رواية ناديه الفصل الثالث والعشرون 23 بقلم انين الليل

///////💔💔💔//////////////

سراج 

ناديه باوعتلي وگالت الحنين بصيغة الامر 

...ياالله حنين امشي

حنين باوعت وهي مستغربه من كلام ناديه الي مبين عليها زعلانه بس ليش 

لان انا ما صرت اسأل عليهن مو هي الي غالقه الجهاز حتى بيوم زواجي من عرفت هي ابيت كرم 

اتصلت لكن الرد 

الجهاز مغلق ومن سالت عليها گلولي بالحمام وابد ما دزتلي حتى كلمة مبروك

طيب ليش هذا التصرف اتقربت منها وباوعتلها وانا اشوف 

بعيونها حزن وعتاب وانا اشوف ناديه الي صايره جميله جدا واكفه وتقريبا بطولي گتلها 

::شنو هالحچي ماكو الحمد لله ع السلامه ليش شصاير 

ما خليتها تجاوب گتلها:: ياالله اصعدي بالسياره عيب الطالبات يباعن هسه شيگولون

فتحت الها باب السياره وصعدت وحنين فتحت الباب الورا وصعدت تمينا ساكتين وانا اشوفها شلون دايره وجهها 

عني وما تباوع 

 قبل ما اوصل للبيت فريت السياره وطلعنا ع الشارع القريب كانت اكو اسواق وكفت يمها وانطيت الحنين فلوس 

وكتلها ::انزلي حنون اشتري شنو تردين وجيبي وياج قوطية ببسي الناديه لان الظاهر اكو واحد ثقيل دم متغر 

على معدتها

وهزيت راسي الحنين وهي تسالني //عمو يعني شنو اريد اشتري لان هاي فلوس هواي 

::اي بابا شنو تردين اشتري واحنا منتظريج اهنا 

راحت حنين وناديه بقت دايره وجهها عني انا جريت نفس وگتلها 

::اگدر افهم ليش زعلانه وما تحچين وياي شنو الي صاير

هي سكتت ما جاوبت رديت سالتها 

::ناديه احچي شبيج ما تردين تباعيلي انا بيش ضوجتج 

شفت دمعه وگعت من عينها اتقربت منها ومديت ايدي اريد امسح دمعتها هي بعدت خدها عني 

ومسحت دمعتها بايدها جريت نفس وگتلها 

:: وهسه 

بدون ما تباوعلي اجاني صوت هادئ ومكسور لكن الجمله الي گالتها هزت كياني 

... سراج انت ليش اتزوجت ؟

ما عرفت شرد عليها ناديه تعاتبني حتى بدون ما تلفظ كلمة عمو ظليت ساكت بعدين گتلها ::ناديه اشبيج 

جاوبتني والعبره مكسره بصدرها وهالمره عينها بعيني 

......ما بيه شي بس انت ليش اجيت ليش ما بقيت مسافر ومن رجعت بقيت ابغداد شنوالي ذكرك بينا لا تگول 

اشتاقيت النه ما اصدك لان صارت قديمه

انا باوعت الها مستغرب ::يعني شنو راح احچي ما تصدگيني 

هي ظلت تشهك وبچيتها مو مال ناديه الطفله الي طول عمرها خايفه لا احسها هالمره تختلف 

جريت نفس وگتلها:: تدرين عمج هادي هو الي منعني اجي اشوفكم واتصل والگا مغلق ليش 

... انسى اشحنه 

:: ناديه ما راح تكليلي شبيج 

... ما بيه شي ياريت ترجعنه للبيت

باوعت الها وانا اگلها بنتر ::غيراعرف ليش تبچين وليش ما تردين تشوفيني مو اگلج هادي منعني اشوفكم وصارت

سفرتي مفاجئه واجيت وفهمتج 

هي باوعتلي وكالت وهي تاشر بايدها تستفهم :: وزواجك هم مفاجئه ؟

غمضت وجريت نفس وانا ما لاگي جواب السؤالها ولا لاگي تفسير التصرفها دگيت هورن واجت حنين شايله كتبها 

بايدها سالتها ناديه ...ليش شايله كتبج بايدج

حنين //مو اشتريت هواي وضميتهن بالجنطه لا تشوفهن حيزبونه وبناتها ريا وسكينه 

...كافي حنين اسكتي 

حنين //هاج ندوش ضمي هذني بجنطتج عفيه (باوعتلي ) عمو سراج شبيك ضايج 

::ما بيه شي بابا المهم اشتريتي 

حنين //اي اشتريت بس ما يكفني طول فترة غيابك

ناديه ...... انچبي ياما شايفه اسكتي 

حنين //انا شگلت ناديه 

ناديه بنتر ......بس ولا نفس اوصل واعلمج 

حنين سكتت ما جاوبت طلعت چيس چبس وصارت تاكل وتشرب عصير بعدين قبل لا نوصل 

سالتني حنين //عمو يمته تروح ؟

اباوع على ناديه ما مهتمه جاوبت وعيني عليها :: العصر نروح البيت بيبي جميله نبات والصبح نروح 

حسيت بيها تتسمع للكلام حنين گالت //ليش عمو ابقى خلي انشوفك 

::راح اخذچن وياي البيت عمو كرم 

حنين //عبالي تگول اخذچن المدينة الالعاب 

::تدللين المدينة الالعاب العصر 

حنين// بس لا تحچي گدام افراح وعصابتها

اشوف حنين عبالك بعدهي طفله وهي تاكل بالجبس بشراهه وكانها من زمان ما ماكلته اما ناديه 

فهاي جاي اشوفها انسانه ناضجه وكانما عمرها تلاثين سنه

وصلنه للبيت نزلت حنين وناديه تريد تنزل گلت وانا اتنفس بعمق ::ما تردين تحچين 

هي نزلت وانا اشوفها من مشيتها منكسره ودگن الباب افراح فتحت الباب وهي تاهل وتسهل واتفاجئت من شافت

 البنات وياي

افراح //هلا بيك سراج شنو صادفت البنات يم الباب 

جاوبتها ::لا والله ام ياسر رحت انتظرتهن يم المدرسه على ما حلن وجبتهن وياي 

افراح باوعت الهن //شو واگفات ما تدخلن

دخلن من باب المطبخ ودخلت انا للديوان الخارجي انتظر هادي 

اجت افراح جايبه ماي وهي تكول // شنو سراج قابل انت غريب تعال هناك 

::تسلمين ام ياسر خلي يجي هادي المهم انتم شلونكم 

بخير ونعمه 

::الاولاد شلونهم اشو ما كو

افراح //ياسر تدري يشتغل بشركه اجنبيه ويتاخر ياالله يجي وعمار من الكليه ويروح الصالة الالعاب 

::ها ما شاءالله شنو مسجل فنون قتاليه بس هيج يتعب اقلها يرتاح وياكل وينام شويه 

افراح //لا مو يدرب اجرله صاله رياضيه شراكه ويه صديقه احسن بدل ما يكضيها تسخت وهم يشيل مصرفه 

::اها بيها الخير هو شنوويدرس 

افراح //قانون بس مبين كل شي ماكو

::لا ان شالله يتخرج ويصير احسن محامي 

افراح // ان شالله اي انت شلونك سراج 

::الحمد لله تمام 

اباوع الديوانيه چبيره برانيه والحديقه تخبل والكراج يوسع سيارتين واكثر اخذني الفضول سالتها

::بيتكم محورين بي مو 

افراح //لا سراج مو تحوير لكن جيرانه باع القطعه الي بصف بيتنا واشتراها هادي وبناها هاي الديوانيه 

والحديقه والكراج والديوانيه القديمه خليتها صاله والصاله فتحناها على الصاله الداخليه وصارت كلش چبيره 

هاي الي بيها نگعد انا والاولاد والبنات

::زين تسوون بيها الخير بس لو بانينها بيت للاولاد تعرفين اول وتالي يراد الهم 

افراح //ان شاء الله نبنيلهم ما نعوفهم 

::ان شالله 

واجت بتهم لابسه بنطلون جينز وقميص مرتبه كلش ومبينه ما لازمه شي بايدها گالت 

ماما هاج التلفون بابا جاي يتصل 

افراح گلتلها //شنو هدوله ليش ما تسلمين على عمج سراج

هديل بابتسامه // هلو عمو اشلونك 

::هلا عمو اشلونج 

هديل //الحمد لله 

::اگلج انتي بالرابع مو 

- - اي عمو 

::ما شاء الله علمي لو ادبي 

- - لا علمي 

::الله يوفقج شدي حيلج

اتصل هادي افراح ردت //هلا ابو ياسر اي هذا موجود بالديوانيه البره يگول متانيك 

ها لا چا هو واحد من اهل البيت ما يحتاج عزيمه 

سدته تريد تحجي هادي اتصل 

اشلونك سراج 

::هلا ابو ياسر 

- - صار عندي اجتماع انت اخذ راحتك البيت بيتك 

::لا انتظرك 

هادي //شلك بيها تنتظرني شنو ما ماكلين ما گاعدين ياالله انت راعي بيت وانا بس اكمل اجي عندي 

وياك موضوع مهم كلش

دخلت وره افراح للصاله كانت كلش وفخمه وكبيره ومرتبه بيها طخمين قنفات وميز طعام بي 12كرسي كان فخم كلش 

اما الثريات والتحفيات فذني شي ثاني 

شفت سجى گاعده ويمها بنيه من شافتني گالت 

عمو شلونك 

كانت اسيل بت هادي لابسه تراك بناتي جديد لان حتى العلامه ناسيه ما شايلتها 

::اهلا عمو اشلونج 

الحمد لله زينه

افراح //شنو سراج ما يرادلك عزيمه انت راعي بيت 

::تسلمين ام ياسر 

اتفضل اتفضل انا گعدت ع القنفه يم سجى الي چانت تعلج وتلعب بايدها بمداليه برگبتها 

افراح //من رخصتكم 

راحت افراح للمطبخ وسجى تهز برجلها وهي تگول //بيت ابن عمتك فخم ما شاء الله 

::الله يرزقه 

بدن البنات يخلن الصحون ع الميز واجت افراح گالت //ياالله اتفضلوا شنو يرادالكم عزيمه 

::لو منتظرين الولد هادي

افراح //الولد يتاخرون وهادي عنده اجتماع وهو يتاخر شنو سراج انت قابل خطار 

اندك الباب وراحت اسيل تفتحه اجه عمار وسلم عليه وعلى سجى 

افراح گالت //هذا عمار اجه بوكته ياالله ماما اصعد غير ملابسك وانزل اتغدا

اجيت گعدت وسجى گعدت بصفي ناديه وحنين يجيبن بالصحون مالت الاكل وبعدها جاين جگات گزاز 

جك بي لبن والثاني عصير ورجعت 

حنين جابت گلاصات وزعتهن ونزل عمار گعد گبالي 

انا باوعت الافراح وگلتلهن ::اگعدن عمو اتغدن

حسيت لمعه بعيونهن وترقب الافراح وهنه لازمات الكراسي ومتوترات بين ايكعدن وبين يبقن 

سجى راسا جاوبت گالت //شنو ام ياسر تگعدون الخدم وياكم ياكلون انا سامعه عن طيبة اهل البصره بس توصل

للخدم ياكلون وياكم والله تواضع 

ناديه باوعتلي وجاوبت...... ليش خاله ما گال..

اهنا سجى قاطعت ناديه بنتر //شنو خاله صدك بلا تربيه تعرفيني اعرفج صدك ما تنطون عين هاي كلها من وراج 

ام ياسر لان انتي متساهله وياهن

افراح// لا تضوجين حبيبتي ذني مو خدامات ذني بنات حماي وهنه رابيات عدنا بالبيت 

سجى عبالك تذكرت //هااا هاي الي امهن ياستار كتلت ابوهن هاا خطيه وينهي الي اندعمت وطيبها سراج انتي 

(اشرت على حنين )

حنين اشرت باصبعها وهي متفاجئه او مستغربه //لا ناديه 

سجى باوعت الناديه وگالت //ها اشوفج تعرجين من رجلج خطيه العرج حيل مبين عليها اكلج ام ياسر شنو

 الي دعمها

افراح //دراجه دعمتها چا ماتت لو ما ستر رب العالمين 

سجى //ها ودعمتها بس برجلها 

افراح تاشر على رجلها //اي بصفحة رجلها فوك من الركبه لا والركبه همينه والحوض 

 سجى //. خطيه اكلج ام ياسر وهم (اهنا سجى شاورتها )وافراح تگلها// اتصدگين ما ندري همزين لفتي نظرنا 

سجى //اي بعد تعرفين جان لازم تتاكدين كل شي يصير والناس ما ترحم

ناديه حاچت سجى ......ست سجى شنو قصدج 

سجى //وياي 

ناديه ......اي وياج انا شبيه وانتي هيج تحچين وتتشاورين ويه عمتي 

افراح //ولج شنو هاللسان 

ناديه ......عمه افراح شنو شاورتج عليه 

افراح //انچبي كافي عيب لا تحچين وروحي جيبي صحون فارغه 

سجى //. مو اگلج امثال ذني ما ينطن عين

انا سمعت احس نار تطلع من خشمي ابدي الزم سجى واموتها

افراح // ياالله سراج شنو انت خطار 

:: الله يديم البيت واهله (باوع النه وگال )بابا اگعدن اتغدن 

ناديه ......لا سر ...احنه ناكل بالمطبخ 

::لا ليش بالمطبخ شنو انتن غريبات بعدين انا عمچن وسجى مرت عمچن مو سجى 

سجى بدلاعه زايده //اي سراج بس خليهن براحتهن اكيد هنه متعودات ياكلن بالمطبخ

حنين گعدت يم اسيل وافراح تباوع الها بنص عين بس ما تگدر تحچي باوعتلي ناديه ودارت وجهها ومشت 

خطوتين سجى گالت //ناديه جيبيلي ماي وياريت تخلين بي ثلج 

دارت وراحت للمطبخ وسجى تسمع بيها //هاي شنو خطيه متعقده من رجلها تعرج عليها وهي شابه 

جاوبتها ::بس ما مبينه اي عرج برجلها 

سجى //لا سراج شنو ما مبينه

خزرتها السجى واجت ناديه وخلت الثلج كدامها كالتلها سجى 

جيبيلي ماعون زغير 

وراحت ناديه وجابت ماعون بقت واگفه سجى گالت //عفيه بالشطوره تذكريني اب جينا الخدامه العد اهلي اتعلمت 

تبقى واكفه من كثر ما اامر عليها حتى صرت وين ما اروح اخذها وياي 

تدرين ام ياسر يرادلج وحده مثل جينا مطيعه ولو ما يحتاج عندج بدل الوحده اثنين

ناديه گالت ......حنين كومي خلي نصعد 

گامت حنين والدمعه بعينها انا من شفت تصرف سجى گلت ::الحمد لله 

افراح // شنو هاي سراج 

وگفت ::لا ما كو شي بس هم ياالله نروح ورانا سفر ياالله سجى غسلي وبسرعه الحكيني للسياره 

الكل اتعجب من تصرفي افراح تسال //سراج شصاير (وترجع تگول ) يا سجى ابد ما اتغدت 

جاوبتها ::لا ام ياسر اصلا سجى من دون الايام اليوم شبعت ياالله فيمان الله وسلميلي على هادي سجى 

 انا طالع بسرعه الحگيني

افراح //غير تفهمني سراج هسه من يجي هادي شاگله 

::اجاني تلفون من الدائره لازم ارجع حالا 

افراح //تره هاي ما تنحسب 

::ان شالله اجي باقرب وقت 

ورحت وافراح تگول //بس لا الاكل ما عجبكم 

::لا بالعكس ام ياسر انتو ما قصرتو ونفسكم كلش طيب بالاكل 

عمار //. انتو حتى ما ظكتو منين عرفتو طيب 

سراج // لا طيب كلش

افراح // سراج حتى ما شفناها السجى خليها تبقى يمنا يومين تلاثه وبعدين تعال اخذها 

::الايام جايه ام ياسر سلمي على هادي 

واجت سجى باوست افراح الي تگلها //شلي سد نفسكم وگمتو بسرعه من الغدا 

هي سكتت وصعدت بالسياره وانا ابدي اموتها انهيها تميت ساكت وصلنه البيت كرم نزلت دكيت الباب 

طلعلي كرم وشافني //هلا سراج اتفضل (باوعلي وسالني )شبيك سراج شصاير 

::ما بيه شي بس راح ارجع البغداد 

كرم //ترجع شنو مو گلت تجي تبات يمي

غير مره خلي هاي (واشرت السجى تنزل اشرت براسي )روحي سلمي على عمتي جميله وارجعي للسياره 

هي دخلت وكرم گلي //شبيك غير تفهمني 

انا بعصبيه واشر على سجى ::شفهمك من وره هاي بت الكلب صفت ويه افراح خليتها ساعتين درستها شكو 

حقد على مياده وبناتها

كرم //بشرفك تحچي صدك 

::اي والله كرم دير بالك عليهن هذا هادي افراح ما اعرف شمسويتله 

كرم //على گولة امي بت نصره شخليت وراك

شعلت جگاره ودخنتها گلت الكرم //ابو مرتضى انت تگلي هادي مدللهن انت شايف صداريهن دشاديشهن 

اللابساتهن شايفهن شنو لو اديهن المتفطرات 

كرم //سراج احنه تره ما نروح الهم لان ما يردون احد يجيهم وحتى هو ما كلف خاطره فد يوم دز على امي 

وانا من اروح حدي للديوان

 وكل ما اشوفه بالسوك يگول اشتري ملابس البنات عباس

::كرم خليها سكته يا ملابس حنين لابسه صدرية ناديه الي اشتريتها الها قبل وفاة عمتي وناديه لابسه صدريه 

من البالات قديمه اگلك سويلي طريق خلي اسلم على عمتي واروح وانت جيبهن يمكم يومين وخلي زهراء 

تخابرهن لان حنين كلش مشتاقه الها 

كرم //لا حول ولا قوة الا باالله خطيه ياريتهن ماتن ويه ابوهن ولا هذا الضيم

دخلت وانا ضايج من نفسي شفت عمتي جميله گاعده على جربايتها وسجى على القنفه اليمها بستها براسها وطلعت

الها مصرف 

كرم //سراج شلها بي المصرف قابل انا مقصر 

جميله يمها العكازه رفعتها وهي تگله //وانت شعليك ابن الكلب ابن اخوي وينطيني ماخذه من ورث ابوك 

ضحكت بوجهي گالتلي //مرتك تگول مترم عليها هسه ترجعون البغداد ليش شعدك 

::جميله اي هسه ارجع اروح اجيبلج رجل واجي 

رفعت اديها //وين عشتو لو تردون چان من اتطلكت زوجتوني مو هسه 

بعدين هاي مرتك تگول اريد اظل

باوعت السجى خزرتها ::لا عمه واني 

جميله //خاب انجب ابو اني ما ترهم مفطوم عليها شني نسيت امك 

::لا مو هيج بس ما اكدر اجي اخذها امري مو بيدي (واشرت براسي السجى )ياالله عمه هم ياالله اروح ادعيلي 

جميله حضنتني //الله وياك سلم على ابوك وجيبه خلي اشوفه گبل لا اموت 

::عمرج طويل جميله

وطلعنا وانا اسمع دعاء عمتي رغم ساعات تنسى وتحجي كلام مخربط. اجه وراي كرم وگلي 

- - سراج دير بالك وانت تسوق 

::ان شالله بس مثل ما وصيتك مو تنسى 

وطلعنا وانا اغلي سجى هم ساكته ودايره وجهها بنص الطريق گالت 

- - سراج تره للعلم اني ما اتغديت وهسه كلش جوعانه

ما جاوبتها وگفت يم مطعم ودكيت هورن واجه عامل وصيته على لفتين وقوطية ببسي وبطلين ماي جابهن

 وانطيته الحساب وشغلت السياره هي اكلت وهي ساكته عرفت بيه صاير بركان وصلنه بالليل دخلنه للبيت 

انا بدون ما احچي وياها دخلت للغرفه اخذت ملابس وطلعت رحت للغرفه الثانيه قفلت الباب وسبحت وطلعت 

اتمددت حتى ما الي خلك امشط شعري چنت حاس بالخجل من الي سوته سجى والكلام الي سمعته الناديه وانا

 انا الي بقيت ساكت وما رديت عليها 

رغم تعبان لكن لزمت النقال واتصلت بكرم كتله (وصلنه )لان هو طول الطريق كل شويه ويتصل 

اتصلت بناديه وهالمره رن تلفونها لكن ما جاوبتني اتصلت مره ثانيه ونفس الشي عرفت بيها هي مقهوره من الي 

صار دزيتلها كلمتين ::ناديه انا اسف 

كان ردها عليه كلام خلاني اخجل من نفسي 

......انا اكرهك اكرهك لان انت جبان

وغلقته صرت اتصل رغم اعرف هي بعد مستحيل تفتح وياي خط ثاني يوم الصبح طلعت للدوام بدون ما امر على 

سجى ومن رجعت العصر رحت الاهلي رغم اتصلت عليه اكثر من عشرين مره 

انا چنت مشتت وكان لازم اعرف السبب الي خلا سجى هيج تحچي ولازم اروح الناديه واعتذر منها 

بقيت عد اهلي واتعشيت وسجى تتصل وانا ما ارد بعدين اتصلت على امي وسالت عليه وامي گالت الها انا يمهم

هي گالت الامي //خاله دا اتصل وهو ما يرد 

اشرت الامي يعني نايم امي جاوبتها //اي خاله اجه تعبان وهسه راح الغرفته اتمدد ونام

سجى //زين خاله من يگعد گليله خلي يجي لان اكو كلبه منتظرته بالبيت 

امي //لا حبيبتي ابنيتي ليش هيج تحچين هو:اجه تعبان وراح الغرفته ما صار شي 

سجى //لا صار وصار ومن يجي اعرف شلون اتفاهم ويا

امي سدت التلفون وما عقبت على كلام سجى باوعتلي وگالت 

شبيك سراج ممكن تفهمني 

::ما صاير شي تعبان شويه وضغط العمل 

سراج ماما عمري ما شفتك هيج شصاير 

نفخت دخان الجگاره ورديت ::يمكن اتسرعت بزواجي من سجى 

امي عكفت حواجبها //شنو هالكلام قابل انت زغير 

::ولان مو زغير هيج اگول 

- - دي كافي لا يسمع ابوك وهو كلش تعبان ياالله روح البيتك 

::لا امي اريد ابات اهنا 

- - ومرتك ماما 

::ما عليها شي

رحت الغرفتي وانا احس بنفسي مختنك اتمددت ع الچربايه وانا كل شويه اتصل برقم ناديه واعرف ما راح تجاوب 

وارجع اقرا المسج واحس بيها شلون كتبته اجتني امي وگالت 

- - سراج ابوك رايدك 

انا رحت لكيته متمدد على ظهره گعدت يمه هو گلي //شنو ليش ما رحت البيتك 

جاوبته بابتسامه مصطنعه ::شنو منير نسيت هو هذا بيتي الاصلي

هز راسه //لا ما نسيت بس اريدك من تجي تجي انت وزوجتك لو تجي تشوفنا وتروح البيتك ذاك 

انا بضحكه ::قصدك التقليد 

ابوي ابتسم وگلي //ايي شتسمي سمي شلونها عمتك جميله 

::تزهو بالنصر تريد الها رجل وتريدك تروح يمها تشوفك 

- - وكرم وهادي وبنات عباس

جريت حسره //كلهم يسلمون وزينين 

ابوي //ليش بابا احس بيك مقهور وضايج 

انا جريت نفس واتقربت بسته بخده وگتله ::لا تاخذ ابالك متاعب بالشغل 

- - رووح بابا ارتاح 

::تصبح على خير 

- - وانت من اهله

رجعت للغرفه ما اعرف يمته نمت ولا شلون الي اتذكره هو اني صرت ادخن وسجى اتصلت وانا ما جاوبتها 

وبعدين دزتلي مسج // اريد اعرف سراج ليش ما ترد عليه شلي صار 

ومسج ثاني //رد سراج هاي شبيك 

  وبعدها // ولاترد العتب مو عليك العتب عليه اني

الصبح گعدت تقريبا الساعه بالخمسه صليت ولبست وطلعت قررت اروح للبصره ظليت امشي وانا ساكت حتى 

ما افكر بشي ولا شسوي رايح والمن وليش صارت الساعه بثمانيه وگفت يم مطعم تريگت وشربت چاي اتصلت 

بمديري بالدائره الي هو ابو سجى طلبت منه اجازه تلث تيام

الو 

:: السلام عليكم 

اهلا سراج عليكم السلام اشلونك 

:: الحمد لله زين 

خير شعجب دا تتصل 

:: حجي اتمنى توقعلي على اجازه  

خير ان شاء الله 

:: الحقيقه مسافر 

هو جاوبني بتساؤل //هاا وين للبصره 

::لا استاذ صديقي عمه اتوفه بالعماره ولازم اكون يمه واوكف ويا

  حمحم // لازم يهمك امره 

::اي اكثر من اخوي وصاحب فضل عليه 

اي تدلل بس منو يبقى يم زوجتك 

::بكيفها تريد تبقى بالبيت يجي واحد من الولد يمها تريد تروح يمكم بكيفها 

هم صحيح بكيفها. 

::شكرا استاذ

العفو

بعدين كتبت السجى مسج فهمتها رايح للعماره الفاتحة عم رضا ويجوز ابقى يمه يومين تلاثه اذا تردين روحي يم اهلج 

هي بس قرت المسج اتصلت مره واثنين انا ما جاوبتها بقت تلح اضطريت اجاوبها 

:: الو 

هي بعصبيه //هم زين من كلفت نفسك ترد عليه 

بقيت ساكت ما جاوبتها هي گالت

- - شنو اني رجل كرسي اخر من يعلم بسفراتك انت سراج مو طبيعي من رجعنا من البصره وانت ما اعرف شبيك 

انا هم ما رديت عليها 

- - عشتوا سافرت ويه زوجي للبصره ليله انحسبت عليه سفره ورجع راح الاهله حتى.كل شي ما شفت 

سراج مو دا احجي وياك شبيك ما تجاوبني ليش ممكن اعرف

نهيت المكالمه وانا ما اعرف ليش هيج اسوي ويه سجى سجى الي خلتني اتفاجأ بالي سوته ابيت هادي 

بقيت ماشي بالسياره الى ان وصلت للبصره وبقيت افتر بشوارعها ومرات اوگف وانا افكر بالي صار الى ان باوعت 

الساعتي شفتها قريب الساعه بالوحده خابرت كرم 

كرم //الو هلا سراج 

::هلا كرم اشلونك 

- - الحمد لله انت شلونك 

::انا زين انت وين 

- - انا توني اجيت من الدوام

::يعني بالبيت 

- - اي بالبيت ليش تسأل خير 

::ماكو شي جايك 

كرم مستغرب //يعني انت بالبصره ؟

اتنفست قوي ::اي هسه وصلت 

- - زين منتظرك اتانيك ع الغدا 

::لا كرم اطلع لي نتغدا بره 

- - قصدك ما اگول انت جاي شكو غير افتهم 

::هسه راح اوصل انت فد خمس دقايق واطلع

وطلع كرم لگاني واكف ركب بالسياره سلم عليه وگلي //شكو سراج 

::ما كو شي حبيت اتغدا انا وياك 

كرم //ادري يمته رحت البغداد يمته رجعت 

::رحت ورجعت عندي شغل 

- - وخالي شلونه والوالده 

::الحمد لله كلنه زينين

نزلنا للمطعم وطلبت غدا واتغدينا وشربنا چاي 

كرم //خير سراج ليش جبتني اهنا وما دخلت للبيت 

جريت نفس وگتله ::محتاجك بشغله 

- - خير سراج گلي شكو

سولفتله على الي صار ابيت هادي كرم اتعجب واشوفه يسمع ويهز براسه اسف وقهر 

باوعلي وگلي// وهسه سراج 

- - اريدك تجيب ناديه وحنين البيتك محد يدري بيهن 

كرم عكف حواجبه // وليش ؟

::الغايه كرم اريد اعرف شي 

كرم هز ايده //شتعرف مرتك ما قصرت والبركه بافراح وبناتها وهادي الطلي

::اعرف شتريد تحچي واعرف انا غلطان لكن انا اتفاجآت بتصرف سجى لذلك من رجعنا اللحد هسه انا اساسا

ما حاچي وياها ولا كلمه اصلا انا بتت ابيت اهلي 

كرم // زين احنه نرجع هسه البيتنا تشوف عمتك والعصر اروح اجيبهن 

هزيت راسي //لا ما اريد احد يعرف انا جاي 

كرم //ما تريد احد يعرف ؟

::اقصد على ما اشوف ناديه وافتهم منها

كرم //ياالله امشي واگعد بالديوان وانا اروح اجيبهن واجي 

::لا كرم انا ابقى اهنا وانت روح بس شتكل الهادي 

كرم بعصبيه //خلي يولي المره هذا مرت افراح والله لوالزمه محد يفكه مني 

::لا كرم الخاطر البنات ما اريد اتسبب الهن بمشكله 

كرم// اروح اگله اريدهن يجن يم غفران وبيبيتهن جميله تريد تشوفهن 

::لا هسه افراح تگول احنه نجيبهن بالليل 

كرم //چا شگول

::گول اريد اخذهن هنه وغفران يشترن ملابس لان بيبيتهن جميله انطتني الهن فلوس طبعا وره ما تتملق 

الافراح بيك 

كرم هز راسه //اي بت الكلب تدري لو گايلي بساعتها والله اروح احرك البيت على روسهم 

::هسه انت رووح وبس توصل رمشلي 

كرم هز راسه //ان شالله

وراح كرم وانا بقيت اول مره بحياتي هيج اكون مرتبك تقريبا ساعه اله ربع ورمشلي كرم وانا درت 

 بالسياره وصلت لگيتهن گاعدات بالديوان البراني حنين شافتني رادت تجي تحضني لكن ناديه لزمت ايدها 

باوعت وگلت:: هلگد كارهتني بحيث ما تخلين حنين تجي وتسلم عليه

ناديه باوعت الكرم وگلتلته ......عمو كرم عبالنا صدك تريد تاخذنا تشتريلنا ملابس ويه غفران بس كان لازم 

ما نصدكك لان انت ولا مره سويتها 

باوعت الكرم الي ارتبك وگال //صحيح لان دووم اسمع هادي يگول اشتريت ملابس وجبت شغلات البنات عباس 

هي باستهزاء ......وانت تصدگه ؟

كرم //بابا ناديه عمچن سراج جاي يريد يحچي وياچن 

حنين //خير عمو

ناديه باوعتلها يعني اسكتي 

جريت نفس ::اول شي انا جاي اعتذر عن الي صار ذاك اليوم انا م..

قاطعتني ناديه وهي رافعه ايدها يعني اسكت 

......تعتذر جاي تعتذر عن شنو عن الكلام الي گالته مرتك وانت ما رديتها لو عن ضحك افراح هي وبناتها 

من مرتك استهزإت بيه لو من شاورت افراح ما اعرف شگالت الها لو الي صار وره ما طلعتو هذني كلهن 

مقبولات

لكن شي واحد ما اقبله (اتقربت مني. ) اعتذارك انت عن نفسك

كرم راد يحچي انا رفعت ايدي يعني اسكت 

::حقج ندوش بس انا مثلج ماردت الموقف يتطور انتي صعدتي وياچ حنين وانا اخذتها ورحت 

ابتسمت باستهزاء ......ااه صرت تقارن قوتك ورجولتك بيه انا واختي وبضعفي 

::شلون يعني ؟

......يعني انا من رحت انا واختي رحت لان انجرحت لان استهزأو بيه ومحد دافع عني ولان الي اشوفه السند 

والظهر والقوه تم ساكت رحت لان انذبحنا ولان ست سجى تشوفنا خدامات الافراح وبناتها واحنا فعلا خدامات 

كرم بعصبيه //شنو هالحچي انتن گاعدات ابيت عمچن 

ناديه ......اي هذا الظاهر بس ما تدرون بينه وبعيشتنا

كرم // عمو ناديه تره الحمد لله گاعدات ابيت واكو واحد يكد عليكم تاكلن وتشربن 

هزت راسها ......هم صحيح بس الي ما تعرفونه احنا من تركنا بيت بيبي ست افراح مگعدتنا بالمخزن 

... الي ما تعرفونه انو احنه نشتغل ليل ونهار 

... الي ما تعرفونه ما نگعد وياهم لا بعشا ولا بغدا

... الي ما تعرفونه ياعمامنا نسبح بالبيتونه بطشت انا واختي نحمي ماي بالچوله ونسبح 

بالليل كلش وحده توكف اباب السطح والثانيه تسبح حتى محد يشوفها لو يكول نسيت وصعدت بالغلط الي 

ما تدرون بي انو الصدريه الي لابستها حنين هي صدريتي الي انت اشتريتها الي (واشرت عليه )

والقميص همه 

وانا ملبستني صدريه مال بالات ومن گتلها ليش خاله اشتريلي صدريه من المحلات تكلي يعجبج يعجبج 

ما يعجبج احسن تبطلين وتكعدين تشتغلين

ومن يجي هادي تگله وگدامي رحت واشتريتلها ملابس جدد 

بعد شتريدون تعرفون 

حنين //نسيتي الكتله الي حصلناها من هادي اول امس لو ما ياسر لزمه چان موتنا 

كرم بعصبيه //اليوم اروح واجيبجن اهنا وهادي بس يفك حلگه اكتله خلاص

ناديه ابتسمت وكالت ......تجيبنه شنو هادي ينطينه لو افراح تتخلى عن خدامتين ابلاش مثل ما گالت السيده

 سجى لا عمو كرم خلينه ما نريد انسبب الك مشاكل انت بغنى عنها 

وگفت واتقربت مني وگالت وتاشر بااصبعها ... انت كلتها ما الچن اله مدرستچن والشهاده انا هسه جاي 

احارب واتقبل اي اهانه واي تصرف من قريب او بعيد بس حتى انجح (باوعت الحنين )

ياالله حنين خلي نمشي

كرم // وين وين رايحات 

...راجعين البيت هادي اقصد البيت عمنا 

كرم //لا عمو ابقن اهنا 

هي باوعتلي ...لا نرجع وانت ابقى يم خطارك 

كرم //مو على اساس اخذجن واشتريلجن ملابس 

......غير مره عدنا ملابس خير من الله ياالله حنين

كرم //اوگفن بابا ما يصير ترجعن ابحدچن 

باوعتلي وابتسمت باستهزاء ...لا عمو ما علينه شي اصلا محد يباوع النه لان احنه طاعون نعدي اي احد

يتقرب من عدنه فالناس تتحاشانه 

كرم //ناديه ابقي وانا اوديچن 

هزت راسها ... ما علينه شي 

كرم //زين شتكولين گدام هادي وافراح 

...نگول اي شي اصلا منو مهتم بينه نگول السياره عطلت يمكم واستحينه ونزلنه اساسا احنه غراب البين

هي لزمت ايد حنين وطلعت وبطلعتها سمعت شهگتها عرفتها بچت بحرگه واتعجبت من قوة شخصيتها گدامي 

ومن ضعفي او الشي الي جاي يصيرلي ردت اروح وراهن بس كرم لزم ايدي وگلي 

- - خليهن هذا الشي الي يصير بيهن ضريبه للي سوته امهن

بقيت صافن علىى نفسي ودخل كرم وانا رحت سلمت على عمتي جميله وبعدها گلت الكرم انا راجع البغداد 

هو ما قبل ولزم بيه //هاي شنو منك سراج تره ناديه مراهقه وما هان عليها تسمع احد يفشلها وانت ساكت 

هزيت راسي :: حقها كرم بس ما اگدر ابقى لازم اروح 

طلعت وسط استغراب جميله الي تگلي// شمالك انغسل حظك من يوم الاخذت هاي الچنها بريعصي

صدك ابتسمت من كلامها كرم طلع وياي وگلي //سراج ابقى ارتاح وارجع 

::لا كرم چان ابالي شي ردت اعرفه وهسه عرفته 

كرم //بكيفك اذا مصربس راح تتعب 

:: اگلك كرم خابر زهراء خلي تجيكم وتروح تشوف البنات بس خلي تجيب هديه الافراح على مود تگدر 

تشوفهن وتسالهن

كرم // وليش انتظر زهراء خو ادز ام مرتضى وافهمها 

:: بكيفك وهاك ( مديت ايدي على جيبي ) هذني فلوس اشتري بيهن ملابس وديهن الهن ولا تبين اي شي 

من الي گالته ناديه 

كرم رد ايدي //لاتوصي حريص خلي افلوسك بجيبك انا اخذلهن 

::ماكو فرق كرم

كرم بخجل // وداعتك سراج عبالي مو هيج عيشتهن گلت راتب ابوهن خير من الله والبيتين ماجرات ومحل ابوهن

 بيد ثامر وتعرفه شگد امين ويقسملي يكول اقل شي اوصل هادي مليون ونص بالشهر 

جريت حسره ::كل شي اعرف كرم وهم نعرف بهادي شلون يرجف على الفلس كل تجارته من فلوس ناديه وحنين 

وصدگني لازم نسكت على ما يبلغن وهنه يطالبن بحقهن هسه بس نحجي يبطلهن او افراح تبطلهن وتعقد الهن 

على ولدها وتاخذ الاكو والماكو

كرم //تدري هاي ما مفكر بيها 

:: لا فكر لذلك لازم نبين الهم احنا ما ندري بشي والبنات مرتاحات 

- - اي سراج هم صدك 

::انا هسه راح اروح وامر على بيت هادي اسلم واطلع مناك واذا تجي زهراء هم خليها تمر عليهن 

- - اي رووح الله وياك

سلمت على كرم ورحت البيت هادي الي اتفاجأ من شافني وهو يرحب بيه وگلي // اتفضل سراج بيتك 

::لا والله عندي شغله كضيتها وراجع البغداد بس حبيت امر واسلم عليك 

هادي //لا اليوم تبقى يمنا تبات وباجر تروح 

::اعذرني ابو ياسر عندي التزام 

واجت افراح وهي متفاجئه //هلا بيك سراج شنو وين رايح بهالليل

:: مي خالف مستعجل شنو قابل جاي اجربكم 

سلمت عليهم وگلت :: وين ناديه وحنين 

افراح //راحن ويه كرم اخذهن البيبيتهن جميله 

::ها توني رحت سلمت عليهم ما شفتهن 

افراح // يجوز بالمطبخ شوف وين لاتنسى كبرن وصارن يستحن يطلعن

باوعت الها باستهزاء ::اي هم صحيح ياالله اودعناكم (باوعت الهادي )اي شي تحتاجه بس خابرني 

هادي بابتسامه //تسلم سراج هو من ناحية محتاج محتاج 

انا بضحك ::خير بس لا تگلي فلوس تره كلش مفلس 

- - لا يابه مو فلوس بس ابن عم ابو زوجتك رجال واصل بال..

::اي 

- - واريد عمك يتوسطلي يمه 

::ها على شنو 

- - انتقل يمه اصير مدير مكتبه 

::هاي سهله تدلل 

- - صدك سراج

::شنو قابل اچذب عليك بس ولو اشوف تبقى اهنا احسن الك انت مدير مو شويه شلك بيها تكون مدير مكتب

هادي //لا سراج انت ما تعرف عم مرتك هوايه تجي يمه مناقصات وهاي بيها خير من الله 

انا بضحك ::عمي الله يكافينه شركم 

وانطاني اسمه وسلمت عليهم وافراح تگلي //الله عليك سراج خلي سجى تجي وياك مره ثانيه 

::ان شالله ام ياسر مع السلامه 

- - الله وياك

من طلعت عرفت ليش هادي اجه بعرسي وجاب خروف وليش عزمنا وسوالنه غدا اثاري على مود گرايب سجى

على مود يحصل من المناقصات ما كفا الي اخذه 

طلعت من البصره وانا احس بروحي مختنك وصوت ناديه يرن باذني وشهگتها وبچيتها ما يفارگن خيالي 

ما حبيت ارجع البغداد واشوف سجى خابرت رضا 

رضا //هلا سراج اشلونك 

::هلا رضا انت وين

رضا //هاا حقك هو هذا الياخذ يتدوهن 

انا بقلة صبر ::رضا گلي انت وين 

تغير كلامه وياي //ابغداد سراج هاي شبيك شصاير 

::رضا تعال اريد اروح للبستان مالتك 

رضا //سراج شكو 

::ماكو شي محتاج ابقى ابحدي 

هو اتنفس بعمق وگلي //اي رووح سراج هسه اخابر بيت عمي ينظفولك البيت 

::تسلم رضا

رضا //خوفتني سراج يحتاج اجيك 

::لا رضا بس لا تگول الاي احد انا وين 

رضا //اعتمد

وصلت تقريبا الساعه 11 بالليل لگيت بيت عم رضا متانيني ومن شافوني فتحولي الباب 

دخلت وانا تعبان كلش اتمددت على القنفه ربع ساعه واندك الباب ابن عم رضا جايبلي عشا 

اكلت شويه وبعدها جابلي چاي وگعد شويه يمي وبعدين راح عرفت رضا موصيهم انا دخلت للغرفه 

وغيرت ملابسي 

بقيت بس بالشورت والفانيله الداخليه وغلقت النقال ونمت لان كلش احس بنفسي تعبان 

صحيت على دگة الباب باوعت للساعه بالتسعه اله ثلث الصبح عرفت هذا ابن عم رضا جايبلي ريوك

 فتحت الباب

اتفاجات برضا جاي هو باوعلي وگلي //سراج شبيك شصاير 

انا بتعب ::انت ليش اجيت 

رضا //شنو ليش سراج صاير وياك شي الليل كله ما نمته 

جريت نفس وشعلت جكاره وسولفتله رضا باوعلي وگلي وهو يهز بايده //هو هذا الي مضوجك ؟

::رضا تعبان ما اعرف شسوي احس بنفسي عاجز

- - ادري بيك 

::تدري ؟

رضا //اي سراج انت مو عاجز لكن انت تايه واكع بين نارين 

ما جاوبته هو گلي //سراج ليش هلگد متاذي على ناديه 

::لاتنسى هي وصية عباس وعمتي الله يرحمهم

رضا باوعلي گلي //بس ؟

رديت ::اي بس رضا 

رضا گلي //سراج صارح نفسك وبعدين جاوبني

/////

سراج 

باوعت الرضا وگتله ::شنو قصدك تره فاهمك 

رضا //خلص اذا انت فاهمني لا تسالني عن قصدي 

::رضا يمكن انا غلطت 

هز راسه وگلي //سراج انت غلطت بحق نفسك لان گلبك بناحيه وعقلك بناحيه

:: اهووو هم رجعنا للالغاز 

رضا //لا وداعتك بس سراج يمكن اتسرعت 

هزيت راسي :: يمكن (باوعتله وسالته ) :::رضا وانت ؟

هو رفع راسه متفاجئ //انا انا شبيه 

::تدري من عرفتك وانا احس بيك انت ضام عني شي وحتى من اتزوجت يمكن مثل حالي واكثر

هو غمض عيونه وهز راسه وجر نفس وگلي 

- - لان ساعات نظلم نفسنا ونعيش بوهم اسمه المستحيل ونبقى نركض ورا ويوم وره يوم لا احنه عايفينه 

ولا محاولين بلكي يصير صدك 

::تتصور رضا المستحيل يصير صدك

هز راسه //اي يصير ونگدر نسوي حقيقه 

::رضا شنو شايل من مستحيل احچيلي 

ابتسم بحزن //يمعود قصه قديمه وفاتت لان الگدامك وهسه السانه شطوله ومسوي روحه بس هو وبس 

چان اكبر جبان 

:: هههه انت جبان ليش هالشكل تحجي على نفسك سولف رضا

باوعلي وفتح باب الصاله وطلع انا بقيت افكر بكلام رضا وبحاله الى ان اندك الباب اجه ابن عمه جاب الريوك 

سالته گتله :: رضا وين 

- - يم الشط 

:: يم الشط شيسوي 

 جاوبني بابتسامه وهو اياشر - - گضى عمره يروح هناك ويغني ابوذيات بس بالليل مو بالنهار 

::زين خلي ناخذ الصينيه نروح نتريك انا ويا ولو تعبتكم

- - افه ما مقبوله منك لا ياخوي تعبك راحه انت خوينه وعزيز علينه وانتم خوال ولدنا 

::مشكور وكثر الله خيرك 

من حچى هيج لان اختي نور قبل تلث سنوات اتزوجت (علي )اخو رضا بعد ان اجو وسكنو بغداد خطبوها 

امي ما قابله بهذا الزواج لان تشوف علي واهله مو من مستوانا لكن ابوي گللها 

- - ليش امنه اتذكر انتي من وافقتي بيه هم امج الله يرحمها بوكتها گالت مو من مستوانا وانتي قبلتي 

بعدين علي خوش ولد وضابط والناس كلها تحمد بي

بالاخير امي وافقت على علي لكن بقت زعلانه على نور لان رفضت ابن خالي عبد الحميد الي عايش بالخارج 

وحتى من صار عد نور توم ولد اثنين ما فرحت نفس فرحتها بابن موفق اخوي

لذلك نور من تجي تبقى گاعده اكثر الوقت يم ابوي وبعدين صارت ما تجي اله اذا ابوي خابرها 

انا اعرف بيها شكد متعلقه بابوي واعرف جاي تعاني من زعل امي لكن بشاشة (علي )وحبه الها 

 خلاها سعيده حتى لو امي زعلانه عليها

اخذت الصينيه ورحت الرضا وصلت ما شفته خليت الصينيه وانا اباوع بلكي اشوفه اتمشيت سمعته وهو يحچي 

مواال ع الحبيب وعلى الفراك چان صوته شجي والكلام مؤثر وهو يگول

ااااااه

انشد انشد انشد عليهم وين صاروا 

شبيدي شبيدي على الصار شبيدي ياصاحبي والجره 

وشيفيد دمعي بعد مهما همل والجره

ماتجي يالمبتعد وتشوف بيه الجره 

اگعدلك اكعود اكعدلك واسولف ضيم گلبي

گعدت اسمعه شلون يغني الموال وشلون يجر الابوذيه بصوت ابن الريف الجنوبي غلبتني دموعي وانا داير وجهي 

هو حس بشهكة صوتي اجه يمي ولزم چتفي وگلي 

- - ها يا صاحبي عجبك صوتي او ونيني 

انا باوعتله وگلت ::انت من تغني الموال ترتاح 

رضا //يمكن ارتاح شويه وانوب التهي بالشغل بس الليل شيخلصه وانت مشلوع گلبك 

سالته ::عاشك رضا وضاع منك حبك ؟

  هز راسه - - اي ضاع مني (اتحسر وگلي )المصيبه عايش وياي وگبال عيني 

::سولفلي رضا 

رضا //ومن كون اسولفلك شني بالمثل انسى 

::لا بس يمكن ترتاح من تفضفض 

باوعلي وگال //تدري سراج انا نسيت نوم الليل من اكثر من 15سنه

النوم جافاني ومشى وما يدك بابي بليل 

اسهر اناطر واظل احلم يجيني بليل 

يلي سكنت الگلب بلكت تحن وتروح 

شيل لهلك لاتجي امشي ولك وروح 

خليني هايم اظل بس لاتجيني بليل

اتذكرت ناديه الي اعرف بيها ماتنام من چانت زغيره (جريت حسره )::سولفلي رضا انت چنت عاشك 

هز راسه //. چنت لا ياخوي انا چنت والهسه واللحد ما موت 

::وليش ما اخذتها 

رضا حاول يغير الموضوع //اگلك انت مو جايب الريوك خلينه نتريك 

::اي امشي بس مو عبالك انسى تسولفلي رضا.

رحنا گعدنا وبعدين وگف رضا اومى بايده شويه واجه ابن عمه جايب قوري چاي گله اگعد اتريك هو اعتذر 

وگال ام علي سوتلي ريوك من فجر الله خو مو مثلكم محد ابحالكم 

ضحكنا وهو راح واحنا تريگنا. احنا ساكتين من كملنه انا شعلت جكاره وانطيت الرضا جكاره 

هو اخذها وسحب نفس واتحسر انا گتله ::طورك حلو بچاني

هو ابتسم ابتسامه باهته وگلي //هذا الطور الريفي طور حزايني حتى بالفرح هو حزين 

:: اي طورك حزين يذكرني من امك الله يرحمها تنعى على اخوك 

هو اتحسر وهز راسه انا سالته ::رضا منو هاي ؟

هو باوعلي وسالني بعيونه شنو قصدي جاوبته 

::الي تحبها رضا ومخليتك ما تنام الليل ومامرتاح

هو دنك وجر حسره وگلي //اي سراج انا عاشك بس عشگي عشك شروگي مسودن بالعشك والمصيبه لا انوله 

ولا اگدر انسا 

::يعني تريد تقنعني يارضا انت من اتزوجت ما نسيت حبيبتك 

رفعلي راسه وگلي //انسى لمن ما انت تنسى مو هل اتزوجت 

رديت واشر على نفسي. :: انا ما اعرف شنو قصدك سولفلي 

رضا //سراج هذا (واشر على گلبه ) فك عينه من هو. زغير على عشك نقي بس القدر چان ضدنا 

::شلون ؟

رضا //من انا زغير وعيت اهنا بهاي الگاع ابوي وامي وانا واخوتي ابوي متكتر عن بيت عمي يگولون چان ابوي 

ما ينجرع يدور ع المشاكل ادواره سبحان الله بس اخذ امي الله يرحمها. ركد وبقو عمامي عراكه وما يهابون

ابوي ظل يفلح بالگاع وعدنا حلال من كبرنا شويه سجلنه ابوي بالمدرسه وچانت بوكتها صف واحد وبنات واوولد

 سووا ونروح للمدرسه انا واخوي ولد عمي واختي وبنات عمي(واتحسر ) وحبيتها واحنه زغار

سراج 

باوعت الرضا وگتله ::شنو قصدك تره فاهمك 

رضا //خلص اذا انت فاهمني لا تسالني عن قصدي 

::رضا يمكن انا غلطت 

هز راسه وگلي //سراج انت غلطت بحق نفسك لان گلبك بناحيه وعقلك بناحيه

:: اهووو هم رجعنا للالغاز 

رضا //لا وداعتك بس سراج يمكن اتسرعت 

هزيت راسي :: يمكن (باوعتله وسالته ) :::رضا وانت ؟

هو رفع راسه متفاجئ //انا انا شبيه 

::تدري من عرفتك وانا احس بيك انت ضام عني شي وحتى من اتزوجت يمكن مثل حالي واكثر

هو غمض عيونه وهز راسه وجر نفس وگلي 

- - لان ساعات نظلم نفسنا ونعيش بوهم اسمه المستحيل ونبقى نركض ورا ويوم وره يوم لا احنه عايفينه 

ولا محاولين بلكي يصير صدك 

::تتصور رضا المستحيل يصير صدك

هز راسه //اي يصير ونگدر نسوي حقيقه 

::رضا شنو شايل من مستحيل احچيلي 

ابتسم بحزن //يمعود قصه قديمه وفاتت لان الگدامك وهسه السانه شطوله ومسوي روحه بس هو وبس 

چان اكبر جبان 

:: هههه انت جبان ليش هالشكل تحجي على نفسك سولف رضا

باوعلي وفتح باب الصاله وطلع انا بقيت افكر بكلام رضا وبحاله الى ان اندك الباب اجه ابن عمه جاب الريوك 

سالته گتله :: رضا وين 

- - يم الشط 

:: يم الشط شيسوي 

 جاوبني بابتسامه وهو اياشر - - گضى عمره يروح هناك ويغني ابوذيات بس بالليل مو بالنهار 

::زين خلي ناخذ الصينيه نروح نتريك انا ويا ولو تعبتكم

- - افه ما مقبوله منك لا ياخوي تعبك راحه انت خوينه وعزيز علينه وانتم خوال ولدنا 

::مشكور وكثر الله خيرك 

من حچى هيج لان اختي نور قبل تلث سنوات اتزوجت (علي )اخو رضا بعد ان اجو وسكنو بغداد خطبوها 

امي ما قابله بهذا الزواج لان تشوف علي واهله مو من مستوانا لكن ابوي گللها 

- - ليش امنه اتذكر انتي من وافقتي بيه هم امج الله يرحمها بوكتها گالت مو من مستوانا وانتي قبلتي 

بعدين علي خوش ولد وضابط والناس كلها تحمد بي

بالاخير امي وافقت على علي لكن بقت زعلانه على نور لان رفضت ابن خالي عبد الحميد الي عايش بالخارج 

وحتى من صار عد نور توم ولد اثنين ما فرحت نفس فرحتها بابن موفق اخوي

لذلك نور من تجي تبقى گاعده اكثر الوقت يم ابوي وبعدين صارت ما تجي اله اذا ابوي خابرها 

انا اعرف بيها شكد متعلقه بابوي واعرف جاي تعاني من زعل امي لكن بشاشة (علي )وحبه الها 

 خلاها سعيده حتى لو امي زعلانه عليها

اخذت الصينيه ورحت الرضا وصلت ما شفته خليت الصينيه وانا اباوع بلكي اشوفه اتمشيت سمعته وهو يحچي 

مواال ع الحبيب وعلى الفراك چان صوته شجي والكلام مؤثر وهو يگول

ااااااه

انشد انشد انشد عليهم وين صاروا 

شبيدي شبيدي على الصار شبيدي ياصاحبي والجره 

وشيفيد دمعي بعد مهما همل والجره

ماتجي يالمبتعد وتشوف بيه الجره 

اگعدلك اكعود اكعدلك واسولف ضيم گلبي

كعدت تانيتها تجي هي ما تعرف انا اهنا لان چنت كل ما انزل الاهلي اسير بالليل على بيت عمي حتى هي 

من تدري تطلع اتانيني گلت خلي اداري روحي بمكان ما اشوفني بي صرت بسد حمضه 

( نبات طبيعي موجود على شكل كور خضراء )

ربع ساعه اكثر اجت كعدت وهي ساكته تالي رفعت راسها للسما واسمعها تگول

- - ربي اخذ امانتك مليت شسوي وشلون بيه كرهت العيشه والناس وابوي واخوي كرهت روحي ربي ساعدني 

لا تخليني افضح روحي وافضح رضا

وهواي حچي وانا اسمعها شلون تبچي ما اتحملت طلعت واجيت يمها ما ادري شسوي اريد بس افتهم ليش اذا تريد

 اخوي ليش ضحكت عليه واذا رايدتني ليش قبلت باخوي اتدنيت يمها وگتلها 

- - سكنه ليش خنتيني 

هي جمدت بمكانها اتدنيت اكثر باوعت الها والذاك الوجه الملائكي المتروس دموع تگول خرز ليلو باوعتلي وگالت 

- - رضا انا ما ..

رفعت ايدي يعني اسكتي وحچيت

- - شني انتي شتردين تگولين ولج ويه اخوي عفتي السلف كله وما لا گلج اله اخوي ليش 

ما احسيت لك اله الراشدي بخدي وهي ترجف وتگول 

- - ايا نذل ولك انت تشك بيه انا انا اريد حسن والعب عليك چا مو حسن هوالي يعرف بعشگنا ولك مو من 

رحت هالمره گتلي راح احاچي حسن واخلي يخطبچ من ابوچ وهو اجه الابوي وخطبني 

ابحده ومن گالي ابوي انا رضيت لدالي الك واجه ثاني يوم وجاب الجاهه جاب السلف كله وعد وانا 

فرحانه راح اصير الك وگالو اجه السيد يريد يعرف انتي راضيه يو لا انا من فرحتي ما دريت السيد جاي يعقد 

هو نشدني //عمي انتي راضيه 

انا گتله // اي راضيه

گال ردي وراي وهنا المصيبه من سمعت اسم اخوك هو رجلي اهنا ما عرفت شحجي وشكول 

اگول لا والدنيا مگلوبه وحتى امك تدري شگول اگول لا حتى يگولون بيها شي واهلي يذبحوني وابوي واخوتي 

يمشون راسهم بالگاع هاي المصيبه روح انشد عليها امك واخوك مو جاي تتهمني

دارت وجهها لزمت ايدها هي عتتها وگالت بحسره // لا رضا انت هسه محرم عليه حرام 

وراحت تبچي واسمعها تگول

اريد اسأل گليبي شخذ وشرد 

وليش بغفله عني ابتعد واشرد 

لون تدري بگلبي شطلب وشرد 

يريد يصير الك ويصير اليه 

الدمع ظل يفرك بخدي ودله 

ومشيت وياي ما تدري ودله 

ياهو الجابك الگلبي ودلاك 

تهت وبس روحي ال ادور عليه

وراحت سكنه وانا اسمع شهگتها رجعت للبيت ولگيت امي نايمه اتدنيت عليها وگتلها وانا ابچي 

اگعدي يمه ادري بيج ما نايمه 

هي گعدت وباوعتلي وتشوف دموعي گالت //رضا يمه اذكر الله والنسوان اهواي 

- - يمه لو النسوان اهواي ليش حسن ما لگى اله سكنه ياخذها سكنه يمه مو تدرون بيه رايدها ليش مو 

هو يشوفني اريدها ليش يمه دنت نفسه عليها 

امي بنتر //وهي ليش رضت ما گالت ما اريد ما لي نفس بي شو بس نشدها السيد تگلى موافجه

- - يمه انتي هيج تحچين ليش يمه تردين تگولين هي رايدته تطلعين ابنج بري 

امي نكتت زيجها وگالت //استغفر الله بس هي من نشدوها رضت وبيومها لكيتها لابسه دشداشه 

جديده وفرحانه الما تريد ما تبدل وتسولف وتضحك 

انا گمت فكيت الجام خانه مالت البوفيه وطلعت القرآن وگتلها 

- - احلفي يمه احلفي من رضت سكنه رضت على حسن مو لدالها جايين تخطبونها اليه

امي باوعتلي وبعيونهاعتاب وهي تگلي 

- - يمه رضا اخوك رادها وعاشگها ويعرف بيك انت تريدها بس هو ما گدر اله ياخذها 

باوعتلها بعتب وانا اعض بصبعي // وانتي رضيتي يمه ذبحتيني واخوي حرگني 

اتدنت يمي امي وحبتني بخدي وهي تگلي 

- - مي خالف يمه باچر اخذلك اغاتها بس لا تتفارگون وتعاركون على مود مره ومني بت عمكم 

يمه رضا (وبچت ) ادري بمصيبتك چبيره بس اسكت يابني الخاطر سكنه ابلعها واسكت لاتنشهر البت 

وهيه مكروده

طلعت وگفت بالباب وهي تباوعلي ظليت ذيج الليله بره ما ادري شسوي اروح وانهبها وافضحه بس شنو ذنب 

اهلها لو اخلي ياخذها لو اكتل حسن الفجر 

گعدت شفت امي تحلب بالهوايش رحت للحجره وطلعت البندقيه 

ورحت اريد اكمن اله ومن يجي اكتله امي شافتني طاح سطل الحليب من ايدها وهي تگلي

- - يمه فدوه اغديلك لا تكتل اخوك يمه ادري بي هو نذل بس انت يوليدي لا تضيع روحك على مود شي ما يسوه

انا ما سمعتها ركضت راحت اتصيح السكنه تدري بهذا الوكت تحلب بالهوايش لحگتني وهي تگلي 

تحچي بعبره ودموعها تنزل //رضا انا ضعت انت لا تضيع روحك 

انا بالي مو يمها ردت عليه وگالت //ولو كتلته عبالك تاخذني ياهو يطيني الك رضا الخاطري

صارت كدامي واخذت البندقيه وبچت حييل وگالت 

- - انا احبك واظل احبك وها گدام امك لو يصيرون عدي عشر اولاد من حسن اظلن اكرهه لو يصوغني 

ذهب بس يارضا انا كل شي ما اريد بس اشوفك سالم انا راح اخذ حسن واشبع مغمه وانت تبقى 

سالم هذا هو ما اريد بعد شي

اخذت مني البندقيه وگعدنا انا وياها وامي وصرنا نبچي بس المرار والحرگه المرت عليه ما تنوصف 

بيومها اجه حسن انا لا سلمت علي ولا عاتبته هو اجه يضحك وگلي 

شني رضا ما تسلم عليه وتباركلي

سكتت بيومها وانا احس النار تطلع من راسي وظليت ما اجي للبيت ولا اوصل 

سالته ::وين بقيت 

- - من ارد من العسكريه عدنا گاع بعيده متروكه كل سنه ناجرها على فلاح رحت بنيتلي صريفه وگعدت بيها وحتى 

العرس ما حضرته ولو تشوف شصار بيه يوم العرس ردت اكتل روحي وانا اشوف حلم عمري انباك مني

ظليت ابوحدي وامي وعلي يجون من اجي من العسكريه ودريت بسكنه حبلت ودريت من علي هو يوميه يكتلها 

وعلي يكلي ما شافها يوم من الايام تضحك وجابت ولد ومن خباثته سما رضا ما ادري ليش  

وانوب حبلت وجابت بت سماها صفا وانا ما احچي ويه حسن  

وادري بي شگد چان قاسي وياها ويكتلها

سالته ::رضا حسن اخوك الي كتله ابن عمك وانت كتلت ابن عمك على مود اخوك 

جر حسره وهز راسه // سنة 2002 عمر بته خمس تشهر حسن بوكتها اشترى گاع من واحد والگاع يم بيت 

عمي واظن ولد عمي معاملين عليها بس حسن مزاود وماخذها چان اخو سكنه سبحان الله نسخه من حسن بالخباثه 

بوكتها هو رفيق حزبي وشايف روحه واتعاركو ع الگاع كل واحد يريدها اله وصار بيناتهم 

حجي واتهاددوا هذا طلع البندقيه وذاك طلع المسدس واخوها رمى حسن طلقه وحده ما خطت گلبه 

فتحت عيوني ع الاخر :: اااه

هز راسه // ومات اخوي كتله اخو سكنه وخال ولده چنت بالكاع كاعد لمن اجوني الناس وخبروني 

عزيز ابن عمي كتل حسن اخوي 

بيومها ما تعرف شعوري بين حزن وقهر وبين فرح لان اخوها السكنه اخذ ثاري بس على حساب سعادتها

اترملت وهي عمرها 177 سنه وعافت جهال اثنين لازم بعد ما تشوفهم يبقون عدنا 

واخوها تشمخر بالزايد وصار يتحارش بينا ويسمعنا كلام

انا بوكتها ما اخذت ثاري منه لان حسن چان غريمي بس بنفس الوكت اخوي وهاي چبيره كون اسكت عن ثار اخوي 

وانقسمو عمامي نصين نص يگول نكتل عزيز ونشيل ونص يگولون عمام يفصلون ونرضى بالفصل 

ويردون يگولون الراي اول وتالي بيد اخو واحنه عمامك او وياك بس هم لازم تفكر 

واهل سكنه ما سكتو ودوا تهديد بس رضا يسوي شي راح ناخذ علي وناخذ الگاع كلها ونگول منتمين 

الحزب ال ......

بوكتها امي گالت //يمه ارضى بالفصل لا تتفرهدون انت واخوك وعليك ياثار شمحصولي يمه 

جاوبتها //. والناس تكول خاف من اعزيز ساكت وراضي بالفصل 

امي هزت راسها //. اي يمه وكلها الناس تخاف من اعزيز بس مو تخاف منه هو. لا تخاف من الحزب 

نسيت شسوى ابيت بدوان مو اخذ اولادهم لمن ما ودولهم ناس اتوسطت وطلعهم بهاكثر فلوس

قبلت يفصلون وگعدت العشيره وگالو شتريد رضا فصل واحنا

الفصل الرابع والعشرون من هنا