رواية بنات سهر الفصل السابع والعشرون بقلم فراقد حسن علي
انهمرت دموع اليأس....
على دماءِ القلب الموجوع من القدر المحتوم...
على روحٍ هامت في سماءِ ....
ارتدت الفستان الأسود حداداً....
على الحب الذي قُتل بِذنب الحياه.........
==============////==============
(( على أتفقنا مو 😁 ،،مالحكت اراجع الحلقه ))
مسرة / بيوم بالليل ويعطل المولد
همام شغل مولد البيت صوتها يسطر
وهستوني غفيت بالصاله
كلنا متمددين هنا ، لمى وخالتي وحسين
وسوار وجهالها ، وتبارك
حتى منتصر وهمام اتمددنه علمود المبرده
ودك تلفون منتصر
مرتين يلا رد عليه جان نايم
من رد كاله / صددددك تحجي مهند
جااااوبني صدددك تحجي ...
تلفون منتصر خرعنا جان متمدد وكعد على حيله
كلنا انتبهنا على صوته وكمزتة
اني سمعت اسم مهند لو زعت العافيه
اخاف من سالفه بيتنا
مع العلم اني ما مسويه شي غلط
بس هم واحد ما ينحزر خاف يلفقولي تهمه
بس من منتصر سد الخط وكل / يووم حاتم وعه
حاتم صحه من الموت
فرحتنا ما وسعت الكاع
هذا اليصلي على النبي
وهذا يكول ما شاء الله
وخالتي بقت تندعيله بالعافيه
ومنتصر بقى يسب بالاوضاع الأمنية
مايكدر هسه يطلع ويروح للمستشفى يخاف من الامريكان وحضر التجوال لازم ينتظر للفجر
من الفرح عيونه مااخذت نوم للفجر
وانوب جهال طارق كبوا صريخ وبجي من الحر
لمى وسوار غسللهم بمي بارد
وخليناهم بحلك المبرده يلا شويه غفوا
ومشارق من هسه عرمة وصلفه
بس نغطيها انخاف عليها تستبرد
تعيط وتبجي الا نوخره عنها
يلا تسكت وترجع تنام
وفقار حاير يدور صدر امه تخلي بصفها يلا ينام
مسوي ملاهي ، خالتي تخاف من سوار
لا تطفى وتنام عليه تخنكة ،
وهو ما يغفى لا بحظنها وعلى ريحتها
عود هو ما متعلم عليها ،
بس مو هوايه يبقى بحظنها بالنهار
شو كام يجلب بيها وما ينام الا بحظنها
ووهج الها الله ياهو اليعطف عليها تنام بحظنه
بس لمى هوايه تحبها هي ومشارق
وفقار استغفر الله تكولون تتنكس من عنده
ولا توصل يمه ، تفرق بينهم
وبقينا كاعدين
يادوب شعشع الفجر وراح منتصر وهمام
وحتى طارق راح وياهم للمستشفى
يشوفون عمو حاتم
خالتي لبست عبايتها وراحت لبيت عمو حاتم
كالت/ بلكت الحك على بيداء
عاد خلت ورجعت كالت/ غابشه للمستشفى
للظهر ورجعوا الولد الحمد لله عمو حاتم
صاحي من ازمته
-
بس ما يحرك ايده يكولون مشلوله من الضربه
لان ضاربته طلقه من جتفه من كدام طالعه من ظهرة
-
وزره بس شويه يشد حيله يسويله عميله تقويم للعظم
لان الدكتور يكول /هسه ما يتحمل تخدير
-
منتصر يكول /صح مفتح عيونه
والدكاترة يكولون كل أعضائه تشتغل
بس ما يعجبني مصكوك وبس يباوع بالوجوه
والحمد لله يوم بعد يوم صحته بالصاعد
يرحون الولد عليه بالمستشفى
ويكولون اوضاعه احسن
خالتي تروح وترجع على بيداء
تكول / عيب منها هي طيبه وزينه
وهذا السوال يوكف بعينها
بهاي الايام لاحظت طارق بس يفتر بالبيت
وهوايه عصبي ، ويتنرفز على اقل شي
وهوايه يبقى يبلع حب وجع راس
وحتى مرات يكوم يعيط ويصيح بدون سبب
وشكو اغاني حزينه يشغلها ويبقى يسمع
وحتى لعبت روحي هلكد ما يعيد باغنيه
على ساعه انفجر واكشف المضموم
واشوفك جوة ظلعي أشايل هموم
وخالتي تعصر بهل عصير مال برتقال وتنطي
-
وهو يكلها /شكو فاكهه سويلي منها عصاير
-
ويبقى الليل كله يكرز حب شمسي
لو كرزات مشكله
ويشرب بهل جاي والقهوه ويرجع اليورة
عاد هنا انتبهت هو عايف الشرب
ويحاول يلهي روحه باي شي
يكول /جسمي ينغزني ياكل بيه علمودة
يعني اسم الله مو بالشي السهل يعوفه
هو مدمن عليه الله يكفينا الشر
ويقوي على بلاء غواة الشيطان
-
-
-
سوار/ اني اكتشفت حب المراة الرجلها
مثل الورده الجميلة
ووفاء رجلها الها مثل قطرات الندى عليها
وخيانته هي الحذاء الحقير
اليدوس على هاي الوردة ويمردها
طارق بهاي سوايته ملخ روحي وقلبي
اكو نار بروحي مشعوله ما ترضى تخمد وتطفى
لو عايفني بس ام الجهالي
وما متقرب من عندي هوايه احسن
اني مااعرف ولا رجال قبله غير بابا الله يرحمه
وحتى من انقتل جنت طفله كلش صغيره
يعني فتحت عيوني وروحي عليه
بس خوش جازه صفاء روحي بكفخة قاسيه
بعد الهوسه الصارت
خالتي كالتلي/ مالج دخل بي
وممنوع توصلين يمه ،
واذا صاح عليج
لو راد منج شي لا تجاوبي
وانا احميج منه
بس الزميلي روحج شويه
ولا تضعفين كدام سوالفه وعذاب اشتياقج اله
انا مراة مثلج واحس بيج
وحكج لو اشتاقيتي لحظنة
بس اصبري انا اعلمة
واخذلج حكج مربع من عنده
وصدكت خالتي بكلامها ويايه ،
صارت ويايه على طارق ،
هو ابد ما يوصل يمي لو يحاجني
بس عن الجهال لا ابد ما متنع
حتى لو بحظني يجي ياخذهم من عندي
وخالتي كلساع وذبتلها بسمار
مره تكله / طارق فكر زين وردلي خبر شوكت اطلك البنيه ترى منتصر ساكت ومنتظر مني جواب
ومره تكله/ علواه لو تعجل بتفكيرك
البنيه صغيره واريد اشوفلها قسمة زينه
كبل لا تغمض عيوني
هو يبقى يباوعلها صفح ما راضي بكلامها
ويكلها /فطوم سوالفج هاي عوفيهن مو عليه
ومره هو دخل للغرفه راد يشوف فقار
خالتي عاطت / اووكف بمكانك
خل البنيه تلبس حجابها شكو امدرعم كبل علينا
هو هنا عاط / يوووم انتي صدك تحجين
لا تسودينها عليه ،
شنو مرتي وتلبس مني حجاب
لا تخليني اكفر بيها وبسوادينها
كالتله/ اي حرمانها عليك تحلم بعد تشوفها
روح اخذ الخايسه انت مو شكول مراة نظيفه
هو دك الباب بقوه وكاللها / علياء الخر..... مالي
دخل بيها ما تصيرلي مراه
لو مو تسويلي سحورة
لو مو تمشي للصبه وللسادة والشيوخ
نكس وما يمض بيه سحورتها
بس ردت الوع قلبها واشمرها مثل القندرة العتيكة
وهاي اول مرة افكر اخبث على بشر
والله ردها عليه
فطوم اطلعي من الموضوع وخليني اني ومرتي
نصفي غزلنا الشربك
هي كالتله/ مو على مزاجك
منتصر قرر يطلكها منك
وكالي دوريلها قسمة زينه
اريد اطلع من خطيتها ،
و بس اطلكها تروح تسكن بيت عمها حاتم
ومن تخلص عدتها ازفها لواحد يستاهلها
كام يصيح ويعيط ويدفر بالباب يكلها / طلاك مااطلك
واعوفها معلكة وما تروح بحظن ثاني
واذا سوتيها سالفه واجتمعوا الأخريه عليه
اخلي براسها جيله واكتلها وما تروح الغيري
باوع عليه جنت ابجي وخايفه من صوته وعياطة
وهم محروك قلبي من عنده
كالي / اكلج انتي راضيه على سالفه الطلاك
كتله / بكيف منتصر
هو شيكول اني اكول اي
هو عاط وانوب بالكوة كام يلكف الهواء/ يعني حياتي
ومصيري صارن هسه بيد منتصر
لج بابا افتهمي انا رجلج مو منتصر
كتله / منتصر هو بمكان بابا وبعد بكيفه
واني اريد رجال يحبني
شلون هو يحب بس مسرة
اني اريد اتزوج رجال مثله حباب
هو تخبل اجى اخذ فقار من حظني
وانوب سحل مهد البنات اخذهم يمه بالاستقبال
وكالي / حتى لو لكيتي القندرة الحباب اليحبج
طلاك مااطلكج ، اعوفج هيج معلكه
وجهالي تحلمين تشوفيهم
روحي خل قرارات منتصر تفيدج
اني هنا عقلي على كدي مااعرف افكر
كمت ابجي بخوف واكلها /خاله عفيه اخذ جهالي
بعد ما ينطيهم اليه
هي ضحكت وكالت / ولج مسودنه قابل وين وداهم
هسه يزهك من بجيهم ويردهم عليج
بس شفتي شلون حابج ومتمسك بيج
وبقت هاي الحرب النفسية مشعوله بالبيت
وزاد الطين بله من خالتي بشرتني
وهو قاسم يمين بالقران بعد ما يشرب
يكلها / كلمات منتصر وهوسته عليه
صوابهن ملخ روحي اكثر من صواب الطلقات
كام يدور حجج على اقل شغلة يعيط
ويبقى يصيح
وخالتي تكلي/ ميخالف نتحمله هو اليكطع الجكاير
يسودن مو عاد اليكطع الشرب وروحة النسوان
بيوم خالتي راحت يم بيداء العصر تشوفها
ولمى اخذت البنات وكعدت بالحديقة هي وحيدر
بقيت بس اني بالصالة اتفرج تلفزيون
ويمي فقار نايم
واقلم باميا الخالتي تريد تخليها بالمجمده
مسرة جانت رايحه لبيت ساهرة هو منتصر وداها
كالتله / ضايجة ومخنوكه
اجى طارق كعد بطرف القنفه
كالي / تسويلي كلاص جاي راسي ملخني
كتله / ميخالف بس عينك على فقار خاف يكعد
احنا دوم مجهزين السماور مفورين المي والهيل
والقوري الصغير بي جاي كامل
يعني اصب نص كوب جاي ونص كوب مي حار
يصير كلش طيب ، بسرعه صبيتله وقدمتله
ورجعت كعدت بمكاني ورجعت اقلم باميا
كال / تعرفين بيه انا خريج هندسه ميكانيك
وبتقدر امتياز بعد ، من انا وصغير
انا ومنتصر نحب سوالف سيارات وتصليح
وشكو شي اسمه برغي ودرنفيس نسودن عليهن
منتصر ما كمل دراسه خلص بس سادس
وبلش بشغله جان متزوج الحجيه
هي الساعدته وخلته يكمل السادس
-
وهو عوض نقص الدراسة بيه
وصلني للهندسة وزخ عليه فلوس زخ
علمود التدريس الخصوصي
حتى اطلع معدل زين بالسادس
وقبل بوكت صدام الدراسة من صدك تعب
مو مثل هسه شلح واعبر طالب بسادس
ما يعرف يكتب اسمه
المهم ومن انا طالب بالكليه
وكعت بشلة عساس هم أصدقاء
بس جانوا شلة عفطيه واول خطوات الدمار اليه
تعلمت الشرب منهم وجنت اشرب بالبسكوت
اخاف من منتصر ،
هو جان يعرف بيه ادخن
من جنت طالب بالاعدادي ، ما حاجاني
-
بس الشرب لا من عرف بيه شك راسي بالمكوار
وطردني من البيت
ورحت لفيت يمهم عدهم بيت ساكنين بي
ما ساكنين بالاقسام الداخلية
المهم طاح حظي بالزايد بسبب رفكتهم
وجنت مراهق متأخر وطايش ،
وعقلي مجيم ما يفكر
وغارتني الدنيا وطيش الشباب والفلوس
لحد مااجى منتصر وحاتم سحلوني من بيناتهم
-
منتصر كالي / ابقى كدام عيني وشتريد تسوي سوي بعد صرت اطول مني حتى استحي اضربك
-
وحاتم / كالي بس اتخرج وحقق حلم اخوك
وانا أضمك ويايه بالجيش
بوكتها غمزلي وما افتهمت شنو قصده
رجعت للبيت وذبيت حيلي على دراسه
بس الوب على الشرب مااكدر اسيطر على نفسي
كمت اروح بليل اشرب قليل
حتى بس تهدأ عندي وشت راسي
واجي الف راسي وانام حتى منتصر ما يلكفني
لحد ما تخرجت قبل السقوط
انا ابد ما مريت بتجربه الحب نهائيا
ماأحب العب على بنات الناس
اذا أحب معناها اتزوج
واعرف طبع اهلنا ما يقبلون بالغريبه
فما خليت بالي بالكليه
يعني يم وحدة من الطالبات الجانن ويايه
صار هوسه العراق وسقوط النظام الرئاسي
وبعد مرور الاشهر
يلا رجعت الأوضاع شويه تستقر
وبسنه ٢٠٠٥ دخلت للعسكريه
مو علمود شغله راتب لو حاب هذا المجال
بس حاتم ضابط بالحكومة القديمه
ومستجد بالحكومة الجديده
وبقى مجموع ويه ربعه واصدقائه
وهو صاحب مزاج وكيف وطلعات وكعدات
ودلال النسوان ، ألتحقت وياه علمود الونسة
أنا جندي عادي لا رتبه ولا منصب
حتى مرتاح بدوامي اطلع ويه حاتم وارجع وياه
انا وياه انام بنفس الغرفه
عود من يطلع المكان انا اسوق السياره
واذا مابيه حيل لو تعبان
اكو ولد صديقي هو يستلم عني
وحاتم من يضوج بالدوام لو يريد يغير جو
يفلت لبيت عماتي واهلنا هناك بالعرب
مره مرتين واكثر اروح وياه
-
لجحت بنيه حلوة وانتي بعد شايفتها
تصير بت بتها العمتي ام شمخي عمتي الجبيره
دخلت براسي ، شفتها لسان وحلوة
ومحترمة نفسها ، وام بيت ونظيفه
هذن الشغلات كلهن عرفتهن
من كمت اسكن بيت عمتي من التحق للدوام
ومااروح اداوم بالوحدة أبد .
-
وهو حاتم يغطي عليه
هو عرفني خليت عيني عليها
وهو بعد ماخذ دبلوم بقرايه النسوان
كالي / جيت تراها خوش صيده
وصدك يوم بعد يوم تعلقت بيها
وانطيتها باص وذبيتلها كلمة
بويه انا معجب بيج ورايدج باجر حلالي
فكري بكلامي زين ورجعيلي خبر
ترديني نصيبج لو لا
حتى افتهم دربي واكون على بينه وياج
وردتلي خبر بصعدتي الثانيه
هي موافقه عليه اكون اليوم حبيبها
وباجر نصيبها وحلالها
ردت مهله اشهر هم اتعرف عليها
وهم اكون نفسي بنفسي
انا عندي خير من الله
واكدر بساعتها افتح بيت وحدي
بس مااعرف ليش ردت مهله هم انتكل على نفسي بكلشي ،ومااريد شي من منتصر عيب عليه هوايه ثقلت عليه ، وهم انطي لنفسي مجال أتعرف عليها اكثر
ومشت الايام وبعت روحي وقلبي
وكل مشاعري واحساسي الها ،
عمري ما حبيت بنيه
عمري ما باوعت لبنت عايله بنظره حرام
صح اروح ويه حاتم لكعدات الغجر
واشوف هناك اشكال الوان النسوان
بس هن هو هذا شغلهن هن عارضات نفسهن
بس بنت عايله وناس ابد ما ندكيت بوحدة
اخاف على خواتي من دين العرض
وشكو بيج يا دنيا
من ملابس من هدايا من عطور
من تلفونات من ارصده من حلويات ومشتريات
اجيب واشتري واخلص كل راتبي عليها
كتلج قبل هذني السوالف بعت روحي وقلبي الها
وكل اهلنا هنا بغداد عرفوا بسالفة حبي الها
ومن يردون يحلفوني علمود اسويلهم شي
يحلفوني بااسمها وانا اطير مثل الغبي
واسويلهم الشغله ومرتاح والله ذكروني بيها
وبيوم راسلني رقم غريب
دزلي هوايه خريط ورسايل
ويحلف مية يمين علياء تحبني وتحب ابن عمها
انصدمت افترت بيه الدنيا
شلون هيج يصير هي تموت عليه ،
وتبقى تبجي من انزل مجاز لبغداد
اخلص الوكت وياها تلفون وره تلفون من انزل هنا
ومن اسمعها تشهك وتبجي وتكلي/ مشتاقتلك كومة ليش هيج طولت عليه ،،
وانا ما صارلي يومين من عفتها
تتملخ روحي عليها
اعوف كلشي وارجع اسافر لهناك
حتى لا تبقى تبجي وتقهر بروحها
الرسايل دوختني واراسل صاحب الرقم
انت منو ؟؟
ما جاوبني وما عرفته
بس من اسلوب الكتابه عرفت اليكتب بنيه
او مراه مو اسلوب زلمة ابد
المهم بيوم نزلت هنا لبغداد يومين
وبقيت افكر وافكر
شلون اتأكد هذا الرقم صادك ويايه لو جاذب
دزيتله رساله/ اثبتلي علياء تحب عبد الحسين
مااريد بس كلام وحلفان اريد دليل
دزلي / هي عكب باجر متواعده وياه
يتشافون بستان حجي قدوري
وبالعيانه هو مواعدها يجبلها زنجيل ذهب
هي طلبته من عنده بي حرف اسمها الاول بالانكليزي
انا بقيت اكل بروحي، وبقيت اتواصل وياها
كلشي ما بينت الها ، وانتظر الوكت يمشي
واريد الزم الدليل الياكل بروحي
والله اجى عكب باجر وأغبش لهناك
وبقيت على تواصل ويه صاحب الرقم
ما رحت لا لبيت عمتي
ولا للوحدة مالتي ،
كابلت بستان حجي قدوري وكعدت
وقبل المغرب بشويه ويدزلي الرقم رساله / روح شوفها
كاعدة بساجية الماي وعبد الحسين كاعد يمها
رحت ركض كمت مااشوف دربي
انوب ساجيه بعيدة عليه صارت
بهذاك طرف البستان
والجحها من بعيد
صدك كاعدة ومنزله رجليها بساجة المي
وعبد كاعد بصفها ولازم ايدها بعد
وصوت ضحكتها يرن بالبستان
انا هنا اشتعلت بانزين وطفيت
نار كبت بيه وطفت اصبحت رماد
كمت ارجف من كتمت اعصابي
لان اذا اهد على الزلمة يحكني بالعشاير
وهو ابن عمها وأولى بيها من عندي
وهم افضحها وهي تعند عرضي
صرت مثل بلاع الموس اذا ابلعه يمزق روحي
واذا اسحبه يمزق بلعومي وحلكي ويكطع عني الهواء
رجعت لمكاني ورجل اطخ برجل
ودموع روحي حركت روحي
أقسملج بدين محمد مااعرف شلون اشرحلج
بوكتها شنو من أحساس النار والوجع وألالم
الحسيته سحك روحي وكسرها
حتى بعد ماعندي حيل اجر النفس
واجبر الباقي من روحي
ولا تستغربين من كلامي ترى مشاعر الحب الصافي
ومجازات هذا الحب بمشاعر الخيانه
تمرد الزلم والنسوان ،
ماتفرق والله هذا زلمة ولازم يكون قوي ،
وهاي مراه لازم تبجي وتكون ضعيفه
لا ألحب ما يرحم واحد يبجي عيون الجميع
ويحرك كلب الكل
رجعت لبغداد وعلى ياساعه اكلب السياره
اتسودنت ، فقدت عقلي
ولج حب صافي اكثر من سنه ونص
انطيت روحي وقلبي الها
طلعت تلعب عليه وتخوني
الحلو بليل تراسلني ومسويه روحها
راح تموت من الشوك وتبجي علمودي
بس كتبتلها / شلونه عبد الحسين
وهي اختفت لا ساعه ولا ساعتين
انوب رجعت اتصلت/ شنو سامع
وشبيك احسك مو على بعضك
كتلها بالقلم العريض/ شعندج ويه عبد الحسين ابن عمج
هو مو ساكن بغير منطقه شعندج ملتقيه وياه
بستان حجي قدوري المغرب
وجايبلج هديه زنجيل بي حرفج بالانكليزي
هي أنصكت اخرست
لا تجاوبني ولا ادافع عن روحها
بس اسمعها تشهك وتبجي
وين يلا كالتلي/ طه والله انا احبك الك
بس هو لازكلي انا مااحبه
سديت الخط بوجها وهي السده
ويمكن شهر وانا ادمرت اتهسترت اتسودنت
اريد شي اكسره افلشه
اريد اعيط، اصيح
اريد اطلع هاي القهره البكلبي بلكت ارتاح
ماكو شي يخفف عني
لحد ما ادزلي رساله بت المطي
تكلي/ شو ما باركتلي انخطبت
لابن عمي عبد الحسين
واليوم حفلة الملجة مالتنا
هوايه فرحانه بقسمتي من عنده
وحبيت ابلغك حتى تفرح ويايه
كمت بدون عقل مسودن وطلقوا سراحة
شكو شي كدامي كسرته
شكو غلط وفشار ومسبه وكفران وصايح وعايط
ما خليت كلمه عوجه بالكون ما كلتها عليها
البيت دخلوا انذار من ورايه
صرت بدون عقل
بنت المطي اعرفها سوت سالفه خطوبتها عناد بيه
والله عود هي ما مكسوره
وعادي إذا انا رحت حبيبها الثاني موجود
-
وانا اصلا مااشتريها بعد بلاش
-
المراه اليطخ ايدها زلمة غيري تجز روحي منها
'
مو عاد وحدة مثلها حقيره وخاينه
هي بذمه ابن عمها وتراسلني
متندمه وتريد تفسخ الخطوبه
والله مالكت بي المواصفات التحلم بيها
وهاي المواصفات لكتهن بيه مالكتهن بي
-
من انعل ابوج لابو حتى الحب وباعلج روحه
لهناك واسمع ابن عمها فاسخ الخطوبه منها
وعايفها ،
صاحب الرقم كالي / لكف رسايلها وياك
وهي تكتبلي / انا طلبت منه يعوفني
انا بس اقره رسايلها
وابد من هذاك اليوم لا راستلها ولا جاوبتها ،
ولا حتى رحت لبيت عمتي
كطعت رجلي منهم
لحد ما صارت سالفتنا
واحمد الله واشكره عليها
احلى غلطة صارت بحياتي
وطشت سالفه خطوبتنا والعقد
-
وهي رجعت تراسلني/ شلون تعوفني
وشلون تخطب غيري
وانا بعدني انتظرك
لبستها لبست القندره
واتفاجى بيها بنت الجلب بكل عين صلفه
تجي ويه اهلها من صارت سالفه عرسنا
وبنت ذيل الجلب صعدتلي الغرفتي فوك
وبقت تحسب وتدعي وتبجي
خوش زفيتها زفه محترمه
عرفتها هي مجرد حشره كرصتني
وانا كفختها ومردتها بيدي
وشمرتها بسطل الزبل
والحمد لله من الله رزقني بعسل صافي
مو مثلها مي مجاري وهمزين ما شمرت روحي بيها
ومن سمعتي اتصالي بيها بليل
هي الدكت عليه
وانا عود ردت احرك كلبها واخبث عليها
بس انا الطحت بحفرة خيانه المشاعر
سواره الي انتي تحسين بي واحترك قلبج علموده
انا مريت بي وحسيت بنفس احساسج
ان شاء الله من اليوم انا راح اكون انسان ثاني
واحاول اعوضج بكل خير
اتمنى تنطيني فرصه ثانيه
اذا مو الخاطري الخاطر جهالنا ....
هو يحجي واني شبعت بجي
ماادري انقهر عليه لو انقهر على روحي
هو مجروح ومغدور
وهو هم جرحني وغدرني
مااعرف شسوي
مااعرف شلون اصرف
شايفين الواحد من يصرف بطريقه غريبه بدون وعي ومايعرف ليش هيج اصرف
كمت وعفت كلشي بمكانه
أخذت فقار ورحت لغرفة خالتي
نيمته بالمهد ورحت توضيت وكمت اصلي
حتى لا وكت صلاة ولا ابد
بس اصلي وابجي مااعرف شبيه
روحي توجعني 🥺
يعني الجسم من ينوجع
اكو علاج ينشرب أله ويروح هذا الوجع ،
بس وجع الروح شلون يتعالج ؟؟
شو اني اصلي اجتي بالي فكره
كملت صلاتي واخذت فقار بحظني
واخذت شمعه ورحت للحديقه الوره البيت
وشعلتها جوة النخله
جانت خاله ام عمر تشعلها جوة نبكه
بس هنا ماكو بس نخله وهن كلهن نبات مبارك
وخليت فقار بصفها
وبجيت بغصه قهر وكمت احجي اخيط واخربط
وهاي الشكوى قدمتها بين ايدين ربي العالمين
اني يتمه وهو نعم الوكيل ومتأكده يسمعني
الا غوربت الدنيا يلا رجعت الداخل البيت
انوب اتكأبت بالزايد بسبب الغروب
لكيت حيدر ولمى بالمطبخ
جاي ياكلون معجنات ويشربون عصير
كتله / حيدر حباب وديني البيت ساهرة
فرد نوب مختنكة
ضحك وكالي / بويه هذاك رجلج نايم بالاستقبال
انا شكو ، روحي كليله واذا وافق اوديج
اني منا حيل مختنكة مو مال اكعد اناقشه
كتله / مشكور
وعفته ورحت جوة الغرفة خالتي
مخنوكه اريد شي يفك عني
متت حجاره ونامت بنص صدري
اجتي لمى كالت / يلا لبسي عباتج راح ياخذج رجلج
تاخذين البنات وياج لو بس فقار
كتلها/ لا بس فقار خليهن يمج
لبست عبايتي وشلت فقار
انوب مااعرف اشيله بالعباية اتخركن
طلعت لكيت طارق منتظرني باب الشارع
طلع يمشي كدامي لحد ما وصلنا لبيت ساهرة
دخلت للبيت هو عافني وراح
لكيت ساهرة كاعدة تعلم بمسرة على خياط
مااعرف تطريز بيدها ابره وخيط وقماش تنقش عليه
وامها كاعدة على كرسي الصلاة تصلي قبل اذان المغرب
من شافتني ساهرة دخلت عليهم ومبينه باجيه
كامت بوجهي وكالتلي/ هلا أمي هلا بيج تفضلي
اني سمعت كالت امي لو شكو بيج ياروحي بجي
طلعته وبشهكة وصوت عالي
هي حظنتني قوي كالت/ منو وياج
-
كتلها / طارق
-
كالتلي/ شنو ضربج
-
كتلها/ لا بس وجع قلبي
-
باستني على راسي وكالت / اسم الله على قلبج
-
اجتي مسرة اخذت فقار من عندي
وكعدت يمهن ،
العجوز سلمت عليه
وهم كالتلي / شلونج يمه ، شلونهن بناتج
صلوات صاير فقار حلو
وبقت تسويله اغاني مال جهال
شلون خالتي تسويهن الهم
ساهرة خابرت على مازن كالتله / طلبتك ولا تردني
اريد اساور تجي لبيتي
عازمتها هي وخواتها على العشه
-
هو ملتحق بس انحرج من عدها
كايللها / تدللين هسه حيدر يجيبها الج
-
يمكن ربع ساعه واجتي أساور مستغربه من لمتنا
بس كيفت على جتمعنا يم ساهرة
خطيه هي ساهرة كالت / كل ما تضوجن
بس دكلي تلفون وانا اخابر زلمجن
يستحون مني ما يردوني وتعال هنا
اخذن راحتجن
ومر الوقت ولا حسيت بي ،
سوالف العجوز ولا تنمل كله تحجي على ايام قبل
وضحك ، وشقه ، ولمه خواتي
وساهرة سوتلنا عشاه خفيف
بس هلكد حسيت الاكل طيب
يعني جانت ليلة كلش حلوة
وره العشاء ساهرة جابتلنا موطا ،ومشتريات
وحب شمسي ، وكعدنا على فد ضحكة
وفد سالفه حلوة
مسرة كالتلها / حجيه مو يكولون ربما صدفه
خيرا من الف ميعاد ،
مادام هسه كلنا مجموعات يمج
سولفينا شنو سالفه ماما وبابا
واني اثق بيج وبصدق كلامج
لان حجيه وتخافين الله
هي ضحكت وكالت / انتي صدك ما تنسين
ومابيها شي سالفه امكم وابوكم
بس العادات والتقاليد والمجتمع هو الظلمهم
امكم الله يرحمها والنعم من اصلها
من عشيرة الجبور البو خطاب من اهالي الموصل
من سكنه احدى القرى التابعه لنينوى
خطيه بالشافعات يلا مخلصه معهد تمريض
هناك يم اهلها عدهم عيب
البنيه تدرس بهيج معهد وتصير ممرضه ،
واغلب البيوت العراقيه
ما يقبلون بتهم تصير ممرضه
والله عليها سمعه مو حلوة ،
وهم نسوا هي مهنه انسانية
حالها حال الطب والصيدلة
وبكل مهنه اكو الزين واكو الشين
وبكل اختلاط اتصير سلبيات
والواثق من تربيته ما تهزه الاعصاير
بس السمعه المو حلوة عمت على الكل
الله يرحمها طلعت من الأوائل على المعهد
ومديرة المعهد بوكتها رفعت اسمها تكريم الها
تلتحق بكليه التمريض هنا بغداد
لان تعيينات مركزيه وشهادتها منا من جامعة بغداد
جان الها شنه ورنه مو هسه خربت الدراسه
اهلها عارضوا وابد ما قبلوا على الفكره
وامها الله يرحمها بوكتها وكفت وياها
ورادتها تكمل دراستها ، وصايره بيناتهم
هوسه ومشاكل، شلون تجي وتكعد هنا
بغداد وحدها
بيبيتكم مهجة اخت عمتي فاطمه ام منتصر
من هي شابه هذا الحجي بالخمسينيات
حبت جدكم وهو زلمة غريب مو من عشيرتنا
وهو استقتل عليها ،
وهي وكفت بوجه اهلها علموده
وبعد قسمه الله فوك ارادت الجميع
صارت من قسمته وتزوجوا
وطفرت هناك للموصل وعاشت هناك ،
وخلفت كوم بنات ولد
ومن ضمنهم امجن سهر الله يرحمها
بيبيتكم صلبه وقويه صح ما دارسه ومتعلمه
بس مثقفه اكتسبت ثقافتها من الدنيا
وصلت بناتها وولدها كلهم بالدراسه
وقنعت جدكم وخوالكم ،
ان سهر ما راح تسكن وحدها
ولا راح تسكن بالاقسام الداخلية
تجيبها تسكن هنا بيت خالتها الحجي فاطمه
جدكم جان كلش يحب عمي ابو منتصر
وهوايه يحترم عمامي ، هو جان يعرفهم
باعتباره نسيبهم وعديل عمي ابو منتصر
وبعد اقناع بيبيتكم مهجة وافق
تجي أمجن وتسكن بيت خالتها وتكمل دراستها
وجانت هدى وسهى بنات شابات بعدهن ما متزوجات
بس انا ومنتصر جنا هستونا عاقدين
وكاعدين بيت وحدنا ،،ما ساكنين وياهم
وطارق جان كلش صغير ،
فجدكم شاف الاوضاع تناسب بنته
يعني ماكو شاب وياها بالبيت
وافق وجابها البغداد وسكنت بيت خالتها
حتى تكمل دراستها
امجن الله يرحمها انتن بعد شايفاتها
حلوة وشخصيتها قويه
من سكنت بيت عمي كاظم وهو بيت خالتها فاطمه
كريم أبن عمي حميد
اخو حيدر ومازن الجبير الله يرحمه
خله عينه عليها ، ودخلها بمزاجه
وهو جان يكرك صيت ومنصب بالدوله
هي لا رفضته ولا انطته مجال
بقت مخليته على الشحن على كولت منتصر
أبوجن عدنان يصير ابن عمي محمد
جان هستوة واكف على رجليه
وبادي بشغل بيع وشراء الأدوات المستخدمه
هم عجبته وخله عينه عليها
ابوجن الله يرحمه يختلف عن كريم
من ناحية الادب والاخلاق
ابوجن خلوق وخوش انسان
وصاحب قلب طيب ،
بس حالته الماديه اقل من كريم
الجان طاك بوكته ويلعب بالفلوس لعب،
والله يرحمه جان شمخره وشايل خشمه
شايف حاله ومغرور بصيته ومنصبه بالدوله
امأنة الله ورسوله انا بعيني ما شفت بس سمعت
وبعد انتن تعرفن بين الحق والبطال فرق أربعة اصابع يكولن نسوان ال الحسن
عساس امجن جانت بالكليه تطلع ويه كريم
وبيت خالتها تكعد ويه أبوجن عدنان
وين الصدك وين الجذب مااعرف
من طش الخبر بين اهلنا وعمامنا
عدنان يحب سهر ويريد يخطبها ،
كلهم وكفوا بوجهه
ماعدهم غريبه تدخل بيناتهم ،
ولا ينطون الغريب
معنوا يعوفها وماله دخل بيها
ابوجن بعد شروكي وعشك تسودن على أمجن
ولان رفضوا اهلنا زواجه منها
هو تسودن بالزايد
وانوب كريم محاجي وجه الوجه
كايله / انسحب منها أنا رايدها
انا اقنع اهلنا واخذها
ابوجن كوم واخذ خالاتك وعمتجن الله يرحمها
وبيبيتكم امه يعني .
وروح اخطبها من اهلها
هم اهلها هم رفضوا لان اجاهم باص
عمامي ما قابلين على هذا الزواج
والشي بالشي يذكر هاي عمتجن الله يرحمها خيره
هي نفسها البيداء خوفت سوار بيها
حتى توافق على طارق بيوم العقد
هي كالتلي /خوفتها وكتلها ذبحوا عمتج
ودفنوها بالصحراء وخليتها توافق
هي نفسها هاي عمتجن شهدتلي وخلصتني من الموت
لا ذبحها واحد ولا ابد ،
المسكينه عدها سكر ولادي
وماتزوجت بقت بنيه وماتت من وراه
اي ونرجع لسالفه أبوجن الله يرحمه
من رجع من بيت جدكم من رفضوا
سواله هوسه وعركة
خطيه الكل وكف بوجه ومحد سانده
و ما جاز من الموضوع
من شاف امجن راحت الاهلها
وبعد ما خلوها تجي مره ثانيه لبيت خالتها
يعني بطلوها من دوامها ومنعوها تكمل دراستها
ومنعوها من الجيه البغداد
هم اخذ أمه واصدقائه اثنين وراح يخطبها
للمره الثانيه وهم رفضوا اهلها ينطوها أله ....
ليش ما بيوم وكريم الله يرحمه
قنع عمامي يروح يخطبها
ومو الكل موافق بس هو بعد صاحب كلمة
ويعرف شلون يسيطر عليهم
وبعدهم هوسه هذا موافق وهذاك لا
وهذا يكول غريبه،
وهذاك يكول مو تريد عدنان
وبعدهم يتناقشون هذا الحجي اسبوع يجر اسبوع
ومانسمع غير متعاركين عدنان وكريم
وين بمكان الشغل مال عدنان
وهو كاتل كريم موت
شنو الصار وشنو الجره مانعرف
غير السمعناه من العمال الموجودين
كريم رايح على ابوجن لمكان شغله
وكايم يشمر عليه بالحجي ومن هذا اسلوبه
اكتلك ،،واسجنك ،،وادفنك
متلاغين وصايره بيناتهم عركة
وابوجن كاتل كريم وشارد
ولهناك يمكن ما طالعه سبعة الفاتحة
مال كريم الله يرحمه
ويهدون علينا أهل أمجن
أبوجن ما خذن امجن وشارد بيها
وصارت هوسه ومشاكل وطلابه عشاير
واهل أمجن دكوا بيت عمي محمد ،
ودكوا بيت عمامي
ياهو اليعرفوا التابع لعدنان ما سلم منهم
وأدخلت عشيرتين طرف صلح بين عشيرتنا
وعشيرة أمجن ،
وهدروا دم أبوجن
وشيخ عشيرتنا كسر عصاته من العشيرة
وقرروا وين ما يلكون عدنان وسهر يذبحوهم
ومن هذاك اليوم اصبح أبوجن عدنان
مطلوب للدوله لان كتل كريم
ومطلوب هو وأمجن للعشاير لان شردوا
يعني تعتبر امجن نهيبه
شارده من اهلها ويه حبيبها
هاي عقوبتها بالعشاير الذبح
والزلمة الشردت وياه هم ينذبح
لان مس عرض وشرف عائلتها
وحتى لو لكفوهم بعدين متزوجين
وبينهم عقد شرعي واذا كدروا عقد قانوني
والزلمة معترف بيها هي زوجته وما ناكرها
لو يكتلوهم
لو يعفون عنهم ،
بس تبقى لازكة بيها كلمة فلانه المنهوبه طول عمرها
ومن وكتها بعد ما عرفنا درب أمجن وابوجن وين
والعالم الماترحم سووا سالفتهم شماعه
وعلكوا عليها كلشي جابه القدر
من موتت عمي محمد جدجن وزوجته
وموتت عمي حميد ابو كريم وزوجته
والمشاكل الصارت بين العمام
والله كله من وره عدنان ماتوا من القهر
والله كله من وره عدنان اتعاركوا العمام
ويبوووو شكد سمعنا حجي وسوالف ما ترحم
وهاي كل سالفه أمجن وأبوجن
هم حبوا بعض بس العادات والتقاليد والمجتمع الفاشل
وكفوا بوجه سعادتهم ومنعوا زواجهم مثل باقي العالم
وأبوجن مشى وره قلبه اخذها وشرد بيها
واصبح هو عدنان القاتل
وهي سهر المنهوبه
وانا متأكده أمجن شريفه وطاهرة وخوش مراة
ولو صدك جانت عدها علاقه بكريم
جان أختارته اله وتزوجته
شو أحسن من أبوجن بكلشي
هم مريش يزخ فلوس
وهم صاحب منصب بالدوله
وهم صاحب صيت
بس هي أختارت أبوجن لان خلوق وصاحب طيبه
وكل الحجي الزايد تلفيق من العالم الماترحم
اني أسمع قصة ماما وبابا
وارضع بفقار وعيوني تهل دم عليهم
ماادري ابجي وانقهر عليهم
لو على حظنا ،
يعني هم حبوا بعض
وزواجهم ما صار مثل باقي الناس
وبابا بقى مطلوب للدوله وللعشاير لحد ما توفى
وهي ماما بقت لازكة بيها الكلمه المو زينه
حتى بعد وفاتها
واحنا تحملنا ذنب هذا حبهم وزواجهم المو عادي ...
-
-
-
اساور /مازن هوايه يضايقني بتحذيرانه الماالها داعي
البسي عبايه كدام أخوان بيداء
لا تكعدين يمهم عيب
زلم غربه عليج ويباوعولج بغير نظره
لا تاكلين كدامهم
صوتج لا يعلي من تسولفين
لا تضحكين بصوت عالي
من صدك كمت اضوج من هاي سوالفه
من احاجي يكلي/ اخاف عليج
ماعندي شك او سوء ظن تجاهج
وبهذيج الليله الي بلغني بيها مازن
عمو حاتم صحه
يمه طرت من فرحتي
مااعرف اضحك مثل المخبله
لو ابجي مثل ام العزة
بيداء تهلهل وتبجي وتحظن بجهالها
هي من قبل يومين ثلاثه
الاطباء بلغوها عنده استجابه قويه
ومتأملين خير
ما صدكت شعشع الفجر وراحت هي وامها واخوها
الف الحمدلله غيمه وانزاحت من سمانا
الحمدلله على نعمة الفرصه الثانيه
الحصلها عمو حاتم بالحياة
وفرح قلوبنا وفرح جهاله
وربي يديم وجودة خيمه على راس عائلته
ماكو شي بهاي الفتره جديد بحاتي
غير سالفه عمو حاتم واموره الطبيه
الحمدلله تصعد للأحسن
وجهاله الملتهيه وياهم
وخواتي الاعرف اخبارهن غير من تلفون
ومازن الشاعلني بسوالف غيرته مثل ما يكول
لو طبع الشك التارس روحه
بيوم هو خابرني العصر كالي/راح يجيج حيدر
روحي لبيت الحجيه ساهرة
عازمتج على العشا انتي وخواتج
وصدك اخذني حيدر ورحت
حيدر اريحي مو مثل مازن
بس عصبي نار ما يتفاهم
عكس مازن هادئ
وبعد العشا والسهره والسوالف الحلوه
سمعت قصة ماما وبابا
اني مو هيج افتهمتها من مازن
ومن العجوز ام ساهره
ولا حتى من خالتي فاطمة
كل واحد ضايف شويه من عنده
لو حاذف شويه
بس لبة السالفه ماما حابه بابا
واهلهم ما قابلين على زواجهم
ومنهزمين من عدهم ومتزوجين بدون رضاهم
صح خطوة زواجهم غلط
بس مو معناها ماما مو زينه
وياهو الجاي يعيرنا بيها
مسرة بجت بقهر وكالت / صح احنا من انتقلنا
من بيت بابا وماما
واجينا لبيت خالتي فاطمة
وعرفنا اهلنا الجديدين
تعذبنا وانظربنا وياهو الجاي يهين بينا
وسمعنا اشكال الوان الكلام المو حلو
بس فتره واستقرت امورنا وعرفنا اهلهنا
وهم عرفونا من طيبه اخلاقنا ونظافة شرفنا
اليرجع الفضل والاساس بتربيتنا الترفع الراس الماما
اليكولون عليها مو زينه
احنا بحياتهم عشنا بدلال
وبمماتهم استقرينا بعد فتره عذاب صغيره
بس هم الله يساعدهم
شنو شافوا من ضيم وقهر بهاي الدنيا
شلون عاشوا وهم مطلوبين للدوله وللعشاير
وين جانوا عايشين
وين ضموا نفسهم
شنو اكلوا
شنو شربوا
شلون عاشوا
شلون كونوا نفسهم
بابا شلون دبر عيشته هو وماما وين انهزم بيها
ماما شنو حست من فارقت اهلها
شلون امنت برجال غريب وعافت كلشي وراها علموده
شلون ضحت بسمعتها علمود حبها وزواجها من بابا
زين هم من خطوا هاي الخطوة الغلط بوكتهم
فكروا بس بحبهم ونفسهم
لو فكروا بجهالهم من بعدهم شلون بيهم ومعقوله الهذا السبب ماما هيج ربتنا وبعدتنا عن الدنيا حتى لا نوكع بنفس غلطها ؟؟!!
هوووايه اسئله ولجن تاكل بقلبي وبروحي وكامت تناشغ وتبجي بصوت عالي
ساهرة كالت / لو ادري ولا مسولفتلجن مو جنا نضحك ونسولف ونضحك
انكلبت سهرتنا بجي وحزن
وره ما مشى الوقت أجى منتصر اخذنا وصلني لبيت عمو حاتم
واخذ مرته وسوار لبيتهم
مازن بقى يحقق ويايه منو جابج
وبيش ساعه رجعتي
وشصار بيت الحجيه
ولازم كلشي احجيله بالتفصيل الدقيق
-
-
-
ومرت الايام بسلامه وطلع عمو حاتم للبيت .......
-
-
ومازن قرر يوم عرسنا
وبشلت تجهيزات العرس .....
وصار الشي الي ما يخطر على بال اي بشر ....
هاي التفاصيل الاخيرة اوضحها الكم بالحلقة القادمة 😁
شكرا لزيارتكم عالم روايات سكيرهوم
