رواية بنات الملا الفصل الخامس والعشرون بقلم رغد الموالي
أم حلا... عمچ لما شاف مرته لمهاب تنكتل بطريقة وحشية مااتحمل وهجم على مهاب وضاربو
ومهاب تخبل عليه وگله
مهاب... أنت تضربنيييييي، والله لاأقتلك اليوم والله
كلللللب عبالك ماأدري بينكم شكوووووو
... أنت مو رجال، لو رجال جان ماتمد إيدك على النسوان والجهال ياعار بيت الذيب
مهاب... اني عار بيت الذيب، والله اليوم لااشوفك منو العار
وتضاربو وصار الدم يخرج من وجوههم الاثنين
وصاح عليها عمچ على مرته لمهاب
كللها روحي
انهزميييي هذا حيقتلج.
هي تبجي وتلطم على وجهها كالتله ابوي هم يقتلني
وين اروح
ومهاب يصيح عليها والله الي طلعتي لاادفنج انتي وعايشة
وانت ياكلب تدخل بيني وبين مرتيييييييي
بيومها دزيت أنس على عمامج وهم بالشغل وكتلهم بلي دايصير واجوي يركضون
وفاككوهم
رحاب... انتو تخبلتووووو تتكاتلون بيناتكم
والتفت لااخوه... انت ليش تدخل بين رجال ومرته
... حيقتلها... أعوفه يقتلها؟
رحاب... أنت شنو كل يومين تلاثه حاطها لمرتك وكاتلها شنو انت بشر
مهاب... اني ومرتي محد يتدخل
رحاب... عاملها بما يرضي الله
مهاب... هي الي متخاف الله بيه... هاي الي كدامكم خانتني واني ساكتتتت اكول اخويه واذا حجيت لازم اقتل اخويه
رحاب... وكف بصدمة شنوووووو، خانتك؟ وي منو؟
مهاب.... خانتني وي هذا الكلب الي دافعلها
... يكذببب، هذا كذاااااااب
مهاب.... بينهم حب يابه واحد يحب الثاني بالخفية من تزوجتها ماكالت اني احب اخوك ولا هو حجه
تزوجتها ونظرات ثاري بينهم وحب مدفون واني ياغافل الك الله تردوني اعاملها مثل اي رحال لمرته
رحاب... صحيح هالكلام هذا؟
... مارد... ولا تكلم...
رحاب... جره من قميصه وتكلم... صحيح هالكلام هذا؟ احجييييييييييي
... بس ماخنته والله، وحق الله من يوم الي خطبها اعتبرتها اختي، ولان شفته ذبح نفسه عليها كلت هو يحبها وبنت عمنه فتنتنه خلتني احبها وخلته يحبها
وماردت يوكع دم وحقد دفنتها بگلبي وحقدت عليها
وماحجيت حتى لايصير شي
مهاب... وكلامك وياها بنص الليل
باوعله بصدمه اخوه متفاجأ كيف عرف؟
واكمل كلامه مهاب... وكفتكم بنص الليل عبالك ماشفتكم
ماسمعت عتبكم
رحاب بعصبيه.... ولك احجييييييييي
مهاب اني احجيلك.... مرتي بنص الليل طلعت من الغرفة
وتأخرت رحت أشوفها وين لكيتها هي واخويه واكفين واحد قريب على الثاني
وكانو يتكلمون...
... بس فهميني انتي شلون تقبلين بأخوية وتدرين اني أحبج
... جبروني... وانت ماحجيت لما هو نهى عليه ليش ماانت كتلهم احبها
اني بنيه مااكدر احجي واكول احبه لااخوه ابويه يقتلني
... وتتزوجي لااخويه، انتي كذابه وكعتينه ثنينه
... وكتاب الله لا، اني حبيتك انت اني مااحبه لمهاب
ولحد هسه احبك ومااحبه، وكلما يدخل الغرفة اتخيله انت
ردها بكف، وخزرها، إياج
ديربالج تعيديها مره ثانيه وتشيليني من بالج غير اخوة ماكو خلاص تحبيني حبيني مثل اخوج
اني هم تزوجت واحب زوجتي
... ايييي اشوفك على طول جايبلها هدايه وتطلعها وتونسها واني لا حسرة عليه اسمع كلمة حلوه من مهاب
حسرة عليه الكلمة الحلوه
حسرة عليه نطلع سوه
حسرة عليه كلشي حلو، وانت تحرك بگلبي تتعمد تنطيها الهدايا كدامي لو تكوللها امشي تحضري خل نطلع
تحركه لكلبي ليش
... أني نسيتج ومو يمج اني
... أنت كذاب، تكذب تتعمد تحجي حتى تحركه لگلبي
... اني حبيتج قبل اي، بس هسه وخصوصاً بعد ماسمعت كلامج هذا طلعتي من نفسي وانتهيتي
... لان حجيت الحقيقة
... هذه قذاره مو حقيقه، المره الي تشوف غير زوجها بغرفتها هاي وحده رخيصه ومتستاهل حتى تتخلى بيت
وتستاهلين الي دايسوي بيج مهاب
ضربته كف وتكلمت، انت جبان، ومتستاهل دمعه وحده نزلت عليك
مهاب... من سمعت هالكلام مااعرف شصار بيه وليش سكتت مثل واحد كلي اشششششش باوع للي ببطنها
جانت حامل وسكتت
سكتت مردت اخسر ابني واخوية
يمكن الي سكتني بوكتها كلام اخوية وشفته ما نطاها مجال سكتت مثل ماسكت
بس مانسيت مانسيت بقيت كل يوم اتذكرها
رحاب... مرتك ملازم تبقى بهالبيت تاخذها وتطلع
مهاب... بعد موضوعها هذا الي نعرف ينتهي كلشي وافضل حل هو الطلاك اني مااريدها بعد
ام حلا... ومن يومها ودوها لبيت اهلها ومهاب عزم على الطلاك وطولت سالفتها شهور ابوها ماقبل تتطلك بنته
وهي عدها جهال ثنين ويبجون يردون امهم ليل نهار يبجون على امهم
اجت بالليل وكعت على رجل مهاب كالتله ابوي يكتل بيه ليل نهار وجهالي حطك على شوفتهم
خليني خدامة الهم وروح انت تزوج وعيش حياتك
واني خلاص عوفني بس اربيهم
بوكتها رحاب تدخل وشفقو عليها وبقت لجهالها ونسدت السالفة
المواقف خلصت بس الجرح الي بل الگلب يبقه مايروح
للبيوت أسرار وفي كل بيت حكاية وحكايتنا مع درة لم تنتهي...
ام جواهر... دره حبيبتي ليش مترجعين لمدرستج
دره... يوم كبرت يامدرسه
ام جواهر... مسائي ادرسي منها يصيرون عندج صديقات من عمرج ومنها تسوين لنفسج مستقبل
دره... هااا لا يوم اني مقعده وماكدر
ام جواهر... بنتي دره اني اريدج تصيرين قويه ومتنكسرين الكرسي هذا لاتخلي يحسسج بالنقص
لاتخلي يدفنج بالحياة
انتي لازم توكفين على حيلج لاتسمحين لأحد يشوف نفسه عليج
اليوم اني اذا اريد أثبت للكل أني مو عاجزه لازم اا بين قوتي إذا تدفنين نفسج بالحياة بس لأن إنتي عاجزه عن المشي في الطريق فإنت تكونين داتظلمين نفسج
مكدرتي تمشين بالطريق على الارض بس تكدرين تمشين في طريق الحياة
في طريق الإنجاز
يايوم صح اني جاهله وماكملت دراسه بس والله اشوف الي صارو وودرسو ماشاء الله جمال وثقافه والكل تحترمها وجنطتها مليانه فلوس
انتي يمه ليش ماتصيرين مثلهم
احنه قبل اهلنه مايدخلونه مدارس واذا دخلناها بس نتعلم نقره ونكتب هاهيه بطلونه
يعلمونه نخبز يعلمونه نشتغل
جنت بنيه صغيره عمري 9 سنين اوكف اركب امي مره جبيره يادوبها توكف على تنور الطين تخبزلنه
عيله جبيره جهال هواي والخبز ينخبز يوم بيومه هاي توكف تدكها للنجانه وتشجر التنور مرتين
خطيه ماتلحك عاد اني وخواتي نشتغل نكنس نرتب اني اركب ويييييين عبالج طباخ هه
لا جدر على نار يم التنور امي تعلمني واني اركب
وهم نكعد نداريها للنار لما تصير المركه
ونثرد بالخبز الحار والله جان شطيب
نثرد ونلتم ونكعد ناكل هاي التمن احنه مانركبه بس الزناكيل يركبوه وهم مو يوميه نضم التمن من يجينه خطار نركب منه
حياتنه جانت تقتصر على هالشي يعني منفكر نطلع
منفكر نشتغل
وحدتنه يصير عمرها 12 13 سنه تفكر تتزوج ورجال يصرف عليها
اتذكر جيرانه جانو ناس حيل الله مفضل عليهم
حتى بيتهم جان بي كهرباء مو مثلنه لاله وفانوس
وبنتهم هالوحده ومدلليها دلال
يعني عدهم تلفزيون تتفرج عليه وهي طالبه تدرس جانت واحنه نروح عدهم صديقاتها امها خطيه تفرح من تشوفنه اجينه يم بنتها
تجيبلنه اكل يخبل وطيب وتكول اكلو بلكت بنتي على الواهس تاكل وياكم ماعدها احد وياها ياكل ومتاكل واحنه جهال نفرح
مرات الدنيا حاره نروح يمها شويه على البنكه وبيتهم تبليط نمدد على الكاع البارده مال الهواء احنه كاعنه جانت طين ومفروشه حصير والكاع حاره تچوي بينه
بنت جيرانه تدرس وتحجيلنه قصص تقراها بالكتب وتحجيلنه اشياء حلوه بالاسلاميه وكلشي تعرف احنه مانعرفها نبقه صافنين شلون حلو كلامها
جان يعجبني اصير مثلها بس هي وين واني وين
اني اهلي مخلفين 10 هي هالوحده
ابوها يشتغل ويصرف ابويه رجال فلاح وعلى كده
بيتهم حديث بيتنه قديم
يابنتي الأهل الهم دور جبير
يعني اهلي عن اهلها فرق جبير
هسه هي صارت دكتوره ومازال حالها افضل من حالي الله يوفقها واللهم لاحسد لكن القصد ان هي مشت صح واختارت صح وتزوجت زواج موفق
هي يابنتي تبدي من البدايه تعبت على نفسها وحصدت
فاانت لازم تزرعين حتى تحصدين
تدرين لمن تحصدين شكد راح تفتخرين امام نفسج
شكد راح ناس يتمنون انهم يكونون قريبين منج او يعرفوج
شكد ناس اذتج او كسرتج راح تموت بقهرها
القرار يبدي منج انتي بإيدج تغيرين نفسج
بإيدج تصعدين فوك بعيون الناس
وبإيدج تنزلين جوه بعيونهم
بيإيدج تخليهم يتحسرون عليج
وبإيدج تخليهم ميتندمون عليج
فكري بكلامي زين
وقرري
كانت تستمع بإصغاء مفرط
الانسان في مرحلة الضياع يحتاج من يفهمه ويربت على كتفه ويوجهها للصح
مهما بلغ الانسان من وعي لابد ان يأتي ذلك الالم او المشكلة التي تجعل منه ضعيفا وتائها لايعرف كيف يفكر ويقرر ويواجه !
الانكسار أصعب ألم يمر على الإنسان
هو انكسار في الروح فقدان الشغف
سرقة الضحكه وكثرة الصمت والدموع
ونتيجتها لعنة الوعي!
كانت كلمات الام على ابنتها مثل ضماد لجروح قد خلفها ذلك العاشق الكاذب وخلدتها تلك السنين العجاف التي أكلت قدم تلك الجميلة فأقعدتها عن مواصلة الحياة
وكأنها كانت في كابوس والليل طويل لم تستيقظ بعد
حتى جائتها الشمس فنزلت بأشعتها على عينيها المغمضتين فأيقضتها من سباتها!
انا على يقين تام بأن الالم لايمر بسلام على الانسان
إنه يترك درس لن يُنسى
إنه يجعل من الانسان إنسان أخر يولد من جديد
لقد كان الالم لدره ظاهره عذاب وباطنه رحمة
شرود الذهن اصبح رفيقاً لدره فهي للحضات وكأنها غطت في حلم على إفاقة
وترى نفسها ذات مكانة مرموقة في المجتمع
ويتحدث عنها الجميع وكأنها محور الكون
بل عقلها أصبح يصور لها أشياء اخرى
مثلا تشغل منصب راقي في المجتمع
ترى نفسها ناجحه وقوية وقد انتقمت من رائد بنجاحها
فزوجة رائد ستصبح اماً وستلد الكثير من الاطفال ستنشغل في تربيتهم ومتطلباتهم وستطلب الكثير من رائد وسيحتار رائد في جمع الاموال لشراء منزل
لهم سيضطر الى استلاف الاموال او ينتظر سنوات طويله لجمع الاموال ستكون حياته تقليديه
كأمه أو أبيه ستحدث بينهم المشاكل تارة بسبب الأطفال وتارة بسبب متطلبات الحياة
سيذهب جمال زوجته وستتغير طبيعة جسدها
سيراني او ربما سيسمع أخباري سيعرف حينها
أن إعاقتي لن تكن حاجز امام ماأستحق
أنا أيضا انسان وأستطيع فعل كل شيء
سأتجه لعملي وجمع الاموال سأنفق من اموالي على
منتجات للعناية ببشرتي او شعري وسأكون انيقة على الدوام
حينها سأقف امام المرآة واقول
لماذا يافتاة أحببت ذلك الفاشل الأحمق
سأتندم على حبك وهذا وعد!
الايام تتوالى وآزر رجع بعد غيابه لفترة
دخل بيت شيخ ذياب والشر كان واضح بعيونه
كان ماكو بالبيت غير آنس والنسوان
تكلم اول ماشاف ام حلا بنبره فيها نوع من التكبر... عمه
شسويتو على الموضوع الي كتلكم عليه
ام حلا... انساه آزر عمامك ميقبلون
آزر ... ومن شوكت امشي بشورهم حتى امشي بشورهم اليوم اني مو بلغتكم ترحون تخطبولياها
ام حلا... منخطبها ماعلينه احنه
تقرب وخزرها بعيونه ورجع ضيقها وتكلم بنفس النبره... مشيتو بأمر هذا الكلب مهاب مو
ماشي عمه
يصير خير
ام حلا... ولك ابني ارجع للبيت الي ربيت بي ارجع وي عمامك واشتغل وساعتها اني ازوجك احسن بنيه
ولك يمه وين داتروح وين عايش شلون لشوكت تبقه هيج
آزر... اني حسافر كلها فتره صغيره واروح بعد مالي رجعه هنا ردتج تخطبيلياها وازوجها واطلع بيها للخارج كبل وانتي تمشين برأي هذا الكلب
لشوكت تبقون تمشون وراه وخايفين منه
شو هاي شوفة عينج
كتل عمتي
ودمرني
ودمر مرته
واحد واحد دايصفي بينه وانتو تمشون وراه وخايفييييين
ام حلا... وشبدينه
آزر... بصوت.... بيدكم
كلشي بيديكم بس انتو غنم
تخافوووووووون
كان يتكلم وبي رجفه واضحه وتعبان حيل
ام حلا.... شبيك انت اشو وضعك مو طبيعي شبيك
آزر... مابيه شي
وهاي ماس اذا متخطبولياها اخذها من اهلها بليله سوده واسافر وعود كملو ثاراتكم وياهم
طلع وطبك الباب بقوة ومشى بسيارته
وهو يمشي صادفها توقف ونزل
جان تعبان اكثر من ماكان بيت جده
آزر... ش
شلونج ماس
ماس... مشفتك جيت خطبت
آزر... كان يقطع بالكلام
هذوله الجلاب ميقبلون يجون يخطبوج الي ماعندي احد يجي يخطبج
ماس... قنع اهلك وعود تعال باي
آزر... اوكفي اوكفي
ماس... نعم
آزر... هاي
هاي اشتريتلج موبايل اخذي
ماكدر اجي هنا بعد عندي شغل
واريد اعرف شدايصير
يعني
علمود
الخطوبه
ماس... انت شبيك شو وضعك مو طبيعي
آزر... هسه دخذي ما
مااكدر
ابقه بعد
حروح
نطاها الموبايل وصعد بسيارته وراح
وهي شافته موبايل راقي اخر اصدار الفرحه ماوسعتها
ضمته بجنطتها وكتمت ابتسامتها وكملت مشيتها
طول الطريق مشاعر مضطربه لكن كانت مثل الي حصدت جائزه
دخلت للبيت على هدوء ماكان احد موجود بالغرفه
طلعت الموبايل من الجنطه وفتحته كان رقمه موجود فقط
طفت الموبايل وخلته بين الملابس الي بكنتورها
كانت مشاعر خوف مسيطره لما دخلت بالموبايل للبيت
شلون لو اهلي سألو منين هذا
شلون لو عرفو عندي موبايل
ابويه شيسكته
لا
لازم اضمه وماخلي احد يعرف حتى ياقوت
صدك ياقوت وين
ياقوت كانت تنزل الدرج بحذر
شافتها ماس
هاي شنو وين جنتي
تفززت.... ها
ها
هاي جنت داغير جو فوك
ماس... كثرانه تغيير الجو عندج ياقوت خانم صايره رجليج متعرف غير الدرج
ياقوت... شتقصدين
ماس... هه انتي اعرف
عافتها ومشت
الارتباك كان واضح على ياقوت
واخذت تكلم نفسها
(( كل شويه اصعد فوك بس علمود أشوفه مره وحده تشاوفنه وبعدها مدانتلاكه...
راح ابقه كل شويه اصعد واخلي يحددلي وقت يجي وأشوفه
هاي ماس بدت تشك بيه وهسه تسويلي مشكله))
تمشت بخطوات بطيئه بسبب تفكيرها المفرط بلي شغل بالها
دخلت للمطبخ كانت زمرد تسولف وي امها
زمرد... رجعتله خبر وكتله احنه ماعدنه مشكله مو هذا الاسبوع على الي وراه العرس
بسعاد... الله يهنيج بنيتي ويسعدج ربي
زمرد... يمه شو من تحدد موعد العرس صارت عندي خوفه وتردد
بسعاد... طبيعي هالشي كل البنات تحس بهذا الاحساس بداية زواجها سيد احمد شاب خلوق ومتدين وزينة الشبان وحيل مأمنه عليج يمه
زمرد... الحمد لله
ياقوت... لو ماافوت بالصدفه ماادري بموعد العرس
زمرد... هستونه ثبتنه
ياقوت... الف مبروك حبيبي تتهنين ان شاء الله
زمرد... تسلمين يوم الالج ان شاء الله
ياقوت... بخجل... بعد وكتها
كانت الفرحه واضحه على وجه زمرد مامصدكه الي داتعيشها
بلغت خواتها حتى يبدون يجهزون نفسهم من هسه
لليل وقت ما الكل راح لفراشه يرتاح صوت صفير صار بالمنطقه
للحضة ياقوت حست ان هذا آسر وراحت بسرعتها للسطح تتأكد من احساسها
فزت من سريرها بحذر وتتمشى على رؤووس اصابعها
فتحت الباب بهدوء مفرط وطلعت
واكملت مشيتها ايضا على رؤووس اصابعها وتتلفت يمين ويسار وقلبها يكاد يطلع من شدة الخوف والقلق
اصوات نبضات القلب كادت ان تسمع
صعدت للدرج بايه بايه بحذر
ووصلت للغرفه ودخلت وفتحت الشباك وكان احساسها حقيقي
وكفت يم الشباك كان كاعد كبال الشباك ولما شافها ابتسم وهي ابتسمت
همس شلونج
... زينه اني
لا تصوفر بعد يروح احد ينتبه
... وشلون اخليج تعرفين
... مااعرف
... اني راح اجي هنا كل جمعه وثلاثاء بنفس هذا التوقيت
.... ماشي
... ياقوت
... ها
... دااجمع واشتري بيت اريد اجي اخطبج من ابوج ادعي كون يقبل
... ابتسمت بخجل
حروح اني
... محتاجه شي
... هزت براسها لا وابتسمت ابتسامه اخيره وراحت
... نزلت بهدوء فتحت الباب لكت ماس تتصل ومباشرة سدت الخط بخوف
عقدت حاجبها بإستغراب وعييونها صارت على الموبايل الي ضمته بإيدها ماس
هاي شنو
ماس... تحجين
احجي
ياقوت... شتقصدين
ماس... يعني البيك الي جان كاعدلچ جوه الشباك اكول عليه وانتي ساعتها تعرفين ابويه شراح يسوي
فخلينه ستر وغطى على بعظنه شتكليييييين
ياقوت... منيلج الموبايل
ماس... اشترالياه ازر
ياقوت... وشنو ناوي؟
ماس... يخطبني بس اهله الچلاب ميقبلون يجون يخطبوني
ياقوت... تره آزر محد يعرف عنه شي
ماس... مو مهم المهم احبه ويحبني وحنزوج
ياقوت... ماس اني عني مراح احجي وانتي لاتحجين لااهلي هم
اني واسر نحب بعضنه وهو والله دايجمع فلوس حتى يشتريلي بيت ويتزوجني
ماس.... هههههههه والله ضحكتيني يجمع فلوس؟ لج بابا هذا يرادلها صبر ايوب يعني سنين
ياقوت... مو ابويه ميزوجه عدهم
ماس... وليش عدهم خو يأجرلج بيت ويجمع فلوس اثاث على الاقل غرفة نوم وغراض مطبخ ومهرچ
وبعدين انتي تتزوجي وهو وضعه مو هلكد ماعنده غير دراجته يروح ويجي عليها
ياقوت... بس جده عافلهم هواي املاك وهو شغله خير من الله بس مجان مخلي بباله بيت وحد ومن شاف اكو امل قرر ان يجمع ويخطبني
ماس... والله انتي فقيره ومسكينه لج ماما انتي متزوجه يامتزوجه اخذيلج واحد عنده سياره عنده بيت ملك يسفرچ يطلعچ
آسر بداية الطريق
ياقوت... بس يحبني وهو بعده بأول شبابه يعني يكدر يشتغل ويكون اموال ويصير رجل غني التجاره حلوه ومربحه وهو استاذ بالمهنه مالته وكلها معتمده عليه
ماس... انتي حابته وواكعه
ياقوت... اي اني حبيته
وانتي شنو عن آزر
ماس... هم حابته بس لو يجيني احسن منه ماتردد واوافق بس على الاقل عصفور في الكف افضل من عشره على الشجره
ياقوت... لاتطوخين علاقتج بي
لاتخافين عليه خافي على نفسج لاابوج يحس على الصوفر مالته ويسويلج مصيبه
شوفي آزر شلون ذكي شغله من جوه لجوه موبايل ومحد يدري
ياقوت.. بس هذا الموبايل شكله حلو وغالي
ماس .. ابتسمت بانتصار... لعد اني على سواد عيونه نطيته مجال الرجال اهم شي جيبه والمره جمالها
الليل يحمل احداث كثيره ويولد مواقف تتخلد بالذاكره
مثل ماولد الموقف الي بقه بذهن آسر بعد ماشاف ياقوت رجع يتمشى والابتسامه تتوسط وجها وهو رايح بعالم اخر ومو وي الناس
يتمشى ويدندن كلمات ودخل للبيت صوت اقدامه تسمع من فرط الهدوء
فتح باب الغرفه ودخل تمشى بخطوات قليله ورمى نفسه على سريره خله عكس ايده جوه راسه وصار يفكر بيها وعيونه تنظر للسقف
يتخايلها وهي عروسته والناس وراهم تصفكلهم وتطشلهم چكليت
ليل يروح وليل يجي والايام تتوالى قرب عرس زمرد والاهل ملتهين بتجهيزات العرس
كل يوم بسعاد وزمرد وام العريس يروحون للسوك يجهزون ملابس العرس واحتياجات للعرسان
العرس يحتاج تجهيزات كثيره ومو مال تخلص بيوم او يومين
بسعاد... زمرد هذا الكوستم حلو اخذي
زمرد... لا يوم اشو كوستم
بسعاد... يوم انتي عروس وكل العرايس تلبس كوستم وتجهز بجهازها
زمرد... بس اني مااحبه
ام احمد... لا زمرد لازم تاخذين هيج موديل الناس شتكول علينه ممشترين لعروستهم قطعه ثكيله
زمرد... الي تشوفوه هاهيه
ام احمد... اي خل تاخذ كوستم وراها نروح ناخذلها ربطات وشحاطات
بسعاد... اي صحيح وبعد ناخذلها زواكه
زمرد... زواكه شنو يوم مكياج عيب تكلين لاابو المحل زواكه
بسعاد... والله هالجيل حيخبلنه دمشي امشي
راحو بعدها لمحل الربطات وهم اخذو على ذوق ام احمد وبسعاد وبعدها راحو للكوزمتك
بسعاد... عيني اكلك شعندك زواكه مال عرايس طلعها دنشوف
البائع... شنو رايده العروس بالضبط يعني شنو نوع المكياج الكحل الحمر
همست بسعاد لزمرد وسألتها وزمرد ماكانت تعرف غير مكياج سمر كيك
بسعاد بهمس... ولج شنو هذا السمر كيك شنو طابين لاابو غذائيه احنه
زمرد... يوم البنات يخلون منه وعاجبني يطلعني بيضه ثلج
بسعاد... سمر كيك ابني
البائع... تدللين بس خل تجي العروس هي تتقرب وتختار ليش راجعه ليوره خل تشوف شيعجبها
تقدمت زمرد وباوعت لاارجاء المحل كان منوع اشكال من مساحيق التجميل احتارت شنو تشتري
والبائع نصحها بكم قطعه لان شافها متعرف
اشترو التجهيزات ورجعو
وثاني يوم الصبح راحت ام جواهر للسوك ايضا واشترت شمعة العرس حتى يجلون العروسه
وقبل الحنه بيوم راحت اجرت البدلات
كانت البدله زهرية اللون عليها حبات من الكرستال مخصره من الاعلى منفوشه من الاسفل
شعرها المصبوغ باللون الاصفر وجمالها اضافلها جمال اخر
شعور متضاربه تراود زمرد قلق على خوف وتوتر
بيوم الحنه كانت كلش فرحانه والناس فرحانه بعرسها
اغاني واجواء صاخبه احتفالا بهذا العرس
وفي النهايه ليوم الحنه حنوها ووكفوها حتى يجلوها
وكفت وحده من المعازيم ممن تتقن انشودة جلوة العروس المتعارفه من احدى العادات العراقيه بالعرس
ان تقف العروس ويعلكولها شمعه كبيره وتمسكها امرأءه تنشد انشوده ختاميه للعروس وهي في بيت ابوها بكلمات تلامس مشاعر العروس اولا ثم الاهل
(تبتدأ ب ياحسنيها من ليلة جليات بيها.... الى نهاية الانشوده)
ماس وهي تباوع لااختها تخيلت وكأنها هي او يوم الي هي تتزوج وتكون عروس لاآزر
كانت تنظر الها بإبتسامه
دره كانت تارة تكون موجودة وتاره تختفي
احساس الانكسار الي مرافق دره صعب تتخطاه
خصوصا وهي اكبر من زمرد والمفروض هي متزوجه قبلها
وهي منفرده بغرفتها وتبجي اجت جواهر
جواهر.. شبيج دره ليش تبچين
دره... لا هيج على زمرد راح اشتاقلها
جواهر... لو جانت على زمرد جان دموعج ماخجلتي منها وانفردتي احنه هم بچينه على زمرد
احجيلي
دره... مابيه جواهر مابيه
جواهر... رائد مو
انفجرت بالدموع دره وواحتضنتها جواهر واخذت تربت عليها بحب
يادره لشوكت تبقين اسيرة هاي المشاعر وتفتقديه هو تزوج والله اعلم ماابنه بالطريق وانتي هنا تبچين عليه
دره... مو بديه
والله حبيته جواهر مو بيديه
كانت تتكلم ودموع تنهمر مثل شلال والغصه واضحه بنبرة صوتها
عشت وياه اجمل احساس صعدني فوك
فوك بين الغيم وبليله ويوم رماني وسواني حطام
اني ماأذيته بشي
والله ماسويتله شي
جواهر.... حسبي الله ونعم الوكيل
الله ينتقم منك رائد
كومي دره كومي وامسحي دموعج
الناس بره شيكلون علينه عود
دره... هسه اجي
ماس... جواهر جواهر.... تعالي هاشم اجه يريدج
جواهر... اي اجيت شعجب جاي بهل الليل
طلعت تتمشى واول ماشافته بره بالكراج الخارجي للبيت كان واقف مع اطفاله يبوسهم
هلو هاشم اشوفك هنا
هاشم... اي والله اجيت اشوفكم
جواهر... باستغراب... تشوفنه ههههه بعدني مابتت
هاشم... كاعد وحدي حسيت بخنكه وضيقت صدر قويه واشتاقيتلكم فجأه هواي كلت اروح اشوفكم هسه ارتاح
جواهر... عمري هاشم حبيبي
انت هيج تتكلم بس لان ممتعود تشوفنه نبات بره البيت
هاشم... اي يمكن هيج
وانت شطالع ياگمر تخبل
جواهر... هههههه يعني احلى من يوم زواجنه
هاشم... بكل وقتك حلو
جبتلهم نساتل للجهال
جواهر... اشكال اكلو اليوم ليش مكلف نفسك
هاشم... اذا للجهال مااجيب المن اجيب لعد
جواهر... حبيبي هاشم تعيش وتجيبلنه يعمري انت
هاشم... يلا راح اروح اني ديربالج على الجهال تره كل شويه يطلعون بره والدنيا ليل خاف يصير عليهم شي
جواهر... لا لتخاف عليهم روح نام واطمن ولاتقلق اكو دعاء التاج يم راسي جوه المخده خلي جوه مخدتك ونام
هاشم... ماشي حبيبي اروح اني ثيمالا
جواهر... الله وياك حبيبي
في صباح اليوم التالي كانت زفة زمرد
الاجواء كانت عراقيه بحته الاقرباء كلها ملتمه
وصوت الاغاني والهلاهل
للعصر جابو العروس من الصالون
كانت تلبس بدله بيضاء منفوشه وطرحه طويله
ميك اب جميل بأحمر شفاه واضح كانت سعيده
والفرحه ماواسعتها
شعور البنت بهذه اللحضات تكون متناقضه
مابين فرحتها بحياتها الجديده ومابين حزنها على فراق اهلها
عبد المجيب الي عنده اغلى شي بالدنيا بناته
كان واقف ينتظر الزفه يجون وياخذها عريسها
لو نتوقف قليلا وندرك لعبة الحياة
نعرف ان الحياة عباره عن حلقة وصل
ناس توصل ناس رساله ومن انسان لاانسان
هذه الرساله هي غريزه بشريه
لازم كل انسان يكتبها ويوصلها
اول ماينشأ ويبدي يكبر يحس نفسه هو محور الكون
وان هو بمجرد عرف يمشي ويتكلم ويصاحب اولاد المنطقه معناها هو صار اله دور مهم بالدنيا ليس فقط المجتمع هو قادر على ان يمتلك قوة خارقه ماموجوده عند احد من البشريه او ربما اذا هو حزن فالناس كلها الي موجوده حتكون حزينه كذلك مع الفرح اذا كان سعيد وفرحان فالبشر لازم يفرحون لفرحه او وياه
لما يبدي يكبر اكثر حيدرك ان اهم شي بالحياة هو المشاعر والاحاسيس والحب في هذه المرحله الانسان يمر بفتره تسمى المراهقه اي يكون طايش مايعرف غير نفسه وشنو تطلب
يكون قوي شديد البنيه قليل التفكير كثير الفعل مستبد الرأي
لما يتعثر ويصدم بالحياة حيبدي يكون اناني ويقارن نفسه مع الاخرين ان هو افضل ان هو تحمل معاناة وتحمل اهات وهو احق بالمكافأه في هذه الحياة
حيبدي يتولد الطبيعه المدنيه وهي ان يحلم ويتمنى يصل او يحقق هذا الحلم فيقنع نفسه ان بمجرد مثلا يكمل دراسته ويتعين ويحصل على وظيفه خلاص راح يكتفي وراح يكدر بمرتبه يحقق احلامه بيت وسياره وزوجه
بمجرد ان توضف يكتشف ان هو يداوم يوميه ولساعات طويله والمرتب قليل وماحقق الي يريده فيبدي يفكر بشغله اخرى اضافة دخل مع الوظيفه بعد ما يشتغل شغلتين يجد نفسه مرهق وماعتده وقت ان يعيش حياته هنا يقرر يتزوج املا منه ان في نهاية النهار يجد زوجه تزيح عنه التعب
لكن ما ان يتزوج حتى تبدي المسؤوليات ومشاكل الحياة والاطفال ومتطالباتهم
يتعب من المسؤوليات ومن تذمر الزوجه كل يوم وطلبات العائله فيلتجأ الى اقامة علاقات غير شرعيه املا منه ان يحصل على السعاده لكن يجد نفسه ان ينفق امواله على عاىلته من جهه ومن يقيم علاقاته معهم من جهة اخرى يصبح مثكلا بالهموم والحياة يتقدم بالعمر ويكبر الابناء ويقف كوقفة عبد المجيب ينتظر زفة ابنته
او ابنه وهو يتذكر مقتطفات مما مر في حياته واولها زواجه وكيف تم
عبد الودود... مو عبالك تأخرو خويه
عبد المجيب... ننتظر بعدها ماغربت الشمس عاليه
عبد الودود... مر على الوقت ربع ساعه
عبد المجيب... ميخ......
بعده ماكملها للكلمه وصوت انفجار قوي وقريب اخترق سمع الجميع والخوف دب بقلوب الكل
الشضايا تطشرت بكل مكان كان قريب على الانفجار والدخان ارتفع للسماء يستغيث ويشكي لله على ارواح قد حلقت ودماء قد سفحت.....
شكرا لزيارتكم عالم روايات سكيرهوم
