رواية كريات الدم السوداء الجزء الثاني الفصل الثامن والعشرون بقلم زحل شريف
--قدر--
-شكد مرينا بأزمات بس مديحه دوم تأخذ الأمور بساطه
تبجي شويه وتسكت أو بنص القهر تحشش ، بس هل مرة
مكسورة حيل متغيرة وكأنو مو هيه تحجي ودموعها تصب
مديحه::ماكسرني من گتلني ورغم قسى وياي وحتى
من راد يتأكد من كوني بنيه أو لا بس الي آذاني
من صعدت فاطمه وأنه بحاله تخزي وكل ضني راح تتعاطف وياي الا من نزعت نعالها وكتلتني تمنيت لو اموت بيدها ،تمنيت امي موجوده ،، مادافعت عن نفسي ولا بعدتها ماعرف شنو جان احساسي يمكن ردت اشوف منهم اسوء شي حتى مافكر بالبقاء عدهم اخر شي تفلت بوجهي ، بس الي فاجئني من دخل وعرف بيها كتلتني صار مثل الثور الهايج ماخله شي ماكسرة .
ــ يجوز تندم لأن اذاج.
مديحه::شيفيد الندم بعد السوا بيه .
ـ دنكت تمسح دموعها وتتحسر،، حاولت اهون عليها
لزمت أيدها امسح عليها بحنيه ،، كافي عليمن تبجين
خلص اعتبري الصار مصيبه من مصايب الصعده .
مديحه؛:توسلت بي يطفئ الضوى لأن فشلت
من نضراته الي تتفحص كل شبر بيه ماقبل والگرهني بي
اكثر من .
ـحجتها وغصت تبجي جربتها لحظني اششش كافي
انسي لاتبقين تعيدين الصار .
مديحه::بنفس اللحظه الي بعد عني بيها تفلت عليه
تخبل رجع عليه صفگني على حلگي حسيت اسناني
تفلشت ماوجعتن الطگه بس الوجع من رد عليه وكرر فعله.
ـ شبعت بجي من القهر بطني گامت توجعني
حست بيه نوجعت مسحت دموعها وجرتني لحظنها.
مديحه::يمعودة أنه مابجيت على روحي بگدچ
ـ ليش احنى هيج نتعذب؟
مديحه::انتي عندج ثابت خوش ولد .
ـ عدلت گعدتي ومسحت دموعي التفتت اباوع
خاف سونه تجي وتسمعنا .
مديحه::شكو بت الصخل شبيج تتلفتين
ـ شوفي انه مااحجي گدامها حتى لاتنقهر
بس احسه ،، يريد يلغي وجودها من حياتي. .
مديحه:: شلون يعني ؟
ـ ابسط شي من اريد إجيها لازم نتعارك
وكل مرة يعيد نفس الكلام ، اعتبريها متزوجه،، بغير محافظه
شلون هم يوميه لازم اوديج ،، عكس روحتي لبيت الحجي
مايمل ولايعترض .
مديحه::انتي ضلي مصرة على الموضوع
لحد مايمل ويقتنع، انو مستحيل تستغنين عن اختج
ـ هو هيج جاي اسوي دتعاي نامي حظنتها بحذر
أنه خايفه لا الجم اثر طگات طارق الها وهيه
خايفه على بطني غفينا واحنى نتحسر،، فزيت على أيدها تكعد بيه فكيت عيوني أتلفت اريد اتاكد حلم لو حقيقه
مديحه::شبيج يمعودة وكفتي گلبي هو أنه عايزة
ـ عدلت نفسي وگعدت اسالها،، احنى وين؟
مديحه::بالجنه.
ـ باوعتلها بزعل ضحكت وشكد مشتاقه لتحشيشها
لا صدك أنه اذكر نمنا بالصاله.
مديحه::اي وأنه دخلتج هنا لأن الباشا اجه
ـوبعده هنا لو راح ؟
مديحه::مادري عفتهم بالصاله ودخلت يمج.
-بيش الساعه؟
ـاعتقد بل٥
ـ گمت فتحت الباب اباوع الصاله ضلمه
مديت راسي اسمع صوت همس رديت باوعت لمديحه
اشرتلي شكو،، اگلج شو محد بس اسمع صوت
مديحه::معناها بعده .
ـ جا وينهم شو مابين منهم شي
مديحه:: تلكينه نايم على القنفه وحاشرها بحضنه
قصدي وحاظنها .
ـلو شما يصير ماتكدرين تلزمين السانج.
مديحه::دعوفيهم ليش تططعين رزق الرجال
ـ طبكت الباب ورجعت لفراشي، تدرين مرات
هو يكسر خاطري ،، لأن يحبها .
مديحه::وهيه هم تحبه.
ـ بس الكارثه إذا عرفوا أهله لو اريج مستحيل
تسكت .
مديحه::ولهذا السبب هيه تريده يبعد عنها.
ـ اگلج اريد اروح للحمام شلون؟انه احجي وهيه
شمرت الغطه وكعدت على حيلها ، سالتني .
مديحه::تردين ترحين.
ـ هزيت راسي اي وكل ضني تريد تطلع وياي .
مديحه::تكومين تفتحين الباب وقبل مااطلعين خلي حجابج
على راسج تمشين كم خطوى على اليسرى يصير الحمام گبالج فتحي الباب ودخلي شخشخي ومن ترجعين لهنا طفي الضوى وياج .
-حاجتها وجرت الغطى على وجها ضليت فاگه
حلگي ،، حجيت بصوت ناصي هم لو بيج مكان صاحي اطكج وافوخ گلبي.
مديحه::ابن الطحال فلشني تفلش بس هينه أعلمه.
ـ عفتها وكمت طلعت امشي على أطراف أصابعي
مثل الحرامي بسرعه وصلت للحمام ورجعت،، شالت راسها
باوعتلي .
مديحه::ها شعدج واگفه بعد دطفي الضوى .
ـ مشتهيه ثلج .
مديحه::حتى نساوتج مگلوبي، النسوان تشتهي
اگله انتي حاطه إلزلمه تمشين بي وتگرطين ثلج.
ـ خرب ذكرتيني صدك مشتهيه اشم عطرة
نعلعه المن حجيتي وهسه وين الگاه واشمه.
مديحه::تنامين لو اگوم اسمط ابوج
ـ تحجي من ورا الغطى ادنيت عليها سحبته منها
ادري تحاجيني من ورا الباب ،، گعدت تضحك اي دكعدي
يمعودة ابد مايلوگلج السكته.
مديحه::كسر كلشي بيه .
ـاووو عليمن بجيتي يولي ؟
مديحه::تمنيت يحبني ،تمنيت اعيش مثل البشر تدرين اول مرة شفت بيتهم بنيت احلام ،،اغمض عيني واتخيل نفسي
انضف واطبخ ومن اكمل ادخل أسبح وانتضرة يجي ومن اشوف سيارته اطلع اتلگاه من الباب ويحظني.
ـ تحجي ودموعها تصب ،، متت قهر عليها
بس ماردت تبقى بهل حزن طكيتها وأنه اضحك
باوعتلي متفاجئه صحت بيها مو جنج منحرفه
مديحه::لعب روحي حتى من الانحراف.
ـ لاتنقهرين اكيد رب العالمين يعوضج.
مديحه::ماريد شي بعد .
ـ تحسرت بصوت عالي دنكت عليها بداعتي كافي
مسحي ادموعج وگومي وياي انجيب ثلج ، عفيه
رحمه لامج ،عضت اصبعها وحجت بصوت ناصي.
مديحه::ولج الرجال نايم بله خالع لو اختج گالبه دقله::
ـجا شلون ؟ التفتت اباوع لنقالي دخلت على رسائل
لكيته گاتبلي ،مشتاقلج ،گلت اراسله ومن يگعد الصبح يشوفها دزيتله هم أنه مشتاقتلك شو بس وصلت قرأها
شنو جان كاعد بالوات ساب ،، التفتت على مديحه
هزت راسها شكو حجيتلها اكلج شعنده لحد الآن كاعد
مديحه::رجال لوحده والشيطان شاطر وبنات الحلال
هواي وتريدن الصدك ثابت مايتفوت اصلا
ـ سحبت المخدة وكفختها ايا حقيرة بدال
ماتهديني توزيني.
مديحه::نصيحه لاتعوفين رجلج لوحده ترى تتندمين
شوفي مو قصدي يخون بس خاف .
ـ اسكتي لا خاف ولا شي اصلا ثابت ماعنده هاي السوالف.
مديحه::لا تخسرينه لأن خوش ولد ويحبج
ـ قطع حديثنا صوت النقال فتحت خط سألني بقلق.
ثابت::ليش گاعده خو مابيج شي؟
-لا بس انته شعندك گاعد ؟
ثابت::ماگدرت انام .
ـ ليش؟
ثابت::لأن مشتاقلج وتعودت وجودج بحظني
ـ التفتت على مديحه، رجعت تمددت وغطت راسها
سكتت استمع لصوت أنفاسه رد گال .
ثابت::شلونها مديحه ؟
ـ زينه .
ـ تمام وانتي ؟
ـ مشتهيه ثلج واريد اشمك.
ثابت::هاي ماكو اسهل منها حضري نفسج هسه اجيج
وبالنسبه للثلج اشتريلج قالب .
ـ اي تعال .
ثابت::من ارمشلج اطلعي،، يله روحي حضري نفسج
ـلحظه شنو تريد تأخذني ؟
ثابت:: اي غير تردين تمشيني ؟
ـاي تعال هنا .
ثابت::وين اجي شبيج غير نروح لبيتنا خلص
شفتي اختج ومديحه بعد شكو ؟
ـاريد ابقى بعد .
ثابت::خوش ضلي .
ـ اي تعال أكلك مشتهيه عطرك
ثابت ::لا يأبه الي يريدنا يجينا .
ـ يعني شنو ؟
ثابت::يعني باي راح انام.
ـ سده بوجهي شمرت النقال وباوعت لمديحه
تهتز جوى الغطى ادنيت طكيتها
مديحه::خرب ابوج بت الصخل شبيج مو جسمي كله
يوجعني ثول البلگه .
ـ تحجي وكوى لازمه ضحكتها درت وجهي بزعل
أدنت عليه ،دفعتها إذا تردين تصالحيني كومي جيبيلي ثلج
مديحه::منين اجيب وام اعطوب والباجة مسويلهم كعدت
عرب بالصاله.
ـولج ماهمه بس اسمع صوت سوالف همس
مديحه::دكومي أنه وياج نطلع عاد مو وحدي اتفشل.
ـ كمت فتحنا الباب على كيف الصاله ضلمه
وضوء خفيف واعتقد مال نقال التفتت عليه شاورتني
مديحه::يمكن يتابعون فلم .
ـ اي ويينهم شو مايبينون.
مديحه::اكلج يجوز بالغرفه وهذا نقال نسو مشتغل.
ـ طلعنا نمشي ونتلفت ركزت على التخم ماكو
تقربنا شويه وضح الصوت والضاهر كاعدين بالكاع
ومسندين نفسهم على التخم تقربنا أكثر سونه تحجي بعبرة
سونه::أنه مثل هاي الحقيقه المرفوضه.
الباشا::انتي واقع مفروض عليه أعيشه بكل حالاته
اختلاف راقي وشيء غريب .
ـ جرتني مديحه رجعنا للغرفه طبكت الباب وتعمدت
تطلع صوت قاصدة تنبهم شويه واجت سونه
دخلت تباوعلنا بخوف كبل خلت أيدها على بطني.
سونه::ها خو مابيج شي ؟
مديحه::عدكم غرفه وكعدو تغازلو بيها.
ـ التفتت عليها وهاي استلمتها.
مديحه::اختج نساوتها مثل طناگيرها تريد ثلج.
سونه::اي هسه اجيبلج وطلعن ترى احنى كاعدين.
مديحه::اي شفناكم .
ـ هزت أيدها وطلعت ماراضيه شويه وصاح علينا الباشا.
الباشا::تعالن يابه .
ـ مديحه ماقبلت تطلع لبست شال وطلعت
لكيته گاعد شكد احب اسلوبه احس هو افضل واحد بيت
الحجي رغم همه يحجون عليه لأن يشرب بس أنه اشوف
غير شي حنين ومحترم اشرلي كعدت كباله اجت سونه
جايبه طاسه بيها ثلج خلتها بحظني باوعلي وضحك
انحرجت ردت اكوم ماقبل .
الباشا::دتعاي يأبه وين رايحه .
ـاخذ راحتك أنه يم مديحه .
الباشا::صيحيها اريدها.
ـ كوى قنعت تطلع سلم عليها .
الباشا::شوفي يأبه أنه مااكلج الصار أمر عادي بس انتي
هم غلطانه المفروض من تزوجتي تغيرين رقمج وتنهين
اي شيء بالماضي .
مديحه::ماعندي تواصل ويا أحد وماتوقعت يخابرني محابس لأن جان يراسلني من رقمه الدولي وحضرته
يعني مو ذنبي إذا هو نذل
الباشا::صح وأنه والحجي وثابت ماقبلنا ولعبنا بي لعب
ضل يتعذر وهذا دليل على أنو هو رايدج لأن لو مو هيج
جان گال اطلك وفضت راحت بس الولد مستقتل.
مديحه::مانرهم بعد اصلا قبل المشكله احنى
مامتفقين هو مابي اذيه ولا قصر وياي بس أمه دمرتني
الباشا::راح اسألج وجاوبيني بصراحه
ـ هزت راسها اي .
الباشا::اخر ايام لامج الله يرحمها حسب ما سمعت
فقدت الذاكرة وحتى انتي نستج ، صح لو لا
مديحه::اي اصلا من جبتها من دار المسنين
تكلي رجعيني ليش بگتيني.
الباشا::وانتي رجعتيها لو تحملتيها .
ـ شهكت مديحه تبجي باوعلها ورد
الباشا::وأنه متاكد هسه تتمنين لو باقيه وشما تكون حالتها
انتي تتحمليها
مديحه::ياريت لو بس نفسها وياي جان كابلتها وكعدت
الباشا::وطارق نفس الشي هاي أمه لو شما سوت
هو مجبور يتحملها وهل شي يثبت معدنه اصيل،، مااگلج
ارجعي لا ابقي سنه خل يجي بدال المرة الف .
مديحه::ماريده بعد خل يطلگني.
الباشا::لاتتخذين قرار بساعة غضب وان مارجعتي
تبقين هنا معززة مكرمة حالج حال البنات.
ـ هزت راسها اي وكامت باوعلي وضحك::
الباشا::ها ترحين اخذج بطريقي اوصلج لبيتج
ـ لا اريد ابقى بس اليوم والله مشتاقه لمديحه.
الباشا::ابقي يأبه عسى ماتبقين شهر .
ـ بس ثابت ، قاطعني .
الباشا::أنه احجي ويا.
ـشكرا شكرا باشا.
الباشا::تدلل قدرنا .
ـحجاها وكام ،
الباشا::يله يأبه أخذوا راحتكم
ـ طلع وأحنى استلمنا سونه تصنيف
مديحه::تترومسون وأحنى ضالين محبوسين بالغرفه
سونه::طلع السانج مو أمس تتبكبكين
مديحه::وانتي متشمته بيه
ـ كفختها وكامت سوت اگل وجابته
للضهر خابرني ثابت كال طارق جاي،، مديحه كالتلهم
ابد ماريده بعد يومين من توجداي يم سونه اجه عليه رجعت لبيتي ،،نزلني وراح وشكد اكره هل حاله من ابقى لوحدي رغم حاولت انزل الطفل بس شعور بداخلي
يحسسني بالمسؤليه بحيث اتحرك بحذر نضف وسبحت
اجه بالليل جايب ويا بيزا , تلكيته حظني يبوس بيه .
5
ثابت::بعد ماكو مبيت برا .
ـ ترى اختي ماعوفها.
ثابت::وأنه مااكدر بلياج اضوج من ادخل للبيت وماشوفج
ـ خذله مشوار هو يتحلف بيه تعدت فترة أنه ابيتي
حتى من الروح لبيت الحجي شويه ونرجع وهو هم مايتاخر يجي من وكت حاولت اتاجوز احلامي وتفكيري بالجينات، بطني بدت تگبر ،،خاله كل ماتنزل للسوك تجيبلي ملابس الطفل جهزت بناتي ولادي بسبب رفض ثابت انو نعرف جنس،،الجنين ، وهو يكول كون تبقين حامل مكيف على لبسي لبدلات الحوامل ولان اشبگ بي .
ثابت::احب هاي البدلات عليج .
ـ ورغم يعرف مااتنازل عن روحتي لسونه
بس لازم يخاذله ساعه يحجي وبقيت كل خميس اروح والجمعه بليل يجي عليه .
ثابت::ترى إذا جبتي ماخلي ابني يروح وياج.
ـ اي خوش خلي يمك،،وهيج نخلصها بكل مرة
الاحلام مافكتني وأكعد من نومي مرعوبه ،،امن نفسي بالدعاء ،،البنات صبح وليل يتصلن بيه
مديحه::ها ام الخيوط شخبارج.
ـزينه .
سونه::قدر شكد صار عليج ؟
ـ ماعرف بس على حساب نغم أنه بالسابع .
مديحه::جا شمنتضرة ماترحين السونار ؟
ـ ثابت مايقبل يكول تضيع الفرحه بالمولد
شيجي هلا بي،، المهم انتن شنو وضعجن.
مديحه::أنه مخلصتها اليل كله محبوسه بالغرفه
لان ام اعطوب والباجة ماتحلالهم السوالف اله بالصاله
ـ صاحت سونه مسمعتني .
سونه::جذابه صار كم يوم ماجاي بس يخابر يكول
خطيه مديحه تتقيد .
ـ ترى طارق كل يوم يجي للحجي ،، سكتت مديحه
شويه ونهيت مكالمتي وياهن،، كملت تنضيف وسبحت
لليل اجه ويخلصها وياي غزل لحد ما انام.
ـ كعدت على بوساته أيده على بطني .
ثابت::صباح الورد .
ـ حظنته أنته صباحي .
ثابت::يا يأبه .
ـ يبتلي الي يتغزل بيك كافي عوفني ،،كوى خلصت روحي
بين ماجهزت الريوك طلع هو مبدل باوعتله هز رأسه شكو
ليش كاشخ هيج وين رايح.
ثابت::عندي شغل واحتمال اتاخر اوديج لبيت الحجي
ـوالشغل هيج يروحوله.
ثابت::يغار الحلو يأبه غير ماشوف غيرج.
ـ قشمرني قشمرني .
ثابت::هو انتي تتقشمرين دمشي بدلي يله.
ـ حضرت نفسي وطلعنا تلكتني بنين.
بنين::اي عيني من لكه مديحه نسى بنينه.
ـ.لا شلون انساج اصلا انتي اختي .
ـ سلمت على الكل هو أخذ الحجي وطلع للمغرب وهو ماكو
انشغلت ويا البنات رغم اريج تتصيد الفرص حتى تغثني بس مااهتميت واكفين أنه وبنين بالمطبخ واندك الجرس
محد موجود من الولد خاله تصلي انتضرناها تكمل
طلعت واحنى لزمنا باب المطبخ شويه ودخلت فاطمه تفاجئت بيها بقينا نباوع راحت خاله فتحت باب الإستقبال
ورجعت لباب البيت دخل طارق مدنك دخلتهم خاله ،التفتت على بنين الي حجت بدون ماتنتبه.
بنين::شخصيه وحلو .
ـ اي طارق حلو يشبه عمو فاروق،، صاحت علينا نغم
نغم؛:دتعالن لا تلگفجن خاله وتترزلن ويا كلمتها
اجت اريج من الصاله .
اريج::منو اجه ؟
بنين::زوج مديحه وأمه.
ـ هزت أيدها وجرت الكرسي وكعدت اجت خاله.
وفيه:: ابنينه حضري ماي وجاي وخابري ابوج وانتي قيادة
لبسي صايتج وتعاي يمي ماما
ـ خاف مايقبل ثابت اكعد يمهم.
وفيه::أنه موجودة شنو ميقبل .
ـ ركضت لبست ولفيت شالي ودخلت عليهم سلمت
رد وهو مدنك شكد مشتاقتله رغم گلبي شايل عليه بسبب مديحه بس يبقى الاخ الي عرفته فاطمه تباوعلي بوستها وكعدت بصف خاله.
وفيه::هسه يجون الولد والحجي .
ـ سألتني فاطمه.
فاطمه::اي كالو حامل شكد عليج وشنو بيج
ـ خاله تولت الرد .
وفيه::احنى مانفكر ولد لو بنت اهم شي
تمام الخلقه .
فاطمه::اي هي هاي الخلقه ،، وشلون اذا طلع
ـ كح طارق منبها واعرف جانت متقصدة بكلامها
رفعت راسي باوعتله غمض عيونه بأاسف عاد خاله
فتحت موضوع وياهم.
وفيه::يا ام طارق الرجال يجور ويتعصب بس يبقى
دور الأم الي تحاول تهدء الوضع البنيه مستهضمه وحيل
شايله بخاطرها عليكم .
فاطمه::والله لو باقيه عليه فلا اجي بس هو جبرني
وفيه::معناها البنيه مالها رجعه وياكم مادامج مارايدتها
ماراح تستقر ليش ترجعونها ونوب يصير طفل وينظم
فاطمه::اصلا هل زواج غلط.
ـ باوعتلها احس تتعمد تثيرني وهو يخزر
بيها يريدها تسكت،، غيرت الموضوع خاله ،، وجهت كلامها
لطارق .
وفيه::شوف ياماما الرجل الشهم يكون لزوجته أهل
ـ هز رأسه اي،، بعدنا نسولف ودخل الباشا سلم .
الباشا::حياكم الله .
ـ سلم عليه طارق بحرارة ترخصنا احنى
واخذنا فاطمه ويانا للصاله اجن البنات سلمن عليها،،وطلعن
بس اريج بقت كاعده شويه واجت نغم جايبه ضيافه وفاطمه تباوعلهن ضلت خاله تحجي وياها .
وفيه::البنيه يتيمه والج بيها اجر ،،وانتي ماعندج بت
لو كاسبتها ومعاملتها بطيب ،، وبلكي ربج يكتبلهم نصيب
باأطفال ،، يملون عليكم البيت .
ـ فزت فاطمه معترضه.
فاطمه::اسم الله نوب يخلف من هاي .
وفيه::وليش ماتخلف جا المن متزوجين هاي سنه الحياة
وبعدين المفروض هل شي يفرحج لأن وليدج وحيد خلي
يخلف ويسويله عاضه بلكي ربج يجبر خاطرة بولد يخاوي
ـ رديت عليها أنه ،، جنتي تتمنين يتزوج ويخلف وكم مرة
عرستيله وما وحده بقت وشكد حاولتي وعمو فاروق كالج
مااظلم بنات الناس وهسه هو رايدها .
فاطمه::اي يزوج الي تناسبه خو مو يخلف من مديحه
-جا ليش خطبتوها ؟
فاطمه:: من البدايه أنه مامقتنعه بهل زواج
ـ خلص المن جايين بعد خلي ابنج يطلگها ،، حجيت بعصبيه
اشرتلي خاله اسكت .
وفيه::كلام قدر صح خلصو البنت وكلمن يذكر صاحبه بخير
فاطمه:'لو عليه اشمر وراها ١٠ حجارات مو سبعه بس هو
مجلب بيها .
وفيه::وانتي شنو الي يرضيج غير سعادته مادامه ريدها
فاطمه::يعني لو ابنج تقبلين يتزوج هيج وحده
وفيه::وشبيها ترى البنات خوش بنات والدليل هاي قيادة
فاطمه::اي ماخذتيها لابنج .
وفيه::ثابت اعز من ولدي ،، قبل مايكون حماية هو ابن عمي
ربيته بحضني أحسبه ابني البچر ، وهاي احنى ننتضر قدورة
تولد ونحسب لايامها .
فاطمه::بالنسبه الي مااكدر اتقبل مديحه لابني
وحتى وإن اصر على رجوعها أنه شرطت عليه يتزوج
غيرها اريد اطفال من وحده الها اصل وأهل
ـ ابتسمت اريج باستفزاز وكامت من يمنا
ضلت فاطمه تحجي وشكد حاولت وياها خاله بس أنه اعرف
طبعها ومدام ماحبت مديحه فمستحيل تخليها ترتاح كمت
اريد اخابر سونه دخلت للمطبخ واسمع اريج تحجي ويا نغم
اريج::اي حقها تريد ام لاحفادها تتباها بنسبها
خو مو تأخذ كاوليه .
نغم:::مو ذنبها هذا أصلها اهم شي البنيه خوش بنيه.
ـ دايرات وجهن للباب ويحجن .
اريج::وإذا اكلج حتى خالو هم مامقتنع بقدر وحتى سمعت
على أساس شارط على ثابت انو يتزوج عليها حتى يخلف
لان خايفين من جينات الوارثه مال ابو قدر .
نغم::منين جبتي هل كلام اصلا عمو فرحان بحملها.
اريج::اكلج متأكدة امي كالت .
ـ هنه يحجن وأنه دموعي صبت انسحبت بدون مايحسن
عليه ركضت للحمام غسلت وجهي وطلعت كاتمه عبرتي بصدري، رديت يم خاله وفاطمه لكيتها تحجي على امي
عاد طلعت ضيم السمعته بيها ،، شوفي لخاطر انتي بيتنا
راح أعديها ، جايه على جنتج لاتخبطين بالكلام اصلا
مديحه هواي عليج هو انتي منو يعاشرج مل فاروق من
سوادينج وهسه استلمتي طارق خلص روحي شوفيله وحده
من مستواج سحارة تحرگ بخور،، على صوتي اجن البنات كامت خاله جرتني طلعتني من الصاله.
وفيه::عيب ماما مهما كان هيه ابيتنا شلون تتجاوزين عليها.
ـ ماتشوفيها شلون تحجي على امي .
وفيه::اششش صوتج عيب .ماتوقعتها منج ياقدر
تعاي بنين اخذيها لغرفتج
ـ اجت بنين اخذتني لغرفتها،،بجيت احس نار صدري
تمنيت سونه يمي وترزلها .
بنين::شوفي ماعرف شنو نوع العلاقه بين مديحه
وطارق ولا فهمت شنو سبب مشكلتهم بس الي فهمته
انو هو رايدها والدليل جاب أمه رغم رفضها وهذا الشي
يثبت محبته لمديحه ولو الي كلام وياها اكلها انطي فرصه
ـ رفعت راسي باوعتلها.
بنين::بناتنا كلهن تزوجن عند عيال واجهن مشاكل
من العمه والحمات بس جانن يكولن اهم شي رجلي يحبني
ـ مو مثل فاطمه انتي ماتعرفيها أنه معاشرتها تملل
مريضه تشك بكل شيء وماتتعب من خلق المشاكل
اذا مالكت سبب لمشكله تعارك نفسها
بنين::بس مديحه مو من البنات الفقيرة واعتقد ماتصعب
عليها فاطمه وتكدر تكسب طارق وتعيش ويا وتتجاهل تصرفات أمه .
ـسكتت شويه ودخلت اريج .سالتها بنين
بنين::ها راحوا
اريج::اي طبعا يروحون خو مايبقون بعد السوته قدر
ـرديت عليها وأنه شسويتلها لبيتها.
اريج:: اشكد وكحه انتي تتجاوزين على المرة وهيه
ابيتنا ولو مالومج شمعرفج بهيج أمور .
ـ صاحت بيها بنين .
بنين:: المرة تجاوزت على امها اي وحده مكانها ماتسكت .
ـ كمت على حيلي وكفت كبالها ،، وحجيت
وانتي شكو ليش ادخلين نفسج بشيء مايخصج
اريج::ايخصني المرة ضيفه بيتنا.
ـ هم ميخصج اذا غلطت خاله تحاسبني،حجيتها ،، وطلعت للمطبخ تبعتني ادردم ،،اندفع باب المطبخ ودخل ثابت هز رأسه شكو دنكت امسح بدموعي ،بعدني مارادة حجت اريج .
اريج::اذا هيج كارهتهم شكو دخلتي استقبلتهم
اشو طرتي من الفرح من شفتيهم ضليتي لازمه باب
المطبخ ماصدكتي خاله كالتلج تعاي سلمي .
ـ التفتت عليها مصدومه وهو واكف يباوعلنا
على صوتها اجت خاله .
وفيه::شكو ليش صوتجن عالي .
ـ نغم وبنين ضلن ساكتات وثابت يباوعلي ،التفتت على خاله وحجيت ،، ترى خاله كالتالي تعاي سلمي،هز رأسه تمام بس وجه انطعن دار وجها وهو متوجه للاستقبال گال.
ثابت::حضري نفسج نروح للبيت بس خل اشوف الحجي
ـ التفتت على خاله غمزتلي بمعنى لا تخافين،، بقيت كاعدة
بالمطبخ شويه ودز عليه الحجي رحت لكيته بس هو ثابت ماكو سلمت وكعدت منتضرته يحجي رفعه رأسه باوعلي
ابو اسعد::تدرين اعتبرج بنتي ولهذا السبب راح
احجي وياج كأب تجاوزج على ام طارق غلط مهما كان
هيه ضيفه لو شما حجت المفروض ماتحجين جان ماكعدتي يمها ،
ــ عمو هيه الي بدت خو مااسمعها تحجي على امي واسكت
ابو اسعد::مرة محترك گلبها على ابنها. المفروض
احنى نحاول نقنعها ونخجلها حتى نصلح بينهم .
ـ وشبي ابنها قابل مديحه كاتلته، هيه جايه تعتذر
حتى ترجع جنتها ،، شو نزلت على امي حجي.
ابو اسعد::وهيه اصلا ماجانت رايدة هل زواج
وانتي تدرين بس ابنها جبرها .
ـوعليمن مسوين عليها منيه خلص يطلكها،، ويرضي أمه
ابو اسعد::وهذا حل برايج ؟
ـ جايه تكول مامقتنعه بيها وماتريدها تخلف ومخليه ابالها تزوجه ،، خو مانتوسلها ؟
ابو اسعد::لا بس نحاول نقنعها،،خو مانطلكها بالنسبه
لمديحه طارق فرصه لأن إذا أطلكت وين تروح.
ـ جنت اكول ممكن ترجع بس بعد كلامها الافضل
يطلكون ،، تبقى كاعده يم سونه.
ابو اسعد::وتشوفين هل شي صح ؟
بنات لوحدهن اصلا أنه كعدت اختج مامقتنع بيها
ـ خو ماتعوفها وبعدين شبيهن اذا كعدن وحدهن
يعني ماكو بنات اهلهن ماتو وبقن شنسوي مثل .
ابو اسعد::شوفي يأبه اول شي البنيه لاتقربجن ولا
الها صله بيجن أما اختج كعدتها وحدها غلط وأنه
اكول إذا رجعت مديحه حاولي تقنعين اختج تجي تسكن وياج افضل.
ـ ماراح تقبل اصلا هيه جانت ناويه تبيع وتأخذ بغير مكان
بس لخاطري بقت،، باوعلي وهز رأسه تمام كمت وأنه احجي
من رخصتك عمو إذا ماريد مني شي بعد رد وهو يستغفر.
ابو اسعد:: شوفي يأبه الرجال،،يخلص نهارة بالعمل ومن يرجع يريد الي يتلكاه بلكمه طيبه مو يلكه بيته فارغ .
ـ مارايحه يوميه عمو احنى متفقين كل خميس ابات يمها.
ابو اسعد::حاولي تتأقلمين على حياتج گأمرأة متزوجه
لا تربطين حياتج بااختج يعني لو هيه باقيه بالسعوديه شلون .
ـ باوعتله وهل كلمه ثابت هم حجاها قبل،، رديت بعبرة
عمو اختي حاليا قريبه عليه ،، فلا تتوقعون بيوم استغني عنها ولا اقطع صلتي بيها وأنه مامقصرة ويا ثابت واساسا
احنى مخلصين كل وقتنا يمكم ،،خو هيه هم الها حق بيه
يله من رخصتك،، حجيتها وطلعت لكيت خاله تجهز عشى
جريت جنطتي طلعت نقالي اتصلت بي وبس فتح خط
گتله تعال رجعني للبيت ،،شويه واجه مانطيته مجال يسأل ترخصت من خاله وطلعت لحكني يدردم من قهري مانتبهت
بحيث وصلت للباب يله التفتت هو وراي فتح الباب دخلنا.
دخلت الغرفه طبكت الباب ضل يحجي .
ثابت::نوب انتي الماراضيه لأن سكتت على سوايتج.
ـ صحت مسمعته شسويت تردوني اسكت وهيه تحجي على امي و تقلل من قيمتنا جايه ترجع جنتها لو تعيرها بااصلها
ثابت::حتى لو المفروض ماتردين عليها مرة جبيرة
وتعرفين وضعها انسانه مريضه .
ـ اي ولازم نتحمل المريض الي يعيرنا بااصلنا
شوف خل أكلك لأجبرناكم ولا جذبنا عرفتونا بالصعده
وطلعتونا بيدكم من نص الضيم ، بس مال ادوسون علينا
لا مانسكت.
ثابت::هو منو محاجيج مرة وجنتها اول وتالي ينصلحون
خليج محضر خير لو لاتدخلين .
ـ جريت جنطه لميت ملابسي ، فتحت الباب باوعلي مستغرب
ثابت::ها خير شو جنطه ؟
ـ اي احسن اطلع من حياتك .
ـراد يحظني بعدته.
ثابت::شبيج يمعودة لا يصير بيج شي انتبهي لنفسج
ـ صرخت ياريت ايصير واموت واخلص تعبت، حرام عليكم شنو ذنبي ليش هيج ليش نوب تريد تزوج عليه جا ماخليتني. احمل جان كتلي اريد طفل من غيرج أصله مو مثل اصلج .
ثابت::اششش اهدي شو تعاي كعدي ،شنو هل كلام
ـ جرني كعدني وهو يحجي .
ثابت::ترى إذا ابني أتاذة ازعل.
ـوعلى أساس أنته رايده.
ثابت::اكيد ومنتضر جته واحسب الايام لشوفته
ـ باوعتله ودرت وجهي .
ثابت ::ها شو ماراضيه .
ـ شوف خل أكلك شي خاف مفكر تزوج عليها
وروح امي ماابقى عندك دقيقه .
ثابت::وهاي سالفه جديدة ؟
-لا مو جديدة ولاتغشم نفسك عود ما تدري ترى اعرف
اتفاقك ويا الحجي
ثابت::يا اتفاق ؟
ـ حجيتله عن كلام اريج هز رأسه بأسف
ثابت::وانتي تصدكين بكل شي ينگال
ـ بس هيه حجت وماجانت تعرف أنه وراها.
ثابت::وذا أنه اگلج مستحيل بيوم اتزوج عليج؟
ـ واذا الحجي گالك ؟
ثابت::بغض النضر عن كل شيء بس نخلي احتمال
انو يعرض عليه لكن مايفرض قدر الحجي مو ضالم ابد
ـواذا
ثابت ::اششش لا تعبين نفسج بهيج أمور .
ـ خلصت ليلي بجي نام هو بعد ماتعب من الكلام وياي
سحبت روحي من يمه طلعت افتر بالبيت احس بروحي
مختنكه طلعت للحديقه رفعت راسي للسما بجيت يارب
ارحم حالي لو تموتني أنه والي بطني لو تنطيني طفل يشبه أهله لاتشمت بيه الناس تعبت ياربي ،،،،جذثيت على ركبي
نزلت للكاع بتعب دنكت اتلمس بطني احس الالم بصفحتي
كرفصت روحي ابجي وادعي ،، ماحسيت اله بيد جرتني
صرخت بخوف رفعت راسي وهو واكف ويحجي
ثابت::وتالي تبقين هيج ترى تبعتيني شبيج.
ـانتم اشبيكم انتم الي تعبتونا شبيدي إذا ابوي راضي
يعني إذا ابني طلع يشبه اهلي.
ثابت:: انذبه بالشط كافي عاد شنو هل كلام
مللتني شيخلص هل كم شهر وانعل غيرته الي يخليج تحبلين بعد .
ـ صرخت اي طبعا ماتخليني احمل خو ماتريد مني
اصلا مخطط أنته والحجي خلص عوفني اروح لأختي
وانته شوفلك وحده مثل اصلك .
ثابت::دكومي دخلي عود من تجيبين اطيني ابني وروحي.
ـ باوعتله متفاجئه يعني ناوي تأخذه مني لا والله اقتله
واقتل نفسي ومانطيكيا..
ثابت::دتعاي طبي .
حجاها ولزمني من ايدي دفعته ومشيت ويا ماجاي اعبر
من الحديقه عثرت بالصونده مال الماي وطحت ،،صرخت
بصوت عالي التفت عليه مصدوم راد يكومني ماكدرت احس بطني تملخت ضل هو محتار يتلفت دنكت شالني،،دخلني للغرفه نزلني للجربايه،،وانه اصرخ حسيت ملابسي نكعت
وهو يتلفت محتار .
ثابت::بس اهدي اهدي خل اخابر ام اسعد .
ـ خابر سونه اريد اختي .
ثابت::اي اي ،،بس اهدي يأبه .
__سلاسل__
_رغم إلحاح الباشا وثابت على رجوع مديحه
وطارق الي مللني باتصالاته بس ماادخلت ولا كلتلها رجعي وشكد حاولو انو ياخذوها تقابله بيت الحجي رفضت ماردت
ينضغط عليها واحتمال يحرجوها ويجوز يسمعونها كلام
بحيث تنجبر ترجع خليتها براحتها ،، وجودها سدا عليه الوحشه ،، عزلت غرفتي وطلعت لكيتها لازمه النقال وتباوع
بتركيز مديت راسي ،، شفتها مطلعه هل برنامج كفختها
ولج مو رعبتيني من هل غضب شكو تباوعين عليه
3
مديحه::ولج خاطف ابن جيرانهم وقاتله ودافنه
ويدور ويا أهله لا ونوب واكف بفاتحته .
ـ عجيب هيج صايرة عدنا شغلات
ثاري مو بس الصعده.
مديحه::ياصعده ولج مصايب جرائم توكف العقل
ـوهيج تخلص نهارها
الباشا اجته رحمه سالفة محابس ورفض افتح
الصالون بحجة اخاف عليج ،،وانه بسبب هل برنامج الي مديحه تباوعله ولازم اشوف وياها صرت خاف ،كلش
حتى هيه ماخليها تطلع للأسواق شنو نحتاج نخابر مولي
اعزل بالمطبخ وهيه يمي تحجي ويا قدر بالنقال،من سالتها تفاجئت من كالت بالسابع نهت مكالمتها ، التفتت عليها وانه اسأل شبيها الايام تركض رگض .
مديحه::وكله من عمرنا .
ـ شلون عمر خلص بالألم نستجدي منه الفرح كوه.
مديحه::لشوكت تبقين هيج ؟
ـ مافهمت ؟
مديحه::وراح اعتبر نفسي غبيه واصدك مافهمتي
واگلج شنو نهاية البينج وبين الباشا .
ـ طبكت باب الگاونتر وكمت وهيه وراي.
مديحه::ها سكتي؟
ـ شجاوبج هذا حالي گدامج شنو البيدي وتردين الصدك
فكرت بكلامج خليني بحمايته الدنيا صايرة تخوف
واختفاء محابس مايطمن،، وهم بسبب هذا البرنامج
الي خليتيني اليل كله اباوع للجرائم الي تصير
مديحه::اي هذا الصح تعاي ابوسج .
ـ بالعيد نتباوس .
مديحه::صدك ولج ماتخلينا نروح للزيارة.
ـ غير كون يقبل .
مديحه::دخابري كليله جان طلعنا باجر.
-ولو ادري راح يكول لا بس انجرب كامت جابت
نقالي اطينيا وكعدت گبالي دكيت رد وهو يتغزل
الباشا::هلا بالعشك.
ـ كلت مادام مزاجه تمام خل احجي ،، تحمحمت
وحجيت بدلع ،، اگول باشا .
الباشا::گولي يابه ريت محد غيرج يگول .
ـ عود ردنا نروح أنه و مديحه للزيارة.
الباشا::اي ادللي أفرغ واخذكم.
ـ لا أحنى نريد نروح هاي الايام .
الباشا::كل الايام بيها زيارة
وأخذج ازورج واربطج هناك بلكي تعقلين .
ـ شبيه مخبله وتربطني هناك؟
الباشا::لا يأبه العقل كله انتي بس اقصد تعقلين من جانبي
ـ نهيت مكالمتي ويا وكمت لمديحه الي كوى كاتمه ضحكتها
عليمن تضحكين غير انتي الي دفعتيني .كفختها شردت .
مديحه::وروح امي بس هو دواج .
ـوهيج نخلصها مرات يكتفي بمكالمه ،،ومرات يجي بس اليعجبني بي محترم وجود مديحه مايدخل الغرفه لحد مااحلفله هيه نايمه ،، غريب هل رجال لو مااعرفه من ايام الصعدة جان مااستغربت تصرفه والظاهر لاحض استغرابي باوعلي وضحك هزيت راسي شكو .
الباشا::اعرف شيدور ابالج شوفي هسه انتي زوجتي
مو عشيقه .
ـ يعني شنو .
الباشا::يعني من احترم وجود مديحه لأجلج حتى لاتنحرجين منها.
ـوهيج يوميه اكتشف بي خصله جديدة
ثابت زعلان ومعتبر رفض مديحه لطارق بسببي مااهتميت
هاي الفترة مثل فترة شفاء بالنسبة إلنا أنه و مديحه
نخلص نهارنا مگابلين التلفزيون نسمع لطميات ومحاضرات
وبليل الباشا يستلمني رديت عليه
الباشا::يأبه الولد اعتذر واحنى ماقصرنا بي گافي عاد
شسويلها ماتقبل خو مااجبرها .
الباشا::هم احجي وياها .
ـماشي ,, ردت اسدة صاح لحظه
الباشا::فد ساعه ويجيج مولي دزيت بعيدة نقال لمدينه
خل تقتقنا عود خل اخابر والكاه مشغول وهم كولي تحجي ويا قدر .
ـ لا بعد إذا جبتلها نقال مانطيها نقالي،، سده كمت كلت الها.
مديحه::لا يمعودة عيب أنه جنت ناويه انطي فلوس لقدر
تخلي ثابت يجيبلي .
ـ ترى أنه ماطالبة منه بس هو لأن يدك ويلكاه مشغول
ويعرف انتي وقدر تسولفن ليل نهار .
ـوعيني لمديحه الي صارت
اگثر وقتها هيه مگابله النقال وتصفح .
ـومثل روتين كل يوم ،،خلصنها سوالف واكل ومديحه قافله على طارق،،الايام تمشي وأحنه نراوح بمكانه، ومن الفراغ
البينا صارت سولتنا اگل ،، متمددين بفراشنا ونسولف گتلها روحي احس وزني زاد هزت أيدها ماراضيه.
مديحه::غير يخبل عليج السمن .
ـوحته انتي سمانه باوعت كامت شغلت الضوى باوعت لروحها بالمرايه والتفتت عليه
مديحه::اي كلش لازم نخفف اكلنا.
ـ سكتنا صوت النقال وكل ضني الباشا مديت ايدي
للميز سحبته تفاحئت من شفت رقم ثابت شعجب متصل
بهيج وقت فتحت خط احس گلبي يريد يطلع من صدري
وأنه اسمع صوت قدر تبجي بصوت عالي سألته شبيها
ثابت::أنه بالطريق جهزي نفس ترحين ويانا
ـوين شبيها ليش تبجي ،، ادنت عليه مديحه اخذت
النقال وفتحت الصوت وهو يحجي.
ثابت::دحضري نفسج راح اوصل يله الگاج بالباب
ـ سده بوجهي ضليت اصفن ، جرتني مديحه
وركضت للكنتور طلعت صايتنا وشالات اريد اديه تعبني
ماعرفت البس اوصل لباب الغرفه وارجع مادري شدور
سمعنا الهورن ورمش نقالي طلعت و مديحه وراي صعدت
لكيتها بحظن خاله وفيه ، سالتها بخوف شبيها شبيها
وفيه::اسم الله ماما مابيها شي أن شاء الله
ـلحد ماوصلنه المستشفى أنه الف فگرة اجت أبالي
نزل هو يركض شويه واجه ويا ممرضات وعربانه نزلها
وأحنه وراها دخلنها للدكتور سألت شبيها
وفيه:: عثرت وطاحت دكتور واظن ماي الرأس طك
بس فحصتها الدكتورة كالتلهم گبل
السونار خذنها الممرضات وأنه ومديحه نركض وراهن
وكل شويه محولينا لمكان وهيه تبجي وانصدمنا من كالت
الدكتور لازم نولدها لأن المشيمه مفصوله،، وكعدت تشرح لخاله وفيه مصطلحات ماعرفها .
وفيه::الي تشوفينه دكتورة اهم شي سلامتها .
ـرجعت فحصتها
الدكتورة:: ماعدها توسع لازم عمليه.
وفيه::هسه راح ابلغ زوجها
-طلعت خاله لثابت تبلغه اجه يستفسر من الدكتورة
وفيه::خابر للبيت انطيهم علم وخلي نغم
تجيب جنطه قيادة والطفل .
- طلع ثابت وحولو قدر لغرفه بقينا أنه
و مديحه يمها مااعرف شسوي وشتصرف هيه تبجي
واحنى نبجي صاحت علينا خاله .
وفيه::صلن على محمد ماما مو زين البجي ادعولها .
ـسالتها وين راح ثابت؟
وفيه::راح يفتحلها فايل مدري طبله
ـ شويه واجن ممرضات جايبات لبس عمليات
من شافتهن تخبلت.
قدر::لا مأسوي عمليه .
وفيه::اسم الله ماما حبيبتي خطيه طفلج يموت بطنج
وحتى عليج خطر.
قدر::خلينا انموت أنه اريد اخلص من الدنيا ماسوي
ـ انهارت تبجي ضليت اصفن ماعرف شسوي
عاد دخل هو حجه وياها وخاله ماقصرت مديحه تتوسل
مديحه::يهون عليج تعوفينا سونه تموت إذا صار بيج شي
ـ بقيت بس ابجي وهمه يقنعون بيها لحد ما دخلت عليها
الدكتورة حاجتها هزت راسها اي وعينها عليه تقربت ابوس
بوجها وخاله اخذت الملابس من الممرضات لبستها لمينا
شعرها ولبسنها خافي الشعر .راح ثابت يجهزلها دم
شويه وكالو يله اجه ثابت بوسها ويقرا الها ادعيه.
ثابت::اول يوم شفتج بي غمضت عيوني وگانو رب العالمين
كشف عني الحجاب لمدة ثواني ،، وشفت حياتي وياج
بزعلج ورضاج بدلالج ودموعج صورة سريعه مرت على عيوني عرفت انتي الي احبج هواي ثقي هذا القلب مادگ لغيرج .
-ابتعد مسويلنا مجال
مديحه::بس دموعها تصب .
ـ أنه الخوف سيطر عليه ماعرفت شحجي
صعدوها السديه واخذنها الممرضات يدفعن بيها
ركضت وراهن احس روحي تنسحب مني ويه كل خطوة
لحد باب غرفة العمليات كالو حدكم لهنا دنكت ابوس بيها
رادن يبعدني الممرضات كالهم ثابت خلوها .اشرتلي دنكت
عليها تحجي بتعب وتناشغ.
قدر::إذا متت والي بطني عاش لاتنطينه الهم اخذي وشردي
-بجيت بصوت عالي لا لا تگولين هيج أنه انتضرج هنا كليلي اطلع ولج ماعندي غيرج انتي الدنيا بالنسبه الي .
قدر::أول يوم شفتج بي فرحت لأن جنت اتمنى تصير
عندي اخت رغم الضرف الجمعنا بس فرحت بيج .
ـوانه اعتبرج كل اهلي لخاطرج باقيه . لا تخليني وحدي
قدر بروح امج لاتعوفيني اموت والله اموت .
ثابت::كافي يأبه اذكري الله هسه تطلع وجنها العافيه
ـ انغلق باب غرفة العمليات احس انسد بوجهي باب الدنيا
فرت روحي خليت اديه على وجهي ابجي وادعي ياربي
سلمها الي تدري ماعندي بس هيه ياربي لاتوجع كلبي بيها
رجعنا لمكان الانتضار وتافجئ بأهل ثابت كلهم جايين
الحجي واياد مولي والباشا راح عليهم
ثابت::ها يأبه شجابك كتلهم لا تقلقونه.
ـ حضنه الحجي ورد
ابو اسعد::تطلع سالمه .
حجاها والتفت علينا.
ابو اسعد::ها يأبه شلونكم .
ـ اجت نغم سلمت علينا.
نغم::تعالن اكعدن ترى عملية سهله
ـ ردينا أنه و مديحه باالحمد الله راح وكف يم الولد
بعدنا ماكاعدين ودخلت ام اريج كامت نغم تلكتها
ام اريج::من دگ التلفون عبالي اريج طلكت.
وفيه::هو أنه حاسبه حسابي أيامها حتى نومي خفيف
اكول خاف يدكون عليه ومااسمع .
ام اريج::شبيها هيه مو بالسابع؟
-اي طايحه المسكينه عاثرة بالحديقه
ـ هزت أيدها ماعاجبها .
صاح عليهم الحجي .
ابو اسعد::يأبه اطلعو للحديقه وكفتنا هنا زحمه.
ـ طلعو الولد التفت علينا .
ابو اسعد::كومن بالغرفه مو حاجزيلها غرفه هناك انتضرن
وفيه::اي هسه نكوم .
ـ طلع الحجي بقينا بس احنى .
ماعرف شگد مر وقت وأنه و مديحه نمشي بالممر نوصل مسافه ونرد احس حيلي باد التفت احجي وياها وعيني لباب
صالة العمليات التفت على صوت طبه ماشوف اله مديحه طايحه اجت نغم شالتها اريد احرك اديه ماكدرت صاحت على الممرضات جابلها عربانه خذوها ردت امشي وراها حسيت الگاع افترت بيه انتبهتلي خاله كامت لزمتني.
وفيه::شبيجن ماما ترى عملية سهله اصلا افضل
من الولادة والم الطلوك شو تعاي كعدي .
-خاله اريد اروح اشوف مديحه.
وفيه::دكعدي هذا ثابت اجه.
ـ سالته بخوف ها شبيها مديحه وينها.
ثابت::مابيها شي خطيه صار عدها هبوط علكولها مغذي
خليت نغم يمها بس ترتاح تجيبها .كومن الغرفه عيب
كعدتجن هنا
وفيه::اي صدك يله كومن
ــدخلنه الغرفه بين خوفي على قدر وقلقي على مديحه وا الانتضار والي استغربته جيت ام مريم ،،احس كلام ام اريج
زرف اذني من شافتها والتفتت على خاله وفيه تحجي وياها
ام اريج::عزا شامت جايه تشوف ابن ثابت
شيطلع شكول على هل زواجه الي ما وراها بس الضيم
ـ سكتت خاله وهيه تكون تتلكه ام مريم
وفيه::اهم شي تمام الخلقه واحنى لاصانعين بي ايد ولا رجل
ام اريج::هل كلام اقنعو بي الناس اذا طلع عبد
ـ خزرتها خاله وفيه ،، دارت تبوس ام مريم .
وفيه::شجابج؟
ام مريم::جبار گلي شايف الحجي من طالع وكال امشينا.
ـ عفتهن وطلعت اشوف مديحه لاكتني بالممر
جايبتها نغم أتجيلها سالتني بقلق
مديحه::ها بشري.
ـ بعدها .
نغم::هسه يطلعوها،، امشن نكعد يم خاله
ـروحن انتن خلني هنا انتضرها .
ـ خذتها نغم اجه ثابت يمي ،،كعد واشرلي كعدت مسافه
عنه حجه وعينه لباب صالة العمليات.
ثابت::ترى مديحه حامل
بعدني مامستوعبه الخبر ،، طلعت الممرضه شايله الطفل
وتحجي.
الممرضه:: حمد الله على سلامتها جبتلكم
بنوته راح انخليها بالخدج .
ـ كام ثابت بلهفه .
ثابت::لحظه يأبه بدون زحمه عليج بس خلي اشوفها.
ـاريد رجليه تعيني كوى كمت
بخطوات مترددة تقربت بس مو كلش اريد اشوفها وخايفه
وهيه بيد الممرضه ملفلفتها تلفف دنك عليها ثابت مادري شيقرأ بأذنها وأنه اريد بس المح شكلها رفع رأسه وهو يحمد الله مشت الممرضه وهيه حاظنه الطفله ،، التفت عليه ثابت وهو مبتسم هزيت راسي ها وكوى طلعت الكلمه مني تشبه
منو حلوى .رد وهو يضحك.
ثابت::طلعت تحبج اگثر مني،،بحيث بتنا نسخه منج
وصارت عدنا ام اعطوب ثانيه.
