رواية بنات الحجي السعيد الفصل الثاني والعشرون بقلم شمس العراقية
جنات ـ جنت حاسه سعادتي ما راح تكتمل وهالأحساس
ما أجه من عبث من بعد ما وگعني تعمد ورجع جفص بطني ومن طلع حيدر هو صعد الدرج حيدر شافه بس أنخبص بيه وأخذني النزيف وكلهم فوك رأسي وصلنا المستشفى وهو خايف ويباوعلي وأني النزيف أخذني حيدر راح أموت ما أتحمل بعد الحك لأبنك فدوه .
حيدر ـ لاهيج تحجين جنات لالا ما بيكم شيء أتحملي عيني أنتِ أتحملي .
جنات ـ دخلوني گبل لصالة العمليات وهوسه برأسي والدكتوره عصبيه وأني شبه بديت أفقط الوعي وبعدها صحيت حيدر أبني حيدر
حيدر ـ الحمدلله على سلامتج حبيبتي .
جنات ـ أباوعله عيونه كلهن دموع ولازم أيدي تلسمت بطني فارغه حيدر أبني وينه ، صارله شيء لو أخذوا مني بالخدج أبني وين .
ـ الحمدلله على كل حال
ـ يعني شُـــنوْ أبني مات مو هز رأسه لالا حيدر لاتگولها أبني انتظره يوم يوم ومتت بحبالته ، أنهاريت وهو يهدي بيه واجتي فاطمه تواسيني وتسگت بيه بس أني گلبي تكطع فاطمه أبني فاطمه من جنت انشر ملابس هو جان يدفر بطني قوي شلون يموت بعدني ما شفته ما فرحت بي ، أبني هذا أبني .
فاطمه ـ الله يعوضج خيره جنات حبيبتي هدي فدوه لعينج شطالع بيدنا عساها بحظك وبختك يا كرار على هالمصيبه هاي .
جنات ـ تحجي هي وحيدر وأني صافنه ودموعي ما نشفت رغم وجع عمليه بس وجع نار گلبي على أبني أكبر وأجتي الدكتوره وتحجي وتسأل وأني أجاوبها .
الدكتوره ـ ماما عندج أسقاطات قبل هذا الطفل
ـ أي عندي
ـ كم شهر وسقطتي
ً ـ ما أعرف كم شهر بس بداية حملي
ـ تمام ، كتبت الج علاجات كامله تخلصيهن وبعدها من تسحبين الخيط تجيني العياده نكمل علاجج لان رحمج جداً تعبان والحمل ممنوع عنج منـا لسنه كامله الا أعالج رحمج ومشاكلج يله أسمحلج بالحمل فهمتي عليه جنات .
ـ أي دكتوره
ـ وأذا ما التزمتي بكلامي وحملتي لا سامح الله يمكن يقتلعون الرحم مالتج ، ديري بالج على نفسج وعندج العافيه حبيبتي .
حيدر ـ شوگت أكدر أطلعها .
دكتوره ـ اليوم ماكو مشكله خل يخلص علاجها وطلعوها
جنات ـ راحت الدكتوره وهو باوعلي وبعيونه هواي كلام بس سگت وصلنا البيت هو ساكت وفاطمه دارت بالها عليها ويومين هو ساكت وفاطمه يمي وأخواتي ليال ولقاء وياهم عمتي سلوى وعمتي نجاح اجو عليه ويسألوني ما كتلهم كرار ما ردت حيدر يزعل وينقهر مهما يكون أبنه ومن رجعت لحد الان كرار ما شفته
راحوا ودخل هو بس ساكت ، حيدر شبيك .
حيدر ـ ما بيه شيء .
ـ لا بيك صارلي ثلاثة أيام من طلعنا وأنت ساكت أذا على طفل هذا ما يمنعك تبقى ساكت وما تحجي وياي
ـ لا
ـ لعد شبيك
ـ بعدين مو وگته .
ـ طلع وعافني وسألت فاطمه كالت كرار دازه لخواله وراح يستقر يمهم على طول وفهمت خواله ما راضين على تصرفاته گلت يجوز بسبب اللي صار وكرار يضل يم خواله هو ضايج بس بعدين ربطت الأحداث وفهمت هو ضايج مني لان عرف اني مسقطه طفل قبل وهو ما يدري بهل الموضوع عباله بس غلطه بفترة الخطوبه وفقط ما يعرف باقي التفاصيل اللي ما أتمنى أحجيها أبداً مو عاد أحجيها لـ حيدر قطعة من گلبي .
وصار موعد التحاقه ودخل هو يحضر ملابسه حيدر تگدر تبقى أو تأخذ أجازه .
حيدر ـ الله كريم
ـ تروح لدوام وأنت زعلان مني أهون عليك .
ـ مثل ما أني هنت عليج
ـ قصدك لان ضميت عنك مو
ـ ما أدري سألي روحج .
ـ هذا الموضوع ما حبيت أحجي بي وما حجيتلك مو القصد اضم عنك لا والله .
ـ بس هيج موضوع ينضم وحامل ومسقطه والأعرفه غلطه بفترة الخطوبه! يعني جان لازم تحجيلي .
ً ـ بديت أحجيله وهو يسمعني وأني أحجي وابجي ما جنت متوقعه توصل الأمور لهل الدرجه خسرت أمي بسبب أنانيتي ونفس الوقت زوجة أبويه كدرت تسيطر عليه لحدما أمي ماتت ومن تزوجتك شفتك العوض عن الأذيه الشفتها بحياتي والله حبيتك وما ردت أخسرك بسبب الماضي مالتي ، ما جاوبني مشه وصحت وراه بعدك زعلان وضايج من عندي .
ـ ما زعلان وأذا ضايج ، ضايج من أبني أنتِ ما الج دخل وأذا فاطمه تسألج لاتحجيلها شيء خاص بيج وحجيتلي وخلص ينتهي وما ينحجي بعد ، وأذا اضوج فه ضجت بوكتها لان ما حجيتيلي .
ـ طلع وهو ضايج بس مو على أبنه أعرف ىي ضاج من عندي خرب بيومي على عالغلطه يا حب يا صخام برأسي والله لو عندي عقل هسه فلا احب وأدخل الحب بحياتي ما شفت منه بس القهر والأذيه وتالي ما تالي شحصلت أمي ماتت وحتى حيدر شبه خسرته وخسرت ثقته بيه ، أنقهرت وشكله كدامي شلون مقهور وسگوته دمرني وما راح الدوام ضل بالبيت وفاطمه قايمه بگلشي وسحبت الخيط وهو وداني وگملنا گلشي وثاني يوم التحق وأحنه ما نحجي .
راسلت لقاء ما موجوده وضليت أقهر بروحي والبيت يوحش عليه ومن جان هو راضي عليه البيت بحضوره وبغيابه البيت جنه بس من التحق وهو ما يحجي وياي
كل زواياه صارت تخنگني والوقت صار ما يخلص وأنطفيت بغيابه .
" هاي نتيجه أغلاطنا وأخطائنا تأثر حتى على مستقبلنا خاصةً إذا جانت أخطاء صعب تنسي وتنغفر واللّي بسببها نخسر أهلنا بسبب قلة وعيينا للأمور عبالنا الدنيا بس النا نعيش مثل ما نريد وننسى الأهل والسمعه وكلام الناس وأذية الأخرين على حساب سعادتنا اذا كانت العلاقه مع شخض متزوج مثلي أني وعماد ، وهواي أخطاء ما نحسب الها حساب لنتائجها وأستاهل اذا ضل مأخذ مني موقف أو تغيير عليه لان أعرف بنفسي غلطت ويه عماد وبقيت وياه وهو متزوج وضميت عن حيدر ماضيي فه من حقه يزعل ويضوج ما الومه بس يبقى عزيز قلبي وأحن شخص بدنيتي .
_____________________________
لقاء ـ لقاء ـ ومن كل هالمصايب والهموم لگيته وساندني بكلشي بدون مقابل لكيت بي الأمان المضيعته وعايشه بخوف حتى وأني بيت أهلي من الحياطين صرت أخاف عايشه حياتي بغابه وبوسط الوحوش والذيابه كلها تنهش من للحمك ...
لكيت الأمان قبل الحب وتفاصيله يكفي يكون سند ويخاف عليه بغض النظر عن باقي التفاصيل ، حبيته وكان أول حب ، أضيع والكه نفسي يمه أغرق بگومه مشاكل وهموم وأفكار وهوسه برأسي وارتاح من اسولف وياه .
أخفيت عنه مشاكلي وضياعي بوسط أهلي لان يبقون أهل وأسمنا مرتبط بإسمهم رضينـا او ما رضينـا وكل ثانيه أعيشها بسعاده وياه جنت أدفع ثمنها غالي عند جواهر وأخويه اللي حرام يتسمى أخ عباره عن گتل وسب وغلط وطعن .
وصح أني أعارك وأدافع وكحه وما أسكت عن حقي ولا عن حق أخواتي بس بداخلي ضياع وأتمنى أختفي من هالعالم العايشه بي طاقتي بدأت تنفذ وأحس ما راح أكمل للأخير ! .
بالصيدله وأشتغل بس بالي مو صافي ودخل وأبتسم لي ، أتفضل .
أمجد ـ أريد علاج لـ گلبي يوجعني .
لقاء ـ شُنو نوع الوجع نغزه ، ضيق تنفس ، نبضات قلبك سريعه ولازم تراجع دكتور أخصائي صدريه وقلبيه ويكتب الك وصفة علاج وبعدها تدلل أحنه بالخدمه .
ـ أكولج سردتي اليّه جريده ، بس يله ونوع الوجع أشتياق .
ـ أبتسمتله ما متوفر العلاج حالياً .
ـ لا هذا هو أخذت علاجي .
ـ ضحك وأخذ شريط براستول علمود لاحد يشك واخذت الحساب وراح وهو يباوعلي ورجعت گملت شغلي واخذت تكسي ورجعت البيت
ـ رجعتي البيت لو بعدج
ـ لا رجعت بالطريق
ـ مو گتلج من تطلعين بلغيني الدنيا مغرب والتكاسي مو كلهم أمان ، شبيج أنتِ
ـ لاتخاف عليه ، اتعشى وأراسلك
ـ تمام .
ـ وصلت البيت عمي وتعشينا ولكيته مراسلني
ـ أكولج حجيت ويه حيدر وبلغته راح يرجع يحجي ويه عمامج ويقنعهم يأثرون على أخوج ويوافق
ـ وإذا ما گدروا يقنعونا ويأثرون عليه شلون
ـ عادي حتى لو ما أعوفج أرجع أخطبج مره ثانيه وثالثه ورابعه وما أمل
ـ تمام
ـ شبيج شو ما عاجبتني .
ـ لا هيج .
ـ ما تطول ان شاء الله، بس يوافق أجيبج يمي .
ـ الله كريم وضلينا نحجي ونعست والصبح أجه نائل وباوعلي وما حجه وياي معقوله حيدر گاله ، رجعت لكيت أمجد مراسلني .
ـ أخوج رفض وما قابل نجيكم البيت
ـ شگال الكم
ـ طرده بدون مستحى گايله لاتجي ولا أتعبون نفسكم ما عندي نسوان لزواج بس ميخالف ولا يهمج حبيبي
ـ بعدين أحاجيك نائل موجود اخاف يحس ويسحب موبايل مني ويسويلي سالفه .
ـ تمام ديري بالج .
ـ عفت الموبايل وأجه تخصر وگف يم الباب وعصماء لمت رجليها وعدلت شالها .
نائل ـ شلونجن مرتاحات
لقاء ـ الحمدلله أخونا ما مقصر ويانا
نائل ـ أنتِ أنجبي .
لقاء ـ مشه صاير فد مكروه وغثه وبلغت ليال وعصماء وليال كالت
ليال ـ المفروض جاي گبل على عمي كريم نائل من الاوادم يروحله أنتِ هم مدري شلونج قابل ما تعرفينه
لقاء ـ هو گالي يروح على نائل شگوله لاتروح والناس شايفينه أخونا شمدريهم هيج غثه يعني حتى من يردون يجون بيت عمي كريم هو ما راضي شگد صاير مكروه . .
عصماء ـ البي خير الله يقدمه .
لقاء ـ وين الخير شايفينه ضالين من بيت لبيت سگتنا ومر كم يوم وهدوء وعلى تواصل ويه أمجد وجواهر بدأت تسمعني كلام وبسامير وطلعت تدري بأمجد نائل حاجيلها حبيب أمه ما يعرف يضم عليها .
كل هالفتره أحنه بيت جدي أو بالاصح بيت جواهر لان ما الهم دور الكلمه الأولى والأخيره بيد جواهر وأبنها هم صاحبين البيت وبكيفهم يتحكمون بينا وكل هذا وأني ساكته وشعور يخوف بسبب الكتمان والاذيه العشتها وتكون أصعب اذا كانت من الأهل تحس روحك بينهم غريب وما تنتمي لهل العالم ولا هذا مكانك ولا راح يجي يوم وأستمر بهذا المكان وبهذا الواقع!
طلع تعيني وبلشت أدوام بالمستشفى جنت احسن منهن أطلع واطب صح اسمع كلام من نائل وجواهر بس أهون ما جنت ادري بغيابي شيصير الا بيوم رجعت
ولكيت جواهر مگومة الملابس وعصماء تغسل عصماء شتسوين
عصماء ـ أغسل ملابس .
ـ أدري بس ليش تغسلين ملابسها وملابس ابنها ومرته ما تنزل تغسل ملابسها أحد كال الها أنتِ خدامه الخلفوها شو عوفي من أيدج يله.
ـ عوفيهن فدوه لعينج ما ناقصه مشاكل والشغل ما يتعب هسه أغسلهن وانشرهن شگو قابل .
ـ هسه اجي اني الهن خوش لكن خدامه ليال مسلمتها المطبخ وايديها مدمرات من الغسل والتنظيف وانت الملابس وغسل حمامات خوش لگن خدامه
ـ لقاء فدوه عوفيهن .
ـ شلت ملابسها وملابس رجلها وصعدت الها وتماضر ماخذه غرفة عمي سليم لان غرفة بيداء مقفوله نائل ماخذ المفتاح من يوم الماتت محد يدخلها غيره هو .
لكيتها نايمه جريت اللحاف وجسمها مكشف وعاطت عاطوا عليج شعندج نايمه لهل الوگت ساعه ٣ العصر وگت نوم مو خستي وريحتج طلعت
تماضر ـ شگد هجميه أنتِ وعود دارسه شيسمونها داخله لغرفتي شو طلعي برى لا اصيح عليج عمتي .
لقاء ـ صيحي علمود أحطج فوك عمتج وأكبسجن شاورما من أنعل ابوج لابو عمتج السگط شمرت عليها الملابس هنا ومايهن قذارتج أنتِ ورجلج أنتِ غسليهن عصماء مو خدامه الج ولخلفوج واذا شفت الج ملبس جوه اشنقج بي خوش سمعتي زين لو أعيد وعندج غساله فوك وغسلي مسلباتج فوك وجوه ما تنزلين .
ـ وأنتِ شعليج تتدخلين
ـ أني اللي أتدخل لا عصماء زوجة أخوي وما أسمح كأن من يكون يأمرها ويتأمر عليها فاهمه .
ـ لا والله أنتن شُنو شغلجن شو زواج وما تتزوجن بعد وهذا بيت اهلجن لعد البنت شتسوي بيت اهلها غير تخدمهم
ـ لزمتها من شعرها شگلتي ما سمعت أخدم منو وأذا أخدم بس أمي وابويه مو أخدمج أنتِ ورجلج ، لاتخلين شيطاني ينكز عليج وأشمرج من فوك على عمتج وأنصب عزاز ، خوش فه صيري خوش بنيه وحبابه .
ـ خلص والله بس عوفيني ميخالف أني أغسلهن
ـ أخر مره وتنزلين تساعديهن بشغل البيت والمطبخ والطبخ لو أعيدج الكتله اللي گتلها الج بيداء الله يرحمها ودخلتج المُستشفى تذكرين لو اذكرج شصار بيج .
ـ لا دخيلج لقاء عوفيني يمعوده ركبتي راح تكسرينها
ـ شوفي وسمعي زين بنت نجلاء أني وحده ما عندي شيء غالي على گلبي أخسره فقط أختي وزوجة أخويه وبناته والعباس أبو فاضل يا تماضر واللّي سماج تماضر اذا شفت منج تصرف ما يعجبني ، اصعدلج أخنگج بفراشج وأسويها فاهمه والله اسويها .
ـ لقاء دخيلج راح أموت لقاء عوفيني والله أخر ومو اني نزلتهن عمتي هي كالت نزليهن عصماء تغسلهن وليال هي ما تخليني أدخل المطبخ وأساعدها گالتلي أبقي بغرفتج أهتمي بنائل وبس .
ـ عفتها بحيث تطلب النفس ومختنگه ماشي يعني الشغل شغل عمتج عواهر .
ـ أي والله مو أني ، شعندي وياجن شو البيت بيت ابوجن أني شعليه .
ـ أي هيج صيري وحاجيني بهذا الأسلوب البيت بيت أبونا سعيد وأذا عبالجن مريض ونايم بالفراش وتستغلن غيابه وكلبتن عقله بالسحوره أمحيجن من الوجود .
عفتها نزلت وأسمع جواهر تصييح على عصماء
جواهر ـ صارلج ساعه بهل الملابس گمليهن وأمشي غسلي ورى البيت وصعدي نظفي طابق الفوك كله وغسلي السطح .
لقاء ـ عصماء عوفيهن لاتغسليهن اني شحجيت وياج شلتهن وشمرتهن عليها
جواهر ـ ولج تشمرين ملابسي وبوجهي ادبسزز
لقاء ـ أنتِ غسليهن مكسره شعندج بس أكل ونوم .
جواهر ـ أذا ما كسرت رأسج يا أدبسزز عبالج ما أعرف سوالفج وموبايلاتج أنتِ وأبن ثريا .
لقاء ـ سوالفيش شعندج طلعي ما خايفه لامنج ولا من الاكبر منج .
ـ اي طبعاً ما تخافين رأسج ما مكسر بس أني أكسره الج وأجفصج بالقندره أذا ما خليتج خدامه اليه وأنتِ تغسلين ملابسي أني مو جواهر بسيطه لقاء بسيطه
لقاء ـ دخلت غرفتها وهي تهدّد وتتوّعد وعصماء ما حجت شالتهن وغسلتهن ومسحت وجهي بقلة صبر ودخلت الغرفه غيرت ملابسي واجتي ليال وين جنتي .
ليال ـ جنت الف كبه ظهري اني وعمتي طگ توني خلصت ، شبيجن متعاركات
ـ هاي عصماء راح تجلطني ليش تغسل ملابس سليمه لا انوب ملابس نائل وتماضر لعبت نفسي شهل القذاره
ـ شتحجين يمعوده هذاك اليوم ما غسلتهن تعالي وشوفي شحجت عليه شعر رأسج يوكف زين جديتي سگتتها بس بعدبيش بعد ما فرغت بطنها .
ـ أصبريلي عبالج أعوفها والله ما أعوفها اكشفها اكشفها ام السحوره تهدّدني! ما تدري خليتها برّأسي اذا ما كشفتها وخليتهم كلهم يطردونها من البيت أني مو لقاء بنت سعيد! .
ـ شتسوين لقاء!
ـ شعليج ،أنتن الجن الصافي أني أعرف شغلي وياها كتلج قبل لـو اني لو هي أثنينا بهل القصر ما نعيش لعد اعوفها هيج على حل شعرها وسالفتج وفضيحتج اعبرها الها بارده مبرده ولا كأنما صاير شيء لا حبيبتي
ـ دخيلج عوفيها ما ناقصين مشاكل أحنه مو گدها هاي داهيه وعدها مية الف درب ، وتفر رأس أكبر واحد أنتِ ما شفتي جدي وجديتي شلون مت الهم كلمه بهل البيت وكلشي بإيدها هي وأبنها من كل عقلج تخلين راسج برأسها .
ـ لا أعوفها براحتها وأصير مثل أمي ومثلج ضليتهن ساكتات عن أذيتها وسوالفها لما كام محد يصدك بيجن وأمي ماتت وأنتِ أنفضحتي وزواج بعد ما تتزوجين خاف عبالج لان أسمج شطبت عليه بخط أحمر بالقلم العريض وكل هذا وتردين أنتِ أسكت ، ما تسكتين لخاطر الله
ـ ريد بروده الكاع وتعبنا من المشاكل ما شفتي شصار بينا من مصايب والله تعبت أريد أخلي رأسي عالمخده وأني مرتاحه .
ـ گلشي مخطط إلّه! حتى أنتحار بيداء ما أستبعده تكون ساحرتلها وخربطت عقلها والأ بنيه مثل الورده ليش تتنحر حتى سالفة أبتزاز! بس سهله أكشف گلشي .
ـ لقاء عوفيها .
ـ أنتِ بس ديري بالج على عصماء والبنات بغيابي وما الج دخل الباقي عليه .
ـ الله يستر منج ومن الّي بعقلج .
ـ ا جاوبتها بس أني تعبانه أكثر من الكل والوضع صار يخنكني وأشوف جواهر تتحكم بالصغير والكبير وكلشي تحت سيطرتها ماكو هيج شيء محد يوكفها عند حدها وينهي شر أعمالها بس يله اني وراها وين تروح مني .
صار وقت العشه وكعدنا نتعشى وتماضر عينها على الدرج تتنظره ينزل نايم بغرفة بيداء وجواهر اشرتلها وكعدت تتعشى وكامن عافن المواعين وين أمشي غسليهن .
جواهر ـ منو يغسلهن تماضر
لقاء ـ أي تماضر لعد منو ليكون تردين عصماء لو ليال لو اني اغسل .
جواهر ـ أي وشبيج أنتِ أمشي غسليهن .
ـ اخاف على اظافيري تماضر امشي المطبخ شوفي شغلج
ـ تماضر ما تمشين وجنتي بس تخدم رجلها والمطبخ ما توصله وتحركي أنتِ غسليهن يله .
الحجيه حليمه ـ وتالي ما نخلص من مشاكلجن حتى على المواعين متعاركات ليال جده گومي أنتِ غسليهن
لقاء ـ وين ما تگومين تماضر تغسلهن جريتها وجواهر كامت جرتها ودفعتني على ايدي .
جواهر ـ أنتِ امشي غسليهن لا ازوع سوالفيش كدام الكل وأولهم أخوج نائل وهو يشوف شغله .
لقاء ـ تحجي واني عيني على موبايلها بصدرها مشتغل الضوه مالته يمكن يتصل! ونزل نائل وكمت نفضت نفسي ومشيت المطبخ غسلتهن وتذكرت موبايلها هي أبداً ما اذبه بكاع! غير بي شيء وتخاف ما تبقي بمكان كله بصدرها أذن بي اسرار وبلاوي ومخليته صامت لازم أكشف شنو بي بس شلون أوصل اله شلون .
رجعت كعدت يمهم ونائل يتعشى وتماضر بصفه تحجي وهو باله مو يمها واجتي نجلاء وياها أبنها فهد! أول مره يجي بهيج وقت! بالعاده تجي بس هي وبناتها .
حليمه ـ هلا بفهد هلا جده
فهد ـ هلا بيج جده شلونج شلون عافيتج .
الحجيه حليمه ـ زينه الحمدلله ، أكعد جده أكعد اليوم شجابك ولك جده شمذكرك بينا أنت ما تجينا الا ندز عليك .
فهد ـ والله جده مشاغل ملتهين بهل الدنيا .
لقاء ـ هذا ما مرتاحه لجيته! ليال گومي يباوعلج گومي
ليال ـ شيباوع عزه هو أصغر مني .
ـ حتى لو گومي أشتم ريحة طبخه مستويه ما مرتاحه
ـ ماشي راح أخذ غنى أنومها تعالي حبيبتي .
عصماء ـ أني هم جايه وياج تعبانه أريد أتمدد .
لقاء ـ گامن وعمتي نجلاء گالت الهن .
نجلاء ـ وين كايمات شو بس أحنه أجينا أنتن كمتن لو تستحن من أبني فهد هو صح ما يجي دائماً بس مو غريب هذا أبني فهد .
لقاء ـ الله يخلي الج أسد الغابه .
نجلاء ـ أي والاسد مالتج تستهئزين حضرتج واكع بيدج
لقاء ـ شگو بيها أبن عمتي راحن ونجلاء سگتت ويحجن هي وجديتي وجواهر ما فهمت منهن گلشي ونائل كمل ويتصفح بموبايله وتماضر أطنطن يمه وعاط بيها الا گومها من مكانها
نائل ـ شو گوميييي ذبحتيني ولي من وجهي .
جواهر ـ أسم الله الرحمٰن عين ما صلت على النبي شبيك أبني على كيفك وياها .
نائل ـ ماكو هيج قابليه صارلي ساعه أكول إلها سگتي راسي يوجعني ما تسگتت دگول مكينه مشتغله فوك رأسي مو مره .
نجلاء ، تماضر أمشي بغرفتج .
لقاء ـ فهد راد يتدخل أمه منعته وتماضر صعدت تبجي وأمها هي وجواهر لحگنها! ونائل مشغل أغاني حزينه وجنى أجتي باوعلها وسحبها بحضنه يبوس بيها وهي ما تريده وتبجي منه عافها وباوعلي وأنزعج گمت اخذتها على عصماء يمكن تستغرب منه .
عصماء ـ تعالي وين تردين كل شويه تطلعين .
لقاء ـ طلعت من يمهن وگفت يم الدرج نائل گبالي بس ما منتبه وصعدت فوك على كيف وصلت الغرفه
جواهر ـ وين انطيج المحلات هسه خاف نائل ما يقبل
نجلاء ـ لعد شوگت مو قبل لا أجي گلتي تعالي وجيبي فهد وتدللي شو هسه غيرتي رأيج
ـ ما غيرت رأيي بس بعدني ما گلت لنائل وأخاف ليث هم مـا يقبل تعرفين واكف ويه باسل وبنات عمه سليمه التكرفه وتكرفهن .
ـ زيحي من طريقج شبيج .
ـ يله هسه أنزل وأني احجي ويه نائل لان هو ما يعرف بشغل الذهب أكيد يوافق ، لان هذا شغل سليمه باسل .
ـ أي روحي وأحسن ما ما المحلات معزله وحراماا گومة شغل متوقف خلي فهد يفتحه ويكعد بي هم الشغل يمشي وهو يكعد بي
لقاء ـ دفعت عليهن الباب خوش مخططات سريه يعني ما كفاجن دخلتنا السجن تردن تلعبن برزقه وبكيفج تنطين المحلات لفهد! ليش يابه أبن عم خال والمحلات محد يفتحهن غير باسل لا فهد ولا غير فهد .
جواهر ـ وأنتِ شعليج تتدخلين صمي حلكج ويله نزلي
لقاء ـ هو راح أنزل وأفضحجن ، نزلت ولكيت نائل يم الدرج يصييح علينا
نائل ـ هم رجعنا هم رجعنا شگو شبيجن ثكبتن من الله يأخذجن وأنتِ شمصعدج فوك لو جلدج يحكج عالمشاكل ما تعرفين تكعدين الا تتعاركين .
لقاء ـ نزلت وسحبني من أيدي قوي وعطت بي عوفني مخلت أيدي عوفني وصعدت اكشفت مخططاتهن السريه أمك وعمتك أم فهد الليّ جايبه فهد وجايه ما سألت نفسك فهد شعنده جاي اليوم! أني أكولك يردن ينطن المحلات الذهب لفهد والله احرك المحلات وما اخلي فهد يكعد بي ، خوش والله بالسجن ويكفيكم تلعبون برزقه وتعبه .
نائل ـ يا محلات يا فهد شتحجين أنتِ .
جواهر ـ وأنتِ شعليج تتدخلين المحلات محلات رجلي وتعبه ليكون عبالج المحلات بس لأخوج باسل لا عيني گلشي الّي ولابني وحيدي وأنتِ وأخواتج تتزوجن وزلمنجن هما يعيشونج لاتحلمن بشيء المال والمحلات والبيوت وكل الأملاك بس لأبني هو وريث أبوه وأخوج التحجين عنه نايم بالسجون شوگت يطلع لو ترديني أنتظره والمحلات الذهب معزله شعندي يابه .
لقاء ـ مــا أريد گلشي أخذي الج ولأبنج المال والبيوت وكل الاملاك أخذيها بالعافيه عليكم بس مال تنطين مفاتيح المحلات بيد فهد وهو يستلم الشغل بمكان باسل لاتحلمين بيها .
نجلاء ـ وشبي أبني فهد والمحلات محلات خاله وأحسن ما معزلينه كلنا نفيدكم وخل أبني يستلم الشغل ونائل فدوه لطوله هاي مو شغلته مو أبني شتكول عمه .
لقاء ـ نائل باوع على أمه وعلى فهد
جواهر ـ شيگول أكيد يوافق وين نلگي أحسن من فهد ثقه وأبن عمته مو غريب مو يمه نائل واحسن ما معزلينه .
لقاء ـ لا نائل لا توافق والله هاي مخططات بينهن وفهد شمعرفه بالذهب وشغل صعب وتجار مو كل واحد يدبرها أنتَ أكبر منه ما تعرفله وكلمن اله شغل الله عليك لاتوافق .
نائل ـ وأنتِ شعليج حارگه دمج وتتدخلين بسوالف أكبر منج أمشي أنكبري يم أختج يله
لقاء ـ مع الأسف عليك والله ، عفته ومشيت وقفلت الغرفه وعصماء تبجي حقها لان تعب رجلها اني أحتركت بنار ، لاتبجين وعيونج ما اخليهن يوصلن اللي أبالهن وأعتقد هما ما موقفين الشغل لان ليث وفارس وعمي يشتغلون بالذهب هسه ابلغه واخلي ليث يستلم المحلات .
راسلته ليث موجود أكو موضوع مهم وضروري رد عليه بسرعه وأذا تجيني للبيت أفضل بس بالأول احجيلك شجاي يصير ، رسلتها وما فاتح أنترنت خرب مو وگتك
أتصلت عليه مغلق شلون سالفه ورجعت خليت أذاني
نائل ـ لا يمه شبيج تخبلتي
جواهر ـ وليش تخبلت ليكون تسمع كلام أختك
نائل ـ لا مو أسمع كلامها بس هذا الشغل اله ناسه مو ياهو اجه اني عمر صارلي وأبويه بس راد مني اتعلم ما عرفتله صعب ويتعب يريد عقل فطن .
جواهر ـ وشبي عقلك أنت ما خليت بالك لان عندك شغلك ومصلحتك وهذا أبن عمتك مو غريب وهو خوش ولد ونعرفه على اقل اخو مرتك وأحسن ما تنطي لابن عمك ليث ما شفته شلون يحجي عليك وواكف ضدك ويه بنات عمه هو أصلاً بيت عمك كريم من يومهم ما يحبونا ولا يحبونك وليث يكرهكك بس يحب باسل لان مصالح عبالهم كلشي اله وانت لان وحيد ما الك شيء من الورث والمحلات
نائل ـ يمه وگته هالحجي كل سالفه دخلتي الورث .
جواهر ـ ولك يمه لاتضل فطير وأعلم بيك أنتَ بس أمشي ورى أمك ما تخسر خلينا ننطي المفاتيح لفهد وأنت هم اوكف على رأسه واذا تكدرله بعدين الزموا الشغل أثنينكم .
نائل ـ لا يمه مستحيل عوفي فهد .
جواهر ـ لا مو على كيفك وكيف أختك منين نعيش والمحلات راح اسلمهن لفهد ومن باجر هو يرجع يكمل الشغل
لقاء ـ نائل عصب عليها وصوته صار عالي ولاحظت جديتي مأديه جواهر وتريد فهد يستلم الشغل إذن الخطط من رأس الجبير أكص أيدي اذا ما طلعت نجلاء لازمه مستمسك خطير على جواهر وراح تسلمها المحلات وتسد حلگها! واضحه ما تحب تركيز ...
ليال ـ شوفي مـا فتح الرسائل .
لقاء ـ لا هذا نايم راح أروحله غطن عليه .
ليال ـ وين تروحين ألّه بهل الليل والابواب المقفله والباب البينهم مضروب سنجيل وقفل وأذا طلعتي الف سؤال تنسألين .
لقاء ـ هسه خل نشوفه بلگي يفتح ، ضليت أنتظر وصوتهم بعده موجود ورحت الحمامات وطلعت من باب الترك وأفتريت عالحوش وصلت الحايط شباك غرفته اظلم دورت على حصوه لكيتها وشمرتها على الشباك قوي وطك خرب أشسويت وگبل انفتحت الأضويه وفتح الشباك يباوع واني اشرله ليث شافني وركز وغمني
ليث ـ هاي سوالفج ليش كسرتي الجام شعندج
لقاء ـ اشرتله عالموبايل ودخل ورجعت من باب الترك وصار نائل بوجهي فزيت مرعوبه .
نائل ـ شعندج .
لقاء ـ شعندي قابل جنت اطير طيور عبرته ودخلت الغرفه وموبايلي بيد ليال ها فتح
ليال ـ أي كتبلج هاج جاوبي بسرعه .
لقاء ـ اخذتها اسفه كسرت الجام
ليث ـ لا عادي گولي شصاير مكعدتني من النوم
ـ شعندك نايم من هسه
ـ عندي دوام الصبح ونمت من وگت يله أحجيلي .
ـ حجيتله گلشي وضل ساكت بدون رد وأذا ترضى فهد يستلم الشغل اني ما اتدخل بس حجيت ومحد يسمع
مني وكلها ثكبت برأسي بس أكولها الك جواهر وراها مصايب ونهايتنا كلنا على إيدها وعمتك نجلاء شريكه وياها أذا ما طلعت هي الرأس المخطط وجواهر المدبر
ـ يعني فهد أهنا
ـ أي لعد شحجي أني ياباني
ـ من شوگت هذا الحجي .
ـ ورى العشه أجه هو وأمه وهو صُدك نظراته بس على ليال يعني الشغله مو بس محلات الذهب لان جديتك حليمه سليمه مأديه گلشي وتهلي وترحب وتمسح لفهد ، يجوز أبالها تزوجه ليال تعرف جواهر أشسوت وشحجت على ليال ما يحتاج أحجيلك .
ـ جايهم .
ـ هلا بيك .
ليال ـ ها شحجيتوا .
لقاء ـ هاج أقري كعدت تقرأ وسمعنا صوت ليث أوبا علگت علگها ابو نغم ، ها تطلعن .
ليال ـ لا روحي ما أجي
عصماء ـ أني هم مالي خلك .
لقاء ـ تمام وطلعت ويحجي ونائل يصيح عليه .
ليث ـ منو گلح الشغل موقفينه تحجين عشره بالشهر
جواهر ـ يعني تفتحون المحلات ورجلي مريض والأرباح والفلوس وينها اكيد بگتوا المحل واللي بي شفت نائل شفت من اكولك ما تصدگني طلعوا مأخذين المحلات وبكيفهم يشتغلون ويلعبون بالفلوس لعب شافوا ابوك مريض وانوب جاي علينا ويتهدد هاي أكيد اختك راحت گالتلته ودزته عليك .
نائل ـ وأنتِ شعليك بكلشي مدخل نفسك والمحلات محلات أبويه وأني أبنه الجبير عسى ما أكعد بيها كواويد بكيفي ما الك شغل بيه خليك بوظيفتك وشغلك لا والله ادخل القانون واسويها سالفه لاتعجبك ولت تعجب أهلك .
ليث ـ هنا كلمتين المحلات محلات عمي ومحد يكعد بيهن غير عمي سعيد وباسل والاثنين ما متواجدين وعمي يصير زين وباسل بعون الله اطلعه من السجن ما ابقي ومن يطلع هو يستلم المحلات والشغل واظن أنتَ شغلك تعرفه ما الك شغله بشغل باسل ومن عمي يصير زين هو يقسم كلشي بينكم بالتساوي وحتى أخواتك الهن حصه .
نائل ـ لا الظاهر شفت نفسك شوفه وكبروا رأسك هذولاك الناس واذا تحامي لنذل تكون انذل منه لا هو ولا أخواته الهم شيء يمي عاجبك ما عاجبك اركع راسك بحايط والمحلات محلات يمي وأني المسؤول عن الشغل .
ليث ـ لاتكوم تحجي وتجفص بكيفك هذا حق لا أنتَ ولا غيرك ينكره أدخل بعينك وأخذه واذا عبالك باسل بالسجن والبنات جبتهن يمك تسيطر وتكوش على گلشي وحاطلي اخوه مرتك وتريد تكعد بالمحلات ويستلم الشغل ويومين ويعلن افلاس والديانه تلزم الباب هذا الشغل ما يمشي عندي ، لا فهد ولا غير فهد يستلم الشغل .
نائل ـ أمشي منا وصايرلي باتمان كل هذا علمود ليال تباوعلك والله لو تعلك روحك من هدب عيونك ليال ما تشوفها ولاتشوف اظفرها
والنسخه يمي محد يستلم الشغل ويله أمشي منا .
ليث ـ كلامنا كلام زلم واحد يحاجي الثاني لا أدخل النسوان وتبعر السالفه خليك اصيل لو أمك عاميتك صاير طلي وعربانه بيد أمك وعمتك .
لقاء ـ هجم عليه وضربه وليث هم رجعله الضربه وجديتي فازعتهم وعاطت بيهم
حليمه ـ خلص كافي عاد خبلتونا بس متعاركين يوميه وأنت شعندك جاي بهل الليل محمل علينا .
جواهر ـ هذيج سليمه جابته .
ليث ـ محد جابني أني أجييت والمحلات عندي وكفيلك العباس أذا شفت واحد منكم واصل باب المحلات احفرلكم حفره وأطمكم بيها وأنت أبن عمي وهذا حقك بس من تصير رجال أصيل وعليك الأعتماد تعال أشلعلك عيوني يله سلام .
لقاء ـ طلع من البيت ونائل باوعلي وصــاح .
نائل ـ لقــــــاء
لقاء ـ ركضت الغرفه وقفلت الباب وهو يدك بالباب
نائل ـ أذا ما فتحتي والله أكسره على رأسج
جواهر ـ كسر رأسها هل البربوك كله المشاكل من جوه رأسها واسحب منها موبايلها هي راحت خابرته ادري بيها
نائل ـ لقــــــاء فتحي الباب راح أكسسسره .
لقاء ـ والله ما عليه وأني حجيت وياك وتوسلت بيك لاتسلم الشغل لفهد بس ما سمعت مني ورحت على ليث لان هذا تعب أبويه وباسل انطي بكل برود گلب لنجلاء وأبنها شمعرفني شيسون بي .
نائل ـ منو مسلم الشغل يا كواد واني وين رحت ليش شبيه مكسر أخلي فهد يستلم الشغل شتحجين
لقاء ـ گلت هسه تتأثر بكلام وعمتك وتسلمه الشغل
ليال ـ نائل أحلفك بروح بيداء وغلاتها ومعزتها بگلبك تعوفها هي من قهرها على تعب باسل راحت گالت ليث وما ردات احد يستلم الشغل بمكانه هذا تعبه صارله سنين وأنت أخوه وتعرف بإخوك .
لقاء ـ أختفى صوته يمكن راح ، فتحت الباب بس نجلاء واكفه يم الدرج تحجي ويه تماضر
نجلاء ـ شفتي وسمعتي بعينج بس حلفته بيها عاف الباب وعافنا گلنا وصعد لغرفتها أمداج ما جان تصيرين مثلها حتى وهي ميته متأثر عليها لو هذا هم حظي لا أنتِ حملتي ونبتتي جذورج وصرتي أم البيت ولا أخوج أستلم الشغل .
لقاء ـ باوعتلهن ها شلونجن شلون المخططات بعدها مستمره حرامات فلشتها الجن لو تموتن سيطرة كامله على هالبيت ماكو وأني كاعدتلجن أنتِ وبنتج وأبنج هم أجته دفره من ليث واخذ نصيبه وأنلطم على حلكه مكشخته ومسويته رجال وجايبته غمزتلها عبالج تفوتني اني لقاء بنت سعيد مكس منج يا عمتو يا حبيبتي
نجلاء ـ الله يأخذج أنتِ وعمتج .
لقاء ـ التؤام مالتج أني أموت تموتين وراي ماتحب غلط
شمرت عليه نعالها ونزلت رأسي ليش ما وكع برأس جواهر وعاطت بيها
جواهر ـ وثول يثولج يالدابه شگو تشمرين بنعالج عليه
نجلاء ـ شگو تصييحين وتغلطين وأني ما شمرته عليج .
لقاء ـ رجعت شمرته عليها ودخلت الغرفه اضحك سامعات من يكولون صارت بالنعل .
ليال ـ اي سامعين بس والله ما يسگتن الج عوفيهن يمعوده لا يرجعن عليج ويأذنج .
لقاء ـ خيولن شعوف منهن يله مهم المحلات اطمئنيت عليهن وفلشت مخططاتهن السريه .
ليال ـ أي هاج ليث مراسلج كاتبلج وينج طركاعه .
لقاء ـ أخذته وجاوبته هلا بالليثُ الغابه .
ـ شتعرفين أنتِ تعالي أحجيلي .
ـ گلشي أعرف والله
ـ أحجي بله
ـ حجيتله عن السحر وعن موت أمي وهواي أمور
ـ شُـــنوْ يأكدلج هي قتلت خالتي هيفاء عندج أدله تثبت هي قتلتها وليش ما حجيتي بوگتها يمكن جان كدرنا نكشف الحقيقه بوكتها عن طريق التشريح .
ـ وعلى أي أساس تصدگوني لان كل مره تصير ويانا أمور توكف شعر الرأس حتى موبايلتنا تختفي وأمي حجت الا بزعت كلها وگفت ضدها محد صدگها تريد يصدگون بيه والوقت جان صعب علينا وتعرف من ماتت أمي شصـار بينا فقدنا وبعد الفاتحه مو حجينا وأنت جنت موجود وشفت بعينك .
ـ أني وياج ومصدگج
ـ أي هسه بديت تصدگني من وصلنا حافة الأنهيار والنار وصلت ليال وأكلتها يله اجيت تسألني وتتطقس بابا شحجيلك عنها واللي حجيته الك شيء بسيط لو احجيلك الأمور السوتها ويانا من يجي الليل من جانت امي عايشه شعر رأسك يوكف .
ـ وتالي
ـ ما أعرف .
ـ ماشي نامي هسه والله كريم
ـ هسه سالفة المحلات يمك مو
ـ گلشي يمي لايضل بالجن هو عمي من تمرض سلمنا الشغل وطلب من أبويه محد يستلمه غيرنا أني متأكد عمي يعرف گلشي بس ما أعرف ليش ساكت
ـ أحس يجي يوم يصير ضدها
ـ لا ما أعتقد لخاطر أبنه ، يله عوفي السوالف روحي نامي تأخر الوقت
ـ أسفين طيرنا نومتك
ـ لا عادي .
ـ راح وليال وعصماء نامن وأني ضليت كاعده لكيت منه مراسله معلقه منذ أربع ساعات فتحتها هواي مراسلني أخر شيء كاتب
أمجد ـ هسه تطلعين متعمده ما تجاوبيني وأني محترك بناري.
لقاء ـ منين تجيب هالحجي هذا ، ترى بالبيت مو بالمُسِشفى أو بالصيدليه وأجاوبك براحتي أكيد أكون متقيده ونفس الوقت أخاف من نائل لا يكشفني .
ـ وينج وين الخوف شجابه عليج وأنتِ عشيره ما تردج أنتِ وتكولي أخاف!
ـ لا بس لازم أكون حذره .
ـ ما يحتاج باجر نجي على بيت عمج كريم
ـ تجون
ـ أي اجيب عمامي وخوالي وابويه وحيدر ونجي نشوف تاليتها ويه أخوج أبو رأس المربع
ـ ها يله الله كريم .
ـ الله كريم يله راح أنام
ـ وين تروح هسه .
ـ عندي دوام الصبح شسويلج هسه اجيتني وين جنتي من راسلتج
ـ ها هيج صارت الدوام أهم مني
ـ أي طبعاً أهم على أقل اطلع وأطب وأشوف وأستلم راتب يعني مستفاد أنتِ بشنو تفيدني بس قهر لگلبي .
ـ أي صحيح وتشوف بنات
ـ أهم شيء البنات هو شمصبرنا على الحياة غير البنات
ـ اي طلع الدوام مهم واهم شيء الكشخه والتغيرات اليوميه ملاحظ على نفسك صاير سرسري .
ـ ولج منو السرسري .
ـ أني ، أنتَ غير ليش كم سرسري أكو بحياتي عود استاذ وقدوه الطالب وخابص نفسك .
ـ خلف الله عليج يابه طلعتيني سرسري بس باقي تسويني متحرش بيج هاي الضلت
ـ يجوز متحرش بغيري شمدريني شتسوي من ورى ظهري الله يعلم
ـ لا ما أكدر أخاف منج
ـ لا واضح هواي تخاف جان أحترمت مشاعري وأشوف شتشوف شافك عزارئيل وكبعك وأخذك
ـ وأكبعج وياي هم خوما اروح وحدي لازم تجين وياي
ـ ما اروح روح وحدك
ـ هسه أريد اروح انام لو انتظر عزارئيل يجي يكبعني ويأخذني .
ـ لا انتظره
ـ وأنتِ
ـ انتظره وياك
ـ يعني تجين وياي
ـ أي لعد عبالك تخلص مني وين ما تروح اروح وياك
ـ زين لعد متفقين .
ـ أي ، تريد تروح تنام وأني روحي طافره ومتعاركه والدنيا محتركه على رأسي
ـ لا أنومج يله أنام أنتِ هم عندج دوام يله أمشي بفراشج نامي وريحي العالم من شرج ونوم الظالم عباده .
ـ ماااشي
ـ هاي الماشي ما مرتاح الها تعاي خل نتفاهم
ـ ما جاوبته
ـ يمعوده
ـ ماكو رد
ـ زعلت وزعلت الدنيا كلها شيفضها على رأسك أمجد
لقاء جاوبيني رحمه لأهلج وين وليتي نمتي؟
ـ شتريد
ـ هو شريد ، أريدج غيرك شيريد أكثر منج
ـ أبتسمت صاير تحجي كلام حلو ما عرفتك
ـ هو أني لو أنتِ شو گلبتي ترى أنتِ ناشفه .
ـ يله روح نام
ـ أحلى صيدلانيه بالدنيا .
ـ خجلت ، أضمك بگلبي
ـ أحضنه لكلبج أني ، يله حبيبي رضيتي
ـ أي بعد لاتزعلني منك
ـ تمام صيدلانيتي .
ـ راح نام وضليت أفكر بي وما اعرف شنو منتظرني باجر
وكعدت لكيت دزالي صورته وكاتب
ـ كشختي بس الج .
ـ أي بس الي لعد المن
ـ بس الج والله
ـ عبالي يله اروح تأخر
ـ طلعتي لو بعدج
ـ بعدني
ـ من تطلعين بلغيني .
ـ تمام ولكيت ليال مجهزتلي الريوك عصماء وين لعد
ليال ـ صعدت تغسل الطابق الفوك .
لقاء ـ وينها وين الغفسل هي مو حامل
ليال ـ تريگي وروحي هسه أصعد اساعدها .
لقاء ـ راح تخلبني أنتن عافتني وصعدت الها وكعدت أتريك واجتي جواهر
جواهر ـ عبالج ما ادري بحقارتج وليش هيج سويتي بس سهله أني الج أصبريلي اذا خليتج تتوسلين بيه اخلي نائل يوافق على ابن ثريا اني مو جواهر
لقاء ـ ما جاوبتها وشلت جنطتي والسويج والسياره بالباب طلعت باوعت التاير بنجر ليا سافله هسه شلون اروح الدوام ، راسلت ليث وين أنتَ .
ليث ـ بالدوام ليش
لقاء ـ سيارتي كعدت لكيتها بنجر هسه شلون عندي دوام ما ضل عليه وگت عبالي بعدك وتوصلني .
ـ لا من وگت رحت لاتروحين تكسي هسه أدزلج أحد يوصلج .
ـ منو
ـ هسه أنتظري .
ـ ما يحتاج اخذ تكسي شافها ما جاوبني مشيت وراسلت امجد راح اتمشى سيارتي بنجر .
ـ لا بربج
ـ أي والله راح اخذ تكسي رسلتها وبهل الاثناء هورن سياره أنداريت سجاد
سجاد ـ أصعدي أوصلج .
لقاء ـ لا ما يحتاج أخذ تكسي
ـ تكسي وولد عمامج بگد الدود صعدي بله لغوه يله
ـ تمام ، صعدت ليكدام وسيارة أمجد وطلع وتصادفنا
ضل يباوعلي بكل تركيز ومشينا وهو ضل ورانا گبل وصلتني منه رساله
ـ شوگت لحكتي تصعدين وياه
ـ أبن عمي ترى
ـ أدري أبن عمج لعد منو قابل
ـ اوصل ونحجي شافها وما رد أكيد انزعج من سجاد .
سجاد ـ ليش ما تلزمين خط وتخلصين من هالتعب
لقاء ـ لا ما احب
ـ أذا هيج من أرجع أعلمج شلون تسوين تاير بنجر
ـ أي علواه بس تدري حتى لو علمتني ما راح ادبرها تريد خلك واني عاد شلون عندي خلك
ـ ليش شبيج
ـ ما بيه شيء .
ـ دوامج كل الأيام ما عندج اوف
ـ حتى لو عندي اروح
ـ ليش شعجب
ـ كعدة البيت تخنك على الأقل الدوام تطلع من هوسة البيت والأكتئاب .
ـ هم صحيح .
ـ شصار على دراستك بالماستر .
ـ بعد والله
ـ الله يوفقك
ـ تسلمين ويوفقج .
ـ حسيت نبرته مختلفه مو مثل قبل جان يضحك ويشاقي ما اعرف ليش حسيت بهل الأحساس وليش ليث دزه ما دز فواز او فارس او حتى زياد ليش سجاد!
وصلني ومن نزلت باوعلي وكال
سجاد ـ من يخلص الدوام لاتروحين أني أجي أخذج
لقاء ـ لا ما يحتاج .
ـ نتخابر .
ـ شغل السياره وراح وصلت وفتحت موبايلي ماكو أي رساله من أمجد وصلتني رساله من سجاد
سجاد ـ تعالي ولج شو بالحقيقه اتكهربت منج مو نفس ما بالموبايل .
لقاء ـ ضحكت طبعاً لاحظت وأستغربت گلت يجوز عندك مشاكل خاصه .
ـ لا ماكو لا خاصه ولا عامه
ـ شعجب
ـ أنفصلنا أبويه ما يوافق ومعارض ليش ابقى مجلب بالبنيه خل تروح تشوف حياتها شنو ذنبها .
ـ لا خطيه قهرتني والله
ـ الله لا يقهرج .
ـ تسلم
ـ من تطلعين خابريني اجي أخذج
ـ والله ما يحتاج
ـ لقاء لاتعاندين
ـ تمام سجاد .
ـ ديله باي
ـ باي ورجعت راسلته ما فاتح انترنت اتصلت عليه ما جاوبني ورحت كملت شغلي وقبل لايخلص الدوام أتصل عليه
أمجد ـ متصله عليه
لقاء ـ وأنت رجعت أتصلت
ـ أي
ـ شبيك گوه تحجي
ـ ما بيه شيء
ـ رجعت البيت
ـ أي
ـ أها هسه عرفت تغار ، والله فجأه اجه وصلني شگوله يعني وهو أبن عمي وزين علينا وصديق باسل
ـ اي أبن عمج شگايل اني منو جايب موضوعه تحجين بي .
ـ أها تمام وأنت شبيك گوه تحاجيني حتى گوه تتنفس
ـ شبيه يعني ، منا لساعتين نروح بيت عمج
ـ الله كريم حبيبي وعمري وحياتي اموت على اللي يغار
ـ أي أحركيني بنار ويامن ترجعين
ـ وياه
ـ حلو حبيبي حلو ، هسه گملت عليك أمجد خاف الصبح عدت سلامات هسه ما تعدي والله .
ـ ريلاكس حبيبي ريلاكس .
ـ ريلاكس صمطج أنتِ وأبن عمج زين لو لا
ـ ضحكت فدوه لحبيبي العصبي .
ـ اي اضحكي عليه وبردي نار گلبي بهاي سوالفج
ـ يله اروح أبصم واطلع
ـ ماشي
ـ واضح عليه الانزعاج وقطع الخط وأتصل سجاد وطلعت ولكيته ينتظرني هلاو .
سجاد ـ هلا والله
لقاء ـ ما حجينا وأني جنت أتصفح ما منتبه ولاحظت عينه على موبايلي عفته بالجنطه وصلنا شكراً سجاد
سجاد ـ تدللي .
لقاء ـ وصلت تغديت وراسلته
أمجد ـ جاي أتحضر اكمل واراسلج .
لقاء ـ أوك ، وضليت أنتظره
أمجد ـ شدعوه كل القبيله جايين شگو .
لقاء ـ منوو ومنوو لان ما اعرف ما طلعت شفتهم
ـ بيت عمج رشيد كلهم وعلى رأسهم سليمه!
ـ منو سليمه
ـ تعرفينه
ـ عرفته سجاد وبعدها راح ما راسلني ونزل نائل كاشخ وباوعلي وگال
نائل ـ خل يسوي الطريق سجة قطار عادي كلش عادي
رفضته قبل وأرفضه هسه وأهله عادي ماكو اسهل منها .
لقاء ـ طلع وأجتي جنات وضليت عايشه بقلق ومتوتره
ويحجن وأني رأسي يريد يطگ وصلتني رساله وأنصدمت بالرفض جان من ليث! .
أمجد ـ شغله وحده شاغله بالي ومخبلتني واذا طلعت صحيح السالفه كلها تخطيط من أبن عمج ليث وگولي أمجد ما گال هاي عود هو صديق حيدر وفشلنا .
لقاء ـ ما فهمت عليك يعني شلون .
ـ أنتِ مع الوگت تفهمين أو سألي أبن عمج ليش رفض وهو أكيد يگولج السبب ، بس حركة گلبي عليج بحظهم وبختهم .
ـ عفت الموبايل وأجه نائل وما قصر بالكلام وقهر جنات
نائل ـ هذا الموضوع أنتهى واذا تقدم مره ثالثه ما يصيرلج خير واصلاً ما يلحك يتقدملج مره ثالثه!
لقاء ـ ما فهمت عليه وجواهر تباوعلي بشماته عفتها ودخلت الغرفه أول مره ابجي من كل كلبي ليش رفضوا ليش .
ليال ـ خابري ليث وأفهمي منه ليش هو هم رفض شجاه مو جان واكف وياج
ـ أذا اروحله هسه يگول اكو بينكم شيء شگوله ويضل يسألني ما ادري ليال ما ادري ، بس نار بگلبي ليش كسروا گلبي وگلبه .
ـ گومي يمكن أجه هذا صوته عزه بس لايدخل علينا شالي وينه خرب شالي .
ـ شجاج انكرصتي ، ودك الباب وليال گبل سحبت بطانية البنات لفت بيها رأسها وهو وكف يم الباب
ليث ـ لقاء تعالي أريد احجي وياج اني طالع تعالي لبيتنا
لقاء ـ راح وگمت غسلت وجهي واجتي جواهر
جواهر ـ عبالج تحبين وتمعشگين ومحد يكشفج تاليتج وكعتي وانكشفتي واجه ورفضوا ، لعد تخلين رأسج برأسي وأفوتها الج .
لقاء ـ ما جاوبتها لان ما الّي خلكها واذا أتلاغه وياها لازم أكتلها واتعارك ، مشيت والباب البينا مفتوح وشفت سجاد واكف ويه ليث باوعلي وفتح الباب وطلع واشرلي وتجاهلته ورجعت وعرفت كلام أمجد وصاح وراي .
ليث ـ وين رايحه لقاء
لقاء ـ رجعت مقهوره وشافتني ليال
ليال ـ شگو شبيج شحجيتوا
ليث ـ ليش هي حجت وين وليتي مو أصييح وراج شبيج انطيتي ظهرج ومشيتي .
لقاء ـ بس أريد اعرف شغله أنتِو من شنو مخلوقين
يعني والله لو الحقاره والنذاله تضوي جان هسه أهل أبوي منورين .
ليث ـ فد مره أخذيلج راشدي اني شعليه بإهل أبوج
لقاء ـ ليش مو أنت الرفضت ،لزمني من أيدي وسحبني للغرفه عوفني ليث شبيك تخبلت
ليث ـ امشي نججي بالغرفه لان أنتِ تردين تتعاركين أدري بيج طبكن فيوزاتج وجدحن .
ليال ـ أني اخليكم .
ليث ـ لا أبقي أريد احجي وياجن اثنيجن!
ليال ـ ويانا!! وبشنو تحجي ، عندك حجي أحجي ويه لقاء أني عندي شغل .
ليث ـ وين رايحه رجعي الكلام يخصج أنتِ وأختج لاتصييرين عناد مثلها
ليال ـ لعد عوف الباب مفتوح ما ناقصه يدگولي طبل علمك كفايه .
لقاء ـ ليش رفضت يعني عاجبك وضعي وأني مجفصه بيد جواهر ومشاكلنا يوميه لو ليال مسويتها خدامه لو عصماء تغسل الها ملابسها لو بنات اخوي بس تصيح عليهن وتضرب بيهن عاجبك هالوضع عاجبك لا بيكم واحد شريف يحجي ويوكفها عند حدها ولا تجينا قسمه وتخلونا نتزوج ونخلص منها ومن هالعيشه الوياها .
ليث ـ وشدعوه هيج كاتلات روحجن عالزواج
ليال ـ لاتحجي بصيغة جمع!
ليث ـ لا أقصد يعني الزواج هسه مو وگته وهاي مسؤوليه ولا راح تبقن طول العمر بدون زواج وأنتظرن منا لما يطلع أخوجن الأمر امر والشور شوره .
ليال ـ شو تحاجي الأثنين ترى الخطابه على لقاء مو علينا أثنينا لا أني اطلع أحسن شيء شگو باقيه .
ليث ـ أنتِ شبيج ما تتحاجيين وحجيت لان أنتِ أختها الجبيره والكلام يكون كدامج ليش گبل تأخذين على نفسج هو جايين عليج خطابه ومزوجج وخلصان
ليال ـ لازم ضاله برگبتك تزوجني وتخلص مني ترى عيب عليك هالحجي وأني صوجي والله شو وخري لقاء .
لقاء ـ دفعتني من الباب وطلعت مزعوجه وهو عصب ترى صدك كلامها أنت كلامك وياي ليش تشلمها وبعدين شُـــنوْ هاي جايين عليج خطابه ومزوجج خلصان منج لو هاي حقاره وخباثه منك تريد تضوجها لان حسيت بيها ضايجه من وجودك وهي وياك بنفس المكان .
ليث ـ لا مو هيج القصد بس حجايتي ما بيها شيء هي گبل نترت وعصبت بوجهي وأني ما تحملت أمشي نحجي برى
ـ مشينا بالحديقه وجديتي تباوعلنا وهو كعد مزعوج ما الك حق تنزعج منها وترى ليال ما تنسها خاف عبالك نست اللّي سويتها بيها ، المهم مو هنا موضوعنا ليش رفضت أمجد
ـ يا حبيبي وتعرفين أسمه هم
ـ طبعاً حمه أختي شيء أكيد أعرفه
ـ ولو مـا مقتنع بس أماشييج المهم أني رفضت وفهمت حيدر هم وخلص أنتهى الموضوع وزواج هسه ماكو منـا لما يطلع أخوجن .
ـ ليش غير أكو سبب
ـ ما يوالمج صيدلانيه بگد الدنيا تأخذ أستاذ ما متناسقين وما عجبني .
ـ أيبا أول مره أسمعك تحجي بهاي النبره من يمتى صارت الناس مقامات والصيدلانيه ما تأخذ أستاذ ليش أني بنت الوزير!
جديد عليك هالحجي أستاذ ليث لاتخليني اغير نظرتي بيك هذا مو كلامك ولا نظرتك ولا حتى أسلوبك .!
ـ سجاد يوالمج أكثر وهم أبن عمج وأحسن منه
ـ أهنا الحجي دكول من الأول يا ليث ليش تحجيلي بالمقامات وتخليني أكرهك ، والله شگيت برفضك مخلي سجاد على بالك لان من خابرتك على سيارتي دزيته هو يوصلني ويرجعني ، طلعت جواهر لا شيء يمك تخطيطاتك عمي داهيه أنتَ .
ـ ليش شبي ما عاجبج
ـ ما بي شيء وسجاد ورده وأحسن ولد عمامي كلهم صح أنتَ أقرب واحد من عمامي بس هو هم خوش ولد وحباب بس مستحيل أشوفه زوج .
ـ مع الوگت تشوفينه!
ـ لا عفيه ليث والله معتبرته صديق منين طلعتلي بهل السالفه من كل عقلك تحجي
ـ أي والله شگو بيها وراح يقدم ماجستير ويدرس على شهادته ويصير دكتور جامعي .
ـ ليث مستحيل يصيير هالشيء وأذا مخططين ورفضتوا أمجد لهل السبب علمود تنطوني لسجاد والله ما اتزوجه أصلاً بالبيت ما اضل .
ـ وين تولين شو صايره تحجين بزود وكلامج خطير كعدي راحه لقاء سوالف المسلسلات والأفلام مو عليه اكسر رأسج والله .
ـ أروح لخوالي وهسه أخابر خالي شامل يجي يأخذني اني مو لعبه بيدكم تزوجوني بكيفكم .
ـ تخابرلي خالها شامل لا هاي العايزه اوكفي .
ـ مشيت منعني عوفني ليث طلعت حالك من حالكم واقسى منهم عود شايفتك بعين الجبيره وسانده ظهري عليك وحالك من حال باسل وتالي تصدمني بيك هو هيج ليث عوفني خليني أولي .
ـ أوكفي يمعوده .
ـ مستحيل أتزوج سجاد مستحيل والله ما أضل والله
ـ يله خلص نسد موضوع سجاد مثل ما تردين
ـ ليث أنتَ شبيك والله مو صاحي
ـ أنجبي لقاء وأحجي عدل وشفت سجاد أنسب الج من أمجد ورفضت لـ أسباب ثانيه وأشوف الزواج هسه مو وكته لو قبل لا يدخل باسل السجن اي بيها مجال بس هسه لا شيلي الزواج من بالج والتهي بوظيفتج .
ـ شُـــنوْ أسبابك
ـ بعدين تعرفين بس زواج هسه ماكو فاهمه .
ً ـ صرت ما أعرفك أبداً لان مصدومه بيك والله
ـ وصدمتهم هذا العندي عاجبج عاجبج ما عاجبج ركعي رأسج .
ـ عفته ومشيت مزعوجه منه حيــل يمكن يكون شك أكو بينا علاقه ورفض! لان أمجد لح بموضوع الخطبه أو يكون نائل حاجي اله شيء وغير رأيه بإمجد أو يكون هو وعمامي ناوين يزوجوني لـ سجاد والأ ليش يحجيلي بالمقامات كأنما يريد يغيرلي نظرتي ما يدري عيوني ما يشوفن غير أمجد ، ليش ليث ليش هيج صرت .
حجيت لـ ليال ضلت ساكته وما شاركت بس عصماء
عصماء ـ ليش تظنّن بي السوّء ليث من يومه صاحب مُواقف حَلوه مستحيل يسوي شيء ضد سعادتجن أو بي أذيه الجن ما أتوقع يكدر يجبرج على سجاد أني أحس اكو اسباب ثانيه بس هو ما حجالج عنها لان گلتي أكدلج وكالج انتظري أخوج يطلع من السجن وفعلاً هذا أنسب حل لان الزواج بي مسؤوليه بس نفس الوقت وجواهر والمشاكل اللّي ما تخلص وأخاف عليجن منها .
لقاء ـ دام هيج سوه ميخالف .
ليال ـ على شُـــنوْ ناويه هاي الميخالف بيها هواي كلام
لقاء ـ ماكو گلشي ، وسگتت وراسلت أمجد نايم
أمجد ـ لا ، سألتي أبن عمج
ـ أي سألته
ـ أي وشگال الج .
ـ ما كال شيء لما يطلع أخويه من السجن يعني بعد ثمان سنوات ، تكدر تتنظرني!
ـ أي عادي ما عندي مشكله
ـ بس هواي .
ـ لا حبيبي مو هواي اليحب ينتظر ويصبر ويتحمل ميخالف .
ـ وشبابك من حقك تتزوج ، تضل رابط مصيرك وحياتك ومستقبلك عليه صعبه أمجد .
ـ لا مو صعبه وين الصعوبه بيها لقاء أني أحبج ومستعد أبقى أنتظر عمر كامل .
ـ هذا مجرد كلام مع الوقت صدگني راح تمل
ـ أمل! لقاء ليش أحساسي يگولي أنتِ تردين تنهين حُبنا وبسرعه تنازلتي .
ـ لان ما أريد أظلمك وياي تعرف ثمان سنوات شگد لا يوم ولا يومين وضعنا العائلي متشتت ونفس الوقت
ما أريد يطلع علينا كلام أكو تواصل بينا وتعرف مُباشرةً يوصل الكلام لأختك فاطمه ومن أختك لأخوك حيدر يعني الموضوع حساس وخاصه إحنه جوارين صعبه أذا طلع علينا كلام يمسنا أثنينا .
ـ يعني هاي هي لقاء .
ـ أكتب وأبجي وكعدت ليال سحبت مني الموبايل وأخذتني بحضنها ، ليال نار بصدري أحبه والله الكل يشوفني يگول هاي ما تحب هم تحب بس ما يعرفون بداخلي شنو وأول ما حبيت حبيته .
ـ وشيفيد الحُب ، أحنه بواقع مو مال حب ولا سوالف حب ، جان أمي كدرت تخالف واقعها مو أخذت أبويه على حب وينها هسه وين حبها بشنو فادها لو فادنا أحنه باسل بالسجن جنات أنفضحت وأني وبالأخير أنتِ ما معروف جواهر شنو ضامتلج ، أستمري بهل الخطوه وعوفي ولا تتندمين وهو الله يعوضه ويجبر گلبه .
ـ أي وگمت غسلت وجهي ورجعت دزيتله أي هاي هي
ـ عادي أبقى أنتظرج .
ـ لاتتنظرني وأذا أنتظرتني يمكن أتزوج بشنو يفيدك الأنتظار كتبتها بدم گلبي شافها وما رد عليه وضلت الرساله كما هي ومرت أشهر وما دار بينا أي كلام وجان هيج أفضل ألنا إثنينا ما أريد العلاقه تستمر ونهايتها مو زواج وبعدين يطلع عليه كلام وأشاعات وتوصل باسل ما أريده ينصدم وينخذل مني أني تربيته ولا اني هيج أستمر بعلاقه ما معروفه نهايتها مستحيل حتى لو جانت روحي بي ، الحب شيء ونفسي وسمعتي شيء وخاصه جواهر مترصده النا وتريد منا غلطه وغلطة الشاطر بإلف .
أروح الدوام وأرجع بس أني شبه طافيه القهر يأكل بيه لأن أصادفه صح مو دائماً بس تجمعنا الصدف وبعيونه هواي كلام ما انحجه او ما لحگنا نحجي ، يعاتبني بنظراته ويكسر گلبي بسگوته أحسه أنطفىٔ أكثر مني لان النهايه كانت من طرفي .
أباوع على بنات باسل يمشون وفرحانات بنفسهم ما يعرفون واقعهم ولا الناس العايشات وياهم ، كاعده بالغرفه وهنا يمي غافلني وطلعن وسمعت صوت غنى تبجي ركضت لكيت جواهر ضاربتها بحيث خدها أحمر نزلت عصماء تركض ذبت الملابس وأخذتها بحضنها ليش ضربتيها تنكسر ايدج أن شاء الله .
جواهر ـ تستاهل لعد شمدخلها غرفتي نازعه حفاظتها ومطمسه الكاع والغرفه نظيفه وأني اصلي شهل القذاره ، لمي بناتج ورجعي نظفي الغرفه واذا شفتهن بغرفتي أكتلهن .
لقاء ـ أنتِ مدي أيدج عليهن شلون ما اكسرها الج .
جواهر ـ أنتِ أنجبي شو وخري اروح اغسل عوذه بس وسخ وين ما يمشن يوسخن الله يكصف عمرجن .
لقاء ـ مشت وهي تحجي فورت دمي وعصماء اخذتها غسلت الها ورجعت نظفت غرفتها وصحت بيها شو عوفيها شگو تنظفينها .
عصماء ـ لقاء عوفيني ما اريد مشاكل وترجع على بناتي واني كلشي ولا بناتي .
لقاء ـ نظفتها وطلعت أشتعلت بنار وشفت حفاظة بالحاويه شلتها وفرغتها بالغرفه ترست الكاع وسديت الباب ودخلت يمهم وكعدت وعصماء كاعده تغيرلهن
وليال اجتي كعدت تصلي
عصماء ـ عينج عليهن لاتخليهن يطلعن لما اغسل ملابسهن وأجي انومهن .
لقاء ـ ماشي طلعت وجواهر عاطتت .
جواهر ـ ولج عصماء ما اخلص منج ومن بناتج ووسخن
لقاء ـ عاطوا عليج أن شاء الله كل ظني بس تحجي ما عبالي أسمع صوت عصماء تبجي طلعت لكيتها تضرب بيها تخبلت وهجمت عليها اريد اخلص عصماء منها وجرت حجابها ومن شعرها وعصماء ما تمد ايدها أبداً ونزل نائل ختلت وراي ادور على شالها وتبجي
نائل ـ شنو هالعياط شگو شبيجن متعاركات هم رجعنا وتالي ما نرتاح هالساعه .
عصماء ـ يولي شالي شالي عليج الله شالي .
لقاء ـ دفعت جواهر وسحبت الشال من جوه رجليها وغطيت شعرها وعصماء ركضت للغرفه وجواهر جلبت بثوبها اسود كشمير وشكته من ظهرها وعصماء صرخت
عصماء ـ لاااااا لاااااا ليش ياربي
لقاء ـ جواهر الله ياخذج نائل كبل صد وجهه وركضنا اني وليال سترناها ودخلناها الغرفه وهي تبجي ملخت نفسها لبست ملابسها وتضرب على وجهه كافي ما باوع والله گبل صد وجهه عنج .
عصماء ـ حتى لو بس شافني مو گتلج عوفيها ما أريد مشاكل ليش رجعتي فرغتي الحفاظه بغرفتها وهي تخبلت حقها منو يرضاها على نفسه غرفته تتوسخ
ليال ـ هاي أنتِ يعني وتالي وياج ما تبطلين سوالفج هيج احسن رجعت ضربتها وشگت ثوبها احنه بس نريد بروده الكاع ناقصين مشاكل يا لقاء ما تعرفين تكعدين
لقاء ـ والله من قهري حرگت دمي من شفتها تضرب بغنى وخدها أحمر وهي طفله شمعرفها بنفسها .
ليال ـ عوفيها كافي عاد ترى طگت روحي يوميه مشاكل وعياط وصياح ما مليتي ، بابا احنه مو گدها هسه نائل يشوف الوساخه بغرفتها ويگول أمي حقها تحجي وتضرب ، بيج خير تحجين حقج لا ليش لان أمه
لقاء ـ سگتت وعصماء تبجي فطرت گلبي كله بسببي حسبي الله عليج يا جواهر وأسمعها تحجي وتصييح وتدعي أحتركت بنار .
جواهر ـ مو وضعيه هاي غرفتي خاست حسره ما افتح الباب يدخلن بيها لعد تراضاها شو الوساخه يمه شوف
نائل ـ شُـــنوْ هاي ولج عصماء ، عصماء لمي بناتج ونظفيهن شنو القذاره وين عايشين احنه بحضيره مال حيوانات
لقاء ـ وشصار اطفال شمعرفهن .
نائل ـ سنه ونص ما يعرفن ما تعلمهن ومنا هيج أنتبهي لبناتج ما اريد لغوة ومشاكل نريد انام ساعه ماكو بس يصرخن وشكو لـ ١٢ بالليل يله ينامن منا وهيج بالعشره تنوميهن .
لقاء ـ حجه حجه ومشه وعصماء ما حجت وليال بس تحجي عليه وتالي انجبرت واني نظفت غرفة جواهر وشفت موبايلها ردت أخذه ودخلت عاطت بيه .
جواهر ـ يله عاد گملي شغلج صارلج ساعه شگد بارده لعد أذا تتزوجين شلون ادبرينها يمكن خياسج يطلع الباب الحوش .
لقاء ـ منو گالج أتزوج ابقى نايمه على گلبج لان أحبج
جواهر ـ نامت عليج سليمه الگبور أنتِ وأختج وخلصتني منجن ، حبتج حيه ام سبع روؤس منين نزل عليج الحب من أبن ثريا .
لقاء ـ ما جاوبتها لان ما أريد يطلع كلام عني وعنه بس ضلت عيوني على موبايلها يعني عادي تخلي عالميز! لازم أخذه وأشوفه .
مر كم يوم وعصماء مصخنه نار بديت أخاف عليها نأخذج المستشفى وأسويلج فحوصات وسونار هم
عصماء ـ لا ما يحتاج هي تروح .
ليال ـ شلون من كيفها تروح شُـــنوْ ناسيه نفسج أنتِ حامل والصخونه موزينه عليج يا عيني .
عصماء ـ عوفيني ليال فدوه لعينج عوفيني .
لقاء ـ يابه اذا طلعت مسويه شيء لطفل بطنج الا اجفص بطنها
ليال ـ عوفيها لقاء دكافي عاد
لقاء ـ سگتت وعصماء ليال ضلت الليل گله كاعده يمها الحمدلله فكتها والظهر رجعت من الدوام الكاهن داخلات بغرفتها وعصماء تسبح دخلت اخذهن ودورت على موبايلها ماكو وين موليه. ليال وين سليمه
ليال ـ طلعت من الصبح هي ونجلاء ليش مشتاقتلها تسأليني عليها .
لقاء ـ لا أني اشتاقلها عوذه بس أفتقدتها ، أكولج تكدرين تساعديني .
ـ أساعدج بشنو
ـ هي شوگت طلعت
ـ من الـعشره
ـ ولحد الأن ما راجعه
ـ أي ما اعرف گالن يسون حجاب لتماضر مال حباله
ـ تماضر راحت وياهن
ـ أي أخذناها وياهن .
ـ خوش فرصه أمشي اوكفيلي يم باب الغرفه مالتها
ـ شتسوين يمصخمه لقاء ستري علينا .
ـ هسه دصبري شمسويه گمتي تتلاطمين بوجهي
ـ مو أعرف سوالفج تاليتنا نوكع بمصيبه دمشي يله
ـ دخلت غرفتها وهي واكفتلي وخبصتني انطيني مجال خل ادور خرب خفت ملابسج عزه ملابس نوم شگد حلوه هاي تلبسهن لابويه مو
ـ لا تلبسهن اليه فضيني عاد بسرعه .
ـ گلبت الكنتور ولكيت قاصه مقفوله برقم سري خرب بالحظ ودورت بعلبه لكيت موبايل حاولت اشغله ما يشتغل گبل ضميته بصدري .
ـ أسمع صوت بسرررعه امشي يمكن اجني
ـ اييي طلعنا نتراكض وغنى وجنى لابسات ملابس الداخليه بروسهن ايعع لعبتن نفسي بعد فلا ابوسجن شلتها امشي سبحيها صارت قذره .
ـ طلعي عاد وفضيني .
ـ طلعنا وليال ترجف شجاج وثول وشگو قابل ودخلت جديتي هي وعمتي نجاح يعني مو هنا ، هذن وين ولن لحد هسه ما جايات ودخلت الغرفه وسديت الباب وعصماء غيرتلهن وتباوعلنا
عصماء ـ شنو جنتن شتسون
ليال ـ لقاء أفندي جانت بغرفتها بله لكيتي شيء .
لقاء ـ أي لگيت طلعته من صدري وليال رادت تسحبه مني وين تأخذينه .
ليال ـ أمشي رجعي لغرفتها قبل ترجع لاتحس ، والله اني صوجي سمعت منج وطاوعتج وگفتلج هسه ما تلكاه بغرفتها وتتهمنا داخلين غرفتها وتبوگنا وتطلعنا حراميه لا هاي العايزه .
عصماء ـ أي لقاء رجعي لاتسويلنا مشكله .
لقاء ـ ما أرجعه وهو ما يشتغل يجوز قديم وذابته خنشوفه شبي ، هو نوع صرصور فتحته ولكيت بي سيم كارت! أي هسه تمام أجيت والله جابك عليه .
عصماء ـ سيم كارت خاف مال عمو سعيد
لقاء ـ لا مالتها ابويه يشيل موبايل حديث بس هي عدها دروب وهذا كل سوالفها موجوده بي وأكيد الأرقام هم موجوده بي وتفيدنا .
عصماء ـ وهسه شتسوين دخلي موبايلج وشوفي
لقاء ـ لا أخذه ليث هو يشوفه شبي ، نحجي وليال ساكته وگبل هجمت عليه
ليال ـ جيبي السيم الكارت ما ناقصين مشاكل لقاء
لقاء ـ ما اجيبه من كل عقلج لكيته تردين أرجعه والله ما ارجعه وافتحه واشوف شبي واكشفها هسه اخذه ليث
خل يشوفه اليّه .
ليال ـ شتسوين من كل عقلج جيبي السيم كارت جيبي
لقاء ـ ما أجيبه والله أعرفج تخافين منها وبس تأخذينه تكسرين وكل الأرقام تروح وكل دليل ما يضل عدنا
ـ شُـــنــسوي بالدليل وعلى أي أساس راح يصدگنا شو دجيبي ما ناقصه مشاكل البينا مكفينا .
ـ ما اجيبه والله لو تذبحيني والا افضحها وأسود عيشتها واخليها عبره لكل وحده منحطه مثلها تفوت زلم للبيت وتهجم بيوت وتنبش قبور وتخلي بملابسنا عظام ميتين وتقطع قسمتنا وتدخل سجون وتقرأ بروسهم علينا خلتهم خنازير وجن مو بشر وتردين مني أسكتلها أني مو بنت سعيد اذا سگتلتها الا أكشف تأريخها الأسود .
ـ اي تالي اشوف نهايتنا على أيدج
ـ أنتِ بس أكرميني بسكوتج وما عليج گبل گامت تخاف وخبصتها عليه وبعدين هو مشتغل شايفنه شبي هسه يطلع محترك عاد أحنه شلون عدنا حظ وحتى لو يشتغل ادزله جني ينفخ ويعطله .
ـ أعوذ بالله من الشيطان الرجيم ، خرب بسوالفج لقاء امشي شمري والله ما مرتاحه أخاف تسويلنا سالفه .
ـ دسگتي ، جبت موبايلي راسلت ليث وبلغته وجاوبني
ليث ـ والموبايل ما أشتغل
لقاء ـ لا حاولت وياه ما يشتغل
ـ هي وينها هسه
ـ طالعه هي وعمتي وتماضر من العشره لحد الان ما راجعات
ـ ونائل وين
ـ طلع لشغل لحد الان ما راجع
ـ راح اجي اخذه حضريهن الشريحه الموبايل أحاول اصلحه
ـ تتوقع جديد لو قديم .
ـ أحتمال جديد وغيرته هالفتره أو يكون قديم خنشوفه وهي تبين يله راح أجي
ـ تمام ، وكمت وليال تباوعلي شگو شبيج
ـ ليش دخلتي ليث أذا عرفت ليث وياج
ـ منين تعرف أذا ما أنتِ حجيتي الها هي مو مكبوره طالعه عساها لا رجعت .
ـ ما تنجبين يله امشي انطي قبل لاتجي وتشوفه
ـ يمه خايفه على الحُوب شمرت عليها المخده وطلعت لكيته واكف واشرلي عالكاميرات ودخلت بيتهم وانطيتهن اله وعمتي سلوى تباوع وتسأل يله اني اروح عود ردلي خبر
رجعت البيت وهنا ورى ساعه اجني وتماضر الوجه مگلوب ونجلاء ولت لبيتها وجواهر حست أحد داخل غرفتها لان طلعت تباوعلنا بالأخص أني لليل راسلت ليث ها بشر
ليث ـ الخط محترك والجهاز كذلك
لقاء ـ باع الحظ ، ليث أذا كدرت أخذت موبايلها الأصلي تگدر تساعدني .
ـ شلون تأخذينه وأنتِ تكولين بأمكان محظوره وما يوكع بكاع بس اذا تنومينها بس شلون!
ـ أي عادي أني أجيب حب منوم وأنومها واسحبه منها ونشوفه ونرجعه وهي نايمه عود اكثر الجرعه وأذا ماتت عادي ما عليها حسافه مهم أخلص منها .
ـ لقاء عوفيها
ـ لا ليث مستحيل أعوفها .
ـ طلعيها من رأسج يطلع باسل من السجن وياخذجن يمه وعوفناها شجابن عليها
ـ وشوگت يطلع
ـ يطلع شعليج أنتِ أني ما عايفه ولا أعوفه بس الشغله تحتاج صبر .
ـ ليث ما أكدر أعيش وياها وأني أعرف كل سوالفها ويانا يعني تصور ليال عادي عدها ومتقبله الوضع ومتعايشه وياها وتأكل وتشرب طبيعي الأمر بس أني من أشوفها أختنك أريد أموتها
ـ ليال صبوره وتتحمل مو مثلج
ـ اي مو مثلي بس أفهمني ليث اللي سوته بينا مو قليل هدمت بيت كامل شلون هيج بشر مأذي وظالم وعايش حياته طبيعي والكل خاضع اله وكلمته مسموعه والامر والناهي وأم البيت يصير هيج والله هذه مو عداله
ـ المثلها هواي وأنكس منها هي هيج گلشي أنقلبت موازينه الظالم عايش حياته والمظلوم شابع دفرات
ـ ليث لازم تنكشف وتتحاسب بس مو يساندني بس أنتَ! الله عليك أوكف وياي وساعدني نكشفها .
ـ لقاء عوفيها ختولي
ـ ليش خايف منها وما تقبل أكشفها تعرف شيء!
ـ لا شخاف منها بس الأفضل الواحد يبتعد عن هيج حفره مليانه قذاره ، هاي صعب تنكشف واذا تخلين روحج وراسج برأسها تتأذين واذا تشاركنا اني وياج واحد من عدنا يطلع سالم أذا مو أثنينا ، عمق عالم الاسحار مخيف لقاء اكثر ما تتخلين وحسب معرفتي مرت أبوج واصله مراحل ما اريد اشرحلج اكثر بس عالم رعب .
ـ ليث شمعرفك بهيج معلومات .
ـ أني هم مثلج جنت شاك بيها وأني مستحيل أكذب ليال لان مره أجيتوا وحجيتوا الهم أنتِ وأخواتج وخالتي هيفاء بس المشكله محد صدك بيجن وخليت عقلي وياها فتره بس ما حصلت شيء وبعدين بحثت وعرفت هواي أمور ونسد موضوعها أفضل لان تضر .
ـ ليث بس خل أحاول لازم الگي شيء مستمسك
ـ أذا كدرتي حاولي أدورين بإغراضها عن قصاصات أوراق لان هي صعب تحفظ أرقام على الأغلب يكتبون الها أرقامهم بقصاصات صغيره دورين زين بلكي تلگين شيء .
ـ يعني تساعدني .
ـ أي
ـ تمام ليث شكراً وصدك تعال ليال تدري أنت ضليت تبحوش ورى جواهر
ـ لا ما گايل الها وهي بعدها بفتره أنفصلنا اني وليال
ليش تسألين
ـ ما ادري عبالي ليال تعرف لان خافت عليك من جواهر وما قبلت أدخلك .
ـ لا شتسويلي قابل .
ـ تمام شكراً على گلشي
ـ مـا مسوي شيء بس ديري بالج منها لاتخلينها اشك بيج أنتِ متبعتها حاولي من تباوعلج بعدي عيونج عن نظرها لان بيهم عن طريق العيون يكشفهم اللي يريد يأذيهم فهمتي .
ـ تمام .
ـ يله روحي نغم تبجي أنزل اشوفها
ـ صدك شلونها بعدها تبجي هواي
ـ لا زينه الحمدلله هي فقيره ما إلها صوت تشبه المرحومه هواي بس تجيها ايام تضل تبجي ما تسگت لان طفل يحس بالفقدان وهي جانت متعلقه بإمها هواي الله يرحمها .
ـ الله يرحمها أي والله شگد جانت طيبه حتى صادقت ليال على الرغم معرفتها بس ضلت بصداقتها وعلاقتهن قويه وحلوه .
ـ أي .
ـ تصبح على خير
ـ وأنتِ بخير
ـ عفت الموبايل وگمت طلعت برى غرفتها ظلمه ومقفوله خليت أذاني وتذكرت كلام ليث وأبتعدت خايفه ورجعت نمت بفراشي بالف ويلاه يله نمت وكعدت الصبح لبست ورحت المطبخ عصماء كاعده هي والبنات يتريگن وجواهر واكفه عالطباخ كعدت اتريك
وجواهر قدمتلها كلاص حليب
جواهر ـ هاج هذا حليب زين الج سويت اليه وضل زايد
ـ ليث بس خل أحاول لازم الگي شيء مستمسك
ـ أذا كدرتي حاولي أدورين بإغراضها عن قصاصات أوراق لان هي صعب تحفظ أرقام على الأغلب يكتبون الها أرقامهم بقصاصات صغيره دورين زين بلكي تلگين شيء .
ـ يعني تساعدني .
ـ أي
ـ تمام ليث شكراً وصدك تعال ليال تدري أنت ضليت تبحوش ورى جواهر
ـ لا ما گايل الها وهي بعدها بفتره أنفصلنا اني وليال
ليش تسألين
ـ ما ادري عبالي ليال تعرف لان خافت عليك من جواهر وما قبلت أدخلك .
ـ لا شتسويلي قابل .
ـ تمام شكراً على گلشي
ـ مـا مسوي شيء بس ديري بالج منها لاتخلينها اشك بيج أنتِ متبعتها حاولي من تباوعلج بعدي عيونج عن نظرها لان بيهم عن طريق العيون يكشفهم اللي يريد يأذيهم فهمتي .
ـ تمام .
ـ يله روحي نغم تبجي أنزل اشوفها
ـ صدك شلونها بعدها تبجي هواي
ـ لا زينه الحمدلله هي فقيره ما إلها صوت تشبه المرحومه هواي بس تجيها ايام تضل تبجي ما تسگت لان طفل يحس بالفقدان وهي جانت متعلقه بإمها هواي الله يرحمها .
ـ الله يرحمها أي والله شگد جانت طيبه حتى صادقت ليال على الرغم معرفتها بس ضلت بصداقتها وعلاقتهن قويه وحلوه .
ـ أي .
ـ تصبح على خير
ـ وأنتِ بخير
ـ عفت الموبايل وگمت طلعت برى غرفتها ظلمه ومقفوله خليت أذاني وتذكرت كلام ليث وأبتعدت خايفه ورجعت نمت بفراشي بالف ويلاه يله نمت وكعدت الصبح لبست ورحت المطبخ عصماء كاعده هي والبنات يتريگن وجواهر واكفه عالطباخ كعدت اتريك
وجواهر قدمتلها كلاص حليب
جواهر ـ هاج هذا حليب زين الج سويت اليه وضل زايد
لقاء ـ رفعتلها حواجبي لاتشربينه هزتلي رأسها وجواهر طلعت وگمت ذبيته بالسنك أي شيء تنطي الج لاتشربينه حتى البنات .
عصماء ـ لا ادري بيها
لقاء ـ تمام وطلعت وليث وصلني وجان جايب نغم وياه تضحك وتلعب وياي طول الطريق وصلني وبلشت شغلي وتذكرته باوعت المحادثه دزيتله صباح الخير گبل شافها
أمجد ـ صباح النور شلونج
ـ زينه وأنت
ـ عايش
ـ حبيت اسأل عليك
ـ رحمه الله والديج .
ـ ردت أكتبله مشتاقتلك بس تراجعت ورجعت البيت مخنوگه وأتصلت عليه ليال تفأجات ها ليال .
ليال ـ تعالي عصماء وراج طلعت ولحد هسه ما راجعه ما شفتيها
لقاء ـ لا ما شفتها ليش هي وين راحت .
ـ گالت تسوي فحوصات وسونار بالمستشفى گتلها ليش ما رحتي ويه لقاء گالت لا هسه تذكرت وراح أروح وأنتظر وماكو وأتصل عليها ما تجاوبني!
ـ وين راحت والبنات خوما وياها
ـ لا وين تأخذهن عافتهن وراحت لوحدها رجعي المستشفى سألي عليها أخاف تخربطت وگعت
ـ تمام قطعت الخط وليث يسألني يله خل نرجع
ليث ـ أتصلي عليها بلكي تجاوبج ، شلون تخلنها تروح وحدها ليال غير تحجي تگول بله هاي سالفه .
لقاء ـ أتصلت ما تجاوب ورجعنا المستشفى سألت عليها وأنطيت أسمها ما داخله المستشفى يربي وين راحت عصماء وينج وين رحتي وأتصلت ليال ها بشري
ليال ـ أجتي هسه دخلت البيت الحمدلله .
لقاء ـ تمام هسه نجي
ليث ـ ها شتگول
لقاء ـ هسه رجعت امشي خل افهم منها وين جانت رجعنا البيت وصادفتني جواهر عبرتها ورحت على عصماء وين جنتي خوفتينا عليج .
عصماء ـ لا عيوني لاتخافن رحت المستشفى سويت فحوصات وسونار تعرفين من حملت لحد الان ما مسويه فحوصات .
لقاء ـ بس أنتِ ما داخله المستشفى شلون سويتي فحوصات ، تغييرت ملامح وجهه وليال تباوعلي عصماء وين جنتي گولي ليش خايفه .
ليال ـ أذا رحتي تسألين على أهلج عادي حقج
لقاء ـ وأذا رحتي على باسل ليث سأل وأنتِ ما رايحه
عصماء ـ أذا أحجيلجن ما تگولن لأي احد حتى لـ ليث .
لقاء ـ ليال أوكفي يم الباب أحجي وعد ما نكول لأحد بس لاتخوفيني عليج مية الف فكره اجتني كلت شالت رأسها من ضيم گلبها طگت وهجت .
عصماء ـ لا شبيه تخبلت بس أني صارلي شهر لازمه محامي لـ باسل!
لقاء ـ لازمه محامي وصارلج شهر
ليال ـ وليش ما حجيتي النا .
عصماء ـ أذا حجيت ينكشف أمري وأني ما أريد أحد يعرف ويتدخل ويخرب عليه كل شغلي والمحامي نفسه حذرني محد من أهل البيت يعرف والشغل لازم يكون سري علمود يكدر يطلعه بسرعه بدون ما أحد يتدخل ويخرب القضيه لان جواهر ونائل ما يردونه يطلع .
لقاء ـ شلون ويمتى وين لكيتي هذا المحامي تعالي سولفيلنا ولج ، كل هذا لوحدج وشعجب ما تكولين ليث يساعدج .
عصماء ـ لا ديري بالج لاأدخلين ليث
ليال ـ ليش شبي شتعرفين .
عصماء ـ ما أعرف أي شيء بس لاتكولين اله لان ليث هم لازم محامي وجاي يمشي بالقضيه بس شغله مطول وأني اريد باسل يطلع بإسرع وقت لان قضيته صعبه وكذب مو ثمان سنوات أكثر
لقاء ـ أكثر يعني شُـــنوْ .
ليال ـ مو وگت اسئلتج هسه ، لازم نوكف وياها ونساعدها ويه المحامي ونغطي وراها لاحد يكشفها بالأخص نائل وأمه اذا كشفوها هاي هي بعد
لقاء ـ ميخالف والله وياج بگلشي وكعدت تحجي النا وليال تباوع الباب وگفنا وياها ومن تطلع نغطي وراها وكم مره ردت أوصلها أو اروح وياها ما قبلت وگالت
عصماء ـ أذا تروحين وياي يشگون بينا أما اذا وحدي محد يشك بيه اكول اروح اجيب حفاظات وحليب لبناتي أو اروح السوك عادي اي عذر مهم اطلع من البيت .
لقاء ـ تمام وگامت وتروح وتجي لوحدها وليث كام يسألني عليها وأطلع اله أعذار بس حسيته ما مقتنع وشاك بيها
وبيوم تأخرت والف عذر انطينا نائل بس ما يصدك ولازم الها الباب ويفتر وجواهر تحجي عليها ، دزيتلها جيبي وياج حليب وحفاظات علمود محد يشك بيج .
عصماء ـ جبت راح أوصل .
جواهر ـ يوميه لابسه عبايتها وماشيع ما أدري وين تروح تگول اروح السوك لو تجيب حليب بس تجذب خوما رايحه السوك هاي مرت أخوك أستجلبت شافت ماكو رجال على رأسها وبكيفها .
نائل ـ وهسه يله تحجين يعني يوميه طالعه
لقاء ـ على كيفكم عيني كمتوا تحجون شعدها يوميه بس تطلع من تحتاج حليب وحفاظات وتروح المستشفى تسوي فحوصات
نائل ـ وشعدها بالمستشفى فحوصات مال شنو ليش هي مريضه .
لقاء ـ باوعت على ليال لا مو مريضه بس حامل جواهر شهگت .
جواهر ـ حامل من شوگت شو ما گلتن وشگد الها
نائل ـ يمه وگت هل الاسئله خل تجي هسه .
جواهر ـ والله يمه لا كالن لا حجن خوما بايگه ما تحجي تگول اني حامل
الحجيه ـ كم شهر الها شو ما مبين عليها
جواهر ـ وصورت بيها تؤام لو فردي ولد لو بنات
لقاء ـ لا بعدها ما مسويه هسه تجي ونسألها وشويه ودخلت علينا ونائل يستوجب بيها شگد كرهته عبالك هو ولي أمرها وجواهر ركضت عليها ما ادري ما أرتاحيت الها .
جواهر ـ ولج عصماء طلعتي حامل وما تگولين شگو ضامه علينا خبر حملج ، كم شهر الج وصورتي بيج تؤام مو لو فردي .
عصماء ـ لا مو تؤام بيه بنيه .
جواهر ـ ها حرامات عبالي تؤام يله شگو بيها البنيه تخبل المهم طفل مو عمه .
الحجيه ـ الله يسهل الج ديري بالج على رويحتج وعلى البطنج لاتضلين رايحه راده لوحدج وتحتاجين شيء نائل يجيبه عمهن ما يقصر .
نائل ـ طلعه من البيت بعد ماكو كعدي وسگتي ما عدنا نسوان تفرفر وتردين شيء أني اجيب ودكتوره أمي وعمتي موجوات يأخذجن صار مفهوم كلامي
لقاء ـ ما حجت ودخلت الغرفه ولحگتها ها بشري
عصماء ـ بعدين الحياطين الها اذان تعبانه خل أرتاح وأحجيلج
لقاء ـ گلتي بيه بنيه ليش سويتي سونار .
عصماء ـ أي سويت طلعت بيه بنيه .
لقاء ـ الحمدلله الله يسهل عليج وتكومين بالسلامه
ذبت عبايتها ونامت بصف بناتها ورحت تغديت وجواهر عيونها عالباب وليال تباوعلي نظراتها مو راحه! وراها شيء .
جواهر گامت تتود لعصماء وگامت ما تصييح على البنات ولا تخليها تشتغل دائماً وتنزل تماضر تكمل الشغل ويه ليال أنگلبت ١٨٠درجه بالتعامل يا خوفي
الي أبالي صحيح وبيوم رجعت من الصيدليه ولكيت عصماء تبجي شگو شبيج .
عصماء ـ لا هيج ما بيه شيء .
لقاء ـ لا بيج منو وياج .
عصماء ـ لازم أطلع من البيت وأروح على المحامي باسل لازم يطلع وبسرعه أني أطگ روحي تعبت ما عندي طاقه أتحمل أكثر .
لقاء ـ ماشي بس منو وياج .
عصماء ـ محد
لقاء ـ سگتت وسألت ليال ما تعرف شبيها ودخلت المطبخ لكيت تماضر وجواهر ويحجن بينهم وبالصدفه سمعتهن .
تماضر ـ شتگولين عمه توافق
جواهر ـ أي ليش ما توافق يطلع رجلها وتخلف هي تحيب تؤام ، اني عبالي بيها تؤام حرامات جان واحد أخذنا واحد يضل اله علمود لاتنقهر وما تقبل تنطي
تماضر ـ وباسل شلون عمه هم تگولون اله خاف ما يقبل ينطي بنته
جواهر ـ لا ما نگول اله وقابل المن منطي بنته للغريب شو منطيها لأخوه وهو مسجون من يطلع هذاك الوگت هي كبرانه حتى ما يطالب بيها لان ما ربت بحضنه ما يحن الها أنتِ ما عليج خليها عليه أني أحاجيها وأقنعها وگلت لعمتي هم گالت تحاحيها وتقنعها حتى لو بفلوس هم تقنع .
لقاء ـ خوش مخططات أنتِ محد يلحگج والله أنتِ داهيه يعني وصلت بيج تأخذين بنت أخويه من حضن أمها لحضن تماضر والله ما تخلف وين صايره هاي بيا قاموس ، لو لأن أبوها مسجون وبكيفج تلعبين ورى ظهره وگلتي يطلع يلگاها كبرانه وما يداعي بيها .
جواهر ـ وشعليج أنتِ والأخ أخوج المفروض تفرحين وأنتِ تطالبيين بيها وتفرحينه لو سمجن ينكط حقيرات ومسمومات ما تحبن الخير لأخوجن .
لقاء ـ نحب اله الخير وأتمناله يصير طفل بس مال يأخذ طفل غيره والله أبوها بالسجن هاي ما صايره ولا تصير ولا تحلمين تقنعين عصماء لان ماكو أم تنطي ظناها بالأخص عصماء روحها بناتها ولا أحنه نقبل بهل الشيء
جواهر ـ لاتقبل فوك ما كاعده ومدلله وأطب وتطلع بكيفها ومحد يحاجيها وين لاگيتها الخاتون مو مثلها وشصار عليها وهي حضنها متروس ويطلع اخوج وتترس البيت جهال هي بس هل البنيه لما أخوجن
لقاء ـ هذا الشيء ما يصير أفتهمني ودخلت عصماء تبجي الظاهر سمعت الكلام .
عصماء ـ مستحيل أنطيج بنتي مستحيل لو أبوها يضل العمر كله بالسجن ما افرط بنته وأنطيها الج
جواهر ـ وشصار عليج أعتبري أختج عايشه وتنطينها الها وتفرحين رجلها وأنتِ أختها وابني حماج مو غريب وهي بنت أخوه هم يدير باله عليها ويصير الها أب بغياب أبوها .
عصماء ـ أبوها عايش ما ميت علمود نائل يصيرلها أب وبنتي تضل بحضني وتتنظر أبوها حالها حال أخواتها يعيشن بحرمان من ابوهن يطلع ويعوضهن بس مال أشيلها تسع شهور وبعدين عالحاضر أشيلها وأنطيها الج لا مستحيل هاي بنتي ، لقاء لاتوكفين وياها حتى لو أخوج ما أكدر هاي بنتي بنتي أفهموني شلون أنطي بنتي
لقاء ـ حاضنه بطنها وتبجي لاتخافين محد يأخذها منج وأحنه ضد هالشيء مستحيل يصير أمشي غسلي وأرتاحي وبنتج تضل بحضنج محد يگدر يأخذها منج
أخذتها غسلت إلها وهي تبجي وليال تسگتت بالبنات دخلتها الغرفه أرتاحي وجواهر تحجي يم جديتي وتماضر تباوع بتمسكن وطلعت عليها وصحت بيها أنتِ من كل عقلج تحجين هذا الشيء ما يصير لو تعلكين روحج من رمش عيونج منو ينطنج بنته هاي أم أم وگلبها محترك على رجلها تريد تكسرينها فوك كسرتها وتأخذين بنتها أنتِ مو صاحيه ومريضه غضب على يومج حتى عصماء ما سلمت من شرج ومخططاتج .
الحجية حليمه ـ شگو بيها البنت بنت أخوه ما الج حق تمنعين لان هذا أخوج ومحروم من الخلفه ويدير باله على بنات أخوه مو بس هالبينه لاتصيرين حجاره عثره
لقاء ـ لا أصير لان هذا جرم بحق عصماء وبنت أخويه ومستحيل أخلي مخططاتجن تصيير ما انطي بنت باسل لأي أحد لو يكون أخويه من أمي وأبويه بنت باسل محد يأخذها من حضن أمها .
الحجيه حليمه ـ عوذه منج من أخت عوذه عفيه أخت ما تردين الخير لأخوج الله يكصف عمرج مال الوجع أكلتني وشربتني .
جواهر ـ شفتي عمه شفتي القهر وهذا أخوهن ما يردن يفرحنه مو أكولج من يومهن ما يحبن أبني وما يردنه اله الخير بس محد يصدگني .
لقاء ـ عفتهن وطگيت من القهر وعصماء تبجي گافي تبجين من كل عقلج أخليهن يأخذ بنتج من حضنج بابا شبيج وين عايشين أحنه .
عصماء ـ عايشين تحت رحمه جواهر شُـــنوْ نسيتي إشسوت بينا من دخل باسل لسجن لحد هسه وأنتِ أكثر وحده تعرفين جواهر واللي برأسسها تسوي حتى لو الكل وكف ضدها كلمتها كلمه .
ليال ـ صحيح كلامها وأني أشوف عصماء ما تضل أهنا
لقاء ـ وين تروح وأهلها ما يردونها وأذا تروح بيت عمي كريم تتوقعين نائل يسکت هو حتى بيها يتحكم وهما كافي عليهم أبويه مريض وحايرين بي ولاتنسين ليث هم جاي يشتغل يطلع باسل من السجن .
عصماء ـ لا أروح على أهلي غصباً عليهم يستقبلوني وأذا طردوني احر بيت وأكعد بس متأكده أهلي ما يطردوني أحساسي ما يخيب بيهم ابقى اني بنتهم
ليال ـ أي خل تروح لأهلها وهم تكدر تشتغل ويه المحامي براحتها وأطب وتطلع محد يحاسبها لان اذا تبقى أهنا محد يخليها واذا نائل كشفها يخرب عليها
هو گلشي ولا باسل يطلع من السجن كلنا ندري شلون حاقد عليه من وفاة بيداء وأنوب طلعت سالفة جواهر واليصدمج جديتي واكفه وياها وأحتمال نائل هم يقتنع وبعدين من تولد يأخذون الطفله غصب حتى بيت عمي كريم بنفسهم ما يكدرون الهم
لقاء ـ بس شلون تروح وحدها لديالى وطريق والبنات وياها وأنتِ حامل والله أخاف عليج لا خلي نگول ليث
هو يتصرف ، حتى لو نرجع نعيش بالبيت ويجيب أبويه يمنا ها شتگولن .
عصماء ـ لا لاتكولين ما يحتاج والله أني أروح لوحدي
شگو عليه
ليال ـ وين يكعد ويانا وهو مسوي عمليه لقلبه من كل عقلج عمي كريم صارله أشهر يفتر ويه عالأطباء علمود يصير زين يكوم يبقي ويانا وأنتِ شفتي نائل شسوى من كل عقلج يوافق والله يسوي حفله علينا دسگتي
لقاء ـ لعد هذا هو بس شلون تطلعين نگول الهم لو شلون فهمني لان عقلي وگف وما أكدر افارك البنات شلون ياربي روحي بيهن غنى جنى عمه حضنتهن وابوس بيهن روحي أنتن .
ليال ـ مجبورين لقاء أحنه ما نكدر نسوي گلشي لباسل اما عصماء تكدر سباعيه هي بنصنها وطلعت لازمه محامي ، خليها تروح وتخلص من هالجحيم شبعت ضيم هي وبناتها .
لقاء ـ أي بس شلون
ليال ـ نهزمها! .
لقاء ـ جنت واكفه يم الباب سگتن أجتي سليمه وسگتنا وكعدنا نفكر شلون نهزم عصماء من البيت
ومر كم يوم ونائل صار يتقرب من البنات ويجيب ويشتري الهن يمكن عرف بالموضوع ومبين مقتنع أهنا ازداد خوفي أكثر وصار لازم نستعجل ونهزم عصماء من البيت هم تطلع باسل من السجن وهم تنهزم بنتها من هالمجرمين والأنذال عايشين بوسط عصابه ومافيات مو أهل والله .
الصبح ما رحت الدوام بقيت بالبيت وشفت جواهر لبست عبايتها وطلعت ونائل طالع لشغل وعمتي نجاح حتى لو تشوفنا ما تمنعنا هاي فقيره ورجعت عليهن ركض جواهر طلعت هاي فرصتنا .
ليال ـ يمه سوده عليه حبيباتي .
لقاء ـ أخذت جنى بحضني أبوس واشم بيها وغنى بحضن ليال وعصماء تباوعلنا وتبجي ومجهزه جنطتها وأغراضها وليال راحت جابت كل الذهب مالتنا والفلوس من عمتي سلوى خلتهن بأيدها .
ليال ـ هذا ذهبنا وهذا ذهب أمي وهاي الفلوس ويه اللي العندج خاف ما يكفجن بيعي گلشي وطلعي باسل
أملنا عليج عصماء نباوع على الله ثم عليج .
عصماء ـ أن شاء الله ديرن بالجن على نفسجن ونتخابر
لقاء ـ تمام ودعناها وعمتي نجاح شافتها وهي طالعه وأحنه شايلين البنات بس ما حجت وطلعنا وصلناها يم الباب وليث جان فوك وصاح علينا .
ليث ـ وين
لقاء ـ بعدين نحجيلك يله عصماء روحي .
ليث ـ أوكفي هسه أنزل
لقاء ـ طلعت عصماء والبنات يمشن كدامها وليث فتح الباب وباوعلنا مستغرب وتماضر اجتي تصييح
تماضر ـ وين هزمتنها وين الا أكول لنائل عليجن ليث لاتخليها تروح ترة منهزمه .
ليث ـ أﻧت أدخلي جوه .
لقاء ـ دخلها وسد الباب ونباوع عليهم يحجي وياها وهي تهز برأسها برفض
ليال ـ شيحجي وياها
لقاء ـ يمكن يقنعها هو يوصلها او يكول الها ابقي يمنا
أباوعلها مشت وگفت تكسي وصعدت وباوعتلنا رفعت ايدها والبنات أخذن روحي وراهن ومشت السياره وراحت عصماء ورجع ليث دفع الباب ودخل .
ليث ـ هاي عصماء شبيها بابا القضيه مو يوم ويومين
تريد صبر من كل عقلها لازمه محامي ويكرف بيها فلوس ترى من زمان ادري بس ما تدخلت لان ما أريد اغثها بس مال تگدر تطلع باسل ما تصير خلوني اشوف شغلي عدل باسل أذا ما تبرء القضيه تضل برگبته ليش هي بالسوالف بالسباعيه .
لقاء ـ خليها تشوف شغلها يجوز هي تطلعه شمدريك وأنت ما مقصر وتساند أنتَ وياها وطلعوا مو صعبه
ليث ـ بابا هذا حجي ونائل وين .
لقاء ـ بالشغل خوما تگوله هنا هزمنها .
ليث ـ لا شعليه وهو شعلي يمنعها قابل ولي أمرها وهي رايحه لأهلها شگو باقيه ومن الأول گلت تروح يم اهلها احسن الها بس محد سمع مني ، يله بيها الخير
لقاء ـ وعلى صوتنا دخل نائل يحجي ويصيي علينا هاي أكيد الحقيره تماضر راحت بلغته .
نائل ـ شلون تتصرفن من ورة ظهري وتهزمنها من البيت شلون لو ماكو أحد على رأسجن بكيفجن بس أني أعلمها أرجعها وارجع اشوف شغلي وياجن .
ليث ـ وين وين ترجعها
نائل ـ أي أرجعها وتكعد وتنجب هي وبناتها طلعه من البيت ماكو .
ليث ـ لا بربك وأنت شعليك بيها مو ولي أمرها تتحكم بيها والمره راحت لأهلها شگو باقيه اهنا من الأول لازم تروح بيت أهلها .
نائل ـ أنت أسكت ولا تتدخل محد طلب رأيك ولو بيك خير جان منعتها مو تخليها تروح لوحدها حامل وياها بنات أثنين .
ليث ـ هيج شايل همها وهم بناتها وخايف عليهن جان ما سجنت رجلها وتهمته وشهدت ضده ظلم وباطل ونومته بالسجون وهسه صايرلي الأخ الحنون وخايف على بنات أخوه دبطل سوالفك صايرلي والي عليهن .
نائل ـ أمشي اطلع من بيتي وأذا شفتك أكسر رجلك أي اني أخوهن والمسؤول عنهن أنت شنو عود أبن عمهن
** على هيج ابن عم
ليث ـ مشكلتك ناقص گلشي مو بس أخلاق لهذا ما راح اردك .
لقاء ـ فتح الباب وطلع نائل باوعلنا وعاط بينا وضربنا أثنينا وسحبنا من شعرنا للبيت ما حجينا ولا منعننا خلي دام عصماء طلعت من البيت الباقي مو مهم .
ودخلنا وليال لازمه رأسها يمكن أذاها لأن أيده ثكيله واجتي جواهر هي ونجلاء تخبلت وأني متشمته بيها .
جواهر ـ كله من أخواتك أساس البله هنا بس عرفن نريد البنيه هزمناها مو أكولك ما يحبنك ما يردن الك الخير شفت بعينك شسون الأدبسززيات گامن وهزمناها لأهلها ، كله منج أنتِ الحيه الصفره أنت هزمتيها علمود تحرگين گلبي الله يأخذج طركاعه مو بنيه .
لقاء ـ أي أني هزمتها ومستحيل اللي أبالكم يصيير
عفتهن ودخلت الغرفه وليال مگابله ملابسهن وتبجي خابرتيها .
ليال ـ أي گالت طلعت من الكراج من توصل هي تخابرنا
بس بالي يمها ويم البنات شلون راح أصبر على فراكهم
لقاء ـ عصماء سباعيّه ما ينخاف عليها وراحت خلصت نيالها والله أعيش يم كواويد ولا أعيش بهل البيت وأكابل جواهر وأبنها العربانه ونجلاء الطماعه أمها وابوها الفلوس والورث كبر حتى كبر تسحسل بنفسها وراهم
ليال ـ أكولج ليش ليث هيج حجه عن القضيه
لقاء ـ لان الشغل صعب ولان هي مره عباله ما تكدر لوحدها ما يدري هي من دون علمنا وبهل الضيم الشافته وحرعته غافلت الكل ولزمت محامي هيج نسوان ما ينخاف عليهن يطلعن حقهن من حلك الذيب وأن شاء الله عصماء تطلع باسل من السجن .
ليال ـ أن شاء الله .
لقاء ـ أول أيام جان الفراق صعب وصورتهن گبالي وضحكتهن ولعبهن بعقلي دمعتي ما نشفت من نار الشوك والحمدلله واصله أهلها بخير وأمان وأطمئننا عليها وعلى البنات وضلينا بس أني وليال وتفارگنا
عن عصماء جانت ويانا وشارگتنا بگلشي ما حسيناها مرت أخ بكثر ما شفناها الأخت الكبيره والأم ، جانت زوجة أخ والنعم منها ومن أصلها .
ومرت أشهر وزادت معاناتنا جواهر من يوم راحت عصماء ذبت قهرها بينا حتى على أختي جنات ما تخلينا نروح بس نحجي وياها أتصال وأني تعبت من الوضع گلش حتى الدوام ما ضلي واهس أروح واجي بدون شغف
وباسل ماكو عنه أي تطورات وعصماء جاي تشتغل ويه المحامي بس ليث يکول صعب ما تگدر وأيسسنه جنت فرحانه وگلت تكدر تطلعه بس مع ذلك ميخالف تحاول وأن شاء الله تگدر هي سباعيّه ما تستسلم بسهوله
وبيوم وصلنا خبر عن جنات متنا قهر خاف أحنه عايزين التمت علينا منين اجتها ارتاحينا وكلنا تزوحت وخلصت ورجلها خوش رجال أنوب طلع الها ابن رجلها عفيه سعاده ما تكتمل لازم يصير شيء معاكس وتخرب .
تحهزنا وعمتي سلوى ونجاح ما اعرف شعجب طلعت من جديتي وكالت روحن عليها وحتى طلبت من جواهر بس ما تروح يله بعد احسن شگو رايحه بعد كل اللي سوته بيها تروح عفيه صلافه .
جواهر ـ هاي حوبة أخوجن وحرگة گلبي لان ردنا بنت باسل سويتنها سالفه شگبرها وتالي هزمتنها لأهلها وقهرتنا على البنيه ، الله بالمرصاد خله أبن جنات يكمل للولاده ويموت بطنها ، لعد بس أنتن تصيرن أمهات وأبني ما يصيير أب هذه عداله .
لقاء ـ ردت أردها بس ليال منعتني
ليال ـ عوفيها تتحجي وأذا حجيتي أدري بيج تجفصين ديري بالج تجبين طاري الخلفه ويوصل الكلام لنائل وينقهر خطيه حتى لو حقير ونذل ميخالف .
لقاء ـ لا شعليه ولا عبالج ما مقهوره عليه والله شابعه قهر بس مال أنطي بنت باسل اله لا هذا الشيء حرام الله وعباده ما يرضون بي ، وهو الله يفرح گلبه بطفل ويجبر خاطره يارب لاتخلي أغلاط أمه تأثر عليه هو ماله ذنب عافين عليه وعن كل اللي سواه ويانا .
طلعنا رايحيين على جنات وكل خطوه أمشييها گلبي يوجعني أكثر من يوم العفته أني شبه ميته صح صارت مشاكل وظروف بس هو على بالي بكل وقت أعيشه من دونه ، حُبنا ما أكتمل بسبب الأهل والظروف العاكستنا ووگفت ضدنا .
دخلنا البيت وفاطمه أستقبلتنا وبالصاله وهو نزل وگف وهو يباوعلي شفته عيوني أنترست دموع فزيت على أيد ليال ودخلنا الغرفه يمها وشفناها الوجه ذبلان وتبجي على أبنها وعلى تعبها وضلينا كاعدين فاطمه ضيفتنا وأني عيوني على الباب ومر خطف شفت طوله وگلبي يغلي من القهر .
سلوى ـ يله أحنه نگوم تضل يمكم العافيه وجنات يمه لاتقهرين بروحج وهذا امر الله وبعدكم شباب تلحكون تلخفون وتترسون البيت جهال .
فاطمه ـ لا الله كريم ، بس بعدها حقها الله يساعدها
لقاء ـ ودعناها وليال تبجي عليها وطلعنا من غرفتها وشفت شحاطته باب الأستقبال وسمعت صوته
وگلبي وگف .
أمجد ـ زينب النفاضه من يمج .
لقاء ـ تشرب جگاير أمجد من يمتى گمت تشرب! ومشينا والباب مفتوح شوي شفته بس ما منتبه عليه عينه بالموبايل وتالي مشيت وترگت گلبي وراي وحيل انقهرت ونعلت جواهر ونائل وأهلي وگلشي حقدت على الكل حتى على نفسسي لان حبيته وخليته يحبني ويتعلق بيه وتالي عفته متعذب وراي .
رجعنا البيت وعمتي سلوى راحت بيتها ودخلنا بيتنا وجواهر كاعده يم جديتي وعبرناها وصاحت ورانا .
جواهر ـ شفتي حبيب الگلب شفتي أبن ثريا .
الحجيه حليمه ـ شُـــنوْ هالحجي جواهر منو أبن ثريا
جواهر ـ ليش عمه ما تدرين ما تعرفين أبن ثريا الأستاذ أمجد اخوه حيدر زوج جنات .
الحجيه حليمه ـ أي شبي ولقاء شعليها بأبن ثريا
جواهر ـ ليش عمه شعليها ليش هو مو خطب مرتين وطلعت الخاتون تحبه وتحجي هي وياه عالموبايل
وهسه بدون مستحى وخوف راحت تشوفه بس يجي نائل وأكوله وخلي يشوف شغله وياها وأحسن شيء يزوجها لواحد من ولد عمامها لاتالي تطلع النا بفضيحه مثل أخواتها جنات وليال .
الحجيه حليمه ـ جواهر سگتييي شهل الحجي هذا
جواهر ـ لا عمه ما أسگت لان أذا أسگتت تاليتنا هم ننفضح هو بدون شيء مفضوحين خلي يشوف حل لأخته قبل لاتصخم وجه .
لقاء ـ تحجي تحجي وأني اباوعلها وليال تهز بيه
ليال ـ لقاء أمشي ختولي أمشي غيري ملابسج عوفيها
لقاء ـ لا ما أعوفها هالمره أنهي على حياتها خلاص هجمت عليها ودفعتها قوي وكعت على ظهرها وعاطت بعلوا صوتها
جواهر ـ يمــــــه ظهري طگ عمــــه ظهرييييي الحكيليييييي .
لقاء ـ نمت عليها واخنك بيها واضرب بيها وليال وعمتي وجديتي يردن يسحبني واني ادك براسها بالكاع تطعنين بشرفي أنتِ تحجين على شرفي عبالج اني جنات وليال يسكتن الج أنتِ ليش ما اتوبين ليش ما تعرفيني كم مره كتلتج كم مره نعلت والديج مـــــــا تصيرلج عبـــــــــره تردين تموتــــــــين أمـــــــوتج جواهـــــــر أمـــــوتج واخلص العالم من شــــــرج أمــــــوتج جواهـــــر .
ليال ـ لقاء دخيلج راح تموت لقــــاء رأسها كام يذب دم لقــــاء ولج لقــــاء راح تمــــوت .
الحجيه حليمه ـ يبـــــوه الحكولييييي يبـــــوه ولكم الحگوو الها راح تموتها .
لقاء ـ خنگتها وعيونها طلعن وهي ترفس تذكري إشسويتي بإمي شلون خليتها مخنوگه وتطلب النفس تذكريها زين ماتت وهي بحسره شمة هوا تذكريها تذكري حركة گلبها ولوعتها على جنات تذكري زين
عيونها طلعن وجهه احمر ولسانها طلع متر ليكدام
جواهر ـ راح أمــــــوت .
لقاء ـ هو أني أريـــــدج تموتين موتي موتي وانرفعت شالني ليث ودفعني وهي ترفس وتكح والدم بالكاع رفع رأسها وعاط بيهن بعلو صوته
ليث ـ بسرعه ركضي خل فارس يشغل السياره ثلث نسوان ما كدرتن الها
لقاء ـ شالوها هو وفارس أخذوها وجديتي أدك وتلطم وصعدت وياهم وراحوا وعمتي نجاح تضرب على وجهه
نجاح ـ ولج اذا ماتت شنحجي شنگول شصخمتي عزه بعينج أنتِ مجرمه سيحتي دمها تخبلتي .
لقاء ـ أي تخبلت وإذا ما تسكتين أســـيح دمج والحكج بيها وعساها لا گامت يالله يا حبيبي تجيني البشاره وتقبض روحها وتخلصني من شرها .
ليال ـ فتحتي على نفســــج باب من جهنم .
لقاء ـ ما يهمني ، رحت غيرت ملابســي ونائل أتصل وجاوبته وأجاني صوته يعيط
نائل ـ لقــــاء اليوم أشرب وارتوي من دمج اليوم گتلج حلال أذا ما كطعتج أني كواد مو نائل .
لقاء ـ قطع الخط وأنفتح الباب دخل ليث وصاح بيه
ليث ـ گومي أم المصايب گومي بسرعه
لقاء ـ وين خلي يجي يگتلني اذا هو رجال خل يجي ما عندي شيء أخسسره .
ليث ـ دمشي صايرتلي سباعيّه وهو براجدي واحد يطفي عينج بابا بغل هذا بغل تعرفين اذا ضربج هسه وهو دمه فاير عليج يسكطج أمشي وأنتِ هم تعالي
ليال ـ وأني شعليه ما اجي
ليث ـ لاتتخبلن عليه أمشن .
لقاء ـ مشينا وياه ودخلنا البيت وسمعنا صوته ليال گامت تخاف وتبلع بريگها
ليال ـ كله منج مو كتلج عوفيها يوميه گاتلتها
أستلمي هسه شيخلصنا منه وحقه امه سيحتي دمها ونومتيها مستشفى عبالج يسكتلج .
ليث ـ أمشن صعدن بغرفتي فوك وقفلن الباب تحرگن
لقاء ـ صعدنا ركض ودخلنا غرفته وقفلنا الباب ليال كعدت على الجربايه لازمه گلبها وترجف وأني متت خوف يا سباعيّه يا دنيا بس صوته شال گلبي من صدري بعدت البرده شويه وباوعت وشفته عمي كريم وفارس وليث بصدره وهو شايل صونده يمه عزه .
ليال ـ عوفي الشباك غضب على يومج كله منج يعني بيت عمي كريم مبتلين بينا بس تخيلي لوما ليث منو يخلصج من نائل ، أخ منج أخ .
لقاء ـ عفت الشباك وشويه صار هدوء يارب فضت خرب دمي نشف هسه على هالخوفه والهبطه كون ميته يعني تسوى واحد يخاف وينهبط شتگولين ليال
ليال ـ مصيبه مصابتج بس سگتييي .
لقاء ـ سگتنا وشويه وسمعنا الباب يريد ينفتح گمت منو
ليث ـ أني ليث فتحي
لقاء ـ فتحته ها شصار
ليث ـ گولي ما صار شمسويه بأمه ولج رأسها بي فطر
بالجمجمه عمي حقه دمه فاير عليج أذا يلزمج شرط يدفنج ثلاث زلم گوه منعنا منج
ليال ـ وهسه وينه
ليث ـ راح المستشفى هو وأبويه وأنتن ابقن لما نشوف تاليها شلون .
ليال ـ أني ما عليه خليني أروح هو ما يضربني مشكلته ويه لقاء .
ليث ـ وين تروحيـــن دكعدي وسگتتي هسه أمي تصعد الجن .
لقاء ـ نزل وليال ضاجت وتتأفف شگو شبيج
ليال ـ هسه أني شگوو ساحلني وياج عبالك أني گاتله جواهر .
لقاء ـ هو خايف عليج أكثر مني ويخاف نائل يفرغ قهره مني بيج لهذا جابج وياي ديله فوك ما لاگيه واحد يخاف عليح وأنتِ ما راضييه .
ليال ـ ما تنجبيين وتسگتين أني صوجي أجييت وياج لا انوب مكعدنا بغرفته ليش ما كعدنا بغرفة فواز او ياقوت
لقاء ـ أي روحي كعدي بغرفه ياقوت عقلج ما اعرف شبي
ليال ـ بي نعل مكطعه على رأسج ، هما ينلامون ما يصييحون الج غير طركاعه .
لقاء ـ بقينا بغرفته ولليل عمتي سلوى صعدت النا العشه وتضحك ها عمه بردت كلبج مو بالله
سلوى ـ ولج يمه والله أخاف عليج مو هيج هسه زين يعني فطر برأسها وأخوج متخبل عليج بس يريد يلزمج
لقاء ـ تحجي واجه ليث وراه عمي كريم وشكله مزعوج خفت منه وگمت ودخل هو وليث .
كريم ـ بابا شهل العمل هذا شمسويه بمرت أبوج هو هيج مزوگه المره وفطر برأسها أنتِ مجرمه من خبال يخبلج اني ما شايف هيج بنيه ولا راح اشوف ما عدنا هيج نسوان وكحات وعرمات وما يحترمن بس أنتِ مدري عليمن طالعه .
لقاء ـ بس عمي والله هي وسگتني
كريم ـ من عمى العماج وعمى عمج وياج واحنه وينه وين المشاكل مو كدامج ما تشوفين ابوج مريض ومسوي عمليه وگلبه تعبان وأخوج بالسجن ومرت أخوج هزمتيها هي وبناتها ماكو هيج وكاحه وفلاته يوميه هارجه البيت ومسويلتنا مشكله هاي مو أختج وياج شو ما سمعانين الها صوت بس لا أنتِ وكحه لازم نشوفلج حل س گالوها محد يلم البنات غير الأم ومن ماتت أمجن طاح حظجن .
لقاء ـ حجه ومشه ورجع گال
كريم ـ خليهن بغرفتك لاينزلن هذا خبل لايروح يسكطهن
ليث ـ ماشي
لقاء ـ ونزلوا وعمتي سلوى گالت
سلوى ـ لاتزعلن من عمجن لان راحلها المستشفى وشافها ونائل هم مقهور على أمه وهو ما تحمل ميخالف عمجن حسبة أبوجن وهو لان مقهور عليجن
ما يريد مشاكل وتنضرن .
لقاء ـ ما حجيت وليال سگتت وعمتي سلوى نزلت وضليت صافنه وعبرت ياقوت وباوعتلنا بنظرات أستحقار شبعت من هالنظرات يوميه من بيت للبيت يوميه مشاكل الى متى نضل هيج .
ضلينا بغرفة ليث وأجه الليل وصعدت النا عمتي وليال نامت دنگت باستها ودمعت عيني على حنيتها وخوفها على ليال ياريت ليث يأخذها وأمن عليها واني وين اروح اضل على أيد جواهر وتكون نهايتي على أيدها .
واسمع صوت نائل
نائل ـ ليال خل تنزل تجي وياي ما عندي شيء وياها هي أصلاً أعقلهن كلهن بس هذيج سليمه يابه اذا الزمها الا أكلها بسنوني .
لقاء ـ وشويه وصعد ليث صاح لعمتي .
ليث ـ يمه
سلوى ـ يمه نايمه گلبي ما ينطيني أكعدها خليها الصبح تروح .
ليث ـ ماشي عوفيها لعد نايمه
سلوى ـ يمه ليث أوگف أريد أحجي وياك يموضوع
ليث ـ مو وگته هسه يمه خل أنزل على نائل .
لقاء ـ ما ادري ليش أحساسي يگول الموضوع يخص ليال يارب يخصها ويأخذها يمه رغم كل اللي صار وأذيته الها بس ما الها غيرها وهو اكثر واحد يخاف عليها ..
وخليت رأسي عالمخده والليل الناس تنام بي أني بقيت كاعده وأفكر للصبح توصلت لقرار نهائي من بعد معركه طاحنه من الافكار ...
طلعت حساب خالي شامل وراسلته خالي شلونك أخبارك
وصلته ورى نص ساعه جاوبني .
شامل ـ هلا لقاء هلا خالي الحمدلله زين يبعد خالج
لقاء ـ خالي أكدر احجي وياك
ـ أي گولي
ـ وحجيتله كلشي برساله خالي اني تعبت والله تعال أخذني يمكم اريد يمر يوم وأعيشه بسلام ماكو
ـ اي خالي أخذج يمنا صدك جذب بس أهلج يقبلون
ـ عساهم لاقبلوا لعد أموت أحسن
ـ لا خالي أسم الله بس خالج يحيى يمنا خل احجي وياه وهو يقنع أهلج ويجيبج يمنا لان اني وياهم مو على اصطلاح
ـ وخالي يحيى شوگت اجه
ـ اجانا زياره والله صارله أسبوع .
ـ ماشي خالي أنتظرك سلملي
ـ الله يسلمج .
ـ وضليت أنتظره وليال نزلت بدون ما تحجي وياي وللعصر اتصل عليه رقم غريب وأستغربت جاوبته واجاني صوت .
ـ الو لقاء شلونج
ـ منو
ـ اني خالج يحيى شلونج بابا
ـ خالي يحيى الحمدلله تمام وأنت شلونك
ـ شلوني الحمدلله على كل حال شامل حجالي گلشي ومن الاول ما رضيت هيفاء ترجع لسعيد لان مو ماال مره الرجال الما يقدر المره ويصونها جريمه انطي مره واشيل خطيتها وياه بس بعد صارت وخسرنا أمج .
ـ الله يرحمها .
ـ أي بابا هسه عرفت گلشي وأنت متعينه مو
ـ اي خالي
ـ تمام ، شوفي بابا اني دكتور جراح مقيم بالأمارات واني وياج اثنينا بالطب واقترحت على خوالج من اسافر الامارات أسحبج يمي واهناك على وظيفتج اني ما اتفضل عليج بشيء شهادتج عندج بس تعيشين يمي ماكو بس بناتي اثنين واني وعمتج بس بالأول گلت اسألج لان مال تجيين يم خوالج واهلج قريبين عليج صعب يخلونج واصلاً ما يرضون تجيين .
ـ صفنت قصدك أسافر وياك
ـ أي مو أحسن الج واختج جنات تزوجت ومرت أخوج راحت لاهلها وأخوج بالسجن قضيته صعبه وأنتِ بنيه شطالع بيدج تسويله وهم تطورين من نفسج وطموحج .
ـ عادي اردلك خبر بعدين خالو
ـ عادي بنيتي واصلاً الشغله تطول اذا وافقتي علمود من اسافر ارتب الج كلشي واكمل الأجراءات كلها وأبلغج
ـ تمام خالو أردلك خبر
ـ هذا هو بابا ديري بالج على نفسج
ـ أن شاء الله وراح وصفنت معقوله تكون فرصتي وأخلص من هالعذاب بس أمجد شلون وليال منو يضل الها وجنات وعصماء والبنات وباسل والسجن ضليت صافنه للعصر توصلت لقرار نهائي وراسلت ليث وينك
ليث ـ بالاستقبال كاعد ليش ضجتي
لقاء ـ طبعاً أضوج
ـ اخاف ما ضايجه مشتاقه للمشاكل اعرفج جلدج يحكح ما تعرفين تكعدين
ـ لا ليث بس اني تعبت والله
ـ أي وشسويلج
ـ ما تسويلي شيء بس لكيت الحل أخلصكم مني ومن المشاكل اللي اسويها لان اذا ابقى مره ثانيه أسويلكم مصيبه وهالمره ربك لطف وأنت لحكتني بأخر انفاسها
ـ لا ما يحتاج احنه لكينا الج الحل المناسب والمستقر
ـ شنو بله .
ـ نزوجج لـ سجاد!
ـ لا مستحيل لا عفيه ليث .
ـ راح أصعد واحجي وياج بهذ الموضوع طلعي بالصاله
ـ تمام لبست شالي وطلعت وياقوت طلعت من غرفتها وگالت
ياقوت ـ نخلص من ليال تطلعين أنتِ شسالفتجتن
ليث ـ ياقوت نزلي جوه لا أكسر حلگج يله .
لقاء ـ ياقوت نزلت وأجه كعد أي كمل
ليث ـ أي هذا أنسب حل والله ما تلگين أحسن من سجاد هذا مربينا على إيدينه أني وباسل .
ـ لا ليث لاتخذلني الله عليك خليك على موقفك لاتجبرني على سجاد وسابقاً حجيت وياك بهذ الموضوع وسدينا ليش ترجع هسه تفتحه
ـ ماكو حل غير زواجج سجاد ويفتح الج بيت لوحدج وحتى مـا عنده مانع بوظيفتج ما يتدخل ولا يمنعج
ـ يعني هو يدري وموافق
ـ بعده ما رادلي خبر بس اذا وافق ما يمنعج .
ـ لا ليث لا عفيه والله معتبرته أخ وحاله حالك وحال باسل شلون هيج تفكر .
ـ لعد شتردين لقاء ، اذا ارجعج معناها أحكم عليج بالموت جواهر ما تعوفج بعد على اللي سويتي بيها
ـ أفهمني ليث أني ما اريــــد اتزوج وانتوا كرهتوني بالزواج من ساعتها وشلته من بالي وأذا تردون تخلصون مني أني عندي حل أحسن من الزواج .
ـ وشُـــنوْ هذا الحـــل
ـ أسافر!
ـ تسافرين
ـ أي أســافر
ـ مو وگت قشمره وأحلامج هاي نامي العصريات وأحلمي بيها بس وياي لاتحاجيني ما عدنا نسـوان تسافر وين تسافرين ويامن شبيج لقاء تخبلتي .
ـ أنطيني مجال أحجيلك عفيه زلم گبل تثكبون وما عدنا نسوان تسافر خل احجي بالأول .
ـ أحجي خل أشوف تاليتج .
ـ حجيت الّه وهو مركز وياي وعاگد الحواجب وأول كلمه نطقها لدرجه گالها وحتى نبرة صوته تغييرت .
ـ وليال .
ـ هسه أنتَ أقتنعت يعني وافقت وبعدين اسأل على ليال .
ـ وخالج هذا شنو تخصصه
ـ دكتور جراح هو من زمان مستقر بالأمارات
ـ يعني تشتغلين وياه لان أثنينكم نفس المجال
ـ أي هو هيج قصده والسكن أعيش وياهم بس بنات خالي أثنين الاعرفه ليلى جاي تدرس بمصر وقمر بعدها
ـ ليش ما تروحين فتره يم خوالج ترتاحين وترجعين
ـ واروح وأرجع وبعدين ليث وبعدين
ـ ليش ما تتزوجين سجاد
ـ هم رجعلي على سجاد
ـ والله خوش ولد ويستاهلج .
ـ يستاهل أحسن مني الله ينطي على كد نيته وأخلاقه الحلوه بس أني ما مخليه أبالي الزواج أتمنى تفهمني وأني معتبرتك مثل باسل وسانده ظهري عليك لا توكف ضدي وتخذلني ما اللي غيرك ، بس ساعدني بهل الخطوه وخليني أعيش حياتي مثل العالم .
ـ بس السفر مو حل نهائي لقاء هاي كل وحده تمر بظروف واقع ما عجبها تسافر شطلعت هاي .
ـ أي اذا اجتها فرصه ليش ما تسافر وتطور من نفسها منو ما يتمنى يسافر وهي فرصه واجتني واني الصدك بالبدايه خابرت خالي اروح اعيش يمهم وخالي شامل لان علاقته مو هلكد كال اكول لخالج يحيى هو يحجي ويه أهلج شو خابرني وبلغني ها ليث شتگول
شو سگتت
ـ ما ادري لقاء
ـ ليث أني اذا أبقى أسوي الكم مصيبه وادخل السجن الحك باسل ما أكدر أتحملها هالمره أنتَ خلصتها مني مره الثانيه محد يلحگها واكرهه اشوف الدم من اشوفها هواي اذتنا وأني الشخص يأذيني ويأذي أهلي ما انساه أذيته .
ـ ليال شلون تعوفينها .
ـ أنتَ موجود .
ـ أي أقهريني
ـ لا ليش أقهرك أنتَ حبيبها وأبن عمها وسندها وعزوتها وماكو شخص يخاف عليها بگدك .
ـ ليا حقيره شلون تفتح جروح غضب الله على يومج
ـ هسه بس وافق وقنع أهلي وعمامي هسه اني جايبتك تفكر بيه لو بـ ليال .
ـ مصلحجيه ولج مو أختج هاي خرب بيومج ما عندج وفه أبداً بإتصال واحد من خالج بعتييها .
ـ ليال تعيش وياها أني ما أكدر والله أذبحها وأبليكم
ـ ادري بيج أصلاً أنتن كل وحده شكل ولا عبالك أخوات
ـ أي شنسوي ، هسه شگلت
ـ الله كريم سهله أنطيني مجال لاتضلين تلبكين عليه
ـ يعني وافقت .
ـ يصير خير .
ـ يعني أبلغ خالي .
ـ أنطيني مجال شحجيت أني شو طلعتي ما مصدگه تسافرين .
ـ أي شلون لعد وأخلص من هالعيشه بس مشاكل والله حتى وظيفتي مـا أفتهمت منها وشغل الصيدليه هاملته مالي واهس بگلشي .
ـ يله أني أنزل عود ابلغج شيصير وياي
ـ تمام ونزل وأستبشرت خير وخابرني خالي وگالي
يحيى ـ خابرني ليث وسألني على كلشي
لقاء ـ أي وحجيتله .
يحيى ـ أي حجيتله وأكو منظمات هم وبعد يومين اسافر الأمارات وارتب الج گلشي وأبلغ ليث يحجزلج طياره ويدزج اليه عندح جواز مو
ـ اي عندي ، يعني خالي ليث موافق
ـ أي موافق وگالي راح ادزها يمك أمن عليها وأنتِ بنت أختي هيفاء الغاليه قطعه من كبدي أخليج بعيوني أمانة أختي .
ـ بعد گلبي خالي وأختنك من ذكر صوت امي وأني بجيت تعالي يمه وشوفي وأخيراً أجاني الفرج على الرغم هواي راح اتأذى وأعوف أحبابي بس ماكو حل ثاني أريد أعيش .
بقيت بالغرفه أريد اراسل أمجد ودخلت عليه ليال!
ليال ـ وين تسافرين منين طلعتي النا بهل السفر
لقاء ـ تعالي أكعدي أحجيلج
ـ أحجيلي احجيلي لان هسه عفت ليث يحجي ويه نائل وطلع أبويه وعمي كريم موافقين بس عمي رشيد معترض على سفرج .
ـ حجيت الها كلشي وحسيتها فرحانه اليه بس عيونها دمعت خوما تزعلين أذا سافرت وعفتكم .
ـ أي طبعاً ازعل أنتِ تؤامي النص مالتي أني من دونج أضيع بس هاي فرصتج تخلصين من جواهر لان كلهم گالوا لقاء اذا ترجع تعيش بالبيت تسوي مصيبه واذا عالزواج هو بس سجاد وسجاد ما يريد مبلغ ليث وكايله قنع ابويه وفهمه
ـ يعني سجاد رفض الزواج
ـ اي هسه عفت ليث يحجي .
ـ ما ادري ليش حسيت هاي من ليث
ـ شوكت تسافرين
ـ ما اعرف لما خالي يسافر ويكمل الأجراءات وبعدين اسافر .
ـ الله يسهل الج والله فرحتلج من كل گلبي .
ـ حضنتها بعد روحي ليلو ، ولاتزعلين أذا بقيتي لوحدج
ليث موجود ما يتخلى عنج نزلت رأسها
ـ لا شسالفه شگو عليه نائل موجود وهو زين وياي وعادي اني أعيش وياهم بس المهم أنتن تكونن مرتاحات وباسل يطلع من السجن وينجمع بعائلته گلشي ما اريد .
ـ يروحي حضنتها وبجيت ومسحت دموعي وباستني
ـ يله أني اروح محضره حشوة كبه أروح أسسسويها عود ادزلج
ـ تمام ، راحت وشويه وصعد ليث
ليث ـ نزلي أخوج يريد يحجي وياج
لقاء ـ خوما يگتلني
ليث ـ لا شسالفه حجيت وياه وفهمته وگال منا لما تسافر تبقى يمي .
ـ يعني وافق .
ـ أي ما عنده مانع ، يله نزلي
ـ شسويت الهم وخليتهم يوافقون .
ـ ما سويت الهم شيء هم يردون يخلصون منج ومن شرج
ـ عوذه يا خبيث ضحك ونزل ونزلت وراه ونائل واكف بالحوش وسلمت عليه وعاكد الحواجب
نائل ـ والحلفان وين اودي حلفت أسكطج شلون
لقاء ـ خفت منه ليث
ليث ـ لااا نائل أنت انطيتني كلمه لا تتراجع عنها .
نائل ـ أمشي كدامي .
لقاء ـ مشيت ودخلت البيت ما حجه وياي وأني خفت منه يضربني الحمدلله مـا ضربني وجديتي شافتني غمتني وكالت
الحجيه حليمه ـ عساج رحتي لا رديتي ما وراج بس الشر
لقاء ـ ما جاوبتها وشفت جواهر لافه رأسها بشاش وعيونها مورمه وجهه صاير أحمر عزه هاي شصاير بيها
جواهر ـ تباعيين بشماته شوفي أشسويتي بيه الله يأخذج ولك نائل شلون تفوتها البيت وهي جان موتتني
نائل ـ يمه رحمه لأهلج گافي مشاكل .
جواهر ـ اصبريلي أني اعلمج والله الا اسكطج اذا ما طفيت عينج اني مو أخت كنعان .
لقاء ـ الله يأخذج أنتِ وأخوج كنعان عفتها تحجي وسألت ليال هاي شبيها عيونها مورمه وجهه احمر .
ليال ـ من نضد مالتج على رأسها نسيتي شلون ضربتيها ضرب مال موت .
لقاء ـ يله عاشت ايدي ضحكت اضحكي يمعوده أختج راح تسافر واخلص من جواهر .
ـ اي والله ، ربي يسهل الج .
ـ أمين حبيبي أمين وتذكرت أمجد وراسلت جنات وحجيت وياها وبلغتها وأنصدمت وكبل خابرتني تبجي
جنات ـ وين تسافرين وتعوفينا شيلي السفر من بالج وهذا خالي يحيى منين طلع النا شو من ماتت أمي ما اجه هسه متذكرج ويأخذج يمه
لقاء ـ موزين يأخذني يمه ويخلصني من هالعيشه
ـ لقاء لاتسافرين حبابه والله أطگ وراج ما كافي عصماء والبنات راحوا بدون ما اشوفهن لو باسل كلبي طاگ عليه وانتن ما أكدر اجي عليجن من ورى الكلام والمغثه هسه ادري يتيمه أم بس مو أهل وانوب تسافرين اني منو يضل الي .
ـ ليال موجوده خلص كافي تبجين عود نتخابر
ـ ليش تسافرين ليش منين طلعتي بهل القرار هاي أنتِ تنامين وتكعدين وتقررين قرارتج الجايفه .
ـ ليا جايفه ليش السفر قرار جايف طاح حظج شبيج انفجرتي وتبجين شكو شبيج خاف حيدر مزعلج .
ـ لا حيدر بالدوام ملتهي بس أنتِ أختي والسفر ما اعرف عوفي الله عليج وأمجد شلون تعوفينه وهو عايش على وجودج وذكرياتج عوذه شكد قاسيه .
ـ الله يعوضه مجبوره جنات وهيج أحسن الظالم ما ينكشف ومستمر وعايش حياته واني بهيج وضع ما أكدر أعيش وياها نفس البيت .
ـ تمام براحتج أهم شيء تكونين مرتاحه
ـ أي وبهل الأثناء أمجد أتصل وفصلته ورجع دزلي
أمجد ـ جاوبي أريد احجي وياج
لقاء ـ ما أكدر أتصال مراسله عادي
ـ وين تسافرين منين طلعتي بالسفر
ـ منين عرفت
ـ عرفت وخلص ، لقاء عوفي السفر
ـ ما أكدر رتبت اوضاعي راح اسافر
ـ وين
ـ يم خالي بالأمارات .
ـ يعني تقيمين أهناك
ـ أي واشتغل ويه خالي نفس المجال اني وياه بالطب
ـ وليش ما حجيتي شو سفرج مفاجئ
ـ گلشي صار بسرعه يله هيج رهمت
ـ أذا أمنعج ما تسافرين .
ـ لا أسافر
ـ ليش مصممه على قرارج لهل الدرجه كارهه تبقين اهنا
ـ ما كارهه ابقى اهنا بس السفر انسب حل
ـ عوفي السفر لقاء لأ تخلبيني بقرارتج
ـ ما أكدر أمجد
ـ ما تكدرين شلون ليش تسافرين وتعوفين كلشي وراج حياتج واهلج وناسج ليش بايعه اليحبونج
ـ ما بايعه بس أريد اعيش
ـ وما تعيشين الأ بالامارات عوفي السفر لقاء الغي سفر ماكو لقاء ما تسافرين فاهمه سفر ماكو
ـ ما الغي قررت وخلص ، الله يسعدك ويوفقك
ـ هاي هي بهل السهولة يعني .
ـ مع الأسف
ـ براحتج وسفره سعيده .
ـ ما جاوبته ومسحت دموعي وضليت أيام هادئه وجواهر تتحرش بيه تريد تسوي مشاكل بس مبتعده
عنها لخاطر نائل ولاحظت عليه صارله أيام ساكت ونظراته حزينه ومكسور لان دارت السنه وزع الها ثواب وگلت يجوز تذكرها مشتاق ألها .
بس لا الموضوع أكبر لان العصر كاعده أتصفح وليال تسوي العشه ودخل هو وتماضر وجواهر جانوا يم الدكتوره دكتوره كالوا تماضر عدها مراجعه بس من دخلوا علينا نائل وجهه سماد وتماضر عيونها مورمه من البجي خير يا ساتر شگو شبيهم هو صعد فوك كوه يمشي شگله يكسر الخاطر گلبي وجعني وخفت عليه وجواهر وگعت بحضن جديتي تبجي وصوتها مكسور من كثر ما باجيه وكامت تضرب على وجهه قوي .
جواهر ـ ولج عمه ظهري أنكسسر عمه سوده بوجهي
سوده بوجهي عمه ولج عمه أبني وحيدي أبني مرد كلبي عمت عيني عليك يمه حبيبي .
الحجيه ـ ولج احجي شگو شبيج وكعتي گلبي نائل شبي احجييي شگوو شگالت الكم الدكتوره .
تماضر ـ گالت نائل عقيم نسبة الأنجاب صفر .
لقاء ـ شهگت وگبل نزلت دمعتي نائل لا يا ربي لا وجواهر ضربت تماضر وتحجي وتبجي وتسگت بيها واستهترت وكلبي شبت بي نار على نائل
جواهر ـ أنجبي وسكتي ابني مو عقيم ابني كلشي ما بي گلشي ما بي اي أبني مو عقيم مو عقيم أكيد غلطانين وحتى لو اعالجه ويصيرله اطفال اي اني اعالجه ما اعوفه ابيع العندي والما العندي وأعالجه وأزوجه تاج راسج واترس البيت جهال وأفرح بجهاله وازوجهم بيدي ولك يمه نائل نظر عيوني يمه عمت عيني عليك وليدي .
لقاء ـ تبجي ملخت نفسسها حتى أحنه بجينا عليها وجديتي اخذتها بحضنها وتسگت بيها وتماضر صعدت تبجي ونائل بغرفة بيداء من اجه دخل بعد ما طلع .
جواهر ـ عمه وحيدي هذا وحيدي أبني أنكسر گلبه أنحرم من كلمة يابه بس ما أعوفه اي عمه ما نعوفه نعالجه مو اكول لسعيد خل يبيع محلات الذهب ويعالجه مو اي أكوله أبني ما بي شيء ابني مو عقيم .
الحجيه حليمه ـ أي جواهر أي .
لقاء ـ ضلت تبجي وصوتها طبگ وحــيل انقهرنا هذا الجنت خايفه منه هو يدفع ثمن اغلاط أمه بس هو ماله ذنب ولله گلبه طيب وعلى نياته حتى لو قسى ويانا ميخالف أخويه هذا أخونا الجبير .
ثاني يوم الصبح جانت يوم جمعه وهو ما طلع من غرفته صعدت أمه حاولت وياه
جواهر ـ يمه بس حاجيني ريحي كلبي بالي يمك أبني
نائل ـ ما بيه شيء يمه هسه أنزل .
لقاء ـ نزلت وباوعتلي بحقد وراحت المطبخ وطلع هو باوعلي ونظراته حزينه أستحيت اطيب خاطره ما اريد احسسه الله يكون بعونه .
لكيت ليال مجهزه الريوك وگعدنا كُلنا بس تماضر ما نزلت
نائل ـ تماضر وين لعد
جواهر ـ بغرفتها هسه تنزل .
لقاء ـ صبيت الجاي ودخلت نجلاء سلمت بس شكلها عصبيه وجديتي صاحت بيها
الحجيه حليمه ـ شعندج واكفه كعدي تريگي ويانا
نجلاء ـ لا ما جايه أكعد جايه اخذ بنتي
جواهر ـ وين تأخذينها .
نجلاء ـ أخذها يمي ، تماضر نزلي عاد وين صرتي نمتي صارلي ساعه من گتلج تحضري .
لقاء ـ نائل باوع على عمتي ورجع كمل ريوگه
الحجيه حليمه ـ وين مأخذتها ما تحجين مو تحاجيج .
نجلاء ـ أخذها يمي وين اخذها قابل يله تماضر أخوج ينتظرنا نمتي الا اصعدلج .
لقاء ـ صعدت ألها ولحكتها جواهر وارتفعت أصواتهن
ونائل ساكت قهرني موقفه يبجي الصخر وطلعت عمتي تجر بتماضر من أيديها وتماضر تبجي ما تريد تروح .
تماضر ـ عوفيني ما أريـــد اروح ما أريـــد خليني .
نجلاء ـ وين أعوفج شگو باقيه صارلج شگد ما حبتلي والسبب انعرف بعد على شنو باقيه دافنه شبابج ويه واحد عاجز وعقيم وما يخلف ما تردين تصيرين أم وبحضنج طفل ، أمشي كدامي امشي يله .
لقاء ـ نزلتها وتحجي ونائل سمعها نزلت دمعته ومسحها عالسريع واني فار دمي من القهر وكمت صحت بي عوفيها ما تريـــد تروح غصب وهي راضيه تبقى وياه منو كالج عقيم يجوز خطأ وحتى لو ما نعوفه نعالجه .
نجلاء ـ شتعالجين منه ونسبة صفر وصارلكم شكد ما عالجتوا هسه تعالجونه وين جنتوا قبل هسه عدما عرفتوا تردون تعالجونه ، ذبيتوا السبب بيداء وبنتي علمود يطلع نائل كلشي ما بي تالي طلع العيب بي مو بيهن ، والله اني ما مستعده ابقي بنتي كل عمرها يمه وعايشه على أمل من حقها تصيير أم .
لقاء ـ ايبا هسه نائل صار ما بي خير وجايه تاخذين بنتج والله ما تردين تدفن شبابها وهي محرومه من الخلفه الله يرحم ايام قبل جنتي تبوسيين قنادر نائل علمود يباوع على بنتج وبكل مناسبه وعزيمه جايبه بناتج وتكشخين وتلمعين بيهن علمود نائل يباوعلهن وكدام. عيني تعلمين بنتج شلون تذب نفسها على أخويه وتدلع وتملع ونص الليالي تصعدله وهو رجال كاعد بغرفته لما صخم وجهه .
نجلاء ـ انجبي بنتي اشرف من الشرف ما اسمحلج تحجين عليها
لقاء ـ اي بنتج شريفه بس أنتِ رخصتيها كدامه وهو كسرها وتالي من تزوج الأنسانه اليحبها دخلتن عالخط وتقرن براسه مرتك ما تخلف مرتك ما تخلف خليتهن كل عيوب الدنيا بيداء وتنطن بهل الاعشاب وطلعت هل الاعشاب تمنع عنها الحمل علمود ما تخلف وتحققن مخططاتجن وهجمتن بيت بيداء وأخذتن نائل من حضنها كل هذا علمود تسترين بنتج اللي رخصتيها ودمرتيها بإيدج .
نجلاء ـ ايييي أمشي وخري من وجهي وأنتِ أمشي وخل يطلگج ومن الصبح ازوجج وخلفي صارلج شگد جان هسه جهالج بطولج .
تماضر ـ اني راضيه بس عوفيني ما أريـــد اروح وياج
نجلاء ـ راضيه تبقين بدون اطفال وطول عمرج تعيشين ويه واحد عاجز وعقيم ما يخلف .
لقاء ـ دكافي عاد كل شويه عايدتها كدامنا لما ابن أخوج وكاعد ومن الله يأخذج من عمه من عمى العماج جلبت بشعرها وفرغت قهري بيها واجتي ليال هم تكتل بيها ومحد نقذها بس تماضر تبجي وتسحب بأمها .
نجلاء ـ الله ياخذجن وساعة السوده الزوجتج بيها امشي
لقاء ـ گامت تعدل بنفسها وسحبت تماضر وجديتي تفلت بوجهه
الحجيه حليمه ـ لو مخلصات عليج يله ولي والباب يعثرج دامج هضمتي نائل وغثيتي وكسرتي كلبه لا اني امج ولا أنتِ بنتي وامشي ولي من بيتي أنتِ وبنتج لا بارك الله بيج .
نجلاء ـ ترى من حقي بنتي وأريد اشوف خلفتها .
حليمه ـ أمشي الله يأخذج أنتِ وبنتج يله أنكلعي .
لقاء ـ طلعت ونائل على كعدته ساكت وجواهر باوعتلنا وكالت
جواهر ـ عود دافعتن لأخوجن وانتن متشمتات بي عبالجن ما اعرفجن كدامه كلبجن محروك وتحجن من الله يصخم وجوهجن لو صدك مقهورات على أخوجن جان ما هزمتن عصماء جان انطيتنا البنيه وفرحتنا اخوجن بس حقيرات ونكسات ما تطهرهن .
لقاء ـ هاي شبيها
ليال ـ عوفيها .
لقاء ـ نائل طلع برى وكسر خاطري شكد حقيرات بشر من يوكع بعد محد يريده وهذا حال نائل وأيام مرت هو عازل نفسه وأفتقدنا صوته وصرت أتمنى يصييح ويعصب بس نائل أنطفئ مثل الشمعه الأ أمه هي هي صح مقهوره على أبنها بس بعدها حيه وتنفخ بالسم مالتها ما تطهر .
واليوم موعد طيارتي وجهزت ملابسي وجنطتي ولبست وليال فرحانه وتساعدني وعمتي نحاح تباوعلنا عمه ما اوصيج على ليال امانه يمج
نجاح ـ لا يضل بالج بعيوني وهي فقيره ما عدها اذيه على أحد محد علي بيها .
لقاء ـ هم صحيح ورن موبايلي ها ليث .
ليث ـ يله طلعي نروح المطار تأخرنا .
لقاء ـ أي طالعه وطلعت اسحب بجنطتي وشافتني جواهر واستغربت يمكن ما تدري وصاحت بيه
جواهر ـ وين موليه أنتِ وجنطتج خير .
لقاء ـ أسافر اني وليث يوديني على خالي بالأمارات ليش ما عندج علم يا يمكن ما گالوا الج لان جنتي توج طالعه من المستشفى خافوا عليج تنهبطين يله هسه عرفتي .
جواهر ـ شُـــنوْ بكيفج وبكيف ليث وهو منو واخوج نائل هو المسؤول عليج امشي رجعي انوب عليه السفر بنات اخر وگت يعيشن بالخارج ، امشي وخلي ابوج يصير زين اذا ما خليته كسر رأسج .
ليث ـ ها خلصتي يله نمشي
جواهر ـ وين تمشي وأنت شگو بيها عدها اخو اشوفك بكيفك تتحكم عبالك أنت اخوهن وسفر ماكو امشي رجعي .
ليث ـ ما عندي وقت وما فارغلج يله لقاء أمشي ليال باقي الجنط جيبيهن والحكيني .
لقاء ـ ليث كاشخ كشخه فول ولابس المناظر والساعه وجواهر محتركه تصييح وتحجي واني اباوعلها بنظرات شماته عبالج تسيطرين عليه وتكسرين رأسي ما كدرتي اليه حرامات يله احاجيج اتصال فيديو چاو
ليال جابت الجنطه تضحك عليه ولحگت ليث اخذهن منها خلاهن بالسياره
جواهر ـ ولك نائل انزل شوف اختك راح تولي تسافر وأنت نايم وما تدري شيصير من ورى ظهرك .
نائل ـ شكوووو تصييحين أي وتسافر شتردين منها
جواهر ـ يعني تدري
نائل ـ أي ادري .
لقاء ـ طلعنا ودخلت ودعت أبويه باسني وحسيت صحته زينه ودعت وعمي كريم وعمتي سلوى ليال امانه عندج ديري بالج عليها
سلوى ـ هاي بنتي ما يحتاج توصيني عليها بعيوني الله يسهل الج ويوفقج يمه .
لقاء ـ ورجعت ودعت جديتي ما حجت شيء وجدي طالع يم بيت عمي رشيد وعمتي نجاح وليال حبيبتي ديري بالج على نفسج وعلى جنات وعصماء والبنات لاتكطعين بيهن
ليال ـ أن شاء الله ولايضل بالج عليه أهم شيء أنتِ تكونين مرتاحه
لقاء ـ تحجي وليث يباوعلها وتقدمت على نائل ما تودعني صفن بوجهي وحضني وبجيت بحضنه ومشيت وليال تبجي وراي وطلعنا واني ابجي ليث اوكف يم جنات اريد اودعها
ليث ـ بس جنات
لقاء ـ ضحك وعرفت قصده ونزلت دگيت الباب طلعلي حيدر سلمت عليه وعفته واكف ويه ليث وأول ما دخلت هو طلعلي جنات كاعده .
أمجد ـ أي ، جنات أختج أجتي تودعج وتسافر .
لقاء ـ أحس شگ گلبي واجتي جنات حضنتها وابجي وهو يدخن ويباوعلي وجفص على جگارته يله مع السلامه .
جنات ـ الله وياج خيتي حبيبتي بالسلامه .
لقاء ـ مشيت وصاح وراي .
أمجد ـ توصلين بالسلامه يارب .
لقاء ـ أنداريت عليه الله يسلمك ومشيت وطلعنا للمطار وليث يحجي عالموبايل ويه عمتي سلوى
ليث ـ مو عفتها نايمه شلون كعدت ، خلي فواز يأخذها يشتريلها انطينياها ها بابا حبيبي أي ادري أي خفت راسه ليث يروحلج فدوه ليث
لقاء ـ يحجي ويه بنته ويحجي على نفسه ويسكتها وصلنا المطار وهو كمل الاجراءات وصار الوقت نغادر ومشيت وياه وصعدنا الطياره وأقعلت وغادرت بلدي العراق والى اللقاء
شكرا لزيارتكم عالم روايات سكيرهوم
