رواية كريات الدم السوداء الجزء الثاني الفصل الرابع والعشرون بقلم زحل شريف
__
مديحه::لا تكليلي تردين تطلكين؟
_لا مو غبيه انه راح ادفعه الثمن غالي وداعتج
سكتت اريد اعرف افكر دك نقالي باوعت قدر
شمرته على مديحه ،، وصحت جاوبيها فتحت
خط وفتحت الصوت
مديحه::ها قدر.
قدر::وينها خلي احجي وياها؟
مديحه::تسمعج.
قدر::وروح امي امس يله دريت سونه
بيش احلفلج وتصدكين وماردت اقهرج
كلت هو يبلغج افضل ،، شبيدي مثلا .
_مردت گلبي تبجي بصوت عالي صحت مسمعتها
خلص لا تبجين لاتخلينهن يحسن
قدر::انه بيتي ماكدرت ابقى تعذرت منهم
وأجيت وبس يجي ثابت اجيج
_لا تجيني اريد ابقى لوحدي ،،
قدر::رجعتي تبعديني عنج
_لطمت على وجهي وين باعدتج تحملت،، الضيم
في سبيل اجاورج بس هم الي حق ارتاح اترجاج
قدر::خلص ارتاحي وبعدين اخابرج
_سدته التفتت على مديحه.
مديحه::شكو ماروح اصلا اريدلي حجه بلكي يعاركني وابقى
_عفتها وكمت للغرفة دخلت وقفلت الباب
احس نار بصدري ،، مرة اكول مو من حقي ومرة
اكول لا ليش جذب عليه ،، احتاريت شسوي باوعت
للكنتور وتذكرت البدله الي بيوم العقد عليه لبستها
فتحت المجر اخذت المقص وطلعتها سويتها خيوط ،، اجت عيني للعلاكه الي مخليه بيها الرسائل
والحلقه جريتها اتذكرت من سألني
الباشا::ليش مالبستي حلقتج جيبهيا البسجياها
_بيومها كتله لا من تسوي العمليه وترجع بالسلامة
تجيني وأريدك توكف على رجليك،،،، وتصير كبالي وتلبسنيها شهكت ابجي همزين نزلت نزلن دموعي احس ارتاحيت ،، عصرتها بيدي محتارة شسوي تالي لبستها أي هيج اخلي محتار ،، كمت لان مديحه فلشت الباب فتحته باوعتلي بقلق
مديحه::اذا اول المشوار هيج شلون راح تواجهني
_رفعت ايدي قاصده اشوفها الحلقه
مديحه::لاتستعجلين.
_خابري رجلج يجي عليج .
مديحه::باجر اروح
_خابري قدر كليليها لاتخلي اعيالها يحسدون
عرفت حتى ثابت
مديحه::توني سديته منها كالت كتلهم راسي لان بجينا من قريت القصيدة وهم مشتاقه لأمي وثابت
ماسألها عنج .يعني ماعرف
_ميخالف وبيها
مديحه::شناويه؟
_على شنو رجال مزوج قبل ماياخذني طبيعي زوجته تحمل ،،يروح ويجي ونتفاهم ،، وياريت انتي هم تحددين موقفج ويا طارق
مدينه::تردين الصدك هو قبل كم يوم حاجاني
وحلف بكلام الله
_عليمن حلف؟
مديحه::كال صح جنت احبها ولان ربينا سوى تعلقت بيها ومن طلعت من السجن وعرفت الصار
تعاركت ويا عمامي ،، ماانكر خطبتج لاجل اكدر اشوفها بس من شفت تعامل الباشا ومولي وياي
بااحترام خجلت من نفسي وقبل فترة رحت زرت ودعيتلها بالتوفيق .
_اي وانتي وين وشنو من هذا كله؟
مديحه::سالته نفس السؤال.
_وشو جوابه.
مديحه::گال .
طارق:رغم جنت مخطط غير شي بس
وجودج خلاني انتبه تدرين،، كاعد بالشغل واتذكر
سوالفج وابتسم ،، اصفن بكل تفاصيلج،والكه نفسي اعوف كلشي واجي حتى اداهرج لو اباوع لج
وانتي تحاولين تتشيطنين،، على امي رغم مااقبل
عليها بس اعرف بيج گلبج ابيض ومئمن ماتأذيها.
_الزبده؟
مديحه::الزبدة ،رغم گال حبيتج،،گلبي ماتحرك ولا فرحت،بس
_بشنو احجي خل أفهم .
مديحه::ارتاح لوجوده،، تعجبني سوالفه
وما يوم طلبت شي وتعذر حتى امه من تحجي
يعاتبها سمعته يحجي وياها كالها اذا تحبيني حبيها.
_خلص هيه تبدي بااعجاب وتنتهي بحب.
مديحه::وانتي ؟
_تدرين شكو شعر لو أغنية سمعتها اله وكأنو القدر يطبق أحداثه علي،، تذكرين ،من گتبتله قصتي وياك حلوة باأول المشوار، عجيب امري وهاي انه اعيش
الضيم تالي بااخر القصه.
مديحه::اسمعي منه قبل كل شي .
_هو انه اريد اسمعه ،،كعدت بتعب وهيه اتصلت بقدر وصتها ماتحجي لثابت ..
مديحه::ليش ماتخلينا نطلع نتمشى .
_مالي خلك راسي يأذيني،،كون انام
مديحه::حتى انه نعست شو تعاي نغلق نقالاتنا
ونام
_كامت جابت فراش تمددت وهيه طفت الاضويه واجت بصفي جرت مني النقال ،، قفلته غمضت
اتوسل النوم وربي رحمني ومن عليه بعطفه وغفيت
مافزيت لحد ما هيه كعدتني .
مديحه::ولج غير اشتهرنا الباب تفلش
_فركت عيوني اريد اركز
مديحه؛:قدر وثابت بالباب دكومي للغرفة خل ادخلهم .
_لميت افراشي وكمت للغرفة ،، اختذتلي شال
وطلعت اغسل اسمع قدر تسأل بقلق
قدر::شسالفه يعني نايمات ليش تلفوناتجن
مغلقه والله كلبي راد يوگف من الخوف
_نشفت وجهي وطلعت سلمت .
ثابت::يابة هذا مو نوم إنتحار.
_ابتسمت مجاملة باوعلي بشك.
ثابت::اكو شي ؟
_لا بس ما دري ليش هيج نمنا.
ثابت::متأكدة ؟
_اي .
ثابت::ليش ماتردين على الباشا؟
_ماخابرني وانه ماردت احرجه لان اريج يمه
قدر::رجعت من الصبح
_باوعلها ثابت دنكت بخجل
ثابت::يله الحمد الله مابيكم شي
_كام واشرلها يله گتلة عوفها وباليل تعال عليها
حتى مديحه هم تروح باليل
ثابت::تمونين ياصاحبتي.
_طلع وهيه سدت الباب ورا ،، كمت فتحت
نقالي لكيته متصل وداز رسائل،، خابرته رد بثكل
الباشا::زين من تفضلتي عليه ورديتي.
_وانه ماعاتبتك ليش ماخابرت .
الباشا::راحن البنات؟
_لا بليل يرحن،،
الباشا::خوش من يرحن بلغيني ادز عليج
_ماخليته يكمل ،، لا دز تريدني تعال هنا
الباشا::وهذا شرط لو شنو ؟
_حفظ لكرامتي .
الباشا::ومنو الي مس كرامتج؟
_وجودي يمك بالخفيه وهم الحذر واجب افضل
مانعرض نفسنا لموقف مثل الي صار
الباشا::سونه من الأخير شنو ابالج
_ماكو شي سلامتك شوكت تسافر؟
الباشا::بعد كم يوم،، حضري جوازج ترحين وياي
_بصفتي شنو ؟
الباشا::زوجتي
_ أها يعني كلت لاهلك ؟
الباشا::لا
_جا شلون اروح وياك والي عرفته عمك يروح
وياك وخالك ومدري منو يعني ذول كلهم عادي يعرفون
الباشا::لا اذا انتي وياي مااخلي احد بس الخال
_عضيت ايدي بقهر،، احس روحي اشتعلت
صاح منبهني
الباشا::ها شو صفنتي
_لا ماروح
الباشا::ليش ؟
_لان وجودي غلط
الباشا::من اشوكت ؟ مو انتي الي لحيتي على العملية ،، ولخاطرج قبلت اسويها.
_وانه هم عبالي لخاطري،،ضحكت مستهزئه ههههههه .. بعد ماكدرت اسكت صحت انته اتجذب الجذبه و تريدني اصدك ولو اي صدكتك
الباشا::وشنو جذبت ؟
_باشا من الأخير بدون لف ودوران تروح وترجع
بالسلامة وساعتها النا كلام .
الباشا::واذا كتلج مااسويها اذا مو انتي وياي
_اگلك جذاب وراح تسويها لخاطر اريج والي بطنها
الباشا::سونه مثلا انه مجذب عليج ماتدرين بيه
متزوج
_لا أعرف
الباشا::وشنو غلط اذا لخاطرهم وخاطرج واكيد هيه هم الها حق،،واذا على حملها قابل هذا
اول طفل مو عندي ولد واجبي افكر بيهم .
_خلص سوي عمليتك لخاطرهم
الباشا::مو انه أعرف كتلج راح تلعبين بذويلج.
_ابد هاي انه منتضرتك ترجع تمشي على رجليك
وتعلن زواجك مني وهيج لانخاف احد يشوفنا ولا
اضطر البد ،،احجي ويا وقدر دخلت عليه سحبت النقال مني سدته.
قدر::خلص العندج كلتي عاجبه ينفذ .
_رجع اتصل فصلته وجرتني طلعت لكيت مديحه
محضرة صينيه ،، كعدت مالي نفس بس ماردت
اكسر بخاطرهن .
مديحه::ترى طارق جاي عليه
_روحي ويا وشوفي تاليته شنو .
قدر::انه ابقى يمج
_اكلنا كامت مديحه حضرت روحها،،دخلت
للمطبخ شويه وطلعت بيدها بطل ماي سالتها قدر
قدر::شنو رايحه مشايه ؟
_شو هاي وجهت البطل علينا وعصرته كمزت
خرب ابوج شبيج
قدر::هههههه نافورة يا شتسوين بي.
مديحه::اخذة وياي حتى من ترش عليه
خل ارشها منه بلكي توب وتبطل.
_رغم الضيم ضحكت اجه عليها طلعت سلمت
عليه
طارق::يابه لاتزعلين بس ماكو مبيت بعد
ترى ماكدر افاركها
_دنزل احجي وياك،، طفى سيارته ونزل.
طارق::أمريني .
_مو وصيتك اريد احد يبنيلي المحل
طارق::بس افرغ هاي الأيام ادللي
_تمام انتضرك ،، بوستها وراحت،، دخلت لكيت
قدر تصفن سالتها شبيج،،دنكت محتارة وبعدها
مارادة عليه اندك الجرس التفت اباوع للكامرة طبكت سيارته ،،وقبل ماينزل مولي طبكت سيارة
ثابت كتلها فتحيلهم الباب،وكعدت منتضرة
دخلو اتلاثتهم .
ثابت::انه وياج شنو الي يرضيج
_اخذ قدر وروح ماعدنا شي نسولف انه والباشا
ونتفاهم .
ثابت::لا اعتبريني اخوج
_ترى انه ماعندي مشكلة هو طلب واحد
ثابت::وهو
_يعلن زواجنا
ثابت::ماطلبتي غير حقج ،، كومي قدر
وانته مولي امشي اريدك بشغله،، عود اذا الباشا رادك يتصل بيك.
_كل هذا وهو ساكت،، يباوعلي بتوعد طلعوا
انه مدنكه وهو ضال ساكت ثواني رفعت راسي لكيته انضارة لايدي ابتسمت وحركت الحلقه
الباشا::شعجب لبستيها؟
_عجبني ،،رفع حاجبه معترض،،شعلت جكارته
الباشا::راح اسألج وجابيني بصراحه.
_هزيت راسي اي.
الباشا::لو انتي بمكان اريج تقبلين اجي اكلج
تزوجت عليج .
_سكتت محتارة
الباشا::ها سكتي شفتي شلون صعبه.
_مو هيج بس يبقى الخيار الي،، عن نفسي
اكلك مادام اجت وحده غيري وكدرت تملي جزء
بگلبك اذن ماله داعي نستمر،، رفع رأسه باوعلي
مستغرب..
الباشا::جا شلون ترديني اكسرها،، وقبل ماتجاوبين
اسمعيني للأخير ،،اعرف راح تكولين شمعنى ثابت
علن عن اختي ،، انه مامستنكف منج والدليل عقدتج بشهود ،، بس هو قبل مايلتقي بقدر
بينه وبين مريم خلاف وماتراهمو وانتي لاحظتي
هل شيء مو .
_هزيت راسي اي ،، كمل كلامه.
الباشا::بس انه واريج مابينا خلاف ،،ولا هيه
مأذيتني وبنت عمتي وعندي ولد منها وهسه حامل
_هههه ترى عرفتك وانته مال إم طيبه .
الباشا::صح اطلع واسهر وامشي وارجع الها
ماحبيت ولا بيوم فكرت اتزوج ،،وهيج هيه
مقتنعه كأي زوجه تفكر أول وتالي مرجوعه الي .
_فكيت حلكي يعني انه سبب كلامك معنى انتو
جنتو عائلة متفاهمه وانه الدخيله الي خربت
الباشا::لا مو هيج ،، بس مالها ذنب بحبي الج
ولا ذنبي حبيتج سونه مالي على گلبي سلطان واني مالج ذنب
_لا انته هسه خليتني اشوف روحي مثل سليمه
من خذت أبوي وخربت بيتنا وطشرتنا
الباشا::انه مو مثل ابوج ولا .
_صحت ولا شنو ؟زين انته اذا هيج تخاف على مشاعرها ليش وهمتني أبعد وترجعني ليش
زين مو كلت أول وتالي ابلغهم
الباشا::اي ابلغهم بس مو بهاي الطريقه
انه مو ناقص غيرة واوكف بوجها واكلها تعاي انه
حبيت وتزوجت عاجبج ضلي ماعاجبج الله وياج
مو هيج الأمور تنحل يابه.
_فهمني اعتبرني حمارة ،،لو على كولت عقلي
مال عبيد .
الباشا::لاتقوليني شي ماكايله ترى كلمة الشقى
_كمت احس جسمي اشتغل نار
فركت وجهي ،،شمرت الشال ركضت للحمام
غسلت وجهي ورجعت هو ضل محتار
الباشا::ترى مايستوجب كل هذا.
_صحت بصوت عالي ،، اسمع باشا من الأخير
انه مااقبل تهدم بيتك على مودي ،، ولا تتوقع
أنجبر ابقى مالتك من تريدني اجيك.
الباشا::ماكلت هيج افهمي لاتضلين تنعثلين
_موكتلك فهمنييييي.
الباشا::أول وتالي تعرف وساعتها .
_قصدك تنتضرها لحد ما تولد وساعتها
تنجبر تقبل الأمر الواقع،، واحتمال تخيرك لو هيه
وجهالها لو العبدة،، وهنا اهلك يدخلون وبالنهايه
مايصح اله الصحيح
الباشا::ولج شبيج انتي شبيج تخبلتي اكعدي
وفهمي يابه قابل انه طفل واكيد مافرط بيج،،وبعدين هو منو الي اقترح موضوع العقد
_وانه غلطه .
الباشا::يعني شنو؟
_مو كل غلط يتصحح مرات نضطر نعالجه.
الباشا::من الأخير مال اطلكج كطنه وشيليها
من اذنج
_وانه ماطلبت الطلاك .
الباشا::والحل
_انه بيتي زوجتك وحقك وحقها وماكول لا
بس اذا تريدني تجيني وشوكت ماوصلها خبر
تصير إمر واقع مو انته تكول أول وتالي تعرف
الباشا::تدرين انه هسه ماشوفج سونه.
_ردت وحاولت وتمنيت اصير حالي حال
أي وحدة بس شفت روحي انداس،ولكيت افضل حل البس وجه سلوم وهيج ماتخجل عاجبك اخليك على راسي ماعاجبك انته عند اهلك
وانه بيتي.
الباشا::وان ماعجبني هم مااطلكج.
_وانه ماريد اطلك.
الباشا::هينه تستغلين حالتي توكفين بوجهي
وتهددين عود ترى ماتكدر اسويلي شي .
_لا وحتى اثبتلك محبتي ،حجيتها ودنكت راسي
لحظنه هاي انه جوى ايدك،دفعني وجر تقاله
عرفت خابر لمولي .
الباشا::تعال بسرعه.
_اجه مولي وقبل مايطلع التفت عليه.
الباشا::باب البيت ماتوصلين انه موجود تبلغيني
بالتردينه ماموجود رقم ثابت ومولي عندج فاهمتني.
_هزيت راسي اي ،، طلع طبكت الباب ورجعت
اريد شي يبرد نار گلبي ،،،،،،،نوب جسمي شبي
دخلت للحمام سبحت بماي بارد اباوع شنو هاي
الطكع الحمر انوب اتلمستهن حارات،، فرت روحي
طلعت كسرت ثلج ترستلي طاسه وكعدت مرة
امشي الفص على وجهي ومرة اخلي على صدري
بجيت محتارة كمت نفشت،،، الكنتور طلعتلي دشداشة كودري كلت بلكي يبرد جسمي،،الوب
ماخليت حبايه ماشربتها كرفصت روحي ونمت
كبال السبلت رغم الجو بارد انه مشتعله،
غفيت من اثر الحبوب فزيت احس بروحي مورمه
باوعت اديه صايرات شكبرهن ،،،،ورجليه نفس
الشي كوى وصلت المرايه اخترعت من شفت وجهي رديت للصاله ادور نقالي لكيته وبسرعه
اتصلت بمديحه،،ردت بخوف.
مديحه::ها شبيج ؟
_لحكيني حجيتها وبجيت.
مديحه::شبيج بس فهميني احد دخل عليج؟
_لا لا بس شو فزيت لكيت روحي مورمه.
مديحه::جايه بس مسافه الطريق .
_سديته وبقيت انتضرها ،،وصدك ماطولت
فتحت الها الباب ماانتبهت لروحي بدون حجاب ودشداشتي نص دفعتني،، واشرت لطارق اوكف
مديحه::بس البسي ليش هيج شكلت
هاي حساسيه لو شنو .
_ماكلت شي والله ،بسرعه دخلت جابتلي ملابس
لبستني وطلعتني دموعي تصب حجه طارق وهو يفتح باب السيارة .
طارق::لاتخافين.
_احس السيارة خنگه وصلنا المستشفى نزلوني
بس شافني الدكتور كال لطارق جيب هاي الابرة
بسرعه هسه تضربها،،راح طارق وهو ضل يسالني.
الدكتور::من شوكت صارت هاي الحاله عندج؟
_هسه .
الدكتور ::اكلتي شي حار أو خبطتي فد نوعين؟
_هزيت راسي لا باوعلي .
الدكتور::متعرضه لفد صدمه أو مشكلة؟
_ردت مديحه.
مديحه::اي دكتور صارت مشگلة بينها وبين زوجها
هز رأسه بأسف ودنك بكتب بالوصفه اجه طارق
جايب الابرة.
الدكتور::اخذها لصالة الممرضات خلي يضربوها
وباجر الصبح جيبها للاستشارة سويليها تحاليل.
_ضربت الابرة وطلعنا .
طارق::باجر احجزلج عند اخصائي.
هسه شتكولين لو اوكلج ازبري غير يخليج منتعشه.
مديحه::اي جيبلها.
_مالي خلك احجي عيوني للجامه نزل طارق
التفتت عليه مديحه.
مديحه::شصار ؟
_كولي شنو الماصار،بس مالي حيل احجي.
مديحه::تمشين وياي.
_لا رجعوني لبيتي.
مديحه::خوش جا ابقى يمج.
_لا ماريد احد يمي،سكتنا من اجه طارق
ناوشني الازبري،كالتله رجعها لبيتنا
طارق::لا يابة تمشي ويانه.
مديحة::ماتقبل.
طارق::خلص ابقي يمها.
مديحه::لا تريد تبقى وحدها.
_دخلنا شارعنا انخمش گلبي من شفت سيارته
بالباب باوعتلها وحجيت لاتنزلون .
طارق::شكو شبيج ؟
_اترجاك اوكف هنا نزلوني وروحو.
مديحه::نزلها هيه متحاجيه وياهم.
طارق::خاب دسكتي واذا قابل مايعرفوني .
_طبك بالباب وقبل ماانزل نزل هو
توجه على سيارتهم .
مديحه::هسه شنو ؟
_نزلت وهيه وراي بعدني ماعابرة صاح عليه
وكفت كباله
الباشا::شوصيتج؟
_قربت وجهي قاصدة يشوفه،،هز رأسه تمام
والتفت على طارق.
الباشا::هيه بماثبة اختك بس الي اريده
منك اذا اتصلت بيك تبلغني حالك حال مولي.
_شال ايده طارق خلاها على رأسه.
الباشا::مشكور .
_اشرت لمديحه روحو، دارت وجها ومشت ورا
وانه هم ماجني اشوفه فتحت الباب ودخلت
وطبكته وراي ،بخطوات سريعه تمشيت للكامرة
ضلو واكفين شويه وراحو ،،،،بدة مفعول الابرة
خف الورم شويه جابتلي فراش تمددت لثاني يوم
خابرت قدر .
قدر::ها شنو الاخبار؟
_ماكو شي بس لايضل بالج اريد أغلق جهازي.
قدر::تمام وانه اجيج.
_سديته واتصلت بمديحه،،وماطولت كلت الها جيبيلي خط جديد وبي رصيد.
مديحه::باليل يمج.
_غلقت النقال وكابلت الكاميرات،، المغرب
طبكت سيارته ، نزل مولي دك الجرس ماجني
اسمع دك الباب ولا تحركت ،،ملو وراح لليل اجت
مديحه جايبه نقال ومركبه بي خط خذته وكلتلها روحي.
مديحه::غير اخذج للدكتور؟
_لا .
مديحه::عود خابريني.
_ركبت الخط الجديد اتصلت بقدر وصيتها ماتنطي لبشر وهيج خلصتها يوم يجر يوم،،وهو يجي ينزل
مولي يفلش الباب ويمل ويروح، لحد ما كالو راح
يسافر اجتني قدر.
قدر::موتنا مللنا وزعل على ثابت.
_شوكت يروح؟ومنو يروح ويا.
قدر::عكب باجر والخال و عمه محمد
وعلاء ابن جبار.
_هههه علاء.
قدر::شوفي همه يكولون انه واخوي على أبن عمي
وانه وابن عمي على الغريب.
_صفنت سهله خلي يرجع ويصير خير.
قدر::يله هذا ثابت اجه عليه.
_الله وياج ،وبعد سفرة باسبوع دزيت على
طارق جابلي خلفه كملت الصالون وصبغنا
مديحه::بعد القطعه، شنو تسميته.
_اي شي .
طارق::سونه احلى.
_هاي هيه،وجاب القطعه علكها ثابت
ماادخل ابد،كتلهم اريد اطلع اجهز غراض.
ثابت::انه اجيبلج كراسي وديكور مرايات عليه.
_مشكور.
قدر::والمواد ؟
ثابت::لازم نروح للجمله.
_خوش خلي نكمل الديكور.
ثابت::بالتوفيق.
_راحو وثاني يوم اجت قدر نزلها ثابت بالباب وراح تفاجئت شكو.
قدر::مادري منو موصله خبر ولج وحرك النقال
كال لثابت اذا مانهيت الموضوع ارجع انه انهي.
_وشنو الغلط بالموضوع.
قدر::هم ثابت كاله خليها تتسلى،بس هو متخبل.
_ماله دخل،وحتى انتي كليله معليه.عود من يجي
انه ويا نتفاهم ،، يله خابري رجلج وروحي.
قدر::طردة شنو؟
_لاحتى عيالج مايحسون اكو شي.
قدر::اصلا اريج متخبله.
_حقها رجلها أن شاء يرجع متعافي.
قدر::أن شاء الله .
_وهيج حالي مثل المسجون ،اليوم عمليتة
الوب وعيني للنقال منتضرة خبر، تلفت اعصابي
لحد مادكت قدر بشرتني.
قدر::الف الحمد الله يكولون نجحت عمليتة
يله رايحة لان بيتهم انخبص عود باليل اخابرج.
_نزلن دموعي ،،اي وشكد خططنا لهذا اليوم
صدك لو كالو الگدر ماگدر،مر شهر على سفرة
وبهاي الفترة انه فتحت الصالون ،،،،صح قليل
نساء تجي بس انه فرحانه،،، وهم اخلص وقت
وهم باب رزق ،المع بالجام ونفتح الباب التفتت وماتفاجئت من جيتها رحبت بيها اعتيادي كعدت على كرسي وتعمدت تضهر بطنها نزعت حجابها وتحجي بدلع.
اريج::گلت ليش نفيد الغريب .
_هلا بيج،شنو تردين ؟
اريج::كل شيء عنايه تنضيف شعري حابه اغير
لونه شتكولين احمر لو شقارات .
_ادللي نبدي بوجهج افضل،ركبت سماعاتها بأذنها
وسندت رأسها على كرسي وتعمدت تخابرة.
اريج::ها حبيبي شلون صرت اليوم.
_بعدت عنها سويت روحي اخبط مواد وهيه
تضحك وتسولف ،شالت رأسها موجها كلامها الي.
اريج::يله عفيه ليش واكفه مو تأخرت.
_رديت وتعمدت اسمعه صوتي ياعيني غير
جاي تخابرين كملي حتى نبلش،والضاهر سمعني
لان ماردت عليه حجت ويا .
اريج::اي حبي بلغت خالة وكلت افيدها خطيه.
_ابتسمت وهيه مستمرة تحجي ويا .
اريج::لا شيوديني وبعدين خلت الصبغ على شعري.
_رفعت حاجبي باوعتلها سدته مزعوجه
تقدمت عليها ها نبلش .
اريج::لا مقبل يكول روحي لمركز افضل.
_لفت شالها وطلعت،،خابرت البنات حجيتلهن.
مديحه::شكد حقيرة.
قدر::تعمدت تجيج،، عود تحرك گلبج.
_هو شضال بي .
قدر::كالو عكب باجر يوصلون.
_بالسلامه أن شاء الله ،،وشيجيب باجر
وبلغتني قدر بجيته.
قدر::اجه بس ما بقى كالهم خلوني ارتاح
كم يوم حتى اكدر استقبل الناس.
_تمام بعد لاتتصلين بيه لان هسه يدور رقمي.
قدر::واذا اجاج ؟
_لا راح افتح الخط القديم ومن يلح اغلقه يومين انه بقلق وعرفت راح يتصل بيه بس ماتوقعته يجي نزل عكازته بيده وكف گبال الكامرة وقبل مايدك الجرس طلعتله ، باوعلي وضحك.
الباشا::ها ماكو حمد الله على السلامة لو ما
متوقعه ارجع اوكف
_الله يعلم فرحتلك،،تقدم بعدت مسويتله مجال
دخل وهو يحجي.
الباشا::شوفي من الأخير بدون جدال
الصالون ينسد.
_لا ماسدة .
الباشا::وانه ماتنكسر كلمتي.
_شوكت ماحطيتني بيتك احكمني.
الباشا::اكيد خو ما اكعد ابيتج.
_وشنو العيب؟
الباشا::ماترهم يكولون عليه كعيدي بيتج يتاجر
هو والصالون واخذلج مكان بغير منطقه.
_كعد وسند عكازته بصفه ،، هزيت راسي اي
غير من تبلغ اهلك؟بس موتريدني اعوف بيتي
وابعد عن اختي حتى جنابك يكدر يدخل عليه
ومحد يشوفه لو يوصل خبر لزوجتك.
الباشا::وانه ماخاف .
_خلص خليني بمكاني.
الباشا::مبدئيا الصالون ينسد.
_تعذرني ،، كام تقدم عليه مالحكت أبعد جرني
سحب الشال شمرة ودنك باسني بعمق كوى بعدت .
الباشا::لا توازيني على اذيتج.
_حجاها وطلع،،طبكت الباب ورجعت اسب بروحي
ثاني يوم كعدت ومثل كل يوم،،،، كملت نضيفت
وسبحت ولبست صايتي ،،،،،،طلعت اريد افتح باب الصالون الحديد من برا انصدمت من شفت القطعه مدكوكه بالحايط نعتذر عن استقبالكم المحل مغلق للصيانه،،درت وجهي ودخلت اتصلت بقدر كتلها تعاي .
قدر::خو ماكو شي؟
_تعاي وبعدين تعرفين اكلج.
قدر::ها ؟
_الفلوس الگتيلي عليهن بعدهن عندج؟
قدر::اي .
_جيبيهن وياج بس لاتكولين لثابت.
قدر::ماشي .
_خابرت مديحه وقبل مااگلها تعاي،، كالت جايه
دخلت حضرتلي جنطة لميت فلوسي وكم قطعه
ذهب باقيات هويتي وجوازي طلعت الطابو مال
البيت خليته على صفحه،، اجت قدر تلكيتها
قدر؛:شصاير شنو هاي القطعه شبي صالونج؟
_دخل توصل مديحه واحجيلجن،،هاي لفت
كومي فتحيلها الباب،،،،،كعدن يباوعلي بخوف
بدون مقدمات صحت لا هو غريب واشتكي عليه
وثابت مل وانه تعبت ،،اريد منجن توكفن وياي
اريد اشل حالة واتوبه.
مديحه::غير نفهم شتسوين
_انتي كومي اريدج ترحين تشوفلي خطاط
سويلي قطعه الدار للبيع.
مديحه::امشي وياي وخلص.
_اذا طارق نكرني فاطمة تجي وتبلغه.
قدر::لا بروح امج لاتبعدين عني.
_التفتت عليها ،، مادام اشم الهوى مااعوفج
بس استقر اخلي يجيبج وشرط كل يومين .
قدر::اخذيني وياج.
_وثابت،، ينتحر.ولج رحميني يهون عليج
اريج ادوس على گلبي .كتلج فترة بس
ارتب وضعي.
مديحه::خو اطلكي منه وخلص؟
_لا من انه على ذمته ويصبح مايلكاني تختلف
اذا مطلكني ،،قدر اريد اروح وانه مطمنه ولو ثابت
سند الج ومتأكدة يفديج بروحه.
قدر::عود ردت ابشرجن انه حامل.
_طفرت مديحه تصرخ وتهلهل،،،خرب ابوج
فضحتينا،، ادنيت عليها شبكتها نزلن دموعي
الف مبروك شوكت وثابت يدري؟
قدر::لا محد يعرف امس معدتي تخربطت
ونغم انتبهتلي كالت اجيب تحليل منزلي نتأكد
مديحه::اي ونوب .
قدر::اي طلع حمل ،، بس ماخلتني احجي
كالت هسه فرحانين بالباشا وتضيع فرحتهم بيج خلي يومج مميز.
_الله يرزقها ويفرح گلبها بعد ماخاف عليج
مادام عندج ناس تحبج.
قدر::وين ترحين زين ترجعين لو لا؟
_ماعوفج .بس اترجاج لاتخليني بقلق .
مديحه::جا خل افلت للخطاط لا يجيني طارق.
_بقيت حاظنه قدر أبوس بيها،، ولج بيج
انه تقويت تذكرين من جنتي تخوفين سلوم
قدر::بس لا تكطعين بيه.
_روحي انتي والنفس ونضر عيني
شلون اكطع بيج.بس خليني اوجعه.
قدر::ميخالف هاج هاي الفلوس.
_بعد مااجت مديحه وخذلهن مشوار بجي
لليل راحن ،،طلعت ثبت القطعه وبسرعه
أخذت غراضي وطلعت أتلفت بوجهي للكراج
أول سيارة صارت كبالي صعدت همزين لكيت كرسي على الجامه كعدت قبطت السيارة وطلعنا الگراج ،ومن كثر ما بالي مشغول مادريت شكد
مر وقت،
فتحت النقال القديم كتبت لثابت عينك على قدر ذمه برگبتك،، وبس وصلته دك رفضته كرر الاتصال مارديت لحد ماسكت عرفت راح يشوف البيت لو يسال قدر ،، وبين تفكير وقهر ابتسمت من شفت رقمه فتحت خط.
الباشا::ادعي ماالكاج لو ادعي اموت.
_اسم الله عليك ربي يحفظك لاهلك وزوجتك.
الباشا::كلمة احفضيها زين شتعتبرينها
((تحذير)( نصيحه )(وصيه)
_قاطعته،، يتوصى الطفل والماعرف دنيا
والعاقل فشل من كون يتوصى،
حجيتها وغلقت النقال.
