رواية ناديه الفصل السادس والعشرون 26 بقلم انين الليل

دائما عمه زهراء هي وبيبي جميله يجونه ومرات يباتن يومين واكثر وعمه زهراء تشيل الفراشات وتغسل البيت 

لان بيبي منيره ما تگدر ابحدها عماتي نوال وسلوى يجن كل تلث اسابيع او اسبوعين بحجة بيوتهن وجهالهن 

نوال احس من نظرة عيونها تكرهني وانا ابد ما احبها وحتى بيبي مو هلگد تحجي وياها

عمتي سلوى دووم الدمعه بعينها اعرف تبچي على ابوي لكن عمري ما حسيت بيها تحبني انا وحنين

اما عمي هادي فهذا كل ما يجي يسوي عركه ويه بيبي ويروح واذا صادف واجه هو وافراح وياهم جهالهم فاكيد 

انا وحنين نشبع تكفخ من عنده او من هديل وعمار واسيل يتعاركون ويانه ويضربونه بس ياسر چان يدافع عنه

 واتذكر مره ضربني عمار هو وهديل وصرت ابچي وشافهم ياسر شبعهم كتل

وشافته افراح وهو يضرب بهديل ويتوعدها اذا مره ثانيه ضربتني عاد بمجرد ما اجه عمي هادي افراح 

بلغته وهو لزم ياسر وضربه وهو يگله 

- - لك ناقص تضرب اخوك واختك على مود بنات مياده 

ياسر //بابا هديل وعمار ضربوا ناديه وهي كل شي ما مسويه 

هادي //وطبها طووب يضربوها وانت ما عليك

اشوف الدمعه بعين بيبي وبيومها گالت النه بس تشوفن هادي ومرته وجهالهم گبل للغرفه تنامن ماتبقن گاعدات

وصدك صرنا اذا يجون ولو همه مو دووم يجون كل شهر ونص شهرين يمرون ساعه او ساعتين اذا طوبو 

فه انا وحنين نسوي روحنا نايمات حتى ما يجون ويتحرشون بينه

وسجلت بالمتوسطه ولان انا بسبب الحادث اتاخرت سنه لحگت بيه هديل بت عمي واهنا بيبي منيره طلبت مني 

اتحجب انا شنو تگلي بيبي اسوي بدون اي مناقشه واتحجبت وصارت هديل كل ما تشوفني تسمعني كلام 

بصوره غير مباشره لكن اعرف هي تقصدني بهذا الكلام وانا اجي واسولف البيبي الي اشوف الحزن 

والقهر مبين عليها ودوم الگاها گاعده بالمحل وتبچي بسكته وبيبي تعلمني وتگلي

=كلهن يغارن منج لان انتي ماخذه جمال امي واخلاق ابوج ما عليج بهديل 

......بيبي هاي هديل تمشي وتسولف للبنات وتگلهن انا موتت امي ومرات تتعمد تگلهن وتسمعني 

لا هي موزينه دخلت صاحبها للبيت وكتلت رجلها 

ومرات اسمعها تحچي //امي تگول ما عليج بالجمال وهاي حلوه المهم اسمج واسم ابوج المهندس واسم امج الي 

الناس تحلف بشرفها وتباوعلي وتگول 

اكيد حلوات ويباعولهن الزلم لان ابوهن تركماني

واجي ابچي وما اگدر اله اسولف البيبي وهي تگلي 

= ما عليج بيها يغارن منج وخصوصا هاي اهديله الصخله مره ثانيه اذا سولفت انتي.ولا گان الحچي عليج 

بالعكس اگعدي وياهن وگولي 

= اي كل من يطلع على اهله انا طالعه على خاتون ام بيبي يگولون حلوه تخبل حتى عمه افراح شايفتها 

وبيبي تگول هديل طالعه على عم افراح اسمه دعاج هيج ما حلو

وفعلا صرت اروح واگعد وهديل تحچي وتحاول تبزني بالكلام لكن انا مثل ما علمتني بيبي صرت احچي 

وما اسكت بس كلامي بهدوء وموزون فد يوم وزعت النه مدرسة الرياضيات اوراق الامتحان الشهري وچانت 

الدرجه من خمسين گالت الي ماخذه 

اربعه وعشرين توگف گبال الطالبات (لان درجة رسوب ) صاحت باسمي الثلاثي ردت اطلع وگلبي يدك لكن 

هي اشرت لي يعني ابقي بالرحله وما گالت درجتي انا وگفت وانا خايفه بعدها 

صارت تصيح باسماء الطالبات وتگول درجاتهن وصاحت اسم هديل الي گالت نعم ست وهي متشمته 

بيه لان واگفه وطلعت تريد تجيب الورقه وتباوع الي بكره وتضحك لمن ما گالت الها المدرسه

- - ليش تضحكين على خيبتج وطياح حظج انتي ماخذه اربعه من خمسين صارن البنات يضحكن وهي 

واگفه گبال الطالبات هي وبعد شكم طالبه من كملت المدرسه بقيت انا سالتني

گالت //ناديه انتي شتعودين الهديل 

انا جاوبتها بخوف وارتباك ...س ست هي بت ع عمي 

- - ها وانتو بنفس البيت 

...لا ست انا ويه بيبي واختي 

- - وابوج 

......ميت

اندارت الهديل //وانتي ابوج موجود 

هديل باستعلاء//نعم ست ابويه مهندس بشركة الا ...

قاطعتها المدرسه //ما طوول ابوج مهندس ما يدرسج لو بس فالحه بالسوالف والضحك

بعدين المدرسه باوعتلي وگالت

- - انا صحت باسمها اول طالبه لان شفت تشابه الاسماء وردت اتاكد ناديه عباس عفيه عليج جايبه 

49ممتاز اريدج تحافظين على مستواج ما شاء الله حلوه ومؤدبه وشاطره صفگولها حييل

انا بوكتها فرحت وحسيت انو انا انسانه الي مكانتي بالمجتمع وعرفت مهما يكون ماضي الانسان او ماضي اهله 

راح الناس تنسا او تتناسا لمجرد النجاح وقررت ادرس واشد حيلي اكثر

وهديل وباقي الطالبات اخذتهن المدرسه للمديره الي بوقتها ضربتهن مسطرتين وخلت الاوراق يمها حتى تسوي 

استدعاء الولي الامر بعد ان تنتهي الامتحانات وبعد ان تشوف درجاتهن اباقي المواد

رجعت هديل للصف وهي تخزر بيه دك الجرس بيومها مدرسة الجغرافيه ما جايه طلعنه شاغر طلعت هديل 

هي وجماعتها وانا طلعت شفتها راحت يم الحانوت وصارت تشتري الصديقاتها وتشاور بيهن

انا رحت اشتريت واجيت امشي انا وابنيه اسمها رابحه لمن ما وگفت وحده من صديقات هديل وصارت تگول 

عرووج (والبنات يردن وراها) دگوله تنكه

وهديل تباوعلي اجت البنيه الي اسمها ذكرى وگالت // ليش ما تجين تلعبين ويانه 

قبل ما اجاوب وحده جاوبتها // عوفيها ذكرى ما تدرين بيها هاي الاغنيه مفصله عليها مو هيج هديل

انا احترك دمي والدمعه بعيني وهنه يضحكن عليه اتقربت من هديل الي چانت ما محجبه وملشت شعرها وهي 

هم كمشتني من شعري لكن انا صرت اقوى منها رادت تجي ذكرى تضربني رابحه گالت الها 

- - ذكرى عوفيها مو حرام عليج لان يتيمه وما عدها فلوس تشتريلج هيچ تسوين

بيومها ذكرى استحت اجت المدرسه المراقبه واخذتنا للمديره وانا مسويه وجه هديل خارطه وشعرها وهي 

تبچي لكن هي عضتني من شافتنا المديره ست عفراء الي الكل يخاف منها ويحسب الها الف حساب گالت 

- - باچر ما تجن اله يجي ولي امرچن 

هديل بتشفي وهي تگول //صار ست باچر اخلي بابا مهندس هادي يجي ويتفاهم وياج

رجعت للبيت وانا حاقده على مياده الي وصلتني الهاي المواصيل وقررت ما اداوم بعد وشافتني بيبي وانا 

متخربطه احوالي وبيومها گتلها بعد ما اداوم لكن بيبي اصرت تاخذني وتروح للمديره وصادف اجه عمو سراج

 وهو راح وياي ودخل على المديره ابحده وحچى وياها وبعدين ست عفراء دزت عليه وگلتلي

- - انتي بطله والشي الي سويتي هواي بنات اكبر منج وافهم ما يسونه ويظلن متسترات ع الخطأ الى ان يوگعن 

باخطاء فادحه يمكن تضرهن ويصيرن منبوذات

وبيومها حسيت بالانتصار والخيلاء وانا اشوف البنات شلون يباوعن للحرس الي ويه عمو شلون شايلي الجنطه لو 

من شافن سراج طلع وانطاني مصرف وعدل حجابي وسوا حركه بخشمه دووم يسويها الي 

صارن يسالني منو هذا ومبين علي شكد يحبج وهواي كلام لكن من رجعت للبيت اتغيرت الفرحه الى حزن وحزن

 ظل وياي طوول حياتي

بيومها اجه هادي وافراح وصارو يحچون وهادي دفع بيبي وصرت انا وحنين نصرخ ولزمني هادي كسرني 

وافراح ويا تضرب وطلعو وانا ما بيه اوكف من كثر الضرب لمن وصلت البيبي وشفناها ما تتحرك وظلينه نصرخ 

والتمت الجوارين واخذناها للمستشفى

وصرت اداري ابيبي وياي عمه زهراء الى ان اتوفت بيبيتي وصار محتم عليه انا وحنين ان نودع بيت بيبي الي 

چنا بي معززين مكرمين رغم التعب واجينه البيت عمنا اخو ابونا الي صرنا بي ذليلات وخايفات ماكو شي 

نشد بي ظهرنا او ننسد علي بس وصايا عمو سراج والي كل ما اتأذه من الدنيا والوكت اتذكرهن واجر نفس 

واقرر اقاوم حتى انجح واعيش

وصرنا انا وحنين خدم الافراح والبناتها

اتذكر من كملنه يوم السابع وكلمن قرر ياخذ شي من بيت بيبي اله احنه اخذنا بس ملابسنا واتذكر بيومها صعدنا 

ويه عمو سراج الي وصلنه وهو ما بطل جكارته بحلگه ويوصي بينه

چان مبين علي القهر وحتى الخوف اي انا اعرف عمو سراج من ينقهر واعرفه من يخاف اتذكر نظرة عيونه 

لمن اخذني للاردن وهوشايلني ويگل للدكتور ::انا خايف عليها 

نفس هاي النظره شفتها بوجهه بيوم وصلنه البيت عمي هادي وحسيت بعد ما اراح اشوف سراج 

الطريق كله وهو يوصيني ويگلي

::ابد لا تضعفين اهم شي دراستج كلنه تعبنا وخفنا وصادفنا اهواي اشياء لكن بقينا بدراستنا ومن حصلنه على

الشهاده اتغيرت هواي امور بحياتنا 

انا اجاوبه ...عمو ما راح تتركنا مو

هو يباوعلي بعيونه لمعه وابتسامه حزينه ويهز براسه ::لا ما اتركج وحتى لو ابتعدت واي شي يصادفج يقهرج 

غمضي عيونج وانتي راح تشوفيني ندوش انتي انسانه قويه وبطله وانا متاكد راح تبقين بمدرستج 

...عمو خايفه وانت مو يمي اقصد مو يمنا 

::لا تخافين امامج طريقين اما تتكسلين ويبطلوج وهذا قمة الضعف وراح تبقين ضعيفه واي شي ما راح تتحققين

 من احلامج او تبقين بمدرستج وتدرسين وتنجحين وراح تحققين كل احلامج

حنين //وانا هم عمو 

باوع الها وگال ::طبعا انتي هم شعبالج لعد 

حنين//مو اشوف الكلام بس الناديه 

::لان هي الچبيره وهي الي راح تسمعين كلامها وشنو تگلج تگليلها صار وانا اعرف شگد تحبين اختج 

حنين //صار عمو بس انت لا تتركنا

هو وگف السياره يم محل وگال ::تدرين ندوش انتي حياتج راح تتبدل المجرد دخولج للكليه 

حنين //حييل شگد بعد 

باوع الها وغمض نص عين ::لا بسرعه السنين تركض البارحه انتي صرتي 

باوعتله ......شلون عمو 

::يعني اريد منج تتحملين الى ان تكملين سادس وبعدين يصير خير

...اي غير تفهمني 

::يعني من تنجحين من السادس انت تصيرين ولية امر نفسج بس هذا الكلام ابد ما اريده يطلع الاي احد مفهوم 

هزيت راسي 

::ندوش احفظي رقمي على گلبج هو ورقم عمه زهراء 

...ليش عمو مو عندي جهاز بيبي 

::لا عمج هادي اكيد راح يسالج عنه وانتي انطي اله وهاج (طلع جهاز من جيبه هو والشاحنه گلي )هذا خلي عندج 

محد يشوفه ودائما خلي صامت وانا اعبي بي رصيد وبس مسجات افتهمتي

هزيت راسي 

باوع الحنين ::حنين بابا افتهمتي مو تحچيين وتگولين ناديه عدها جهاز نقال 

حنين //اي عمو ما اگول

::واي شي عمه زهراء موجوده تطلبنه منها 

...صار بس انت لا تتاخر دووم تعال 

ابتسم وگال ::هم صار بس اهم شي تبقيين قويه وما تخافيين من اي شي وتديرين بالج على نفسج وعلى اختج

نزل يم المحل واشترا نساتل وكاكاو وعصائر وچبس وهواي شغلات 

وصلنه البيت عمي هادي وسلمت عليهم واجه عمي گله //شو اتاخرتو

::مريتلهن بالمحل واشتريت حلويات هاك هذن للجهال 

هادي //يمعود شنو هالزحمه ياالله اتفضل نشرب چاي

هو رد ::لا عندي شغل بالدائره هادي دير بالك على بنات عباس 

هادي //تحچي صدك ذني بناتي 

سراج باوعلي وغمض عيونه وهو يگول ::الله يرحمج ياعمه

ما اعرف ليش حسيت بعد ما اشوف عمو سراج 

دخلنه البيت هادي يمكن صار ثمن سنوات او اكثر ما شايفته للبيت من لمن صار الحادث من دخلت اتفاجات 

بي شلون معدله وماخذ القطعه اليمه ومسويها مضافه چبيره ويمها مطبخ وصحيات وكراج وحديقه چبيره لان 

طابك وياها الطارمه والبيت الداخلي نفس ما كان لكن مجدد الصبغ والاثاث ومكبر المطبخ

دخلنه حنين فاهيه ع البيت واشوف شلون افراح وبناتها ضايجات من جيتنا افراح گالت گدام عمي وهي تفتح باب 

الديوان القديم // انتي واختج اليوم نامن اهنا على ما باچر اشوف وين اگعدچن 

هي باوعت العمي وحاچتني وهي تحرك برجليها 

- - اسمعي ناديه انتي واختج هاي احاچيچن گدام عمچن انا مره عدي ولد شباب وانتن شابات باجر اشوف الچن 

غرفه تگعدن بيها من يجون الولد لا تتخطفن گدامهم تگعدن بغرفتچن وتسكتن والحجاب ما ينزع افتهمتن مو باچر

 تجيني اجميله لو ازهيره وتصير عنتر براسي

انا ما جاوبت بس بقيت صافنه على عمي الي ما رد لو بكلمه اخذت اختي ودخلنه للديوانيه الي هي مخليتها غرفه استقبال

 بيها طخم قنفات جديد يخبل ومفروشه زوليه راقيه ظلينه واگفين اجت وگالت 

- - هاج هاي مخده الج ومخده الاختج وبطانيه الكل وحده نامن ع الزوليه مو تدمرنها

وسدت الباب وانا القهره بگلبي شنو اندمرها ومنين اجت كل هاي الفلوس اذا هلگد عنده ليش چان من يجي ياخذ 

من بيبي ودووم ايگللها الراتب ما يكفي ربع الشهر 

لو من اتوفت بيبي الله يرحمها شلون صار يطالب بفلوسها وما كلف نفسه ينطي دفنه الها

اسمع هديل اجت وهي تسال //شنو ماما وين نيمتيهن 

افراح //اهنا بالغرفه الچبيره 

هديل //وليش ما خليتيهن اهنا ينامن 

افراح //ناسيه الدرج وينزلون اخوانج خليهن وباجر اشوف الهن غرفه

طلعت وگلت ......عمو خلي انجيب چرابينا وكنتورنا 

افراح هزت ايدها //من حلاة الكنتور والچرابي روحي نامي والصباح رباح 

قفلت الباب وطلعت النقال لگيت رساله من سراج 

::ها ندوش شنو الاخبار 

جاوبته ... بعد عمو الرؤيه ضبابيه خلونه بالديوان الداخلي 

:: اكيد باچر ينطوكم غرفه 

...عمو مو مهم بس اهم شي لا تتركنا

::ندوش اترك عمري وما اتركج انتي وحنين بس لا تنسين احذفي الرسايل انا متاكد باچر هادي يسالج ع النقال

انتي اقفلي وگليله عمو هذا جبته وياي البارحه 

...اي 

::وصيتلج زهراء باچر تجيبلج ملابس سود للدوام

انا ما جاوبته صرت ابچي هو كتبلي گلي 

::ندوش لا تبچيين امسحي دموعج ولا تنسين تحذفين المحادثه ياالله بابا 

انا مسحت دموعي وحذفت المحادثه اجتني رساله منه گلي 

::ناديه من نضوج لو ننقهر شنسوي 

انا كتبتله ... اغمض عيوني واشوف 

::شتشوفين 

...اشوف عمو سراج وهو يضحك

::مو بس اني شوفي اي انسان تحبي مو بس سراج 

انا راسا كتبت بدون تفكير ......بس انا احبك انت وبس 

ما رد عليه اله بعد وكت گلي 

::ندوش احذفي الرسايل واغلقي الجهاز ونامي 

...صار عمو 

::تصبحين على خير بعد ما اكتب اي شي اريدج تنامين وتديرين بالج 

هزيت راسي عبالك هو يمي وكتبت ::وانت من اهل الخير

وحذفت المسجات وغلقت الجهاز ورحت يم حنين الي لگيتها مطلعتلي دشداشه والها دشداشه نمنا اكيد انا ما انام اله 

بعد صلاة الفجر والصبح فزينا على دگة الباب 

فتحت الباب شفت افراح وهي تباوع للديوانيه وتخوزر بينه انا وحنين سالتني بنتر

- - ليش قافله الباب 

جاوبتها ...عمه مو انتي گلتي عندج الولد وما تردين تشوفينه بدون حجاب عاد انا قفلت الباب عليه انا واختي 

افراح بامر //لمي الفراشات وتعاي انتي واختج وراي 

لميت البطانيتين وخليت المخاد فوگهن ورحت انا وحنين بعد ان لبسنا دشاديشنا الطوال وحجاباتنا غسلنه بالمغسله

 وحنين متعوده تطول اذا غسلت لكن انا مجرد ما غسلت وجهه بالصابون والماي سديت الحنفيه واشرت الها بوجهي

هي افتهمت رحنا للمطبخ الي كان چبير كلش بي كاونترات اخر موديل ومجمده وثلاجه وتلفزيون وبراد وبي طاولة طعام 

شفتها كاعده على الكرسي واديها على الطاوله وهي تريد تنفجر سالتنه //شنو ما ترحن للدوام 

...اي عمه نروح بس مو اليوم لان ما عدنا ملابس سود عمه زهراء گالت تجيب النه 

هي باستهزاء //اي زهراء كريمه طالعه الامها اكعدي ذاك ريوكجن

شفت صينيه بالكاع يعني هاي رساله من تاكلن مكانچن بالگاع هي گالت //بس تكملن الريوك تعالن للصاله اريدچن

مخليتنا بالصينيه كوبين چاي وصمونتين وجبن مثلث حنين تريد بيض لان ما تحب الجبن المثلث وادري بحنين 

ما تكفيها صمونه رحت لگيتها گاعده باوعتلي وهي عاكفه خواجبها //ها شرايده؟ 

...عمه حنين ما تاكل الجبن المثلث متعوده تتريك بيض 

هي لمت شفايفها وگالت //افتحي الثلاجه واخذي بيضه وحده طگيها الها (وهزت ايدها ) متعوده هههي

فتحت الثلاجه وحنين تباوعلي شفتها مليانه خيرات الله اخذت البيضه ورحت يم الطباخ شفت طاوه بيها شويه زيت 

وبقايا بيض اجت حنين يمي گلتلي //ندوش بس بيضه

باوعت شفتها تريد تبچي هزيت راسي وصرت اخلط بالبيضه لمن ما سويتها كانما كريمه وصبيتها بالطاوه 

صارت قرص وانطيتها الحنين الي صارت تاكل وتدمع انا ما حاچيتها صبيت چاي واخذت نص صمونه 

وجبنايه وحده واكلتها بعد ان كملنه كفيت المواعين وصرت اجلف بيهن وگلت الحنين امسحي الكاونترات

حنين هزت راسها بعدم الموافقه انا اخذت قطعة قماش ومسحت الكاونترات من كملتهن رحت انا وحنين وصلنه يم 

عمه افراح هي باوعت وگالت 

- - اسمعن زين انتن اجيتن اهنا تعيشن بهذا البيت ولازم تعرفن شي واحد انو الامر الناهي والكلمته تمشي 

هي بس انا تنسن عمچن او بيت جميله 

- - انتن مو زغار اذا تردن تعيشن اهنا تسمعن كلامي وتنفذن اوامري ماكو باشاره مني هادي يگدر كل شي يسوي 

حتى يذبحچن

احنه صرنا نباوع الها هي كملت 

- - اسمعن دلال وعيارة منيره تنسنها الي اگوله انا يمشي راح تگعدن بغرفه ممنوع تنزلن بغدا بعشا اكلچن

 انطيجن ايا تصعدنه فوك واذا احد سالچن گولن نستحي عاد خلي ينسون سواية مي...ياالله ما علينه 

الشغل تتقاسمنه بيناتجن خو مو گاعدات وتردن احنه نصير الچن خدم عاد حللن اللگمه التاكلنها ومو 

بكيفچن تسبحن تستاذنن لان انا عدي ولد مو عوزي فضايح فوك من الناس

(وكانها اتذكرت شي )ها ها وليش خو اسبحن بالبيتونه بالليل احسن الجن فوك اكو صوبه وسطل وطشت 

وسبحن اخذن ماي من المقطوره بيها حنفيه ع السطح احسن 

احنه اتعجبنا هي اتقربت من عندي

- - ها ناديه خاتون مفهوم واذا ما تردين گولي اكو هواي خيارات 

هزيت راسي وسكتت هي گالت //ياالله جيبن ملابسچن وتعالن وراي

جبنا جنطنا ورحنا وراها هي تصعد بالدرج وانا وحنين بيدنا الجنط ونفسنا مكسوره من الي سمعنا 

وصلنا الطابق الثاني كان بي صاله ومطبخ واربع غرف وبوسط الصاله درج صعدت اله واحنا وراها فوك 

اكو بيتونه وغرفه زغيره يعني مبين مخزن فتحت الباب وگالت

- - كفظنه ونظفنه واكعدن بي وحده منجن تنزل تصعد الفراشات الي نمتن عليهن وتفرشنهن 

صفنت شفته مخزن بي غراض وهواي اشياء فزيت على صوت افراح 

- - ياالله بسرعه سولچن همه ورتبلجن مكان 

انا رديت عليها ......عمه خلي انجيب جرابينا وكنتورنا 

افراح //لا عيني وين تخلنهم 

حنين //عمه هاي هواي غرف بوحده منهن

افراح خزرتها وگالت //لا غلطانه الغرف وحده الياسر وحده العمار وحده الاسيل وحده الهديل 

حنين اشرت على غرفه// عمه بذيج الغرفه الزايده نگعد 

افراح //لا هاي للخطار الي يجون يباتون بيها 

حنين //عمه خلي هديل واسيل بغرفه وانا واختي بغرفه

افراح بنتر //عود من نبيع قصر يلدز نسويلج غرفه (اتقربت عليه )فهمي اختج ما اريد لغوه زايده

لزمت ايد حنين وخزرتها يعني اسكتي وباوعت الافراح باحتقار وهي نزلت وتگول 

- - ما بقن عليه اله اطلع بتي من غرفتها واگعد بيها النغلات بنات الگ..

حنين باوعتلي وصارت تبچي وتگلي //ناديه خلي نرجع والله اهناك نبقى ابحدنا وما نخاف اهنا نخاف 

انا حضنتها وگتلها...... نسيتي شنو گال عمو سراج لازم نتحمل كلها تلث سنوات

حنين //وابقى اهنا تلث سنوات لا ناديه ترديني اموت 

... لا حنين لا تحچين هيج ما سمعتيها من تگول الحل والربط اب ايدي يعني هاي تگدر كل شي تسوي 

حنين //ناديه انا خايفه 

حظنتها حييل ...ما طوول انا يمج لا تخافين ياروحي

وبقيت امسد على شعرها واحچي ويه روحي 

......لازم اصير قويه لان مو انا ابحدي لا لازم اصير قويه الخاطر حنين اكيد بيوم من الايام كل شي يتغير ما 

معقوله نبقى هالشكل 

باوعت الحنين وگتلها ......ياالله حنونه على عناد فرح الشريره خلي انظف مكانه ونفرش ولازم نصير اقوى من 

هاي الظروف ولازم ننجح على عناد هاي الهمجيه بت الفگر

حنين تحچي وهي حاظنتني // الحيزبونه الشريره 

...اي الحيزبونه 

ولاتنسين عمج 

...وعمي 

- وهديل 

...كلهم قاطبتا

وضحكنا رغم اشوف حنين ضحكتها بحزن بس مضطره تجاملني مثل ما انا اجاملها وادري بعد هواي راح نشوف 

ماسي وضيم واتذكرت عمي سراج من يگلي من يصادفچ موقف او تخافيين من شي غمضي عيونج 

انا غمضت عيوني وبقيت افكر بس بسراج وشفته وهو جاي يمشي ويبتسم

جريت نفس وابتسمت وفتحت عيوني وانا اعرف راح تبدي مرحله صعبه وصعبه جدا ولازم