رواية بنات سهر الفصل الثالث والعشرون بقلم فراقد حسن علي
سوار/ حبــنه بالــصدفه بــدة 💗
لاشايــفه و لاشــافنــي ؟💑
دفــاني بــسوالف عشــگ😍
علمــني احــبه وعافــني😭
كاعدين بليل كلنا بالصالة
ومنتصر جاب بس حسين يبجي علينا خطيه مايرتاح بيت أمه
اني كاعده وسانده ظهري على القنفه
ومفرشه بالكاع ماده رجليه ومغطيتهن بجرجف
وحسين كاعد بحظني يعني منطيني ظهره
وساند راسه على صدري
ومدد رجليناته ويه رجلية
وادلك بشعره واسولفله شنو اشوف بالتلفزيون
وهو يسمع ويركز على صوت الممثل يكول هذا فلان
جنا مندمجين نتابع مسلسله تركيه جديدة
أسمها العشق الممنوع
اني أحب مهند هوايه حلو
وهو حسين يحب نهال
ولمى بس ادافع السمر شكد اكرها
وحده مكروهه وشايله خشمها
طارق ومنتصر وعمو حاتم وهمام
ماخذيلهم زاويه يلعبون ورق
ومسرة صعدت فوك تريد تسبح
وخالتي ولمى كاعدات يكرزن حب شمسي
ويتابعن ويايه المسلسل
وهن البارحه يلا أجن من بيت نهى
وهم يصيرون بيت خالهم مو غربه
خطية جابت ولد صارلها هوايه
بس اجى للدنيا مريض
يوم عنده العفو أحتباس مايدرر
اخذوة وطهروه ،
ويوم مايسكت وبس يبجي طلعت ايده مخلوعه
ودوه للمراه التعرف سوتها
ويوم اكتشفت عنده خلل العفو جوة المثانه ودوه للطبيب كال /هذا فتق ولازم عمليه وسوتله عمليه وهو خطيه عمرة اشهر وكامت تبجي وهوايه مقهوره عليه
عادت راحتلها خالتي ولمى هم يساعدنها ويدارن صغير
وهم شويه يخفف على نفسيتها
عمو حاتم من راد يروح البيته كال لطارق/ كوم جيبلي البوم الصور شكو مخمره عندك
جاوبه طارق / ابو جواد بغرفتي فوك ومابيه حيل اصعد
باجر الصبح اجيبه ويايه
بيش ساعه نغبش ؟؟
جاوبة عمو حاتم/ بكيفكم
شوكت ما جهزتوا انطوني علم
منتصر كال / ابو جواد خليها عكب باجر
مرتي ماعدها صور باجر اكصلها صور ونغشبش ان شاء الله من الصبح
طارق باوع علينا وصاح / خاااايب يالمطي وين نايم على شيب الخلفوك كوووم خنكت جهالي
منتصر صاح عليه/ شبيك ووجع
كاله / ماتشوفه مسوي مرتي وجهالي
دوشك ضغط لشيب الخلفوه ومرتاح كوم لو اجي اسحلك
حسين كاله / اعوذ بالله من مشتت الاحباب انا وصديقتي كاعدين نتابع المسلسل شكو اخترعت
هو طارق طفر عليه واجى شاله من حظني
ومنتصر كاله / لو اربطك بشبابك الحمزة تبقى ملكوف
هو بقى شايل حسين وشمره على جتفه
حسبالك شايل جيس طحين
نكسه على راسه وبقى مجلب بس برجليه
وكالي / عندج صور صغار مال معاملة
كتله / لا ماعندي
شسوي بيهن
كال / جا غير نريد نعقد محكمة
مادام الله هدئ عمج علينا
كتله / خو وره مااجيب
عمي حاتم كال / وفروخج عليمن نسجلهم
ماكو شي يثبت انتم متزوجين
غير حب الله والوطن
طارق راح نزل حسين بحظن خالتي وكاللها/ هذا شيطان يكعد بحظنها وحظن اختها ويكمش بيهن
وهن فطر حسبالهن فقير مايدرنه راضع ويه بليس
هو ضحك وكاله / أبو شباب ترباتك أنا
هنا عمو حاتم ومنتصر خربوا من ضحك
وخالتي كالتلي/ بعد ايدي يايمه وباست حسين من خده
وكالت الطارق / هيج أحسلك يمه من فشلت روحك
هو واخياته انت ليش حاشر خشمك بنصهم
هو بالشقى دفر حسين على رجله وكاله / نذذل
صوجي انا دللتك زايد
وره ماراح عمو حاتم
ومنتصر كال الطارق / باجر العصر اخذ البنات
كصلهن صور علمود المعامله
وبلغ مازن يجهز نفسه
وحاجي بالبسكوت بهذاك الموضوع،
ترى حاتم مسودن لا يطكه بصواب ويسكطة
وراها رحنا الغرفه خالتي اني وطارق
اني بس امشي على كيفي واروح اكعد على السرير
هو يروح يجيبلي دشداشة خفيفه ابدل
وانوب يجيبلي المشط واظفر شعري
وانوب يروح يجب دولكه المي يخليها يمي
ويشوفني شنو محتاجه بعد
يكمل كل الشغلات البسيطة
يلا يطفي الضوة وأنام
اني أنام صفحة
صار امنيتي انام على ظهري
لو اكدر انكلب بسرعه للصفحة الثانيه
اكعد على حيلي وافتر على كيفي
يلا انام على صفحة الثانيه
حتى نومه تطير من عيني
تمدد ومدلي ايده نمت عليها
وجهي بوجه هو ابد مايحب البوس والتكمش
واني هم احب سوالفه واسلوبه حلوة ويايه
واموت على حركاته وإحظانه وبوساته
الحمد لله كمت ابد مااخاف من عنده
بالبدايه جنت كلش اخاف من عنده واستحي
بس بعدين لا الحمد لله تعودت
كلشي يصير بيناتنه حالنا حال كل المتزوجين
بس النواشف على كولته ،بس تقارب ماكو
الصدك حاول ويايه اكثر من مره
بس مو يشوفني اخاف وارتبك
لان الموقف كله ينعاد براسي ،
هو يبطل ويعوف الموضوع
يكول / اخاف على الجهال لا يصير بيهم شي
من كثر خوفج ،عود من تجبين نباشر بالسالفه
وبذاك الوكت اذا هم كتيلي اخاف اشمرج من السطح
بس هو فنان مااعرف معلم بهاي سوالف يعرف شلون ياخذ حقه ويرتاح وزايد
تذكرت كتله / سمعت منتصر كالك
حاجي مازن شبي ؟؟
كالي/ حاتم ذيب امعط ما تفوته فايته يعرف مازن يجي يشوف اختج بغيابه وهو وساكت على فساد يكول /مااكدر امنعه هي مرته
بس يجي بنصاص الليالي يفوت البيتي هاي ماارضاها
لان العالم ماتخلي مرتي بحالها
والله شكلك تواعد ابن عم رجلها
بغياب رجلها ، ومحد يكول بنت اخوه ساكنه عنده
وهذا رجلها يجي يشوفها ،
والعالم وماتحب تسولف ونصير علج بحلك كل نذل
كتله / ياااا شمدري عمو حاتم
كالي / شوفي هاي بابا حاتم مفتح بالتيزاب
جواد مسولف يكول عمو مازن يجي يتعشى يمنا
هو اجى يمنا و شاف الكاميرا التشرف على بيته
ومن راقب كل التسجيل شاف سيارة مازن
طبكت بالوحدة بليل باب بيته
وهو دخل بملابسه العسكريه البيته
وماطلع ألا وره اذان الفجر
والحجي بيناتنه عود مو تروحين تسولفين لاختج
يعرف بمازن فلش نظام إعادة ضبط المصنع عند اختج
كتله / شنو يعني ماافتهمت عليك
كالي/ مو كتلج عمج ذيب امعط
عرف اختج لاعبه دقلات ويه رجلها
كتله / عززززة شكد عيب شلون عرف
كالي/ شبيج بابا مشيتها تختلف
البنيه الصرمهر حوضها ومشيتها تختلف عن المتزوجه او حشاج البنيه الس... التعلب دقلات شلاليه
كتله / بس والله ترى هي بنيه حبابه
ومو لان اختي وادافعلها
بس حرام تحجون عليها
كالي / بابا محد جايب طاريها
رجال ومرته وهذا حلالهم
بس عمج معترض على مازن
من يدخل البيته بنص الليل
واكلج شغله اكيد مازن مو غشيم
ولا غبي ، هو فطن وذكي
وطبعه غريزي بس مايدور حرام
اكيد علمها عليه وطلع عينها
وانا متأكد يجامعها من ..... وعايفها بنيه
و بيوم الدخله يطك السدة علمود حجي العالم
بس هو تلكينه فلسها من اول فرصه صارتله
والله كتله بدون قصدي
وبدون ماافكر بمعنى كلامي/
عزززه يعني منتصر هم غريزي
لان هم ياخذ من مسرة مناك
هو سطرني خفيف على وجهي وكال / ياااغبي
عيب وحرام تكوليلي شغلات تخص خواتج
من تسمعين منهن شي بهاي شغلات
افتهمي وتعلمي منهم بس لا تكولي حرام
وبعدين هاي السالفه طبيعيه
تصير بين كل المتزوجين
كل واحد متزوج يحتل مرته احتلال الكافر
وحقه حلاله ومو حرام
بس اكو بي بشر و يراعيها نفسيا وجسديا
واكو لا خنزير تهمه بس راحته ويأذيها
وهسه على طاري الموضوع انا كلشي مامحصل
غاسل ايدي بدهن كريز من وراج
مخلصها بوسات فاهيه
وحظن مال قشامر
بعيده عليه ثلاث مترات بهذا كرشج
ونظدة المخاد المنومتها بصفج
كتله/ هذا العندي يعجبك ما يعجبك
جهالك كافين عليه ما يخلوني انام مثل البشر
كالي/ لا عمي عاجبني وراضي
بس لا طنكرين علينا وكلشي ما نحصل
ونخسر كلشي مثل هذيج الحلوة
لا حظت برجليها ولا خذت سيد علي
هسه نامي ترى كبيت للستار
هسه اذا اطخ براسي اجيبج بهذا الليل الاكشر
كنشت وجهي عليه وبسته من خده
وهو غطاني زين لان يخاف من بروده السبلت
واني اكدي البروده تكدي
ثاني يوم ماكو شي جديد لحد العصر
اخذنا اني ومسرة وراحت ويانه لمى
بس تسمع طلعه تجي تركض
ماتنلام الواحد يطلع شويه يغير جو
رحنا أخذنا صور مال معاملة علمود نعقد محمكة
عمو نازل مجاز من العسكريه
حتى يروح ويانه للمحكمة هو يعتبر ولي امرنا
ثاني يوم من الصبح شلع قلبي
اني البس عبايه من اطلع وجواها جبه
هو ما يقبل تعاي البسي شي طويل وبنطرون
رجليج تطلع من تصعدين وتنزلين من السياره،
اكله /مااكدر البس البنطرون يضايقني
لبست ستريج وجواريب وعليه قميص قطني
طويل لحد الركبه والعفو حذاء ناصي
ولبست ربطتي وخليت كحله وحمره خفيفه
وطلعنا بسيارته
ومنتصر اجي هو ومسرة
وانوب اجي عمو حاتم ومازن واساور
بالطريق شفت ألبوم مال صور
مخلي كدامه على الدشبول
سحبته وبقيت اتفرج على الصور
كلهم رياجيل عسكريين
مااعرف عدهم اجتماع
مااعرف مؤتمر على كولت عمو حاتم مرات من يحجي
واني كلساع اكول الطارق
منو هذا الواكف يم عمو ومصور وياه ،
يكلي فلان هو كلهم يعرفهم
باوعت وركزت على واحد والله حلو
سألته منو هذا ؟؟
كالي /أركان التكريتي
كتله / والله حلو ومبين صغير
هذا تكريتي من اقرباء الريس ابو عدي الله يرحمه .
ماما تحب الريس وزرعت محبته بينه
هو كالي / مو عاجبج تتفلش سنونج
شنو حلو وصغير ما تحترمين شويه
شنو انا مو بعينج
كتله / اسفه والله مو قصدي
بس غير كاعده أحجي وياك
ومااعرف اجذب عليك
الكلام اليجي بقلبي اكوله الك
هسه هذا الرجال منين
سني من جماعتنا لو شيعي من جماعتكم
هو ضحك وكال / لج بابا انتي وخواتج
ترجعن لأصلجن ، أصل أمجن أنسنه
وبعدين احنا بالجيش ماعدنه هذا سني وهذا شيعي
كلنا قلب واحد
ومن ينعلس عنصر من النقطة كلها تنعلس وياه
والارهابي من يفجر النقطة لو يغتالون الجنود
مايعرفون منو السني منو الشيعي
عدهم منتسبين وكبل
وهاي التسميات صارت عيب الواحد يسولف بيها
وممنوعه الحديث بيها بالنظام العسكري ودوائر الدوله
وهذا الزلمة خوش زلمة وشهم
سبع واخو خيته
كل جنودة وربعه الضباط يحبونه ويحترمونه
والله كتله بدون قصدي يعني ماافكر بالكلام
زين لو لا
كتله / ميخالف اخذ صورته اشوفها الخواتي
خاف عمو حاتم ياخذ اللبوم وما يلحكن يشوفن
هذا الشاب الصاك
هو بسرعة لزم ايدي وعصرها
كالي / كااافي عاد هوووايه تحملتج
كفي السانج لو أذيج
اني كلش انقهرت واختنكت بس ما بجيت
رجعت البوم الصور على الدشبول
ودرت وجهي على جامه وبقيت اباوع على شارع
هنا ركزت شويه هو سوه هيج بيه
لان غار من الكلام
لعد ليش ميحس بيه من يروح يم النسوان
ومن علياء الحقيره تخابره لو دزله رسايل
وكتله كلمه ومن عساني لا كلتها
ومن عسه لساني انكص ولا نطقتها
كلتها بوكت جنت مخنوكه وقلبي محروك
انداريت عليه ودموعي هلن على وجهي
كتله / بس اكلك حسبي الله ونعم الوكيل بيك
اني بس حجيت عن هذا الرجال انت ضجت واجيت تكسر ايدي ، بس انت من تروح يم النسوان
ماتفكر وتكول خطيه هاي تنقهر وهي حامل بجهالي
انت تفكر بس بروحك وما تفكر بيه
هو بقى يباوع عليه وعلى الطريق
كلشي ما حجه بقى ساكت
وبعدين كالي / انتي شكد قبيحة
بوجهي ودعين عليه
كتله / مو ادعي عليك
بس اذكرك اني يتميه وماعندي ام واب
ورب العالمين هو صار كفيلي من بعدهم
وراح يعاقبك على قهري وحركة قلبي
الي انت ما تفكر بيها
هو صاح / بسسسسس صوتج بعد ماسمعه
والعباس تحجين كلمه زايده اشمرج من السياره
ترى اتحملتج بما يكفي
اني هم سكتت وبعدها ابد ماحجيت وياه
لحد ماوصلنا للمحكمة
هو نزلني من السياره
وحتى مالي خلك امشي لو اكمل المعامله
خرب واهسي بكلشي
بقى هو ومازن يركضون بالمعامله
وانوب رحنا للمستشفى سولنا تحليل دم
وره ساعه استلمنا نتيجة ورجعنا للمحكمة
كالوا هذا يسمونه عقد مسائي يعني بفلوس،
بنفس اليوم يكمل ما ننتظر سره مثل باقي الناس
من دخلنا على القاضي كام يضحك
كال / والله كمنا نقلد الاجانب
البنيه حامل وراح تجيب
يلا تجي تعقد ،
عمو حاتم كاله / الظروف اقوة من عدنا
باايام عرسهن توفت امهن
والتهينا بالعزة ،
وبين ما صفينه امور سكنهن
ومشى زواجهم بس على عقد السيد
الحمد لله رهمت حياتهن براحة
وهل التشوفه كدامك حامل وعلى ابواب ولادة
وتعرف بعد بشغلات تسجيل البيان
واثبات النسب
القاضي رجال حباب فد يشاقي ويضحك
ويكول المنتصر/ وانت الشايب حرامات متزوج هاي البنيه الصغيره ، لان منتصر بعد عرسه عاف شعره يرجع ابيض ماصبغه
وانوب ضحك ويه مازن كاله /سياده النقيب
ان شاء الله خلفتكم تصير دبس وراشي
مازن كاله /سيدي بس ادعيلنا بالذريه الصالحه
ومن الله يرزقني نذر عليه اسمي ابني على اسمك
هو ضحك وكاله/ اسمه على بخت النبي أحسن
لان جان هو القاضي اسمه أحمد
بس عاد صيغة العقد على منتصر ومسره
مرة وحدة، وانوب عادها على أساور ومازن
وانوب عليه وعلى طارق
وبارك للجميع وختم الاوراق وانطاهن بيد منتصر
كاله/ كمل باقي الإجراءات وبالتوفيق وبالرفاه والبنين
طلعنا من غرفة القاضي
اني بعد مااكدر اكعد ظهري انكسر
مشيت على كيفي طارق لحكني
عرفني بقيت على طنكورتي
صعدني بالسيارة تمددت بالكشن الوره
بين ماخلصوا جميع إجراءات العقد
ما رجعنا للبيت لان صارت ب ٣ العصر
عمو حاتم عزمنا على مطعم
وحجزوا بالجناح العائلي
ونزلوا اشكال الوان الاكل ما شاء الله
طارق يخلي كدامي الاكل
يكلي / اكلي وكلي الجهال وياج
وعوفي الطنكوره على صفحة
حرام واحد يزعل على نعمة الله .
اني كمت اذوق بالاكل عجبني طعمة
يا طارق ، يازعل ، يا بطيخ
اكلت مال اربع نفرات وعوضت مال ريوك وغده
رجعنا للبيت وتلكتنا خالتي ولمى كامن يهلهلن
مازن بلغ الجميع على باجر حفلتهم
بس احنا مايحتاج نسوي حفله
لان لبسنا الذهب بيوم الحنه
بس أساور خطيه كلشي ماكو
الليل كله طارق يرضي بيه
واعرف جذاب مو علمودي
يخاف على الجهال
يكول / الحجيه تكول لازم أداريها وماتزعل وتضوج
وهي اليوم دخلت بشهر الثامن هذا الشهر
شويه خطر ،واخاف جهالي يلكفون الطنكوره
وتعال يعمي شيلني وين انطي وجهي اذا بجوا وعاطوا سويه
اني هم ضعيفه كدامه
احب أحظانه وبوساته تراضيت وياه ،
الليل كلنا كعدنا نتفق باجر شنو البس واي شي اطلعه كال /تؤ مدلع ،ضيق ،مو محشم ،
بالاخير اتفقنا البس بنطرون مال حوامل
هذا ابو اللاستيكة العريضه من فوك وقميص خفاش كلش عريض
اليشوفه يكول جبه قصيره جوة الركبه
هي حفلة ساعه زمان وتخلص
الصبح رحنا اني ومسره ولمى
للصالون لمى اتفقت وياها من البارحة
اني بس حفيت ويادوب عدلت حواجبي
طارق ميقبل اخففهن يتخل من الحاجب الرفيع
ومسرة لا حفت حفافه كامله
ومن رجعنا راحت هي ولمى
بوجهن على بيت عمو حاتم
يساعدن أساور
اني رجعت للبيت اكلت بسرعه
ورحت تمددت ظهري خربان
ابد ماعنده قوة وطاقه اكعد
لحد ما صار العصر يلا كمت سبحت وبدلت
ولبست حجابي وخليت بس كحله
هو منو راح يباوع عليه
لبست عبايتي ورحت امشي على كيفي ويه خالتي
وطارق يمشي ويانه وخبصنا
امشن سريع ، الزلم يشوفوجن
انتي نزلي راسج
وخالتي تمشي وتستغفر
الحفله حيل حلوة وهم كل الأقرباء موجودين
اساور لابسه فستان كلش محتشم وحجاب
ومازن كلش أنيق ومرتب
الناس فرحانين واني ادور مكان اتمدد بي
وخالتي خطية حايره تسخر بالبنات علمودي
/ خاله جيبلها كوشه تخليها وره ظهرها
كومن من القنفه خليها تمدد
انتي يا بنيه روحي لبيداء كلليها الحجيه ام منتصر
تريد كيك وعصير لمرت طارق
فد حبيت اهتمامها بيه
وابد ما انطت مجال للنسوان تقلل من عدنا
وعلى مسرة هلكد مدحت بيها
وهو صدك مسرة شايله بيت خالتي على راسها
صح لمى تساعدها بس ماعليها ذاك الثقل
يمكن اقل ساعه كتلها /خاله تعبت
ظهري راح ينكسر
خابري طارق يجي يرجعني للبيت
شويه وأجتي بنيه مااعرفها كالت /
حجيه أبنج واكف بالباب
يكول خلي تجي ام فقار
اني هنا نفشت ريشاتي صرت ام فقار
طلعت عليه مكشره من فرحتي بأسمي الجديد بقيت امشي واضحك لحد ما وصلت البيتنه
هو كال / يالله اليوم شمس مشرقه
كتله / حبيت تصيحلي أم فقار
كالي / الحمد لله من ضحكتي
لو ادري من زمان صايحلج ام المطي ومخلص الموضوع
عضيته من زنده حتى يبطل يقهر بقلبي
ويخرب واهس ضحكتي
عدت يومين ماكو شي جديد
بس راجعت للدكتوره كالت /اوضاعج كلش زينه
وحددتلي موعد للعميله كالت /مااجازف ابد
على الولاده الطبيعه اخاف عليج وعلى الاطفال
وانطتني أبر تكول/ لازم اضربها هاي مال اكتمال
الرئه للجهال تخاف اجيب بأي ساعه
وعلمتني على موعد ضربتهن
وكالت عادي اذا ماحسيتي بحركه مثل قبل
الجهال يخنسون عليها ،
وره يومين عادي يرجعون يتحركون .
طارق بليل كالي/ انتي كاعدة بس اكويلي البدله العسكرية وجاب الاوتي وسحب سيار الكهرباء ليمي
لان مسرة بغرفتها فوك يستحي يكلها
ولمى مريضه مابيها شي بس معذوره ونايمه
وهو مايعرف يكوي يكول تحترك بيدي
كعدت اكوي البدله،
وهو لملم باقي نواقص جنطته العسكرية
خطيه لمى محضرتها ومرتبتها
بس باقي حاجيات نقص
من كملنا كلشي وهو راح حجة ويه خالتي وسلم عليها،
كال /خاف مااشوفها لان أطلع من الفجر
ومن رجع للغرفة انطاني فلوس
كال /خاف تحتاجين شي هاي خليهن جوة ايدج
كتله / راح اخابر سهى هي ولمى يحضرلي
تجهيزات للجهال لان نهى حايره باأبنها
كالي / بكيفج
يالله هلكد بوسني وحظني
ويبوس بطني ويحاجي الجهال
حسبالك كاعدين كدامه ويحاجيهم
ويكلهم / ممنوع تعبون ام عيون جتاله
ترى من انزل مجاز اعقابكم
وكل مايحرك بطني تزيد حركتهم
وهو كلش فرحان ومكيف
كالي/ والعباس شو ما يهلي التحق
شو تعلمت على تخته البيت
صار شهر مكابلج وكاعد
راح اشتاقلج انتي وهوسه جهالي
واذا طكيت من الاشتياق يمكن اطفر
وحاتم هو يحير بروحه
اني هنا حلفتة بالقران وحلفته بالنبي
ممنوع يروح لبيت عمته ، ولا يشوف علياء
كالي / والعباس رزلتها وطيحت حظها
ومن يومها بعد ماتصلت
وخليها بالج
مو انا الروحي تهوى البنيه الشايفها غيري
عسه ما ملموسه ايد مااريدها حلالي
كتله / لعد شلون قبلت تزوجني
قصدي مو لان صارت هذيج سالفه
يعني لان منتصر جبرك تزوجني قبلت بيه
لان اني بنت سهر على كولتكم
وعلى فكرتكم اني واخواتي وماما مو خوش نسوان
ضحك وكال/ شوف هاي لج بابا نبشت اهلج نبش
منطقتكم كلها افتريتها ، دكيت باب باب
وزلم شارعكم حلفتهم بالقران اخذته ويايه
وجاركم ابو عمر هلكد ما طلعت روحه بالأسئلة
كالي / بالقران ما تصدك من احلفلك
امشي اروح وياك زوار الكربله
واحلفلك بشباك اخو زينب حتى تصدك ،
المرأة وبناتها صوت مالهن ،
محد يعرف بهذا البيت اكو بنات شابات
امهن تطلع كد الشي الضروري
اصلا حاتم مو هو عمجن
بس الصدك حاله حال الغريب ما يعرفجن،
بس شافجن كال / هذني كناري الفيفي محبوس بقفص من ذهب
هنياله اليحظه بوحده منهن وتصير من نصيبه
وهوايه راقبتج وراقبت خواتج
دخلتي الجمجمة واقتنعت بيج من عقل وروح والحجية ماقصرت خوش ساعدتنا وقربت بينا المسافه
لفني بحظنه وكالي / بروح ابوج شنو هذا عطرج
هو نفسه الجنتي مخليته بهذاك اليوم اليهسه العطر بخشمي
كتله / ما مخليه عطر
بس اخلي معطر جسم الليزر ابو القبق الوردي
هاي الشيشة الكزاز أم الالف
يدفن خشمه بصدري وبركبتي
ويسحب نفس كل حيله
يكلي/ أفيشش
ولج شكد اعرف نسوان وشكد شام عطور
بس مثلج نظيفه وريحتج طيبه
وهذا المعطر اله طعم خاص عندج
ابد ما مشتم بوحدة غيرج
وكل عقله كام وراح للميز يدور بالغراض وطلع الشيشة وخلاها بجنطته
كال / حتى كل مااشتاقلج اشتم العطر واذكرج
يادوب غفيت
وفزيت على صوت الطكطه
لكيته سابح ومبدل ومحضر روحه يريد يطلع
العفو على صوت طبطبه مشيه البسطال بالكاع
كعدت ، هو كال / ماردت اكعدج
اتحركت بكل هدوء
كمت على كيفي حظنته بقوة
وهو حظني كالي / ديري بالج على روحج وعلى جهالي
وصيت الحجيه هم ادير بالها عليج
شال جنطته وطلع رحت امشي وراه وصلته الباب المطبخ
ضوة الفجر هستوة طالع
باب المطبخ كالي / يلا فوتي وقفلي الباب من جوة
اني هم كتله / مع السلامة
وفتت اقفل الباب وبقيت اباوع عليه من الجام
طلع لباب الشارع لان ماياخذ سيارته من يروح للدوام
عدهم سيارة خاصه مال عمو حاتم يرحون بيها
بس قفلت الباب ورجعت خطوة
يعني ظهري صار على الباب
ومااسمع غير صوت انفجار شال البيت وركعه
وصوت الجام مال شباك من اطشر
هم تكولون أنفجار ثاني وصار
وصوت خرطة مال طلقات
اني بدون شعور وبدون وعي مااعرف شلون اتصرف
كمت ادور على سرقي الباب مااشوفه
وبس اعيط طاااااااارق تعاااال اااارجع
فتحت الباب يادوب ركضت لنص الطرمة
مااحس الا همام يصيح ووووووولك بوووويه الحكنا
وطلع يركض للشارع وصل قبلي لابس بس برموده
وصلت للباب وعساني لا وصلت
شفت همام يسوحل بطارق من نص الشارع
وعباره عن ذبيحة كله دم
وناس كاموا يطلعون من بيوتهم
يصيحون شكو وشصار
مااحس الا منتصر طلع يركض من البيت
بس بالشورت الابيص والفانيله البيضه
هو شاف طارق كله دمايه وهمام يسوحل بي
فاقد ويعط وووولك لا تموووت
هو خطيه انجبح بنص الشارع
وكام بسرعه على حيله وراح يركض عليه
اباوع زين زلم أثنين يسوحلون برجال ثاني
باوعت هذا عمو حاتم غارق بدمه
مااشوف اهدوم عليه صايرات وصله مال دم
بيداء طلعت من بيتها مفرعه ولمت الناس بالصريخ
اني هنا امشي على كيفي اريد اوصل يمهم
واصيح على نفس الصوت
طارق تعال ارجع ،
حتى مامنتبهه على روحي
اني طالعه بدون حجاب
السياره يم بيت عمو حاتم هم رابع بيت عن بيتنه
مطشره اطشر ومتعقجة بس ما مشعوله
طارق واكع من جهه بيت خالتي
وعمو حاتم واكع باب بيتهم
همام ومنتصر يشلون بطارق ويعدلون بجسمه
واكو دم يطلع من صدره مثل البوري
همام عاصره بيده وهو ينزل بسرعه
من وصلت قريب عليهم باوعت عليه
مغمض عيونه والدم كام يطلع من حلكه
ويطلع صوت قرقره من حلكه
منتصر يبجي ويعبط بووووويه طاااارق لا تموت
همام يصيح ووووووولكم جيبولي سيارره
اخويه ماااات
هذا الحجي كله ماكو دقايق مرت عليه
باابشع صوره وارعب موقف شفته بحياتي
رجال غريب هو شغل سيارته
والزلم خلو عمو حاتم بيها
وراحوا ،
ورجال ثاني هم شغل سيارته
واجى هو وباقي الزلم شالوا طارق
ميت مايحرك لا ايد ولا رجل بس يقرقر
زهمام راح وياهم
منتصر بقى بمكانه كاعد يريد يتحرك مايكدر
كام يفرك بقلبه ويلكف الهوه بالكوه
ويأشرلي روحي يعني افوت للبيت
الزلم الباقين شالوا ودخلوا للبيت
واني بقيت وأكفة بنص الشارع غريبه
وبس اباوع على الناس انملى الشارع بيهم
وبيداء النسوان يسترن بيها ملخت روحها
واني ما واعيه على روحي بس اباوع واتلفت
مااعرف هسه لازم شسوي
اجتي مراه جيران بيت خالتي
تحجي ويايه بس ماادري ليش مااسمعها
عقلي يعيد بس صوره طارق من شفته اخير شي
هي كادتني ودتني جوة للبيت
اشوف خالتي كاعدة بنص الطرمه
وثوبها مشكوك واكو نسوان يمها
ولمى تعيط بكل صوتها وتلطم
ومسره تلبس بدشداشه المنتصر
واكو رجال واكف يمه يغسل بوجهه
مااعرف شسوي مااعرف شلون اتصرف
اجتي مسرة تركض عليه
مشيت وياها وبس اكلها/ طاارق ماات
اني شفته مات كله دم
هي ما تاحجيني بس تبجي
كعدتني بالمطبخ وراحت جابت حجابي من جوة
وشدت الربطة على راسي
وكالت / ابقي كاعدة ممنوع تتحركين من مكانج
وطلعت تركض على خالتي بره
منتصر فات للبيت مايكدر يمشي
شاف حسين واكف ويبجي
كاله / جيبلي سويج سيارة وتلفون من فوك على ميز المرايه تندل مكانهن
حسين راح يمشي وصعد فوك
وهو منتصر وكف على السنك يغسل بوجهه ويبجي
ويكول / لا أسألك رد القضاء بس اسالك اللطف
صدك نزل حسين بيده تلفون والسويج
كاله /بويه طارق ماااات
هنا منتصر عاط بصوت عالي / يااابويه كاظم عااااين الحالي،، اخذ السويج والتلفون وطلع
حسين اجي عليه وكالي/ صدك طارق مات
حركت راسي يعني اي كتله ماااات
هو خطيه كام يبجي بصوت عالي
ومره يمسح دموعه ومره يمسح دموعي
حظني قوي واثنيناتنه كمنا نبجي بصوت عالي
النسوان سحلن خالتي ولمى وفوتنهن جوة للبيت
ملخن ارواحن ، كطعن اهدومهن عليهن
شويه واجتي بيداء هي والمخبلة سوة
ادك وتلط ،وهم نسوان يسكتن بيها
ولحكتها اساور تسكت بالجهال
وتكالبن خالتي وبيداء ولمى ودك ولطم
شويه ويجي حيدر خبل يصيح /منو كتللللهم ولك خووويه طارق ياهو الغدرك
ولللك حاااتم منو صادك وانت الذيب
سال وين اخذوهم
مراه غريبه جاوبته وكالتله على اسم المستشفى
هو شغل سيارة طارق
مسرة جابتله السويج ودشداشه لهمام
اني كتلها ترى مالابس هدوم
وراح
مسرة لزمت تلفون خالتي ودكت على كل اقربائهم
هي لمى كالتلها خابريهم
ياهو الدك عليه وهي تبجي
تكلهم تعالوا لبيت خالتي
طارق ضربوه هو وعمو حاتم
ماكو ساعه ماادري شلون مشى الوكت
والناس ملوا بيت خالتي والشارع
وانوب مسرة ادك على منتصر ما يجاوبها
ونسوان الي رياجيلهم راحوا وياهم للمستشفى
هم مايجاوبون واكو بيهم تلفون عايفينه بالبيت
بس واحد جاوب كال/ الهم الله
الاطباء جالين عليهم
اجتي سهى من باب الشارع تعيط
وتلطم وياها نسوان بيت عمهم
وجهالها تصركعوا من صوت العياط
خالتي تخربطت وحارت بيها مسرة
سكرها وضعطها ارتفعن وخشمها طك دم
هنا وتجي نهى هي وبيت خالها
وزلمهم اخذوا خالتي وراحت وياها مسره
ومرت حماها السهى للمستشفى
والله يكفيكم الشر، ولا يشوفكم هيج لحظات
رعب وخوف وقلق وحزن
من صدك لحظات سبي وتفريق شمل العايلة
ناس تلطم ، وناس تبجي
وناس تصبر بناس
وهذن نسوان يحجن
وهذن النسوان يكولن
للظهر ماكو رجال يمنا
بس نسوان اقرباء ونسوان الغربه ويلطمن ويبجن
وجهال صوت عياطهم
وبجيهم خايفين يهز البيت هز
اني حارت بيه أساور
دخلتني للحمام سبحتني بمي بارد
ماادري ليش جسمي انكلب احمر وصار كله طكع
ولزمتني الرجفه ، شلون كمت اوعي على روحي
واستوعب الصار وينعاد براسي كل الموقف
وينعاد صوت الانفجار، والطلق
ومنظر الدم ، وشوفه طارق مغمض
والدم يطلع من حلكه ويقرقر
بطني تكورت ونعصرت عصر
حتى كمت مااحس عندي حركة
مااعرف من الخوف لو من الرجفه
جسمي كله يختض من الرجيف
أساور طفت السبلت ، ونومتني وغطتني
عافتني ابجي بدون دموع عيوني نشفت
وبس اشهك ، وراحت جابتلي كلاص حليب حار
شربته شويه شويه احس بلعومي اتجرح
من كثر العياط والبجي
بقت كاعدة يمي كالت/نامي مالج شغل بالنسوان
وبقت تفرك بطني صارت حجاره
كالتلي/ نامي انتي هوايه خايفه وجهالج خطيه
شوفيهم خايفين ،
بس اني وين عيوني تاخذ نوم
هي بقت كاعدة يمي وتقره قران على بطني
لحد ما ثقلت عيوني وغفيت
فزيت مخروعه العفو اريد ازوع
حتى مالحكت أتحرك العفو زعت على السرير
انوب طلعت روحي اريد اتنفس ماكو
كمت بس أتخوع
اجتي نهى كالت/ هااا شيج
من شافتني خطيه ما ضاجت مني
كومتني للحمام انوب اريد امشي مااكدر
ظهري واحد وضربه بطبر انشليت
هي كامت تصيح على البنات اجتي أساور تركض
اخذتني هي وياها العفو للحمام سحلني سحل
بين ما رجعت سبحتني أساور
ونهى جابتلي هدوم بدلت
احس بطني كامت تفور
طلعت أساور والعفو استلمني الاسهال
وبقيت للعصر العفو اسهال وازواع
كعدت باب الحمام، بطني احسها مو طبيعيه
كل ماازوع العفو احسها تتقلص وتنضغظ بالزايد
هنا ساهرة وأساور حارن بيه
كمت ابجي كلش موجوعه
واحد يذبحني ولا يكلي العفو
تعالي زوعي تطلع روحي ماكو هواء
وللعصر طارق وعمو حاتم مو زينين
طارق يكولون حالته احسن من عمو حاتم
بس اثنينهم حالتهم خطره
وياهو الياخابرون عليه يكول ادعولهم
خالتي المغرب رجعوها للبيت
مخليها مغذي بعده بيدها
ومسرة شايله وياها علاكة العلاج
وخالتي ممروده مرد
واني غديت جنازة مددت باب الحمام
بعد مااكدر أتحرك ، ساهرة خابرت
على حيدر وبقت تتوسل بي يجيني
كالتله/ بس نسوان بالبيت وين اوديها
تعالوا اخذوها للمستشفى راح تموت هي وجهالها
عاد سمعتها تشرحله حالتي
يمكن اقل ساعه واجاني
جانت ساهرة امددتتني على سرير خالتي
بس مغيره الفراش القديم كله
بس هو هالمره فحصني
كال الأساور جيبلي كرسي
من كعد يمي قاس ضغطي
وقاس سكري بهذا الجهاز الصغير
ولزم بطني وبقى مغمض عيوني شلون اليحسب
ويهز براسه ما راضي
كال/ من شوكت ماعندج حركة
كتله /من الصبح
خلالي كانونه ومغذي وخله بي أبره
كال الساهره/ بعد ست ساعات اذا ماكو حركة
اخذها للمستشفى احولها للعمليات
بس لا الجهال من الخوف التف الحبل السري عليهم
تقلص بطنها مو طبيعي وحركه ماعدها
بطنها صايره جلمود
كامت النسوان ناس تروح
وناس تجي عليه يشوفني
اني احس عندي المغص يزيد مو ينقص
وبطني بيها وما تتقلص
وظهري انكسر من الوجع
يمكن وره ساعتين اكثر كمت أغفي
جسمي نحل فرد نوب
بس غفيت العفو حسيت روحي ادررت على روحي
فزيت بسرعة بعد مااسيطر
انوب أستحيت واريد اوكف مااكدر
كمت ابجي من الخجل
وكمت اصيح على أساور
اجتي حماة نهى خطيه شافني ابجي ومااكدر اكعد
هي ساعدتني كتلها/ اريد خواتي
راحت تصيحهن ، اجتني سهى ومسره
ولحكتهن ساهرة
من كومني اني امشي العفو ينزل الأدرار على رجليه
مااسيطر
سهى عاطت/ وووولج عززززة وصخاااام
هذا مو بووول شبيج مستحيه
ولج هذا مي الراس طك الجهال راح يموووتون
كتلها /شنو مي الراس شعلي بالجهال
كالت/ ولج معزايه عندج ولاده
كتلها /يعني هسه راح اجيب
شلون واني هسه دخلت بالثامن
هي كامت تخرط بخدودها وتكول /
ولج يوم اصخام وعزة ابنج مقبلينه
وجهاله ما تحويهم
ساهرة خبصت التلفون خبص
ادك على منتصر وكامت تحجي عليه
لان ماكو رجال يمنا ،
وانوب خابرت على همام
وانوب على مهند حركتهم حرك
كالتلهم /عدها ولاده وخلصت المي
والجهال حيدر يكول/ ميتين بطنها .....
من اموتن ابنولي كبر كـلش جبير
لأن كل امنياتي اوياي ماخـذهــن
-
-
-
مسرة /صحت الله اكبر يمتى ارتاح
رد الحزن بصوت وصاح آيس
-
-
-
أساور / مثل جرحي ابد ماشفته بانسان
لان عندي الجرح طبعه الـتكاثــر
شكرا لزيارتكم عالم روايات سكيرهوم
