رواية بيوت الصفيح الفصل السابع والعشرون بقلم زهراء السراي
السعادةُ ابنةُ الصبر
لا تُولد إلا من رحم الألم
.
.
.
.
.
.
.
.
غِنى
______
وبعد عمر من التعب اكتشفت
أن السعادة تأتي من عدة
مصادر وأهمها
العائلة
تفتر علينا بعيونها أيمن وآني
وحمادة سانديها بمخدات وتكركر
بشعراتها الشگر الطايرة
والسن الواحد اللي طالعلها
اشرلها أيمن
-تعااااي ريري تعاااااي
تباوعله صفح وتغلس
اني اصيحها تضرب أيدي
حمادة يقلدنا
-رررريري تعاي تعاي
شمرت نفسها بين ايدي
وتفتح شفافها عود تبوسه
يگعد يمها تخلي راسها على رجله
حتى يباوعلها ينزل راسه يبوسها
ويرجع للتلفون يباوع
عيني من أيمن گعد على جهة
وعينة بالتلفون يشوف الأخبار
كعدت بصفه اباوع ويا
-الوضع ميطمننننن الوباء راح يوصل
-لا ياساتر شبيك تفائل
-متفائل بس الوضع يخوف لاااازم
يرجعون مسافرينا اللي بالدول المصابة
وراح ينتشر
-حبيبي گول ياالله
-ياالله حبيبتي گومي بس سويلي
كوب جاي اطلع للمكتب الجماعة
فايرة اعصابهم يگولون بس ينتشر
الوباء يتوقف رزقنا خايفين
عالفلوس بس الارواح لا عاااادي طززز
بيها
گمت ولحگني للمطبخ شرب جايه
وطلع للباب صحتله
-نوووووومي
-حفاظات وحليب بعد روووحي
-وحلويات وحبشكلات
وسريلاك بالرز والعسل
-وبعد شيييب ابوي
-الله يرحمه بس لا بعد وياك
معجنات للعزيمة اللي بمدرسة
حمادة ماالحگ اسوي
وجيب وياك قطع كيك هم
-احترگ ابوج
-بعد رووووحي
ضحك شمرلي بوسة بالهوا وراح
مشيت للغرفة باوعت رحمة غافية
على رجل حمادة وايده الصغيرة
يحركها بشعرها بهدوء ويتابع
بالتلفون درس انجليزي يتعلم
شلتها من حضنه مدلي وجهه
ابوسه بسته وعضيت خدوده
مسح خده وضحك
خليتها بفراشها وتمددت وياها
متغدين ومرتاحين حمادة گبالي
تعب طفى التلفون وباوعلي بعيونه
الحلوة عرفت شيريد
فتحت ايدي واجاني نام بحضني
بسته وايدي تلعب بشعره
-حمادة تحبني
-احبج وأحب ريري
-وبابا
-وبابا ورهومة
غط راسة بحضني وبده يغفى
نام وتركته هو واخته وطلعت للبيت
اعزل من المطبخ للحمامات
للصالة لغرفة حمادة كملتها ووكعت
عيني على صورتنا معلگة اني شايله
رحمة وأيمن حاضن حمادة وكلنا
لابسين أبيض ابتسمت على هالذكرى
الحلوة من عمر رحمة شهر
گعدت عالسرير وفتحت تلفوني اطلع
صور من ذيج الأيام ابتسمت على كل
ذكرى حلوة وصعبة مرت بهالأيام
ورجعت لذيج الأيام بولادتي
بعد مراحت صِبى والبنات رهام
محصلت أجازة حتى تنزل وتورطت
لوحدي ويه الطفلة رغم أيمن موجود
بس موسم سياحة وميلحگ يجي بالنهار
يادوب بالليل محتاسة بالطفلة وحمادة
بده دوامه أحس جاي ادور بحلقة مفرغة
ارضعها وأجهز واعقم لرضعاتها الجاية
لأن مترضع مني رفضتني وبقت عالحليب
الصناعي
اغسللها اغيرلها ومرات يادوب اكل ضعفت
اكثر من المعتاد بالليل أيمن يساعدني
بس اني اكتئاب مابعد الولادة رافقني
وبس ابجي لحد ما انتبهلي أيمن ادخل
بالحمام ابجي واطلع مغسلة اريد
اكون گد المسؤولية بس ماجاي
اگدر أحس اضوج من صوت رحمة
ومرات انقهر لأن مااحس بشي تجاهه
ومرات من گد شعوري الغامر ناحيتها
اتمنى ارجعها لداخل بطني
شعور متضارب حتى أيمن أضوج منه
مرات وابتعد عنه وهو ينطيني مساحتي
عبالة الموضوع موضوع تعب جسدي وبس
الى أن بمرة أنهاريت من صوت رحمة وبجيها
وصوت حمادة يصيح ننة أريد كيكة سويلي
وأيمن مشغول بالتلفون لا ارادياً گمت اعيط
-اششششش اشششش سكتووووو كلكم
كافييييييييي
حمادة انهزم لغرفته ورحمة زادت بجي
وأيمن رفعها لحضنة واني تركت الغرفة كلها
وصعدت فوگ السطح للمخزن گعدت أبجي
وأبجي لمدة نص ساعة وشفت أيمن مقبل عليه
بدون كلام گومني نزلنا للغرفة رحمة بسريرها نايمة
وحمادة بغرفته
تمدد عالسرير وغمرني بحضنه
-شبيج حبيبتي
صايرة ساكتة وعيونج الحلوات
مو مثل قبل
حتى حضنج مو نفسه شبيج حبيبتي
بعدت راسي عن صدره ورجعه بهدوء
وهو يمسح على شعري
نزلت دموعي ورديت بصوت متكسر
- ما أدري أيمن
أحس كل شي ثگيل
حتى نفسي ما جاي أفرح بشي
وتتخايلي أشياء واحس بأشياء مااريد
أحسها
گعد وگعدني ويا سند ظهري لصدره
وحاوط اكتافي بهدوء
-ليش تفكرين لوحدج أني يمج
وأعرف هذا مو تعب عادي بعد الولادة
تصير هيج أشياء مو عيب ولا ضعف ليش
تضمين عليه هيج مخاوف
نزلت دموعي وبجيت بسكوت ضمني لصدره
وايده حاوطت خصري
-لتخافين كل شي تمام بس طلبي
مساعدتي اني يمج
-احس نفسي جاي اغرگ
-مراح اخليج تغرگين
وين غنوة البطلة اللي جابتلي هالفصعونة
الصغيرة وقاومت الوحام وثقل الحمل
وين غنوة اللي گالت اني راح اكووون احسن ام
بالدنيا
التفتت وغرست وجهي بصدره وبجيت
بحرگة وهو يربت على كتفي ويمسح على ظهري بخفة
-اني آسسسفة مجاي اگدر اصير الأم اللي
تحتاجهت بنتي
- اششش لا تعتذرين إنتِ أم عظيمة حتى لو تعبانة تبقين احسن أم واجمل زوجة وافضل حبيبة
-أيمن اوعدني إذا يوم من الأيام تعبت
وضعت رجعني الك ولأطفالنا لأني خايفة
- أوعدج غنوة كل مرة تضيعين اني
أكون خارطة الطريق إلج عيوني محطاتج
وصدري أستراحتج
غفيت بعد هالوعد وصحيت على صوت
رحمة وهو ياخذهة يسكتها
-اششش باباتي خلي الخبلة نايمة
بس تسمعج تطلع انيابها وگرونها
-اي مو اني بقرة
-احلى بقررررة نامي بعد روحي
ضحك وجابها لحضني والرضعة بيده
اخذتهت أباوع لملامحها الناعمة وحركة
اصابعها وهي تتمسك بأيدي
-ياروووحي ياماما
باس راسي وطلع تاركني وياها
من هاليوم صار يساعدني وميتركني
الا وقت شغلة ويحاول يرجع من
وقت
اتصالي دائم بأخواتي وهالشي
خفف عني بديت أتعود يوم بعد
يوم لحد مبدت تنشنش وتبين ملامحها
اكثر وأكثر بعمر الشهر صورنا صورة
عائلية وبعمر الشهرين بدينا نطلع
بيها بره البيت
بعمر الثلث أشهر احلوت والاربع أشهر
صارت نسخة مُنى بطفولتها
اني تعودت وكل شي گعد بمكانه
رحت مرتين للبنات
بهالأشهر الخمسة لأن أخاف على
رحمة من الطريق والتعب
بيدي التلفون وفزيت من ذكرياتي
عالنغمة أسم أيمن نور الشاشة
-ها حبيبي
-أم حمادة شو مشتهي مسگوف
-لباجر
-لا هسه للعشه
-صدگ تحجي
-والله
-صخاااااام اذا صدگ
-شكوووو شصار
-جاي تخوووووني أيمن
-شصاااار ياخيانة
-ولك أيمممممممن حامل من غيري وتتوحم
على مسگوف
-طيح الله حظج
-شكراً ياخاين
-جايييج ياخبلة
-تتدلل على باجر للغده أحلى مسگوف
لعيونك تمام
-تمام يلاحبيبتي وراي شغل
سد التلفون واختفى لليل رجع
بين عشه وترتيب ونوم الاولاد
رحتله للصالة ساد الباب لگيت
الصالة مدخنة وگفت يمه أباوع
الباكيت خلصان ومبلش بالثاني
-شبيك ياعيوني
-مااعرف ابد ما مطمأن للوضع
-شو اني هم خفت منتشر الفايروس
بشكل جبير
-الصينين ياكلون زواحف واحنه نوگع بيها
-بلكي يارب ميوصلنا
-يوصل المسافرين جاي يرجعون
واكيد لاگفين اصابات
-الله كريم عيوني
سحبت الجگارة منه طفيتها
-گوم سويلي شامية مالحة
-هاااااه ياالله تتوحمين
-اي حتى ولادتنا تصادف سوة
اني وانت ابو المسگوووووف
كفخني وهو گايم رحنة للمطبخ
وگعد يسويلي الشامية خلاها عالميز
وگمنا ناكل ونتذكر شغلات قديمة
بأيامنا اللي مضت
-تتذكرين مرة من دخلنا اني وياج گروب
والادمن اللوگي گلج اريدج ادمونه ويايه
-ايييي حرامات هذا حسابي شگد احبه تهكر
مدري شبي انسد
-اي جان حساب حلو اني هكرته
-كذااااااب
-والله بوقتها ستوني بادي احبج
ومااگدر اتلطلط گدامج وأستخف
گمت هكرتج وطلعت الولد بنظرج
گ***د
-هههههههههههه حتى حبك معووووق
المهم اسمع
-گولي
-تتذكر زهرة الياسمين
-شلوووون مااتذكرها دزتلي رزالة بعدين حظرتني
رغم اني شگد محترمها
-اييييي حبيبي هاي اني شگلتلها
گالت اني حيل احب أيمن واحسن صديق اليه
هوووو
-يابربوگ شسويتي
-جنت صديقتك واغااااار تصادق غيري
گلتلها أيمن يلعب عالبنات بالبداية بحجة الصداقة
وبعدين يدور سوالف
-سوالفيش
-حبشكلات ادبسزية
اني گلت هيج وهو لحگني راكض يعيط
-ياااااااابنت الكلب
-لتغلط ولك
وصلت للهول ولگفني كفخني تكفخ
-كاااافي يمممممه راح اموت
ضحك وحضني
-يلا طايحتلج هايه السالفة لأن تزوجتج بعد
-غصباً عليك
ضربني كله بصماخه ورجعنا ناكل
باوعتله مبتسم عرفته جاي يفكر بشي
-احجي بيش تفكر
-اذا انتشر الفايروس اكيد
تتوقف الحياة مثل الصين
اگول ليش منسويلنا طفل ثاني
نتونس علي وانت بالحمل كلش
تضحكين والله فرجة ببلاش
-كملت سوالف
-اي
-روح نام حبيبي وتغطى زين
-ولجججججج شنو قصدج
-اقصد حبيبي هاي نايم مكشف بدون
غطى لذلك تجيك هيج احلام
-معفنة
-معفن
-ولج
-ولك
-غنيييييييوة
-نومي
گلتها بمياعة وهو ضحك شالني
للغرفة
تمددنا نسولف لحد مااخذنا النوم
وصار اللي صار فعلا ومثل ماتخيل أيمن
بدت الاصابات عدنا وانطلقت من النجف
من طالب ايراني يدرس هنا
والمسافرين اللي رجعو بدت الأصابات
تزيد وخوفنا الاكبر عالاطفال
وخصوصاً هم حمادة عندة فتحة بالقلب
وميتحمل
ورحمة ولادة مبكرة وصغيرة وماعدها مناعة
لذلك أيمن اتصل بالبنات لأن اطفالهن هوايه
ويختلطون گاللهم اني اجي ازوركم حتى محد
يزعل واني بقيت عالاتصال ويه البنات
شهر على شهر زادت الحالات وأنتشر المرض
بشكل واسع وبشهر الثالث انطلق أول حظر
تجوال بالعراق البلد قبلها بأشهر جان
يمر بأزمة حزينة وفترة الثورة تركت
أثر عميق بگلوبنا
ووراها مباشرة صدمة الفايروس
النفسية متحطمة والخوف ملة گلبنا
جنت خايفة على اولادي وأيمن واخواتي
وسومة وكل احبابنا
كل يوم اتصل بالكل حتى اتأكد من سلامتهم
وأيمن بوجودة يحاول يخفف عنا
كل يوم مسويلنا لعبة لو نشاط حتى
نتحرك ومنضوج
الكل صار ببيته ومحد يطلع أيمن
من يروح يتسوگ اعقمه وهو طالع من فوك
ليجوه
وبالرجعة كذلك يغسل ويبدل ويتعقم بالحمام
البره يلا
وهيج انرفع الحظر بحجة تمت السيطرة
على الحالات المنتشرة ورجع الوضع تأزم
وصار الانتشار مرعب والأيام صارت تمشي
ثگيلة مخيفة
السياحة توقفت الطرق انسدت المدارس
صارت الكترونية ونسينا حياتنا القديمة
وبعز هالأزمة صار شي ممتوقعته
لمدة أيام أني الم بصدري وممرتاحة
بيوم گعدت على الآم عميقة متنحمل
من خوفي گعدت أفحص گدام المراية
واتفاجأ بثلث كتل جبيرة تحت الأبط
وبالصدر ويه ألتهاب جلدي واحمرار
من خوفي نفيت الفكرة وابعدتها عن
مخيلتي وكعدت ابرر لنفسي اني أهوجس
وخايفة من شي مموجود أصلاً
اسبوع على هالحال من التفكير بطلت الاكل
والنوم لحد ما أيمن وبحركة يتشاقه وغير
مقصودة طخني وعطت لحضتها بهت بوجهي
وصفن
-أذيتج
هزيت راسي بالرفض
-ليش تبجيييين
-أيمن
مجرد مانطقتها نزلت دموعي وهو هز راسه خايف
-شصاير
-يمكن ……
-شنووووو
تقدملي مگعدني عالسرير
-شبيييج غنوووة شجاج
-يمكن عندي ورم بالصدر
نطقت الجملة مرة وحدة حتى أرتاح
صفن لدقايق بوجهي
-مافهمت
وتحول خوفي على نفسي لخوف علي
وهو مستغرب وصافن وممصدگ
-اكو ثلث كتل جبيرة بصدري
حضني بقوة وسكتنا احنة الأثنين
لدقايق صامتين
-نروح للدكتور
-اخاف عالاطفال مااطلع
-اخذهم ومااخلي احد يتقربلهم
حمادة البسة كمامة وكفوف ورحمة بحضني
-اخاف ………
-منين خايفة ولج انت عرمة وحتى الورم يخاف منج
جرني ويا وكفنا
-لبسي ولبسي الجهال يلا بين مااجري أتصالاتي
حتى أشوفلي حجز يم دكتورتج
وبين الاتصالات والقطوعات وكل شويه
موقفينا وصلنا الدكتورة دخلت جنت
خايفة من اللي راح أسمعه وبعد كلامي
وياها عن الاعراض بدت فحص
يدوي نظرتها جانت قلقة وبعدها
حولتني للسونار خلصت وگعدنا
نحجي
-مااكذب عليج كتل اورام وتليفات بعمق
الثدي الأيمن وتحت الأبط
نزل عليه السكون وهي تشرحلي
لحد مااستوعبت
-شنسوي دكتورة
-منگدر نرفعهن نهائياً ولا نتحرك قيد
شعرة الا بعد الخزعة
حسيت بلحظتها وكأني جاي
اغرگ وماكو ايد تسحبني وتطمني
غيره استأذنت ودخل أيمن
خلا رحمة بيدي وحمادة بحضنه
وحجتله الدكتورة كل شي
مسمعت بصوته غير نبرة الاطمئنان
وهو يرد عالدكتورة
-شنسوي
-خزعة وبأسرع وقت وأنصحححكم
بالمستشفى الاهلية نفسها اللي ولدتها
بيها المستشفى ميستقبل اي مصابين
ومعقمة ومهيأة بالكامل
كل شي جان مشوش والكلام
اللي دار بين أيمن وبينها
مفهمته جان مبهم من شدة
توهاني وتفكيري باللي ممكن يصير
طلعنا وهي تنطي أيمن اوراق واشياء
يفهمني عليها بالبيت
طول الطريق الصمت مسيطر
وصلنا البيت بديت بالتعقيم كل شي
تعقم وتنظف لحد ماارتاحيت
عشيت الاطفال ونامو بعد مارضعت
رحمة رضعتها
أيمن اختفى طلعت على صوته وهو يصيح
-تفووووتج ركضي
مشيتله بسرعة گاعد بالصالة مشغل
الصوبة النفطية مخلي عليها بلوط
و كستناء يحمصهم ودلة الگهوة الصغيرة
على جهة
-تفوووتج الأجواء
-الريحة تجنن
-شوووفي اعرف شلون اصيدج ام
بطن
سحبني وگعدت يمه طگطگت البلوطة
ونزلها بالصحن گشرها وخلاها بيدي
-املي كرررشج مدام أيمن عايش
سندت راسي على كتفه اكل
غصيت بعبرتي ونزلت دموعي
وكتمت شهگاتي وهزة جسمي
بسبب بكائي فضحتني
استدار وحضني قوي
-هي هاي غِنى القووووية وبعدين ماكو
شي اني مطمأن وگلبي بارد
بصوت مخنوگ وحزن اثقل صدري
رديت
-ما أتخيل المستشفى ولا غرفة العمليات
ولا حتى صوت الأجهزة اللي تصير مثل العداد التنازلي
لعمري
-ليش منجي نتخيل شي ثاني تتخيلين النتيجة سليمة تتخيلين نرجع للبيت نضحك عالخوف اللي خايفينه هسه نحتفل مثل المجانين لأن واجهنا خوف ماله مبرر وها اني من هسسسه اكيد الف بالمية النتيجة سليمة
-وإذا مجانت سليمة
أذا الجواب جان هو الشي اللي أخافه هسه
رد علية بنبرة ثابتة وهادئة
-إذا جان اللي خايفة منه وان شااااااء الله واني على ثقة ماكو شي بس بالحالتين راح أكون أول واحد يلبس درع ويوگف يحارب وياج حتى لو هالحرب وهمية واحنه لأن خايفين نفترضها
-تخيلتك تنهزم وتخيلت تتخلى عني
كفخني وضحك
-كافي تتخيلين حبيبتي أني وياج مو لأنج بخير ولا لأنج شابة ولا علمود اموال مرحوم عامر الله يلحمه
ضحكت وهو كمل يحجي جد
- أني وياج لأنج أنتِ واللي يحب ما يختار الظروف يختار الإنسان بكل حالاته
رفعت راسي من صدره وباوعتله مبتسمة
بحزن
-راح تكون وياي وتلزم ايدي وقت
خوفي وتعبي
-الزمها وابوسها واحضنها
سحب ايدي باسها
-باجر نروح من الصبح للمستشفى
-والجهال
-ويانه الغرفة معقمة مراح اخلي شخص يلمسهم
-تتعب وياهم
-تهون
بكل هالازمة مابلغت أخواتي
فاللي جاي تمر بي صِبى كافي
مر هاليوم بقلق وأرق من التفكير
للصبح طلعنا للمستشفى
وبعد اجراءات وشغلات
دخلت وللمرة الثالثة غرفة العمليات
التخدير جان موضعي وطلع الموضوع أهون
من تفكيري للمغرب طلعوني للبيت
ومنا بديت مرحلة الخوف ولهالسبب
أرتفعت حرارتي بشكل مخيف
هالشي خله أيمن ملازمني واحتار
بيني وبين الاطفال وهنا اكتشفت
أن اختياري هو الصح أيمن بكل أزماتي
وگفلي وميمل ولا يتذمر
نامو بليلتها الأطفال واني أجفاني رفضت
أن تغمض اجاني گعد يمي عالسرير وبيده
كوب خلا بين ايدبه بهدوء
اشربي شويه راح يهديج وتنامين شويه
اخذت الكوب ايدي ترجف حاولت ابتسم بس عيني غدرتني ونزلت دموعي
-ما راح يهدي الخوف اللي بگلبي أيمن
مااعتقد كوب بابونج يهدي عواصف افكاري
-شبيج خايفة لهالدرجة
-أيمن انت مستوعب تدري شنو يعني خزعة يعني احتمال احتمال أني عندي بالسرطان
احتمال تتغير حياتي
احتمال أموت
بسرعة خله ايده على شفافي يسكتني
-اشششش ماكو شي والله سكتي كافي
حرك راسه بالرفض قرب مني ولف ايده حواليه حضني
-لا تحجين هيج لا تخلين الخوف يسبق النتيجة أني وياج بكل شي بكل احتمال
بكل وجع بس إذا ظليتي تفكرين راح تربيلج علة
ثانية وتتمرضين زيادة
-شلوون أيمن خاف سر………
قاطعني ويحجي بجدية
-اذا تفكرين هيج راح تظلين سجينة الشك
والشك يأذيج اكثر من أي مرض حبيبتي
خلي ببالج أن نگدر نتجاوز كل شي اني
وياج
-وأذا طلعت النتيجة مو زينة
اخذني لصدره ساندني ويمسح على شعري بهدوء
-نحارب نضحك نبجي ننتصر وراح نكمل مهما كانت النتيجة انتي مو وحدج ابد
حاوطته ودسيت راسي بصدرة وبجيت بهدوء
وهو ساكن محاوطني بأهتمامه وحضنه الدافي
اللي صارلي ملجأ من الخوف
يومين لخ مرو من الانتظار وأجانه أتصال الدكتورة
الترقب والخوف وكل شي تجمع بهاللحظات
رحت واني مخلية گدامي كل الاحتمالات ومثل مگال أيمن
-نخلي گدامنا كل الاحتمالات بس نسبقهن برحمة
رب العالمين ولطفه وكرمه تمام
دخلنا العيادة وجه الدكتورة جان طبيعي
گعدنة گبالهه وضحكت
-الحمدلله عالسلامة خوفناج صح بس ردنا نتأكد
ايمن ضغط على ايدي واني تنفست براحة
-الغدد طبيعيات من نسيج الثدي وحميدات
بس لازم نرفعهم تمام
هزيت راسي وعيوني مابطلت الدموع
-ماما لتخافين لازم جان نسوي هالاجراء حتى
نتأكد لسلامتج
-يمتى نرفعهن دكتورة
-تاخذ هالعلاج لمدة أسبوعين يزيل الالتهابات
بعدها ان شاء الله نفحص ونحدد الموعد
-خير ان شاء الله
رجعنا للبيت بعد مااخذنا العلاج الفرحة
تشع من حوالينا واحس حتى انفاسنا أنتظمت
دخلنا أيمن للبيت وطلع ورجع بعد نص ساعة
بكمية جُكليت عملاقة جان يضحك وهو يرشها
حواليه وحمادة يگمز ورحمة لأن أحنه نضحك هي
تضحك
حضني يفتر بية فرحان
باسني بسرعة وهمس
-الحمد لله عالسلامة غنوة
-حبيبي
حضنته واستقرت حياتي
وره اسبوعين بالتمام تمت العملية
الحمد لله وجانت تقريبا سهلة
الكل حواليه لكن بالأتصال
خوفاً من المرض اخواتي سومة
اخوات أيمن الاصدقاء
ومرت أيام الجائحة وللأسف أنصابينا
كلنا بس الحمدلله كل شي عده سلامات
رغم التعب والمرض لكن أيمن جان
مثل مافعلا گال
-أني درعج بوقت القتال وراحتج
بوقت التعب
مرت أيامي ويا بسعادة مثل ماوصفلي
ووعدني بأول يوم خطوبتنا جان گد الكلمة
حالياً سنة ٢٠٢٢ الجائحة صارت أخف وتقريباً
الحياة رجعت لطبيعتها
واگفين أني واخواتي وسومة والمحبين
اللي عزمناهم بصالة سومة نحتفل
بعيد ميلاد رحمة واگفة بفستناها المنفوش
تصفگ لسانها الطويل جايبلنا الحجي
تأشر لسومة تسميها ديده
-ديدة هدية دب كبييييير
اشرتلها سومة على عيونها
-تتدللين يابعد ديده
شمرت نفسها لحضنها
تركتها خالاتها محاوطاتها وتگمز بينهم وبين
قمر والشباب وطلعت بره ادور علي
كالعادة لگيته يم المرجوحة يدخن
سحبت الجگارة دخنت شويه أبتسملي
اخذها مني طفاها وشمرها وسحبني حضني
-تتذكرين بوقت تنظيف البيت قبل لتشيلون
بي
-اممممم اتذكر قبل سنين
-هالحركة سببت حرگة بگلبي وگلت هالبربوگ
ماافوتها الا اخذها
ضحكت على كلمته وضربته بجبيني على جبينه
-ماندمت لأن اختاريتني
- أحلى قرار اخذتة بحياتي
إني اختاريتج مو لأنج مثالية بالعكس جنتي خبلة مليانة عقد وكلاكيع
اختاريتج لأن جنتي حقيقية بيج قوة رغم الوجع
خلتج توگفين بكل عنفوان وبأي ضرف
خللت كفي بكفة وابتسمت
- واني ماندمت ولا لحظة حتى بوقت الألم والخذلان والتعب لأن وياك حتى التعب يصير أهون
والضياع يصير وجود أحبك لأنك انت وبقيت انت رغم انك اجلح وأسود ودبس بس الدبس مالتي والاجلح الخاص بگلبي
نقر على خشمي وضحك
-اذا ندمان فعلى شي واحد لأن مااخذتج
من وقت جان هسه عدنة ٩ اطفال
ضحكت علي سندت راسي على كتفة
- ما ندمت ولا راح أندم
كل شي صار حتى الغلطات قادتني إلك
وهاي أعظم هدية من رب العالمين
رغم فسادك وسوالفك المكسرة
كفخني واستمر يشرحلي مدى سعادته بوجودي
بحياته
سكت واني رافعخ راسي أباوعله
شمس الغروب تضرب على ملامحه الحلوة
لحيته وسمارة ورصعة فكة
بستها مثل كل مرة وغمر راسه حاضني بهدوء
هذا أيمن الأنسان اللي حبني بفقري
وتعبي وعقدي النفسية من الرجال
أيمن اللي بكل مرة يختارني ويبيع الدنيا
يستحق لقب الرجل الأجمل بحياتي
لقب زوجي وحبيبي وفارس الأحلام
.
.
.
.
.
.
.
.
مُنى
________
جمال الحياة ما يكتمل إلا بوجود گلب نرتاح له
نبجي ونضحك ويا
نحجيله تعبنا وما نخاف من ضعفنا گدامه
الاستقرار الحقيقي مو ببيت ولا بفلوس
هو بواحد تحس ويا وجوده إنك بخير
حتى لو الدنيا تعب
مع الحبيب اللي يفهمك من نظرة
ويحضنك وكأن الدنيا كلها صارت أمان
تصير الحياة بوجودة أبسط وأجمل وأحن
٢٠٢٢ : الشهر الثالث
واگفة عالمرايا أعدل حجابي
رتبته وجاي أخلي الدنابيس
اباوعله گام من السرير راكضلي
ورفعني لحضنه
-وييييين ياحلوووو
-دوام حضوري اليوم ردت اكمل واگعدك
تاخذني
ايده الوقحة تفتح دگم السترة
والثانية تسحب بالحجاب
-يبووووووو راح أنتحر
-مشتاقلج شبيج
گالها ودس راسه بنحري يدغدغني
ضحكت حيل مثل كل مرة وهو ضحك
-انفضحنا بطة
افتريت صرت بين ايدي
-بطل تسوي هالحركة تدري بيه اتدغدغ
-واني أموووت على هالمكان
گالهه ورجع نفس الشي تنفس بعمق وابتعد
على دگة الباب وصوت قمر
-ولج تأخرررررنا گعدي خالو
رفعلي حاجبه واجه يبوس بوجهي
ويهمس
-متدري بخالو غاط بالعسسسل
-أبو الدبگ ودينه اليوم حضوري حباب
-علم النفسسس ماشايف خبلات يدرسن
علم النفس
-من وراااااك دخلتا اريد افهم شخصيتك حيرتني
-امممممم غامممممض
غمزلي وتوجه للحمام غسل وطلع
لبس واشرلي عالحمرة
-اللون طوخ
-والله وردي فاتح
-ميخالف مسحي
نقاش كل يوم واطلع خاسرة
-من عيووووني يلا حبيبي البس كمامتك
-ماااريد
-البسهة عيوني احسن
-الرجل الحديدي اني الوحيد اللي
ماانصبت بالفايروس
-اي عيوني لذلك اگلك البس كمامتك
-ما فكرتي باللقاح
-صارت عندي مناعة بعد اصابتي
مااحتاجه ويلا امشي قمر خبصتنا
نزلت ويا للسيارة لگيت الحجية
واگفة بالباب بيدها لفة
ضحكت واني ابوسها
-يمتى تتوقف اللفة بيبي
-لمن تكملين جامعتج
ودعتها وطلعنا قمر بباب السيارة
تلفونها على اذنها واكيد يتعاركون
-لاززززم أداوم شلون هو يومين حضوري
حتى زحمة من الاساتذة مااروح
يبوووو راح انتحرررر من وراك
ودعته وسدت التلفون وضربت جبينها
-بالله شورطني بالخطوبة اني
دخلنا السيارة ومثل كل مرة صاحت لأن
اني اگعد گدام
-ايييييييييه زمان الأمر العگروگ عالرگ
ولج المعفنة صرتي تگعدين گدام
التفتت لعبتلها حواجبي
-گاعدة يم زوووجي سر سعادتي
غمتني واحنة نمشي
-عود مُنى المعفنة تزوجت وصارت شخصية
التفتلها حمزة
-لا خالو ماكو شخصية خالج السبع ماسحها الها
مسح
-حممممممزة
-اميرررررتي
ضحكت قمر واحنه نراجع مادة الأمتحان
سويه وصلنا وراح
دخلنا الحضور قليل بعدهم
افترينا بالجامعة بدون كمامات شويه
تنفسنا علما دخلنا محاضراتنا وامتحنا
واتصلت بي ياخذنا
-ها حبيبي
-جايكم فقار ياخذكم
-تمام
طلعنا وية وصول فقار فتحت الباب قمر
وصعدت گدام واني وره
دارت وجها اليه متشمتة
-هاااااا رجعتي ليورة واني يم
زوجي سر سعادتي
وجه فقار المغيم اختلف بعد هالكلمة
وضحك عدل المرايا يحاجيني
-بربج مُنى ماتقنعيها نتزوج
-مااااريد هسه اريد تخلص الازمة
واسوي حفلة جبيييييرة بالقاعة
-خررررب بليسج لج صرت طرشي مخلل
من الانتظار دفضيها
-واهون عليك نتزوج سكيتي
-ليش سكيتي مثل زفة خالي حمزة
زواج حلو وكل شي على الاصول
باوعتله محتارة اني اعرف فكرتها
وأعرف شبيها بس مخليتها براحتها
تدور حجج وأسباب تتهرب من الزواج
وصلنا فقار وراح لگيت
الحجية بالمطبخ بملابسي
گعدت أساعدها وقمر وياي
خلصنا ودفعتنا
-انت قمر روحي ارتاحي
-وانت رجلج تعبان روحيه
صعدت لگيت التلفون على أذنه
وعصبي
-آية ترى مو حجي هذا اتفقنا عالتصميم ويه
الرجال بطلي ارتجال من يمج الفكرة
اللي طالبينها ننفذها
شويه وابتسم وكمل حديثه
-تمام هاي هي اشوفج ونتفق
سد الخط وباوعلي أحس حرگة
بمعدتي من يحاجيها
بدون كلام وحتى منتعارك تركته اخذت
ملابسي وطلعت للحمام سبحت بسرعة ورجعت
لگيتة مشغل الصوبة ومخلي المنشفة بصفه
سحبني اول مدخلت ورفع المنشفة المبللة
وگعد ينشف بالثانية
نشف شعري وگمت شلت المنشفة اعلگها
-شبيييج ام خشم
-مابيه تعبانة
-تعاي يمي
تمدد عالسرير ورحت بصفه حضني
وراسي على صدره يتنفس بهدوء
-شغل والله ليش تتحسسين
-مااحبها وانت تعرف
يعني اكو مهندسة تحاجي زميلها ب٣ بالليل
زوجها ميغار
-منفصلة
-صلوووووات وهذا مبرر لقلة الذوق
متگول زوجته تغار علي تضوج
-اذا اني الگمر بيدي شعليه بالنجوم
امتدت أيده محاوطة خصري وشفافه
تجولت على نحري بنسق هادئ
غمرني الدفو وهو يحضني وغطيت
بالنوم لوقت غير معلوم حسيت
بعدها بحركته ولحيته اللي تبزز
بنحري انطيته مساحته ينام مرتاح
وعيني منه اباوع لوجهه اللي أحبه
ايدي تجولت على وجناته لحيته
ورموشه ابتسمت على ذكرياتي
الماضية وذيج الأيام ورجعت بذاكرتي الها
.
.
.
.
بعد انتقالتنا يم سومة وولادة غنوة
والاحداث الحلوة اللي صارت داومنا
اني وقمر كل يوم حمزة يمر ياخذنا للدوام
بعد الدوام بين دراسة والبيت والروتين
كل يوم اكو ساعة نتواصل بيها اني
وحمزة هالساعة هايه خلال يومي بقت
مثل الركن الهادئ اللي انزوي بي
بعد التعب نسولف نتناقش نحجي
بكل شي وأي شي بأيامها جانت سنوية
خالتي و صِبى وبسبب مشاكل عدها
نست واني گلبي جان مشتاق هووايه
مشتاق لخالتي ولفرقد راسلني فتحت الرسالة
مارديت
رجع راسلني مارديت قبل جان من ماارد يزعل
ويحجي كلام يزعلني بس هسه تغير وصار
يتفهمني ويسألني اذا بيه شي من مارديت
سألني بكلمتين برسالة صوتية اتصل بيج
دزيتله اوك اتصل سألني
-بطة بيج شي
-سنوية خالتي والكل ناسي
-محد ناسي بس الكل تعبان صِبى بيهت اللي
مكفيها و غِنى مشغولة بحياتها وأولادها
-بس گلبييي ……
بجيت ومگدرت احجي
-شبي گلبج انطيج گلبي مكانه اذا تعب
رديت بصوت أحاول ادعي القوة
-اني عادي أگدر اواجه حزني بوحدي بس
يعني شويه اريد ينتبهولي
-كلهم عدهم اللي شاغلهم الدنيا ماشية
اعوج ويا الكل بس اني موجود احجيلي
-مااعرف أحس شعوري مخربط
-احجيلي واني اعدلج شعورج
واشيل عنج قساوة الدنيا
-تفهمني اني جنت طفلة فتعبر الاحداث
من خلالي مرور الكرام عبالي انساها
بس اكتشفت ان كل حدث مر بحياتي
ترك مكانة ندبة بداية بموت امي
وأني أصرخ أول صرخة بحياتي نهاية بوفاة
خالتي
-ماجنت ادري تحسين هالاحساس اني هم
مثل الكل عبالي ناسية كل شي لأن صغيرة
-لا غلطانين كلكم حسيت بوفاة فرقد
وكأن سجين حامي انتصف بنص گلبي
وشال منه جزء بس الكل انغمس بحزنه
ومحد من عدنه سأل الثاني عن شعوره
وبعدة خالتي اللي ربتني
جانت كل شي أم وخالة وصديقة
ما جنت أحس بالنقص وياها
بس هم الحياة ما تخلي فرحة تكمل
راحت مرضها خطفها بغمضة عين
واحس فد يوم فجأة صحيت وكل شي اختفى
-مُنى شايله كل هذا وحدج
هذا وجع عمر وانتي شايلته بگلبج الصغير من سنين
-تعرف مرات اگول ليش عشت كل هالخسارات
بهالعمر ليش كل أحد أحبه يموت لو يختفي
گمت أخاف أحب
أخاف أفقد احد
أخاف أفرح لأنه دائماً بعدها تجي صفعة ترجعني
ليوره
سكت شوية ونطقها بهدوء
-واني وين رحت
ومنا انطلقت ولأول مرة كشابة احجي شعوري
لشخص احملة مشاعر حقيقية
-انت تختلف بس……
-بس شنوو
-بس وياك صار احساسي بالخوف مضاعف
خوف من إني أخسرك
خوف من إني أفتحلك گلبي وانخذل ويرجع گلبي
ينكسر بغياب جديد
رد عليه بصوت واثق وهادئ يطمني
-مُنى أني مو الدنيا اللي ممكن تخذلج صدگي
وعيونج الحلوات مراح اكونلج بيوم
لا وجع ولا خسارة
أني حيل أتمنى أكون بداية لفصل جديد وحلو بحياتج مو صفحة ألم جديدة شتگولين تجربين تعيشين
وياي وبيه
-أخاف
-أمني وياي والله مراح تخسرين
همست بضعف
-اني ضعيفة ودائما خايفة
علّمني شلون أعيش بدون خوف
ضحك وهو يهمس
-بس خلي أيدج بيدي ونعيشها سوه
خطوة بخطوة
واعدني هالوعد واكتشفت ساعتها اني جاي
ارسم البداية وية حمزة
اللي بعد فترة اكتشفت ان الموعد اللي انطانيا
جان موعد خطوبة راد يتقدملي حسب كلام قمر
بس اللي صار بشهر العاشر من سنة ٢٠١٩
غير كل الخطط حمزة وكل شخص حر شريف
أنظم للشباب بساحات التظاهر جانت أيام
ثگيلة وحزينة مر بيها الشعب حزناً عالشباب
اللي راحو ثمن للصوت الحر فتأجلت كل امور
الحياة
وكالعادة بالأوطان اللي يستباح بيها دم الحرية
مقابل صوت الباطل انقمعت الثورة وسببت
حزن ثگيل على گلوبنا
رجعنا للدوام اني و صِبى نداوم والحياة
مشت بنسق ممل ورتابة صِبى وبسبب اللي
صار احسها عايشة مجرد تتنفس فقط
دائما حزينة وگلبها احسة مكسور اما
قمر مو مثل عادتها صارت اغلب وقتهة ساكتة
نتحارش بيها نحاول نطلعها من اللي صار
احيانا تنطلق واحيانا حتى ابتسامة متبتسم
كل يوم اني وحمزة نحجي بموضوع الدكتور
وهي رافضة الى أن صار اللي صار بيوم
واتصلت بيه ساعة ثلاثة بالليل تبجي وصوتها مختفي
-شبيجج قمورة
- مُنى اني گصيت أوردتي وهسسه ……
عطت بس سمعتها وعلى صوت عيطتي
گعدت صِبى
-قمررررر احجي
-خايفة اموت
گالتها وانسد الخط بنفس الثواني
صِبى اتصلت بأسد واني بحمزة
انخبصنا طول الفجر احنا وياهم عالخط
لحد ماطمنونا ان الجروح تتعالج والحمد لله
سطحية ببومها بقت بالمستشفى لليل
اخذتني صِبى هي وسومة ورحنالهم
ودخلت صِبى ويايه ألها شويه وطلعتني
نص ساعة وطلعت يمنه اني وحمزة وأسد
-حجيت وياها ضروري دكتور نفسي
ووافقت بس تتحسن تبدي وياها
ويارب يمها العافية
دخلتلها سلمت عليها وطلعت
اخذولهة اجازة لمدة أسبوع
واني وياها عالنت انطيها الدروس
لحد ماتحسنت وبدت من يومها بجلسات
العلاج النفسي اللي رافقها بيها حمزة وفقار
اغلب الوقت ومنها انطلقت شرارة اعجاب بينهم
احاديث طويلة ومكالمات مواساة
تهذبت بيها روح قمر وتحسنت نفسيتها
وبدت تسترجع روحهة القديمة
وصارت تتخلى عن ذكرياتها السيئة
ذكرى بعد الثانية الى أن توقفت عن الجلسات
وتحسنت
ببداية سنة ٢٠٢٠ دخلنا منعطف جديد
الجائحة اللي وقفت حياتنا
كورونا اللي شكلت جزء من ذاكرتنا بهالعامين
خوف ورعب ودراسة ألكترونية وعطل
طويلة واكتئاب الصدمة اللي سببته
للكل
بس رغم هذا هالسنة جانت بمثابة
حلقات وصل التحمت بيني وبين حمزة
سهراتنا الطويلة واحنه نحجي بكل شي
بلا ملل گروبنا احنه الأربعة اني ويا
وفقار وقمر اللي صاير ساحة قتال
مرة بينه وبينهم ومرة بيني وبينه
قراءة كتب سوية يساعدني
بالدروس اني وقمر واغلب الوقت
بموافقة صِبى ألى أن حان وقت الأمتحان
بالشهر التاسع بدة التوتر والخوف
والحمد لله بمساعدة الكل امتحنا
وخلصنا شهر ١٠ اول يوم بي أتصل بيه
حمزة جان صوته فرحان وسألني سؤال واحد
-موافقة تتزوجيني مُنى
صفنت لثواني ورديت
-أكيد أي
ضحك على ردي وشمر جملته بسرعة
-نفس التاريخ ١٠/١٠
ودعني وراح نص ساعة بعدها
واجتني صِبى للغرفة
-مُنى حبيبتي
ابتسمت باوعتلي رافعة حاجبها
-والله اني المستحية وانت واصلج الخبر قبلي
ابتسمت گعدت بصفي
-معليج بيه وبمشاكلي اني وأسد
اني أشوف حمزة مناسب ألج وانت يا معفنة ادري
بيج تحبي
-اذا هالشي يأثر عليج والله مااوافق
-انجبي اساساً أسد وحمزة متصلين بأيمن
وبأيام فتح الحظر راح يجون
وخلال ٩ أيام جهزنا تجهيز بسيط
مرتب فستان بنفسجي عدل
بكتف واحد واكسسوارات فضية
ترتيب نازك بسبب الوضع والحظر
الخطوبة مقتصرة على عوائلنا أحنه
بس بسبب حالة وفاة جانت عند أهل
حمزة وهم خوف من الفايروس بس اهله
واهلي وكم شخص قريب عليهم
بالليل قبل الخطوبة يحجي ويايه
وينطيني التعليمات
-تركي شعرج مفتوووح
لتخلين مكياج هوايه خلي وجهج ببراءته
-وبعد
-البعد عليه اني
ضحك ضحكة سخيفة وراح
اليوم الثاني جهزنا كل شي واني سشورت
شعري وخليت مكياج بسيط بالبيت
گعدة الرجال بالحديقة
والنساء بالصالة وبين صد ورد
وكلام تم الاتفاق وبدينة بخطوات العقد
صِبى يمي وعيونها الحلوة تلمع بدموعها
كملو العقد ودخل حمزة مااگدر أگول غير ان هو
طالع أمييير فعلا ابتسملي وگعد يمي
نسوي طقوس الخطوبة رغم حزن عائلته بس
احترمو فرحتي وفرحو ويايه وخصوصاً
الحجية جانت مبتسمة طول الحفلة بعد
تلبيس الحلقات وهالامور توجه الكل للتوزيعات
والضيافة وبعدها طلعو لبيوتهم وقمورة
الخبيثة تحوم حواليه
-هسسسة يجيج ابو گمزة بس يوصل الشيخ
وفعلا وصل الشيخ واتصل استأذن من صِبى
ودخل يمي للصالة باوعلي وفاتح ايده
رفعني فرني مثل الطفلة اني وفستاني
المنفوش
-بطوووووط
-ابو گمزة
گرصني من زندي وضحك
-اگلج بطة
-عيوني
-اااااااااخ
گالها وسرق من ثغري قبلة دافية
امتدت لثواني وهو حاضني مااعرف اي وصف
الها غير انها أشبه بالسحر
قربني اله زيادة وأني ارتجفت اوصالي فرح وتوتر
حسيت بهدوء
حسيت الدنيا كلها سكتت
صوت الموسيقى والفوضى برة حتى گلبي توقف شويه
ولمن لمس جبيني بشفافه ماحسيتها بس بوسة
جانت أمان وعد مو بوسة عادية لا كأنة عزف بيها
على اوتار جلدي ماان لامست شفافة شفافي
شميت عطرة حنيتة وصبره عليه طول هالسنوات
كأنه بثلي بيها كل كلمة ماگدر ينطقها خوفاً
على مشاعري الطفولية
و ظل يخزنها لهيج لحظة
احتضني واني سكتت مو من الخجل
من الارتواء
كأن كل العمر جان عطش
وجاية أشرب أول قطرة حب حلال
بهالبوسة السريعة
ابتعد عني وهو يرتب خصل شعري ابتسملي
وهمس
هسه أنتي إلي وكل التعب راح
وسنين الأنتظار طلعت تسوه
بعدها ودعني وراح وانطلقنا برحلة خطوبة
مليانة ضحك ومغامرات ودلع ودلال ومشاكل
الى أن حان وقت التقديم للجامعة وبعد معدلي
العالي صدمتهم بشنو اريد أدخل فدخلت
اني وقمر علم النفس حسب اللي حبينا
سويه
ايام السنة الاولى جانت مد وجزر وأغلب الدوام
الكتروني بسبب ارتفاع الأصابات ماعشنا
أجواء الجامعة وانحبسنا اغلب الوقت بالبيت
وكل مرة ننسأل عن الزواج نگول من تنتهي
الجائحة بس يبدو انها مراح تنتهي
لذلك وبنفس الموعد ١٠/١٠/٢٠٢١
تم زفافنا بعد تحسن صِبى من اصابتها المميتة
بالفايروس
جان زواج ابسط من البسيط مجرد جلسة
تصوير ورجعنا للبيت بسبب القوانين اللي منعت
حتى الزفة والتجمعات الصغيرة
بفستان منفوش مثل الاميرات وتاج
يلم شعري المرفوع دخلت عش الزوجية
تحت تبريكات العائلة وتهنأتها زفونه لغرفتنا
اني وحمزة بطبيعة علاقتنا مجنونة
ماكو حدود اول مدخلنا بلا كلام شمرت البرگع
واشرتله
-توكل بره حبي خل ابدل متت حر
-حريش ولج اليوم يوووومنا
-واذا يومنا نبقى معفنين
باوعلي وضحك
-امشي بطوط طلعي ملابسج ودخلي الحمام
الطابق فارغ بس احنه بي
طلعت للحمام سبحت وغيرت ورجعتله
دخل هو ورجع لگاني منشفة شعري
باوعلي بالمرايا ونظراته تتلاعب على اكتافي
الظاهرة من الفستان الخفيف اللي لابسته
غمزتلة ضحك لابس دشداشة بيضة
تجنن علي گاعدة على اكتافخ
باوعتله وگمت بعد مارشيت عطر
غمرلته بنظرة كلها شقاوة وباوعلي مستغرب
واني احاوط اكتافة العب بياخة الدشداشة
-ها بطة انقلبت الأدوار
-اممممم لعد ليش انتظرتك كل هالسنين
حتى أتحرش بيك
-ياااااااابه تحرش فد مرة
-اييييييي
-زين موافق علميني بهدوء ترى اني
رجال فقير
گالها وهو يسحبني لحضنه
-سهلة اعلمك درس درس
گلتها وايدة بخفة حاوطتني وتغلغلت بمسامي
بلمسة سببت قشعريرة بدمي
تراجعت من صارت صدگ وباوعتله
-حبيبي
-بطوط
-جنت اتشاقه حباب
-جبانة
گالهة وهو يهدئ أضاءة الغرفة
حضني وكأن حضنه الضيق صار بوسع
وطن وطن صغير يوسعني اني واحلامي
وذكرياتي
جنت خايفة أتنفس بثگل شويه شويه
عيوني تتحرك على كل مكان الا علي هو
جسمي احسه يدفى ويبرد وهو ياخذني لحضنه
ونتمدد بمكانه
يهمسلي بمشاعره وسنين انتظارخ اليه
ويعتذرلي عن كل غلطة غلطها بحقي
ما جان مستعجل ما جان ملهوف حتى
يسوي اللي يسوي اسقاط واجب
جان يتقدم عليه وكأنه يمشي
على بتلات ورد يخاف عليها تنجرح
كل خطوة بيها دفو مو بس لهفة
امتدت همساته لساعات من بعدها
مد إيده على إيدي لمسها بخفة
كأنه يسألني بشكل غير مباشر
مستعدة من حس برجفة ايدي
عرف بعدني احتضني وكأنة يطمني
ان مستعد ينتظرني ومراح يضيع
تعب سنين بلحظات شهوة سريعة
يمسح على كتفي بهدوء ويهمس
بأحلى الكلام قربلي على كيف
وحاول بهدوء يزيل توتري
ارتجفت بحضنه وبدينت رحلة
السكينة والرحمة بألتحام هادئ
بدون ضجة ولا خوف ولا شهگات
متوترة ببساطة جسدين التقو بهدوء
كأنه من زمان منتظرين هاللحظة
وبعد ما هدت الأصوات اخذني بحضنه
سندني على صدرة وهمس وهو
يضحك
-إذا هاي أول ليلة أتخيل شراح تكون ليالينا الجاية
فرح ممزوج بدلعج وجنونج
وضحكتج اللي تملي غرفتي وتطمني ان بطووووط واخيرا صار الي
وهيج جانت ليلتنا الأولى
ما چانت لحظات رغبة عابرة
چانت بداية
بداية عمر جديد اني اله وهو الي
ومتحاوطنا بس السعادة
____
فزيت من ذكرياتي وهو يعض اصبعي اللي
جان يلمس شفاف
-الحلووووو المتحرررررش
-اگعد حبيبي جعت اني
-نزلي گدامي حظريلنا الغدة هسه تلگين
الكل تغده ونام
نزلت جوة اسمع صووت بالمطبخ وهمسات
قمر
-انفضحنا لك فقاااااار كافي بووووس
دخلت وهو فلت تاركها وهي تضحك
-هااااا قميرة الفاسدة
-انجبيييي شكم مرة لكفتج انت وخالو
ابتسمت ولزمت كفوفها
-شتشوفين نفسج
-احسن والله متشوفي لطشلي لأن صرت اتقبل
هالسوالف
لمعت عيونها
-تدرين اجه وقت گلت راح يمل فقار ويتركني
وبكل مرة ابعدة بيها يضحك ويتفهمني
ويغير الموضوع الى أن تعودت وصار الشي
شبه عادي
-انت بطلة البنية اللي عدت كل ذيج
الظروف قادرة تتعدى كل شي
ابتسمتلي وشمرتلي بوسة بالهوا
-خل اروح انام بااااااي
طفرت من المطبخ واني گعدت احمي
الغدة حسيت بأيده تحاوط خصري وراسه
مسنود على كتفي
-گلي الدجاج بطة مااحبة مسلووگ
-والله اضوج من ريحته
-يلا حبيبتي جعت
گعد يتصفح بتلفونه واني اشتغل
خليت الدجاج بالطاوة بس طلعت ريحته
حسيت روحي طلعت ومعدتي گلبت
ركضت للحمام وهو ورايه
-شبيييييج
-مو گتلك ريحة الدجاج مااحبها
باوعلي مستغرب رحنة نتغده ماگدرت اتقرب من
الدجاج اساساً لثاني يوم
اشوفة يتصفن دخل للحجية للغرفة وطلعتلي
-مناوي بيبي
-ها بيبي حبيبتي
-الشهرية اجتج
-لا مو تعرفين ضاربة الابرة وينتهي
مفعولها بعد شهر
-يا ماما ليش ابر المانع وتخربين جسمج
وهرموناتج
-بس اريد اكمل هالسنة واسيطر واخاف اسوي
طفل بهالازمة والفايروس
-زين واذا اگلج اني شاكة بيج حامل
-لا مستحيل عالابرة الدكتورة انتطني بيها
ضمان ست اشهر ضبط
-هسة شخسرانة سوي تحليل منزلي
لعب عقلي وصدگ فكرت
وبالفعل جابلي التحليل حمزة وسويته
وفعلا صار اللي گالته بيبي
گعدت عالسرير وگعد بصفي
-هاااا
-حامل
وگف مصدوم ومبتسم
-متأكدة
-اي والله شوف الاختبار
-ليش ضايجة
-مو ضايجة بس ممتوقعة وخايفة بهالازمة
يصير طفل
-بطة
-ها
-فررررحي راح ينترس البيت بطابيط
رفعني وهو يضحك وبما أن السعادة
معدية وتنتشر الكل فرح لهالخبر
ولگيت اني ماشية بشهرين ونص حمل
عالأبرة اللي اخذتها وطلعت ارادة
ربنا اقوى من كل علاج
بعد مرور سبع أشهر شرف للدنيا
وحسب ماحب يسمي حمزة
أسد حمزة غالب الطفل الأسمراني
الجميل اللي خلاني عشت الامومة
اللي ماعشتها كطفلة
وبعد مرور أيام سعادة وبوجود
الكل حوالينا
گاعدين هو وابنه بالحديقة
مخلي بحضنه
ويتفرج ويا الصيصان ويغنون
رفعولي راسهم اخذتلهم صورة
واني احدث نفسي بفرح
وغامرني شعور غريب مزيج من
الحب والذكرى كل شي رجع
تصور گدامي كل مشكلة وكل كلام جارح
وكل نظرة جانت تقنعني اني أكرهه
بس گلبي جان بكل مرة يتركني
ويركضله
وهسه
هسه اشوفه ابنه بيده
عيوني انملت دموع واني ابتسم
يا ربي
منو جان يصدگ إن الحب اللي بدأ بعناد بنرفزة
ينتهي بهاللمعة بعينه
وهو يباوعلي ويباوع لأسد كأنه أثمن شي صارله
اكتشفت بعد سنين العناد مررة والعداوة مرة
والحب مرة
أكتشفت أن الحب بعد العداوة يفوز
لأنّه مو بس حب هو انتصار
انتصار على كبريائي وكبريائه
اللي جان يمنعنا نحب
وعلى عصبيته اللي جانت تغطي ضعفه
وشعوره تجاهي
هسه كل شي انتهى الحزن والفقد
والبعد
وماكو غير ضحكة أسد ولمسة حمزة لكفي
وصوت داخلي يهمسلي
-شوفي هذا العنيد اللي ما توقعتي تحبينه
بعد تعب وغربة مشاعر
صارلج أرض و وطن
.
.
.
.
.
