رواية جذبني فمك البني الفصل التاسع والعشرون 29 بقلم عبير إدريس

لطالما كان حضنك ابرد الاماكن دفئآ لي.

_______

ايفين

ساعه تجر ساعه لا عمو ادهم بين ولا سيلين

صارت العشره وال ١١ وال ١٢ تقريب الوحده سمعت صوت بره بالطرمه لبست شالي وطلعت لكيت عمو ادهم واكف واحواله كلها متخربطه وفهد هم حسيته ضايج ومتأثر ايمن واكف يمهم وميعرفون شنو يسوون حسيتهم حايرين رحت يمهم همست بصوت مخنوك..

ايفين : عمو وين اختي اريد اختي ..

رفع عينه باوعلي وجها ذبلان واصفر بس حاول يغير ملامحه ويطمني اجه يمي وكف قريب عليه وكال.

ادهم : اختج سباعيه وانتي هم مثلها اريدج تروحين تفرشين سجادتج وتقرين اللي اكلج عليه لان انه مابيه افتح حلكي وادعي من التعب انتي يتيمه والله راح يستجاب دعائج..

ايفين : عمو كلي شنو هسه اسوي اهم شي اختي ترجعلي.

ادهم : باعي راح انطيج دعاء تسويه بالمضبوط ،،،

الدعاء يدل على عجز الانسان وتضرعه لله سبحانه لهذا ماعدنه غيره نلتجئ اله ويارب ميخيبنه .

ايفين: يارب عمو يارب..

ادهم : كتبي بموبايلج حتى متنسين ( بسم الله الرحمن الرحيم الهي انا عاجز في كل شيء وانت القادر على كل شيء ارحم عني واقضي حاجتي برحمتك يا ارحم الراحمين ) ..

ايفين : كم مره اكولها..

ادهم ٧٢ مره ) ابد لتزيدين ولا تنقصين.

ايفين: ماشي عمو الله يريح كلبك وكلبي.

ادهم : لتشيلين هم كلبي بارد وعندي احساس مابيها شي..

ايفين : ان شاءالله راح اروح اتوضى وادعي .

ادهم : عفيه سباعيه مريم نامت اكلت.

ايفين : اي سوتلها امك وتعشت وصعدت نامت يمهم فوك..

ادهم : ها زين باعي ماريدج تطلعين بره ضلي بلبيت..

ايفين : وين بره يعني هنا يمكم.

ادهم : عفيه هنا لتطلعين ابد.

ايفين : اي ما اطلع...

دخلت للبيت توضيت ولزمت سبحه بلشت اسبح..

كملت ورجعت فريت السبحه عشر مرات

بالصلاة على محمد وال محمد ( صلى الله عليه واله وصحبه وسلم )

باوعت الساعه ٣ راح يصير الفجر وانتي ماكو مكانها فارغ فراشها مرتب متت قهر تخبلت ، بس من اتذكر كلام عمو من يكول كلبي بارد والله موجود استغفر ربي واضل ادعي ..

للخمسه سمعت صوت بره باوعت من الشباك نزل فهد يركض وراه ايمن وعمو ادهم اخر شي حسيته كوه يمشي ما متوازن عرفت الشقيقة هايجه عليه لان من تلزمه يكوم يترنح من يمشي وحركته تقل يصير يمشي بطيء حركاته محسوبه ...

فتحت الباب ردت اروح اسأل بس تذكرت كلي لتطلعين دخلت وقفلت الباب لان وحدي بلبيت كلهم فوك بيت ايمن رحت جبت موبايلي وخابرت عمو..

جاوبني بصوت تعبان..

ادهم : ها ايفين.

ايفين: عمو شصار ليش طلعتو تركضون اكو خبر عن سيلين..

ادهم : البارحه رحنه للكليه شفنه الكامرات واكو كم محل هم شادين كامرات واحد من المحلات جان معزل البارحه واليوم خابروني جايبين عنوان الولد وجاي وياهم مفتح ...

ايفين : يا الله ..

ادهم : اختج الظهر يمج لتشيلين هم.

ايفين : عمو الله يخليك اريد اختي تبات اليوم يمي راح اموت من الخوف عليها.

ادهم : كتلج اختج يمج تبات ادعيلها وبس وكرري الدعاء الكتلج عليه البارحه.

ايفين : ماشي..

ادهم: قفلي البوب زين..

ايفين : قفلت..

ادهم : يلا ارتاحي نامي شويه.

ايفين: ماشي عمو الله وياك.

سده واني رحت مددت وبيدي السبحه ايدي كامت متاخذ حسيت بوجع بكلاتي لان صارلي هواي كاعده كمت اخذت مسكن اخر فتره عمو راجعلي يم اطباء ثنين لان اتعب بسرعه واقل جهد توجعني كالو مابيه شي بس الجهد موزين عليه وعند الحاجه اشرب مسكن..

سيلين ابد متخليني اشتغل ولا اسوي اي شي نزلت دموعي من اتذكرها شلون تجيبلي كلاص الحليب والفاكهة واني اقره ورغم هيه هم عدها دراسه بس تحسسني اني بنتها وتهتم بيه ...

____

الحديث منقول عن لسان ايمن..

ايمن

طلعنه من البيت وخايف على ادهم الليل كله منايم وبس يشرب جكاير وياخذ حبوب وجع راس كلت اخويه ميصبح عليه الصبح كلش خفت عليه والزاد

الطين بله اتصال تماره بليل تريد تحجي ويه البنات ..

ادهم : وشذكرج بيهن هسه؟

تمارة : اريد بناتي لو اجي باجر بكيفك بعد.

ادهم : تعالي انه اريدج تجين منتضرج..

تمارة : تستهزء ..

ادهم : هواي سهلتي عليه امور عاشت ايدج ..

طبكه بوجها باوعله فهد.

فهد : ها يالحبيب شبيها ***

ادهم :فهد تره ما متحمل احد حتى نفسي..

فهد : هسه انت شبيك متخبل احنه مو وياك ماسوينه سوايتك.

ادهم : ماريد اكلك انت ماعندك ربع غيرتي بس راح تجبرني اكولها.

فهد : يعني انت شنو مكلتها هسه.

ادهم : ايمن سكت اخوك وخلي يعدي الليل على خير..

فهد : اللي يشوف وجهك يشوف خير.

ايمن: فهد جوز من المداهر شبيك انت.

فهد : هههههه سكتت سكتت بس شوفه راح يموت..

رفع راسه ادهم باوعله ونصى ...

انتضرنه الليل كله كاعدين على اعصابنه والتوتر مو طبيعي حتى فهد رغم التحشيش ويريد يخفف التوتر بس هم قلق وكل شويه يتصل بجماعته ..

اول ما طلع الفجر اجه اتصال على ادهم جاوب سده وكال يلا.

فهد : شكو وين..

ادهم يلبس بالقمصله ويحجي..

ادهم : كوم خابروني الامن مال جامعه واصلين

للبيت مال الولد صاحب المحل البيه كامرات وجايبيه من الصبح مفتح ويكول تعالو شوفو التصوير..

فهد : يلا يا الله.

طلعنه وصعدنه بسياره فهد هو وادهم ليكدام وانه ليوره ، اتصلت ايفين وضل يحجي وياها الي يسمعه ويشوفه شلون يفهمها يكول شكد اعصابه بارده ومعايش اي توتر سده ورجع انتبه على الطريق ...

كل شويه ويطلب ادهم من فهد يستعجل.

فهد : ادري اطير.

سكت مجاوبه..

وصلنه للمكان اول ما خفف فهد ادهم فتح الباب ونزل.

فهد : شبيك انتظر خل اوكف..

ايمن : تره هواي لحيت وياه واعصابه تلفانه..

فهد : ديلا يلا انزل..

نزلنه ورحنه للمحل لكينه امن الجامعه موجودين اول ما دخلنه سلمو على ادهم وعلى فهد واخر شي مديت ايدي صافحتهم..

رجعو التصوير من ساعه عشره لحد ساعه ١٢ يلا بينت بالفديو عبرت الشارع وراحت لجهة الكراج..

فهد : الكراج بيه كامرات.

جاوبه ابو الامنيه.

_ اكيد بيه ..

فهد : يلا ادهم للكراج..

طلعنه وادهم ساكت بس ايده ترجف ماعرف وجع راسه زاد لو لان ماماكل كلشي رحت يمه سألته..

ايمن: راسك مو ..

باوعني ومشة مجاوبني..

وصلنه لابو الكراج وطلبنه نشوف الكامرات حجه وياهم فهد وادهم بس يستمع مابيه حيل يحجي وكلش تعب ..

_ هاي الكامرات سيدي راجعها كلها واحنه بره منتضريك.

فهد : ممنون عفيه بالسبع..

طلعو وادهم كال..

ادهم : لتضل تكلب روح على الوقت اللي ضهرت بيه بالفديو السابق.

فهد : ما انتبهت على الوقت.

ادهم: متكلي شلون عينوك بال_____ انت ، المهم الساعه ١٢ اله ثلث..

باوعله فهد معاجبه ورجع للحاسبه طلع التسجيل ، طلعت تمشي وتتلفت منا ومنا تريد تعبر الشارع وصلت للكراج جان واحد واكف وكفت يمه حجه وياها و اشرلها على سياره وصلت يمها مجرد وكفت نزلو ثنين دفعوها للسياره وصعدو مشت السياره وثكلت كبال باب الكراج لان جانت سياره قبلهم صاح ادهم.

ادهم : وكف الصوره على السايق بله..

فهد : شنو تعرفه.

ادهم : اي هذا غزوان..

فهد : ياغزوان ..

ادهم : زوج امها

فهد : زين شجابه عليها ..

ادهم : بعدين احجيلك بس هسه كوم لابو الكراج..

فهد : شتريد منه.

ادهم : فهد فتح دماغك يعني شريد بنيه انخطفت من كراجهم ما عيطت ما صيحت شفتها شلون تدفع بيهم وقاومت يعني وينهم اريد اعرف.

فهد : متشوف كراج فارغ.

ادهم : مستحيل يفرغ لازم يضل واحد بيه انه يوميه اطبك سيارتي واشوف ابو الكراج موجود.

طلع بره وتبعه فهد ضلو يحجون ويه ابو الكراج وابو الكراج يحلف ويبرر مجان موجود كال سألو ابو المسائي لان اني ساعه ١١ اسلم الكراج اله.

فهد : وهذا ماعنده رقم عنوان شلون نوصله.

_ اي عنده رقم هذا رقمه.

فهد : اتصل بيه خليه يجي بدون متبين احنه يمك..

_ صار هسه اتصل.

اتصل بيه وره شويه جاوبه وطلب منه يجي للكراج..

كعدنه ننتظر ساعه كامله يله اجه الولد كاموله فهد وادهم كلت راح بيها لزموه منا ومنا وهذا جنه عصفور بيدهن ،

حجو هواي وياه بالعيني واغاتي نكر ،،،تالي استعملو العين الحمره من اول راشدي من فهد خرط الاول والتالي..

_ عمي اني معليه مسلحين عندي عائله واخاف على نفسي شريد اسويلها يعني انت دتشوف البوك والخطف بعز النهار واني اعزل لا شايل سلاح لا سجينه كفيلك الله سجينه مقراضه ماعندي ...

ادهم : يعني سمعتها تصيح وعفتها على الاقل اطلع صيح الناس روح لامن الجامعه لعد انت ليش خاليك هنا تلعب دعابل غير تحرس..

_ اخويه مالحكت همه دخلو بالسياره حالهم حال البقيه بعدين صارت سالفه البنيه اجه واحد وكف يم الكابينه الكاعد بيها شوفني سلاح بخاصرته واشرلي اشش شتريد اسوي ..

نتر بيه فهد...

فهد : من يا ساعه همه هنا.

_دخلو وراكم يعني الاستاذ والبنيه دخلت سيارتهم وهمه مباشرتا دخلو ..

فهد : يعني جانو مراقبيكم ادهم..

ادهم سكت مجاوبه بعدين فهد التفت على الولد وكله.

فهد: مشكور وانه اسف ضربتك لان نكرت السالفه واعذرنه اعصابنه تلفانه..

_ لا مصار شي ان شاء الله تلكوها.

ايمن : ان شاءالله يله يولد شعدنه هنا بعد..

طلعنه وادهم كعد على الرصيف رحنه يمه.

فهد : شنو دخت.

ساكت و لازم عينه .

ايمن : راسه من البارحه .

فهد : علاج شي ماعنده.

ايمن : لا تاخذلها كم يوم وتفك من وحدها..

فهد : ادهم كوم اكعد بالسياره حاره عليك شمس قويه هنا....

اشرله بيده يعني عوفني..

انتضرنه عشر دقايق وكام راح صعد بالسياره صعدنه ورجعنه للبيت..

ادهم : اطلع للشمال..

فهد : صدك تحجي..

ادهم : لا اتشاقه اطلع للشمال يابه ..

فهد : فهمني شعنده ويه البنات وليش خطف سيلين خاف امهن تريدهن..

ادهم : لا مشكلته ويايه مو ويه البنات..

فهد : وياك ليش شمسوي انت؟

ادهم : ابتزيته ..

فهد : هههههه صدك تحجي.

ادهم: اي صدك احجي..

فهد : وشلون ابتزيته وعلمود شنو وشعدك وياه..

ادهم : قبل شهر رحت للشمال للمكان اليشتغل بيه هو يضل بليل يسكر يلا يرجع للبيت سلمت وكعدت معرفني جان مطفي حجيت وياه علمود سالفه وضاح نكر وكال كلشي ماعرف بعدين استفزيته اعترف على نفسه صورته وسجلت كلامه.

فهد : بشنو

استفزيته وشلون؟

ادهم : معليك انت شغلتي هاي..

فهد : زين كمل..

ادهم : ثاني يوم من صحصح دزيتله المقطع صوت وصوره وجان مبين بوعيه من حجه يعني مو كلش مثكل تخبل من شافه كتله تجي تتنازل عن البيت لسيلين واختها لو اقدم الاعتراف للبيش مركه وهمه يفتصلون وياك اجه ثاني يوم مثل الحباب تنازل وراح وطلعتهم من البيت وهسه كاعد امشي بمعامله البيع من تكمل اخذهم يوقعون و اشتري بيت هنا للبنات وأأجره الهم يكعدون بيه.

فهد : اي وليش مقدمت الفديو للشرطه لحد الان ..

ادهم : مو دزلي تهديد كلي دير بالك على البنات اذا انحبست جماعتي هواي وبيتك اندله واندليت البنات وين يداومون وحده كليه والثانيه معهد دروس خصوصي دير بالك عليهن.

فهد : وشنو كتله انت..

ادهم : كتله ما اقدمه بشرط ماتتعرض الهن بس ما ادري بيه راح يغدر بيه ..

فهد : وهذا شنو منين منو وراه.

ادهم : سألت عنه واحد عصابجي ايده طويله وعنده عادي يكتل ويسوي شغلات هواي طايح حضها.

فهد: لعد شجابك عليه واندكيت بيه .

ادهم : تريد اعوفله البيت شكبره يلعب بيه لعب والله دمي احترك..

فهد : هسه شنو البيت حولته بأسم البنات ؟

ادهم : بعدها المعامله لازم اخذ البنات للشمال هو بس تنازل..

فهد : زين عندك رقمه اتصل عليه برأيك تماره عدها علم.

ادهم : احتمال جبير تدري لان خابرت البارحه قابل صدفه..

ايمن : شنو من ام تعرف بتها راح تنخطف وتساعدهم.

ادهم : بر**** شنو تترجه منها..

فهد : برأيك يريد يساومنه على فلوس لو شنو..

ادهم : احتمال يطلب احذف المقاطع..

فهد : واحتمال جبير يطلب فلوس .

ايمن: صح.

طلع ادهم الموبايل اتصل عليه مجاوب ساعتين نتصل محد يرد ..

ادهم : ميجاوب النذل..

فهد : يلعب بعصابك علمود شنو يطلب تنطيه.

ادهم : هسه غير يجاوب ابن ال **..

كام ينفخ ولزم راسه رجع الكشن ليوره وارتاج عليه..

مشينه بالسياره وكف فهد يم مطعم نزل جاب لفات وببسي وصعد مدلي وحده اخذتها وياها قوطيه وادهم مقبل ياخذ ..

فهد : اكل يمعود ..

ادهم : ما اشتهي..

فهد : اذا متاكل ارجع للبيت وما اروح لاي مكان وياك..

ادهم : ارجع طبك طوب..

فهد : هههههه مو صوجك ..

كعدنه ناكل وهو على صفنته نزلت من السياره ورحت فتحت الباب مالته وحاجيته.

ايمن : ادهم تره ميصير هيج انت كلشي ما ماكل اكل حتى نكدر نكمل.

ادهم : ماريد عوفني.

ايمن : الحمدلله عرفنه هيه وين احسن من نضل ندور وتالي منحصل شي..

ضرب على رجله حيل وكال.

ادهم : لو ماعارف عنها شي احسن من عرفت بيها يم غزوان.

ايمن: ميأذيها راح يبتزك وبس..

ادهم : ان شاءالله بس هيج..

ضلينه بالشارع نفتر ومنعرف وين نروح الى ان دك الموبايل على ادهم رقم غريب ..

فهد : افتح حاكيه .

فتح حاكيه وجاوب..

ادهم : نعم ..

_ ها شلونك هسه زين.

ادهم : سيلين وين؟

_ يم ابوها الثاني هههههه.

نزل من السياره وركع بابها حيل راح ليغاد وحجه وياه سد الحاكيه..

ادهم : ابن ابوك الزم شعره منها واشوفك النسوان شتجيب،

نتر بعصبيه وصوت عالي.

ادهم : شتريد فلوس وبعد هذا هو توصلك اعتبره انمسح وين انتضرك ، لعد شلون اخذها ابن الزمااااااال..

فهد : انطيني احجي وياه..

نتر ايده من فهد وراح ليغاد.

ادهم : هاهيه اجي بس كون صدك تصير رجال وكد كلمتك متلزمها ولا تأذيها ، الفلوس يمك واعتبر الفديو انحذف خلي ابالك شغله سجلت صوتك وكل كلامك والفديو موجود ترجع سيلين واشوفها كلشي مابيها وغير العشر ملايين ما انطي ، هذا العندي اي خليتك تحجي هيج زوج انه واتوسل بيك غير ردتك تحجي عفيه عليك تخسر شغلك وتخسر كلشي احسنلك رجعها واليوم تبات بلبيت ..

سده وفرك وجها بعصبيه سأله فهد..

فهد : شصار وشنو كال..

ادهم : ساعه ويدزوها..

فهد : مابيها شي..

ادهم : مادري يكول مابيها.

فهد : شنو راد فلوس.

ادهم : راد ارجعله البيت واحذف الفديو بس من كتله سجلت التهديد ومناك الفديو مالتك يعني تثبت عليه وهو شغله توه مبلش بيه مشروع ذاب فلوس كلبه بيه يخاف يخسره لهذا سكت ..

فهد :وين بكردستان..

ادهم : اي .

فهد : ليش تنطيه فلوس نروح نسحله.

ادهم : لا خاف يأذيها كلب هذا متعرفه ...

فهد : لعد تنطيه عشره والله حرام.

ادهم : اعرف شلون اطلعهن من عينه بس المهم سيلين مابيها شي هاهيه...

فهد هز راسه ساكت بعدين كال..

فهد : وين نروح هسه .

ادهم : نرجع للبيت اجيب دفتر الصكوك...

فهد : يلا لعد .

رجعنه كال..

ادهم : لتنزلون بسرعه اجي ما اتأخر..

ايمن : يلا منتضريك..

نزل دقايق واجه صعد كال لفهد

ادهم : اطلع يلا..

فهد : اوكف يا بنك المفتح هسه.

ادهم : اعرف محد مفتح اكتبله صك وانطيه.

فهد : ههههه وهناك ينلزم خرب بيوم تفكيرك...

ادهم : لا اخليه ياخذهن.

فهد : شنو ابالك فهمني

ادهم : ابالي ارجع سيلين وبس ..

فهد : مممم..

وصلنه للعنوان الكال عليه غزوان لادهم طفه السياره وكعدنه ننتظر. ، انتضرنه اتصالهم على نار ..

فهد : هذا ميجي يضحك علينه صارت ال ١٢..

ادهم : لا يجي.

فهد : صدكني ميجي لان اكيد

اجتي على باله فكره سحب الفلوس من البنك كال اكيد راح انلزم تره مو لهدرجه هو غبي..

ادهم : ننتظر ونشوف لتحجي توقعات راسي راح ينفجر.

فهد : مو قصه توقعات بس داكلك يعني كعدتنه هنا ما الها معنى لان ما راح يجون..

ادهم : ننتظر ونشوف ..

انتظرنه صارت الوحده وماكو اتصال يدك ادهم يطلع مغلق ..

فهد : شكتلك ..

ادهم : يلعب عليه لو شنو اريد افهم.

فهد : يريد يستلم فلوس بيده الصبح يرجع يخابرك.

ادهم : ما ضل صبر بيه ماضل ..

فهد : ادهم ابو الصبر ويعلمنه ع الصبر هيج ينهار بسهوله.

ادهم : انت مدرك خطوره الوضع لو تسولف بكيفك..

فهد : اسولف بكيفي..

ادهم ضل يستغفر وبعدين سكت ...

للصبح احنه ننتظر صارت ساعه ثمانيه اتصلو نزل ادهم من السياره وجاوبه.

ادهم : وينك ابن ؟؟ *******

نزل عليه فشار وغلط اول مره اسمع ادهم يغلط هيج..

ادهم : اي اجيبهن كتلك وبعد ، شوف راح اسوي الكلت عليه بس قسم بالله اذا اذيتها ورحنه للعنوان الكلت عليه وما لكيتها اعتبر نفسك ميت وبكيفك بعد.

سد الموبايل ومسح كصته بيده..

راح فهد كعد على البنيد وانه رحت يمه.

ايمن : ها شكال.

ادهم : راح يدزون واحد لهنا يستلم الفلوس وبعدها نروح ل _ هناك سيلين.

ايمن: يعني بشارع لو وين.

ادهم : ماعرف يكول دازها ويه ابو تكسي ما اله صله بيهم.

ايمن : متمرسين ذوله

ادهم : بالعراق العظيم ما عدت استغرب كلشي ..

ايمن : حقك تريد تسافر انه هم لعبت نفسي يمكن ما اضل هنا ..

ادهم : هسه خل ترجع وعود افكر الله كريم..

ايمن : هسه شنو تروح تجيب الفلوس لو منو يروح.

ادهم : نسيت ضل عقل بيه ، هاك هذا الكارت روح اسحب الفلوس وتعال وهذا الرمز اكتبه يمك ، _ .

ايمن : تمام راح اروح بلكت ما اتأخر.

ادهم : ضروري متتأخر..

رحت جبت الفلوس ورجعت .

ايمن : هاي جبتهن...

ادهم : خليهن بالسيارة.

خليتهن وكعدت ساعه واجتي سياره وكفت من بعيد واتصلو على ادهم جاوب.

ادهم : ها زين زين جيت.

فتح الباب اخذ الجنطه وراح نزلت وكفت يم فهد.

ضلينه منتظرين سلمهم الفلوس من الجامه محد نزل من السياره واجه يمشي سريع شبه يركض وصل يمنه وكال يلا..

صعدنه ورحنه للعنوان الكالو عليه وفعلا نلكه سياره تكسي بنفس المكان واكفه بيها رجال جبير نزلنه وراح ادهم فتح الباب الخلفيه رحت وراه لكيناها كاعده هادئه تباوع ليكدام دنك ادهم لمستواها وحجه وياها.

ادهم : لتخافين انه يمج سيلين تسمعيني ..

متجاوب بس دمعتها نزلت..

جرها من ايدها ونزلها نزلت تمشي عبالك ميته سيارتنه طابكه وره التكسي صعدها ليوره وصعد يمها وانه صعدت ليكدام ماعرف شنو جان يحجي وياها لان همس يهمس وصلنه للبيت نزلنه هيه هم نزلت مشت راحت يم الباب فتحناها و دخلت واحنه وراها تلكتها ايفين ركضت عليها حضنتها وتبجي وانه وفهد صعدنه فوك نرتاح لان ما نايمين ..

ايفين ..

متت خوف اتصل على عمو ينطيني رفض اجه للبيت احجي وياه ميجاوب يكز على اسنانه ويحرك بعضلات وجها وميحجي ماعرف شنو اخذ وياه وطلع ثاني يوم الصبح يلا اجوي يعني ليلتين اختي باتت بره ركضت عليها حضنتها وابجي وهيه صافنه شافتني دموعها نزلت ..

دخلتها جوه وعمو طلب مني اسبحها ..

دخلتها للحمام سبحتها وهيه صافنه تروط بجسمها متثبت كملت الها نشفتها ورحت جبتلها ملابس البسها وابوس بيها كملنه وطلعتها وديتها لغرفتنه نيمتها على الجربايه نامت وصافنه على السكف بس دموعها تنزل كعدت يمها ردت احجي وياها اندك الباب طلعت عمو.

ادهم : راح اسبح عوفيها تنام ابد لستأليها شصار ..

ايفين: ماشي.

ادهم : عينج عليها لتغفلين عنها دقيقه.

ايفين : اي.

ادهم : اي احد يدك الباب مال الهول لتفتحيه اله اطلع من الحمام...

ايفين: حتى لو امك.

ادهم : خصوصا امي.

ايفين : هذا هو ..

راح عمو واني ضليت يمها كل شويه يجي يشوفها ويروح..

اكل اسوي كوه تاكل لو تشرب مي ومتقبل تاكل بعد اخر شي عمو كال سويلها عصاير وبس..

استمريت وياها عصاير واراقبها حسب عمو شنو يكول اسوي مرت اربع ايام ضبط صاحني عمو رحتله..

ادهم : اريدج تسأليها شنو الصار وياها وخليها تسولفلج ..

ايفين : خاف متحجي.

ادهم : لا راح تحجي ..

ايفين: ماشي..

رجعت يمها كعدت تدنت ليغاد كمت امسد بشعرها واحجي وياها.

ايفين : شنو الصار وياج احجيلي .

باوعتلي وبجت بحركه ..

ايفين : ابجي ترتاحين بس احجيلي حبابه والله ضل بالي صارلي ست ايام منايمه مثل الاوادم كل شويه تجي فكره ابالي شكل ..

مقبلت تحجي اي شي رجعت لعمو كتله كاال عوفيها..

مشى اسبوع وعمو على اعصابه عنده دوام تصحيح وما راح خابرهم بلغهم عنده ظرف ...

ثامن يوم جنه كاعدين اني وسيلين نباوع على التلفزيون هيه تباوع ويايه بس ماعرف بالها ويه التلفزيون لو لا اندك الباب عمو لبسنه شالات وفات ..

جر كرسي وكعد كبال سيلين ، اني هم كعدت كلت هسه يكلي طلعي بره بس مكال ..

ادهم : سيلين لازم نحجي ارتاحيتي هوواي..

دنكت راسها..

ادهم : ما اريد تحجيلي عن الصار وياج بس اللي اريده منج تنتبهي

ن ويايه شنو اكلج سوي ماشي..

هزت راسها ب اي..

ادهم : سيلين تذكري الصار وياج بدون متحجيلي كأنما كاعده تشوفين فلم رعب او فلم بيه احداث محلوه وضايجه منها وانتي بداخل هذا الفلم وتباوعين على الاحداث وعايشتها ماشي ..

هزت راسها ..

ادهم : ركزي ويايه بس اريد تخلين ابالج انتي هسه بمكان امن يمي و احنه كاعدين بيتنه انه ادهم وهاي ايفين بس فكرج اريده هناك بمكان الحدث ..

هزت راسها ..

ادهم : لزمي الصوره بيدج اللي كاعد تباوعين عليها ..

هزت راسها ب اي ونزلت دمعتها هو مركز وياها بس احسه كوه كاعد على اعصابه ومتوتر اكثر منها اول مره اشوف عمو بهيج حال دائما هادئ ومسيطر على الامور هسه احسه حتى ميكدر يحجي وياها ..

ادهم : هسه الصوره ابالج وانتي بنص الحدث تمام،،، زين اريدج تباوعين على اطراف اصابع ايدي الثنين ذني ..

رفع ايده وسوه حركه مثل علامه النصر واشر على اطراف اصابعه كلها باوعي هنا .

ادهم : عفيه هسه اتبعي اصبعي بعيونج بدون متحركين راسج..

كام يودي ايده يمنه ويسره شلون من نأشر لواحد نكله لا بس مسوي علامه النصر وهيه عينها تروح وتجي ويه اصابعه.. .

حسبت تقريبا من ٥٠ _ ٦٠ مره كرر الحركه

همس بصوت هادئ

ادهم : سيلين الماضي بالذاكره والحاضر تباعين على حركه ايدي هسه راح اسرع الحركه واريدج ويايه..

كام يسرع الحركه مال ايده وهم كررها ٥٠ _ ٦٠

ادهم : كافي ارتاحي واخذي نفس ..

ادهم : هسه احجيلي الافكار والخواطر اللي اعتلت دماغج واخذت الجزء الاكبر من تفكيرج.

سكتت مقبلت تحجي شي دنكت راسها ..

ادهم : ماشي لتحجين بس رجعي ركزي بهاي الخواطر الجديده ورجعي اتبعي اصابعي ...

حرك ايده ونفس العدد مال قبل شويه..

ادهم : ارتاحي واحجي لنفسج الخواطر او الحادثه الصارت وياج ومنو الاشخاص اللي اجوي ابالج وياريت اسمع تفكيرج فكري بصوت عالي الله يخليج خليني اساعدج..

مقبلت تحجي.

ادهم : زين نفسج حسيتيه تغير..

هزت راسها اي.

ادهم : شنو يوجعج هسه اي مكان بجسمج يوجعج.

اشرت على عقلها وكلبها ...

جر نفس قوي وزفره.

ادهم : تمام نرجع باوعي على اصبعي ..

عاد الحركه وصار عشر مرات يعني كل مره ٥٠ _ ٦٠ يحرك اصبعه وهيه تباوع ..

طلب منها ترجع للحدث الصعب اللي ابالها ..

ادهم : دتشوفيه ؟

اشرت اي..

ادهم : تتذكرين كلشي بيه ..

اشرت اي.

ادهم: شفتي نفسج بهذا المكان.

كالت اي وبجت..

كام طلع من الغرفه ورجع جايب جهاز قياس الضغط ..

قاسلها ضغطها كمت وكفت يمهم باوعت نازل ضغطها...

سد الجهاز وكعد كرر الحركات وياها وهم يكلها تخيلي..

رجع قاس ضغطها جان كلش نازل اكثر من اول مره بدرجتين باوعت عليه حسيته ارتاح ..

ادهم : كافي نامي ورفعي رجلج..

التفت عليه وكال ..

ادهم : تعاي ورايه.

رحت وراه وكعدنه نسوي عصاير الها علمود يصعد ضغطها ، سألته متحملت.

ايفين : عمو من شفتها نزل ضغطها يعني تعبت ليش كررت وياها التمرين وهسه تريده يصعد..

ادهم : انه ردت اتعبها.

ايفين : ليش ؟

ادهم : هذا التمرين اسمه تقنيه التخلص من الذكريات الصعبه والماضي المرير والصدمات النفسيه ، تقنيه ال emdr هاي التقنيه اذا اريد اعرف تطبيقي نجح على المريض لازم ضغطه ينزل ..

ايفين : واذا منزل.

ادهم : يعني ممركزه ويايه او بالها مو يم الحدث..

ايفين : وهاي شكد نستمر عليه وتصير زينه.

ادهم : حسب حالتها النفسيه بس ان شاءالله متطول لان من اول مره بدت تستجيب.

ايفين : الحمدلله.

ادهم : يلا روحي يمها وخليها تشرب واي وكت تكعدج بليل كعدي يمكن تحجيلج.

ايفين : ماشي.

اخذت العصير ورحت يمها كعدتها شربت ورجعت نامت..

استمرينه بالتمارين كل يوم ومرات من يشوفها تتعب يخليهة ترتاح والجدول صار بين يوم ويوم..

شهر كامل يلا سيلين رجعت تحجي ومو كلشي يعني على كد السؤال تجاوب .

ومره بليل اجتي يمي كعدت.

سيلين: افونه.

كمت كعدت جنت توني اريد اغفه .

ايفين : شنو حبي كولي ..

سيلين : ابتزوني..

ايفين : منو ؟

سيلين : غزوان الجلب.

ايفين: بشنو ابتزوج احجي عفيه سوالج شي.

سيلين : هددوني بيج اذا مسمعت كلام ومسويت اللي يردوه ياخذوج ابدالي.

ايفين : كلب يعرف نقطه ضعفج اني احجي شلون اخذوج وشنو الصار بس قبلهة سوالج شي.

سيلين : لا مسوه شي قوي بس...

ايفين : احجيلي من البدايه.

سيلين : جنت اشتريلج كم شغله وكلت اجيب اليه هم واجتي بنيه صاحتني ...

ايفين : اي..

سيلين : كالت استاذ ادهم منتظرج بالكراج تعجبت شعجب من وكت طالع وهو اصلا ينتظرني بالكليه بس لان ماعندي موبايل رحت كلت اشوفه اذا موجود اصعد مموجود ارجع للكليه ...

ايفين : زين.

سيلين : بعدها رحت اول ما وصلت للكراج شافني ولد عبالي ابو الكراج كلي سياره الاستاذ عطلانه ومنتظرج بذيج السياره رحت وين مأشرلي اول ما وصلت نزلو ثنين وصعدوني ومن ضليت اضرب بيهم واصيح هددوني بيج.

ايفين : وبعدين وين اخذوج..

نزلت راسها كامت تبجي بحركه حجت ترجف.

سيلين : نزعني كلشي وصورني كال كليله لعمج اذا سلم الفديو مالتي انشر الفديو

مالتج.

ايفين : يا كلب يا كلب ياكلب .

فرفحت روحي كمت اضرب على وجهي وحجيت بصوت عالي باوعت باتجاه الباب لكيت عمو واكف جانت الباب شويه مفتوحه درت وجهي علمود سيلين متنتبه وتسكت..

سيلين : واني نفسيتي تعبت اريد اموت كل ما اتذكر شلون لزمني ونضراته الوصخه تتوزع على جسمي تخبلت ايفين نفسي لعبت كرهت الناس كلها وبعد ماعندي ثقه بأي احد..

ايفين : ماعرف شنو احجي والله ماعرف..

حضنتها و نامت بحضني ضليت امسد براسها لحد ما غفت كل شويه ارفع عيني اباوع عمو واكف وخال ايده بجيبه بس ملامحه مغضبه ويتنفس سريع ...

راح واني نيمتها بمكاني غطيتها ورحت نمت بمكانها..

مرت الايام واستمرت الجلسات نفسها وعمو لا سألني ولا سألها لان هوو سمع ، كل يوم يجي يم الباب يوكف يباوع ويروح ، وطلب مني نلبس حجاب بهاي الفتره لان يريد يجي بأي وكت وكال اذا عدكم شي قفلو الباب اعرف معاناها مشغولين واذا ماعدكم شي عوفيه مفتوح شويه هو من يشوفه مفتوح يوكف يباوع شكو ماكو ويروح من الباب ميفوت..

خلصت العطله وبعد للدوام اسبوعين .

تحسنت سيلين شويه استمر علاجها ٣ اشهر الحمدلله رجعت احسن ما اكول تشافت تماما بس احسن واحنه وياها وياها ابد منتركها وحدها طلعنه هواي مرات ويه ايمن ومرات ويه عمو ادهم بس لحد الان ايمن ميحجي ويايه حتى لو نطلع علمود سيلين ،،،

ومره كعدو كعده طويله ايمن وسيلين وحجالها كلشي صار من يوم اللي انخطفت لحد ما لكوها .

ابو عمو ادهم من سمع بالسالفه اجوي كعدو بيت فهد اللي بناه وره البيت وكالو فتره وننتقل لبغداد كلهم اجوي حتى فهد بس احنه معزولين عنهم ومنختلط ابد بطلب من عمو ادهم..

وبيوم خابر عمهم عزمهم على عرس ابنه ضيغم

عمو اجه وكال نطلع نشتري ملابس لمريم وانتو هم اشترو.

رحنه اني وسيلين ونرمان ومريم وعمو ..

اشترينه ملابس للحنه والزفه ..

نرمان كالت اريد مكياج اشتري التفتت على سيلين كتلها..

ايفين : اكلج احنه ابد ماعنده مكياج واني عاجبني اشتري شتكولين.

سيلين : يلا نشتري بس اني كلشي ما اعرف بيه بس الكحله.

ايفين : معليج اني اعلمج..

سيلين : يلا..

اشتريت اللي اريده والها هم اشتريتلها لان متعرف كتلها انتي اختاري الوان حمر الج هاي ما يرادلها شي.

اني اختاريت ورديات وماروني وبنفسجي وهيه شكو جوزي غامق تاخذه .

ايفين : شنو هاي تعاي الوانيش هاي..

سيلين : شعليج عجبني.

ايفين: هيه هاي مال عرس ..

سيلين : اي اني اريد اخلي هيج الوان وجهج لو وجهي..

ايفين : لج هذا جوزي طووووووخ.

سيلين : اسمه بني محمر اقري.

ايفين : زين اخذي غير لون وهذا خليه غير مره مو بالعرس.

سيلين : شو اله اخليه بالعرس ..

ايفين : كيفج خبله هههه باعي راح اشتري عدسات.

سيلين : اني هم عاجبني دائما اشوف بنات يلبسون منها بس اخاف اجرب..

ايفين : اني هم ممجربتها بس نجرب انتي يالون راح تاخذين اني عاجبني زيتوني ..

سيلين : رصاصي على سمائي.

ايفين : يلا ناخذ

اشترينه كلشي ورجعنه ...

واليوم حفله الحنه كعدنه من الصبح نتحضر

الفصل الثلاثون من هنا