رواية كريات الدم السوداء الجزء الثاني الفصل التاسع والعشرون بقلم زحل شريف
//////____سلاسل_____//////
-سألته بتردد يعني سمرة ؟ باوعلي بزعل كررت سؤالي
تشبه لوني لو ؟
ثابت::هاي شبيج يأبه تحجين صدك؟
ـاي بس طمني سودة سمرة ؟
-اول شي ماأقبل تحجين على بنتي ،، ثاني شي
حلوة تخبل .
-مافهمت شلون تخبل وانته كلت نسخه مني ؟
ثابت::ولان نسخه منج كلت تخبل ليش انتي ماتعرفين
بنفسج حلوة .
-ضليت اصفن مانطقت حرف وهو مبتسم ومن الفرح
عيونه تلمع انتبه عليه هز رأسه شكو دنكت محتارة
ثابت::شبيج يأبه شو جنج مافرحانه.
-خايفه من قدر لأن قاطعني .
ثابت::شنو هل كلام ترى الامومه غريزة وان كان الطفل
مو حلو بس بعين أمه ملك جمال والمفروض مانحسسها
بخوف كون من تشوفنا فرحانين بالبنيه حتى تتقبلها وتحبها
-اذكرت كلامه عن مديحه،رفعت راسي باوعتله ضحك.
ثابت::ها يأبه شكو بعد؟
ـ مديحه اقصد يعني ،، هز رأسه بأسف وتقرب كعد عبالي.
ثابت::ترى هيه متدري الممرضه طلبت تحليل دم
لان شافت وجها شاحب ومن طلعت النتيجه أنه اخذتها للدكتورة .
-جا غير نكلها ؟
ثابت::مو هسه بالبيت بلغيها .يله كومي نبشر الأهل
-جا خاف يطلعون قدر .
ثابت::كومي يأبه ميطلعوها هسه .
-كمت والف حسبه أبالي دخلنا الغرفه لكينا الحبايب مبسطات ودك سوالف بس شافنا سألن
وفيه::ها بشرو
ثابت::الحمد الله ولدت بنوته جنها گمر ،،بس خلوها
بالخدج
-باوعت لمديحه متمددة على سرير من سمعت كلام ثابت
طفرت فرحانه شبكتني ضحكوا على تصرفها .
وفيه::الف الحمد الله على سلامتها مبروك.
نغم::الف مبروك وحمد الله على سلامتها.
ام اريج::شفتها الطفله لو لا؟
-باوعلها ثابت وهز رأسه بمعنى اي ردت سألت .
ام اريج::يعني بيضه؟
-رد بدون اهتمام .
ثابت::تخبل تشبه خالتها .
-مديحه من فرحتها كامت اطفر ،، اله تصرف ام اريج
الي نشغت بصوت عالي وضربت صدرها وهيه تصيح
ام اريج::شنوووو لا تگولها .
وفيه::شنو هل حجي شبيج جاي يكلج تشبها خالتها
يعني اكيد حلوى والحمد الله والشكر على إتمام الصحه
-رد ثابت مأكد كلامه.
ثابت::لا وعيونها ملونه مثل جدي محمد.
-ضلت ام اريج تتلفت ماعاجبها ونغم وخاله الضحكه
مافاركت وجهن
وفيه::سميتها لو بعدك؟
ـردت نغم وهيه ادنك على الجنطه اطلع منها علبه مثل الحصاله
نغم::هاي القوطيه مال الاسماء قدر كالت من اولد
يله تفتحوها
ـضحك ثابت ،،بعدنا نسولف ودخلو الحجي والولد وعمهم
محمد بشرهم باركوله شالت العلبة نغم خلتها بأيدي باوعتلها مستغربه
نغم::كالت تخلين سونه تلزمها وكل شخص موجود
يسحب ورقه ويكول الاسم الطلعله تفريها عليهم مرتين
منو يتكرر عنده الاسم هو يسميها
-خنكتني العبرة بكلشي مخليتلي حق اعرف تفكيرها
تريد تفرض وجودي عليهم انتبهولي رغم حاولت اكتم
شهكتي
وفيه::يا ليش هل بجي مايصلح .
-عيون الباشا ونضراته الي يسرقها ومن ورا ابو
وترتني كعدت بصف خاله اريد بس اهدء سألهم الحجي
ابو اسعد::شوكت يطلعوها من الخدج
ثابت::بعدني ماشفت الدكتورة منتضر لحد مايطلعون امها روحو انتو
الباشا::لا عيني غير نشوفها مو تريد تعبرها للبيت
يمكيجنها .
ثابت::عيونها مثل عيون جدي محمد .
الباشا::لا الله عليك ؟
-هز رأسه ثابت اي .
اياد::مايصير نروح للخدج نشوفها
وفيه::ياااا شبيكم عيب .
-گام الحجي واشرلهم يله امشو
الباشا::أنه ماروح لحد مااشوف جنتي .
-باوعله ثابت رد بتحدي.
الباشا::ها شو جنك ماقابل ترى أنه وقدر متفقين من زمان
نغم::دسموها هسه وبعدين اخطبو.
-اشرتلي بمعنى كومي استحيت كامت وجرتني
شلت القوطيه هزيتها و فتحت القبق منها صاح مولي
مولي::قرعة مال سلفه شنو .
-قدمتها للحجي مد أيده .
ابو اسعد::بسم الله الرحمن الرحيم.
-سحب ورقه ،فتحها صاحت نغم .
نغم::لاتكول الاسم الي بأيدك عمو لحد ما تخلص الاسماء
كلها يله سحبوا وكل واحد يحتفظ بورقته.
-حجتها وتوجهت الباشا ماعرف شنو شاورته هز رأسه تمام
سحبو وهمه يضحكون ام اريج وام مريم بس يباوعن
من ضمن الي سحبوا مديحه ونغم والمصيبه الي ساعه هو ماد ايدة بالقوطيه يختار ورقه يحجي بهمس
الباشا::سمرة لو بيدي اسميها على اسمج.
-ابتعدت عنه ،، اخر اسم صار من نصيب الحجي أخذ الورقه
الكل فتحو الاسماء العدهم الا الباشا ماقبل يفتح ورقاته
صاح بي ثابت .
ثابت::ماتفتح خل نعرف شعندك ؟
الباشا::اول خلي نشوف الحجي.
- انتضرنا الحجي فتح ورقاته
ابو اسعد::رقيه متكرر نفس الاسم.
-حجاها وتقدم على ثابت حظنه مشهد يخلي الدموع
تنزل ،،اجه دور الباشا فتح اول ورقه باوعلها وصفن ثواني
صاحو بي .
ثابت::ماتحجي؟
مولي::اكيد الاسم العندك احلى .
-وماجنت اعرف اختي بهذا الذكاء الي خله الكل
امام الامر والواقع وصدمه لام مريم وام اريج ،رفع
رأسه باوعلنا وفتح الورقه الثانيه والغريب الورقات الي بأيده شويه مختلفات بالحجم عن الي سحبوهن البقيه ،، قرأها بصوت مسموع.
الباشا::چنتي .
-ثواني من الصمت والاستغراب رد كررها
الباشا::الورقتين العندي بيها هل كلمة ((چنتي ))
-تقدم ثابت يريد يأخذها منه رفض ضكو الولد بس هو
وجه تغير ابو انتبهله اشرله شكو ؟
ابو اسعد::خوش جا عليمن ضايج مو أنته ردتها
بس هل شي لاتحجون بي ولا تاخذو عهد هاي دنيا
يجوز من يكبرون مايقبلون باأختياركم .
ثابت::وأنه شبيه منطي بنتي لهذا وابنه ثنينهم
هتليه لايابه ما ازوجها .
-اعترضت ام اريج .
ام اريج::وشنو قابل الام مالها دور بزواج ابنها
منو يكول اريج توافق .
-رمقها الحجي بنضرة تحذيريه.،،،كعد الباشا بصف ابو
وفتح الورقه وبدأ يقرأ.
الباشا::لمن كانت هذة الورقه بين يديه،،انا قدر والاقدار
ساقتني إلى هنا ولا أدري إن كنت سوف أرى مولودتي
لكني احملها امانه بين يديك مني كأم اختار لابنتي شخص
يكون لها سندا بعد ابيها كلامي للباشا الذي كان لي أخ وسند
وصديق في ايامي المريرة شكرا لتحملك تذمراتي واشكرك
لقبولك ابنتي زوجه مستقبلية لولدك .أن مت فهيه وصيه
وان عشت فهو وعدا .
-هو يحجي وأنه و مديحه نبجي كمنا وحده لزمت ايد
الثانيه طلعنا ومانعرف وين نروح لحكنا ثابت .
ثابت::تعالو يأبه شبيكم .
-التفتت عليه وأنه ابجي بداعت الحجي عليك
روح اسال عنها ليش ماطلعوها خاف صار بيها شي.
ثابت::اسم الله يأبه شنو هل كلام ترى مخليها بغرفه
الافاقه علمود تصحى من البنج هسه شويه ويطلعوها تعالن اكعدن هنا بين ما اطلع ادخنلني جكارة .
-كعدنا وهو ماعرف وين راح ضلينه وحده تباوع بوجه الثانيه
خوف قلق حيرة.
مديحه::ماتمشينا نشوف البنيه
-وشلون نوصل للخدج ؟
مديحه::نسال .
-كمنا نمشي ونتلفت سألنا كم ممرضه كالو ممنوع دخلون
لحد ما وصلنا الخدج توسلنا بالممرضه الي بالباب
الممرضه::شنو اسمها اختج
مديحه::قدر قدر
الممرضه::ديله فوتن .
-فتحت الباب واشرتلنا على وحدة من الحاضنات تقربنا
نباوع ياالله شهكت من شفتها التفتت على مديحه الي صدمتها مو اقل مني ركزنا بالطفله
مديحه::وروح امي من تكبر تصير تشك شك
-رغم نعومتها بس ملامحها واضحه الف الحمد الله
شعرها مو عكش،، بس لون عيونها غريب بين الخضر
والصفار .
مديحه::بس انتضريها بعد كم شهر وشوفي شلون تنگلب
خلقتها خاب نسيتي روحج من جنتي زغيرة .
-صاحت بينا الممرضه طلعنا وكلبي مشتعل نار على قدر
سالنا الممرضه شكد تبقى البنيه بالخدج كالت حسب حالتها
يجوز اسبوع او اكثر .
مديحه::دمشينا هناك
ـ هلكنا من الانتضار لحد ماطلعوها ركضت وراهن
دخلوها بالغرفه كامن خاله ونغم نزلوها على سريرها
تون بالألم وتحجي مخربط اجه ثابت گالهم روحو انتو
بس خاله ماقبلت أم اريج وام مريم وزوجه محمد راحن
بقينا بس احنى لحد ما انتبهت قدر باوعتلنا
قدر::وينها بنتي ؟
-تقربت عليها بوستها ،، وأنه احجي بنتج تخبل بس خلوها
بالخدج لأن ولادتج مو وقتها .
قدر::بيضه لو ؟
-تخبل حجيتها وبعدت متهربه من سؤالها تولت المهمه
مديحه ونغم وخاله احتارن شيسون بس هيه متوجعه
اجه ثابت جايب علاجها و الممرضه استلمتها ابر تغفه وتفزمن الالم بس لاحظت تتجنب الكلام ويا ثابت لليل
راحن خاله ونغم وانه و مديحه بقينا نسينا نفسنا بدون اكل
لحد مااجه الباشا جايب عشى هو وثابت سوولهم
لفات وطلع من يمنا.
مديحه::تصدكين من شفت الاكل يله جعت
تعاي ناكل قبل لا يجون .
-اكل وعيني لقدر الي تون كملنا اكل اجو جايبيلنا چاي
ثابت::ليش ماترحن للبيت أنه ابقى
-لا خلينا هو شبقى من اليل ،، بس كول شلون نطلع
ونعوف الطفله ؟
ثابت::ماعليها شي تبقى بالخدج كم يوم .
-جر الكرسي وكعد گبال قدر الي مغمضه تمثل النوم
غمزلي الباشا بمعنى طلعي وراي كمت و مديحه وياي
ثابت::ها وين؟
مديحه::اختنكنا من ريحه الديتول، نطلع شويه للحديقه.
-هز رأسه تمام ،، طلعنا لكينا الباشا كاعد على المسطبه
اشرلنا تعالن .
مديحه::روحي انتي يمه أنه اريد اكعد هناك على ذاك الحشيش .
-عفتها وتقدمت للباشا سوالي مكان يمه كعدت وأنه اتحسر
الباشا::ها عليمن هل حسرة .
-حايرة بقدر اذا شافت بنتها،،هز ايدة ماراضي على كلامي
الباشا::عود صدك ولج غير تخبل اصلا اجمل من امها
-شفتها؟
الباشا::اي كوى خلوني ادخل بس صدك جميله وبيها
هواي من ملامحج وهذا الي مجملها.
-سكتت محتارة رد سألني
الباشا::بيج شي احد مسمعج كلام.
-لا بس دايخه بسالفه مديحه.
الباشا::شبيها؟
-درت وجهي عليه ،، وحجيت بتردد مديحه حامل
فك عيونه متفاجئه .
الباشا::سبحان الله يمكن هل شيء راح يخليها تتراجع
عن قرار الطلاق .
-سكت ثواني وانرسمت على وجه ابتسامة
باوعلي وحجه بصيغه لعوبة.
الباشا::والسمرة شوكت تفرحنا بحملها .
-ماتوقعت سؤالة درت وجهي متهربه من الإجابة
رد بغير صيغه
الباشا::صدك ليش ماحملتي كل هاي المدة ؟
-صفنت اباوعله يعني من كل عقلة يحجي
نبهني على هل أمر الي ما حاسبة احسابة سكتت وهو هم
غير الموضوع دخن جكارته وكام واشرلي اتبعه تمشيت ورا
عبالي ندخل گال نروح الكافتيريا مال مستشفى
الباشا::اخذيلج ماي عصائر خاف تجوعن
-اخذت كم حاجه وطلعنا صحت على مديحه اجت
دخلنا الغرفه لكينا ثابت يسولف وياقدر وهيه تستمع بتركيز
التفت شافنا ابتسم وبعد كرسيه من يمها
-تقدم الباشا سلم عليها .
الباشا::حمد الله على سلامتها ام جنتي.
-دنكت خجلانه وثابت عبالك تذكر الموضوع.
ثابت::صدك تعاي شنو يأبه بكيفج تنطين بنتي.
قدر::اي اتفقنا أنه والباشا من زمان ،بس كلي هيه حلوة
الباشا::يأبه انتي غير اطيتنياها بعد معليج حلوة لو لا أحنى
قابلين بيها .
-سكتت مامقتنعه راح الباشا وثابت طلع
للحديقه وهيه مرة تتالم ومرة مديحه تلهيها بالسوالف
قدر::شفتنها بنتي .
مديحه::اي كوى خلونا ندخل للخدج
قدر::حلوى ؟
مديحه::تخبل .
قدر::بيضه ؟
-سكتت مديحه وأنه سويت روحي مشغوله اعدل
بالفراش مال الجربايه صعدت تمددت وهيه منتضرة منا الاجابه ردت كررت سؤالها
قدر::شبيجن ماتسمعن جاي اسال بيضه لو لا
-ردت مديحه وهيه تكوم تصعد يمي .
مديحه::تشبه سونه .
-باعتلها صفنت بوجهنا شويه وغمضت أشرت لمديحه تسكت
للصبح مانمت اجت الدكتورة جيكتها كومناها للحمام كوى تمشي اجه ثابت كالها نطلع تخبلت من عرفت البنيه تبقى
قدر::ماخلي بنتي هنا لوحدها .
ثابت::يأبه ميطلعوها لازم تبقى .
قدر::اي ابقى وياها .
ثابت::مايخلونج يمها اصلا ممنوع .
-تعب وهو يقنع بيها تالي جدد حجز ليوم ثاني
احس راسي راح ينفجر أشرت لمديحه طلعنا
همزين اجت خاله وفيه جايبه ريوك بسطنا بالحديقه
وفيه::دتريكن بين ماشوف قدر .
-نوب أنه لا جبت نقالي ولا جنطتي
مديحه::اروح أنه اجيب نقالتنا وافلوس
-لا يمعودة شيوديج خلي نشوف بلكي تقنع يطلعهوها
كملنا ريوك ودخلنا مالكيناهم يا وين راحوا شويه واجو
قدر بس الدموع تصب تلكيتها ها وين جنتو
وفيه::رحنا شفنا البنيه
-غمزلي ثابت تبعته لباب الردهه
ثابت::لا تضغطون عليها عوفيها شتكلج كليلها اي
-مافهمت شنو يعني ؟
ثابت::من شافت الطفله تخبلت تگول
-سكت يستغفر ،، رغم اعرف حالتها وسبب خوفها
بس حز بداخلي موقف قدر الي كارهه لون بنتها . سكتت وهو طلع يدخن رجعت يمهن لكيتها مغطيه حتى عيونها باوعت لمديحه دنكت محتارة وخاله تحاول تقنعها
وفيه::كون من تكبر تصير مثل سونه جا يابختج
مديحه::يا خاله ياسونه غير تخبل هيه بس عيونها
كافي وترى سونه جانت تخرع وروح امي لو شايفه
رجليها قبل من جانت تلبس الصدريه القصيرة غير تلطمين
-ضحكت خاله على سوالف مديحه .
وفيه::يعني بتنا احلى
مديحه::وروح امي اواعدج هاي الفرخه من تكبر
تصير تشك شك .
-ضلت خاله يمنا للضهر اجه عليها مولي وراحت
العصر اجت نغم همزين جايبتلنا كل وحده دشداشه منها
عاد سبحنا بالحمام الي بالغرفه غيرنا ملابسنا
شويه وراحت نغم بقينا مكابلين قدر الي بس تصفن
تقربت عليها وحجيت بزعل معقوله شايفتني مو حلوى
مدت أيدها لزمت ايدي وبجت
قدر::لا وروح امي بس لان شفتج شكد انظلمتي
-متوقعه رفض أهل الباشا الي بسبب لوني غلطانه
ترى همهم مايخرب بيته يخافون على زوجته وابنه
ومنصبه .
قدر::اطلب منج طلب وتنفذينه الي
-گولي
قدر:: أخذ بنتي وابعد عن الناس كلها صدكيني تعبت
-ليش وثابت مو خطيه يهون عليج تحرمينا من بنته
قدر:: محد خطيه غيرنا ومحد راح ينظلم غيرنا ولج متفق
ويا الحجي يتزوج عليه.
-التفتت على مديحه الي اجت كعدت بطرف الجربايه
مديحه::هاي شوكت ومنو گالج
قدر:: مو مهم الكال بس هذا اتفاقه ومتأكدة مو جذب
-سكتت محتارة بقت تحجي وتبجي ظلت مديحه تحجي وياها
مديحه::شوفي بروح امي لو سواها أنه اخذج انتي وبنتج
الجن الازرگ ما يندلنا طريق.
-لثاني يوم كملنا اجرائات الخروج وقدر شبعت بجي
اخذها شافت بنتها وطلعنا .
قدر::اروح لبيت سونه .
-التفت باوعلها ماراضي
قدر::ترى عملية يعني احتاج اختي تداريني
ثابت::اي تروح ويانه لبيتنا هيه و مديحه، وبعدين
الحجي منتضرنا ومحضرين ذبيحتهم .
ـرديت أنه ،، لا تعذرني اتقيد بيتكم واكيد اهلك وناسك
يجون يسلمون عليها نزلنا لبيتنا وان شاء بس تتحسن
واطلع بتك من الخدج اخذهن لبيتكم ، سكت مامقتنع
ثابت::تمام بس ديري بالج لاتخليها تتحرك لأن عمليتها
بعدها خضرة .
-وصلنا للبيت نزلها دخلنا وهو بقى كاعد يمها بين ماحضرنالها الغرفه دخلتها
ثابت::شنو محتاجين اجيبلكم
-سلامتك كلشي عدنا ،، ترخص وراح بس مغثوث
سديت الباب ورجعت حضرتلها الحمام لحكتني مديحه
مديحه::زين سويتي
-يمعودة عبالك مشتريها يشوفها مالها خلك وهو حاير
بااهله صح الناس فرحانين بيها بس مريضه المفروض يعذرها المهم شلون نسبحها خاف عمليتها تتبلل
مديحه::هاي مهمتي معليج .
-عفت مديحه كومتها وأنه نضفت البيت كله غسلته
خابرت الباشا
الباشا::هلا وغلا مشتااااااقلتج
-اريد اروح للسوك
الباشا::لا ، خابري مولي شنو تردين كليله
-ترى قدر عندي ومحتاجه شغلات تخصها.
الباشا::اي كتبيله شنو تردين.
-لا والله استحي لان مو بس مسواك
الباشا::روحي ويا ورجلج على رجله سمرة لاتغيبين
عن عينه ثانيه اترجاج ترى مابيه حيل .
-چا ادز ويا مديحه
الباشا::لا يأبه مايصير بله زوجها أو احد شافها ويا ماترهم
صدك عرفت بنفسها حامل .
-لا لحد الان ماگتلها همزين ذكرتني يله دزلي مولي
الباشا::سمرة ؟
-همممم
الباشا::مشتاقلج .
-سديت النقال وأنه اضحك رحت لكيت مديحه تمشط
لقدر دنكت بستها اي هسه ريحتج مال بشر يمه اختنكنا
من ريحه الديتول، احجي وياهن ودك نقالي رقم مولي رديت
مولي::امي تكول لايطبخن هيه ادزلكم
-دتعال أنته اريدك
مولي::اي شويه وارمشلج طلعي يله باي
-گومي مدوح كتبيلي شنو تحتاجين
قدر::وين رايحه ؟
-للسوك رايدة شي ؟
قدر::تعاي اكعدي احاجيج .
-سندت نفسها وأنه كعدت يمها كولي
قدر::اريدج تشوفيلنا بيت ملك مو زراعي نشتري بفلوس الي اخذتها من بيت فاروق نخلي للزمن
-لزمت أيدها وحجيت بحنيه ،، قدر ليش هيج
تفكرين ادعي ربي العالمين يهديلج ثابت وتربين بنيتج
يم ابوها وتحققين بيها الماگدرتي توصلينه بالنسبه للبيت
هذا بيتنا وعندي الفلوس الي انطيتيناهن وباقي من غايبي
قدر::الدنيا مالها امان وكلشي يصير وبعدين ليش باقيات
الفلوس عاد نعتبر نفسنا ضاميهن
-منو يگول ثابت يقبل ؟
قدر::ماله حق يعترض واصلا هو ما سألني عليهن.
-التفتت على مديحه هزيت راسي شتكولين؟
مديحه::خوش تفكر البلگه .
-ماشي كومي على حيلج وسهلة ،، هسه خلني اروح البس
لان مولي راح يوصل ،، كمت تبعتني مديحه
مديحه::جيبي الها عصائر ولا تنسين لسقات كليله الصيدلاني
مال عملية ومعقم وقطن ومسكن وكبسول التهاب
-طلعت لكيت مولي اول ماصعدت شمر عليه
ضرف عرفته فلوس شلته خليته على الچكمجه باوعلي
وجر نقاله ما توقعت يتصل بالباشا فتح الصوت وحجه
مولي::اي باشا ست سونه رفضت الفلوس.
-فگيت حلكي مصدومه وذاك رد باانزعاج
الباشا::رجعها للبيت إذا متاخذهن يله عندي شغل
لاتضل كل شويه داك .
-نهى المكالمه والتفت عليه
مولي::ها ارجعج لو شنو ؟
-مديت ايدي اخذت الفلوس وسكتت ،،عاد ماقصر مولي
فرني البصرة كلها نزل وياي للسوك ماخليت شي
مولي::بعد محتاجه شي؟
-بس الصيدليه.
مولي::اي كليلي أنه انزل
-لا شغلات خاصه ،، هز رأسه تمام نزلنا هو بقه برا وأنه
دخلت اخذت الي اريده جاي احاسب وسمعت بنيه تسال
عن مانع حمل عبالك ذكرتني ،، كتبت الصيدلانيه انطيني باكيت رجعنا البيت نزل مولي المسواك طلعت مديحه
دخلته وياي
مديحه::شسالفه وين جايبه هذا كله .
-يمعودة نضل يوميه مخابرين مولي ،،المهم شلونها قدر
مديحه::نامت
-خوش جا تعاي بين ماتعزلين المسواك أنه أسبح عفتها
بوجهي للحمام كملت وصحت عليها ناوشيني دشداشه نسيت
مديحه::الباب يندك أضن مولي بالباب
-لبست وطلعت شعري مبلل خليت الشال وطلعت لله
وتفاجئ بنين ونغم ويا نزلن.
بنين::سبرايس
-احلى سبرايس تعالن ،، دخلتهن و مديحه كيفت بنين
بنين::ولج سونه يكولون بنت ثابت تشبهج غير ميته
على شوفتها يبوووي معناها صاروخ .
نغم::دصبن الاكل لايبرد
-كمت نشفت شعري وهنه دخلن كعدن قدر
فرحت بشوفتهن كامت نغم جرت طبله خلت اكل لقدر
نغم::تغدن أنه اغدي قدر
-بقن يمنا للعصر واجاهن مولي ،، خابرني ثابت يسأل
ثابت::ها يأبه شلونكم قيادة شلونها
-تمام بس كل شويه تبجي تريد بنتها
ثابت::أنه بالمستشفى ماهان عليه اعوفها
-كسر خاطري صدك مو هين عليهم ،، سكتت رد سألني
ثابت::بلغتي مديحه بحملها
ـلا والله محتارة
ثابت::لازم تكليلها حتى نبلغ زوجها ،، مايصير تضم عنه. هيج شي
-نهيت مكالمتي ويا وكمت محتارة اباوعلها هسه هاي
معقولة ماحست على نفسها صار كم شهر صافنه بيها
كمزتني من صفكت بوجهي
مديحه::تصفنين ام اعطوب اكو شي ؟
-هزيت راسي اي قدر استغربت اشرتلي اكعدها
خليت المخده ورا ضهرها وعدلت كعدتها حجيت بتردد
مديحه انتي حامل باوعتلي متفاجئه
قدر::يااااا
-خزرت قدر ودرت وجهي لمديحه الي عبالك واحد صافكها
راشدي ضلت تباوع بوجوهنا دنكت امسح بدموعي رفعت
راسي اريد بس احجي العبرة خنكتني ادنيت عليها اريد اشبكها دفعتني وكامت شلون المخبله توصل لباب الغرفه
وترجع تلتفت علينا دقايق وهيه على هل حاله نزلت قدر
من جربايه لزمتها من أيدها جرتها للصاله كعدتها وكعدت بصفها
قدر::لاتكتميها بگلبج اصرخي
-وگانو أنطتها الاذن حتى تطلع وجع گلبها كامت وهيه تصيح بصوت عالي
مديحه::يا اااااالله ليش هيج يربي ليشششششش
وين اودي هم يعيش مثلي لو يبقى طول عمرة يتعير ابن الكاوليه لو فاطمه شراح تسمي لا يربي تعذرني ماخلي
-التفت باوعتلي .
مديحه::شلون عرفتي ومنو يعرف غيرج؟
-ثابت گلي بيوم الطحتي بالمستشفى مسويلج تحليل دم
واعتقد محد غيرة عرف لأن نغم ماحجت بس أنه كلت للباشا
قدر::وكل عقلجن ثابت هسه مابلغ الحجي وطارق
مديحه::خابري بسرعه كليله لايحجي
-عرفت الي أبالها ،، صحت كافي شبيجن هيج كارهات بزرجن حرام عليجن ولجن خلنا يصير عدنا
عائله نستند عليها خلص تعبت منجن
مديحه::وكل عقلج يخلونه. نعيش
-ماتردين طارق تبقين وياي وتجيبين ونربي سوى
مديحه::ماابقى هنا امشي بعيد اعيش بمكان محد يعرفني بي هيج احسن الي .
-ويهون عليج تعوفيني وأنه رجعت لخاطرجن ليش هيج
مديحه::امشي نروح لبغداد ناخذلنا مكان ونكعد
-وقدر وبنتها ؟دنكت تبجي وقدر بس تناشغ
احس روحي تعبت ياربي شسوي وشتصرف
مديحه::ماارجع إذا أصر على رجوعي انزل الطفل
-عفتهن يبجن وكمت خابرت ثابت حجيتله
ثابت::رد فعل طبيعي عوفيها تهدء لليل أنه اجي
-خلصنا نهارنا بجي
مديحه::جحيم عيشتي ويا فإطمه بس ماجنت اشكيلجن
حتى على ماي تحاسبني تباوع للكمه الاكلها وتحسب العلاكه الي يجيبها الي تصبح تدعي عليه لحد ما تتعب ضاله معلكه
فوك مكابله البلازمه ماانزل تصيح تعاي البيت خايس انزل
تمشي وترش عليه خل من غير الغلط والمسبه ومن يجي واحجيله يكلي شسوي مريضه تحمليها .
-تحجي ودموعها تصب
مديحه::وكله كوم ويوم الي صعدت عليه وكتلتني اخخخخخ
ماانسه بوقتها حالتي الي تخزي مجردة من ملابسي وهيه
استغلتها فرصه ولا الغلط الي كالته ماينحجي وهوه
الحقير هوه السافل ولجن حتى لو حقه وراد يتأكد من عذريتي بس مو بهيج طريقه .
-غصت مختنكه لطمت على وجها كمت لزمتها
انهارت تصرخ وتدعي على امها لحد ما تعبت كومتها اريد ادخلها الغرفه فقدت بيدي ضليت اصرخ قدر ماعرفت شتسوي صحت خابريلي ثابت بسرعه ،، وحظنت مديحه
كوى وصلتها الغرفه عفتها وطلعت جبت ماي ثلج غسلت وجهها نشغت حظنتها ابجي ليش هيج تردين تحرگين
كلبي عليج لميت شعرها ومسحت وجها ،، اجتني قدر كوى تمشي
قدر::ثابت بالباب ماكدرت امشي .
-طلعت فتحتله الباب تفاجئت خاله وفيه ويا.
وفيه::اسم الله شبيها قدر
-دخلو يتساءلون تبعتهم وأنه احجي مو قدر خاله مديحه
التفت عليه المرة حلكها يابس كسرت خاطري ركضت جبتلها
ماي شربت وغسلت وجها طلعت قدر لازمه عمليتها ومنحنيه
كوى تمشي كام ثابت لزمها جابها كعدها يمه .
ثابت::شكو شبيجن خابرتني تصرخ عبالي هيه بيها شي
وفيه::وينها مديحه ؟
-كمت وخاله وياي دخلت على مديحه كعدت يمها
وحجت بهدوء
وفيه::شوفي ماما مالومج ولا اكول هين بس فكري
انتن لا أهل لا عشيرة المفروض تخلفن تسون لنفسجن أهل
بنيه تصاحبينها ولد يشيل كبرتج ولو طارق مللنا وداعت ثابت وأسعد الولد يمكن كام يخجل يجي يوميه صار بين يوم ويوم يا ماما المشاكل تصير والدنيا ماتوكف الحياة مو كلها حلو لابد نعيش المر حتى نحس بطعم الفرح
مديحه::ماريده ومستحيل ارجعله .
وفيه::اي ومحد يجبرج خلص تولدين بالسلامه وتقيمين عليه
دعوى طلاق وتبقين يم هل سونه المبتليله بيجن
كومي يعيني نعلي الشيطان وغسلي وجهج خل اخذج للمستشفى انجيك ضغطج
مديحه::لا مابيه شي مشكورة خاله ربي يخليج
وفيه::الحجي كال يخابرة حتى ينطي خبر .
-بقت تحجي وياها شويه وطلعنا لكينا قدر وثابت
عالكين باوعتلها بس تناشغ.
وفيه::ها شبيج انتي ترى موزين عليج ماما انتي نفسه
وديري بالج على نفسج .
-سكتت قدر بس ثابت مسلط نضراته عليها .
وفيه:: أنه جان بقيت يمجن بس والله ناس تجينا
يله نمشي .
ـحجتها وكامت بقى ثابت يباوع لقدر هزت راسها لا
صاح منزعج.
ثابت:::لشوكت ؟
قدر::لحد ما تجيبلي بنتي يله روح جيبها
لو تأخذني ابقى يمها .
ثابت::هو بكيفي يكلولج خطر انطلعها تحملي هل كم يوم
-غثني اسلوبه وياها حجيت وأنه الزم أيدها
اخذها تشوفها خلي ترتاح وتطمئن،، ورجعها هنا لأن هيه مريضه مو مال تبقى لوحدها أن شاء من تطلع بنيتكم وقدر تشيل خيوط العملية ترجع لبيتها ،، باوعلي ماقابل خاله أيدت كلامي .
وفيه::اي خليها يم اخيتها ولو ناس تجي تريد تسلم عليها
-خاله غير كون بنتها بحظنها حتى تستقبل الي يباركلها.
وفيه::اي والله بس تدرين فرحانين لثابت اخواته وأهلنا
يله مو مشكله هنه جم يوم.
-التفتت على قدر الي مشت للغرفه لحكتها ها شتردين
قدر::لبسيني صايتي وشال
-لبستها وطلعت كالتله تأخذني هز رأسه اي
طلعو رجعت لمديحه لكيتها صافنه كعدت وأنه اتحسر
مديحه::زين سويتي من حاجيتي هذا هم يرادله
ضب
-تحجي وعينها بالسكف رفعت راسي اباوع وين هيه تباوع
التفتت عليه مستغربه صحت بيها اريد اشوف شنو بسكف
الغرفه الي مخليج صافنه بي ابتسمت بحزن
مديحه::بعد شورانا من ضيم
-نعيش ونشوف وربج كريم ،، دكومي نكعد بالصاله لحد ماتجي قدر ،، كمت وهيه تبعتني اسمع نقالي يدك دورت
لكيته بالمطبخ لحد ماوصلته خلصت المكالمه عبالي الباشا
وماتفاجئت من شفت رقم طارق بعدني بصفنتي ودك
رديت بثكل اهلا طارق
طارق::أنه راح اوصل لبيتج .
-حجاها وسدة التفتت اباوع لمديحه هزت راسها شكو
طارق جاي صفنت ثواني نوب ردت
مديحه::خلي يجي احسن يكون الكلام مباشر بينا
-دخلت لبست صايتي وشالي وصل طارق استقبلته
دخل لكاها كاعده سلم هزت راسها كرد اشرتله اكعد
ورحت حضرت ماي وجاي رجعت لكيته يحجي وياها
طارق::البشر مامعصوم عن الخطى وأنه اعتذرت
مديحه::وأنه ماكتلك اريد اطلك لأن غلطت بحقي بس مانرهم فياريت نخلص بدون مشاكل .
طارق::بس انتي حامل وحتى الطلاك ميصير
مديحه::من اجيب
طارق::وبعدين متوقعه انطيج ابني ترى إذا اطلكتي آخذة
مديحه::القانون موجود إذا يحكم الطفل الك انطيكيا
ـتحي بدون ماتباوعله شال رأسه غمزلي مافهمت شيريد
اشرلي بمعنى كومي عبالي يريد يحجي وياي تحججت بصوت الباب وكمت طلعت للحديقه انتضرته هسه يجي
مرت دقائق وهو ماكو يا رديت دخلت وانصدم الكا حاظنها
مشبك أيدها وهيه ترفس بي وهو مستلمها بوس ضليت أتلفت أنوب فشلت من روحي هسه شسوي ادخل ارجع بالحديقة ،،سمعت صوت سيارة طبكت عرفت اجو ثابت وقدر دخلت وأنه احجي اريد أنبه طارق الي ابتعد وهو يضحك و مديحه مطنگرة تخزر بيه ندك الجرس طلعت فتحت الباب دخلت قدر تمسح بدموعها وثابت وراها يستغفر بعدني ماحاجيه گال
طارق::هاي سيارة طارق بابج؟
-اي قبل شويه اجه ،، باوعلي عاكد حاجبه بس حسيته
انغث عفته ودخلت اجه وراي سلم،، تباركله طارق
طارق::عود اليوم جايب امي وجايكم بس من بلغني الحجي بحمل مديحه تفاچئت
-ترخصت قدر ودخلت الغرفه بقى طارق يسولف ويا ثابت
طارق::يأبه حلها النا أنه مال أطلك مستحيل والمستحيل
الأكيد انطي طفلي يعيش بغير مكان كلولي شتريد انفذ
ثابت::أنه حجيت وياها وهم انطيها مجال ترتاح هيه زعلها منك ثگيل أن شاء الله تنصلح الأمور بينكم وهل شي يم الحجي كلامك يمه
-حسيت ثابت يريد يبين لطارق بعد لا توصل هنا والأمر
يم الحجي سكتت وطارق انحرج بس رد بأدب
طارق::لحد الان هيه على ذمتي وأنه لو ماواثق من سونه
جان ماخليتها يمها حتى لو اضطر الأمر ابلغ والدها
-ابتسمت وعيني لثابت الي ماعاجبه ترخص طارق
غمزت لمديحه تكوم وياي طلعنا ويا للباب،، باوعلها
طارق::لعينوج اتحمل ثقي مايوم كعدت يم شخص مارايدني
-دنكت وهو صعد سيارته وراح دخلت لكيت ثابت متحضر
اول ماكعدت استلمني
ثابت::غلط تخلي يدخل لبيتج .
-باوعتله متفاجئه نبرته بعصبيه ،، التفتت على مديحه دنكت
رديت ،، ماعرف بي جاي هو اتصل كال أنه واصل لبيتج .
ثابت::حتى وإن المفروض تبلغيني .
-ترى الولد كل هاي الفترة ماوصل بس يمكن فرحته
بخبر حملها خلاه يجي وسمعته كالك الحجي بلغني
ثابت::المهم ياريت منا وهيج تكليله كلامك ويا الحجي
غلط دخلته عليجن جيران تأخذها بغير نضرة أنه احجي لمصلحتج
-حاولت اضغط على اعصابي بس ماكدرت،، رديت
بنفس نبرته ،، اول شي الجيران جانو يشوفونه من يجيبها وياخذها واكيد يعرفون زوجته وثانيه هو مامطلكها بينهم
زعل مثل زعلك ويا قدر عادي تجي عليها .
ثابت::لا مو عادي رجال غريب
ـ عكدت حواجبي مافتهمه شلون يعني ترى أنته هم غريب
لا ابن عمنا ولا تعودلنا بس لان زوج اختي .
ثابت::اي زوج اختج بس طارق .
-شهكت مديحه التفتت عليها مخليه أيدها على حلكها
ودموعها مثل المطر ،، رفعت راسها رادت تحجي اشرتلها تسكت ونهديت بي شوف يا صاحبي اذا قصدك مديحه
مو اختي فغلطان وهل كلام بلغ بي الكل هيه وقدر نفس الشي ومثل ما أنته زوج اختي طارق نفسك غير هل كلام ماعندي ،، حجيت بعصبيه وصوت عالي وهو يباوعلي مصدوم هز رأسه تمام صاح على قدر وهو يكوم
ثابت::مالي حق احدد الي يدخل لبيتج بس من حقي
ماخلي زوجتي تبقى على الأقل لحد ما مديحه تحدد موقفها من طارق .
التفتت باوعت لقدر اجت لازمه بطنها وكفت گباله
مديحه بس صوت شهكاتها ينسمع ضليت أتلفت بينهن
بس قدر فاجئتني من حجت
قدر::اخذتني وتعرف كلشي عني وألف مرة كتلك
مااقطع تواصلي وصلتي باختي و مديحه حالها حال سونه
رجال جاي يصالح زوجته دخلت لكيت اختي كاعده يمه بدون حجاب لو أنه كابلته مو شوفت عينك سلم بثگل حتى مارفع رأسه وحتى لو أنته ماموجود لا تتوقع طارق يدخل
عليه الغرفه يسلم ولا أنه اطلع
ثابت::وأنه رجال وماقبل تلتقين بهل شخص
قدر::وأنه مأكول لا بس دخلت هو كاعد خو ماتعدا بدون سلام .
ثابت::خلص امشي لبيتج .
ـكامت مديحه وهيه تحجي
مديحه::حقك ثابت وان شاء الله بعد مايجي طارق لهنا
هسه أبلغه لحد مااخصم موضوعي ويا واشوفلي مكان
-حجتها ودخلت الغرفه تخبلت وهو حاول يحجي
ثابت::مو هيج يأبه بس
ـصاحت قدر
قدر::بس شنو خلصصصص كافي تعاملونه وكأنو احنى
خطيئه عورة وتردون تستروها وتخفونها خلصصصص
عوفونا لحالنا حرام عليك خليك بمكانه لو أني زعلانه
وجايك خبر بحملي جان مافكرت بشي واجيتني لو لا
ثابت::نصي صوتج وانتبهي لكلامج أنه ماقصدت شي
قدر::الباشا يدخل على اختي ماكلت شتكول عنه الناس
-باوعلها والتفت عليه
ثابت::الباشا زوجها والجيران مو غشمه يعرفون وحتى
الحجي هم عرف بعقدهم
-ضلت قدر تباوعلي درت وجهي ودخلت لمديحه
واسمع كلام قدر ويا نار واشتعلت بصدري بس ماردت احجي ردتها هيه تحدد موقفها شويه ودخلت تجر بروحها
باوعتلها مستغربه شنو راح ؟
قدر::اي كومي خابري للباشا اريده
-مانطتني مجال احجي أشرت بسرعه كمت جبت نقالي
اتصلت وانطيتها النقال بس فتح خط كالتله
قدر::باشا اريد بنتي .
-مدري شنو گالها ،، حجتله مختصر وشمرت النقال
عليه خرب عايزة أنوب هو يستلمني خليته على اذني وسكتت صاح مكمزني
الباشا::ويينججج ام المشاكل
-ترى مامسويه شي
الباشا::ماعرفتي تتصلين تكليلي ولج وتالي وياج شوكت تنعدلين وتتصرفين مثل البشر
-يعني بشنو احلف وتصدكون الولد واصل لبيتنا وخابرني
الباشا::وهيج تحجين ويا ثابت
-جا ماكتله شلون حجه وياي يعني مافكر بمديحه وموقفها
الباشا::يعني غشيمه انتي ماتدرين يغار على مرته ليش
كبرتي السالفه جان سكتي ،،،لو ماتكدر الفلفل ماترد
كون الزمج
-هسه شنو تضلون كل شويه واحد مستلمني
حجيتها وبجيت بعبرة اختنكت حسيت بروحي ضعيفه
تحسر ورد
الباشا::عليمن تبجين منوو الي حاجي .اسكتي انعل ابو شكلج كافي شبيج أنه ماقبلت وهو ميت قهر على مديحه وخجلان يكول شلون هيج حجيت بس ماارتاح لطارق
-كسر خاطري شفته فرحان بحملها كلت بلكي يتصالحون
الباشا::خو أحنى نكيف شنريد غير تستقر ،، دروحي خل اشوف ثابت جايني
ـ سديته منه وكمت للمطبخ حضرتلهن اكل بدون
واهس توسلت يله اكلن قدر بس تلج على بتها و مديحه صفنتها طولت باوعتلها درات وجها صحت شنو ابالج بت التالف
مديحه::انه اول وتالي لازم اخليلي مكان يعني اذا جبت
-باوعتلها وهزيت ايدي ،، خوش عود من تجيبين هاي اذا طارق عافج .
مديحه::جا خابري خل يجي عليه ارجع احسن.
-ها كولي اريد رجلي ومشتاقتله
مديحه::لا .
-جا المن راجعه
مديحه::لأن مالي احد
-ترى ثابت متندم على كلامه وتدرين هو يضوج من طارق
مديحه::عليمن متندم ماجحه شي غلط وأنه من زمان كتلج
ترى عيال اختج ماراح يقبلون بوجودي
قدر::وانتن بكيفهم شنو مكعديجن بيتهم لو معيشينجن
من راتبهم ترى محد اله حق ومادام الحجي عرف بزواج سونه والباشا خلص منين خايفات
مديحه::ومنو گالج قابل بزواجهم ترى بالصدفه عرف
قدر::ولا يقبل اهم شي عرف .
-سكتت و مديحه هم ماحجت بعد اجه الباشا
وتعذر من مديحه.
الباشا:: كتلج من قبل وارجع اكول انتي حالج حال
البنات لاتزعلين من ثابت ترى خجلان منج وداعت الحجي
-كعد يم قدر شويه ونوب ترخص تبعته اريد أوصله للباب
شو التفت عليه مالحكت احجي جرني لاستقبال
الباشا::ولج خلي البنات يرحن لزلمهن مو راح اهلس اعطوبج
-يحجي ويبوس بيه اريد أفلت روحي ماكو يمعود
يا نوب هنا تريد تمطلني؟
الباشا::جا خواتج لأزمات الغرف شسوي اطردهن
تعاي انعل ابو اعطوبج سمرة مشتاقلج .
-ماعافني لحد ما شبع طلع يضحك وأنه أتلفت يتراولي
درن شصار بينا حتى مارجعت يمهن ضليت افتر واعزل بالبيت سبحت ودخلت لكيت قدر نايمه وهيج بطلاع الروح
خلصت الايام بين طارق ومكالماته وروحاته للحجي وبين ثابت الي زعلان مدري خجلان مااجه لحد يوم الي طلعو بي البنيه كعدت قدر من الصبح حضرت روحها دكت على الباشا
أجاها هو وأمه يا شنو تروحون لوحدكم دخل البس صايتي
وفيه::ديله لاتتاخرين .
-طلعت بعد ماوصيت مديحه وصلنه للمستشفى لكينا ثابت
سلمت عادي رد بثكل يا نوب زعلان قدر مااهتمت صاحت علينا خاله
وفيه::تعاي خلي الدكتورة تفتح الخيوط فد مرة
-شالت خيوطها وجيكتها حمد الله ما بيها شي عمليتها
بعد إجراءات وجيب جنسية الام وعقد لحد ماسلوموها النا
طلعو روحنا خاله جايبه حاظنه تخبل خلتها بيها والباشا
كل شويه مدنك بايسها
ثابت::ترة تتحس من شواربك شبيك .
الباشا::لاتدخل بيني وبين چنتي.
-حجاها وباوع لقدر هزت راسها مأيدة كلامه
ثابت::تلعبين انتي ويا بكيفج تنطين
وفيه::دمشو تبقون تداهرون هنا .
-طلعنا من المستشفى خاله شايله الطفله التفتت أشرت لقدر
بمعنى روحي ويا زوجج
قدر::انطوني بنتي وياي
-صعدت وخاله خلت الطفله بحظنها اشرتلي اصعد وياها
انحرجت بس ماكو حل ثاني ترخصت من خاله وصعدت ويا ثابت الي وجه مايكصه السيف قبل مانوصل للمنطقه كالتله
قدر::نزلني ويا سونه وبعدين تعال عليه
ثابت::شنو ردة شعندج بعد غير نمشي لبيتنا
قدر::اريد أسبح وسبح رقاوي .منو الي هناك ترى
بعدني موجوعه ولا تنسى ماعرف للطفله وخاله ملتهيه بالخطار .
ثابت::نغم تساعدج وبعدين هسه لازم نروح لأن الحجي منتضرنا ماذبح لحد ماتجين انتي وبنتج
قدر::يعني ماخذني هيج كدام النسوان غير تحجي احضر نفسي اكيد اخواتك موجودات
ثابت::وقابل ماشايفاتج لو جايين يخطبونج ترى مرة نفسه
وعمليه محد ينتقدج وبعدين شبيج جنج العافيه
-رغم اسلوبه ماعاجبني بس حسيت قدر عاندته
قدر::اي نزلني أسبح وحضر نفسي وابدل لبنتي
-قبل مايرد كتله ماتااخر بسرعه أسبحتها وتبدل
وبعدين أنه هم مامهيئه نفسي لو مامعزومه وياكم
ثابت::لا يأبه اصلا الحجي كال تجي هيه ومديحه
-خلص نص ساعه مانطول ،، كوى سكت نزلنا وراح
تلكتنا مديحه خذت رقاوي على كولت قدر تبوس بيها
بعدني مامسولفه لمديحه اندك الباب باوعت سيارة الباشا
طلعت مستغربه ها شكو ،، ضحك وهو ينزل بيده علاكه
شمرها عليه
الباشا::هاي امي دزتها لقدر يله لاتتاخرن الحجي ينتضر تينه.
-عكدت حاجبي تينه شنو .
الباشا::جنها تينه سمرة وراويه وشكلها يخبل .
-راح وهو يتغامز يربي شاخطين هل عائله
دخلت بلغتها نوب كيفت
قدر::حلو دلع تينه
مديحه::خاب شوف العيون ياتينه .
-جريتها منهن كومن راح تحسدنها يله حضرن نفسجن
بسرعه عيب الناس منتضرينا مانطيت مجال لمديحه ترفض
اباوع لقدر طلعت جنها عروس شنو هل دراعه والله ذوقها حلو خاله وفيه.
قدر::دروحي كملي انتي ،، مديحه البسي بدلتي مال حوامل هذيج المرة بقت يمجن تطلع تخبل عليج .
-لبست صايه بيها شغل من الردن ورتبت وياها شال
باوعت لمديحه شنو هل حسن عيني مو جنج وردتي من شوفت طارق لليوم خدودج تفحن باوعتلي وهزت أيدها
اجه ثابت قفلت الباب وصعدت قدر حاظنه بتها وصلنا
تلكونا من الباب الحجي واكف بالكراج ويمه الگصاب
دخلت قدر سلمت عليه باسها برأسها وأشر للكصاب ذبح
الذبيحه دخلنا وننصدم شنو هاي كلها بناتهم نغم وبنين
اخذن بت قدر وطارن بيها الغرفه سلمنا أنه و مديحه
مديحه::تعب فچي من البوس
-رفعت راسي للي دخلت جنها عروس البس شنو
والمكياج خفيف والذهب عبالك جاي تعرض بي دخلت تمشي بدلع رغم بطنها جبيرة بس جسمها حلو طويله أحسها شخصيه سلمت علينا من بعيد وباوست قدر
اريج::مبروك والحمد الله على السلامه وينها بنتج
قدر::خذنها البنات .
-لمتهم حلوة كلهم أهل وكرايب اخوات ثابت كلهن كبار بالعمر
بس محترمات كلش عدى ام اريج ويمكن حقها تضوج منا
الباشا ما دخل ولا شفته بس مولي اجه يهوس
مولي::وينها بت ثابت رقيوااا تعاي جماعة ابوج هنا
وينج بعد عمج بالنص ترى من هسه
وفيه::ولك فضحتنا يل حقير شيكولون علينا الناس امشي
-دخل جاب رقاوي من بنين اخذها بحاظنتها لاستقبال
شويه وجابها وثابت ورا
مولي::لو تذبحني ماانطيهن بالنص كتلك بالنص
ـبنات محمد ميتات ضحك وثابت خانك مولي
طلع الفلوس من جيبه خلاهن بحظن قدر اباوع لحاظنه
الطفله صلوات شكد بيها فلوس .صبو غدة والزلم بالاستقبال واحنى بالصاله وأكثر بشر ارتاحيتله ام جواد اخت ثابت الجبيرة بعد جاي وسوالف بدن يوجبن قدر وبنتها ضحكت من گلبي على ام جواد شلون تهوس لرقاوي
ام جواد::ترف يأتين يمحلي البساتين
-ومافوتتها اريج الي تعمدت تغث قدر.
اريج::جنها نوميه بصرة .
ـحجتها بضحك بس نغم ماسكتت
نغم::غير تخبل عين الباردة عليها بس الشعر والعيون
يسون مرة
ام جواد::تشبه خالتها جنها هنديه تخبل
ـالله يجبر بخاطرج ياخاله
ام جواد::يخاله غير الصدك أنه اشوفج احلة من قيادة
قدر::ياااا ازعل ترى
ام جواد::انتي الغاليه مرت الغالي بزر الكعدة وعزيز الحجي
-كامت قدر بوستها التفتت على مديحه .
ام جواد::وانتي يمه عليش ماتردين لزلمتج خطيه يوميه
جاي لهنا يتوسل خايبه هاي الحياة يوم كتله ويوم حبه
مديحه::أمه ماتريدني
ام جواد::من تخلفين تريدج لأجل بزرها فرحيهم بضناج
وصيري سنعه اكسبيها تحجي جنج ماتسمعين جا هو الحجي يوجع بالليل زلمتج ينسيج هم النهار
-كلامها يخبل وسالفها ماتنمل قدر بينهم معززة
بس هل شي غث اريج وامها للعصر كنالهم نروح احنى
وفيه::ابقن وبليل مولي يوصلكم هسه يجن خواتي
بنين::تعاي يمنا سونه نغم تريدج بالمطبخ
-كمت يمهن
نغم::خلطة الكباب السحريه مالتج بلكي تسويها النا
-حضرلي المواد وثرمته الهن وعجنته صار وقت الصلاه
كلهن توجهن ابد مايأخرن صلاتهن حتى الي بيدها شغل عافته أنه و مديحه انفردنا بغرفه بنين اجتنا قدر شايله بنتها
قدر::همزين ام جواد كالت تبقى يمي كم يوم تعلمني
شلون اقوم بواجب بنتي
-الله ينطيها العافيه .همزين جنت محتارة
قدر::لا حتى خاله وفيه ماتخليني اكيد تجيني
-خوش ديري بالج على نفسج وشويه فكي مو شاهدتها
ويا ثابت مارضيت عليج ترى اسلوبج صاير كلش
قدر::ماشفتي شلون يحجي وياي
مديحه::وانتي تردين مثله غير رجال
قدر::خوش بس لو تبقن يمي شعدجن رايحات
-اجيج ماعوفج بس خلي الناس تكف منكم
قدر::اكلج سمعت الباشا راجع لدوامه ومرقينه
-ماكال المهم الله يوفقه
قدر::اممممم
-باوعتلها متفاجئه ضحكت وكامت من يمنا
مديحه::اگلج هيه اريج مو أيامها شوكت تجيب
-شمدريني دشوفيها ماجنها حامل
مديحه::بس والله حلوة بت الاوادم
-باوعتلها ضحكت
مديحه::بس لا غرتي
-دكومي لادفرج
مديحه::متوحشه ماعندج رحمه تخوفين خل اشرد لا تأذين طفلي كوم ماما خاله مسودنه .
-كامت وهيه تلزم بطنها ،، طلعت تضحك يربي عيارتها
ماتنحزر لليل الحجي دز على مديحه غمزتلها روحي
خلي يطيح حظج
مديحه::أمش وياي
-متوحشه ماعندي رحمه شلج بيه نوب اذي طفلج
احجي وهيه تتوسل بعيونها ثأري بنين وراي ميته ضحك
بنين::خرب بليسج سونه يااا
-والله تولي الحقيرة
مديحه::استحي اروح لوحدي خاف يمه الولد
بنين::لا لوحده امشي اوصلج وارجع
كامت وهيه تتوعدلي رجعت بنين تضحك،، ها شنو
بنين::صدمتها ابوي وعمي محمد واياد ومولي
-كسرت خاطري هسه تضل تتلفت بقيت يم قدر
وكلهن گاعدات اريج ماشالت عينها عني شويه واجت مديحه تمسح بعيونها
وفيه::ها لزمج الحجي ياماما يريد مصلحتج
وداعت ثابت لعب بطارق لعب وشرط عليه يجيب أمه
-ضلت مديحه مدنكه وام اجواد وخوات خاله وفيه هم
حجن وياها كتلهم خليها تفكر ماريد اضغط عليها
اريج::يووو ترى الف وحده تتمنى الولد مناقصه شي
ابن عائلة وناس معروفين يكول اسعد عمام ابو تجار
-عرفت قصدها غلست وجني مااسمعها و مديحه هم
لبستها درنا وجهنا لخاله كنالها نروح خابرت مولي سلمنا وطلعنا وشكد وصيت قدر ماتتسرع وتنتبه من اريج
قدر::اصلا مااجي بعد راح انشغل بنتي والبنات
يجني
-بوسناها وطلعنا وصلت للبيت احس مكسرة تكسرة
يبوي عبالك جنا مسافرين .
مديحه::بس حلوة لمتهم ربي يدمها عليهم
-شمرت الصايه والشال وكعدت بصفها
غردي شكالج الحجي
مديحه::گال ضبيته وهو متندم گتله مامستعده للرجعه
-شو مامقتعه ليش احس اكو بعد كلام
مديحه::اكيد مايسكت بس مااهتميت
-شنو تقسطين عليه تقسط ماتحجين
مديحه::ماريد اغثج
-لا عليج الله خاب شايفه الي جلدة تدبغ على الدگ
بعد ماينوجع احجي
مديحه::الضاهر الرجال مامعترف بزواجج من الباشا
-لا بس گولي مخطط لغير شي
مديحه::مافهمت
-يجي وكت وتفهمين كومي خلينا انام
مديحه::ليش ماتخلينا نشيل منا فلوس قدر على بيج
على ذهبي والعندي ناخذ بااحسن مكان ونفتحلنا مشروع ونعيش
-هاي فكرة الحجي الي مافهمتيها هسه عرفتي
مديحه::مالج حق عليهم خو ماتجبريهم يتقبلونج
-لا مااجبرهم بس ماعوف اختي لحد ما تستقر
مديحه::احس روحي مقيدتج
-اكلي تبن ،، حجيتها وكمت لجنطتي طلعت نقالي باوعت
لرقمه فتحت خط بحسرة وشكد حاولت اخفي عنه بس يعرف البيه من صوتي
الباشا::شبيها سمرتي
-اذا بيوم خيروك بيني وبين ،، قاطعني .
الباشا::مايسووها لأن يعرفوني ،، سمرة تحملي لخاطري
وأنه ماريد منج تجاملين اهلي اعتبريني ماعندي أهل اهم شي أنه وياج مرتاحين ..
-سكتت اخذله ساعه غزل وسوالف نهيت مكالمتي ويا
ورحت تمددت يم مديحه كل وحدنا بينا صافنه بهمها
كم يوم وطارق هم اجه بلغت الباشا
الباشا::اي يأبه خلي يحجي وياها بلكي يتصالحون
شو اطينياها وينها .
شتريد منها ؟
الباشا::تغارين السمرة
-منين اغار شبيك مديحه اختي
الباشا::يأبه غير بعدج ماحلت بعيني مرة
--اممممم جا اريج حبلت من جبن ابو الولد
الباشا::هههههههههه طاح حظج ياأم اعطوب
-حجيتها وتندمت احس بروحي عركت شمرت النقال على مديحه مدري شنو يحجي وياها خلصتها خوش خوش
سدته سالتها شنو كالج
مديحه::شغلات مال كبار لا تدخلين بيها
-ايا حقيرة خوش أنه الج ،، وهيج الايام تمشي
وطارق يتصيد الفرص بس اكوم يلزمها اجي الكاها
حمرة من البوس بس ماتنازلت شلعت كلبه كلت خليها ويا
مديحه::ماخابرتي قدر
-دتعاي نخابرها دكيت ردت تضحك فتحت كامرة مكعده
بنتها بكركوتها
قدر::ولج بنتي عرمه تريد اغاني
مديحه::خلي شيخ ثابت يأدبها
قدر::لا كمت أشغللها لطميات تسكت
-شخبارج
قدر::زينه ام جواد ماقصرت علمتني هواي شغلات
وخاله ماعايفتني ونغم صبح وليل يمي وثابت يلزم خفارة
انام واعوفها عليه الكاه محتار بيها نوب اخاف يخنكها بحظنه
مديحه::خرب عقلج انتي وبنتج مو راحه
قدر::صدك اليوم اريج عدها ولادة خابرونا من الصبح
-وجابت بعدها
قدر::ماكو لحد الان منتضرة بنين تخابرني.
--الله يسهل عليها
قدر::اي والله خطيه .
-خذتلها مشوار ويا مديحه وسدته طارق استلمني
صحت بيها ترى مليت استحي شكوله لاتجي
مديحه::كليله احنى بيت قدر
-رديت عليه اكلني بالسلام
طارق::أنه وامي بالطريق بيها مجال تستقبلينا ولو اذيناج
-تنوروني أنته اخوي الله يشهد هلا بيكم سديته وكمت بسرعه لميت الصاله وحضرت ماي وضيافه و مديحه
ادردم يمعودة عيب اطردهم خلص انتي خصميها وياهم
راحت تبدل وأنه بلغت الباشا كال عادي حتى نسيت اساله
على اريج شكد عيب كمزت من صاحت الحقيرة
مديحه::يله يلحنينه تسال على شريجتها يمه من العيارة
-رحت استقبلت طارق وأمه دخلو رحبت بيهم
رغم فاطمه مبين كوى جايه دخلت لمديحه ولج فضيها ترى
ماجيين يخطبونج همه من زمان عيالج،، رشت عطر ومشت
بدون ماتلتفت عليه ضليت فاگه حلكي تبعتها سلمت بثكل ونضرات فاطمه مثل الرصاص تباوعلها
طارق::ترى مللت بيت الحجي حتى اخجل اروحلهم بعد
وكلت الباشا موافق بالي تردي
مديحه::اي خوش همه جنتهم بالمستشفى كم يوم
وروحلهم
فاطمه::عليمن رايحلهم بعد خو منا وناخذج
-رديت عليها ،، لا خاله مايصير همه معتبريها بتهم
شلون نخليهم بضهرنا عيب لازم يرجعها بعلم الحجي
عوجت حلكها ماراضيه بقو كاعدين شويه وراحو
مديحه::بعدها تحجي معلك شفتيها؟
-يمعودة غلسي عنها وغمض عين فتح عين تجيبين
وتلتهين بطفلج اكلج صدك ليش ماتاخذين سونار
مديحه::مو هسه خل ارجع واخلي ينفذ شروطي
-ذكرتيني شنو يكولج وافقت على كلام الباشا
مديحه::اي الله يوفقه ماقصر هو كايله لو تخليلها مبلغ
بالبنك لو تشتريلها كاع ضمان الدنيا فوت وموت واذا صار عليك شي امك تشمرها بالشارع ومانسيت الصار بقدر وشسوو بيها عمام ابوك وانته عندك خير المن تريده عاد اضمن شي لابنك بنتك
-زين يسوي هم طلع يفكر الباشا
مديحه::شوفي سونه احسن واحد بيت الحجي هو الباشا
ـ هزيت راسي اي خلص اليل وثاني يوم استغربت
ماخابرني احجي بگلبي اي مرته جابت اكيد ملتهي بيها
مديحه::ها شخطتي تحجي ويا روحج
-انتي حتى بيني وبين روحي هم حاشره اذنج
مديحه::غير حواجبج واحد يصعد والثاني ينزل
وحلكج رايح منا وجاي منا تعابير وجهج كلها تسولف
-اگلج من أمس ماخابر وقدر گالت اريج بالمستشفى
مديحه::اكيد التها بيها ماشفتيهم شلون بولادة قدر كلهم
واكفين شو خابري قدر خل نسألها
-دكيت ماردت شويه وهيه اتصلت ردت عليها مديحه
مديحه::ها ام تينه شنو الاخبار
قدر::ولج لا يسمع ثابت مايقبل نصيحها تينه
مديحه::شخبار اريج جابت لا
قدر::اي جابت وقبل شويه مطلعينها بس أنه مارحت
خاله خابرتني تكول موزين على بنتج نفاس ماعرف شنو
مديحه::يجوز صح هيه إدرة المهم شجابت اريج
قدر::يكولون ولد
مديحه::الله يخلي الهم ماتجين نشوفج
قدر::الخميس ليلا
-هنه يحجن وأنه بالي يسولف،، نساني وانشغل بيها
نهن مكالمتهن و مديحه كامت تنضف ولج اكعدي لا يصير بيج شي وتبليني
مديحه::شسالفه نوب الحامل ماتتحرك
دروحي طلعي غيرتج بالمطبخ وسيولنا غدة
-مارديت عليها وصدك طلعت غيرتي بالطبخ
لليل وهو ماكو حز بخاطري حيل وانقهرت
مديحه::خابري باركيله
-لا ماخابر
مديحه::يمه الطناكير من تجي بت الصخل ضاله تحركين
بروحج عليمن د اتصلي .
-ماخابرت يوم ثاني وهم ماكو نخابر قدر تكول ملتهين
ناس تجيهم ،، تالي طك كلبي خابرته رد بتعب
الباشا::هايابه .
-حسيته فشلني ماعرفت احجي كتله مبروك
وحمد الله على سلامة اريج
الباشا::الله يسلمج حبيبتي
-سكتت وهو هم ساكت تحججت بمديحه وسديته
بس متت قهر بجيت لحد ما تعبت
مديحه::ترى زوجته خو مايعوفها وأنه شفت اهتمامهم
بنسوانهم كلهم نفس الشي
-الله يسعده ،، وهيج خلصتها الخميس اجت قدر
التهينا وياها بنتها صايرة شحلاتها
قدر::يووو الحجي صبح وليل يجي يشوفها
وخاله تكول بعدها بزر نفاس من تكبر تصير تخبل
-العب بشعر البنيه يربي شنو هل شعر
قدر::يكلولي على خالتها نغم تكول سونه شعرها يخبل
صدك شعرج عليمن طالع ؟
-سألت امي قبل ،،تكول شعرج على وحده من جداتنا
على أساس هنديه ،، حجيتها و مديحه طاحت من الضحك باوعتلها يا شبيج.
مديحه::هههههههه خرب ابوج بت الصخل أنوب هنود
ولج لاتحجين اسكتي أنوب اتفضحينا خرب شنو اهلنا
طلعو كلهم نغولة هنود سود كاوليه
-كفختها وقدر تضحك
قدر::تدرين كلام امج صح لان كلها متعجبه على شعرج
-لان عبدة وشعري سرح
قدر::لا والله همه العبيد بحلاتج خاب غير ميتات عليج
وبعدين انتي سمرة مو سودة
-بقت ليلها كله تسولفلنا على بيت الحجي ثاني يوم راحت
تعدة اسبوع واحنى مخلصيها مكالمات تفتح كامرة وتخلي بنتها كبالنا .
قدر::شنو اخبار طارق
-منتضرين الحجي يفرغ حتى يروحله ومناك يرجعها
قدر::هو أنه هم ردت اروح اسلم على اريج بس كلما اكول لثابت يگلي هوسه خلي تخف الناس حبايب اريج هواي
-خوش ديري بالج على بنتج يله باي كمت وروحي تلوب
وهو ابد ماله حس مديحه انطت رقمها الجديد لطارق واليل كله همه يسولفون،، كعدت مالي خلك عفت مديحه نايمه
ونضفت وحضرت اكل كل شويه ادخل لصفحته اباوع تالي ماكدرت اصبر دزيتله رساله صباح الخير ورا ساعه رد
الباشا::صباحج عسل اسمر بلون خدودج
-بعد مادز شي غميت روحي بعد ولا اخابرة ولا اراسله
امداني شبيه يعني مبينه شبع مني وملتهي بأريج
مديحه::ياالله دخيلك اليوم ثنين جا انتي حتى الاثنين
اطنكرين سودة عليه
- من قهري بجيت ادنت شبكتني
مديحه::يجوز عنده شغل مو كالت قدر راجع لدوامه
-مايغيب ساعه حتى لو عندة شغل،،صار أكثر من أسبوع
مديحه::اي غير ملتهي منا زوجته ومنا دوامه خابري
ـ لا والله مااخابر لو يبقى شهر بعد مااراسله.
مديحه::حضري يولي عليمن محترك گلبج.
-باوعتلها ضحكت،، كملنا ومثل كل يوم خابرنا قدر
ردت وبنتها بحظنها وتاشرلنا بيدها عود تينه تحجي ويانا
قدر::هلووو شلونجن خالاتي
مديحه::ترف يأتين يمحلي البساتين
قدر::يله روحن خلي اجهزهها اريد اروح لبيت الحجي
مديحه::ها شعجب ؟
قدر::ثابت رايح بشغل وكال اتاخر عاد كلي روحي لبين ماارجع هسه راح يدزولي مولي .
ـخوش روحي ومن تجين خابرينا ،، سدينا ولليل أنه
عيني بالنقال بدت الحساسيه وياي جسمي احتر مديحه ضلت تحجي عليه همزين باقي عندي حبوب شربت
وتمددت وهيه يمي غفيت مادري بروحي للصبح كعدت خطيه نايمه يمي بالصاله كعدتها
مديحه::ها شلون صرتي ؟
-ليش نايمه هنا؟
مديحه::ماهان عليه اكعدج
ـ كمت سبحت وهيه خذتلها مشوار ويا طارق طلعت لكيتها
مغثوثه هااا؟
مديحه::كلش مايصبر بعد.
-حقه وهمه خطيه كافي خلي يفرح بحملج وانتي هم
مديحه::اي كتله روح لبيت الحجي ،
-اي هاي هيه ،، شوكت يروح
مديحه::مخابر الباشا كايله انه بالدوام وهو مايقبل يروح
اله الباشا موجود .
-خوش خلي احسن حتى يحسب حساب نوب
ما يفكر يزعلج ،، صدك قدر ماخابرت مو كالت رايحه لاريج
حجيتها ودنكت على نقالي دكيت ماردت عفتها تريكنا وللضهر مديحه دكت ها
مديحه::خاب تلكينها عافته بالبيت وراحت .
-شبيج جا تبات عدهم شنو .
مديحه::عمي على هوستهن الشفتها لو يدك مدفع مايسمعن
تلكيها راحت من الصبح اكيد ملتمات خليها تلتهي وياهن
-سكتت ومر الوقت لا الباشا ولا قدر لليل دكيت مغلق
التفتت على مديحه
مديحه::ها شبيج؟
-مغلق شسالفه؟سكتت مديحه نوب كالت دكي على ثابت
دكيت اول مرة مارد مرة ثانيه رد يمه صوت سألته عنها
ثابت::ها خاف مابي شحن لأن هيه بيت الحجي
-من أمس هناك شعجب ؟
ثابت::اي لأن أنه عندي شغل وماكدرت ارجع فبقت
-خوش شوكت ترجع ؟
ثابت::أن شاء الله الصبح
-خوش خليها تخابرني لأن ضل بالي
ثابت::أن شاء الله
-سديته بس مامرتاحه مديحه بقت تحجي عليه
مديحه::شسالفه ترى عادي شنو الجديد هيه دوم هناك
-بس من أمس ،، كمت وعيني للساعه ضليت الوب
كلبي معصور عصر ياربي دخيلك من قلقي بجيت
مديحه::خاب شبيج صدك عود شنو هل سوادين
-طلعت للحديقه اباوع للسما وروحي تلوب
مدري شبيه اختنكت ،، يمكن لأن مقهورة من الباشا
اي يجوز سبيت روحي وعتبت عليه ليش هيج معقولة ماجيت على بالك لو ابوك كالك عوفها وعفتني اي اكيد
اسال واجاوب روحي طلعت مديحه دخلتني
مديحه::شبيج يمعودة صلي على محمد
-اللهم صل على محمد وال محمد ولج مدري شبيه
مديحه::لأن ماخابرج .
-دنكت ابجي شفتي اكيد ابو وهو مايكسر كلمته
مديحه::وان جان هيج لا خير البي هو الخسران
-هزيت راسي اي خلص ليلي تفكير للصبح غفيت
كعدت مخترعه
مديحه::اسم الله شبيج
-بدون مارد عليها كمت ادور نقالي دكيت على قدر مغلق
دكيت على ثابت وعذرة خله عقلي يفتر
ثابت::ها سونه اعتذر نسيت
- ماخليته يكمل سديته والتفتت على مديحه هاي الكلمه
مثل كلمة طارق وعذرة من خابرته عليج
مديحه::شبيج يمعودة قابل ثابت يأذيها مالت الله الولد وأهله يتفدونها تفدي .
-كمت للغرفه وهيه وراي لبست صايتي وأخذت جزدان
لزمتني مديحه دفعتها .
مديحه::دخل البس امشي وياج .
-بسرعه لا تماطلين ولج قدر بيها شي.
مديحه::اوووو غسل ام السوادين بت الصخل.
-طلعنا هيه تمشي وراي وادردم من قلقي وخوفي
ماخذت سيارة امشي واتعثر لحد ما وصلنا شارعهم
التفتت على مديحه تجر بروحها
مديحه::كلبي وكف ولج فحطت احترك عمج
-درت وجهي مشيت وكفت گبال الباب مال بيت قدر
دك نقالي باوعت الباشا رفضته مدري ليش كلبي انعصر اريد ادك الجرس ومترددة مدري خايفه خاف الكاها متأذيه لو نوب اتفشل ،، والظاهر شافوني انفتح الباب ونغم وخاله بوجهي تلكني بس وجوهن ماتبشر بخير دخلت و مديحه وياي
وفيه::عود جاي اخابرج .
-التفتت على مديحه وحالها مو افضل مني وجها انخبط
رجع نقالي دك رفضته احس كلبي انخمش اول ما دخلنا
الصاله الحجي وأخو كاعدين اريد ااسلم الكلمه ماتطلع
رجل تتقدم ورجل ترجع عيني لغرفتها اباوع بالوجوه
التفتت بنتها بيد بنين مدري شلون وصلت لباب الغرفه
كلشي توقعت وفكرت بهواي أمور بس مااجه أبالي الكاها
هيج شنو هذول سيد شيخ وليش يمها شبيها اختي شهكت من شفتها .
شكرا لزيارتكم عالم روايات سكيرهوم
