رواية ناديه الفصل الخامس والعشرون 25 بقلم انين الليل

_________

سراج 

سديت الخط ويه كامل وركبت سيارتي انا ورضا هو ما حاول يسالني تمينا ساكتين بعدين رضا حچى وگلي 

- - ذبني يم المحل 

انا ابتسمت عرفت يريدني احچي ::وك رضا شگد صارلك ابغداد وبعدك ذاك انت شنو ذبني .. چيس 

واشمرك ..

رضا //ليش بلعتها سراج گول چيس زباله واشمرك بالحاويه اگلك شنو بعدني ذاك انا كلمن سكن بغداد

 يتبغدد عمي انا هذا كلامي لازم احافظ ع التراث تريدني اگول اني ولعد ما راهمه حتى ما تلوك عليه 

ضحكت وگتله ......امشي وياي 

رضا //تحجي صدك 

::اي والله

رضا استعدل وگال //امشي وامشي وهذا كامل بس يفك حلگه اودي وره الشمس شنو شلداله ما وراك زلم شني 

::كفو منك بس بروح ابوك شنو شلداله

-ضرب على رجله //. اهو شلون احنه بااهل بغداد (شلداله ) يعني شحسباله بعدين - شني كفو ما كفو

  سراج تره انت السويته وياي محد مسوي عرضت نفسك واهلك بذاك الوكت الشجاع يرجف بالصيف 

باوعتله ::وانت رديتها ياصاحبي 

ضحك باستهزاء//هئ هئ اي من صرت مجاهد عبالهم كتلته لان رفيق بس انت السويته صدك سوايتك زلمه 

من ظهر زلمه وما ادري بيش اجازيك

::ما بيناتنا ياالله خلي نروح بس هاا اريدك تلزم نفسك من تشوف ابنه 

رضا //خاب شني الزم نفسي هذا ابو اني واني المايع خوش چا انا اله الا اعلمه 

انا ضحكت هالمره ضحكت من گلبي رضا گلي //شبيك سراج ضحكنا 

::والله ضحكت شلون رهمت چا وخوش ويه اني 

- - ترهم سراج كل شي يرهم

باوعتله :: شقصدك ؟

- - تصنيع بعد اخوك 

ضحكت اكثر وصلنه رضا گلي //انا اظل اتانيك اهنا وانت رووح شوف عمك 

::انزل وياي ما عدي شي اضمه لو خايف 

- - انا اخو اعليه انا اخاف افه راح انزل وتشوف النسوان شتجيب 

::رضا تلزم نفسك نتفاهم بالحسنى 

- - صار سراج بس ها دير بالك تصير مثلي وتاليتك بس تجر حسرات وترد بمواويل جوه الشجره

سلهمت عيوني نزلنه ودخلت على كامل الي اتفاجأ بجية رضا سلمنه وهو گلي //شعجب جاي وياك الاخ المكان عملك 

جاوبته ::استاذ انا مجاز واجيت تلبيه لاوامرك بعدين هذا رضا اخوي وصديقي ونسيبنه 

كامل //صحيح انت هالمره جاي مو بصفه رسميه امور عائليه 

::ورضا مو غريب 

كامل رفع حواجبه //ها يعني شنو يعرف باسرار بيتك

رضا رد //استاذ احنه ناس نعرف الاصول ومن نجي ويه خوينه نجي حتى نلگى حل ونساعد حتى ما تتازم 

الامور (وگف رضا ) وانا طالع متانيك ابو نور يم السياره 

طلع رضا وبقيت انا كامل باوعلي وگلي 

سراج انت خطأت من رحت للبصره وگلت انا رايح الفاتحة عم صديقي بالعماره 

::ليش انتو مخلين عليه ناس تراقبني 

- - لا مو هيج لكن ......

قاطعته ::لكن شنو استاذ جايين ويه زوجتي وكانما انا متهم وانتو اتحققون وياي وسؤال وجواب وبعدين تهديد 

وتگلي موهيج 

كامل دخن //اي تاركها ما اعرف شكم يووم وحضرتك رايح تتونس وتشوف گرايبك كل هذا الشي وما تريدها 

تزعل ولا تريدها تخبرنه 

عضيت شفتي وگتله ::لا عادي خليها تخبركم بس هذا الشي ما يصيرلي

كامل //شقصدك سراج 

::ما قصدي شي بس حاب تفهم بتك انو كل الي كان بيناتنا انتهى 

كامل عكف حواجبه //شلون يعني وضح؟

::يعني يا استاذ كامل انا ما اگدر اعيش ويه بنتك (هو راد يحجي انا ما خليته )بنتك احسن بنيه ويستاهلها الي 

احسن مني لكن بيها عيب واحد هي تريد تسيطر عليه وانا ما اقبل بهذا الشي 

كامل //افهم من كلامك تريد تطلگها

هزيت راسي ::اي نعم لان انا ما اتعودت تتوجهلي اهانه وابقى ساكت لكن اليوم بقيت ساكت 

كامل //اي لان تعرف بنفسك غلطان 

باوعتله بنظرة استهزاء وهزيت راسي وگتله ::فعلا غلطان لذلك راح اصلح غلطي استاذ ابو احمد انا وبنتك 

طريقنا مسدود اعذرني

ما انتظرت اسمع رده وطلعت منه وانا احس نار تطلع من عيوني وصلت يم رضا الي لكيته منتظرني يم السياره 

ركبت وبقيت ساكت وهو ما حچى لان شافني عصبي وصلنه يم مطعم ونزلت انا ويا هو طلب عشا بدون ما يسالني

شريد بقى ساكت اكلنه قليل طلب چاي شربنا سالني //سراج شسويت 

باوعتله ::بعد وكت چان ما سالتني 

- - حقك عمي بس ما ردت انشدك واضغط عليك ردتك انت تسولف

هزيت راسي وكتله ::اتفقنا ع الطلاق 

رضا //متاكد ؟

::اي متاكد ما نرهم 

بهاي الاثناء اتصلت سجى ما جاوبتها مره ثانيه وثالثه انا اخذت التلفون وطلعت بره المطعم جاوبتها 

::الو 

سجى بعصبيه //انت هيي ياحقير انت منو حتى تتطاول وتطلگني نسيت نفسك 

جاوبتها ::لا بهاي الشغله بالذات ما ناسي نفسي اعرفها مجرد حشره انتي واهلج ممكن تسحكوني

 باحذيتكم يمته ما تردون

سجى بتهكم //ايي همزين تعرف نفسك ياحقيير بس اله اخليك تندم على الساعه الي تطلگني بيها 

جاوبتها ابرود ::لا ابساطه انا اتندمت على الساعه الي عرفتج بيها 

سجى //اي لان انت نكره وتبقى نكره انا صوجي نزلت نفسي الواحد مثلك 

::والله صحيح وهسه انتبهتي النفسج ابقي منتبهه دائما 

سجى نصت صوتها //سراج هذا اخر كلام

بنفس برودي ::وما اتراجع عنه بس نصيحه حالة التكبر الي عندج انصحج ابتعدي عنها اذا كنتي تفكرين ترتبطين 

بانسان يكون رجل اما اذا تردين ترتبطين بالمستقبل بواحد امعه حشره تسحكونه برجليكم يمته ما عجبكم فابقي 

بكبرياءج انتي واهلج باچر الصبح يوصلج خط الطلاق وياهن المؤخر والاثاث كله اخذي الج 

سجى بتهكم //لك اني يهمني اثاث لو بعيني اني صوجي ردت اسوي منك شي بس انت ما تستاهل

::صدگيني ياسجى يمكن بلحظه فكرت اعيد حساباتي وياج وابدي صفحه جديده لكن كلمتج هي الي نهت كول شي

رجعت يم رضا الي لكيته منتظرني گعدت بمكاني ودخنت جكاره هو سالني 

—ها سراج 

نفخت الدخان وهزيت راسي گتله هاا؟ 

سكت رضا وصار يدخن نرگيله كسرت السكوت:: اگلك ليش ما طلبتلي نرگيله مو بعينك انا لو شنو 

رضا نفخ الدخان وگلي //هسه چنك عليها واشر بايده واجه النادل وگله احلى نرگيله العمك 

حك راسه وگلي// بشر سمسم يو ماش 

باوعتله وسالته ::اكو بالطلاك سمسم وماش ؟

رضا ابتسم وگلي //اي لمن تفتك من غلطه غلطتها وانت ما متقصد 

جريت نفس ::كلامك صحيح باچر اطلگها 

رضا //ولا اگلك هي الخسرانه لان المثل ذوله صدگني دووم يربحون

سحبت نفس وحاولت اغير الموضوع وانا ما اعرف ليش ضايج قررت اروح للبيت رضا گلي 

- - سراج امشي بات يمي 

::لا شنو ابات يمك 

- - مثل ما گتلك ما اخليك تروح للبيت لو ادري اچتفك 

ابتسمت وگتله ::ها وليش اخاف ابحدي مثلا 

رضا//لا مو تخاف ولا تخاف بس امشي وياي وانا اگلك ليش 

وركبنا بالسياره وظل يغني ويصفگ بطريقة حلوه

ماتنسمع رحاي بس ايدي ادير 

ماتنسمع رحاي بس ايدي ادير 

لاطحن بگايا الروح موش اطحن شعير 

لاهلنه امشينه بويه امشينه 

لاهلنه امشينه يامدلوله 

ونيني هلبت كسر گلبك ونيني 

وبقى رضا يغني مره موال مره اغنيه مره دارمي الى ان وصلنه ونزلت ويا ِطبعا بيت رضا ابحده حتى مو يم علي 

اخو واختي نور الي تزوجو بعد ان رجعت نور ويه ابوي وامتحنت السادس ودخلت كلية تربيه قسم جغرافيه 

وبالمرحله الثانيه تزوجت 

رغم معارضة امي لكن علي اصر يتزوجها وصار يخطبها اكثر من مره وبعدين امي وافقت من شافتنا 

كلنه موافقين

بالبدايه علي اجر بيت وبعدين اشترا مشتمل زغير عاش بي هو ونور وصار عدهم اثنين اولاد توم

اما ام رضا فبقت ويه رضا حتى من اتمرضت ما قبل رضا اله هو يداريها 

انا اعرف السبب لان نور يعرف بيها مو مال شغل وخدمه ومن اتوفت امه هو بقى بالبيت 

دخلنه انا ويا بالصاله بيته حديث وحلو هو راح جابلي تراك جديد وسوا گهوه عربيه ونرگيله

سالته ::اگلك رضا ليش ما خليتني اروح للبيت 

رضا //شتسوي يخوي تروح مو گتلي كل شي عفته الها 

::اي بس هناك ملابسي واوراقي 

- - باچر انا وياك نروح ونجيبهن 

::شنو تخاف عليه مثلا 

رضا گلي /تؤ اخاف منك

::هههههه صدك رضا ليش ما خليتني اروح 

- - هيج كاتلتني الوحاشه واريدك يمي 

::ليش ما ترجع مرتك وابنك

هو باوعلي وجر نفس وگلي //صعبه سراج 

::شنو الصعب البيها 

- - سراج تدري انا اتزوجت كله الخاطر امي بس ما گدرت 

::قصدك ما كدرت تنسى سكنه

  اتحسر - - اي ولا حتى بالحلم ما تدري انا شلون عشت وشصار بيه وانا احس بيها صارت الاخوي والمصيبه ادري 

بيها ما تريده ودووم اسمع من امي وعلي شگد چان يكتل بيها لا تگول چان يجرم بيها 

::كان لازم من اخوها كتل حسن انت ماخذها 

رضا جر حسره //اي هو هيج لكن امي ما رضت كلت خلي تبرد السالفه بس اخوها فات زايد اظطراني اكتله 

وانت تعرف الي صار

::اي اعرف بس لازم تعيش حياتك الى متى تبقى هيج زين يجوز تتعب بالليل يجيك حرامي كل شي يصير 

باوعلي وگال //ما اگدر سراج 

::ليش طلگتها المرتك لاتگلي ما اتوالمتو احچيلي الصدك 

هو اتحسر وگلي //لان عرفت بيه احب وعاشك حاولت وياي المشكله ما اكدر انسى ومن صار الولد شرطت 

عليه لازم اكتب كل شي باسمه 

انا عكفت حواجبي ::وليش كل هذا ؟

- - تگول لان اعرف بيك راح تظلمه وراح تنطي اكثر املاكك لاولاد اخوك

::بس هي من حقها تدافع عن زوجها وعن حق ابنها 

- - هذا اذا انا چنت فعلا راح اظلمه 

::بس مو هذا السبب رضا 

هو حاول يغير الموضوع رديت علي ::ما تريد تحچي براحتك 

- - لاتزعل مني بس انا عاشك واحب وكل شي اسوي الي حق بي 

::لكن ظلمت ابنك 

- - لا مو الهلدرجه اگلك شني نظل نسولف بليش ما رديت مرتك وظلمت ابنك شني 

جاوبته ::لا يابه خلي انبدل الموضوع بس اعرف انت ضام عليه شي

هو صفن شويه ورجع گلي //وانت سراج 

:: انا تمام ما بيه شي گدامك بس احچيلي ال صدك ليش ما خليتني ارووح 

رضا //سراج لان انت عاشك وما اريدك تخسر عشكك

دار وجهه ونام ع القنفه وانا بقيت افكر بكلامه الي ما حاول يوضحه الي بقيت ادخن وبعدها ما دريت نمت 

ومن گعدت لگيت مسجات من سجى وحتى من امها الي تگلي //ما نريد نخسرك بتي تحبك 

لكن انا قررت وخلص لان عرفت بنفسي انا ما حبيت سجى ولا هي ترهملي زوجه 

ثاني يوم ما داومت كتبت السجى مسج 

::صباح الخير اريد اروح اخذ ملابسي وما اريد اضايقج يمته ما موجوده

هي ردت// اي رووح لان انا بعد ساعتين ادز عمال يحملون الاثاث افكر اشمره بالزباله بعدين گلت انطي 

للناس الفقره يستفادون منه عاد يدعولي 

ما رديت عليها هي گالت //من تريد تروح خبرني لان ما يعجبني اشوف چهرتك 

جاوبتها ::هسه رايح

رحت انا ورضا بعد ان اتريگنا ودخلت للبيت لكيت ما موجود احد صحت على رضا يشوف المفاجأه وياي 

لگيت ملابسي ولا قطعه بمكانها كلها مشككات ومشمورات بكل مكان بالبيت بصراحه توقعت هذا الشي منها 

رحت الغرفة النوم اريد افتح القاصه اخذ اوراقي وعندي فلوس لگيت القاصه كلها مشيوله هزيت راسي وگلي رضا

- - ها سراج 

::خلي نطلع لان احس اختنگت 

- - مو گلت اوراق عندك تاخذهن 

ضحكت باستهزاء وگتله ::اي بالقاصه بس ما موجوده 

رضا باستغراب //انا اخوك شايلين القاصه باكملها 

::اي والله 

- - تولي شنهي باچر تطلع بدل والفلوس اعتبرهن غايبها

ضحكت من عفويته وشلون الكل شي عنده حل هو اتقرب مني وخله ايده على چتفي وگلي 

- - ياالله بعد اخوك خلي نطلع هذا المكان مو الك 

طلعت وانا اباوع للملابس المشگكه والاحذيه المشموره بكل مكان وصلنه للباب وفتحنا اتفاجأنه باحمد اخوها جاي 

ويا تلاثه او اربعه ودخلو للبيت واحمد يگول 

- - وين وين شنو دخول الحمام مثل خروجه 

باوعتله وگلت ::شنو استاذ جاي تهدد

احمد باوعلي باستهزاء وگلي //لا حبيبي متوهم احنه ما نهدد احنا شغلنه حار بحار 

اول مره اشوف احمد وهو يحچي بهاي الطريقه جاوبته وانا احك بحنچي 

::اي وانا حاضر بس الجماعه شيسوون جايين وياك 

اتقرب مني وسوو نفس الحركه الي سويتها لمن اجوني هو واهله وگلي 

- - جايبهم يتعرفون عليك

اشر الهم براسه وذوله اتقربو عليه همه اربعه دارو عليه مبين عليهم يلعبون العاب حركه وقوى فصارو يضربوني

ما منتبهيين الرضا الي من شافهم صاح 

افه انا اخوج( يا اعليه) واتدنى صار يضرب بيهم همه باوعوله وانا باغتتهم صرت اضرب كل واحد بخشمه بمكان

 يخلي يفقد توازنه ورضا يضرب بيهم ويگول //اياچلاب وليه مال مخانيث

طلعت مسدسي ورميت طلقه الكل وگف انا صحت عليهم بعصبيه 

:: ارفعو اديكم ليفووك بسرعه 

  اتقربت منهم وگلت ::هذا بيتي وانتو اقتحمتو لذلك حتى من اكتلكم القانون بصفي بدون إطاله رضا طلع هوياتهم

 وشكوموجود بجيوبهم

وصار رضا يطلع هوياتهم ويشمرهن بالگاع واخذت هوية احمد خليتها بجيبي بعدها كتلهم :: انزعو ملابسكم   

همه استغربو رديت عليهم بنتر :: گلت انزعو الملابس وابقو بالداخليات اذا ما تردوني اعوقكم

نزعو وبقو بملابسهم الداخليه واحمد وياهم اخذتهم وقفلت باب الحمام عليهم وانا ساكت قبل ما اطلع گتلهم 

احمد ابن ل...ومحترك گلبه على اخته لكن انتم اعتديتو على موظف حكومي وداخل بيته شوفو شنو راح يصير بيكم 

سمعت احمد يعيط ويگلي // شنو عبالك افوتها الك 

ضحكت وجاوبته :: ههههه بعدك اتهدد

احمد بعصبيه // اندمك اندمك مو عبالك افوتها الك 

رجعت علي وگتله ::اي عود واسحكني مثل الحشره 

رضا گلي //يامعود ياحشره هو صار جريدي مبلل جوه المطر ومطگوك بمصياده

الصدك رغم انا مقهور من تصرف احمد بس ضحكت من تصورات رضا جاوبته 

:: انت اجيت تبينلي دخول الحمام مو مثل خروجه وجايبلك جماعه يلعبون حديد ومنطيهم فلوس وبعدك اتهدد 

:: بشنو حمودي اتهدد بمنصب ابوك لو بفلوسك، لو بشنو راح اخليك اهنا تاخذ دوش معدل وتفكر شلون تگدر تنتقم مني

طلعنه من البيت واخذت هوياتهم وموبايلاتهم ومفتاح السياره مالت احمد قفلت الباب عليهم وانطيت سويج سيارتي 

الرضا وانا اخذت سيارة احمد ركبتها وطلعت المكتب ابو وصلنه انا ورضا ودخلنه علي انا الضربه بعيني راسا 

ورمت وقميصي انشك ورضا خشمه ينزف دم بهذا مظهرنه وصلنه الكامل الي من شافني اتفاجأ 

خليت الموبايلات والفلوس وسويج السياره وگتله 

::استاذ كامل مره ثانيه من تردون تاخذون حيفكم لاتجيبون وياكم شلة شوارع خلي تصير المواجهه وجها لوجه 

يعني رجال الرجال

كامل باستغراب //فهمني شصاير 

طلعتله مفتاح البيت وگتله 

:: روح اسأل ابنك وبتك المصون الي المفروض هي لا زالت زوجتي وشايله اسمي 

كامل //هذا شنو الحجي سراج انت تع..

رفعت ايدي ما خليته يكمل وگتله ::انا الخاطرك ما نهيته الابنك وعوقته مو خوف منك لكن انت انسان محترم ومع 

الاسف ابنك زعطوط فمن اعوقه راح اكبر راسه 

درت وگلت الرضا امشي رضا 

رضا گلي // يواشك سراج عدي حسبه ويه الحجي 

باوع الكامل // استاذ كامل انت او ولدك وعشيرتك گومانيين لان اعتديتو عليه وانا رجال غريب جاي ويه صاحبي 

البيته الكم تلث تيام وتالي عود انشد على ابنك وين تلكا 

كامل جاوب بعصبيه // مو چنك اتهدد تعرف شگدر اسوي بيك 

رضا باستهزاء //والله اعرف بس خلي ابالك الكتل ابن عمه خليصه وبوكته رفيق ويهز الگاع هز وداعتك

 يسدح ابنك او. ويا عشره وما يرفله جفن انشد عن رضا ياهو وشسوه وهسه هو شنو وبعدين هدد هاا 

وهذا تهديدك هم علي حشم فك روحك

طلعنه بالباب درت واتقربت شويه گتله //استاذ العصر اطي وكاله للسيد يطلك بتك ومثل ما دخلنه بالمعروف 

خلي نطلع بالمعروف ونصيحه خلي ابنك يخلي رجلي بالگاع لا يتكسر 

وفتحت الباب ودرت علي مره ثانيه وگتله ملابس ابنك وعصابته بالجنطه مال السياره

رضا حچى بصوت مسموع // اسمعني استاذ انا صورت ابنك وجماعته خاف ايوازيكم الشيطان على سراج ودير بالك 

حصوه من السما تطيح اگول انتم 

ركبنا بالسياره ورضا خشمه بقى ينزف گتله //خلي نروح للمستشفى 

- - عليمن ما تسووا امشينه للبيت نسبح ونبدل

وصلنه البيت رضا وتلفون كامل ما بطل اتصال انا اتصلت بيوسف ابن عمي وگتله يشوفلي جماعته ينقلوني الغير

 مكان يوسف من عرف الي صار كلي // شنو ابكيفه كامل هو وابنه ما يدري منو احنه 

:: يوسف بلا تهور بعد ما ترهم ابقى انا وكامل بنفس الدائره انت حاول تنقلني 

يوسف //. ما عليك يمي

ابوي وموفق اتصلو مره وحده وامي بقت تلح باتصالها جاوبتها مجرد ما فتحت الخط 

گالت // سراج شنو انت عبالك بعدك زغير شنو زعطوط انت ما تگلي شنو هالتصرفات 

:: يووم گليلي الحمد لله ع السلامه 

امي //وبعد الك عين وتحچي تعرف ابوك ارتفع عنده السكر 

:: ياالله جاي 

باوعت الرضا واتنفست قوي ::راح اروح الاهلي

رضا لازم اكلنس يمسح الدم من خشمه // امشي وياك 

هزيت راسي :: لا اروح شعليه بس انت روح للمستشفى 

رضا // ما بيه شي انگطع الدم

طلعت اسوق بالسياره وصلت لگيت الوجوه كلها 

ثگيله سلمت ورحت الابوي بغرفته شفته متمدد مبين علي التعب اجت امي وراي وهي تگول 

- - وتالي وياك انت ما تكبر 

::شنو يووم شصاير 

- - هاا تگلي شصاير لا مصاير شي بس تريد تطلك بت الناس لان عندك لعبه 

::شنو لعبه الله يخليج بس هذا حدنا طريقنا مسدود

امي //لا مو طريقك لكن احنه ما راح نفتك من بنات عباس 

انا اتعجبت من كلام امي الي اول مره اسمعه اتقربت يمها وگتلها ::يووم شنو هالحچي شنو شجاب بنات عباس بالنص

امي بنتر //اي احچي لعد تچذب تگول رايح الفاتحة عم صاحبي بالعماره وتطلع رايح للبصره على مود نا ...

ما خليت امي تكمل ::هاي ست الحسن اتنازلت واجتج تتشكى مو 

- - اي اجتي هي وامها باالله ما تستحي يمته تكبر وتتحمل مسؤولية نفسك بدل ما حامل مسؤولية غيرك

موفق اجه وهو يگلي// شنو سراج هاي التصرفات محد بعينك 

امي ردت //لا محد بعينه عايش دور البطل والمنقذ وناسي التزاماته اتجاه بيته وزوجته ما راح تفهم باچر لازم 

تكون اسره وبيت ولازم تفهم يصير گلبك على اولادك 

جاوبت امي ::هم صحيح ولازم اراقبهم وادير بالي عليهم واشوفهم شبيهم ما بيهم مو 

- - اي لعد شلون ربيناكم

::بس المفروض يا امي انا من اجيت هسه چنتي تباعيلي وتباعين العيني شلون زرگه وجهي المورم وقميصي 

 لو انتي تختلفين لكن انا اگلج انتي مو محبة بيه ولا بسجى اصلا اعرف بيج تضوجين منها لان دا تحسيها 

فد وحده متكبره هيه وامها. بس البرستيج گدام الناس 

اطلك بت كامل شلون ابوها منو وامها فلانه وعمها علتان وخالها عنده هيج واملاكه هلگد لان انا متزوج مجموعة

شركات 

اسمعي ماما سجى لو تصير ملكه متوجه هم اطلگها

امي //واني ما اقبل شنو ذاك اليوم اخذتها واليوم طلگتها شتگول علينه الناس 

اتقربت من ابوي الي چان متمدد على الچربايه وگتله ::ها منير شتگول 

هو باوع الوجهي وگال //امنه سراج مو زغير يعرف شيسوي 

امي بعصبيه // هاا صحيت وگع على گلبك مي بارد 

موفق گلي //سراج شلون هيج تحچي ويه امي

امي بنفس عصبيتها // وهو من يمته معتبرني امه هو عنده منيره وبنات عباس احسن مني بهواااي  

بصراحه انصدمت اول مره اسمع امي هيج تحچي 

ابوي بتعب //منيره الله يرحمها ماتت من زمان لو ناسيه 

امي //لا ما ناسيه وادري بيها صاحبة فضل عليك وادري عباس صاحب فضل على سراج بس بعد كافي 

  لهنا وكافي انتو كفيتو وفيتو اريد هذا (واتاشر عليه )الي يگول عليه امه ينتبه النفسه

رديت :: تره هذا الي تحچين علي مو زغير. ويعرف يتصرف 

امي //اله اذا طلگت سجى تصير اكبر غبي 

جاوبتها باستهزاء ::اي اصير غبي ولا اصير.........

امي هزت ايدها وگالت //هو انت الحچي وياك ضايع عرفتك من لمن ضحكت علينه وخليتنه نسافر وانت بقيت 

واحنه صرنا لا ليلنه ليل ولا نهارنا نهار وبعدين اجيت وخليت ابوك يرجع لو نسيت تره للعلم اني غاسله 

ايدي منك من زماان

هي طلعت وانا بقيت يم ابوي موفق اتقرب مني وگلي 

- - ما يصير هيج سراج اجت زوجتك هي وامها وچانت منهاره وتگول سراج يريد يطلگني على مود بت 

ابن عمته وامها صارت تهدد 

انا ابتسمت وگلت ::وامي خايفه من تهديد ام سجى 

موفق راد يحچي بس ابوي استعدل بگعدته واشر الموفق يسكت و اشرلي بايده اتقرب علي اكثر سالني بتعب

  - - احم شنو السبب تريد تطلك سجى 

::ما ترهملي منير 

بابا //سراج ابني تره كل مره تغار 

::لا حجي سجى تريد تمشي كلامها عليه وتأمر وتنهى بكيفها 

- - شلون يعني ؟

::مخليه عليه جواسيس وهي واهلها يباعون للواحد بنص عين

ابوي //اذا تتذكر اني گتلك همه متكبرين 

هزيت راسي ::ما انكر بابا حاولت اغير من طبعها لكن تريد تسيطر ومحد بعينها وشايفه نفسها 

ابوي سالني //صدك هي منين تعرف انت رحت للبصره ؟

::شتتصور انت بابا 

ابوي //ما كو غيرها هالعكربه افراح

::بعد شلون تريدني اخليها زوجه الي اذا بساعتين صادقت وحده حقوده وصارت مثلها واتعس انت ما شفت 

شنو الي صار وهاي تاليها مخليه دوبها ودوب ناديه الي ما شافتها بس نص ساعه 

منير //كله تدبير افراح 

:: لا بابا وهي مو زغيره بس عدها حب السيطره 

منير //شلون يعني

وسولفت الابوي شنو حچى احمد ومن رحت اجيب ملابسي شنو لگيتها مسويه واحمد جايبله جماعه وضربوني 

اشوف ابوي انقهر لكن من سولفتله شنو سويت انا ورضا هو فرح وگلي 

- - هذا هو زين تسوي بس كون ربيتهم زين 

ابتسمت :: شتعرف باابنك ذيب 

امي دخلت للغرفه // ذيب مو ويه كامل وابنه

ابوي // صحيح كلام امك دير بالك لان حتى كامل ما راح يسكت 

ابتسمت :: لاتخاف عليه منير وانتي امونه ما راح يصير اله كل خير خابرت يوسف وگلي ما عليك انا احلها 

موفق // بس ما يمنع تدير بالك 

:: لا تخافون ما عليه شي ورضا وياي 

امي وهيه تهز بايدها // اي واحد اتعس من اللاخ انوب رضا ويا

ردت اضوجها :: اي وعلي نسيبي من عرف گلب الدنيا وصار يتهدد ورضا كال اجيب عمامي ونگعد ابيتكم هالگعده 

امي هزت ايدها انا اتقربت عليها وحضنتها وهي دفعتني رحت بست راس ابوي الي گلي // تمنيتك تستقر وترتاح 

ابتسمت بوجهه وگتله:: ان شالله بابا اهم شي انت لا تضوج ولا تنقهر 

ابوي راد يجاوب اتصل كامل انا رديت وابوي وگف طلع للصاله قبلي وانا رحت امشي كعدت

::الو 

- - شلونك ابني 

::الحمد لله استاذ 

- - سراج طبعا انا اكرر اسفي للسوا احمد لكن انت هم ما مقصر 

::والله استاذ انا كنت ابيتي وابنك وبتك همه الي اعتدو عليه وبس الجبان الي يسكت بهيج حاله 

كامل //حقك وهذا صاحبك اني راح ادز علي جماعه وياخذون من خاطره

::والله استاذ هذا شي راجعله 

- - هم صحيح ردت اعرف عنوانه اذا ممكن 

:: راح ادزلك رقم تلفونه واتفاهم ويا 

- - زين مشكور 

::العفو وانا هالايام اعتبرني مجاز وياريت بتك ترجعلي الجنسيه والشهاده بس ترجعهن سالمات مو امزقات 

كامل //ها شتگول ؟

::مثل ما سمعت والفلوس الي بالقاصه مؤخرها 

كامل ابرود //انا اشوف الموضوع وارجعلك خبرفيمان الله 

::الله وياك 

اجه يمي موفق وگلي //يعني سراج انت متعارك ويه اخو سجى ومتضاربين

ابتسمت من برود موفق وهم زين رضا ما چان موجود جاوبته :: بعد وكت موفق 

امي //ها خوش ومشگكه هدومك وماخذه اوراقك والله يستر من الجايات 

باوعت الها ابوي گلها //شنو امنه خايفه منهم 

امي //لا والله منير خايفه على هذا الي طلع الشيب براسه وما يعرف يتصرف

ابوي // كافي امنه سراج هو ابو التصرف (باوعلي ابوي وگال )رووح ابني وشتريد تسوي سوي انت مو زغير 

امي //. خو انت منير الي مطلع عينه من هو زغير 

ابتسمت :: عيني امونه لا تخافيين عليه ياالله انا رايح 

طلعت واتصلت برضا الي گلي //شني ظل بالي 

::خاب شبيك زغير

رضا //ههههه صرت تحچي مثلي 

::اگلك انطيت رقمك الكامل يريد ياخذ من خاطرك 

- - يولي اله اداوي واعرفه حجمه هو وهذا احميد 

كتله ::راح اجي يمك شكم يوم تستقبلني 

- -هله وميت هله يابعد بيتي 

::زين شويه وجايك

رحت للسوك وجبت شكم قطعة ملابس الي ورجعت يم رضا للبيت سولفنا انا ويا واتصل رقم برضا هو باوعلي 

عرفته كامل اتصل حتى ايبرد الموقف 

رضا جاوبه فتح السبيكر

الو 

مرحبا عمي رضا 

اهلا منو وياي 

انا ابو احمد 

ما اعرفك يااحمد هذا 

انا استاذ كامل قبل شويه ...

قاطعه رضا // هاا انت ابو الولد الي اجه واعتدى عليه ابيت سراج 

جر نفس // ايي ابو الشباب اتصلت واعرف باابني غلطان بس ما يراد تصير عصبي وگوامه وما اعرف شنو 

رضا // خلصت كلامك 

كامل //. رضا 

استاذ رضا

كامل // استاذ رضا احنه ان شاالله اخوان وشكد تريد ادفعلك بدون كعده او...

اهنا رضا قاطعه // اسمعني حجي هي كلمه لو اعثر واطيح اگول همه فلا تحاول غصبن ما عليكم 

تحولون وتفصلوني لو ماكو انشدو انا ياهو وتالي نحچي 

 وسد التلفون وانا حابس ضحكتي يباوعلي ويكلي //. ها شلونه خويك 

   رديت وانا مبتسم :: مثل ما كال كامل ابو الشباب 

لا سراج استاذ لايكه هوااي 

  :: ياالله خلي نطلع نتغدا 

 - - نتغدا اهنا وصيت يشوولنه سمچه

جابولنه السمچه وياها خبز حار وطرشي ومقبلات 

اتغدينا ورضا سووا چاي واحنا نشرب رضا سالني 

- - سراج شتتصور منو الگال السجى على روحتك للبصره 

::ماكو غيرها الكلبه افراح 

- - وشبساع افراح صاحبت سجى مو تگول ما شافتها اله ساعتين 

::مو هادي عده شغله يم عم سجى

- - لا باالله 

::والله 

- 0 چا بعد اخوك الله يساعد ناديه على الي راح تسوي بيها افريحه وهادي 

هزيت راسي وظليت صافن تالي گتله:: گوم بدل عدي شغله خلي نطلع

وراح رضا يبدل وانا خابرت كرم گتله يجيبلي رقم افراح من مرته من امه المهم يجيبلي رقمها 

دقايق ودزالي بمسج انا اتصلت 

هي ردت //الو 

::اشلونج ام ياسر 

افراح //هلا منو 

::هاي شنو ما تعرفين صوتي 

افراح //لا والله منو انت

::انا سراج 

افراح //هلا بيك اشلونك وشلون سجى 

::سجى انتي الي تعرفين باخبارها  

ها ..قاطعتها وگلت ::ام ياسر انا طلگت سجى وانتي السبب وهادي راح تروح علي الشغله الويا عمها ومن يعرف 

ما راح يرحمج 

افراح بنتر // انا شعليه شنو تريد تبليها براسي 

::لا عليج وانتي خابرتيها وگتيلها انا جاي للبصره مثل ما گتيلها على قصة ناديه

افراح //لا انت مفتهم غلط هي سالتني وانا جاوبتها وخابرتني وگتلها اجه ومر علينه 

::لا ام ياسر هي ما گالت هيج گالت انتي خابرتيها وكتيلها سراج يجي على مود بس يشوف ناديه وهواي كلام

 عيب ينگال انتي هدمتي بيتي وحطمتيني كله من وراج انا واخو مرتي تعاركنا او وصلنه للطلاك

افراح تبرر //لا لا سراج هاي سجى فد وحده چذابه هي تگول احس بسراج عده شي ويه ناديه وانا اگلها لا ماكو

هيج شي 

جاوبتها باستهزاء ::يمعوده غير انا شفتج انتي وياها شسويتي بناديه هي منين تدري بالسوالف هسه انا مايهمني 

المهم ضاعت الشغله على هادي وطلاگنا صار من وراج 

افراح //لا انا شعليه انت ومرتك

::مرتي لو ما سامعه منج ما چان تخبلت عليه على كل ام ياسر انا خابرتج اخاف الج نيه تزيدين وتنقصين يم هادي 

يم سجى تره انا سجلت صوتج وانتي بكيفج 

افراح //سراج تسجلي شنو انا اتبلى عليك 

::لا بس خاف هادي يزعل ويصير بخاطره خسر الصفقه ما يدري الخسرته الصفقه مرته 

ياالله ام ياسر فيمان الله

رضا كعد يسمع وهو يهز بيده ويضحك كتله //ياالله 

-وين 

::نروح نشوف سيد يطلك سجى 

ورحنا للسيد وانطيته وكاله ورجعت اتصلت بناديه لكن ما جاوبتني اتصلت مره ومرتين لكن ما ردت كتبت الها مسج 

ردي ناديه 

هي ردت عليه وكالت ......اكرهك سرااج

__________

ناديه وهي تسترجع الاحداث 

چنت راجعه الظهر فرحانه لان نجحت من صف الثاني للصف الثالث وحنين وياي نجحت من الاول للثاني لكن 

حنين ناجحه وبس وانا ناجحه الاولى من وصلنه حنين راحت تركض ودخلت للمحل وانا بقيت امشي ما حسيت اله

على دراجه مسرعه ودعمتني برجلي وعلى صفحتي بالبدايه صرخت حيل واحس يبس ريگي وانا اسمع رجال يكلي 

لاتخافين وبعدين صوت صريخ وناس وهوسه بعدها انغمى عليه وفتحت عيوني وانا اشوف بيبي وعمه زهراء 

وعمو كرم وياسر وافراح وبيبي بسيمه وانا بس اباوع بعيوني واحس بثگل برجلي واجه عمو هادي وهو يسأل 

- - منو دعمها ما عرفتوا 

وعرفت همه سوولي عمليه وخلو حديد برجلي وبقيت خمس تيام او اكثر بالمستشفى وانا ابچي لان رجلي توجعني 

واخذني عمو كرم هو وبيبي وزهراء الغير طبيب الي قرر هم يسويلي عمليه 

وسوولي وانا نفس الالم ما انام اله يضربوني ابره وانا اشوف جوارين بيبي منيره يجون ويجيبون العصير والنساتل

ومن يرحون يجي عمو هادي وهو يگول 

- - افراح خلي بطل عصير وقوطية جكليت واخذي الباقي لان بس تطلع اكيد راح الناس تجي 

تتحمد الها السلامه عاد هناك قدمي للناس

وطلعوني من المستشفى وكرم گال ياخذني للبيت حتى عمه زهراء ومرته اتداريني لكن هادي ما قبل 

واخذني البيته 

الطبيب گال لازم اشوفها بعد اسبوع چنت ما اگدر اتحرك وموجوعه ومن طلعت خلاني عمو هادي بالصاله 

على القنفه بحجة خاف ناس تجي تشوفها

 واافراح گالت //خلوها اهنا حتى يصير التواليت قريب عليها

زهراء صارت تجي الصبح ويمر عليها كرم بالليل ياخذها لان كانت تتحرج من نومتها بالصاله وبيبي منيره 

وحنين ينامن بالكاع يمي الصبح بيبي تگعد من الفجر وتسويلي حليب وتشربني انا اشرب شويه لان 

روحة الحمام صعبه على بيبي انتظر عمه زهراء تجي وتشيلني وتساعدني 

اما الاكل فافراح ما تطبخ ومن سالتها بيبي جميله ليش ما تطبخين 

تگلها //هادي يجي متغدي والجهال ما ياكلون اسويلهم لفات

فبيبي يوميه تنطي الياسر فلوس ويجيب غدا ومجرد ما يجي الغدا كلهم يلتمون وياكلونه لان زهراء وبيبي منيره

يلتهن بيه يوكلني وانا ما اكل لان متاذيه وموجوعه

اول يومين ابجي من الوجع وينطوني علاج وشويه اهدا وبعدين ارجع ابچي لكن ثالث يووم انتهيت وصرت اصرخ 

من كثر الالم حتى اگل البيبي جيبي سچينه وگطعيها الرجلي رااح اموت 

وانا اشوف بيبي تبچي عليه وهي تگل العمي هادي خلي نعرضها على غير طبيب لكن عمي يگلها 

- - عليمن نعرضها هو نفس الشي وهي تبچي من الجبس الي برجلها شنو بس مخاسير

وبيبي تتصل بعمو سراج وتلفونه مغلق وخابرت عمي كرم واجه بالليل وگال على اساس ياخذني البغداد لكن هادي 

صار يحچي وينتر ويگول // انا عندي شغل ما اگدر وانت ملتزم بوظيفه وكلها اطباء ونفس الشي 

واسمعه يگول البيبي //ما راح نخلص من بنات مياده يوميه مصيبه وطلابه

صرت اتمنى الموت من الوجع وبگلبي اعاتب سراج ليش ما ترد على بيبي 

واجه سراج وبنفس اليوم اخذني البغداد ومناك للاردن وانا اشوفه شلون مقهور عليه ومن وصلنه وعرضني 

على الاطباء واشوفه يشيلني ويبقى يمي بالمستشفى وبعدين طلعنه صار ياخذني يسوولي علاج طبيعي

ويبقى وياي ويشجعني وبعدها صرت اتحرك چنت فرحانه والدكتور بيومها گلي وهو اياشر على

سراج //هذا شيعود الك 

جاوبته //عمي 

الطبيب //اسمعي ناديه هذا عمك هو السبب بشفائج بعد الله لان لو ما هو كان انتي الان معوقه او رجلك مبتوره 

سراج بفرحه::لا دكتور الفضل ال الله انا ما سويت شي 

بيبي منيره وهي تبچي =صحيح لكن الله سببك الهليتيمه حتى تعالجها

كنت فرحانه وانا امشي على العكازه وبمرور الايام صرت امشي بدونها لكن احس بيها ثگيله كنت فرحانه وانا

 اسمع سراج يگلي انتي بالبدايه راح تعرجين شويه من رجلج انا ما اهتميت لان كان اهم شي عندي امشي 

وبعد ما يسوولي عمليه وراها اجه سراج وهو صار يعلمني شلون اخلي كرتونه بهالقياس داخل الحذاء تحت الكعب 

مالت رجلي وهو جابلي هواي منهن حتى اذا اتأكلت وحده اطلع غيرها واقتصر لبسي على ترانشوز الرياضي 

وحتى من عرفت انو انا بقيت بصفي انا بالبدايه ضجت لان احب المدرسه عكس حنين الي ما اهتمت بالعكس 

احس بيها فرحت لان هي بالاساس ما تحب المدرسه

ورجعنا وبقينا ابغداد فتره وراها رجعنا للبصره وبقى سراج دووم يجي ويروح ويسال علينه ويجيب النه هدايا 

وملابس ويطلعنه وبيبي ويانه خصوصا من ننجح

انا دائما انجح الاولى لكن حنين كلش ما تحب الدراسه من اطلع للساحه بالفرصه احاول ما امشي هواي لان

 مو هلگد اسيطر على رجلي رغم بيبي وعمه زهراء وبيبي نسيمه يگلولي انتي تمشين عدل ما مبين عليج اي شي 

لكن انا كنت انحرج ودووم اشوف المعلمات من يوگفن ويشوفني يظلن يحچن ابيناتهن وهنه يباعلي اعرف يحچن 

عليه وعلى قضية امي

من چنت زغيره وتتقرب مني معلمه وتصيحني وهي گاعده باخير رحله وتسالني عن الحادثه انا اسولف الها كل شي 

لان هي تگعدني يمها وبذاك الوكت الي تگعد بصف المعلمه وتسولف عليها هاي فد شي مهم 

اكثر المعلمات زينات وياي وانا بطبعي هادئه واسمع الكلام خصوصا الي توصيني بي بيبي منيره 

مرات يجن يمي طالبات ومرات يبتعدن عني لكن انا ما اهتم لان كل شي موجود عندي 

اختي وبيبي وعمه زهراء وعمو سراج وكرم

من نحل من المدرسه نرجع انا وحنين وندخل من باب الدكان نلگى بيبي منتظرتنه وتخلينه الغدا ومن صرت 

بصف الخامس بدت بيبي تعلمني اغسل ملابسي انا واختي وارتب غرفتي وصرت انظف البيت من ارجع من الدوام

 واشوف بيبي شلون فرحانه بينه

انا ما چنت انام بالليل ابد لان بس اخلي راسي ع المخده ترجعلي ذكرى حادثة بابا 

ساعات انعس ومجرد ما اغمض عيوني اشوف صورة بابا وسلدار يخنك بي وهو شلون يحاول يخلص نفسه 

وما يگدر 

وشلون بابا يرجفن ادي ويوكع انا راسا اطفر وساعات اصرخ وتبقى بيبي تقرا باذني ايات وتسمي وتمسح على 

راسي اهدا وابقى ما انام الفجر اكعد ويه بيبي اصلي وانام شويه قبل ما اروح للدوام والظهر وره ما اتغدا 

ما اقاوم النعاس عاد انام نوم عميق ما اگعد اله المغرب وساعات بالليل كلش

من صرت بصف الخامس اشوف بدت تصيير عندي تغييرات بجسمي وبيبي صارت تحرص علينه اكثر 

ودوم توصيني لا تطلعين اذا ما تلبسين كولون جوه الملابس وبالليل البسي بجامه حتى لو دشداشتح طويله 

وحتى لو بس احنه وتوصيني من نروح للمدرسه الزمي اختج من ايدها لان انتي الچبيره وانتي المسؤوله 

ديري بالج احد يحاجيج بالشارع وتردين علي 

لو تلتفتين لو تضحكين ولا تحچيين بصوت عالي

ومن تمرين وتشوفين ناس واكفه لو شباب امشي بسرعه وعينج بالگاع واذا چنتي تسولفين ويه اختج اگطعي 

السالفه على ما تعبرينهم وديري بالج من البنات الوكحات الي يغلطن ويفشرن (يسبن )

الفصل السادس والعشرون من هنا