رواية بنات الملا الفصل الثامن والعشرون بقلم رغد الموالي
في ذلك البيت الذي سكنه الحزن واصبح خاوياً من وجود ذلك الشاب في ذلك البيت الذي تسكنه امٌ مفجوعة بولدها وزوجةٌ قد ترملت في صغرها
مازالت النساء تقصد ذلك البيت لتؤازر تلك الناحبات الفاكدات...
تقدمت اختها بخطوات متثاقله مابين استيعاب ماحدث ومابين لا
تقدمت ودموعها تنهمر على وجنتيها حتى ان حجابها تبلل من كثرة مسح تلك الدموع
دخلت فنظرت لااختها الارملة المكسورة المحدبة الظهر
مورمة الجفنين لاطمة الخدود
زمرد... بنفس تلك الحاله... حبيبتي جواهر خيتي جواهر
جواهر... إحتظنت أختها وإنفجرت بالدموع بحرگة
يخيل إليّ ان الذي في الخارج خارج مكانهم يسمع بكائهما ومواساتهما لبعظهما
فعلا... اللسان يعجز عن البوح بالكلام
كانت المواساة دموع لا كلام!
زمرد... حبيبتي جواهر بعد الاربعين تجين يمنه مو؟
جواهر... بصوت متعوب حزين... ان شاء الله بس ادعيلي زمرد ارتاح مداأنام الليل مداأكدر مداأتقبل فكرة عافني وراح
زمرد... حبيبتي جواهر ربي يريح بالج
كليلي شمحتاجه
جواهر... مامحتاجه شي اني أشكرچ
زمرد... باوعت للمكان كان يصرخ بالحزن
كان يذكر الحزين في كل لحضة أن يبكي
وجهت نظرها لااختها وتكلمت
جواهر لازم تجين يم اهلي هنا لو بقيتي تموتين ببطء
جواهر... تكلمت بتعب... ان شاء الله
ام جواهر... يلا زمرد نروح أبوج هسه يجي وبعد غداء ماسويتلهم
زمرد... هزت راسها بتقبل... صار يمه... خيتي جواهر ربي يعينج على ماإبتلاج وينطيج القوه وتربين هالايتام
جواهر... مشكوره اختي اسأل الله ان يسعدج بزواجج ويرزقج بالذريه الصالحه
الحياة كذبة نعيشها نبحث عن السعادة الأبدية لكنها ليست في الدنيا!
نبحث عن إكتمال في حياتنا لكن في الحقيقة كلٌ منا له معركة خاصة يحارب بها
بعد مرور اسبوعين...
سيارات الشرطة في المنطقه وانتشار كبير ثار إستغراب أهل المنطقه بأكملها
كانو امام بيت الشيخ ذياب
دقت الباب فتح الهم الباب فهد...
الضابط... عدنه امر بتفتيش البيت
فهد... شنو وليش تفتشون
الضابط... سوي طريق ولتسأل ليش
فهد... هز راسه بقبول كانت عيونه تتنقل لكل عناصر الشرطه
راح وبعد ثواني رجع تفضل سيدي
دخلت الشرطه تفتش كل البيت والضابط كان واقف مع فهد وإيهاب
إيهاب... شنو الموضوع سيدي غير نفهم
الضابط... آزر عايش وياكم هنا؟
إيهاب... لا
الضابط... وين ممكن يتواجد
إيهاب... سيدي آزر من زمان عايف البيت وعايش بره ومو ويانه بس فهمنه شبي آزر
الضابط... ابنكم متورط بالتعامل مع مهربين إرهاب
فهد... بصدمه.... شنوووو
ارهاب
الضابط... اذا عرفنه ان آزر يتردد لهذا البيت ومانطيتونه علم نضطر نسحبكم كلكم للتوقيف
طلعت الشرطه دون العثور على ازر او أثره
كانو عمام آزر يمرون بموقف صعب بعدم تصديق
مباشرة ركبو سياراتهم وتوجهو لمعمل الحداده
فهد... دخل وهو مخلي ايده على راسه
تعالوووووووو تعالوووووووو
ياولد ذياب تعالو سمعو العار الي دخله النه ابن نعمااااااان
مهاب... شكو شصاير
إيهاب... آزر إرهابييييي والشرطه دادور عليه
مهاب... بصدمه... شنوووووو
شمر الروطه ( حديده) بالكاع ولزمه لإيهاب من قميصه بتهجم
انت داتدري بروحك شداتحچي
فهد... على كيفك مهاب قابل هو من كيفه دايحجي
الشرطه اجت للبيت وفتشت البيت
رخى ايده عن اخوه والتفت لفهد وتكلم انت شداتحجي
وتكلم بهدوء هاي الخفت منها
بعدها صرخ
هاااااااااااااي الي جنت خاااااااااااااااااايف منهااااااا
ولك آآآآآآآزررررر
اجه آسر عاقد الحاجبين وعيونه تمر عليهم كلهم بسرعه
شكو عمي
شصاير
رحاب... أخوك
اخوووووك داتدور عليه الشرطه ارهابي صايرلي
فتح عيونه بوسعها شنوووووووو
بعدم تصديق أخويه يشتغل بالاستيراد والتصدير ياارهاب
فهد... الشرطه اجت اليوم شنو نكذب عليك
آسر... اني متأكد من آزر يشتغل استيراد وتصدير
مهاب... وشيستورد وشيصدر شيخ؟
آسر... كال بضاعه منوعه ما كال شنو هي
مهاب... وانت صدكته مووووو
آسر... والحل شلون هسه نعوف آزر تركض وراه الشرطه
إيهاب... لعد شتريدنه نسويله طبه طوب
آسر... طبه طوب!
اذا كان كلامك صحيح واخويه فعلا مثل مداتكول
معناها مصيره اعدام او سجن مؤبد
فهد... الي يجي من ايده الله يزيده
آسر... كلكم ضده انتو شنو هالحقد هذا
مهاب... اخوك واحد مستهتر ويستاهل الي صار وياه
آسر... مستهتر؟!
لو انت الي خليته يعوف البيت انت عفته بحاله من ثغير وانت شاد وياه
مهاب... تقدم عليه بتهجم خازر عيونه واستوقفه إيهاب... مهاب مو وكتها عووووفه
مهاب... داتسمعه شدايمسلت
فهد... روح آسر منا كافي فضايح
آسر... من هالكاع أكللكم توكفون وي آزر اعترف بيكم ماتوكوفون لاعمامي ولا أعرفكم
إيهاب... صار عمي آسر اذا مو لخاطر اخوك لخاطر ابوك ولخاطرك
مهاب... هذا صخم تاريخ شيخ ذياب سمعتنه صارت بالكاع
آسر... مجان فكرت بسمعته من كتلت نهله
مهاب... تقدم عليه بغضب وضربه ببوكس وثار آسر ورد الضربه وحاجزوهم عمامه
فهد شبيكمممممممم كولو يالله
مهاب... ولد نعمان لاتربيه ولا احترام واحدهم لسانه شطوله
آسر... لهنا والزم حدك دمرت امي ودمرت اخويه وهسه تريد تدمره بالزايد شنو هالحقد الي بگلبك
مهاب... اطلع بررره من هالكاع لاابن اخويه ولااعترف بيك
آسر... غصبا ماعليك باقي المال مو مالك وحدك وتقرر
ايهاب... عمو اسكت عمك هذا مايصير ترده هيج
آسر... شو ارده واريد اشوفه شيسوي
مو كافي الي صار ويانه بسببه
رحاب... استهدي بالرحمن ياب كول يالله
روح للبيت هسه وبعدين نشوف شنسوي وي اخوك
تكلم بغضب مكتوم وهز راسه... رايح اني رايح
طلع من المعمل واستخرج تليفونه واتصل على آزر رن رن رن وبعدها جاوبه آزر
آسر... بنفس الغضب المكتوم... الي سمعته صحيح
آزر... وشسمعت
آسر... الشرطه تدور وراك ليش
آزر... اجت للبيت
آسر... اجت........... كلي الي سمعته صحيح
آزر... اي... واني مقدم على سفر حسافر
آسر... الشرطه تلزمك لاتسافر هسه داتدور وراك
آزر... طرق غير شرعيه اسافر
آسر... جايز من روحك انت الضاهر
اصبر واختفي هالفتره واني اراقبلك الوضع
آزر... شتراقب الحموله بيد الشرطه ولازمين ادله عليه بأي لحضه يتوصلون الي
آسر... ياحموله... بعدك تكذب عليه
آزر... حمولة المخدرات
آسر... مخدرات؟
... لعد شنو التهمه
... متهميك 4 ارهاب
... لا آسر اني مو ارهابي وروح ابويه وروح جدي مو ارهابي اني اشتغل بالمخدرات
اتاجر بيها
... ليش آزر ليش سلكت هالدرب هذا لييييييش
... الي صار صار آسر مو وكت ملامه
واني هذه الحقيره الا انتقم منها يلا اهاجر
... منو هي؟
ماس بنت حجي عبد.... الملا هذا العطار
... بأستغراب... شنووووو ماس؟ وشعرفك بيها شنو الموضوع
.... سالفه طويله بس حختصرلك
هذه اني وياها علاقه والتقت بيه وعرفت بسالفة المخدرات محد غيرها مبلغ عليه ولفت حبل المشنقه حول رقبتي
وروحه لاابويه لااندمها اذا ماپجيتها دم اني مو ابن ذياب
... ولك شجابك عليها ومن شوكت وشلون
ازر... اني حبيتها جنت جاي حتى انطيها فلوس جنت اشتغل وانطيها مصرف كل بين فتره وفتره امر عليها وانطيها فلوس اشوف ابوها على كد حاله وهي بنيه ويعجبها كلشي كلت مااخلي شي بنفسها وآزر موجود
اجيبلها فلوس وشتريد تصرف وتشتري وخل تعيش بخيري دام خشمي يشم الهوى
اني حبيتها كلش آسر وحك هو الله ماحبيت وحده مثلها
روحي متعلقه بيها وهيج تجازيني بالاخير
آسر... اذا الي كلته صحيح وحك الخوه ياآزر لا ادمر بيت الملا
مو زين من عدنا نسينه دم ابونه نوب اخويه وهم منهم بدت
... عوفها لماس عليه اني أادبها اني مااريد احد يأذيها اني اني اعرف شلون اندمها واخليها متنسى آزر بحياتها بس خليها هسه خل تهدأ وساعتها يصير خير
... بس كلي شلون جنتو تلتقون ولك اني مااشوفك بالسنه مره انت وين لكيتها
... اشتريتلها موبايل ونتخابر هسه اتصل عليها مغلق قافلته وهذا الي أكدلي هي وره السالفه
... ماشي آزر ديربالك على نفسك
غلق المكالمه وعض شفته السفلى بتحلف وكأنه ينوي لشر من عيونه الي تنظر للأمام
توجه لبيت الملا وكف بالباب راد يدكها تردد
بقه واكف مخوصر ايده يروح ويجي
بعدها وكف خله باطن ايده خلف رگبته يفكر شنو يسوي شلون
باوع للشباك اكيد هي مراح تطلع هسه
فاليوم ماكان اليوم المتفق بينهم
رن الجرس ووگف بجنب الحايط دون ان يشوفوه عند فتح الباب
طلعت ماس فتحت الباب صاحت منووو
صاح هو بعلو صوته وكأنه يكلم صديقه الي ببداية الفرع
الشباك
الشباك
باچر يكمل واذا مكدرت تعال على الباب
ضيقت عينها بتفهم وابتسامه ماكره
وراحت مهروله لياقوت
ماس... حبيب القلب بالباب
ياقوت... هه مو وكت استفزازج
ماس... والنبي اطلعي وشوفي
ياقوت... ولج شطلع
ماس... ياقوت اطلعي وشوفي شيريد وشجابه هسه
لبست شالها وطلعت تكلكت من خلف الباب
تتفضل منو
تقرب قرب الباب الي كانت مفتوحه قليل
واعطى ظهره للباب والتفت للفتحة الباب وتكلم
... بنيت عليج امال كل ليله احلم شلون تصيريلي عروسه بس اهلج الي سوو بينه مو قليل
اني نسيت الماضي ونسيت ابوج كتال ابويه وكلت انتي مالج ذنب بس نسيت العرك دساس
تكليلها لأختج يكول آزر أني أعرف شلون اطلع حليب امها من خشمها واعلمها شلون تبلغ الشرطه عليه
خل تدير بالها على روحها لان آزر مخبل وخل تتوقع كلشي
دار وجهه وراح
عقدت حاجبها بإستغراب وخذلان شنو الي صاير شبي آسر وياشرطه
تمشت بخطوات متثاقله مليانه افكار ببالها
اجت ماس... متبسمه وغمزت بعينها... ها شگلج
رفعت عيونها بتثاقل وتكلمت بهمس... تعالي تعالي احجيلج
فتحت عيونها ماس بخوف... شبيج شصاير
دخلو للغرفه وسدو الباب كانت خايفه ان يسمعها احد او يعرف شي
التفتت يمنه ويسره وتكلمت... آسر يكلي ان انتي مبلغه الشرطه على آزر اخوه
ماس... بعدم رضا وقبول.... شنو عيني شنووووووووو
هه
هاي بلوتهم يذبوها براسيييي شعندي يمه وشلاكيني
وشكتيله
ياقوت... ملحكت ارد نصدمت
ماس... مو بومه بقيتي ساكته وتباوعيله
ياقوت... يكلي آزر واحد يخوف كلشي يطلع منه خل تتوقع كلشي
آزر متحلف بيج ماس
ماس... وليش يتحلف يمه
شنو تايهتله اني
دخل اشوف شلون يتجرأ عليه حتى اكسرله ايده
ياقوت... اسمعيني الموضوع چبير مو مال اضرب واحچي
ماس... باعي اني ماأخاف غير بس من الخلقني
يتهمني يريد ينتقم مني فوكاها
شايفني بالمراكز افتر مشكلجيه
شبيهم ذولي شو مابيهم واحد عاقل
ياقوت... وشلون حتبرئيها لنفسج وهو تاهمج انتي
ماس... هسه اخابره وافتهم شصاير
تعالي امشي راقبيلي الوضع
ياقوت... ابقى امشي وراج واشوف تاليها وياج
دخلت للغرفه وياقوت بقت باب الغرفه تراقب لماس
فتحت جهازها ماس واتصلت ب آزر
بعد اتصالين فتح خط
رد ببرود مخيف... وإلچ عين تخابريني؟
ماس... يعني الي حچاه اخوك صحيح متهمني
آزر... ومنو غيرچ عرف!
ماس... اني بس وماكلت لاحد
آزر... بإستهزاء... هه ضحكتيني جر نفس وتكلم هذا شاربي مو عليه اذا ماندمتج ياماس اني تطعنيني بظهري
ماس... ماطعنتك بظهرك ولتبقه تمسلت مسويلي فيلم اكشن وعايشلي قصص وروايات عراقية كرار صلاح دور البطل المجروح
آزر... ولچ هاي عليه هذا لسانچ... بسيطه اذا مكصيته اني مو ابن ابويه
ماس... شوف آزر للمره الاخيره اكولك مووو ا اني تريد تصدك صدك ماتصدك طبك طوب
آزر... بصياح... شلون حتخليني هسه اجي اكسرلها راسها لسانچ كصي
ماس... تتهمني مخابره الشرطه ودكلي احترميني انت شخليت احترامات الي لمن هيج تتهمني لو الي بگلبك حقد كام يطلع هسه
انت وعمامك واخوتك الحاقدين على ابويه
طلعتو هسه الي يجيكم من الريح تكلون عبد المجيب وبناته كافي الزم حدك مو عبالك اني حسكتلك واذا تفكر تندك بيه اشوفك النسوان شتسوي
روح شوف منو عرف ببلاويك وبلغ مو تجي تذب بلاويك عليه
يلا ولي... وسدته للخط
دخلت ياقوت لما سمعت هالكلام جانت تسمع لااختها وهي تتكلم كأنها رجل
تكلمت باستغراب... هاي وي آزر جنتي هيج تحچين
ماس... يستاهل شنو يتهمني
ياقوت... اني كتلج فهمي بهدوء لو كتلج صيري رجال وخابري
ماس... ماعليچ هو هيج يلا يجر عدل مره هم تخبلت هيج عليه جر عدل من ابقه اتوسل وابرر يصير عنتر شايل سيفه
ياقوت... بس مو هيج
ماس... سدي حلگج انتي يالفاهيه سكتت من شافته لااسر تنحول تكوم متعرف لاتمشي ولاتحچي
بسيطه هذا اخوه اني هم اعرف شلون اربي
ياقوت... حتربين ولد ذياب تاليتج
ماس... لا ابقه اباوعلهم مثلج مثل فهاوتچ
شوفي داكلج هذوله صح الي يشوفهم يكول ماشاء الله زلم معدله بس تره تخبلي عليهم يبقه ساكت وميردج آزر تره مينجرع وعركاته مشهودلها بالمنطقه وانتي تعرفين
بس اني من يمي يسكت ميحجي كلشي يبقه يحفظ رزالتي شلون ارزله
واخوه اني اله
اني يتهموني بسيطه
ياقوت... بقت تباوعلها مستغربه متعرف شترد
الايام تتوالى من هدوء صارخ بالضجيج
يخال للجميع ان كل شي يسير بشكل جيد لكن في دواخل النفس كانت هنالك معارك تقام
من جهة ماس الغاضبه من الاتهام
وياقوت التي دخلت في صراع بين قلبها وعقلها
وآزر الذي إعتقد أن حتى حبيبة قلبه غدرته
وآسر الذي قرر يتبع عقله هذه المرة
وماأشد حكم العقل إن العقل قاسٍ إن لم ترافقه المشاعر!!
في ذلك الليل الذي بدأت نسمته تداعبه رياحٌ بارده تفتح أبواب الخريف ثم الشتاء
كان مستلقي رغم أن الوقت منتصف الليل يفترض أن يكون نائم لكن نار الانتقام اشتعلت
وكأن شيطان دخل في رأسه يذكره كل دقيقة في ذلك الماضي الاليم
ويرسم له صورته وهو طفل يتيم حيث لاام ولا اب
كان يضع ايده بشكل مثني على جبهته وينظر للسقف
من ظلام يكسره ضوء خفيف جداً
عقله يكلمه...
أنت شلون علقت گلبك بيها مو تعرف أبوها كتل أبوك
هسه يلا صحيت الا اختها وكعت اخوك
هسه يلا عرفت هالناس هذه بداخلها حقد وعمرها ماتنضف!
شلون
انت حتى لاأبوها توددلته هواي وخضعت هواي في سبيل ان يعطيك بنته
مشيت بقلب مايعرف لوين رايح وعاندت
يما كتلك لا ياأسر هالناس بينك وبينهم دم دم ياآسر لا تنجرف لاتروح زايد
كلي شحتسوي وهسه اخوك نحكم بالموت شلون واخوك حيكضيها اما سجن او يلتف عليه حبل المشنقه
انت ماتعرف شنو ممكن مسوي مصايب بعد المخدرات هذه انت تعرفها شلون لو طلعت عليه تهم بعد
شلون لو اخوك خسرته هو بسببها
فز وكعد بغضب وقبض اسنانه العليا بأسنانه السفلى بغضب وتكلم. ... ااااااااااخ
لعنة الله على قلبي
لعنة الله على قلبي
أني أني الي مشيت وراه ومافكرتتتت شلون
شلون هيج صار
شلون نسيييييييت
ااااخ يانار گلبي هسه بيش اطفيها
شلون
لج ياقوت أهلج
أهلج ياااقووووووت اخ ياأهلج
شسوو بينه
ولج احرك كلب أبوچ بيچ
والله ماتهونين عليه أأذي شعره منچ
بس أخ
وحق روحه لاأبويه وحق ترابه إذا صار شي على آزر
لاأحرك ماس وياقوت واحرك روحي وراها
واخلي عبد المجيب يموت كل يوم الف موته
ومااقتله واريحه
كان اخوه الياس يسمع الكلام لكن النعاس كان غالبه
بعد قول جملته الاخيره نهض
مستغرب من كلامه
... وعبد المجيب وبناته شعليهم
.. التفت اله اطال النظر يحاول ادراك انفعاله انه خلاه يستيقظ اخوه من نومه
فتكلم بهدوء مملوء بالخيبه وجه نظؤه لناحية الباب
هم السبب الي خلو الشرطه تركض وره اخوك
الياس... بصدمه.... شنووو وشلون ومنين عرفو
آسر... اخوك على علاقه وي بنت عبد المجيب وهي عرفت باخوك وبلغت الشرطه
إلياس... لا يابنت الـــــــــــ
آسر... الضاهر مانشف حقدهم القديم وماشفى غليلهم بمقتل أبوك
إلياس... وأنت مو عاشكلي بنته
آسر... أأأاااااااااخ هذا الي حارگلي گلبي
إلياس... وشحتسوي هسه؟
آسر... مااعرف راح أتجنن الياس راح اتجنن
إلياس ... لازم تترك البنيه آسر لازم تنساها
الي يمشي وره گلبه مصيره ذله وهي حتذلك
اخوك هسه الله يعلم وين بسبب اختها واحنه هنا مثل طير المذبوح نلوب
آسر... بس گلبي يكلي هي مالها ذنب
إلياس... العرگ دساس!!
أخذته صفنه بكلامه بين عقل مدرك وقلب رافض....
مع قرب الخريف تفتتح المدارس ابوابها من جديد
لكن هذه السنة تختلف فعودة درة لإكمال مسيرتها الدراسية كان اشبه بالطريق الوردي الذي بدأت تسلكه
ليصنع من درة إمرأة قوية لايعيقها شلل ولا شفقة الناس
الأيام كفيلة بتداوي الجروح رجعت تنفست من جديد بفرحة يملئها الأمل كان الداعم لصنع هذه الفرحة أبويها
اخذتها أمها وراحت للمدرسة المسائية وأنتقلت مع الي بعمرها كانت فرصة لتكوين صداقات جديدة...
الحياة هذه تقسو أحياناً وتربت على الكتف أحياناً أخرى
قست على درة بل علمتها درساً قاسيا جعل منها إمرأة قوية القلب
الحياة خاصمت جواهر منذ مدة فجعلت منها إمرأة أرملة بأيتام صغار
عادت مكسورة يعانقها السواد من رأسها الى قدمها وجفونها وردية أثر تلك النكبة عادت الى بيت أهلها الى ذلك البيت الذي عاشت فيه اجمل سنين في عمرها
الى ذلك البيت الذي كانت تعيش فيه في يوم من الأيام لاتخاف شيئاً ولاتعرف ماهو الحزن حرة طليقة ك حمامة تحطُ على أغصان ألاشجار في أوج ربيعها
تلك الحمامة التي كانت لاتتأثر بكل ماحصل ويحصل
إن المرء يعيش طيلة حياته طفلاًحتى يتزوج،
إنه يكبر سبعون عاماً حينما يتزوج!
فشريك الحياة يشعره بشبابه والاطفال يشعرونه بأنه أصبح كهلاً إن إدراك المسؤولية لهو عاتق ثقيل على المرء
عجباً من الانسان وعقليته كيف له أن يقف في حفل زفافه فرحاً ليحمل مسؤولية كبيرة
ويبكي فرحاً لولادة نقطة ضعفه على الأرض
لاشك أننا نفرح في حفل الزفاف وفي رؤية الوجه البريء القادم للحياة فنحن تحكمنا العاطفة اكثر من العقل فلو العقل كان هو وحده المتحكم ماكان للمرء أن يعلق على عاتقه كل هذا العبىء
حتى في الحزن نحن تحكمنا العاطفه فلو لم تفرح جواهر في عرسها ماكانت اليوم تبكي لفقدان حبيبها
إن الموت حق فلو كان العقل وحده هو المدرك ماكانت لتبكي!
لكن عاطفتها تغلبها حنينها يذكرها لذلك هي تبكي
إن الانسان هو كتلة من العاطفة اكثر من العقل
فعقل الانسان قاسٍ اشبه بشيطان لعين انه يعرف كل شيء ومع ذلك يكفر!
إن تلك الأرملة المكسورة قد إتخذت من بيت أهلها غرفة لتكون شاهدة على إخلاصها لزوجها ورعياتها لأطفاله
لتشهد الجدران عندما تكبر على شبابها الذي فنى تحت سقف تلك الغرفة لتذكر ابنائها فيما بعد!
ام جواهر... يمه جواهر لاتنقهرين ولاتبقين تبچين هاي اني وأبوچ نخليچ بعيونه والي تردي يصير الچ
جواهر... كانت تنظر لجميع ارجاء الغرفة بعيون خجلة ووجهت نظرها لوالدتها.... يمه خاف جهالي مايخلوكم ترتاحون يمه مايكعدون
ام جواهر... دكت على صدرها... شتحچين جواهر جهالج روحي من الدنيا يمه هاي الكلمة ماريدج تعيديها
جواهر... يمه اني ادري بيكم تحبوهم بس هم مايكعدون
ام جواهر... جواهر بنيتي من شوكت حسبناج خطار حتى اليوم خجلانه وتحسبين حساب سكتي جواهر وهالحجي بعد. لاتعيدي وكومي بدلي وتعالي نكعد بالطرمه اليوم ابوچ حيجيبلنه كباب للعشاء يعني مراح نسوي عشاء اليوم
اتبسمت رغم ان الحزن خطف الابتسامه من القلب
رتبت ملابسها بكنتورها القديم لما كانت بنت ومع كل قطعة ملابس تسترجعلها ذكرياتها وشلون الحياة تدووووور مثل الدولاب
سرعان ماتزوجت وسرعان ما انجبت وسرعان ماترملت مرت الحياة بيها مثل سرعة البرق
تمشت بخطوات بطيئه بعد. اكمالها ترتيب ملابسها
وطلعت للطرمه الخارجية كانو اطفالها يلعبون بره
وبيبيتهم فارشة الحصيرة وتطرز تعمل جنطة خاصة للتسوق كانت عبارة عن گونية تمن يتم إفراغها من التمن وتغسل وبعد تنشيفها يبدون يطرزون بأشكال ورسومات بخيوط ملونه تعطي مظهر چذاب وجميل
إجت كعدت يمها وإبتسمت وتكلمت
... يمه منو بعد بقه يستعمل هاي العلاگه بالمسواگ
ام جواهر... اكو أكو النسوان الي بعمرنا وبعمر امي يستعملوها بيها كل البركه هاي يمه جواهر
جواهر... إبتسمت مجدداً... تتذكرين من چنتي ترحين انتي وجدو وشايله هاي العلاكه
ام جواهر... يووووو لاتذكريني، چان جدج يگلي علاكتچ لاتنسيها ياجواهر هاي الخير والبركه
أخذها ونروح اني ويا نتمشى لحد منوصل للسوك نتسوك ونخلي كل المسواگ بيها
مره سألته كتله عمي ماطلعنه مرة للسوك ماتگلي العلاكه
حجي شعبان... بركه هاي بركه
زهيه چانت تسوي منها وتبيع إجت فترة صارت مصدر عيشتنه وزهيه جانت تحب تسوي منها ترسم رسمات حلوه أكللها يزهيه انتي ماتعرفين لاقرايه ولاكتابه منو علمچ ترسمين كالت هاي هيج بالفطرة أشوف الجهال يرسمون اخذلي فكرة
جواهر... لعد شلون چانت تقرأ القرآن
ام جواهر... تعلمت القرآن من الجيران چانت مره تعرف تقره وتكتب علمت بنات المنطقه لما كبرت بيبيتج زهيه صارت تعرف تقره القرآن وعلمت بنات المنطقه هم
جواهر... اي كملي
ام جواهر... اي وهاي تعلمنه عليها مانكدر من دونها حتى المهفة والحصيره مال الخبز والسلة مال التمر منكدر نعوف هالأشياء هاي الأشياء الي داتجي صانعيها من النايلون يمه احسها مو زينه متسوه واحد يصرف فلوسه عليها هاي ربچ خلق النخل ومن سعفها نسوي الاشياء الي نريدها
جواهر... بس يمه الحياة داتتطور يعني انتي على رأيج النخله كنز بالبيت من سعفها نسوي الي ذكرتي ومن تمرها نسوي الدبس، نجبس التمر وحتى النواة مالتها يستخدمو بالعلاج بالطب النبوي
بس هسه لا صارت تجي أشياء تشبه الي تسويها بس بشكل عصري يناسب جيلنا
والعلاج تطور وصار يعالج بشكل اسرع
الحياة يوم بعد يوم داتتغير للأحسن
يعني ابسط شي جان عدنه تلفزيون نشوف بي بس قناة وحده وهسه الستلايت صار يعرض كلشي وقنوات هواي
وجان الهاتف الأرضي الا بالبيت او بمكان العمل يلا تتصلين وهسه الموبايل وين متمشين وياج
مو صح؟
ام جواهر... صحيح اكو أشياء مفيدة دخلت للمجتمع وأكو اشياء مو ضروريه
عجلة الحياة بدأت تُسرع وأقدار بنات الملا لم تُعرف إلى الأن.
شكرا لزيارتكم عالم روايات سكيرهوم
