رواية بنات سهر الفصل الثامن والعشرون بقلم فراقد حسن علي
انشروا أغلى الروائح والبخور 🎉
وانثروا ماء الزهر والعطور💐
وافرشوا في دربهما أحلى الزهور🌷⚘🌹
بمناسبة زواج (( أساور )) 👰
الذي أتمنى أن يدوم دهور🥰😍😘🥳
==========================
أساور/ السلام عليكم ورحمه الله وبركاته
الحمد لله من طلع عمو حاتم للبيت بسلامه
الفرحة والضحكة الطشت بوجة مرته وجهاله
صعدت للسماء مرفره تشكر رب العباد
على نعمة وجودة بحياتهم
هو المكسين حالته حاله
ايده اليمني ابد ما يحركها
من الجتف مشلوله يكول املختني من الوجع
وبطنه ملفوفه كلها
ورجله اسم الله من فوك الركبه
بيها مشبك مال تقويم العظم
هو خطية أستهضم
لان ماعنده اخ يعينه على صوابه
ولا عندة ولد جبير يشيل حمله
بس مازن وهمام واحمد ما قصروا
سكنوا بيته علمود مدارته
من عدا اولاد عمه الرياجيل الكبار والصغار
كلساع جاي واحد يشوفه ابد ما تركوه لحاله
مازن من دون الناس كلها عينه بس يمي
خله عقله ويه خطواتي وحركاتي
شل دماغي من كثر الشك ماادري الخوف
ماادري الحرص الزايد عنده
وهم مرتين ثلاثه أستغل الفرصه
من عمو ينام نوم عميق بسبب المسكنات
وماكو واحد من الولد يدزلي رساله/
خلي الباب مفتوحه راح أصعد
والصدك أني هم هواية اشتاقلة
من يصعدلي أجلب بي ولا اريده ينزل
هو شويه ويطفر ويعوفني
هو طبعه كلش حلو
واسلوبه راقي ابد ما يستصغر المقابيله
وهوايه مدللني يكلي بس اطلبي على السانج
ابد ماعنده بخل ،ويحب يناقش ويسمع
وهوايه شغلات مااعرفها هو يشرحها اليه
ابد ما حسسني اني جاهله لو مو متعلمة
عمو حاتم يوم بعد يوم الحمدلله أحسن
ياخذونه المركز العلاج الطبيعي
علمود ايده ورجله يحركوهن اله حتى لا يبسن
وينشلن عن الحركة
بليل كاعدين كلنا يمنه
وجان موجود عمو جابر وعمو شامل
والرياجيل كلهم موجودين وياهم نسوانهم
عمو حاتم كال / خل اسولفلكم سالفه
من انضربت حسيت بحرارة الطلقات اول شي
جكارة وتلسع بجلدي ،
-
وبرمشه عين فلشت روحي من قوة الالم
اختنكت كمت اجر النفس كوة
ماكو ثانيه والالم احتل كل جسمي
وسيطر على عقلي ، بديت افقد الوعي
وكمت احس جسمي كلش ثقيل
تكولون صارت الدنيا عباره عن بحر
وجسمي كونيه مليانه رصاص ونشمرت بهذا البحر
غطيت وصار كلشي اظلم
لا اشوف ولا اسمع ولا اتنفس بس ظلمة
خفت لدرجة الرعب وكطع النفس من شدة الظلمة
منين ما التفت ظلمه ، ظلمه
اصيح بس صدى صوتي يرجع عليه
اريد احد يجاوبني ماكو
احس نفسي امشي بنفق
وهذا النفق مابي لا هواء ولا ضوة
-
هناك واشوف شاشه انعرضت كدامي
ركضت عليها مكيف وفرحان اجاني ضوة
باوعت هذا شريط مسجل اليه
انا صاعد بسيارتي وراجع من الدوام
وطلعت ايدي من جامه سياره
وانطيت الف للفقيرة ألواكفه بالاشارة،
رفعت ايدها وكالت /
الله يطول بعمرك ويخليك خيمه على راس جهالك
عندي يتامه وهاي الصدقه امانة الله الهم
اشتريلهم بيها لكمة للغدة
-
واختفت الشاشه ورجعت ظلمه
ورجعت اختنكت من شده الظلام
ومشيت ، وبقيت امشي ،
احس هذا النفق ماله نهايه
لهناك والجح نقطه ضوة بعيدة كلش بكد خرم ابره
وصوت أبوي محمد يصيح عليه /حكيم حكيم
تسمع صوتي تعال ليه منتظرك
كمت اركض واركض ومااوصل
تعبت من كثر ما ركضت
كعدت وبجيت من شدة الخوف والرعب من الظلمة
وأنعرضت الشاشه مره ثانيه
واشوف شريط ثاني مسجل اليه
انا اوزع الهريسه بيدي للعالم بمصباح عاشور
وجاهل صغير اجه متأخر بعد ما خلصنا توزيع
كتله /خلصنا ،
كالي/ بيبي تكول لو ماعون
لان امي تتنسى وتريد بعد
فرغتله بالجدر الشايله من الباقي الجهالي
ضحك فرحان محصل ثواب لأمه ،
كالي/ الله يخليك عمي . وراح يركض
وهم اختفت الشاشه ورجع الظلام
هنا واسمع صوت ابويه قريب صاح عليه /
ولك فروخك ينتظروك هم روحك وتعال ليه
يلا يالسبع كول يالله
كمت على حيلي واصيح يالله بكل قوة صوتي
واركض واركض وبعده الضوة بعيد عليه
من الخوف والرعب كمت أصيح بخبال
يالله، يااارب ، ياالله، يااارب
احس خطواتي صارت كل خطوه شكبرها
يعني احس نفسي مو اركض لا حسبالك
صاعد بسياره من السرعه الاركض بيها
وصلت قريب للنقطة مال ضوة
باوعت ليفوك طلعت اني واكع بير غميج
وصوت ابويه محمد ينادي عليه من فوك حلك البير
بجت لان خاب ظني بعد كل هذا التعب
وكلشي ما حصلت . وطلعت واكع بير غميج
شلون راح أصعد وشلون راح اطلع
واشوف امي وابويه نزلوا عليه
بس مو جسم وبشر ،
لا شلون الخيال لو الظل ،
وشالوني كل واحد من جهه
وصعدوا بيه ليفوك وطلعوني من البير
باوعت اشوف ابويه محمد اليصيح عليه موجود ،
وهذا الظل مالته هم موجود
وامي هم نفس الحاله ،
هي موجوده وظلها موجود
سالتهم / منو انتم ؟؟
ابوي ضحك وكال /انا أبوك محمد
وهذا أشر على الظل /دعائي الصالح الك
امش جدامي فروخك لوعوا جبدي
بصريخهم عليك
-
دفعني من ظهري ومشاني كدامه
هنا فتحت عيوني اول مره
واشوف ضوة الدنيا من جديد
بعد هذاك الظلام اليخنك
من خلص كلامه عمو حاتم
بقى واحد يباوع بوجه الثاني،،
هو كال / ادري بيكم استغربتوا
بس انا مستغرب اكثر منكم
ولحد هسه كل مااغمض وانام
اشوف هذيج الظلمه بمنامي وأفز خايف ومرعوب
وبقى كل واحد يفسر سالفه عمو حاتم على معرفته
ناس تكول / هذا حلم
وناس تكول / لا مات ورجع للدنيا
وناس تكول / لا هذا عقلة الباطن صورله الخوف بطريقه الظلمه ،
وين الحقيقة والواقع الله واعلم
وعدا شهرين على جيت عمو حاتم للبيت
والحمد لله هوايه احسن واكو عندة تحسن
مازن وحيدر خلصوا بناء بيوتهم
وجهزوا كلشي ،
يعني صار بيتنا انا ومازن وحد
وبيت حيدر وحد
وبيت اختهم شهلاء وابنها وحد
وبصفنه بيت الحجيه ساهرة
مازن بلغ عمو حاتم علمود موعد عرسنا
كاله / انا كلش مستحي منك
واعرف بيك ذيب وما تكسرك الجيلات ،
واشوفك حيد وسند للينتجي عليك
جايك بطلب وأتمنى ما تردني
اريد اخذ مريتي البيتي
بحفلة بسيطه وزفه صغيره كدام الناس
تعرف بعد استقليت بيت وحدي
واحتاج مريتي يمي
عمو حاتم ابد مااعترض بالعكس كيف
وكاله / الخميس الجاي يفيدك ؟؟
-
مازن كاله / والله كفو منك أبو جواد
ان شاء الله الخميس اطلع مريتي من باب بيتك
انت هم ابوها ولي امرها
لمى اعترضت ما قبلت يصير عرسنا سويه
من باب كالت / وحده بينه تنجبس
-
ومن باب كالت / شلون تصير الحفله
قابل العالم والاقرباء ينقسمون نصين
نص بيتنا ونص بيت حاتم هاي وين صايره
بيداء كالتلها / اليجي بيتي هلا بي
وعين غطه وعين فراش ،
وأساور بتنا وعزيزه علينا
مثل معزتج انتي وخواتها
كلجن يعزجن أبو جواد ويحترمجن
وصدك بلشنا بسوالف تجهيز حفلة الحنة والعرس
وخواتي مااجن عليه لان التهن بيت خالتي
علمود لمى ، عود تجيني مسره ركض ركض
ما تطول ساعتين ثلاثه وترجع
وخلف الله على بيداء وخواتها ما قصرن ويايه
اني بقيت افر براسي صارت ويايه حاله غريبه
العفو اني دورتي منتظمة كل ٢٨ يوم تنزل
هالمره قبطت ٥٠ يوم وهي ماكو !!!!
كلت البيداء/ كالت والله ماكو شي يخوف
تلكيها من التعب وركضت الخطار علمود عمج
وهسه ركضه العرس تخربطت
باليل كاعدة أحجي ويه مازن
كتله / اني خايفه بس لا عندي كيس مثل مسره
خطيه هسه من راجعت الدكتوره
طلع عدها كيس هو اليمنع الحمل عدها
كالي / ليش هذا الخوف ماافتهمت عليج
كتله / مو صار ٥٠ يوم صلاتي كامله
ما مقطوعه
هو سكت شويه وكالي / شنو قصدج
الشهريه عندج متخربطة
كتله / اي ترى استحي اكلك
بس مااعرف شلون جطيتها كدامك
كالي / مابيها شي مو عيب
ان شاء الله وره عرسنا اخذج للمراجعه
لا تخافين صارت عندج خربطه بالهرمونات من التعب
وركض الاسبوع ركض وبعد تعب وتجهيز كلشي
يخص حفلة الحنه والعرس على ايد بيداء
واجى يوم الأربعاء يوم الحنه
صارت حفلتي بسيطه وحلوة
بالبدايه حضرن بس نسوان الشارع الغريبات
وصديقات بيداء وخواتها ، ونسوان اخوانها
وبليل اجني خواتي وكل النسوان اقربائي
من حفلة لمى واجن عليه
وهم رجعن سولي حفلة من جديد
الحمد لله فرحت صح غصة فكد ماما موجوده
بس هاي الدنيا لازم تمشي عجلتها على راس الكل
اجي يوم الخميس
والله ولا افتهمت من عنده شي
طار النهار ، بين الصالون والمكياج
وبين الخطار الاحتارت بيهم بيداء
وبين خواتي المكابلاتني ويبجن ،
واني شبعت بجي وياهن
اكو شي غريب احسه يفوج بصدري
مااعرفه شنو هو ، خوف ، وارتباك ، وقلق
خايفه من حياتي الجديده
اجتي زفه حيدر ولمى قبل زفتي
وطلعوا للتصوير قلبنا
يمكن بعد ساعه يلا اجى مازن
والعالم الزفوا حيدر رجعوا زفوا مازن
من سلمني عمو حاتم بيد مازن بجيت
اريد بابا سند اليه يحمني من شر الدنيا
المضموم بالايام الجايه ،
هو خطيه عمو حاتم كاعد على الكرسي المتحرك ،
دنكت بوسته وهو حظني بتك أيد
وباسني على راسي ،
كالي / داعيلج من لبة قلبي الله يسعدج ويوفقج
طلعت من بيت عمو ولازمة ايد مازن
طبعا كلشي مااشوف، لابسه بدله اردان
وحجاب ، وفوكاهن البركع نازل على وجهي
وبرنص كلش جبير مغطيني
هو مازن احتار بيه يدليني على الطريق
ما قبل نروح للتصوير
الزفه افترت شويه بالمنطقه
وبعدين رحنا البيتنا
اجتي البنيه المصوره وياها اخوها
مااردي رجلها استغفر الله
صورتنا بالبيت ،وبقى الولد كاعد بره بالصالة ينتظرها
ومازن راد خواته شهلاء ووفاء يصورن ويانه ما قبلن
بس بيداء ، وخواتي
خالتي فاطمة ، ساهرة
واجى حيدر هم صور ويانه
وبعد ما الكل سلم علينا وباركلنا
وبيداء هي وساهرة محضرات العشاء النا
ومحضرات عصاير ، وحلويات ، وكرزات
خطيه كلشي مجهزات ، سلمن وراحن
وبيداء شاورتني كالت / انتظرج خابريني
واذا ما كدرتي دزيلي رساله
كتلها/ اي ان شاء الله
حيدر الخبيث شاور مازن وطلع يضحك
هو هم بقى يضحك ، وراح قفل الباب وراهم
من رجع كتله/ تعال ساعدني البدله بيها قيطان
ما أنوشه ،
كالي / بس دقيقه خلي بس ابدل حمسني القاط
وكع من عندي جلد
هو بين ما بدل اني نزعت الحجاب
ومسحت المكياج ، اجى فتحلي القيطان
وكالي/ اروح اسبح واصلي
انتي هم صلي حتى نتعشا
الحمد لله أحس روحي مرتاحه
بدلت ، وعدلت البدله بجنطتها
ورتب الهوسه السواها مازن
شمر هدومه على السرير
وبعدين رحت شفت الاكل حار مايحتاج احمي
بين ماطلع مازن من الحمام وراح للصاله
اني دخلت سبحت بردت روحي
وطلعت توضيت وصليت ،
لكيته هو مجهز ميز الطعام
كعدنا تعشينا
كالي / اريد سطل جاي دايخ مسطور
كمت اسويله جاي ،
هو ساعدني لملمت الميز ،
وغسلت المواعين
هو هنا دك تلفونه جاوب عرفته حيدر
كاله / شبيك ملكوف الليل كله عشه
شعندي مستعجل،
روح للمسودنه اليمك
وعوفني اشرب الجاي راسي انسطر
-
انوب ضحك ضحكه بصوت عالي وكاله /
لا أشكرك عندي حب وجع راس
واصلا راسي مرتاح بس متعود اشرب جاي وره الاكل
وبعد لا أدك لا اجي اخنكك
صبيت جاي اليه واله
وكعدت يمه بالصالة
يتفرج على هاي القناه خبلني بيها
قتاة جديده مال عالم الحيوان
أسمها ناشيونال جيوغرافيك أبوظبي
ويحب التقارير التنعرض بيها
هو يشرب جاي اشري اتقرب عليه
اني كاعده بصفه بس تقربت اكثر وختلت بحظنه
كالي / اول مره احس الجاي هيج طيب..
كتله / ترى اعرف كاعد تجاملني لان خفيف
اني مااشرب جاي بليل ابقى كاعده
عيوني ما تاخذ نوم
كالي / هو المطلوب اريدج ما تنامين
خله كلاص الجاي على الطبله وبوسني
((((كانت لكلماته الجميلة كأثر لوحه فنيه بداخلي
لوحة اسميتها غروب الشمس
وخلف جفون ذلك الغروب
بدأ رسمته بالصمت الذي هو أساس هذه اللوحة
واللحظات بها عباره عن حكايات الشوق بين العاشقين
يلتقون تحت ظلامه
وفيه تتجدد الأحلام
وفيه يتيهون ويتخدرون بذلك الصمت الهارب
ويرسم أجمل أللحظات التي تجمع العاشقين
ومن أجمل ما نسج الخيال
الذي يستند على شعاع الشمس
المتمثل بدفئ المشاعر
ويلتقط ومضة للرياح المتمثلة
بأنفاس العاشقين المتطايرة خلف شغف الاشتياق
ويرسم من زاويه اخرى ذلك الخضار الجميل
المتمثل بلحظات الهدوء
الذي أسكنتهم على حين غفلة
محاولة التهدئة وقبول السكون
لأنهم نسوا قطار الزمن
وتسابقت أنفاسهم واحظانهم فتصبغت بألوان العشق المتمثل بألوان الشفق وقت الأصيل
وتتلون لحظات عشقهم بااجمل الألوان
متسابقة مع أهداب الشمس كلما اقتربت من الغروب
ورسم من زاوية اخرى وبعد صبر لذيد
انكسار لموج البحر،
والـشمس مالت للغروب،
واللون الأحمر قام يسجد في طرف محرابها
وأسترسل برياح الشتاء الصلبه البارده
وجاءت لحظة الألم لكنها سرعان ما أختفت
فتغنت طيور البحر بأزكى لحون أسرابها،
وتعايش العاشقين كظل الشمس وقت غروبها
مع هذاك الافق الجميل
وبعد جفن ذلك الغروب الجميل
توجد عين نائمة بجوار من تحب،
وعين تترقب عودة من تحب،
وأخرى ملأها دمع الحنين لمن تحب ...........)))))
وبعد هذيج اللحظات الحلوة
الجمعتنا مع بعض وصرنا روحين بجسد واحد
حتى ما توجعت ألم كلش بسيط
هو كام يضحك بصوت عالي لان اندمجنا بالصاله
وبقى يتلفت لان ما محضره روحي
عاد اخذ نيشاني بفانيلته البيضه الداخلية
كال/ بس احنا تصير دخلنتا بالصالة
كتله / صوجك ما نطيتني مجال افتهم دربي
كال / بيتنا وبكيفي وين مايعجبني اخذ راحتي
ردت اكوم ماكدرت رجليه اتشنجت
كمت اضرب بي من وره اخبالاته توجعت
هو بس يضحك ويكلي / ترى خايف عليج
لان بعدج جديده
بقيت متمدده بمكاني ،
وهو راح جابلنا فراش ونمنه بالصالة
للصبح كعدنا الباب تكسرت
هو طلع عليها ،
اجتنا خالتي فاطمة وبيداء وساهرة
جايبات النا ريوك ، وباركن النا
وبقن يهلهلن ،
هو عافهن كاعدات يمي وراح للحمام،
خالتي فاطمة سالتني عن موضوعنا
عاد شوفتهن الفانيله مالته
وهن كامن يضحكن على خبالاته
الحمد لله ايام عرسي جانت كلش حلوة
خلصناها بين زيارة الامام الكاظم
وبين عزايم أهلنا كلساع واحد مخابر
عازمنه يمهم على غدة لو عشا
وبين جدولنا اليومي الأنكلب
انام بالنهار ونكعد بليل
وبين خبالات مازن لعب روحي
شكد ما ياخذ مني حق وحقوق ما يشبع
يكول / والله عريس والدوله مطيتني اجازة
غير أستغلها بشي يفيدني ويكوي حيلي
ما سويت حفلة بالسبعة ،
لان لمى سوت حفله وماردت لا اغثها ولا تغثني
وهي تحسب أحساب الاتيكيت والخطار
ومتريد تنقص من حفلتها شي
ولا واحد يشاركها
وهذا شي من حقها
عروس وتريد تلفت الانظار بس الها
ومازن من شافني أنعقجت
اخذني بيومها زياره الكربلاء
اول مره اشوفها وازورها بحياتي
جانت زياره وسفره من العمر
خلصنا هناك أحلى ثلاث أيام
ومن رجعنا كتله/ مازن بعد ما بيها مجال
اخذني للسونار كلش اتأذه من تتقربلي
ويجلب بيه المغص ، احس أوضاعي مو تمام
هو كالي / العصر أخذج
صدك العصر بدلت وكملت ،وطلعنا
براس شارع شفنا شهلاء وابنها فهد
واكفين على الشارع
يريدون يأجرون تكسي
وكفلهم مازن وصعدت ويانه
تريد تروح للسوك
تشتري تجهيزات لفهد مال مدرسه
-
كالت لمازن / ترى انا بغلت حيدر وكالي روحي
-
هو جاوبها/ براحتج ام فهد بس لا تتأخرين بالسوك
الواحد يخاف من التفجيرات
هي سألت / وين رايحين بدون عرضه ؟
اني جاوبتها / اريد اروح للسونار عندي خربطة
هو مازن جنه ما رضى وبقى يخوز بيه لان كتلها
عاد هي كالت / تعرفين دكتوره تروحيلها
لو اخذج على دكتورتي ايدها عافيه .
بقيت أباوع على مازن عيونه جاحظهن عليه ،
حتى ماأعرف بعد شرد عليها
عاد حجيت الصدك
كتلها / لا والله كلنا اي دكتوره نشوف ماعليها ازدحام
نحجز عدها
كالت / جا نيتج صافيه
هسه اروح وياج على دكتورتي
السكرتيرة التشتغل عدها اعرفها
بس أدبك أيدها ادخلج بسرعه
صدك وصلنا مازن يم العياده
ومن نزلت هي وفهد
هو كالي /انتظري
سوة نفسه ينطيني فلوس
من شافها نزلت كرصني من زندي
وكالي / لا تبقين فطيره انتبهي زين
مو ياهو اليضحك بوجهج حسبالج يحبج
نزلت مهضومه شبي انكلب عليه
وهي شهلاء دخلت قبلي للعيادة
وسلمت على البنيه السكرتيرة
وانطتها أكرامية بالبسكوت
وصدك ما طولنا شويه ودخلتنا
اني ردت ادخل بس وحدي بس هي شهلاء
فاتت ويايه
حتى دخلت قبلي وسلمت على الدكتوره
وكالتلها / هاي مرت اخوي النقيب مازن
بعدها عروس وأجتج تجيك وضعها
الدكتوره بقت تسألني شكو وشعندي
كتلها / عندي خربطة فوك الشهرين
ما اجتني الدوره ،
واخاف عندي كيس مثل اختي
كالتلي / أصعدي للفحص خل اشوف شعندج
والله حتى مااعرف شسوي
شهلاء حتى ما أجتي يمي
يعني تساعدني لو تعلمني شسوي
هي الدكتوره بقت تعلم بيه
وبعد الفحص المخجل ،
كالت /تمام اوضاعج كلش نظيفه ،
من شافتني بالسونار بقت تباوع بوجهي
كالتلي/ صار تقارب بينج ويبن زوجج قبل عرسكم؟؟
كتلها / ماافتهمت قصدج شنو
تقصدين ملامسة خارجية ،لو دخله كاملة؟؟
كالتلي/ هو اني اريد افتهم منج
كتلها / اي اكو تقارب ملامسه فقط
ودخله كامله صارت بيوم عرسنا قبل ١٠ أيام تقريبا
هي ضحكت وكالت / والله زوجج النقيب
مفول بنزين محسن ما شاء الله
مبروك حبيبتي عندج حمل والجنين أوضاعه تمام
والج شهرين وأسبوع من حامل
لا تخافين كل أوضاعج زينه
شهلاء من سمعت شنو كالتلي الدكتوره
طلعت تبشر مازن منتظرنا بره
اني بقت افر براسي شنو حامل ؟؟
شلون صار الحمل واحنا قبل ١٠ ايام من اتزوجنا ؟
زين شلون حبلت وهو مازن ما يصير عنده خلفه ؟
بعدني ألبس بهدومي واعدل بحالي
دخلت البنيه السكرتيرة وكالت / دكتورة زوج البنيه
يريد يدخل يكلمج ضروري
شكد منعته بس هو مصر
وكال /اذا متقبل ادخل يمها
من رخصتها ثواني خل تطلعلي بره اريد أحجي وياها
هي كالتلها / دخلي اشوف شعنده
دخل مازن شنو وجهه مكلوب
كاتم اعصابه بالكوة بقى يباوعلي بخزرة
وعيونه جاحظهن عليه
دخلت وراه شهلاء هو كاللها /من رخصتج ام فهد
عندي حجي خاص ويه اخيتي الدكتوره
هي خلت وطلعت ومن طلعت
تباوع عليه وتحركلي بحلكها
هو كعد وبقى يفتهم من الدكتوره
وفهمها إن هو ما يخلف نسبته ضعيفه
وما صار بيناتنه دخله كامله فقط ملامسه سطحيه
حالنا حال اي اثنين مخطوبين وعاقدين بالشرع والمحكمة،
هي سألتله بالقلم العريض
لان افتهمت من كلامه هو يشك بيه
وعلى يا دقيقه ينكر الحمل
كالتله / العفو منك اخي لا حياء في العلم والدين
من كنت تتقرب الزوجتك قبل عرسكم
نزل سائلك المنوي على جسمها وبقى فتره عليها
يلا نهضت غسلته؟؟
كاللها / اي نعم صار هذا الشي واكثر من مره
و تعرفين بعد كلشي بالبوكة يصير بخربطة
وتعرفين بوضعنا مخطوبين ومنتهزين الفرصه
كالتله / اخي زوجتك حامل ومخلصه شهرين
والها اسبوع من داخله بالشهر الثالث
وهذا الحمل نتيجة الملامسه السطحية الحدثت بينكم
هوايه بنات حشاها العدهن علاقات غير شرعيه
يحبلن بسبب هذه الملامسة
يدخل السائل المنوي عبر غشاء بكارتهن بدون ما
يتمزق ويصير الحمل
وتحل المصايب والكواثر على روسهم وروس اهلهم
اخي اذا سمحت سويلي هذا تحليل هسه
حتى انت تتأكد وتقطع الشك باليقين
هو كاللها/ انا واثق من زوجتي وابد ما مخونها
بس انا مستغرب الحمل عدها وانا مااخلف
هي كالتله/ وربك رزقك
حتى تحمده وتشكره على نعمته
ولا تبقى مستغرب هوايه مثل حالتك
ويصير عدهم
هو اخذ ورقه التحليل من عدها
واشرلي تعالي ويايه
دكتوره كالتله/ اخي رجاءا زوجتك حامل منك
بدون عنف ولا تخلي الشيطان يسيطر على تفكيرك
اتمنى هسه تسوي التحليل بهذا المختبر اليمنا
هو كاللها / جزاج الله خير على النصيحة
ارجع واكلج انا ماشاك بزوجتي
بس استغربت حملها وانا مااخلف
طلعنا بس لا هو حجه شي
ولا اني حجيت شي بقيت ساكته
وخايفه من ردت فعله
هو طلع وانطى الفهد فلوس خلاهن بيده
وكاله / توكل خالي انت وامك جهزوا غراض المدرسه احنا مطولين عدنا تحاليل لخالتك
شهلاء كالتله/ هاااا تاكدت من الدكتوره
مرتك حبلانه منك لو من غيرك
تعرفهن بعد يخوفن ياخذن رس من أمهن
هو صك على سنونه وضرب ايده جف بجف
وكاللها / ام فهد توكلي محروسه بالله
العالم منا لا تخليني اعيط هسه واسويلي هوسه
وخليها بالج مرتي انظف من لمعة الذهب
وحبله من عندي والبطنها إبني
هي هزت أيدها وكالتله / شدعواك شكنالك
وهيج كبيت علينا ، غير خايفه على سمعتك
بس صوجي هذا اليريد الزين الغيره
وهو يفتهم هذا الخوف خراب الحياته
اخذت ابنها وطلعت من العياده زعلانه وكامت تبجي
هو كالي / امشي ويايه
وراح للمختبر أباوع عليه
يعرف كل خطوات التحليل
وانتظرنه ساعه يلا طلعت النتيجه
هو بقى يباوع بالورقه وكال / لج عود الظهر واصلج
وهسه طالعه النسبه ٦٠ وحركة جيدة جدا
شو أتغير وضعه وضحك
وتقرب عليه وباسني على راسي ،
وكالي / كصتج خير عليه
متعرفين الفرحة البقلبي هسه شكبرها
ورجعت للدكتوره شوفتها الورقه
ضحكت وكالت / مو كتلك زوجج النقيب
مفول بانزين محسن ، مبروك حبيبتي.
وكتبتلي وصفه مال مقويات
طلعت مازن ولا هو قبل دقايق .
يضحك ويه روحه وشكله مرتاح
واكف باب العياده ويباوع للسماء ،
انطيته الوصفه جابلي العلاج من الصيدليه
وبقى الطريق كله يضحك ويسولف
بس اني ماادري شبيه
انغثيت من بدايه شكه بيه
وشلون شكله جان مكلوب ويخوزر بيه
وكلام اخته ملخ روحي تكله حبله منك لو من غيرك
وياخذن رس من أمهن
رجعنا للبيت وهو طاير من الفرحه
بقى يحظن ويبوس ، يمكن باسني
من راسي الرجليه ، ترسني بوسات
بس أني أضحك بالجذب
بداخلي أبد ماكو فرحه
هوايه انغثيت من موقف شكه وكلام أخته
اتصل علية حيدر بالعافيه سافر هو لمى
بعد حفلة السبعه مالتهم لسوريا
مازن يكول مااكدر أسافر ما مسمومحلي
اطلع خارج العراق مااعرف صدك كلامه
لو يجذب عليه ؟!
واسمع مازن يكله / الله يبارك بيك يوم إلك
ونفرح بيك ، شبسرعه شهلاء طشت الخبر
سكت وانوب كاله / تاكل خ.... أحسن الها
انت تعرف بالطب أكثر مني
الظهر واصل مرتي وهسه سويت تحليل
نسبتي ٦٠ والحركة جيدة
لا تبقى أختك تبثول بالحجي لو اكسر ظهرها
اني رحت لغرفتي بدلت واسمع صوت
بيداء أجتنا ، طلعت واشوف عمو حاتم
وهمام واحمد وبيداء يمنا
رجعت بسرعه للغرفة لبست حجاب كامل
وطلعت سلمت عليهم
كمت اقدملهم ضيافة أجتي بيداء
لحكتني للمطبخ، باركتلي
وكالت/ كلش فرحانه الج
وخلي شهلاء تموت بقهرها الحقيره
شيشت حيدر بالتلفون
واجت شيشت عمج عليج
تكله/ شلون حبله واخوي ما يخلف
والها ثلاث اشهر من حبلت وشايله نغلها
وهي ساكنه بيتك منو اللعب عليها وصخم كصتها
ونكست سمعتك وسمعه اهلنا
بقيت فاكة حلكي هاي شبيها
حسبي الله ونعم الوكيل بيها
صدك لو كالوا عليها /تحب المشاكل
تعيش وتتعايش عليها
رجعت للصاله وعمو حاتم باركلي
والولد يضحكون ويه مازن
وعمو حاتم يكول المازن / ولك على هاي دكت بيه
ودخلتك البيتي المفروض اكسر رجلك ،
بس حكك مرتك وحلالك
وانت طبعك من الحريف
حكك ما تصبر بدونها بهاي عاذرك
واذا أجاكم ولد تسمي على اسمي
اعتبره اسمه رد اعتبار اليه
وبقوا فوك الساعه ضحك وسوالف وشقه وراحوا
عدت ايامي زينه ويه مازن
بس كمت كلش اضوج لان وحدي
واحس روحي مخنوكة وبس ابجي
اريد بشر ويايه بالبيت
مازن يحاول يسوي دوامه يومي
لان بعده اسبوع يلتحق للعسكريه
واسبوع ينزل مجاز
وحتى لبيت عمو حاتم ما يقبل أروح
لان يمهم الولد يدارون عمو ويساعدونه
اسبوع التحاقه أبقى بالنهار وحدي بالبيت
وبليل ابات بيت ساهرة
بيوم عصريه فلت من دوامه واجاني
وجان كلش متلهف عليه
شو اني بس حظني وبوسني نفرته ،
شكد حاول ويايه بس مااعرف شبيه
احس روحي كارهته وروحي كامت تلعب
من ريحه عطره المخبوطة بريحه الجكاير
دفعته عني وكمت ابجي واتوسل بي
يعوفني بحالي ولا يتقرب عليه
هو تخبل شبيج وليش ما ترديني ؟؟
واني بس اكله / والله مااعرف شبيه
مااعرف ليش مااريدك
هو هنا تخبل وكالي / شنو شايفه واحد غيري عاجبج وهيج كارهتني ؟؟......
-
-
-
-
سوار / من يوم سمعت قصة طارق ويه علياء
ماأدري ليش مره اضوج من عنده
ومره انقهر عليه
هو صحته يوم عن يوم بالأحسن
وهوايه يحب الجهال
يخلص وكته بالنهار وياهم ويه حسين
وبليل يجمعون اولاد عمه
ويبقون يلعبون ورق لوكت متأخر
والحمد لله من مر كم يوم
وطلع عمو حاتم للبيت كلنا فرحنا ،
وهو طارق يكول /حاتم صديقي واخويه
صح هو آكبر من عندي بالعمر
بس أفهمه ويفهمني
كلش فرح بطلعته وشوفته بسلامه
وكام يخلص اغلب الوكت يمه
بيوم أجاني جان وكت الضحى
جنت احضر هدوم للجهال نريد انسبحهم
خالتي تسبحهم اني اخاف مااعرف الزمهم
كالي / اريد أحجي وياج ألمصلحتج
انتظرج فوك بغرفتي
عشر دقايق اذا ما صاعدتي
اعتبري نفسج حره
ومن باجر اطلكج وشوفي حياتج ويه غيري
بقيت متردده اصعد لو لا
اني رحت وكلت الخالتي طارق هيج وهيج كالي
هي كالت / دمشي يا خايبه أصعدي وراه
ما صدكنا بطل شرب وصار أدمي
بلكت الله يريد حياتكم تستمر سويه
صعدت وكلش خايفه ومتردده
لكيته يفتر بالغرفة ويدخن
من وكفت باب الغرفة هو بقى يباوع عليه
كتله / ليش ادخن حيدر مايقبل
يكول ما تطيب وصدرك يقبط
كالي / تفوتين لو تخافين مني ؟؟
دخلت للغرفة هو راح وقفل الباب
كالي/ اكعدي اريد أحجي وياج
كعدت على السرير هو بقى يفتر
كالي / سوار انا اجذب عليج اذا اكلج هسه أحبج
يا بنت الناس افتهمي عليه المشاعر مثل البناء
الكلمه الحلوة والموقف الجيد يبنيها
والكلمه التوجع والموقف السيئ يهدمها
علياء هي بيدها ومواقفها الخ......
هدمت كلشي يخصها ومبني بداخل روحي الها
طلعتها من قلبي جزت روحي منها
لا تفكرين بيوم من الايام علياء تصيرلي مرأه
سوار باوعي عليه ، انتي مرتي وام جهالي
والله شاريج بالنفس ،
واريد اكمل حياتي وياج
منين مااباوعلج وانخلج تلمعين مثل الذهب
انا الخاطرج والخاطر جهالي والخاطر روحي
عفت الشرب وبعد مااخلي بحلكي ليوم الدين
ودرب النسوان بعد مااوصله اذا اكتفي بيج
شعندي بعد رايحلهن ،
الصراحه البارحه هم سمعت من حاتم
سالفه خوفتني
واحسها هي هم رادع صارت بروحي
ومن هذا اليوم انا اعلن التوبه لله
وبري من الشرب والنسوان كدام عظمته
الج حريه الاختبار منا لليل
لو تكملين حياتج وياي
لو تكليلي لا والله مااريدك
والعباس مراح ازعل منج
ومن باجر أمشى باأجراءات الطلاك
اخذي راحتج ورديلي خبر بليل
عافني وطلع نزل جوة
أني بقيت كاعدة بمكاني
أجتي لمى ومسرة يركضن
وافتهمن مني شنو كالي وشيريد
بقن يحجن عليه ويقنعني ابقى وياه
نزلت جوة وخالتي هم بقت تحجي ويايه
هو اني اصلا احس روحي اريده
بس اخاف من الخيانه
والله مشاعر الخيانه تموت الروح
لليل واني محتاره مااعرف شريد
بقيت كاعدة بالمرجوحة وافكر
سمعت فقار يبجي جابته اليه تبارك
خليته على صدري وبقيت اهز بالمرجوحة
حتى بالي مو يمه
سودة عليه شهك بالحليب وطلعت روحه
بقيت اطبطب على ظهره هو يبجي واني ابجي
اجتي مسرة كعدت يمي
كالتلي / شتردين بالضبط
-
كتلها / اني اريد طارق بس اخاف منه
اخاف يخوني ويه علياء لو يتزوج عليه
لو يرجع الدرب النسوان
كالتلي/ ترى هو حلف بالله وبالقران
كدام خالتي ومنتصر بعد ما يرجع
لهذني الطرق التعبانه
وهو هوايه متغير وصاير جدي
انتي ملاحظتي الفرق والتغير عليه
كتلها /محتاره مااعرف شسوي
اذا ابقى وياه خاف يخوني
واذا اعوفه اعرف بروحي اتندم
لان احس روحي احبه واريده اتعلمت عليه
هي كالت / الله لا يحير عبده
سوي قبضه ( كهيعص )
وفتحه ( حم - عسق )
وانوي الله يدبر امرج
وكامت من يمي دخلت جوة
بقيت فقار بحظني سودة عليه
شبع بجي ونام زعلان
حسباله اضربه لان طبطبت على ظهره
وبقيت أجرب طريقه طريقه ماما
لامره ولا مرتين لحد ما تعبت
دخلت جوة ونيمت فقار بمكانه
ورحت خليت راسي بحظن خالتي
كاعدة بالصالة تتفرج مسلسل تركي
الولد كلهم رايحين يم عمو حاتم
كالتلي/ شبيج هيج ممرودة
كتلها / مو تعرفين البيه
كالتلي/ تاخذين بنصيحتي
وانا امج واريدن مصلحتج
خلي جهالج يمي
وصعدي الغرفتج عدليها ونظفيها بسرعه
واسبحي والبسيلج شي حلو
وانا ادزلج أبو جهالج وراج
بس بهداي عليه تراه مريض لا تعبي
كتلها / والله خاله أنتي تردين مصلحه ابنج
هي ضحكت وكالت/ انتي هم تردين ابني
كومي اصعدي الغرفتج وجهالج خليهم الليله عندي
واريدج الصبح نازله منشنشه وتضحكين
كمت وصعدت الغرفتي الفوك
هي نظيفه دوم تنظفها مسرة لو لمى ،
واني مرات من يصيرلي مجال امسحها
محد ساكن بيها ،
بدلت نزله السرير بوحده جديده
مسحت الاخشاب بسرعه
شافتني لمى من رادت تنزل
اجتي ساعدتني ورتبت الغرفه احسن مني
وطلعتلي ثوب نوم حلو لا مشلح ولا مستور نص نص ، كالتلي اسبحي بسرعه حتى اشسورلج شعرج
واخليلج مكياج خفيف
ركضت بسرعه سبحت وطلعت
لكيتها ماسحه كاع الغرفه
ومعطرتها ، ومخليه بيها شموع
وناثره ورد وجكليت على السرير
ضحكت كتلها /هاي شمسويه
كالت/ هاي سوالف تفيد
تجذب الرجل للمصيدة النسائية
شسورلتلي شعري وخلته مفتوح
وبسرعه عدلت حواجبي
سوتهن بشفره الحلاقه مال رياجيل
والله بقن على ثخنهن
وحلوات ما خربن بس نظفتهن وحددتهن
خلتلي مكياج كلش بسيط
كالت / طارق ما يحب المكياج
ويضوج من الحمرة الطوخ
من يشوف وحده مخليه حمرة طوخ
يكول عليها /جنها قرد ماكل شونذر
انوب كالتلي /وين هذا عطرج الخابصني بي ؟؟
كتلها / جوة هو معطر الجسم الليزر الوردي
مااخلي غيره
ضحكت وكالت / يحب البساطة طه اغا
من عابتلج وعابلته على هيج ذوق خرائي
انزل اجيبه الج اغركي بي . لنشوف تاليتكم
وبعد الترتيبات عافتني لمى وراحت الغرفتها
شكد بقيت انتظر طارق وهو ماكو
خليت ودخلت جوة نزله السرير ونمت
شسويله ساعه صارت ب ١ بليل وهو ماكو
فزيت شبعانه نوم وذابحني الحر
نزله السرير ديباج ،
والثوب حرير مااعرف ستن ناعم حمسني
كعدت وحدي نايمه بالغرفه
باوعت للساعة ب ٥ الفجر
لميت شعري وبدلت هدومي ونزلت اشوف جهالي
وجان أشوف طارق نايم يم راس خالتي
ومخلي فقار بحظنه ،
انقهرت على روحي حضرت ورتبت
وتالي هو المايريدني
شكد عيب من روحي فشلتها ...
رحت شلت فقار على كيفي ونيمته بمكانه
وتمددت بصف خالتي
ووين مر الوكت يلا رجعت غفيت
كعدت خالتي تنده بيه
كالت / اكعدي يمه رضعي البنيه تصرخ جوعانه
كمت بالكوة اباوع للساعه ب ٩ الصبح
اخذت وهج وخليتها على صدري
طارق نايم والجهال هم نايمين
وحسين نايم بصف خالتي من هذيج الجهه
خالتي ضحكت وكالت/ خايبين مو صوجكم
صوجي أنا الردت أجمع راسين بالحلال
بس انتم مو شكول نعمه
شكو عايفين غرفتكم ونايمين يمي
جاوبها طارق وهو مغمض / فطوم خاتون
شوكت تبطلين هاي سالفتج
من تشوفين بشر نايم
ما تسوين هوسه ؟؟
وشكرا لجهودج لا تخافين
ما راحت هبائنا منثورا.
صعدت ولكيت الطير مالتج نايم
ومتلفلف بالأيزار وضام حتى راسه
لا تخافين اليوم اخذ حكي منه مربع
بس خل انام منتصر وماجد البارحه طلعوا روحي
كلساع واحد ساحلني
خالتي كالتله / كوووم اخذ مرتك واصعد فوك كمل نومتك شكو نايم يمي
كاللها / مابيه حيل
وجندي اليشتغل عندي تعبان
ماله خلك من الصبح
يطلع تعداد لساحة العراضات
خالتي شمرت عليه مخدة صغيره وكالتله /
كووم اصعد الغرفتك لو اخليك بحلك منتصر
كاللها / حجي يفيدج من اشبع نوم اسولف وياج
وانتي جنة امي لفي راسج ونامي
الظهر اعجنج عجن ظميلج حيل من هسه
خالتي بقت تهز بيدها كالتله/ مامنك فايده
اني بقيت اليوم كله ضايجه
والله فد فشله استحيت من روحي
ومن خالتي ومن لمى
وهو ولآ مهتم يدندن ويغني
ومخلي فقار على قلبه
الظهر ما صعدت الغرفتي
هو صعد نام وللعصر يلا نزل
وشرب جاي وبوجه البيت عمو حاتم
بعد ما تعشينا بس احنا النسوان
لان رياجيل البيت مقيمين بيت عمو حاتم
خالتي بقت تحجي عليه اصعد الغرفتي
عاندت ، وهي ولمى شكد بقن يلحن عليه
عاد أخذت فقار وصعدت
حتى اخلص من رزايلهن
بعدها ما صارت ساعه ب ١٠ واجى طارق
مكيف وفرحان ويلاعب فقار وحسبالك ولا يشوفني
شو اخذه ونزل جوة يم خالتي
صحت وراه/ وين ماخذ الولد
كالي / الحجيه تريده عدهم سالفه عشاير
يردولها حل
بسرعه نزله الخالتي وصعدلي
وقفل الباب، هو شيطان مال نسوان
شكد تعززت عليه ،
وشكد منعت روحي من عنده
بس هو بعد يكول للشيطان
اتكتر أني اعلم النسوان بمكانك ،
فشعرت حينما قبلني بأنني أمسيت
كقطرة من قطرات المطر
وكل حنين العالم أصدر من قلبه
وعندما تعانقت أولى حبّات المطر وهي قبلاته
مع صحرائي القاحلة وهي روحي المهشمه
أصدرت رائحة شهيّة المتمثله بتلك اللحظات الجميله
التي جمعتنا مع بعضنا البعض
فشبهتها برائحة عطر الشتاء الذي لا يضاها
فكل قطرة مطره منه
كانت ترسل إلى صحرائي القاحلة
قطرة لامعة محمله بالحنين الهادئ
فسكنت بداخلي حكاية مؤلمة
يكتمها قلبي إلبرئ وناشدت بها روحي السماء...
فأمسيت أتساءل هل تلك القطرات الرقيقة،
ورياح أشوقه وأحضانه
ستحمل إلى حياتي الصفراء القاحلة
الخضار البسيط المتمثل بأحلامي وأشواقي؟!
فأمسينا قلبين بجسدا واحد
بفضل ذلك العناق الذي تحول الى
مطرُ غزير من الهمسات العذبه
واللمسات الجميله
فأنغسلت به أحقاد الصدور
وسواد القلوب
أحبّت رائحة ذلك المطر
ونسيمه البارد الذي يراقص أغصان أشجاري
وموجه الهادىء الذي أنسابني بين يديه كماء البحر
فشعرت بأحظانه بوطني الجميل....
وبعد انتظار ذهب ذلك الشتاء
وجاءت أيام الصيف الحارّة،
حيث الشمس تأبى الرّحيل
فتساقطت دموعي معلنة عن اوجاعي وألآمي
فكانت بصدق ونقاء حبات المطر
كانت تخرج من أعماقي
أستذكرت حكايات لا تُحكى عصفت بداخلي
وأضنها ستعصف
كلما هبّت ريح الشتاء العاتية فتبعثرني ....
وبعد ذيج اللحظات الحلوة
كلش خفت وتذكرت يوم الحادث
بجيت ودفعته عني بس هو ما تركني
كالي / اتحمليني وأتحملج أصبري
خلي نكسر حاجز الخوف .
وباأسلوبه الحلو وطول خلكه وياي أحتواني،
بس شنو شبعته عض وخراميش
ما عافني بقى ضامني بحظنه ويمسح على راسي
شبعت بجي هم توجعت وهم خفت
شكد مر الوكت يلا غفيت ونمت على ايده
مااجذب حبيت قربه ، حبيت اسلوبه
حبيت كلماته وهمساته
بس الخوف اذاني
موقف هذاك اليوم ابد ميروح من ذاكرتي
شي صعب انساه او مستحيل بيوم انساه
كعدت الصبح متكسره تكسر
وهو ماادري شلون نايم رجل هنا وايد اهناك
ماخذ السرير كله اله همزين ما شامرني بالكاع
بس اتحركت وكمت ابدل
كالي / لا تسوين صوت
يالله شكد نومه خفيف بسرعه يكعد
بدلت على كيفي واخذت هدوم جديده
وسبحت بالحمام الفوك ومشطت ونزلت جوة
رحت بوجهي على جهالي لكيت لمى اطعم بيهم
خالتي بس طلعت الأربعين مالتهم بدت
اذوقهم الاكل ، تكول /انا كل جهالي هيج
بس يتعدى يوم الأربعين اذوقهم الأكل
والحمدلله هسه هم شويه كبروا ونشنشوا
صبحت على لمى وكعدت اتريك
مااحس الا خالتي
اجتي ولمزت شعري من جوة الربطة
كتلها / هااا خاله اشتبهتي اني مو مسره
كالت /من اليوم ورايح اذا نزلتي وشعرج يابس
اكسر اعظامج بالماسحة
يوميه اريدج تغسلين الصبح وتنزلين
حالج من حال اختج
ولا عدالج تقشمرين عليه وتغسلين جذب
حتى لا احجي عليج وازفج
اروح اسأل رجلج
واذا كال ماكو شي اشرج بالشمس
لمى ضحكت وكالت / قبل خاف لازمة سيطرة
بس على مسرة ، هسه اجاج السره
احسبي يوميه الصبح تتفتشين
ويويلج اذا نزلتي يابسه
هي تغططج بتانكي الرزايل
نزل طارق بعده مطفي
جان يكلها / يوم جنتج فاهيه هب بياض
شويه ضبيها كلشي ما محصل منها بس العض والخراميش
هي كالتله/ ميخالف اتحملها منا لأسبوع
ماانعدلت اشغل المساحه تعدل اعظامها
خليت وطفرت رحت بالصالة
لا طارق اليستحي ولا خالتي تبطل شقه
الحمد لله الايام القدمت عليه حلوة
طارق انسان واعي ودارس ومثقف
وهوايه اكبر من عندي بالعمر يفهمني
ويلكالي العذر لبعض تصرفاتي البعدها صغيره
مرات من يشاقه ويايه يكلي/ لو انا متزوج من صغري
بنتي هسه بعمرج
-
-
-
-
مسرة/ ماادري الدنيا شبيها
يوم تمشي حلو ، وعشره تمشي مر
من سقطت حملي واني روحي مفرفحه
على الحمل واريد جاهل
صح جهال سوار عندي و بحظني
بس مااحسهم يعوضوني بشعور الامومه
الاحس روحي محتاجتة
حتى يكملني ويتوجني بصفه المرأه الكاملة
حاجيت ساهرة تاخذني للسونار
اريد اشوف شعندي
لان العفو صارت عندي خربطة
عاد العصر اخذنا منتصر ورحنا للدكتوره
طلع عندي كيس على المبيض الايسر
كالتلي الدكتوره /هذا الكيس يمنع الحمل
ويخربط الهرمونات عندج
كتبتلي كومة أبر وعلاجات
اني استخدمتهن لو طاح حظي حشاكم
شعري كام يوكع اتورط امشطة
اعظامي كلها توجعني
مره ابرد اكوم ارجف ومره ابوخ واحتر
جسمي كله يوجعني كلساع احس بيه شي
وصارت عندي كآبة وبس أبجي
انوب زادت عندي الكآبه من تزوجت لمى
احسها اختي الثالثه هوايه تعودت عليها
وهي حبابه وطبعها حلو
وصاحبت السان وتعرف ادبر حالها
تعلمت منها هواية اشياء
خطيه بيوم حنتها شبعت بجي
مخليه وهج ومشارق بحظنها وتبوس بيهن وتبجي
وخالتي والله يمكن قبل اسبوع هي تبجي عليها
شكد صعبه من البنيه تعوف اهلها
وتروح بيت جديد وحياة جديدة
صح هاي سنة الحياة
بس أصعب شي أني اشوف هو هذا الانتقال
انوب هوايه ضجت لان ماكدرت اوكف ويه اساور
هي اختي ومن حقي افرح بيها
بس وين الحك وهي خطيه عذرتني
اطفر هنا وهناك بيت خالتي
وهم لمة وهوسه الأقرباء
وهاي كالت ،وهذيج حجت
وانوب يدقن قلبي باأسئلتهن
هااا ما حبلتي ؟؟
ماصار عندج شي بعد الطروح ؟؟
صدك انتي عاكر وما تخلفين بعد ؟
صدك عندج ورم على المبايض ؟
وتعال جيب واحد عنده خلك ما مدشن
ويكعد يسولف وياهن ويشرحلهن
بيوم زفه لمى وطلعتها من البيت
طارق بلكوه مصبر روحه
ولازم عيونه حتى ما يبجي كدام الناس
همام اصلا من البارحة واليوم
باقي بيت عمو حاتم ولا اجى للبيت
منتصر هو الطلعها من البيت وسلمها بيد حيدر
وهي مجلبه بخالتي تعالي ويايه
لا تعوفيني وحدي
صفنت عليها اللهم بدون حسد
هي مسنودة بااخوانها
ووجود امها
ورجلها ابن عمها وزواجهم عن قصه حب
وصارلها ثلاث سنوات من تعرفه
وكل اهلها شالوا همها من طلعت
ليش أحنا محد فكر بينا اني وخواتي من زوجونا
وزعونا سبايا على رياجيلهم
صح يجوز بتفكيرهم رادوا الستر النا
بس مو بهيج طريقه بقت توجع الروح
احس البيت فرغ من طلعت من عنده لمى
سوار حايره بجهالها
وطارق اهم شي عنده فقار مخلي على قلبه
والبنات على خالتي وسوار
وحسين اصلا هو هادئ ماعنده هوسه وحركه
وتبارك علواه لو شفناها ساعه باليوم
وهمام لو بالكليه لو بيت عمو حاتم
ومنتصر ياخذ شغله بالنهار
ويجيبه الليل تعبان
يلف راسه وينام
يعني هسه من حقي اصير أم
ويصير عندي جاهل ألتهي بي
بيوم كاعدين كلنا نتغدا
منتصر كالي/ من تخلصين اكلج
جيبيلي مفتاح بيت اهلج محتاجه بشغله ضروريه ....
