رواية بنات الملا الفصل الثالث والعشرون بقلم رغد الموالي
لا تنسى قلبي المنكسر
لأريدك يوماً ما أن تأتيني بالأعذار!
رغد الموالي
..........
زمرد... بعد عقد السيد النه وبعد ماراحو الزلم استأذنت ام احمد حتى يدخل السيد احمد ونتشاوف لااول مره !
وي دخول السيد احمد علت الاصوات بالصلاة على محمد وآل محمد وصارو يهنوه
مبارك سيدنا الف مبارك
وهو كان يرد عليهم
لما رفعت راسي شفته كان مهيوب حتى وهو برد السلام بطريقه وديه تزيده احترام
جنت طايره طايره من الفرح متوقعت بيوم راح افرح هيج جنت احيانا افكر واتسائل
ياترى الرجل الي راح يكون زوجي بيوم من الايام شلون حيكون شنو يشتغل شنو اخلاقه شنو الاشياء الي يحبها والي مايحبها
راح يكون حنين مثل ابويه وي امي لو العكس
ياترى حيكونون عندي اولاد او لا
راح اكون بيت وحدي لو وي اهل زوجي
لما كعد قريب مني انتبهت اله وارتبكت كلش
كان خجل نوعا ما وعينه تركزت على الارض ولا رفعها حتى عليه
اجت ام احمد يمنه
بسم الله الرحمن الرحيم تبارك الرحمن
ماشاء الله
الله بهنيكم ويكتبلكم الذريه الصالحه
ام جواهر... ذريه مباركه ان شاء الله تكون
ام احمد... ان شاء الله... جدهم رسول الله واكيد حيكونون ملتزمين وباريين مثل ابوهم
اخذتهم السوالف لاامي والنسوان واني وسيد احمد ساكتين ومدنكين بالارض لاهو تكلم ولااني
مره انتبه لااختي جواهر كل شويه تكوم على جهالها مره ياقوت كل شويه تجيب مره ماي مره عصاىر وتقدم وملتهيه باوعت لماس اشرتلي بعيونها على السيد انو اكلمه وتلوم بيه بنضراتها
باوعت لاامي هي وام احمد مندمجين بالسوالف على خيريه بنت عبد المطلب والي مااعرفها منو بس طلعو ثنينهم يعرفوها
اخواته ثنين يتكلمون مره بيناتهم مره وي جواهر
رجعت دنكت اجت ياقوت
سيدنا ماتريد ماي
السيد احمد... لا اشكرج
ياقوت... زمرد جيبيله عصير للسيد
التفت عليه... لا اشكرج
كتم ابتسامته
وياقوت راحت وهو تكلم
شلونج زمرده
زمرد... اني زينه الحمد لله
السيد احمد... زمرده انتي خو مااحد ضغط عليج علمود زواجج مني
زمرد... لا لا ابد سيدنا
السيد.. شنو سيدنا اني زوجج على سنة الله ورسوله يعني تصيحيلي بااسمي
زمرد... بس ميصير مو انت سيد يعني لابس عمامة رسول الله هم
السيد... اي بس هذا مايمنعني ان اصير حالي حال البقيه وزجتي تصيحلي بااسمي
اني هم اطلع واسافر واقضي اوقات مع الاهل والاصدقاء يعني قابل اختلف عن الناس
دنكت خجل
السيد احمد... اني احمد الله عز وجل ان اكرمني بزوجه جميله وحسنة السمعه مثلج زمرده
خجلت ودنكت...
دره .. مرت الايام وحيل اشتاقيت لرائد ماكو شفته بعد ما جواهر عرفت بينه مره صعد للسطح وبعدها ماكو ولايدز رسايل ولايصعد صرت الوب
مرتين اجت ام رائد ويكعدون يسولفون هي وامي مااعرف عن شنو
بيوم سمعت صوت هلاهل من بيت رائد
راحو خواتي يباوعون من ثقب الباب واني روحي فرفحت ردت اشوف
شفت رائد ويا اهله وناس نسوان ثنتين والاب وجانو يطشون لرائد ولمره يمه جكليت
من شفت ايدي ثلجت واحس اذاني صوفرت وتعرق بجسمي وراسي صرت كلشي مااسمع وراها مااعرف شنو صار فتحت عيني بالاستقبال مدده وابويه يمي وامي كاعده وتبجي
دره... ها بابا شنو صار ليش اني هنا نايمه
ام جواهر... دره يمه عيني شبيج امي قلقتينه عليج
ابو جواهر... شلونج باباتي
شبيج ياروحي انتي شنو الي مأذيج
دره... مابيه شي بابا
ابو جواهر... الطبيب كال هبوط بالضغط همزين ما صار بيج شي
دره... مابيه شي بابا
اجت جواهر... دره يعمري انتي شلون صرتي
من شفت جواهر حضنتها وبچيت وهي حضنتني وطبطب علىه
لاتبجين عمري انتي
ابو جواهر... شبيج دره ليش تبجين
جواهر... دره خايفه بابا هي جانت تتفرج فلم البارحه وحيل خافت ولهسبب حتى ضغطها هبط
ابو جواهر... لا مو هذا السبب دره بنيتي ضامه على ابوها شي
دره... لا بابا مابيه شي بس مثل مكالت جواهر خفت البارحه جنت اشوف فيلم رعب
هز براسه بقبول رغم اني وجواهر ندري بي مامقتنع كام وطلع بره الاستقبال وصاح لاامي وراحت وراه
جواهر... بهمس.. ياغبيه فضحتي نفسج
دره ... بدموع وشهكه... خطب جواهر خطب وعافني
جواهر... كتلج كذاب كتلج يكذب
دره... لا جواهر مستحيل يمكن اهله ماقبلو يخطبوني
اي
لان مشلوله ومااكدر اكون بيت وعائله مو
يمكن هو هم هيج حس بيه
جواهر... اتركي هسه الضنون وارتاحي تره حتفضحين نفسج زحمه من ابويه
دره... جواهر احس روحي حموت الهوى مدايدخل بريتي مختنكه جواهر
جواهر... ولج شبيج لاتخبليني اصيح لاابوي
دره... بدموع... لا بس كوميني كعديني جواهر احس واني مدده حجر جبير على صدري
جواهر... اكعدي دره هاج هاي مخده وره ضهرچ وارتاحي
دره... جواهر ليش كسر خاطري ليش عافني ليش خلاني احبه
جواهر... بعدين نحجي واسألج وتجاوبيني هسه مو وكته هذا الكلام
دره... اريد اشوفها لخطيبته احلى مني؟
ها
وفضلها عليه
جواهر... لا دره لا
مو لان احلى منح اني متأكده انتي احلى منها
ومتأكده هو تزوحها برغبة اهله مو برغبته
هو رادج انتي وحبچ انتي
وراح يبقه يحبچ بس انتي تعرفين
الاهل الهم الدور الاكبر لان هذه حياة وهو على طول بره وحيخليج وي اهله وانتي وي اهله تتعبين لان ضروفج خاصه
لهسبب مارادج تتعبين وتتبهذلين
دره... ويكسر گلبي
جواهر... هو احساس صعب صحيح بس تتخطي كم يوم وتتعودين بعدها تبدين تتناسين لحد ماتنسين
بس لو كنتي وي اهله كان بقت معاناتج
دره... اني احبه جواهر حيل احبه مستحيل اتقبل وحده تعيش وياه واني هنا باقيه اتعذب مااكدر
جواهر... ارتاحي هسه وبعدين نحجي
اكوم اشوف امي خاف محتاجه
كان يوم قاسي جداً على دره
ماكانت متوقعه هذا الغدر من رائد
كل ماتبقه وحدها تبچي ومن يجون اهلها تمسح دموعها وماتبين شي
كآبه مفرطه وحزن واضح يعتنق دره وأصعب مافي الامر حبيبها الي تركها من دون ان يوضح اي مبرر
تركني وكأنني لاشيء ك الهوى!
تركني بين دموعي التي عن الناس لاتُرى
تركني مع قلبي الذي يرفس ك الطير
وعقلي الذي يلومني فأقول له كفى!
إنه محبوبي حتى وإن هجر
هو الروح هو النبض وانا لاشيءمن دونه فكفى!
لن تعرف شيئاً عن العشق
مالي بكَ انت أفقدك أنت
وينادونني بمجنون العشق فتذهب انت ويبقى هو مخلدا....!
لماذا تركتني يارائدا؟
بقلمي... رغد الموالي
كانت الايام تمر وتتوالى ماتنتظر احد ولاتراعي مشاعر أحد
ياقوت... يمكن تعودت اشوفه واكف من بعيد يترقب جيتي
مرت فتره وهو ماكو مااعرف شنو هذا الشعور
لا هو حب ولا هو كره لا هو اهتمام ولاهو اهمال
مشينه ولاكتنه حلا
حلا... هلو بنات كلت تأخرت بس لاعفتوني
ياقوت... لا احنه هم تأخرنه اليوم
ماس... شبيج تتنفسين سريع
حلا... شكلج والله
كوه تحضرت واجيت جنت اساعد امي بالبيت
آسر ابن عمي واكع من القمريه ومكسوره رجله ومضروب براسه ونايم بالفراش حرارته مرتفعه مجاي تنزل وهسه حياخذوه للدكتور ديشوفون ليش
وهوسه وخطار مدانلحك
ياقوت... جنت مركزه بكل كلمه دكولها
وشوكت هيج صار ويا
حلا... من كم يوم والله خطيه كلش متأذي
ياقوت... هو شلون يعني هيج وكع
حلا... دايشدون قمريه والقمريه عاليه مال عماره وصاعد هو فوك ليش ما الحديده الي مثبتيها حتى يصعد عليها ممثبتيها زين جان توكع هو تمسك بالبدايه بشيش جان طالع من الحايط بس جص مال حايط دخل بعينه ووكع
امه اجت عليه وطردوها عمامي كالولها هسه تذكرتي عندج ولد
ياقوت... خطيه ليش
حلا... هي عافتهم هم وصغار وتره الدنيا بعبت بيهم لعب يعني صدوك هسه جايه خايفه على ولدها
ياقوت... كان سماعي لهذا الخبر حزين ومؤلم
حتى طول الدوام واني افكر بي لما رجعنه من الدوام لكينه آزر وعمامه بالباب وصياحات وعراك ووهو مستند بعكازات ومتكأ على الحايط ساند راسه بالحايط
آزر.... ثقو بالله اطشركم ومترفلي جفن خاف عبالكم آزر قبل نفسه لااااا اصحوووو
ايهاب... بالقران اذا ماتسد حلكك وتنجب لا ااروح ابلغ عليك
آزر... بوجهك للمركز.. اني ماتخوفني لا حـ،كومه ولا أكبر سلطه بالد،وله
الياس... ولك كافي سد حلكك وروح منا اخوك بيا حاااال
ازر... نطوني جوازه اسفره بره يتعالج
ايهاب.... وهو شبيييييييي شبيييي دتسفره
واكفين صياحات بالباب اول ماانتبه لجيتنه عدل راسه وباوعلنه
شفته چان ذبلان وجهها وجوه عيونه مطعونات ومبين متأذي حيل
باوع لاأهله وباوعلي بنظرات كلها
حزن
وأسف
وخيبه
چانت عيونه تشرح كلشي وكأنه يكلي هذوله اهلي شبديه
امشي ولاكأنج شفتي او سمعتي شي
مشينه من يمهم حنطلع الفرع التفتت عليهم شفته يياوعلي بعده
احس گلبي طار من الفرحه ومشيت حد ماوصلت للبيت
فرحت حيل من شفته احس طايره رغم هو حاله تكسر الخاطر
صرت اسوي كل شغلي بواهس واغني والاعب الهواء
جانت ماس تدرس يمي واني ارتب كنتوري
ماس... شفتي لاازر اليوم شلون متخبل على عمامه
ياقوت... مخبل مثلهم
ماس... يريد يسفره لااخوه
ياقوت... اي سمعته والله عيب يوميه صياحاتهم لراس الشارع
ماس... حلا سولفتلي عن آزر كالت عنده فلوس يابو فلوس وكل مايجي ينطيها فلوس
ياقوت... اي وشعلينه احنه
ماس... لا هيج داكول بس شفتي سيارته
ياقوت... بصراحه تخبل اني اول مره اشوف هيج سياره
ماس... من عاف بيت جده وللشغل وي عمامه ضال يلعب بالفلوس
ياقوت... وانتي ليش هيج مهتمه بي وبأخباره
ماس... لا هيج عابتلج بس اول مره اشوف شاب بعده بهذا العمر هيج مكون نفسه
ياقوت... حسيتها مهتمه بي او بالاحرى معجبه بي
باوعتلها ردت انصحها بس شگلها
واني صرت مثلها او يمكن اكثر
أعيش بصراع چبير بداخلي مابين قلبي وعقلي
قلبي ميّال وعقلي رافض
اول مره احس بشعور حلو وغريب واحس اني فعلا عايشه اول مره احس بروحي بنت وانو لازم تنحب
لازم تلكه شخص يهتم بيها ولو بنظره
صرت اني اتمنه اشوف آسر ويوميه قبل لايطلع ادعي كون موجود
باليوم الثاني اختي ماس بطبعها فضوليه فسألت حلا
ماس... ليش البارحه يتعاركون عمامج ولد عمج
حلا... هذا آزر تعارك وي عمامي علمود آسر
لان آسر صحته تعبانه والوكعه حيل مأذيته ف آزر راد ياخذه ويرحون لبنان يتعالج عمامي ماقبلو
ياقوت... لهاي الدرجه متأذي؟
حلا... لا والله هو يكدر يكوم ويكعد بس متوجع وكاله الدكتور هنا لان بعده يرادلها ايام بس هو يلوب يريد يروح للشغل مامتعلم يكعد بالبيت بس آزر خايف عليه لان هو وصغير مره ضربه عمي مهاب وتأذه بظهره وهسه هم على ظهره وكع ومتأذي ويكلهم خاف اخويه يصير بي شي العمود الفقري مالته كلش مأذي البارحه كالي حلا تعالي دلكيلي ظهري راح اموت من الوجع
ياقوت... ودلكتيله؟
حلا... اي غير متوجع
ساد صمت ثواني بعدين تكلمت... تره اني وولد عمي اخوه يعني مايباوعولي بنظره ثانيه ومايصيحولي غير مرت اخونه فلا تتفاجئين
ياقوت... لا لا عادي
حلا... اي خطيه دلكتله امي جابتله حليب جاموس كالتله اسر لازم تشربه وهم خكيه شربه
بس الي اذاه مو هاي الي اذاه امه اجت عليه سامعه بي مريض وهو تخبل ماقبل يطلع عليها
ام حلا... كوم آسر على امك خطيه اجت تشوفك
آسر... روحي كليلها ترجع منين مااجت هسه تذكرت عدها ولد
ام حلا... لاتحكم عليها آسر انت متعرف سنو ضروفها
آسر... لو ابو الضروف مو اقوى من ان تتخلى عن ولدها كافي يوم يرحم اهلج تره صدري تعبان مااكدر اعلي صوتي وانغث كليلها خل تطلع
ام حلا... امري لله شسوي رايحه اكللها
شويه واجت عليه ام اسر
ام آسر... آسر حبيبي يمه ليش متقبل تشوفني
ماردلها ودار وجها عنها
ام آسر... حقك تدير وجهك بس والله متعرف انت بشنو مريت بيتك جدك جان أأمن مكان اخليكم بي اعرف عمامك شرانيه بس وي العالم مو وياكم
اسر حبيبي بس باوعلي والله كوه اجيت اني
اني اتابع اخباركم على طول
من كالولي ابنج واكع ومتأذي روحي طارت
يمه فدوه يبو طول الحلو صاير رجال
لحيه وشوارب
چنك عمك شهاب نسخه منه انت يمه بس ماطالع مثل اخلاقه عمك شهاب چان احسن واحد بعمامك انت ليش هيج
آسر... من دون مايباوعلها
كملتي كلامچ.... كومي روحي
نزلت دمعتها وصارت تبچي وطلعت مباشرة وام حلا أكلت گلبه بالحچي
ام حلا... ولك حرام عليك هاي امك شلون هيج تحاجيها خطيه كسرت کلبها
وهو مايرد
حاجيني باوعلي
لاتصير مثل اخوك آزر المستهتر شوفه محد صار يحبه لان ابو مشاكل انت لاتصير مثله
انت الطيب والهادىء خليك مثل ماانت لاتتطبع بغير اطباع بعدين حرام عليك هاي امك
وين بر الوالدين اسر
ليش هيج
آسر.... والله؟!
بر والدين!
ياوالدين هاي؟
ياام تحچين عنها يوم
الام الي عافت ولدها ايتام مكفخه جوه ايد رجلج ومهاب هاااااا؟
وين جانت كل هاي السنين وهسه جايه بعد ماصرت رجال ومبحال احد جايتني
وين جانت
من عرفت تتزوج وتغفى عينها بفراش ناعم مافكرت بجهالها ماكالت ولدي الله اعلم بحالهم شنو
من تعرف قساوة مهاب جان تخاف علينه منه
ام حلا... عمك مهاب مجان عافها بحالها هي مره وهو رجال وانت افهم
اسر... تتزوجه علمودنه مو تروح تتزوج غريب واحنه نصفه لاام ولااب
ام حلا... وتالي وياك اسر
اسر... عوفيني بحالي تره متوجع وروحي طالعه
ام حلا... ماتروح للدكتور
اسر... لا مااروح خليني هنا ماعاد الله ياخذها لروحي ويريحني
ياقوت... وليش هيج يدعي على روحه
حلا... هو كارهها للعيشه ويانه وآزر اخوه طلع مايشتغل بالحداده وآسر من يومها يريد بس يعرف آزر وين دايشتغل وين يروح وين يجي مايدري عنه شي بس آزر شوكت مايحب يظهرلهم اجاهم من يروح بعد محد يعرف عنه شي
هو تعبانه نفسيته من فتره ابويه كله دنزوجك وهو مايقبل يتزوج
ياقوت... ليش
حلا... ماادري حتى مايقبل احد يفتح وياه موضوع الزواج
الايام صارت تتوالى تروح وتجي وحزن دره بخلال هذه الايام ازداد وكان واضح عليها
خصوصا بعد ما حان زواجه لرائد وحنته صارت باب البيت الاغاني والهوسه
تعبت دره حيل وكان ذبلان وجهها واكلها قليل
اجت بيومها جواهر وكانت المؤنس الوحيد من بين اهلها
دره بصوت تعبان وهمس... جواهر.... اريد اصعد للسطح
جواهر... شتصعدين فدوه لعينج اكعدي واسكتي
دره... بس اشوفه شلون طالع
جواهر... راح تتعذبين
دره... بجت بكسرة گلب.... وهمست.... انتهت قصتنه
الاصوات عاليه أشبه بعلو الصرخات التي في قلبي
وكأن قلبي هو الذي يصرخ فيصدر صداه كلحن يتراقص عليه الساذجون
وهو واقف ليس فرحاً بعرسه بل يتنغم على ذلك اللحن
وكأنه دخل معركة فقتل قائد الجيش فوقف فوق جثمانه
يتفاخر امام جيشه بالنصر والهزيمة لذلك القائد
يالك من متمرد قاسٍ مراوغ!
الساعات تمر ببطء متعب ماكنت متوقعه ان راح اتألم
لهذه الدرجه وكأن روحيي تنتزع من جسدي ببطء
فكرت لو خلدت للنوم راح ارتاح
النوم بالنسبة لمن فقد محبوبه هو موت مؤقت يريحه لبضع ساعات !!
لكن ما إن تمددت حتى داهمتني ذكرياتي
وكأن ذاكرتي هي الأخرى تحالفت معه في هذه المعركة الخاسره!
كان الصمت هو العلاج الوحيد الذي يواسيني
لكن ذاكرتي خانتني
وعقلي يقسو عليّ كأمي حينما كانت تغضب مني حينما أفعل شيء خاطىء
اما قلبي فهو ثائر بنوحه كطفلٍ فقد أمه وهو مازال رضيعاً
أما أنا أهرب لمن وممن ؟!!!
الان أنا لست عاجزة عن السير على قدمي أنا عاجزة حتى أن اجعل نفسي تقف من جديد
ام جواهر... شبيج دره يمه صارلج كم يوم معاجبني وضعج شبيج احجيلي فتحيلي گلبچ
دره.... مابيه شي يوم مابيه
ام جواهر... شوفي بنتي دره بهذه الحياة مو كلشي نتمناه لازم يصير أحياناً رب العالمين يبعد عنا أشياء لان مو لصالحنا لان لو صارت ممكن تأذينا ممكن تخلينه نصير ناس غير لذلك الله يبعدها عنا
احنه منعرف ليش ماصارت نبقه نبجي وندعي ونتوسل برب العالمين ان تصير لكن ماتصير
وبعد مده تصير الافضل ساعتها نگول الحمد لله انها ماصارت أو الله عوضني بالأفضل
يابنتي هذه الحياة مرها صعب بس احنه لازم نكون أقوياء وماننكسر
أنتباني بكاء ورميت راسي بحضن أمي وبچيت
بكيت في حضن أمي حتى أرتاح قلبي
تُرى كيف يرتاح من ليس لديه أم ؟!
ياقوت... يلا ماس تأخرنه امشي
راحو للمدرسه يركضون الدنيا صبح وكعدو متأخرين
طلعت وتنفست بعمق بإمتلاء الرئه
صوت العصافير على شجرة التكي وريحة التراب المبلل
أسر خاطري
كانت الشمس تتسلل بين اوراق الشجره
ريحة الشاي وصوت الاستكان
اشياء بسيطه لكن تحسسك بالحياة بالأمل....
زمرد... يمه السيد احمد يكلي اني مااحب خطوبتنه تطول يريد نتزوج خلال هذا الشهر
ام جواهر... واني هم ماريدها تطول يروح احد يموت او تصير مشاكل بس جان كتيله نصبغ البيت نرتب وبعدها نتزوج
زمرد... كتله يمه بس يكلي خاف تطولون وحرام عليه ابقه اطب واطلع واني ماماخذج كدام هالناس بزفة عرس
ام جواهر... السيد أحمد انسان محترم ويخاف الله
وان شاء الله يخاف الله بيچ
زمرد... الحمد لله ان كان نصيبي من احد عباد الله الصالحين
ام جواهر... دعوات ابوكم بصلاة الليل ورضا عليكم
.......
حلا.... كانت الأيام تمر ببطىء على آسر ليل نهار كاعد بالبيت مرات من ضوجته يكعد بالباب
صار يمشي على العكازات
آسر بطبعه كتوم وهادىء أحيانا لو تتمزق روحه مايتكلم
امي جانت تحس بالمسؤوليه تجاه اولاد عمي
ام حلا... حبيبي آسر ليش اشوفك هاي الفتره هواي تصفن وساكت ماتحجي عيونك بيها ألم بيها تعب
أحجيلي وليدي اني هم مثل أمك
آسر... إحنه اذا نخلقنه دانتعذب ليش ندخل النار لو اخطأنا
ام حلا... كلامك هذا مامقبول آسر... هذا اعتراض على الوجود وعلى حكمة الله
آسر... اني داسأل يوم
ام حلا.... الله خلقنا للعباده... لكن الناس هم بيناتهم صارو واحد يأذي الثاني
آسر.... ليش ماخلق البشر كلها طيبه
ام حلا... ليش الميزان مايتوازن لو خلينه كيلو بجهة والجهة الثانيه فاضيه؟
آسر... لان مايصير لازم كيلو بالجهة الثانيه حتى يتوازن
آم حلا... وانت كلتها
لهسبب لازم مثل مااكو خير اكو شر
مثل مااكو ضلمه اكو نور
لكل شي خلقه الله زوجين
الا الصبر كان وحيد
فياابني خلي عينك بعين رب العالمين وترضى بالاخير
آسر.... بتعب ممل...نظرلها ببطىء والتفت يمنه ويسره ورجع اخفظ راسه مثل الي مضيع شي
تكلم... اني مخنوك وتعبان اريد اكعد بالباب حطلع شويه بس ساعديني وصليني بالكرسي حتى اكعد عليه
ام حلا... باابتسامه راضيه... امشي اوصلك
كعد بالباب متكأ على عكازته ويتنفس بعمق ويتأمل بالرايح والجاي
واخذ يكلم نفسه
ناس تروح وناس تجي وكل شخص يمر بهدوء من دون مايتكلم
الله أعلم شنو من كلام برؤوسهم شنو من حزن يمرون بي
او سعاده يعيشونها او حتى ينتظرونها
في هذه الاثناء اجه أزر بسيارته
ونزل
كان يرتدي قميص اصفر مفتوح الازرار من فوق وتتوسطها ميداليه كبيره وبنطرون ونظارات شمسيه
من هيئته واضح انه شقي مع حركاته الشقاويه
رفع احد حاجبه وتكلم بثقه مع ابتسامه مخفيه
ــ ها ولك كاعد هنا
أسر... رفع راسه قليلا بعدها اخفظه وتكلم من دون مايباوعله
وين اروح لعد هاي تگرمت وكعدت
أزر... اجه كعد يمه طلع سيجارته واخذ يشعلها ويتكلم
أسر انت بقيتك هنا دمارك يعنيانت راح تدمر عمامي مو اودام وراح يأذوك
آسر... وتريدني اجي وياك
آزر... شنو رأيك انت مو احسن
آسر... وشنو تشتغل وين داتروح وين داتجي وين تنام
آزر... وداعتك احسن مكان واحسن شغل بس انت اريد الله يهديك وتجي وياي
آسر... عوفني آزر اني هنا عايش ومتحمل بيت جدي بس لجل عيون وحده خلت يصير عندي أمل بالحياة جديد
آزر... حبيت؟
آسر... من زمان وحموت عليها بس مااكدر اتزوجها هنا او يمكن ابوها اصلا ماينطيها الي
آزر ... وتتوفع تقبل بيك بهذا وضعك انت لابيت ولاسياره لاشهاده والبنات هسه يدورون كل الي ذكرتها
آسر... حتى لو مارادتني اهلها مانطوها حبقه أحبها بگلبي هي عايشه
آزر... دامك تحبها هيج لعد محتتزوجها واهلها مينطوها او يمكن هي
وسكت وباوع للقادم واصدر صوت صفير
ورجع التفت لاآسر لكاه هو الثاني يباوع ومو يمه والابتسامه بوجها كل هذيج الكأبه راحت
صار يهمس لاآزر من دون مايباوعله
مرتب أني شعري شكلي ملابسي مرتبه
آزر... اي مال ناس تحب من كل گلبها
اقتربو وبعدها استدارو للطريق الثاني مكملين الطريق
آزر... ويكلك طحين ماكو لعد هذا الكيك منين
آسر مستمر بالنظر من دون ماينتبه لااخوه او شنو گال
ركله بعكس ايده
ولك مو داحجي وياك آسر هيييييي
آسر... شتريد
آزر... ياهي منهم
آسر... ياقوت
آزر... واني اعرف اسم الثانيه حتى دكلي اكلك ياهي ام الجنطه الزركه لو الورديه
آسر.... الورديه
آزر... تكلم باارتياح وكأنه كان جبل هم على صدره وانزاح اييييييي ريحتني
راح اروح عليهم الحكهم
آسر... عوفهم يمعود
آزر... هسه اجي
فز بسرعه وراح عليهم.....
سوف نقع بالحب يوماً ما مهما قلنا ذلك مستحيلا ً....
شكرا لزيارتكم عالم روايات سكيرهوم
