رواية بنات سهر الفصل الخامس والعشرون بقلم فراقد حسن علي
هم انه مثلك دوم هم هيج مگرود 🥺
البخت بالشينات بس گاعد گعود🤦♀️
=========================
((ما مراجعه الحلقه غلسوا على السحك 😅))
مسرة/ الحياة بنظري
من جنت الطفلة الصغيرة
عرفت بيها بس اللعب والزعل على لعاباتي
( مرحلة الدلال )
ومن صرت بنيه مراهقة
عرفت بيها الاهتمام والعناية بالنفس والمظهر والاخلاق (مرحلة البناء والتركيز )
ومن صرت مراة كامله بس هنا توفت ماما
وعرفت اهلي الجنت مااعرفهم
عرفت شنو معنى (تجربة الحياة القاسية )
ومن صرت مراة متزوجة عرفت ان
(( الحياة قصيرة بس المصائب تسويها طويلة))
منتصر يكسر خاطري
كدام الناس يمشي محني الظهر على مصيبة طارق
ومن يجي بليل بالكوة ياكل لكمة
ويسبح ويتمدد ومو تكولون هذاك الرجال القوي
لا يشبع بجي
يكول / المصايب هلن فد هله على راسي
عليمن أعاين
على أخوي المتوسد الموت
لو على ابن عمي الميت ومنتظرين بس توقيع ورقته
لو على امي النعجنت بالقهر وعلى ياساعه تنجلط
لو على مرت اخوي من الخوف والرعب
جابت صغارها ثميني ،
لو على جهال اخوي واحدهم سكط وبعدنا مالحكنا نفرح بيهم
لو على رزقي التحاربت بي وهددوني بصريح العباره
لو رزقك لو عائلتك
ربي على بختك ضاكت كاعك عليه
اني هنا من شفته هيج مناهر ويبجي
مااعرف شسويله ، بس حظنته بقوة
وكتله/ كول يالله ،
هو عصرني عصر بحظنه وبجى بصوت عالي
كالي / ادعي لخوي مو زين
مرتين سحبناه من حلك عزرائيل
كمت ابجي وياه كتله / والله هذا امتحان من رب العالمين ، لان انت حجي ويريد يشوف قوة ايمانك
ليش ما تتوضى وتقرا قران دفعه بلاء مو احسن شي
هو حرك راسه اي وبقى شويه ساكن بحظني
انوب عافني وكام توضى ورجع صلى
وكعد يقرأ قران
من ارتاح وخلص صلاته والقران
كعدت يمه كتله/ شبي طارق ؟؟
كالي / مناعيل الوالدين مصوبينه بثلاث جيلات
وحدة بطنه ومفلشه مصارينه كلنا ميخالف
والدكاترة عالجوه وبالعمليه هم خيط وكصوا
ورهموا مصارينه مشت سالفته
الاثنين الباقيات جايات بصدره
كاسراتله خمس ضلوع وزارفات الرئه اليمنى
وظلع من مكسور هم زارف الرئه
الدكاتره يكولون لا عبالكم بس هذا الزرف
الصغير مال جيله التشوفونه من بره
من داخل مفلشات الرئه اليمني
وطالعات من ظهره
انوب من التدخين رئته تعبانه
زادت عليه المضاعفات
الرئه ما تشتغل بصوره صحيحة
بعد ما سووا الدكاترة العليهم بالعمليات
كام يجمع الدم بين الرئه وجدار صدره
ما يتنفس ينصك ويقطع النفس
الدكاترة بسرعه زرفوا صدره من بره وخلوله صوندة
كامت تكت دم وهواء ، يلا لكف الهواء
وكل شويه ينصك ويختنك
يجي الجراح يجيب ابره يمكن طولها شبر
يدخلها بين ضلوعه ويسحب بس هواء
يلا يلكف الهواء، يسمونه استرواح الرئه
ماادري رضوح الصدر يعني هاي عوارض بسبب
ضربة الجيلات
وانا احسبي بكل صكه وكطع نفس لطارق
ادفع من عمري حيل واهجس قلبي يوكف
ولج مو سهله عليه اعاينه شلون يموت
وانا ايديه مجتفه شسويله وشلون اشتري من الموت احسن جراحين ودكاتره جبتهم اله ،
وهم سووا العليهم والباقي يم رحمة الله
وانوب عنده تك اذانه اليسرى سكطت
ما يسمع بيها متفلشه عنده الطبله
من صوت الصوتيه الشامريها بسياره حاتم
ومن ضيم الشرب عندة الكبد والكليات تعبانات
ما يعيننه ويشتغلن صح
حتى الدكتور المشرف على حالته
يكول / مدمر كلياته اول مرة اشوف
كليات بيضه وميته هيج تطلع بالسونار
وكل الدكاترة النسألهم يكولون/ العلينا سويناه
والباقي يم الله
ادعوله بالشفاء العاجل
كتله/ وعمو حاتم شلونة ؟؟
كالي / حاتم شو سلم أمانتة بسرعه
جنه تعب من الدنيا
جيله مفلشه زره ،
واثنين بطنه مفلشات المصارين
ورفعوا الطحال متمزق
وجيله ضاربه جتفه من كدام طالعه من ظهره
الدكاتره يكولون اكو اصابات اخطر من اصابته بس يعيشون وضعهم يستقر بس حاتم مااعرف شنو سالفته
يمكن الصوتيه هم الها اثر على دماغه وجسمه
كتله / منتصر انت منو هددك ؟؟
كالي / انا جماعه بمجال شغلي هددوني بالقلم العريض
انتقل لغير مكان واعوفلهم ساحة الشغل الهم
لان اكو امتيازات اقدمها للمشتري هم يشفوها
كسره الشغلهم ،
والصراحه حاتم هم مهدد كونه ضابط عسكري
شو هالايام صاير كتل العسكري بفلس
يجي واحد ابن حرام على الدراجة يخرطة ويطلع
حتى شرطة المرور ماسلموا على اعمارهم
دعيت من كل قلبي الطارق وعمو حاتم
ربي يرزقهم الشفاء العاجل
ويرجعون للبيت سالمين
ساهرة مو ضرتي بس هلكد وقوره ورزنه
شالت سوار شيل ام ودارت بتها
ساهرة شخصيتها قويه
وكلش محترمة ، وصاحبة دين
بعد حجيه من صدك وتخاف الله
وهوايه تسولف باامور الدين وتنصح وتعلم
مااشوفها مراه تهمها الدنيا،
هي أمراه فلاحة تزرع حسنات بالدنيا
و تتأمل تحصدها بخير بالآخرة
وكفتلي بموقف غيرت فكري عليها
تغير من السماء للكاع
اني ابد ما بلغت وحدة غريبه عن حملي
واحتاريت بخالتي ، وبسوار
والهوسه الصارت ما رحت للدكتوره بعدني
، بس خالتي قلبها ما ينطيها من تشوفيني اطفر
لو اكمز على شغله تخاف عليه
تصيح عليه / على كيفج يمه
عينج على حالج
شويه اركدي وكولي يالله خليني بضيم واحد
حمواتي سهى ونهى ،لمى بلغتهن
والله العظيم فد كيفن وفرحن
وشكد بقن يدعن اليه والمنتصر بالخير
منتصر مراعي الكل وايده بحلك الصغير قبل الجبير
فالكل يحبه ويحترمه الحمد لله
وهو عنده مبدأ بالكلمة الطيبه تكسب الجميع
حمواتي ما يخلني اشتغل
واتعب بفرت البيت والخطار
لو اشيل ثكل هن تكفلن بكلشي
بس اني استحي منهن هل شي الخفيف
اشارك بي ،
الناس يرحون ويجون لبيت خالتي
يسألون على طارق ، ويجون يوجبون
علمود سلامة سوار وجية الجهال
العصر واجني نسوان مااعرفهن
وياهم تبارك ،
طلعن خالات تبارك وعماتها
يعني من طرف امها نهايه
لان هي نهايه تصير بنت بت خالها الخالتي فاطمة
يعني هم من نفس العشيرة بس اقرباء من بعيد
اجني يسلمن على خالتي ويسألن على طارق
ويسلمن على سوار
وهم طرف صلح رجعن تبارك للبيت
وعادي هن سلمن وكعدن وقبلن ضيافه
وهذيج سوالف والحجي
ولا حسبالك نهايه مطلكها منتصر كلشي عادي
ما ظلن على العشا خالتي شكد جلبت بيهن
ما قبلن وكالن /هذا بيتنا ما نحتاج عزيمه
وراحن
عدت يومين وتبارك تمشي مثل ميل ساعه
كله تكول / تم ، وحاضر ، وتدللون ،
تكمز قبل عماتها من يردون من عدها شغله
ومن اجى ابوها بليل سلمت عليه وتعذرت منه
وكامت تبجي على طارق وعمو حاتم
وهو بوسها وحظنها وضمها جوه ايده
و بس يكلها / بسج بويه لا تبجين ادعيلهم
وهي اباوع عليها صدك متغيره
وصايرة حبابه ، وخدومة
وتركض لخدمة الخطار اليجي
وحتى خالتي كيفت على هذا تغيرها
كالت / الله يهديها علينا
ام احمد هاي المراة الفقير،
صار شكد من افتقدناها
من خابرنها قبل مده طويله تجي تساعدنا بتنظيف البيت وتشيل ويانه الزوالي،
تعذرت وكالت / رايحه خطار لبيت اهلنا بالمحافظات
وراها شكد خالتي ادك على رقمها يطلع مغلق
وتوسلت بهمام يروح يشوفها
وراح عليها
كال / والعباس كسرت الباب محد طلع عليه
وسألت الجيران كالوا /راحوا لبيت اهلهم للمحافظات
خالتي كالت / عساها تكون هي وجنتها واليتامه بخير
الغايب عذره وياه
وبيوم كعدت من الصبح
كلت عيب ناس رايحين جايين علينا
والطرمة كلها تراب من تايرات السيارات
قبل يومين غسلتها لمى واساور
اني كلت ماعندي شي وما تعبني
اشغل الفارة واغسلها بسرعة،
وبعدين اسحبها بالماسحة
والله بلشت اغسل بيها صوت الفارة عالي
وتضخ المي بقوة ، وحدت صاحت عليه /
وثووول مو احجي وياج
انداريت شفتها هدى ، طفيت الفارة
وكتلها / بلي ام تأميم تفضلي
كالتلي/ تعاي ورايه للحديقة الوره البيت اريد أحجي وياج ،
رحت امشي وراها ،
وكفت وبقت تباوع بوجهي
وكالتلي/ شعندج ويه رجلي
ليش يراسلج ويتصل عليج
انصدمت وبقيت ثوله مااعرف شكللها
وبقيت لا اخذ ولا انطي ،
بس كتلها / والله ماعندي شي
بس راد شغله وساعدته بيها
هي كالتلي سهله / هسه يكعد منتصر واسولفله على كلشي ، واشوفه يقبل مرته وعلى ذمته
وتواعد ابن عمه ونسيبه، رجل اخته
انتن نفس طينة أمجن
حرامات منتصر انغش بيج
عافتني وراحت دخلت للبيت
كتلني الخوف
خاف صدك تسويلي سالفه
وشكد عيب كدام ناس تفضحني
وتكول عندي علاقه برجلها
بقيت خايفه وارجف من كلامها وتهديدها
ليش ما دكت الباب وطلعت سهى
استقبلت بيت عمتها اهل الجنوب
واني هم سلمت عليهم كلش احبهم واحترمهم
ماعندي شي وياهم بالعكس اهل بابا ولازم احترمهم
رجعت اكمل غسل الطرمة وشغلت الفارة
اشتغل وبالي يم تهديد هدى أبد مو سهله
وانوب اجوي اهل الجنوب لا صدك اليوم
تعزيني وتصخمني
والله ما منتبهه ولا بالي ولا متقصده
امشي وبالي مو عندي وارش الكاع بالفارة
وميها قوي ، خلصت صوندتها لنص الطرمة
لازم اطفيها واحولها على نقطة الكهرباء الثانيه
التفيت بسرعة وهي بيدي
صارت رشكتها على سيارة منتصر
وعلى رجلين تبارك جانت فاتحه بابها ومدخله نص جسمها جوة مااعرف شطلع من عدها ،
وهي عاطت / هيييي شبيج عميه
من عساج لا صبحتي
اني هم ما سكتلها كتلها / انجبي واحترمي نفسج لا
تبلشين البارحة جابنج خالاتج لا تسويلج سالفه
مامتقصده
عافتني وراحت تمشي تريد تدخل للمطبخ
والله سمعتها كالت / بعد حظ كح..... كلمتجن مسموعه
اني انقهرت من كلمتها
رشيت ظهرها بالمي، بصوندة الفارة نكعتها
هي صاحت/ هاي ليش يااا كح...
واجتي طايره عليه
شنو مليانه حقد وغل وكره
دفعتني بقوة من صدري
شمرتي للكاع كعدت على نهاية ظهري كسرت اعظامي
وادروشت عليه نامت بشعري
هلست الربطة من راسي وكطعت شعري تكطع
اني اريد اكوم اوكف على حيلي
بعد مااكدر تبلهت خبزتني خبز
هي صح بعمر سوار بس بطولي وسمينه
وايدها ثكيله من تضرب
هي تخبلت كامت تضربني دفرات وجلاليق
واني بس كاعده بالكاع وصيح /خاله لحكيلي
واريد افك شعري من ايدها
هنا طلعت ساهرة من الاستقبال
ولحكنها بنات ام شمخي الخطار
وسهى ركضت وراهن
اجتي ساهرة بسرعه ودفعت تبارك عني
ولزمتها سطر راشديات ما قبلتلها لان تجاوزت عليه
وانوب لكفتها سهى هم كفختها
البنات كومني من الكاع
مشيت بالكوة متكسرة تكسر
اني امشي حسيت شي حار ينزل عليه
عرفت نزف كمت اعيط على خالتي بخوف /
خاله لحكيني ودخلت من باب المطبخ
لحكتني ساهرة تركض
واجتي مرت ماجد ابن عمهم من داخل المطبخ
اني انصكيت من الخوف خفت على الحمل
مرت ماجد اسمها نوف كالتلي / شبيج
ليش هيج تنزفين شنو انتي حبله؟؟
ساهرة مشتني للحمام الداخلي
تغسلي ودردم على تبارك وصلافتها وعرامتها
وامها ما عرفت تربيها
دكت باب الحمام سهى وخالتي
وساهرة صاحت / سهى كعدي منتصر
خل ياخذ مرته للمستشفى يمكن طرحت .
انوب طلعت من الحمام
صعدت جابتلي هدوم كامله ورجعت ساعدتني ابدل
وخالتي بقت يمي بالحمام كلش خافت
وبقت ادعي على تبارك كون ايدها بالكسر
اجاني منتصر سودة عليه خايف
وبعده نايم هوايه تعبان
كالي / شبيج يحظي الجايف شوكعج من الدرج
ما صدكت الله يجبر خاطر حسين بااخ يعينه على زمانه
ساهرة كالتله / ابو حسين مو وكت اللوم
اخذها للمستشفى
كاللها / الله وكيلج هسه اهجم الشارع
واسويلي حادث لشتي كلها ترجف
هي كالتله/ كول يالله وانا امشي وياك
طلعت للصاله ولاكتني سوار
لمى كايدتها وحانيه ظهرها
ولازمة بطنها وتمشي على كيفها
كتلها/ شبيج
كالت لمى / موجوعه من الخيط
بلكت حيدر يجيها الضحى يسحبه الها
منتصر بسرعه سلم على اهل الجنوب
وصعد لبس دشداشة مال طلعه
ونزل اخذني هو وساهرة وسهى للمستشفى
بالمستشفى دخلوني للقسم النسائي
سولي تحليل دم طلع عندي حمل
حولتني للسونار طلع اكو كيس حمل
وحامل اليه شهر
ومكانه جاهل زين ،
كالتلي /لا تخافين حاليا النزف العندج ما يخوف
هاي ابر مثبته ونامي على ظهرج
وراحة تامه ، وبعد عشر ايام راجعي
طلعت واكو امل بقلبي
وسهى بشرت منتصر
اكو حمل واوضاعي ما تخوف
خطيه كيف وبقى يدعي الله يفرحنا بشوفه الجاهل
بالطريق مر على جوبة مال طليان
اشترى طلي كال/ دفعه بلاء
شو هل الايام المصايب متحزمة عليه
وصلنا للبيت وكلها تسال شكو وشلون صرت
ساهرة كالتلهم / صلوا على النبي
الصلاة على محمد وال محمد
تطفي نظرة المحب التأذي بشغف الحب
قبل عين الغريب التأذي بنظرة حسد وعين حاسدة
الحمد لله منتصر الله رزقه بخير وبركه
وان شاء الله نفرح بشوفه اوليدة
وسمعت تبشبش النسوان
وحدة من بنات ام شمخي كالت / ياااا فلك
الفلك بنات سهيرة حبالتهن حباله البزازين
بس يدوسن دكمة يحبلن خو ما مثل حظنا
مراجعه وعمليات وما نحبل
بقيت اقرة المعوذات بقلبي واسمي بااسم الله
واصلي على النبي الله يكفنا شر عيون الحاسدين
وخالتي ما تقبل اصعد فوك الغرفتي
تخاف من صعدت الدرج
خلتني يمها بالغرفة الثانيه الجوة
وهذيج لسوار
ساهرة هنا أبتلت بيه وبسوار
اني سوت عليه حصار ممنوع اكوم واتحرك
كد روحه الحمام وارجع اتمدد
تجيب الاكل ليمي ،
وبس نايمه على ظهري واخذ العلاج بوكته
واخذت الابر المثبته والله كريم....
-
-
سوار/ كعدت الصبح كلشي مابيه
وصحتي زينه ،
ولكيت بين ام شمخي يمنا سلمت عليهم
وعلياء واختها الحقيرات غثني بحجيهن
هاي دكول/ صايره أشسمنها ولا جنها مسويه عملية
وهاي دكول/ واكعلها الدلال
اني حتي ما رديت عليهن
سويتلي ريوك وكعدت على ميز الطعام اتريك
فجأه واحس سجينه وشكت بطني
ضربتني نغزه قوة شنجتني
ماتحركت بقيت جامدة من وجعها
اشرت اللمى تعاليلي
كاعدة كدامي تحضر غده الخطار
هنا أنفتحت باب المطبخ ودخلت مسرة
تبجي وتعيط / خاله لحكيني
وشعرها مكفش وشكلها مكتوله
ورجليها تصب دمايه وراها
ولحكتها ساهرة تركض وراها
وصارت هوسه وعياط وصياح بره
فاتت تبارك تركض وتبجي وصعدت فوك
وراها سهى وبنات ام شمخي يهدن بيها
من اخذن مسرة للحمام نهى تحلفت بتبارك
كالت / اذا ماخليت همام اليوم يسكطها انا فلا اتسمى
لمى احتارت بيه ، كالت / هذا تشنج من الخيط
لا تخافين كولي يالله، كملي ريوكج
حتى اخذج الغرفتج
مااكلت روحي انسدت من الوجع
عيني على علياء بحجة موجوده بالمطبخ وتساعد
بس هي مركزة عيونها يمي
وتشوف لمى شلون حايره بيه
كمت ولمى ودتني الغرفتي
الي هي بالاصل غرفة خالتي بس اني احتليتها
واتمددت على السرير ،
بقيت ادعي المسرة كون كلشي مابيها
خطيه شاورتني بالبسكوت اول ما عرفت بنفسها حامل
وكالت/ اكلج حتى لا زعلين لان خالتي ما تقبل اكول
واني هم سكتت وما كلت ولا واحد خطيه
وهي دازة رساله لأساور وهم مبشرتها
مسرة رجعت من المستشفى
الحمد لله اوضاعها زينه
ونامت بغرفة خالتي الثانيه
وحيدر بعده مااجى عليه
-
اني بقيت بس متمدده ابد ما تحركت حتى لا اتوجع
ولمى تروح وترجع عليه
كالت /حيدر يجي العصر ماصار عنده مجال يطلع
-
كتلها / شبيها مسرة وتبارك
-
كالت / توته حية وخبيثه نفس اسلوب امها
تلدغ وتضم راسها ورادت حجه حتى تضرب مسرة
الكلبه عرفت بيها حامل
-
بس سهى ما كالت المنتصر والعباس يذبحها
وعيب منا العالم خطار نسوي هوسه كدامهم
بس انطينه باص الهمام هو يلبش بيها
ما كعدت اتغديت اخاف اتحرك
ساهرة سوتلي لفات واكلت اني نايمه
تكلي / ادري بيج تدللين عليه بس ميخالف
امشيها الج من حقج بنيه وتدلل على امها
لو اشتاقيتي لدلال ابو فقار ؟؟
كتلها / اي والله أشتاقيتله وأشتاق لبوساته
ضحكت لان كلت الكلمة بسرعه
بس ساهرة حبابه ما تفهمني غلط
كرصتني من خدي وكالت / والله طالعه عينج
حقج طارق حباب وقلبه ابيض الله يكومه بسلامه
ويهدي عليج .
تقربت عليه وكالت/ بيت عمتي ام شمخي
مطوله كعدتهم
اذا طلع رجلج بسلامه نامي على قلبه
ممنوع تعوفينه ترى علياء تاخذه منج
يمه كلشي ولا علياء تاخذ طارق مني
والصدك هي احلى مني
هم اطول مني
وجسمها اضخم
وبشرتها حنطيه
وتعرف تسولف مو مثلي
والله أخاف منها الله يكفيني شرها
العصر اجاني حيدر جايب وياه جنطة الكصابة
على كولت طارق
كال/ منو تبقى يمي كون قلبها كوي
مو مثل مريتي ترفه وتوكع فوك المجروح
ساهرة كالتله/ تعذرني كلبي ماينطيني
اشوف بنيتي تتأذه
ولمى سحبت نفسها هسه توكع فوكايه
سهى كالتله/ انا اساعدك
هو طلع كل النسوان برة وسد الباب
كال /تعذرني انثول من الخبصه والهوسه
أنوب كال السهى/ ستريها طلعيلي بس مكان العمليه
سهى لفت رجليه وبقت دشداشتي على بطني
هو كعد يمي على سرير وربع رجليه
من لزم العمليه كال /اوووو هاي ليش هيج ملتهبة
مو علمت ساهرة تعقمها الها
سحب مخدر باابره السكر وجكني بمكان العمليه
كمت اعيط من وجع الابر
اباوع عليه بقى يتلمس مكان الخياط
من الخارج وعقم العمليه كلها
كالي / ديري وجهج من عابت هل عيون خل اشتغل
سهى كالت/ لا تباوعين حتى لا تخافين
بس شفت بيدة الموس والمقص
غمضت عيوني ودرت وجهي على جهه سهى
ما حسيت بشي بس اني من الخوف كمت ارجف
هو كلساع وكال / هاي شلون ورطه
لج بويه شبيج شمرتي روحج على الرجاج
هسه خلصت
ويمكن عشر دقايق هو مااعرف شيسوي
وسهى تكله/ خررب بأبليسك لعبت روحي
يكلها / أووي عيني الج الصافي يالرقيقه
حسيته ضمد عمليتي من جديد
كالي/ من عابتلج انتي وعيونج الحول
الخبصنه بيها طبوني، خلصنا
عود لا تتحركين اليوم وباجر
خيطتلج غرزتين وهذا الخيط القديم
من باوعت هو ينزع الجفوف من ايدة
ويمه كومه شاش وقطن بيهن دم
والخيط الازرق مال عمليه صدك ساحبه
الحمد لله ما وجعني وخلصت من الوجع
يمه من راح وكت البنج كمت ابجي عمليه جديده
هو دزلي بيد فقوري أبن سهى علاكة ابر مال التهابات
لازم أضربهن من جديد
كتلهم / والله مااضرب ولا وحدة
ماعندي مكان صاحي وين اضربهن
بقيت ابجي وساهرة حارت بيه
خالتي رجعت خابرت على حيدر
كالتله/ عمه فدوه اروح الطولك تعال شوف البنيه
فرد نوب متأذيه وتبجي
كلت الساهره العفو لازم اروح للحمام
اخذتني بالكوة امشي كلش متاذيه
من طلعت من الحمام خالتي صاحت عليه
تعاي هنا بالصالة حيدر منتظرج
اخذتني ساهرة سحل وكعدتني بالصالة
هو بقى يباوع عليه زكال الخالتي/ بس كلولي
هاي شلون حبلت وبقت شايله الجهال
ولكم من جكت الابره خربت
خالتي كالتله / والله سباعيه وحبابه وتسمع الكلام
بس هي ترفه وصغيرة شتريدها دنكة وتحمل الوجع
اجي كعد يمي كال / جيبي ايدج اشدلج كانونه واشوف وين توصل وياج انتي ورجلج
كتله/ اخاف توجعني والله شوف هاي ايدي
كانونة العمليه صار مكانها أزرك
كال / جا ضربيهن بالعضلة
كتله / يوجعني والله حار دواهن وحتى ماكو مكان اضربهن
كالي / جا شلون رايج ما بقى غير تشربيهن
شو الحقيرة علياء نطت من يمها وكالت /
لا تتعايرين حبابه شدي الكانونه ولا تبقين تفيكين
حيدر كاللها / بت عمتي شدكولين لو اخليها الج
انجرب هم توجعج لو تفيكين بيها
هي انلصمت وبعد ما حجت
سحب ايدي وكالي/ يلا عاد صيري قويه
ترى انا قلبي ميت
مو مثل قلب رجلج رجيج
بس يشوف دموعج يطيح كبلج
بقيت ابجي لحد ما خلصها وضربني بيها الابره
وكال الخالتي /هاي الابره المسكنه لازم بالعضله
خالتي دعتله وكالتله / من كون الله يرزقك من اوسع ابوابه
هو بقى كاعد وصاح/ وين مريتي
يمعودة تعاي خلصنا ،
وجيبلي وياج جاي حليب
خالتي بقت تسأله عن طارق وعمو حاتم
هو مو بنفس المستشفى الموجودين بيها يداوم
لا بغير مستشفى بس يروح يشوفهم ويعرف حالتهم
كاللها/ يمكن طارق هل يومين يطلع للييت
اوضاعه الحمد لله احسن
بس حاتم ادعوله اكو استجابه قليله عنده والله كريم
فد كيفت وفرحت وبقيت ادعي الطارق يطلع بسلامه
رحت على مسره ضربتني الابره المسكنه
وتمددت يمها ، احسن لا هي تضوج ولا اني
ومرت يومين لا طلع طارق ، ولا طلعوا جهالي
ولا تحسن عمو حاتم
بس من نسال عليهم يكولون الحمد لله احسن
اوضاعهم زينه
والحال نفس الحال بس نايمات اني ومسره
وساهرة حارت بيته
اني هنا اكلت طين حشاكم عمليتي التهبت
صارت كلها جغد وانفتحت منها غرز
والعفو كامت تبش جراحه
بحيث الليل كله تبقى تنغز بيه من الوجع
وساهرة تضمدها ومايفيد وياها
ومر على نومة طارق بالمستشفى ١٧ يوم
يلا طلع للبيت ،الف الحمد لله
من رجع للبيت بسلامه
وبيوم الطلع للبيت أجوي بوقت الضحى
جابوا بسياره اسعاف ، منتصر يخاف عليه
ونصبوله سرير بالاستقبال
شنو الكاع ما شالتني من الفرحه
منتصر ذبح جوة رجليه عجل
وفر سبع ديوجة داير مدايره يلا ذبحوهن
خالتي ماادري تهلهل ماادري اطش جكليت
ماادري تبجي وتبوس بطارق
من مددوا على سريره وناس كلهم ملمومين عليه
هوسه ومخبوصين فرحانين بطلعته
همام يكول / لا تبوسنه هوايه بوسه وحدة كافيه ،
ترى ما يتنفس رئته تعبانه بسرعه يتعب
كل الموجودين سلموا عليه
هو ما يرد عليهم بس يحرك راسه
اني بقيت اخير شي استحي اروح اسلم عليه
مااعرف شبيه وليش استحي
وشكد مكيفه وفرحانه بجيته بسلامة
ساهرة اخذتني سحل ،
حتى مسرة احسن مني
راحت سلمت عليه ،
من وصلت يم سريره كتله/ الحمد لله على سلامتك
هوايه فرحانة بشوفتك وانت زين
اشرلي بيده تعاي ادنك عليه
هو متمدد ونايم نص كعدة
حسبالي ابوسه من خده
هو جرني قوي وباسني من حلكي
فد أستحيت ختلت بهدومي
وانوب همام وماجد واحمد
ومهند وحتى منتصر جان موجود
كتلني الخجل ، والبنات حمواتي كامن يصفكن
هو رجع باسني مره ثانيه
وكالي / تعاي اكعدي يمي لا تروحين
ادور عليج من اول ما أجيت
بالكوة يحجي يلهث تكولون جان يركض
كعدت يمه على السرير
كال الخالتي/ يوم شو مريتي ضعفانة
عود وصيتج عليها
خالتي كالتله / يمه غير ولدت بسلامه وشويه شويه يرجع جسمها يستقر ،
وسودة عليه انذبحت من القهر عليك
حتى حملها ما كملته من خوفها وقهرها عليك
مهند كاله / قوي حالك يالحبيب مرتك وجهالج
محتاجينك
هو كاله / من شفت ابو عيون جتاله طابت ريتي
خالتي صاحت / خايبه دكومي نامه بحظنه
بلكت يرد حيله
يمه خالتي تخبلت من الفرح شكد عيب خجلتني
بقيت بمكاني ولا تحركت
الحمد لله هذا اليوم ابد ماانساه
شكد فرحت بشوفة طارق ،
صح ملفوف بشاش ابيض
من صدره لحد حزامه ،
بس هو سالم ويتنفس
كلش كافي عندي المهم عايش
حيدر اجى سكن يمنا علمود طارق
لان ما يتنفس زين وجابوله بطل اوكسجين
يتنفس عليه ،
وما ينام عدل لا نايم نص نومه
والله شبه كاعد ،يكول اختنك
وعندة علاج وابر ومغذيات وضماد الجروح
وضلوعه توجعه يكول تاكل بروحي من أتنفس
حيدر هو تكفل بي وكابله وكعد
الخطار سبونا سبي ، وفد يروح وفد يجي
بس اغلب الخطار ما يبقون وبالاخص الرياجيل
اقل ساعه ويرحون ،
واليبقون على الغدة لو العشا البنات موجودات
متحزمات الخدمة الخطار
اني انسليت من وجع العمليه
ساهرة كالت لحيدر ،
-
صاح عليه
جان كاعد يم طارق يضمد بجرحه
وهمزين هسه الرياجيل اصدقاء منتصر راحو
-
كالي/ ام عيون حول ليش عمليتج التهبت
ما تضربين الابر مو
كتله/ لا والله اضربهن بس مااعرف ليش ما طابت
كالي / ميخالف لا تخافين تصير بعض العمليات
هاي الالتهابات
تعرفين دربج استري حالج وطلعيها اشوفها
كتله / اروح هناك للغرفة
كالي / بكيفج الي يريحج
رجعت للغرفة وساهرة بقت يمي
هو اجى وشافها ، شنو مو ايد بشر والله
طلع روحي، عصرها العفو فرغها من الجراحه
وفتح عليها كبسول لونه احمر بعد ما عقمها
وعلم ساهره كاللها/ يوميه تنظيفها بهاي الطريقه
يلا تطيب ،
وساهرة ما قصرت ويايه يوميه كامت تنظفها اليه
الحمد لله أحسن
اني كمت كل مااشوف ماكو رياجيل غربه
اروح اكعد يم طارق،
مااريد هاي الحقيره تجي يمه
ولو هو بيا حال بالكوه يتنفس
حتى اكله مو هذاك الاكل كله سوائل ويكول اتعب واختنك
بس شنو من تروح سهى تشوف الجهال العصر
وترجع هو خطيه يبقى يسال عليهم
حتى كاللها/ صوريهم خل اشوفهم
من جابت صورة اليوم من راحت شافتهم
ما شاء الله هوايه متغيرين وصايرين احسن
ومسرة سودة عليه بقت تباوع على صوره وتبجي
وكالت / ترى والله العظيم فرحانه بيهم
مو عبالج احسدهم
خطيه كسرت خاطري اعرفها تحبني وتحب جهالي
وتحبلي الخير ، بس بعد هذا رزق الله
مسرة/ بقيت ١٠ ايام نايمة وما أتحرك
كد روحه الحمام وارجع ،
واخذ العلاج بوقته
وضربت الابر المثبته ،
وبقيت ادعي كون الله يفرحني
بس هاي الايام ابد ما قطع الدم عندي
ينزل بس شي قليل ،
منتصر يروح للمستشفى الصبح ما يجي لليل
يشوف طارق وحاتم ، ومن يرجع بليل
يجي يسألني شلونج بشريني كونج زينه
اكله / لا الحمد الله اليوم احسن
مااريد اخوفه ،
وهو يكول / يالله
اللهم ارزقنا بالذريه الصالحه
لحد ما خلصت عشر ايام اني بس نايمه
ومتأمله خير، ليش ما رحت لدكتوره أختصاص
نفس الدكتوره التراجعها
نهى وسوار ،
وهي نهى راحت ويايه وشرحتلها حالتي ،
سوتلي سونار وكالت /ماما ماعندج حمل
كيس الحمل مقلوع من مكانه
مايحتاجلج عمليه كرداج وتنظيف
انطيج حبايتين فقط اشربيهن
وتحاميل نسائيه كافيه تنظفج
اسبوع واشوفج
شبعت بجي عرفت حملي سقط
والله كتلكم اني مجربه من ينكسر شي بيدي
تصير عدنا مصيبه ،
وهل انضرب طارق وعمو حاتم
وجابت سوار ثميني وجهالها بقوا بالخدج
وهسه حملي ماكمل وسقط
منتصر من شافني طلعت من عيادة الدكتوره ابجي
كال / العوض بالله
ما مكتوبلي الفرح
اجتي نهى ورايه وجابتلي العلاج
رجعت للبيت اسحل برجليه من القهر
وخالتي هم شبعت بجي
ودكت ولطمت على حظ منتصر،
وحتى مااريد احد يكلي الله يعوضج بخير
فارت روحي من القهر ،
وانوب اشوف تبارك هي وهدومها الحصر
وجسمها اليخزي تفتر كدامي
ومنتصر غافل عن فعلتها
والله عيب حمواتي يبلغنه بالصدك ويكتلها
ويسويله هوسه كدام الخطار ، وهم كلهم اقربائهم
مااستخدمت العلاج ، هنا كبت خالاتي
كلت المنتصر /اروح لبيت عمو حاتم
ماابقى هنا
هو ميقبل ياخذني
يكلي/ ابقي كدام عيني لا يصير بيج شي
من حركت روحي وقهري شمرت علاكة العلاج
بالكاع وطشرتها بالمطبخ،
ورحت الغرفه خالتي كمت ابجي بصوت عالي
-
هو لحكني ويصح /تعاااي هنا شنو هذا تصرفج
مال مزعطة
ماحاجيته بقيت بس اباوع بوجهه وابجي
كمت ارجف من القهر والاعصاب
بس كاتمه على روحي كلشي ما حجيت
هنا وتجي ساهرة كالت / يبعد روحي من عساها
دموعج تحرك تبارك الحقيره
الله يعوضج بخير امي
بعدج صغيرة وبمكان هذا الكتلته اخته
الله يعوضج بتوم بدل عنه
منتصر بقى يفر براسه كال / حجيه مو من عوايدج
تبسمرين بالحجي شبيها تبارك
كالتله / منتصر بدون هوسه وبدون صياح
خطارك موجود ويعتبرون صياحك طرده الهم
اخذ بنتك الغرفتها
وشوف فرحتها الوزعت منها على الجيران
بطيحت اخوها شنو معناها
هي متعمدة تكتل مسرة وطرحها من عرفتها حبلة ،
وبلغتك بوكتها سهى هي طاحت من الدرج
حتى لا تسويلك هوسه كدام خطارك
هو ما طلع من الغرفه بقى يفتر روحه رجعة
وبقى يسبح سبحته بيده ويكول/ استغفر الله
بصوت عالي ، كعد بالكاع وكال الساهره/
سويلي اي شي بارد ترى راح انفجر
وجيبي علاج اختج وياج
طلعت ساهرة من الغرفه
وهو يباوع علية شلون ابجي بقهر
كالي / ليش ما كتيلي الصدك ؟؟
كتله / انت بيا حال واكعد اكلك تبارك كتلتني
واكيد هم راح تضوج من عندي
والبنات كالن ممنوع تكوليله عيب من الخطار
هو بس كال / يصير خير
جابتله ساهرة دولكه صغيره مال عصير مشمش
كلها ثلج، شربها مره وحده
كام على حيله وقبل لا يطلع من الغرفة
كال / انا طالع ممنوع واحد يخابر عليه
ساهرة لحكته ماخذ سيارته وطالع
من رجعت سألتها /وين راح
كالت / لا تخافين عليه راح للأبو جوادين
خلي يروح يفرغ ضيم قلبه هناك
بلعت الحبوب وما تعشيت من القهر
بقيت بغرفه خالتي
والعفو استخدمت التحاميل هن ثلاثه
بس بين كل وحدة وحده نص ساعه
وبقيت نايمه وللفجر وكالي الوجع تعاي هنا
تملخت بطني كمت ابجي من قوة الالم
وصار عندي نزف قوي ،
ونفسي كامت تلعب
زعت شكو شي جان بمعدتي،
وانوب صخنت ،
ساهرة ونهى كابلني وكعدن
نهى كالت / ابو صيدلية علمني على اعراض العلاج
لا تخافين هسه شويه شويه تخف عندج
وصدك ل ١٢ الظهر يلا فك الوجع عندي
ونزل عندي شي بكد الحمصاية الكبيره
لونه ابيض ، وياه جبدة صغيرة حمرة
ام شمخي كالت / هذا طروح الولد
وخالتي هم كالت / هذا ولد
منتصر ماراح بهذا اليوم للمستشفى
بقى بالبيت يروح ويرجع عليه
كال / اخاف عليج اخاف تعازين روحة المستشفى
ومااحجي عن حسين مو تكولون طفل صغير
هلكد بجى وانقهر ، وخالتي مجلبه بي
يشمر نفسه من حظنها ويكلها/ عوفيني
اخوي مات ماعندي اخ
كل الولد عدهم اخوان بس انا وحيد ماعندي اخ
خله خالتي تنمرد من القهر بالزايد
همام ماخذه وطالع من البيت
حيدر أتصل على صديقته الدكتوره النسائية
وحجالها كل اسماء علاجي
وهي بس ضافتلي نوع واحد مال ابر
كالت/ حتى لا تصير عدها جرثومة بالرحم
بسبب الاجهاض
جابلي منتصر الابر
وضربتهن والحمد لله على كل حال
-
-
سوار / وقبط شهر و٤ ايام
بالعدل يلا سهى بشروها باجر
نروح ناخذ جهالي ،
ما صدكت يجي باجر
واروح اجيبهم
منتصر راح ويانه اني وسهى ولمى
واجى مهند ويانه ، وطارق يوصي
منتصر بعد اخيك
اسال عن حالهم كلش زين يلا تطلعهم
ومنتصر ومهند ما قصروا
سألوا الطبيب لحد ما داخ
البنات مشارق ووهج زينات وهوايه يتشابهن
بس ذو الفقار ما يشابه وياهن
وانعم من عدهن ،
ورجليه من الركبه وجوة مقوسه العظم عوج
الطبيب يكول من يصير عمرة ست أشهر
راجعوا بي طبيب اختصاص عظام وكسور
حتى يسويله عمليه ويعدلهن
يمه ما صدكت لزمتهن
مااعرف ابوس منو بيهم
اريدهم كلهم بحظني ،
منتصر فد مكيف وفرحان ويكول السهى
/ضميهم جوة العبايه لا ينحسدون
منهند كاله / على حورهم من حشى خلقه الله
يلعبون ستين نفس زركان وجنهم جريذيه
لمى كالت / من حلات جهالك واحدهم زوعة
هذوله ولد الغالي شوفهم شلون حلوين
كالها مهند/ افاااا جهالي زوعه
هسه صاروا كخه والله وكت
كالتله / عمتي ام حمادي تكول بزرت ابن الك
وبزت بتك لا للأهلهم ، هذوله بزرة ابنا
مو بزرت مرتك الغاكه
هو كال / سمعت ابو حسين كدامك شهد شاهد من اهلها
كالت بلسانها مرتك غاكة
كاله منتصر/ يخوي ليش ما تستر على روحك
لا يجيك واير وينتلك وانت نايم
هو ضحك وكال / كلشي يطلع من اختك
لمى جليت بمشارق متقبل تنطيها
تكول / مو حيدر سوالها العمليه
اعتبروها اجر التعب ما نريد منكم فلوس
وسهى شالت فقار ووهج سويه بالعش
اني مااعرف اشيلهم
الطريق كله ومنتصر يكول / عود ليش ما يبجون
شو خانسين
سهى كالتله/ ابو حسين بليل وانزل عليهم
هسه نايمين
وصلنا للبيت ومهند كال/ اوكفن
طشر عليهم فلوس ترس عشوشهم فلوس
دخلنا للبيت وخالتي وام ساهرة وام شمخي
رجن البيت بذكر اسم الله والصلاة على النبي
والجهال فرحانين وعدهم عيد يردون يشوفوهم
طارق شنو طار من الفرح
سهى خلتهم بحظنه
هو يخاف يشيلهم
بس يباوع عليهم ،
خالتي تكله/ يمه بوسهم
يكلها /لا خطيه صغار شواربي ولحيتي اتنغز خدهم
بس ناوشيني امهم ابوسها
انوب صاح على لمى /يالزريكه تعاي
جيبي البيدج اشوفه
هي تحرك جتفها ما تقبل وتكله / ما
هاي بنيه اسمها مشارق مالتي صارت انساها بعد
هو يكلها / بس اكوملج اخبزج
جيبها اشوفها
كالتله / تشبه اليمك تشبه اختها وهج
بس العندي احلى
هو يباوع عليهم يكول/ هو ياهو الولد وياهو البنيه
لج سهى تعاي طلعيهم خل اشوفهم زين
كتله / هاي ام الوردي بنيه اشرتله على شريط الدشداشه مالتها
وهذا ابو الازرك ولد
كال / شو هذا ازرك مو حلو
كالتله خالتي /صلي على محمد وكول يالله
ازرك لو ابيض احنا ما خالقين شي من عنده
انوب كالتله / الخاطر فرحه جهالك
زين لحيتك وشعرك صاير جنك ارهابي
كاللها / يوم بروح ابويه ما تفرغيلي غرفتج شويه
وعلي مشتاق للفيفي مالتي
تحجين بيت الله اذا تجمعيني انا وعائلتي
بغرفه وحده
هي كالتله / بس زين وتشلع عيوني
ابد اليوم انوم الكناري بحظنك
واشبع بيها وبفروخك للصبح
هو صاح / همااام جيبلي عقيل خلي يجي يحلقلي
اليوم اعرس فطوم اليوم اريد اعرس
النسوان كامن يضحكن
وخالتي كالتله / عاد بيك حيل للعرس
لو بس حجي
هو صاح عليه / تعاااي لج شدكولين بيه حيل لو لا
اني اريد احرك قلب علياء
كتله / وهو شوكت راح منك الحيل
اصلا انت توزع حيل للمعرسين
هو صاح / بعدددد حيلي ريتج هاي الترفع المعنويات
مو فاطمة خاتون
ولج كون اكاسرج بالزحلاوي وادوخ بيج
خالتي كالتله / طويرق كول يالله بعدك بحلك عزرائيل
هو كال / كايلين يالله بس مااكدر اكطع كلشي فجأه
العافيه بالتداريج ...
اني هنا بعده ما كمل كلامه كتله /
سهله واعتبري اني التداريج
هو كال/ كوووموا اطلعوا بره من رخصتكم
اكو طير ناوي على ذبحه آليوم
هنا أجى منتصر وكف فوك راس الجهال
وطشر عليهم فلوس غركهم تغرك
ودنك باس طارق كاله / هسه ردت روحي بشوفتك انت واولادك سالمين
شو خالتي كامت تبجي وتكول /
بس الله يعلم شكو بقلبي وبقلبك
هو كاللها / حجيه مو فرحانين شكو كلبتيها على التركي
سهى كالت / امشي كدامي جوة اعلمج
شلون ترضعيهم خطيه كاموا يدورون
لمى كالت/ اني انطيها ممه
انسوها هاي الحمامه مالتي
طارق كاللها/ اكوملج اسحلج خليها ويه اخوانها
باوع عليه وكال / للذكر مثل حظ الأنثيين
كتله / شنو /
كال / جهه للبنات وجهه لفقار
ياااا يالله فد خجلت انوب منتصر واكف
وكام يضحك يكله/ ابقى بهذا عقلك المتحجر
شلون خلصت هندسه مااعرف
اخذنا الجهال ورحنا بغرفه خالتي
كعدت يمي سهى
وبقت تعلم بيه شلون اخليهم بحظني
وانطيهم حليب، والله كلش ناعمين وصغار
خفت اشيلهم عاد هي خلت مخدة بحظني
وخلت اول شي فقار
يمه فد شعور مااعرف اوصفه شي حلو
شي غريب ، شي بي حنيه ولذه عجيبه
اباوع عليه شلون اندل صدري
وهو مغمض و يطبك حلكة على جسمي
ويبلع الحليب من صدك حسيته يعرفني
اللهم بحق النبي محمد ترزق كل بنيه هيج لحظات حلوة
والحمد لله شويه شويه رجعت الفرحة بيت خالتي
طارق برحمة الله وعناية حيدر واخوانه
شال روحه ، وكام يفتر بالبيت وحده
والحمد لله بعد ما يحتاج الأوكسجين
بس شنو من كثر الوجع والالم فرد نوب ضعف
وجنه شرطي مرور يفتر بالبيت
يمشي على كيفه وكلساع وكال
هذا ليش وسخ ،
هذا ليش مو بمكانه
هاي ليش هوسه ،
هدوم الجهال ليش بعدهن بالسله
ليش لهسه ما خابزات
اتأخر غداجن
يمه شيب قلبنا بس ينتقد
خالتي تكله / جنك عجوز أكراد تمشي ودردم
هو يكلها / فاطمة خاتون ترى مفطوم
من النسوان والعرك والجكاير
وادورلي حرشه حتى اكب واروح انتحر بيهن
هي تكله / انت الخسران محد يشيل الوجع
عنك استجن واكعد وكول يالله
وعاين الروحك وعاين لمريتك وجهالك
الجهال الف الحمد لله ما تعبانه بيهم
خالتي وساهرة ولمى ومسرة مستلمات القياده عني
اني بوكت يردون يرضعون اخليهم بحظني
واحلى شي انام بليل براحتي
اشمرهم على ساهرة ولمى وخالتي
ومن راحوا كل الخطار وبقينا بس احنا
بليل اروح للاستقبال اقفل الأبواب
وانام بحظن طارق يمدلي ايدة انام عليها
هو مايكدر يتقلب ينام بس على ظهره
اني انام مني للحياط اخاف اوكع السرير صغير
بليل يكعدني ايده خدرانه يسحبها من جوة راسي
كل مااكعد بليل الكاه كاعد
اكله / شبيك ؟؟
يكلي/ افكر وعيني ما تاخذ نوم ....
لمى تخبلت نست حتى حيدر
تلبس وتعدل بالبنات وتحير شسوي بيهن
حتى تخطط حواجبهن وتخليلهن كحله
ومرات من تخليلهن حمرة طارق يتخبل
يكلها /عوزج بس تصعديهن نمره
وشكو هدوم تعجبها بالسوق من تروح تشتريلهن
بس فقار ابد مالها شغله بي
حتى ما تشيله ولا تبوسه
ومسرة تموت على فقار
تغور بلمى من تلبسه وتبوطره
واني مكيفه اني المستفاده
علواه احبل واجيب يوميه
بالحباله شالوني من الكاع
ومن جبت مالي دخل بشي هم مرتاحه الحمدلله
منتصر يجي من شغله تعبان وصاح /وين الطيور
جيبوهم اليه ، تركض مسرة تجيبله فقار
وتجي لمى تجيبله مشارق
ووهج بالاخير لو اني اخذها اله
لو ساهرة
طارق عنده فقار بجفه واني والبنات بجفه
يموت عليه، صح يلاعبه ويناغي
بس من بعيد يخاف يشيله لان كلش ناعم
وبيوم وهج بقت تبجي مااعرف شبيها
حارت بيها ساهرة ولمى
حتى خالتي شافتها كالت خاف ممتونه
وطلع كلشي مابيها بس مااعرف شبيها تبجي
اني جنت كاعدة بالغرفه وياهن ولمى
شايلتها وتفتر بيها
نعست وكمت اريد انام ، رحت للاستقبال
فتحت الباب على كيفي كلت خطيه
طارق نايم واكعده ويبقى الليل كله كاعد
ظلمه مطفي ضوة الاستقبال
وضوة الصاله هم طافي
فتت واسمع طارق يكول / اي احبج
بس شنو ذنبها هاي النايمه بصفي
وهي أحلى ذنب صار بصحوتي .....؟؟؟!!
شكرا لزيارتكم عالم روايات سكيرهوم
