رواية بنات سهر الفصل السادس والعشرون بقلم فراقد حسن علي
أبجي بس بلا دمع 🥺
بلايه صوت الينسمع !
والله شده ،،
أشلون اطلع من صفنتي ؟
داخ راسي :
من البجي الماينسمع
=========/==========
((نفس اتفاقنه مو 😁 ماألحك اراجع الحلقه
ولو اعرف نتفق على ان لا نتفق 💪))
أساور/ السلام عليكم ورحمة الله وبركاته
بعدكم تذكروني مو ؟؟
بعد انتم تعرفون سكنت بيت عمو حاتم
والحمد لله هوايه مرتاحه يمهم
ابد ما حسيت نفسي ثقيله عليهم
بيداء اختي الثالثه الكبيره مو مرت عمي
هوايه تعلمت منها شغلات ، وهوايه نصحتني
وعمو حاتم مدللني وحاسبني حالي من حال جهاله
عمو حاتم ابد مااشوفه بالبيت سكران
لو تصرفاته مو حلوة ،
بالعكس كله يضحك ويشاقه
بس بيداء مااعرف شلون تعرفه
تكول عليه / أجى منسم
وابد ما شفته لو سمعته يخابر
أشوفه رجال طبيعي
أب وزوج مثالي مثل ما يكولون
مازن يستغل التحاق عمو حاتم للعسكريه
ويجي يشوفني ،
وبيداء عدها علم بكل جياته
حتى بليل من يفلت من دوامه ويجيني
بيداء عرفت بالموضوع عن طريق صدفة
مازن جان يمي وبعد ما خلصنا لعب الطوبه
راح للحمام يسبح ،
هي فازة بليل وتكول/حسيت اكو طكطه مو طبيعه
وصعدتلي فوك . من دخلت عليه للغرفة
وشافتني بهدوم خفيفه هو مازن جابهن اليه
بالبدايه خافت بس من كتلها مازن يمي
وبالحمام يسبح بقت تباوعلي بنظرة ما عرفتها
كالتلي / بعدج بنيه لو طك السد ؟؟
كتلها / لا والله بعدني بنيه ،
وغير الشغلات الكتلج عيلهن ما نجاوز الحدود
كالتلي / انا حذرتج وطلعت من خطيتج
لا تأمنين زايد لا تنغدرين
هنا مازن دخل علينا للغرفة
والظاهر سمع كلامها كاللها / افااا عليج ام جواد
مو أنا الاغدر بمرتي ، وبراس الشهر انعرس
ما غلطان وياها بشي
واخاف عليها اكثر من مااخاف على روحي
غلطتي الوحيدة ادخل للبيت بدون علم حاتم
وهذا الشي ندمان عليه ، بس وروح اعزاز قلبي
بوجودج وبوجودها انا بنفسي ابلغ حاتم بدخلتي البيته
واكله بعد مريتي ملفوفه بحظني
وهذا شي حلال الله وحقها وحقي
انا لو ماالبناء من زمان عرست
بس اريد استقل بسكن لوحدي يلا اعرس
وان شاء الله ما ظل شي لراس الشهر
ومن هاي الليله بعد ماادخل البيت اخوي بغيابه
والكدامج مرتي وعلى سنه الله ورسوله
وأطهر وانظف وابيض من الشرف نفسه
من باجر اريد اتعبج ادزلج فلوس
جهزيها للعرس ، والبيت انا اجهزة
هو يحجي وكلش ضايج ، عرفته انحرج
وهم ضاج من كلمة بيداء من كالت تنغدرين
مازن واني أعرفه وهمه هم يعرفونه شهم ورجال
ما يغدر بعدوه مو عاد يغدر بيه
بيداء كعدت يمي وافتهمت من عندي
شنو طبيعه التقارب اليصير بيناتنه
كالت / الملامسة السطحية ماتخوف
حتى لو البخت راد يسويها ويه غيرج وتحبل
أنتي ما تحبلين لان هو نسبته ضعيفه
والحمل بحالتكم من سابع المستحيلات
بس التقارب ال....... حرام اذا مو بموافقة المراة
اذا انتي موافقه يكولون مكروهه حتى مو حلال
واذا ما موافقه حرام ، وبي اضرار صحيه
كتلها / اي اعرف هذني الشغلات كلهن
وهو شرحلي كلشي بالتفصيل
ويعرف الأضرار الصحيه فما يكمل كلشي
من نتقارب يخاف عليه،
واني مااجذب عليج هوايه احب قربه
وهو اسلوبه كلش حلو ويايه
بيدة احس روحي صحراء جافه وهو المي العذب اليرويني
هي ضحكت وكالت / مو كتلج كبل
انتي سجين وطلقوا سراحة ،
بس الصدك وبدون زعل
انتم كلكم هاي العايله واحدكم فلفل حار
جيناتكم الفراشيه متوارثه تموتون على الفراش
تف على هيج عايله منحرفه
كرصتها من زندها وكتلها/ هسه انتي عساس فقيره
لو ما تلدغين عمو حاتم من العض
ومن ينزل لحد ما يلتحق مااشوف شعرج يابس
دوم اشوفج ناكعة
كالت / يا خايبه غير كون هو راضي
كل هذا ما يشبعه اذا ما يروح للخايسات
يحس بروحة نقص مدمن نسوان
الله لا يشوفج ضيمي
صدك من يومها
مازن بعد ما وصل لبيت عمو حاتم
وبيوم خابرني كالي /عندج صور مال معاملة
كتله/ لا
كال / حضري روحج هس امرلج
كلت البيداء على سالفه مال صور
كالت / اكيد علمود عقد المحكمة
وصدك اجى اخذني مازن للمصور وطريق كله ينافخ
كتله /شبيك
كالي / طارق البارحه خابرني حاتم شايل بخاطرة مني.
ولحد ما صورت ورجعت للبيت هو بس ينافخ
من وصلني نزل ويايه
وبكل ثقه كعد وحجة ويه عمو حاتم
لا نكرني ولا نكر جيته عليه
عمو حاتم بقى ساكت وكاله / باجر تعقد محمكة
وتسوي حفلة عقد اريد العالم كلها تعرف انت داخل لبيتي علمود مرتك
وصدك عقدنا محكمة
الحمد لله صرت مرت مازن شرعا وقانونا
بس عمو حاتم وجه كلش ثكيل على مازن
ومازن بقى ياكل بروحه
كاله / وره حفلة العقد بااسبوع اعرس
حتى لو بيتي ما كامل( يعني قرب موعد عرسنا )
وكال/ حتى لو حيدر ما قبل يعرس مالي دخل بي
بيداء ومسرة لمى ما قصرن
هوايه تعبن ويايه ،
من فرة الصواغ علمود مشتراة الذهب
و فرة شرايه الفستان المحتشم للحفله
و روحت الصالون علمود مكياج الحفله
وتجهيز ضيافة الحفلة من عصاير وكيك
ومن تنظيف وترتيب البيت علمود جية الخطار
وكل هذني الشغلات صارن بوقت قياسي
شغله يومين ركض بركض
لبست فستان محتشم عريض واردان
وحجاب ،،ومكياج خفيف ،
ومازن ما راضي تصركع
يكلي /شكو هلكد مخليه مكياج
ليش فستانج مفصل جسمج
بقى يدور حجج ما رضى
الشغله الرتاحيت الها ، خواته مادخلن
شهلاء الهجمت حياة لمى وحيدر بقت بعيده
حالها حال الخطار الغربه
بس وفاء لا شويه جاملت بالفرح
من صفكات وهلاهل ومكيفه وفرحانه الأخوها
اني اعرف بيهن ما يردني
لان بابا قاتل اخوهن
بس بعد ما يكدرن يسون شي لان قرروا العمام
اصير من قسمة مازن
من لبسني مازن ذهبي بين خبصه النسوان وهوستهن
كلش استحي وارتبك ،
وشكد متعلمة عليه وهو متعلم عليه ،
ايده كامت ترجف من الخجل والارتباك
وروجة العرك وحدة تاخذة وحدة تجيبه
كلت بروحي /الف الحمد لله من رجلي خلوق
ويستحرم ، الرجال اليعرف حقوق عبادة الله
يعرف حقوق مرته عليه
بيداء وخواتها وامها من حضرن بالحفلة
شكد فرحن اليه والخواتي،
خطيه بيداء تكول / اليوم حفلة اختي فرحتلج
من لبة قلبي
والحمد لله بعد الحفلة هي بدت تجهزلي
من هدوم وشغلات العرس
اني مااعرف بهاي الأشياء
بس هي يوميه العصر
ادز على مازن نروح للسوك ونشتري
شغلات اليه ، وشغلات للبيت
نروح فارغين نرجع محملين سيارة بالخيرات
اشكال والوان هو ياخذ الغراض بوجهن للبيت
يكول/ انا اعدلهن
وبقينا على تلفون نسهر للفجر سوالف
وشقه ، وضحك ، عشت احلى ايام
واحلى ساعات ،اجمل أيام مرت بحياتي
وقرب موعد عرسنا ، عمو حاتم كال/
بس التحق للعسكريه ومن انزل مجاز ازفكم
وليش ما الحظ الأغبر
الفجر اغتالوا عمو حاتم وطارق
من رادوا يرحون الدوامهم
عمو حاتم كايل البيداء / اكو جماعه مهددينه
وحتى مخليلة طلقه بظرف
وهو مطلع عليهم قوات عسكرية وساجنهم
جنت نايمه بغرفتي فوك
قبل ساعه يمكن سديت الخط من مازن
جنت احجي وياه ،هو ملتحق بالدوام ما موجود
واسمع صوت انفجار هز بيت عمو هز
وخرط رشاشة صوت الطلق تكولون بالبيت
اخترعت ونزلت ركض ،
واشوف بيداء تلم بجهالها خطيه متخبلين
واحدهم يصرخ بصوت عالي من الخوف
من شافتني دفعت الجهال عليه
وطلعت تركض للشارع ،وهي عاطت لمت الدنيا
، سوده عليه عمو حاتم غرقان بدمه
وبعدين يلا وعيت على حجي الناس
طارق هم مضروب
وبعد ما الرياجيل اخذوا عمو حاتم وطارق للمستشفى
رحنا لبيت خالتي واسم الله حالهم
افجع من حالتنا
اني حرت بسوار صارت فرد نوب
وبعد الهوسه وكلشي صار
وعرفتوا عن لسان خواتي
اجاني قهر جديد ....
مازن شد حراب ويايه
ممنوع اروح لبيت خالتي
اكلة / خواتي منو الهن وقلبي يمهن
يكلي / اكو تلفون خابريهن
من يصيرلي مجال اجي اخذج نروح سويه
ونرجع سويه ،
بيداء كالت / مالنا خلك للمشاكل عوفي براحته
اني هم اتكفى الشر وبطلت عن الروحة لبيت خالتي
بس كله اكضيها اتصال ويه مسرة
وشرحتلها وضعي
هي كالت / ميخالف لا تجين
ولا تسوين مشاكل ويه رجلج
أطمئن عنج بالتلفون وشوكت ما يعجبج خابريني
واني هم التهيت ويه بيداء
كطعت حالها على عمو حاتم والله عجبتني
مو تكولون يحرك قلبها ويروح للنسوان
ومدمن يسكر يوميه ، لا تبجي عليه دم من القهر
تكول رجلي وابو جهالي وراعي بيتي
خلاف عينه انذل وتاكلني جلاب البشر
شريد منه خل يشرب خل يروح للنسوان
بس المهم عايش ويمشي على طوله
وظله مخيم عليه وعلى جهالي
مااعرف بس هي هيج تفكير
لو اكو نسوان نفس تفكيرها ؟؟
وهم التهيت بضيافة الخطار اهل الشارع
واليسمع ، والاقرباء، والغربه
واهلها امها وخواتها وخوانها ابد ما عافوها
الحمد لله وجود اهلها شويه خفف عليها من القهر
الجهال صاروا بركبتي ، بيداء حارت بقهرها
تروح للمستشفى من الصبح هي واخوانها
ما تجي للعصر مرات للمغرب
تجي ميته من البجي ،
تكول / وعلي حاتم ميت
ومابيها مجال بعد يصحى ويعدل ،
بس كلبه يشتغل كلشي ماكو لا حس ولا نفس
وامها وخواتها يصبرن عليها
اني على وكت فراغي اكعد اقرا قران
واهدي لوجه الله دفعه بلاء عن عمر عمو حاتم
واستمر حالنا هيج قهر وبجي
وزادني حالي قهر
سوار جابت وطلعت من المستشفى
وماكدرت اروح مازن بالدوام
بس اخابرها ، حتى بيداء ماراحت
لان حقها الكل عاذرها هي بيا حال
وتروح توجب علمود جيابه الجهال
بس امها وخواتها راحن وتعذرن من خالتي
وحتى اني خابرت خالتي وتعذرت منها
كالتلي / لا تفكرين بينه ،عليج برجلج وبس
هو من ينزل مجاز تعاي وياه لا تسويلج مشكله
كلنا نعرف سوادين مازن
وصدك بس نزل مجاز اجاني العصر
اخذني لبيت خالتي شفت خواتي وشويه غيرت نفسيتي يمهن شوفتهن اطمن روحي
مسرة بقت تنصح بيه ادير بالي على حالي
واسمع كلامه وماأسوي مشاكل
وبقيت لليل بيت خالتي
ساعدت البنات اشيل شويه عن مسرة
الحمد لله من بشرتني حبلة هوايه فرحت الها
احنا وحدتنا غريبه ويتيمه وبس الله سندنا
وجهالنا بجيتهم يعززون سندنا وقوتنا بين اهلنا
العرفناهم تالي عمرنا
وغسلت ويه لمى الطرمه
وبقينا نسولف اني وياها كالت / ديري بالج من شهلاء
وفاء شويه احسن منها ، بس شهلاء اذا خلتج براسها
ادمر حياتج حقودة وخبيثه
صايره بيها حاله نفسيه على كولت حيدر
تتسودن من تشوف رجال ومرته مصافين ومرتاحين
حتى انا بالشقه كلت الحيدر /ترى من حقها
تريد حظن رجال زوجوها
كالي / هي ترضى وانا مامزوجها
والعرس مو حرام لو رادت تعرس
بس هي ما ترضه تريد تربي ابنها قابل اجبرها الا تعرسين ،
كتلها / ربي يكفني شرها .
ومشت الايام وعمو حاتم لا حس ولا نفس
يكولون اكو استجابه عندة
بس من تروح بيداء للمستشفى وترجع
تكول / على حاله وين الاستجابة العندة
مازن خبلني والله كلساع مخابرني
لا تطلعين كدام أخوان بيداء على شي تافه
واذا مضطره عباتج لا توكع من راسج
لا تلعبين ويه الجهال
صوتج لا تعلي واحد يسمعج
تلفونج تخلي يمج من دكه وحدة تجاوبيني
وبليل دزلي رساله كاتب بيها / تدرين افكر بيج
انتي بانزين وعلى شخطة تكبين
شلون هيج متحملة بدوني ،
ولج خايف عليج لا تكبين ويه واحد من اليمكم
هههااأاي
اني قريت رسالته لو تخبلت
عقلي وكف حتى لو يشاقه ميصير هيج يكلي
عيب علية هيج يفكر بيه
اتصلت عليه بسرعه ودموعي غسلت روحي
بس كال /الو شلونج حبيبتي
واني عطت عليه / لا تكوول حبيبتي
وحرام عليك هيج تفكر بيه
اني اذا بانزين مااشتعل بس بحظنك
مو وحده بلا تربيه وماعندي اخلاق
واشتعل بحظن الرايح والجاي
حرام وعيب عليك هيج تكلي
سديت الخط واني ميته من البجي
روحي طلعت شلون هيج يفكر بيه
شكد بقى يدك ودزلي رساله /
ترى اشاقه وياج شبيج سودنتي
بقيت يومين ماارد عليه
بس من يدك بسرعه انطي رفض
معناها التلفون يمي مابيه حيل لسوالفه
كاعدين كلنا على الريوك بيداء وخواتها وامها
وبس اخوها واحد بايت يمنا نايم بالاستقبال
وباقي خوانها يرحون بليل علمود بيوتهم
ونسوانهم وجهالج ، ويجون بالنهار
هنا تواجد اهلها ابد ما حسيتهم خطار ثكيل
بالعكس وكفتهم حلوة
صح هم هوايه ما شاءالله رياجيل ونسوان وجهال
بس وجودهم يبث اطمئنان لبيداء
ويهدي من حالها شويه
نوره صغيره كاعدة اوكل بيها اسويلها لكمات صغيره
تباوع على باب الصاله وتردم كلشي ماافتهم عليها
غير بس كلمه بابا .
بيداء خلت بالها وياها
وتفتهم على حجيها
سالتها / شبي بابا وين راح ؟؟
هي نوره خرطت كليشه ماادري شتكول
بيداء كالت / يمكن شايفه حلم ماادري تفتهم على هوستتا وحجينه ، تكول/ بابا صاير بي اواه
وراح بعيد ، وهسه يجي يجبلها نمنم يعني يشتريلها
ام بيداء كالت/ ان شاء الله خير
الجاهل يحس مو مثلنا
بلكت الله بشاره خير من كالت يجي يشتريلها
بقينا ندعي العمو حاتم بالشفاء العاجل
بسلامه سمعنا بطلعه طارق
يمه الكاع ما شالتني من الفرح
هوايه فرحت برجعتة للبيت الخاطر اختي وجهالها
وهو امانة الله زين ما شفت شي من عنده
عدا غلطته ويه سوار. يعني اقصد ويايه ويه مسرة
وما شفت من عنده لو نظره مو زينه
، من جنت يمهم وحتى من انتقلت لبيت عمو حاتم
واروح عليهم يحترمني ويسميني مرت اخوي
حتى ما يصيح بسمي ، بس همام مجلبي بمعاضد
وبيوم سمعت بمسرة طارحه وميت ابنها
فرفحت وبقيت ابجي على حظها
وأتوسل بمازن بس اروح اشوفهم ما قبل
كال /انا من اجي اخذج انسي شي اسمه طلعه بدوني
رجلي على رجلج
نزل من دوامه اخذني لبيت خالتي
مثلا نروح من العصر
و بليل متأخر يلا نرجع من عدهم
هو يكعد يم طارق والولد
وانا اشبع شوف وسوالف ويه خواتي
من دخلنا لبيت خالتي
جان الوكت قبل الغدة
اني لحيت على مازن يجي يوديني
اريد اتغدة ويه خواتي .
لان اعرفهم هل ايام ماعدهم خطار وهوسه
لكينا منتصر يصيح ويعيط يكول/ والعباس اطرده
من البيت وانعل أبو لأبو اليطلع وراه
شيب قلبي من وراه ما بسه لعب
مو اشتريته من حلك عزرائيل خل يستجن ويكعد
هو منتصر من شافني اني ومازن دخلنا عليهم
من باب الاستقبال سكت
وكام بوجه مازن وسلم علينا
وحيدر كاعد على جهه ويدخن
وهمام يكلب بتلفونة
استغربت طارق ماكو بالاستقبال هو هنا سريره
من طلع من المستشفى ولليوم هو ينام هنا
دخلت للبيت جوة وسلمت على خواتي
وخالتي ولمى وبوست الجهال
لاحظت سوار ممرودة مرد
وخالتي وجهه مكلوب
ووهج تبجي من ايد مسره لايد لمى
وفقار ومشارق تنيم بيهم خالتي بالمهد
سوار متمدده على القنفه بالمطبخ
وعيونها صايرات وحدتهن طوبه من كثر البجي
هنا حيدر اجى كال / شبيها طفلة من اجت
ولهسه هي على فد بجيه
كالتله خالتي/ عمه من امس هاي بجيتها
اريد العصر اخذها للطبيب الاطفال
واشوف علتها شنهي
هو اخذها من ايد مسرة خلاها على القنفه
مال المطبخ وبقى يكلب بيها
كال اللمى / شو روحي جيبلي السماعه
هاي بجيتها مال وجع
هو مخلي جميع الأغراض الطبيه
اليحتاجهن بالكومدي يم طارق بالاستقبال
سوار طفرت من مكانها واجت يمها
وخالتي هم أجتي جانت كاعدة على هذيج القنفه
مسرة كاعده يم يحيدر وتسكت بيها
متاخذ لا الممه ولا الملهي
لمى جابت سماعه الطبيب
وحيدر بقى يجيك بيها
سال سوار/ من ترضعيها تزوع الحليب
كلتله / علواه لو يبقى بطنها عشر دقايق
خالتلي كالت / ترى عادي اغلب جهالنا جانوا هيج
يزعون الحليب
هو بقى يقلب بيها
هوايه جيكها طول خلك بفحصها
كال لسوار / كل شكد يلا تطلع بطنها
كالتله خالتي / حشاك ما عدها خروج
الا انا اسويلها فتيله البنات يخافن يعورنها
وانتظرها ثلاث ايام اربعه ايام يلا
أريدها تلم لحيمه
هو كال / عمه بربج البنيه راح تموت
وانتي تكليلي تلم اللحيمه
صاح / همااااااام حضرت سيارتك
البنيه لو الحك عليها لو لا...
خالتي كالت /يمه اسم الله شبيها البنيه
سوار كامت تبجي واخذتها من ايد لمى
وتكله/ فدوة حيدر شبيها بتي
اجي منتصر ومازن وصارت هوسه
كلهم يكولون شبيها البنيه
حيدر كاللهم / انا متاكد من تشخيصي
عدها التواء بالامعاء يرادلها عملية فوريه
بس ناخذها للسونار اتاكد
هنا شنو كل الموجودين اتصركعوا
طفلها بكد جف الايد حتى شوفه مابيها
وينها وين العمليه وانوب الاتواء الامعاء
منتصر بقى يسال بحيدر ليش وشنو السبب
كاله / اكثر شي عيب خلقي يصيب أمعاء الطفل
بمرحله تكوينه وهو جنين برحم امه
وهل كدامك اعراضه واضحة
انتفاخ شوف بطنها شكبرها
وهي حتى ما ترضع زين ترجع الحليب
وماعدها خروج ، امعائها خاملة
هسه بس اتاكد من السونار
ادخلها للعمليات دكتور رياض جراج باامتياز
بعمليات الاطفال
خالتي دكت ولطمت لحد ما ملت
وسوار مخليتها بحظنها وتجبي
انوب لمى مااعرف شبيها صارت صفرة وكامت ترجف
وتكله/ حيدر بروح ابوك لا تخليها تموت والله اموت وراها
منتصر مااعرف عليمن اتصل
بس من المخابرة عرفته على طارق
كاله/ يالساقط بنتك راح تموت تعال شوفها
راح اخذها للعمليات لو نلحك عليها لو لا
حيدر كال لمسرة/ بلكت انتي شويه لعاقله بيهن
اجمعي جنطه ملابس للطفله وغراضها
وحدة منجن تجي ويايه انتي لو امها
لو شوف منو
لمى كالتله / اني اروح
كاللها / اكعدي وسكتي بس تشمين ريحة الديتول
توكعين باب المستشفى
خالتي كالتله / هسه اخابر على الحجية
تروح هي ومسرة وياها
مااخلي امها تروح، ترضع خوانها واخاف عليهم
لا تشتم من المستشفى ويتأذون جهال من
تجي و ترضعهم
مسرة ركضت تجمع جنطة للبنيه
ولمى تناشغ وتبجي هوايه متعلقه بيهن
وسوار بجيتها اكبر من حركت قلبها على بتها
وخالتي تبجي وعينها على سوار وبتها
منتصر كعد على القنفه ويباوع علينا
عيونه مكلوبات دم مبين كاتم اعصابه بالكوة
همام ومازن وحيدر واكفين مايعرفون شيسون
اجي حسين ينكط مي طالع من الحمام
صاح/ يمه فاطمة وينج شوفيني سبحت
جلفت بليفه مرتين
كالتله/ تعال هنا انا كاعدة على القنفه بصف السنك
هو راح عليها ،
هو يمشي
كال/ مازن هنا مو
أشتم ريحته ترست خشمي
مازن كاله / شلونك ابو شباب
ومشى عليه ولزم ايده وبوسه
هو كاله / شلونك يالصنديد مشتاقين
مازن جاوبه / الحمدلله بخير نسأل عنك
يالسبع ،كالوا تريد تسافر سياحة للشمال
كاله / ابوي مايرضي يريد عمي حاتم يطلع من المستشفى يلا نروح ،
و راح على خالتي بقت تنشف بشعرة
وتعدل بهدومه ،
يعني تخيلوا حسين طفل عادي
مو حسبالك طفل اعمي
كلشي يعرف وكلشي يفتهم
وكلش فطن وذكي ، وسريع الحفظ
اجتي مسرة شوفت جنطت وهج الخالتي
كالتلها /هاي هيه هن ملابس وحفاظات
وقوطية الحليب وممتها
اجتي ساهرة وامها جانن رايحات البيتهن
تكول ساهرة / صارله هوايه متروك هم اشوفه
وانظفه ، وهم مسبحه امها
ورجعن من خابرتهن خالتي
اجي طارق جان رايح بيت ساهرة
استغربت ليش رايح بيت ساهرة
هو مو مريض شطلعه ؟؟
بس دخل وبالكوة يمشي هو بعدة مريض وتعبان
منتصر كاله / حرامات الله ينطيك مراه وجهال
انت هذا الهواء حرام عليك
تعلمت على درب الكح... هن كافيات عليك
ما تنصلح لو اوسدك باللحد
الاعوج يبقى اعوج
هو مااهتم الحجي المنتصر
اجي وكف فوك راس سوار
وكاللها / شبيها البنيه ؟؟
-
سوار ما جاوبته بقت بس مدنكة وتبجي
هو بصبعه دك على راس سوار
وصاح / يا خر.... مو احجي وياج شبيها البنيه
منتصر كاله/ ماكو غيرك الانكس من الخ.....
بنتك بيها التواء بالامعاء وراح ناخذها للمستشفى
نسويلها عمليه
هو جنه ولا يسمع منتصر شنو يحجي وياه
باوع على حيدر وهم بقى يساله ويفتهم من عنده
شو هو ادروش على سوار
ويكلها / صووجج انتي هم تسمين ام
مال بزره انتي ،،مكضيتها بس نوم واكل
ما تعرفين بنتج منفوخه لو مريضه
لو بيها غير شي ،
خالتي كالتله / لا دورلك حجه على البنيه
كلنا مدارين الجهال وما عرفنالها الا حيدر شافها
سوار كالتله / انت هم ابوها ما شفتها شبيها
لو حاير بس بالتلفونات
هو من سمعها هيج كالت
سطرها براشدي فر راسها
وكل الموجودين كاموا يحجون ويصيحون عليه
ومنتصر كب من مكانه ودفع طارق
يريد يطلعه بره البيت
وحيدر ومازن وهمام وكفوا بوجه منتصر
كام يرعد غلط وفشار ومسبه على طارق
وطارق بقى يرادد بي خبله بالزايد،
منتصر فقد من كثر اعصابه
ضرب طارق بوكس بنص وجهه
وانطاة ضربه ثانيه على صدره
خلاه طارق يعيط لرب السموات وكام يتلوه من الوجع
يصيح / حيدر تعال ليه ولك انكطع نفسي
منتصر كاله / من عساه الهواء ما دخل جوفك
كافي عاااد حس على روحك
ولك صرت بعير الى متى ابقى اركض وراك
واسد بسوالفك الجايفه
ولك هذا حسين مو اصغر واحد بالعايله
احسن منك وافهم منك واعقل منك
كاااااافي يالساقط تعبت ومليت منك ومن سوالفك
ولك غيرك ويطلع من هيج شدة
يخلص عمرة ساجد لله يحمده ويشكره
هسه حتى الله ما يريد منك هل عبادة
بس التفت الروحك
الصحتك السكطتها بسوالفك الجايفه
التفت الرزق الله النطاه الك ومنطاه الغيرك
انطاك جمارة ماشايفها الهواء
وانطاك ٣ جهال غيرك يتحسر على شوفتهم
وانت حاير بالتلفون وهاي الكح.... دزتلك رساله
وهذيج خابرتك .
يالمطي يحلبن بيك ارصدة وفلوس وهدايا ،
ليش ياالكواد مو مريتك وجهالك اولى بيك منهن
بس مو صوجك صوج عمامي الرادو أيسونك ادمي
وانطوك مراه تسوه راسك وراس الخلفك
ابن النعال يتنفس بالكوة ومدخل عرك البتي
مكاسرة بالميرندا من انعل ابوك لابو حتى ابوك
الماعرف يربيك وشمرك ضيم على راسي
منتصر انخرط فد خرطة على طارق
كام يخيط ويخربط ، ما خله كلمة توجع
وتذبح الروح ما شمرها عليه
وهو طارق كام يلاكف الهواء كوه
حيدر ومازن حاروا بي
لان منتصر فقد وبعصبيته ضرب صدره
سحله حيدر ومازن وخلوة على الأوكسجين
وهو حتى كام يبجي من قوة الوجع
وخالتي تصيح / من عساج بالشهيره والفضيحه
يالكح... ياام الرجوله لو بيج خير مو ابن عمج
ياخذج شهر ويطلكج
عبن لكفج تخابرين بالمطي العندي
وساهرة وامها يسكتن بهذا ويرجعن على هذاك
واني ولمى ومسرة حرنه بالجهال
اتخبلوا من صوت الصياح والعياط
منتصر كال الطارق وكدام الكل /
بوجود اخوانك همام وحيدر ومازن
وهم شاهدين على كلامي
علياء ما تصيرلك مراه وخشمي يشتم الهواء
والعباس عليه الا اصير اسقط منك واشهرها بين اهلها وعمامها هناك وانعل ابوها لابو اليطلع وراها
ومن عين الفجر تطلك سوار ومالك دخل بيها وبجهالها
اني ولي أمرها وابو جهالها
وبعد ماالك كعده بيتي تعذرني
هوايه تحملت سوالفك شيبت قلبي من وراك
ساهرة سحبت منتصر وبقت تسد بحلكه
هوايه غلط وفشر على طارق
تكله / حجي يمعود كول يالله
لعنه الله على شيطانك
هسه احنا بيا حال ،
حيدر خابر على الدكتور صديقه
وكاله / دزيتلك بنت اخوي عينك عليها
راح همام ومازن وساهرة ومسرة
اخذوا وهج للمستشفى
وسوار نامت بركبة خالتي حظنتها وظلت تبجي
بصوت عالي وتكلها / عفيه خاله راح تموت بنتي
عفيه خاله بعدها صغيره خطيه يسولها عمليه
وهي خالتي وام ساهرة يصبرن بيها
واني ولمى حرنه بفقار وبمشارق
منتصر تعب اتمدد بالصالة
وحيدر حار بطارق يلوب من الوجع
الضربه اذته
مرت ساعه اكثر وخالتي كلساع
ادك على همام لو ساهرة لو مازن
منو المايرد عليها ادك على الثاني
وطلع تشخيص حيدر صحيح وهج عدها
التواء بالامعاء ولادي ومدخليها للعمليات
سوار بقت تبجي وانوب كامت ترجف
وبس تكول / بنتي راح تموت
خاله بنتي راح تموت
وللمغرب يلا الحمد لله شويه هدأ بيت خالتي
والحمد لله طمنونه الطفلة زينه
وعمليتها ناجحة .
خالتي كالتلي / كومي يمه خلي غدة الخوانج
وغدي الباقين والحمد لله على وعدي ومكتوبي
جبت عمري ضيم وقهر ويه نسوان ال الحسن
انهزم منهن ويلحكني بعباه مشككه
اني هم كمت وحميت الاكل
وديت الحيدر والطارق
من دخلت عليهم للاستقبال لكيت طارق
يسمع اغاني رياض احمد بالتلفون ويبجي
وحيدر كاعد يمه صافن على حال الدنيا
وانوب جهزت غده المنتصر تغده هو وحسين
وانوب جهزت غدة الخالتي ولمى
ولسوار ، وام ساهرة
كعدنا بس محد اكل محد اله نفس
استغفر الله المشاكل تطلع من جوة الكاع
لليل واني بقيت بيت خالتي لحد مااجى مازن
الحمد لله طمنا طفلة زين ،
والدكتور مداريها
وصحتها زينه وعمليتها ناجحة
توسلت بي ابقى بيت خالتي ما قبل
كال / عيب من بيداء من الصبح عفتيها وحدها
واني اعرفه جذاب مايقبل ابات عدهم
سلمت على جميع ورجعت البيت عمو حاتم .......
-
-
-
سوار/ حال لسان سوار يقول
👇👇👇👇👇👇👇👇👇
((ردتك يفلان يمنتي حين اليصح مكروه
ازامط بيك وانت تريد تلويني
يا سجين صخري البيك أجيد اعداي
تالي من الظهر تطعني سجيني
ياشتله وسكيتك من بيابي العين
أساكيك العسل وانت سموم تسكيني
وازنتك بروحي من علي ساموك
كل ظني بغلاة الغالي تشريني
تهت بسوالفك والغرني حجيك ذاك
بنعيمك جنت أفوجن من تحاجيني
شلت عنك عمر مليان اذيه وضيم
وانت بكل كباحة تروح تأذيني
اغفرلك الزله وخاطري مكسور
وصادقت اليضدني ونكرت ديني
الوج عليك مثل الفاكدة الها وحيد
وانت ادير الوجه من تلاكيني
أمنتك اسراري وكل خفايا الروح
ليش بكل حلك شامت أمخليني
سمح طبعي مثل طولي مثل قلبي عدل وياك
دخليني على طولي ليش تلويني
أجيت بيا عذر وبيا صلافة عين
كلي بيا وسيله وبيش ترضيني
خلها مدثرة ولا تفضح المضموم
وعلى اسرار المودة لا توازيني
كتلك هذا طبعي من بديت وياي
وقريت وأضحتلك كل قوانيني
ميت حاسبك وانت بحياتك هاي
ولا اريد اليجي عنك يعزيني
هذا فراكنه وكلمن بدربه يروح
لا من دينك أني ولا انت من ديني ))
حياتي برجعة طارق بسلامه للبيت
وبشوفه جهالي بحظني سالمين
هوايه حلت الدنيا بعيني
وزادت حلاوتها بمدارات خالتي ولمى زمسره الجهالي ، وحب منتصر وهمام الهم
وفرحه حسين بصوت بجيهم
الحمد لله حياتي زينه وحلوة
بس الما حاسب أحساب المغطايات
ويشدلهن حزام الله يكفيكم الشر
تنهجم هاي الدنيا على راسه
بيوم وهج بقت تبجي مااعرف شبيها
حارت بيها ساهرة ولمى
حتى خالتي شافتها كالت خاف ممتونه
وطلع كلشي مابيها بس مااعرف شبيها تبجي
اني جنت كاعدة بالغرفه وياهن ولمى
شايلتها وتفتر بيها
نعست وكمت اريد انام ، رحت للاستقبال
فتحت الباب على كيفي كلت خطيه
طارق نايم واكعده ويبقى الليل كله كاعد
ظلمه مطفي ضوة الاستقبال
وضوة الصاله هم طافي
دخلت واسمع طارق يكول / اي احبج
بس شنو ذنبها هاي النايمه بصفي
وهي أحلى ذنب صار بصحوتي ....
اني شنو احس كلامه طلقه وضربتني
شعلت الضوة بسرعه ردت فعل مال مخابيل
وكتله/ طارررق ويامن تحجي
هو تفاجئ نزل التلفون من اذانه ونهى الاتصال
وكالي / شبيج اسودنتي
شكو تصيحين العالم نايمه
اني تأكدت هو جان يخابر
وسمعت كلامه كلش زين يكلها احبج
عقل ماعندي ومااعرف اصرف
ركضت وجريت التلفون من ايده
وانوب مااعرفله اريد افتحه واشوف ويامن جان يحجي
هو كام على حيلة وخمطة من ايدي
كالي / شبيج بابا ، بس شويه صبر
هسه افهمج
اني رجعت سحبت التلفون من ايده
عقلي طفه ، نار وشبت بظلوعي
كمت مااشوف من القهر
دموعي هلن وزادن النار عليه
افتح بالجهاز ماينفتح
واصيح/ وياااامن جنت تحجي
ويه هاي الدايحة مووو
افتح الجهاز رااح اموووت
هو خمط الجهاز من ايدي
ويضحك عليه ماادري يضحك على تصرفاتي
كالي / وشتردين هسه جنت احجي ويه علياء
اني سمعته اكد الكلام
هجمت عليه من حركت قلبي وشيطت روحي
بعد مااعرف شلون اتصرف فقدت
ردت اضربه ، هو خاف على صدره
وبعد ايد رجال ثكيله وقويه
واني منا خويت من القهر
بس دفعني وكعت بالكاع
يعني رجعت ليوره وكعت بالكاع تمددت على ظهري
هو بسرعه دنك يريد يلزمني لو يلكفني
اني كمت اخمط بيده وخمطت وجهه
واصيح / وخرررر وخررررر عنننننني
ان شاء الله تمووووت انت وعليااااااء
هنا أجتي خالتي فتحت الباب وتكول / يمه برررد
برررد اسم الله شكو شبيكم
واجتي ساهرة تركض وراها
ولمى شايله وهج بعدها تبجي وهم دخلت علينا
اني نار الغيرة شعلت بروحي
ومااعرف اتصرف عقلي على كدي
كمت الطم على وجهي واصيح /
ولج خاله يخابر بعلياء الدايحه ويكلها احبج
هو صاح/ صوووتج ومرض
العالم نايمه
خالتي كالتله / طويرق شنهي ردينه على غضب الله
مو كلت نسيتها ومااريدها وبعد مااعبرها
شنو هذا اللعب مالتك
هو راد يجاوبها بس شاف
لمى اخذت دولكه من طبله بصف السرير
تريد تشرب ، هو صاح عليها/ عووووفيها
كالتله / شبيك خرعتني حلكي يبس من الهبطة
بعدها الدولكه بيهدها بس شايلتها تريد تشرب
بسرعه رجعتها على الطبله
وكالت / ايععع طارق هذا عرك
خابطه ويه الميرندا
هو كالها / اي خ...... مو كتلج عوفيها
خالتلي كالتله/ عزززززة بعين الخلفوووك
بعدك بحلك عزرائيل شكو تشرررب
منو جابلك هذا المرض
كاللها / مالج دخل بالجابه اليه
ما شربت هوايه راسي ذبحني من الصداع
وجسمي ملخني عليه مااكدر اتركه فجأه
خالتي تفلت عليه وكالتله / من اهمدبطني الشالتك
تبقى طول عمرك اعوج
كالتلي /كومي ويايه واني اعلمه.
ساهرة سحلتني واخذتني بغرفة خالتي
كطعت روحي من البجي والقهر
والله العظيم كمت احبه،
وبديت انسى فعلته السودة ويايه
وحلفلي ماله شغل بعلياء وصدكت بي
هسه الكفه يخابر ويكلها احبج انحمست حمس
طلع الصبح واني بس افكر واكل بروحي
وعيني مااخذت نوم ،
وانوب وهج بس تبجي
لمى أنطتها قطرات سباستال بلكت تنام
خالتي ما قبلت ارضع الجهال
كالت / مقهوره وحليبج يأذيهم
الصبح ساهرة سوت الريوك وحضرت كلشي
كالت / عمه اني اروح لبيتي واجي العصر
هسه الكاه كله تراب
واخاف من الجريذيه هسه الكاهن كارضات شكو كدامهن ، وهم اشوف المجمدة والثلاجة
خاف جهاز الحمايه ما مشتغل وخربانات
تريكت ويه خالتي ولمى واخذت امها وراحت
أني ما تريكت مالي نفس
روحي توجعني لو عايفني طارق اخاف منه
ومامتقرب بعد من عندي وما معلمني عليه
ومتزوج علياء ولا حامسني هل حمسه هاي
نزل منتصر ومسرة وتريكوا سويه
ومن راد يروح منتصر لشغله
كال عندي شغل ضروري شغله ساعه وارجع
خالتي كالتله / انتظرك عندي حجي وياك
هو طلع مستعجل
نزل همام كال /غير تكعدوني راح عليه الامتحان
خالتي كالتله / جا ما وكتت تلفونك
كاللها / طفيته ورجعت نمت
كالتله / جا تعذرنه ما ندري بيك رجعت نمت
هو كاللها / يوم شكو ليش تعاركين ويايه
لمى كعدت يمه على ميز طعام وسولفتله
كل سالفه صارت
كال / يوم والله ماكو فايدة لا تحركين دمج
ولا ابد ، شوكت ما حاتم يطيب
من الشرب والنسوان طارق يطيب
خالتي حارت بوهج وبالجهال
ولمى فرت البيت بسرعه هي ومسره
اني بقيت مقهوره ونايمه على القنفه بالمطبخ
لحد مااجتي اساور ، وصار كلشي بوجودها
هي ومازن لحد ما راحوا بليل
ومن اجى مازن طمنه وهج زينه
وعمليتها ناجحة
منتصر بهاي الليله ما صعد فوك
بقى متمدد بالصاله
وكلساع وكال اللمى /تعاي شوفي اخوج شلونه
نايم لو كاعد
واذا كاعد شوفي مرتاح لو متوجع
لمى تدخل تشوفه وتجي تكله /
متمدد ومخلي قناع الأوكسجين
ومشغل اغاني ويبجي وحيدر كاعد يمه
ام ساهره وخالتي
بقن حايرات بين طارق وبين منتصر ،
يالله هذيج الليله شكد جانت وحشه
وكئيبه ، بنتي بعيده عن حظني
ورجلي غدر وخان بيه
والاخوان تعاركوا بيناتهم
وختالي شبعت قهر وضيم
-
-
-
مسرة/ اني بالنسبه اليه
خواتي هن فاكهة حياتي
وهن بهجة البيت
وفرح الدنيا
وأنيسات المكان
خواتي الله جعلهن نعمة أنزرعت بروحي
عسى ربي ما يحرمني من وجودهن
وادعي ربي يحفظ خواتي وخواتكم
ماما جانت عدها كلمة حلوة
بس بهذاك الوقت ماجنت اعرف شنو معناها
تكول الهم والحزن والقهر والمرض
يتوزع على بني ادم حالهن حال
الرزق والستر والصحة والعافية
حتى تكون كفة ميزان الدنيا متعادله
هسه افتهمت معنى كلامها
اساور شكد ما حبت مازن وثقت بي
وهو هم حابها ومعترف بيها
بس شكاك وخانكها بسبب سواد تفكيره
وسوار بعد خوفها من طارق
وبدت حياتهم تتغير نحو الاحسن
وبلشت بالخطوة الزينه التزيح خوفها من عندة
انكفخت بشي اسمه حب مراة ثانيه ( خيانة المشاعر )
واني الحمدلله حياتي زينه ويه منتصر
بس عندي مشكلتين
وهي تبارك وخباثتها
حتى من منتصر عرف بيها هي ضربتني
بقى ساكت عنها وكلشي ما سوالها
من كتله / ليش متعاقبها
كالي / العقاب مو بس ضرب الج الصافي
والمشكله الثانيه غيرتي من ساهرة
الحمدلله حاولت اسجنها ومااسوي مشاكل الروحي
من تأكدت هو وياها مجرد اولاد عم
وعلاقتهم علاقة صداقه واحترام
اجذب اذا اكول ما تجي بروحي شكوك
وافكار سودة بس اطردهن من اشوفها
كل همها تكسب حسنات لأخرتها
مو بحال تشاركني برجلي
وشفتوا مواقف ساهرة وركضتها ويانه
وللعلم تركض مو بس النا ، تركض للجميع
شكو وحدة تريد تجيب وتروح للمستشفى ساهرة رايحه وياها ،
شكو وحدة محتاجه عونه بيا شي
ساهر تروحلها ،
شكو وحدة تريد فلوس دين لو سلفه
ساهرة متبرعه بمساعدتها
خدومة بشكل وابد ماتتعاجز وتكول لا
من خالتي خابرتها تروح ويايه ناخذ وهج للمستشفى
اجتي بسرعه، وهوايه خافت على وهج
وبقت الطريق كله تقره عليها قران
لحد ما وصلنا للمستشفى ودكتور صديق حيدر
منتظرنا ، واخذناها للسونار
طلع تشخيص حيدر صح التواء بالامعاء
وبعد خمطة القلب من اخذوها من عدنا للعمليات
وبعد الانتظار الحمدلله طلع الدكتور
كال عمليتها ناجحة ان شاءالله
ثاني يوم بعد مراقبتها واوضاعها زينه
خرجوها من المستشفى
خطيه هي كلها بكد جف ايد منتصر
يادوب بيها شوفه
وانوب الكانونه اخدت كل جف ايدها
حتى من خلولها الها مازن انهزم برة الغرفة
يكول / قلبي يوجعني من اشوف طفل متاذي
رجعنا للبيت الكل وجوهم مكلوبه
سوار شبكت بتها وبقت حاظنتها وتبجي
وخالتي تحجي عليها تكلها / مو حتى حليبج راح يجف
من القهر والبجي كولي يالله
والحمد لله من ردت الحظنج سالمه
اجي حسين كال / عمي طارق يريد وهج يشوفها
اخذتها لمى وراحت للاستقبال يشوفها ابوها
ومانسمع بس صوت رياجيل يبجون
ركضنا اني وساهرة وخالتي لحكتنا
منتصر حاظن طارق وهو بيده وهج
واثنينهم يبجون بصوت عالي
كمنا نبجي وياهم ، صح محد حجى وكال شي
بس هاي الدموع وهاي الاحظان جانت
كفيله بغسل القهر الموجود بالروح
حيدر شكد ما يكولون قلبه جلد وكوي
من شافهم يبجون خلا وطلع برة
ولمى واكفه يم اخوانها وتبجي وياهم
منتصر اخذ وهج من حظن طارق
وبقى يبوس بيها ،
كاله / يخوي اصحى على دنياتك
الخاطر هاي النعمة
خالتي كالت الهمام جان كاعد على جهه
ويتفرج على الصار / يمه ما تجبلنا طير دجاج نذبحة
لوجه الله ، شو المصايب تهلهل على راسي
كاللها/ يوم لو تذبحيني هم ما يفيد
انتم عالم تحبون المشاكل ودوخة الراس
كام من مكانه وكال / اروح انام احسن كلشي
البارحه ما نمت الله يرضى ابات بالحديقة مال مستشفى
والحمد لله بينا بخت بحيدر
مقيم بيت خالتي، علمود طارق
وهسه اجته وهج هم يشوفها
ولمى تحمس بروحها حمس
ماتكدر توصل يمه تخاف من خوانها
وبيوم بالليل ويعطل المولد
همام شغل مولد البيت صوتها يسطر
وهستوني غفيت بالصاله
كلنا متمددين هنا ، لمى وخالتي وحسين
وسوار وجهالها ، وتبارك
حتى منتصر وهمام اتمددنه علمود المبرده
ودك تلفون منتصر
مرتين يلا رد عليه جان نايم
من رد كاله / صددددك تحجي مهند
جااااوبني صدددك تحجي ..
