رواية بنات الحجي السعيد الفصل الثالث والعشرون بقلم شمس العراقية
ليال ـ من بعد وفاة أمي تعبنا وتحملنا أكثر من طاقتنا جانت هي الراحه والسند والسعاده الكامله حتى لو نمر بظروف صعبه نتجاوزها بكل سهوله بوجود أمي ، أني جرحي وأذيتي من ليث تخطيته بوجود أمي بس سجن باسل وغياب عصماء والبنات وكسرة جنات ومعاناة لقاء ومرض أبويه بيمن أتخطاه أفكر بيهم كلهم من بعد ما كنا بيت واحد متجمعين بكل حب وجامعتنا أمي حواليها ونضحك ونسولف ونطلع وعايشين الدنيا حالنا حال بقية العوائل العراقيه صح جواهر تاذينا بس أمي عايشه أما هسه أذيتها مستباحه ما رحمتنا حتى أبنها ما سلم منها ومن شرها عائله كامله ضاعت وتشتت وكلمن صار بمكان ثاني ما أعتقد نرجع ننجمع مثل قبل وحتى لو رجعنا بس مو نفس قبل لان الأذيه ما تنسي وكلمن عاش حياة وظروف خاصه بي ، الله يرحمج يمه مــــن رحتي كُلنا في ضياع من بعدج .
رجعت الغرفه فارغه مو بس الغرفه فرغت عليه أحس تغربت ، لقاء جان بس وجودها أمان اليه ما جنت متخيله بيوم من الأيام أفترق عنها ، صح مشكلجيه بس ما تقبل الاذيه وما تسگت عن حقها جانت أدافع علينا كلنا .
... وبالأخير من كثر ما دافعت وحاولت تغيرر الحقيقه
بس ما كدرت لان لوحدها أستنززفت طاقتها وغادرت وأتمنالها التوفيق بحياتها الله يعوضها المهم أمنت عليها من شر جواهر وأذيتها .
صار شهر من سافرت لقاء وأني بقيت لوحدي وكاعده أباوع لصور البنات دازتهن اليه عصماء ومن يوم راحت أحنه ما شايفينها وحيــل مشتاقتلها ومشتاقه للبنات وولدت وصار عمر بنتها أربع اشهر تقريباً ومحد وصلها وسمتها هيفاء على أسم أمي ، بجيت بقهر وحضنت الموبايل وصورهن يا روحي أنتن شوگت يطلع ابوجن وينجمع بيجن وبإمجن المسكينه .
جواهر ـ ما تگومين شعندج بس بهل الغرفه كومي على شغلج والغساله مليانه ملابس شغليها وغسلي ورى البيت والغده لاتطبخين اني من ارجع أطبخ لان نجاح راحت على عمتج أنسام هي وعمتي .
ليال ـ أي هسه ، طلعت وهي لبست عبايتها وطلعت ودخلت الحمام خليت الملابس بالغساله ملابس نائل وملابسها غسلتهن وگملت باقي شغلي وهي ما أجتي وطبخت الغده وصليت وأجه نائل من الشغل
نائل ـ أمي لعد وين
ليال ـ طلعت الصبح
ـ ولحد الأن ما راجعه ما گالتلج وين راحت
ـ لا والله
ـ والباقيين وين
ـ رايحيين بيت عمتي أنسام
ـ أها أي جايين خطابه على هدير ، يله صبيلنا الغده خل نتغدى اني وياج .
ـ صبيت الغده وكعدنا نتغده أني وياه ودخلت جواهر مزعوجه
نائل ـ شبيج خوما تعارگتي .
جواهر ـ أي عمتك قهرتني ، ليش اللي أجاها أحسن منك ، تريد تزوجها للغريب والله يدوام وياها بالمستشفى .
نائل ـ منو كلج روحي خطبيها اليه ، خل البنيه تمشي بقسمتها لو الأ تسوين مشاكل ما كافي وزواج بعد ما أتزوج مو گتلج هذا الموضوع ما تفتحينه وياي بعد وأني شُنو شفت من زواجي الاول والثاني عاد الثالث .
ـ لا الأ تتزوج لعد تبقى هيج بدون مره
ـ أي أبقى حياتي وعاجبتني عوفيني بحالي رحمه لأهلج
يمه هم رجعتي لسالفة الزواج
ـ لا ما أعوفك حتى لو بس تخدمك وأدير بالها عليك بس مال تضل بدون مره هاي ما صايره واضل ادور الك مره وغصباً عليك تتزوج ، لعد تضل مثل عمك سليم ضل عزابي من صار شايب تزوج ولو كبرت منو يأخذك
ـ يأخذني الله ويخلصني من هالعيشه
ـ ولك يمه لاتوجع گلبي أني شعندي بالدنيا غيرك خليني أدورلك وأزوجك والف وحده تتمناك .
ـ تزوجيني ومنو يرضى ينطي لبنته لواحد أستغفر الله ما تسكتيين يمه ما تسكتيين .
ليال ـ عصب وگام وهي باوعتلي وصاحت بيه
جواهر ـ گومي احمي الغده وصبيلي وگملتي شغلج
ليال ـ أي گملته
ـ وغرفتي نظفتيها
ـ لا ليش أني أنظفها
ـ أي لعد منو ينظفها شنو شغلج أنتِ شو أكل ونوم لو هم مثل أختج تردين تسافرين وتعيشين بالخارج يم خالج وخوالج هسه صاروا خوال وگاتلتهم المحنه عليجن
ـ كلمن وظروفه وأنتِ تعرفين ليش ما يجون
ـ أي اعرف مشاكل قديمه بينهم بس أمح وماتت على شنو مـا يجون عليجن هسه تذكروا وصاروا حنينين
ـ ما جاوبتها گمت غسلت المواعين وهي تصييح
ـ وين صار الغده نمتي خوما نمتي شگد بارده هالبنيه
الله يساعد الياخذج ولو يا مصخم يخليج بيته على سواد وجهج تربيه هيفاء شتطلعين .
ـ أستغفر الله وأتوب إليه يعني تدري بنفسها هي أذتني وخربت سمعتي وتحجي ويه نفسها بكل ثقه ماكو هيج قابليه وحقاره ، صبيت الغده بارد وأخذتها الها ومشيت
ً ـ ولج الغده بارد من الله يكصف عمرج جاي تلعبين عليه تعالي أحمي وجيبي .
ـ موزين صبيت الج كومي أنتِ أحمي ، عبالي اردها بس گامت جرتني من شعري عوفيني
ـ ولج الخانسه تعلين صوتج عليه وطالعلج لسان شو أمشي أحمي وجيبي يله تحركي .
ـ دفعتني وگعت بالكاع گمت وحميته ورجعته وكعدت بالمطبخ مقهوره ، ذبت المواعين وكمت غسلتهن ورحت الغرفه نمت .
العصر كعدت لكيت جدي وجديتي كاعدين وهي تصب الهم الجاي كعدت يمهم وسألت على عمتي نجاح ضاله يم عمتي انسام ويسولفون على خطيب هدير وجواهر مطنگره يمكن حتى ويه جديتي متزاعله وگملوا جاي وصاحت بيه بعصبيه
جواهر ـ گومي شيلي الأستكانات وغسليهن يله
الحجيه حليمه ـ وشگو تصيحيين عليها
جواهر ـ وين مصيحه عليها هي بارده
ـ من شوگت صارت ليال بارده وأخر مره أسمعج تصيحين عليها .
ليال ـ توني ردت أشيلهن دخل علينا ليث اللي من يوم سافر هو ولقاء ما شفته سلم وأني كمت وجديتي وگفتني .
الحجيه حليمه ـ صبيله جاي ، جده تريد جاي .
ليث ـ أي جده ، أي شلونكم .
جواهر ـ زينين عمك شلون صار شُـــنوْ تبنيتوا .
ليث ـ ههههه أي ليش ضايجه .
ـ أي لعد صارله سنه يمكم وهو هسه صحته زينه مو شفته كلشي ما بي ما يجي بيته شگو ضال يتدلل عليكم .
ـ يجي يجي وصحته زينه الحمدلله صار مثل الحصان لاتخافين يكفي ويوفي .
الحجيه حليمه ـ ليا ادبسزز ولك عيب بنت عمك كاعده صاير ما تستحي .
ليال ـ باوعلي وضحك أني گبل شلت الاستكانات ورحت المطبخ بعد ما طلعت وكملت العشه وهو موجود بس لا يتعشى يمنا موخوش سالفه .
" ضليت بالمطبخ هذا شوگت يروح أريد اروح أصلي هسه تجيني جواهر وتخبصني وتروح عليه الصلاة مديت رأسي شافني گبل رجعت هذا شبي ليكون عباله يرجع نفس قبل أباوعلك وتباوعلي ونظرات لايابه مستحيل هالشيء لو أعرف أضل أخدم جواهر ولا أرجعلك أني لحد الأن هورنات العرس أدك برأسي هذيج الكسره والغصه والهضيمه شينساها .
وفزيت على صوت جواهر .
جواهر ـ شبيج صافنه أمشي صبي العشه طلعتي خبز من المجمده .
ليال ـ أي طلعت الخبز بس اصلي وأجي ، طلعت من المطبخ وما لكيته گلت يمكن طلع يغسل باوعت ماكو وسمعت صوته بالحوش مالتهم .
ليث ـ ياقوت تعاي غسليلها وغيرلها ملابسها .
ليال ـ يله همزين راح رحت صليت ورجعت صبيتلهم العشه ونائل ما تعشى حيل متغيير وأبداً ما يختلط بإحد
كل وقته بغرفة بيداء ، وحتى هو بهذا حاله أمه ما عايفته جاي تدورله على مره تريد تزوجه وهو رافض الزواج من أساسه وهي فضحته جان تكدر تخلي سر بينها وبينه وبين تماضر بس الله يسلمها وعمتي هم ما گالت أبن أخويه وعبالهن شيء هين الله يكون بعونه
" مرت أيام وكاعدين كلنا وتهاني أتصلت على عمتي نجاح وكُلنا أســتغربنا لان من يوم راحت تماضر عمتي ما وصلتنا ولا متصله .
الحجيه حليمه ـ جيبي شو فتحي الخط والسماعه خل أشوفها شتريد ها جده تهاني .
تماضر ـ جده أني تماضر شلونج .
ـ هلا جده تماضر زينه على الله
ـ جده ما أكدر أطول وياج وخابرتج من موبايل تهاني لأن أمي سحبت مني موبايلي علمود لا أحجي ويه نائل فدوه أروحلج جده تعالوا أحجوا وياها ورجعوني لنائل قبل لاتزوجني لغير واحد ، أني ما أريد أتزوج أريد نائل فدوه رحتلج جده تعالي أخذوني والله راضيه بي وهذا الشيء مو بإيده هذا أمر رب العالمين .
ـ والله يا بعد جديتج أدري بيج وأدري بگلبج وهو هم يدري بيج تحبينه وتردينه ويسمع صوتج بس شسوي لأمج حسبي الله عليها من أم
ـ الله عليج جده خليتها يمج أني اذا تزوجت غير نائل أموت والله وأذا يسمع صوتي نائل لاتعوفني تعال أخذني والله العظيم راضيه بگلشي راضيه وينكص لساني أذا بيوم فتحت حلگي بس لاتعوفني .
ـ يصير خير جده .
ـ ماشي جده لازم اروح باي .
ليال ـ قطعت الخط وهو ساكت ما حجه بس جان يسمع صوتها وهي تحجي وتبجي وتتوسل .
جواهر ـ كله من نجلاء بس تريد تزوجها شبسرعه خل تطلع عدتها لو تريد تلگي إلها رجال .
الحجيه حليمه ـ لا ما تزوجها مو بكيفها أمشي أخذني بيت عمك كريم نكوم هسه نرجعها الك وغصباّ على رأس عمتك
نائل ـ لا جده عوفيها تسسوي مشاكل وعمتي لسان
الحجيه حليمه ـ ختولي ما عليك منها أحنه علينا بتماضر الأصيله يله يبعد جديتك گوم وياي .
ليال ـ راحوا بيت عمي كريم للمغرب يله رجعوا وما رجعت تماضر ومحاولين وياها أبوها هم معاند ويمكن غاثين نائل بالكلام لان ما رجع للبيت وجواهر ضلت لازمه الباب تنتظره ورافعه أيديها وتدعي .
جواهر ـ حسبي الله عليج يا نجلاء كون أبنج يطلع عاجز وتحسسين بالوجع ونار الگلب حسبي الله عليج غثيتي وزعلتي هذا وحيدي حبيب گلبي عمت عيني عليك يمه ربي لاتوجع گلبي بوحيدي ما عندي غيره يمه سوده بوجهي عليك نائل .
الحجيه حليمه ـ خابري شوفي وينه ليش تأخر وين راح
جواهر ـ مغلق موبايله مغلق وگلبي أشتعل بنار وين راح
ليال ـ تأخر الوقت وهو ما رجع وجواهر كاعده يم الباب تتنظره وتبجي دمعتها ما نشفت ورجعت وسمعت صوت رجعت باوعت واجه وهي وكعت يم رجليه تبوس بيها وهو رفعها وحضنته وتبجي
جواهر ـ يمه فدوه لطولك تروحلك فدوه أمك ولك وين رحت وخليت گلبي مشتعل بنار عليك يهون عليك ولك يمه تريد تموتني
نائل ـ أمشي يمه شمكعدج أهنا گومي .
جواهر ـ أكعد العمر كله أنتظرك بس أنت لاتروح بعيد عني مية الف حسبه أجتي برأسي ليش خوفتني عليك
ليال ـ حاضنته وتبوس بي ودخلوا الغرفه ونومها وهي حاضنته تالي خلاها تنام وصعد لغرفته وباوعلي .
نائل ـ أنتِ هم تتنظريني
ليال ـ أي أنشغل بالي عليك
نائل ـ الله لايشغلج بالج ، روحي نامي خيتي .
ليال ـ أن شاء الله ، دخلت نمت وأفكر بي حتى من يحجي الكسره عبره بصدره حيل مكسور ومهضوم ومخذول ، بجييت عليه من كل گلبي كسرته للعدو ما أتمناها الله يصبره ويجبر كسره ويكون بعونه .
ثاني يوم جواهر من الصبح طالعه وجديتي سألت عليها
وگملت شغلي أني وعمتي وطبخت الغده وأجتي هي تضحك وفرحانه خير اللهم أجعله خير هاي شبيها معقوله عمتي نجلاء أقتنعت ووافقت ترجع تماضر يجوز .
الحجيه حليمه ـ خير سنج يضحك شعندج
جواهر ـ عندي كل الخير ، لكيت مره نائل شلون بنيه تخبل گيمر هلگد حلوه وعاقله بنت جارنا أبو سعدون االساكنين ورانا عرفتيهم .
ـ أي عرفتهم خوش ناس
ـ أي والله خوش ناس طيبين وأوادم وحجيت ويه أمها وموافقين بس .
ـ أي وبس شنو أشوفج سگتي .
ـ يردون مره لأبنهم يعني مره بمره شتگولين ننطيهم ليال وناخذ عبير والولد خوش ولد بس مطلك وبيته لوحده .
ـ شتگولين أنتِ لازم تخبلتي لا لا ما ننطي مره بمره
وليال ما ضاله بالدار أنطيها لمطلك .
ـ وشگو بيها جنات مو أنطيتوها أرمل وأبنه بطوله وهاي هم وأخوها يتزوج بيها ينطيها ويأخذ شصار
ولاتنسين اللي صار ومحد يدك بابها لو هم نسيتوا .
ـ لا ما نسيينا بس ولد عمها موجودين .
ـ وينهم ولد عمها شو ولا واحد أجه دك بابها لا سجاد لا فواز ولا حتى ليث الأرمل ، صدك تحجين عمه خليها تتزوج وتشوف حياتها شو أخواتها كلمن مشت بحالها المن مخليتها تباعين على طولها اقلها تتزوج تحصلها كم طفل والولد بعده شاب حلو وموظف وبيته لوحده شتريد اكثر من هيج والناس نعرفهم وجواريين وقريبه علينا حالها حال جنات .
ـ سگتي هسه عوفي الموضوع وهما ليش ما ينطون مره الا يأخذون بمكانها وين صايره هاي .
ـ هما يردون ليال أم سعدون گالت نريدها لـ حكيم .
ليال ـ جديتي باوعتلي وأني ضليت ساكته وهالسكوت دمرني خله الكل يتحكم بيه وبحياتي ما حجيت ومر يومين وأجتي عمتي أنسام وراحن هي وجواهر وجديتي عليهم يمكن جديتي أقتنعت ووافقت يعني معقوله ينطوني ويأخذون لنائل لا لا عزه على رأسي زواجيش هذا شلون أكول الهم ما أريد أتزوج خلوني هيج حتى لو اضل أخدمكم بس ما اريــد اتزوج أنتظر باسل يطلع من السجن يأخذني يمه .
للظهر رجع وأبويه هم أجه وصحته زينه ورحت سلمت عليه وباسني وضل صافن عليه ويباوع بالبيت فارغ من أخواتي بس أني ضليت حس بالفراغ .
گمت صبيت الغده وتغدينا وأبويه ويانا وجواهر فرحانه بس ابويه ما يباوعلها حسيته حيــل متغير ومن فواز جاب ملابسه جواهر رادت تأخذهن هو گام أخذهن
گملنا الغده ورحت الغرفه ولكيت جنات تتصل جاوبتها هلا جنات شلونج .
جنات ـ هلا عيني الحمدلله زينه ، شلونكم
ـ زينين الحمدلله
ـ أكولج يردون يجون عليج خطابه مو
ـ منين سمعتي
ـ فاطمه گالتلي ولج وافقي وأنتِ مغمضه
ـ شلون يعني شگالتلج فاطمه
ـ شوفي هو صح جواهر تريد عبير أخته لنائل بس للامانه أهل الولد خوش ناس فاطمه حجتلي عنهم وحتى حيدر مدح منهم والولد أسمه حكيم خوش ولد وبيته لوحده بس منفصل .
مهم خوش أنسان وهما رايدينج لأبنهم وينطون عبير لنائل هذا الفهمته من فاطمه لان أخت رائد صديقة فاطمه ومسولفه إلها حتى طالبه صورتج منها تشوفج لأخوها بس فاطمه ما قابله ولا أني اقبل .
ً ـ ضليت ساكته
ـ ها شبيج شو سگتي .
ـ ما أدري يعني مو تخطيط من جواهر
ـ لا هي رايحه عليهم تريد عبير لنائل وأم الولد طالبتج لابنها وصاير الكلام وتعرفين بعد ناس تسأل ناس ماتشوفين أخته كبل اجتي ادور صورتج تشوفها لأخوها
ـ أي عمتي وجواهر وجديتي راحن عليهم يشوفن البنيه بس بعد ما حاجيين وياي ولا فتحوا موضوع وأني مو ابالي الزواج ما ادري گلبي جفل تعرفين اللي صار وياي وكم مره خربت قسمتي .
ـ أدري والله بس شتسوين هذا هم حظج ولاتنسين ليث كان السبب بخراب قسمتج وتالي تزوج وعافج وحتى من ماتت مرته ما تقدم خطوه وبادر .
ـ لا لا شتحجين أنتِ ، قصدج اتزوجه لا مستحيل
ـ اي شفتي بعدج مقهوره منه بس تردين الصراحه علواه يتقدملج ومع الوكت توافقين وتتقبلين الامر لان ما تلگين احسن من ليث يحبج ويخاف عليج رغم حقارته ونذالته بس رجال صاحب مواقف حلوه ويكفي يحبج بس اخ من عناده وشروطه وين وصلتج جان أنتو هسه متزوجين ومخلفين ولا هالذله العايشتها يم جواهر بكيفها تتأمر عليج .
ـ الحمدلله على كل حال
ـ أني حجيتلج اللي وصلني من عيالي ومن كلام حيدر عن الولد وأهله وحيــل مدح منهم ومن أخلاقهم بعد بكيفج الحياة حياتج والقرار يرجع الج والله يقدم البي خير .
ـ الله كريم
ـ ها يعني تفكرين مو
ـ ما ادري بعدني دايخه وأهلي كلهم ساكتين
ـ أحتمال يتناقشون بينهم وبعدين يجون يسألونج وصدك سمعت أبويه راجع البيت وصحته زينه لان حيدر رايح السوك وشايفه كاعد بالمحل ومسلم عليه وكايله سلملي على جنات يوم اجي اتغدى يمكم فد فرحت .
ـ أي الحمدلله بس گلبه تعبان سوده عليه حتى من سوه عمليه لگلبه مال شرايين بعده وجه فد ذبلان .
ـ أي حيدر هم گال أبوج تعبان وگايله ليش كاعد بالمحل ما بيك وينك وين الشغل كايله على ريحة باسل هواي متأثر خطيه
ـ أي هو من دخل السجن أبويه نايم بالفراش خلف الله على عمي كريم افتر بي الدنيا وعلى كل الأطباء ما خله دكتور يعتب عليه وعالجه لو باقي يم جواهر جان من زمان ابويه لاحك أمي بس يله همزين هسه صحته شوي زينه وعالعلاج يرجع أحسن من قبل .
ـ الله كريم كلنا نرجع احسن من قبل بس خل يطلع باسل گلشي يهون
ـ الله كريم ، الله يسمع منج
ـ هسه شگلتي
ـ شگول! تعاي جنات شو أشوفج هواي متحمسه
ـ لا ولج بس بالي يمج والله وكلنا نعرف سوالف جواهر وأنتِ فقيره وعاقله مو مثلنا وتضل تكفخ بيج تضلين خدامه الها وأول تالي تتزوجين والقسمه الزينه مو كل مره تتحصل واذا شفتي نفسج موافقه والا اكولج أدزلج صورته فاطمه شوفتني حسابه كالت خاف خطيه تريد تشوفه من حقها شتكولين أدزلج صورته وشوفي .
ـ لا ولج شدزين كعدي راحه يمعوده
ـ والله أخاف ادزلج وتوافقين وهذاك الرجال يخرب عليج
ـ لا ما أعتقد ومو بكيفه يخرب هو شعليه بيه زايده منه اذا خرب وأصلاً هو ما موجود سمعت يحجن بينهم رايح دوره بالدوام مالته ما اعرف مال شُنو بس ما موجود .
ـ ها الله يقدم البي خير ، هسه ادزلج صورته
ـ جنات كعدي راحه عوفي الصوره لا أدزين
ـ ما عليج هسه تشوفينه توافقين يله باي عود العصر اخابرج .
ـ تمام الله وياج ولادزين شيء ديري بالج ضحكت وقطعت الخط والله خبله وصلتني صورته باوعتلها زين ما بي شيء گبل مسحتها دزيتلها مسحيها من يمج لاحيدر يشوفها اني مسحتها من يمي عيب .
ـ شگو عيب خطابه ويردون يجون عليج من حقج تشوفينه قابل يطلع الج من الموبايل
ـ جنات شو طالعه عينج وصايرتلي خطابه واني مو كتلج لا ادزين صور مو عيب صورة رجال غريب بموبايلي وبله من گتلج مسحيها من يمج مسحتيها لو لا ، يابه اذا حيدر شافها لو عرف دازتها اليه فلا أحجي وياج بعد .
ـ لا والله مسحتها شبيج شجايني قابل وأني هم اخاف منه ومن هيج سوالف لا عبالج والله ارجف رجيف منه صارلي شگد من متزوجه لحد الان نفس خوفي منه هو بسلامه عمره شخصيته طاغيه فديته وأحمم ترى حكيم نفس شخصية حيدر والله دوافقي خل نفرح بيكم حبابه وتخلصين من جواهر يحظي شبيج .
ـ سدي الموضوع هسه وأبقي على خوفج من حيدر هيج أحسن أصلاً حتى من تزوجتي تغيرتي كلش
ـ أي والله رباني لأن أني جنت ادبسزز
ـ هههه الله يخليكم لبعض
ـ أمين ، أي صدك شفتي حلو مو
ـ جنات
ـ خلص سگتنا يله اني اروح قبل لاحيدر يعيط بيه
ـ مسحي محادثه
ـ لا ما عليه حتى لو أعوفهن ما يتدخل يحترمني ويثق بيه بس امسحهن لخاطرج ادري بيج تستحيين .
ـ تمام الله وياج ، راحت وضحكت على سوالفها راسلت عصماء وبلغتها وگالتلي .
عصماء ـ لاتستعجلين وخلي حيدر يسأل عنه زين بلكي أخوج يطلع وتخلصين من جواهر وهو يقرر
ليال ـ والله ما أدري اني هم دايخه
ـ حقج ادوخين هذا زواج ومسؤوليه صعبه
ـ الله كريم البنات شلونهن الصغيره شلونها
ـ زينات فدوه لعينهن ولعقلهن وحيـل تشبه خالتي الله يرحمها
ـ صدك يروحي دزيلي صورتها اشوفها دزتلي وشفتها كبرانه يروحي وينك باسل بناتك كبرن وأنت مو على رأسهن ربي يفرج عنك .
عفت الموبايل ونمت والعصر كعدت وأجه أبويه بإيده اجياس خلاهن يم الباب يابه شنو هذن .
سعيد ـ هذن ملابس لمرت أخوح والبنات وصيت سلوى اشترتلهن وحفاظات وحليب باجر اروحلهن
ليال ـ تروح على عصماء
سعيد ـ أي اروحلها لعد خوما أعوفها يا بابا وحجيت وياها ترجع وياي ما تقنع ما تحاجينها أنتِ وتقنعينها ترجع وياي هي والبنات .
ليال ـ أن شاء الله ، خلاهن يمي وراح وفرحت الف الحمدلله وخابرت عصماء وحجيت وياها مصممه على قرارها .
عصماء ـ لا ليال ما أرجع أني كلت لعمي وفهمته رجعه ما أرجع كالي باجر يجي علينا ونروح اني وياه عالمحامي
ـ ها زين يعني حجيتوا على موضوع باسل
ـ اي حجه وياي گالي اني وياج ما اعوفج ولا أعوف أبني وبنات ابني بس مال رجعه ما ارجع وفهمي عمي سعيد
ـ ماشي عيني راحت ورحت بلغت أبويه وضاج وحسيته حيل تعبان ويريد يرجعها هي والبنات وهي هم حقها
جواهر ما قصرت وياها وين ترجع ، وثاني يوم راحلها
ومن رجع جديتي سألته شصار على باسل ما جاوبها
مر كم يوم وأبويه رغم صحته وبعده تعبان بس دايخ
وما عايف عصماء ويتواصل وياها .
العصر نايمه وكعدت على صوت جواهر صرعتني
جواهر ـ گومي لبسي تحضري وجهج معشب لابستلي هالأسود وجه الأرمله .
ليال ـ راحت باوعت لعمتي وين البس واتحضر عمه هاي شبيها وشعليها بوجهي وبلبسي
نجاح ـ ذبي الاسود ياعيني وامج صارلها سنتين من توفت وأخواتج ذبنا من زمان ليش بس أنتِ باقيه لابسته
ـ عمه فدوه لعينج گلبي سماد وحزينه على أمي هو وينه الفرح البس الألوان عود من يطلع باسل أذبه .
ـ هذا هو بكيفج عيني أني علمودج والاسود موزين ينلبس هواي .
ـ هسه عوفي لبسي ، شتريد مني گالتلي گومي تحضري .
ـ تأخذج الحفافه تحفين وتصبغين شعرج
ـ ليش يابه شعندي أحف
ـ أكو ناس باجر يجون عليج گومي روحي وياها أحسن وتخلصين منها ومن لسانها شالعه گلبج والناس خوش ناس أنسام تمدح منهم .
ـ بس عمه محد أخذ رأيي شلون هيج اروح احف وأتجهز گبل يجون حتى ما سألتوني موافقه لو لا .
ـ هما هسه بس يجون يحجون ويشوفونج وأكيد ابوج بالليل يحجي وياج ومحد يجبرج على شيء حتى أمي كالت ما أجبر ليال براضاتها .
ـ ها
ـ أي حبيبتي وهسه روحي الحفافه وكلي امرج وان شاء الله خير ما ادري اني متفائله بيهم .
ـ ما حجيت گمت غسلت وهي تحضرت ونزل نائل وهي صاحت بيه
جواهر ـ ديله عاد صارلج ساعه أبرد من الثلج شوكت نروح وشوگت نرجع .
نائل ـ على كيفج وياها أنطييها مجال شگو تصييحين
ليال ـ عفتها ولبست عبايتي وشالي بدون گلشي وطلعت وياها ورحنا مشي وخايفه منها وهمزين بالطريق اجتي عمتي أنسام وأمنت بيها وراحت ويانا
وصلنا وحفيت ورتبتلي حواجبي وصبغتلي شعري وطلعنا أخذني السوك عمتي أختارتلي فستان حلو وكم شغله وكملنا ورجعنا البيت وأبويه جان موجود باوعلي
ولليل گملنا العشه واجتي عمتي سلوى تباوعلي بنظرات حزينه وما حجت حتى ما طولت بالكعده راحت واني كمت للغرفه وأجه ابويه عدلت كعدتي .
سعيد ـ ها بابا ليال شلونج .
ليال ـ الحمدلله بابا زينه وأنت شلون صحتك
ـ حوه رحمته ، بابا اكو ناس يردون يجون عليج أكيد عرفتي ، والقرار الأول والاخير يرجع الج ما أجبرج أبداً
ـ بقيت ساكته ومستحيه منه وگام باسني من راسي
ـ الله يرضى عليج وعلى أخواتج
ـ الله يحفظك النا حضني ومتمسك بيه يالله شگد محتاجه هالحضن بجيت ومسح دمعتي .
ـ لاتبجين بابا وتوجعين گلبي كافي عليه قهرتكم تأكل بگلبي اني ظلمتكم أنتوا وامكم .
ـ لا هيج تحجي بابا مسح دموعه ومشه ولاحظت ما ينام يمها وهي واكفه باب الغرفه بس راح أجتني
جواهر ـ شحجيتي وياه شقريتي براسه هاا
نجاح ـ شبيج عليها شتحجي وياه وهي شعليها وابوها واجه عليها يسألها
جواهر ـ لا أدري بيها تقري برأسه عليه تخلي يكرهني وهي تشبه أمها مكروه مثلها وأنت خليتي يعوف غرفته وينام لوحده كله منج رأس الحيه خل يجون ويأخذونج واخلص منج شوكت اخلص اني شوگت .
نجاح ـ جواهر بدال ما واكفه تحاسبين هالمسكينه روحي عليه وسألي .
ليال ـ عافتنا وطلعت عصبيه يارب صبرني عليها وعلى خبالها انوب رجعت عليه هو بدور امي ما قرينا برأسه عاد هسه شيسولنا هسه هو شضل .
الصبح كعدت وجواهر نشاط فول نظفت البيت وبخرته وأبويه هم متحضر وكاعد هو وجدي وجديتي وعمتي انسام هم أجتي هي وهدير وسلمت عليهم باوستني ونائل نزل باوعلي وأبتسملي
نائل ـ أذا ما عجبج أرفضي وما عليج يم أخوج .
ليال ـ هزيت رأسي وأبويه صاح عليه .
سعيد ـ خابرت فارس يكعد بالمحل .
نائل ـ أي خابرته ، عمامي خابرتهم
سعيد ـ أي هسه يجون وگلت لحيدر هم هسه يجي .
ليال ـ عفتهم يحجون ودخلت سبحت وطلعت وعمتي أنسام وهدير رتبني وكشخني وأني خايفه والدمعه بطارف عيني تمنيت أخواتي موجودات وگلمنا وطلعن يمكن اجو يستقبلوهم ودخلت جنات حضنتني شجابج .
جنات ـ حيدر جابني ولج سکتي وخليها فد فرحت ابويه خابره وكاله تعال احضر المشيه .
ليال ـ همزين وكعدنا وهدير تسولف على خطيبها وأني رجفه بكل جسمي واجتي عمتي انسام
انسام ـ گومي سلمي على النسوان وشوي أبتسمي جنات هدير قدمن ضيافه ربي يسهل عليج يا عمه .
ليال ـ لزمت ايدي حسيت بالأمان بلمسة ايدها هي صح جانت مرات موزينه علينا بس أهون من نجلاء ما عدها سوالف يكفي بناتها حبابات ويحبنا .
دخلت وتقدمت وأم الولد بس شافتني تصلي على النبي وتبوس بيه وأخواته اثنين ومرت اخوه وكعدت بصف عمتي سلوى بس شافتني جرت حسرات .
يحجن بينهم ويباوعلي وأني ابلع بريگي بعلومي يطك وأيديه يرجفون ونزلت دمعتي لان عمتي سلوى تباوعلي وتبجي أختنگت حيــل وگالن .
ـ حجيه عادي أبني يشوفها الشوفه الشرعيه وهي هم تشوفه گلشي يصير يجوز ابني ما يعجبها من حقهم .
الحجيه حليمه ـ ليش يشوفها أنتِ مو شفتيها ليش ما عجبتج
أم حكيم ـ شلون ما عجبتني وين تصح اليه هيج جنه حلوه وخجوله عمي أيدي بالدهن وعندي حظ وبخت احطها بيتي وتصير زوجة أبني بس تمشي ويه ابني كافي .
ليال ـ يحجن وأني بالي مو يمهن لأن كلش أختنگت ومر الوقت وگالوا لازم تتحضر الشوفه الشرعيه لبسني عباية أبويه فوك فستاني وتسترت زين وضليت كاعده وأجه هو وعمتي بصفي همست
أنسام ـ رفعي رأسج الولد يريد يشوفج لعد ليش سموها شوفة شرعيه يا عمه .
ليال ـ بالگوه رفعت رأسي بطول حيدر وتقريباً نفس شخصيه بس هو أصلع گبل نزلت رأسي وأمه گالتله
أم حكيم ـ أكعد يمه ليش واكف .
حكيم ـ لا هذا هو خل أمشي .
أم حكيم ـ أكعد يمه ششفت منها ، عيني ليال رفعي راسج خلي نشوف جمالج حبيبتي .
حكيم ـ يمه گافي شفتها يله اني اروح .
ليال ـ همزين طلع واني گمت بسرعه للغرفه وضلن هنا ذبيت ملابسي وأجتي جنات .
جنات ـ شفتي
ليال ـ أي خبصتيني بي شفته .
ـ عليج الله هو أحلى لو ليث
ـ لا طبعاً ليث
ـ أها
ـ لا أقصد بالجمال هسه شدخل ليث جبتي بالنص لو متعمده بإسئلتج وگته هسه
ـ أسفه مو قصدي والله
ـ راحوا لو بعدهم
ـ لا بعدهم راسلت حيدر گال جاي يحجون واذا وافقتي
والولد وافق باجر يعقدون الكم ، ها شتكولين
ـ ما ادري خليني أفكر
ـ براحتج عيني يله اروح يم النسوان ولج هاي امه بعدها صغيره شفتها شلون تحجي ولبس والكشخه فول
ـ أي شفتها تحجي وأني بالي مو صافي وراحوا وبالليل ما طلعت وضليت أفكر جبتها من أفكار من الماضي والأوجاعي والخذلان الى أن توصلت لقرار نهائي وأبويه الصبح سألني ووافقت والله يقدم الخير .
وأبويه تناقش هو وعمامي وجدي واخذ رأيهم كلهم وتذكرت ليث! ما اله صوت مختفي ولا أني تبعت عنه هاي هي لازم أشوف حياتي أني هم تعبت أريد أرتاح ثالث يوم رد إلهم الخبر والموافقه .
بس جانت صدمه للكل رابع يوم ردوا النا الرفض وجانت الصدمه اليه أكبر من الكل وكدام أهلي وصلني الرفض
لاينطون ولا يأخذون وما نعرف السبب ونائل عصب وأنزعج حيــل .
نائل ـ أني جانت أمنيتي يرفضون وما أخذ منهم لان ما أريد اتــزوج ولا مفكر بالزواج بس كله منج أنتِ لحيتي ورحتي مشيتي عليهم .
جواهر ـ وأني شعليه ترجع عليه ما تروح تسألهم ليش رفضوا واكف تحاسبني .
نائل ـ ليش مو سوالفج منو رايد مصخم وجه ورايد منج تزوجينه هاي اذا ما طلعتي حاجيه الهم عني وقنعتيهم
ومتأكد أنتِ عرضتي عليهم ليال مقابل ينطون بنتهم وهسه شصار كسروا ليال ورفضوا والسبب منو أنتِ .
سعيد ـ أذا طلع هالحجي صُدك ما تلومين الأ نفسج
جواهر ـ واني شعليه فوك ما اريد ازوج ابنك وبنتك وأنت عايفهم ونايم بيت اخوك صارلك سنه وهسه متذكر وصايرلي اب ومقهور عليهم .
ليال ـ ضربها راجدي وجرها من شعرها ونائل خلصها منه
الحجيه حليمه ـ دكعد وينك وين تضربها كافي لايصيرلك شيء ويوگف گلبك ما صارت وما انطوا طبهم مرض .
سعيد ـ هو وأكف گلبي وخلصان منها شوفي ولج اذا تدخلتي بزواج ليال أكسر ركبتج والله البنت بنتي واني ازوجها ابقيها ما الج شغل بس مال تعرضينها مقابل ينطونج مره لابنج جنازتج اطلعها وما اطلع ليال بهيج زواج من تدبيرج .
ليال ـ باوعلي مقهور ونظراتهم كلها أنكسار عفتهم ودخلت الغرفه مقهوره هاي ثالث مره توصل للعقد وتخرب معقوله ليث خربها! بس لا جان تدخل قبل
بوقت ليش هسه ، خل اسأل عمتي هو موجود
لو بعده بالدوره .
أحتي عمتي وسألتها وضلت تباوعلي بشك ها عمه
نجاح ـ ليش تسألين عليه
ليال ـ هيج سألت وبس
ـ لا ما موجود ، البارحه سألت سلوى گتلها منو ومنو منكم اجه للخطبه گالت بس فارس وكريم گتلها وليث گالت عنده شغل ما موجود رايح للبصره .
ـ ها تمام
ـ ما گلتي ليش سألتي
ـ هيج عمه بس سألت عافتني وراحت ، واني دخت معقوله ياقوت گالتله بس جان خابرني منين يخابرني واني حاظرته ما ادري ما اريد اظلمه يجوز يطلع صُدك ما عنده علم .
للعصر اجتي جواهر وگالت .
جواهر ـ رحت سألت أم سعدون ليش رفضتوا
سعيد ـ وأنتِ منو كالج روحي ساليهم منو رايد منج تردين تجلطيني .
نائل ـ شگو رحتي شبيج يمه ذابه نفسج هالذبه عليهم بابا ما أتزوج ما أتزوج راح اهج من ورى سوالفج .
الحجيه حليمه ـ انطوا مجال كبيتوا خل نفهم ليش رفضوا اي أحجي شگالت الج ام سعدون .
جواهر ـ گالت ليش خدعتونا وضميتوا علينا سالفة ليال
نائل ـ سالفتيش!
جواهر ـ طافرين أثنين حراميه ومغتصبينها وسالفتها طاشه كل اثتنين يحجون بيها الولد سأل واحد من المنطقه مسولف اله وحاجيله على ليال واللي صار وياها بهذا اليوم ورفضوا يعني السبب من بنتك لاترجع عليه زين مني لكيت الها رجال منو يأخذها بهاي سالفتها وسمعتها المصخمه .
نائل ـ أنتِ السبب أنتِ والله أنتِ كله منج رحتي عرضتي عليهم ليال وهسه أنفتحت سالفتها ويحجون بيها والعالم يحجون عليها وصارلها شگد ولو ليال بيها
شيء احنه نزوجها ليش ما تخليني ساكت يمه
جواهر ـ ما تحجي ليش ساكت يلا احجي شعندك واكف ضدي وأني شعليه غير اختك معيبوبه وردت استر عليها
سعيد ـ گااااافي الله يأخذج گااااافي .
ليال ـ دفرها ويضرب بيها وجديتي جرتها وهو تخربط ونائل التهى بي واخذه الاسستقبال .
الحجيه حليمه ـ ما تعرفين تسكتين الله يكصف عمرج شلون تحجين على ليال وتكولين معيبوبه لو بيها شيء ما نزوجها جان هي كالت ما اريد أتزوج مو بلغت ابوها واخوها موافقه بس أنتِ جلدج تعلم على الكتل من دور لقاء اذا ما تنكتلين ما تصيرين أدمي وتصمين حلگج
جواهر ـ لعد اذا هيج ما جان ولد عمامها يأخذونها بدال ما ساكتين وخايفين من حجي العالم يحجون بسالفة ليال خل واحد من ولد عمامها يأخذها .
ليال ـ جديتي باوعتلي كأنما تگولي ماكو غير ليث يأخذج نظراتها جانت تحجي گلشي عفتها وكعدت مقهوره حيل والله طگ گلبي رجعت فتحت سالفتي والكل يحجي بيه لا والقهر مغتصبينها أثنين ، قهر والله قهر هواي على گلبي ما بيه أتحمل بعد ما بيه .
خابرتني جنات والسالفه طاشه من جديد .
جنات ـ متأكده هي فضحتج لو بس اريد اعرف وين تريد توصل وأنتِ ما ضارتها ليش هيج تسوي يعني هسه احسن من يحجون بسالفتج لا والقهر گايلين أخوها
عاجز يعني يعرفون بنائل!
ـ شتگولين أنتِ لامستحيل
ـ أكول اللي سمعته خيتي
ـ نائل اذا سمع يموت أمه هو بدون شيء گالب عليها هالفتره وبس يحجي ما يرضى على تصرفاتها .
ـ خلي تستاهل قليل جانت تدفع بي علينا دار وكتها وخله أبنها ينگلب ضدها .
ـ خايفه على نائل إذا سمع شيصير بي هذا الموضوع حساس ومأذي هو شُـــنوْ ذنبه يتعيير بعجزه ادري شنو من أم تكولين الهم أبني عاجز بس علمود ينطونج مره والله هو خطيه لا حاجي لا كايل اريد اتزوج هي من كيفها مشت وخطبت ودبرت ورهمت .
ـ جواهر بعد ، يله عيني لاتزعلين لان خربت الله ما كاتبلج تصير
ـ لا شسوي الحمدلله على كل حال ، وأنتهى الأتصال وضل بالي يم نائل وهو طول الوقت صافن ويباوعلي مقهور عليه وبيوم كاعدين وأجه من برى صاير دم وكابل امه ويحجي ويبجي .
نائل ـ شلون تروحين تگولين الهم أبني عاجز وعقيم ما يكدر يخلف شلــــون يمــــه ، بس گوليلي ليش هيج سويتي تـــــردين منهم يشفقون عليه ويستخطوني وينطوني بنتهم لو شُــــــنوْ بالضبط فهميني يمه فهميني شلـــــــون انطاج گلبج تفضحين أبنـــــــج شلـــــون يمـــــــه .
جواهر ـ والله يمه سويت گلشي علمودك ردت أزوجك وأفرح بيك وتصبر عليك بينما نعالجك .
نائل ـ منـــــو رايد منج مو گتلج من بعد بيداء ما تحلالي مره مو گتلج مو من ماتت حتى تماضر ردت اطلگها گلتي لا أصبر كم شهر ونحاول لما بالأخير طلع العيب بيه وتالي أمها فضحتني وهسه طلگتها وراح تزوجها والعيب لا بيها ولا بيداء اللي ظلمتها من وراج
مو أنتِ جنتي تنطينها أعشــــاب مو أنتِ وجانت تحبج وثاقه بيج وكل ظنها علاج بس علمود تصيـــر حامــل أخ يا كسرتج يا بيداء أخ يا وجع گلبي شگد ظلمتج أخ
جواهر ـ فدوه اروحلك يمه والله گلشي سويته لأجل عيونك مــا عبالي ينكسر خاطرك وكلبك يا ينظر عيني يأ امي وابويه أنتِ ، نائل ابني حبيبي حاجيني لاتبجي رويحة أمك أني اعالجك وازوجك وتترسلي البيت جهال
ليال ـ كاعد وحيله مهدود وهي يم رجليه تبحي وتتوسل بي وتبوس بأيديه .
نائل ـ يمه أنتِ دمرتيني وفضحتيني بالمنطقه نائل عاجز وأجاني واحد عود يريدلي الخير أدزك على خوش دكتور مضبوط بس يكلف يعني أني مفضوح علني ومنو الفاضحني أمي يا عالم أمي ، أمي الجنت أمشي وراج وأني مغمض شتحجين اصدك بيج شتكولين انفذ لان أنتِ أغلى شيء بحياتي نقطة ضعفي ما عبالي تصيرلي وجع لگلبي
جواهر ـ لا هيج تحاجيني وتوجع گلبي نائل والحجوا جعل لسانهم الكص وجوه رجليك يروحلك فدوه كلمن يحجي عليك تاج رأسهم أنت
نائل ـ يمه أنتِ قضيتي على حياتي دمرتييني خليتني أعادي حتى أخويه وأخواتي وأني احبهم والله احبهم وعيت على الدنيا هما كدامي صغار جنت اوكع يشلوني واذا احد ضربني لقاء وباسل يصيرولي سيف ويدافعولي وكلما تشوفيني أتقربلهم تبعديني عنهم
لما كبرنا وشصار بالأخير خليتني أدخل أخويه السجن صح موقفي صعب بموت بيداء بس خليتني اشهد ضد أخويه بدون ما أسمع يتوسل بيه ويگولي نائل خويه والله مو أني قتلتها وروح أمي الماكو اعز منها مو اني وأني أشسويت ضليت اسمع منج أسمع بإيدي دخلت أخويه من دمي ولحمي وسجنته وراح يكمل سنتين هو بالسجن ويمكن ما يطلع منو السبب أنتِ گله منج
جواهر ـ أني شعليه والله مو أني هو المجرم وبعيونك شفت السلاح بإيده والدم على كل ملابسه ليش ترجع على امك لو انقرا براسك عليه ولك اني أمك ، امك تفديك بروحها هيج تحاجيني .
نائل ـ أي هيج أحاجييج لأن أنتِ إتخذتي من موت بيداء سبب وأنتقمتي من خالتي هيفاء بخلفتها حتى وهي ميته أنتقامج ما أنتهى من باسل وأخواته وخليتني درع لـ أنتقامج منها وقضيتي عليهم كلهم من جنات طعنتوا بشرفها بسالفة ويه عماد عود ردتي تسترين عليها وطلع كل تخطيط منج وأني أشسويت تهمت لقاء وباسل هما متفقين عليج وكذبتهم وطعنت بشرف أخته اللي هي أختي هم طعنت بشرف أختي شايفه هيج أخ نذل .
لــو باسل نايم بالسجون لو عصماء أنهزمت من ظلمج الها واخر مخططاتج أجيتني تردين تأخذين طفلها واني رفضت وكتلج مستحيل بس بقيتي مصممه على قرارج وتالي أخذت بناتها وراحت .
لو لقاء اللي سافرت وهجت من الظلم العاشته من الضرب اللي جنت اضرب بيها موزين ما سكطت وحده منهن لـو ليال رحتي عرضتيها على الناس علمود شُـــنوْ ينطون مره لأبنج العاجز العقيم الفضحتي بالمنطقه وبين الجيران والأهل اني أخواتي ظلمتهن دافعولي وأنتِ رحتي فضحتيني وأخر شيء أني خلصتي منهم رجعتي على أبنج من روحج دمرتي وقضيتي على حياته
ليال ـ يحجي ويبجي وهي تبوس بي وتبجي وياه وتشهك صوتها عالي ومطبك وجديتي تبجي وابويه يباوع على نائل ويبجي دموعه تجري خسرهم واحد ورى الثاني واحد بالسجن واحد أمه دمرته .
جواهر ـ گلشي سويته علمودك ردت گلشي الك وأنت تصيير ابو البيت وابو الشغل والمال مالك وتحت أمرك ردت كلشي الك ردت الك الزين ولك يمه اني شعندي بالدنيا غيرك ردتك تعيش مرتاح ومدلل وملك زمانك يمه أنتِ دنيتي وأني أموت من دونك عندي أنت وبس سامحني يمه سامحني والله من خوفي وحبي الك
نائل ـ أشسويتي بنفسج وبيه يمه وعلى مالمن منو يستاهل كل هالأذيه اللي سسبتيها بس گوليلي على شُـــنوْ علمود ورث والفلوس وسخ الدنيا علمود الذهب والبيوت والاملاك شسوي بيهن وأني ما عندي طفل يصيحيلي بابا .
جواهر ـ يصيرلك يمه والله يصيرلك ما عليك أحنه نعالجك ما أعوفك هيج والله ما أعوفك أوديك لاخر الدنيا
واعالجك وازوجك وتترسلي البيت جهال .
نائل ـ منـــــو يعالجني يمه هاي حوبة العالم اللي اذيتها حوبتهم هاي يمـــــــه أنتِ طغيتي وظلمتي وتجبرتي هواي هواي وجريتيني وياج بظلمج وطغيانج خليتيني اظلم نفسي وأخويه ومرته وبناته وأخواتي وبيداء وحتى تماضر من كسرتها گتلج يمه خليني أصلح غلطتي البنيه ما ألها ذنب تردين تكلبينها بينا مـــــا قبلتي وظلمتها وبعدين صلحت غلطتي وكسرت گلب بيداء من اذكر دموعها وغصتها أكرهج يمه حيــل أكرهج أنتِ مو أم والله مو أم ياريتني اني مو أبنج ياريتني اني اخو باسل من أب وأم .
ليال ـ دفعها ومشه وهي صاحت وراه .
جواهر ـ هما يكرهونك ويكرهوني وقروأ برأسك عليه وتالي ما تالي هيج تحاجيني ولك أني أمك مستعده اسوي كلشي علمود سعادتك .
نائل ـ ياريت قارين برأسي من زمان ياريتني يرجع الزمان وأصدك بلقاء جانت تحجي وتتوسل واحد يصدگها ياريت مصدك أخويه باسل ياريتني لو مصدك خالتي هيفاء من توكف كدامكم كلكم وتكذبونها وتطلع منزله رأسها بس ما صدگتهم وكلمن راح بمكان ومن گالي ليث وحجالي گلشي يعرفه وحجالي عن سوالفج كلهن بقيت ساكت ومـا حجيت گلت لا أمي مستحيل تضر وتأذي أحد أمي ما تســـويها بس من شفتج أذيتيني وأني أبنج وفضحتيني وگتها صدگت كلام ليث بس الوقت جان متأخر ولا أكدر اصلح شيء فات الأوان والسبب أنتِ
ليال ـ طلع من البيت وهي تركض وراه وتتوسل بي يرجع دفعها وطلع وگعت بالكاع تبجي وادك وتلطم على وجهه وگامت جديتي جابتها وأبويه گام وباوعلها وكال
سعيد ـ جواهر ما ضلتلج خبزه يمي
ليال ـ قبل لايكمل جديتي منعته وما خلته يكمل
الحجيه حليمه ـ لا يمه على بختك لا هاي أم نائل وحتى لو غلطت سامحها يمه وتضل أم أبنك لا يمه فدوه اروحلك يمه ، عوفوها عليه أني احاجيها .
سعيد ـ شتحاجينها يمه شتحاجينها ليش هي تسمع من أحد ، بيت كامل هجمتي عائله كامله دمرتيهم وبالأخير النار وصلت لأبنج وتالي يشيل رأسه ويهج من سوالفج فضحتي بين ربعه وجوارينه على ابنج ما سترتي بس گوليلي أنتِ أم ، غضب الله عليج من يومج صاحبة المشاكل بس اني الصوج مني المفروض من زمان مطلگج وشامرج على أهلج
ليال ـ يصيحح ودمه محترك من القهر ودخل عمي كريم كام يحجي عليه وأخذه طلعه برى وصاح عليه
كريم ـ ليال علاج أبوج
ليال ـ أي عمي ركضت جبت علاجه وصلت الهم وسمعته يحجي وياه .
كريم ـ شگو تقهر بنفسك وأنت مريض وينك وين العصبيه وحرگان الدم تريد تموت
سعيد ـ لعد اني شگو عايش المن باقي بس كولي شو خلفتي كلهم تدمروا واحد ورى الثاني وينهم وضلت بس ليال وسالفتها طشت وانفضحت واللي فضحها مرتي فضحتها وصخمت وجهه منو يدك بابها ويأخذها والحجي الطلع عليها ما ينحجي يا أخوي ما ينحجي وتريد مني اهدي شهدي هاي بنتي خطيتها برگبتي
كريم ـ مو كتلك أني اخذها لواحد من ولدي بس أصبر عليه لما أقنعه واجيبه گبل أعقدلهم وفضت راحت ما الك شغل بيها وبس تتزوج سالفتها تنسي غصباً عليهم يستگون وينسون وطبهم مرض بس يا أخوي صحتك هسه أهم ليش توجع گلبي وترجع تتمرض منو يفيدك شو صارلك سنه محد وصلك لا جواهر ولا غير جواهر وهسه مگابلها وتحرك دمك من انعل يومها ويوم الدخلتها الحياتك جنت متزوج هيفاء شحلاتك شجاك .
ولج ليال وين صرتي عمي
ليال ـ أجييت عمي هذا العلاج أخذه مني وأني مصدومه باللي سمعته تخشبت ويحجي وياي واني صافنه الا عاط بيه
كريم ـ ليـــال ولج عمي ليـــال .
ليال ـ ها عمي .
كريم ـ صارلي شگد اصيح عليج شبيج عمي أمشي سويلنا أستگان جاي .
ليال ـ دخلت وطلع جدي كعد يمهم وسويتلهم جاي ورجعت الغرفه دايخه معقوله يُكون هو خرب گلشي علمود هو يأخذني! معقوله ليث .
لليل حتى عشة ما تعشينا ونائل ما رجع وجواهر بس كاعده وتبجي وجديتي تسگت بيها هي قافله دمعتها ما نشفت وكلما اعبر من يمها تباوعلي بحقد نظراتها اليه تخوف تجاهلتها وثاني يوم أجتني جديتي وشكلها عدها كلام تريد تحجي وفعلاً كعدت يمي وگالت
الحجيه حليمه ـ البنيه من تخرب سمعتها صعبه جده ، واللي صار صعب يا جده وحجي العالم ما يرحم وسالفتج رجعت طشت من جديد وزادوها من خطبوج عبالهم خدعناهم ونريد نكبعهم بيج للامانه الناس ما حجوا بس وصلني عمة الولد وين ما تكعد تحجي عليج لما فضحتج يمكن تريد ابن اخوها ولگت سالفتج وخربت قسمتج وهسه يـا جده لازم نسد حلوك العالم ونسترج وجايتج أكولج ابن عمج راح يأخذج .
نجاح ـ يمه ياهو منهم
الحجيه حليمه ـ فواز!
ليال ـ صدمة عمري فواز! بس جده .
الحجيه حليمه ـ خليني أكمل كلامي يا جده ، عمامج حجوا وأتفقوا سجاد ما يريد زواج وليث حاجيته من زمان عليج وأمه هم حاجته گايل ما يريد يتزوج وحقه توه تزوج مرته ماتت ومنا بنته بعده ما مفكر وما ضل بس فواز ها جده شتكولين .
ليال ـ جده شگول ليش أنتوا أخذتوا رأي هسه تگولين حجوا وأتفقوا يعني حاسمين الامر وأخر شيء جايه عليه
واذا گتلج ما موافقه موافقتي الها دور وأكيد ما موافقه .
الحجيه حليمه ـ لا ما الها دور لان نريد نسد حلوك العالم
ونسترج جده ما نريد العالم تضل تعلج بلحمنا ولحمج
هاي هي جده اني كتلج علمود تتجهزين وباجر يعقدون الكم وفواز خوش ولد وأبن عمج وعمج كريم يحبج ويريدج وما يريد أحد يجيب معدلج بكلمه ، يله أني أكوم اروح عليهم .
ليال ـ راحت ونزلت دمعتي وهاي أكثر مره أبجي بيها وأحتاج أحد يمي أحس أنحصرت بزاويه منا اهلي ومنا السمعه ومنا كلام الناس ومنا أبن عمي وأخوه اي
أخوه شلون أتزوج أخوه واني وياه نفس البيت وتحت سقف واحد شلون ليال شلون ياربي ما تمنيت نفسي بهيج موقف صعب الموت أهون عليه من أتزوج أخوه
وهو شلون يراضاها ليش ما عارض ليش ليث ليش
" بجيت من كل گلبي وأخذتني عمتي بحضنها عمه نار بگلبي عمه أتمنى أموت والله أتمنى .
نجاح ـ اوف على حظج ليال أوف منين ما تجيبينها ما تصير حظج معثر مثل حظ أمج .
ليال ـ أمي احسن مني ماتت وخلصت بس أني راح أتعذب أكثر منها عمه ، وينج يمه تعالي شوفي موقف بنتج بين الماضي والحاضر بين نارين .
الكل ناموا وأني ما نمت ولا نشفتلي دمعه ولا أيدي تأخذ على شيء للصبح اجتي عمتي سلوى نظراتها حزينه كأنما ما راضيه على هذا الزواج ردت اسألها ليث شلون يراضاها على نفسه أخذ أخوه بس غصت بعلومي وسگتت ومشيت وياها وبوسط عمامي ولد عمامي كلهم وفواز كاشخ بس الشكل مبين عليه مجبور وباوعت بنظرات سريعه لاحظت هو مــا موجود بينهم!
وجابوا الشيخ وبدأ الكلام وطلبوا موافقتي نزلت دمعتي حرگت خدي ونطقتها موافقه وتم العقد بس أجبار من داخلي ما راضيه أبداً ما راضيه ...
بارگوا النا وولد عمامي باركوا اله وعمتي باستني وعمي كريم طلع الحلقات واشر لفواز واجه لبسني ولبسته وسحبت أيدي وخاليه من اي شعور كأنما لعابه تشتغل على الريمونت .
ما طولت لان مختنگه والهوا ما يجيني طلعت ودخلت الغرفه وشافتني جواهر وغمتني
جواهر ـ موزين حصلتي رجال ستر عليج وفواكاها ما راضيه لو هي دموع تماسيح
ليال ـ ما جاوبتها دخلت الغرفه قفلت الباب وبجيت الا طلعت روحي گله منك أنتِ وصلتني لهل الحال كله منك بجيت الا بلعومي تجرح وصار موبايلي گدامي مثل المخبله ادور على رقمه وتذكرت اني حاظرته من هذاك اليوم ما رفعت عنه الحظر رحت رفعت الحظر وأتصلت عليه وأني اغلي وافور يرن ومحد يجاوبني وين يله أجاني صوته وشگله نايم
ليث ـ ليال هاي أنتِ .
ليال ـ أي أني ليال ، ليال اللي دمرتها ووصلتها حافة الأنهيار ليال اللي وصلتها لحال الموت أهون عليه ليال اللي دمرتها بسبب أنانيتك وشروطك الفرضتهن عليه وعلى غيري لا ، گلشي صارلي أنتَ السبب بي .
ـ ليال شگو شبيج ، احجي على كيفج خل افهم لان جاي تبجين ، شگووو منـــو ويـــــاج .
ـ گله منك أنت السبب أنت ضيعتني وخربت حياتي وأذا مو كد الحب ليش حبيت .
ـ غيـــــر أفهــــــم شبيــــج بالأول وبعدين حاسبيني منا لسنه اذا ححيت أزين شاربي ، شگووو شبيج .
ـ مسوي روحك ما تدري علمود لا ليال تنقهر لا يجوز عبالك بعدني أحبك ترى من زمان نسيتك وحلفت لو تضل بس أنت ما احجي وياك ولا اسمعك صوتي بس حقارتك ونذالك اللي سويتها بيه جبرتني أتصل عليك .
ـ شمسوي ليـــال والله مـــا مسوي شيء الف رحمه ونور تنزل على كبر امج بس احجيلي شبيج ليش تبجين هسه عوفيلي حقارتي وياج بالماضي حاجيني هسه شصايـــــر وراي عفتج گلشي مـــــا بيج . .
ـ حتى وأنت ما موجود شرك يعم ومتأكده مليار بالميه أنت خربت قسمتي وأنت خابرت حكيم وخربته ورفضوا
ـ يا قسمة الگشره يا حكـــيم ، حكـــيم منـــو هذا ليــــال حاجينــــي ، يا حكـــيم هذا يا كواد حاجيني يا صخام برأسج وبراسي
ـ مشكلتي أعرفك
ـ تعرفيني حاحيني يمعوده راح اتخبل يا حكيـم هذا احد جاي عليج وراي أحجي شبيج ترى مثل الاطرش بالزفه كلشي ما جاي افهم عليج بالبصره بالشغل أبويه مشتعل من التعب
ـ أي حكيم ابن بيت أبو سعدون جوارينه بالفرع الثاني خطبوني لأبنهم ورجع صاح بيه الا فززني .
ـ هاي مـــــــن شوگـــــت صـــــار هالحجي ليـــال
ـ صار وخلص واجو شافوني والولد هم شافني وشفته
بس وصلنا للعقد ورفضوا
ـ شُـــنوْ شافج! يعني شافج شافج كعد وياج احجيييي عاد هو هذا الكواد أبن القندره الاسمه حكـــيم هذا مو .
ـ أي هو وتسوي روحك ما تعرفه أيباه شگد خبير بهيج سوالف تذكر شلون خربت على أستاذ باهر وزياد وهسه حكيم بس أعتقد من بعد هذول يجي واحد ما راح تگدر تخرب عليه لان قبل نص ساعه عقدنا أني وأخوك فواز هم سوي روحك ما تعرف ، قبل لايحجي فصلت الخط بوجهه ورجع أتصل ورفضته وضل يتصل وارفضه اخر شيء دزلي رساله عالخط
ـ بس جاوبيني أيدي ما تأخذ على الكتابه .
ـ حظرته وعفته ورى دقايق أتصل رقم غريب رفضته عرفته هو ورجعت حظرته ورقم ثالث وهم حظرته اخر شيء دزلي رساله .
ـ عايف الشغل من أنعل ابو اليشتغل بعد واليوم أحركج أنتِ وأهلي اشعلكم شعل على هالعمل هذا كواويد .
ـ عفت الموبايل وطلعت يمكن صُدك ما يدري ما لگيت أحد رايحيين بس عمتي بالمطبخ عبالي اشوف عمتي سلوى بس الباب البينا مقفول وأسمع صوتهم بالحديقه بيت عمي كريم هسه ليث يجيكم!
بقيت دايخه معقوله ما عنده علم وعمي ليش ما گاله يجوز عباله ما يتزوج ويخرب عليه ما يخليني اتزوج لان هما عرفوا هو اليخرب عليه بس مو من حقهم ما يكولون اله ويصدمونا .
ضليت عايشه بقلق لليل هو ماكو وصبيت عشه واجو ابويه وجدي وجديتي وجواهر ما اجتي وكعدنا واني مالي نفس وسمعت صوت هورن قوي شال البيت
الحجيه حليمه ـ هذا يا مخبل يدك هورن هيج هذا بابنا لو باب أخوك .
ليال ـ طلع أبويه فتح الباب وسمعت صوته كاله
ليث ـ عمي أنت بعدين حسابك راجعلك ، جايكم واحد واحد بالسره ولو انتوا ما بيكم أمان سلوتكم الغدر .
ليال ـ أبويه دخل وباوعلي كأنما عرف واني عرفت ليث ما يدري محد گايله لان من صوته وعصبيته عرفته ورجع صاح بصوت عالي .
ليث ـ فـــــــواز ، فـــــــواز اليوم أبوك أصمطه .
كريم ـ شگوو شبيك تصيح وأدك هورن ثولتنا تخبلت
ليث ـ تسأل شبيه تسوي روحك ما تدري شمسوي من ورى ظهري وأنت حجي وخابص نفسك شلون تزوج ليال وفواز شلـــون .
كريم ـ وأنت شعليك تتدخل
ليث ـ ليش شعليه غريب أني غريب موزين تدري بيه أريدها مو تدري بأبنك يحبها شلون تزوجها لأبنك الثاني انتوا عصابه يهود كفره مجرمين سلابه داع ش ما يسون عملكم .
كريم ـ مو گلنا الك عليها ما ردتها گلت ما اتزوج شايل الزواج من رأسسي وصرتلي الزوج الوفي لو صدك تحبها جان اخذتها ما خليتها مكفخه على أيد النسواين لما هسه أنفضحت وسالفتها على كل للسان وعقدتلهم لان اريد اسد حلوك العالم ما اريد احد يجيب طاريها انفضحنا .
ليث ـ وأني شعليه بالعالم بكيفكم تقررون حتى لو ما اريد اتزوج خابروني كولولي يابه راح نزوج بنت عمك انتوا جايين عليها خطابه وهذا حكييمم من حكمته سليمه شايفها واني ما أدري .
سلوى ـ حجيت وياك الا طلع على لساني شعر
ليث ـ أنتِ بالذات لاتحجين على الأقل جان خابرتيني
أمشي صيحيلي ابنج هسه يجي يطلگها الليل ما تباته وهي على ذمته فـــــــواز فـــــــواز .
كريم ـ لاتصيييح فضحتنا وفواز ما موجود طالع بيت عمك .
ليث ـ هسه اجيبه سحل وهسه يطلگها والشريف يوگف بوجهي ويمنعني الا اطشر مخه بالحياطين والله اليفك حلگه وياي والله .
كريم ـ من خبال اليخبلك اي والله لا تزوجتها ولا خليتها تتزوج وتشوف حياتها هي حقاره ونذاله مثلك ما شفت ولا اشوف دمرت البنيه گومة أجتها خطابه كسرت بختها وخربت عليها عليها عبالك ما ادري بحقارتك .
ليث ـ وتگوم وتحرك گلبي وتزوجه لأخويه هسه أنت شتفرق عني ما سويت شيء إلها
كريم ـ أنچب .
ليال ـ أرتفعت أصواتهم وأنفتح الباب وكبل رجعت الغرفه وصارت أصواتهم عاليه عمي وأبويه وجدي وجديتي يبوه علگت والله هذا مخبل طلع صُدك ما عنده علم بس يســتاهل يابه برد گلبي من شعوطته وحرگت گلبه صح ما جنت متقصده بس هي أجتي لحالها أني ما الي شغل .
ضليت كاعده بالغرفه ما طلعت ورن موبايلي ياقوت هاي شمذكرها بيه تتصل بعدين شگيت گلت يجوز هو ما جاوبتها ضلت تتصل تالي حظرتها وشويه وسمعت صوتها تسأل عليه
ياقوت ـ عمه نجاح ليال وين شُـــنوْ نايمه من هسه
نجاح ـ لا كاعده هسه دخلت الغرفه شتردين منها
ياقوت ـ هيج اسأل عليها
ليال ـ ودخلت الغرفه تفأجات بجيتها هاي شجابها
ياقوت ـ صايره ما تجاوبين مو أتصل عليج ما تفتحين خط لو عبالج ليث وحظرتيني أدكين ثكل وكرامه برأسي وبرأس أخويه وأنتِ ما صدگتي فـــــــواز عقد عليج
ليال ـ شتردين .
ـ شريد قابل بس أشوفج فرحانه الأخوان متعاركين علمودج عبالج هذا فد أنجاز لو أنتِ فد وحده مهمه وهيج تذابحوا عليج واحد يگول طلگ واحد يگول ما اطلگ وأفشل شيء من أخوان أثنين يتعاركون على وحده ما تسوى .
ـ گملتي .
ـ لا بعدني بس أكولج شيء قبل لا أروح لأن الأهل ما كالوا الج ولهل السبب فـــــــواز ما عاند ما يطلگج .
ـ شُـــنوْ .
ـ لازم تردين تتطلگين من فـــــــواز وتأخذين ليث
ـ لو عليه لأ فـــــــواز ولا ليث بس الحظ من يعكس وياك وخلاني مگفخه لوكت ألّي خلاج أنتِ هيج تحجين وياي وعيب عليج هاده عليه للبيت واني بنت عمج مو بنت عدوج .
ـ بنت عمي ششفت منج بس خراب لحياتي يا بنت عم التحجين عنها وأني زوجي طلگني وراح يتزوج وأنتِ السبب گله منج .
ـ وأني شعليه بيج وبزوجج ترى غير سالفه هاي شصير تذبونه برأسي
ـ شوفي أني ما جايه أحاجيج بموضوعي بس أنقهرت عليج وگلت تلاحگي لنفسج .
ـ لا واضج هواي مقهوره
ـ اذا عندج كرامه لنفسج أنسحبي من عائلتنا كلها حتى من ليث لان اذا فواز طلگج ورجعتي أخذتي ليث تنزلين من عين نفسج قبل عيون الكل لان بس القليلة كرامه ترضىٰ تأخذ أخوه خطيبها ونفس الوقت لاتنسين هو شلون كسرج وتزوج إيناس كدام عينج وشباك غرفته گبالج .
ـ أمشي طلعي برى گافي عاد يوميه تحجين بهل الموضوع شويه أستحي متدخله بگلشي .
ـ أي أتدخل من أشوف حياة أخواني وخوتهم تخرب بسببج وفواز وافق يستر عليج بشرط فرضه على أهلي يله أقتنع لان يحب وحده وياه واهلي يردون يسترون عليج تعرفين نفسج شلون أنفضحتي بسبب شر أعمالج تاليتج حتى رجال يستر عليج ماكو .
ـ أمشي طلعي برى .
ـ أي أطلع بس أكولج فـــــــواز بعد ما يتزوجج بكم شهر يتزوجج حبيبته وأنتِ يكعدج ويه أهلي وهي هذا البيت اللي بصف بيتكم مقابل ببتنا أبويه اشتراه اله يزوجه بي .
ـ شتحجين أنتِ .
ـ گلت العندي وهسه أمشي وضلت يمج أنتِ ونفسيتج تقبلين على نفسج بهيج زواج .
ـ مشت وعافتني مصدومه فوك صدمتي لا ياربي مستحيل وأبويه يدري بهل الشرط عادي عدهم وافقوا وأني شُـــنوْ ذنبي من هالزواج بحجة يسترون عليه ليش أني إشسويت والله ما سويت شيء والله
نجاح ـ ليال حبيبتي شبيج ليش تبجين
ليال ـ عمه شحجيلج سولفت إلها يعني أبويه يدري ووافق وعمي كريم مشتري البيت ما جاي أصدك شجاي يصيير وكل هذا ما مبلغيين ليث طيب ليش .
نجاح ـ أوكفي ما أعتقد أبوج يدري ماكو هيج شيء عمه هاي تحجي من كيفها تريد تخرب عليج هسه اسأل واشوفلج .
ليال ـ راحت وبقيت بالغرفه وأسمع صوت أبويه يمكن ما يدري وشويه وسمعت صوت فـــــــواز وجدي يگوله
عبد الغني ـ أحنه من أنطيناك ليال ما ندري بشروطك ولا كريم بلغنا ولا نرضى بهيج شرط وأذا ابوك موافق أحنه ما موافقين .
فواز ـ أني طلاك مـا أطلك بعد مو جاهل أني تمشوني على كيفكم أمشي أعقد وأمشي طلگ وافقت أعقد عليها وفضت راحت وصارت على ذمتي احب اتزوج هذا الشيء أني وياها نتفاهم عليه بس مال ساعه اعقد ورى كم ساعه طلك أني مو جاهل .
ليال ـ گمت سديت الباب ما أريد أسمع أي صوت وبقيت بحدود الساعه وأندك الباب ما جاوبت
سلوى ـ يمه ليال أني عمتج فتحي الباب
ليال ـ گمت فتحته ها عمه .
سلوى ـ لبسي شالج وتعالي وياي فواز يريد يطلگج
ليال ـ والله لعبتوا بيه طوبه لبست شالي ومشيت وياها ودخلت الاستقبال عمامي كاعدين وهو گام طلكني بحضور الشيخ وطلعت وجديتي تحجي ما رضت
الحجيه حليمه ـ وين جان لعد هسه تذكرها وطلگها من أخوه وهيج يحبها ما جان يتقدم ويطلبها اليوم البارحه من ماتت مرته وهو أول تالي يتزوج شهل الجذب بس أعرفه من يومه حقير لاتزوجها ولا يخليها تتزوج وتعيش حياتها وغصباً عليه هو يعقد عليها ويأخذها وحجي زايد ناقص ما اريد وفهمي ابنج أبو صماخ هالحجي وهو وينه هسه .
سلوى ـ شال رأسه يم بيت عمه رشيد .
الحجيه حليمه ـ خل الصبح يجيني .
سلوى ـ أن شاء الله عمه .
ليال ـ عفتهن ودخلت الغرفه ولگيت موبايلي يتصل رقم غريب ومراسلات على الواتساب رفضته وفتحت الرسائل
ـ جاوبي جاوبي جاوبي جاوبي جاوبي .
ـ نشط الأن گبل رجع دزلي
ـ هذا رقمي الجديد حفظي يمج
ً ـ منو أنتَ .
ـ ليث منو قابل حكيم سليمه التكرفه
ـ زين گتلي علمود أحظرك
ـ أموتج أذا حظرتي الرقم متكوليلي منين أراسلج من الكواويد .
ـ وشگو تراسلني منو گالك احجي وياك وشگو جبرت أخوك يطلگني لعبه بيدكم بيوم واحد عقد وطلاك
ـ لعد تأخذين أخويه .
ـ وأنت شعليك بإخوك ترى ما صايره بس عدكم بس الصوج مو منكم الصوج مني ومن أهلي رخصوني الكم بحجه الستر والله أتحمل كلام الناس وأخدم جواهر ولا أنذل هالذله ولا أخوك ولا أنت وأذا تراسلني من رقم ثاني أكسر الرقم وشگلك ما أريد أشوفه .
رسلتها وحظرت الرقم ورجع أتصل من رقم ثاني بالكاشف طلع سجاد عرفته هو جاوبته شتريد لخاطر الله ما گافي ما مليت .
ليث ـ أريدج ، بس أسمعيني وبعدها أحظري الرقم
ليال ـ مستحيل بعد أسمعك .
ً ـ مقدر وضعج واللي صار مو سهل بس خل نحجي
ً ـ نحجي بشنو نحجي ليث بس گولي منو وصلنا لهل الحال غيرك يعني هسه عاجبك أخوك عقد عليه ورجع طلگني لا والقهر طلع زواجه مني بشروط يعني حتى لعابه ما يلعبون بيها هيج ، تعبتني ما شفت شيء حلو منك بس أذيه وهسه راجعلي تگولي أريدج وأني أكولها الك ما أريــــدك .
ـ ليال لاتقطعين الأتصال .
ـ سديت الخط وقفلت موبايلي وأني نار بگلبي منه شبعت قهر ونمت وأني أبجي وأجتني عمتي نومتني بحضنها وتسگت بيه عمه والله لو أمي عايشه فلا أنقهر أصلاً جان ما أنذل هالذله وأنشمر هالشمره
ـ الله يجبر خاطرج وكسرتج گافي تقهرين بروحج گافي
ـ نمت وأني ابجي كعدت الصبح ولكيته موجود جديتي تحجي وياه باوعلي وصديت وجهي عنه وطلعت لكيته رايح واجتني عمتي بإيدها موبايلها .
نجاح ـ هاج أحجي وياه حلفني ولح عليه بس دخلي الغرفه وأني أوكفلج لا جواهر تسمعج ادكلج طبل
ليال ـ منو گالج احجي وياه أخذي عمه ما احجي
ـ ليال أفهمي منه شيريد لاتعاندين
ـ أخذته منها وفتحت الخط بقيت ساكته
ـ أبقي ساكته بس أسمعيني وبعدها لاتحجين
ـ ما أريــــد أسمعك أبداً وصَدك وثق بالله لو أمي عايشه لو بس باسل موجود جان ما هذا حالي انذليت ذلة الجلب صرت خدامه ومكفخه بيد جواهر وكل هذن راضيه بيهن راضيه أخدم وأنذل بس ما أنجمع بيك ولا ثانيه أخ لو أمي عايشه والله صوتي ما أخليك تسمعه طولي ما تشوفه ولو تصح اليه فرصه مثل لقاء اروح وأخلص منك المهم أبتعد عن كلشي يخصك وخاف عبالك طلع عليه كلام وسمعتي تشوهت والقسمه تجيني وتخرب لازم ارضى بالزواج منك مستحيل هالشيء يصيير .
ـ محد يجبرج على شيء أنتِ ما رايدته وزواجج من أخويه جان لعبة جهال بدون تفكير وبدون عقل من الأساس .
ـ وحتى لو أنجبرت عليك مثل ما نجبرت على أخوك بحجه الستر ، هالزواج يكون أجباري لان ما عندي سند يسندني وأخلص نفسي وأهلي من كلام الناس بس مال زوجه وليال القديمه ترجعلك لاتحلم بيها گلشي يخصك مات بگلبي من زمان لاتجرب حظك مره ثانيه لان راح تتندم وياريت هالزواج ما يصيير وتمنعه لان راح تأذيني اضعاف اذيتك الشفتها منك .
ـ هذا هو .
ـ سگتت وهو شكله يدخن رجع گال
ـ مثل ما تردين ، ماكو زواج ومحدّد عليه بيج لا فواز ولا سجاد ولا ليث ، عيشي حياتج من حقج تعيشنها وما عليج من كلام الناس وأني أبن عمج وبظهرج وترجع علاقتنا مثل أيام قبل أبن عمج وأي شيء تحتاجينه تجين عليه مثل تمام .
ـ ما جاوبته
ـ يله مع السلامه بنت عمي
ـ الله وياك ، رجعت موبايل عمتي كون توفي بكلامك وما تتأثر بكلامهم وأني بنيه لا حول ولا قوة الأ بالله
توقع على قرارات أكبر منها ، شدعي عليج جواهر لعبتي لعب بسمعتي خليتي الناس تعلج بلحمي صرت سالفة كل إثنين وأني الينحلف بإسمي وأخلاقي هاي تاليتها حسبي الله عليج يا جواهر ...
مر كم يوم وجواهر تلوب وتتوسل بإبويه يروح يرجع نائل لان من يوم الطلع ما رجع البيت وهي شبه متخبله .
جواهر ـ أمشي أطلع دور عليه هذا أبنك مو بس أبني
سعيد ـ ليش مو بسببج عاف البيت من ورى سوالفج أكو أم تفضح أبنها أكو أم تسوي سوايتج
جواهر ـ بس جيبلي أبني گلشي ما اريد وبيك خير وأحجي عليه بس نائل يدخل البيت وأشوفه طوله مو گلبي فركس ونار مشتعله روح شوفه وخل يرجع وياك
ليال ـ ما جاوبها حسيت أبويه يعرف مكانه بس ما يگول الها ولليل نائل رجع بس ما يحجي وهي تتوسل بي مشه وصعد فوك بدون كلام وهي أدك بالباب ما يجاوبها
جواهر ـ نائل يمه وليدي حبيبي أفتح الباب خل نحجي وشتريد أني حاضره بس لاتبقى زعلان من أمك ولك يمه والله گلبي راح يوگف من زعلك أني شعندي غيرك
ليال ـ ما رد عليها وتالي رجعت وعفتهم ودخلت غرفتي وهمزين موضوعي محدّ حجه بي بلگي الله وسدوا واخلص من هالسالفه لا ليث ولا غير ليث كرهت الزواج واليتزوج هم .
الصبح كعدنا وأنصدمنا بقرار نائل نزل بإيده جنطته وجواهر صراخها شايل البيت تبجي وتتوسل بي وتحاول تمنعه يسافر بس هو مصمم على قراره ، باوعتله وبجيت ما تمنيت يغادر ويعوفنا مو هيج النهايه نائل
جواهر ـ يمــــه حبيبي وين تـــــروح وتعوفني والله أمـــوت وراك أتخبل واركض بالشوراع ، يمه نائل حبيب أمك عوف السفر عوفه وين رايح وين تسافر وأني أمك تعوفني شلون أنطاك گلبك تمشي وتخليني .
نائل ـ عوفيني خليني أولي وأخلص تعبت ما أكدر بعد تعبت من گلشي ، وكلشي بالبيت بالشوراع بالمنطقه كلها صار يخنگي عوفيني خليني أروح واخلص من العذاب اللي جاي أعيشه كل يوم أني ظلمت ناس هواي بحياتي وأنت السبب بهل الشيء سوي شيء زين اليه وخليني اسافر .
جواهر ـ لااااا ما أخليك تسافر ما أخليك والله ما تروح ما تروح ، نائل يمه فدوه اروحلك لاتعوفني أخذني وياك اي أروح وياك ما اضل وين ما تروح اني وياك رجلي على رجلك ولك يمه اني وراك نفس ما أتنفس يوكف گلبي ولك أني أمك امك نار بگلبي حس بناري نائل يمه لاتكسرلي گلبي وتخليني حبيبي .
ليال ـ مجلبه برجليه وتتوسل بي سحب نفسه منها وباوعلي وهو يبجي حضني من وجهي ومسح دموعي لاتسافر نائل الله عليك عوف السفر وخليك ويانا وأنسى كلشي وعد كلشي صار يتصلح ونرجع أخوان وحبايب بس السفر مو حل نائل وين تعوف أمك وأهلك وأني تعوفني منو ضلي غيرك أنت أخويه الجبير وتضل أخونا كلنا بس لاتسافر .
نائل ـ توجعين گلبي بكلمة أخونا الجبير وأني ما صرت الجن أخ أني ظلمتجن خويه وعذبتجن حيل ظلمتجن أنتن ما تستاهلن أخ مثلي ولا حتى باسل الأخ ما يعادي أخوخ ويسجنه الأخ سند وعزوه أني كلمه أخ ما استاهلها أنت عدجن أخ واحد اللي هو باسل وأني رايح وأتمنى تسامحيني على گلشي سويته وياج
ليال ـ ماسمحتك دنيا أخره دنك باسه أيديه وحضني قوي ويبوس بيه وابوس بي والله ولا يوم حقدت عليك وأدري بيك گلبك طيب ومعزتك من معزة باسل أنت أخويه .
نائل ـ خيتي الجبيره الله يرضى عليج ويجبر خاطرج مثل ما جبرتي خاطري ديري بالج على نفسج وأخواتج وسلميلي على الكل مع السلامه ، أدعيلي ليال .
ليال ـ الله وياك حبيبي ، ودع الكل وأبويه يبجي ويتوسل بي
سعيد ـ نائل أبني عوف السفر ولاتروح وليدي أذا مو لخاطر أمك لخاطري لاتعوفني يابه وتكسرلي ظهري بروحتك وليدي كافي عليه كسرة باسل ولقاء منو ضلي أبني لاتروح .
نائل ـ لا يابه خليني أروح ودير بالك على ليال لاتظلمها بعد وأذا ليث تقدم الها أنطيها اله لان بس هو يستاهل الها ودز مصرف لقاء ودير بالك على جنات عينك عليها وباسل طلعه من السجن لاتعوفه مسجون ظلم وضل ويه عصماء وطلعوا واني تنازلت واخذ امي هم خل تتنازل عن شهادتها ضده ورجع عصماء والبنات وعوضهن عن الأذيه اللي سسببتها أني والمحلات وشغلي كل حقوقي وأملاكي تنازلت عنها لباسل وبناته اذا ما أخذهن أنطي گلشي لبناته گول الهن هذن من عمجن نائل خلي يضل مني شيء زين بلكي يغفرلي السنين الأخذت منهن أبوهن وحرمتهن من حنان الأب .
مع السلامه .
______________________
ليال ـ شال جنطته ومشه وجواهر تركض وراه وهو عافها بدون ما يلتفتت وراه وهي تصرخ تخبلت روحها فرفحت عليه مثل الطير المذبوح
جواهر ـ نائــــــــــل ولك يمــــــه حبيبي نائـــــــــل
لاتـــــروح وتخليني وراك لاتسافـــــر يمــــه حبيبي
يمــــه حاجيني تسافر وأنت زعلان مني عمت عيني
ليال ـ طلع بالحوش وعمامي ولد عمامي موجودين وانطه الجنطة لسجاد ودعهم كلهم وحضن ليث وطبطب على أكتافه وباوعلي حسيته وصى ليث عليه وسمعت أسم باسل هم ومشه وجواهر تركض وراه وعمتي سلوى وعمتي نجاح جلبن بيها وهي ادافع وتصييح وراه وفتح باب السياره وسجاد اليسوق وباوعلها ونزلت دمعته وصعد وراح الله وياه سافر نائل وخلانا وضلت أمه ادك وتلطم ملخت نفسها يسگتن بيها هي فقدت تخبلت وتصرخ الا صوتها طبك انتهت على الأخير وراح نقطة ضعفها .
جواهر ـ راح وليدج يا جواهـــــر راح وليدج يا جواهـــــر
راح نائـــــــل راح حبيبي وعافني وحدي ولك يمــــــه سافرت وأنت زعلان مني عمت عيونك أمك ولك يمه نائـــــــل أرجع لحضن أمك ولاتفركس گلبي وراك أرجع وأخذني ويــــــاك ولك يمــــــه نائــــــــل أرجعلي .
ليال ـ حاولن وياهن ما قبلت تگوم ضلت بالحوش تنعي وتبجي لوحدها كاعده بالكاع وشكلها يكسر القلب والخاطر كُلنا نعرف وندري شكثر تحب أبنها وسوت المستحيل علموده علمود يضل گلشي اله وتالي عاف كلشي وسافر وضلت وراه حتى وداع ما ودعها بسبب الأذيه السببتها اله لدرجه ما دنك عليها لعد شگد متأذي منها ، الله يسهل امرك يا خويه ، الله وياك حبيبي .
رجعت وابويه كاعد يبجي وعمامي أخذوا تعجبني خوتهم وحبهم وخوفهم على بعض تمنيت هالحنيه والحب بين نائل وباسل اللي حتى أسمائهم متقاربه بالشبه والشكل مثل التؤام بس الفرق نائل ضخم وطويل وباسل كذلك بس مو بضخامة نائل وطوله أثنيهن يشبهون أبويه بس ما تشابهوا بحنية أخوانه فرقتهم جواهر بسبب الحقد والجشع والطمع بسبب الورث وبالأخير تفرقوا وعائله كامله في ضياع .
لكيت لقاء تتصل جاوبتها هلا لقاء أجاني صوتها تبجي
لقاء ـ صُدك نائــــــل سافر .
ليال ـ أي والله قبل شويه راح الله وياه .
ً ـ أي خابرت جنات گالت اجه وعدني وهو يبجي سوده عليه وين سافر يا دوله ما عرفتوا سألتوا وشوكت يرجع
ـ لا والله ما سألته ما اظن يرجع لقاء نائـــــل مجروح هواي متأذي شگد ما تتصورين وحاس بالذنب .
ـ عمت عيني عليك خويه يابه طگ گلبي عليه وأني روحي من الدنيا هو لو تدرين شگد احبه هو گلبه طيب وحنون لما أمه سليمه الله يأخذها شگو عايشه بعدها ما ماتت وراه الله يكرفها .
ـ سولفت الها وهي السبب بگلشي
ـ من يوم عرفت وكتلت نجلاء عرفت جواهـــــر راح تفضح إبنها وتالي فضحته وسافر من أذيتها ، هي دمرته هي السبب رجال شگده شگبره مثل الجبل وكعته للكاع حسبي الله عليها اللهم لاشماته بس تســتاهل خليها تتلوع وتتعذب وراه كافي عليها ما سامحها وراح وهو زعلان منها حـيل بعد أيدي عاشت أيده .
المفروض هو أبن أمي مو أبنها هو من طيبة گلبه وحنيته يستاهل أم مثل أمي مو مثل جواهــــــــر الشيطانه أعوذ بالله منها من أم .
ـ شنسويلها ما أكول غير الله يهديها ، أي أنتِ شلونج أخبارج
ـ زينه ما جاي أتعود الغربه تخنك وخالي وعائلته ما مقصرين بس صعبه ليال ومن يجي الليل أتذكركم كلكم
ـ بس يطلع باسل رجعي العراق
ـ خابرني ليث صدك شصار عليج
ـ حجيت الها گلشي وكامت تحجي عليه
ـ وليش هيج سويتي خطيه شكد قاسيه
ـ شُـــنوْ نسيتي أذيته
ـ لا ما نسيت بس هذاك جان وگت وهسه وگت ثاني مو مال عتاب وزعل ومغثة بالكلام أنتِ هسه بحاجته وشفتي شلون انقهر من موقف أهله وياه ودگت عمامي وابويه الناقصه خرب بالحظ من ورة كلام الناس هيج تسسون وتالي طلگج هذا شغل جهال والله عمي احنه نعرف نتصرف احسن منهم شنو يعقد عليج فواز ويجي ليث بنفس اليوم يطلكج شهل القهر لعبه أنتِ
ـ شمدريني تعالي فهميهم هالحجي .
ـ لاتسمحين الهم يتحكمون بيج هذا زواج وأبويه شُـــنوْ شغله وأنتِ بنته شلون يسمح الهم بقرارتهم هذا كايم من مرض وهيج عمي خل يرجع ينام هو بالحالتين ما منا فايده .
ـ لا خطيه هو شعليه ما عنده علم والله خطيه
ـ ما عنده علم شلون لاادفعين ليال قابل يسحلونج سحل غصب عنه أكيد تم كلشي بموافقته هما صح خوتهم حلوه واحد يوكف لثاني بكل مصائب بس قرارتهم ما تعجبني متسرعين كبل يشملونه بالتصليح وزوج هذاك لهاي بدون تفكير عبالهم هذا الحل وهما كبار وعليهم العتب والله حركوا دمي شهل القهر هذا وفواز شلون يسمح لنفسه يتزوج حييبته بعد ما يتزوجج حقل تجارب أنتِ لو بالمزاد بيع وشراء شبيج يحظي عوفي الفقر ترى راح تجلطيني
ـ يله هسه فضت عالخير والحمدلله خلصت من فواز
ً ـ الحمدلله صدك أبويه رايح على عصماء
ـ اي من صار زين كبل راحلها ويتواصل وياها ما عايفها
ـ اي الحمدلله أي وهسه ما تعرسون أنتِ وليث الخُوب والحرب علمود ارجع العراق علمود عرسكم
ـ لا يابه يا عرس
ـ الله عليج من تشوفينه ما گلبج يحن ويدك
ـ لا
ـ أحلف عليج تجذبين الحب حلو اني بالغربه وأحن اله
ـ الله كريم
ـ أنطي فرصه لنفسج واله صح غلط بحقج بس خطيه كافي اثنينكم تعذبتوا عيشوا حبكم وانطوا حقه من المحبه البينكم صيروا عائله وخلفوا كافي أريد أصير خاله
ـ شعندج سوالف
ـ شسوي أنقهر عليكم أثنينكم وادري هو بعده يحبج وأنتِ هم بس تكابرين والجرح اللي تركه الج جاي يخليج تقاومين ما تضعفين لحبه بس هذا مو حل دائمي لان القلب يحتاج حب وحنيه هو ينمو على الحب .
ـ تحجي وأني صافنه وكلامها اثر بيه وانتهى الاتصال وخربطت عقلي وأفكاري دخت بكلامها وضليت أسبوع
افكر احس عقلي راح يوكف من التفكير ونفس الوقت هو ما موجود بالدوام ودوامه حالياً بالبصره المهندس النفط ليث فخامه الاسم تكفي خرب شبيه كمت أتغزل بمهنته واسمه لا ليال كعدي راحه لاتتراجعين ثبتي على قرارج والله شكلي راح اتراجع عن قراري .
گعدت من النوم باوعت الساعه ٨ وصوت أبويه وجواهر واصل لعندي عمه شگو شبيهم متعارگين
نجاح ـ صارله أسبوع يقنع بيها تمشي وياه تتنازل عن شهادتها ضد باسل ما تمشي معانده .
ليال ـ طلعت وهي واكفه باب الغرفه وتحجي وتدعي
جواهر ـ لو تصلخ جلدي ما اروح أتنازل وعمت عينه نائل تنازل عن دمه مرته وهو أخوه گاتلها هسه كلكم تردون تبرونه دم بيداء وين تروحون من خطيتها ما تخافون الله .
سعيد ـ وأنتِ شمدريج هو كاتلها شفتي بعينج من عمى بعينج
ـ أي شفت مو جان لازم المسدس ودمها بملابسه شنو هذا صبغ لو شايل مسدس مي ، جاي تلعبون انتوا هاي جريمه قتل ولازم ياخذ جزاته بنيه شابه شنو ذنبها
ـ من الله يأخذج ويخلصني منج ومن شرج والله اذا ما مشيتي وياي وهسه تنازلتي ما الج كعده بهل البيت
ـ البيت بيت ابني ما اطلع شتسوي سوي .
ليال ـ سدت الباب وجديتي صاحت عليه
الحجيه حليمه ـ عوفها اني أحاجيها عوفها
سعيد ـ شعوفها يمه ما سمعتيها شتحجي تريد تجلطني والله لما نائل وصاني بيها والله اكظبها الباب وما الفيها بالبيت بس لخاطره ما اريد اهضمه وهو مكسور خاطره ومهضوم .
الحجيه حليمه ـ وين تكظبها الباب بهذا العمر ما تريدلك مره اداريك منو يداريك شو بناتك كلمن ومشت وليال ما دايمه الك باجر عكبه تجي قسمتها وتمشي بيت رجلها اكعد واسكت وهالحجي لاتحجي بي تكظبها الباب لعب جهال هي صارلها عمر عايشه وياك هسه تكظبها الباب .
ليال ـ خله وطلع مزعوج وجديتي دگت عليها الباب ودخلت تحجي وياها وعرفت من خلال كلامهن من يوم وفاة أمي هاجرها وعازل فراشه من هذا متخبله علينا والله أبويه طلع خوش معاقبج .
جواهر ـ حتى وهي ميته ما خلصت منها بعده يحن الها
الحجيه ـ مو وكته هالحجي المره ماتت الله يرحمها سكتي ولمي لسانج حاجي كلمه حلوه لاتضلين بس مشاكل أنتِ وياه .
ليال ـ ما اعرف ليش فرحت اللهم لاشماته بس تستاهل
ورجع ابويه ولزمته جديتي تحجي وياه وعاط بيها .
سعيد ـ شتحجين يمه اني تحلالي مره من بعدها وكرهت كل النسوان من خليت هيفاء جوه التراب واني حبيت مره والله اخذها مني وهاي هي وجواهر ما عاجبها هذاك درب أهلها وراها سبع حجرات عاجبها تكعد وتحترم نفسها اهلاً وسهلاً ما عاجبها تولي للبيت أهلها .
الحجيه ـ ولك يمه حرام عليك مريتك ما يجوز الله يحاسبك عليها
سعيد ـ خل يحاسبني راضي وهذا الموضوع بعد لاتفتحينه وياي جواهر ما تصيرلي مره بعد وكعدتها بالبيت لخاطر أبنها والله لما نائل وخاطر نائل والله بس أخ هو شمصبرني عليها لما هو وتالي عافني وشال رأسه من وراها ومن وسوالفها الطايح حظها .
ليال ـ طلع وجديتي دگت عوجيتها مزعوجه من تصرفه
أبتعدت لان جواهر شيصير تذبه برأسي ما عليه هسه ترجع عليه تكول تقرا براسه شعليه اني ...
لليل جاي أكلب بموبايلي وصار كبالي رقمه وتذكرت اخر مره من حجينا وصوته تركز بمخيلتي وشلون جان تعبان وفاحط من القهر على سالفة أهلي حسيت مأخذين منه روحه أنعصر گلبي وغلبتني مشاعري وكبل رفعت الحظر عنه للصبح كعدت على صوت المنبه لصلاة الفجر كمت صليت وكعدت استغفرت وقريت قران كم صفحه وأذكار الصباح من توفت أمي التزمت لان هي الله يرحمها جانت ملتزمه ومحافظه على صلاتها وأذكارها وعلمتنا نصيير مثلها وأن شاء الله نكون كد تعليمها .
ورجعت نمت وما يجيني النوم حاولت وبس أتگلب
خرب بعقلج لقاء إشسويتي بيه شو عبالك حنيت! .
فتحت موبايلي وشفته ناشر حاله من بعد ما فتحت الحظر ورى نص ساعه تقريباً ناشرها واكف وبملابس الدوام وضاحك بس التعب مبين عليه ومخلي قلب ضليت أباوع الصوره واخذتلي صفنه تالي تدارگت نفسي وعفت الموبايل ونمت .
كعدت الصبح على صوت جواهر وجرت الغطا عني وكشفت جسمي فززتي شكو شصاير على كيفج
جواهر ـ نايمه لظهاري نامت عليج سليمه شو كومي على شغلج وگت نوم هسه .
نجاح ـ على كيفج وياها وبعد وگت يله ساعه ٨ شگو مكعدتها من هسه وهنا شغلات البيت يوميه نفس الشيء .
جواهر ـ أنتِ ما عليج ، يله گومي لا بارك الله بيج .
ليال ـ نفضت فراشي وگمت على شغلي ولگيتها مسوية حملة تنظيف عالمطبخ وجلف السراميك واني وياها انظف موتتني جنت خلصانه صارلها أسبوع عازله نفسها بغرفتها الظاهر خلص حزنها زعلها على نائل ورجعت عليه عوذه ما اخلص أني .
جواهر ـ يله امشي عمتج غسلت البيت وأنتِ أمشي غسلي الحوش وكدام الباب وهم والحديقه نظفيها زين
ليال ـ ماشي وبلشت غسل ونظفت الحديقه وجاي اغسل كدام باب الحوش هو أجه وطبك سيارته گبل عدلت شالي ودخلت جوه وارش ماي بالصونده وهو ما يباوع أبداً ونزل دخل بيتهم طبيعي حتى ما سلم .
گملت شغلي ورجعت البيت والعصر هم لزمتني شغل وشمرت عليها ملابسها أهنا تخبلت شلتهن وعفتهن عالصفحه وغسلت ملابس ابويه وملابسي واجتي هي
جواهر ـ شو شامره ملابسي شو أمشي غسليهن لا اخليج بالغساله وأغسل عمرج .
ليال ـ غسليهن أنتِ اني أغسل بس ملابس أبويه لان أبويه وأخدمه بعيوني بس مال اغسل ملابسج لا والله أعذريني أنتِ مو أمي .
جواهر ـ مو بكيفج أمشي أني وغصباً على رأسج تغسلين ملابسي وبدون ما اكولج يله تحرگي .
ـ ما أغسل ما عليه
ـ شگلتي ولج شو ما سمعت
ـ أني شعليه بملابسج ما اغسلهن ونفسي تلعب منهن غسليهن أنتِ وداخلياتج شلون اني اغسلهن اني أمي ما جانت تخليني اغسل داخلياتها لا هي ولا ابويه هي جانت تغسلهن وبيدها هم مو بالغساله مو عاد أنتِ .
ـ من أنعل أمج لابو الجابج عليه يا ادبسزز والله اليوم اطلع قهري كله بيج وأعلمج شلون تغسليهن وأنتِ ساكته .
ـ گبل جرتني من شعري وتضرب بيه واني اريد اخلص روحي منها وهي جنها بغل نامت عليه وعضتني من ايدي شاغت روحي عمه ولج عمه لحگيلي واجتني عمتي وتجر بيها بس شنو شلعت كل شعري وكل شوي عاضتني دكول جلب مستجلب كوه عمتي خلصتني منها كعدت بجيت ومكان العضه يوجعني .
نجاح ـ ما تخافين من الله ليش هيج ضربتيها شمسويتلج مو خطيه ، أمشي عمه امشي هذا هم حظج خلاج على ايد هالظالمه .
جواهر ـ تستاهل وكلما تعاندني وتوكف بوجهي الها گتله ونائل بسببج عافني وسافر كله من وراج ومن ورة سوالفج لما سوالفج الساقطه جان وافقوا عليج واخذوج وخلصوني منج ومن عارج يا عار وأخذت عبير لنائل بس أنكشفتي وانفضحتي كدامهم ونائل عافني وراح من راحت روحج عبالي اخلص منج هم ضليتي عتله على گلبي عوذه حتى عوذه .
نجاح ـ أنتِ شُـــنوْ حتى ابنج عافج ما انكسرت عينج ما كافي ما تجوزين ما شبعتي من المشاكل عوفيها .
ليال ـ أخذتني عمتي بالغرفه واباوع مكان سنونها اني هم ثوله ما ضربتها دعضيها كبر ، اجه أبويه من السوك وعمتي گالتله وكام يحجي ودخل عليها الغرفه وكبت بينهم وطلع وباوعتلي وتحلفتلي بالشر عزه والله فلا تعوفني الا تنعنع عظامي بس هالمره ما اسكتلها
مرت أشهر وأني طاقتي خلصت جواهر حيل تعبتني وبيوم جديتي وعمتي نجاح راحن عمتي انسام واني ما اخذني وياهن ضليت بالبيت وجواهر أستفردت بيه كتلتني كتله ودافعت وضربتها بس ما كدرت الها ومن اجتي جديتي وعمتي حجيت الهن بس شيسون الها مجلوبه ومن راح نائل انجلبت علينا بالزايد وصايره أعصاب اقل كلمه تعيط بيه تصرعني بصوتها .
وانوب القهر الأكبر لگلبي ليث مختفي حتى من يجي علينا جواهر ما تخليني اطلع اشوفه تكبرني بالمطبخ حتى انسلك من الحر ولا اطلع ومن اطلع الكاه رايح فد انقهر وعلى الأنترنت وما يتواجد واتساب قليل يفتح وكلما اريد أبادر كرامتي تمنعني وانتظره هو يبادر هو ماكو كلشي منه حتى حالات كام ما ينشر يمكن اني لحيت ورخصت نفسي صوجي والله
لقاء خربت عقلي جنت ناسيته ومعانده گلبي شجابني على المر وشلعان الكلب مره ثانيه جنت مرتاحه وشحلاتني من انعل ابو الحب واليحب اي والله ارجع مثل ما جنت هواي اشرفلي من هالمذله كل شوي داخله الواتساب اشوفه فاتح لو لا كبر شحس أني .
الحجيه حليمه ـ جده ليال باجر عرس زياد هم تروحين .
ليال ـ لا جده شيوديني .
نجاح ـ ليش ولج خلي نروح نغيير جو حتى جنات راح تجي خابرتني گالت عمي رشيد جاي عليها للبيت وعازمها هي رجلها .
ليال ـ ها والله ما ادري ، وفرحت من عرفت عمي رشيد رايحلهم للبيت عازمهم شگد جبيره عند رجلها همزين
وعمتي تريد تروح واني ضليت حايره أخاف عبالهم متشمته بياقوت لان زياد تزوج وعمتي سلوى تزعل مني بس هو طلگها من زمان ، ياربي والله مالي خلك مشاكل ويسمعني كلام .
تالي أنجبرت أروح العرس لان جديتي وعمتي يروحن وجواهر من الحنه راحت عفيه خلك خلگها وعادي عدها فراق نائل اني من اذكره نار تشب بگلبي مو عاد هي أمه لعد وهذاك العياط والبجي وينه عفيه بشر بسرعه تتخطين اريد ربع التخطي العندج عندي .
" رغم مالي واهس ويني وين الفرح وأخواني واحد بالسجن واحد سافر وأختي هم سافرت بس شسوي حالي من حالهن ، كشخت ولبست عبايتي وشالي وطلعنا نتمشى لان بيتهم بالفرع الثاني بعد مسافه قليله وعبرنا من باب بيتهم وشفت سيارته موجوده يعني بالبيت باوعت الشباك غرفته البرده مسدوده .
وصلنا وأستقبلتنا عمتي أسمهان وتبوس بيه وتلهي وترحب بينا أستغربت منها هي مو هلكد تودني سبحان المغير القلوب بس هي اجتها فتره أبتعدت عن جواهر وعماتي يجوز هالبعد خلاها تعرف أوادمها .
تغدينا بالبيت وشفت هدير وغدير وكعدنا نسولف وجنات هم اجتي وصارت كعده حلوه بس هالكعده ناقصه لقاء اخذتها منا الغربه .
جنات ـ هدير شوكت تتزوجين .
هدير ـ الشهر الجاي ان شاء الله وانتن أول المعزومات
ليال ـ أن شاء الله وضلينا كاعدين وسولفنا اني وجنات وسالتني على جواهر وحجيتلها
جنات ـ لاتبقين هيج حركي ساكن من يجي حاولي تلمحين اله تردين قربه وهو من يشوف منج تصرف هو يجيج يبارد وخلص كافي ما تعبتني من الخدامه صارلج سنتين تخدمين وتكتل وتهين بيج .
ليال ـ الله كريم وبعدها كمنا تحضرنا ورحنا اخذنا العروس للقاعه الامانه جانت حلوه واحلى من ياقوت كالوا غريبه ويحجن بينهن على أساس مأخذها على حب .
العرسان راحوا الفندق وأحنه رجعنا البيت عمي رشيد وأستلمنا الشغل وساعدنا عمتي اسمهان الكل شاركن ونظفنا البيت وتشكرن من عدنا ورجعنا تعبانين وجنات ويانا بس طولت ما ردات جواهر تسوي مشكله كبل خابرت حيدر أجه اخذها ..
اجيت فراشي تمددت تعبانه وصلتني مراسله من رقم غريب فتحتها
ياقوت ـ شگد شفت حقاره ونذاله وخيسه مثلج مـا شفت رحتي حضرتي عرسه عناد بيه لو عناد بإهلي لان فواز طلگج بنفس اليوم .
ليال ـ لا عناد بيج ولا بيت عمي ورحت حالي من حال الكل والولد طلگج من زمان أنتِ مو على ذمته علمود أعاندج ما الج حق تعتبين وتزعلين أصلاً زايده منج .
ـ بس بيوم من الايام جان زوجي واحبه يا حقيره بس من يومج ما تحبين اليه الخير ما تشوفين بقيتي بالدار محد يأخذج من ورة سمعتج السكط والبنات كلهن انخطبهن حتى أختي فيروز هالأسبوع يجونها بيت خالي يخطبونها وأنتِ ضلي خدامه لجواهر وها عبالج يدزون عليج بالأعراس محبتاً لا حبيبتي علمود تخدمين
وصلنا شغلج وخدامتج بيت عمي وشلون عمتي أسمهان تتشكر منج بس يله خدامه وأنتِ هذا مستواج .
ـ ما تحملت حقارتها گبل حظرتها بعدها محملتني الذنب بخراب زواجها من زياد حتى لو جان يحبني أني ما الي ذنب ولا اني حبيته لو انطيته أمل مجرد خطبني وما صارت القسمه بس هذا عقلها ومستوى تفكيرها .
دخلت على حسابه شفته نشط الان مشتاقتله وگلبي يريده نزلت دمعتي يمكن صدك تالي اضل بالدار لا شهل الحجي شكلي تاثرت بكلام ياقوت تالي عفت الموبايل وتمددت بوسط أفكاري وحنيني للماضي والبيت فرغ عليه وترك فراغ بروحي .
مر كم يوم وتمنيته يجي علينا بس ما أجه وجان كلما من يجي من الدوام يسلم على جدي وجديتي بس ما اجه وعيني عالباب منتظره جيته وأسمع صوت بنته بالحوش تلعب وتضحك معقوله هو جاي يلعبها بس ليش ما يجي علينا معقوله زعلان لان رحنا العرس زياد بس لا شعليه هو طلگ اخته من زمان على شنو يزعل لعد ليش ما يجي شبي
شگلي أني مو بس حنيت اني وكعت على وجهي وفتحت على نفسي باب والحنين البگلبي يريده .
العصر جنت كاعده أخيط ويه عمتي وإجه هو وبنته شايلها دخل سلم على جديتي وكعد وبنته تلعب بحضنه شدني أباوع عليه وعلى تفاصيله
ليث ـ إستكان جاي اذا ماكو زحمه
ليال ـ يمه يمه گلبي يرفرف ما طلب جاي جن طلب روحي سويتله وديتله الجاي وإيديه ترجف باوعلي وحجه
ليث ـ شبيج يابه هل الرجيف عليمن
ليال ـ بگلبي كلت حقك ما تعرف گلبي ناصب جادر عرس
أخذه مني ويباوع لايديه لابسه خاتم أنتبه عليه
ليث ـ هاي شوكت زوجوج وأني ما أدري
ليال ـ أبتسمت لا هيج لابسته
ليث ـ مستعجله عالزواج بنت هيفاء .
ليال ـ بگلبي وين الله يهديك وتباوع على حالي وترحم بي وتاخذني وتخلصني من جواهر كمل جايه وكام من غبائي بعد يمشي واني أخذت الجاي اشتم بي ريحة الدخان كبر شجنت أحس وهو باوع عليه ونظرلي نظره خلتني أكره روحي شافني شگد عيب ..
مشيت المطبخ وغسلت وجهي من السنك وصفنت وضربت گصتي بقوه تندمت على كل نظره نظرتها اله لأن ما يستاهل مني حتى النظره حرامات بي ضيعني من الأول صعب نرجع ثاني أني الغبيه ما كدرت أنساه
واجتي عمتي توزع أبتسامات
نجاح ـ شبيج وجهج أنكلب هسه جنتي شحلاتج وجهج ورد وتفح حتى أمي لاحظت عليج وكالت ليال رجعت تعشگ .
ليال ـ بجيت عمه تصرفت بغباء حجيت الها تصرفي ما ادري احس هالتصرفات مو اليه وبعد كل اللي صار رجعت أحن اله ما اعرف أفكاري مخربطه وضاله حايره بين اللي صار الماضي وبين واقعي الحالي ، أنتِ شتكولين هسه شيكول عليه خوما يأخذ عني نظره موحلوه استخفيت مو اي استخفيت .
نجاح ـ لا حبيبتي بالعكس ياريت كلها مثلج ومثل كلبج النظيف اليحب بعفه وستر وحياء ويحسب حساب لكل تصرف وحركه منه علمود المقابل ما يفكر غير تفكير
ـ بس عمه أخاف عباله رجعت ذبيت نفسي عليه
ـ لا تخافين لا ما عباله والگلب غصب عنج يحن مو بأيدج حتى تصرفاتج اجتي بلحظه شوك وطغت وتمردت عليج ، لاتفكرين .
ـ حضنتني ويريحت گلبي ورجعت غسلت الاستكانات
وشلت موبايلي لكيت منه رساله .
ليث ـ مشتاقلج مثل ما أنتِ مشتاقتلي بس أني اكثر
ليال ـ شهگت بفرحه دخلت لصدري الحزين أباوع وأقرا ومبتسمه بحب وابجي يالله من شوگت ما سامعتها وحرمني منها ، شعور حلو ومخربط وتوتر فضيع ورجفه بكل جسمي مو بس بجسمي الرجفه بنص گلبي من بعد سنين رجعلي لو القدر هو كاتبلنا نتعذب وبعدين ننجمع مره ثانيه بإقدار مختلفه عن الماضي .
ليث ـ وينج
ليال ـ مسحت دموعي وأنخبصت بكلمة وينج يبوه رجعت ليال لسوالفها جنت عاقله هسه كمت دربي ما اندله من وراه .
ليث ـ راح أتصل .
ـ جاوبته وين تتصل
ـ وين أهنا غير
ـ لا اقصد مو هسه
ـ شوگت لعد ، ضيعنا هواي أيام ما أريد تأخير بعد
ـ طلعت وشفت غرفة جواهر همزين ماكو وعمتي رجعت يم جديتي تخيط ، دخلت الغرفه ورجع دزلي
ـ ها وينج راح أتصل
ـ أتصل وجاوبته وفد مستحيه گوه حجيت ها ليث
ـ ها
ـ هو أحسه مركز بنبرة صوتي وأثنينا في صمت روحي
ـ ليال
ـ ها
ـ بعدني أحبج
ـ غمضت عيوني وعشت شعورها المنطفي بداخلي جاوبته أي اعرفك بعدك تحبني شُـــنوْ التغيير .
ـ وأني هم أعرفج بعدج تحبيني .
ـ أثنينا نعرف بنفسنا رجع حجه بس صوته متوتر .
ـ أني راح اجي
ـ وين تجي
ـ أجي و
ـ أي شُـــنوْ هو
ـ ليالي اليوم بالليل راح أجي أخطبج توافقين مو .
ـ أي أوافق
ـ يالله شگد جنت متمني أسمعها منج .
ـ سمعتها لما شروطك .
ـ أي أدري ، نظراتج وأنتِ تباوعلي گبالي راسمهن بعقلي ، الشوك فاضحج لدرجه ما تحملت گبل دزيتلج
جنت منتظر منج .
ـ جنت محتاجه وقت
ـ والوقت كله الج المهم رجعتيلي .
ـ يله لازم اروح أخاف جواهر تجي .
ـ ما ضل شيء وأجيبج يمي وأخلصج من جواهر هانت
ـ أبتسمت يله باي .
ـ باي حبيبي .
ـ گبل قطعت الخط خجلانه يمه گلبي يريد يوگف خرب استقر بمكانك وباوعت بالمرايا مبتسمه وجهي ردتله الحياة ورجعت ليال لـ ليث .
رجع دزلي رساله .
ليث ـ بالليل أجي اخطبج واعقد عليج اسجلج بإسمي ما يمر الليل أذا ما أنت على ذمة ليث وباجر عندي دوام اريد اروح وأني مرتاح أريد أروح وأنتِ الي ومالتي.
ليال ـ تمام اللي تشوفه مناسب سوي هو اني الك ومــا صرت لغيرك .
ـ گلتها الج قبل لو أني أخذج لو الله يأخذج
ـ أناني مو بإيدك
ـ أنانيتي بحبج بس بغير شيء لا ومو بأيدي غصب عني أنتِ خاصه بيه وكلها كم ساعه وتصيرين حلالي
ـ خجلت گلبي يدك سريع رجعت جاوبته أنت بلغتهم
ـ أي شلون لعد أول الناس أمي وطشت جگليت والهلاهل شالت البيت وتمشي وتبوس بيه .
ـ فدوه أروحلها
ـ المن تروحين فدوه
ـ لعمتي
ـ ما تروحين فدوه لأحد حتى اليه ما تگولين فدوه
ـ ليش
ـ بكيفي .
ـ تمام من اولها ليث .
ـ خليني احبج براحتي ليال قسم بالله طاگ گلبي من حبج .
ـ ها طاك گلبك مني
ـ لا مو منج من الحب البگلبي ألج يبعد گلبي والبي .
ـ شكراً شكراً
ـ أي خلف الله عليج دتعالي بالحوش أشوفج
ـ وين تشوفني هسه جنت يمنا وشفتني
ـ لا هسه طعمها يختلف تعالي أنتظرج
ـ وين أنت
ـ يم الشباك .
ـ وين رجعتني ليث
ـ خلص سدي الموضوع هسه
ـ ليش أسده
ـ أحسن ليال أحسن
ـ لان تعرف بنفسك مذنب
ـ أي أعرف وهواي مذنب أني فرطت بيج وخسرتج وما أخسرج بعد لهذا عوفي الماضي على صفحه فدوه أروحلج .
ـ تمام راح أطلع وأذا جديتي حست بيه وگالتلي وين شگول الها .
ـ هسه طلعي بلكي تغلس ولبسي شالج زين
ـ أي لابسته وطلعت وجديتي باوعتلي
الحجيه حليمه ـ وين رايحه
ليال ـ ما عرفت شجاوبها عاد عمتي نقذتني وكالت
نجاح ـ تشوف الماي أجه وشغلي الماطور أذا جاي .
ليال ـ أي وطلعت متوتره وأعدل بشالي وباوعتله وشفته واكف يدخن وشافني ضحك وغمزلي وگال
ليث ـ راح انزل ابقي لاتروحين جايج .
ليال ـ گلبي يريد يطلع من صدري أنخبصت وأجه لان سمعته يكح وصارت صوت حركه يفتح الباب البينا
ليث ـ تعالي فتحي مسدود من يمكم .
ـ باوعت وأجيت فتحته وصار وجهه قريب مني وأبتعد وكح واني اعدل بشالي أباوع وابتستم وارجع انزل رأسي وارجع اباوع الكاه صافن عليه .
ـ تبقين تباوعيلي هيج منا لبعد سنه ما أشبع منج .
ـ نفخ الدخان وذب الجگاره ورجع طلع الباكيت ورث جكاره ثانيه ودخنها ونفخ دخانها واني صافنه عليه وعلى حركاته اخذ گلبي ارتجيت على الحايط أباوعله وهو صافن بيه وينفخ دخان بدون اي كلام .
ـ أريد الدنيا كلها توكف بهل الثانيه محد يجيني ويخرب عليه أجمل أوقات عمري ويه شريان گلبي .
ـ هسه يجينا أبويه
ـ عادي أكوله شحدك تحجي بالليل تسجل بإسمي
ـ ابتسمت وعدلت شعري وأجه هو
ـ تقربي عليه أحجبج وأضم شعرج الهوا يتعبه .
ـ تقرب عليه ومد أيديه وضم شعري واني انفاسي عاليه وخوف مو طبيعي وعدل شالي وحجبني ما خله ولا شعرايه طالعه .
ـ هسه حجاب مضبوط ، أجيبلج حجاب اميره احسن من الشال شتگولين .
ـ لا ما يحتاج ولان شعري ناعم ما يثبت الشال عليه والحجاب الاميره ما يلوكلي
ـ شنو الما يلوكلج الحجاب هذا أمه داعيه عليه .
ـ ضحكت
ـ ليش حتى من تضحكين تخفين ضحكتج .
ـ هي عاده بيه أخلي ايدي من أضحك .
ـ وأحلى عاده
الحجيه حليمه ـ ليال وين نمتي .
ليث ـ أستلم العطلات التعبانه قبل لا ليث ما موجود ليال محد بحالها هسه صارت عزيزه روحي عمي بس خل أعقد عليج اجيبج للبيت والكواد يفتح حلگه وياي اشگه بالنص .
ليال ـ يله اروح باي .
ليث ـ ما شبعت منج شلون .
ليال ـ مشيت وهو يباوعلي ودخلت وجديتي تباوعلي بشك وعمتي أبتسمت وغمزتلي .
الحجيه حليمه ـ وين جنتي شو طولتي شصار هالماي هذا واجه لو لا شغلتي الماطور .
ليال ـ بگلبي يا ماطور جده وين تحجين هو غير لو شفته رحت شفت حفيدج حتى ما شبعت منه ، ها لا ما اجه
الحجيه حليمه ـ أي أكعدي ساعدي عمتج وتعلمي منها الخياط احسن ما دايخه .
ليال ـ يمه هاي شمدريها اني دايخه كعدت وعمتي مبتسمه وباستني قوي وجديتي باوعتلنا بلعت ريگ ورجعت أساعدها وأفكر بي ومبتسمه لما جديتي ارجعله والله .
دك الموبايل أبويه وجديتي حجت وياه وتهز براسها وتباوعلي .
الحجيه حليمه ـ الله يصخم وجه أذا گالي مو جان كاعد يمي ما جاب طاري أشو بالليل شعنده مستعجل ها هيج وأذا عنده دوام من يرجع عود خوما تطير ديله .
ليال ـ باوعتلي بس ما حجت بس مبتسمه .
الحجيه حليمه ـ ليا أدبسززيه تعبر عليه سوالفكم .
نجاح ـ شكو يمه
الحجيه حليمه ـ ماكو شيء خليج بشغلج .
ليال ـ كملنا شغلنا وگمت ساعدت عمتي بالعشه ورجع أبويه وسأل على جواهر جديتي جاوبته طلعت رايحه لاهلها يله همزين اخلص من وجهه النحس لاتخرب فرحتي .
تعشينا وأبويه يباوعلي بنظرات فرح وكملنا واني كمت وهو ضل يحجي وياهم واجتي عمتي جابتلي موبايلي
نجاح ـ هاج موبايلج أصلي وخبصني بس يتصل
ليال ـ عمه اوكفيلي خطيه وگفتلي وجاوبته ها
ليث ـ ها روحي تعشيتي
ـ اي الحمدلله
ـ عافيات ، راح نجي متجهزه لو بعدج
ـ تجون خوما هسه لا عفيه بعدني تونا كملنا جاي ما صابتلهم وراي فستان شيء خوما بثوبي .
ـ تمام الوقت كله الج لاتستعجلين وحالياً شيء بسيط فقط عقد شيخ والبسج حقله ومن ارجع من الدوام أسويلج حفله خطوبه .
ـ لا ما يحتاج نبقى على شيء البسيط
ـ لا يحتاج هذا حقج ، يله كملي شغلج من تخلصين بلغيني
ـ تمام راح وصبيتلهم جاي وما اتحضر الا أبويه يبلغني عيب شيگول عليه قدمتلهم وابتسملي وكال
سعيد ـ ليال بابا روحي تحضري وخلي عمتج نجاح تساعدج عمامج راح يجون يخطبونج مني واستعجلي لان راح يجون .
ليال ـ ما جاوبته مشيت مستحيه ومتوتره ورحت سبحت عالسريع وخليت مكياج بس تربيب ورتبت شعري لبست الفستان اخذته من اجو علينا اهل حكيم أذا عرف الا يتخبل گملته ودزيتله أني كملت
ـ تمام بس انتظر عمي رشيد والولد
ـ كعدت أنتظر وعمتي يمي فرحانه بيه فدوه اروحلج عمه
ًـ الف الحمدلله من راح تنجمعون الله يسعدكم .
ـ الحمدلله وشويه ودخلت علينا جنات وعمتي سلوى تهلهل وتبوس بيه وجنات اطش جگليت هي وعمتي سلوى وياقوت وراها بس ساكته وفيروز فرحانه الا ياقوت .
جنات ـ ولج أني اخر من يعلم هسه حيدر كالي مثل المخبله اجيتج لا حفافه لا شيء عالسريع ثولني يالله ويالله شنو هالخطبه السريعه يركضون وراكم .
سلوى ـ ميخالف عسى ما الفجر بس المهم صارت اله يمه صدقه لهل الوجه واخيراً راح تصيرين مريته وجنتي واحطج بيتي عندي حظ وبخت مشكور محمود ربي على عطاياك طلبتها منك وما فشلتني الف الحمدلله يمه والله ما مصدگه ولج جنات يمه اكرصيني خاف حلمانه
جنات ـ لا عمه حقيقه والله حقيقه ليلو فدوه لهل الوجه شطالعه اليوم تخبلين وجهج مورد جنج فراوله صدقه لله
ليال ـ ضليت كاعده واجتي عمتي انسام وبناتها وهدير حبيبتي اجتي تركض حضنتني تبوس بيه من كل گلبها
هدير ـ واخيراً وأخيرا ما تتصورين شگد فرحانه الكم طايره طايره خرب لوما ليث مستعجل جان تحضرنا وسوينا الكم حفله حركنا الجو .
غدير ـ سألته گال من ارجع اسوي حفله وشبعن طربگه
أنسام ـ بالخير عليج حبيبتي ليال تستاهلين كل الخير
ليال ـ الله يبارك بيج حبيبتي عمه باستني والبنات وياي ونضحك ونسولف وجنات اتصلت على لقاء كاميرا وتباوعلي وتبجي وبجيت وياها أفتقدتها هي وأمي وعصماء جنت اتمنى يكونون وياي بهيج يوم الله يرحمج يمه جنتي تتمنين أصير لـ ليث وتشوفين فرحتي وتفرحين وياي بس ما صارت رحتي من وگت وما شاركتيني فرحتي ، أرتاحي يمه صرت اله .
لقاء ـ لاتبجين هذا يوم الفرح ولا يهمج من تتزوجون اجي واذب لحم نعلگها مو بنات هدير لك شهل الجمال
غدير مشتاقتلج فيروز ياقوت شلونجن
هدير ـ مو بحمالك حبيبي عليج الله تعالي علمود تحضرين عرسي
لقاء ـ اجي ان شاء الله اجي بس هالاسبوع عندي شغل اكمله واحجز طياره واجي للعراق اني وخالي يحيى .
ليال ـ تحجي ويانا ودزوا عليه وكمت ويه عمتي سلوى والرجفه بگلبي لازمتني بارده حتى سنوني واحد يطك بالثاني .
أنسام ـ سوده عليه ترجف هي شگد تستحي تعالي حبيبتي .
ليال ـ وصلت ماكو غريب بس حيدر ويضحك هو ليث
لابسني عباية أبويه وكعدني بصف أبويه لزم أيدي وحسيت بالأمان وبحنيته وخوفه بهل اللحظات الحلوه وبين الكاعدين أفتقدت أخواني شكد جانوا يتنمون يحضرون العقد مالتي كلما تصير تخرب وينقهرون
عليه سوده عليه باسل ونائل نزلت دمعتي عليهم
واجه الشيخ وبدأ الكلام وأني لازمتني بارده يسألني ومتوتره وفرح الدنيا كله تجمع بروحي واخيراً راح أصير الك ونطقت الموافقه وهو كذلك بس هو نطقها سريع وكلهم ضحكوا وضحكة حيدر بارزه وتم العقد وصرت بإسمه وحلاله وصرت مريت ليث .
طلعت وهما يباركون اله وسمعت سجاد كاله
سجاد ـ لك وأخيراً صارت الك ينراد الك هلوهله بس ما أعرف أهلهل .
ليال ـ وكلهن باركن اليه وفرحانات وياي وذبيت العبايه وهدير وخرت الشال خلت شعري مفتوح واخذنا صور
ومر الوقت وأجه هو وعمتي تبارك وتبوس بي وهو عايف الكل ويباوعلي باله مو يم أحد بس يمي .
تقدم جديتي باركتلنا وهدير گالت
هدير ـ ليث اوكف بصفها اخذلكم كم صوره وها لاتخاف اارسلهن ليال واحذفهن قبل لاتحجي .
ليث ـ أي زين
ليال ـ وگف بصفي وأخذتلنا كم صوره وأصابعه تتلمس اصابعي متوتر اكثر مني قدمت أيدي وكبل أحتضنها بأيدي وشد عليها شعور ما ينوصف من بعد معاناة تأخذين التحبينه يحجي واني اباوعله ورجع باوعلي واحد صفن بوجه الثاني .
ليث ـ مبروك صرتي اليه مبروك علينا أثنينا .
ليال ـ الله يبارك بعمرك ويحفظك يارب .
ليث ـ الا أجييلج حجاب أميره .
ليال ـ ضحكت ميخالف جيبلي ولزم ايدي قوي وكعدنا وشويه كعد وراح وضلينا كاعدين ورجع دزلي .
ليث ـ ترى ارجع بس كاعدين وعيب من حيدر رجعت بعدني گلشي ما شفت منج ولا شبعت شوف أريد احضنج واحس بشعور ملكتج وصرتي اليه .
ليال ـ تمام وتأخر الوقت وگاموا ودعت جنات ضلي اليوم .
جنات ـ لا والله اليوم ما أكدر لان باجر يلتحق واريد ارجع احضرله ملابسه وشغلاته وعاجنه كليجه اسويها ياخذها وياه غير مره تدللي من عيوني .
ليال ـ ماشي على راحتج وراحت عمتي سلوى طلعت وياها وعمتي أنسام هي والبنات هم راحن ضليت بس أني وعمتي نجاح ضلت تلم الهوسه وتوني اريد أمشي
ليث ـ وين وين
ليال ـ أغير فستاني .
ليث ـ غير أشوفه ما شفته زين .
ليال ـ تقرب عليه صار مقابيلي وحضني من وجهي وباسني من كصتي بعمق وگبل حضني وحضنته وبجيت وأنفجرت بحضنه ليش هيج سويت بيه ليش .
ـ اسف يروحي اسف حقج عليه أسف
ـ حاضني بقوه ويشم بشعري وأني متمسكه بي
مسح دموعي ولزم وجهي بإيده وخليت وجهي بكف أيده وغضمت ورجعت اباوعله لگيته هو هم مدمعه عيونه وتقربت مسحت دموعه وباس أيدي .
ـ هل اللحظات الحلوه وتخرب وتجينا جديتي لو عمي
ـ كبل ركضه للغرفه
ـ ادري بيج وأضل أني مگابلهم .
ـ أي شلون خوما كدامهم لعد وعيب احجي ومبتسمه وهو يباوعلي ويتلفت شبيك وتقرب دنك باسني من خدي بهدوء وأني كلبي ينبض بكل سرعته وخوف ومستحى وخجل ليث هو حس بيه وأبتعد واني منزله رأسي ما كدرت ابقى أستحيت منه ومشيت الغرفه واسمع صوته يحجي هو وأبويه همزين مشيت ولا شافني ابويه يمه گلبي يريد يشگ صدري مسحت وجهي وتلمست خدي مبتسمه .
ولگيت عصماء متصله ورجعت أتصلت عليها وجاوبتني بعد روحي الغاليه شلونج أخبارج اعذريني متصله عليه بس موبايلي صامت .
عصماء ـ فدوه الكلبج مو مهم المهم عندي سعادتج وفرحتج ولج ليلو حتى نبرة صوتج متغيره والفرح مأخذ مكانه تستاهلين يروحي الف مبروك الله عوضج على كد نياتج وطيبه قلبج كلش فرحتلكم .
ـ الله يبارك بعمرج هالفرحه جانت ناقصه وجودج أنتِ وباسل والله وتمنيت تكونون أول الحاضرين بس تعرفين ليث مستعجل خبصني ألا اسجلج بإسمي قبل لا اروح الدوام تصوري بس حجينا اول أتصال كبل كالي راح أجي أخطبج واعقد عليج شايفه هيج .
ـ عاد ليث معروف بمواقفه ونعم منه الله يحفظه الج هسه جنات خابرتني وگالتلي والله وگلت باجر اجي عمي سعيد يجي عليه واجي لبغداد علمود باسل وامر عليج وجنات حلفت عليه الا أتغدى يمها .
ـ ما اعرف والله محد گالي عليج الله عصماء رجعي للبيت والله أبويه باله يمج أنتِ والبنات بس يفكر بيكم حتى كالي أقنعيها حاولي وياها خل ترجع ، جيبي البنات ومنا روحي أنتِ وأبويه عالمحامي وكملوا شغلكم
ـ لا حبيبتي ليال خليني أهنا يم أهلي مرتاحه ما أريد اجي وترجع المشاكل وأني كلبي خلصان من القهر ومن يطلع باسل شيقرر أني وياه إما هسه كلش أعتذر منكم
وگولي لعمي فدوه لا يلح عليه خلوني على راحتي .
ـ تمام هذا هو براحتج ما نضغط عليج وباجر انتظرج هم تجيبين البنات وياج .
ـ لا والله أعوفهن يم أهلي ما اكدر اجي لوحدي ولو عمي مـا يقبل بس المحامي اشتغل بالقضيه بوجودي
وهم أريد اشوف باسل وعبالي اخذله ملابس بس عمي گال ما يحتاج يمكن هو وليث ماخذين اله كلشي .
ـ اي يروحون اله بس ما يحجولي گلشي.
ـ يله عيني مع السلامه أذا أجيت باجر نتشاوف .
ـ الله وياج ان شاء الله ، راحت ولكيته دازلي رسائل
ليث ـ وينج أختفيتي تعالي عيني ما شفنا منج بس شفتي أبوج إنهزمتي .
ليال ـ لا جنت احجي ويه عصماء گالت باجر تجي
ـ أي أدري ، يله تعالي وسويلنا جاي
ـ وگت جاي هسه روح بيتكم تأخر الوقت مو عندك دوام
ـ أعتبرها طرده
ـ لا بس علمودك موزين السهر عليك
ـ اليوم أبقى وياج أصلاً ما أعوف الموبايل بگلبي گومة سوالف الج
ـ خوما تخلصهن بيوم واحد حرامات ورانا عمر طويل يوميه شويه ليث
ـ ههههه فدوه لسوالفج لاتخافين زوجج مليان سوالف
ـ أبويه بعده كاعد
ـ اي ليش تستحين
ـ اي والله مو تضل تباوعلي وأنثول ترى اصمطك بالجاي
ـ هههه ماشي بس طلعي من الغرفه خل اشوف طولج
ـ اجييت ، عفت الموبايل ورفعت شعري وخليت شالي ضبطته زين ولبست دشداشه لون اسود وبصدرها قلب أحمر وطلعت سويتلهم جاي وقدمتلهم هو شافني ضحك وگام يكح غص رجلي هذا شبي قدمت لابويه وجديتي وجدي وصلته
ـ گلبج ليش مطلعته درينا الحب مالتج صار الج ضمي كلبج ضمي فضحيتنا .
ـ اشر على الدشداشه خرب والله على نيتي شگد فشله قدمتلهم وكعدت اعدل بشالي وضميت القلب بالشال وكعدت وهو مقابيلي ويسولف هو وأبويه على باجر ويرحون على باسل واني فرحانه عود خطيبي وكذا الله شعور حلو يا ناس .
وخلص الجاي وگام وابويه يگلب بالموبايل وهو اشرلي وهمست ما اكوم روح عاد جديتي كالت
الحجيه حليمه ـ گومي ويه رجلج .
ليال ـ الله رجلي گمت وراه وصلنا الباب واندارلي .
ليث ـ حلوه عليج الداشدشه منين مأخذتها بيها الوان بعد .
ليال ـ مو عيبت على القلب البيها ليش تسأل .
ـ منو اني لا والله بس اني شفت الگلب أجتني الضحكه من أولها تسويلي أغراءات .
ـ خجلت ليث .
ـ ها يا عيون ليث
ـ وأتصل موبايله
ـ ها ياقوت أي هسه راح أجي عشيتها يله أجييت
يله روحي أني راح اروح أنوم نغم وأخابرج .
ـ تمام تقرب باسني من خدي .
ـ تصبحين على خير يا روحي .
ـ وأنت بالف خير ، راح الله وياه ورجعت أبويه يحجي ويه المحامي ما ادري اجاني احساس باسل يطلع عن قريب لان هالفتره ابويه هواي مخلي كل عقله بالقضيه ويه عصماء يارب يطلع بالسلامه ونخلص ونرتاح من هالهم
وأخيراً أرتاح گلبي التعبان وأنجمعت مع الشخص الحبيته رغم كل الظروف والمشاكل اللي صارت ويانا وجمعنا القدر مره ثانيه ومنتظرين باسل يطلع من السجن وتكمل فرحتنا بس هالفرحه ناقصه نائل مجرد أذكر أسمه غصه بروحي عليه أبتعد عن الكل حتى حساباته غالقهن بس يخابر ابويه ويحجي وياه يسأل على باسل وأتمنى يرجع يفتح حساباته ويجاوبنه ونتواصل وياه الله يريح بالك ويسعدك وين ما تكون يا خويه .
___________________________
عصماء ـ گلشي عشته ومريت بي وتعذبت بغيابه وأنكسرت وأنذليت أني وبناتي كله يهون بس المهم يطلع وأكحل عيوني بشوفته بس يطلع ويلمني أني وبناته والله الحياة ما تنعاش من دونه عايشه من دون روح ظهري مكسور بغيابه ...
بالسياره أني وبناتي وحده بطني وأثنين بحضني ومصيرنا مجهول وما أعرف شنو منتظرني وصلت بيت أهلي والباب مضروب سنجيل وقفل! والمحل كذلك وصلت بيت جدي وطلعلي عمي واني شفته بجيت عمي حازم .
حازم ـ دخلي عمي دخلي
عصماء ـ دخلت وحجيتلهم گلشي وضلوا ساكتين وجدي كال
الحجي ـ والله يا جدي أبوج وامج من يوم ما ماتت أختج هما شالوا واذا تردين تروحين الهم عمج ياخذج الهم واذت تبقين يمنا هلا بيج أنتِ تبقين بنيتنا وما الج ذنب واللي صار صار والله يعلم وأختج ماتت بعد .
عصماء ـ وگمت اني وبناتي وعمي وصلنا وتمشي بينا السياره ليش عمي أهلي وين شايليين .
حازم ـ بالكاطون .
عصماء ـ هزيت رأسي ووصلنا ونزلت اني وبناتي ودك الباب وطلع أبويه تعبان هواي عمي حجه وياه وسلم وراح واني بقيت واكفه وبناتي يباعن عليه يابه ما عندي أحد والدنيا ضاگت عليه وعلى بناتي بس الله وأنتوا تستقبلني عندك كام يبجي وركضت عليه حضني ويبجي وكع بالكاع وأني حاضنته ابجي وياه يابه أجيتك مهضومه يابه
يابه ظهري أنكسر أختي ورجلي يابه ، مصيبيتن على راسي وحملت الما ينحمل وجرعت المر وتلوعت يابه كون أني الميته ولا بيداء ماتت وما شبعت بجيات عليها ماتت بين ايديه .
غنيه ـ ولج يمه عصماء بنيتي يمه معصومه يمه شجابج عمت عيني عليج يمه .
عصماء ـ دخلوني البيت وكوه أمشي وحاضنه أمي وابجي يمــه شحجيلج يمه بيداء ماتت كدام عيوني
يمه دزيتها الج بتابوت يمه شحجيلج يمه البگلبي
والجره على رأسي مــا ينحجي يمه .
غنيه ـ گومي يمه گومي وبعدين تحجيلي وشتحجيلي خيتج وماتت ودفنتها شيفيد الحجي بعد يمه شيفيد ماتت خيتج ماتت بيداء ، كومي يمه تعالن جده تعالن
عصماء ـ أخذتهن بحضنها تبوس بيهن وباوعتلي
غنيه ـ حامل يمه
ـ أي يمه
ـ الله كريم يمه .
ـ رجعت حضنتها يمه طاگ گلبي لو تدرين شكثر أحتاجيتج يمه وتمنيت اجي بس محد خلاني وصلني منكم خبر كايلين لاتجي ولاتوصل .
غنيه ـ لا والله يا يمه لا حاجيين ولا گايلين ومنو اليحجي يمه شو أبوج من ماتت أختج هو أنعكد لسانه ما يحجي وبس أني وشحجي ليش منو ضلي غيرج
شو اخوج دفنته ولحكته بيداء ودفنتها بصف أخوج زرفت جبدي وطرت گلبي يمه من جابوها ومشرحينها ومخيطينها يمه ريتني اني الميته ولا شايفتها بتابوت يمه هذيج العيون الحلوات مغمضتهن وهذيج الرموش وهذاك المبسم والوجه الحلو غسلتها بإيده ودفنتها راحت خيتج بيداء يمه راحت وگله مني خابرتني تبجي وتتوسل بيه تريد تجي يمنا ترتاح أني ما سمعت منها وما أنطيتها وجه عبالي ترجع لسوالفها أني ما عرفت أحتويها وضليت أعايرها لما طگ گلبها وماتت وخلت جمره بگلبي أخ يمه بيداء .
ـ تحجي وتبجي حضنتها وبجينا سوه وفرغت روحي وابويه بس يبجي ، يمه يعني أنتوا مصدكين باسل بريء .
غنيه ـ يمه مـا شافت عيوننه بس دزوا علينا حققوا ويانا وقبل لايحققون ويانا ليث حجه ويانا وگال گولوا أنتحار لان باسل ماله ذنب بس أبوج ما يحجي بس حققوا ويانا بعد ما ندري ضلت يم الله ويمهم
ـ والله هو بريء من دمها وما اله ذنب
ـ أحجيلي شصار بهذاك اليوم الاسود ، جواهر حجتلي بس ما صدگت بيها گلت الا أسمع منج بس ما شفتج ولا كدرت اجيج وطشت سالفة أختج منتحره وابوج شال من القريه وأجينا بهل البيت اجرنا على كدنا .
ـ كعدت حجيت الها وأمي سگتت وأبويه نزل رأسه دموعه على خده واشر بحركات يمه شيگول .
ـ يگول باسل بريء
ـ وأنتِ شتكولين .
ـ يمه شگول أختج وماتت بعد وباسل شعنده وياها يقتلها وهو نمله ما ياذي الله يرحمها ويغفرلها .
ـ أمين ، گمت غسلت وجهي وأجيت بست أبويه من رأسه وباسني لاتنقهر لخاطري هز رأسه واخذ بناتي يبوس بيهن وگمت رتبت ملابسنا وخلص هذا اليوم بقهر وحزن .
وثاني يوم أمي أخذتني على بيداء المقبرة وصلتها ورجليه ماتن وشفت قبرها وأسمها وأني الجنت ما مصدگه بيها ميته وهسه يم گبرها وكعت يمها وحضنتها وصرخت وعاتبت ولج خيتي كسرتي ظهري ليش هيج سويتي برويحتج بيداء ليش ولج خيتي كطعتي بروحج مو أحنه أخوات شلون تعوفين خيتج
خلتيني وحيده وما عندي خيه ولج خيتي وين يروح مهيب من خطيتج هم ينام مرتاح عساه لاشاف
النوم ، لعد أنتِ نايمه وهو عايش حياته ظلمتي نفسج وظلمتينا وياج خيتي بس مسامحينج خيتي
ما عندي شيء وياج لا عبالج مقهوره منج لا والله
بس مقهوره وحاقده على نفسي لان ما ساعدتج ولحد هسه صوتج وأنتِ تتوسلين بيه أساعدج بإذاني صوتج ما يفارگني بيداء جويتي گلبي .
غنيه ـ گافي يمه گافي لاتكطعين گلبي ترى گلبي خلصان من القهر ولج عصماء يمه ما الي غيرج عينيني يمه .
عصماء ـ أخذتني أمي تسگت بيه وقرينا الها الفاتحه مع السلامه كل فترة اجيج سامحيني خيتي ومشينا وصلت البيت تعبانه گبل نمت وضليت أيام دايخه بحياتي ، وأخذت أمي وبعت الذهب وانطيت اتعاب المحامي وضليت أشتغل على القضيه وأروح واجي البغداد وأبويه وياي وأجاني ليث للمكتب المحامي
وما راضي .
ليث ـ بس أني ما عايفه ولا أعوفه والقضيه تحتاج وقت عصماء هي مو بمعضله انطيني مجال خليني اشوف شغلي عدل .
عصماء ـ أني ما مانعه أحد يطلعه وكثر الله خيرك بس أني اريد اطلعه ما اريده يطول أكثر .
ـ القضيه قضيه قتل والتهمه ثاتبه عليه وثبتت أكثر من نكر أعترافج وضل مصمم وفضل السجن مقابل سمعة أختج هذا موكف قضيته الجريمه متلبسه باسل شبيج عصماء الادله كلها عليه وبغرفته ساحة دم ولاتنسين الشهود ضده العالم تحجي الشافته مو بكيفج هذا قانون واني وأنتِ نعرف باسل بريء بس الباقيين شلون نائل وجواهر وعمتي نجلاء وغيرهم
خلينا نشوف شغلنا اني أريد اطلعه برائه اريد ابري باسل من دم بيداء ما اريد اطلعه مثلج .
ـ تريد تطلعه برائه وشوگت سنه سنتين ثلاثه أربعه خمسه واضل أني أنتظره كل هالسنوات هو بالسجن وهو مظلوم وبناته شنو ذنبهم يعيشن من دون أب
بدال ما أنتظر أطلعه بكفاله وفلوس .
ـ هذا هو أبقي على شغلج
ـ أي ابقى وما أعوفه الا اطلعه وكثر الله خيرك وأعذرني بس ما أكدر ابقي اكثر وأخاف عليه لا قضيته تتحول أعدام .
ـ لا ما تتحول الا أذا نائل رجع تدخل ولح بالقضيه بس حالياً منسحب يله أني أروح عندي شغل وأي شيء تحتاجينه خابريني .
ـ أن شاء الله ، طلع ظرف وخلاه بيدي شنو هذا ليث والله ما محتاجه عندي الحمدلله
ـ أخذي أنتِ أمانة الغالي يله فيمالا .
ـ راح وضميت الظرف ودخلت يم المحامي وححينا بهواي أمور تخص القضيه وعن كلام ليث هم .
سراج ـ أي شيء يصير ابلغج على الموبايل ولاتخافين أني أنطيتج وعد أطلعه وأن شاء الله عند وعدي وما اقصر وياكم .
عصماء ـ أن شاء الله أستاذ مع السلامه طلعت من يمه أني وأبويه ورحنا السجن تلثمت بالشال بقيت فقط عيوني وكملت الاجراءت ومشيت والتقيينا بس جان
مو باسل واحد ثاني من كثر ما متغيير حجه بنبرة خشنه
باسل ـ شجابج .
عصماء ـ نزلت دمعتي والغصه بصدري وجاوبته أجيت أشوفك ما رد عليه وضليت مدنگه ما رفعت ࢪأسي وجان يباوع بكل حذر على كل تفاصيل بيه .
ـ كم مره نبهتج ما توصلين هل المكان كم مره
ـ دخل الرعب بداخلي من عصبيته بس كان شوقي أقوى من خوفي جاوبته بهدوء اشتاقيتلك ما صبرت روحي تفركست على شوفتك واختنكت جاوبني
ـ بس هذا هو ما مو لازم محد يموت وره أحد
ـ على راحتك كمت من مكاني استوقفني صوته
ـ مره الثانيه ما أطلعلج عدل أستلميني من المشرحه
ـ رجعت باوعتله لاهيج تحجي وتشلع گلبي من مكانه ليش هيج مأيس خليك باسل الأعرفه القوي والمتفائل .
ـ لاتجيين بعد ولاتوصليني أعتبري نفسج أرمله شگو جايه ولشوگت تضلين تجين رايحه جايه الى متى ، سنه سنتين أربعه خمسه ترى ١٥ سنه خاف ما تدرين .
ـ أدري والله أدري وأقنع نفسي وأكول ٨ سنوات على كلام أهلك بس من لزمت الك محامي عرفت ١٥ سنه
بس حتى لو عشرين سنه ما أخليك والله اطلعك
بس أصبر عليه .
ـ عصماء لاتطلعين خبالي عليج هسه عوفي القضيه بابا زلم ما تگدر تطلعني أنتِ مره وحدج وين تكدرين وأخاف عليج تعرفين شنو أخاف عليج ولاتنسين وراج بناتي وكرشج استغفر الله حامل مو .
ـ بجيت أي حامل وبيه بنيه بس ما عليك ما عليهن شيء وثق بيه
ـ ثاق بيج والله ثاق بيج بس هذا سجن وقضايا ومحاكم شجابج على هيج سوالف عوفيها عيني أنتِ لايصيرلج شيء والله ما ناقص ما كافي عليه عايفكم لاتزيدينها عليه عوفيني طبني مرض وگابلي بناتي وديري بالج على البطنج .
ـ لزمته من أيديه ما أعوفك والله لو أعرف أموت ما أعوفك ولاتشغل بالك ما علينا شيء أحنه بخير كلنا عايشين بس ننتظرك تطلع وأختنگت
ـ من يوم يومج ذبيه بس ديري بالج نفسج وعلى البطنج وگلتي بيج بنيه
ـ أي
ـ الله يگومج بالسلامه من تولدين بالسلامه سميها على أسم امي هيفاء .
ـ أن شاء الله ودعته وطلعت مختنگه ورجعت الديالى لان هو مسجون بغداد وكابلت بناتي وابجي وضليت أشهر
وكل فتره أروحله ويضل يحجي ما قبل وأخر مره رحتله وگال
باسل ـ أذا أجيتي بعد ما أحجي وياج وحتى لو طلعت والله العظيم لساني ما يلتوي على لسانج بس تجين مره ثانيه .
عصماء ـ ليش
ـ بدون ليش لاتجين وخلص أسمعي كلامي عصماء لاتخبليني والمحامي هم لاتوصلينه عوفي خلي ليث هو يتواصل وياه ويمشي بالقضيه سحبي نفسج ولاتعانديني
ـ بس أني مو لوحدي أبويه وياي
ـ حتى لو أبوج وياج ما أقبل ومره وحده أفهميني ولاتعانديني .
ـ هذا هو مثل ما تريد بعد ما أوصلك وأي شيء تحتاجه أدزه بإيد أبويه
ـ ما يحتاج ليث ما مقصر يجيبلي گلشي أنتِ بس كعدي بالبيت شوفي بطنج اذا هسه گمتي تتولدين وين أوديج يا عيني .
ـ تمام ودعته ورجعت وبعد ما وصلته وبطني كبرت ودخلت شهري وما واصله دكتوره وأمي أخذتني وطلعت الطفله تعبانه كلش ونفس اليوم حددت عمليه لان خافت عليها تموت بطني ودخلت ودعت بناتي وأمنت عليهن يم أمي وأبويه وخليت أمي وراي تبجي وشايله غنى وجنى بحضن أبويه وحييدين ما النا أحد عشت أيام صعبه كلش للكافر ما أتمناها يعيشها ..
مرت أشهر وباسل بعده بالسجن وصارله سنتين بالسجن
وعمر بناته ثلاث سنوات ونص وعمر هيفاء سنتين نفس عدد أيام سجن أبوها هي ورى ما دخل السجن اني طلعت حامل بيها بداية حملي .
أهلي ما قصروا وياي رغم تعبانيين بس وگفوا وياي وساندوني يكفي هما مصدگيني وبيوم عمي سعيد خابرني وفرحت بأتصاله وطلب مني أرجع بس رفضت
سعيد ـ ليش بابا
عصماء ـ أحسن عمي خليني بيت أهلي مرتاحه
ـ لعد راح أجي عليكم
ـ الف هلا بيك وأنطيته العنوان بالتفصيل وأجانا جايب اشكال الدنيا مسواك وملابس وكعد هو وأبويه وأبويه بس يأشر ما يحجي عمي حيل أنقهر عليه وگام دفع فلوس الأيجار وانطاني مصرف كامل ودعنا وراح وضل كل أسبوع أقل الأسبوع هو يجينا ما عافنا أبداً رغم صحته تعبانه بس ضل ويانا وهو تكفل القضيه واني وياه نمشي بيها ونتخابر وليث هم تدخل وتعاوننا
والقضيه بدأت تسهل علينا وحصلنا أمل بسيط من
نائل سحب نفسه وتنازل يارب ضلت يمك .
كاعده وأباوع عليهن يلعبن كدامي وبحضن أبويه ويضحك وياهن وهيفاء تشبه خالتي متعلقه بأمي وأمي كذلك وجرت شيلتها وتلعب بشعرها وأمي تضحك وتلعبهن وأني بوسطهم وتذكرته أشتاقيتلك يروحها لعصماء اخ منك ومن كلامك وحلفانك حرمتني من شوفتك صار شگد ما زايرتك شوگت ياربي طالت حيل طالت .
ثاني يوم الظهر أتصل موبايلي المحامي أستاذ سراج جاوبته هلا أستاذ سراج .
سراج ـ أهلا ست عصماء شلونج خيتي
عصماء ـ الحمدلله حسيت عنده كلام خير أستاذ صاير شيء بخصوص باسل ضحك وگال
سراج ـ مبروك ست عصماء زوجج باسل طلع من السجن
شكرا لزيارتكم عالم روايات سكيرهوم
