رواية ناديه الفصل الرابع والعشرون 24 بقلم انين الليل

 نلبس چان ابودي اصير نذل مثل حسن واطلب 

فصل اخذ سكنه

لكن ما گدرت بوكتها استحييت من امي الاشوفها تبچي على حسن وتنعى النهار كله وصار فصل اخوي 

الگاع الي انكتل على مودها

وديت الها خبر بيد اختي راح ارفض الفصل واطلبج فصل انتي بس اصبري  

انا ما جست الگاع ولا وصلتها ولا گدرت احچي گدام امي اريد اخذ سكنه وظليت عايش هناك بنفس مكاني 

وانا يوميه اتمنى اشوفها

باوعلي // وتلاگيت وياك بالمگبره وانا ما اعرفك بس يا سراج من يومها دخلت گلبي ومن سمعت قصة  

عباس انقهرت على البنات وشراح يصير بيهن من ايكبرن 

وبقيت اتحين الفرصه حتى اروح على رجال شيخ خييرمو من عشيرتنا وارفض الفصل واطلب بتهم 

  بحجة حرام مانعينها من جهالها 

وگعدت الصبح اريد اروح للزلمه ومريت من يم الكاع الي اطوني اياها فصل بس الي شفته عجبني

:: شنو شفت ؟

وشفت اخوها عزيز جاي يكرب بالگاع مالتنه وهو من شافني ما چنا كاتل اخوي لا خاف ولا شرد ظل بكرابه 

وصلت يمه وسالته //شتسوي وليش جاي انت مو مهدور دمك 

هو گلي باستهزاء //وياهو هادر دمي انت 

گتله //رووح منا واتكفى الشر 

عزيز //. ههههه باالله والا ما رحت شتسوي لا تگلي تكتلني

من كلامه واستهزائه انا ما اتحملت كمشته ونزلته من المكينه وبوكتها الرفاق وين ماچان يحطون المسدس بالصفحه 

گول نزلته واخذته منه المسدس ورميته طلقه وحده بنفس المسدس الي كتل بي حسن انا كتلته وبگلبه طلقه وحده 

اطيتها اله كلش ابگلبه

واتحسر رضا وگال //وما انسى من اجيتك انا واهلي وشلون ساعدتنا وعرضت نفسك للخطر 

باوعتله ::ليش انا الي انسى شلون انت ساعدتني وحافظت على بيتنا ومحلاتنا 

رضا //ما سويت اله الواجب ومن صار الاحداث صرت بعيون الناس بطل ومجاهد وكتل ابن عمه الرفيق 

الي ماذي الناس وما يدرون انا كتلته لان اجه واستهزأ بينا وردتلي الكاع وحتى كاع بيت عمي هسه انا مسؤول عنها 

لان همه راحو الغير مكان وهاي انا ذاك يوم وهذا يوم عايش بدوامه وقهر

::والارض الي چانت السبب بموتة حسن ؟

رضا //رديتها البيت عمي ومن گعدنا للفصل رغم همه شالو لان ابن عمي ماذي هواي ناس انا اشتريت گاعهم 

او وديت الهم فلوس الگاع يعني فصل 

::وسكنه وين هسه ؟

رضا //اشتريت الها بيت ورديت جهالها الها لان بعد مستحيل تكون من نصيبي 

::ما اتزوجت ؟

هو باوعلي //تتصور تتزوج ؟

::اكيد لا 

هو اتحسر //اي والله ما اتزوجت 

::هم شفتها 

- - من يوم الي اخوها كتل حسن ما شفتها بس مره يو مرتين والجهال دووم يجون ويبقون عدنا شهر اكثر واردهم 

رغم الناس تلومني اشلون اخلي اولاد اخوي عد امهم وخوالهم الي يتموهم لكن انا الي شايل الضيم واعرف 

بضيم وقهر سكنه اشلون احرم جهال من امهم

:: لكن انت حرمت نفسك من حب عمرك  

  هز راسه بحزن // اي والله ياسراج هالگلك الحك على روحك ولا تصير مثلي

  دنگت وانا اتنفس قوي باوعت الرضا الي هز راسه وكلي 

تره عيونك فاضحتك ياصاحبي

رجعت للبيت واقارب رضا شولنه سمج اتغدينا ورضا طلع يشوف الگاع ورد بالليل ما گدرت انام بقيت الليل كله 

وانا افكر بكلام رضا بقيت تلث تيام رابع يووم الصبح قررت ارجع البغداد وانا طوول التلث تيام غالق التلفون  

وياي رضا طول الدرب وهو جر ابوذيات وره الظهر بشويه وصلنه البغداد ورحنا اتغدينا بمطعم بعدها وصلت 

رضا يم بيته وانا رجعت للبيت وهناك ما لگيت احد عرفت سجى رايحه الاهلها دخلت اخذت حمام وطلعت 

بدلت واتمددت على فراشي واتفاجات ابسجى جايه هي وابوها وامها واخوانها اثنينهم

دخلت عليه للغرفه وخلت الباب مفتوح وهي تگول بصوت عالي وباستهزاء 

- - - الحمد لله ع السلامه چان بقيت فد خمس تيام سته او ليش تكمل اربعينية المرحوم وتجي 

انا باوعتلها واجيت اتقربت يمها:: خير سجى شصاير ؟

سجى //لا ما صاير شي يا استاذ يامحترم

خزرتها وانا اشوف امها واخوانها يباعولي بتعالي طلعت للصاله وگعدت بدون ما اسلم وگلت الابوها 

::اتفضل عمي ليش واگف البيت بيتك 

سجى جاوبت //لا تغير الموضوع 

 كعدت ع القنفه جاوبتها بكل برود ::مو يكون بالاساس اكو موضوع 

امها حچت// على كيفج سجاوي خلي نفتهم هاي العصبيه مو زينه عليج (وباوعتلي وسالتني )

- - سراج انت وين چنت ؟

اتعجبت من سؤال امها ورديت ::لويش خاله تسألين صاير شي ؟

سجى هي جاوبت //اي صاير 

::شصاير ؟ 

اتقربت عليه وهي تگول //الصاير انت كذبت عليه وما كنت بفاتحة عم صديقك

باوعت الها صفح وحچيت باستهزاء ::هاا وانتي جايه وجايبه وياج السيد الوالد والوالده واخوانج بس حتى تگليلي 

انت ما چنت بفاتحة عم صديقك 

كامل جاوبني //سراج تره سجى خافت عليك وصارت تبچي لان ما ترد ع الاتصال وخافت ودزت علينه 

::عمي وانا هسه رجعت مابيه شي والحمد لله واتصور حجي عيب تصرف بتك هذا

اتقربت يمي سجى وهي تگول //عيب ليش الي مثلك يعرف العيب 

من سمعت جملتها الاخيره وكفت على حيلي وضربتها راشدي وگتلها 

:::تعرفين كلش زين انا الي اعرف العيب 

الكل انذهل من تصرفي واجه اخوها وهو يگلي بعصبيه //باي حق تمد ايدك على اختي 

::بحق هي زوجتي واتجاوزت عليه

اخوها وهو يصيح //بس ما تمد ايدك افتهمت 

ما جاوبته سالتها ::اگدر اعرف هاي الفعاليه شنو الداعي الها 

هي متفاجئه من تصرفي وگلتلي //هسه اتطلگني دقيقه ما ابقى عندك مو بت كامل الي تنمد ايد عليها وتنضرب 

رديت عليها بكل هدوء ::وانا حاضر 

جاوبتني امها بنفس التعالي // الظاهر انت منتظر هاي اللحظه 

سجى متخوصره //اي ماما حتى يخلاله الجو

اتقربت عليها ::احچي عدل وكافي 

امها //هو شنو الكافي فتحنالك بيتنا وگلبنا وانطيناك بتنا وتالي تضربها گدامنا 

كرهت نبرة التعالي الي تحچي بيها جاوبتها بنتر 

::واكسر راسها لان هي مو محترمه 

اخوها گلي //الزم حدك لا اندمك 

رفعت حاجبي باستغراب وانا افر بايدي :: مو چنكم جايين تتعاركون وتتهددون وانا ما احب هاي الطريقه

كامل گلي // سراج انت كذبت علينه من گلت رايح الفاتحة صديقك وانت رحت للبصره واريد اعرف انت 

ليش رحت 

انا جاوبته باستهزاء ::رحت اغير نظام الحكم اتصور اني حر وين ما اريد اروح اروح ومحد اله حق يسالني 

كامل //بس انت گتلي ......

قاطعته ::اي گلت وعجبني اروح للبصره ليش ممنوع 

كامل //- لا مو ممنوع بس چان المفروض تنطي علم المرتك انت رايح للبصره

باوعت السجى هي ردت //اي رحت حتى تشوفها الناديه مو 

هزيت راسي وجريت نفس ::وانتي جايبه ابوج وامج واخوتج حتى تگليلي هاي الجمله 

سجى //اي وحتى اگلك انا كشفتك

رديت باستهزاء ::هههههه عبالي جايه تخوفيني بت حضرة ال....لكن انتي ما عرفتيني لان استعجلتي بالزواج مني 

انا محد يلويلي ايد واذا انتي چنتي بت حضرة ال..هذا البرستيج تگولينه گدام الناس مظهر انتي اهنا زوجة سراج 

ومو من حق اي احد يتدخل بينا حتى لو چان ابوچ

جاوبني اخوها //وانت منو حتى هيج تحچي كلك قحط حشره تريد تتعلى وتصعد على اكتاف ابويه 

اتقربت منه ومديت اديه اثنينهن على چتفه وانا كانما امسح تراب عن قميصه وهزيت راسي وگتله باستهزاء

::كلامك صحيح وبمكانه وهسه صعدت بس انا ثگيل لذلك اكتاف ابوك ما شالتني

هو راد يحچي انا ما خليته باوعت السجى وگتلها //لذلك ياست سجى يراد تشوفين واحد خفيف حتى يگدر ابوج يشيله 

كامل //شنو هذا الكلام 

انا ولا كانه هو رئيسي بالشغل گتله ::اي استاذ كامل هو هذا الكلام مو سراج الي هيج ينحچي ويا ولا سراج 

الي ينلوي اذراعه

احمد اخوها گلي //لك ما تدري بينا احنا نگدر بلحظه ننهيك انسحكك برجلينه 

حاولت امسك نفسي وابين برودي امامهم گتله بكل هدوء لكن انا ابدي اكتلهم كلهم 

:: انا ما ارد عليك هذا الكلام يرد بي عليك ابوك ياسبع 

اخذت السويج والنقال وطلعت ركبت بالسياره وبقيت افتر وانا عباره عن بركان يريد ينفجر اتصلت برضا

رد عليه //ها سراج خير 

::انت وين 

- - بالبيت وشويه واروح للمحل ليش

::انتظرني جايك 

- - هلا بيك

رحت يم رضا لان احس من يحچي وياي ارتاح واحس بي فاهمني وصلت يم البيت دگيت هورن هو طلع وصل يمي 

- - هلا ابو نور 

نزلت نظارتي ورفعت حاجبي وگتله ::منوهاي نور 

هو بضحك //بتك غير 

::ااه يعني انت سميتها بكيفك

- - مبينه كل واحد اسمه سراج لو يسمي منير لو قمر لو نور لو ضياء وان شالله كلهم يصيرون عندك ياالله حول (يعني انزل ) 

خلي اشربك چاي 

ابتسمت من كلامه وكتله ::لا انت تعال اصعد 

ركب يمي وگعد واتسالم وياي //السلام عليكم 

::عليكم السلام 

سقت السياره وظليت ساكت رضا باوعلي حس بيه ضايج وانا ادخن هو صار يغني بموال بصوته الشجي

يراحااي يراحااي ابي افركچن لما ادميچن يراحااي

بسبب كل حين تلچمن يراحااي 

انا كلمن ياويلاه انا كلمن نظر شخصي ياراحاي 

متت بسبب ااه احو احوو انا صبغوا الباب وتيتهم 

انا كلمن نظر شخصي ياراحااي 

متيت بسبب فركاك اليه

انا ما سيطرت وانا اسمع الموال نزلت دمعه من عيني هو گلي 

- - افه وانا اخوك صدك سراج بچيت 

انا جريت نفس بالجگاره ::ليش شتشوفني ما عندي گلب

رضا//لا والله بس ادري بدمعتك عزيزه 

ما جاوبته وبقيت ساكت هو گلي //سراج شصاير وانظل نفتر بالسياره 

ما جاوبته رجع گال// دوگف ياخي خلي افتهم شبيك

وگفنا على صفحه نزل رضا واجه بصفحتي وگلي //سراج تنزل وانا اسوق انروح المكان هادي نگعد بي ونسولف 

جريت نفس وگتله:: هو وينه المكان الهادي 

ونزلت وگفت يم السياره وشعلت جكاره ورضا هم دخن واحنا ساكتين گللي 

- - اگلك سراج تحچي لو هسه اطگك بموال وابوذيه اخلي كل هاي الناس البسيارت يلتمون علينه 

انا ضحكت رغم ضايج هو حچى گلي //شبيك تعاركت وياك

جريت نفس ::يمكن مثل ما گلت غلطت باختياري 

- - شلون 

وسولفتله الي صار هو من سمع اخوها هيج گال صار يحچي ويگول انا خوك(نخوة اهل الجنوب ) 

گلي //وشراح تسوي 

::والله ما ادري 

- - لا لازم تذبحها على قبله شوف سراج گدامك حلين لو هذا لو هذا 

باوعتله مستفهم ::شنو هالالغاز رضا شنو لو هذا لو هذا

- - سراج انت ليش من دون الناس خابرتني 

::شنو قصدك وضح 

- - قصدي ليش مو عدك اخوك اولاد عمك صحبانك ليش انا 

::لان من احجي وياك احس بكلامك من گلبك 

- - هاي شهاده اعتز بيها بس مو هذا السبب 

::لعد شنو 

رضا //انا اگلك من احچي وياك سوالفي من گلبي حد بحد ما اعرف اجامل 

::اي ما طول حد بحد گلي شنو قصدك بالحلين لو هذا لو هذا

- - قصدي خويه لو ترضى تبقى ويه مرتك وتمشي على هواها وهوى اهلها وشيگولون صار وخلي ابالك 

اول ناس يبعدونك عنهم گرايبك واحبابك وتصير بره بس انت وبس بس الحقيقه انت ...

::والحل الثاني 

فرك ايده //الحل الثاني ياسراج انت الي تعرفه مو انا

اهنا رن التلفون شفته كامل ابو سجى 

جاوبته رغم رضا دار وجهه وراد يمشي انا لزمته وجاوبت 

::اهلا استاذ 

هو بدون نفس //انت وين 

::اتفضل امر خدمه

- - رايدك تمرلي بالمكتب 

::هسه استاذ ؟

كامل بنتر //واحنا من يمته عدنا مواعيد 

جاوبته ابرود ::صار وتدلل جايك

////////

الفصل الخامس والعشرون من هنا 

شكرا لزيارتكم عالم روايات سكيرهوم