رواية جذبني فمك البني الفصل الرابع والعشرون 24 بقلم عبير إدريس

غم ذاك العمر من ينكضي تعلعل..

__

كملنه كلام وكمت اريد اروح رفع راسه كال ..

ايمن : ها يابه وين؟

سيلين: ساعه ١١ نعست وانت هم نام.

ايمن : اي هم صدك تأخر الوقت شكرا على العشا.

سيلين : اني شكو اشكر اخوك

ايمن :لو مو انتي اخويه ميجيب.

حجاها وضحك..

سيلين: صح اني ذكرته بس هو اشتراه.

ايمن : معليج مني غلسي غلسي..

ماعرف شنو يحجي بس الغاز مدري هو دهري ويايه ...

سيلين : تصبح على خير..

ايمن : وانتي من اهله..

نزلت لكيت باب الهول مسدود ، ياغبيه يا ايفين عود كتلها لتسديه شلون اخاف ادكها ونايمين ضليت حايره ، رجعت صعدت على ايمن دكيت الباب فتحها.

ايمن: هاا

سيلين : حباب خابر على ايفين.

ايمن: لوتيه انتي مو تدرين حاضرها ..

سيلين : هاي شبيك مو الباب مقفول واخاف ادكه ويكعدون..

ايمن : شلون متفقات عليه والله وعاشت ايدكم.

حجاها وكتف ايده.

سيلين : تره محد متفق هاي عمو ساده للباب عباله اني نمت..

ايمن : دكي خلي عمج يفتحه.

سيلين : ايمن تره ازعل..

رفعت اصبعي اهدد.

ايمن : ما افتح عليها الحضر ولا اتصل هسه انزل وياج وادك الباب ..

طلع كدامي يمشي ونزل قبلي نزلت وراه ادردم.

سيلين : يعني انت صدك تحجي..

ايمن: متشاقي وياج قبل..

حجاها ودك الباب ..

سيلين : والله عيب الرجال كوه نام هسه يكعد ميكلي وين جنتي ؟

رفع حاجبه وسد تك عين مد ايده يريد يدك الباب انفتح باوعت عمو واكف وعاكد حاجبه شعره مهوس مبين صارله ساعه اكثر من نايم ...

ادهم : وين جنتو؟

ايمن : اخذنه فره بالمنطقه وجينه وين جنه يعني غير فوك..

باوعلنه وفات ..

سيلين : هسه زين من هيج سويت..

ايمن : اي زين..

فتت وسديت الباب سمعت باب غرفته انسد يا الله شكد عيب وفشله كعدناه رحت للحمام فرشت اسناني وفتت للغرفه لكيت ايفين نايمه اني هم نمت ثاني يوم كعدت على ايد مريم تمسد بوجهي فتحت عيني لكيتها واكفه مبدله وبيدها مشط باوعتلها ضحكت .

سيلين : صباح الخير كلبي شوكت كعدتي..

مريم : كعدت ويه بابا الصبح سوينه ريوك سويه وتريكنه وبدلي وكال ماعرف امشطلج روحي كعدي سيلين..

كمت اخذت منها المشط وبستها..

سيلين : مو تدلل ياسة الصغيرونه فدوه نسخه مصغره ..

التفتت عليه وكالت..

مريم : بس اشبه بابا همين.

سيلين : صح تشبهين بابا همين.

مريم : وانتي تشبهيني ..

سيلين : هههههه لا اني اشبه عمه ياسه وانتي طالعه علينه لان اني اكبر منج.

مريم : صح هسه تجين ويانه.

سيلين : اي طبعا اجي وياج هسه ابدلج واني هم ابدل ونروح ..

مريم : اي بابا يكول اذا تجي صيحيها تتريك لان سوالج ويانه..

سيلين : سوالي اكل قصدج..

مريم : اي لفه وخلاها بالماعون وغطاها علمود متبرد..

سيلين : عاشت ايده وايدج ...

بستها ضحكت ، كمت عدلت فراشي ولبست حجابي وطلعت رحت للحمام وبعدين للمطبخ لكيت القوري على الطباخ لزمته حار بعده صبيت وكعدت على الميز وخرت الماعون لكيت اللفه فتحتها بيها بيض ولحم ،

والله نشط هاي ساعه بيش كاعد اكلت مبتسمه اول مره واحد يدللني ويسويلي اكل ابد مصايره ويايه جنت اني شايله المسؤوليه من وعيت على الدنيا لحد ما كبرت ومرات عمه من جانت بحيلها تسوي بس اساعدها ابد ما اضل نايمه للظهر وتكعدني اتريك يعني هاي اول مره اتدلل بيها حسيت حتى طعم الاكل يختلف رغم هو عادي مابيه شي بس ك احساس حسيته اكلت براحه وبنفس مفتوحه كملت ورحت غسلت رجعت لغرفتي بدلت وانفتح الباب فاتت مريومه..

سيلين : ما مرايم..

مريم : بابا يكول كملت ..

سيلين : اي كملت بس البس الشال.

مريم : يلا منتضريج بره..

سيلين : ماشي..

راحت واني كملت تبديل طلعت لكيته مكنبص ويعدل بملابس مريم وبصفه جنطه صغيره جلد مال دوام لونها جوزي...

سيلين : صباح الخير .

التفتتو عليه مبتسمين ...

هلكت ما وجوهم تبعث الراحه بالنفس اتمنى اعيش طول عمري وياهم وقريبه منهم ماريد اطلع من هذا البيت وافاركهم احسهم صارو جزء من حياتي يوم عن يوم كاعد احس بأحساس الانتماء العائلي الهم الجنت فاقدته قبل.

ادهم : صباح النور جاهزه.

سيلين : انت شتشوف..

ادهم : يلا نطلع لعد..

مشو كدامي جان لابس قميص ابيض وستره رصاصي وبنطرون نيلي كلش انيق بلبسه والعطر المميز اللي يخليه ابد مشامته قبل مرات اريد اسأله منين يشتري العطور مالته بس استحي ..

طلعت وصعدنه بالسياره وصلنه للروضه نزلنه تلاثتنه ..

دخلنه وتسالم ويه المدير مال الروضه وضلو يحجون الظاهر يعرفه قبل يعني احتمال لان جاي اكثر من مره وراها اجتي المس اخذت مريم ودعتنه ولوحت بيدها باي وراحت ..

التفت عليه مبتسم وعيونه مدمعه شلون رهمها مادري ..

ادهم : يلا نطلع..

سيلين : يلا..

طلعنه وصعدنه بالسياره سألته.

سيلين : ليش عيونك مليانه دموع.

ادهم : تمنيت ياسة ويايه تشوفها ..

حجاها واختنك وضل الطريق كله ساكت مكدر يحجي بعد واني هم انقهرت العبره خنكتني على عمه وره نص ساعه سكوت وكفنه بالازدحام سألته.

سيلين : وين رايحين .

ادهم :

اخذج لمكان ..

سيلين : وين

ادهم : بعدين تعرفين..

سيلين : ماحب سوالف الغموض والمفاجأت اتخبل منها كلي الله عليك.

ادهم : حلوو

سيلين: شنو الحلو

ادهم : بدينه نتعرف.

سيلين:عمو انت كل يوم تكلي بدينه نتعرف..

باوعلي ورجع التفت على الطريق..

ادهم : الانسان عباره عن بحر من المعارف والافكار والاطباع والتصرفات من غير الممكن اتعرف عليج بين يوم وليله.

سيلين : بس راح يصيرلي شهرين يمكم وقبلها من جانت عمه مريضه هم ضليت فتره لا بأس بيها.

ادهم : وان يكن متجي ربع حياتج العشتيها بعيده عنه لهذا كل يوم نتعرف على شي..

سيلين :زين انت مو عندك دوام.

ادهم : سيلين انتي ليش ماعندج صبر..

سيلين : لان ما احب الشي المخفي اريد اعرف كلشي..

ادهم : مضل شي وتعرفين ..

سيلين: ليش متحجي عود.

ادهم : احب اقره ملامحج من تعرفين ..

سيلين: وشنو الفرق هسه هم راح اعبر عن الشي الراح تحجيه بنفس الملامح..

ادهم : لا اكو فرق هسه داسوق..

كلت بكلبي يريد يركز..

وصلنه مكان كله طلاب لابسين زي مال دوام شكيت بشي بس من اتذكر اني ممقدمه ولا حاجين بهذا الموضوع اصلا استبعد السالفه.

سيلين : وين رايحين غير افهم..

ادهم : صبر يا دنيا تعلمي ويايه الصبر ..

سيلين: واني عكسك ما اتحمل..

ادهم : اتعلمي تتحملين هههه..

سيلين: مستفز ..

حجيتها على كيفي مسمع مشه قبلي وصاح على واحد واكف يمكن الامنيه مال الجامعه حجه وياه واشر عليه ذاك جاوبه بصوت مسموع.

_ فوت دكتور واني ادخلها وراك.

فات بدون ميلتفت عليه اجه هذا الولد وصل يمي وكال فوتي بهاي الغرفه الصغيره وحاجي البنيه كليلها اني اخت دكتور ادهم وجايه وياه..

سيلين : ماشي.

دخلت وحجيت وياها باوعتلي كالت..

_ فتحي الجنطه..

فتحتها فتشتها وكالت فوتي فتت للجامعه باوعت عليه لكيته واكف يخابر ايد شايل بيها الموبايل وايد شايل الجنطه وصلت يمه مدلي الجنطه اخذتها ومد ايده ل

بجيب البنطرون طلع ورقه صغيره بيها رقم رده وعقج الورقه كمل مكالمه وكال.

ادهم : يلا..

مشيت وراه وماعرف شكو رحنه مكان مثل البنايه وبيها غرف دخلنه ومشينه بممر وبعدين دخل بغرفه واني ضليت واكفه بره قريت مكتوب غرفه التسجيل..

حرت تسجيل شنو وليش جابني وياه بديت اضوج كلش واتعصب ، وره شويه طلع وصاحني .

ادهم : تعاي سيلين..

باوعتله صفح وفتت ، كتبت اسمي بقائمه وكلتلي وقعي وقعت وبصمت ، رفعت راسها باوعتله كلتله هذا هو دكتور كملت المعامله..

تشكر منها وطلعنه يمشي كدامي واني امشي وراه وحايره شنو الديصير التفت عليه وكال.

ادهم : يلا..

سيلين : دامشي.

ادهم : عندي محاضره تأخرت ..

سيلين : هسه غير افهم على شنو بصمت ووقعت..

ادهم : سويتلج تنازل املاك حجاها وابتسم.

سيلين: تره ضجت..

ادهم : تره ادري.

سيلين : هو انت اكو شي متدري بيه.

ادهم : مو بله .

خبلني وصلنه لبنايه ثانيه دخلنه بيها ومشينه بممر مكتض بالطلاب شافوه الكل ابتسم وسلمو عليه شلونك دكتور وفاتو للقاعه ضليت واكفه بره استحيت افوت التفت عليه وكال.

ادهم : فوتي كدامي.

سيلين : اخجل.

ادهم : اعرف تخجلين فوتي..

فتت الكل كاعد واتجهت الانضار عليه كلش خجلت مبين همه ناس تعرف ناس ومرتاحين بس اني التوتر العندي مو طبيعي وكلش ضجت ما احب الاختلاط ولا احب هيج اجواء توترت وايدي كامت ترجف ..

اجاني صوته فات للقاعه التفتت عليه جان مبتسم ودخل بحضور وهيبه الكل كام وكف سلم عليهم ردو السلام وكعدو التفت عليه وكال.

ادهم : تفضلي ست اكعدي هنا.

اشرلي على كرسي كباله بالسره الامامي.

جان ولد كاعد بيه كام واني رحت كعدت بمكانه...

وبلش يحجي وياهم..

ادهم : قارين لو مسفطين مثل كل مره علمود امتحنكم ..

صارت ضجه الطلاب كل واحد يحجي شكل..

_ استاذ والله صعب.

الثاني كال..

_ الماده هواي .

وحده كالت

_ متنحفظ ابد نقره منا ننسى منا ..

اخذ قلم وكتب على السبوره الملاحظات اللي ذكروهن التفت عليهم وسد القلم ، رفع راسه وكال..

ادهم : مليتوني سلبيه تره..

ضحكوا واحد منهم كال كلش صعبه ماده ممفهومه..

صفك وكال ...

ادهم : الكل يمد ايده للأمام بسرعه ..

مدو ايدهم بشكل مستقيم ..

ادهم : كف مقابل كف وايد عن ايد تبعد شبر يعني ماريد الايد تلتقي..

سوو مثل ما هو سوه بعدين كللهم..

ادهم : سوو علامه اكس ظهر الكف الايمن على ظهر الكف الايسر بعدين فرو كفوف ايدكم وشبكوهن سوه ، هسه خلو قدمكم اليسار فوق قدمكم اليمين هسه اخذو نفس عميق من الانف ويه الزفير فرو ايدكم ...

اول شي علامه اكس بعدين نطبك الايد بالعكس تشابك يعني واخر شي نفرها من جوه وتوصل لحد صدرنه بحيث كفوف ايدنه تصير كبال وجهنه..

سووها واني هم سويتها وياهم ...واحد من الطلاب كله..

_ استاذ هاي شنو هههه رياضه صباحيه..

ادهم : ضبطتلكم الطاقه مال جسمكم وخلصتكم من السلبيه ..

ضحكو الطلاب ..

ادهم : شوفو شلون تغيروتو عكس ما دخلت ،،هسه نجي لاسئلتكم اول شي استاذ احنه ننسى ومنحفظ بسرعه لو نحفظ وننسى مو ؟

الكل كال اي عفيه استاذ

صحيح..

ادهم : لان بالكم مو ويه الدراسه اما الماده جدا سهله.

جاوبه طالب.

_ استاذ تره انت تشوفها سهله لان دارس اصعب منها ..

ادهم : لا معليها .

_ يعني تجيب عقلي لعقلك وانت دكتور واني طالب..

ضحك وحك انفه حركته المعتاده اكو ميز وكف يمه وخله ايده على الميز فرش كفوف ايده وباوع على الطلاب تحولت ملامحه جديه وكال..

ادهم : كلامكم المعتاد دكتور نسيت او اقره وانسى ووو الخ ، احب اكلك يا احمد ذاكرتي وذاكرتك وذاكرة اشهر علماء علم النفس بالعالم ومن ضمنهم العالم جون واطسون وذكره كل البشر هيه ذاكره وحده ماكو ذاكره تنسى وذاكره متنسى ذاكره ضعيفه وذاكره قويه ماكو هيج كلام ابدا كلنا مخلوقين بنفس الطريقه ونفس الاليه هسه تكلولي لا استاذ شلون العالم يختلف عن الدكتور والدكتور يختلف عن الطالب والطالب يختلف عن المادارس واني اكول الفرق مو بالذاكره الفرق بطريقه الاستخدام لهاي الذاكره...

حجه طالب..

_ شلون يعني استاذ ماكو هيج شي جان الكل صارو اطباء والكل علماء وما جان اكو تفاوت بين المستويات.

ادهم : انطيك مثال زياد لاعب حديد وانت متلعب حديد هل العضله رب العالمين خلقها لزياد منتفخه بهذا الشكل وانت لا ، العظله هيه نفسها عباره عن عضو بجسم الانسان مكون من انسجه والنسيج مكون من خلايا والخلايا عدنه كلنه بس زياد دخل قاعه ولعب على نفسه ورتب جسمه وصار بهاي الصوره انت ضليت كاعد بمكانك وبقه جسمك نفسه ، الذكره نفس الشي كلنا مخلوقين بذاكره جدا قويه وقوه عقل هائله بس السبب بينه منعرف شلون نستخدمها بطريقه صحيحه بالتالي راح تضعف الذاكره ونكوم ننسى بسرعه ونفقد التركيز ...

_ بس استاذ هم ماقنعتني يعني تجيب ذاكره العالم انشتاين عليه وعلى امجد وين اكو هيج شي..

ضحك والطلاب هم ضحكو على كلام هذا الطالب ..

ابستم ادهم وكال .

ادهم : زين مرات اهلك يوصوك على شغله معينه وتروح نص الطريق تنسى لو ترجع للبيت تسألهم اما تخابرهم ،،، كم واحد صايره وياه هاي الحاله الشغله ينساها وره عشر دقايق..

الكل رفع ايده..

ادهم : تمام هاي شغله بسيطه نسيتوها وهيه مصار الها عشر دقايق بس ممكن جدا تتذكرون شغله صارت قبل خمس سنوات وتدك بكلبكم خصوصا اذا جانت من شخص عزيز عليكم كللكم بيها او معلومه سمعتوها من شخص تحبوه وضلت ابالكم منو صايره وياه هاي الحاله..

رجعو نفسهم رفعو اديهم..

ادهم : طيب ليش الشغله قبل خمس سنوات تتذكروها وشغله حسبه دقايق او يوم تنسوها يلا جاوبوني..

كل واحد حجه شكل هو مقتنع بكلامهم من بعد ما سمع نقاشاتهم كال .

ادهم : انه اكللكم ليش لان الموقف الصار قبل خمس سنوات جنتو مهتمين بيه او من ضمن اهتماماتكم لهذا انطبع بذاكرتكم اما من واحد يدزكم على شي تكونون مجبرين او دراستكم مجبرين تقروها متكون بواهس وتركيز بالكم مشتت يم عده اشياء وتكونون غير مهتمين الها ، يعني ملخص كلامي الشغله التهتم بيها تحفظها بسرعه والشغله الما مهتم بيها متحفظها لو تحط روحك بروحها ..

لهذا ماكو ذكره ضعيفه وذاكره قويه ذاكره تنسى وذاكره تتذكر لا انت اللي تتحكم بطريقه استخدامك لهاي الذكره ...

واكو شغله ثانيه قوه العقل الباطن تلعب دور جدا كبير اذا تكول عن نفسك انه انسى بسرعه انه ما افهم ما استوعب من تكرر هاي العبارات راح تنسى فعلا لان انت توحي لنفسك ومؤمن بهاي الحقيقه لهذا عقلك الباطن ياخذها مسلمات وقواعد ثابته راح يخليك تنسى بسرعه ،

قال رسول الله ص( لا تتمارضوا فتمرضوا فتموتوا)

اذن التفكير السلبي هو عدوك اذا تفكر بشي سلبي راح تصير فعلا مثل ما تفكر ..

_ استاذ والحل شنو؟

ادهم : الحل عندك لازم كل واحد بينه يبرمج نفسه برمجه ذاتيه اولا اخلص من التفكير السلبي وتستبدلها ب افكار ايجابيه وتحفيز للنفس توكف وتكول انه افهم انه اتذكر لمده لا تقل عن شهر علمود يتعود عقلك الباطن على البرمجه الجديده ويشتغل صح لتنسى انت ذكي وانتي ذكيه بس الخلل ما تستعملوها صح ،، وهم حبكم للشي اللي تسوه يلعب دور مهم اذا حبيتو شي راح تبدعون بيه ..

طريقه استخدام الذكراه وبرمجه العقل الباطن هيه الحل ..

وحده كلتله..

_ استاذ شلون نركز اني عندي مشكله اريد اقره بس ما اركز ابد رغم اكعد وحدي بالغرفه..

ادهم : حتى نركز لازم نقضي على المشتتات اذا انتي تخلصتي من المشتتات كلها راح تركزين بدراستج ..

_ مثل شنو دكتور مشتتات ...

ادهم : هواي عدنه مشتتات تلهينه عن الدراسه والاهم راح اذكرها الكم ..

اولا كثره استخدام الاجهزه الالكترونيه موبايل كومبيوتر تلفزيون بلي ستيشن وغيرها لساعات طويله باليوم تعمل تشتت ذهني يعني مثلا تشوفين مسلسل مده ست ساعات متواصله او انت تلعب بلي مده لا تقل عن خمس ساعات وتجي تريد تحل معادله بالرياضيات راح تكدر انه اكلك لا لان بالك يم اللعبه وبالج يم الاحداث ،

لتستخدمون الاجهزه ساعات طويله وتجون تقرون لان تفكيركم مشتت وفاقدين التركيز لهذا تنسون بسرعه ،

ثانيا المشاكل تقره وبالك يم مشكله صارت قبل كم يوم او عقلك ينتج مشاكل مستقبليه

مالها وجود انت تخترعها في سبيل متقره وتقتل الوقت ،،

٣ خوف قلق توتر يخليك متركز رابعا البيئه المحيطه صوت تلفزيون اطفال يمك او كلام بين اثنين بالك يصير يمهم لا ارديا ،،

والاضاءه والكعده الصحيه درجه حراره الغرفه وبرودتها..

كلها تلعب دور بالدراسه والتركيز ومن تقرون ماده لتخلون باقي المواد يمكم او قريبه عليكم،،

مثلا تقره انكليزي ويمك فيزياء واحياء ووو باقي المواد هيج راح تتشتت بين المواد لان مجرد النظر الهن راح يصير زخم على العقل وبالتالي ما راح يركز على اكثر من فكره،،

اخر شي التعب الجسدي السهر بليل يسبب تعب للذهن والجسد وتروح تمتحن او تجي تداوم شلون راح تجاوب وتركز ويايه لهذا بسرعه تنسى وتكول انه قريت ليش مجاوبت ...

ضلو يحجون هواي قنعهم بفكرته وشرح الماده بسلاسه وعلى الغيب بدون ما يفتح كتاب وجان فارض هيبته بكميه العلم العنده واي سؤال استفزازي منهم يقابله بمعلومه تخليهم صافنين وهيج سيطر على عقلهم وقنعهم وحبو الشرح واستقبلوه منه بصدر رحب .

ادهم : نلتفي بالمحاظره القادمه واريدكم انشط من هيج..

كالو اي وتشكرو منه ، اشرلي بيده يلا،،

كمت طلع وطلعت وراه مشينه وصعدنه الدرج رحنه لمكان بيه غرف هواي دخلنه بوحده من الغرف مكتوب اسمه على الباب واسم استاذ ثاني دخلنه كعد وكلي كعدي كعدت.

ادهم : شنو رأييج بجو الجامعه.

ابتسمت.

سيلين : حبيته كلش..

ادهم : لاحظتج اندمجتي وياهم بسرعه..

سيلين : صح واستفاديت هم.

ادهم : راح اجيبج ويايه يوميا بين ما يبدي دوامكم ..

بهتت وعقدت حاجبي .

سيلين : دوامنه شنو؟

ادهم : هاي جامعتج سيلين...

ضحكت..

سيلين : شنو يعني شدتكول انت عمو.

ادهم : هنا صيحيلي استاذ دكتور عوفي سالفه عمو هههه.

سيلين : هسه بيناتنه عود من يجي احد اكلك دكتور بس جاوبني شنو السالفه.

ادهم : من اول ما اجيتو وجبتو اوراقكم والمستمسكات خليت ايمن يقدملج من انفتح التقديم وطلعت نتائج القبولات وانقبلتي اداب قسم اثار ...

سلين : لا والله صدك تحجي؟

ابتسم وميل راسه يباوعلي.

ادهم : صدك احجي.

سيلين : شلون اشكرك فهمني.

ادهم : ديري بالج على نفسج وعلى اختج كلشي ماريد.

خليت ايدي على وجهي وكمت ابجي ..

ادهم : يلا اعتبرها دموع فرح ابجي ميخالف..

وره شويه وخرت ايدي دفع باكيت الكلينس صار قريب عليه اخذت ثنين ومسحت دموعي وخشمي باوعتله وضحكت..

سيلين : بيش اجازيك..

ادهم : ماريد شي ضحكتكم كافيه واشوفكم مرتاحين ..

سيلين : شكرا .

ادهم : على كوله ايفين كلش شكرا هههه..

سيلين : اي سولفتلي ضحكت بوكتها تدري سويت التسبيحات اللي انت نطيتها لايفين وصدك حسيت تغير بحياتي اول شي ابتعدت ماما عنه وعمامي والشي الثاني فرحت بسالفه دراستي اللي جنت بس من انام احلم اداوم ولو مو طموحي بس احسن من ماكو..

ادهم : بطلي سلبيه كولي ادرس واطلع من الاوائل واقدم دراسات واصير استاذه جامعيه معليج بالقسم وممكن تكملين دكتوراه ونصير دكاتره هنا سوه ..

سيلين: حيل عمو يعني بعد تسع سنوات.

ادهم : ماكو شي يجي بالسهل وكل هدف نريد نحققه يحتاج صبر وقوه تحمل واهم شي واهس ..

سيلين : تحمست..

ضحك وكال ..

ادهم : هسه راح تبدي عندي محاضره تجين ويايه لو تضلين هنا ترتاحين.

سيلين : لا اضل هنا .

ادهم : ماشي اكمل واجيج علمود نلحك على مرايم.

سيلين : اوك..

طلع واني ادعيله بكل خطوه سلامه هلكد ما فرحني كمت اموت عليه يوم عن يوم حبه يزيد بكلبي واحساس الابوه يكبر بداخلي من ناحيته...

خلص المحاضره وطلعنه رحنه اخذنه مريومه من الروضه ورجعنه للبيت ، اول ما دخلنه طلع ايمن من البيت الجوه وعاقج الوجه سلم علينه وطلع من البيت.

ادهم : هذا شبيه.

سيلين : مادري..

دخلنه جوه كلمن راح لغرفته بدلت ملابسي والتفتت على مريم.

سيلين : مرايم وين نزعتي ملابسج الصبح.

مريم : بغرفه بابا.

سيلين : زين منو كعدج اليوم نسيت اسألج.

مريم : البارحه نمت يمه لان كلي شلون اكعدج والبنات نايمين تعالي يمي واني رحت..

سيلين : فدوه تعاي بدلي علمود نغسل ونسوي غده..

مريم : يلا ..

بدلت ورحنه للحمام فتحت الباب مسدود دكيته جاوبتني ايفين بصوت مخنوك..

سيلين : افونه فتحي الباب شبيج شنو دتبجين..

مجاوبتني فتحت الباب مغسله وجها وعيونها حمر دم..

باوعتلها بقلق عافتني وراحت للغرفه اني هم مسألتها كدام مريم وهم خفت عمو يسمع ، على السريع غسلنه وكلت لمريم تنتظرني بالمطبخ بين ما ارجعلها..

رحت للغرفه لكيتها نايمه ومغطيه راسها.

سيلين : افونه شبيج حبي كومي احاجيج.

ايفين: عوفيني عفيه.

سيلين : صار شي بينكم انتي وايمن متعاركين لو شنو؟

ايفين : كتلج مابيه شي مابيه مابيه.

كامت تعيط وتضرب على وجها اندك الباب كمت فتحته عمو ادهم واكف وعاقج حاجبه اشرلي بحركه بوجها وكال ..

ادهم : شكو شبيها ؟

سيلين : ماعرف غفله كامت تبجي وتصيح ..

دفع الباب بيده على كيف وفات وكف كبالها..

ادهم : شكو منو وياج ؟

كعدت عدل و دارت وجها خجلانه منه..

ادهم : اذا متحبين تحجي

ن براحتج من تحسين بنفسج تردين تسولفين هاي اختج يمج احجيلها ..

هزت راسها اي وهو طلع ..

رحت كعدت يمها باوعتلي وبجت..

سيلين : غيررررر افهم شكو شصاير..

كامت تشهك وتحجي..

ايفين : شكلج شريد احجي بيا عين اسولف.

سيلين : خوفتيني غير افهم صار بينكم شي احجي .

كزيت على اسناني وحجيت وياها..

شهكت وبجت متقبل تحجي .

سيلين : زين رايحه لايمن هو يفهمني.

كمت وهيه كمزت جرتني من ردني التفتت عليها باوعتلي تتوسل..

ايفين : عليج الله لترحين وتحاجيه لخاطري اذا صدك تحبيني.

سيلين : لعد احجيلي..

ايفين : الظاهر بيت عمامج ماراح يعوفونه نرتاح.

سيلين : منو منهم وشصار احجي؟

ايفين : اسامه الكلب داز محادثاتنه اني وياه لايمن والصور الجنت ادزهن اله ..

ضربت على وجهي وعطت بعدين سديت حلكي وهمست.

سيلين : عزة عزة بعينج كون اتخزينه يا ايفين شنو بيهن المحادثات ومن وين جاب رقم ايمن ودزهن الهه.

ايفين : من اجوي لهنا اسامه جان وياهم ايمن كايل حجايه كدام عمو صلاح كايله اني اخطب ايفين منك وسيلين راح تدرس ولتاخذهم هذا من سامع متخبل داخل ع الفيس مالتي وقاري التعليقات مال ايمن معلقلي على الصوره الشخصيه ودازله كلشي كايله احبها وتحبني وعلاقه بينه واذا متصدك ادزلك صور ايمن ممصدك بيه دازله صوري ومحادثاتي واجه ايمن متخبل يكول نزلتي من عيني مجنت متصورج بهذا السوء عفيه احجي وياه فدوه كليله اني موهيج..

سيلين : ماعرف الومج لو الوم اسامه لو الوم حضنه

الاعوج الماجاي ينعدل وبعدين شحجي وياه هو على سالفه تافها زعل منج وحضرج..

كمت ارجف شسوي شلون اقنعه اختي ماعدها شي وياه على كد الكلام وبس وجانت مراهقه عقلي كام يودي ويجيب..

ايفين : راسلني..

سيلين: منو؟

ايفين : اسامه ؟

سيلين : جذب شيريد.

ايفين : يكلي اذا مرجعتي علاقتج بيه وشنو اريده تسويه ادز صورج والمحادثات لادهم ولفهد ولابوهم واكللهم ذني اللي تدافعون عليهن هاي اخلاقهن واخليهم يجيبوج يمي واشبع بيج هنا..

سيلين : لج اموتج هسه وكاعده تحجيلي بكل اريحيه فهميني شسوي هسه اني وين اودي وجهي منهم ولج كتلج لتسوين شي وتخزينه ناس غربه اخ يا الله ...

ايفين: والله مسويت غلط من بعد ما وعدتج وهو ضحك عليه.

سيلين : تعرفين بيهم نكسين ليش مشيتي وراه قابل جبرج تدزين صور جبرج تسولفين بس انتي نذله بيج رس من تماره.

ايفين : تغيرت مو كدامج هاج هذا موبايلي وشوفي حتى صديقات ماعندي.

سيلين : اني اعرف نهايتي على ايدج وايدج امج اني تورطت بيكم تورطت بهيج عائله محيطها وجوها ملوث مستحيل ابو الربو يعيش بينكم واني مريضه وانتو ملوثين لهذا راح اموت قبل يومي.. ..

لهناك واندك الباب التفتت ادهم ، نار تطلع من عينه من الاعصاب دخل وطلب مني اطلع..

كمت امتمت ماعرف شحجي بعد.

سيلين : شنشششنوشكو.

نتر ..

ادهم : روحي يم مريم ..

عفتهم وطلعت اندب بحضي وحظ اختي الاعوج شلون بينه شلون فضيحه ...