رواية ناديه الفصل السابع والعشرون 27 بقلم انين الليل

ناديه

بعد ان سمعنا اوامر افراح گمت على المخزن ورتبته چان كله تراب يعني هو مخزن وبي فراشات اكيد مو يوميه

 يتنظف

شلت قسم من الفراشات خليتهن بالبيتونه بعد ان رتبتها ونظفت المخزت كنسته وغسلته رغم الدنيا بارده وانتظرت 

على ما نشف وفرشت بي زوليه قديمه بعدين نزلت وسالتها شنو افرش النه 

هي باوعت وگالت //فوتي ( واشرت على غرفه جوه ) روحي الهاي الغرفه طلعي دواشك اثنين ويه الفراشات الي

 انطيتهن الچن ما اريد وصاخه بيتي نظيف

اجت حنين شالت الدواشك صعدتهن وانا مديت دواشگنا وخليت المخاد 

گعدنا ونباوع للمخزن كلش زغير يادوب مكفينه واهنا احتارينه وين نخلي ملابسنا وكتبنا 

ونزلت بعد ان گلت الحنين ابقي اهنا رحت لگيت افراح گاعده وتخابر من شافتني اتعمدت تعلي صوتها

- - ها يمه شسوي الواحد ما يعول ايدير باله على اولاده جابولي بنات الناس 

- - لا يمه شلي غرض بيهن هنه وعمهن ينجازن شنو اگعد الهن خدامه 

- - ادري يمه غصبن ما عليهن يخدمن لو ماكو من الصبح ينذبن بدار الايتام وهادي تعرفينه يسويها ويسوي ابوها 

- - لا عليمن تحاچينه انا اتفاهمت ويا وهو گلي بكيفج 

- - اي اي يمه لا يظل بالج

سدت التلفون ودارت وباعتلي اتقربت مني وهي تگول 

- - هاي مال التصنط جوزي منها تتصنطين على شنو والمن تودين اخبارنا 

جاوبتها ... لا عمه مو هيج انا ما جاي اتصنط 

افراح //چا المن جايه 

- - عمه اريد ميز شي اخلي بي ملابسنا خو ما يبقن بالجنط وانتي ما قبلتي نجيب الكنتور مالتنا

هي هزت ايدها //والله تتشرطين 

...عمه ما اتشرط بس 

اشرت بايدها يعني اسكتي //بس شنو ترديلج كنتور بت مياده معلمتج كناتير امج لو اميازتها بالسجن 

انا انقهرت رديت عليها ......عمه عيب شنو هالحچي هذا

افراح عاطت عليه ولزمت ثوبي من يم صدري وتعت بيه وتگول 

—-ولج انتي تعلميني العيب بت الك.. يا نغله ماندري منين ملگطتج وجابوج عدي 

رديت عليها ...عمه ليش هيج والله اگل العمي هادي لو لان بيبي اتوفت هيج تسوين بينه 

هي بصوت عالي //انعل ابوج لاابو عمج لا ابو بيبيتج هي لو ما مثل مياده ما چان لفت هيج شكول...

قطع كلامها صوت زمخه خلاها تجمد بمكانها وهو يگول //ولج افراح تحچين وتسبين بامي اليوم اموتج 

هي بقت ابمكانها وهو واتقرب منها وگال //بت الحرامي تسبين اب امي  

افراح ردت بتوتر // اي اسب ملفيتلي هالنغلات وجايه تتشرط عليه بت ام الزلم تريد الها كنتور 

هادي //وانتي شنو وتتشرط عليج تجيبينه من كدج

لزمها من شعرها وضربها بالحايط وهو يگللها // مو كافي ما شبعتي

وصار يضرب بيها دماها انا احاول اوخره وهو يدفعني لمن ما عافها باوعتلي وگالت 

- - ارتاحيتي بت الگ...بس هي البر...شتخلف وانت (باوعت الهادي )اله اندمك على هاي سوايتك 

هو لزمها وصار يضرب بيها ويگلها //انتي اتندميني اليوم اموتج 

صرت گدامه وانا مخليه اديه بصوره مستقيمه ع الجانب واگله

...عمو بروح بيبي كافي لا تضربها 

هو باوعلي وشافني شلون ابچي راح گعد بالصاله وانا اتقربت يمها هي نتلت ايدي وگالت 

- - احسنلي يموتني ولا وحده مثلج تحاميني

ودفعتني وراحت دخلت الغرفتها عرفت انا واختي ما مرغوب بينا وعرفت اذا نبقى معناتها افراح صدك تندمنه

وتكرهنه الساعه الي انولدنا بيها 

رحت يمه گتله وانا ابچي ......عمو الله يخليك خلينه نرجع البيت بيبي والله ما علينه شي 

هو خزرني هي رغم ما تگدر تحچي طلعت من غرفتها وگالت //اي هادي خليها هي واختها تروح وانت 

الزم چيس عليهن بنات مياده

وطبگت الباب هو خزرني ولزمني من رگبتي رغم انا متحجبه وگلي وهو صاك على اسنانه 

- - هذا الكلام اذا عدتي اگص السانج ياالله روحي يم اختج وما اسمع نفس

خفت من نظرته الي حسيت بيها كلها كره وحقد رحت صعدت الدرج وانا ارجف واحس بخيبة امل چبيره من الي

شفته والي سمعته رحت لگيت حنين متمدده على صفحتها 

گعدت يمها وردت اتصل بسراج اقصد اكتبله مسج لكن گلت راح يجي ويجيب عمو كرم ويا ويسوون مشكله وبعدين

 كلمن يروح سراج يسافر الشغله وعمو كرم يرجع البيته وجهاله وانا واختي راح نرجع اهنا والنفس الذله گوه 

حبست دمعتي

بقيت گاعده انا وحنين الي اكيد سمعت عياط هادي وافراح وما اعرف شگد فاات من الوقت لمن ما انفتح الباب 

واجت هديل واسيل احنا گعدنا وهديل باوعتلي باستزغار وصارت تحچي وكأنما اتزمخ علينه

- - هاي بعدج ما دخلتي للبيت انتي واختج وهيج صار بابا يضرب امي وعليمن على مودج انتي 

 ( وتاشر باصبعها ). لا هاي چبيره وراح تشوفين شنو راح يصير 

جاوبتها ...امج سبت بيبيتنا الي ما صار الها اسبوع من اتوفت 

هديل //وتسبها وتلعن والديها سبت بيبي هذيج الي انقبرت (واتقربت هديل مني ) بيبيتج الج انتي مو بيبيتنا

افتهمتي بس سهله انا الج 

اسيل گالت //عوفيها فرحانه عبالها تگعد بالقصر 

هديل //اي مو سوو الحلگها

اتعجبت من كلامهن جاوبتهن ... تره ما اجينه بارادتنا ابوج جابنا ولو اكو مكان غير اهنا يمكن نروحله وهذا القصر 

قصركم واحنه گاعدات بالمخزن ياريت ابوج يخلينه نرجع البيتنا ياريت

هديل //انچبي واسكتي ولا تبقيين تمسلتين ما عاجبج المخزن اصلا هواي عليج ومو عبالج راح ننسالج اياها 

اسيل //امشي هدوله يولن

ونزلن وهنا يتمضحكن بقينا انا وحنين وره ما اجت هديل واختها اكثر من ساعتين واحنه نسمع اصوات رجلين

 ع الدرج وسمعت صوت ياسر وبعدين صوت عمار الي يسولف ويضحك ويه اسيل 

بعدها اجت اسيل وجابت طاوه بيها طماطه وخبزتين وگالت 

- - امي تگول بس تكملن انزلن رايدتچن

وگعدنا انا وحنين ناكل ودموعنا توگع على الخبزه واعرف حنين ما تاكل اله تمن ومرك الظهر ما اشتهينا 

ناكل يمكن كل وحده اخذت ربع خبزه ما گدرنا نكمل اكلنه لان القهر الي احنه بي نسانه الجوع نزلت وحنين جابت 

الصينيه شفنا هديل گاعده بالصاله ع القنفه وهي لابسه برمودا اسود وبي خط جوزي وبيدها النقال واسيل ما 

موجوده 

ولگينا افراح گاعده على الكرسي الي بالمطبخ واحنا نشوف ع الطاوله بقايا اكل بصياني سفري مبين دجاج وتمن

جايبينه من المطعم باوعتلي وگالت

- - ياالله خاتون انتي واختج تقسمن الشغل بيناتچن البيت چبير وانا ابحدي ما اگدر انا هذا العندي تردن 

تگعدن اهنا بلا مشاكل اگعدن اشتغلن وحللن اللگمه الي تاكلنها تكنسن وتمسحن وتغسلن ملابس وتكونهن لو 

ما تريدن تره انا (رفعت اصبعها ) افراح اعرف اشلون اتصرف وياچن واذا تردن جيبن الخدامه الي چانت منيره

 خالتها الچن

جاوبتها ...ليش عمه انتي جايبتنا خدامات 

افراح اتقربت مني وهي تخزرني // شوفي ولج انديوه انا اكرهج مو اليوم لا من زمااان واليوم زدت بكرهي الج 

احسنلج احچي عدل واذا تردين تعرفين

  (هزت راسها ) اي خدامات عاجبجن اهلا وسهلا ما عاجبجن ذاك الشارع الي امجن جابتجن منه وروحن

شوفن منين ملگطتچن من ياواحد لان صحبانها هواي 

حنين بحرگه //والله اكل العمو عليج

اجت هديل وعتت حنين من شعرها حنين صرخت افراح وخرت هديل انا صار گلبي يدك بسرعه 

باوعت الافراح وانا ارجف من الهضمه گتلها بتحدي 

...عمه امنا جايبتنا من الشارع ملگطتنا من صحبانها مثل ما تگولين بس احنه بالجنسيه هادي يصير عمنا غصبن

على اليقبل والما يقبل وابونه عباس ...

هي قاطعتني // كملي وامچ مياده تعرفيها لو اذكرج 

.... لا اعرفها واعرفها زين وراح نگعد ونخدم وما راح نموت اذا خدمنا انتي الي. سويتي المشكله كل الي ردنا 

نجيب كنتورنا ابو البابين نخلي بي ملابسنا لان حتى الخدامات هم يخلولهن ميز كنتور

افراح //انجبي وصوتج ما اسمعه وياالله اشتغلن وانتن ساكتات 

...اي نشتغل بس بتج لا تمد ايدها على حنين 

افراح //هاا واذا مدتها اكيد راح تكولن الهادي 

اتقربت مني وهي تحاچيني بشبه التهديد 

— - شراح يسوي هادي يبعبع لو يمعمع شويه وبعدين يتعذر امشي عدل اذا تردين محد يحاچيج ويحاچي اختج

وضحكت هي وبتها بتشفي عرفت ضحكت من گالت امشي عدل 

بوكتها زاد كرهي الافراح قاطات هي وبناتها جريت نفس وهي طلعت گعدت بالصاله وانا وحنين بقينا انظف بالمطبخ 

الي هو نظيف ومرتب البيت كله نظيف ومرتب اجه عمو هادي ودخل هي من شافته دخلت للغرفه وهو سلم وگعد گال

- - هديل صبيلي غدا 

هديل// بابا ما سوينا غدا امي وصت عمار راح جاب دجاج من المطعم 

- - اي ياالله بين ما ابدل خليلي غداي

ما سال علينه ولا كانه موجودات عرفت هو ضربها لان سبت بيبي دخل وهديل شغلت المايكرويف وخلت فخذ دجاج 

وزلاطه وخبز خلتهن ع الطاوله وهي تغني دكت الباب هو طلع هو ويه افراح الي چانت مبدله ودخلو للمطبخ وهو

 ما يشوفنا گدامه

گعد هو وياها وانا وحنين انسحبنا رحنا للصاله بقينا واگفات واسمعه يوكل بيها وهي تگله //ما اريد 

هديل راحت وگالت //تره ندري بيكم عشاق بس مو گدامنا

ضحكو ولا كانو صاير شي بقيت انا وحنين وحده تباوع للثانيه وعرفنا شنو احنا بهذا البيت ومن يومها 

قررت اداري خبزتي واتحمل واصبر 

مو سراج گلي اصبري وبس تتخرجين كل شي راح ينحل 

ومن ينحل بذاك الوكت راح احاسب كل واحد غلط بحقي ولو ما اعرف شنو الي راح يتغير

اجو ياسر وعمار وانا اشوفهم شلون يحترمون افراح وهادي لكن الي شفته انو افراح هي الي مسيطره وكلمتها 

ما تصير كلمه ونص مو اثنين بيومها صاحت افراح وگالت 

- - ناديه خدري چاي زين بسرعه وصبيلنه وجيبي للصاله

اشوف عمار شلون عينه زايغه ويباوع الحنين الي انوثتها طاغيه لذلك قررت ما اخلي حنين ابحدها همه راحوحتى 

ما سلمو علينه وانا خدرت الچاي وصبيت الهم باستكانات وگلت الحنين ابقي بالمطبخ 

من خليت الچاي وردت اطلع افراح گالت العمار

- - عموري من تكمل چايك صعد الميز ابو بابين الي بالمنور وخلي بالمخزن 

هديل سالتها // المن شتسوين بي مو على اساس تبيعينه ما ادري تنطينه 

افراح عوجت حلگها //حتى هاي (واتآشر عليه ) هي واختها يخلن ملابسهن بي

انا رحت للمطبخ ياسر گال //شنو ماما بنات عمي يگعدن بالمخزن 

افراح //چا وين تريدني اگعدهن بالديوانيه لو بالصاله انتم كلمن غرفته 

ياسر //لا گعديهن بالغرفه الچبيره الفوك 

افراح باستهزاء //اااا اخاف تتشاقى شنو ناسي الغرفه الچبيره مخليتها للخطار

ياسر //ماما ياخطاار هي بيبي من تجي تبقى جوه ما تگدر تصعد وخالتي تصعد يم البنات بعد منو جاينه 

افراح //يصدف ياسر يصدف 

ياسر //اي حتى لو يصدف يكعدن بالغرفه مو بالمخزن 

افراح وگفت وعلت صوتها //اگلك انت معليك هاي قضايا نسوان بعدين انا گعدتهن بالمخزن لان يافهيم انتو 

ولد شباب وهنه بنات مراهقات وما يصير

ياسر //والله ماما لو مخليتهن بالمطبخ ولا بالمخزن 

هادي جاوب بهدوء //ياسر بابا انت ما عليك خلي امك تتصرف 

افراح //سمعتو ابوكم شگال خلوني اتصرف بنات وبحدهن وعد بيبيتهن المريضه مو عبالكم هينات يرادالهن 

تربيه ومراقبه وياالله لا تگعدون يمنا 

اسيل //اووو بدا غيس (قيس)وليلى امشو

همه ضحكو صعدو وافراح گالت //عموري الميزصعدا مو تنسا

عمار //صار وتدلل الحجيه 

افراح //علوا ليش وره ابوكم اكو حجه 

هادي يباعلها //فرحه انا كلي الج 

افراح تعوج بحلگها //شمحصله بس حچي 

هادي //تحصلين وتحصلين هواي

وراحو للغرفه وهمه يضحكون وانا وحنين وحده تباوع للثانيه واحنا متعجبات من عمنا الي ما كلف نفسه 

يكلنه شلونكم 

ومتعجب بمرته الي صدك ما اگدر اوصفها لا خلقه ولا اخلاق 

صعدت انا وحنين بعد ان غسلنه الاستكانات ودخلنه للغرفه وحنين تباوعلي وتگلي

- - يعني ناديه شنو 

جاوبتها ......شنو شنو هايه حياتنا وغصبن علينه نتحملها

حنين برطمت //ما اگدر ناديه ما اگدر 

حاچيتها بامر ...لا تگدرين تتذكرين شگد دارينا بيبي وشلناها انا وياچ وهسه لازم نتحمل هاي السنتين تلاثه وبعدين 

كل شي يتصلح 

حنين والدمعه نزلت من عينها //توعديني ندووش

ابتسمت بوجهه......اي اوعدج حنونه انتي كل شي لا تشتغلين بس ابقي يمي وين ما اروح 

حنين //لا ندووش اشتغل وياج هذا عمچ گاعد بقلعه مو ابيت 

...اسمعي الكلام مو عمو سراج وصاج اسمعي كلام اختج وانتي مو زغيره

هزت راسها بالموافقه شويه وانفتح علينه الباب احنا فزينا چان عمار شكد مكروه عينه زايغه ويباوع على

 حنين بنظرات ما ارتاحيت الها خصوصا وحنين انوثتها طاغيه وجمالها مو طبيعي 

راح اسركم (حنين تشبه مياده لكن هي جسمها اجثل من مياده )

انا رحت گتله ......ها عمار مو لازم تدك الباب 

هو باوعلي وگال //اعتذر ست ناديه نسيت انتن سكنتن اهنا 

انا ما رديت علي هو گال //هذا الميز امي گالت اصعده وانا انكسر ظهري فوگها ما قابله هاي بدل ما تشكريني 

هزيت راسي وگتله. ...... شكرا تسلم 

هو يبتسم //لا بالخدمه شعدنا غير ناديه واختها

عمار بصف سادس اعدادي لان اتذكر هو عاد السادس سنتين رسب وهسه الثالثه انا اخذت الميز منه وسديت 

الباب بوجهه وكلت الحنين هذا الميز نرتب بي ملابسنا 

هي هزت راسها وطلعت قميص مال تراك ملون ورحت للمغسله بللته ماي وصرت امسح الميز لان كله تراب 

العصر گتلها //حنين امشي ننزل

ونزلنا ولگينا محد جوه نظفنا البيت ومسحت الطبلات كان البيت بي هواي اثاث وكله فخم طلعت انا وياها ونظفنا 

الحديقه بس الگراج ما گدرت انظفه لان بي السيارات 

العصر طلع هادي وبقت افراح گاعده بالصاله وانا وحنين بالمطبخ نزل عمار افراح گالت

- - ناديه سوي چاي زين وخلي بذنيج الكوبين

اشرتلي على كوابه كبار لونهن صيني ابيض انا هم خدرت الچاي وصبيته اجت هي فتحت الاوفن وطلعت كيك 

وكليجه خلتهن بصحن يم الكوابه وشفتها اتصلت ترميشه واجه عمار اخذهن وهو يگول

- - استاذ عبد الكريم يجي بالليل يعني لازم عشا 

افراح گالت //من يطلع هذا المدرس بسرعه قبل لا يجي روح جيب صينية كباب 

اسيل سمعت وهي نازله ع الدرج //ماما وياج گص اليه 

هي ردت عليها وهي تتحرك ومنتچيه ع الكاونتر وكانما تسمعنا بتشفي 

- - تدلل اسوله شعدي غيرها 

اسيل //لا تسمع هديل وتزعل ههه

الكل ضحك اله انا وحنين وعرفت انو الجاي والكيك للمدرس الخصوصي وحتى العشا للمدرس الي راح يجي

وره هذا عرفت خالينهم العمار 

افراح باوعت وگالت //من تشوفني انا واولادي نسولف لا تظلن فاهيات روحن اطلعن اگضلچن شغل 

اسيل //شنو ماما راح تبطليهن من المدرسه 

انا نزيت عبالك تكهربت افراح ردت //لا يكملن هاي السنه ونشوف

اتقربت منها وگلت ......عمه ليش نبطل احنه شاطرات 

هي ما جاوبتني وانا لزمت حنين من ايدها وصعدت فووك وكتبت العمه زهراء الي صار من اول 

ما وصلنه والخوف الي نحس بي من افراح وبناتها هي ردت عليه 

 — بالليل راح اجي واشوف انتي لا تحچيين

المغرب اتوضيت بالمغسله الفوك وصليت ومن كملت صلاة اجت اسيل وهي تگلي 

- امي رايدتچن 

بوكتها اسيل لابسه بنطلون كابوي وقميص وردي وترانشوز

اشوف حنين تباعلها وبعيونها حسد لان احنه حتى من چنا عد بيبي ما تقبل نلبس هيج ما اعرف ليش رغم 

لبسنا كله حلو ومرتب لكن ما تقبل نلبس برمودات ولابنطلونات ولا ملابس ضيگه 

نزلنا انا واختي بعد ما عدلنا حجاباتنا لگينا افراح كاعده بالصاله وهديل لابسه برمودا اسود نص افراح باوعت 

النه وگالت وهي تريد تنفجر

- - عيني هسه راح تجي هاي العانس زهيرا هي وامها المخرفه 

اباوع هديل واسيل يضحكن بصوت عالي باوعت وابتسامة شماته مرسومه على وجهها وهي تگول 

- - اسكتن خلني احچي (وباوعت النه وگالت ) 

- - يجن يسالنچن حچايه زايده ما اسمع زين تره الكلام لا يقدم ولاياخر تحچن زهراء وجميله هم يحچن وما راح 

يصير شي احترمن نفسجن وامشن عدل

باوعت الها وگلت ......عمه افراح ليش تكرهينا ؟

انا عبالي تنكر او حتى تزمخ عليه وتگلي لا انتي شتحچين لكن هي خلت عينها بعيني وردت 

- - ما ادري هيچ من الله اكرهچن 

وهديل واسيل زادن بضحكهن باوعتلي افراح وگالت 

- - روحي انتي واختج واخذلجن جبنه وصمونه واتعشن بيها واصعدن عود من تجي اجميله هي وبتها نودي عليچن

رغم اكرهها الافراح من چنت زغيره لكن شگد احتقرتها لان جاي تمثل دور ما لايك عليها ما جاوبتها اخذت 

صمونه الحنين وخليت بيها جبنه وانا هم اخذت صمونه وخليت بيها جبنه وصعدنا وانا العبره واصله حدها لان 

احنا اقصد انا وحنين عبالك مجاديه وتحن علينه وتنطينه من بيت الخلفها حنين تاكل ودموعها على خدها وانا 

انطيتها اللفه الثانيه

 وگتلها ......اخذي حنونه واكلي ياروحي ولا تبچيين

حنين رغم شبت لكن عقلها بعده عقلية بنيه زغيره رحت فتحت جنطه عندي زغيره وطلعت صورة مياده وبقيت 

اباوع الها وانا اباوع الها بشمئزاز وانا اگلها 

...... شگد اكرهج ياحقيره

بقيت اباوع للصوره وانا هاي مو اول مره كل ما يصادفني موقف اروح للصوره مره اعاتبها ومره اغلط عليها 

جريت نفس وضميت الصوره وانا افكر واگول 

......هاي اول يووم وهيج باقي الايام شنو الي راح يصير 

اجيت يم حنين الي تاكل باللفه الثانيه وهي تگلي //هاج ندووش اكلي بقيتلج نص 

انا ابتسمت وگتلها ......لا حبيبتي انتي اكليها والله مو جوعانه

حنين //بس انتي كل شي ما اكلتي حتى الظهر 

...مي خالف من اجوع اكل اي شي 

- - ليش هي افراح الشريره تخلينه شي ناكله 

هزيت راسي وگتلها ......حنون انا وياج مو زغار كبار ولازم نتذكر كلام بيبي الله يرحمها من تگلنه اهم شي 

تحافظن على نفسجن 

...وكلام عمو سراج من وصانه لازم نصير شاطرات بالمدرسه 

...وانا اگلج احنه لازم نصير صبورات مثل سندريلا

حنين بتعجب //شنو ندوش سندريلا ؟

...اي حنونه ياگلبي بس احنا سندلارات اثنين انا وانتي 

حنين وشفايفها يرجفن وعيونها مليانات دموع //وافراح وبناتها الشريرات 

ضحكت وگتلها ......بالظبط ذيج مرت ابوها السندريلا وهاي مرت عمنا وبناتها شفتي شگد اتعذبت لكن 

بالاخير ارتاحت

حنين //واحنا هم نتعذب وبعدين نرتاح 

...اي صحيح مثل ما تگولين بس اول شي لازم نكون گلب واحد ولازم شنو يصير وياج تگليلي وحتى انا هم 

شيصير وياي اجي اگلج ونفكر سووا ونلگى حل 

هزت راسها حنين بالموافقه گتلها ... عفيه باختي واول شي لازم تفهمين انو كل الي بهذا البيت يكرهنا افراح

 وعمنا وبناتها او ولدها واحنا لازم نحسب نفسنا غربه او نشتغل عدهم ولازم ابد ما نحتك بيهم ولا نتقرب منهم

حنين //بس شلون ندووش 

...مثل ما گتلج شفتي هاي اول يووم وشفتيها شسوت بعد يومين تلاثه الله عليج شتسوي بينا افراح وبناتها 

حنون صحيح انا اكبر منج بسنه وحده لكن انا فاهمه الحياة احسن منج لان انتي بيبي الله يرحمها دللتج ما خلتج 

تحسين بشي 

حنين //الله يرحمها اشتاقيت الها ندوش (وحضنتني وصرنا نبچي )

بعدها رحت للعلاكه الي اشتراها النه عمو سراج وطلعت نستله وكيك وعصير انا اكلت كيكه والباقي انطيته الحنين 

وگتلها ... اكلي بسرعه لا يجن الشريرات ويشوفنه 

حنين //اي هسه 

وصرنا ناكل وشويه هدئنا من الشي الي شفنا وسمعنا هديل اجت وگالت 

انزلن اجت عمتچن

ونزلنه ولگيت عمه زهراء جايه هي وبيبي جميله انا باوستهن عبالك صار سنه ما شايفتهن مو البارحه 

زهراء وهي تبتسم //ها يا حلوات شلونچن 

جاوبتها ......الحمد لله عمه وانتي (درت على جميله ) بيبي شلونج 

جميله اشرتلي بايدها يعني تحضني رحت حضنتني كالت //انا زينه خو ما ضايجات محد زعلجن 

بسرعه رديت ...لا بيبي منو يزعلنه

جميله //هاي (واشرت على افراح )گلت بلكت مزعلتجن لو سامعات منها حچايه حتى اخابر قيس 

افراح //يا شنو عمه تهدديني بقيس لو لان ماخذ بتج ويسمع كلامها 

جميله //لا قيس حقاني مايسمع حچاية بتي مو مثلج مسويه هويدي احميها الفشل 

زهراء //يمه شنوهالحچي شنو مانعرف افراح بت عمتنا حبوبه وطيبه وتخاف الله 

(دارت على افراح )ام ياسر لا تاخذين ابالج تعرفيها الامي

افراح //لا عليمن كلامها ما ينوخذ بي 

رادت بيبي جميله تحچي بس زهراء گالت 

- - ندوش انتي وحنونه جبت الچن ملابس سود وحجابات وملابس للمدرسه ياالله اخذنهن وگدرنهن 

اخذت العلاليك ...... شكرا عمه 

زهراء //اجي اصعد وياچن 

شفت افراح خزرتني جاوبتها ......لا عمه عليمن هسه نصعد ونگدرهن

- - ياالله حبايبي على مود اي اشكال ارجع ابدلهن 

افراح (اشرت بايدها )//روحن للديوان بدلن على شنو صاعدات ونازلات 

انا وحنين دخلنه للديوان واسمع بيبي جميله تگل الافراح 

- - چا ليش بناتج ما لابسات اسود على حبوبتهن 

افراح //ياعمه بناتي وين شايفاتها البيبيتهن وبعدين هنه تره ازغار مو مال يلبسن اسود

زهراء //يمه الحزن بالگلب 

جميله وهي تصفك ايدها بالثانيه //هاي مال الحزن بالگلب سوالف العيارات الما يريدن يحزنن 

زهراء //يمممه 

جميله //وغمه الحزن بالگلب شني ..

قاطع كلامها ياسر الي اجه وباس راسها //هلا بيبي اشلونج جميله 

جميله //هلا بيك يسوري انت 

ياسر //اي بيبي شنو نسيتي 

- - لا ولك عبالي ذاك المگير اعمير 

افراح //ياا عمه ليش تغلطين على ابني

جميله //حبوبه هم النه بي ابنج ابو ابن اختي گبل لا ياخذج وابن حماي 

ياسر //بيبي وامي بت حماتج شنو نسيتي 

افراح //اي بيبيتك جميله تتذكر الشي اليعجبها والما يعجبها تمسحه من ذاكرتها 

جميله هزت ايدها //شوف افريحه صارت تتمحچى لا ماانسى بس انتي النسيتي 

افراح //شنسيت عمه ؟

جميله //نسيتي منيره الما صارلها اسبوع تصير ام رجلج ومرت خالج وبيبية بناتج وانتي ما كلفتي نفسج 

تلبسين بناتج اسود عاد للاربعين 

افراح //يا عمه مو گلنه الحزن بالگلب 

جميله تهز بايدها //ههه هي ياحزن هذا البلگلب تتحمر وتتقرمز وتطك بعلچها وتگول الحزن بالگلب چا 

الفرح شلون يصيرهاي شماته 

ياسر //بيبي صدك الحزن بالگلب 

جميله //خاب ما تنچب هذا عذر انطلعه من نكرهلنه واحد ما نريد نحزن علي 

افراح //لازم انتي مسويتها عمه

جميله //اي ليش الچذب من مات ابراهيم اغطي وجهي واسوي روحي ابچي بس من مات عباس عمت عيني 

حزنت وبچيت وابد ما نزعت الاسود من يوم المات 

افراح //عمه هنه ما هلگد شايفاتها لو متعلقات بيها مو يكرهنا 

جميله بهدوء //حتى لو يكرهنها الخاطر ابوهن هي امه عليج الله افريحه باچر لو ماتت امج ما تلبسينهن اسود

زهراء بابتسامه تحاول تخفيها لان جميله قصفت افراح //يمه شهالحچي بالكيف الي يلبس والما يريد يلبس وين 

صارت ( علت صوتها ) ناديه وحنين خلي اشوف الملابس عليهن ندووش حنون تعالن خلي اشوف الملابس گدن 

افراح //هسه يجن اگلج زهراء شنو انتي ما ناويه تتزوجين

جميله //شني عدج رجل الها بس لا تگليلها اخذج الهادي 

افراح بهتت ابتسامتها زهراء گالت //يممه شني هاالحچي ابو ياسر مثل اخوي وهذا رايي من زمان وبعدين وين 

يلگى مره مثل افراح

افراح// اي والله زهوره لا عاب حلگج هادي يگول حتى اذا متي ما اخذ وراج مره ما اشوف بالدنيا كلها بس انتي 

جميله بهمس //عاميته بسحورتج انتي وامج واختج 

زهراء ضحكت وگالت //اي والله ام ياسر ياهي مثلج ادب وجمال واخلاق وبت ناس 

جميله //ادب وبت ناس واخلاق اي بس جمال بهاي چذبتي شو درام مال نفط ومو عبالك جايبتلها اربع بطون

 تگولين جايبه سطعش بطنها الخشمها ورگبتها لازگه ويه صدرها

افراح //اي عمه بس هادي ما يشوف غيري مره 

جميله // جاي تفرين بخرزتج 

طلعت وانا لابسه تراك اسود وقميصه طويل وحنين همه ولافات شالات على شعرنا 

ياسر يباوعلي ما نزل عينه من عليه وزهراء گالت //ها اجن عليچن الملابس بالعافيه 

...اي عمه اجن شكرا هواي جايبه 

- - لا حبيبتي تدللين وملابس المدرسه 

...اي عمه على گدنا 

جميله //مو گتلج زهراء لا تشترين هواي اسود وره الاربعين ينزعنه

بسرعه رديت ......لا شنو وره الاربعين هاي بيبي الي ربتنا وتعبت علينه لحد يگول انزعن الاسود 

(وصرت ابچي )وجميله صارت تنعى وتگول 

بيتج ياخيه كسر فيه 

وكعداتچن عنت عليه 

شنهي البصر بهاي البنيه 

اهنا ياام عباس يااختي

زهراء گالت وهي تمسح بدموعها// يمه كافي ما يصلح تبچين ابيت هادي 

جميله //ليش هادي مو ابنها انوب صار البچي ما يصلح 

زهراء //عمه ناديه انتي واختج مو زغار هاي ام ياسر مثل امچن واكثر من امچن وهادي اخو ابوچن وهذا البيت 

چبير وانتي ناديه انتي وحنين نادرات وسباعيات هم ساعدن بالبيت ولو ادري باام ياسر ما يهون عليها تشغلچن 

بس لا ما يصير كل وحده تاخذ شغل

حنين رادت تحچي لزمت ايدهاورديت وانا اهز راسي ... صار عمه 

جميله //اي بيبي واهم شي تدرسن وتنجحن ومن تحلن من المدرسه تساعدن بالبيت 

......ان شاء الله 

زهراء//عفيه بالبنات وام ياسر طبخها ونفسها يخبل اتعلمن منها الطبخ والترتيب 

...اي عمه

اهنا اجه عمو هادي وكرم وسلم وهادي باس راس جميله وهو يسال //منو هاي النفسها طيب بالطبخ 

ياسر //بابا عمه زهراء جاي تحمد بطبخ امي 

هادي بابتسامه //اي صدك ام ياسر ماكو مثل طبخها 

جميله تباوعلي // اي بيبي ومن تضوجن بس گلن العمچن وتعالن يومين تلاثه يم عمتچن وبنات عمچن 

زهراء//واي شي تحتاجنه مو كله من عمچن هو ما يقصر من تجن گللي او خلن عمه افراح تخابرني زين

  انا ضربت على خدي ... اهوو نسيت (ورحت صعدت ورجعت بسرعه )

......هاك عمو هذا نقال بيبي الله يرحمها انتم نسيتو بس من اجيت البارحه جبته وياي 

هادي //اي صدك نسينا وين چان 

......عمو ابوفيتها بالجام خانه

واخذه هادي وهذا رأي عمه زهراء حتى لا افراح تتقول هي وبناتها وراحت عمه زهراء واحنا صعدنا هي جايبه

 ويه الملابس نساتل وكيك وعصير وگالت كل ما تجي اتجيب النه وره شويه هي كاتبتلي

- - انا صبغت بافراح حتى اكسر عينها وما يظللها حجه ولازم تصبرين وتفهمين حنين اول وتالي الوضع يتغير

 بس يراد وقت ما نريد يضيع حقچن

عرفت من كلام عمه زهراء انو اكو شي زين مضموم النه بس قبله لازم نتحمل لان راح نشوف ايام صعبه 

ولازم ادير بالي

بالليل انا مثل ما تعرفون ما انام اله الفجر وهذا الشي زين لان خلاني اراقب حنين وادير بالي عليها من عيون 

عمار الي كلهن حقاره بس صرت اتعب لان لازم اگعد من وكت يعني اصلي الفجر وانام ساعتين وبعدها اگعد 

واكمل الشغل تنظيف وغسل مواعين وغسل ملابس وتنظيف الطارمات والحديقه ولازم ما نگعد وياهم ع السفره 

لان عدها ولد وما نگعد بالصاله كله بالغرفه اقصد المخزن وهذا عمي ولا كأنما موجودات لا يسلم علينه ولا يسألنه

اذا يدخل للبيت ويشوفنا وجهه كله يتبدل علينه ويبين من تعابيره الكره والحقد 

 ومن يشوف بناته يحضنهن ويتشاقى وياهن وهو يضحك

انا اخذ حنين واصعد بهدوء وره تقريبا اسبوع چنت بالمطبخ وحنين تشر ملابس بالحديقه وهو اجه عيونه ناط 

منها الشرار 

لاگته افراح. // خيرك هادي شكو شصاير 

هو خزرني حسيت يريد يگوم يذبحني باوعتلي وگالت //روحي اغسلي الطارمه 

انا رحت وهي تگله //شصاير 

ما سمعت شي بس سمعته خابر وصار يغلط على سراج ويگله 

- - الوين تريد توصل شنو عبالك اخلي الحلگها وانت فرحان بالوكاله اسمع ممنوع تجي لو تسال عليهن وكل شي 

سهل انا اعرف شلون ارجعه لا انت ولا الاكبر منك يوگف بوجهي

انا من سمعت هيج يحچي ويه سراج گلبي خمشني واحچي ويه روحي يعني بعد ما اشووف عمي سراج ولا راح

 يجي ويسال علينه كوه حبست دموعي كملت وصعدت فوك انا وحنين بوكتها حتى ما صاحولنه ع الغدا 

اشوف الجو مشحون واحس حركه بالبيت العصر نزلت انا وحنين لكيت المواعين مال الغدا ع الطاوله ومحد جوه 

كعدت حنين وصبيتلها شويه تمن ومرك كل الباقي انا اكلت خاشوگتين وخليت الباقي الها غسلت المواعين ورتبت 

المطبخ وصعدنا للغرفه ملاذنا الوحيد وانا ما اعرف شنو صاير لكن احس انو اكو شي يخصني انا بالذات

ظليت حايره وخايفه لان افراح كل مره تكلي شنو اسوي للعشا اليوم الجو متوتر وانا ما اعرف شي 

بالليل كتبتلي زهراء راح يجوون هي وبيبي وعمي كرم انا وحنين بقينا منتظرات بعدها نزلنه وكفنا ع الدرج 

واجه كرم وجميله وزهراء وسمعنا صار 

حچي واسمع هادي هو وعمار ابنه يتهددون وهذا سراج وين ما اشوفه اكتله بليلتها ما نزلنه ولا شفنا عمه زهراء 

ولا احد صاحلنه ع العشا

بالليل كلش حاچيت زهراء سالتها ...شصاير 

هي جاوبتني //ما صاير شي خلافات عمج هادي وسراج 

...عليمن عمه 

زهراء //لا تنشغلين بهيج امور انتبهي النفسج واختج 

...ان شاء الله عمه

وبقينا هاي حالنه اتصدگون هادي من يجي وما يشوفنا لا يسال علينه ولا يصيح النه بس اذا صادف وشافنا 

احنا نجي نگله // الله يساعدك عمو هو گوه يرد علينه 

اما عماتي سلوى اجت مرتين ونوال بس تخابر يسالن على الاربعينيه وافراح جوابها المعهود 

- - ما ندري بعده هادي ما مقرر

قبل اربعينية بيبي بتلث تيام اجه كرم هو وزهراء وبعدها اجت عمتي سلوى ومن كعدو مبين على هادي العصبيه 

والتثاقل من جيتهم كرم حچى ويه هادي 

- - ها ابو ياسر شنو راح تسوي 

هادي باوعله باستفسار // عليش كرم 

كرم //اقصد الاربعينيه مالت خالتي شنو تجيب قاري والنسوان يجيبن ملايه لو شنو ويمته نتوكل ونروح

اهنا عمي هادي وگف وگال 

- - والله ابو مرتضى انا بالنسبه اليه كل شي ما اسوي لان امي الله يرحمها ما خلتلي شي ولا خلتني وكيل 

فاانا صار حالي من حال بناتها 

كرم // هذا شلون حچي هادي عيب

هادي //ها كرم صارعيب الحچي لكن من تخليلها واحد وكيل وتترك ابنها مو عيب شنو يعني انا اگلك 

يعني ما معتبرتني اسمعني كرم الي يريد يسوي يسوي من جيبه 

سلوى گالت //شنو هادي كله عدك فلوس هاي امنا 

افراح //الي يريد يتهوبز يتهوبز من جيبه احنه مالنا شغل

سلوى //ليش ام ياسر احنا ما اخذنا شي اكثر من رجلج لا والله انتو اكثر واكثر بعدين ما شاء الله بيت عباس 

ومحله وبيت امي والمحل كلها اجارات مستخسرين عليها ملايه وقاري 

افراح //وهي هم انطتج وتعبت عليچن سوولها انتن 

سلوى //اي نسويلها وغصبن ما علينه انا بالنسبه الي راح اسويلها قرايه ابيتي واروح وازورها وانتو بكيفكم

وطلعت عمتي سلوى وهي تمسح بدموعها 

زهراء بعتب وهي تبچي //ليش مو خطيه خالتي شگد عانت وتعبت

هادي //اي عانت وتعبت وتاليتها انطتها للزعاطيط 

كرم وگف واشر العمه زهراء يعني گومي وگال // على كيفك ابو ياسر انا ااجر سياره واخذ البنات وامي وحتى جاراتها 

هادي // بكيفك ابو مرتضى 

كرم بعصبيه اتقرب من هادي وگله // طبعا بكيفي

وطلعوا الكل زعلان على هادي الي بقى يخزر بيه وده يموتني وره يومين اجت زهراء وگالت 

- - كرم اجر سياره والليله نطلع اذا تردين ام ياسر تعالي ويانه هي گالت 

افراح //لا هادي ما يقبل 

زهراء// كرم خابر هادي على مود البنات وگله اخذهن 

افراح // اي عادي خليهن يرحن شنو قابل لازمتهن

زهراء //ام ياسر بس تدرين شنو ولد ما يروح يزور قبر امه ولا يسويلها ثواب ولا قرايه تره كلنه راح نكبر 

افراح //شنو انا مانعته ذاك هو ابن خالتج وابن عمچ واحچي ويا 

زهراء //لا ام ياسر انا ما احچي على گولتج بكيفه

ورحنا البيت عمو كرم وبالليل اجت سياره كوستر وركبنا بيها انا وحنين وزهراء وجميله وعمو كرم وزوجته 

وابنه وعمه شمس ونصره ام افراح وبيبي بسيمه ام ناجي وچنتها

رحنا وانا الطريق كله ابچي وحنين مره تنام ومره تگعد وتبجي وياي وصلنه الفجر زرنا وصلينه وطلعنه للمقبره 

وانا صرت انحب بصوت مسموع وحتى السايق بچى وصلنه عمو كرم وزهراء نزلو وبعدين اشرولنه انا

 رحت اركض وصلت يم القبر وانا كأنما اشوفها تبتسم لي وتريد تحضني صرت اصرخ بكل قوتي واگول

......بيبي بيبي اكعدي شوفينه بيبي تعبنا والله اگعدي النه احنه بحاجتج 

وصرت اصرخ بشكل متواصل بيبي جميله كعدت وصارت تنعى وتبچي وتگلها 

- - خيه الولد ما اجاج منيره خيه الولد مسرع ما نساج

وبيبي نسيمه هم تبجي وتنعى لكن انا اصرخ حيل واضرب على وجهي اريد اگلها 

... تره الخايفه منه طول عمرج بس رحتي صار بينه واكثر

زهراء شعلت بخور ورشت ماي ورد وراحت يم قبر ابوي 

وهم شفتها خلت بخور وماي ورد اهنا حسيت بوحده حضنتنا انا وحنين وهي تگول بصوت بي عبره

- - صباحج خييرمنيره 

وصارت تبچي شفتها بيبي امنه ام سراج واسمع كرم يسلم ويگله //خالي شلونك شجابك

اجه جدوو منير وگعد يم الگبر وصار يبچي واسمع كرم يسلم على سراج وعلى جدو جميل وابنه يوسف 

نصره صارت تنعى وبيبي جميله همه واحنه بس نبچي بعدين بيبي جميله گالت 

- - كافي ام قيس ناديه وحنين كتلن نفسهن راح يموتن 

جاوبتها ... علوا نموت ونحضن بيبي

اسمع الكل بچى على كلامي حتى كرم وجدو منير وجميل بعدها سكتو لان كل واحد راح القبور اهله وانا رحت 

يم بابا وابچي اما حنين بقت يم بيبي 

اجه يمي سراج وگلي 

اشلونج ناديه

//////////💔💔///////////يتبع

#ناديه

#انين_الليل

#بارت٢٨

_____________

ناديه 

سمعت صوته الي ما يخلو من الحزن وهو قريب عليه :: شلونج ناديه 

درت وجهي اباوعله وعيوني كلها دموع وكتله وانا اريد احضنه ......الله يسلمك عمو 

::ناديه على كيفج كافي عياط تعبتي ومو زين عليهم 

......ليش عمو عبالك انا بس ابچي عليهم انا ابچي على روحي 

::ندوش اعرف كل شي ولازم تتحملين

......اي اتحمل اذا انت تبقى تجي وتسال علينه اتحمل بس عمو انت ما راح تجي وما تقبل تگلي شصاير 

::راح تعرفين بالوقت المناسب (اتقرب يمي )ندووش اي شي اكتبيلي او اطلبي من عمه زهراء 

......اريد ارجع البيت بيبي انا واختي 

هو جر نفس // هسه صعبه وراح اگلج شي قبل لا تجي نصره اسمعيني حبيبتي اذا تردين احوالج تتبدل نحو 

الافضل هالفتره راح تكون عندچ اصعب فتره بحياتچ ولازم تتحملين هاي السنتين تلاثه وراها كل شي يتغير 

ونحو الافضل ها ندووش راح تتحملين

هزيت راسي ......اي عمو بس اوعدني ما تتركني 

::ما اتركج وعد وداعت ناديه ما اتركج وهسه كافي ياالله 

باوعت الحنين وگتلها ......انتي ليش ما تجين القبر بابا وتقريله الفاتحه 

حنين بعدم اكتراث //وانا منين اعرفه 

اتقربت عليها ...حتى لو ما تعرفي هذا ابونه 

حنين //اي ابونه الي تركنا بالضيم (وبچت)

...لا حنين ابونه مو بايده وتركنا

اجت عمه سلوى وسلمت على سراج ونوال سالته بدون ما تسلم علي وگالت 

- - - شنو الي سمعنا سراج صدك لو شقى 

سراج رفع نظارته وگال ::مو وكته نوال احنه جايين الاربعينية امج اي شي بالوقت الحاضر مو وكته 

سكتت نوال وهي تخوزر بيه 

بعدهه رحنا ودعنا بيبي ورحنا زرنا كربلاء وبالطريق نزلونه المطعم وره الزياره راح عمو سراج وسلم على 

كرم والنسوان وكرم نزل سلم على جدو منير عرفت همه راح يرجعون البغداد اجه عمو كرم وگلي

- - ناديه جدج منير يريدج انتي وحنين 

رحت وصلت يم سيارة سراج وجدو منير باسني وگلي //صيري سباعيه 

انا هزيت راسي وبعدها باس حنين سراج گلي 

::ندووش اي شي يصير بلغيني وما عليج باي شي تسمعينه انا عن قريب اجي واحل كل شي 

......اي عمو غير تفهمني 

::ان شالله بس المهم اي شي يصير اكتبيلي وشنو تحتاجين وصي عمه زهراء

بيبي امنه اجت وحضنتني وخلت بايدي فلوس وگالت //مصرف الج والاختج ومثل ما فهمناج صيري قويه 

سراج اتقرب مني وگلي ::ندووش اي شي ايزعلنه عادي راح ينتهي بس اهم شي نحافظ على نفسنا ونصير اقوياء 

حنين // عمو مثل الشجره امام العاصفه 

هو ابتسم وكلها :: منيلچ هاي الافكار 

حنين وهي تبتسم // تجيني مثل الصور وارسمها

ورجعنا للبصره وانا ابدي ما ارجع بيومها ما قبلت زهراء نروح البيت هادي وگالت 

- - ابقن باتن يمي وباچر انا اروح وياچن

وبتنا وثاني يوم رجعتنا عمه زهراء ودخلنه فتحت النه الباب اسيل الي گالت 

- - كلنه نايمين بس انا نزلت اشرب ماي وسمعت الجرس 

زهراء من الباب گالت //حبيبتي سلمي على ماما 

وراحت وانا وحنين صعدتا گعدنا شويه واجت اسيل گالت //امي تگول خلي ينزلن

ونزلنه واحنا مستغربات مو تكول نايمين لگيناها حاطه رجل على رجل من شافتنه گالت 

- - ما طول شبعتن اخواره ياالله شوفن شغلچن وحده للديوانيه البره والثانيه تغسل الطارمات المدرسين على جيه 

رحت اريد اطلع المكنسه من جوه الدرج گالت //لا بالمكناسه العاديه نظفيها والزوالي امسحيهن بماي وزاهي

رحت وانا ساكته ما جاوبتها ونظفت الديوان وحنين تغسل بالطارمه كملنا ورحنا للمطبخ 

گالت// طلعي لحم واثرمي سوي كباب عروك وبالليل لفي دولمه 

ثرمت وصعدت صليت بالليل انا اگلي واجه عمي هادي انا دايره وجهي شافته حنين گلتله //شلونك عمي

هو ما رد انا درت شفته جاي يمي لزمني من ايدي حيل وراد يخليها بالزيت الحامي وگلي

- - بت الكلب رايحه للنجف تدگين سوالف ويه سراج العار لو رايحه البيبيتج 

انا صرت اصرخ من الخوف اجه ياسر ولزم ايده وافراح تباوع 

ياسر //بابا شنو شصاير 

هادي //انت اسكت ما عليك اريد اربيها الهاي بت العار

افراح// اي ربيها بس لا تحرگها مو عرجه ومحروگه 

ياسر //شنو هالحچي هذا يمه 

هادي كمشني من شعري //بت الكلب اذا عرفت بيج شايفه سراج لو محاچيته انهيج من الوجود

صار ريگي مثل الخشبه اليابسه جاوبته بخوف ......عمو انا ما سويت شي هو اجه وسلم عليه 

هادي //ها وروحتج يمهم بالسياره 

حنين //لا عمو ما راحت اله للسياره الوصلالك الكلام چذاب جدو منير دز عليها 

اتقرب من حنين كمشها من شعرها وگلها //هذا اللسان يرادله گص

حنين صارت تبچي وصلت يمه وگتله 

...عمو احنا رحنا البيبي وهناك اجه جدو منير ومن راد يروح دز عليه ولو احد سائلني هم جاوبت 

هادي //وانا ما اريدچن تعرفن اي احد انتن بنات ومو عوزي فضيحه جديده هالمره اعبرها مره ثانيه اذا عرفت

شايفاته الهذا سراج اموتچن 

افراح // وحتى بيت كرم شكو يوم والثاني رايحات 

هادي //اي حتى بيت كرم حدچن للمدرسه لو ماكو حتى المدرسه ابطلچن منها

طلع هادي وراحت ورا افراح وبقى ياسر الي گال //ناديه لا تزعلين ابوي تره خايف عليچن 

باوعتله وانا ابچي وگلت ...اي وحتى امك هم خايفه علينه

هو سكت كملت الكباب وگليت بتيته الاسيل وحنين سوت زلاطه وخدرت الچاي وصعدنا ساكتات انا وحنين

وكتبت العمو سراج كل شي وحتى الزهراء الي سالتني 

- - وصعدتن بدون عشا 

......اي عمه 

- - لا على عناد هادي والحيه انزلي واخذي عشا انتي واختج واصعدي 

وسراج كلامه المعتاد ::ندووش غمضي عيونج وانتي تشوفيني ابتسم وانتي هم ابتسمي كوني على ثقه كل شي 

راح يتبدل وتصير سوالف

همه متعودين من يكمل عمار من المدرس يتعشوون انا نزلت شفتهن گاعدات هديل تلعب بموبايلها واسيل متمدده

 ع القنفه وهي وهادي گاعدين يباعون ع التلفزيون انا رحت خليت كباب وبتيته وصبيت كوبين چاي واخذت 

اربع صمونات هي اجت انا شلت الصينيه هي لزمتها مني

افراح //- اوگفي اوگفي هاي المن 

...عمه عشاي انا واختي لان انتو تتاخرون وما تقبلين ناكل وياكم لو تردين اصبلج انتي وعمي 

افراح //لا مو هسه اصعدي وبس نكمل عشا انزلي اغسلي المواعين 

ما جاوبتها وصلت النهاية الدرج شفت ياسر نازل من شافني صار على صفحه وگلي

- - تدرين انا مو هلگد احب كباب العروك بس يمكن اليوم راح اكله كله 

...بالعافيه

ورحت الحنين الي لگيتها متغطيه وتبچي وخرت الغطا وحچيت وياها 

......ياالله حنونه گومي اتعشي وما عليچ بالي صار 

حنين // يعني نبقى هالشكل بس ضرب واهانه وشغل 

ابتسمت ... اي مثل سندريلا 

حنين // يمعوده ياستدريلا منين نجيب الامير 

... من ندرس ونحصل شهاده راح يجينه الامير الي ينقذنا

وتمينا هاي حياتنا افراح تحتار شتطلع النه من شغل وتريدنه نراددها وبناتها من يشوفنه يضحكن ويتشفن 

وعمار عينه نگسه على حنين وياسر دووم يحاول يجذب نظري 

وهادي مليان سم علينه

وسمعت اجه سراج ومن نزلت افراح گلتلي //اصعدي لا تنزلين لا اكسر رجلج الثانيه

وره اربعينية بيبي بشهر اجه اخو مرت خال سراج وخطب زهراء لان بيبي امنه حامدتها اله 

هو رجال كبيربالعمر اسمه طلال وعنده منصب ولده كلهم بالخارج وهناك متزوجين ومن اتوفت زوجته بقى

 ابحده لكن بيبي امنه مقنعته يتزوج واجه وشاف زهراء وتمت الموافقه

عمه زهراء راسلتني وگالت //تعالي للخطوبه 

لكن الي صار افراح راحت هي وبناتها وگالت من تسالج زهراء گولي //لان حزينه انا واختي ما اجي 

باوعتلي وما خلتني ارد //بعدين انتي مو حزينه على بيبيتج وتسوين روحج تتبچبچين من احد يگلج فكي حزنج 

الناس فرحانه ولابسه الوان وانتي واختج رايحات باسود عبالك غراب البين

وراحت هي وبناتها وانا وحنين بقينه 

صعدنا فووك وقفلنه الباب علينه راسلني سراج ::ليش ما اجيتو

...لان غراب البين ما قبلت نجي 

::هههههه افراح مو هي وبناتها غراب بين والله صحيح ليش ما قبلت تروحن

ولفتله السبب هو گلي :: لا ندووش لان انتي وحنين حلوات والكل راح يباوع الچن فهيه وبناتها يغارن 

ولا يهمج الايام هواي

انقهرت وانا اشوف حنين ابدها تروح تشوف زهراء واجن تالي ليل وياهن هادي وياسر

وعمار واجت ابتهاج اختها الافراح احنه بوكتها بالمطبخ اجت افراح وبيدها حافظه وباوعتلنه وگالت 

- - هاچن ودتها زهراء 

وطلعت گعدت بالصاله الچبيره وهنه يسولفن ويضحكن 

اجه ياسر وگال //ليش ما اجيتن للخطبه 

حنين رادت تحچي لكن انا سبقتها وگلت ...لان حزينات على بيبي ما رحنا

هو باوع وگال //اتعشيتن 

...هسه راح نسويلنه عشا تريد انسويلك ويانه 

- - لا لا بالعافيه

طلع وانا كصصت طماطه وگليت وافراح اجت وگالت وره ما تكملن عشا سوي چاي وجيبي للصاله 

ما رديت عليها انا سويت چاي واخذته دخلت وگلت 

...السلام عليكم (باوعت لابتهاج )اشلونج خاله 

ابتهاج //هله بيج بس سميني عمه احسن

هديل واسيل ضحكن حييل انا درت وطلعت والدمعه بعيني اجه ياسر گال 

- - شنو عود شكو اله داعي هذا الكلام 

ابتهاج //شبيك خاله شنو صاير 

ياسر //البنيه گالت اشلونج خاله ردي عليها ضروري تگليلها سميني عمه

افراح باستهزاء //اااا ه وشصار باالله 

ياسر //ما صار شي بس خالتي فشلتها 

ابتهاج //لا ما فشلتها انا بت عمة ابوها شنو يعني اعود الامها مثلا 

افراح //اسم الله شنو نعود الامها 

ياسر// يممه شنو هالحچي كافي الخاطر الله

ابتهاج غيرت الموضوع //وانت ياسر يمته ناوي تخطب نريد نفرح بيك 

- - بعد خاله خلي اخذ الشهاده 

افراح //تاخذ الشهاده اليسمعك بعدك بالمتوسطه كلها بس هاي السنه وتكمل 

- - ان شا الله 

افراح //انت من هلگدوتك مرمرني انا صاحبي عموري شگله يگلي صار

ياسر صعد الغرفته وانا وحنين بقينا بالمطبخ لمن ما افراح گالت //تعاي اخذي الاستكانات 

دخلت وهي واختها تسولف //اگلج ابتهاج هاي زهيره شتگون