رواية بيوت الصفيح الفصل الخامس والعشرون بقلم زهراء السراي
"كالخيلِ يمنعُنا الشُّمُوخُ شِكايةً
وتئِنُّ من خلفِ الضلوعِ جروحُ
.
.
.
.
.
.
مُنى
_______
أحيانا لا تأتي الحقيقة في وقتها المناسب
بل تزحف ببطء
تتسلل خفية وسط الضباب
حتى إذا ما انقشع كل شيء
ظهرت كأنها كانت موجودة منذ البدء
فقط نحن من أغلقنا أعيننا عنها
أيام متعبة وثقيلة تمر عالبيت
مرض أسد وعمليتة وية
تعب الحجية اللي تخفي عنهم
وحمزة اللي بالة مشغول وقمر
اللي على خلاف وية امهة لأن متقبل
تروحلهة للبيت واني
وتفكيري بالامتحانات كل يوم
اطلع مادة نراجعهة اني وقمر بس
رغم هذا احس ماكو فائدة دماغي
جامد اقرا واقرأ ومجاي استوعب
شي تعودت على صِبى و غِنى
يقروني أنقهر ومااگدر اضغط على
صِبى اشوفهة محتارة بين اسد
والبيت وفقار يجيب الشغل يتعاونون
علي تقريني واني اگللهة ماكو داعي
لأن اشوف التعب بعيونهة مرات اسمع
صياح اسد وعصبيتة عليهة
وهي تواجه بصمت وهالشي جاي
يمرضهة ويخليهة تذوي
وتتعب كل يوم الصبح انزل
للحديقة اراجع وتتسلل الحجية
تخلي صحن فاكهة ولفة وكوب حليب
وجاي يمي وتدخل
گاعدة اراجع لباجر امتحان فيزياء
واحس اريد ابجي هوواية المادة
خلت الصحن عالميز
-اكلي يلة تقرين
-شكرا بيبي
صوتي رايح وأريد بس ابجي
خطواتهة تراجعت واجتني
گعدت عالكرسي بصفي
-شبيج بيبي
-تعبانة المادة هواية
-اراجعلج
باوعتلهة مستغربة
-ولج عبالج اني امية
ترة موظفة متقاعدة بمحكمة ال……
ابتسمت
-مااعرف هالشي
ربتت على ايدي وضحكت
-شلون صدت غالب غير شافني
بالمحكمة
بيبي ليش وجهج مهموم هيج
امتحانات وتخلص وانت شاطرة
اني شفت اوراق الامتحان من تجيبيهن
-احس راسي فارغ
-ما مرتاحة هنا
غطيت عيوني امنع دموعي وضحكت اخفي
احراجي
-لا والله انتم ممأذيني بس اني ماادري
شبية
-احساس الغربة صعب مو
-اي هواية
مسحت دموعي وهي تباوعلي
-اول أيام من اجيتي تابعتج
تعرفين ششفت بيج
-شنو
-شفت نفسي امي ماتت واني اصغر
اخواتي واخوي جانو متزوجين واني بالمتوسطة
صرت كل يوم ببيت لحد مااستقريت ببيت
عمي رفض يخليني يم احد
رحت عشت يمهم ماجانو مأذيني
بس احساس الغربة مرضني ابجي
على كل شي ومن كل شي احسب
حساب للكلمة وحتى الاكل اگول
اذا اخلص صحني گدامهم يگولون مشايفة
ومااطلب شي الا عمي يجيبلي بكيفة
شفت نفسي بيج من الصبح اطلع بدون
ريوگ استحي اكل لأن عددهم هواي
وصرت اذوي واضعف من كل شي
بس شنو انتِ اقوى مني
متكلمة وشاطرة وذكية
مراح تسوين هيج انت محسوبة من عدنة
مثل قمر اني يابيبي صح ساكتة بس هذا
طبعي مو معناهة مااحبج لو مااريدج هنا
فهمتي علية
هزيت راسي مبتسمة
-وادري بيج من تفتحين الباب تباوعيلي
واني اصلي ومن ترتبين غرفتي
احسبيني مثل ماتحسبيني ام
خالة بيبي بس لا تذبلين
الدنيا اقدار وانت قدرج
تفقدين امج بس مو معناهة
تعيشين عمرج خايفة
ومتقوقعة على نفسج
من تصير لمة لا تختلين بالغرفة نزلي
واختلطي غصبا عن الكل انت صرتي
بت هذا البيت تمام
-تمام
-يبست رياگي انطيني مي من يمج
شربت المي وبقت تسولف وياية
وكعدت صدگ تراجعلي
ومن هاليوم سويت اللي گالت علي
صرت اتعود شوية شوية عالكل
بس بأحترام صرت اتصرف
شوية براحة اكبر الى
ان خلصنة الأمتحانات والحمد لله
ارتاحينا بيومهة سوالنا حمزة طلعة
للزوراء احنة ويا والحجية وحتى ستيفاني
تونسنا بيهة ولعبنا
ورة هالفترة بأسبوعين
اخذنة حمزة نستلم النتائج
وطلع گال ربع ساعة وراجعلكم
راح واحنة استلمنا النتائج ناجحين
صورنا وية صديقاتنا وطلعنة
حيدر ينتظر اختة سلم علية
وصار على جهة واختة بصفة
تحجي وياية وهو ساكت الولد
وگف حمزة ودگ هورن صعدنا ويا
بقت عينة ثابتة على حيدر يباوعلة
عدل المرايا علية وخزرني ماعرت اهمية
للموضوع لأن فعلا ماكو شي
رجعنا للبيت بس دخلنة هو صعد لغرفتة
فرحانين اني وقمر وهي بخبال شغلت
اغاني نجاح وتصفگ بالغرفة
اندفرت الباب فتحتهة قمر
-كاووووووولية احنة
-اسفة خالووووو
طلع وهو يخزرني مر هاليوم
وهو مثل الجداحة محد يحجي
ويا بس نامت قمر راسلني
-شعندج واگفة وية هذا
-مواگفة يمة والله جنت احجي
وية اختة ليش شصار
-رافعلي حاجبة ويضحك بأستهزاء
-والله ماادري بس گال السلام عليكم
ووخر
-اذا يشوف البنات مستخفة طبعا يسلم
ويتمضحك عبالك ووووحدة عايقة
-هاي اني المستخفة
خلالي ايموجي اووووك
گمت حظرتة بدون تفاهم دگ
عالخط رجعت حظرتة
دگ باب الغرفة مارديت هيج
افضل كل واحد حافظ احترامة بدون
مشاكل
مر اسبوع واحنة اببببد حتى منخلي عينة
بعين بعض ومنكون بنفس المكان
ليوم الجمعة الحجية سوت غدة بمناسبة
نجاحنا وسلامة أسد لأن صار يمشي عزمت ام فقار وسناء وام قمر
ام قمر مگدرت تجي عدهة عزيمة لأهل زوجها
تغدينة وگاعدين ننتظر الجاي تلفوني
بيدي قمر الكلبة تراسلني وتدز صور مضحكة
كل شوية مبتسمة بوجهة وهي تخبث تدز غيرهن
اباوع لحمزة عينة مني ورجلة تهتز بعصبية مركز وياية
اخر شي ضحكت ضحكة خفيفة مكممة شفافي
خاف ننفضح
الكبار صايرين على جهة ومحد منتبه
اجة صار گدامنا بدون نقاش بسرعة سحب
تلفوني وتلفون قمر ومشة بسرعة لغرفتة
-شبييييي تخبل
اشرتلي قمر گتلهة مااعرف
ثواني أستوعبت اني حافظة الفيديو بمحادثة
التليگرام اللي اساساً نحجي بيهة
اني وقمر وبعدهة مفتوحة
وگفت وركضت الدرج وراية قمر
-شصاااار
-الفيديوووو بعدة بمحادثتنا محفوووووظ
ضربت على خدهة وخارت قواهة وگعدت بالگاع
قويت نفسي ورحت وگفت بباب الغرفة أرجف جنت خاااايفة بس احاول اسيطر عالموقف بس
حااااسة راح يصير شي أهمس لحد يسمع وادگ الباب بهدوء وهي بصفي تبجي
-فدوووة جيب التلفون ماكو شي والله
جنت احجي وية قمر
ربع ساعة انهارت بيهة أعصابنا رجعت أدگ
مرة مرتين ثلاثة هدووووء دگيت
وعاط
-دقيييييييقة
ثووواني بس جانت تفصل بينة وبين الكارثة
انفتحت الباب ووگعت عيونة على قمر
عيونة جانت جمرررر تشرح عذاب سنين
شافة هو مختصر بلحظة
ركضت هي هاربة من نظراتة وهو دخل الغرفة طلع راااااكض بيدة مسدس جان صوت الغضب يزمجر
داخل اضلاعة وارتفع وانفجر وهو نازل واني
اسحب بي أمنعة من الكارثة
فلت من ايدي وهو يلتفتلي
-ايييييدج مُنى شلوووون صار هيييج
تررررررررركيني
گالهة نزل راكض الدرج
والكل بالهول وگف يشوف شصاير
ركض حمزة سوة الدرج خطوتين
ومابلسانة غير كلمتين يصيح بيهم بصوت مجروح
-اليووووووووم موتة على ايييييدي اليوم
اكتلة
الحجية لگفتة بالباب
-وللللك يمة وووووووين رايييييح
دفعهة بخفة ايدة وركض ورا فقار
محد لحگ بي فقار لحگة بسيارتة
جمدت اني وأنظار الكل توجهت تتسائل
ليش اني مانعتة ينزل
ركضتلي صِبى
-احجيييييي وين رايح الولد ليش لازمتة انتِ
مگدرت اگول شي بس
-راح لبيت ام قمر
مگدرت احجي بعدهة اي شي
جسمي تشنج وبديت ارجف
والكل حوالية والتلفونات كلهة
تدگ ربع ساعة وحلت الكارثة
واتصال ام قمر وهي تعيط
-ماااااااات حمززززززززة ولكم لحگولي
بعد اللي سمعتة فقدت الوعي لوقت
غير معلوم بس صحيت على ايد
صِبى تصحيني والبيت فوضى
عينهة بعيني مخسرت بس كلمتين
-حسابج يممممممممي
اتصالات وهووووسة صِبى كل شوية
تتصل تطمـأن ومتحجي گدامي
شهگت وتبجي
مشيت يمهة ماسيطرت على دموعي
-حمزة مات مووووو
تمسح بعينهة ومترد تستمع
لأسد
الحجية طلعت وتصيح
-الحمد لله يارررب الحمد لله
للآن محد فاهم شصار
بس الحجية اجت لصبى
-يووووم صعديلهة رجلية ماتعيني
سووووودة بووووجهي ولج قمووورة
يمة
سحبتني صِبى لغرفتهة بعد ماطمنت الحجية
اول مدخلت سدت الباب وضربتني
كف ارتديت بسببة ليورة
-هسة تحجيلي كل شييييي فهمتتتتتتي
لو لا قمممممممر ليش حبست نفسهة
تلفونج ليش لگيتة بغرفة حمزززززة
احجي
اني واثقة انها عرفت السبب بس
تريد تسمع مني
-والله افهمج بسس……
-ماااااابي شي حمزززززززة وهذا مووووضوع
نحجي بي بعدين فهمتي
بديت احجيلهة بشكل مختصر اللي
صار لقمر من شدة الموقف گعدت
عالسرير متگدر تحجي
دارت وجهة الية ورجعتلي بكف ثاني
-عباااااالج هالشي هييييين محجيتي
-شلوووون احجي وهي صاحبة الشأن
متحجي
-لج انتِ واااااااااعية بيدوفيلي متحرش بالاطفال
عايش حياااااااتة والطفلة هاي متحطمة
هييييييي عدهة اسبابهة للصمت انت شنو عذرج
-سرررررر سرهة امنتني علييييي شنو
موقفي واني احجيلج شي گالت علي سررررر
-لج هاي جرررررريمة كاااااااارثة
ياااااسر
-متعرفين هي بشنووو مرت متعرفين
ليش سكتت
وگفت وسحبتني وياهة
-ينتهي هالموضوع واطمأن على قمر
وحمزة ونطلع مناااااااااااا فهمتي
رجعت ابجي سحبتني من شعري
-بعتي مشاااااعرج مووو هو هذا المقهورة
منة حمزة مووووووو
هزيت راسي انفي الكلام دفعتني گدامهة
-دخلي لقمر شوفيهة
دگيت الباب وحجيت بهدوء
-قمر فتحي الباب
هاي اني بس طمنيني عليج
فتحت الباب عيونهة ممرودة من البجي
وحضنتني
-انتهى كل شي قمررر انتهى كل شي هسة
انتِ بأمان هسسسة لازم تحجين
-خالو حمززززة
-الحجية تگول ضربتة سهلة
دخلت وياهة للغرفة تلفونهة يدگ
بأسم امهة مترد
بقينة بالغرفة للعصر دخل أسد
علينة للغرفة
بس شافتة قمر رفعت اديهة تحمي نفسهة
تقرب منها وسحبهة حضنهة
-تخافين مني قمر
-خالو والله مو اني السبب
-ماجاي احاسبج جاي اطمنج
-خالو حمزززة
-حمزة ضربتة بسيطة
-وو هووو ………
ارتجف صوتهة خايفة
-هوووو حسابة يمي سحلتة سحل
من المستشفى للمركز ومنا اني راح استلمة
ماگال شي ثاني بقى حاضنهة
يواسيهة مر هاليوم كل واحد
يفكر بشي
أسد يفكر شلون يحاسب أياد
على عملتة
الحجية راحت للمستشفى واصرت
تبات يم حمزة
ام قمر اجت للبيت ودخلت غرفة امها
قفلت على نفسهة
ومفتحتهة لثاني يوم
نزل أسد يسحب بأيدة قمر ودگ الباب
عليهة وية دخول الحجية من برة وفقار
ساند حمزة اللي جانت بطنة ملفوفة ووجهة
شاحب راحلة أسد حضنة
وگعدة عالقنفة
اباوعلة من بعيد ميباوع بس على قمر اللي تبجي
اشرلهة راحت حضنهة وهو ساكت دقايق
وام قمر فتحت الباب جان وجهة أحمر بس
شافت حمزة ركضت حضنتة قمر ابتعدت
لزمهة أسد وعينة من امها
-ميااااادة گعدي نحجي
-ماكو شي نحجي اسد وانتم ساجنين
الرجال
-بابا أنت مستووووعبة الكلام
-شستوعب بس فهموني رجال صارلة عمر
وياي وصاحبكم مايوم شفت علي
شي ولا انتممممم فجأة صار متحرش
بس اريد استوعب
لطمت على خدهة وقمر باوعتلهة
-ممصدگة مو ماما
-حاجيتلي شي انتتتتتتتِ حتى اصدگ
ركضت قمر الغرفة جابت تلفوني
فتحت الفيديو وخلتة بيدهة
صفنت ام قمر اللي متعرف شي ولحد
الان عبالهة الشغلة بس اتهام
بلعت ريگهة بالگوة
-يمممممتة هاي
-كل مرة وكل يوم وكل جية الية يمج
بهتت قمر وگعدت بصف حمزة ساندة راسهة
على كتفة
رفع ايدة يمسح على راسهة وگوة يحجي
-والله اخذلج حقج وزااااايد بس
خل يطيحون حظة بالمركز
-صددددددگ تحجون بنتي تنفضحححححح
واني انفضح وهو ينفضح
ولأول مرة اشوف الحجية منهارة
بكل قوتهة ضربت ام قمر على وجهة
-بنتج تنفضحححح شنوووو انت حيووووانة
ولج هوووو الينفضح هوووو الغلطاااان
لزمت وجهة تبجي وانهارت
-اذا صااااااارلة سنين يتحرش بيهة
هسة قرررررررت تحجي ليييش ساكتة
من سنيييين بس اريد استوووووعب
لجججججج قمر ليش ساكتة
قمر جانت هادئة مثل تمثال شمع
منظر يدمي الة الگلب وتدمع العيون
صوتهة رغم هدوئة جان ثابت وقوي
وكأنها امتدت قوتهة من خوالهة اللي
وكفو وياهة
-شتحبين تعرفين ست ميادة
من يمتة من اول مادخلتي بيتج
ونسيتي بابا من خلالة وحتى اني
نسيتيني
من صف الثالث أبتدائي
شهگت امهة وضربت على وجهة
-لييييش محجيتي وشلووووون
-اني طفلة صغيرة خايفة استغل خوفي
من فقدان بابا وصار يهددني
بالسجين ان يذبحني
-كذاااااااااااااااااابة
صدييييق ابووووج روح بالروح
ضحكت قمر ووگفت تحجي بأنهيار
-كذااااااااابة تماااااام
رفعت التشيرت مالتهة وفقار دار وجهة
بسرعة طلعت بطنهة
-هذاااااااا شنووو ماما
-احترگتي بكوب الجاي
-هووووو حرگني بالقورررري
لأن ردت احجي لبنت عمي
فتحت التشيرت بينت حمالتهة وخوالهة نزلو راسهم
محترمين عمق حزنهة وفقدانها لأحساسها
-هااااااية شنووووو تعرفين
هذاااااا الحرگ لأن هددتة بخوااااالي
حرگني وأيام وليالي اني ابجي من الالم
ومن تدخلين تگليلي صايرة
دلوعة عبالج من تعب الدروس
عمررررج مافتشتي تلفووونة
البي مصوررررني عريانة يهدددددني
انت اكثررررررررر ام فاشلة شفتهة بحياتي
-اننننننننني مو فاشلة اني زوجة مخدوعة
امممممممم مخدوعة
-ام مخدوعة
اني بشنوووو خدعتج
-من كبرتي لييييش سكتي
-اني مسكتت والدليل بيدي اني
فرررريت الستيرن حتى امووووووت
وسويت الحادث
شهگت امها وأسد ماگدر يبقى واگف
سندتة صِبى وگعد عالدرج
بجت قمر واشرت على گلبهة
-كل شي كاتبته هنا ماما
كل شي كاتبتة بگلبي
التواريخ الجروح الصمت وحتى المرات اللي خفت أموت نفسي بيهة لأن عجزت وخفت
حجت امها بصوت خافت وخايفة من اللي راح
تسمعة
-شنو سوة بيج احجييييي
بس أريد أعرف أريد أسمع حتى
احكم
وگف حمزة وهو يتألم لازم بطنة
- شتحكمييييين لج مييييادة حيوووانة
انت ميحتاج تحكمييين وووواضح منو المجرم
ومنو الضحية
-افهمووووني اريد اسمع حتى اوگف وياهة
ردت عليهة قمر بخذلان
-ههه أنتِ توگفين وياي
وينج بكل مرة غبتي بيهه عن البيت وتركتيني
ويا
-مأمنة بي احبة واعرفة وجان صديق ابوج
وحتى عمامج يعرفو وصديق اسد
-تحبببببي بعد السمعتي وشفتي
دسمممممعي لعد الرجال اللي تحبي
بعد كل مرة تطلعين وتسدين الباب وراج
مأمنة يدخلي واني طفلة عمري ٨ سنوات
يلبسني ملااااابسج مال النوووم ويستمتع
وياي كأني مرررررة جبيرة
تقدمت بسرعة لقمر وضربتهة على
وجهة
اسد تحرك ماشي بسرعة ورجعلهة
ذات الضربة
-هاييييي الضربة الج حتى تووووعين على
نفسج بنتج الضحية ياغبية
-أسددددد افهمني شلووون
-مااااكو شلون اكو نفس دنيئة
واكو ام مهملة لتلوميهة مخووفهة يگلهة اذبحج
وهي طفلة
-ومن كبرررررت
-شووووفي محادثتة اللي حافظتهة بتلفوووووني
شمرت التلفون يم امها
اخذتة بأيد ترجف مگدرت تفتحة
مدتة لقمر فتحتة
ودخلت عالمحادثة اللي حافظتهة
من فترة طويلة
بس فتحتهة عاطت وانهارت تلطم بالگاع
- لاااا لاااااا لااااااا مو هيج لاااااااا
ليش ما گلتِيلي
-اگلج وهو يهددني مسويلي محادثات كاملة
بصورتي
فز اسد راد يلزم التلفون يشوفة عاطت قمر
-لتشووووفة خالو حبااااااب لا
حضنهة وهي تبجي
حجت امهة
-يمتتتتة هاااااي يمتة الصورة
ماصحتي ماعيطتي
انفجرت قمر تعيط
- صحت صحت بدموعي بجروحي بخوفي
بس انتي جنتي مشغولة بدوامج تركتيني مكسرة يمة
سوة بية اللي سوا وكسرررررررني
عاطت امهة
-لتگووووووووليهة ولج قمر
وگف اسد لازم وجه قمر وشرايينة تريد
تنفجر يأشر براسة يحاول ينفي اللي راح يسمعة
-ماصار شي مووو قمر بس صووورج وهددج مو
باوعتلي وبجت وكعت دموعي وهي فاتحة ايدهة
رحتلهة راكضة ضمت راسهة بحضني وهمست
-خالو اخذلي حقي
صرخ حمزة ولزم بطنة
-قممممممر سوووواهة مووو
بجت بصوت عالي
وهمست
-خالوووو اذاااني اغتص………
قبل لتكمل كلامهة ارتفع صوت التحفيات
اللي عالطاولة شمرهن اسد وصدح
صوتهن بأرجاء الهول ويا عياط ميادة
-ووووووووووين يمتتتتتة ولج يمتة
بجت قمر وتحاول تستجمع قوتهة
-من تركتيني يمة مكسسسرة ماااااما شنوووو
نسيتي اتصلت بخاااااالو وبيبي اخذووووووني
انت لاهية بي طلعاتة سفراتة عزززززايمة
وتاركتني اصارع تگليلي ليش محجيتي
ليش انت وين غريزتج كأم من صررررت رابع
ابتدائي تركتيني اسبح ابدل لووووحدي
وشمرتيني عليييي طلعاتي مشاويري كل شي
يخصني وهو استغل الفررررصة
ماجربتي مرة تشوفيني
وتغاضيتي عن تصرفاتة ماحسيتي من يگلج
خليهة تحت عينج ماحسيتي من خلاج
تمنيعيني من بيت جدددددي
موووو بس اني ضحيييتة
اني ووووواثقة اكو غيري هووووواية
هذا شخص مررررريض فهمتي
توجهت لأسد لزمت ايدة تبجي
-خالوووو اني مو غلط موو
هوووو يگلي صرتي نجسة وقذرة
والكل راح ينبذج اذا سمع وعمامج
يقتلوج هددني وسوة محادثات مفبركة
بصوري وراد ينشرهة
خالووووو اني مقابلة والله
كل مرة جان يسوووي اللي يسوي
جنتتتتتت ابجي واعيط
واضرب نفسي والله ثلث مرات
حاولت انتحر بسببة
خالو يگلي محد يصدگج
التفتت لحمزة
-خالو حمزة مصدگني مو
اشرلهة وهو يفتح ايدة
راحت لحضنة
هدوء عم الغرفة وأسد اشر لصبى
-جيبي تلفوناتي وجنطتي هسسسة
باوع لأختة
-تلفوووون العار ويييين
-بالبيت بقة
-گووووووووومي وياي
-وييييين أسد
-تجين لا والله انسى انج اختي الاكبر
مني واتصرف تصرف ثاني ويااااااج
گوووووووووومي
گامت للغرفة لبست حجابهة
وطلعت وية أسد
حمزة ميگدر يحجي اخذة فقار و صِبى
لغرفة الحجية يرتاح
قمر وياية صعدتهة
نص ساعة ومن البجي نامت
اجتني صِبى اشرتلي
طلعتلهة لزمتني بعصبية
-ذاك اليوم جابكم أياد سوالكم شيييييي
-لا والله بس خوفنا يمشي سررريع
-يعني يدري بيج تعرفين بسوالفة
-مااادري والله
-سمعي مُنى لتشوفيني ساكتة
حظجججج اطيحة انتِ صرتي جزء من
هالقصة الحزينة شصاااار وشحصل
وشحاجيتلج قمر اذا توجهلج سؤال تحجين
تماااااام
-تمام
تركتني وراحت بقيت يم قمر لليل
وارتفع صوت أسد بالبيت
جان منهار وحتى تجاوز على ام قمر بالكلام
جان يحجي بعصبية عيونه محمرة وصوته عالي
-بس گوليلي ليش ليش رافضة تروحين تبلغين عنة
هذا مو رجال هذا وحش تحرش ببنتج انت مستوعبة
-موووووو سهلة افهمني أسد ابلغ على رجلي
وبنتي وانفضضضضح شلوووون اواجه الناس
شلوووون اواجه هالعار اللي لحگني
انفجر أسد بصراخ عالي ضرب الطاولة بيدة
حيل
-العار مو علييينة العار عليييي هو
-بسسس هي ليش ماگالت شيييييي الا هسة
من استقرتتتت حياتي
-غبببببببببية انت تردين استقرار وية مررريض متحررررش
لا تدافعين عنه
بنتج عمرها ١٦ سنة مو طفلة فاااااهمة شسووووالهة
تخافين من العار بس من نظرة عيون بنتج
المكسورة وحزنها متخافيييين
غطت وجهة بكفوفها وبجت
-اني ضايعة أسد ما أعرف شسوي خايفة
خايفة أفقد كل شي بيت ستر سمعة
-اقسسسسسسم بالله انت غبييييية لج بنتج
ياااارجال يااستقررررار انت بس قيمي الدعوووة
واني اقووووم بكل شي صدگيني
-بسسسس انطيني مجاااااال
عاط بيهة بصوت
-لباجررررر الصبح والله والله بعدها
اوصل الخبر لعمامهة وخل تصير موتة أياااااااد
حلال
دار وجهة من الصالة وصعد الدرج
صرت اني وقمر اللي ساندتهة
گبالة
سحبهة لحضنة
-اذا امج مراحت تجين وياي تشتكين بنفسج
هزت راسهة باس جبينهة وتركهة
دخلنا الغرفة ربع ساعة ودخلت
صِبى گعدت حضنت قمر وتحجي
وياهة جان اكو سؤال يـتأرجح بين شفاف
صِبى ومتگدر تگولة اخر شي طرحتة بخجل
وهو عن الاغتصاب وهل كان هالشي كامل
گالتلهة قمر ان هي فقدت الوعي
وگعدت لگت نفسهة تنزف
عرفت ان أسد دز صِبى يتأكد
ثاني يوم الصبح أم قمر قافلة باب الغرفة
ورافضة تقدم البلاغ أسد اخذ صِبى وفقار
وقمر وراحو للظهر رجعو رغم التعب بس
وجه أسد جان مرتاح وقمر مبتسمة بدموع
اللي صار ان المركز طلب فحص للتأكيد
وبعد عناء وافقت قمر الفحص بين ان
اللي صار مجرد جرح سطحي وهي لا
زالت مثل ماهي
گعد أسد بالهول طلع حمزة من الصالة
والحجية دگ أسد الباب على ام قمر
-طلعييييييييي ميادة خل احجي وياج
طلعت وجهة تعبان باوعت لقمر ودارت
وجهة
-شترررريد أسد
-زووووجج المصون يگول اطلگهة
صفنت بوجه أسد ولطمت على وجهة
-طلگتني منة أسد
-لاااااااااا يا زمالة تلطمين على شنوووو
ياغبييييية لج هو من نفسة يگول تحرم
علية اذا صدگت الكلام وخلت اخوهة صوبني
-حممممممممزة كلة بسببك انتتتتتت اللي كبرت
المووووووضوع لو سادة بيناتنا
وگف حمزة وفقار سندة
-لو ما انت اختي الجبيرة جان عرفت
شلون اتصرف بس سمعي
من هاللحظة اذا ماقبلتي تتطلگين من العار
تطلعين من هذا البيت وتنسسسسين
اي شي يخص قمر حصتهة بذاك البيت وغيرة
وقطعة الارض وسيارتهة وراتبها كلهن تسلميهن
هنا النة وترحين بأيد فارغة للعار
وتنسسسسين عندج اخوة
وگفت صاحت
-اتنازل
عاطت قمر وانهارت بالبجي
-بعد كل شي سمعتيييييي ماما
دارت وجهة بدون مترد على قمر
وگف حمزة بالباب مال الغرفة
والحجية تهدي بي
-وجججججهج ماااشوفة هنااااااا ميادة
-ولك يووووم استهدي بالرحمان خل نحجي
-منحجي هسسسسة تطلع بررررررة
نص ساعة وطلعت بيدهة جنطتهة صاح أسد
-ميادة فكرررري اذا اختاريتي أياد
والله والله اخليج تحلمين تشوفين قمر
دارت وجهة ومشت بدون مترد وسدت
الباب وراهة
وگعت قمر للگاع مغمى عليهة وانخبص
البيت خبص رفعها أسد لحضنة
وخلاهة بالغرفة صِبى بقت حواليهة
لحد مصحت
جانت صامتة هادئة لليل أسد دگ
تلفونة وهلت علي الاتصالات من أهل
أياد الكل يحاول يلم الموضوع
بساعتهة جان قرار أسد صعب
وراد الموضوع ينسد من ناحية
السمعة خوفا من ردة فعل اعمامهة
لذلك جان القرار أن تتحول الدعوة
لاعتداء بالسلاح على حمزة بمشاجرة
واللي ثبت التهمة على أياد
ان السلاح مرخص
بأسم أياد وهو مشتري لحمزة
المشكلة جانت شائكة خلال خمس
أيام اجت ميادة تتوسل بأسد
أسد جمع الكل حمزة واخواتة والحجية
وحتى احنة
دخلنا المكتب وطلبت منة يتنازل
هو وحمزة عن أياد وهي وأياد يسافرون
برة ميبقون بساعتهة قمر وگفت بباب المكتب
وحجت وية أسد بكلام يكسر الگلب
-خالو تنازلو خل يروووح هو ويااااااهة
واضح ماما لگت ويا الحب اللي ماشوفتنيا
من مووووت بابا لهسة
ميادة وهي دايرة وجهة حجت
-قممممممممر انت جزء من المشكلة
-ليش اني طلبت منة يعتدي علية
-لا بس سكتي يجوز سكوت رضا
وگف حمزة وراد يطفر على ميادة
وگفتة ام فقار جانت ترجف
-والله طاااااح حظج اذا صدگ تحجين
ولج من هي طفلة هوو يعتدي عليهة
-ومن كبرررررررت
وگفت قمر گبالهة تبجي
-هاي انت اميييييي وهيج تحجين شگووول عالغربة بس هسة يااااااا امي عرفتي من كبرت شسوة بية اشوفج ساكتة
وررررراح تعيشين حياتج ويا
-مررررراح تفهميني
-شفهممممممممممم
مدت ام قمر ايدهة تأشر لقمر أن تسكت
-أسد اني طرحت عليكم كلامي وضلت بكيفكم
لتفضحونة بييييين الناس
-صووووووووتج مااسمعة محد فضيحة
غير زووووجج السگط
-خلي بعلمكم انت وحمزة وحتى امي اذا
وصل الخبر لعمامهة راح ياخذوهة وانت
أسد تدري صار سنة اني ادافع علمود عمهة
علي مياخذهة لأبنة حسين بس يسمعون
گدامهم خيارين يقتلوهة ويقتلون أياد
لو ياخذوهة يزوجوهة لأبنهم
وتصير خدامة
رجفت كفوف قمر وسحبتهة وام فقار بحظنهة
-سمعي لج والله ماعاش ولا كان اللي
ياخذ قمر شنووووو عبالج قمر بنتج
لاوالله بنتي اني وبنت أسد وحمزة
مدللتنا وصغيرتنا خااااف تردين تلعبين بذيلج
ولج والله اخلي أسد يكسر رگبتج
صرخ أسد
-مياااااااادة من الاخير شرايدة
-تتنازلون عن أياد
-تحلمييييييين اتنازل
صرخ حمزة
-تتنازل حممممممزة أسافر منبقى هناااااااااا
-طبعا تسافرين بي لأن عاااااار وسگط
گعدت متعصبة وتحرك برجلهة
وقمر صاحت لخالهة
-خالوووو أسد مااااريد شي خل يرحون
ماااريد ارجع لبيت جدو
ضرب أسد عالمكتب
-قمممممممر بابا هضيمة خوالج زلم ونتنازل لهذا
-خالووووو خل ترووووح ماما ويا خل يرحووون
فدوة خل يخلص هالكابوس ماااريد
عمو ياخذني لأبنة بسببهم
بجت بصوت مجروح
-خالو فدوووة
وگف أسد وتوجه لحمزة باس راسة
حمزة سحب ايد اسد باسهة
-حمزة لخاطر رجفة قمر نسويهة
اختك بايعة القضية مستعدة تحطم بتهة لخاطرة
وگف حمزة هز راسة لأسد وبصق
بجانب ام قمر وطلع من المكتب
وگفت ورادت تطلع گالت لأسد
-انتظركم باجر
اشرلهة اسد تطلع برة والحجية
طول هالوقت ساكتة ودموعهة ماوگفت
تقربت ميادة تبوسهة دفعتهة
-والله خسارة بييييج حمل تسع شهور
ريتج مييييتة ولج
مشت ميادة للباب صاحت قمر بصوت حاد قبل لا تفتح أمها الباب
-لا تروحين وانت تظنين نفسج مظلومة
لا ترحين وانتي حاطة براسج إنج أم
التفت امهة بوجه جامد
- كافي قمر تعبتيني أني شسويت بحياتي غير إني حاولت أربيج وأدللج
قمر ردت بصوت ممزوج بالحسرة
-ربيتيني ياتربية ماما
شنو ذنبي أنج كل يوم تطلعين وتتركيني وحدي وياه شنو ذنبي إنت تفتحين بيتج لحيوان
وتسدين عينج عني هااااااااا احجي
انفجرت ميادة بكلام جان لازم يبقى سر مكتوم
- ما جنت أعرف ما جنت متأكدة
قمر مشت صارت گبالها
صوتها ارتجف
-يعني جنتي حاسة بس اختاريتي تتغاضين
اختاريتي راحتج على كسرتي
-كااااااافي لا موووو هيج جنت اشك يضررررربج
مو يعتدي………
قطعت كلامهة قمر وعاتبتهة عتاب حزين
-جنت أغلب وقتي خايفة
وانت رفضتي تدورين مصدر خوفي
مشغولة بمكياجج وسفراتج
وطلعاتج وحياتج ويا اياد
جنتي مشغولة تبنين حياة جديدة فوگ جثتي
تنفست ميادة بنفاذ صبر
- أني ما أگدر أضحي بحياتي بعد
أني تعبت أني إلي حق أعيش
-تعيشين على حساب گلبي المكسور وطفولتي
المشوهة ماما
-أنتِ جاحدة كل شي سويته إلج ما کفاج
- إنتِ سويتي بيه مو إليه
وسمحتيلة يسوي
مشت ميادة لباب الهول وصرخت قمر
-يعني بعتيني واشتريتي
-أني جنت أحاول
الحياة ما كانت سهلة بدون رجال المجتمع ميرحم ترملت وارجع اتطلگ شتگول الناس
-شقدممممممملج عايش ببيت بابا يسوق
سيارة بابا ياكل من راتب بابا والناس شقدمتلج وشعللييييييهة
انهارت ميادة ولطمت على وجهة
-تررررردوني انفضح ويتشمتون بية مرة
ارملة والثانية مطلقة
-تفضلين مظهرج على حياتي
-انتهى كل شي قمر انت من سنين
اختاريتي بيت جدج واني هم الية
الحق أختار حياتي
-تختارين حياتج على حساب موووووووووتي
-اي
گالتهة وطلعت وگعت قمر بباب الهول
بمشهد حزين جسد معنى كلمة عقوق الأبناء
فللأبناء بر واجب من قبل الآباء
بعد هالنهار تداولو بينهم وتقرر
التنازل بترتيب أمر منع دخول
للبلد من خلال سياسي معروف صديق
لخالهم ابو صفا
وهيج انتهت حياة ام قمر ووجودهة
من حياة قمر ثامن يوم الصبح اجانة
الأتصال ان تم سفرهم قمر صفنت
وهي تسمع وتنفست نفس قوي
أبتسمت وهي تحضن بيبيتهة
-بيبي قمورة انت زينة
همست وهي تمسح دمعتهة اللي سبقت شعورهة
-بيبي الهوا خفيف وجاي اتنفس بملئ صدري
وهذا جان تعبير قمر الحزين عن خروج
أياد وامهة من حياتها
أما أني فباليوم الثامن الصبح
فتحت علية صِبى الباب واتفقنا
على الخروج من هالبيت بعد
صراع صامت بين صِبى وأسد
طلعت بالحديقة أنتظرها
انتفتح شباك حمزة وطل بسمارة
الساحر من الشباك نبض گلبي نبضة
جديدة وصرت على جهة تخفيت خلف الشجرة
ابتعد حتى ميشوفني
فگلبي الصغير يستكثر ويستثقل
وداعة
دقايق وطلعت صِبى صوتها
الهادئ الباكي صاحتني
-يلة مُنى
طلعنا من الباب مشينة مسافة
للشارع واجة صوت حمزة بالسيارة
التفتت صِبى وهو نزل
-صعدي صِبى اوصلكم
احترم قرارهة والواضح ان أسد دزة
يوصلنة
وصلنة صِبى راحت تدگ الباب
على سومة وهو نزل ينزل الجنط
-بطة
-هممم
-بعدني عالوعد رغم البعد
گالهة وابتسم وهو يخلي جنتطي
بالگاع
تحرك ماشي بعد مدخلنا
وحضنتنة سومة حضن اخت جبيرة
مجرد حضن دافي بدون أسئلة ولا
اي كلمة
أستقرينا يمهة بغرفة ثانية
عدهة ورجعت اني مُنى البنت
الصغيرة اللي ماعرفت طعم الاستقرار
احاول اعيش من جديد
بعيد
بعيد عنة
عن عيونة
وعن مشاعري الوليدة
عسى أن يكون لنا
انا وهو لقاء
في القادم من الحياة
.
.
.
.
.
.
.
.
صِبى
_______
روحي حيث أنت
الصفحة: ٢٦٠
حبيبي فرقد اكتبلك اليوم واني هادئة
صامتة فمثل ماگتلي بمرة
عيونج ماتلوگلهة الدموع قررت أسمع
كلامك
بس مااخفي عليك تعبي لأني حسيت بخذلان مزدوج
خذلان منة هو وخذلان من الحياة اللي كل مرة تخليني أخسر
فرقد صح تركتة بس الوجع بعده ساكن بيه لابسني
وملازمني مثل ظلي
صرت أخاف أحب أخاف أصدگ
حتى من نفسي گمت أخاف
حبيبي إذا شايفني من مكانك سامحني عالدمعة
وسامحني عالضعف
بس انت تدري اني من دونك ما ظل بيه شي ثابت
…………
______
سديت الدفتر وطلعت لسومة و مُنى
لازمات التلفون ويفترن من گروب لگروب
-هاااا بنات بشروووو
-ولج ماكو لحد الان
-فدوووووة شنو شطلعت
-هاااااج يگولون باجر تفتح الروابط
گعدت تعبانة من التفكير ودگ تلفوني
قمر تتصل بية واعرف سوالفها
-هلووو قمورة
-هلوووو خالة شلونج
-حبيبتي انت شلونج
-خالة خل نجي ناخذ مُنى
-لا حبيبتي تعاي انتِ هنا
-حبااااااااابة
-دتعاي هنا اسويلجن حلى بارد من التحبي
-خالة بيبي تريدج
اجاني صوت الحجية
-ها يوم شلونج
-هلا خالة شلونج صحتج شلونهة
-الحمد لله بس بعازتج ليش هيج خالة
والله مكانكم فارغ بس اني مخليتج براحتج
وماسألتج عالصار لأن مااگدر احكم وابني
يگول اني الغلطان
-تراكمات خالة
-ايييي مبين بس اني مااريد اخسركم
وقمورة عينهة عالدرب علمود مناوي
-تجي هنا تنوووورنا والله تعرفين هي بمعزة
مُنى يمي
حجت بصوت هامس حتى متسمع قمر
-گلبهة مكسور وشگد حاولو خوالهة وياهة
مافاد بس ساكتة وهاي سلوتهة الوحيدة
مُنى من تتصل بيهة
-خالة خل يجيبوهة الولد
-هسة اخلي حمزة يجيبهة حاجيهة يوم
بلكي شوية تفك
-خل تبات هنا اليوم تعرفين محد يمنة
-خليهة براحتهة هسة تطير من تسمع
ودعتني وسدت التلفون وهاي
عشر أيام على وجودنا ببيت سومة
الحجية حاجتني مرتين حاولت
بس انتهى النقاش من گاللهة اسد
خليهة ترتاح
فكرتة عن الراحة شنووو مااعرف
تنفست بتعب ورحت للغرفة
أتصلت بغِنى الخبلة فتحت خط
وصار خشمهة گبالي
-شنوووو هالخشم
-ولج رااااح انفجر
-السابع صعب انتبهي لنفسج
-هو شطيح حظي غيرج وغير أيمن
صرت بطيخة بس اكل ونوم
-شراح تسميهة النونوة
-بعدنة نتعارك عالاسم
اجتني ضحكة أيمن سديت الكاميرا
وحولت للصوت لأن بدون حجاب
-أسمعي شتريد تسميهة
-شتردين تسمين ولج
-أسميهة نجمة
-بربج صِبى هذا اسم طفلة من اسمع
الاسم احسهة عجوز سبعينية مدگدگة
-لا بالله على اساس أسمك حلووووو
-هههههههههه ها أيمن شتريد تسميهة
-الجوهرة
-سمعتي صِبى أسم مال راقصات
والله تخيلي لوحة اعلانية مال نادي
ليلي مكتوب الليلة السهرة
رائعة مع الراقصة الجووووووهرة
ضحكت عليهم وهمة يتناقشون بصوت
عالي صحت بيهم
-شبااااااااااااااب سموهة صِبى
ضحك أيمن وصاح
-ياااااااابة والنعم
هي التافهة تگلة
-اييييي والنعم صِبى أسم ثلاثينية جادة
-ولي موووو صوجج صوجي اقترح عليج
اسمي
-حبيبتي والله اسمائنا قديمة بربج مناوي شگدوتهة
اسمهة اكبر من راسهة مُنى
-انجبي خالتي سمتهة مُنى لأن جانت تتمنى
طفل
-مع احتراماتي لخالتي بدل اسم المدرسات
المتقاعدات هذا جان سمتهة أمنية
-روووحي ولج بس تجي مُنى تسحلج سحل
سدت التلفون وراحت حاليا هي داخلة
السابع بلغتها أن متجهز نفسها اني اجهزها
أباوع الفلوس اللي عندي مبلغ بسيط
من طلعت من البيت مااخذت شي بس
مبلغ الرواتب اللي جامعتهم لأن من حقي
وتعبي بالشغل اي شي ثاني مااخذت
گعدت أسترجع ذكريات دخولي لبيت سومة
بذاك اليوم جنت هادئة وهي متوقعة جيتي
اول مدخلت حضنتني بدون متسأل
گعدت هادئة صامتة وهي و مُنى حوالية
سوو اكل بس مگدرت اكل شي تمددت انام
بالصالة احس كأن روحي مسحوبة مني
ومالي طاقة حتى عالحركة
شوية ودخلتلي سومة بيدهة گلاص عصير
گعدت ساكتين اني وياهة باوعتلي وبس اطلقت
سؤال واحد
-شسوالج
وگعت دموعي واني ارد
-كسر گلبي
-ليش ماانطيتي فرصة هو يحبج وانت تحبي
-انطيييتة فرررص وبكلهن قرر يجرحني
تدرين سومة شنو أصعب شعور
مو لأن جرحني من تمرض
بس المشاعر الدفينة العندة جنت
احس دگات گلبة مو الية
-غلطانة والله واضح يحبج
-والله اعرف يحبني بس بعقلة
بس حب صفا بگلبة ولآخر لحظات
جان حتى يغار عليهة گداااامي وكأني حجر
هو زوجي وحبيبي صح بس گلبه مو إلي
محتفظ بصورهم القديمة
محتفظ برسائلها بحرفها موشوم على
گلبة
ابتسمت سومة تمازحني
-ولج حسبي حرفج اثنينجن نفس الحرف
-لا مااعتبرة حرفي لأن مكتوب الها مخصوص
بوقت فراقهم كاتبة بحركة گلب ووجع
-ليش سكتيلة
-ماسكتت حجيت وگلي ذني ذكريات
قديمة تعرفيييين من شالهن من الغرفة
وين لگيتهن
-لتگوليهة يعني ماشمرهن بالزبل
-لا
-لگيتهن بغرفة المكتب
بخانة من الخانات مال الميز ضامهن بكارتونة
مال ملفات
-يجوز يريد يرجعهن الهة
-لا هاي معناهة هو عايش بيهة
وهي عايشة بداخلة واني مجرد ظل
ظل لوحدة فارقهة حتى متتاذة بسبب مرضة
وتعبة لأن رقيقة متتحمل
ضربت سومة على خدها
-ولج شلوووون صبرتي وسكتي
-التعب سكتني والخذلان اني مااعاتب
على نفس الشغلة مرتين عاتبتة مرة
وماسوالي خاطر شلون أعاتبة
مرة ثانية
-وتالي
-التالي كسرررررر گلبي وحطمني
تعرفين شصار
-احجيلي
-بعد ماقنعتة يداوم ويترافع بقضية مهمة
بالصدفة سمعهة تحجي عنة وتگووول معاق
بيومها عرفت أن كل ظنوني وشكوكي صحيحة
لأن باقي عندة عوالق مشاعر قديمة
مووو حب لصفا بس يمكن حنين لأيامهم
من رجعنا للبيت بالمكتب جاي ارتب
وشفت الحجار الملون والقواقع وحتى
الصورة متحولة لفتافيت صغار ومخليهن
بكيس وبالزبل
معناهة هو ماترك ذكرياتة من انكسر
گلبي بس تخلى عنهة من انكسر گلبة
بسبب كلامهة اللي سمعة
-او عرف حقيقتهة وعرف ان لازم يدفن هالحنين
-يمكن
-تنفصلين
-مااعرف
-ليش ماطلبتي الطلاق
-مااعرف
-تحبي
-فوگ متتخيلين
-والتالي
-التالي يمة هو اني اديت الجزء
مالتي من هالعلاقة هسة اني رميت أسلحتي
وتركت أرض المعركة أخذ أستراحة محارب
ابتسمت سومة واشرتلي انام على رجلهة
-انطيج خطة
-شنووو
-لتحظري ولا تلغين برامجج خلي
موجود ويشوف كل شي
ببساطة عيشي من دونة
-مااگدر
-صِبى لمرة وحدة سمعي الكلام
وامشي على مشورتي
دوري شغل بغير مكان
-اكيد مااشتغل يمة
-بس سوي شغلة
-شنو
-نشري عن نجاحج ووظيفتج اذا داومتي
-مااحب هالأسلوب كأنما استجدي أهتمامة
-اسمعيني صِبى هالمرة اني مو وياج
ولتقاطعيني سمعيني للأخير
انت تحبينة ومو حب عاااادي لا حب ناضج
وبقناعة لذلك زعلتي بس زعل وماطلبتي الأنفصال
ولتگليلي أستجدي اهتمامة لا مو هذا القصد
القصد تلفتين انتباهة للي خسرة
لحد ميعرف غلطة وين جان ويصححة
-مااگدر ابقى طول العمر ادلي خارطة
طريقي واعلمة من شنو ازعل
-تعلميييي حبيبتي لازم تعلمي
-هو مو طفل رجال جبير واعي ومثقف
-هههههههههههههه ليش ولج عبالج هي بالعمر والثقافة
الزلم كلهم متشابهين المثقف والفاشل الذكي والغبي الغني والفقير كلهمممممممم نفس النموذج
-مفهمت
-الرجل تختلف طبيعتة عن المرأة
المرأة عاطفية هو عملي يعني مرات صح
نحتاج نلفت أنتباههم ان احنة نريد اهتمام
وندليهم ونعرفهم شنو الزعلنة لأن همة أساساً
عمليين مو عاطفيين ولا حساسين
-بس سومة مرت علية ايام من ثگلهة جنت حاسة راح امووووت بمكاني ردت يلاحظ يحس يسألني
بس لا مصار هالشي
ابتسمت وهي تلعب بشعري
-لأن هو رجل صِبى الرجل مايفكر مثلنا
ما يقرأ الوجوه ولا يفسر السكوت
هو عملي يشوف الشيء إذا نطقتي
أما إحنا نحس ونقرأ الملامح
- بس شلون يعني سومة اني احس بي والله حتى من تنهيدتة من نظرتة اذا تعبان شلون هو ميحس
بية
- إحنا نحتاج نلفت انتباههم
مرات بدمعة مرات بكلمة بسيطة اني تعبانة مثلا ومرات حتى بغياب قصير يخليهم يحسون
مو لأنهم ما يحبونة
بس لأن طبعهم يمرون عالتفاصيل بسرعة وإحنا نغرگ بيهة
- يعني لازم أطلب الحنية
أشرحلة إني محتاجة حضنه وكلامة ووعودة
- اييييي صِبى اييييي
مو ضعف إذا گلتي احضني مو تقليل إذا عبرتي عن ضوجتج الرجال مرات يحب يسمع بصوت واضح حتى يعرف يتصرف
إحنا نحس همة يفهمون من الطلب ببساطة يردون وضوح وانت يا صِبى متعودة عالكتمان وهالشي غلط
غلططططط
اختنگ صوتي وسألتهة
-يعني لو گايلتلة عن تعب گلبي بسبب كل تصرفاتة
جان فهم بسسس ليش مافهم حزن عيوني
-مو گتلج ميفهمون مثلنا والله
لو گايلتلة الأكيد جان گلج مثل كلامي
جان گلج احجيلي وجعج
وهاي أول خطوة يفهم بيهة انج حساسة وتحتاجين ينشاف تعبج يعني شرحيلة صِبى
لا تسكتين على وجعج اببدددددد
إحجي حتى لو بصوت ناصي
لأن هووو يحبج راح يسمع حتى من همسة
صيري واضحة صِبى
مو الكل يفهم لغة العيون والتنهدات مثلج
-بس تصعب علية نفسي لأن مافهمني
غمضت عيوني وفاضت بحزن
- هو زوجي وحبيبي بس من اقتربت منة
حسيتني غريبة عنة
ما يلاحظ وجهي من يتغير بسبب تصرف
ولا عيوني من تحزن معقوووولة احساس الرجال
معدوم لهالدرجة
ضحكت سومة وهي تبعد ايدي عن عيوني
-اگلج الواقع
-گووولي
-الرجال متخلفين عقلياً
-ههههههههههههههههه شلون بالله
-والله شبيج همة ميمشون الا بتوجيهات
-حتى بالحب
-بكل امور الحياة سمعيني هسة بعيدا
عن المزح اسد يحبج بس يمكن ما يعرف شلون يحبج بالطريقة اللي تحتاجيها لذلك انت علمي
-يعني ليش ميفسر سكوتي لتعب وحزن
- ولج رااااح اموتج تعبتيني افهمي
الرجال ما يفسر الصمت والسكتة مثلنة
هو يشوفج ساكتة يحسب الأمور تمام
يشوفج تبادرين يتعود شوية شوية
يفهم تفاصيلج
إحنو بصمت بتفاصيل
بس همة يحبون بطريقة يحتاجون بيها يسمعون ويشوفون ونشرحلهم
ضحكت وهي وياي
-يعني همة اغبياء
كفختني وكملت
- لا بس مختلفين
وإنت بالذات لازم تعلمينه حبج شلون يكون مثل ما علمتي يتنفس وياكل ويشرب ويمشي من جديد
واحجي عادي مو عيب گليلة أني أضعف مرات ومو دوم قوية
احضني واني مشتعلة غضب و قبل لا أبرد
ولا تنتظرين منه يفهم من عيونج كل مرة
مرات لازم تحجين طبع السكوت بطلي
- وإذا ما تغير إذا بقى نفس البرود
-تغيري انت لا تتنازلين
بس غيري طريقتج
خلي حبج ينحجي وتعبج ينحجي
خلي زعلج واضح بدون الغاز
لا تتسترين عالحزن والضوجة
يعني حضني وعاتبي بنفس الوقت
گعدت حضنتهة
-اول مرة اسشير شخص
-لأن تعودتي تاخذين القرارات لوحدج
شگووووول على ابوووووج خلاج مثل
الصخر لا شعور ولا احساس
-هههههههههههههه اضحكي بس اريدج تنفذين
مو بس تسمعين
فزيت من هالذكرى والكلام اللي طيب خاطري
على صوت سومة
-ولج صِبى انفتحت الروووووووابط
فزيت واگفة ركظتلهة
-طلع اسمممممممي
-مااااااعرف
رحت لتلفوني وگعدت أحمل النتائج ماكووو ميحمل ضعيف بسبب اللود
دقايق انتظر واجاني تاگ من أسد على كل المواقع
فزيت وخفت افتح البرامج
تجرأت وردت أشوف شكو وفتحت
الفيسبوك صورة قبعة تخرج
وكلام هادئ لطيف
(زوجتي الحبيبة أنا فخور بكِ
بكل ما أنجزتِه وبكل ما أنتِ عليه
شكراً لكِ لأنكِ علمتِني أن القوة لا تعني الصخب
بل الثبات
وأن النجاح لا يقاس فقط بالوصولة
بل بالإخلاص في الطريق
مبارك لكِ هذا التميز ومبارك لي أني زوجك
ستبقين دائمًا قدوتي ونجمتي العالية في سماء قلبي)
تركت الفيس بوك رحت لأنستجرام
( إلى المرأة التي صنعت من التعب إنجازاً
اليوم وأنا أراكِ تقفين شامخةً في لحظة نجاحك أدركتُ كم أنا محظوظ لأن الحياة منحتني شريكة مثلك
شكراً لكِ لأنكِ لم تكتفِ بأن تكوني زوجةً رائعة
بل أصبحتِ مصدر إلهامٍ لكل من يعرفك
نجاحكِ هو فخرٌ لي وسعادتكِ سعادتي وطموحكِ أصبح الآن قصة تُروى
مبارك لكِ من القلب
ولكِ مني كل الحب وكل الدعم وكل الامتنان)
أباوع منزل صورة معدلي ومغطي أسمي فزيت وعطتتتتتت
-سوووووووومة
٨٤ المعدل
اجت تركض هي و مُنى
-ويييين شفتييييي
هدأت وسكتت
-أسد نشرة
اثنينهن سحبن التلفون يشوفن
وگامت سومة تگمز وية مُنى
-شنووووو هالحب عييييييييني
حظنتني
-مبروووووك حبيبتي الف مبروك
بديت بتفكيري الزايد ليش مااتصل ليش بس
نشر
لحظات خليت قلوب على البوستات
وكأنة جان منتظر شراح تكون ردة فعلي
اتصل التلفون بأسمة
البنات عينهن من الشاشة واني مركزة ومتأرجحة
بين أرد وبين لا
سومة سحبت التلفون بسرعة فتحت خط
وشمرت التلفون علية وانهزمت هي و مُنى
رفعت التلفون اجاني صوتة
-شلونج صِبى
-الحمد لله انت شلون صرت
-مو زين
-بيك شي
-مكانج فارغ البيت والشغل
كأنما اختلف حتى الهوا ونسماتة
بالأماكن اللي مموجودة بيهة
-اريدك ترتاح لتفكر
سكت للحظات وكمل
-الف مبروووووك نجاحج وتفوقج
رغم تعبج بذيج الفترة
-الله يبارك بيك
-صِبى توقعتج تحظريني
من التلفون
-اني مو طفلة أسد حتى احظرك
- ماكو اكبر من عقلج تجين للشغل
صِبى كل شي احسة مخربط بدونج
-لا اعتبرني استقاليت استاذ
-صِبببببببى
-سويت اللي علية بالشغل وياك
أن شاء الله تلگة سكرتيرة ثانية
-وراح تشتغلين موووووو
ارتفع صوتة شوية رديت بهدوء
-أكيد أشتغل
-ممنوووووع فهمتي ممنوع تشتغلين بأي
مكان اني مو بي
- راح أشتغل اختي مقبلة على خامس
واني وراية دوووام
-نشووووووف يامرة اللي تعتب باب البيت
-نشوف
غلق الخط وراح وهاي جانت وحدة من نصائح
سومة مواجهة بدون سكوت
هاليوم جان عبارة عن فرح غاااامر بالنسبة
الية ولأخواتي
بنفس الليلة غِنى طرحت علية فكرة
الشغل وية أيمن واتصل بية بيومهة
-مبروووك النجاح خوية
-الله يبارك بيك أبو حمادة
-بعد اخوج اني گالتلي غِنى عالشغل واني
ومكتبي نتشرف بوجودج بس اطرح عليج
سؤال وانت تردين حتى من احجيلج فكرتي
متلوميني تمام
-تمام
-أسد يدري
-لا ميدري
-اني علاقتي طيبة بأسد ولخاطر راح
اسألة وأقدملة كل الظمانات انج تكونين مرتاحة
بالمكتب ومكتبج وحدج
-لا بالعكس هاي اصول اذا تحب اتصل بي
ثاني يوم أتصل بية أسد استغربت
لأن ضايف أيمن للأتصال بدون سلام
حجاهة بأريحية
-گلتهة آني شغل بمكان اني مو بي
ممنوع واشوف يامرة اللي رجلهة تخطي
خطوة من باب البيت بدون علمي
ضحك أيمن
-هاي بعد أخوج ابو قسور يفخخني
اذا شغلتج
اسد سلم علي
-ابو حمادة شوي واتصل بيك
-في امان الله
طلع أيمن من الاتصال وأسد تنفس براحة
-بكيفج حابة تجين يمي
ومكانج موجود ومحفوظ بالمكتب وغير المكتب
-مستحييييل ارجع يمك
-اي حبيبتي لترجعين عادي
بس هم متشتغلين بغير مكان
-لازم أشتغل عندي حياة ومصرف
-اي اني موجود شنو قابل متت
وصرتي حظرتج أرملة الأستاذ
اسد
-كااااافي
ضحك ورد
-تخافين علية
-مع السلامة
-نشوف
سد الخط وراح بالموجود عندي
وخلال اسبوعين جهزت غِنى جهاز بسيط
للطفل وحرفياً صفيت عالحديدة
بليلتهة بقيت محتارة استحي من سومة
لا شاركت بمصرف ولا دفعت أيجار
دزيت رسالة لغِنى حتى يحاول أيمن
يشغلني بأي مكان گالتلة
ورجعت گالت أسد محلف أيمن
بيومها صدگ بجيت ثاني يوم وبكل
أصرار طلعت واللي يصير خل يصير
دورت شغل بكل مكان وأخيراً
حصلت بعيادة تجميلية بالرسبشن
المكان مسافة من عدنة سيارة
خمس دقايق اكون بالبيت وربع ساعة
مشي
بيومهة سومة مقبلت على تصرفي
و غِنى گالت لتعاندين واني ادز المصرف
ضايقني الكلام وتعصبت ويمكن زعلت مني
-صِبى ترة مو غريب أيمن
-أسألج بالله مسويتهة قبل اني
-افهمج بس والله من مصرفي ادزلج
مو من عندة
-واني مستحيل اكون عالة على احد افهميني
-تمام
ودعتني وبصوتهة زعل وراحت
ثاني يوم بديت الشغل وبوقتها
يكون مر شهر على طلعتي من البيت
الشغل حلو وبسيط كل يوم تقريبا
ب٨ ونص اخلص وأرجع بديت استعيد
نفسي خلال اسبوعين كل شي تمام
الى أن رجعت بيوم وشفت سيارة حمزة
ببابنا گلت يجوز جايب قمر
دخلت للبيت للمطبخ أباوع لسومة
لابسة حجابهة وتلطم على خدهة
-شبيييج ولج
صوت قمر و مُنى جاي من الغرفة يضحكن
-ولج مشتعل ناااااار
-منوووو حمزة
-اي دروحي للصالة خرب حظييييي وحظج
عدلت حجابي ودخلت للصالة ارتديت
ليورة من شفت أسد واگف وجامد بدون
حتى ميرمش ردت اسلم وهو افتتح الحديث
بعصبية مفرطة وصوت هامس لأن يستحي
من سومة
-ويييين جنتي لحد هالوقت
كعدت عالقنفة بهدوء بدون مااواجه عيونة
-جنت بالشغل
رد علية مستنكر
-شغل يعني صدگ الحجي اللي سمعته اشتغلتي وبدون علمي
-اني مو طفلة استاذ حتى اطلب اذنك
تقدم ناحيتي متعصب
-مووووو طفلة بس زووووجة واني بلغتج
ممنوع تشتغلين وتخطين باب البيت صح لو لااااااا
-الشغل من حقي
-واني من واجبي أوفرلج اللي تحتاجي
-بموجب شنو اتقبل منك فلوس
-بموجب عقد الزوووووواج
بالقانون وبالدين
-انت گلتهة عقدددددد زواج
يعني بس ورقة وگتلك الشغل
من حقي مااريد اكون عالة على اي شخص
اجاني بسرعة موگفني عيوني بكل مكان
تتحرك الا علي
لزم فكي ورفع راسي يهمس بتعب وعصبية
-مووووو من حقج تشتغلين واني
ماادري ممنوع شغل بمكان اني ماموجود بي
-اذا ماكو ثقة
-شلوووون مااثق بيج بس افهمي
انننننننننني رجلج
-وتعتقد هالصفة كافية حتى تمنعني بيهة
-شترررررردين اكثر من هالصفة صِبى لتختبرين
صبري وتكسرين كلمتي
-كسر كلمتك لا شيء مقابل كسرة گلبي
-ارجعييييييي يمي واوفرلج كل شي
گتلج بسسسس لتشتغلين
-واني ماانباع وانشرى بمادة أستاذ
أسد أنت فهمتني غلط
تعصب وعض لسانة وهالطبع مشترك بينة
وبين حمزة
-شترررررررردين بالضبط صِبى
فهميني
درت وجهي عنة ومحجيت
شي
-باوعيلي من تحجين
بقيت دايرة وجهي وهو ممسك بوجهي
بكل قوة أصابعة انغرست بخدي
-باوووووعيلي لهالدرجة
مأذيج لهالدرجة كسرتج بحيث عيونج الحلوة
ماصدت بعيوني من شهرين
تنفست بصعوبة واني امسك ايدة حتى يبتعد
فقد اعصابة وصاح بصوت
-باااااااوعيلي
وگعت عيني بعينة وانسابت دموعي
على خدي بهدوء
-ردت اوفر عليك عناء النظر بالعيون اللي
كرهتهة
وغلبني الشوق الة وأرتفع صوت شهگتي
المكتومة ايدة انسابت بخفة تمسح
دموعي وتمسح على خدي
-احجيييلي صِبى غلطان اني
اعرف غلطان بس احجي ليش وصلتي
لمرحلة متباوعين بوجهي
-يمكن كل تصرف سويتة جان ممكن أسامحك
علي حنينك لحبك القديم تسخيف مشاعر
حزني
وتعب گلبي وجروووحك اللي ملت كل ذرة بية رغم كل شي جنت مستعدة أسامح
بس لو …………
بعدت ايدة وتحركت
-بس لو شنووو لتسكتين احجيي
-بس لو كاسر سكوتك لو مباخل
علية بمشاعر الحنية المفرطة اللي جنت تغدقهة بكلامك عن ذيج
ابتسامة سريعة اعتلت ثغرة واني احجي
بصفة الغائب عن صفا
كملت كلامي وهو عينة مني
-سكوتك جان مثل جرح اخير انضاف لجروحي
بخلك بالكلمة الطيبة اللي جان ممكن تنقد موقفك الاخير بگلبي لهالدرجة مأذيني أنت ومحاس
مشة بالصالة واخذهة روحة رجعة
ورجع وگف گبالي
-شووووفي حبيبتي
باوعتلة رافعة حاجبي سوة نفس الحركة
-شووووفي اللي عندي گلتة
والشغل ممنووووووع فااااهمة
والمصرررف جاااااااري سواء بقبولج او عدمة
تحرك ناحية الباب صحتلة
-استاذ اسد كلامك مرفوض
-نشوووووف
دار وجهة وطلع تاركني
گعدت بعد ماعصف بية الاشتياق
وانبت گلبي الحقير لأن دگ بوجودة
دخلو البنات للصالة وقمر خاتلة ورة مُنى
-تعااااااي قميييرة تعاي خاتلة تعرفين نفسج فتانة
-خااااالة والله هو سوالي اغراءات
اخذني مطعم ودللني وسحب مني الكلام
واني اكل بيتزززززا وتعرفين اني اضعف
گدامهة
كفختهة وطلعت مااعرف اضحك عليهة
لو على حظي الا خلاهة تحجي لأسد كل شي
عن شغلي
هاليوم جان جمعة وعطلة المركز
يوم السبت رحت لگيت بالرسبشن ولد
سلمت ودخلت للأدارة
انطوني فلوسي وگالو استغنينة عن خدماتج
واكلت رزالة من المدير بسبب الشخص اللي طالب منهم يفصلوني عرررررفتة هو من المواصفات
طلعت أحس صرت نار
بوجهي اول موصلت البيت اتصلت بي
بس فتح خط انفجرت بي ولأول
مرة بصوت عالي وأنفعال
-شعندك راااااايح لمديييييري
-شبيج حبيبتي شمسوي
يحجي ببرود وهدوء ولا كأنة مسوي كارثة
-أستاذ أسسسسد اللي سووووويتة خررررراب
-احسبيني همجي واغااااار
-هذااااااا تخررررريب مو غيرة گطعت رزقي
رد ببراءة مفتعلة
-اني ماخربت شي عيوني بس گلت رأيي
لو هم مو من حقي اعبر
-تعبر شتعببببر تروح تگل للمدير اني زوجتي
متشتغل الا وية نسوان
وتباوع للرجال بالعين الصغيرة وتگلة
يلة ماكو فرق كلكم اخووات بهالبناية
-ماگلت غلط هو مو حاقن خدودة لو لا
-راااااااح انجلط وبعدين على اي أساس
تهددة تقفل المركز اذا ميطردني
-شسووووي هاي أفعال الحب اني رجل بريء
گلبي حكم ولساني تصرف
-اگلك انطرددددت وترزلت وتگلي افعال الحبببببب
-رزلج باااااجر يتشمع المركز والله
-أسسسسسسد الله
-عيون أسد الله
-الكلاااااام وياك صار مستحيل
-نتعامل بالقبلات حبيبتي
سديت الخط واني افوووووور
دزلي رسالة
-متدووووورين شغل
-ادوووور وأشتغل
-صِبببببببى
دازلي اسمي مسوي شطولة
-وشنوو يعني من تدز اسمي هالطولة اخاااااف بأعتبارك جاي تصيح
دزلي رسالة صوتية
-حوووور
صوتة هادئ ودافي
-وهسة شلوني
خليتلة وجه غاضب وطلعت من المحادثة
صار يستفزني يدز رسائل وارد
ومن أرد يدزلي صوتيات يضحك بيهة
ولهالسبب وبعنادة قررت ارجع ادور شغل
ثاني يوم غيرت ملابسي وطلعت
بعدني بالتكسي ودگ تلفوني هو
-وييييين رايحة
صفنت شلون عرف ثواني وخطرت
ببالي ماكو غير وحدة منهن لو سومة
لو مُنى
-ادور على وظيفة
-افتري ورجعي للبيت
-لا
-صِبى رجعي ليش تخليني أتهور
وازعلج
-ممقصر انت أستاذ
-ترجعين لو لا
-ماارجع
-تمام اذا صدگ مرة وقوية اثبتي
على كلامج وانتظريني بالمكان التردي
-اخت فرقد آني
ومااتهدد
-والنعم والسبع أنعام بس يا صِبى راح
تشوفين وجهي الثاني
-جيييد لحد الان شايفة ثلث وجوه وهذا الرابع
مسمعت بس صوت رگع شي گزاز تفلش
سديت التلفون ثواني رجع أتصل
-منتظرج
-وين
-بالشركة بالريسبشن
-وشنو يعني اخاف
-لا يابوووي عليمن انت سبعة متخاااااافين بس هييين
-هينين مو هين واااحد
غلق التلفون بوجهي وراح
وجهت السايق للشركة واني مقررة
اوگفة عند حدة جانت لهجتة متلاعبة واسلوبة غريب عكس رزانتة وثگلة بالعادي
طول وقت الصراع بهاليومين يستفزني ببرود حتى احجي واني بسبب التراكمات صرت انفجر بي ومااسكت وصلت وسلمت عالموظفة
باوعتلة واگف بباب المصعد
رافع حاجبة انفتح الباب أشرلي أدخل
خطت رجلي باب المصعد وانغلق علينة
هدوء مطبق واضاءة المصعد الصفرة والمرايات اللي تعكس صورتنا اول مدخلت باوعلي وضحك ضحدة مكتومة يذكرني بطولي وطولة هو درت وجهي منة وحرك المصعد
وهو يدوس زر الطابق الثالث بالطابق الثاني بعدنة
مد ايدة لزر الطوارئ وقف المصعد واهتز بقوة
بحيث من ارتجافتي وخوفي مديت
ايدي تمسكت بجاگيتة
بخفة التفت وهو يدفعني ناحية المرايا
لا ارادياً دفعت أيدة بقوة سحب كفوفي
ولف ايدي ليورة أقترب مني لدرجة اختلطت
مسامي بمسامة حاضني بأيد وحدة
الثانية مررهة بهدوء على خدي ونظرة
مثبت على وجهي التفت دايرة
-افتح الباب خل أروووح رجاءاً
-جؤؤؤ
سوة هالصوت بشفافة بمعنى لا
وقرب وجهة وبيدة شال اطراف الحجاب وانفاسة الحارة داعبت نحري تحركت رافضة
ضغط على كفوفي بأذية وهمس بخفوت
-أثبتي ثوواني
-ابتعددددد لتكرهننننننني بيك كافي
-اممممم تمام
كألهة وهو يقبل نحري بقوة لثواني
أبتعد ورفع راسة لوجهي
-والله بعددد متشوفني
نزلت دموعي وهو يباوعلي مركز بملامحي
مبتسم باس عيوني ويحجي بهدوء
-أريد أشوفج وجهي الخامس
دفعتة بجسمي بمحاولة مني حتى اتحرك
سند نفسة علية بالكامل مبتسم من سمعني
متنرفزة
-اي وجه منهم وجه العصبي
لو الوجه اللي يجرح بدون اسباب
لو اللي يغلط وميعتذر
-جؤؤؤ ولا واحد منهم
قرب نفسة وعينة ذبلت على شفافي
قرب لدرجة
اختلط نفسة بنفسي وهمس
-لااا أشوفج وجه العاااااشق
-أسدددد الله كاااااااافي
-بعدني مامكتفي حبيبي
گالهة و ………………
