رواية بنات سهر الفصل الرابع والعشرون بقلم فراقد حسن علي
كون أيصير كلشي بعمري مكَلوب
وأرضة بكل شئ يطلع عن أصولة
كون أول حياتي ألكبر وألشيب
وأخر لحظة من عمري ألطفولة
====================
مسرة/ نار الغيرة سوت قلبي حطب
وحب منتصر أحتل قلبي
والغيرة من ساهرة هي البانزين الحرك قلبي
كل مراة بمكاني ما تقبل اي مراة ثانيه تشاركها برجلها
حتى لو كانت قصة حياتها اقهر واظلم من قصة ساهرة
وماكو شي يكدر يقنع القلب والعقل ماكو بينهم شي
وزواجهم شكليات بس كدام العالم
شي مو بيدي اريد رجلي بس اليه وبس
منتصر كل ما تجي شحنه مال سيارات جديده
ويروح يكمل إجراءاتها مال الاستيراد
وهاي سوالف مال كمارك ،
وشحن قطع الغيار الاصليه والعاديه
وكل الشغلات التخص السيارات
يروح يم ساهرة من العصر ما يجي لنص الليل
والله شنو هي قويه بالرياضيات
تكعد تصفيله كل الحسابات هو ينتكل عليها
وعلى مهند يشتغل وياه هناك بالمعرض
طلع من الصبح هو وهمام استلموا السيارات
ويكول/ شغلي كلش متعب يصير بهذا اليوم
رجع العصر هلكان من التعب
بس سبح واكل لكمة واخذ جنطة السوده
اليشلوها رجال الاعمال بالمسلسلات
وراح لبيت ساهرة
بيت ساهرة بنفس شارع بيت حيدر
هم جيران حايط على حايط
يعني بالشارع الورانه
اني هنا كبت بيه نار الغيرة كلتله /اخذني وياك
كالي / ابقي يم الحجيه شو مالها خلك
واختج خطيه خاف تعتاز شي
بقيت بغرفتي اكل بروحي اروح وارجع
واكرط بظافري ، لبست عبايتي ونزلت
كتلها /خاله هوايه ضايجة اريد اروح لبيت ساهرة
هي لا منعتني ولا ابد
صاحت على همام متمدد بالاستقبال ويكلب بتلفون
كالتله / وصلت مرت اخوك لبيت عمك علي
هو كعد وبقى يباوع عليه
كالي / يلا امشي راح تموتين من الغيرة
لج بابا لا يروح بالج بعيد منتصر والحجية اخوان
لا تعيدين سوالف نهايه وتسودنين
هو يمشي ويدردم واني امشي وراه
من وصلنا هو ما فات بس جر سيم الباب وفتحها
كال / يلا فوتي خليني ارجع اراسل الحب
فتت للطرمه وهو طبك الباب وراح
فتت جوة على كيفي امشي
فتحت باب الكلدور ودخلت للصاله
العجوز نايمه على القنفه وتباوع على تلفزيون
منتصر وساهرة ماكو
حتى ما سلمت عليها فتت من يم راسها
كبل للبيت جوة ،
باوعت بالاستقبال ماكو احد
الغرفة البصف الاستقبال هم مفتوح بابها ماكو احد
سمعت صوت منتصر من المطبخ يمكن يخابر
رحت امشي بسرعة،
باوعت مفرشين كومه أوراق
على ميز الطعام ،
ومنتصر كاعد منطي وجهه للباب ويخابر
وساهره واكفه على طباخ تصب كهوة
اباوع عليها لابسه دشداشة نيليه
وما لابسه حجاب
وشعرها مكصوص ليم اذانها
رصاصي مخبوط شيب وشعر اسود
منتصر باوع عليه وخزرني وبسرعة خلص الاتصال
صاح بصوت عالي / شجاااابج
ساهرة فزت وكالت / بسم الله الرحمن الرحيم
شجاك يمعود خرعتني
اني ولا يم منتصر بالي يمها مركزة بس عليها
منتصر اجى عليه وجرتي من زندي
وصاح / مو احجي وياااج شجابج
كتله / اجيت اشوفك بيت مرتك
هزني حيل من زندي وصاح بوجهي/ سوادينج بطليهن
انتي مو صغيره كم مره حجيت وياج
هي ساهرة اجتي يمنا وكالتلي/
تعالي اشربي كهوة ويانه
وتعلمي شويه على شغل رجلج
وهم غيري جو ويه هوسه الأوراق
منتصر عافني وراح رجع كعد بمكانه
هي ودتله الكهوة وهو يشربها بكل هدوء
ولا جن اني واكفه كدامه ومحتركه
عفتهم وطلعت من مريت من الصاله
لكيت العجوز كاعدة على حيلها
كالت / هلا بيج يمه تفضلي يمي
اني عفتها وطلعت للطرمة
دموعي غسلت وجهي
منتصر صاح ورايه / تعااااي هنا
اني طلعت للشارع وكمت امشي سريع
ورجعت البيت خالتي،
لنص الطرمة مالتنا وصل يمي منتصر
جرني من ايدي ورجعني عليه
وسطرني براشدي فر راسي فر
كالي / مره ثانيه عيدها الا اكسر راسج
اني بس بقيت اباوع بعيونه وأبجي لا حجيت ولا ابد
عفته ومشيت بكسرة قلب وروح مشخله قهر
ورحت بغرفة خالتي بهاي غرفتها الثانيه
لان هذيج القديمه صارت لسوار وطارق
من دخلت لكيتها كاعدة تسفط بهدوم حسين
وتعدلهن وياها بكنتورها ،
اني بقيت كاعدة على جهه وابجي ،
هي تباوع عليه ودير وجهه تسفط بالهدوم
وكلساع تباوع عليه ،
اني تملخت روحي من القهر والبجي انهضمت
هي بس أشرتلي بيدها تعاي وفتحتلي حظنها
كمت رحت عليها وشمرت نفسي بحظنها
لا هي حجت شي ولا اني
بس حسيت هذا حظنها هو دواء لهذا قهري
شكد بجيت بحظنها
وهي بس تكول / كافي يمه بسج
قلبج تكطع من انعل شيب منتصر .
انوب كالتلي/ دكومي غسلي وجهج
وسويلي عصير برتقال بدون شكر
وتعاي اكعدي يمي ، وحتى باتي يم اليوم
ولا تصعدين الغرفتج وانا اخذلج حقك مربع من رجلج
كمت ومالي خلك بس عيب منها
خالتي مراه خيرة ، تحسب احساب لأخرتها
ماتهمها الدنيا، متعاملني اني جنتها
لا اني وسوار بناتها ،
ولمى وباقي بناتها هن الخطار
سويتلها عصير برتقال وقدمته الها
رجعت تمددت بفراشها
وبقت دموعي تصب مقهوره ومهضومه
لليل رجع منتصر واجي للغرفة
كالي / كومي اصعدي فوك اريد أحجي وياج ،
ما رديت عليه ولا جاوبته
هو هم من شافني مطنكرة عافني وراح
لليل نايمين اني وخالتي وحسين
وحتى عشا ما تعشيت
هو دخل للغرفه كال / شنو اليوم تبقين معنطزة
كومي اصعدي فوك
جاوبته خالتي/ تصبح على خير يمه
اصعد لف راسك ونام وطفي الضوة وياك
هو كال / هااا حجيه شو اطرديني
كالتله / لا يمه محشوم
بس بنيتي اليوم عندي خطار
وهوايه تعبانين نريد انام
اذا يعجبك تعال نام يمنا
هو كال / هاي هيه اتفقت فاطمة خاتون ومسرة خانم عليه ، اروح انام بفراشي احسن
اخاف بنص الليل تخنكني وأنا نايم
أستر على عمري أحسلي
طلع وطفى الضوة
الصبح من كعدت لكيته رايح للشغل
عادي اشتغلت وشفت البيت شبي ناقص
وشنو يحتاج ترتيب،
ولمي ويايه خطيه ما تقصر
وخالتي عجنت شويه ماعدنا خبز للغده
واني وياها نخبز احنا كاعدين على التنور الكهربائي
العصر كاعدين نشرب جاي
نزل منتصر وكدام خالتي ولمى
دنك وباسني على راسي
وكالي / محكوكلج ،اعذريني تجاوزت بحقج
بس انتي شويه كبري عقلج
وافتهمي ساهرة اختي مو مرتي ،
مايجمعني بيها غير دم الخوه
اكلج هيج استغفر الله حتى يرتاح بالج
وهذا ثاني يوم واني انام يم خالتي
ثالث ليله لا والله طردتني
كالت/ كافي الخطار ثلاث ايام
وبعدين يصير من اهل البيت يلا اصعدي الغرفتج
رجلج وطاح عليج وحب راسج واعتذرلج
شكو نايمه يمي امشي صعدي .
هم سمعت كلامها وصعدت
بس مااحاجي منتصر
زعلانه عليه بعدني
ثاني يوم أجى عمو حاتم علينا
و كايل المنتصر بهاي اجازتي اريد
اوثق للبنات عقد زواج بالمحكمة
من كالي منتصر كتله / ماعندي صور
ثاني يوم اخذنا طارق اني وسوار واخذنا صور
وثاني يوم رحنه كملنا كل إجراءات العقد
والحمد لله عقدنا عقد قانوني بالمحكمة
والف الحمد لله من فرحنة بحفلة أساور
هوايه تعبت وياها ولمى وبيداء ماقصرن
خواتنا واكثر معزة الله شاهد
وعمو حاتم هو الدك رجل على الحفله
ومازن مااعترض وصارت الحفلة بساع بساع
صح مو حفلة ضخمه نفس حفلتنا اني وسوار
بس الحمد لله كل الناس والاقرباء
اشتركوا ويانه بالفرح
عمو حاتم يكول / انا المستعجل على عقد المحكمة والحفلة ،،حتى العالم يعرفون بنت اخويه
ساكنه عندي ومازن يصير رجلها
والاشهار بالحلال حلو
وهم نسوان الشارع كلهن عزمتهن بيداء
وماقصرت لا ويه مراه ولا ويه جاهل
وكرمت الرياجيل احسن كرم
والحمد لله اتصالحنا اني ومنتصر
لا اني اصبر بدونه ولا هو يصبر بدوني
بس الغيرة مااعرف شسويلها
ولحد يلومني هاي بعد عقليتي
رجلي اريد بس اليه ،
ساهرة صح حبابه وخوش مراه
بس هي مجرد اسمها مرته
تخليني الفكرة اكل بروحي
ثاني يوم الضحى كاعده اساعد لمى نسوي محشي وسألتها
كتلها /اكلج صار ثلاث ايام دورتي متأخره
تتوقعين صار عندي حمل لو لان اتعب بفرة البيت
هي سألتني كالت / هي تتخربط عندج قبل
كتلها / لا ابد منتظمة كل ٢ بالشهر تجي
هي فرحت وكالت/ بلكت الله حبله
هم صارلكم فوك الست اشهر من عرستوا
بلكت الله يرزقكم وماينشلع قلبكم مثل الباقين
على الغدا كلنا أنجمعنا وطارق وسوار
عين النبي تحرسهم
كعدين وحدهم على طرف الميز
ياكلون ويبشبشون بيناتهم ويضحكون
وخالتي فد تفرح من تشوفهم سويه
والله بالبسكوت تجر طرف دشداشتها
من يم صدرها وترفع ايدها الثانيه للسماء وتدعيلهم
وكل مااشيل عيني على منتصر
اشوفه يضحك لو يغمزلي لو يحركلي حاجبه
من لمينه هوسه مواعين الغدا
وكعدت بالصالة اشرب جاي واكلب بالتلفزيون
خالتي اجتي تدعبل وراها لمى
وحسين ملكوف يمشي بيناتهن
شايل بيده جيس صغيره
كالي/ وين انتي ؟؟
كتله /هنا قريب الشاشه تعالي /
خطيه على مكان صوتي اجى يمشي سريع
وشمر بحظني جيس صغير مال صيدلية
وكالي / بس بشريني راح يصير عندي اخ
الا ادفر فقار بس يجي
لمى الخبيثه تضحك كالت / مو انا والله
الحجيه هي بلغت منتصر وهو جابلج التحليل
يالله فد خجلت هو سؤال وهي لمى ماقصرت
بوق ما تضم سالفه حالها حال جواد
كتلها / مااعرفله شلون اسوي
كالت / دكومي انا اعلمج عليه
مليت هلكد ما جربنا بي لسهى والنهي
علمتني عليه واخذته ويايه للحمام
ونفذت خطواتها ، طلع خط طوخ وخط رفيع
شوفتها الها كالت / والعباس حامل
وهستوتج مشكله بعده ضعيف
خالتي فد فرحت وكامت تصلي على النبي
وكالت / ممنوع تحجن بالموضوع
ولا تجيبن طاري لاي بشر
خلي تجيب سوار يلا نكول ونطش الخبر
وحسين مااحجيلكم شلون فرح
يبوسني بقوة يجرني عليه ويشفط خدي شفط
وراح بوس خالتي/ يكلها يمه هم داريها مثل سوار
هذا اخويه ومو تفرقيه عن ابن طبوني
وهي سطرتي بكفخه خفيفه
وكالتله/ لسانك هوايه طولان يرادله كص
وهو يسوي ايده مال اقوياء 💪 ويكلها / راح يصير
عندي اخ منو بعد يكدر يحاجني
يابويه من هسه متحلف الفقار
اذا مااخبز خبز فلا اتسمى ليث
العصر كاعدين نشرب جاي بالصالة
نزل منتصر يريد يروح للمعرض
وكدام خالتي ولمى
حظني وباسني على راسي
وكالي / هديتج تلكيها فوك
لمى تضحك وتكول /ربي ماترزق حويدري شويه رومانسية، عيشته طابك حواجبه
خالتي يمها كلاص مي بسرعه بللت ايدها
وشرتها بوجهه لمى كالتلها / فكس لكل عين حاره
ماصلت على النبي، شبيج فكيتي عينج
على فرحة اخيج
هي شلون الفشلت خطيه وكالتلها / على كيفج فطومه خاتون تعرفينه مانحسد ، والعباس فرحانه بحملها
اكثر من عدها ، عافتنه وكامت
منتصر كاللها/ يوم خطيه فشلتيها
كالتله/ يمه صواب العين يكتل
ونوابات البشر هو يحسد نفسه بنفسه
الواحد يتعلم يسمي ويصلي على النبي كبل لا يحجي
طلع منتصر راح للمعرض
واني صعدت فوك الغرفتي
لكيت مخليلي علبه على الميز
فتحتها بيها كلادة تخبل صايغ بيها اسم ( الله )
اختصر بهاي الهديه هوايه مناسبات
منها مرضاتي واعتذاره
وهدية العقد ، وهسه بشاره الحمل
كاعد اكلب بيها ودك تلفوني
هو نفسه تلفون ماما القديم
باوعت رقم غريب مارديت
دك مره ثانيه وهم ما رديت
دز رساله / انا مهند ابو تأميم ردي ضروري
استغربت شبي مهند شيريد
دك وره الرساله ، جاوبته
سلام عادي
وشلونك ، واخباركم
كالي/ اريد أطلب منج طلب بعد اخيج
وكومه مستحي منج
كتله / تفضل ابو تأميم مايردك الا السانك
كالي / محتاج المفتاح مال بيت اهلج
والحجي بيناتنه ، مااريد حتى منتصر يعرف بي
اكو عايله فقيرة خطيه كاعدين بيت مال طليان
واريد اساعدهم لوجه الله واكسب بيهم ثواب
خطيه حالتهم تكسر الخاطر ،وكلت ويه روحي
احسن ما بيت عدنان باقي فارغ انا اجرة من عندج
واسكن الفقره بي
اني استخطيت هاي العايله
وهم اريد اجر وثواب
واريد صدقه جاريه عن روح ماما وبابا ومحمد
كتله / ميخالف ابو تأميم
اخذ البيت وكعد بي الفقره احسن ماباقي فارغ
ومااريد ايجار هم اريد ثواب عن روح اهلي
وهو غراضه كامله محللين وموهبين
خل يستخدموهن ، والشغلات الزايده
خلي يجمعوها بالغرفة الفوك كلشي لا يذبون من غراضنا ،
هو بقى شكد يتشكر من عندي
وترحم على روح ماما وبابا
وكالي/ بليل من أجى ويه منتصر
بالبسكوت دبريلج طريقه انطيني المفتاح بيها
اني بقيت هذا الموضوع بداخلي
وحتى لخواتي ماكلت
لان اعرف ميصير واحد يشهر بالثواب
يصير رياء ومايوصل الاجر نظيف يم رب العالمين
لليل بقيت افكر شلون انطي مفاتيح
لمهند ومحد يحس عليه
دزيت رساله على رقمه /
ابو تاميم اذا تجي بسيارتك خليها مفتوحه
حتى اشمرلك المفاتيح بداخلها
جاوبني/ صار رحم الله والديج
وصدك من أجى ويه منتصر وتعشه ويانه
وبقى ويه الولد يلعب ورق
اني بالبسكوت رحت شمرت المفاتيح بداخل سيارته
هو افتهم ودخلها للطرمه ما عايفها بره
يمكن حسب احساب الكاميرات
وبعد ابد لا تصل عليه ولا تصلت عليه
بس مسحت الرسايل وحذفت المكالمات
خالتي ماقبلت اروح للدكتورة كالت/ على مراجعة
سوار الجاية بحجة هي عدها مراجعة روحي وياها
مااريد احد يعرف
سوار ضايجة ومكنشه لان طارق باجر يلتحق
ولمى مالها خلك معذوره شربت علاج ونامت
حيدر ماكدر يجي بالمستشفى عنده خفارة
وماقبلت تروح للمضمد تضرب ابره مسكنه
شربت فاليوم ونامت
وخالتي نامت من وكت هي وحسين
اني خليت وصعدت الغرفتي
بقيت امسح بيها وارتب واعدل
صعد منتصر وبين مابدل واجى تمدد
خابر على همام كاله / بس تأكد باب الشارع مقفوله
طلع حاتم وماادري قفلتها وراه لو لا
اني كاعده امسح بغراض الغرفة
واحد شال الكاس يصير بشكل شمعة ملونه
وداخله جيلاتين ملون ونجوم وطوبات
وشمرة من ايدي وطشرة بالكاع
اني اتخبل عقلي يوكف
من شي يوكع من ايدي وينكسر
اسم الله عليكم والله يكفيكم الشر
اني مجربه هذا الشي
بس شي يوكع من ايدي وينكسر
تصير عدنا مصيبه ياحافظ
لازم تصير عدنا شغله تصركعنا
كعدت لميت الكزاز وشكو ايه حافظتها بالقران قريتها
وحتى نزلت شمرت الكزاز العفو بالحاويه البره
ورجعت صعدت اخذت فلوس من محفظة منتصر
وخليتها جوة راسنا صدقه ودفعه بلاء
كتله / باجر الصبح ان شاء الله انطيها الفقير
هو منتصر يضحك عليه يكلي / انتي لان مخليه
هاي سالفه بالج تصير وياج المصادفات السيئه،
انسيها كلشي ما يصير
قريت ايات القرآن الحافظتها ونطقت الشهادة
هذا تعليم ماما النا يوميه اسوي قبل لا انام
ونمت بس غطيت بالنومه
مااحس الا صار هجوووووم
مااعرف قصف
مااعرف رمي وخرط مال رشاشه وطلقات
همزين الجام مال شباك مااطشر علينا بس تفطر ، واحس الغرفة كلها انشالت ونركعت
منتصر فز مخروع وكف على طوله
وصاح / يالله سترك .
وطلع يركض حتى ملابس هدوم بس الداخليات
ويصيح/ نفذوا تهديدهم الجلاب
اني مااعرف شسوي
اصلا كلشي مافكرت غير استر روحي
لبست أسلاميتي معلكتها بالزاوية
ولبست ربطتي ونزلت اركض ،
اسم الله لكيت الفاجعه والعزة كدامي
خالتي ادك وتلطم ولمى تصيح طارق مات
وصوت الناس يرج بالشارع
كمت اكمش بيدين خالتي كطعت روحها
أجى منتصر اثنين رياجيل يسحلون بي
هدومه الداخلية مليوصه دم
رجال صاح عليه /جيبي مي
والثاني صاح/ وياج دشداشة
ركضت صعدت فوك لكفت دشداشة منتصر من الزاويه
ونزلت لكفت دولكه المي وطلعت اركض
لكيت بس رجال واكف يم منتصر
ومنطي ظهره الخالتي ولمى النسوان يسترن بيهن
هو اخذ المي من ايدي وكام يغسل المنتصر
واني ساعدته لبسته الدشداشة
لمحت سوار مفرعه وشعرها مكفش
وبس بدشداشتها الخفيفه
وجها صاير ابيض شاحب من الخوف
وترجف
المراة تسحل بيها وهي تبجي
وتعيد طارق مات ، طارق مات
عفت منتصر وركضت عليها
ماادري ليش عقلي يكلي الستر اهم من كلشي
ركضت جبت حجابها من جوة لبسته الها
وكعدتها بالمطبخ،
ورجعت على خالتي
ماخلت لا وجهه ما خرمشته ولا ثوب ما شكته
ولمى كطعت روحها طارق اخوها وصديقها
وروحهم وحدة
اسم الله هوسه بهوسه
لحظات الله لا يمررها على بشر
توكف القلب من القلق والخوف والارتباك
حتى الواحد ما يعرف شلون يتصرف
منتصر رجال غريب ساق سيارته
وراحوا للمستشفى
انصدمت من اجت بيداء مخبله بدون عقل
وراها اساور تسحول بالجهال
وطلع عمو حاتم هم مغدور
اني سمعت لمى كالتلي /بلغي اهلنا
طارق انغدر ، وهم بدون شعور اركض
اتصل على الأرقام الموجودة بتلفون خالتي
اني رحت على أساور وكتلها / سوار ترى مو زينه
شافت رجلها من ضربوا
داريها وعينج عليها لا تعوفيها
اني عيني على خالتي
سهى ونهى اجني هم الله يساعدهن
بدون عقل يدكن ويلطمن وعيالهن وياهن
خالتي وكعت علينا ، لكفناها للمستشفى
اخذوها ولد اخوها عيال نهى
وراحت ويايه مرت حماها السهى
والمستشفى سووا العليهم
جيكوا ضغطها ، وسكرها، سولها تحاليل
خلولها مغذي ،ضربوها ابرة انسولين نزلوا سكرها
طبيب كال / ازمة نفسيه الله يساعدها
كل امهات العراقيين يمرن بنفس حالتها
من يروحلهن عزيز ،
هو من شافها فرد نوب منهاره
ضربه ابرة منومه وخلاها تنام
مارجعنه للمغرب ، لحد ما صحت خالتي
وابن اخوها بقى ويانه بالمستشفى
وهو الطلعها كال /كلشي مايسولها هنا
وهو يعرف مضمد ودانه عليه
كال /يفتهم اكثر من الطبيب
هم جيكها وهو انطاها علاج وهم خلالها مغذي
وخالتي على فد بجيه وفد ونه
وحلفتلها بالقران وبالنبي محمد طارق عايش
وعمو حاتم عايش وكلشي ما بيهم بس ما تصدك
وهو الصدك حالتهم خطرة
وبالاخص عمو حاتم يكولون مات سريرياً
بس اني مااعرف شنو يعني
من سألت همام/ يعني مات انتقل الى رحمة الله
كالي / فال الله ولا فالج
لا فاقد بس مراقبينه منا الباجر خطورته
وطارق مدخلينه عمليتين
وهم حالته خطرة ،اكثر شي ضربته بصدره
رجعنا للبيت واسم الله مكلوب عزة من دون جادر
وخالتي هوايه تعبت ، شكد ما تصورون تعبت
غدت كاغد محروك ، حرت بيها
خالتي طيبه وخوش مراه تستاهل التعب والخدمه
اباوع هدى كاعدة على جهه وساكته
صح تبجي بس كاعدة متكوكه تكويك
على ياساعه تنفجر ، ابد مو طبيعيه
حتى سلمت على خالتي برود
وهي خالتي كدام كل النسوان دفعتها
كالتلها / كونج ارتاحيتي هاي الطلقه التايهه
هل صابت وليدي
اجيبلج حنه وثوب احمر تكملين بيهن فرحتج
خالتي هوايه مهضومه لان اتذكرت
هدى من دعت على طارق اول ما أجينا البيتهم
لان مارضالها تحجي علينا
انوب سوار نسوان يكولن عدها اعراض ولادة
واجى حيدر شافها كال /اوضاعها قالقتني
مااريد استعجل عليها للمستشفى واخوفها بالزايد
لليل وهي كالت تعالولي ووشلت مي الجهال
-
-
-
سوار /اني ماعندي وجع قوي
يخليني اعيط من وراه
مثل هذني اليجيبن اليطلعن بالمسلسل
عندي العفو اسهال وازواع
وظهري انشل مااكدر اتحرك
وبطني صح بيها مغص بس مو حيل حيل قوي
يعني اكدر اتحمله ، بس صارت حجاره
هوايه تقصلت وماعندي حركه
وهذا المي الينزل العفو عبالي ادرار طلع مي الجهال
واني كلشي مااعرف كضيتها اتصفن بالوجوه
كل النسوان يحجن سويه
انوب ساهرة خبصت التلفون خبص
ادك على منتصر وكامت تحجي عليه
لان ماكو رجال يمنا ،
وانوب خابرت على همام
وانوب على مهند حركتهم حرك
كالتلهم /عدها ولاده وخلصت المي
والجهال حيدر يكول/ ميتين بطنها
هنا صركعتني وصركعت الناس ويانه
مسرة دخلت ويايه للحمام غسلتلي
وحضرت روحي وبدلت
يعني لازم اروح للمستشفى
المشكله كمت اخاف وكمت ارجف بالزايد
مااعرف لان سمعت الجهال ماتو
لو لان راح اسوي عمليه ،
اني من جكة الابره أخرب
الواحد هو دايخ وخايف
والنسوان من كثر حجيهن يخوفنه بالزايد
كل وحدة تحجي شكل ،
انوب كلشي ماعندي هدوم للجهال
وغراض للجيابه والمستشفى
نهى كالت / أنا هسه الم جنطه الهم من
غراض نموري (أنمار ) كلشي عندي جديد
علمت مسرة تلم جنطة اليه
وراحت لبيت عيالها بمنطقه قريبه علينا
كالت ادزها الكم للمستشفى
ساهرة لزمت القرآن وكعدت تقره سوره مريم على بطني، شو هي تقرأ وتبجي خوفتني بالزايد
هنا وتجيني خالتي للغرفة بالكوة تمشي
خطيه كاغديه طينه من القهر والتعب
كالت الساهره / روحي وياها
سهى ونهى خليهن يمي
باوعت على مسره كالتلها /عينج على نفسج وعلى اخيتج روحي ويه اخيتج
اجتي يمي وكعدت بصفي على السرير
حظنتني وكامت تبجي بصوت عالي
تصيح / وين داحي الباب محتاجه فزعتك اليوم
اوليدي بشدة ومتوسد الموت
وفريخاته أمنتهم بيد رب السموات
رايده فرحتي بشوفه طة ومريته وجهاله
منك ياابو الحسن مااريدك تردني وتتعذرني
باستني على كصتي
وكالتلي /لو بيه حيل وامشي اروحن وياج
بس اخاف اتخربط هناك وبيمن يحروحن
توكلي بالله يمه ، همام واكفلج بره
وحيدر منتظرج بالمستشفى
طلعت امشي وأبجي ونسوان كلهن
يكولن/ بسلامه تكومين
صيري سباعيه لا تخافين
ان شاء الله تفرحين بشوفه رجلج وجهالج
شافين الواحد يمشي بس بدون شعور
اكو لحظات تمر على البشر من كثر خوفه وارتباكه
يمشي بدون عقل وبدون روح
مجرد جسمه اله وتمشي
طلعت اني ومسره وساهرة
همام منتظرنا بالطرمة
اباوع عليه نايم على الستيرن
من صعدنا خطيه بالكوة شال راسه وفتح عيونه
بس صعدت كتله / شلونه طارق
كالي / يسال عليج
كتله / والله يسال عليه
كالي / والعباس يسال عليج ولازم ايد ماجد
ويصيح سامحيني اذيتج
ويبجي بصوت عالي وهو بالكوه يجر النفس
ماكو ساعه وبس صحوا الاطباء من بنج العمليه الاولي
دخلوا عمليه ثانيه ما اعرف شصار عنده مضاعفات
كمت ابجي بالزايد هوايه مقهوره عليه
كتله / همام عليك الله راح يعيش مو
يعني مراح يموت نفس بابا وماما
كالي / ادعيله والله كريم
بنص الطريق نزل كال / بعد مااشوف
حجيه تعاي كملي لا اسوي حادث
،اباوع ساهرة نزلت ساقت السيارة بمكانه
وهو صعد بمكانها بالصدر رجع راسه على الكشن
خطيه مغمض بس ما نايم يكول / راسي
صاير طبل هوايه تعبان
وصلنا للمستشفى اني بالكوة امشي من الخوف
وظهري مشلول مااكدر أتحرك وامشي زين
وبطني شنو حجارة احس كمت مااكدر اتنفس
هلكد ما قلصت ويبست احسها صارت خشبه
همام جابلي كرسي المتحرك هذا مال مستشفى
من دخلنا بالاستعلامات خابروا على حيدر
شويه واجى علينا
لابس بجامه وقميص لونهن اخضر مال مستشفى،
وياه بنيه وولد من يحجون وياه ينادونه عمو ،
حولني للسونار
خطيه ابد ماعافني حتى للسونار دخل ويايه
وساهرة هي حارت بيه مسرة خطية مو هلكد تعرف
ماافتهم عليهم شنو يحجون
حيدر والبنيه ام سونار يحجون انكليزي
انوب علت صوت سونار يطلع صوت حركة الجهال
هو خابر من يم تلفون غرفه البنيه
كاللهم / حضرولي صاله العمليات الرابعه
وبلغوا الدكتوره فدك عدها
قيصريه توام ثلاثي طارئه
ماخلاني انزل من سديه السونار
جابولي سديه ثانيه حولوني عليها
كاللهم / اخذوها للصاله الرابعه
وبلغوا طبيب تخدير غزوان وياكم
كلوله أخت حيدر هسه اجي وراكم
اخذتني البنيه والولد الي اجوي وياه بالبدايه
وراهم ساهرة ومسره وهمام يمشون
وصلنا لغرفه كالولهم لهنا حدكم
اني كمت ابجي بصوت عالي هوايه خفت
البنيه هاي الدكتوره مبينه حبابة وبعدها صغيره
كالتلي/ لا تخافين اقري قران هسه دكتور حيدر
ودكتوره فدك يسولج القيصريه ومن تكعدين
تشوفين اطفالج يمج
اني هوايه فرحانه الج لان راح يصير عندج توم
استلموني جوة أثنين نسوان كبار
كالولي/ العفو دخلي للحمام
وانزعي كل هدومج
وهاج البسي هاي هدوم العمليات
جانت صدريه مفتوحه من ظهرها
من بدلت المراه انطتني محرم صلاه لبسه عليها
كلهم يسألوني/ دكتور حيدر شيصير منج
واني اكلهم ابن عمي
وأخو رجلي
من دخله الغرفة العمليات صكيت من البرد
والخوف والرهبه من المكان سكطني بالزايد
من صعدوني على السديه خفت
كتلهم / عفيه صيحولي حيدر اخاف
صارت روحي بحيدر
احسه هو الامان اليه بهاي اللحظات
اجي دكتور شكله اكبر من حيدر
خلالي كانونه كمت ابجي وجعتني
هو يسولف ويايه يريدني اصير قويه ومااخاف
من سالني/ شكد عمرج
كتله/ ١٥ سنه
بقى صافن بوجهي
كالي /منتصر ابو حسين شيصير منج
كتله/ ابن عمي واخو رجلي ورجل اختي
هنا سمعت صوت حيدر كال / يالله يلا بويه
كولي يالله ليش تخافين ما تردين تشوفين جهالج يمج
باوعت عليه لابس صدريه وجفوف وكمامه
كتله/ اخاف، ميخالف الزم ايدك وبجيت
هو كال / هااا شو بجينه
وين طارق عنج بس يشوفج تبجين يكتلج
يخاف على جهاله
-غزوان بعد اخوك
انطيها ابرة مسكنه حتى ماتخاف
وانوب صاح /
فدددك تعالي شوفي اختي الصغيره
شلون عيونها حلوة
الرجال الجبير كالي / شو نامي حتى اسويلج سونار نسمع صوت نبض جهالج
اني هم تمددت والبنيه غطتني
وحيدر هو اللزم ايدي وكالي/ جهالج مابيهم شي لا تخافين
هذا الرجال خلالي ابره مسكنه بالكانونه
بعدها مادخلت الجسمي وكمت اشوف يحيدر يتحرك بسرعة ونمت ....
مسرة / دخلوا سوار للعمليات
لو اني زعت العافيه،
شبعت بجي هوايه خفت عليها ،
سودة عليه وجهه صاير اصفر شاحب ،
حيدر اجى يركض وراه دكتوره هم تركض
كال / ادعولها الاطفال نبضهم ضعيف
هنا شتردوني كعدت كبال صاله العمليات
مااعرف ابجي لو ادعي لو اسولف ويه روحي
ماحسيت غير ساهرة حظنتي وكالتلي /
مو زين عليج وعلى البطنج كولي يالله
ترى منتصر ما شايلته الكاع من فرحته سودة عليه
داري روحج لخاطره
دقايق مرت عليه ضيم وبجي وقهر
هوايه خفت على سوار
همام تلفونه ماسكت كلساع واحد داك عليه
وخالتي اقل العشر دقايق ودكت
وهو يكلها/ يمه والعباس بعد محد طلع علينا
بعدها بالعمليات
يمكن اقل ساعه طلعوا سوار من الصاله على سديه تنفض من البرد، والبنيه الدكتوره الصغيره
تركض ويه الولد اليدفعوها
ركضنا وراهم واصعدنا بالمصعد
خلوها بجناح الخاص بغرفه وحدها
نقلوها من السديه لسرير الغرفة
ساهرة راحت على دكتوره الصغيره
كالتلها /فدوة الصغار شلونهم
كالتلها / الصراحه وحدة من البنات زينه
بس الولد والبنيه الثانيه هوايه تعبانين
دكتور محمد اختصاص الأطفال حاير بيهم جوة
هو ودكتور حيدر ودكتوره فدك
والولد مااعرف شبي عندة خلل برجلي مو طبيعه
سوار خبصتنا خبص تصيح بصوت عالي /
طاااارق تعاااال يمي
طااارق لا تروح
طااااارق وينك ليش مااشوفك
همام كوم وسجل كل حجيها مو تهذي من البنج
تحير شنو تسولف وشنو تحجي
وهو هم خبيث يحجيها وهي تجاوبه
ويكلها / لا تجذبين انتي ما تحبين طارق
راح يتزوج علياء .
وهي خطيه مغمضه عيونها
وتحرك براسها تلوب وتبجي
وتكله / لا والنبي وروح ماما هوايه احبه
حتى بعد مااخاف من عنده شكد احبه من يبوسني
وهنا كامت تخرط كلام عيب
وهمام يضحك
وساهره تحجي عليه تكله / ولك خطيه مو بوعاتها
حرام عليك
هو يكلها / هذا دليل خليني اسجل الها
هو بس يكلها / طارق راح يزوج علياء
وهي تعيط وتبجي / لا عفيه لا يزوج
خاله والله راح اقبل ينام يمي بس لا يتزوج
وهمام يكول / جا شكد صاكرتها علياء
مسويه بيها رعب
انوب لطشت طارق تعال يمي انطيني ايدك
همام لزم ايدها وهي شو سكتت ونامت
ساهرة كالت / والقران طارق مسودن البنيه
هاي البنيه الدكتورة ضربتها ابره
وجابتلها كومه علاج
وكملت طبلتها هوايه سالتنه اسئله تخصها
شويه وصعد حيدر ورانه
همام كاله/ ها خويه بشر جهال شلونهم
كاله / بنيه تمام وضعها زين
بس الثانيه بالكوه تتنفس عدها عسر بالتنفس
والولد كلش تعبان ورجليه عوج مااعرف مقوسه
عنده خلل من الركبه وجوة
خليتهم بالخدج
ما يكدرون يتنفسون بدون اوكسجين
بعد رئتهم مو كامله وان شاء الله خير
والبنات ما يقصرن وياهم هم بعد اختصاصهم
وفدك جزاها الله خير خلصت نوبتها
بس الخاطر خوتنا اجتي سوتلها القيصريه
ايدها نظيفه بالشغل ونصوحه
واختصاص نسائية بامتياز
ودكتور محمد أخصائي اطفال
استلم حاله الصغار والله كريم
منو موجود بالبيت جيبولي مستمسكات طارق ومرته
انسجل بيانات للصغار
كتله / حيدر اني جبت كل مستمسكات سوار
بس طارق ماعندي
همام كال / الصبح انا اروح اجيبهن
كال الحيدر / بعد اخوك اريد انام ساعه ترى راح اتخربط من النعاس والتعب
كاله / امشي بات بغرفتي اني هم انام شويه
التعب كسرني
وسوار وصيت البنات عليها
وممنوع تحركوها الا بعد ٨ ساعات
قيصريتها كانت متعبه
وخلتلها فدك كيس لأدرار فميحتاج تتحرك
راحوا الولد ، وهمام خله تلفونه يم ساهرة
هي اول ما دخلنا للمستشفى طفت تلفونها وتلفوني
كالت/ هم احنا نقلق من كثر الاتصالات
وهم نقلق العالم ويانه
هي اتصلت على خالتي وبشرتها بسلامه سوار وجهال
وشكد حلو اسلوبها تبرد المشعول بنار
سوار / كعدت دايخه راسي ثكيل
وروحي تلعب ، واحس نفسي عركانه
نايمه بغرفة غريبة
ومسرة نايمه على سرير كدامي
وساهرة فارشه بالكاع بطانيه ومخدة ومتمدده
كمت اون من الوجع كل جسمي متفلش
وحلكي يابس اريد مي
وعت عليه ساهرة كامت من نومها
واجتي بوستني وباركتلي
ومسحت وجهي بشعري
فركته فرك وكعت من عنده جلد ،
رفعتلي شويه سرير
كتلها/ روحي تلعب واريد مي
كالت/ هسه اشوف البنيه
راحت طلعت من الغرفه وشويه ورجعت
كالت / ممنوع تشربين مي وروحج تلعب من البنج
اجتي وراها الدكتوره العفو شافت خو ماعندي نزف
كالت/ تبقى للصبح نايمه لا تتحرك
وراحت
كتلها / عفيه حجيه وين جهالي
كالتلي/ فدوة لله فد حلوين وصغار
وحيدر مخليهم بالخدج لان بعدهم ما كاملين
لا تخافين عليهم كلشي ما بيهم الدكتورات مدارياتهم
للفجر واني روحي لايبه
ومسرة خطيه نايمه ولا كعدت
وساهرة كعدت ويايه وحارت بيه
بقت تسولف ويايه وتصبر بيه
للساعه بثمانيه الصبح واني كاعدة
أجتي الدكتوره
هذاك المكياج ، وهذيج الكشخه
تريد تطلع للبيت ،
طلعت هاي الدكتوره فدك
اجتي شافتني وكتبتلي علاج
وكالت للبنيه بعد ١٢ ساعة
يلا تنرفع عنها قسطرة الادرار
وعلاجها تاخذه بنتظام ،
هي تابع بحالتي ،
اجي حيدر وجهه مطبك بعدة نايم
كال / صباح الخير ،
يلا كومي روحي للبيت
بويه ما عرفت انام من وره خالتج والداخليه
ورجلج شماله مسودن بس انتي جايبه
وكف يمي واتصل وكال / يالمسودن
هذا الفيفي مالتك بس فك عني سودنتي وياك
انطاني التلفون ورديت عليه
صوت طارق هو بس كال / الو شلونج سوسو
وبالكوة يحجي، اني طكيتها بجيه
طلعت غصتها من صمصوم قلبي
كتله / انت زين اني خفت عليك حسبالي متت
عفيه لا تموت تعال ارجع للبيت وبعد لا تروح للعسكريه
هو كالي / لا تخافين عليه بس ادعيلي
وهذا الكصاب اليمج خل يداريج
لو ابطل ماانطي مراة
وانعل والديه
باوعت على حيدر وكتله / لا والله حباب
هو سوالي عمليه ، ومخلي الجهال بالخدج
ساهرة تكول صغار وحلوين الحمد لله مابيهم شي
كالي/ انطيني حيدر احجي وياه
الدكتوره فدك ضحكت وكالت/ يااا حيدر باشا
طلعت انت مسوي العمليه واني كلشي ماكو
ساهرة كالتها / بيج الخير والبركة داده
ورحم الله والديج
ماقصرتي ويانه ،
حيدر هو يحجي ويه طارق كال / هذا واجبج عمه
ما مسويه انجاز عظيم ،
هي اشرتله بيدها بسيطه وكالتله / هااا تفشلني
اردها الك بسيطة
سلمت علينا وباركتلي على سلامه الجهال
وبوست ساهرة ومسرة
وكرصت حيدر من جتفه وطلعت
هو صاح وراها / بالعباس اردها الج بدفره
رجع كال / ويك يالمسودن
لا مو حلوة وتلعب ستين نفس
حير بروحك وعوفك منها
ساهرة ضحكت وكالت / كون شايفتك لمى
هيج تضحك وتشاقه ويه البنيه
والعباس تحركك
سد التلفون ويه طارق وكال / الله شاهد
فدك زميله من ايام الدراسه وزميله عمل
صار ب ١٥ سنه من اعرفها ،
بنيه نظيفه وشريفه ومرحه
ما تشاقه بس ويايه ويه زميل ثاني
والباقين لابستهم ،
وعود ما وصيجن أحركن بصلتي
يم المسودنه وخلنها تكب عليه
ساهرة كالتله/ انت تعرف طبعنا
لا نسمع لا نرى لا نتكلم
هو ضحك وكال / ابد، الا هذاك الواحد
شهرني جوة شكو بينه وبين حبيب القلب
من سوالف كتهن بالبنج
ساهرة كالتله/ يااا عزة هاي جوة يمكم بصالة
لو سامع همام من سجل الها هنا بالغرفة
ماخلت خبطت الاخضر واليابس
باوع عليه وكال / يلا كومي اتمشي
اليوم ماكو طلعه مبيتج يمي
اليوم عندي خفار اضوج ابقى وحدي
خل اجي اتونس يمكم بليل
وره ما طلع
ساهرة ومسره يردن يكومني ما يكدرن
كمت ابجي بطني هوايه توجعني
راحت ساهرة تشوف منو يجي يساعدنا
اجتي وياها أثنين ممرضات
شنو وحدتهن رجال شالني شيل وكفني على طولي
اخاف اتحرك وكمت اعيط / راح اوكع
ماماااا بطني توووجعني
وحده صاحت بيه/ اششش ولدغ
شبيج جبانه مو هل لازمينج
يلا امشي كدامي للحمام خل ابدلج
خلسني خلس دخلني للحمام غسللي
وبدلن ملابسي وطلعني
اكلهن دخت اريد اكعد
هاي الوكحه تكلي / اششش لان نايمه أدوخين
يلا امشي وتحركي حتى تتحرك بطنج
وينظف حرمج
أمشي حتى نوديج يم جهالج الظهر
وصدك يمكن عشر دقايق هن يمشن بيه
وساهرة ولمى واكفات باب الغرفة
من كعدني بمكاني على السرير
ساهرة كرمتهن ، وحدة ما قبلت تاخذ
كالت /هذا واجبي حرام عليه اخذ
هاي نفسها التصيح عليه
الا ساهرة كالتلها /هديه اعتبريها
يلا اخذت ،
والثانيه كالت/ انعم الله عليكم
معروف دكتور حيدر بكرمه واخلاقه
ونعم منكم
للظهر ولزمتني صخونه كمت انفض نفض منها
وصدري ملخني من الوجع
اليطخني اعيط بوجه من الوجع
اجتي نفسها هاي الممرضه العصبيه شافتني
كالت / ماكو شي يخوف هذا الحليب در بصدرها
همام بس جاب غده لساهر ولمسرة وراح
سالتله على طارق بس كال /زين وطلع
للعصر يلا اجاني حيدر
كال / ام محمد تكول عليج جبانه وخوافه
ليش ما تمشين
كتله/ مو بطني توجعني ودايخه
كال / لا تبقين نايمه ادوخين
رفعلي السرير خلاني شبه كاعدة
كالي /ابقي هيج على هاي الوضعيه احسلج
وهسه كومي خل اشوفج جهالج
واحدهم جنه كنفذ يلعبون النفس
ساهرة هي ومسرة نهضني على كيفهم
مشيت خطوه وكفت اخاف امشي
هو كال / شو حجيه من رخصتج
هسه اصيح الها ام محمد تصكرها
صدك بس صاح بالممر/ ام محمد تعاي عمه شويه
اجتي هاي الممرضه الوكحة لزمتني هي وساهرة
وسحلتني سحل رحنا بالمصعد الطابق الخدج
يمه شفت جهالي مخليهم ثلاثتهم
بحاظنه وحدة جبيره ،
وعليهم ضوة قوي
وملبسيهم بس حفاظه
سادين عيونهم مااعرف ليش
وكل واحد بيده كانونه
وبخشمه صونده مال اوكسجين
يمه كلش صغار وحيل ناعمين
اني شفتهم والله شمر عليه غضب مال بجي
اتوسل بيهم بس اطب الزمهم ما يقبلون
يكولون الغرفه معقمة ممنوع
والبنيه ام الخدج حاجتني من وره الشباك
كالت / والله زينين
وقربت عليه ألحاظنه شفتهم زين
يمه فد ناعمين وصغار
كتلها / شو حيل صغار ليش ؟؟
والله هوايه اكلت على مودهم
كالت / الحمد لله ترى زينين
هذا ((ذو الفقار ))وزنه كيلوا وربع
وهاي ((مشارق ))وزنها كيلوا وميتين غرام
هاي(( وهج ))ما شاء الله احسن من اخوانها
وزنها كيلو وربع ،
كتلها / منو سامهم
كالت/ عمهم دكتور حيدر هو السماهم
ساهرة كالتلها/ شلون بالتغذيه مالتهم
امهم ترضعهم ، لو تنطوهم حليب من عدكم
كالتلها/ حجية حاليا بس محاليل طبيه نعطيهم
نخاف عليهم عدهم عسر بالتنفس
رجعت للغرفه لا شلتهم ولا لزمتهم
بقيت ابجي عليهم ، شكلهم قهرني
وانوب تذكرت ماما ولكيتها حجها
لان اني من البارحة اريدها توكف يمي
وتوخر الخوف عني ،
بس الحمد لله ساهرة وحيدر ومسرة
سدوا جزء صغير من مكانها
لليل ومحد اجانه من الأقارب
سالت ساهرة/ ليش محد اجي علينا
كالت/ حيدر ما يقبل احد يجي
منع الزياه علينا حتى لا ندوخ ونتعب
لليل كتلني جوع كتلهم اريد اكل
ما تقبل الممرضه ام محمد اكل شي
بس عصير برتقال شربتني ساهرة
وشويه مي ،
تكول/ العفو الا تتحرك بطني يلا
حيدر اجى يمنه بليل وبقينا سوالف وحجي
هو عنده جهاز بس يدك يروح وين يلا يرجع
جاب وياه اكل وجاي لساهره ولمسره
وكالي / انتي ابقي كسوله ونايمه
صوج طارق العلمج على التختخه
كتله / ان شاء الله
يوم تشوف لمى هيج مسويه عمليه
وهم تكلها كسوله لو تخاف عليها
كالي / كون بخت فروخج واشوف لمى بمكانج
نذر عليه البس بناتج كلايد ذهب
ساهرة كالتله / عند الله مو بعيده
للفجر يلا ام محمد الممرضه العفو رفعتلي صونده الادرار ، ارتاحيت راحه نفسيه نص الوجع راح
والعفو استخدمت تحاميل علمود بطني تتحرك
يلا شويه استقريت
الصبح من طلع حيدر للبيت اخذني وياه
كعدني يمه بالصدر كال/ المسافه اوسع
حتى ما تضايقين بالكعده
هو شالني من الكرسي المتحرك وصعدني بالسيارة
بقيت ابجي مقهوره على جهالي
طلعت ومااخذتهم ويايه
هو كالي / ترى يبقون هوايه بالخدج
لان ناقصين ما مقبطين ٩ اشهر
وتوأم رادلهم عنايه خاصه
والطريق كله بقيت ابجي مقهوره
وانوب طسات الشارع شيطت روحي
كلساع كامزة وعايطه من الوجع
وصلنا لبيت خالتي
وحيدر دخل السياره لباب المطبخ
و نزلني من السياره
وساهرة ومسرة مشوني الداخل البيت
تكولون شي عجيب واني اول وحدة اسوي عمليه
كل النسوان يباوعن عليه والجهال يصيحون اجتي
وساهرة تمشي وتصلي على النبي بصوت عالي
ودخلتني بغرفة خالتي مددتني على السرير
وهنا بلش شوط البوس
شكو مراه اجتي باستني
وباركلي على سلامتي وسلامة الجهال
خالتي تبجي وتبوس بية
والله مو تكولون يومين عدت على ضربة طارق
لا حسبالك سنه وجهه ممرود مرد
فرد نوب صايرة بالكوة تتحرك وتمشي
كالت السهى طكطي حرمل وملح
وكالت الساهره/ اريد راعيتها منج امج ونختج
مابيه حيل اعين روحي
ساهرة اشرت على عيونها وكالتلها/ لا توصين حريص
والنسوان كل وحدة تكول شكل
هاي تكول البسي هدوم ثخينه
وهاي تكول ممنوع تغسلين بمي بارد
وهاي تكول لا تاكلين شي حار مو زين حليبج يشيط
وهاي تكول خلي جوة راسج سجينه مو زين من التابعه
وهاي تكول لبسنها ذهب مو زين تبقى خاليه لا تنجبس
وهاي تكول باجر سبحنها بمي وملح
يمه شكد يكولون ويقترحن
ساهرة كاعدة يمي وبس تكلهن/ من عيوني
ان شاء الله هاي خوش معلومه تفيدها
هي ساهرة علمتني بس على شي واحد
بالبسكوت من ماكو نسوان بالغرفة
تخليني اجمع حليبي بكلاص وتروح تكلبه بالحديقة
تكول / حتى لا يجف صدرج خطيه يفيد الجهال
وبقيت عشره ايام تحت رعايه الله وساهرة
هي بقت يمي دارتي بمكان ماما
وحتى امها العجوز تبات يمي بليل
وشكد حلوة سوالفها كله تسولف عن ايام قبل
طارق بالمستشفى كل ما نسأل عليه يكولون زين
ومايقبلون وحده من النسوان تروح للمستشفى تشوفه
خالتي كطعت روحها عليه
اجى واخذها مهند وماجد
يمكن ساعة ورجعوها
شنو اجتي مكطعه روحها من البجي
تكول/ولجن طلعوا يجذبون عليه
وليدي مو زين بس النفس يصعد وينزل
من عساني لا شفته نايم هيج نومه
كسرت ظهري طيحتك يمه طارق
وبقن النسوان يحجن عليها تدعيله يكوم بسلامه
والله يرزقها الصبر
عمو حاتم مو زين فاقد عن الوعي
وهمام يكول / ميت سريرياً
هم الاطباء سووا العليهم والباقي يم رحمة الله
وجهالي بالمستشفى
سهى تروح تشوفهم العصر وترجع
ومره راحت مسرة شافتهم
من رجعت حلفتها كالت / والله العظيم زينين
وحتى شكلهم متغير عن هذاك اليوم
هوايه مداريهم بالخدج
ساهرة كالتلها / منتصر يزخ عليهم زخ فلوس
حتى يداروهم ،
وحيدر يوميه يشوفهم
ان شاء الله تشوفيهم بسلامه
بلكت اسبوع ويطلعوهم وتخليهم بحظنج
وتملين من دوختهم
اني من اكلهم خل اخابر طارق يكلولي نايم
لو تعبان من التخدير والمسكنات
اخلي واسكت
عمليتي بين يوم ويوم اتضمدها اليه ساهرة
تشيل الضماد القديم وتخليلي جديد
لمى ما توصل يمي من تضمدني ساهرة
تكول / والله اتخربط فوكاج
وشكد تحلف بيه تكلي / من رحتي للمستشفى
البنات هم يباوعن على حيدر
هم حسيتي مصادق وحده
كتلها / والله البنات ينادنه عمو
وهو فد شكله كشخه بهدوم الطبيب
وبالعمليات ولا عرفته هو سوالي العمليه
هي تنشنش من سمعتني هيج اسولف عليه
منتصر كله مقيم بالمستشفى يجي بليل
كد يسبح وينام ويطلع من غبشه يرجع للمستشفى
حتى لحيته صارت عاليه ابد ما زينها
تكولون صار شايب بلكوه يمشي
من طلعت للبيت ثاني يوم خطيه جابلي طلي
وذبحه سعيد جوة رجليه
واجى من غبشه قبل لا يروح للمستشفى
باسني على راسي وسلم عليه
وكالي / طارق دز امانه ويايه
سمعني تسجيل بالتلفون
هذا حجي مال البنج هو يسولف ويبجي
ويصيح سوووار سامحيني اذيتج
لج لمى الزريكه اخاف اموت وحيدر يأذيج
ولج نهى والعباس اذا حاجاج وميض بعد اشك حلكه
فاطمة خاتون عينج على جهالي
اني سمعته وفرفحت من البجي
وهو منتصر هم نزلت دموعه ويايه
ساهرة كالتله / حجي هاي انت القوي
ومؤمن بقضاء الله وقدره شخليت للناس العاديين
كاللها/ نومة طارق هدت حيلي
وعاشر يوم مو حظي فكر وهم محد ينصح
ماانتظرت ساهرة وخالتي لباجر يجي حيدر
ويفتحلي الخياط ،
لا اخذتني ساهرة بسيارة احمد ابن عمهم ،
على مراه مضمدة بمنطقتهم
من فتحتلي الخيط وسحبته
حظي الفكر انقطع ابطني ما اجى كامل بيدها
هي حارت شلون تسحب الباقي
لان من هذا الطرف تحصله
ولا من هذا الطرف تحصله
وبقت تتعذر وكالت الساهره اخذيها للمستشفى
رجعنا للبيت خابرت خالتي على حيدر
كاللها / اني اسحبه الها عوفيها على باجر
لا تجيبها للمستشفى اخاف عليها من تلوث
واني هم كيفت رحت سبحت الحمد لله
صار عشرة ايام ما سابحة
فد ارتاحيت ،طن وسخ وكع من عندي
وحليبي كل ساعتين اسحبه
وتكلبه ساهرة لو مسرة بالحديقة
الصبح كعدت والحمد لله حركتي زينه
ضربت كله ابر قويه مال التهابات
ومن خلصتهن بلشت اشرب كبسول
الحمدلله هوايه زينه
ليش ما طلعت من الغرفه واشوف عمتهم ام شمخي
جايه قبل شويه وياها بناتها وولدها
وعلياء الحقيره ،
وكل النسوان سلمن عليه وباركلي بسلامه الجهال
وحتى علياء سلمت عليه وباركتلي
رحت امشي للمطبخ اريد اتريك
وحدة من بنات ام شمخي كالت /
شو ولا جنها جايبه عمليه وطالعه من حلك الموت
شكبرها صايره وشعرضها
دلال بيت خالي كاظم واكعلها
ولا جنها نفسها من عرست
علياء كالتلها / كولي دلال طه نفشها نفش
هو يعرف شلون يدلل
اني ولا أهتميت الحجيهن
لان بس اباوع على علياء اروح افترسها من قهري
هوايه شايله عليها حقد
الحقيرة تريد تاخذ رجلي مني
النسوان اقرباء بيت خالتي البيوتهم قريبه
كامن يروحن ويجن ما يباتن مثل اول ايام
والبنات تارسات المطبخ يشتغلن
سويتلي ريوك وكعدت على ميز الطعام اتريك
فجأه واحس سجينه وشكت بطني
ضربتني نغزه قوة شنجتني
ماتحركت بقيت جامدة من وجعها
هنا أنفتحت باب المطبخ ودخلت مسرة
تبجي وتعيط / خاله لحكيني
وشعرها مكفش وشكلها مكتوله
ورجليها تصب دمايه وراها ..........
شكرا لزيارتكم عالم روايات سكيرهوم
