رواية جذبني فمك البني الفصل الثلاثون 30 بقلم عبير إدريس

يقول البحتري

قبلتها من بعيد فانثنت غضبآ

وربما تبين بها التيه والخجلِ

ومسحت قبلتي من خدها ومشت

كأنها ثمل او مسها خجلِ

______

سيلين

اليوم حسيته مميز شويه لان معزومين على حفله وبنفس الوقت تغيير روتين ،،

العطله انمردت عليه كلشي ما فهمت منها بسبب الصار وجلسات العلاج المتكرره كلش تعبتني وصار جهد مضاعف عليه ومنا تعب الامتحانات والدراسه لهذا حسيت هذا اليوم جدا مميز...

كعدت الصبح والتمينه كلنا على الريوك ..

شاركنه كلنا بيه اني كليت البيض

عمو خدر الجاي

ايفين طلعت الجبن وحضرت السفره.

ومريومه تنكش بالاكل..

حياة سعيده وبسيطه جدا ابسط من ما تتخيلون مابيها اي مبالغه..

حياتنه نعيشها براحتنه اذا ردناها تكون حزينه راح تكون حزينه اذا ردناها مفرحه راح تكون مفرحه وهذا اللي تعلمته من دكتوري الغريب القريب....

كعدنه ناكل بكل هدوء...

تعلمنه الهدوء بالاكل وبالكلام واللباقه بالحوار والتصرف..

واهم شي التزام الديني والأدب البناتي يطغي على شخصيتنه..

هواي تغيرنه اني وايفين وحبينه الحياه هنا وتعلمنه على هذا النمط المعيشي..

كملنه وغسلنه المواعين ورتبنه المطبخ البيت نظيف لهذا رحنه نهتم بنفسنه من تنظيف وعنايه بالبشره والخ..

اجتي نرمان طبعا عدها هواي صفات من عمو ادهم و قريبه من القلب انسانه راقيه ونازكه وابد متحب القيل والقال لهذا قوت علاقتنه بيها خصوصا اني كمت اسولف هواي وياها وشفتها نسخه ثانيه من عمو لهذا علاقتها بعمو جدا قويه اكثر من اخواته الباقيات..

اندكت باب غرفتي ودخلت مريم لازمه يده الباب وتحجي.

مريم : سيلين بابا يريدج.

سيلين : وينه ؟

مريم : كاعد بالمكتب يكول خلي تجي بسرررعه..

سيلين : ههههه فدوه للسين التلفظيه..

مريم : يلا حتى تبدلولي ..

ايفين : اني ابدلج مرايم.

مريم : انتي بدليلي وسيلين تسوي شعري

ايفين : خوش.

سيلين : مو تدللين..

كمت بستها ورحت غسلت ايدي ورحت للمكتب لكيته كاعد..

سيلين : عمو دزيت عليه.

ادهم: اي تعاي كعدي.

رحت كعدت وباوعتله ..

ادهم : اريد منج تسجيل صوتي مياخذ دقايق ..

سيلين : علمود شنو؟

ادهم : حادث الاختطاف.

سيلين : ليش.

ادهم : بدون ليش بس احجيلي مختصر من اجتج البنيه لحد ما صعدوج بالسياره وهذا هو.

سيلين : ماشي..

فتح تسجيل صوت بالموبايل واجه وكف قريب مني وقرب الموبايل يم حلكي جان لازمه بيده وبلشت احجي.

سيلين : جنت بمحل اشتري شغلات اليه دخلت بنيه ما اعرفها كالت اكو بنات يردوج بره طلعت ملكيت بنات ردت ارجع للمحل اجتي نفس البنيه سألتها وينهم البنات ماشفتهم كالت راحو بس يكولون استاذ ادهم يريدج بالكراج ........

وحجيت باقي التفاصيل .. سد الموبايل وكعد على الكرسي المقابيلي وكال..

ادهم : بعد نسوي تمرين سريع لان راح تلتهين اليوم وترجعين تعبانه ومنلحك بليل.

سيلين : يا عمو والله تعبت عليك الله خلي اليوم منسوي لان راح ادوخ وما الي خلك ابدل ولا اروح..

ادهم : لا ميصير نترك تعبنه هيج يروح.

سيلين : بس هو مو دوه ولازم اخذه وكت بوكته علمود ميصير حباب عمو اجلها اليوم

ادهم : لعلمج العلاج النفسي اهم بهواي من العلاج الجسدي ..

سيلين : صحيح بس القصد نكدر نأجلها.

ادهم : الجسم ممكن نأجل علاجه يتحمل لكن كهرباء الدماغ يصير بيها اضطرابات مجرد نترك التمرين فجأه..

سيلين : ليش يعني ؟

ادهم : لان تعلم على نمط وغذاء يومي اذا نتركه فجأ بدون مقدمات راح يصير خمول وتعب جسدي وتروح عليج الحفله..

سيلين : يلا لعد بس كون منتأخر.

ادهم : حتى لو نتأخر احنه نروح وراهم ..

سيلين : عمو بعد ساعتين ما الحك.

ادهم : نلحك نروح بعدهم يلا نبلش.

وكعدنه نسوي التمرين كل ٦٠ مره ارتاح عشر دقايق وهيج طارت ساعه من الوقت قاس ضغطي جان نازل طلب مني اسوي عصير واشرب رحت سويت عصير وشربته ودخلت للحمام غسلت مره ثانيه لان هذا التمرين يسبب اجهاد وتعرق كملت و لفيت شعري رحت لغرفتنه لكيت ايفين ومريم ونرمان مكملين ردت ابجي.

نرمان : شو بعدج وين جنتي.

سيلين : عمو غير ..

ايفين : تعاي انشف شعرج بسرعه بعد متلحكين.

نرمان : سويلها شعرها وهيه تخلي مكياج ..

سيلين : وين اعرف اخلي.

نرمان : ليش مو فتره اشتغلتي بصالون وكلتي دخلت دوره..

سيلين : صح بس ابد محبيته لهذا ابو الصالون حولني على قسم الخاص بالشعر من صبغ وكص ...

نرمان : لعد ايفين شلون تعرف مكياجها يجنن شوفي وجهي كلبته ..

سيلين : هيه رغم مدخلت دوره بس جانت تساعد الكوافيره وتوكف يمها لهذا تعلمت وعلى كوله عمو ادهم اذا حبيتي الشي حتى لو مدارسته راح تتقنيه اني رغم دخلت دوره بس متقنته ومحد حب شغلي بالمكياج عكس تسريحات الشعر والصبغ والكص بدعت بيهن.

ايفين : ههه لو تشوفيها البارحه كلشي متعرف للمكياج بس بيها تختار حمر جوزي.

سيلين : يابه نرمان انتي حكمي ملابسي لونهن بنيات الفستان مال يوم ولبس باجر يعني يصير اخذ لون مغاير واخليه غير اصير قوس قزح...

ايفين: تكدرين تخلين ماروني

ات يجنن يطلع عليج...

سيلين : اي ماحب هيج الوان ومتهويني يعني شلون غصب..

نرمان : براحتج حبيبتي اصلا انتي حلوة وكلشي يلوكلج خصوصا بشرتها لا بيضه كلش ولا سمره يلوك الها تدرجات البني.

سيلين : صح احسه يلوكلي ولو اول مره اجرب المكياج على وجهي..

نرمان : ردت اخذكم للصالون بس كالت ايفين احنه نعرف وحده اهتمت بالثانيه من حيث النظافه.

سيلين : اي صح لهذا منحتاج نروح.

ايفين : هسه شنو اسوي اني.

سلين : عوفي شعري اني اسويه بس رسمي عيوني ولبسيلي العدسات والباقي اني اكمل.

ايفين : يلا خوش..

لبستلي العدسات شويه عيوني دمعت وصارت حمر بعدين استقرت ورسمت عيني مطولت بيها لان سريعه واني محبيت هواي الوان طلبت تخلي لون واحد بس ..

ايفين : خلصنه ..

سيلين : اني اكمل الباقي عاشت ايدج سويتي شعر مريومه.

ايفين : اي سويته تخبل طلعت جنها عمه ياسه.

سيلين : فدوة لعينها ..

نرمان : هسه شنو ننتظرج نروح.

سيلين : روحو واني اروح ويه عمو

نرمان : ويه ادهم

سيلين : اي

نرمان : تره يتأخر.

سيلين : ليش ؟

نرمان: توه راح يزين.

سيلين : جذببب شو مكال .

نرمان : من جنتي بالحمام اجه وكال روحو وقفلو البوب وهو ياخذج وياه.

سيلين : يعني شكد يتأخر.

نرمان : ماعرف والله..

سيلين : انتو ويامن راح ترحون.

نرمان : ويه فهد.

سيلين : وايمن ميروح.

نرمان : لا يروح بس ياخذ ابويه وامي والبنات وكال انتو روحو ويه فهد..

سيلين : ها زين ..

بدلو وكملو طلعو واني كملت المكياج واخذت قلم الروج وخطيت فمي ، تكامل المكياج وصار كلش حلووو حسيت انبثت الحياة بوجهي..

خليت اضاءه خفيفه وبلشت بشعري علكت الشسوار شسورته ورتبته بالماشات كمت وكفت طولان و ماحاسه بيه من كثر الضغط اللي مريت بيه حتى نسيت اباوع على روحي بالمرايا .

اخذت فستاني الجان مفروش على جربايتي طلعته من التعلاكه ولبسته جان لونه بني على بيج ، اكمامه من الكيبور الشفاف ومن يم الصدر كلش حلو ومستور ويجي عدل من جوه يعني شي على شي حلو ومرتب حسيته رتب جسمي وبرز مفاتني الانثويه بطريقه حلوة ....

كملت كلشي رشيت من العطر اللي جابه النه عمو قبل فتره جانت عنده ندوه بدوله من دول الخليج وجابلنه عطور الي ولايفين ولاخواته ، كال ملحكت اشتري هواي شغلات لان كضاها شغل ومؤتمرات وهيه بس ٣ ايام ...

كعدت انتضره تأخر هواي لا اني عندي موبايل واخابر ولا اكو احد بلبيت علمود اطلب منه يتصل بيه..

حسيت بجوع فضيع تذكرت اني على الريوك واخر شي شربته العصير ، كمت طلعت من الغرفه ورحت للمطبخ جانو جايبين اكل من بره مفرغيه بالجدر ومغطه فتحت القبغ وكمت اكل اني و واكفه كملت رحت للحمام اغسل طلعت باب الحمام وانصدم بعمو المصدوم مثلي ..

لا هو يوخر حتى افوت ولا اني العرفت وين اروح لا بيه ارجع للحمام ولا اضل واكفه لان انحرجت كلش رغم لبسي مابيه شي بس تعلمت على الحجاب الكامل كدامه..

دنكت راسي كال.

ادهم : مادري بيج هنا مريت على غرفتكم لكيتها فارغه وعبالي رحتي وياهم لهذا مطلعت صوت.

سيلين : لا مرحت لان تأخرت وتوني يلا كملت..

ادهم : جنت ازين.

سيلين : اي كالت نرمان..

ادهم : تغديتي.

رفعت عيني باوعتله مركز بتفاصيل وجهي خجلت كلش رغم نظرته مثل كل مره من يحجي ويايه يعني مابيها احراج بس اني انثولت ماعرف شبيه وحتى ارتبكت.

سيلين : اكلت شويه.

ادهم : راح اسبح وابدل ونروح.

سيلين : اي ، بس عمو اريد افوت..

ادهم : ها اي فوتي فوتي..

وخر واني مشيت ورحت للغرفه ماعرف شصار بيه كلش خجلت رغم مصار شي بس كلبي ليش يدك سريع مادري ،

لبست البشت فوك الفستان وشال لفيته بشكل راخي علمود شعري ميخرب وكعدت انتظر نص ساعه واجه دك الباب فتحته جان لابس قميص ابيض وبنطرون قماش اسود طالع كلش حلو عيني صارت على معصم ايده جان لابس ساعتي الجبتها اله رغم اني منتبها عليه ميكرر هواي بالبس بس الساعه هاي هواي لبسها انتبه عليه عيوني تفتر على اناقته ابتسم وكال.

ادهم : نروح.

سيلين : يلا نروح..

طلعنه قفل باب البيت وصعدنه بالسياره..

سيلين : وين الحنه بلبيت لو قاعه .

ساكت ويسوق ..عدت السؤال.

سيلين : عمو عمو ..

انتبه عليه وكال .

ادهم : ويايه..

سيلين : اي عمو وياك كم مره سألتك مجاوبتني.

ادهم : بالي بالطريق وماسمعت..

سيلين : الحنه بلبيت لو قاعه.

ادهم : لا قاعه وحده بصف الثانيه وحده الكم وحده النه.

سيلين : ها حلو وباجر.

ادهم : لا باجر مختلط تصير..

سيلين : ها زين.

سكتنه كل شويه اندار عليه الكاه يمسح وجها بالكلينس من يصير ازدحام يباوع من جهة الجامه مالته استغربت احنه بالعاده نضل نسولف شبيه اليوم كلت احتمال الموقف الصار اليوم ضوجه لان جنت ملابسه حجاب..

وصلنه للمكان المسوين بيه العرس صف السياره بالكراج الخاص بالقاعه نزل وطلب مني انتظر ...

ادهم : انتظري من اكلج نزلي تنزلين.

سيلين : ماشي..

ضليت كاعده انتظر وره شويه اجه و وياه نرمان لابسه عبايه وشال اجوي يمي من جهة الباب فتحها وكال.

ادهم : يلا نزلي..

نزلت

ومشيت اني ونرمان سوه التفت عليه كالت.

نرمان : تأخرتو هواي صار المغرب.

سيلين : عمو تأخر

نرمان : يمعوده هواي صارلكم عبالي ادهم لغاها للجيه.

سيلين : لا بس كتلج تأخر واني اصلا من كلتي راح يزين عرفت يتأخر..

نرمان : يلا مصار شي هسه راح يحنون العروس.

سيلين : ها زين ..

دخلنه للقاعه وعمو جان ورانه وهو راح للقاعه اللي بصفنه نزعت البشت والشال ورتبت شعري وطلعت شافتني ايفين اجتي عليه بس جانت كلش ضايجه.

ايفين : وين صرتي ؟

سيلين : عمو تأخر شكو..

ايفين : يمعوده ضليت هنا وسمعت اشكال الحجي من كرايبهم على امج وكلش انقهرت عدا النضرات اللي الحسستني اني موزينه..

سيلين : عمو كالي مقوله حلوة بخصوص هذا الشي ( انت لا تستطيع ان تمنع الناس من الكلام عليك لكنك بكل تأكيد تستطيع ان تمنع نفسك من التأثير بما يقولون لان مفتاح عقلك بيدك لا بأيديهم ) يعني لتهتمين اعتبريهم اصنام مو بشر الصنم يكدر يأذيج .

ايفين : لا

سيلين : اذن استمتعي وخليهم يشوفون بنات تماره شنو من جمال ويندقون دق...

ايفين : والله وقويتي يا سيلين.

سيلين : تربايه عمو اعجبج..

ايفين : والنعم والله والنعم.

ضحكنه وكدرت ارجع ثقه اختي بنفسها عن طريق كلمه وهيه اجتني مكسوره بكلمه ...

هنا الفرق كلمه ممكن تكسرك وكلمه ترجع تبنيك.

هواي ضحكنه وهواي صنفنه خصوصا على اللي انتقصو من اختي ..

اخذنه زاويه وكعدنه نسولف اني وياها.

سيلين : باعي هذا الميز الكدامج راح اكلج منو تكذب ومنو تجامل ومنو تنافق ومنو تكره منو..

التفتت عليه مصدومه وتضحك..

ايفين : خير صرتي ام خيره واني مادري بيج.

سيلين : هههههههههه لا حبيبتي قدرات .

ايفين : شلون يعني قدرات.

سيلين : معليج باعي هاي ام الشال البنفسجي كاعد تكذب عليهم وتكص براسهم ههههه.

ايفين : شلون عرفتي.

سيلين : متباوع عليهم من تحجي ومن يسألوها تباوع على الكاع علمود تبني صوره خياليه وتقنعهم بيها..

ايفين : يا الله ههههه

سيلين : وذيج الثانيه كاعده على اعصابها تريد بس تكوم..

ايفين: شلون عرفتي هههه

سيلين : كل شويه تاخذ نفس قوي وعيونها تفتر منا ومنا وايدها خالتها بحضنها وتعصر بيها ومرات يصير وجهة احمر..

ايفين : اي ست كملي.

سيلين : لازم عجبتج السالفه.

ايفين : اي والله هاي شلون تعرفين.

سيلين : قدرات يابه قدرات ..

ايفين : هاي سوالف عمو مو هو علمج.

سيلين : سنه كامله نداوم سوه مخلينه طالب يعتب علينه ولا استاذ نمشي ونفصل ونحلل بالشخصيات لا اكلج ولا تكليلي شكو علم براسه داره براسي..

ايفين: بخت شوكت اوصل للجامعه واروح ويه عمو ويعلمني.

سيلين : هو ميعلمني بس تصير مواقف كدامنه.

ايفين : مممم مواقف سمعي لعد شصار ويايه اول مطلعنه من البيت.

سيلين : شصار ؟؟؟

ايفين : من طلعنه اني ونرمان من البيت لكيت ايمن وفهد وابوهم واكفين بالطرمه نرمان كالت تعاي نكعد بالحديقه وهمه يصيحونه.

سيلين : زين.

ايفين : كعدنه وره شويه ايمن صح نرمان ماعرف شنو حجه وياها وراحت صعدت فوك لبيت ايمن ..

سيلين : زين كملي.

ايفين : اجه يمي وكف واني كاعده كال..

ايمن: شدعوه يابه هالخشم اليابس حتى سلام ماكو..

ايفين : مشفتك...

ايمن : كل هالضخامه ومشفتيني؟

ايفين : مرات واحد يعمي عينه افضل من ما يشوف منظر يغثه.

ايمن : هسه صرت مغثه مو ؟

ايفين : مكلت هيج

ايمن : شدعوه لعد حتى سلام متسلمين.

ايفين : انت ملاحظ صار اكثر من اربع شهور نتلاكه وجه بوجه ومنتحاجه وانت اخذتني بذنب قديم وحجيتلك كل ظروفي وكل الصار ويايه ومع هذا معذرت ولا صفحت ليش عمو ادهم تصرف ويايه طبيعي ومحسسني بشي..

ايمن : يعني مو حقي اصلا رده فعلي كلش طبيعيه جانت.

ايفين : لا مو حقك لان انت غريب عني ومتربطنه اي صله لا قرابه ولا محبه ولا دم جنه مجرد اصدقاء ،،،ولان ماعندي احد اسولف وياه لهذا انقهرت ومحبيت اخسرك..

ايمن : بس تعرفين كلش زين نيتي وياج مو صداقه وكتلج حاجيت عمج بالكعده وطلبتج منهم ...

ايفين : واني ممفكره بيك غير اخ وصديق غير هذا الشي استبعده..

ايمن : لا والله.

ايفين : اي والله.

ايمن : المهم كومي ويايه صعدي.

ايفين : لا اصعد ويه نرمان بسياره فهد

ايمن: كومي احسلج لو مترحين.

ايفين : اهووو بدت الغيره المالها داعي .

ايمن : كتلج تصعدين بسيارتي مثل الحبابه غير هذا الشي متروحين واعاند والله..

سيلين : وتالي ..

ايفين : صعدت وياه يمشي ويخزر كلت هسه يفضحني بس امه كلش ضاجت كل شويه ذابه حجايه شكل وكعدت هنا بنص اهلها حارت شنو حجت على تمارة

سيلين : الله يلعنها لامج الخلتنه بحلك التسوه والمتسوه

ايفين : اي والله امين ..

سيلين :تدرين تونست وضحكت هواي.

ايفين : اني هم تصدكين.

سيلين : جنه محتاجين هيج جو.

ايفين : فعلا..

اجتي نرمان تمشي ومبتسمه تخبل اناقه ورشاقه وجسم ، طالعه كلش حلوة صح لابسه اسود بس المكياج كلش مغيرها وكفت يمنه وكالت..

نرمان : سيلين اني وياج ما اخذنه صور سوه.

سيلين : يلا ناخذ شورانه.

ايفين : واني عيني.

نرمان: كومه اخذت وياج وخري هههه.

اخذنه صور كم لقطه واني وحدي هم اخذتلي ..

كملت الحفله وطلعنه جانو الولد واكفين ينتظرونه فهد وادهم وامين وابوهم هم جان واكف شافونه ابتسمو اله فهد رفع تك حاجب ولوه شفته مثل الماعاجبه وصلنه يمهم عمو ادهم باوعلنه وكال.

ادهم : تونستو؟

سيلين: كلش.

ايفين: اني من اجتي سيلين يلا بدت الحفله عندي ..

نرمان : يااااا لعد واني مو بعينج.

ايفين : التهيتي وياهم وعفتيني.

فهد : فضونه ادري ميعجبكم الحجي اله بالشارع عدكم بيت واحجو للصبح عفيه نسوان بس لغوه.

ادهم : وليش مغثوث شعلك انت متاخذ سيارتك وتروح منو لازمك.

فهد : ترجعهم انت يعني.

ادهم : اي ارجعهم لا خلفت عليك.

ايمن : دكولو ياالله شطلعت ماكو مكان يجمعكم اذا متعاركتو..

حجه ابوهم..

يوسف : روسيه من جانو صغار هيج ومن شب على شيء شاب عليه.

ايمن : همزين انه اصغر منهم خلصت ..

فردوس : اني راح ارجع ويه فهد وانت ابو ادهم ويامن تروح.

يوسف : وياج يابه انه اكدر افاركج

فهد : ها حجي اصبر للبيت طلعت رومانسيتك مو هنا.

ادهم : يلا احنه رايحين..

تقسمنه على ٣ سيارات اني وايفين ونرمان ويه ادهم وامه وابوه ويه فهد وباقي البنات وجهالهم ويه ايمن رجعنه للبيت كلش تعبانين كبل نمنه....

ثاني يوم كعدت الصبح رحت للمطبخ خليت قوري الجاي على النار جانت ساعه تسعه تعجبت عمو ممتريك هو يكعد من وكت صارت طكطكه بالمطبخ مال مي ومواعين انفتح الباب مالته انداريت شافني ابتسم رديتله الابتسامه.

سيلين : صباح الخير اليوم متأخر بالنوم خوما مريض.

مشى للمطبخ وكال ..

ادهم : صباح النور لا شويه سهرت .

سيلين: ها شعجب؟

ادهم : هيج مزارني النوم..

سيلين : يلا مره بالشهر متأثر..

ادهم : راح اجيب صمون بين متكملين .

سيلين : ماشي.

راح للحمام وطلع يجيب صمون ، رحت كعدت مريم وايفين واجوي للمطبخ اجه عمو وتريكنه ،

كملنه وكمنه على البيت نظفناه اني وايفين ب ١٢ كملنه سويت غده على السريع وفتت سبحت وراها صليت وتغدينه وبلشنه نبدل ،

لبسي جان قميص بني وبنطرون اسود رهمت جنطه وحذاء وخليت مكياج بسيط مجرد كحله وماسكاره وحمره منسيت العدسات لان حبيتها كلش وايفين هم متقل عني جمال واناقه ،

طلعنه بالهول كعدنه ننتظر طلع عمو وتفاجأت لابس قاط بني نفس الوان ملابسي وقميص ابيض ضحكت من شفته هو شافني ابتسم..

سيلين : هاي شنو لابس مثلي.

ادهم : انتي لابسه مثلي انه قاطي من زمان مشتريه.

سيلين : مممم بس مع ذلك انت لبست مثلي.

ادهم : الكلمه الاخيره الج صار يابه انه قلدت.

ضحكنه وطلعنه صعدنه وياه اني وايفين ومريم مشينه بالسياره وصلنه لبيت عمه علمود نطلع من يمهم ونروح ناخذ العروس وبعدها نروح للقاعه وصلنه لبيت عمهم الكل نزل اله احنه مقبل ننزل.

التفتت عليه.

سيلين: اذا تريد تنزل وياهم انزل واحنه نضل هنا عادي تعرفني ماحب هيج اجواء..

من حجيت وياه لاول مره باوعلي بنظره وديه مثل ماهو وصفها اني انداريت حس بيه انحرجت هو هم اندار على الجهة الثانيه ضلينه ساكتين طلعت الزفه حرك السياره و مشينه ، لمحت رجال بالشارع و انداريت عليه وكتله بيه.

سيلين : عمو تتذكر استاذ علي اللي ويانه هذا مو يشبها شوفه الله عليك..

باوعلي جان عاكد حاجبه اندار على المكان اللي اشرتله عليه كال..

ادهم : وين هذا .

سيلين : اي

ادهم : يعني ينطي شبه

سكت وره شويه لزمنه ازدحام كل شويه اشوفه لو يحك ركبته لو يفتح الرباط لو يدخل اصابعه بشعره بعدين كال ..

ادهم : شلون بله تره هذا قهر يربي هههههه

سيلين : شنو شكو ؟

حك انفه وكال ..

ادهم : لا هيج..

سيلين : ها عمو كذبت...

دار وجها عليه باوعلي مستغرب.

ادهم : عود ليش هيج كلتي..

سيلين : حكيت خشمك

ضحك من كل كلبه اني هم ضحكت وايفين كل شويه تسأل شكو شبيكم واكلها هيج ماكو شي..

سيلين : كمت اعرفك اذا تكذب لو لا دير بالك.

ادهم : ههههه لا ياالله ..

فرك عينه بكف ايده ومسد لحيته وكل شويه ضاحك ...

سيلين : ضحكه خير ان شاءالله..

ادهم : ان شاءالله.

وصلنه للقاعه نزلو كلهم واحنه اخر شي نزلنه ، عمو محاوطنه تلاثتنه كأنما بناته كل شويه ملتفت على وحده بينه دخلنه للقاعه رحنه كعدنه يم اهله جانو طابكين ميزين وكاعدين كل عائله بميز كاعده ..

بلشت مراسيم الزفاف وبلش التصنيف مالتنه اني وعمو من نكعد بمكان يصير بيناتنه اندماج مو طبيعي كمت افهمه من الحركه شنو يريد يحجي وهو هم ميحتاج اكول شكد يفهمني..

كل شويه لازمين واحد بس مو غيبه لو نقلد لا يعني اذا جذب لو ينفخ بنفسه لو نضرات الغيره بين البنات اخر شي فهد كال.

فهد : شاركونه وياكم نريد نضحك.

ادهم : متضحك لازمك..

فهد : لا بس من دخلنه لسه انت تضحك ضل بالي يمك..

ادهم : يسلم بالك التهي بروحك معليك بيه ..

فهد : ركبتك ديرها علينه راح يلزمك دمار من ذيج الجهة.

ادهم : انت شيوجعك..

فهد : كلبك يوجعني.

سكت عمو ورجع التفت يحجي ويايه الحلو فهد ابد ميكدر يأثر بيه ولا يضوجه بس فهد جان ضايج واحس

ه كلش خبيث طيله الكعده عينه مفاركتنه اني وعمو بحيث حسسني بنضراته اني موزينه لو عندي علاقه مو حلوه ويه عمو..

ادهم : سيلين شفتي العرسان.

سيلين : اي.

ادهم : شتكولين مندمجين لو لا حسب معرفتج ..

سيلين : حسب معرفتي وخبرتي المستمده من علم حضرت الدكتور .

بعدني ممكمله ضحك..

سيلين : ههههه خليني اكمل تره العالم كلها عينها علينه تدري لو لا ..

ادهم : انه هسه اللي اشوفه انتي وبس القاعه كلها فارغه بالنسبه الي.

سيلين : يعني شنو ؟

ادهم : يعني ما يهمني احد مادام مامسوين شي غلط وانه وياج كاعدين نسولف حالنه حالهم لهذا بالي وياج لان كاعد نسولف هذا قصدي..

سيلين : هاا فهمت هسه نرجع للعرسان.

ادهم : اي انطيني رأييج بله...

سيلين : اكول بينهم اندماج بس قليل لان مبينه خطوبتهم تقليديه او واحد ما مامتعرف على الثاني يمكن لان البنيه غريبه لو شنو رأيك.

ادهم : لا البنيه بنت عمي والعريس ابن عمي يعني ولد عم بس ذوله الاثنين زواجهم انظلمو بيه نتيجه الاعراف والتقاليد ضيغم ويايه جان بالخارج وثنينه ساكنين بنفس العماره يحب وحده سوريه يموت عليها وملاك ما الها رغبه بضيغم ليش ما ادري بالرغم هو قليل يتواجد بالعراق بس ناس تكره ناس.

سيلين : ياااا لعد ليش تزوجو..

ادهم : سالفه طويله بعدين اسولفلج عنها .

سيلين : ماشي.

خلص العرس ورجعنه للبيت ومرت الايام طبيعيه واجه الدوام ، هاي السنه عجبني اخلي مكياج بس خفيف وجلبت بهاي الحمره مرات حتى بالبيت اخلي منها حسيتها تغير من شكلي وكمت اذا ما اخلي احس روحي مريضه ..

داومنه واغلب الاحيان احس عمو يتجنب يسولف ويايه مثل قبل من جنه نداوم كام على كد السؤال يجاوب وابد ميركز بوجهي من نسولف يشتت نضره منا ومنا اني مجان ابالي ليش هيج يتصرف لان ماعرفله طبع كمت انطي اعذار اكول احتمال راسه يوجعه او تعبان والخ ..

اجه الشته واشترينه ملابس شتويه بالشتاء مسموح نلبس تدرجات الجوزي والبني وحتى الاسود مو مثل الصيف يحددونه بألوان معينه للزي...

لبست بنطرون وياه بوت لونه جوزي لون الشوكولا وبلوز اسود وستره بني بيها طول وشال وحمرتي العزيزه هم منسيتها ..

شفت نفسي جدا جميله بعد ماعرف الناس هم هيج تشوفني لو لا ، طلعت من الغرفه وعمو طلع من المكتب شافي ضحك ..

سيلين: واخيرا شفنه ضحكتك صار اسبوع ضايج...

ادهم : لبسج كلش حلو..

سيلين: شكرا انت هم طالع حلو

ادهم : صح ..

الصح على شنو مادري احس باله مو ويايه طلعنه صعدنه بالسياره جان الجو مغيم وبيه ضباب كلش قوي وانفاسنه اعتلت شبابيك السياره وانعدمت الرؤيا علك تدفئة شويه صارت احسن..

ادهم : سيلين من يمج مسحي الجام بالكلينس.

سيلين : تمام.

مسحت الجام وكعدت وصلنه للكليه اخذت اول محاضره الثانيه اجه الاستاذ وكال ..

_ اليوم راح ياخذكم دكتور ادهم بمحاضره توعويه وارشاديه واني اعوضكم غير ايام ..

حجاها واخذ كتبه وطلع وره عشر دقايق اجه عمو فات سلم و وكف بمكانه المعتاد...

جان لابس قميص ابيض وليلك جوزي بنطرون كابوي ازرك وستره نيلي ولفاف جوزي..

حجه ويانه ونطه ارشادات بعدين بلش يسأل عن الالوان ومدى تأثيرها على حياتنه اليوميه..

ادهم : شنو الالوان المفضله عدكم..

كل واحد كال لونه المفضل رجعو سألوه وانت استاذ..

ادهم : احب الألون الي البني و اكثر لون يلامس قلبي وعقلي.

واحد من الطلاب جاوبه.

_ استاذ هذا اللون كئيب رغم اني منتبه عليك هواي تنسق من هذا اللون كلبس حلو لكن مو ناخذه لون مفضل.

ادهم : لوني المفضل وهسه اكلك ليش .

رجع سأل باقي الطلاب وصل يمي اني احب البني بس جاوبت غير جواب من وره الطلاب لان بكل شي يخلون انه.

سيلين : ماعندي لون محدد.

ابتسملي وهز راسه واندار موجه نضرته للطلاب..

ادهم : لغه الالوان تتعلق بالحالات النفسيه ولغة الجسد بصوره مباشره وذلك من خلال تأثرنا بالملابس اللي نلبسها واللي نشوفها على الاشخاص من حولنا الالوان اللي نختارها تعبر عن شخصيتنه ولكل شخص من عدنه يحب لون معين ويتأثر بيه خصوصا من الناحيه العاطفيه..

مثال الابيض يشير الى الطهاره والنقاوه عشاق هذا اللون يلبسوه علمود يعبرون عن داخلهم وعن شخصيتهم الحقيقيه اما اللون الاسود عشاقه يمتازون بالمزاج الحزين والمتخبط..

الابيض ينطي طابع صاحب الشخصيه يكون نقي لهذا اغلب العرائس ترتدي هذا اللون دلال على نقاء العروس وعفتها ،

الاسود يرمز الى سواد الليل الخوف القلق الفراغ الموت البرد ، لانه لون تقليدي يرمز للحزن في معظم بلدان العالم....

بس مننكر انو الاسود يعطي اناقه خاصه لمرتديه لهذا اغلب رجال وسيدات الاعمال يرتدون بدلات بلون اسود لانه يعتبروها اناقه خاصه بس همه ميعرفون بلبسهم هذا يبثون ذبذبات سلبيه على الحاضرين ..

كام طالب سأله..

_ زين استاذ اذا واحد يحب هذا اللون شلون شيسوي.

ادهم : ممكن يكسره بلون ثاني قميص او رباط فاتح واذا سيده ممكن حجاب واذا سافره ممكن قميص جوه الستره علمود يعيد التوازن في الطاقه الايجابيه..

رجع يشرح بالالوان...

اد

هم : الازرق يرمز للخير..

الاصفر تنوير وبذخ والعظمه لانه لون الشمس

اللي يلبس هذا اللون اعرفوه انسان مبدع بتفكيره وشخصيه متئلقه ودائما يكون متفائل .

الاحمر يشير للقوه وطاقه النار والاثاره.

اثبتت دراسات اللون الاحمر يرفع من ضغط الدم ويضاعف معدل التنفس لانه لون النار لهذا في المواقف الحساسه بين الرجال والمرأه يشعل في نفوسهم الاثاره والخطر

اللي يلبس هذا اللون يكون محب للحياه ومتحمس وشغوف ميال للحب والمغامره والاستمتاع في لفت الانظار..

رجال الاعمال يلبسون الرباط الاحمر علمود ينطون انطباع مثير للمقابل وحيويه وشغف اما النساء تلبس الاحمر حتى تبرز ثقتها بنفسها..

وعدد باقي الالوان وشرحها بكل حب ..اخر شي سألوه على اللون البني وتأثيره على المقابل..

ادهم :عشاق اللون البني مميزين جدا..

يكرهون الكذب والتلاعب بالمشاعر

يدرسون افعالهم بعنايه

قراراتهم مستنيره ينفقون المال فقط على الاشياء الضروريه..

يعتنون بالاشياء والاشخاص جيدا..

يحبون الدقه والنظافه والنظام

يفضلون الصمت والراحه الخاصه بهم..

هذا اللون يوصي به علماء النفس خصوصا للأشخاص اللي يعانون من درجه عاليه من القلق يحيطون انفسهم بهذا اللون

مثلا غرفه المعيشه ينصح استخدام هذا اللون بيها لان يبعث الاسترخاء والهدوء بالنفس خصوصا اذا جانت الارضيه بهذا اللون ،

المطابخ يفضل استخدام هذا اللون لان ينطي شعور بالشبع مجرد النظر لهاي الالوان وبالتالي يجنبنه الافراط بالطعام وبهيج راح نحافظ على لياقتنه البدنيه..

الالون الداكنه تقلل المساحه البصريه لهذا تنطي شعور بالدفئ ..

اما غرفه النوم يفضل استخدام تدرجات البني لان عند النظر اله يحسن من الدورة الدمويه والدفى ويحفز على النشاط بس الافضل نكسرها بلون الاحمر والخوخ بنسبه قليله ..

اما الوان الشوكولا تنطي قدره على التحمل البدني..

اما الوان القهوه تنشط عمل القلب وتخفض ضغط الدم وتسكن الجهاز العصبي لدى الانسان لان يساهم بالاسترخاء النفسي.

عشاق القهوه اكثر الناس محاربين ويحبون يوصلون لأهدافهم وفعلا همه الاسرع بالوصول للهدف اللي ابالهم ..

عشاق اللون البني لديهم السيطره على تصرفات الاخرين.

اللون البني مناسب للسهرات الرومانسيه او مقابله عمل..

لان يعطي للمقابل شعور بالثقه والاحترام وراحه غير متناهيه واكثر لون يأثر بالرجل حتى وان كان ميحبه

بس يأثر بيه ...

القهوه هيه المنبه الاول لاجتياز اي اختبار مجرد نشربها نصحصح ونكعد نقره ...

بكل بساطه اللون البني وتدرجاته جاي من الطبيعه اللي هيه عباره عن مجموعه متناغمه من النغمات البنيه ، مثلا الاوراق المتساقطه بالخريف تبعث البهجه بالنفس مجرد النظر اليها وتنطينه شعور بالدفئ الرمل لحاء الشجر التربه وحتى بعض الحيوانات يكون لونها بني..

لون الشوكولا والنبي والقهوه يدل على الحكمه والقدره على الحفاظ على العلاقه الزوجيه والاستقرار والاستدامه والتماسك ..

واهم شي ينطي شعور بالثقه لهذا اغلب الشركات التجاريه يتسخدمون اللون البني بتصميم المنشورات والاعلانات التجاريه بسبب التأثير البصري القوي لهذا اللون على المشاهد ...

وشكرا جزيلا..

_ شكرا استاذ باجر كلها بني .

_ هههههه استاذ باجر تدخل تلكه القاعه عباره عن كاكو هههه

_ استاذ باجر العلاقات والاعترافات دك..

_ اليوم ارجع لابويه اخليه يصبغ البيت واغير كل الاثاث واذا انطردت اجي انام بالصف.

وكل واحد حجه شكل هواي ضحكنه وهواي استفادينه خلصت المحاضره طلع وطلعت وراه جان سابقني بالخطوات سرعت خطوتي وصلت يمه حس بيه التفت .

ادهم : ها ماعندج محاضره

سيلين : جعت..

ادهم : انه هم كلشي ما ماكل.

سيلين : تعرف اني هم احب اللون البني ..

ادهم : ليش محجيتي من سألتج..

سيلين: لان اعرف راح يحجون اشياء تضوجني ولتنسه اليوم الوان ملابسنه بيها شبه.

ادهم : لاحظت.

سيلين : لهذا السبب صبغت غرفتي الوان بنيه وغيرت الاثاث.

ادهم : اي..

سيلين: صدك لون مريح وحبيته.

ادهم : اعرف.

نمشي ونحجي غرفته لونها بنيات وحتى المطبخ والاستقبال وحتى المكتب كله تدرجات هذا اللون،،

اتذكر عمه تكول اني وايمن نخابره يلا نشتري ونأثث.

يعني الالوان جانت ذوقه بس اختيار الموديل عمه..

صعدنه فوك رحنه لغرفته ..

اندار عليه وكال ..

ادهم : امشي ناكل بالنادي اختنكت هنا ..

سيلين : يلا

رحنه وكعدنه بمكان بعيد عن هوسه الطلاب وبلشت اسولف منطلقه وهو خال ايده جوه خده وصافن عليه ...

سيلين : عمو لو تشووف اليوم الاستاذ شلون صفنته...

ادهم : شلون ؟

سيلين : سألني عده اسئله عباله يفشلي كمت اني اسئله بنفس المنهج بحيث داخ تذكرتك من يكلي ليش تردين على سؤالي بسؤال انت هم جنت اكلك ليش ترد على سؤالي بسؤال تخيل العالم كامو يعانون مني ههههه شعلمتني متكلي..

ادهم : وشنو جانت الاسئله..

حجيت حجيت وهو صافن ومركز بوجهي..

سيلين : كملت .

ادهم : صح

سيلين: هو شنو كلت حتى صح..

ادهم : الحجيتيه صح..

سيلين : شلون عرفت صح وانت مدارس اثار

..

حجه بنبره هادئه .

ادهم : حتى وان كان خطأ مادام انتي حجيتيه فهو صح..

سيلين : عمو كافي تضحك بعقلي تره ازعل...

ادهم : مو مافهمت الشرح عيدي..

سيلين: حيل واعيد من جديد وهم تكلي مفهمت.

ادهم ؛ هنا المشكله ارجع اسرح..

سيلين : ههههه بالك وين ؟

ادهم : يم الكاكو...

سيلين : شنو ؟

ادهم : اريد حلاه ضغطي انخفض وحسيت بدوخه...

سيلين : اروح اجيبلك واجي..

ادهم : منتضرج..

رحت رجعت ملكيته وره شويه اجه يمشي ويمسح وجها بالكلينس.

سيلين : وين جنت ؟

ادهم: رحت غسلت وجيت اريد اصحصح نعسان..

اخر كلمه جرهاااا...

سيلين : هممم جبت جاي اشرب هسه تصحصح..

ادهم : جاي بدون ريوك..

سيلين : ناكل شي خفيف اليوم لا جبنه جبن ولا صمون نسينه..

ادهم : انه نسيت عقلي مو بمكانه هههه عذريني يعني..

سيلين : يلا نرجع لحديثنه.

شرب شويه من الجاي وكال.

ادهم : نرجع شعدنه كاعدين..

عدت الكلام وصافن عليه ومكتف ايده ومرتاج على الكرسي..

بعدين من اشرت بيدي رفع حاجبه وفتح عينه ابتسم بهدوء وكال..

ادهم : كملي..

سيلين : تره كملت..

الفصل الواحد والثلاثون من هنا 

شكرا لزيارتكم عالم روايات سكيرهوم