هذاك گاله امي كاوليه
وترگص هناك ، بس امك شعدها رايحه وشلون شافت ، فهمتي يا ام اعطوب.
_صفنت بحجيها، والخوفه ضلت بيه.
مديحه::لادوخوين روحج ونامي هيه تصفى.
_ولج شنام وشتصفى اذا إم طارق هاي وضعيتها
ماراح ترتاحين خلينه ننهي هل سالفه، والله الغني
عن هيج زواج ، باوعتلي ماراضيه ، صحت ها بس لاتگليلي حبيته.
مديحه::لا بس يمكن احسن ويمكن فرصه .
_ احنه بعد ماندور فرص الف الحمد الله
مادام عدنا بيت لأمنه وهم فلوس ترى مانجوع
وانه گلت ابلش اچهز الصالون.
مديحه::هو انه ماحددت وقت عرس خلي نشوف
سالفة الجنسيه وهم اطيح على علت فطوم ،المهم
انتي شنو راح تسوين ويا الباشا.
_خاب ياباشا غير نسيت حته أبوي
من ورا سوالفج تحجين صدك.
مديحه::خاب هذا قطرة بحر من الحجيته الج.
_احجي احجي بعد شمفينه.
مديحه::لا وروح امي تموتين
_وانتي خايفه عليه احجي.
مديحه::خصم الكلام من بعد فترة رجعت طشه
تشتغل وهم رجعت اباوع وبيوم لكفتني.
_صرخت لاااااا.
مديحه::مختصر مفيد ، سحلتني لبيتنا
كسرتني تكسر ، واخر شي حطت راس الدجاجة
بحلكي خلستني بحيث شهر ماحجيت .
_قاطعنا صوت الأذان لان اكو حسينيه قريبه
علينا فلصوت كلش واضح ، التفتت عليه .
مدينه::اكلج عود احنه ليش مانلتزم بالصلاه.
_چا ماتكولين لروحج إم الدجاجة السوده.
مديحه::دگومي والله بعد ولا اگطع صلاتي.
_لا وانه ثابت شكد علمني ادعيه وحته أبو بشاير
وام بشاير الله يذكرهم بالخير , گمنا صلينه وهيه
طفت الاضويه بس انه مادري ليش ضلت بيه خوفه
نامت هيه بقيت اتگلب ونوب صارت سولتي اباوع
جوى الفنفات ومدري شنو يتراولي، گسرت خاطري
ماگعدتها تشغل الضوى لزمت نقالي أكلب برسائل
الباشا ، حسيت بروده لزمت رجليه ،مدري شلون غفيت، ويمكن لان افگر بالسالفه حلمت ، انه
بالصعده، شفت هواي شغلات ومن ضمن الشفته
الزويه شكو شي حجته مديحه ،،،،،بس الي رعبني
طشه سنونها اشلون مال الوحش وحته اضافرها
التفت عليه باوعتلي،،، مالحكت اشرد جرتني دخلتني
للزويه والگاها متروس أنواع الحيوانات خو الدجاج
الأسود ، يمشن بدون روس ،وانه أصرخ وادفع بيها اريدها تعوفني طفر عليه أبو بريص بس كلش جبير شهكت وجن. راحت روحي ، فزيت مامصدگه اباوع مديحه گبالي ،
مدينه:خرب ابوج وگفتي گلبي.
_گوى افتح عيوني وهيه مستلمتني حجي.
مدينه::شبيج ماتگليلي مو نمنا مابينا شي
شجاج وهيج اشتعلتي نار
_شهكت من ابرودة الخاولي الحطته على گصتي
مابيه احجي جسمي مكسر ارجف نيته برد
احس نار تطلع من عيوني وحلگي يابس ، كوة احجي ولج غطيني بعد.
مديحه::شغطيج يمعوده غير مشتعله انتي
دگومي بس خل اشربج علاج اغسلج بلكي تفكج
الصخونه
_جريت الغطه وصحت ولج غطيني ،احس رجليه
صاكات برد اريدهن بس يدفن ماكو ضلت هيه
كل شويه تغط الخاولي بالماي وتحطه على على گصتي مابيه احجي غمضت ومدري شكد مر وقت
صحيت گوى افتح عيوني وهيه مگابلتني ،وبس اغمض تخلي الخاولي على وجهي دفعت ايدها
مديحه::يمعوده بس اصحي شويه.
_ذكرتلها تفاصيل الحلم.ضلت تلوم بروحها ،كلمة افهمها وكلمة لا گامت من يمي غمضت وجسمي كله يرجف اسمع صوت قدر،تحجي وتسال بخوف.
قدر::شبيها،اي غير تخابريني مخليتها مدثرة.
_دنكت تبوسني وشهكت.
قدر::يمه شنو هاي مشتعله نار .
ثابت::دوخرن منها الغطه وگومنها للحمام
بلكي تفگها الصخونه
_حاولن يكومني ، جلبت بالغطه يمعودات عوفني
بردانه ولجن بردانه ، جرني جر للحمام مابيه ادفع
وياهن نوب قدر مشبگتني وذيج فتحي الماي عليه
شهكت ابجي احس نار تطلع من اذانتي وحلگي
مديحه::خوش دخل اجيبلج ملابس .
_بدلتلي قدر وطلعني كتلهن، دثرني فدوة راح اموت من البرد تمددت بفراشي ، دخل ثابت بيدة علاكه
علاج صاح على قدر .
ثابت::كومي سويلها اي شي تاكله حته تأخذ علاج.
_انسحبن ثنينهن ، گعد مسافه عني سالني بقلق.
ثابت::صاير شئ اكو احد غاثج احد اجه لبيتج.
_هزيت راسي لا .
ثابت::احجي سلاسل لاتضمين عليه شنو صاير
منو تعده عليج اكو شخص مهددج .
_لا شسالفه منو يهددني ليش تكول هيج
نوب كلمن يتمرض لازم اكو شي.
ثابت::جا ليش مراسله الباشا بوقت متأخر وكايلتله
خايفه من شنو خايفه احجي يابه.
_غمضت اريد اذكر ،نبهني يسال بضحك.
ثابت::غفيتي لو جاي تعصرين بذاكرتج، تلفونج
وين ليش مغلق .
_درت وجهي أدور ، لمحته على القنفه همزين
اجن البنات حطت الصينية قدر گبالي ،اشرتلها
على النقال اطتنيا وهيه تحجي.
قدر::ونوب ليش نقالج مغلق.
_باوعت يا طافي ترى انه ماغلقه.
قدر::دشربي هذا الحليب حته تدفين .
_سندت ضهري على القنفه كوة مسيطرة على الكوب ارجف بردانه جبرتني اكلت شويه من الفه
ونطتني علاج اريدهم بس يكومون حته اتمدد .
ثابت::وينها مديحه؟
_صاحت عليها قدر اجت سالها.
ثابت::شنو صار وياكم البارحة؟
مديحه::ماصاير بالعكس تعشينا وبقينه للفجر
احنه نسولف صلينه ونمنا فزيت على صريخها
شو لزمتها لكيتها نار.
ثابت::وليش من شفتيها بهل حاله مااتصلتي
انوب انه شكد خابرت عليج مارديت.
_التفتت ادور نقالها جرته وهيه تحجي.
مديحه::هاي شوف بعينك ناسيته صامت
والتهيت اسويلها كمادات .
ثابت:: يابه شيصير,خابريني ليش ضاله مدثرتها
ترى الصخونه لهذا الحد تسبب موت .لا سامح
الله
قدر::لا اسم الله .
_ضلت مديحه تبرر گام وهو يباوع لقدر.
قدر::ماروح ابقى يمها لحد ماتصير زينة.
ثابت::ماشي عود بليل اجي عليج.
_طلع ثابت، تمددت بفراشي وهنه مگابلاتني.
قدر::ولج الباشا حرگ علينا التلفون تخبلت
عبالي صاير بيجن شي .
_كامت مديحه جابت حلويات من الجابتهن باليل.
قدر::اي حلويات وگذا ؟
مديحه::اي چا وحد لو مايلوك .
_هن يحجن وانه اغفي صاحت قدر.
قدر::لاتنامين عفيه ترى ماتفكج الصخونه
دكعدي مشتاقتلج.
_كوة افتح عيوني ،كسرت خاطري
سندت روحي وكعدت ضلن يسولفن .
قدر::ولج مدوح غير مرات اتمنى كون انتي
وياي بيت الحجي .
مديحه::وحته انه هم تمنيت ماخذتج
وياي لفطوم .
_باوعت الها قدر بأاستغراب، وردت تسأل.
قدر::شنو اجتج لو انتي رحتيلها؟
مديحه::اي عزموني بيتهم, بس شلون گعده فاتتج.
_اي عيني بعد صارت فطوم عمتج منو گدج
احجي احجي شنو شلون وشصار.
_هزت ايدها مديحه، وردت بضحك.
مديحه:؛اتمنيت لو انتي موجوده.
_صحت بيها، اول مرة شوفي نقالج اكيد
هسه الولد متصل بيج ونوب سولفي ، واتمنى
تفگرين مثل ماگتلج، مامجبورة،كامت مديحه
جابت نقالها وقدر تتلفت بينا، تالي صاحت .
قدر::ماتحجن شگو . شصاير ترى گافي عليه
أفلام اريج ومريم مابيه حيل سوالفجن احجن.
_باوعتلها ، شبيهن وياج شصاير.
قدر::مابيهن شي ولا تضيعن الموضوع
احجلي شصاير؟
_ديري بالج تضمين عليه ياقدر اترجاج
لان اذا صارت مشگلة ساعتها ماادخل.
قدر::اوو مشگلتيش ترى عادي سوالف جناين
_خوش براحتج ، ادنت حظنتني وهيه تضحك
ردت تسأل بمديحه.
قدر:: احجي مدوح .
_سولفتلها مديحه عن فاطمه.ومختصر
عن أحداث بيت طشه الي حجتها الي.
قدر::شگد جانت امي تحجي عنها وتكول شر أعمالها مااصدك ،، ول بعديش, لو الله كاشفها
من جان عمي فاروق .
مديحه::وداعتج اريد اطيبها على عيب.
_دطيبي روحج ياحقيرة شوفي ترى اذا سمعت
بيج حاجيه بهاي السالفه وروح امي اخلي ثابت
يفسخ خطوبتج من طارق.
مديحه::لا كلشي ولا الأخ ثابت.
_دكومن ناوشني نقالي ،كامت قدر شمرته عليه وكعدت تداهر ويا مديحه ، فتحته اباوع يمكن
الف مكالمه من الباشا ، دخلت على وات ساب
اباوع راد على رسالتي من گتله خايفه.
الباشا::منين خايفه ليش شكو .
_وبنفس الوقت ضال يدز .
الباشا::وينج يمعوده ردي طمنيني خرب
روحج ولجج ردييييي .ليش هيج تتعمدين اذيتي.
_تحسرت أقرأ بكلبي .والضاهر مال من الاتصال
بحيث الرسائل بدون عدد ، آخر رساله قبل نص
ساعه.
الباشا:: شبيج منو وياج سمرة ،
_گتبتله مابيه شي وبس وصلته دك عليه
باوعت للبنات ملتهايات يسولفن گمت بغرفتي ورديت عليه ها باشا، صاح متعصب.
الباشا::خرب اعطوبج ، مو وگفتي گلبي .
_يا يا شبيك .
الباشا::بس كليلي صاير وياج شي.
_لا بس صخنت امس .
الباشا::ليش شصار وهيج تخربطتي،معقوله هيج
حالتي تكسر الخاطر بحيث اتمرضتي من شفتيني
_لا شنو حالتك شبيك شو صار احلى من قبل.
الباشا::هههه وتجاملين نوب .
_سكتت , رد صاح .
الباشا؛:منين خايفه وليش مراسلتني الفجر.
_حلمانه وفزيت خايفه وعبالي انته كاعد
راسلتك ،
الباشا::وتردين اصدك، يعني بشرفج ، هاي سالفه شگلتي لروحج ولج نايم ومن گعدت شفت رسائل ضليت محتار ،نوب جهازج مغلق .
_ضل يحجي وانه اصفن .
الباشا::اسمعي يابه أي شي يصير بلغي ثابت
اتمنى ماتتذاكين ، لان مالي خلك ولا حيل .
_ترى ماكو شي شبيكم.
الباشا::تمام اخذي راحتج.
_نهى المكالمة،،،طلعت لكيت بس قدر
سالتها چا مديحه وين؟
قدر::اتصل عليها طارق وطلعت للطارمه تحجي
ويا المهم انتي شلون صرتي .
_گعدت وانه احجي زينة ، شخبار اعيالج
قدر::لا جديد خطار طبخ جاي،ونوب شگد عدهم
عمام واقارب يبووو ادوخين،وضعج وياهن شنو
قدر::مرة ، ومرة وانه هم تعودت .
_الباشا مايجيهم؟ باوعتلي بشك، وشكد احب
هاي نضرتها تزغر عيونها وتضل مرگزة بالمقابل
قدر::امس اجه شخص والضاهر صديقه المقرب
بحيث گالهم مااشرب حته الماي ، اذا ما شوفه
اتصلو بالباشا كالوله واجه ، لخاطر صديقه ماطول
شويه وراح كالهم الناس من تسمع اجيت ماتفك
_الى متى قابل يبقه عايف اهله.
قدر::هو حتى أبو گال ،فترة ويجيبه لبيته وبلكي
يسوي العمليه الثانيه.
_سكتت وهيه بقت تحجي ،عن بيت
اعيالها وصايره مثلهم ، دخلت مديحه استلمتها نصائح تمددت وعيني عليهن مرة يتعاركن ومرة يضحكن .
مديحه::وروح امي شبيج خوفي الي تندك بيج.
قدر::اي ولج خوش فكرة نوب اسويها.
_فكرتيش ولج معليج بيها هاي إم الزويه.
مديحه::ههههههه بس بشرفج شلوني مو خرطتج
العافيه وصخنتي من الخوف جا لو امثل الشفته
واتقمص دور طشه .
قدر::هههههه ههه غير فاطمة ترش عليج
خل وتقتلج .
_لليل وهنه يگمزن جنهن جهال مرة يحفن
مرة يسون تنضيفات ، دك ثابت على قدر ردت بضوجه
قدر::خليني ابات .
_عرفت ماقبل اشرتلها اطينيا، ناوشتني النقال
وهيه فرحانه سلمت عليه
ثابت::ها يابه شلون صرتي .
_الحمد الله, بس لو تخليها اليوم انه مشتاقتلها
سكت ثواني نوب ،رد
ثابت::تمام بس الصبح اجي عليها لان العصر
انشغل ومولي ماموجود، يله في أمان الله.
_بقينا للصبح كاعدين كل شويه ادخل على صفحات
اباوع اريد اراسله واتردد ، نعست فرشن يمي بعد
ماخذلهن مشوار عرك نامن وانه هم غفيت ، فزينا
على صوت الجرس والباب ثنينهن يندكن سوى
قدر::شكو شصاير.
مديحه::خرب هسه غير اندل الشال.
_مدري شحطت على رأسها وركضت الباب مامصحصحين.والباب تفلش انتبهت النقالات
كلها تدك جريته باوعت رقم ثابت,خلصت
المكالمه قبل مافتح خط دخلت مديحه وثابت
وراها يحجي
ثابت::صدك جذب يمعوده ميتات.
_من شافنا بفراشنا دار منطينا ضهرة،گمت للغرفه اخذت شالي وطلعت غسلت اسمع ،قدر تحاجي
قدر::الفجر نمنا، لان البنات خلصن اليل سوالف
فماحسينا يعني ماسمعنا ترى عادي،شنو صار
مثل لو مخليني للعصر.
ثابت::الف فگرة اجت ابالي يمعودة.
_نشفت وجهي ، ودخلت يمهم صبحت وگعدت.
قدر مزعوجه وهو هم داير وجه سالني.
ثابت::شلون صرتي.
_هزيت راسي تمام، باوعلي وابتسم
ثابت::شسالفه شبيجن مطفيات تدرون بيش
الساعه هسه لو لا .
قدر:: شعدنا دوام خلينا نايمين.
_حجتها وراحت غسلت ولبست صايتها.تفاجئت
من گام ناوي يطلع، حجيت وانه اباوع الها شسالفه
عاد فكي ريجج . دنكت باوستني وهيه تحجي
قدر::لا مو هو عنده شغل يله عود اجيجن
ديربالج على روحج وشيصير خابريني.
_صاحت على مديحه.
قدر::يله دوحي رايحه عود وافيني بالاخبار.
_طلعت وياهم للباب التفت عليه
ثابت:؛رجعي يابه .
_راحو، بس انه كلش انغثيت دخلت لگيت مديحه
تلم بالفراش ،سوت اكل وجاي وجابته كعدت بدون نفس بس على مود العلاج اكلت .
مديحه؛:شبيج مصطگه ؟
_باوعتلها، وقبل مااحجي ردت
مديحه::ترى عادي رجال مايگدر يفارك مرته.
_بس مو هيج ،يعني لو عدها أهل ماتروح تشوفهم؟
مديحه::الاهل يختلفون .
_واهله هم يختلفون بحيث من الصبح لليل هيه
عدهم وعادي مرات تبات اذا هو مسافر ومن جان
يروح يم الباشا بس من تجي هنا ينغث.
مديحه::وعلى طاري الباشا ترى يمكن دك عليج
وانتي بالباب .
_تناوشت نقالي باوعت اي داك ومراسل.
مديحه؛:دشوفي؟
_گامت وانه اتصلت بي رد بس صوته مال واحد
نايم گتله ها عبالي گاعد لان شفت منك مكالمات.
الباشا::غير ثابت دخلني انذار گعدني .
_هههه يعني يتصل بيك انته يمي وتكعدني؟
الباشا؛:لا بس ضال محتارة وقلق خطيه.
_مدري ليش ضجت٫ رديت وشكو بقلق ترى عادي وهو شدعوى مصبح علينا شنو مستأجرتها
من ساعات ولازم ارجعها .
الباشا::وشبيج معصبه يابه؟
_مو معصبه بس ماعجبني تصرفه وماردت احجي
لخاطر قدر لا تضوج بس احسه مامعتبرني اختها
وكأنو مسوي عليه فضل من يخليها يمي ترى
اختي ومن حقي تجيني وتبقه يومين واسبوع.
الباشا::اهدي يابه مايحتاج كل هذا
مابيها شئ هيه تگله وتحدد الها يوم لزيارتج.
_هو غير ينطيها مجال اشو جابها وانه مريضه
وگوى خلاها ونوب اجه مغبش.عبالك يريد
يقطع علاقتها بيه.
الباشا::لا مو هيج ولا من حقه طبعا
لو اختج تأيد كلامج .
_اكيد والدليل كل مرة يجون تتوسل
لو تزعل يله يعوفها.
الباشا::شوفي انه ماردت اكلج وحته لاهلنا هم
ماحجينه لاجل لاتقلقون ،ترى الحادث مالي مدبر
واحتمال بستهدفون اي شخص يخصني ياريت تنتبهين ولو تقفلين بيتج وترحون يم قدر افضل.
_لا ماروح يم احد بيتي ما عليه شي ،
سكتت مستهضمه،عرفت شعله جكاره.
الباشا::خلص براحتج . ماجبرناج هو اقتراح.
لان حاسبينج منا فكتلج
_حجيت بعبرة ، لو هيج جان هو كال امشنا
لبيتي لو صدك حاسبني منه لا ونوب يكول صاحبتي
الباشا::لو بيه حيل جا گتلج
عوفي وصاحبيني ,بس مافيدج بعد.
_وانه گايلتلك شيلني على ضهرك وعبرني
الشارع ومابيك حيل.
الباشا::هو انه اريد واحد يشيلني هسه .غير كون
هذا لسانج ورجليه سالمات واجيج اسحلج بس اخ
_سكتنا شويه نوب سألني .
الباشا::شوكت تزوج مديحه؟
_غير منتضرين بلكي اطيح بأابوها.
الباشا::وين اطيحين بي؟
_حجيتله عن السالفه كلها وهو يستمع
لحد ما انتبهت لروحي جفصت من گتله سليمه
طلبت تشوفگ.
الباشا::شمعنى انه وليش ؟
_ماعرف بس انه نكرت تواصلي بيگ.
الباشا::اذن عدها علم انتي يمنا.
_شنو منين عرفت؟
الباشا::ماعرف بس اكيد اگو من ينقللها اخبار
_معقولة محابس ؟
الباشا::ايجوز ، المهم محد غيرها يعرف ؟
انه لو ماحالتي جان رحتلها.
_لا يمعود شتروح معناها تأكد تواصلي بيك.
الباشا::ولج انتي غبيه ، هيه لو مامتأكده
جا ماكالتلج .
_حته لو هم ماتروحلها ، تولي ثابت كال اخلي
الخال يحاجي محابس من يرجع للعراق يزورها
ويجيب منها الاسم العنوان, سكت ثواني ورد
الباشا::بله سدي شويه واخابرج.
_سديته وگمت لكيتها مفيضه الصاله، صاحت .
مديحه::اوكفي لحد مانشف لاتزلگين.
_خرب عقلج هو انه عايزه بعد بس الطيحه
گملت وكعدنا والباشا ماتصل لليل,خابرت قدر
ردت بس مالها خلك ، سالتها _انتي وين شو هدوء .
قدر::بيتي.
_شعجب راجعه من وكت اليوم جا ثابت وين.
قدر::مارحت اصلا ، وثابت عدهم.
_ليش مارحتي، ولاتكليلي ماصاير شي.
قدر::تحاجينه من رجعنا منج ونزلني بالبيت
وراح ومن جابني لهسه انه لوحدي.
_گلت بكلبي هو جابها لروحه، عود ماردت احجي
بس الضاهر فعلا مايريدها نبات يمي ،كتلها سمعيني زين ، يجي تحجين ويا تكليله اعتبر
امي وابوي موجودين وكل خميس وجمعه ابات عدهم .
قدر::هو انه بالشهر مرة وماقابل .
_شوفي هو لو بيده ولا ساعه بس انتي الي
تشرطين اذا رايده تحسبيني ردت بعبرة.
قدر::تحجين صدك ولج.انتي بالنسبه الي أهل .
_خلص لاتبجين مثل مافهمتج يجي تحاجينه.
قدر::واذا ماقبل ؟
_خابريني ومعليج قدر انه بعد مو بكيف احد
ولا أخاف نبقى بالشارع بيتي وعندي فلوس .
قدر::صدك ذكرتيني ،قبل كم يوم الحجي انطاني
افلوس الديه مال امي ، كلت اجيبهن الج
_لا مامحتاجتهن ضميهن ويا فلوسج.
قدر::انتي مو تردين تفتحين صالون اعتبريهن
دين ومن الله يرزقج عود سدديهن.
_اذا احتاج اگلج دروحي سبحي واكلي ولاتنقهرين
ترى هو يحبج وهم يغار ويخاف احجي ويا بهدوء
قدر::احبججج.
_سدته ،باوعت لمديحه هزت ايدها، كتلها ها شكو.
مديحه::سلامتها سلوم ، ولج شحنتيها ونوب تكليلها يحبج، خرب عقلج الجن الازرك مايتلحك
خططج بت الصخل.
_كمت كفختها، لاتجيبين طاري الجن بت التالف
مو خرطت العافيه بسببج .
مديحه::ههههههههه ماشفتي روحج شلون
تصرخين وانتي حلمانه . غير گلت راح تموت.
_اسكتي لحد الان الخوفه بيه، المهم شنو اخبار
طارق وشقررتو ؟
مديحه::قررت احبك احبك متحبنيش.
_عفتها ومشيت للغرفة لحكتني تضحك.
مديحه::خاب وين مانوصل خل توصل
_حجيتلها عن الباشا
مديحه::بلكي يحصل خبر.
_دخابريلي طارق اريده.
مديحه::لا عيني أخاف على خطيبي.
_جريت نقالي وخابرته وهيه تباوع مامصدكه
وبس رد فتحت صوت ،
طارق::هلا سلاسل حمدالله على السلامة.
_غمزتلها وانه ارد عليه الله يسلمك
اكول طروق، ضحك وهيه فاگه حلگها تباوعلي.
طارق::هههههه لايمعودة حسيتني اركض بالشارع.
_عود ردت تشوفلي شلون اركب گامرات لبيتي.
طارق::سهله هاي بعد شنو محتاجه؟
_حاليا بس هاي.
طارق:اعتبريهن انشدن باجر يمج.
_تشكرت منه وسديت الخط.وهي متخوصرة
وتباوعلي هزيت راسي شكو؟
مديحه::طروق يدري امس خليتج تطفرين
ماكلتيله يجيبلج ويا دجاجه سودة خاف تحاتجينها.
_گمت الها شردت ، ياحقيرة اوكفي لو بيج
خير مو لكوج مسحونه بالحمام إم الزوايه.
مديحه::المهم باوعت وشفت وتعلمنا.
_شتعلمتي اتخبطين طحين صفر تلبخين بي الحايط
ضلينه وحده تهدد الثانيه،،،، لحد مانامنا ثاني يوم
طارق جاب ولد ركبلي گامرات ونوب ماقبل ادفع
هو حاسبه ، وخلص نهارنا احنه مكابلين الشاشه
ونباوع شلون الجهال.
مديحه::بس صدك ونسه عبالك كاعدين بالباب.
_لليل اتصل الباشا، رديت وانه ادعي كون
محصلي خبر عن موضوع مديحه وصدك فرحني.
الباشا::شنو هديتي ؟
_گول شتريد، على هل خبر انطيك عيوني.
الباشا::سالمات يابه، بس انه اريد غير شي.
_شنو ؟
الباشا::موال گون يخليني اغفه.
_سكتت ،صاح بضوجه.
الباشا::خرب ابد مو وگتك ،
_شنو ؟
الباشا::مو وياج يابه اجو الولد يمي الضاهر مالي نصيب اسمع صوتج اليوم يله روحي نامي وانه اخابر ثابت وافهمه موضوع مديحه.
_شمرت النقال وطلعت لمديحه ولج وينج
تعاي بت التالف لكينا ابوج,باوعتلي وگامت
عبالي مدري شجيب شو هاي دخلت بيدها
الماسحه وتحجي .
مديحه::وين جان انه مو وصيته لاتطلع
_صحت هو شنو شبيج، هزت ايدها ماراضيه
وگعدت بس مختنگه ، ادنيت عليها گتلها تبجي
ليش، حابسه دموعج .
مديحه::مو عليه، على روحي لان المفروض
افرح بس اعرف راح ينگرني .
_اوووو ،فاولت الفكر، ولج هو وينه غير تشوفه
نفتهم گبل لطمتي . يجوز يطلع شريف ويتقبلج
منو كال ما نوب ياخذج مني.
مديحه::لا ماياخذني ولا يتقبلني .
_ها شني الهندي گالج؟لو دجاجه نوشه حجت بذانج.
مديحه::لا بس من كالت سلوم خل الباشا يجيني
عرفت مو شخص عادي ، لو من صفحت سلوم
لو راس جبير .
_وحتى لو كلامج صح هم مايهمنا احنى نريد
بس جنسيه وعسا ماقبلج ولا نريده,دكومي لفراشج
باجر ورانا گعده ، وقبل ماتسالين وين انروح لدكتور التجميل ،
مديحه::ترى اذا عملية ماسويها.
_خاب گومي لارفسج.
مديحه::يهد عليج أبوي يرفس بطنج.
_باوعتلها ، درات وجها ونامت ، وانه ماخليت إيه
ولا دعاء من الحفظنياهن ثابت ماقريته لحد ماغفيت كعدتني الصبح ،
مديحه::ترى نقالج اذاني.
_باوعت ثابت رديت عليه.
ثابت::كاعدين نايمين.
_كاعدين كاعدين.
ثابت::تمام دقائق واوصلكم.
_بسرعه كمنا بس شربت جاي اجه والضاهر
الباشا مفهمه .
ثابت::بس نخلي احتمال مايوكف النا ترى لازم
نرفع دعوى أثبات نسبة.
مديحه::كيفك بس انته اندليته عرفته .
ثابت::اي حسب المعلومات تقريبا ندليت
يله انه رايح اخذ الحجي ونشوف بلكي نخصمها
بدون محاكم .
_راح ثابت وانه مثل التنتضر خبر مصيرها
ايام وكل ما اساله يكلي بعد،لحد ما اجه كالها .
ثابت::لازم تحضرين لقاضي الشرعيه.
_اتفقو واخذها وراح واجت مزعوجه ها بشري.
مديحه::واخيرا راح انحسب على البشريه
_شفتي ، شسمه شلونه شكالج ماسألج
شي دحجي شبيج.
مديحه::شفته بس ماحاجاني ولا باوع بوجهي
بس كملنا طلع بدون مايلتفت.
_يولي المهم الهوية .
مديحه::اي الأسبوع الجاي استلمها
_مالحيت عليها عفتها تنفرد بروحها
ايام وهيه دموعها تصب وشكد مااكول عليها
ماتهتم وقويه بس حسيتها انكسرت اليوم خميس
اجت قدر شويه طلعتها من عزلتها.
قدر::خاب دكومي عليمن ضايجه وهسه احنى
شحصلنه من راضي مو جان محسوب علينا أبو
_ولحد مااستلمت الهويه يله اتنفست
التهيت بيها اجهز وجلسات الدكتور ومايخلص يومي بدون الباشا الي حالته من سيءإلى اسوء
دوم معصب مرات أتحمل ومرات انهي المكالمه
فتحت خط وحاولت احجي بهدوء سلم ورديت عليه سألته شلون صرت؟
الباشا::زفت ,
_سكتت صاح.
الباشا::الووو
_هاا
الباشا::چا شبيج ساكته؟
_شسوي ، اذا انته معصب اسألك تصيح
الباشا::تعبت ولج تعبتتتت.
_كسر خاطري ، حاولت اشاقي، كتله احسبها
فترة راحه .
الباشا::ولج راحتيش وانه مكسر بعربانه
_هنه رجليك يوجعنك يعني.
الباشا::كل شيء بيه يوجعني ،روحي نامي يابه.
_وهيج يخلصها وياي ،كم يوم ملتهيه ويا مدوح
الي استلمت الهويه وحددو زواجهم .
مديحه::هو مو گال مانسوي عرس
شو نوب قاعه وحفله.
_وانتي ليش مزعوجه ،خايفه على افلوسه،
خابرت قدر سولفتلها.
قدر::لا شبي ما عنده احد
همه بس أهل فاطمة عشيرة ،يله باجر اجيج
_گل ما يقرب موعد زواجها، ينعصر گلبي
شلون راح افاركج.
مديحه::ترى ابطل .
_عفتها وگمت هاي الفترة صارت مكالماتي ويا الباشا بگثرة يخلص اليل سوالف. اتصلت بثابت
گتله بس تزوج مدوح ابلش بناء الصالون
ثابت::والله ياسونه اشوف لو تجيني عندي
لان صعبة تبقين لوحدج .
_لا شعليه،
ثابت::تمام خير ان شاء الله.
مديحه::ها تصفن إم اعطوب ؟
_سولفتلها على ثابت، وقبل ماترد اندك الباب اجه
طارق جايبىلها غراض وهم نفتح موضوع بقائي لوحدي
طارق::والله انه محتار ، شلون من أخذ مديحه
يعني صعب تبقين لوحدج .
_يمعود دخذها وخلصني اصلا اريد ارتاح منها.
طارق::لو تجين يمي لو ترحين يم قدر .
_لا صعبه ولا شي،راح طارق ومديحه هل ايام جايتها الديانة كله محاضرات،،،،، مندمجه تسمع بتركيز
ومن ضمن كلام الشيخ ،الغناء والرقص. صفنت بكلامه خلصت المحاضرة وصار وقت صلاه .
مديحه::ها ماتكومين لو تغلسين .
_اگلج اذا كله حرام يعني صلاتي مامقبوله.
مديحه::ليش ؟
_مثل هسه انه اخابر الباشا ومرات اغنيله
ومرات يتغزل بيه ومرات.
مدينه::ومرات يسبج وينعل والديج.
_اي يعني حرام لو حلال؟
مديحه::تعذريني بهاي هاي الأمور
اسألي الأخ ثابت.
_راحت تصلي بقيت محتارة ، تالي خابرت ثابت.
حس بيه محتارة ،
ثابت::اسمعج يابه .
_ردت اسألك يعني هو السوالف يعني قصدي
شوف مساع مديحه مطلعه شيخ يحجي عن
الحرام والحلال وكال مايصير المرأة تتحدث ويا
رجل مايقربها
ثابت::فهمت يابه، اسمعي سونه حرام ومابيها
أي فتوة أخرى ، تحلل صداقة الرجل بالمراة
مادام مو من ارحامها .
_هو يحجي ومديحه اجت كعدت، يمي تستمع.
ثابت::والمكالمه الطويلة حظن عن بعد
كيف اذا كان الرجل يكن مشاعر لهل مرأة
والعكس ، ف الي اعرفه وماگدر افتي بغيرة
حرام حرام .
_سكت وانه هم ساكته.
ثابت::ها ياسونه سكتي.
_انه مامخابرة احد واصلا ماعندي احد
بس الباشا ،بس اذا هيج ، قاطعني
ثابت::متگدرين ولا هو يكدر ، لان حاليا انتي
الشخص الوحيد الي يحجي ويا ،تدرين هاي الفترة
نفسيته كلش تعبانه وحتى عليه مايرد.
_چا شسوي ؟
ثابت::ليش مانستغل قربه منج وبلكي تكونين
سبب بعلاجه ، ترى هو لحد الان يشرب ورفضه
لاجراء العملية تعبنا ، شتكولين لو تعقدون شيخ.
_بدون تفكير گتله لا .
ثابت::براحتج بس اذا انتي فعلا هامج صلاتج
لازم تقطعين تواصلج ويا.لان صلاتج وربج اهم.
_سكتت وهو نهى المكالمة ،التفت على مديحه.
مديحه::لا تباوعلي هذا شي يخصج.
_شكد صعب من تتعلق وتتعود على شخص
وفچئه يطلع من حياتك ،
مديحه::ونفس الشي هو هم تعود عليج
ويحبج ويريدج .
_بقيت محتارة دك عليه مارديت حاولت أبعد
بس رسائله تأذيني.
الباشا::ها سمرة بيج شي ليش ماتردين
نايمه اكيد ، من تگعدني خابريني.
_يومين وانه مثل المدمن گوة لازمه روحي
اخلص اليل بجي ، وهو يدك ويراسل.
الباشا::مليتي مني حقج يابه هو انه كاره روحي.
_اقرأ ودموعي تصب .
مديحه::هسه عليمن تبجين خو عقدو.
_شنعقد ولج اهله.
مديحه::وين يدرون هو عقد قابل راح انزفج.
_بعد ماتحملت خابرته رد برود .
الباشا::ها يابه شلونكم.
_بجيت . بصوت عالي .
الباشا::بيج شي احد محاجيج؟
_لا لا بس .
الباشا::بس شنو ؟
_سولفتله على محاضرة الشيخ.شتكول لو نعقد.
الباشا::الشيخ ثابت هذا، خلص انه بعد ماخابرج
الله يهديج ويثبت ايمانج .
_سده بوجهي،وهيج خلصها وياي يوم أغلق نقالي
ويوم مااتحمل وخابرة ،،،،، اليوم الحنه مال مدينه
خذتها قدر وعمتها للصالون،،، وانه ونغم التهينا
نجهز بالضيافه ،،،،وماتفاجئت بجيه اريج استقبلتها عادي وجابو مدوح جنها لعابه ونوب قدر الي لاعب
بخلقتها لعب رگصن ونوب منين هل كولات متگابلات ثنينهن .
مديحه::والمايلعب لعبتنا ؟
قدر::ايشل عنا ايشل.
_ونغم كل شويه تدخل بنصهن، صورن اجه طارق وامه وخالاته،حناها وراحو خلصت الحفلة وراحن البنات بقينا بس احنه .
قدر:مايصير نبطل خل نطيهم فلوسهم
وذهبهم وينطونا بتنا.
_مرة يضحكن ومرة يبجن عيني للكامرة
طبكت سيارة ثابت گتلها اجاج ترى.
قدر::لا وروح امي غير ابجي اذا كال امشي؟
_دخلت مديحه للغرفة ،طلعت فتحتله الباب
دخل وهو يسال
ثابت::ها كاعدين ،انه جان عندي شغل
قريب وكلت أمر .
_دخل عيونه ادورها شافها متخوصرة ضحك.
قدر::لا تكلي أجيت عليج.
ثابت::لا تبجين تخرب الكحله .
_انسحبت وانه اغمزلها ،دخلت يم مديحه.
مديحه::ترى ياخذها لان هيه بربوك صورت ودزتله.
_بعدنا نحجي دخلت قدر ادور صايتها وتحجي.
قدر::من الصبح اجي .
مديحه::دعبلي عزيزتي .
_راحت قدر ادردم خلص ليل بجي ثاني يوم
عرس بالقاعه، وهم إم الباشا ماقصرت رغم
فاطمة شكد سمعتنا حجي بس غلسنا كومتها
ركصت
مديحه::كليلهن خلي يحطن خشابه
_ولج مابيه حيل ،،،شبيج دسكتي فضحتينا
ركصتي اكثر من المعازيم، وبنين ماصدگت خبر
راحت كالت لام الديجي .عود أمها كل شويه ترزلها
وفيه::اذا شفت ركصتي اگتلج كدام النسوان يابنيه
_خلت امها تكعد واشرت لقدر كومن مدينه
ركصت اجت جرتني ولج عوفيني مااركص وخري.
مديحه::اخرب العرس .
_كمت وياهن وفاطمه وأخواتها وحبايباها
من شافنه هم كامن ركصت شويه ورجعت كعدت
اباوع بنين ماكو شويه ولمحتها باب الحمامات
ذابحه لحم تهز من گلبها ، وماتخرت حفلتهم
طلعت الناس واجه ساعة الوداع احس روحي انسحبت مني .
وفيه::كافي ماما خطيه مايصلح تبجين
بهيج يوم يله ادعولها .
_ودعناها اخذها طارق حاجزين بفندق
رجعتي صارت ويا ثابت وقدر، گتلهم نزلوني لبيتي.
ثابت::امشي ويانا عاد بس اليوم.
قدر::خير شو تحجي وگانو متأكد اروح وياك؟
ثابت::لو سونه تلطم مو تبجي ماخليج اليوم لاتعبيني روحج ابد .
_لحد ماوصلنا لباب همه يتعاركون گتلها روحي
انه أريد ابقه لوحدي تعبانه راح أنام ، كوة اقتنعت
دخلت احس البيت يخوف بجيت جانت ماليه عليه
الدنيا ، دك نقالي فتحت خط وانه ابجي
الباشا::حقج يابه بس ادعيلها خطيه تعبت.
_تعودت عليها انه احبها حيل .
الباشا::دمسحي دموعج وگومي فتحيلي كامرة
راويني شلبستي ،شسويتي.
_ هسه شحجي وياك.
الباشا::تمكيجتي شنو لون فستانج.
_اسود مطعم بذهبي وامك لحت عليه اروح صالون
بس صدك طلعت خلقه .
الباشا::أبوس الخلقه.
الباشا::هم ركصتي سمرة.
_شويه, لخاطر مدينه، تحسر بصوت عالي.
الباشا::يابه شكد مشتاقلج.وشتاق لصوتج والرگصج، وكل شيء بيج .
_بدون ماانتبه گتله حتى انه.
الباشا::لا ياالله ولج انتي ،تردين تنتقمين
مني ليش هيج ليش .
_شكو شسويت.
الباشا::من جنت اتوسل تشردين هسه من طحت بينت بطولاتج خرب بعطوبج ،غير كون الزمج هسه
_مو گتلت خلينا نعقد .
الباشا::سمرة زوجتي إم ابني گتلها الج حق لو طلبتي الطلاك ماضلمج وياي ، مو انتي وشجابرج برجل مقعد تخلصين العمر انتي ادفعين بيه . لا أكدر اسوق ولا بيوم امشي وياج لو اوكف لطولج.
_تسوي العملية وامشي ونرجع احسن من قبل.
الباشا::اذا مخليه املج بالعملية في ايسي.
_حجاها وسدة بقيت كاعده بمكاني اصفن.
كمت اريد ابدل ، دك عليه فتحت خط
وانه متوجه للغرفه .
الباشا::موافق ، يله إم الحرام .
_اي هو لان عرفت حجينا وسوالفنا محرمه.
الباشا::,خوش .
_سكتت رد صاح .ها، كتله اي باجر اخابر ثابت
غير هو يعرف شلون شيسوي .
الباشا::هسه .
_شنو هسه ترى ليل.
الباشا::مشكلتكم بعد ترى اذا تأخرتو ابطل
روحي خابري شلون يدبرها، بعد وكت وهو يندل الشيوخ .
_لا والله ماخابر هسه استحي,
الباشا::دمشي أنعل أبو شكلج
_وقبل مايسده صاح.
الباشا::سمرة مو تغيرين لبسج انتضريني.
