رواية كريات الدم السوداء الجزء الثاني الفصل السادس والعشرون بقلم زحل شريف
_سلاسل_
_طول مدة سفري هو يهدد ويتحلف.
الباشا::كل عقلج اريد اوصلج ويصعب عليه
بس راح اعتبرج ،،بفترة نقاها أول وتالي ترجعين.
_صفنت اريد شي يغثه ،، كتبتله
ماارجع وبيتي ينباع وانته مالك عليه حكم.
الباشا::هينه اعلمج .
_عفته يحجي وطلعت من الوات ساب ضل يدك
ماجاوبته،، لليل خابرني ثابت وادري هو دزه لان مارديت عليه .
ثابت::بغض النضر عن طلعتج بهيج طريقه
انطي مجال لنفسج ،،فكري ترى اختج تتاذى اذا بعدتي خطيه هيه مأمنه بقربج،،ومااعتقد الباشا يسكت .
_اترجاك هل مرة مااريدك تدخل انه ويا نتصافى.
ثابت::هيج تخلي يجيج صدكيني مايلزمه شي.
_خلص انته گله انه بأمان هو مو كال
اعتبرج بفترة نقاها .
ثابت::تمام بس خلينا على اتصال طمنيني عنج.
_وهيج خذتلي كم يوم راحه زرت ونزلت للسوگ اشتريت ملابس ،، بالصدفه عرفت هذا المركز عدهم دورات تعليميه،،،،گلت استغل الفرصه
سجلت ومن خلال ساعات التدريب، تعرفت على هواي بنات واكثرهم ،،من غير محافظات اقترحو عليه أسكن وياهم ،،نفس الفندق لان قريب على المركز الاختلاط بالناس،، يوعي ويعلم اكتسبت خبرة ،،رغم كنت منعزلة وماحجيت شي يخص حياتي الي يسألني اكول متزوجه وخلص،،اتصالي بمديحه وقدر مستمر ،،جنت ناويه اعالج نفسي بالبعد واعاقبه واحرمه من شوفتي ياخذني الجنين لحظنه،،،،، بس كرامتي تجلدني ،، ثابت الصبح والعصر يخابرني والباشا رسائله كلها نفس النمط فتحت النقال اقرأ.
الباشا::رجعتي للفندق وين انتي ؟
_وهذا السؤال يتكرر يوميه لازم ارد واگله اي.
الباشا::شوكت تخلص هل مهزلة ؟
_من تطلع من حياتي .
الباشا::هاي الي يكولون عنها من سابع المستحيلات ،، خلي ابالج ما اطلكج ولا اعوفج
تبقين مثل بيت الوقف،، يعني لاتفكرين تصيرين لغيري .
_لا الك ولا لغيرك ،، صدكني آخر همي انته
كل الي افكر بي هو اعيش حياتي مثل ماريد
اصلا كاره جنس ادم كله.
الباشا؛:تمام يصير خير.
_ويوميه على هل موال لازم نتناگر فد ربع ساعه
مرة يلين ومرة يعصب ،،واعرف شلون اغثه من يتصل مارد اجاوبه برسالة ،، والي مهون عليه
البعد مديحه تخلص اليل تسولف وياي.
مديحه::عاد تعلمتي شي بي خير نستفاد منه.
_شغلهم يخبل ،،ولو شايفه المواد الي
يستخدموها فد شي خو مغذيات البشرة اسكتي.
مديحه::أول وحدة انه اخضع للتجربه من تجين
اريدج تگلبين خلقتي گون فطوم ماتعرفني .
_ولج اعتقي المرة راح تخبلينها خطيه.
مديحه::انه الخطية امس اشتهيت تمن أصفر
من هذا الي جنه نطبخه ونخلي عليه جميع شي بالثلاجه،
_اي حته انه هم احبه بالاخص اذا بي بتيته
وكشمش وبصل ، خرب عقلج جعت .
مديحه::غمضي وتخيلي نفس جاي تاكلين
المهم كمت طبخته نصيت النار وصعدت لغرفتي
خابرت طارق كتله جيبلنا روبه ،، ونزلت عبالك مسويه فد انجاز حضرت المواعين بس ريحة الخل
خنكتني كلت اكيد فطوم رشت بس ماتوقعتها
تخلي على التمن .
_هههههههه،لا هاي قوية.
مديحه::من قهرني بجيت .
_وتالي شسويتي؟
مديحه::اجه ولكاني مكابله الجدر وابجي استغرب
عباله التمن محترك سالني.
طارق:: شنو البتيته توفت
لو البصل مسوي حادث .
مديحة::عاد انه انفجرت كتله بعد ماابقى
خلص تعبت من امك مليت ،،إلى متى ناكل
من المطعم هم بنفسي اسوي شي اشتهي،، طلعت
فطوم على صوتنا كمت واصب التمن بصينيه وكتلها اتغدو بي ،،
فاطمة::حشى نعمة الله شنو هل خبط.
مديحه::غير ترستي خل ،،عاد من كتلها هيج
هو تخبل وضل يصيح .
طارق::يمه كافي تعبت مليت حرام عليج
شوكت ترحميني مو راح ارجع اشرب سم بسبب تصرفاتج
فاطمة::ها تعاركني على مودها اي جا هيه
سحرها فعال اكيد تقلبك عليه.
طارق::خصم الكلام لا تكولين صار ويا زوجته
افضل حل اعزل مطبخها فوك لاتدنا اكلج ولا انتي
تخافين كله وحده تاكل براحتها.
_اي خووش حل .
مديحه::غير كون قبلت .
فاطمة::تعزل مني ياعاق ولك تعوفني صدك نذل
شوف ولك سكتتلك ،، تسوي الي براسك وأعرف
زواجك منها عناد بيه ،، خلص اليوم تنهي هاي المهزله .
طارق::يامهزلة يمه زوجتي وحقها عليه
ماكان تعيش بي براحتها .
فاطمة::يعني شنو ولك بس لا حبيتها؟
طارق::اي احبها واريدج تحبيها لخاطري.
_اي حب وكذا ،،جا ماتلام فطوم طلع الولد غركان
كملي كملي وانتي شسوتي من كالها هيج؟
مديحه::حطيتلي جناحات وطرت،، خاب ماتنلصمين،،بت الصخل ياحب، هم الباشا يحبج .
_لاتقيسين هذا بذاك.، والدليل طارق
وكف بوجه أمه وفكر براحتج وهل عزلج.
مديحه::شووكف شبيج ،، غير كون ينفذ
بس حجي كل فعل ماكو ،، ثاني يوم فطوم
كطعت الاكل وتمرضت عاد اجو اهلها وعاتبو
وردت مثل الأول وازيد .
_قابل يشمرها بالشارع ترى أمه وماعدها غيرة
ولاتنسين مريضه مو بيدها ،،والولد هل جاي
يبينلج حبه كسبي وحاولي تعيشين كافي إلى
متى تبقين هيج انتي وياها حرب.
مديحه::اكلج مابينا شئ معتبرني صاحبه .
_غير انتي رافضه ترى ماجاي افهمج
شو من باب تحجين مواقفه ودفاعه الج.
مديحة::خو ماروح اگله تعال انه قبلت .
_دروبج هواي ،، ومو صعب عليج تبينيله
بطريقه من افلامج مديحه لو تخصميها ويا
وتتفقون لو تطلكين .
مديحة::الطلاك للعدها أهل ،، عدها شهادة
وتنتكل على نفسها وتعيش انه من اثنينهم
فلست ولاتكليلي ابقى يمج سونه الباشا مايعوفج،،ترى هو ساكت عنج بسبب ثابت .
_اول وتالي يعوفني يمل ويتعب.
مديحه::ماعرف شكلج؟
_لا تكليلي،، وانتبهي لنفسج وحاولي
تنطين طارق فرصه لان حسب كلامج الولد زين
يله عوفيني انام لان نعست .
مديحة::باي .
_سديته منها وتمددت افكر وين راح نصفى
وشلون اخلص روحي من حب الباشا لازم
أبعد عنه ،،اقنع بروحي تقنع ياربي شهل بلاء
الي نزرع بگلبي ليش هيج احن واشتاقله
مايستحقني ولا انه استحقه هو وين وانه بنت راضي
ومسقط راسي الصعدة ،، مستحيل هل شي ينسي
صفناتي تعبني وهيج اخلص ليلي لحد ما اغفى
كعدت شنو هاي شكد نايمه خرب عقلي انوب اريد
أتذكر يمكن حلمانه اي بس ماجاي اذكر شي
بس يمكن شفت إم مديحه بالحلم زين شنو انطاني
وشجاب قدر بالنص ،، كمت وانه استغفر باوعت لنقالي ثابت متصل ومديحه . دكيت عليهم ماردو
حضرت نفسي اريد اطلع ودك نقالي،،رقم ثابت
رديت عليه وانه الف بشالي هلا بيك شلونكم
ثابت::والله ماعرف شكلج بس قدر مريضه كلش من امس بالمستشفى .
_ها شنو ليش شبيها هو انه بس امس ماخابرتها.
ثابت::اي امس تخربطت،، على عموم انه حبيت
ابلغج حتى لاتكولين ليش ماكتلي،يله اترخص.
_نهى المكالمة وانه صافنه ماصدگت وعبالي
لعبة من الباشا ،خابرت مديحة اكدتلي الخبر
مديحه::اي ثابت اتصل بيه
هسه راح ياخذني طارق الهم.
_تمنيت عندي اجناح وأطير حتى اوصلها بسرعه
لميت غراضي وطلعت للكراج خابرت على ثابت
بلغته
ثابت::تمام من توصلين الكراج خابريني
اجيج طريق السلامة .
_ طول الطريق انه افكر بلحلم اريد بس تذكرة
الخوف سيطر عليه لحد ماوصلت تلكاني هو
ثابت::حمد الله على السلامة
_طمني على قدر شلونها وشبيها؟
ثابت::مابيها غير العافيه بس هيه توهوس
صار فترة .
_من شنو توهوس،، صفن عينه الطريق
رديت سالته شكو ليش ماتحجي
ثابت::شحجي والله محتار ماتوقعت منها
هل تصرف ،،گلت حقها وهل شي عادي وحاولت افهمها انو انه قابل شما يكون لونه وشكله، بس
الضاهر من بحثها عن الجينات الوراثيه خلاها
تتأذى المهم الدكتورة اقترحت علينا تعرضها
على دكتور نفسي.
_وصلنا لبيتهم نزلت وهو نزل غراضي .
ثابت::اخذو راحتكم انه رايح لبيت الحجي
من تحتاجوني خابري عليه.
_التفتت عليه مستغربه ليش يعني ماتدخل؟
ثابت::مديحه يمها وماريدها تتقيد خطيه
وهم عيب من طارق مهما كان يغار على زوجته
يله قفلي الباب.
_دخل الجنط وقبل مايطلع . كال
ثابت::لاتحسسيها بشيء تعاملي وياها
وگأنو الأمر عادي ،،كليلها يولي الطفل
_يعني شنو؟
ثابت::تعرفين من تشوفها،، لان عقلها ماجاي يتحمل التفكير تحسها تصرف مثل الطفل
لاتستغربين ،،قفلي الباب
_سديت الباب ورا ودخلت شكد حجه عن حالتها بس ماتوقعت واصله لهاي المرحلة ،،لكيتها نايمه ومديحه يمها تلكتني بوستها .وعيني لقدر .
مديحه::امشينا برا لاتكعد خليها ترتاح.
_فهميني شكالت الدكتورة؟
مديحه::ماعرف انه اجيتهم هنا بس هيه
قبل فترة خابرتني ورادت علاج تنزلة ورزلتها
ماتوقعت تسوي بروحها هيج .
_مديحه تحجيلي وانه بس ادموعي تصب
كمزنا على صرختها،، ركضنا للغرفة ،، عرفت
حلمانه كوى صحيتها بس شافتني بجت .
_وشكد حجيت وياها،،وهيه مصرة ماتريد الطفل
سايستها ومديحه حاولت تتعامل وياها اعتيادي
حسب تعليمات ثابت،،بس صدمتني من كالت
اريج الي محاجيتها
مديحه:'وانتي غبيه كلمة منها هزتج
ولج انه منج ادوس ابطنها .
قدر::شوفي صح هيه عيرتني ،بس كلامها نبهني.
مديحه::وعليمن نبهتج مثلا انتي ماتدرين ابوج صخل،، لو من اخذج ثابت مايعرفج ،، وبعدين
انتي وين تدرين الطفل يطلع على ابوج.
قدر::انه اتاكدت منه بحثت هواي
جيبي نقالي خل اروايج .
_انطيتها نقالها خذته وسندت نفسها وكعدت
تبحث طلعتلي اكثر من موقع علمي وهنا حتى
انه هم صارت عندي ردة فعل.
قدر::باعي هذا البحث يگول لابد ما تضهر
هل جينات الوراثيه حتى لو من الاجداد.
_اي وشنو يعني احنى مسوينه ترى محد جبرة
يتزوجج وهو الراد جهال منج .لان يحبج
قدر::انه ماريده بعد.
_حالتها مردت گلبي, بعد دهرتها ويا مديحه نامت غطيتها وطلعت.كعدنا بالصالة حايرة شسوي
مديحه:: شو صفنتي شناوية.
_كلما أبعد الضروف ترجعني للبداية
دوم الي يخطط لفد أمر يصير العكس
جنت مفكرة اخذلي شقى بغداد واستقر
أبعد عن كلشي يذكرني .بالماضي هسه تاكدت
من كلام سلوم قبل من كالت ماريد اخلي شي
انلزم منه وجود قدر قيدني وهاي انه رجعت لنفس
الدائرة .
مديحه::ترى اختج شاخطه مو مال لوم.
_وحقها بلي تكوله،وهذا الي ماحسبنا حسابه
من فكرنا نرتبط بهيج ناس،يبقى الأصل طاغي
على كل شي واحنى اصلنا اسود عرك مانكدر
ننكرة لو نضمه .
مديحه:: ثابت ماگايللهم هيه محاولة تسقط
نفسها و كلهم متعاطفين وياها يكولون حاله
نفسيه بسبب الحمل.
_شسوي باريج؟
مديحه::دخيلج لاتصفنين عوفي المرة ترى حامل واذا صار بيها شي ماتخلصين منهم .
_جا شيصبرني لحد ما تولد .
مديحه::وعليمن دايخه انتي بيدج ترديلها الصاع
صاعين لو بس تفكرين عدل.
_كومي لاتخليني اطلع ضيم اريج بيج.
مديحه::ماخذه رجلها وتكول ضيم.
_باوعتلها كامت وهيه تضحك،، صفنت افكر
شلون اطلع اختي من الهيه بي ،،ثابت مامعترض
وأعرف بي يحبها وحتى اهله هم مامقصرين.
مديحه:'بدال هل صفنه كومي خلينا نصف
البيت ونطبخلنا شي ناكله.
_بعدني مارادة عليها اندك الجرس باوعت للكامرة
مولي شايل صينيه طلعت فتحتله الباب سلم
وشكد يعجبني طبعهم ابد مايدخلون بشي.
مولي::هذا غداجن واي شي تردونه خابريني.
_تشكرت منه وراح كمت سبحت وغيرت ملابسي نضنفنا البيت واكلنا، العصر خابرني ثابت.
ثابت::اذا قدر كاعدة هيئيها ناخذها للدكتور
_نايمه لو تخليها غير يوم .
ثابت::خاف حالتها تتأزم وتأذي نفسها.
_انه ماعيفتها مستحيل اغفل عنها.
ثابت::تمام من تحسين وضعها مو تمام بلغيني.
_نهيت مكالمتي ويا ودخلت عليها مغمضه
بس دموعها تنزل تقربت عليها وكل ضني كاعده
مسحت وجها بيدي فزت خايفه .
قدر::شفت امي شفتها جانت تبجي .
_حظنتها اهدء بيها بس موتتني تبجي
وتعتب على أمها
قدر::لو من البداية ذابتني المن جابتني الدنيا
وعافتني لوحدي ليش خلتني ضايعه لو موتتني
واني بطنها .
_احس اجتني رحمه ابجي بيها كابلتها وضلينا
وحده تواسي الثانيه ،، اذا انتي امج أنجبرت اتعوفج
انه تخلت عني وعن جويسم الي شكد اتوسل بيها
تلمنا تالي مات وضلت بنفسه المه والبيت.
قدر::ولهذا السبب انه مراح أخلف والطفل الي
ابطني ماضلمه لازم ينزل .حتى لا يتعذب مثل
عذابي وتنبذة الناس مثل مانبذوني .
_حجتها وطفرت من الجربايه اريد بس الزمها
مالحكت تضرب بطنها اثنين اديها على صوتي
اجت مديحه تركض شبكتها وياي .
مديحه::لزميها خل اخابر رجلها .
قدر::اذا تحبيني خلصيني منه اترجاج خطيه
يعيش العشته.
_اي بس مو هيج تأذين روحج ولج
تموتين هسه اخذج الدكتورة تنزله
قدر::سونه اخذيني بعيد ماريد
ناس خلينا نشرد منا .
_هو انه بعد ماخليج لان حتى انه اريد اشرد
من الناس ،، بقيت احجي وياها لحد ما اجه
ثابت واهله كلهم .بعدت عنها وهو لزمها كمت
سلمت. على إم الباشا .والحجي .
وفيه::اسم الله ماما شبيج قيادة.
أبو اسعد::حضروها ناخذها للدكتور.
_كوى قنعناها لبستها وطلعنا الحجي وأم الباشا
وثابت بقت مديحه بالبيت ،، وصلنا للدكتور والضاهر حاجزين لان بسرعه دخلوها.
وفيه::ادخلي ويا اختج ماما.
_لا خاله انتي احسن مني عاد تفهمينه حالتها.
أبو اسعد::عوفو بس زوجها افضل .
_بقينا كاعدين اكثر من ساعه طلع ثابت
مخلي قدر بعربانه احس بادن رجليه ،تلكاه الحجي يسال بقلق .
أبو اسعد::ها يابه ؟
ثابت::انهارت واضطر ينطيها مهدء، وفقدت.
_اتقربت عليها ،،خليت ايدي على حلكي
امنع صوت شهكتي .
أبو اسعد::دطلعها.بين أقدم السيارة اهنا.
_طلعنا من العيادة،شالها والتفت عليه كال..
ثابت::سونه اصعدي انتي حتى تخلين رأسها بحظنج.
_صعدت وحطها بحظني وام الباشا يمنا.
أبو اسعد::لا اله الا الله اشبيها البنية شجاها
مو جانت مثل الورد ليش هيج انتكست .
وفيه::خاف جلبت وياها تابعه ليش ماناخذها
للسادة .
_لحد ما وصلنه البيت همه كل شويه يقترحون
علاج ،نزلنا تلكتنا مديحه تخبلت من شافتها فاقده.
مديحه::يمه اسم الله شبيها؟
ثابت::مابيها شئ بس من العلاج نامت.
_بقه هو واهله مكابلينها وكاعدين.
أبو اسعد::اشوف الأفضل ننقلها لبيتنا،
حتى احنى عينا عليها .
ثابت::يابه تريد اختها يمها .
أبو اسعد::اي مو مشكلة تجي اختها يمها.
ثابت:: خل تصحى وسهله.
أبو اسعد::يله احنى نروح وشيصير خابرني.
_بقى ثابت مكابلها وكاعد انه ومديحه طلعنا للصالة
خابرها طارق ومن ردها عرفت كالها راح اجيج سدته والتفت عليه.
مديحة::هسه طلع حبه ، من جنت يمه يخلص
نهارة بالشغل وباليل يم اصدقائه ومن احجي
يكول اشرد من افلامجن انتي وامي.
_روحي مدام ثابت راح يبقى يمي .
مديحه::خوش. بس عينج لاتغفلين عنها
وانه باجر اجي .
_اجه طارق وطلعله ثابت تشكر منه
راحو واحنى دخلنا استحيت ادخل للغرفة صاح
عليه
ثابت::تعاي يابه ليش باقيه بالصاله،، انه راح
انام بالغرفه الثانيه اخذي راحتج .
_لايمعود خاف تكعد وماسيطر عليها لوحدي
ابقى انته يمها افضل.
ثابت::تمام جا روحي دخلي جنطتج ليش باقيه
بالصاله ترى الغرفه الثانيه بيها كنتور .
_طلعت من يمه خذت جنطتي وهمزين الغرفة
بيها حتى جربايه خليت ملابسي بجنطتهن بس
طلعتلي دشداشة بدلت وتمددت ماخذت عيني
نوم ضليت اكلب بالنقال صفنت الباشا ابد ما راسلني معقولة ساكت لان يعرف بيه هنا،، وعبالك
سمعني كمزت. من دك نقالي وهو المتصل رفضتها
ودزيتله رساله خير شتريد ؟
الباشا::اذا كاعدة طلعي انه بالباب.
_شنو بالباب شبيك انه بيت ثابت.
الباشا::اي انه برا اطلعي اريدج بشغله.
_تعذرني ماكدر نعسانه وهم مايصير عيب من ثابت.
الباشا::لو تخجلين ماسافرتي جا ماكلتي عيب
شتكول عليه الناس .
_كلت مو مال رسائل ،، دكيت عليه فتح
خط استلمته ،، ياناس اهلك الي خايف يعرفون
مالهم حق يحجون سافرت بقيت هل شي يخصني
ولو مستحي من الناس جان فكرت من تدخل عليه
وتطلع الفجر .
الباشا::كومي فتحي الباب .
_حجاها وسدة ،، كلت ولا أرد عليه كمت طفيت
الضوى توني اريد أمدد وسمعت الجرس عرفته هو كلت اكيد هسه ثابت يطردة لو يتعذر يكله نايمه
شويه وسمعت صوتهم ثابت يرزل بي كمت وكفت ورا الباب .
ثابت::لك ماتخجل انته كافي عاد.
الباشا::شمسوي نازع ملابسي لو كتلك
انطيني الخاولي ارد ادخل للحمام .
ثابت::ديله بدون حجي زايد شكو جايني بهيج
وقت كول ناس نايمه عدهم مريض .
الباشا::جاي على زوجتي .
ثابت::يازوجه انته مخبل ؟
الباشا::زوجتي لو نسيت ،انته الشاهد على عقد.
ثابت::غلطه متندم عليها ومحتار شسوي حتى
اصححها ولك خجلان من نفسي لان وافقت بهل
شي .
الباشا::وليش هيج تكول شنو الغلط بالموضوع.
ثابت::تمام مادامك تشوف الأمر مابي غلط
اخذ زوجتك لبيتك ..
_بقيت واكفه ورا الباب اسمع حجيهم
الباشا::أول وتالي اخذها.
ثابت::شوكت ؟
الباشا::كلشي بوقته، ولا تستفزني وهسه من رخصتك صيحلي زوجتي اريدها .
_التفتت اخذت شالي حطيته على راسي وطلعت
اشرت لثابت روح انته ،، والتفت على الباشا كتله
نطلع بالحديقه نسولف،،، كام طلع قبلي لحكته
كاعد بالكاع وجكارته بيدة ،،،،باوعلي واشر لمكان
كباله وبس كعدت جرني من ايدي لوها احس
العضم طك ولك عوفني لا أصرخ والله.
الباشا::كتلج انطيني مجال لان اريج حامل
تلمين غراضج واطلعين بدون علمي .
_ انته ماخليتلي حل ثاني
تسد محلي وتريدني ابيع بيتي وابعد من اختي.
الباشا؛:وشنو اذا سكنتج بغير مكان خو اعتبري اختج متزوجه شخص بغير محافظه،لو هيه عيارة وعناد وطناكير .
_بس وخر ايدي راح تنكسر .. دنك عضني
بجتفي فرفحت دفعته حيل مالحكت اكوم
لزمني شبعني كفخات .
الباشا؛:تحجين بخشمج وتغلقين النقال
وتشمرين تشمر عبالج مالزمج .
_لو ماحالة قدر جا مالزمتني.
الباشا::لو بسابع سما هم اجيبج.
_دوخر كافي .
الباشا::بختج بثابت وقدر والا حالف اكسر رجلج
كومي انكسحي واحسابج بعده ماخلص.
_ماصدكت هدني كمت بسرعه وهو طلع
دخلت افرك بيدي ،، لثاني كعدت على صريخ
قدر طفرت من الجربايه بدون ما انتبه حسيت
شي نبت برجلي مااهتميت، طلعت اركض
دخلت عليها لكيت ثابت مشبكها بحظنه
وهيه تصرخ التفتت شافتني .
قدر::تعاي اخذيني منا مو كلتي نشرد.
_تقربت عليها وانه احجي أي غير تصيرين
زينه حتى من نشرد مايلزمنا التفتت على ثابت
الي مغمض عيونه حجه وهو مبتسم.
ثابت::لا انه اغمض ماشوفكم دروحي
لبسيلج حجاب يابه.
_خليت ايدي على راسي ،، يا شلون فشله
طلعت اجر برجلي الي عبالك داخل بيها بسمار،،لبست شالي وغسلت ورجعت لكيتها
مخليه وجها بصدرة وتشمم خطيه هو انحرج
بعدها عنه كتله ابقى راح اسوي ريوك .
ثابت::رحمه الله والديج .
_حضرت الريوك شلت الصينية بس رجلي
موتتني حاولت مابين المي بس هو انتبه
لان أعرج
ثابت::شبيها رجلج ؟
_مابيها يمكن خدرت ،صبيت الجاي انطيته الكوب ضل محتار بقدر الي غافيه بحظنه كمت سندتها على مخدتها فزت تباوع بوجهي دنكت بوستها
يله كومي اغسلج حتى تتريكين.
قدر::لا خليني انام نعسانه .
_غمزلي بمعنى خليها تنام غطيتها ونزلت
كابلته تريك وكام.
ثابت::راح ادخن جكارتي برا عينج عليها.
_اباوعلها نايمه الوجه ذبلان شبيدي عليج
يمكن ماجنت مفكرة بهل سالفه بس هذا
واقع مانكدر ننكرة شلت الصينية وديتها للمطبخ
اريد ارجع يمها صاح عليه التفتت كاعد على القنفه
تمشيت بتجاها عيونه على رجلي
ثابت::انتي طايحه احد صاربج .
_لا يمعود بس من سمعت قدر تبجي طفرت من الجربايه بدون ماانتبه
ثابت::متأكدة متأذيج.
_تريد الصدك توجعني كلش .
ثابت::غير تنتبهين دكومي يم قدر خل اروح
اجيبلج مسكن شي اذا العصر ماصارت زينة
نشوفلج دكتور.
_لا يادكتور، هسه تصير زينة خلينا بقدر
كلي شلون راح نقنعها .
ثابت::ربج ارحم بحالها،، إم اسعد كالت
ناخذها للسادة عسى ولعل تتحسن
_بعدني مارادة سمعنا صوتها ركض هو قبلي
تبعته لكيته مكعدها وهيه. تبجي بعبرة
قدر::ماريد انام بعد كل ما اغفه تجيني هاي المرة.
ثابت::أقري المعوذات يابة انتي مؤمنه.وهل شي
امتحان المفروض ميهزج.
قدر::مو امتحان هذا واقع أي لا تجاملني
كتلك انه بحثت وكل شي يدل على الجينات
ثابت::وانه قابل شما يكون اسود احمر
عسى ما يطلع بنفسجي .
قدر::وهو شنو ذنبه يعيش منبوذ من الناس.
ثابت::اهم شي انه وياج انحبه،،نربي ونكبرة
ونعلمه ونخلي مميز اهم شي نعلمه أصول الدين
قدر::واذا كبر وراد يتزوج منو ينطي .
ثابت::انروح. انه وياج نخطبله من الهند،، شبيج كل عقلج تحجين هذا ابني غير الناس تجي هيه تخطبه خو اذا ابنيه ماازوجها،،اله واحد يسكن وياي حتى اذا ايأذيها احمسه حمس .
_يحجي وياها عبالك طفله ويقنع بيها
مالومها لان احنى عانينا بسبب هل شي.
_عفته يحجي وياها وطلعت دكيت على مديحه
ماردت عليه اكيد نايمه ،، بقيت محتارة شسوي
شو البيت نضيف دخلت للمطبخ كلت اسوي غده
فتحت الفريز طلعت دجاجه خليتها بالسنك ،،اندك
الجرس طلع ثابت شويه ورجع إم الباشا ويا سلمت
عليه ودخلت متوجهه لقدر.
وفيه::ها شلونها قيادتها اليوم .
_ضلت تحجي وياها تالي كالت ناخذها للسادة.
قدر::لا ماروح ماروح .
وفيه::ليش ماما غير يعالجوج ومن بخت جدهم
ان شاء الله تشفين كومي لخاطري والله بيتنا
وحشه بلياج والبنات مالهن خلك وحتى الحجي
يكول عود جنت ناوي اسوي مجلس النساء وقيادة
تقرأ بي .
_كوى قنعتها ،،طلعتلها صايه وشال .
قدر::ترحين وياي.
_شوفي رجلي ولج طفرت من الجربايه وكوى
ادوس عليها روحي وياهم وبين ماتجون انه طابخه.
وفيه::لا طبخين هسه البنات يجيبن غداكم.
_خذوها وراحو ،، وانه نضفت غرفتها وغيرت
الفرشه رجعت الدجاجة ورجعت ذبيت الفرشه
بالغسالة فتحت الشبابيك هويت البيت رغم الم
رجلي بس كلت خلي الهي روحي شو مديحه
ماكو معقولة لهسه نايمه دكيت شو نوب مغلق
قلقت طلعت رقم طارق اتصلت بي طول يله رد.
طارق::اهلا سلاسل شلونج .
_زينه اكلك شو ادك على مديحه يطلعلي مغلق.
طارق::ها مادري انه طالع يجوز مابي شحن.
_خوش عود من ترجع كلها تخابريني. نهيت مكالمتي ويا بس مادري ليش مااقتنعت بعذرة،، كلت انتضر
واشوف اذا فعلا مابي شحن أول وتالي تشحنه
مر وقت واجو تلكينهم اباوع لقدر كوى تمشي
دخلناها للغرفة انتبهت مخلين برجلها حجل
حديد وايدها بيها علك تمددت وغمضت عيونها
طلع ثابت واشرلي تبعته .
ثابت::بس اوصل للسوك لان محتاجين غراض
المجلس ومتعود كل سنه انه اجيبهن.
_روح لايضل بالك .
ثابت::ماراح اتاخر وشيصير خابريني
_حجاها وصاح على إم الباشا اخذها وطلعو
بقيت مكابله قدر الي مغمضه ودموعها تصب
صعدت تمددت يمها ،،اعرف بيج كاعده
اسمعيني يجوز انتي احسن مني ربيتي بيت فاروق
وتعلمتي منهم هواي أمور واولها الصلاة والدعاء
قدر::صلاتهم جذب لان نبذوني واعترضو على
زواج طارق مني بسبب نسبي .
_ويجوز هذا الشي جان افضل لان لولا رفضهم
ماقابلتي ثابت وماتعرفتي عليه .
قدر::مالنا ذنب ليش يعاقبونا؟
_اذا نحجي الصدك ترى ثابت مامعترض والرجال
مستقتل على الطفل وحتى اهله.
قدر::بس انه ماريد طفلي يعاني العانيته
لاتنسين الضرف الي ربطتني بثابت والدليل
هاي انتي والباشا ليش ماكدر يعلن زواجه بيج.
_لاتقيسين هيج ،، الباشا أول سبب عمله
وثاني شي زوجته وهو أكد،،مابينهم خلاف وهيه
ماعدها مشاكل ويا وبينهم طفل وهسه حامل
والاهم من هذا كله علاء الي فضحني بين
الناس وكالهم جانت تركص وتطلع حفلات.
قدر::وهم كالهم انه بت حرام .
_شوفي يكولون ذنب أخف من ذنب.
قطع حديثنا صوت الجرس .
قدر::خاف البنات اجن باوعي للكامرة.
_كمت وانصدم الباشا واكف رديت بلغت قدر.
قدر::فتحيله الباب .
_خاف ثابت مايقبل؟
قدر::لا ترى هو ويا حتى لو يتزاعلون بس يحبه.
لا خل اخابر ثابت احسن ،، جريت نقالي وبس دك
رد بقلق گتله الباشا بالباب.
ثابت::اي يابه فتحيله جاي يشوف قدر
_طلعت فتحتله الباب دخل وهو يحجي.
الباشا::ساعه يله تفتحين ؟
_مو بيتي غير نترخص من صاحبة المكان
التفت عليه
الباشا::وتعرفين الأصول جا شلون طلعتي
من بيتج بدون علم زوجج .
_مارديت دخلت لغرفة قدر وهو وراي سلم عليها
وجر الكرسي وكعد كبالها،، وحجى بدون مقدمات
الباشا::فكري اذا تخليتي عن الطفل تتخلين
عن ثابت .
قدر::ولا أضلم بنتي لو ابني ماعشتو العشته
سنين وانه اشوف فاروق احن عم بالدنيا
ومن جانت جدتي تقلد على جسمي مايرضى
ويكلها حرام ماجنت اعرف تقصد نسبي بس من
كبرت ونكشفت الأوراق هو أول من اعترض
الباشا::وهل شي مو صدفه كولي رب العالمين
جان ضاملج ثابت حتى يعوضج .
_قبل مايتزوجني ثابت جنت اسمع حجي اهلك
كل خوفهم من نسبي ترى .
الباشا::وهو اتزوجج وماهمه الكلام .
قدر::وانه احبه حيل واريده بس .
الباشا::وهو يريد طفل منج .
_دنكت تبجي رد كالها.
الباشا::زين عندي اقتراح .
قدر::شنو هوه؟
الباشا::الطب اطور شتكولين لو اخذج الدكتورة
تكشفلنا بالسونار عن الجنين .
قدر::اي تعرف ولد لو بنت خو مااطلع لونه.
الباشا::لا يابه غير سونار ملون تشوف حته
لون عيونه بلكي بيج بخت ويطلع على جدي
عيونه زرك.
_باوعتله بشك ضحك.
الباشا::ها شكلتي؟
قدر::جا اذا هيج شعجب ماخذت اريج اله.
الباشا::انه واريج ماعدنا اعتراض على خلقة الله
شيجي هلا بي لو يطلع عنده أربع ادين هم قابلين
قدر::لا اسم الله.
الباشا::وهم لو طلع بي شي ربج ماجعل
داء اله وضع الدواء ،، هم نكدر نجمله بعمليه.
_حجيت بگلبي الي يسمعه يكول مؤمن
وهو البطل والاغاني مرافكته ،،كمزت من التفت
عليه هز أيدة .
الباشا::شبيج اتكمزين انجري سويلي جاي.
_طلعت وانه احجي بكلبي هو انته مال جاي
بس صدك شو هاي مرتين يجي صاحي معقولة
تاب حميت الجاي صبيت بكوب واخذته اله
باوعلي هزيت راسي شكو .
الباشا::هذا مال الصبح حميتي.
_هو انته ضكته حتى تحجي؟
الباشا::انجري سوي جديد.
_خفت اجادله ويسحلني رجعت سويت جاي جديد
وصبيتله اخذه مني ودار يحجي وياها .
الباشا::يابة اخذيها مني كلمه اذا صار عدكم
بنيه اخذها لأبني .
قدر::وبله ولد.
الباشا::ننتضر اياد بلكي يخلفنا بت،، يابه نزوج مولي وبلكي يصير عنده بت عاد اشفايتلج نسيبج ممرض .
قدر؛:انه احبه مولي .
الباشا::واحنى كلنا نحبج .ها شتكولين؟
قدر::بس هو الطفل مابين اله اتعدة بعد شهر.
الباشا::خلص ننتضر هل شهر .
_حجاها وكام طلع لحكته التفت عليه رجعت
بخطواتي هز أيدة .
الباشا::خايفه زمو .
_منين أخاف ،، باوعلي رافع حاجبه رديت اي
شمسويه حتى أخاف .
الباشا::من افرغ ونكعد اكلج شمسويه
واحسابج عليهن وحده وحده .
_خوش عود من نكعد،، درت وجهي وكتله سد الباب وراك بعدني مادخلت صاح عليه.
الباشا::شبيها رجلج .
_مابيها شي ولا تسوي روحك حنين،،مالحكت
اطفر رجع بسرعه لزمني،، يا عوفني يمعود منا
الجيران خاف احد يشوفنا من فوك،، ولا جنه يسمعني جرني للمطبخ.
الباشا::مو حنين ولا بگلبي رحمه .
_لزم وجهي اثنين اديه احس اختنكت يعذب
بيه مو يبوسني،، ضليت ارفس دفعني وطلع .
ركضت غسلت وجهي طلعت ثلج خليت على حلكي
احس بي ورم خرب يومك على هاي السالفه دخلت
يم قدر لكيتها تصفن كتلها مديحه جهازها مغلق
وطارق يكول انه بالشغل ولحد هسه ماكو .
قدر::يجوز صدك مغلق تلكيها ملتهيه ترش
على فاطمة ماي وذيج منكعتها خل .
_ضحكت صدك سالفتهن تضحك.
قدر::هاي فاطمة من يوم العرفتها هيه هيج
جانت تحتار شتسوي وشكد امي شكت منها
بس ماصدكت .
_دنكت تمسح بدموعها ،، سالتها انتي حلمت باامج
قدر::اي بس ماحجت وياي بس جانت تباوعلي
وتبجي وفزيت حتى ماشبعت منها .
_زين طارق كال انطيت غراض قدر لثابت وينهن مابيهن صورة الها.
قدر::ثابت ضمهن،، لان جنت اطلعهن وابجي.
_وين ضمهن اكيد هنا لله من يجي اكله .
قدر::هو خلاهن بكنتورة
_جا اكيد قافله.
قدر::لا هو مايقفل الكنتور بس حلفني مااطلعهن
وهم استحي افتحه بدون علمه .
_هزيت ايدي وكمت ياكنتور بس كليلي؟
قدر::هذاك الأخير يخلي بي غراضه واوراقه.
_فتحت الكنتور دورت وهيه تحجي وياي.
قدر::صندوك ابيض هو هذا بي الصور.
_هذا لكيته،، طلعته وصعدت يمها بعدني مافاتحته
بجت ،، ها اذا هيج ارجعه.
قدر::لا فتحي خليني اشوفها مشتاقتلها هواي.
_فتحته وانصدم بجمالها احلى من قدر بهواي
شكرة وعيونها ملونه وبيضه ،، بجيت على شبابها
بعدها صغيرة ،، انهارت قدر تبوس بالصورة وتصرخ
كوى خذتها منها رجعت الصندوك بمكانه،، وكعدت كبالها شوفي انه منج اباوع بالصورة ليل نهار حتى
طفلي يطلع يشبها.
قدر::جنت اكلها ليش ماطلعت عليج،، تكلي انتي اجمل مني واداهرها اكلها اشبه فاروق تزعل .
_الله يرحمها ،، كافي عيونج ورمن من البجي
اكلج صدك شو بنين ونغم مااجن.
قدر::بهيج ايام ينشغلن كلش عدهم مجلس
زلم وحيل يتعبن .
_عود الحجي جان ناوي يخليج تقرين .
قدر::يمعودة وين ادبرها استحي .
_انشغلنه بالسوالف،، حسيتها ارتاحيت
مر الوقت وثابت كل شويه يتصل يطمن بس انه بالي يم مديحه لليل اجه ثابت جايبلنا اكل من شاف
قدر كاعدة فرح عفته يمها وطلعت حضرت الاكل
وعلى الواهس اكلت ويانه،، ايست من مديحه
نمت والصبح كعدني صوت ثابت طلعت افرك بعيوني
ثابت::تعاي يم اختج يابه ولو تعبناج .
_ضحكت يمعود على أساس شايلتكم على جتافي
طلع وكال انه اسد الباب . عاد انه ماكلت باطل
تمددت يمها ونمت ،،ماكعدنا لحد الضهر كومتها
غسلت وبدلت ملابسها اجت إم الباشا جايبتلنا
ملابس سود.
وفيه::حزنجن على أبو عبدالله واهل بيته والشهداء ،ها قيادة ماما شتكولين اخذج يمنا
الحجي اكل كلبي يطب ويطلع يكول مضيع شي.
قدر::اي اجي بليل ثابت يجيبني .
وفيه::خوش جيبي اختج وياج .
_وقبل ماتطلع التفتت علينا.
وفيه::ترى البنات مايعرفن شي
كتلهم صارت عدها تابعه وتتحلم ولهيج تمرضت
خاف يجن يسلمن عليج .
_طلعت وهيه تدعي لقدر ،، شكد محترمه
لليل وتلفون مديحه مغلق وطارق مارد عليه
اجه ثابت وكتله.
ثابت::زحمه اتصل بي خاف هيه غلقته حتى لانحرجها ونكلها تعاي يجوز زوجها منعها وحقه .
_عليمن حقه شنو ما يعرفنا؟
ثابت::هاي تختلف عن هاي رجال ميفكر هيج
مهما كان يعتبرني غريب ويجوز امه ماتقبل شو اتصلي بي وسالي.
_خابرت رد سالته ها طارق شنو مديحه من شحنت
طارق::لا غير طلع عاطل الأيسي مال الشحن
وديته للمصلح .
_خو جان خليتها تحجي وياي من نقالك
طارق::بعد نسيت .
_خوش هسه شوكت ترجع للبيت حتى اذكرك.
طارق::والله انه ماخذ امي للزيارة .
_ شنو جا هيه بقت لوحدها
ليش ماجبتها يمي .
طارق::لان انتي بيت ثابت كالت استحي الولد يتقيد.
_وشوكت ترجع ؟
طارق::بعد الدفنه .
_رفعت راسي باوعت لثابت اشرلي انهي المكالمه
كتله خوش عود من ترجع خابرني ،، وسديته
ثابت::مو كتلج اكيد مايريدها تجي هنا،، دكومي
لبسي حتى اخذكم لبيت الحجي .
_لو تعوفني.
قدر::امشي وياي مانتاخر بس اشوف البنات
واسلم على الحجي ونرجع .
_حرجتني مشيت وانه خايفه من مواجهه اريج
تلكنا البنات وشكد فرحن بشوفت قدر سوالفهم
حلوة اجه الحجي كامت قدر سلمت عليه جرها
باس رأسها وسلم عليه .
أبو اسعد::اليوم يله حسيت البيت بي ناس
قدر::شكرا عمو ربي يحفظك .
أبو اسعد::ليلة الحجة انتي تحييها.
قدر::اذا اكدر بس صدكني استحي.
أبو اسعد::الي يقرأ لاهل البيت يتباها ويرفع رأسه
_بقى يحجي وياها ويقنعها تالي ترخص وراح .
بنين::هسه اجيجن بس خل انطيهم غراضهم.
_وحسب ماعرفت من يخلص المجلس هو ولده
وقرايبهم يبقون بالاستقبال ،، انشغلنا بسوالف نغم
نغم::سونه لاتفوتين ليلة العاشر أجواء تخبل
بيها اعمال وهنا البنات يلتمن شي تقرا وشئ
تلطم .
_هزيت راسي اي وعيني لاريج الي كل مادور
وجهي الكاها تباوعلي ،،بنات محمد حبابات وابد
مايسألن عن شي تصرفن كأنو يعرفني من عمر اجت
بنين شايله صينيه خلتها بالنص.
بنين::اشربن نومي .
وفيه::لو مسويه شي للبنات خاف جاعن.
بنين::ضامتلهن اندومي .
وفيه؛:من اطبخينه اصبه على راسج ولج كله امراض يغبيه .
_ ضلن هيه ونغم يتاغمزن
قدر::ترى راح يضمنه وبعدين يطبخنه بسوكت.
_مبينه الشغلة ،،كامت بنين جابت الديجي
حطت لطميه .
بنين::يله بنات اعتبرن نفسجن بالقرايه .
_صدك التمن يرددن لحد ماخلصت القصيدة
كلت لقدر يله ،، خابرت ثابت اجه علينا رجعنا
للبيت خلصت اليل بالي مشغول بمديحه ،فزيت اباوع قدر ماكو اسمع صوت سوالف طلعت افرك بعيوني اتفاجئت من لكيت اريج ونغم وياهن مرة متسوطه بالعمر التفتت قدر شافتني.
قدر::تعاي سونه البنات جايات يتحمدلي السلامة
_هزيت راسي ودخلت للحمام غسلت وطلعت
قدر::سلمي على خاله ميسون تصير خاله بنين
والبنات تعرفيهن .
_بوست المرة نغم باوستني ،،بس اريج تجاهلت سلامي كعدت يمهن ،،نغم تحاول تخلق حديث
بس اريج جان ابالها غير شي التفتت تسأل قدر
اريج::اي ماعرفتو جنس الطفل.
_مالحكت احجي ردت قدر .
قدر::لا مايبين هسه والباشا كال عنده صديق
زوجته دكتورة سونار ،،انوديج الها لان سونارها ملون.
اريج::وشنو اذا ملون يطلع لونه الطفل اسود
لو ابيض ترى مايكشف هيج شي .والله يااسعد وسوالفه
_باوعتلها وابتسمت ،، درت وجهي على قدر
وحجيت ،، بالنسبه لثابت يكول لو يطلع بنفسجي
هم قابل والحجي نذر الف نذر لسلامتها اهم شي
صحتها وصحت الطفل وماضن يطلع مو حلو لان
أمه وابو حلوين واحنى عدنا ميزة،رب العالمين ميزنا بيها بحيث الي يشوفنا يحبنا وكأنو احنى
اجمل الناس ،، حجيتها وكمت للغرفة فتحت
كنتور ثابت طلعت صورة إم قدر وجبتها الهن
هاي أمها اذا على الوراثه انه سامعه الطفل
يأخذ من خواله .
اريج::وانتي عليمن طالعه اذا هيج.
_انه خليط من عمامي وخوالي لان أهل امي
نفس عرگ أهل أبوي وهل تشوفين بعينج
ولو مايصير احمد نفسي.
اريج:: ترى الراقصات كلهن يمتلكن نفس .
_ماخليتها تكمل ،،لا عمري انه مااركص بس
احنى اصحاب البشرة السمراء هيج اجسامنا شلون افهمج هاي ميزتنا . يوووو لو تدرين عماتي
من جمالهن خذوهن شيوخ .
اريج::خوش جا انتي شعجب ماخطبج شيخ.
_باوعت لقدر الي مدنكه ،،ورديت باوعتلهن
كلت بگلبي هيه جابتها لنفسها ،،حجيت بدلع
شكولج بعد طفرة وراثية وحبيت اغير من نمط
العائله وبعدني ما لكيت الي يستحقني.
اريج::هو احنى خايفين من الطفرة الوراثيه.
_كامت نغم وهيه تحجي.
نغم::يله عيوني سلامتج وماتشوفين شر.
اريج::لحظه اتصل بااسعد يدز مولي مابيه امشي.
_ضلت نغم محتارة واريج تريد تستغل الفرصه
حتى تبث سمها .
اريج::قبل أبوي سولفنا على الشيخ محمد الاعريبي.
_قكطعت كلامها ،، اي سالفته معروفه ،من أخذ الوصيفه وبنالها قصر،،،،، وسمى على اسمها
قصر الشيخه فتنه ،،ضلت اريج تباوعلي نغم انحرجت غمزتلها بمعنى معليج .ميسون
ضلت تخزر بيها بس هيه مااهتمت .
اريج::اگلج ميسون تذكرين المدرسة
الجانت بالمتوسطه نسيت اسمها خطيه هيه
الوحيدة طلعت من بين اهلها سمرة كالو
جدها السابع جان متزوج وحده
ميسون::اي ورب العالمين رزقها بزوج ،من نسل رسول الله اخذت سيد معروف بمحافظة
ميسان ،، يله حبايب احنى نترخص .
_دنكت ميسون بوست قدر وهيه تدعيلها
ميسون ::رب يرزقج باليرضيج.
_كأمت نغم وهيه تمد ايدها لاريج.اخذت ابنها.
نغم:: يله يمعودة ترى واري شغل كومي عليمن
ننتضر مولي.
_طلعت ميسون ونغم وراها ،، واريج تمشي
على كيف وايدها على بطنها . استغليت الوضع
هنه وصلن الكراج وهيه بعدها باب المطبخ
وكفت گبالها وحجيت مسمعتها.شوفي ولج
باوعتلي متفاجئه ،اذا مفكرة عندج مكر وتجين تبثين سمج على اختي،،، فنصيحه اتقي كيدي
لان اذا خليتج براسي ابجيج ،، الأفضل تبعدين
عنا ليش اسحلج.
اريج::داكوكه ماعليج عتب.
_والله لايروايج شر الداكوكات انقلعي،، طلعت
بدون ماتلتفت رجعت لكيت قدر مبسطه بالكاع
وتبجي صحت ،،،عليمن تبجين شو فحمناها
بعد شكو كومي غسلي وجهج كومتها غلست
بس مامقتنعه ردت إلهيها.كتلها خلي اخابر طارق لان شغلته مو خاليه.
قدر::كليله احنى راح نجي نشوفها .
_دكيت مارد كامت قدر لغرفتها اندك الباب
باوعت للكامرة أم الباشا طلعت استقبلها
وفيه::وينها قيادة .
جوى تعاي خاله،،دخلت وبس شافتها
قدر بجت بوستها.
وفيه::مسحيها بوجهي ولخاطري ماريد كلمه
توصل لثابت .
_بقت كاعدة وتقنع بقدر شويه وراحت وانه صارت
سولتي النقال ،دكيت على طارق وهم تعذر كال بعده
بكربلاء ،،وثابت يخجل يخابره ضليت محتارة قدر ساعه زينه وساعه تفز من نومها تصرخ.الأحلام مافكتها وثابت يخلص نهارة يمها للمغرب يروح للمجلس لحد ليلة العاشر كال امشو يم اهلي شكد حاولت ماروح.
ثابت::احد سمعج حجايه ؟
_لا بس اخجل مهما كان ابقى غريبه بينهم .
ثابت::لا تكولين هيج ،، انتي وحدة منا .
_يبووي ماتوقعت كل هاي الناس عدهم
التفتت على قدر ولج عرفيني ضليت اصفن
قدر::انتي انطي خدج وبوسي وشلونج الله يسملج
عظم الله اجرج وهاي هيه .
_همه مابدر منهم شي بس انه يتروالي يباوعلي
لو يحجن عليه ضليت مدنكه أجواء تخبل ماعايشتها
قبل البنات الي حافظات قصائد قرنها صاحت اخت ثابت الجبيرة .
إم اجواد::ولج قدر جا مو على أساس انتي تقرين.
قدر::خاله انه مريضه .
إم اجواد::جا والمريض يطيب من يقرأ على الحسين .
_قطع جدالهن دخول إم اريج وياها بنات
وجهال كالت قدر هذن بناتها وجهالهن،،من شفت
البنات كلها كامت كمت بس الي ماحسبت حسابه
من عبرتني إم اريج دنكت فشلانه قدر،،من شافتها
سوت هيج جرتني وكعدت ماسلمت عليها شو هاي
باوعتلنا وصاحت .
إم اريج::شنو ست قدر ترديني ادنك اسلم عليج
الكل باوعلها ردت قدر .
قدر::تعذريني مابيه اوكف سلامج واصل .
وفيه::اي خطيه تعبانه كوى جبتها اصلا الدكتورة
كالت لاتتحرك من الفراش
_ردت اريج مسمعتنا ..
اريج::شسالفه لازكينه بتفله ويطيح ديله
على هل ركضى شراح يطلع .
_خزرتها إم الباشا ،،وغيرت الموضوع
بس انه وقدر نغثينا حيل
قدر::كومي خل انروح .
_لا هسه ثابت يكول ليش واذا حجينا تصير مشكلة وشكلك قدر واختها السبب اسكتي شويه ونروح
صارت كعدت اريج واخواتها كبالنه يباوعن علينا
ويتشاورن نغم وبنين التهن،،، ماي وجاي وبنات
محمد انشغلن يسولفن ويا عماتهن الكبار كأمت
إم الباشا واشرت لاريج تبعتها شويه ورجعت متنكه
دخلت نغم وهيه تحجي.
نغم::عمو نذر هاي اليلة لسلامة قدر ،يلا حبايب صفو راحت تجي العلويه،،، إم سيد صلاح
تقرالنه شويه .
_بين مارتبن كعدتهن دخلت مرة جبيرة .وجها
مريح سلمت وكعدت وياها جنتها وبنتها حسب ماكالت قدر بدت بقرأة قران اول وبعدين خطبة ونوب نعت صوتها يخبل رغم عمرها جبير
بجيت من گلبي كامت جنتها قرت لطمية اباوع أجواء تخلي البشر يخشع فزيت من صفنتي على
ايد نغم تجرني
نغم::تعاي خاله تريدج بالغرفه .
_مشيت وياها دخلتني لغرفة سالتها بخوف ها خاله.
وفيه::هاي ابيات كتبهن الحجي لقدر على أساس تقراهن شتكولين لو انتي تقرين بدالها
_يا خاله ماعرف واخجل عذريني ماكدر .
وفيه::ياماما ثقي بيه هل مجلس راح يغير حياتج
ولو مااحبج جان ماكتلج .
_دنكت عيوني تصب ضلت هيه ونغم يحجن
نغم::أتمنى لو أملك صوت جان نذرته لقراءة المجالس .
_انهاريت كعدت وانه احجي خاله انه جنت
اعرف الله حسب ماسمعت من الناس وبالمدرسه
امي جانت بس برمضان أتصلي وعاشور متخذينه اكل مجاني أبوي يأخذ امي ويطلعون يجيبون اكل نخزنه نبقه فترة نحمي وناكل لحد ما طلعنا من الصعده ومشيت لكربلاء وشفت الزيارة والله يذكرة بالخير أبو بشاير هواي علمني وثابت الي شماكول عنه مااوفي فضله ..
نغم::وهنيالج اذن انتي كل ألفات بحياتج جنتي
غير مسؤله عنه اجت بوكتها حالج حال
الي أعتنق الاسلام من جديد
وفيه ؛:دكومي وطلبي من ربج التوفيق
وادعي لاختج .
_خليت اديه على وجهي ابجي اللهي انته أعلم بحالي،،انه وين من هل مجالس اشوف نفسي
أصغر واقل من هاي الناس .
وفيه::دلزمي الورقة هاي اعتبريها درس احفظيها
وانه راح احجي ويا العلويه تساعدج .
_طلعت وراها انه ونغم ،،اشرتلي العلويه كعدت يمها انطتني السماعه وبعديت اقرأ بارتباك كامت قدر اجت يمي لزمت السماعه الضاهر شافت ايدي ترجف احس الأمر صعب بس العلويه ماقصرت
ترد وياي وهمزين قدر كملت عني .
قدر::واجينا ندك ياام البنين اليلة بابچ وحجينا
على جفوف الگمر قصة عذابج ،ندري انتي الكريمة وماتفصرين تسجلينه بسجل خدام الحسين
_البنات يردن وراها والعلويه اندمجنا المجلس
وقرينا اكثر من قصيدة لحد الفجر العلويه
كالت صلو كمنا صلينا حسب ماكالت أربع ركعات
وحدة عازت الثانيه،، صاحت عليه نغم كمت .
نغم::اخذي قدر لغرفة بنين تتمدد.
_كومتها لان صدك تعبت تمددت يمها
جاي نسولف بمديحه ودخلت علينا اريج وامها
عدلت نفسي قدر ضلت متمدده ،حجت إم اريج
وهيه تباوع لايد قدر .
إم اريج::اگلج كل مااريد اسالج انسى
هذا محبسج منين ماخذته.
_ردت قدر وهيه تتلمس المحبس .
قدر::الحجي أنطانيا قبل من عرف بحملي.
إم اريج::شو بله اشوفه مو جان عند امي واحد مثله.
_لزمت ايد قدر وانه احجي ، لا مايطلع من اريدها.
إم اريج::شنو لازكته بصمغ؟
_لا بس تدرين هيه سمنت بعد الحمل وعصير
المحبس عاد ثابت كالها خلي ،اذا حسيتي يضايقج
اخذه أكبرة ،،باوعت لقدر وجها انطعن غمزتلها لبسيهن كومي امشينا يم البنات .
قدر::اي يله.
_بقينا بالصاله يم نغم والبنات لحد ماطلعت الشمس كالت العلويه أقري الزيارة ،،خلت كتاب بيدي قريت وهنه يردن وراي احس روحي مو انه
اريج بعد ماراوتنا وجها لحد ما خلصنا ، الزلم عدهم مقتل بالجامع راحو والعلويه هم راحت كالت قدر تعبت كلش عاد إم الباشا صاحت لنغم.
وفيه::وصلي البنات خاله.
_وصلتنا نغم للباب ورجعت ماصدكت
لزمت الفراش بجيت بقهر صاحت عليه قدر
قدر::تعاي يمي ثابت مايجي لان عدهم طبخ.
عليمن تبجين تولي ،، هو احنى لو نتحمل
لو نعوف كلشي ونبعد .
_جريتها لحظني اششش لاتقهرين روحج.
قدر::تعبت هواي سمعت منها حجي
واغلس ليش هيج تكرهني .
_اريج مو غبيه وتدري رجلها يريدني
لهذا السبب تضوج منج ،، يله شربي علاجج
أخذت الحبايه وتمددت ،وبس غمضت غفت
وانه هم تعبانه نمت ماكعدت اله العصر صفنت
أي ياسونه شلون لو عرفو ابنهم عاقد عليه بالسر شيكولون راح يبقون يعاملوني بنفس الطريقه لو يعتبروني استغليت طيبتهم وهجمت بيت ابنهم كمت توضيت وصليت اباوع البيت فارغ ثابت بعده ماجاي كعدت قدر وكتلها وشربتها علاج .
قدر::بطني تأذيني حيل .
_تمددي واذا بقى الألم اخابر ثابت.
قدر::أخاف انام واحلم لاتخليني لوحدي.
_هاي انه يمج ،،كمت اباوع لنقالي ماكو خبر من مديحه خلص اليوم والبعده قدر حالتها تحير مرة تندمج وياي وتسولف ومرة تخلصها بجي ليوم 13 بمحرم ثابت يجي شويه ويروح لان عدهم مجالس، سالتها همه خلصو.
قدر:: لحد الأربعين هيج.
_صفنت الباشا ساكت مااتصل ،، يله بلكي انشغل
عني،، شوكت قدر تتحسن اروح لبيتي ارتب وضع
المحل كمت فتحت جنطتي طلعت ملابس الجبتها
لقدر.
قدر::يخبلن ولج هذن منين جبتيهن؟
_بغداد بيها اشياء كلش حلوة ،، المهم انه اريد
اروح لبيتي ترى ثابت متقيد مني خطيه.
قدر::لا تعوفيني أخاف .
_حجتها وبجت يمعودة اشبيج اسكتي ماروح
وبعدين منين تخافين ؟
قدر::كل مااغفى احلم بهاي المرة .
_حلم قدر لاتخلين هيج شي يتعبج .
قدر::كارها نفسي والدنيا اتمنى اموت .
_ضليت احجي وياها لحد ماغفت بليل اجه
ثابت كتله على وضعها .
ثابت::بس خل اتاكد من الدكتورة اذا ماكو خطر
على حملها اخذها للزيارة نبقى هناك لحد ما ترتاح المهم شنو اخبار مديحه؟
_ماكو لحد الان .
ثابت::يجوز بينهم فد خلاف هو مو كال
ارجع بعد الدفنه خلي انشوف .
_خلصت ليلي تفكير بالي مشغول بمديحه
ثاني يوم كعدت لكيت ثابت طالع كعدت
قدر اخذتلها مشوار بجي ولوم ردت تشغلها
اكلج شو طارق ما يرد عليه.
قدر::اگيد بينهم مشاكله وهاي سوالف فطوم
_حجتها وكامت لغرفتها ،، ضليت محتارة
شسوي شويه واجت قدر لازمه نقالها .
قدر::مديحه دازة رسالة من رقم طارق
تكول لايضل بالجن تلفوني عاطل ولان تحاجيت
ويا فاطمة هو تعاند وياي وماجابه .
_خرب عقلها يعني الف مرة وصيتها عوفي المرة.
قدر::خلي اراسلها اطيح حظها.
_كتبتلها قدر .
قدر:: وتالي وياج تبقين انتي وفاطمه
يوميه هوسه مو كتلج عوفيها .
_رسلتها وبقينا ننتضر الرد شويه ودزت.
مديحه::مليت تعبت منها اصلا ندمانه زواجي
بطارق غلط .
_اخذت النقال ،، واستلمتها رزايل وشنو الغلط
بت التالف مللتي الولد بسوالفج وبعدين اذا هيج
ليش من كتلج عوفي جلبتي ،، شويه وردت
مديحه::ماعندي احد كلت اسمه رجل
بس شدعي على محابس الي عافني .
_فكيت حلكي اتمنيت اكدر ادخل من النقال والزمها بت التالف ،، يامحابس ولج بعدج تحجين
بي الناقص الي تخلى عنج النذل العلاس شوفي ولج عاجبج تبقين ويا طارق خير ماعاجبج تجين
وتنطمين يمي .
قدر::ها ماردت ؟
_لا
قدر::شو خل احجي وياها انه .
_كتبتلها قدر.
قدر::ترى طارق حباب صدكيني بس هو عصبي
حاولي تكسبينه شوفي شنو الي يفرحه اتقربي منه
راح يعيشج ملكة.
_باوعت لقدر صفنت صحت بيها شكو
مدت نقالها باوعت،، مديحه سألتها كليلي شيحب.
قدر::بله هاي شحجي وياها.
_اي عادي سؤالها .
قدر::هاج انتي كتبيلها يحب تصيرين اله صاحب يوميه خل ياخذج اكلو ازبري ، تابعو فلم رعب وطبخيله تمن احمر ،، ها ويحب البيض عيون .
_كتبتلها شويه وردت بسؤال صفني .
مديحه::بعدج تحبينه ؟
_بسرعه قدر جرت النقال مني كتبتلها ،
قدر::أي احبه أبن عمي واخوي وصديقي
ترى حتى فاروق رغم هو سبب موت امي هم احبه
ومااكره فاطمة .
_دزتها وشمرت النقال وكامت مديحه بعد ماردت
وهيج يخلص وقتي،،،، بين تقلبات قدر وخوفي على
مديحه لليل انه حسبه تجيبني،،،، وحسبه توديني
دك نقالي باوعت رقم الباشا مالي خلك سوالفه
ضل يدك تالي دز رسالة.
الباشا::اذا اجيت اهلس اعطوبج ردي.
_دك رديت ها خير ؟
الباشا::شوكت ترجعين لبيتج ؟
_ليش ؟
الباشا::تجاوبيني بسؤال .
_اي غير اعرف ليش تسأل رايد شي؟
الباشا::لا بس اكول شوكت ترجعين؟
_ماعرف شوكت ويجوز ماارجع ابقى يم اختي.
الباشا::موكيفج،، وخلي ابالج لو ماقدر ماخليج
ومن باجر تكولين لثابت اروح لبيتي واجي بالنهار
_وهذا أمر تعليمات ؟
الباشا::شتعتبرينه بكيفج .
_شوف باشا اذا قبل مفكرة بعد ماشفت اهلك
ودخلت بيتهم تراجعت هواي لان مستحيل نرهم
الباشا::وانتي منو عاتب عليج تفكرين؟
_سديت الخط وشمرت النقال تعبني ماجاي يتقبل
الأمر مليت من هل وضع ،،،، كافي ياسونه خلص
اعتبري حلم وماتحقق بس تتحسن قدر ابيع بيتي
واطلع من المحافظه كلها احجي ويا روحي
والجرس دك وماتعبت نفسي بالتخمين ادري
هوه وكالعادة ثابت فتحله الباب طلعت لكيته
كاعد بالصالة .وثابت يحجي ويا .
ثابت::وتالي وياك .
الباشا::جاي اخذ زوجتي خو ماكو مشكلة ؟
ثابت::وين تاخذها ؟
الباشا::لبيتها اضن حقي زوجتي وبكيفي .
_التفت ثابت يباوعلي دنكت محتارة،، كام الباشا واشرلي تبعته للحديقه .
الباشا::شوفي ولج انه على اخري وهل تلعوس
ابد ما يعجبني ،،مادامج على ذمتي تمشين بكلامي.
_باوعتله صوته ناصي بس يحجي بعصبية
طلع باكيته شعل جكارة ،،التفت يريد يكعد
عرفت رجليه تأذي سند العكازة وكعد
الباشا::سوالف التزعطط مالي خلكهن بالاخص
هسه لان بالي مشغول بالف سالفه تمشين عدل
احسن ليش تجبريني اذيج .
_اكثر من هيج اذيه ؟ رفع رأسه باوعلي.
الباشا::شمسويلج كولي اريد نجمه من السماء
اذا ماجبتها عاتبيني لاتستغلين حبي طلبتي أعلن
زواجنا وكتلج انطيني مجال
_حجيت بعبرة ،، وهسه غيرت رأيي مااريدك
تعلن شي خلص كلمن يروح لحاله ،، خليت ايدي على وجهي وبجيت تقرب جرني عليه .
الباشا::ليش غير أفهم شبيج ماتكليلي
ولج جاي اكلج احبج .
_يحجي ويبوس بوجهي حظن راسي لصدرة.
الباشا::انه ادري الطنگورة الخميس
بس انتي كل وقتج هيج.
_صعب يتقبلوني ؟
الباشا::اهم شي انه قابل نعيش انه وياج
بعالم لوحدنا ،، خرب روحج شكد مشتاقلج.
_ترى نسولف مو استغليت الوضع.
الباشا::الحياة فرص،،خرب شكلج
شكد احبج .
_وخر يا نوب تريد تنومني هنا .
الباشا::ولج لادفعين ترى رجليه مأذياتني
نوب اليوم خلصتها فرة،،شو بله خل اشوف
شعرج صابغته .
_جر الشال وفتح شعري .
الباشا::حلو عليج هذا الون إم اعطوب محلوة
هيج فراگي يطيحلج ؟ شو انه طار النوم من عيني.
_ترى شعري المصبوغ مو رگبتي ،، ضحك
وجرني لحظنه يشم بيه .
الباشا::شوكت ترحين لبيتج.
_قطع حديثنا صوت الباب كمزت وهو
كام مستغرب ،، ردت امشي لزم ايدي.
الباشا::شبيج خايفه شكو؟
_خاف احد يشوفنا ؟
الباشا::دبقي هنا خل اشوف منو.احتمال مولي
لان اخذ سيارتي راح للا سواق .
_راح فتح الباب احس گلبي وكف من دخل أبو
باوعله مدري شنو حجى ويا ،،بقو ثواني يحجون
تمنيت اكدر اختفي،،التفتت اريد مكان اختل بي نوب اضويه الكراج كلها مشتعله تحركت
اريد افتر ورا المشاي وكفني صوت الحجي .
أبو اسعد::تضمين نفسج مني
بس الله ماينضم عنه شي .
_تقدم متوجه عليه احس رجلي كامن وحده
اطك بالثانيه ،،وصل يمي وهو يحجي .
أبو اسعد::بله هو غاسل ايدي منه ،، لاخجل ولااحترام ،،بس انتي يابنتي المفروض تحترمين
صاحب البيت..
الباشا::يابه بس خل افهمك دمشينا جوى
ترى فاهم الموضوع غلط .
_مااهتم لكلام الباشا ،،رد موجه كلامه الي
احس عركت تمنيت الكاع تنشك وتبلعني .
أبو اسعد::احترمناج ودخلناج بنصنا،ليش
تخونينا،، مافكرتي بسمعة اختج وسمعتنا.
_دنكت فشلانه ماسيطرت على شهكتي
دموعي نزلت مثل المطر كلامه حيل اذاني
تمنيت لو احد ينقذني من هل موقف .
أبو اسعد::اكراما لقدر راح
اسكت بس بعد مالج بقاء بينا .
_رفعت راسي باوعت الباشا تقدم صار بصفي
لزم ايدي ورد على أبو .
الباشا:: شنو هل كلام يابة أفهم
ترى البنية زوجتي .
